အမေရိကန်ရွေးကောက်ခံသမ္မတ ဒေါ်နယ်ထရန့်သည်  ဒီဇင်ဘာလ ၇ ရက်နေ့က  ပြင်သစ်နိုင်ငံ၊ ပါရီမြို့ရှိNotre-Dame ဘုရားကျောင်း ပြန်လည်ဖွင့်လှစ်ခြင်း အခမ်းအနားတွင် ပြင်သစ်သမ္မတ Macron နှင့် ယူကရိန်း သမ္မတ Zelenskiy တို့နှင့် တွေ့ဆုံခဲ့သည်။ အဆိုပါ သုံးပွင့်ဆိုင် တွေ့ဆုံမှုသည် မိနစ် ၂၀ ခန့်ကြာမြင့်ခဲ့သည်။ 

ဒေါ်နယ်ထရန့်အနေဖြင့်  ၎င်းတာဝန်ယူချိန်တွင် ယူကရိန်းအား  စစ်လက်နက်များ ထောက်ပံ့ပေးနေမှုအားရပ်ဆိုင်းလိုက်မည်ကို ယူကရိန်းသမ္မတနှင့် ဥရောပ ခေါင်းဆောင်တို့အကြား စိုးရိမ်နေကြသည့်အချိန်တွင် ထိုသို့တွေ့ဆုံကြခြင်း ဖြစ်ပါသည်။ 

ယခုတွေ့ဆုံမှုသည်ကောင်းမွန်ပြီး အကျိုးဖြစ်ထွန်းမှုရရှိခဲ့ကြောင်း၊ ဆက်လက်၍ သုံးဦးသားအတူတကွ ပူးပေါင်းဆောင်ရွက်သွားကြရန် သဘောတူခဲ့ကြောင်း  ယူကရိန်းသမ္မတက  ပြောကြားလိုက်ပါသည်။  သမ္မတ ဒေါ်နယ်ထရန့်သည်  အမြဲတစေ ခိုင်မာပြတ်သားသည့်သူ တစ်ယောက်ဖြစ်ကြောင်း၊  ဒေါ်နယ်ထရန့်ကို ကျေးဇူး တင်ကြောင်း သမ္မတဇယ်လန်စကီးက ၎င်း၏ X platform  မီဒီယာတွင်  ရေးသားထားပါသည်။ 

ဒေါ်နယ်ထရန့်၏ ယခုပြည်ပခရီးစဉ်သည် ၎င်းအနေဖြင့် ရွေးကောက်ပွဲတွင် အနိုင်ရရှိပြီးနောက် ပထမဆုံးသွားရောက်သည့် ပြည်ပခရီးစဉ်ဖြစ်ပြီး   ပြင်သစ်သမ္မတအတွက် ဥရောပနှင့် လာမည့် အမေရိကန်သမ္မတတို့အကြား ဖျန်ဖြေပေးသူ အခန်းကဏ္ဍကို အစောဆုံး ဆောင်ကြည်းပေးနိုင်ခွင့်ရရှိသည့် ခရီးစဉ်လည်းဖြစ်သည်။ 

လာမည့် ဇန်နဝါရီ ၂၀ တွင် တရားဝင်သမ္မတဖြစ်လာမည့် ဒေါ်နယ်ထရန့်သည် ယခုအချိန်ကတည်းကပင် ကမ္ဘာ့ခေါင်းဆောင်အများအပြားနှင့် တွေ့ဆုံလျက် ရှိပါသည်။

ကိုးကား - Reuters 

စစ်အုပ်ချုပ်ရေးကြေညာခဲ့သည့် တောင်ကိုးရီးယား သမ္မတ Yoon Suk Yeol အား စွပ်စွဲပြစ်တင်သည့် အဆိုသည် လွှတ်တော်တွင် အထမြောက်ခြင်း မရှိ သော်လည်း ၎င်း၏ သမ္မတရာထူးနေရာမှာ လှုပ်ခတ်မှုများ ဖြစ်ပေါ်လျက်ရှိပါသည်။

သို့ဖြစ်၍ တောင်ကိုးရီးယား အဂတိလိုက်စားမှု စုံစမ်း စစ်ဆေးရေးအဖွဲ့က ၁၉-၁၂-၂၀၂၄ ရက်နေ့မှ စတင်၍ Yoon Suk Yeol ၏ ပြည်ပခရီးသွားလာခွင့်ကို ပိတ်ထားလိုက်ပြီဖြစ်ကြောင်း CNN သတင်းဌာနက ဖော်ပြထားသည်။ 

ကိုးကား - CNN

ဆီးရီးယားသမ္မတ အာဆတ် နိုင်ငံမှထွက်ပြေးသွားပြီးနောက်  မော်စကိုမြို့ရှိ  ဆီးရီးယားသံရုံးက စည်းလုံးညီညွတ်မှုကို ပြသသည့်အနေဖြင့် ဆီးရီးယားအလံကို ဖြုတ်ချ၍  ဆီးရီးယားတို့၏ တော်လှန်ရေးအလံဖြစ်သည့် ကြယ် သုံးပွင့်ပါအလံကို လွှင့်ထူလိုက်ကြောင်း သိရှိရပါသည်။ 

အလားတူ ဂျော်ဒန်နိုင်ငံရှိ ဆီးရီးယားသံရုံးကလည်း ဆီးရီးယားအလံကို ဖယ်ရှားလိုက်ကြောင်း ဂျော်ဒန် နိုင်ငံပိုင်မီဒီယာက ထုတ်လွှင့်ခဲ့ပြီး ထိုသို့ ကြယ်သုံးပွင့်ပါ တော်လှန်ရေးအလံကို လွှင့်တင်ထားခြင်း ရှိ၊ မရှိအတည်ပြုနိုင်ခြင်း မရှိသေးပါကြောင်း ပြောကြားထား ပါသည်။

ထို့ပြင်  နိုင်ငံအချို့ရှိ  ဆီးရီးယားသံရုံးများတွင်လည်း   ဆီးရီးယားအလံကို ဖယ်ရှားလိုက်ကြပြီး အချို့ဆီးရီးယားသံရုံးများတွင် တော်လှန်ရေးအလံများ လွှင့်ထူထားကြပြီ ဖြစ်ကြောင်း သိရှိရပါသည်။

ကိုးကား  - ALJAZEERA

တီဟီရန်၏ အဓိကမဟာမိတ် အာဆတ်ကို ဖယ်ရှားပြီးနောက် ဆီးရီးယား၏ ခေါင်းဆောင်သစ်အင်အားစုများနှင့် တိုက်ရိုက်ဆက်သွယ်စကားပြောဆိုရန် လမ်းကြောင်း ဖွင့်ထားပါကြောင်း အီရန်အကြီးတန်း အရာရှိတစ်ဦးက Reuters သတင်းဌာနသို့ ပြောကြားခဲ့သည်။  ထိုဆွေးနွေးပွဲများကို နှစ်နိုင်ငံကြား “ရန်လိုသော အနာဂတ်အလားအလာကို တားဆီးရန်”  ရည်ရွယ်ပါကြောင်း  ၎င်းက  ထည့်သွင်းပြောကြားခဲ့သည်။

ကိုးကား  - Reuters

ရုရှားသမ္မတ ဗလာဒီမာပူတင်သည် ၎င်း၏ တစ်နှစ်တာ နှစ်ချုပ်သတင်းစာရှင်းလင်းပွဲနှင့် အမေးအဖြေကဏ္ဍကို လာမည့် ဒီဇင်ဘာ ၁၉ ရက်တွင် ကျင်းပပြုလုပ်မည် ဖြစ်ကြောင်း ကရင်မလင်ပြောခွင့်ရသူ Dmitry Peskov က ပြောကြားလိုက်သည်။ 

ယခုပြုလုပ်မည့် သတင်းစာရှင်းလင်းပွဲနှင့် အမေးအဖြေ ကဏ္ဍသည် တတိယအကြိမ်မြောက် ဖြစ်ပါသည်။ ၂၀၂၀ ပြည့်နှစ်က ပထမအကြိမ် ပြုလုပ်ခဲ့ပြီး ကိုဗစ်ကူးစက် ရောဂါကြောင့် နောက်နှစ်များတွင် ပြုလုပ်နိုင်ခြင်းမရှိဘဲ ၂၀၂၃ ခုနှစ်တွင်မှသာ စုပေါင်း၍ ဒုတိယအကြိမ် အဖြစ် ပြုလုပ်ခဲ့ပါသည်။ 

ယခုသတင်းစာရှင်းလင်းပွဲတွင် နယ်ပယ်ကဏ္ဍစုံမှ ရလဒ်များကို  အကျဉ်းချုပ် ပြောကြားမည်ဖြစ်ပြီး  "ဗလာဒီမာပူတင်နှင့် နှစ်ကုန်ပြန်လည်စုစည်းမှု" ဟု အမည်ပေးထားပါသည်။ ဗလာဒီမာပူတင်သည် ဝန်ကြီးချုပ် တာဝန်ထမ်းဆောင်စဉ် ၂၀၀၈ ခုနှစ်မေလမှ ၂၀၁၂ ခုနှစ် မေလအတွင်းတွင် အမေးအဖြေကဏ္ဍအဖြစ် ရုရှားနိုင်ငံ သားများနှင့် တိုက်ရိုက်ဖုန်းပြောဆိုမှု လေးကြိမ်တိုင်တိုင် ပြုလုပ်ထုတ်လွှင့်ဖူးပါသည်။

ကိုးကား - TASS

ရှားနိုင်ငံ သမ္မတပူတင်နှင့် ဘီလာရုစ်သမ္မတ လူကာရှန်ကိုတို့သည် ပြည်ထောင်စုနိုင်ငံ( Union State)၏ မူဘောင်အတွင်း လုံခြုံရေးအာမခံချက်များနှင့်ပတ်သက်၍သဘောတူညီချက်တစ်ခု လက်မှတ်ရေးထိုးခဲ့ကြကြောင်း ကရင်မလင်မှ သတင်းထုတ်ပြန်ထားသည်။

အဆိုပါ လက်မှတ်ရေးထိုးအခမ်းအနား၌ ရုရှားသမ္မတ ပူတင်က ရုရှားနှင့် ဘီလာရုစ်နိုင်ငံတို့အကြား လုံခြုံရေး အာမခံချက်တွင် ရုရှားနိုင်ငံ၏ နျူကလီးယားလက်နက်များ အပါအဝင် တပ်ဖွဲ့အားလုံးကို အသုံးပြုနိုင်သည့်အချက် ပါဝင်ကြောင်း ပြောကြားခဲ့ပါသည်။

ဘီလာရုစ်သမ္မတ လူကာရှန်ကိုက လစ်သူယေးနီးယား နှင့် ပိုလန်နိုင်ငံတို့ရှိ နေတိုးမဟာမိတ်တပ်ဖွဲ့များသည် ဘီလာရုစ်နယ်စပ်တွင် ပေါင်းစည်းလျက်ရှိပြီး အဆိုပါ ပေါင်းစည်းမှုသည် ယူကရိန်းနယ်စပ်ထက် ပိုမိုကြီးမားသော ခြိမ်းခြောက်မှုဖြစ်ကြောင်း ပြောကြားခဲ့ပြီး ရုရှားသမ္မတ ပူတင်အား ရုရှားနိုင်ငံ၏ Oreshnik တာလစ်ပစ် ဒုံးကျည်ကို ဘီလာရုစ်နိုင်ငံတွင် နေရာချထားရန် တောင်းဆိုခဲ့ပါသည်။ 

သမ္မတ ပူတင်က ဘီလာရုစ်နိုင်ငံတွင် Oreshnik ဒုံးကျည်ကို နေရာချထားရန်ဖြစ်နိုင်သည်ဟု ပြောကြား ခဲ့ပါသည်။ Oreshnik ဒုံးကျည်သည် ၎င်း၏ ထုတ်လုပ်မှု များတိုးတက်လာသောကြောင့် ဘီလာရုစ်နိုင်ငံတွင် ၂၀၂၅ ခုနှစ် ဒုတိယနှစ်ဝက်တွင် တပ်ဖြန့်နိုင်မည်ဟု သမ္မတပူတင်က ပြောကြားခဲ့ပါသည်။

ထို့အပြင် ဘီလာရုစ်နိုင်ငံတွင် ဖြန့်ကျက်ခြင်းမပြုမီ အဆိုပါ Oreshnik ဒုံးကျည်များ၏ အနိမ့်ဆုံးအကွာအဝေးကို ဆုံးဖြတ်ရန် လိုအပ်မည်ဖြစ်ကြောင်း ရုရှားသမ္မတက မှတ်ချက်ပြုခဲ့သည်။

Oreshnik ဒုံးကျည်သည် ၎င်း၏ အကွာအဝေးတိုလေလေ ထိပ်ဖူး၏စွမ်းအား ကြီးမားလေလေဖြစ်ကြောင်း သမ္မတ ပူတင်က မှတ်ချက်ပြုပြောကြားခဲ့ပါသည်။

ဘီလာရုစ်နိုင်ငံရှိ "Oreshnik" ဒုံးကျည်သည် ရုရှားတပ်မတော်၏ မဟာဗျူဟာမြောက် ဒုံးကျည်တပ်ဖွဲ့၏ အစိတ်အပိုင်းတစ်ခုဖြစ်လာမည်ဖြစ်ကြောင်း၊ သို့သော် ပစ်မှတ်များ၏ အဆုံးအဖြတ်သည် ဘီလာရုစ်နိုင်ငံတွင်သာအကျုံးဝင်မည်ဖြစ်ကြောင်း သမ္မတပူတင်က ပြောကြားခဲ့ပါသည်။

ကိုးကား - kremlin.ru

အစ္စရေးက ဟားမတ်စ်အဖွဲ့ကို အပစ်အခတ်ရပ်စဲရေး အဆိုပြုချက်အသစ် တင်ပြထားကြောင်း အမေရိကန် မီဒီယာ Axios ကဖော်ပြထားသည်။

ဂါဇာကမ်းမြောင်ဒေသအတွင်း အပစ်အခတ်ရပ်စဲရေးနှင့်ဟားမတ်စ်အဖွဲ့က ဖမ်းဆီးထားသောကျန်ရှိနေသေးသည့် ဓားစာခံအချို့ကိုလွှတ်ပေးရန် အစ္စရေးက ဟားမတ်စ်တို့အား အဆိုပြုချက်အသစ်တစ်ခု ပေးအပ်ခဲ့ကြောင်း အမေရိကန်သတင်း ဝက်ဘ်ဆိုက် Axios က ဖော်ပြထားသည်။ ၎င်းတို့နှစ်ဘက်အကြား အပစ်အခတ်ရပ်စဲရေး ညှိနှိုင်းမှုသည် လအတန်ကြာ ရပ်တန့်နေခဲ့ပြီး ဂါဇာကမ်းမြောင်ဒေသတွင် အစ္စရေး၏ စစ်ဆင်ရေးကြောင့် သေဆုံးသူအရေအတွက်သည် ၄၄,၀၀၀ အထိ တိုးလာ ခဲ့သည်။ ဟားမတ်စ်အဖွဲ့က ဂါဇာတွင် ဓားစာခံ ၁၀၀ ခန့်ကို ဖမ်းဆီးထားဆဲ ဖြစ်သည်။

Axios သတင်းဌာနက ဒီဇင်ဘာ ၄ ရက်နေ့တွင် အစ္စရေး အစိုးရအရာရှိနှစ်ဦး၏ ပြောကြားချက်အား ကိုးကားပြီး အစ္စရေးနိုင်ငံသည် သဘောတူညီချက်တစ်ခုရရန် နောက်ဆုံးတင်ပြထားသော ၎င်းမူဘောင်အသစ်၏ အခြေခံမူများကို အီဂျစ်အကြီးတန်းထောက်လှမ်းရေး အရာရှိများထံ တင်ပြခဲ့ကြောင်း၊ ယခုသီတင်းပတ်အစောပိုင်းတွင် ကိုင်ရိုမြို့ရှိ ဟားမတ်စ်အဖွဲ့ ကိုယ်စားလှယ်များထံ ၎င်းအဆိုပြုချက်ကို အီဂျစ်အာဏာပိုင်များက တင်ပြခဲ့ကြောင်းသိရှိရသည်။

ရက်ပေါင်း ၄၂ ရက်မှ ၆၀ အထိ ကြာမြင့်မည့် အပစ်အခတ်ရပ်စဲရေးအတွက် ညှိနှိုင်းရန်ဆန္ဒရှိကြောင်း အစ္စရေးက ထုတ်ဖော်ပြောကြားခဲ့သည်။

အစ္စရေးက ဟားမတ်စ်တို့ဖမ်းဆီးထားသော အသက်ရှင်နေသည့် အမျိုးသမီး ဓားစာခံအားလုံးနှင့် အသက် ၅၀ ကျော် အမျိုးသား ဓားစားခံအားလုံးကို လွှတ်ပေးစေချင်သည်။ 

ဟားမတ်စ်အဖွဲ့အနေဖြင့် အလုံးစုံအပစ်အခတ်ရပ်စဲရေးကို တောင်းဆိုထားသည်ဟု ဖော်ပြထားသည်။

ကိုးကား- NHK World

တစ်နိုင်ငံလုံးကို ရုတ်ရုတ်သဲသဲဖြစ်စေမည့် စစ်အုပ်ချုပ်ရေး ကြေညာပြီး နှစ်ရက်အကြာတွင် တောင်ကိုးရီးယား သမ္မတYoon Suk Yeol ရာထူးမှ နုတ်ထွက်ပေးရန် လူထု၏ ထောက်ခံမှု မြှင့်တက်လျက်ရှိပါသည်။ 

အကယ်၍ သမ္မတ ယွန်းဆက်ယို ရာထူးမှနုတ်ထွက်ပါက လက်ရှိ ဝန်ကြီးချုပ် ဟန်ဒက်ဆိုသူသည် ကြားဖြတ်သမ္မတတာဝန်ယူပြီး အတိုက်အခံခေါင်းဆောင် Lee Jae  Myung သည်သမ္မတအသစ် ဖြစ်လာနိုင်ခြေအများဆုံး ရှိနေပါသည်။ 

အတိုက်အခံဒီမိုကရက်တစ်ပါတီသည် မြောက်ကိုရီးယား ကွန်မြူနစ်အင်အားစုများနှင့် ချိတ်ဆက်၍ နိုင်ငံကို ဆန့်ကျင်ပြီး ဖျက်လိုဖျက်ဆီးလုပ်နေခြင်းမှ အချုပ်အခြာကို ကာကွယ်ရန်  သမ္မတက စစ်အုပ်ချုပ်ရေးအမိန့်ကို ထုတ်ပြန်ခဲ့ခြင်းဖြစ်ကြောင်း ပြောကြားထားပါသည်။ 

သမ္မတ၏ စစ်အုပ်ချုပ်ရေးအမိန့်မှာ ပျက်ပြယ်ခဲ့ပြီဖြစ်သော်လည်း တောင်ကိုရီးယားနိုင်ငံရေးပါတီ (၆) ပါတီက သမ္မတ ယွန်းဆက်ယိုကို စွပ်စွဲပြစ်တင်သည့် အဆိုကို လွှတ်တော်တွင် တင်သွင်းခဲ့ပြီး ဖြစ်ပါသည်။

တောင်ကိုရီးယားနိုင်ငံ၏ ဖွဲ့စည်းပုံအခြေခံဥပဒေအရ လွှတ်တော်အမတ် သုံးပုံနှစ်ပုံဖြစ်သည့် အမတ်စုစုပေါင်း (၂၀၀) ဦးက သမ္မတအား ဖြုတ်ချရန် ထောက်ခံမဲပေးရန် လိုအပ်ပါသည်။ ထို့အပြင် ဖွဲ့စည်းပုံအခြေခံဥပဒေဆိုင်ရာ ခုံရုံး၏ တရားသူကြီး ၉ ဦးအနက် အနည်းဆုံး ၆ ဦး က သမ္မတအား ဖြုတ်ချရန်အဆိုကို ထောက်ခံတင်သွင်းရမည် ဖြစ်ပါသည်။ ထောက်ခံမဲပေးခြင်းကို တောင်ကိုရီးယားလွှတ်တော်အမတ်များက ဒီဇင်ဘာလ ၆ ရက်နေ့ သို့မဟုတ် ၇ ရက်နေ့တွင် ပြုလုပ်မည်ဟု သိရှိရပါသည်။

လွှတ်တော်တွင် သမ္မတ Yoon Suk Yeol ၏ People Power Party အဖွဲ့ဝင် လွှတ်တော်အမတ် အနည်းဆုံး ၈ ဦး ထောက်ခံမှသာ စွပ်စွဲပြစ်တင်သည့်အဆို အထမြောက်မည်ဖြစ်သည့်အတွက် ဆက်လက်စောင့်ကြည့်ရမည် ဖြစ်ပါသည်။ 

ကိုးကား - Aljazeera

တောင်ကိုရီးယားသမ္မတ၏  ဒီဇင်ဘာလ ၃ ရက်နေ့က  ရုတ်တရက် စစ်အုပ်ချုပ်ရေးကြေညာခဲ့မှုအပေါ်   ပါလီမန်၊ အတိုက်အခံပါတီ၊ ပြည်သူများအကြား မကျေနပ်ချက်များနှင့် အုတ်အုတ်သဲသဲဖြစ်နေခြင်းကို  အမေရိကန်စစ်တပ် အနေဖြင့် စိုးရိမ်စိတ်ပူနေကြကြောင်း၊ ကမ္ဘာပေါ်ရှိ အမေရိကန်ပြည်ထောင်စု၏ ပင်လယ်ရပ်ခြား အခြေစိုက် စခန်းများအနက် အင်အားအများဆုံး အခြေစိုက်သည့်နေရာမှာ တောင်ကိုရီးယားဖြစ်ပြီး အမေရိကန်စစ်သားပေါင်း ၃၀,၀၀၀ ခန့် တာဝန်ချထားကြောင်း၊ ထိုသို့ အင်အား တောင့်တင်းသော အခြေစိုက်စစ်တပ် ချထားခြင်းမှာ မြောက်ကိုရီးယား၏ ခြိမ်းခြောက်နေမှုကို စောင့်ကြည့်ရန်နှင့်မဟာဗျူဟာအရ ပြိုင်ဖက်အင်အားကြီး တရုတ်နိုင်ငံအပေါ် ဖိအားပေးရန်ဖြစ်ကြောင်း၊ အမေရိကန် မဟာမိတ် တောင်ကိုရီးယားနိုင်ငံ၏ နိုင်ငံရေး ပရမ်းပတာဖြစ်နေခြင်းကို  ယခုအခါ မြောက်ကိုရီးယား၊ ရုရှားနှင့် တရုတ်တို့က ဂရုတစိုက်စောင့်ကြည့်နေကြကြောင်း CNN သတင်းဌာနက ဖော်ပြထားသည်။ 

ကိုးကား - CNN

အမေရိကန်ရွေးကောက်ခံ သမ္မတ ဒေါ်နယ်ထရမ့်၊ ပြင်သစ်သမ္မတ အီမန်နျူရယ်မက်ခရွန်နှင့် ယူကရိန်း သမ္မတ ဇယ်လင်စကီးတို့သည် ယူကရိန်းပဋိပက္ခ ဖြေရှင်းရေးအတွက် Elysee နန်းတော်တွင် တွေ့ဆုံ ဆွေးနွေးခဲ့ကြကြောင်း သတင်းဌာနများက ဖော်ပြခဲ့ ကြသည်။

အမေရိကန်ရွေးကောက်ခံသမ္မတ Donald Trump ၊ ပြင်သစ်သမ္မတ Emmanuel Macron နှင့် ယူကရိန်း သမ္မတ Vladimir Zelensky တို့သည် ပြင်သစ်နိုင်ငံ Élysée နန်းတော်တွင် တွေ့ဆုံမှုပြုလုပ်ခဲ့ကြောင်း သိရှိရပါသည်။ အဆိုပါတွေ့ဆုံမှုတွင်ပါဝင်သူများသည် “ကာကွယ်ရေးနှင့် ပြစ်မှုဆိုင်ရာပြဿနာများ" ကို ဆွေးနွေးခဲ့ကြပါသည်။ အဆိုပါအစည်းအဝေးသည် ယူကရိန်း ပဋိပက္ခကို ဖြေရှင်းရန် အာရုံစိုက်မည်ဟု မျှော်လင့်ရကြောင်း သတင်းအေဂျင်စီက ဖော်ပြထား ပါသည်။ ၎င်းတို့သုံးဦး၏တွေ့ဆုံမှုသည် နောက်ဆုံးထုတ်ပြန်ချက်မရှိဘဲ မိနစ်၂၀အကြာတွင် ပြီးဆုံးခဲ့ကြောင်း BFMTV က ဖော်ပြထားသည်။ 

ပြင်သစ်သမ္မတ အီမန်နျူရယ်မက်ခရွန်နှင့် ရွေးကောက်ခံ သမ္မတ ဒေါ်နယ်ထရမ့်တို့သည် ရွေးကောက်ပွဲ အနိုင်ရပြီးနောက် အမေရိကန်ခေါင်းဆောင်၏ ပထမဆုံး နိုင်ငံခြားခရီးစဉ်အဖြစ် ကြည်နူးဖွယ်စကားများ ဖလှယ်ခဲ့ကြကြောင်း၊ တစ်ချိန်တည်းမှာပင် ပြင်သစ်သမ္မတ နုတ်ထွက်ရေးအတွက် အီးယူကနေ နုတ်ထွက်ရေး တောင်းဆိုဆန္ဒပြသူများက Élysée နန်းတော်အပြင်ဘက်၌ သမ္မတ Macron ကို ဆန့်ကျင်ဆန္ဒပြမှုများ ဖြစ်ပွားနေကြောင်း၊ မကြာသေးမီက ပြင်သစ်မီဒီယာများက ပြင်သစ်သမ္မတမက်ခရွန်သည် ယူကရိန်းအား SCALP ဒုံးကျည်များဖြင့် ရုရှားပိုင်နက်ကို တိုက်ခိုက်ရန် အခွင့်အရေးပေးခဲ့ကြောင်း၊ ယခင်က ပြင်သစ်ခေါင်းဆောင်သည် ယူကရိန်းသို့ ပြင်သစ်ကိုယ်စားလှယ်တစ်ဦး စေလွှတ်နိုင်ခြေနှင့်ပတ်သက်၍ ကြေညာချက် ထုတ်ခဲ့ဖူးကြောင်း သတင်းအေဂျင်စီက ဖော်ပြထားသည်။

ကိုးကား - BFMTV