စီးပွားရေးလုပ်ငန်းရှင် ဘီလီယံနာ သူဌေးကြီး အီလွန်မက်က အမေရိကန် ဒုတိယသမ္မတ JD Vance သည် နောင်တချိန်တွင် အမေရိကန်သမ္မတ ဖြစ်လာနိုင်ကြောင်း ၎င်း၏ ထင်မြင်ယူဆချက်ကို ပြောကြားလိုက် ပါသည်။

အမေရိကန် ဒုတိယသမ္မတများအနက် JD Vance သည် အတော်ဆုံး ဒုတိယသမ္မတဖြစ်ပြီး အနာဂတ်အမေရိကန်၏ သမ္မတ ဖြစ်လာနိုင်သည် ဟု အီလွန်မက်က ၎င်း၏ X စာမျက်နှာတွင် မှတ်ချက်ပေးထားပါသည်။

အမေရိကန်သမ္မတ ဒေါ်နယ်ထရမ့်ကို ထောက်ခံသူအချို့သည် ထရမ့် အား နောက်ထပ်တစ်ကြိမ် တာဝန်ထမ်းဆောင်နိုင်ရန် အမေရိကန် ပြည်ထောင်စုဖွဲ့စည်းပုံအခြေခံဥပဒေကို ပြင်ဆင်နိုင်ရေးအတွက် လေ့လာ နေကြသည်ဟု NBC သတင်းဌာနက ယခင်က ဖော်ပြခဲ့ပါသည်။

၁၉၅၁ ခုနှစ်တွင် ဖွဲ့စည်းပုံအခြေခံဥပဒေကို ၂၂ ကြိမ်မြောက် ပြင်ဆင် ချက်အရ သမ္မတတစ်ဦးသည် သမ္မတရာထူးကို အများဆုံး သက်တမ်း ၂ ကြိမ် (၈ နှစ်) ဆောင်ရွက်ခွင့်ရှိပါသည်။ 

ယခုနှစ် ဇန်နဝါရီက ရီပတ်ဘလစ်ကန် အမတ် Andy Ogles က သမ္မတ သက်တမ်းကို အများဆုံး ၈ နှစ်မှ ၁၂ နှစ်သို့ တိုးမြှင့်ရန် အဆိုပြုချက် တင်ပြခဲ့ပါသည်။

ကိုးကား- TASS

ရုရှားနိုင်ငံ၏ လုံခြုံရေးကောင်စီအတွင်းရေးမှူး ဆာဂေးရှိုးဂူသည် ဖေဖော်ဝါရီလ ၂၈ ရက်နေ့တွင် အင်ဒိုနီးရှားနှင့် မလေးရှားနိုင်ငံများသို့ လုပ်ငန်းခရီးစဉ်များ ပြီးဆုံးပြီးနောက် တရုတ်ပြည်သူ့သမ္မတနိုင်ငံသို့ ရောက်ရှိခဲ့ပါသည်။

ရုရှားနိုင်ငံ၏ လုံခြုံရေးကောင်စီအတွင်းရေးမှူး ဆာဂေးရှိုးဂူသည် ဤခရီးစဉ်၏ ရည်ရွယ်ချက်ဖြစ်သည့် တရုတ်နိုင်ငံ၏ သမ္မတ ရှီကျင့်ဖျင် နှင့် နိုင်ငံခြားရေးဝန်ကြီး ဝမ်ယိတို့နှင့် တွေ့ဆုံဆွေးနွေးရန်ဖြစ်ပါသည်။

တရုတ်နိုင်ငံခြားရေးဝန်ကြီး ဝမ်ယိနှင့် တွေ့ဆုံပွဲအစတွင် ရုရှားလုံခြုံရေးကောင်စီ အတွင်းရေးမှူး က “မိမိသည် ရုရှားသမ္မတ ဗလာဒီမာပူတင်က ပေးအပ်သော တာဝန်အရ ဤခရီးစဉ် ကို လာရောက်ခြင်းဖြစ်ကြောင်း၊ သမ္မတပူတင်နှင့် ရှီကျင့်ဖျင်တို့ ဖေဖော်ဝါရီ ၂၄ ရက်နေ့က ဖုန်းစကားပြောဆိုမှုများ ပြီးနောက် ဤခရီးစဉ်ကို စီစဉ်ခဲ့ခြင်းဖြစ်ကြောင်း” ပြောကြားခဲ့ပါသည်။ ထို့အပြင် အဆိုပါ တွေ့ဆုံပွဲ ကို ယခုလိုအမြန်ဆုံး စီစဉ်နိုင်ခြင်းသည် နှစ်နိုင်ငံကြား ဆက်ဆံရေး၏ အထူးသဘောသဘာဝကို ပြသသည်ဟု လုံခြုံရေးကောင်စီ အတွင်းရေးမှူး ဆာဂေးရှိုးဂူက ထည့်သွင်း ပြောကြားခဲ့ပါသည်။

လုံခြုံရေးကောင်စီအတွင်းရေးမှူး ဆာဂေးရှိုးဂူက ရုရှားနှင့် တရုတ်နိုင်ငံ တို့သည် နိုင်ငံတကာနှင့် ဒေသတွင်း ပြဿနာများတွင် တူညီသော ချဉ်းကပ်မှုများ ရှိကြောင်း၊ နှစ်နိုင်ငံသည် ကုလသမဂ္ဂ၊ လုံခြုံရေးကောင်စီ၊ G20၊ APEC စသည့် အဖွဲ့အစည်းများတွင် ပူးပေါင်းဆောင်ရွက်လျက် ရှိကြောင်း ပြောကြားခဲ့ပါသည်။ ထို့အပြင် ယခင်နှစ်က ရုရှား၏ BRICS ဥက္ကဋ္ဌအဖြစ် ထမ်းဆောင်စဉ် တရုတ်နိုင်ငံက ပံ့ပိုးကူညီမှုအတွက် ကျေးဇူး တင်ကြောင်း၊ ရုရှားဘက်မှလည်း တရုတ်မိတ်ဖက်များအား ၎င်းတို့၏ လုပ်ငန်းများတွင် ပံ့ပိုးကူညီသွားမည်ဖြစ်ကြောင်း လုံခြုံရေး ကောင်စီ အတွင်းရေးမှူး ဆာဂေးရှိုးဂူက ပြောကြားခဲ့ပါသည်။

အဆိုပါ ခရီးစဉ်သည် ရုရှားနှင့် တရုတ်နိုင်ငံတို့ကြား မဟာဗျူဟာ မိတ်ဖက်ဆက်ဆံရေး၏ အရေးပါမှုကို ထင်ဟပ်စေပြီး နိုင်ငံတကာ ပြည်သူ့အဆင့်တွင် ပူးပေါင်းဆောင်ရွက်မှုများ ပိုမိုခိုင်မာလာစေရန် ရည်ရွယ်ချက်ဖြင့် ဆောင်ရွက်လျက်ရှိကြောင်း ဖော်ပြနေပါသည်။

ကိုးကား - security council of Russia

ရုရှားနှင့် အမေရိကန်တို့ကြား သံရုံးပြန်လည်ဖွင့်လှစ် လည်ပတ်ရေးနှင့် စပ်လျဉ်း၍ နှစ်နိုင်ငံစလုံးမှ သံတမန်များက ဖေဖော်ဝါရီလ ၂၇ ရက်တွင် တူကီယဲနိုင်ငံ အစ္စတန်ဘူမြို့ရှိ အမေရိကန်ကောင်စစ်ဝန်ချုပ်ရုံး၌ တွေ့ဆုံဆွေးနွေးခဲ့ကြောင်း သိရသည်။

ယခုစတင်ကျင်းပသည့် တွေ့ဆုံဆွေးနွေးပွဲသည် အမေရိကန်သမ္မတ ဒေါ်နယ်ထရမ့်နှင့် ရုရှားသမ္မတ ဗလာဒီမာပူတင်တို့ကြား ပြုလုပ်သည့် ဖုန်းမှတစ်ဆင့်ပြောဆို ဆွေးနွေးမှုအတွင်း သဘောတူညီချက်  ချမှတ်ခဲ့ပြီးနောက် ထွက်ပေါ်လာခြင်းဖြစ်သည်။

နှစ်နိုင်ငံသံရုံးများ  ပြန်လည်ဖွင့်လှစ်နိုင်ရေးနှင့် စပ်လျဉ်း၍ ရုရှားနှင့် အမေရိကန်နိုင်ငံတို့မှ အရာရှိများက ယခင်အမေရိကန် အစိုးရလက်ထက်  လုပ်ဆောင်ခဲ့သည့်တရားမဝင် လုပ်ဆောင်မှုများကြောင့်ဖြစ်ပွားခဲ့ရသည့် နည်းပညာဆိုင်ရာ အခက်အခဲများကို ဖြေရှင်းနိုင်ရန်အတွက် အစ္စတန်ဘူမြို့တွင် တွေ့ဆုံဆွေးနွေးခဲ့သည်ဟု အန်ကာရာမြို့ရှိ အမေရိကန်သံရုံးမှ အရာရှိ တစ်ဦးက အတည်ပြုထားသည်။

အဆိုပါတွေ့ဆုံမှုသည် ၆ နာရီကျော်ကြာမြင့်ခဲ့ပြီး ဒေသစံတော်ချိန် ညနေ ၄ နာရီ ၂၀ မိနစ်တွင် ပြီးဆုံးခဲ့ကြောင်း သိရသည်။

အဆိုပါတွေ့ဆုံ ဆွေးနွေးပွဲသည် နှစ်နိုင်ငံသံတမန် ဆက်ဆံရေးကို ထိရောက်စွာနှင့် လျင်မြန်စွာဖြင့် ရှေ့သို့တက်လှမ်းနိုင်စေရေး လမ်းဖွင့်ပေးနိုင်မည်ဟူသော မျှော်လင့်ချက်များကို ထွက်ပေါ်လာစေခဲ့ကြောင်း သိရသည်။

ရုရှားနှင့် အမေရိကန်နိုင်ငံတို့သည် လက်ရှိတွင် သက်ဆိုင်ရာ သံအမတ်များကို အမြန်ဆုံးခန့်အပ် တာဝန်ပေးရန်စီစဉ်လျက် ရှိကြောင်း သိရသည်။ 

Source: Myawady Web Portal

ရုရှားသမ္မတ ဗလာဒီမာပူတင်သည် မြောက်ကိုရီးယားအာဏာရ အလုပ်သမားပါတီ၏ ဗဟိုကော်မတီ အတွင်းရေးမှူးဖြစ်သူ Ri Hi Yong အား ဖေဖော်ဝါရီလ ၂၇ ရက်နေ့တွင် ကရင်မလင်နန်းတော်၌ လက်ခံ တွေ့ဆုံခဲ့ ပါသည်။ ဤသည်မှာ နှစ်နိုင်ငံစစ်ဘက်ဆက်ဆံရေး ပိုမိုနက်ရှိုင်းလာသည့် နည်းတူ ပြုံယမ်းသည် မော်စကိုအတွက် မည်မျှအရေးကြီးကြောင်းကို ပြသလိုက်ခြင်းပင်ဖြစ်ကြောင်း ရုရှားသမ္မတရုံးမှ ထုတ်ဖော်ပြောကြားခဲ့ပါသည်။ရုရှားနှင့် မြောက်ကိုရီးယားတို့သည် အရေးပေါ်အခြေအနေများတွင် တစ်နိုင်ငံနှင့်တစ်နိုင်ငံ စစ်ရေးဆိုင်ရာ အကူအညီ များအပါအဝင် အခြားအကူအညီများပေးရေးဆိုင်ရာ ဘက်စုံမဟာဗျူဟာမိတ်ဖက် ဆက်ဆံရေးစာချုပ်ကို ယခင်နှစ်က ချုပ်ဆိုခဲ့ကြပြီး မြောက်ကိုရီးယားအနေဖြင့် ယူကရိန်းစစ်ပွဲအတွက် ရုရှားအားအထောက်အပံ့ဖြစ်စေရန် ၎င်း၏ တပ်ဖွဲ့များကို စေလွှတ်ပေးခဲ့သည်။ထို့အပြင် ဖေဖော်ဝါရီလ ၂၅ ရက်နေ့တွင် မြောက်ကိုရီးယား ကိုယ်စားလှယ်အဖွဲ့အား အာဏာရ ရုရှားညီညွတ်ရေးပါတီမှ အဆင့်မြင့်အရာရှိကြီးက မော်စကိုတွင် လက်ခံတွေ့ဆုံခဲ့ပြီး ယူကရိန်းဒေသ အထူးစစ်ဆင်ရေးတွင် ပြုံယမ်း၏ ပံ့ပိုးကူညီမှုအတွက် ကျေးဇူးတင်စကားပြောကြားခဲ့ကြောင်း NHK သတင်းစာမျက်နှာတွင် ရေးသားဖော်ပြထားပါသည်။

ကိုးကား- NHK World

ဘာသာပြန်ဆိုသူ-ဦးထက်ထက်အောင်၊ နစက-၄

ရုရှားနိုင်ငံနှင့် အမေရိကန်ပြည်ထောင်စုအကြား ဆက်ဆံရေး တိုးတက်လာစေရန် ဖင်လန်နိုင်ငံနှင့် ဆွီဒင်နိုင်ငံတို့ကို မြောက်အတ္တလန္တိတ် စာချုပ်အဖွဲ့(နေတိုး)မှ ဖယ်ရှားရန် ဒေါ်နယ်ထရမ့်က ဖိအားပေး တောင်းဆိုလာနိုင်ကြောင်း ဖင်လန်နိုင်ငံ နိုင်ငံတကာရေးရာကျွမ်းကျင်သူ Jussi Lassila က ပြောကြားလိုက်ပါသည်။

ပြီးခဲ့သည့်ဖေဖော်ဝါရီ ၁၂ ရက် ဗလာဒီမာပူတင်နှင့် ဒေါ်နယ်ထရမ့်တို့သည် တယ်လီဖုန်းဖြင့် ဆွေးနွေးခဲ့ကြရာ ယူကရိန်းစစ်ပွဲဖြစ်ပွားရသည့် အခြေခံ အကြောင်းအရင်းကို ဖယ်ရှားပေးရန် လိုအပ်ကြောင်း ထည့်သွင်း ပြောကြားခဲ့သည်ကို ကရင်မလင်ထုတ်ပြန်ချက်အရ သိရှိရပါကြောင်း၊ ဒေါ်နယ် ထရမ့်သည် ရုရှားနှင့်ဆက်ဆံရေးတိုးတက်လာစေရန် ၁၉၉၇ ခုနှစ် နောက်ပိုင်း နေတိုးအဖွဲ့၏အနေအထား ရောက်ရှိအောင် လုပ်ဆောင်လာနိုင်ကြောင်း၊ မိမိတို့အနေဖြင့် လက်ရှိအခြေအနေတွင် သည်းခံမှုကို ထိန်းသိမ်းကြရန် လိုအပ်ကြောင်း ကျွမ်းကျင်သူက ပြောကြားခဲ့ပါသည်။

ဖင်လန်နိုင်ငံသည် ၂၀၂၃ ခုနှစ်၊ ဧပြီလတွင် နေတိုးအဖွဲ့ဝင်ဖြစ်လာပြီး၊ ဆွီဒင်နိုင်ငံသည် ၂၀၂၃ ခုနှစ်၊ မေလတွင် နေတိုးအဖွဲ့ဝင် ဖြစ်ခဲ့ပါသည်။               

၁၉၉၇ ခုနှစ်၊ မေလ ၅ ရက်တွင် နေတိုးနှင့် ရုရှားအကြား NOTO- Russia Founding Act စာချုပ်ကို လက်မှတ်ရေးထိုးခဲ့ကြသည်။ ထိုစာချုပ်မှာ နေတိုးနှင့် ရုရှားအကြား အငြင်းပွားမှုများကို စုပေါင်းဖြေရှင်းရန်နှင့် လုံခြုံရေးပူးပေါင်းဆောင်ရွက်မှုများ တိုးတက်လာစေရန် ရည်ရွယ်ခဲ့ရာ ဥရောပလုံခြုံရေးအတွက် လွန်စွာအရေးပါလှပါသည်။ 

“ထိုစာချုပ်အရ နေတိုးသည် အဖွဲ့ဝင် တိုးချဲ့ခွင့် ရရှိခဲ့ကြသည်။ အမှန်တကယ်တွင် နေတိုး၏ အဖွဲ့ဝင်တိုးချဲ့မှုမှာ ရုရှားအတွက် ခံယူရန် မလွယ်ကူခဲ့ပေ။ နောက်ပိုင်းတွင် နေတိုးအဖွဲ့ဝင်ဖြစ်လာကြသည့် ပိုလန်၊ ဟန်ဂေရီနှင့် ချက်ကိုစလိုဗက်ကီးယားတို့သည် ရုရှားအတွက် လုံခြုံရေးအန္တရာယ်ဖြစ်လာမည်” ဟု ရုရှားက မျှော်မှန်းခဲ့သည်။ စာချုပ်အရ ၁၉၉၇ ခုနှစ်က နှစ်ဘက်အကြား ပူးပေါင်းဆောင်ရွက်မှု တိုးတက်လာခဲ့ခြင်းရှိခဲ့သော်လည်း နောက်ပိုင်းတွင် နေတိုးအဖွဲ့ဝင်များ တိုးချဲ့လာမှုမှာ ရုရှားအတွက် နာကျင်စရာ ဖြစ်လာခဲ့ပါတော့သည်။

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊နစက-၃

ယူကရိန်းငြိမ်းချမ်းရေး ဆွေးနွေးပွဲများအတွင်း အမေရိကန်သည် ရုရှား အပေါ်ချမှတ်ထားသည့် ပိတ်ဆို့အရေးယူမှုများကို တစ်ချိန်ချိန်၌ ရုတ်သိမ်း နိုင်သည်ဟု အမေရိကန်သမ္မတဒေါ်နယ်ထရမ့်က ပြောကြားခဲ့ပါသည်။ သို့သော် ရုရှားအပေါ် ပိတ်ဆို့အရေးယူမှုများ ရုတ်သိမ်းနိုင်ခြေနှင့် ပတ်သက်၍ လက်ရှိအချိန်အထိ ဆုံးဖြတ်ချက်ချထားခြင်း မရှိသေးကြောင်း ၎င်းကပြောကြားခဲ့ပါသည်။

ရုရှား-ယူကရိန်း ပဋိပက္ခစတင်ဖြစ်ပွားခဲ့သည့် ၂၀၂၂ ခုနှစ်၊ ဖေဖော်ဝါရီလ နောက်ပိုင်းမှစတင်ပြီး အမေရိကန်နှင့် အနောက်အုပ်စုနိုင်ငံများသည် ရုရှားအပေါ် ပိတ်ဆို့အရေးယူမှု အများအပြား ချမှတ်ခဲ့ခြင်းလည်း ဖြစ်ပါသည်။ သို့သော် အဆိုပါပိတ်ဆို့အရေးယူမှုများသည် တရားမဝင်ကြောင်း နှင့်ရုတ်သိမ်းပေးရန် ရုရှားဘက်က အကြိမ်ကြိမ်တောင်းဆိုခဲ့ကြောင်းလည်း သိရပါသည်။

ယူကရိန်းပဋိပက္ခအတွက် တည်မြဲပြီး ရေရှည်တည်တံ့သည့် ဖြေရှင်းချက် ကို ရှာဖွေနိုင်ရန်အတွက် အနောက်အုပ်စုနိုင်ငံများသည် ရုရှားအပေါ် ပိတ်ဆို့အရေးယူမှုများကို ရုတ်သိမ်းရန် စဉ်းစားရလိမ့်မည်ဟု လွန်ခဲ့သော ရက်ပိုင်းက အမေရိကန် နိုင်ငံခြားရေးဝန်ကြီး မာကိုရူဘီအို က အကြံပြု ပြောဆိုခဲ့ပြီးနောက် ဒေါ်နယ်ထရမ့်၏ပြောဆိုချက်များ ထွက်ပေါ်လာခြင်း ဖြစ်ပါသည်။

ကိုးကား-NP News

ယူကရိန်-ရုရှား စစ်ပွဲဖြစ်ပွားရသည့် အဓိကအကြောင်းအရင်းသည် ယူကရိန်းအနေဖြင့် မြောက်အတ္တလန် တစ်စာချုပ်အဖွဲ့ NATO သို့ဝင်ရန် လုပ်ဆောင်ခဲ့သည့် အတွက်ကြောင့်ဖြစ်ပြီး စစ်ပွဲကိုရပ်တန့်ရန်အတွက် တစ်ခုတည်းသော လုပ်ဆောင်ရမည့်အချက်သည် ယူကရိန်းအနေဖြင့် နေတိုးအဖွဲ့သို့ဝင်မည်ဆိုသည့် အိပ်မက်ကို ဆက်မမက်ရန် လိုအပ်မည်ဟု အမေရိကန်သမ္မတ ဒေါ်နယ်ထရမ့်က ပြောကြားခဲ့သည်။ 

ယူကရိန်း နေတိုးအဖွဲ့သို့ဝင်လိုက်ခြင်းသည် ရုရှား၏ အနောက်တံခါး ခြိမ်းခြောက်မှု ကြီးမားစွာ ဖြစ်လာနိုင်ခြင်းဖြစ်၍ အမေရိကန် ဦးဆောင်သည့် နေတိုးအဖွဲ့သို့ ယူကရိန်းဝင်ရောက်မည့်အရေးကို ရုရှားက အစဉ်တစိုက် ကန့်ကွက်ခဲ့ခြင်းဖြစ်သည်။ ယူကရိန်းပဋိပက္ခနှင့်ပတ်သက်၍ ထရမ့်က ယခင်သမ္မတ ဘိုင်ဒန်၏ ထောက်ခံလုပ်ဆောင်ခဲ့မှုများကို အမြဲအပြစ်တင်ခဲ့ပြီး လက်ရှိ ၎င်း၏လက်ထက်တွင် မည်သည့်အခါမျှ အဖြစ်ခံမည် မဟုတ်ဟုလည်းဆိုသည်။ လွန်ခဲ့သော သီတင်းပတ်တွင် ရုရှားသမ္မတ ဗလာဒီမာပူတင်နှင့် ကြာရှည်စွာ ဖုန်းပြောဆိုပြီးနောက် ထရမ့်က ဖေဖော်ဝါရီ ၂၆ ရက်နေ့ အိမ်ဖြူတော်၌ ပြုလုပ်သော သတင်းစာရှင်းလင်းပွဲတွင် အဆိုပါ ကိစ္စရပ်ကို ထပ်လောင်းပြောကြားခဲ့ပါသည်။ 

ကိုးကား-Myanmar National Post

ယူကရိန်းသမ္မတ ဇီလန်စကီးက အမေရိကန်သမ္မတ ဒေါ်နယ်ထရမ့်နှင့် တွေ့ဆုံရန် ဖေဖော်ဝါရီ ၂၈ ရက်တွင် ဝါရှင်တန်မြို့သို့ သွားရောက်မည် ဖြစ်ကြောင်း ဖေဖော်ဝါရီ ၂၆ ရက်တွင် အတည်ပြု ပြောကြားလိုက် ပါသည်။ 

ထပ်မံ၍ ယူကရိန်းသမ္မတ ဇီလန်စကီးသည် လန်ဒန်သို့ သွားရောက် မည်ဖြစ်ကာ ဗြိတိန်ဝန်ကြီးချုပ်အပါအဝင် ဥရောပနိုင်ငံခေါင်းဆောင် များနှင့် မတ်လ ၂ ရက်တွင် တွေ့ဆုံမည်ဖြစ်ကြောင်း အတည်ပြု ပြောကြားထားပါသည်။

အမေရိကန်သမ္မတ ဒေါ်နယ်ထရမ့်က ယူကရိန်းသမ္မတဇီလန်စကီးသည် ဖေဖော်ဝါရီ ၂၈ ရက်နေ့တွင် ဝါရှင်တန်မြို့သို့ လာရောက်မည်ဟု သိရကြောင်း ဖေဖော်ဝါရီ ၂၅ ရက်တွင် ပြောကြားထားသလို ဗြိတိန် ဝန်ကြီးချုပ် စတာမက် ကလည်း ဥရောပခေါင်းဆောင်များသည် ယူကရိန်း စစ်ပွဲကိစ္စ ဆွေးနွေးရန် မတ်လ ၂ ရက်နေ့တွင် လန်ဒန်မြို့၌ ထိပ်သီး အစည်းအဝေးပြုလုပ်မည်ဖြစ်ကြောင်း ကြေညာခဲ့ပါသည်။ 

ကိုးကား - TASS

Photo: The Washington Post

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ယူကရိန်းသမ္မတ ဇီလန်စကီးသည် လာမည့် ဖေဖော်ဝါရီ ၂၈ ရက် (သောကြာနေ့)တွင် အမေရိကန်ပြည်ထောင်စု၊ ဝါရှင်တန်မြို့တော်ရှိ သမ္မတအိမ်ဖြူတော်သို့ လာရောက်နိုင်သည်ဟု သိရပါကြောင်း အမေရိကန် သမ္မတဒေါ်နယ်ထရမ့်က ပြောကြားလိုက်ပါသည်။

သောကြာနေ့တွင် ယူကရိန်းသမ္မတက အမေရိကန်သို့ လာရောက်မည် ဟု မိမိကြားသိရကြောင်း၊ ၎င်း၏ ခရီးစဉ်မှာ မိမိအတွက် အဆင်ပြေပါကြောင်း၊ အမေရိကန်နှင့် ယူကရိန်းအကြား မြေရှားသတ္တု သုံးစွဲမှုဆိုင်ရာ စီးပွားရေးစာချုပ် လက်မှတ်ရေးထိုးမည်ဖြစ်ကြောင်း ဒေါ်နယ်ထရမ့်က ထပ်မံပြောကြားထားပါသည်။

အမေရိကန်က ယူကရိန်းရှိ မြေရှားသတ္တုသယံဇာတများကို ဝင်ရောက် တူးဖော်အသုံးပြုခွင့်ကိစ္စနှင့် ယူကရိန်းက မိမိနိုင်ငံအနာဂတ် လုံခြုံရေးအာမခံချက်နှင့် ဆက်စပ်သော အရေးကြီးသည့်ကိစ္စတို့ကို ဆွေးနွေးရန် မျှော်လင့်ရပါသည်။ 

ကိုးကား- The Guardian

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

အမေရိကန်သမ္မတ ဒေါ်နယ်ထရမ့်နှင့် ဝါရှင်တန်သို့ ရောက်ရှိနေသည့် ပြင်သစ်သမ္မတ အီမန်နျူရယ် မက်ခရွန်တို့က ယူကရိန်းနှင့်ရုရှား နှစ်နိုင်ငံ အကြား ရေရှည် ငြိမ်းချမ်းရေးဖော်ဆောင်ရေးအတွက် ဖေဖော်ဝါရီ ၂၄ ရက်၌ သဘောတူညီခဲ့သော်လည်း အမေရိကန်နှင့် ဥရောပမဟာမိတ်များ အနေဖြင့် ယူကရိန်းအား အသီးသီး အကူအညီပေးရာ၌ မမျှတသည့် အခြေအနေဖြစ်နေသည်ဆိုသော ထရမ့်၏ပြောကြားချက်ကိုမူ မက်ခရွန် က လူသိရှင်ကြား ငြင်းပယ်ခဲ့သည်။

၎င်းနှင့် မက်ခရွန်ကြား အရေးကြီးကိစ္စရပ် အများအပြားနှင့်စပ်လျဉ်း၍ သဘောတူညီမှုရရှိခဲ့ပြီးဖြစ်သည်ဟု ယုံကြည်ကြောင်း အိမ်ဖြူတော်၌ နှစ်ဖက်တွေ့ဆုံပြီးနောက် ပူးတွဲသတင်းစာရှင်းလင်းပွဲ ပြုလုပ်စဉ်အတွင်း ထရမ့်က ပြောကြားခဲ့သည်။ “အဆိုပါကိစ္စရပ်များထဲတွင် အရေးအကြီးဆုံး ကတော့ ယူကရိန်း-ရုရှား ပဋိပက္ခကို အဆုံးသတ်ရန် အချိန်တန်ပြီ ဆိုတာပါပဲ။ အဲဒါက ယခုအချိန်မှာပဲ ဖြစ်နိုင်ပါလိမ့်မည်” ဟု ၎င်းက ဆိုသည်။

မက်ခရွန်ကလည်း ၎င်းနှင့်ထရမ့်တို့ ဆွေးနွေးစဉ်အတွင်း သေချာရေရာမှုရှိသော အနာဂတ် ခြေလှမ်းများကို ဖော်ဆောင်ခဲ့ကြောင်း ပြောကြား ခဲ့ကာ ရှေ့ဆက်လျှောက်လှမ်းရမည့် လမ်းကြောင်းတစ်ခု ရှိနေသည်ဟု ၎င်းအနေဖြင့် အပြည့်အဝယုံကြည်ကြောင်း၊ ယူကရိန်းနှင့် ရုရှား နှစ်နိုင်ငံ အကြား ရေရှည်တည်တံ့သော ငြိမ်းချမ်းရေးဖော်ဆောင်ရေးအတွက်ယုံကြည်ချက်များတွင် တူညီလျက်ရှိကြောင်း ထရမ့်နှင့်ဆွေးနွေး ပြီးနောက် တွင် ၎င်းက ဆက်လက်ပြောကြားခဲ့သည်။

သို့ရာတွင် ပြင်သစ်သမ္မတက အထက်တွင်ဆိုခဲ့သည့် ငြိမ်းချမ်းရေးမှာ ယူကရိန်းက လက်နက်ချအရှုံးပေးခြင်းကို သော်လည်းကောင်း၊ အာမခံချက် မရှိသော အပစ်အခတ်ရပ်စဲခြင်းကို သော်လည်းကောင်း ဆိုလိုခြင်း မဟုတ် ဟု အလေးအနက် ပြောကြားခဲ့သည်။

“အဆိုပါ ငြိမ်းချမ်းရေးက ယူကရိန်း၏ အချုပ်အခြာအာဏာပိုင်ဆိုင်မှု၊ တခြား အကျိုးစီးပွားဆက်စပ်သူများနှင့် ဆွေးနွေးညှိနှိုင်းမှုများကို လမ်းဖွင့်ပေးရမည်ဖြစ်ကြောင်း” မက်ခရွန်က ပြောကြားခဲ့သည်။

ကိုးကား-Myanmar National Post