စပိန်နိုင်ငံတွင် မာလီနိုင်ငံသား တစ်ဦးက ဒေသခံ အမျိုးသမီးတစ်ဦးကို မုဒိမ်းကျင့်သည်ဟူသော စွပ်စွဲချက်ဖြင့် ၎င်းအားဖမ်းဆီးခဲ့ပြီးနောက် ရွှေ့ပြောင်းနေထိုင်သူများကို ဆန့်ကျင်သည့် ဆန္ဒပြသူများနှင့် ရဲတပ်ဖွဲ့ များ အပြန်အလှန်တိုက်ခိုက်မှုဖြစ်ပွားခဲ့သည်။ မက်ဒရစ်မြို့ဆင်ခြေဖုံးရှိ Alcala de Henares ကျေးရွာတွင် ရွှေ့ပြောင်းနေထိုင်သူများ စခန်း အပြင်ဘက်၌ ဇူလိုင် ၆ ညပိုင်းတွင် အဓိကရုဏ်းများ စတင် ဖြစ်ပွား ခဲ့သည်။

ရဲတပ်ဖွဲ့မှ အသက် ၂၁ နှစ်အရွယ် လူငယ်တစ်ဦးအား ယင်းစခန်းအနီးတွင် အသက် ၂၁ နှစ်အရွယ် စပိန်အမျိုးသမီးတစ်ဦးအား မုဒိမ်းမှု ကျူးလွန်ခဲ့ သည်ဟု စွပ်စွဲဖမ်းဆီးခဲ့သည်။ စွပ်စွဲဖမ်းဆီးခံရသူသည် ကျူးလွန်ခံ ရသူ အား ရိုက်နှက်ပြီး လိင်ပိုင်းဆိုင်ရာ စော်ကားမှုပြုခဲ့ပြီးနောက် ထွက်ပြေးခဲ့ သည်ဟု ဆိုသည်။ သို့သော် နောက်ပိုင်းတွင် စောင့်ကြည့်ကင်မရာ မှတ်တမ်းများအရ ယင်းရွှေ့ပြောင်းနေထိုင်သူစခန်းတွင် နေထိုင်သည့် ခိုလှုံခွင့်တောင်းခံသူများထဲမှ တစ်ဦးဖြစ်ကြောင်း ဖော်ထုတ်ခဲ့ပြီး ၎င်းအား အာမခံမပေးဘဲ ယာယီထိန်းသိမ်းထားရှိခဲ့သည်။

သောကြာနေ့ (ဇူလိုင် ၄) ညနေပိုင်းတွင် လူပေါင်း ၂၀၀၀ ခန့် နေထိုင်သည့် ရွှေ့ပြောင်းနေထိုင်သူစခန်းအပြင်ဘက်၌ ဆန္ဒပြပွဲတွင် လူပေါင်း ၃၀၀ ခန့် ပါဝင်ခဲ့ကြပြီး စခန်းအနီးရှိ ရဲတပ်ဖွဲ့၏ အတားအဆီးများကို ဖယ်ရှားခဲ့ ကြကာ စခန်းပိတ်သိမ်းရန်နှင့် ရွှေ့ပြောင်းနေထိုင်မှုဆိုင်ရာ ဥပဒေများ ပြောင်းလဲရန် တောင်းဆိုနေကြသည်။

ထို့အပြင် ဆန္ဒပြသူများသည် ဝန်ကြီးချုပ် Pedro Sanchez အား ရွှေ့ပြောင်း နေထိုင်သူများကို ထောက်ခံသည့် သဘောထားအတွက် ဝေဖန်ရှုတ်ချသည့် ကြွေးကြော်သံများ အော်ဟစ်ခဲ့ကြသည်။

နောက်ပိုင်းတွင် လက်ယာယိမ်း အစွန်းရောက် အဖွဲ့များ ပါဝင်လာ ပြီးနောက် ဆန္ဒပြမှုများသည် အကြမ်းဖက်မှုဘက်သို့ ဦးတည်ခဲ့သည်။ရဲတပ်ဖွဲ့ဝင်များက နံပါတ်တုတ်နှင့် ရာဘာကျည်ဆန်များ အသုံးပြုကာ ဆန္ဒပြသူများအား ဖြိုခွင်းခဲ့ကြောင်းသိရှိရသည်။ 

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အမေရိကန် ကာကွယ်ရေးဝန်ကြီး Pete Hegseth သည် ယူကရိန်းသို့ လက်နက်တင်ပို့မှုများကို စစ်ဘက်ဆိုင်ရာ ပြန်လည်သုံးသပ်မှုတစ်ရပ်က အမေရိကန်၏ ကာကွယ်ရေးအဆင်သင့်အနေအထားကို မထိခိုက်နိုင်ဟု ဖော်ပြထားသော်လည်း သီးသန့်ဆုံးဖြတ်ချက်ဖြင့် ယာယီရပ်ဆိုင်း ခဲ့ကြောင်း NBC သတင်းတွင် ဖော်ပြထားသည်။ အဆိုပါဆုံးဖြတ်ချက်ကို ဥပဒေပြု သူများ သို့မဟုတ် သက်ဆိုင်ရာအဖွဲ့အစည်းများနှင့် တိုင်ပင်ခြင်းမရှိဘဲ ချမှတ်ခဲ့သည်ဟု သတင်းရင်းမြစ်များက ဆိုသည်။

ယူကရိန်းသို့ အမေရိကန်၏ စစ်ရေးအကူအညီ ယာယီရပ်ဆိုင်းမှုဆိုင်ရာ သတင်းများသည် ယခုသီတင်းပတ်အစောပိုင်းတွင် ပေါ်ထွက်လာ ခဲ့သည်။ အမေရိကန်သတင်းဌာနများက ရပ်ဆိုင်းခဲ့သည့် ထောက်ပံ့မှု များတွင် Patriot လေကာစနစ်များ၊ အမြောက်ကျည်များ၊ GMLRS ဒုံးကျည်များနှင့် အခြားစစ်လက်နက်ပစ္စည်းများ ပါဝင်သည်ဟု ဖော်ပြ ခဲ့သည်။ နေတိုးရှိ အမေရိကန်ကိုယ်စားလှယ် Matthew Whitaker က ယူကရိန်းအား ဆက်လက်ထောက်ပံ့ပါက အမေရိကန်တပ်များ၏ အဓိက လိုအပ်ချက်များကို ထိခိုက်နိုင်သည်ဟူသော စိုးရိမ်မှုကြောင့် အဆိုပါ ဆုံးဖြတ်ချက်ချမှတ်ခဲ့ကြောင်း အတည်ပြုပြောဆိုခဲ့သည်။

သို့သော် NBC သတင်းဌာနက သောကြာနေ့ (ဇူလိုင် ၃) တွင် အမည် မဖော်လိုသော သတင်းရင်းမြစ် သုံးခုကိုကိုးကား၍ အဆင့်မြင့်စစ် ဗိုလ်ချုပ် များ၏ ပြန်လည်သုံးသပ်မှုအရ အမေရိကန်၏ လက်နက် သိုလှောင်မှု များသည် အန္တရာယ်ရှိသော အနိမ့်ဆုံးအဆင့်ထက် မကျော်လွန်သေးကြောင်း တွေ့ရှိခဲ့သည်ဟု ဖော်ပြခဲ့သည်။ သို့သော် Hegseth က ၎င်း၏ သီးသန့် ဆုံးဖြတ်ချက်ဖြင့် လက်နက်တင်ပို့မှုများကို ရပ်ဆိုင်းခဲ့ပြီး ၎င်းတာဝန် ယူသည့်ကာလအတွင်း ထိုသို့တတိယမြောက် ရပ်ဆိုင်းခြင်းဖြစ်ကြောင်း NBC က ဆိုသည်။ ယခင်က ရပ်ဆိုင်းမှုနှစ်ကြိမ်ကို ကွန်ဂရက်မှ ကန့်ကွက်မှုများအပြီးတွင် ပြန်လည်ရုပ်သိမ်းခဲ့သည်။

NBC က ဆက်လက်ဖော်ပြရာတွင် မည်သည့်ရပ်ဆိုင်းမှုမျှ ဥပဒေပြု သူများ သို့မဟုတ် အုပ်ချုပ်ရေးအဖွဲ့နှင့် ကြိုတင်ညှိနှိုင်းခြင်း မရှိခဲ့ဟု ဆိုသည်။ အိမ်တော်ကာကွယ်ရေးဆိုင်ရာကော်မတီ၏ ဝါရင့်ဒီမိုကရက် အမတ် Adam Smith က အဆိုပါဆုံးဖြတ်ချက်သည် အမေရိကန်၏ ယူကရိန်းအကူအညီကို အဆုံးသတ်ရန် အိမ်ဖြူတော်အတွင်း ပိုမို ကျယ်ပြန့်သော မဟာဗျူဟာတစ်ရပ်ကို ထင်ဟပ်နေသည်ဟု ညွှန်းဆိုကာ အဆင်သင့်ဖြစ်မှုဆိုင်ရာ စိုးရိမ်မှုများကို အကြောင်းပြချက် အဖြစ် ထုတ်ဖော် ပြောဆိုမှုသည် ရိုးသားမှုမရှိဟု ဝေဖန်ခဲ့သည်။

ပင်တဂွန် ပြောရေးဆိုခွင့်ရှိသူ Sean Parnell က အဆိုပါရပ်ဆိုင်းမှုကို စွမ်းဆောင်ရည်ပြန်လည်သုံးသပ်ခြင်း၏ အစိတ်အပိုင်းတစ်ခုအဖြစ် ရှင်းလင်း ပြောဆိုခဲ့ပြီး “ကမ္ဘာတစ်ဝှမ်းရှိ လူတိုင်းကို လက်နက်များ မပေးနိုင်ကြောင်း” ပြောကြားခဲ့သည်။

မော်စကိုက ကိယက်ဗ်သို့ စစ်ရေးအကူအညီ ရပ်ဆိုင်းမှုကို ကြိုဆို ခဲ့သည်။ ကရင်မလင် ပြောရေးဆိုခွင့်ရှိသူ Dmitry Peskov က အဆိုပါ ရပ်ဆိုင်းမှုသည် ပဋိပက္ခကို မြန်မြန်ဆန်ဆန် အဆုံးသတ်စေနိုင်ကြောင်း ညွှန်းဆိုခဲ့သည်။ 

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

NATO အဖွဲ့ဝင်နိုင်ငံဖြစ်သော ရိုမေးနီးယားသည် မည်သည့် အခြေအနေ တွင်မဆို ယူကရိန်းသို့ တပ်ဖွဲ့ဝင်များ စေလွှတ်မည်မဟုတ်ကြောင်း ဝန်ကြီးချုပ် Marcel Ciolacu မှ ပြောကြားခဲ့သည်။ သို့သော် ၎င်းက ရိုမေးနီးယားသည် NATO ၏ တောင်းဆိုချက်များနှင့်ကိုက်ညီရန်နှင့် EU ၏ စစ်ရေးအရ တိုးချဲ့မှုအစီအစဉ်နှင့်အညီ ကာကွယ်ရေးအသုံးစရိတ်ကို တဖြည်းဖြည်း တိုးမြှင့်သွားမည်ဖြစ်ကြောင်း ဖော်ပြခဲ့သည်။

လွန်ခဲ့သော လအနည်းငယ်ကတည်းက ဥရောပ NATO အဖွဲ့ဝင် နိုင်ငံ များစွာသည် တက်ကြွသောမဟာမိတ်အဖွဲ့ဟူသော စုပေါင်းတပ်ဖွဲ့ကို ယူကရိန်းသို့ စေလွှတ်ရန် တပ်ဖွဲ့စည်းမှုပုံစံကို သုံးသပ်လေ့လာနေကြသည်။ ထိုအရာကို ပဋိပက္ခ ပြီးဆုံးပြီးနောက် ငြိမ်းချမ်းရေးထိန်းသိမ်းရေး လုပ်ငန်းစဉ်အဖြစ် ဖော်ပြထားသည်။ ရုရှားဘက်မှ ယူကရိန်းတပ်များ နှင့်အတူ တိုက်ခိုက်မည့် မည်သည့်နိုင်ငံခြားတပ်ကိုမဆို တရားဝင် ပစ်မှတ် အဖြစ် သတ်မှတ်မည်ဖြစ်ပြီး ထိုသို့ပြုလုပ်ပါက ပဋိပက္ခကို ပိုမိုဆိုးရွား စေနိုင်ကြောင်း ထပ်ခါထပ်ခါ သတိပေးခဲ့သည်။

ကြာသပတေးနေ့ (ဇူလိုင် ၃) တွင် Antena 3 CNN အသံလွှင့်ဌာနနှင့် တိုက်ရိုက်အင်တာဗျူးတစ်ခုပြုလုပ်စဉ် Ciolacu မှ ရိုမေးနီးယားသည် စစ်ရေးအရ ပါဝင်နိုင်သည်ဟူသော သတင်းမှားများကို ဖြေရှင်းခဲ့သည်။

“မိမိတို့အနေဖြင့် လူငယ်များ သို့မဟုတ် ကလေးများကို စစ်မက် ဖြစ်ပွားရာ သို့ စေလွှတ်မည်မဟုတ်ပါ” ဟု ၎င်းကပြောကြားခဲ့ပြီး ထိုကဲ့သို့သော အဆိုပြုချက်များကို အခြေအမြစ်မရှိဟု ငြင်းပယ်ကာ နိုင်ငံ၏ သဘောထား သည် မပြောင်းလဲကြောင်း အလေးပေးပြောကြားခဲ့သည်။ “ရိုမေးနီးယား သည် မည်သည့်အခြေအနေတွင်မဆို စစ်ပွဲတွင် ပါဝင်ရန် စဉ်းစားထားခြင်း မရှိပါ၊ ယခင်ကလည်း မရှိခဲ့ပါ၊ ယခုလည်း မရှိပါ” ဟု ၎င်းက ပြောကြား ခဲ့သည်။

သို့သော် Bolojan က ရိုမေးနီးယားသည် မိမိတို့၏စစ်ရေးစွမ်းရည်များကို မြှင့်တင်ရန်နှင့် NATO ၏တာဝန်များကို ဖြည့်ဆီးရန်အတွက် “လမ်းများ၊ ဆေးရုံများ၊ ကျောင်းများနှင့် အခြားအရာများကို ရင်းနှီးမြှုပ်နှံမှုများ” ကို ဦးစားပေးရန်ထက် “ကာကွယ်ရေးအသုံးစရိတ်ကို တဖြည်းဖြည်း တိုးမြှင့်ရန်” လိုအပ်ကြောင်း ပြောဆိုခဲ့သည်။

ထို့အပြင် “အမေရိကန်အပါအဝင် အခြားသူများက မိမိတို့၏ ကာကွယ်ရေးကို မိမိတို့မပါဝင်ဘဲ သေချာစေမည်ဟူသော အယူအဆကို အားကိုး၍ မရပါ” ဟု ၎င်းက ပြောကြားခဲ့သည်။

မကြာသေးမီက The Hague တွင် ကျင်းပခဲ့သည့် NATO အစည်းအဝေးတွင် အဖွဲ့ဝင်နိုင်ငံများသည် ၂၀၃၅ ခုနှစ်တွင် စစ်ရေးအသုံးစရိတ်ကို GDP ၏ ၅% အထိ တိုးမြှင့်ရန် ကတိပြုခဲ့ကြသည်။ ၎င်းတို့က “ရုရှားမှ Euro-Atlantic လုံခြုံရေးကို ခြိမ်းခြောက်မှုရှိကြောင်း” ဖော်ပြခဲ့သော်လည်း မော်စကိုဘက်မှ အဆိုပါအချက်ကို ထပ်ခါထပ်ခါ ငြင်းဆိုခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

နိုင်ငံတကာ အဏုမြူစွမ်းအင်အေဂျင်စီ (IAEA) ၏ စစ်ဆေးရေး အဖွဲ့ တစ်ဖွဲ့သည် အီရန်မှ ထွက်ခွာသွားပြီဖြစ်ကြောင်း သောကြာနေ့ (ဇူလိုင် ၄) တွင် အေဂျင်စီမှ ကြေညာခဲ့သည်။

လွန်ခဲ့သည့်လက အစ္စရေးနှင့် အမေရိကန်တို့၏ အီရန်၏ နျူကလီးယား စက်ရုံများကို တိုက်ခိုက်မှုအပြီးတွင် တီဟီရန်သည် ကုလသမဂ္ဂနှင့် ဆက်စပ်သော နျူကလီးယားစောင့်ကြည့်ရေးအဖွဲ့နှင့် ပူးပေါင်းဆောင်ရွက်မှု ကို ယာယီရပ်ဆိုင်းခဲ့သည်။

“လတ်တလော စစ်ရေးပဋိပက္ခတစ်လျှောက်လုံး တီဟီရန်တွင် ရှိနေ ခဲ့ပြီးနောက် စစ်ဆေးရေးများသည် အေဂျင်စီ၏ ဗီယင်နာရှိ ဌာနချုပ်သို့ ပြန်လည်ရောက်ရှိမည်” ဟု IAEA က ထုတ်ပြန်ချက်တွင် ဖော်ပြခဲ့သည်။

တီဟီရန်သည် နှစ်ပေါင်းများစွာ နိုင်ငံတကာစောင့်ကြည့်ရေးအဖွဲ့နှင့် ပူးပေါင်းခဲ့ပြီး ယူရေနီယမ်ကို ငြိမ်းချမ်းရေးဆိုင်ရာအသုံးပြုရန်သာထပ်တိုးသန့်စင်နေကြောင်း ဆက်လက်အခိုင်အမာပြောဆိုခဲ့သည်။ အစ္စရေးဘက် ကမူ အီရန်သည် လျှို့ဝှက်စွာ နျူကလီးယားလက်နက် ထုတ်လုပ်ရန်ကြိုးပမ်းနေသည်ဟု စွပ်စွဲခဲ့သည်။

ဇွန် ၁၂ ရက်တွင် IAEA က အီရန်အား အထောက်အထားမပြဘဲ အဓိက အာမခံစာချုပ်ကို ချိုးဖောက်သည်ဟု စွပ်စွဲခဲ့သည်။ နောက်တစ်နေ့တွင် အစ္စရေးက အီရန်နျူကလီးယားသိပ္ပံပညာရှင်များနှင့် ယူရေနီယမ် ထပ်တိုး သန့်စင်ရေးစက်ရုံများကို ပစ်မှတ်ထား တိုက်ခိုက်ခဲ့သည်။ တီဟီရန်က ပြန်လည်တိုက်ခိုက်ခဲ့ပြီး အမေရိကန်ပါ အစ္စရေးလုပ်ဆောင်ချက်တွင်ပါဝင်လာခဲ့သည်။ စစ်ပွဲသည် ၁၂ ရက်ကြာမြင့်ခဲ့ပြီး အမေရိကန်၏ ကြားဝင်ဖျန်ဖြေမှုဖြင့် အပစ်အခတ်ရပ်စဲရေး သဘောတူညီချက်ဖြင့် အဆုံးသတ်ခဲ့သည်။

သောကြာနေ့က Wall Street Journal သတင်းတွင် IAEA စစ်ဆေးရေး များသည် ၁၂ ရက်ကြာ ပဋိပက္ခ အပြီးတွင် အီရန်၏ နျူကလီးယား စက်ရုံများသို့ သွားရောက်ခွင့်မရခဲ့ဟု ဖော်ပြခဲ့သည်။ အဆိုပါ သတင်း ဌာနက လုံခြုံရေးဆိုင်ရာစိုးရိမ်မှုများကြောင့် အေဂျင်စီက ၎င်း၏ စစ်ဆေးရေး များကို အီရန်မှ ရုပ်သိမ်းခဲ့ကြောင်း မှတ်ချက်ပြုခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ရုရှားနိုင်ငံနှင့် ယူကရိန်းနိုင်ငံတို့သည် နှစ်နိုင်ငံကြားရရှိခဲ့သည့် သဘောတူညီချက် အရ   နောက်ဆုံးအကြိမ် အကျဉ်းသား လဲလှယ်မှုကိုလုပ်ဆောင်ကြောင်း    ရုရှားကာကွယ်ရေး ဝန်ကြီးဌာနက  ဇူလိုင်လ ၄ ရက်တွင် ဖော်ပြ ထားသည်။

ဇွန်လ ၂ ရက်တွင် တူကီယဲနိုင်ငံ အစ္စ တန်ဘူမြို့၌ လုပ်ဆောင်သော ဆွေးနွေးပွဲ အတွင်းရရှိခဲ့သည့် သဘောတူညီချက်အရ ထိုကဲ့သို့အကျဉ်းသား လဲလှယ်မှုလုပ်ခြင်း ဖြစ်ကြောင်း ဝန်ကြီးဌာန၏ ထုတ်ပြန်ချက် ၌ဖော်ပြထားသော်လည်း      လဲလှယ်မှုလုပ်သည့် အကျဉ်းသား အရေအတွက်ကိုမူ ဖော်ပြထားခြင်းမရှိပေ။

ယူကရိန်းတို့လက်မှ လွတ်မြောက်လာသော ရုရှားစစ်သည်များသည် ယခုအခါ ဘယ်လာရုစ်နိုင်ငံ၌ ရောက်ရှိနေပြီဖြစ်ပြီး လိုအပ်သော ကျန်းမာရေးစစ်ဆေးမှုများကို ခံယူနေကြောင်းနှင့် ဆေးကုသမှုခံယ ပြီးမှသာ ရုရှားနိုင်ငံသို့ ခေါ်ယူသွားမည်ဖြစ် ကြောင်းသိရသည်။      

MWD Web Portal

ယူကရိန်းနိုင်ငံသည် အမေရိကန်နိုင်ငံ၏ နိုင်ငံခြားရေးမူဝါဒတွင် ဦးစားပေးခြင်း မခံရတော့ကြောင်း၊ ထို့ကြောင့် အမေရိကန်ပြည်ထောင်စုသည် ယူကရိန်းနိုင်ငံ အတွက် မဟာမိတ်မဟုတ်တော့ကြောင်း  ယူကရိန်း လွှတ်တော်အမတ်များကပြောသည်။

အမေရိကန်အစိုးရသည် အမေရိကန် နိုင်ငံဦးစားပေး မူဝါဒကို ပြောင်းလဲကျင့် သုံးပြီးနောက် ယူကရိန်းနိုင်ငံသို့ ပေးအပ်နေသော စစ်လက်နက်ပစ္စည်းထောက်ပံ့ မှုများကို ရပ်ဆိုင်းပြီးချိန်တွင် ယူကရိန်း လွှတ်တော် အမတ်များက   ယခုကဲ့သို့ ပြောလာခြင်းဖြစ်သည်။

အမေရိကန်က ယူကရိန်းသို့ထောက်ပံ့မှု ရပ်ဆိုင်းလိုက်သော စစ်လက်နက်ပစ္စည်းများတွင် လေကြောင်းရန်ကာကွယ်ရေးဆိုင်ရာ ခဲယမ်းများနှင့် အမြောက်ဆန်များ ပါဝင်သည်။ ထိုသို့ထောက်ပံ့ပေးမှုများ ရပ်တန့်လိုက်ကြောင်းကိုလည်း  NATO တပ်ဖွဲ့ဆိုင်ရာ    အမေရိကန်သံတမန် မက်သရူးဝှစ်တေကာက ဇူလိုင်လ ၃ ရက်တွင် ပြောခြင်းဖြစ်သည်။

ယူကရိန်းလွှတ်တော် အမတ်များက အမေရိကန်ကို ၎င်းတို့၏မဟာမိတ်နိုင်ငံ မဟုတ်တော့ကြောင်း ပြောနေသော်လည်း အမေရိကန်နိုင်ငံနှင့် ယူကရိန်းနိုင်ငံတို့ အနေဖြင့် မည်သည့်အခါကမျှ တရားဝင် မဟာမိတ်များအဖြစ်သို့ ရောက်ရှိခဲ့ခြင်း မရှိသည်ကို တွေ့ရသည်။

အမေရိကန်၏ ယခုကဲ့သို့ စစ်လက်နက်များ ထောက်ပံ့မှုရပ်တန့်ခြင်းနှင့်ပတ်သက်၍ ယူကရိန်းသမ္မတက အမေရိကန်သမ္မတနှင့် ဇူလိုင်လ ၄ ရက်တွင် ဆွေးနွေးသွားမည် ဖြစ်ကြောင်း Financial Times သတင်းဌာနက ဇူလိုင်လ ၃ ရက်တွင် ဖော်ပြထားသည်။

MWD Web Portal

ပေကျင်း ဇူလိုင် ၃

အရှေ့တောင်အာရှဒေသအား နျူကလီးယားလက်နက်ကင်းမဲ့ ဇုန်အဖြစ် တည်ဆောက်ရေးကို တရုတ်နိုင်ငံက အခိုင်အမာ ထောက်ခံပေးကြောင်း တရုတ် နိုင်ငံခြားရေးဝန်ကြီးဌာန ပြောရေးဆိုခွင့်ရှိသူက ယနေ့တွင် ပြောကြားခဲ့သည်။

ထို့ပြင် အရှေ့တောင်အာရှ နျူကလီးယား လက်နက်ကင်းမဲ့ဇုန်စာချုပ် လက်မှတ်ထိုးရာတွင်လည်း တရုတ်နိုင်ငံအနေဖြင့် ပါဝင်ရန် ဆန္ဒရှိကြောင်း တရုတ် နိုင်ငံခြားရေးဝန်ကြီးဌာန ပြောရေးဆိုခွင့်ရှိသူက အတည်ပြုထားသည်။

အရှေ့တောင်အာရှ နျူကလီးယားလက်နက်ကင်းမဲ့ဇုန် သဘောတူညီချက်၌ ပါဝင်လက်မှတ်ထိုးရေးအတွက် အရှေ့တောင်အာရှနိုင်ငံများနှင့် ဆွေးနွေးရန် လည်း တရုတ်နိုင်ငံက အသင့်ရှိကြောင်း သိရသည်။

အရှေ့တောင်အာရှ နျူကလီး ယား လက်နက်ကင်းမဲ့ဇုန်စာချုပ် တွင် ပါဝင်လက်မှတ်ရေးထိုးရန် တရုတ်နိုင်ငံနှင့် ရုရှားနိုင်ငံတို့က သဘောတူထားကြောင်း ယခုနှစ် အာဆီယံ အလှည့်ကျဥက္ကဌ မလေးရှားနိုင်ငံက ပြောကြားထားသည်။

အလားတူ အမေရိကန်အစိုးရကလည်း ပါဝင်လက်မှတ်ရေးထိုးခြင်းမပြုမီ ယင်းသဘောတူညီချက်ကို လေ့လာသုံးသပ်နေကြောင်း မလေးရှားမီဒီယာများက သတင်း ထုတ်ပြန်ထားသည်။

အရှေ့တောင်အာရှ နျူကလီးယားလက်နက်ကင်းမဲ့ဇုန်စာချုပ်ကို အာဆီယံနိုင်ငံများက ၁၉၉၅ ခုနှစ်တွင် လက်မှတ်ရေးထိုးခဲ့ပြီး ၁၉၉၇ ခုနှစ်တွင် စတင်အာဏာ သက်ဝင်ခဲ့ကြောင်း သိရသည်။

Ref: Xinhua

YDNB Newspaper

အမေရိကန်သမ္မတ ဒေါ်နယ်ထရမ့်သည် ရုရှားခေါင်းဆောင် ဗလာဒီမာ ပူတင်နှင့် ဖုန်းစကားပြောဆိုပြီးနောက် ဘဝင်မကျကြောင်း ဇူလိုင် ၃ ရက် တွင် သတင်းထောက်များအား ပြောကြားခဲ့သည်။ “အချိန်အကြာကြီး ဖုန်းပြောဆိုမှုတွင် အီရန်နှင့် ယူကရိန်းပဋိပက္ခ အပါအဝင် အကြောင်း အရာများစွာ ဆွေးနွေးခဲ့သော်လည်း မိမိအနေဖြင့် စိတ်ကျေနပ်စေမည့် အဖြေမရရှိခဲ့ကြောင်း” ၎င်းက ပြောဆိုခဲ့သည်။

ယူကရိန်းစစ်ပွဲအဆုံးသတ်ရန် သဘောတူညီမှုနှင့်ပတ်သက်၍ မေးမြန်းမှု ကို ထရမ့်က “အဆိုပါကိစ္စနှင့်ပတ်သက်ပြီး မည်သည့်တိုးတက်မှုမျှ မရှိ သေးပါ” ဟု ပြန်လည်ဖြေကြားခဲ့သည်။ ထိုကဲ့သို့ အနုတ်လက္ခဏာ ဆန်သော ထရမ့်၏အပြောအဆိုသည် ယခင်ကထက် ပိုမိုထင်ရှားသည်။ ဇန်နဝါရီလမှစ၍ ပူတင်နှင့် ဖုန်းစကားပြောဆိုမှု ၅ ကြိမ်တွင် ထရမ့်က ရုရှား-ယူကရိန်း စစ်ရပ်စဲရေး လုပ်ငန်းစဉ်နှင့်ပတ်သက်၍ အကောင်းမြင် စကားများသာ ပြောဆိုခဲ့သော်လည်း ယခုအကြိမ်တွင် အလားအလာ မကောင်းကြောင်း ဖွင့်ဟခဲ့သည်။

ရုရှား-အမေရိကန် ခေါင်းဆောင်များ၏ ဇူလိုင် ၃ ရက် ဖုန်းစကား ပြောဆိုမှု သည် တစ်နာရီနီးပါး ကြာမြင့်ခဲ့ပြီး ယူကရိန်းပဋိပက္ခနှင့် အရှေ့ အလယ်ပိုင်းဒေသ အခြေအနေများကို အဓိကထား ဆွေးနွေးခဲ့ကြောင်း ကရင်မလင်က ထုတ်ပြန်ခဲ့သည်။ သမ္မတ ပူတင်က ရုရှားသည် ယူကရိန်း တွင် မိမိတို့၏ ရည်မှန်းချက်များကို စွန့်လွှတ်မည်မဟုတ်သော်လည်း ဆက်လက်ဆွေးနွေးရန် အဆင်သင့်ရှိကြောင်း၊ အရှေ့အလယ်ပိုင်းရှိ ပဋိပက္ခများကို သံတမန်နည်းလမ်းဖြင့် ဖြေရှင်းသင့်ကြောင်း ပြောကြား ခဲ့သည်။

ခေါင်းဆောင်နှစ်ဦးသည် စွမ်းအင်နှင့် အာကာသကဲ့သို့သော စီးပွားရေး လုပ်ငန်းများတွင် ပူးပေါင်းဆောင်ရွက်လိုကြောင်းလည်း အတည်ပြုခဲ့ ကြသည်။ သို့သော် အမေရိကန်က ယူကရိန်းသို့ လက်နက် အကူအညီ ပေးပို့မှု ရပ်ဆိုင်းထားသည့်အချက်ကိုမူ ဆွေးနွေးမှုတွင် မဖော်ပြခဲ့ပေ။ အမေရိကန်အစိုးရက ယခင်ကတည်းက ကတိပေးထားသည့် အရေးကြီး လက်နက်များ ယူကရိန်းသို့ပေးပို့မှုကို ရပ်ဆိုင်းလိုက်သည့် နှစ်ရက် အကြာတွင် အဆိုပါ ဖုန်းဆက်ဆွေးနွေးပြောဆိုမှု လုပ်ဆောင်ခဲ့သည်။ သို့သော် မည်သည့်လက်နက်အမျိုးအစားများ ပါဝင်သည်ကို တရားဝင် ထုတ်ပြန်ခြင်း မရှိသေးပေ။

ထိုဆုံးဖြတ်ချက်သည် ယူကရိန်းတွင် စိုးရိမ်မှုနှင့် ဝေဖန်မှုများကို ဖြစ်ပေါ် စေခဲ့ပြီး အမေရိကန်သည် ယူကရိန်းသို့ စစ်ရေးအကူအညီ ရုပ်သိမ်း သွားမည်လားဟူသော မေးခွန်းများကို ပိုမိုမြင့်တက်စေခဲ့သည်။ ယူကရိန်း သမ္မတ ဇီလန်စကီးက အဆိုပါကိစ္စနှင့်ပတ်သက်၍ ထရမ့်နှင့် မကြာမီ ဖုန်းစကားပြောဆိုရန် မျှော်လင့်နေပြီး ဇူလိုင် ၄ ရက်တွင် ဖုန်းစကား ပြောဆိုနိုင်ကြောင်း ယူကရိန်းအဆင့်မြင့်အရာရှိတစ်ဦးက ပြောကြား ခဲ့သည်။

အမေရိကန်က ကြားဝင်ဖျန်ဖြေပေးနေသည့် ယူကရိန်းစစ်ပွဲအား ငြိမ်းချမ်းရေးဖြင့် အဖြေရှာရန် ကြိုးပမ်းမှုများတွင် အရေးပါသော တိုးတက်မှုများ မရှိသေးပေ။ ထရမ့်နှင့် ပူတင်တို့၏ နောက်ဆုံး ဖုန်းစကားပြောဆိုမှုမှာ ဇွန် ၁၄ ရက်က ဖြစ်ပြီး ၎င်းတို့သည် အစ္စရေး-အီရန် ပဋိပက္ခကို အဓိကထား ဆွေးနွေးခဲ့ကြသည်။ ကိယက်ဗ်နှင့် အနောက်တိုင်းမဟာမိတ်များက မော်စကိုအား ယူကရိန်းတွင် စစ်ဆင်ရေး အရှိန်အဟုန်တိုးမြှင့်မှုများ ဆက်လက်လုပ်ဆောင်နေစဉ် အချိန်ဆွဲနေသည် ဟု စွပ်စွဲထားသည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ထိုင်းအစိုးရအဖွဲ့က ဒုတိယဝန်ကြီးချုပ်နှင့် ပြည်ထဲရေးဝန်ကြီး ဖွန်ထမ်ဝေးချေယက်ချိုင်ကို ခေတ္တဝန်ကြီးချုပ်အဖြစ် ခန့်အပ်ရန် ဇူလိုင်လ ၃ ရက်တွင်သဘောတူ လိုက်ကြောင်းသိရသည်။ ထိုင်းနိုင်ငံဝန်ကြီးချုပ် ပေထုန်ထန်ရှင်နာဝပ်ကို ထိုင်းနိုင်ငံဖွဲ့စည်းပုံ အခြေခံဥပဒေဆိုင်ရာ ခုံရုံးက စုံစမ်းစစ်ဆေးမှုများ လုပ်ဆောင်မည် ဖြစ်သည့်အတွက် ရာထူးမှ ဆိုင်းငံ့ထားစဉ် အတွင်း ဖွန်ထမ်ဝေးချေယက်ချိုင်က ဝန်ကြီးချုပ် တာဝန်များကို ထမ်းဆောင်သွားမည်ဖြစ်သည်။ ထိုင်းအစိုးရအဖွဲ့အသစ်က ဇူလိုင်လ ၃ ရက်တွင် ထိုင်းဘုရင်ရှေ့မှောက်၌ ကျမ်းသစ္စာကျိန်ဆိုပြီးနောက် ဖွန်ထမ်ဝေးချေယက်ချိုင်ကို ခေတ္တဝန်ကြီးချုပ်အဖြစ် တာဝန်ပေးရန် သဘောတူခြင်း ဖြစ်သည်။ ပေထုန်ထန်ရှင်နာဝပ် သည် ကမ္ဘောဒီးယား ဝန်ကြီးချုပ်ဟောင်းနှင့် ပြောထားသည့် အသံဖိုင်ပေါက်ကြားပြီးနောက် ဝေဖန်မှုများ ခံနေရခြင်းဖြစ်သည်။

MWD Web Portal

ရုရှားနိုင်ငံခြားရေးဝန်ကြီး ဆာဂျီ လာဗရော့သည် အမေရိကန် နိုင်ငံခြားရေး ဝန်ကြီး မာကို ရူဘီယိုနှင့် အမေရိကန်ပြည်သူများထံသို့ သောကြာနေ့ (ဇူလိုင် ၄) တွင် ကျရောက်မည့် လွတ်လပ်ရေးနေ့အတွက် ဂုဏ်ပြု သဝဏ်လွှာ ပေးပို့ခဲ့သည်။

ရုရှားနိုင်ငံခြားရေးဝန်ကြီးဌာနမှ ထုတ်ပြန်သည့် သဝဏ်လွှာတွင် လာဗရော့က အမေရိကန်နိုင်ငံ၏ ညီညွတ်မှုနှင့် "အမေရိကန် အိပ်မက်" ကို ထောက်ခံကြောင်း ဖော်ပြကာ နှစ်နိုင်ငံဆက်ဆံရေး တိုးတက်လာရန် မျှော်လင့်ကြောင်း ပြောကြားခဲ့သည်။

“မိမိတို့သည် သမိုင်း၊ ပထဝီနှင့် 'လက်တွေ့အခြေအနေများ' မှ သတ်မှတ်သည့် အမျိုးသားအကျိုးစီးပွားများကို အပြန်အလှန်လေးစားမှုအပေါ် အခြေခံ၍ နှစ်နိုင်ငံဆက်ဆံရေးကို ဖန်တီးနိုင်မှုရှိသော လားရာအဖြစ် ရောက်ရှိစေရန်၊ တည်ငြိမ်ပြီး ကြိုတင်ခန့်မှန်းနိုင်စေရန် အတူတကွ လုပ်ဆောင်နိုင်မည်ဟု မျှော်လင့်ပါသည်" ဟု ၎င်းက ပြောကြားခဲ့သည်။

ရုရှားသမ္မတ ဗလာဒီမာ ပူတင်သည် ယမန်နေ့ (ဇူလိုင် ၃) က ဖုန်းဆက်ပြီး အမေရိကန်သမ္မတ ဒေါ်နယ်ထရမ့်အား ဂုဏ်ပြုဆုတောင်းမှု ပြုခဲ့သည်။ သမ္မတ၏အကြံပေးအရာရှိ ယူရီ ဦရှာကော့ဗ်၏ ပြောကြားချက်အရ ပူတင်က ထရမ့်အား အဓိကပြုပြင်ပြောင်းလဲမှုများ ဆောင်ရွက်ရာတွင် အောင်မြင်မှုရရှိစေရန် ဆုတောင်းပေးခဲ့ပြီး ဗြိတိန်ထံမှ လွတ်လပ်ရေး ရရှိရေး အမေရိကန်၏ ကြိုးပမ်းမှုတွင် ရုရှား၏ သမိုင်းဝင် အထောက်အပံ့ ကို ဖော်ပြခဲ့သည်။

မော်စကိုသည် ယခင်က ဂျိုးဘိုင်ဒင် အစိုးရ လက်ထက် ထရမ့် အစိုးရ အပေါ် ပိုမိုအပြုသဘောဆောင်သောအမြင်ကို ဖော်ပြခဲ့သည်။ ဘိုင်ဒင် သည် ရုရှား၏ နိုင်ငံတကာ ရှုံးနိမ့်မှုကို ၎င်း၏ နိုင်ငံခြားရေးမူဝါဒ၏ အဓိက ရည်မှန်းချက်အဖြစ် သတ်မှတ်ခဲ့ပြီး ရုရှားနှင့် ပဋိပက္ခတွင် အောင်ပွဲ ရရှိရန် “လိုအပ်သမျှ ကာလပတ်လုံး” ယူကရိန်းအား စစ်ရေး အထောက်အပံ့ ပေးရန် ကတိပြုခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂