တီဟီရန်၊ အီရန်

ကမ္ဘာ့စီးပွားရေး အင်အားကြီးနိုင်ငံများနှင့် ဆက်ဆံရေးတိုးမြှင့်ရန်နှင့် ပိတ်ဆို့ကန့်သတ်မှုများကို တုန့်ပြန်နိုင်ရန်အတွက် BRICS ထိပ်သီး အစည်းအဝေးတွင် အီရန်နိုင်ငံပါဝင် တက်ရောက်ခွင့်ရရှိရေးသည် အဖိုးတန်အခွင့်အရေးတရပ်ဖြစ်ပါကြောင်း ပါလီမန် ဥက္ကဋ္ဌ Mohammad- Baqer Qalibaf က မေလ ၃၁ ရက်နေ့က ပြောကြားလိုက်ပါကြောင်း Islamic Republic News Agency ဖော်ပြပါရှိပါသည်။

လက်တင်အမေရိကနိုင်ငံနှင့် ၁၁ ကြိမ်မြောက် BRICS Parliamentary Forum သို့ သွားရောက်ရန် မထွက်ခွာမီ ဗင်နီဇွဲလား ပါလီမန် ဥက္ကဋ္ဌ၏ ဖိတ်ကြားချက်အရ စီးပွားရေး၊ နိုင်ငံရေးနှင့် ယဉ်ကျေးမှုဆိုင်ရာ ကဏ္ဍ များ၌ ဆက်ဆံရေး အဆင့်မြှင့်တင်နိုင်ရန် သွားရောက်ခြင်းဖြစ်ကြောင်း၊ တီဟီရန်မြို့၏ Mehrabad International Airport တွင် စနေနေ့ (မေ ၃၁) ညက ပြောကြားလိုက်ခြင်းဖြစ်ပါသည်။

လက်တင်အမေရိကတိုက်၏ လူဦးရေ သန်း ၆၀၀ ကျော်ရှိသည့်အတွက် အီရန်နိုင်ငံနှင့် ဆက်ဆံရေးတွင် မဟာဗျူဟာအရ အရေးပါမှုရှိကြောင်း၊လက်တင်အမေရိက နိုင်ငံများအားလုံးသည် ဧကမဏ္ဍိုင်စနစ်ကို ဆန့်ကျင်ကြပြီး၊ ဗဟုမဏ္ဍိုင်စနစ်ကို ထောက်ခံကြကြောင်း၊ ယင်းအချက်သည် အစ္စလာမ္မစ်သမ္မတနိုင်ငံနှင့် ပူးပေါင်းဆောင်ရွက်ရန်အတွက် ကောင်းမွန်သည့် လမ်းကြောင်းဖြစ်ပါကြောင်း အလေးထားပြောကြားခဲ့ပါသည်။

ကမ္ဘာ့လူဦးရေ၏ ၄၉ ရာခိုင်နှုန်းရှိပြီး၊ ကမ္ဘာ့စီးပွားရေး၏ ၃၉ ရာခိုင်နှုန်းကို ပိုင်ဆိုင်ထားကြောင်းနှင့် နိုင်ငံတကာ ကုန်သွယ်မှု၏ ၂၄ ရာခိုင်နှုန်းကို BRICS အဖွဲ့သည်  ပိုင်ဆိုင်ထားပါကြောင်း  Qalibaf က ပြောကြား ပါသည်။  အီရန်နိုင်ငံ၏ ပါဝင်တက်ရောက်နိုင်မှုသည် နိုင်ငံရေးနှင့် စီးပွားရေး အခွင့်အလမ်းဖြစ်ပါကြောင်း၊  အစည်းအဝေးတွင် နိုင်ငံတကာငွေကြေး ပေးချေမှု စနစ်ဖြစ်သည့် SWIFT နှင့် မတူကွဲပြားသည့် BRICS Pay စနစ် ကို ပြောင်းလဲ အသုံးပြုခြင်းဖြင့် ပိတ်ဆို့မှုများကို ကျော်လွှာနိုင်မည်သည့် အဓိကသော့ချက်ဖြစ်သည်ကို ဦးစားပေး တင်ပြသွားရန်ရှိကြောင်း၊ အီရန် ပါလီမန် ကိုယ်စားလှယ်အဖွဲ့၏ လက်တင်အမေရိက ခရီးစဉ်သည် နိုင်ငံရေး၊ စီးပွားရေးနှင့် ယဉ်ကျေးမှု ကဏ္ဍများတွင် သိသာ မြင်သာသည့် ရလဒ်များ ထွက်ပေါ်လာမည်ဖြစ်ပါကြောင်း ပြောကြားပါသည်။

(၁၁) ကြိမ်မြောက် BRICS Parliamentary Forum သည် ဘရာဇီးနိုင်ငံ၊ ဘရာဇီးလ်လီးယား မြို့၌ ဇွန်လ ၄ ရက်နေ့မှ ၅ ရက်နေ့အထိ ကျင်းပ ပြုလုပ်သွားမည်ဖြစ်ပြီး၊ ဘရာဇီးနိုင်ငံသည် ယခုနှစ်အတွက် BRICS အဖွဲ့ ၏ အလှည့်ကျဥက္ကဋ္ဌအဖြစ် ဆောင်ရွက်သွားမည် ဖြစ်ပါသည်။ 

(Ref: Islamic Republic News Agency)

ဘာသာပြန်ဆိုသူ-ဦးခိုင်ထွဋ်လှ

ရုရှားနိုင်ငံခြားရေးဝန်ကြီး Sergey Lavrov သည် အမေရိကန်နိုင်ငံခြားရေးဝန်ကြီး Marco Rubio နှင့် ဇွန် ၁ ရက်က ဖုန်းဖြင့် ဆက်သွယ်၍ ယူကရိန်းအကျပ်အတည်းနှင့်စပ်လျဉ်းသည့် အခြေအနေ တိုးတက်မှုများအား နှစ်ဖက်ကြား ဆွေးနွေးခဲ့ကြောင်း ရုရှားနိုင်ငံခြားရေးဝန်ကြီးဌာနက ယင်းနေ့ ညပိုင်းတွင် သတင်းထုတ်ပြန် ပြောကြားခဲ့သည်။

Sergey Lavrov နှင့် Marco Rubio တို့သည် နိုင်ငံရေးနည်းလမ်းဖြင့် ယူကရိန်းအကျပ်အတည်း ဖြေရှင်းရေး အဆိုပြုချက်အသီးသီးအား အမြင်သဘောထားချင်းဖလှယ်ခဲ့ရာ ဇွန် ၂ ရက် တူကီယဲနိုင်ငံ မြို့တော် အစ္စတန်ဘူလ် ၌ ကျင်းပမည့် ရုရှား-ယူကရိန်းတိုက်ရိုက်စေ့စပ်ညှိနှိုင်းမှု အစီအစဉ်လည်း ပါဝင်ကြောင်း သတင်းတွင် ဖော်ပြထားသည်။

ဖုန်းဖြင့် ဆက်သွယ်ရာတွင် Marco Rubio က ရုရှားနိုင်ငံ Bryansk ပြည်နယ်နှင့် Kursk ပြည်နယ် ရထား လမ်း အခြေခံအဆောက်အဦ ဖောက်ခွဲခံရခြင်းကြောင့် အရပ်သားများ သေဆုံးဒဏ်ရာရသည့်အပေါ် နှစ်သိမ့် စကားပြောကြားခဲ့ကြောင်း၊ ရုရှားသက်ဆိုင်ရာဌာနများကလည်း အချင်းဖြစ်ရပ်အား အဆုံးစွန်စုံစမ်း စစ်ဆေးမှုများ ပြုလုပ်လျက်ရှိပြီး စုံစမ်းစစ်ဆေးမှုရလဒ်များကို အမြန်ဆုံးထုတ်ပြန်သွားမည်ဖြစ်ကြောင်း သတင်းတွင် ဖော်ပြထားသည်။ တရားခံအား မုချမသွေ ဖော်ထုတ်သွားမည်ဖြစ်ပြီး ထိုက်သင့်သည့် ပြစ်ဒဏ်ပေးသွားမည် ဖြစ်ကြောင်း ရုရှားနိုင်ငံခြားရေးဝန်ကြီးဌာနက အလေးထားပြောကြားခဲ့သည်။

အမေရိကန်နိုင်ငံခြားရေးဝန်ကြီးဌာန၏ ကြေညာချက်တွင် Marco Rubio သည် ယင်းနေ့က ဖိတ်ကြားချက်အရ Sergey Lavrov နှင့် ဖုန်းဖြင့် ဆက်သွယ်ခဲ့ရာ ရေရှည်ငြိမ်းချမ်းရေးဖော်ဆောင်ရန် ရုရှား-ယူကရိန်း တိုက်ရိုက် စေ့စပ်ဆွေးနွေးမှုများ ဆက်လက်လုပ်ဆောင်ရေး အမေရိကန်သမ္မတ ထရမ့်၏ တိုက်တွန်းချက်အား ထပ်မံပြောကြားခဲ့ကြောင်း ဖော်ထားသည်။ 

ကိုးကား- ဆင်ဟွာ 

ဘောလုံးလောင်းကစားနှင့် ရန်ပွဲဝင်ခဲ့သည်ကို ဂုဏ်ယူစွာ ပြောဆိုလေ့ ရှိသော သမိုင်းပညာရှင်နှင့် လူကြိုက်များသော နိုင်ငံရေးသမား တစ်ဦး သည် ပိုလန်နိုင်ငံ၏ သမ္မတရွေးကောက်ပွဲတွင် အံ့ဖွယ်အနိုင်ရရှိခဲ့ပြီး ယင်းအခြေအနေသည် ဗဟိုချုပ်ကိုင်မှုဆန့်ကျင်ရေး အာဏာရှင်စနစ်၏ အမွေအနှစ်များကို ဖြေလျှော့ရန် ဗဟိုအစိုးရ၏ ကြိုးပမ်းမှုများကို အဟန့် အတားဖြစ်စေနိုင်သည်။

ရိုက်တာသတင်းဌာန၏ ရွေးကောက်ပွဲကော်မရှင် အချက်အလက်များ အရ ပိုလန်၏ လူကြိုက်များသော လက်ယာစွန်းရောက် တရားဥပဒေနှင့် တရားမျှတမှု (PiS) ပါတီနှင့် မဟာမိတ်ဖြစ်သူ ကာရိုး နာဗရော့စ်ကီးသည်၅၀.၈၉% မဲရရှိခဲ့ပြီး၊ ရွေးကောက်ပွဲ၏ ဒုတိယအဆင့်တွင် အနိုင်ရရန် အလားအလာ အရှိဆုံးဖြစ်ခဲ့သည့် ဝါဆောမြို့တော်ဝန် လစ်ဘရယ်ဝါဒီ ရာဖယ်ထရ်ဇာ စကော့စ်ကီးကို အနိုင်ရရှိခဲ့သည်။

အဆိုပါရလဒ်သည် PiS ပါတီ၏ သမ္မတအိမ်တော်ကို ၁၀ နှစ်တာ ထိန်းချုပ်မှုကို ဆက်လက်တည်တံ့စေပြီး ဝန်ကြီးချုပ် ဒေါ်နယ်ဒ်တပ်စ်ခ် ၏ အစိုးရအတွက် ဘေးဥပါဒ်ဖြစ်လာစေနိုင်သည်။ တပ်စ်ခ်သည် PiS ၏ လွှမ်းမိုးမှုကို ပိုလန်၏ အငြင်းပွားဖွယ် အဖွဲ့အစည်းများမှ ဖယ်ရှားရန် ကတိပြုခဲ့သောကြောင့် ၎င်းသည် ရာထူးမှနုတ်ထွက်သွားသော သမ္မတ Andrzej Duda နှင့် အကြိမ်ကြိမ် တိုက်ပွဲဝင်ခဲ့ရသည်။

နာဗရော့စ်ကီးသည် အမေရိကန်သမ္မတ ဒေါ်နယ်ထရမ့်၏ ထောက်ခံသူ ဖြစ်ပြီး ရွေးကောက်ပွဲမတိုင်မီ သီတင်းပတ်အနည်းငယ်အတွင်း အိမ်ဖြူတော် သို့ သွားရောက်ခဲ့သည်။ ၎င်းသည် ရွေးကောက်ပွဲတစ်လျှောက်လုံး အနုတ် လက္ခဏာဆောင်သော သတင်းများကြားမှ ရုန်းကန်ခဲ့ရပြီး၊ လွန်ခဲ့သော နှစ်ပတ်က ပထမအဆင့်မဲပေးမှုတွင် ထရ်ဇာစကော့စ်ကီးနောက်မှ ဒုတိယ နေရာဖြင့် အနီးကပ်ရပ်တည်နိုင်ခဲ့သည်။ ထို့နောက် တတိယ နေရာ ရခဲ့သည့် အလွန်လက်ယာစွန်းရောက် ကိုယ်စားလှယ်ထံမှ နောက်ဆုံးအချိန်တွင် ထောက်ခံမှုရရှိခဲ့သည်။

အသက် ၄၂ နှစ်အရွယ် အဆိုပါသမိုင်းပညာရှင်သည် ယခုအခါ တပ်စ်ခ်၏ အစီအစဉ်များကို တားဆီးရန် ဒူဒါ မကြာခဏ အသုံးပြုခဲ့သည့် အလွန် အာဏာကြီးမားသော သမ္မတ၏ ဗီတိုအာဏာကို ရရှိမည်ဖြစ်သည်။ ဥရောပသမဂ္ဂသည် ဒီမိုကရေစီအပေါ် လူထုအာရုံစိုက်မှုဆိုင်ရာ ဝါဒ၏ သက်ရောက်မှုများကို ပြန်လည်ရုတ်သိမ်းရန် ပုံစံညွှန်းကို တပ်စ်ခ်ထံမှ မျှော်လင့်ထားသော်လည်း၊ နာဗရော့စ်ကီး၏ အနိုင်ရမှုသည် ယင်းအစီအစဉ် အတွက် အဟန့်အတားဖြစ်လာစေနိုင်သည်။

ပိုလန်သမ္မတလောင်းများသည် ပါတီ၏ ကိုယ်စားလှယ်ထက် လူတစ်ဦးချင်း အနေဖြင့် ဝင်ရောက်ယှဉ်ပြိုင်လေ့ရှိသော်လည်း၊ ၎င်းတို့၏ နိုင်ငံရေး အဖွဲ့အစည်းများနှင့် ဆက်နွှယ်မှုကို ဖုံးကွယ်ရန် မလွယ်ကူပေ။ သမိုင်းကြောင်း အရ အဓိကပါတီကြီးတိုင်းသည် ၎င်းတို့၏ ကိုယ်စားလှယ်ကို ထောက်ခံ အားပေးလေ့ရှိသည်။

၂၀၂၃ ပါလီမန်ရွေးကောက်ပွဲ၌ တပ်စ်ခ်သည် PiS အစိုးရကို ဖြုတ်ချ နိုင်ခဲ့သော်လည်း၊ နာဗရော့စ်ကီး သမ္မတဖြစ်လာခြင်းက PiS ၏ ၈ နှစ်တာ အုပ်ချုပ်မှုလက်ရာများကို အပြည့်အဝ ပြန်လည်ပြုပြင်ရန် တပ်စ်ခ် အတွက် အဟန့်အတား ဖြစ်စေနိုင်ပါသည်။

ကိုးကား- CNN

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

မော်စကို၊ နိုင်ငံရေး

ရုရှားကိုယ်စားလှယ်အဖွဲ့သည် ယူကရိန်းကိုယ်စားလှယ်အဖွဲ့နှင့် တွေ့ဆုံဆွေးနွေး ရန်အတွက် တူကီယဲနိုင်ငံ အစ္စတန်ဘူမြို့သို့ ထွက်ခွာသွားပြီဖြစ်ကြောင်း အရင်းအမြစ် တစ်ခုက ဇွန်လ ၁ ရက်တွင် ပြောသည်။

ယူကရိန်းကိုယ်စားလှယ်အဖွဲ့အား ကာကွယ်ရေးဝန်ကြီး ရူစတမ် အူမာရော့ဗ်က ဦးဆောင်ထားကြောင်းသိရသည်။ ရုရှားကိုယ်စားလှယ်အဖွဲ့သည် ယူကရိန်းနိုင်ငံမှ တာဝန်ရှိသူများနှင့် ဇွန်လ ၂ ရက်တွင် တွေ့ဆုံ၍   တိုက်ရိုက်ဆွေးနွေးမည်ဖြစ်သည်။

သို့ရာတွင် ယူကရိန်းနှင့်ထပ်မံကျင်းပမည့် ဆွေးနွေးပွဲတွင်လည်း ရုရှားကိုယ်စားလှယ်အဖွဲ့၏   ရပ်တည်ချက်သည် မေလ ၁၆ ရက်တွင်   ကျင်းပခဲ့သော  ဆွေးနွေးပွဲအတွင်းချမှတ်ခဲ့သည့် သဘောထားအတိုင်း ပြောင်းလဲမည်မဟုတ်ကြောင်း ရုရှားအစိုးရအဖွဲ့မှ  ပြောရေးဆိုခွင့်ရှိသူ  မာရီယာဇာခါရိုဗာက  ပြောကြားထားကြောင်းသိရသည်။

တိုက်ရိုက်တွေ့ဆုံဆွေးနွေးပွဲတွင် ပါဝင်သူအားလုံးအနေဖြင့် ငြိမ်းချမ်းရေးဆွေးနွေးပွဲ အောင်မြင်စေရန်အတွက် လုပ်ဆောင်နိုင်မည်ဟု မျှော်လင့်ကြောင်း၊ နှစ်နိုင်ငံကြားဆွေးနွေးပွဲများထပ်မံကျင်းပနိုင်ရန်အတွက်လည်း ရုရှားနိုင်ငံက ထောက်ခံအားပေးလျက်ရှိကြောင်း ရုရှားနိုင်ငံခြားရေးဝန်ကြီး ဆာဂျီလက်ရော့ဗ်က   အစောပိုင်းတွင် ပြောကြားခဲ့ကြောင်းသိရသည်။ 

Ref: Ivz

Source: Myawady Web Portal

ယူကရိန်းနိုင်ငံ၏ ကြည်းတပ် ဦးစီးချုပ် Mikhail Drapaty သည် ယူကရိန်းတပ်မတော် လေ့ကျင့်ရေးစခန်းတစ်ခုတွင် ပစ်ခတ်တိုက်ခိုက်ခံရမှုများကြောင့် ယူကရိန်းစစ်သည်များ သေဆုံးမှုအတွက် တာဝန်ယူကာ ရာထူးမှနုတ်ထွက်သွားကြောင်း သိရှိရပါသည်။

ယူကရိန်းရုပ်သံ Suspilne ၏ ဖော်ပြချက်အရ တနင်္ဂနွေနေ့ (ဇွန် ၁) က ရုရှား၏ ပစ်ခတ်တိုက်ခိုက်မှုကြောင့် ယူကရိန်းစစ်သည် အနည်းဆုံး ၁၂ ဦး သေဆုံးပြီး ၆၀ ခန့် ဒဏ်ရာရရှိခဲ့သည်။ ယူကရိန်းအစိုးရက တည်နေရာ အသေးစိတ်ကို ထုတ်ဖော်မပြောသော်လည်း Suspilne ၏ အရင်းအမြစ်များအရ ၎င်းသည် Dnepropetrovsk ဒေသရှိ Novomoskovsky စစ်လေ့ကျင့်ရေးစခန်းနှင့် နီးစပ်သည့်နေရာဖြစ်နိုင်ကြောင်း သိရသည်။

ရုရှားကာကွယ်ရေးဝန်ကြီးဌာနက တနင်္ဂနွေနေ့ (ဇွန် ၁) တွင် Novomoskovsky လေ့ကျင့်ရေးစခန်း အနီးရှိ အဆောက်အဦတစ်ခုကို ပစ်မှတ်ထား တိုက်ခိုက် ခဲ့ကြောင်း အတည်ပြုခဲ့ပြီး ယူကရိန်းတပ်မတော်၏ 158th နှင့် 33rd Separate Mechanized Brigade (SMB) တို့ကို ပစ်မှတ်ထားတိုက်ခိုက် ခဲ့ခြင်းဖြစ်သည်။

ဦးစီးချုပ် Drapaty က စနေနေ့ (မေ ၃၁) က လူမှုကွန်ရက်တွင် ထုတ်ပြန်သည့် ကြေညာချက်တွင် “မိမိသည် ယူကရိန်းတပ်မတော် (AFU) ၏ ကြည်းတပ် ဦးစီးချုပ် ရာထူးမှ နုတ်ထွက်ရန်အတွက် အစီရင်ခံစာ တင်သွင်းရန် ဆုံးဖြတ်ခဲ့ပါသည်။ ၂၃၉ လေ့ကျင့်ရေးစခန်းတွင် ဖြစ်ပွားခဲ့သည့် အဖြစ်အပျက်ကြောင့် မိမိတို့၏ စစ်သည်များ အသက်ဆုံးရှုံးမှုအတွက် တာဝန်ယူမှု၊ တာဝန်ခံမှုအဖြစ် မိမိ၏ သဘောဆန္ဒအရ ဤဆုံးဖြတ်ချက်ကို ချမှတ်ခြင်းဖြစ်သည်” ဟု ရေးသားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

ရုရှားနိုင်ငံအနေဖြင့် မြောက်ကိုရီးယားနိုင်ငံနှင့်   နယ်ပယ်ပေါင်းစုံတွင်ပူးပေါင်းဆောင်ရွက်မှုများကို ပိုမိုတိုးမြှင့်ရန် ရည်မှန်းထားကြောင်း   ရုရှားသမ္မတရုံးမှပြောရေးဆိုခွင့်ရှိသူဒီမီထရီပက်စကော့က ဇန်နဝါရီ လ ၁၅ ရက်တွင်ပြောသည်။

မြောက်ကိုရီးယားနိုင်ငံမှ နိုင်ငံခြားရေးဝန်ကြီး ချိုဆွန်းဟွေ     ဦးဆောင်သောကိုယ်စားလှယ်အဖွဲ့က   ရုရှားနိုင်ငံသို့ ဇန်နဝါရီလ ၁၅ ရက်မှ ၁၇ ရက်အထိ ချစ်ကြည်ရေးခရီးလာရောက်စဉ် ပြောရေးဆိုခွင့်ရှိသူက ယခုကဲ့သို့ပြောခြင်းဖြစ်သည်။

ပထမဆုံးအနေနဲ့ မြောက်ကိုရီးယားနိုင်ငံဆိုတာ  မိမိတို့ရဲ့အိမ်နီးချင်း ဖြစ်ပါတယ်။ အနီးဆုံးအိမ်နီးချင်းပါ။ ဒါ့အပြင် နယ်ပယ်ပေါင်းစုံမှာ ပူးပေါင်းဆောင်ရွက်မှုတွေကို ပိုမိုတိုးမြှင့်သွားဖို့ ရည်မှန်းထားတဲ့ မိတ်ဖက်နိုင်ငံလည်း ဖြစ်ပါတယ်။ မြောက်ကိုရီးယားနိုင်ငံနဲ့ ဆွေးနွေးမှုများကို အဆင့်အတန်းအားလုံးနဲ့ ဆက်လက်လုပ်ဆောင် သွားမှာပါဟု ဒီမီထရီပက်စကော့က ပြောသည်။

မြောက်ကိုရီးယား နိုင်ငံခြားရေးဝန်ကြီး၏ခရီးစဉ်တွင်    ရုရှားသမ္မတဗလာဒီမာပူတင်နှင့်တွေ့ဆုံဆွေးနွေးမှုလည်း  ပါဝင်ကြောင်း၊ မြောက်ကိုရီးယား ကိုယ်စားလှယ်အဖွဲ့နှင့် ထဲထဲဝင်ဝင်ဆွေးနွေးပြီး သဘောတူညီချက်များ ရရှိမည်ဟု    ရုရှားနိုင်ငံက မျှော်လင့်ထားကြောင်း ၎င်းကဆက်ပြောသည်။

ထို့အတူ ရုရှားသမ္မတအနေဖြင့် မြောက်ကိုရီးယားနိုင်ငံသို့ ချစ်ကြည်ရေးခရီးသွားမည်ဖြစ်ကြောင်း၊     သွားမည့် အချိန်ကို နှစ်ဖက်ညှိနှိုင်းပြီးနောက် ထုတ်ပြန်မည်ဖြစ်ကြောင်းနှင့်  သိပ်မဝေးသော အချိန်တွင် ဖြစ်နိုင်ကြောင်း ပြောရေးဆိုခွင့်ရှိသူက ပြောထားသည်ဟု သိရသည်။

MWD Web Portal

တက်စလာလျှပ်စစ်ကားကုမ္ပဏီစီအီးအို အီလွန်မက်က အစိုးရအဖွဲ့တွင် လေးလကြာ တာဝန်ထမ်းဆောင်မှု ပြီးဆုံးသွားသော်လည်း အနီးကပ် အကြံပေးအဖြစ် ဆက်ရှိနေမည်ဟု အမေရိကန်သမ္မတ ဒေါ်နယ်ထရမ့်က မေ ၃၀ ရက်တွင် ပြောကြားလိုက်သည်။

အိမ်ဖြူတော် ဘဲဥပုံရုံးခန်းတွင် ပြုလုပ်သည့် နှုတ်ဆက်ပွဲတွင် ထရမ့်က ဖက်ဒရယ်အသုံးစရိတ် ဖြတ်တောက်ရေးဌာန (DOGE) ၏ အကြီးအကဲအဖြစ် တာဝန်ယူခဲ့သည့် မက်ကို ချီးကျူးစကားများ ဆိုခဲ့သည်။

အစိုးရအမှုထမ်းအဖြစ် ရက်ပေါင်း ၁၃၀ တာဝန်ပြီးဆုံးပါက အစိုးရအဖွဲ့မှ ထွက်ခွာမည်ဟု အီလွန်မက်က မကြာသေးမီက ကြေညာခဲ့သည်။ ၎င်း တာဝန်ယူမှုက မေ ၃ဝ ရက်ဝန်းကျင်တွင် သက်တမ်းစေ့သွားခဲ့ပြီ ဖြစ်သည်။

နှုတ်ဆက်ပွဲတွင် ထရမ့်က “မက်က တစ်ကယ်ကျောခိုင်းသွားတာ မဟုတ်ပါဘူး။ အိမ်ဖြူတော်ကို သွားလိုက်ပြန်လိုက်တော့ လုပ်နေမှာပါ” ဟုပြောသည်။ DOGE ၏ စွမ်းဆောင်မှုကြောင့် အစိုးရအရာရှိများ၏ အတွေးအခေါ်များ ပြောင်းလဲလာသည်ဟုလည်း သမ္မတကဆိုသည်။

DOGE ဝက်ဘ်ဆိုက်ဖော်ပြချက်အရ မေ ၂၉ ရက်အထိ ၎င်းတို့ဌာနက အမေရိကန်အစိုးရအတွက် ဒေါ်လာ ၁၇၅ ဘီလီယံကို အလေအလွင့် မဖြစ်အောင် သက်သာစေခဲ့သည်။

ကမ္ဘာ့အချမ်းသာဆုံးပုဂ္ဂိုလ်များအနက် တစ်ဦးအပါအဝင်ဖြစ်သည့် မက်သည် ၂၀၂၄ ခုနှစ်တွင် ထရမ့်နှင့်ရီပတ်ဘလီကန်အမတ်များ ရွေးကောက်ခံရစေရန် အမေရိကန်ဒေါ်လာသန်း ၃၀၀ နီးပါး စိုက်ထုတ်ကူညီခဲ့သည်။

အီလွန်မက်ဦးဆောင်သည့် DOGE ကြောင့် အစိုးရဌာနများရှိ ဝန်ထမ်းများစွာ အလုပ်ပြုတ်ခဲ့ရသည်။ အမေရိကန်နိုင်ငံတကာ ဖွံ့ဖြိုးရေး အေဂျင်စီ USAID မှလည်ပတ်နေသည့် ပရိုဂရမ်အများစု ရပ်ဆိုင်းသွားခဲ့သည်။

ထို့နောက်မက်၏ တက်စလာကုမ္ပဏီကို ကမ္ဘာတစ်ဝန်း ဆန္ဒပြမှုများ ဖြစ်လာသည်။ သပိတ်မှောက်ရန် ဆော်ဩလာကြသည်။ ကုမ္ပဏီ၏ အရောင်းနှုန်းလည်း အနိမ့်ဆုံးအဆင့်ထိ ထိုးကျခဲ့သည်။

ကိုးကား- Eleven Media Group

ယူကရိန်းပဋိပက္ခ စတင်တည်းကပင် ရုရှားကို အနိုင်ယူရန် မဖြစ်နိုင်ကြောင်း အထူးသဖြင့် ၎င်း၏နျူကလီးယား အဆင့်အတန်းကြောင့်ဖြစ်ကြောင်း ဂျာမန်နိုင်ငံခြားရေးဝန်ကြီး Johann Wadephul က SZ သတင်းစာတွင် ပြောကြားခဲ့သည်။

ဂျာမနီ၊ ပြင်သစ်နှင့် ဗြိတိန်တို့၏ အဆင့်မြင့်ဆုံးအရာရှိများအပါအဝင် ယူကရိန်း၏အနောက်တိုင်းထောက်ခံသူများနှင့် အမေရိကန်သမ္မတ Joe Biden အစိုးရလက်ထက်တွင် မော်စကိုကို ဗျူဟာမြောက် ရှုူံးနိမ့်မှုဖြစ်စေရန် သို့မဟုတ် အင်အားချိနဲ့သွားစေရန် ရည်ရွယ်ချက်ကို အထပ်ထပ် ပြောဆိုခဲ့ကြပြီး ထိုအကြောင်းပြချက်ကို ယူကရိန်းအား စစ်ရေးအကူအညီ ဆက်လက်ပေးရန် အသုံးပြုခဲ့သည်။

Wadephul သည် သောကြာနေ့ (မေ ၃၀) တွင် မော်စကိုနှင့် ကိယက်ဗ် အကြားပဋိပက္ခကို သံတမန်နည်းလမ်းဖြင့်သာ ဖြေရှင်းနိုင်ကြောင်း ထုတ်ဖော် ဝန်ခံခဲ့သည်။ “အဆိုပါစစ်ပွဲသည် အစကတည်းက ညှိနှိုင်းဖြေရှင်းမှုတစ်ခုဖြင့်သာ အဆုံးသတ်နိုင်ခဲ့မည်ဆိုသည်မှာ ရှင်းနေပါသည်” ဟု ဂျာမနီနိုင်ငံခြားရေးဝန်ကြီးက SZ သတင်းစာနှင့် အင်တာဗျူးတွင် ပြောကြား ခဲ့သည်။

“သေချာသည်က နျူကလီးယားလက်နက်ပိုင်ဆိုင်ထားသည့် ရုရှား၏ အညံ့ခံမှုဆိုသည့် အဓိပ္ပာယ်ဖြင့် လုံးဝရှုံးနိမ့်မှုကို မျှော်လင့်လို့မရနိုင်ပါ” ဟု ဝန်ကြီးက ဆိုပြီး “ယခုကိစ္စမှာ မိမိတို့သည် နည်းနည်းပိုပြီး ရိုးသားစွာ သိမြင်လာပါပြီ” ဟု ဖြည့်စွက်ပြောကြားခဲ့သည်။ ယူကရိန်းစစ်တပ် များသည် လွန်ခဲ့သောလအနည်းငယ်အတွင်း စစ်မျက်နှာတစ်လျှောက် နယ်မြေများဆုံးရှုံးနေသော်လည်း မော်စကို၏တပ်များကို အောင်မြင်စွာ ခုခံနေသည် ဟု ၎င်းက ဆက်လက်ထောက်ခံပြောကြားခဲ့သည်။

နိုင်ငံခြားရေးဝန်ကြီးက ငြိမ်းချမ်းရေးဆွေးနွေးပွဲများတွင် ကိယက်ဗ်အား အခြေအနေကောင်းစေသော ညှိနှိုင်းရေးအနေအထားရရှိရန် ကူညီပေးရန် အရေးကြီးကြောင်း ထပ်လောင်းပြောကြားခဲ့ပြီး ဂျာမနီ၏ စစ်ရေးတိုးချဲ့မှု နှင့် ကာကွယ်ရေးအသုံးစရိတ်များ တိုးမြှင့်ခြင်းကို အကြောင်းပြရာတွင်ရုရှားက ဂျာမနီကိုခြိမ်းခြောက်နေသည်ဟုလည်း ဆိုခဲ့သည်။ ၎င်းက မော်စကိုနှင့် ဘာလင်အကြားဆက်ဆံရေးကို “ပြည့်ဝသောငြိမ်းချမ်းရေး အခြေအနေ” အဖြစ် မသတ်မှတ်နိုင်တော့ကြောင်း ဖြည့်စွက်ပြောကြားခဲ့သည်။

ကိုးကား- RT

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဟားမက်အဖွဲ့သည် စနေနေ့ (မေ ၃၁) က အမေရိကန်က အဆိုပြုထားသော ဂါဇာစစ်ရပ်စဲရေးအစီအစဉ်ကို တုံ့ပြန်ခဲ့ပြီး စစ်ပွဲအဆုံးသတ်ရန် တောင်းဆိုမှုကို ထပ်လောင်းပြုလုပ်ခဲ့သည်။ အမေရိကန်၏ အရှေ့ အလယ်ပိုင်း သံတမန် စတိဗ်ဝစ်ကော့ဖ်က အဆိုပါတောင်းဆိုမှုကို “လုံးဝလက်မခံနိုင် စရာ” ဟု ဝေဖန်ခဲ့သည်။

ဟားမက်၏တုံ့ပြန်ချက်တွင် အမေရိကန်အဆိုပြုချက်၏ အဓိကအချက် (၃) ချက်ကို ပြင်ဆင်ရန် တောင်းဆိုထားကြောင်း အဆိုပါအရင်းအမြစ်က ဆိုသည်။ ၎င်းတွင် အမြဲတမ်းစစ်ရပ်စဲရေးဆိုင်ရာ ညှိနှိုင်းမှုများ ဆက်လက် လုပ်ဆောင်ရန်နှင့် ယာယီရပ်စဲပြီးနောက် ပြန်လည်တိုက်ခိုက်မှု မရှိစေရေး အမေရိကန်၏ အာမခံချက်တောင်းဆိုသည့် အဆိုပြုချက်၊ ကုလသမဂ္ဂ မှတစ်ဆင့် လူသားချင်းစာနာမှုအကူအညီများ ပေးပို့ရန်နှင့် အစ္စရေးတပ် များကို မတ်လ ၂ ရက်နေ့က ရှိခဲ့သည့် နေရာများသို့ ပြန်လည်ဆုတ်ခွာ စေရန် တို့ကိုတောင်းဆိုထားသည်။

ထို့အပြင် “အဆိုပါသဘောတူညီချက်၏ တစ်စိတ်တစ်ပိုင်းအနေဖြင့် အသက်ရှင်လျက်ရှိသည့် အစ္စရေးအကျဉ်းသား ၁၀ ဦးကို ပြန်လည် လွှတ်ပေးမည်ဖြစ်ပြီး၊ သေဆုံးပြီး ဓားစာခံ ၁၈ လောင်းနှင့် လဲလှယ်ရန် သဘောတူညီထားသော ပါလက်စတိုင်း အကျဉ်းသားအရေအတွက်လည်း ပါဝင်မည်ဖြစ်ပါသည်” ဟု ထုတ်ပြန်ချက်တွင် ဖော်ပြထားသည်။

ဝစ်ကော့ဖ်က စနေနေ့ (မေ ၃၁) တွင် X ၌ ဟားမက်၏တုံ့ပြန်ချက်ကို “လုံးဝလက်မခံနိုင်” ဟု ရှုတ်ချကာ “ဤသည်မှာ ညှိနှိုင်းမှုအား နောက်ပြန် ဆွဲခြင်းသာဖြစ်စေသည်” ဟု ရေးသားခဲ့သည်။

ထို့ပြင် “ဟားမက်တို့အနေဖြင့် မိမိတို့တင်ပြထားသော မူဘောင် အဆိုပြုချက်ကို လက်ခံသင့်ပြီး လာမည့်သီတင်းပတ်တွင်ပင် ချက်ချင်း စတင်နိုင်သည့် အနီးကပ်ဆွေးနွေးပွဲများအတွက် အခြေခံအဖြစ် အသုံးပြုသင့်သည်” ဟု ၎င်းက ဆက်လက်ပြောကြားခဲ့သည်။

ဟားမက်၏နိုင်ငံရေးဗျူရိုအဖွဲ့ဝင် Basem Naim က အမေရိကန် သံတမန်၏ မှတ်ချက်များအား “လုံးဝဘက်လိုက်မှု” ဟု ပြင်းပြင်းထန်ထန် ဝေဖန် ခဲ့ပြီး အမေရိကန်သည် ယခင်က ဟားမက်နှင့် သဘောတူညီချက်တစ်ခုကို သဘောတူခဲ့သော်လည်း အစ္စရေးက ယင်းသဘောတူညီချက်ကို ပြင်ဆင်ခဲ့ကြောင်း CNN အား ပြောကြားခဲ့သည်။

“အစ္စရေးသည် မိမိတို့၏ဖမ်းဆီးခံရသူများပြန်လည်ရရှိရေးနှင့် ဟားမက် အား အနိုင်ယူရန် လုပ်ဆောင်မှုများကို ဆက်လက်ဆောင်ရွက်မည်” ဟု အစ္စရေးဝန်ကြီးချုပ်ရုံး၏ ထုတ်ပြန်ချက်တွင် ဖော်ပြထားသည်။

ကိုးကား- CNN

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

တူရကီအာဏာပိုင်များသည် စနေနေ့ (မေ ၃၁) တွင် အတိုက်အခံ ခေါင်းဆောင် မြို့တော်ဝန် Ekrem Imamoglu ဦးဆောင်သော အစ္စတန်ဘူလ် မြို့တော်ဝန်ရုံးအပေါ် အဂတိလိုက်စားမှုစွပ်စွဲချက်များဖြင့် ဖိနှိပ်မှုကို အရှိန်မြှင့်လိုက်ပြီး လူ ၃၀ ခန့်ကို ဖမ်းဆီးလိုက်သည်။

ဖမ်းဆီးခံရသူများတွင် အဓိကအတိုက်အခံပါတီဖြစ်သော CHP ၏ လွှတ်တော် အမတ်ဟောင်းတစ်ဦးနှင့် CHP အုပ်ချုပ်သော အစ္စတန်ဘူလ်ရှိ ခရိုင် ၃ ခု ၏ မြို့တော်ဝန်များ ပါဝင်သည်။

အစိုးရပိုင် Anadolu သတင်းဌာနက အဆိုပါဖမ်းဆီးမှုများသည် အစ္စတန်ဘူလ်မက်ထရိုပိုလီတန်မြူနီစီပယ်နှင့်သက်ဆိုင်သည့် အဂတိ လိုက်စားမှုစုံစမ်းစစ်ဆေးရေး ၄ ခုနှင့်ဆက်စပ်နေကြောင်း ဖော်ပြ ခဲ့သည်။

မတ်လ ၁၉ ရက်တွင် အဂတိလိုက်စားမှုစွပ်စွဲချက်ဖြင့် မြို့တော်ဝန် Ekrem Imamoglu ဖမ်းဆီးခံရပြီးနောက် ယခုဖမ်းဆီးမှုများသည်အစ္စတန်ဘူလ်အုပ်ချုပ်ရေးအပေါ် တရားဝင်ဖိနှိပ်မှု၏ ပဉ္စမအကြိမ်မြောက် ဖြစ်သည်။

သမ္မတ Recep Tayyip Erdogan ၏ ၂၂ နှစ်ကြာ အုပ်ချုပ်မှုကို အပြင်းထန်ဆုံးစိန်ခေါ်နိုင်သူအဖြစ် ရှုမြင်ထားသော Imamoglu ဖမ်းဆီး ခံရမှုသည် ၎င်းအားပြန်လည်လွှတ်ပေးရန်နှင့် Erdogan လက်အောက်ရှိ တူရကီ၏ ဒီမိုကရေစီနိမ့်ကျမှုကို ရပ်တန့်ရန် တောင်းဆိုသည့် ကြီးမား ကျယ်ပြန့်သော ဆန္ဒပြမှုများကို ဖြစ်ပေါ်စေခဲ့သည်။

ကိုးကား- CNN

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂