Skype ဆက်သွယ်ရေးဝန်ဆောင်မှုသည် မေလ ၅ ရက်တွင် လုပ်ငန်းလည်ပတ်မှု တရားဝင် ရပ်ဆိုင်းသွားပြီဖြစ်ကာ အသုံးပြုသူများအတွက် အကောင့်များ ထပ်မံရရှိနိုင်တော့မည်မဟုတ်ပါ။

Microsoft ကုမ္ပဏီကလည်း မေလ ၅ ရက်တွင် Skype လည်ပတ်မှုများကို ရပ်ဆိုင်းကြောင်းကြေညာခဲ့ပြီး ကုမ္ပဏီအနေဖြင့် ၎င်း၏ Microsoft Teams ပလက်ဖောင်းကို တီထွင်ရန် အာရုံစိုက်သွားမည်ဖြစ်ကြောင်း ပြောကြားထားပါသည်။

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

အိန္ဒိယသည် ၎င်း၏ ပိုင်နက်မှ အိမ်နီးချင်း ပါကစ္စတန်သို့ စီးဆင်းနေသည့် ရေပေးဝေမှုကို ကန့်သတ်ရန် စတင်နေပြီဖြစ်ပြီး အလားတူအစီအမံများ ရှိလာမည်ဟု PTI သတင်းအေဂျင်စီက အမည်မဖော်လိုသည့် သတင်းရင်းမြစ် ကိုကိုးကားပြီး ဖော်ပြခဲ့ပါသည်။

နယူးဒေလီအစိုးရက အစ္စလာမာဘတ်အစိုးသည် နယ်စပ်ဖြတ်ကျော် စစ်သွေးကြွများ၏ ကျုးကျော်မှုများကို ကူညီပေးနေကြောင်းစွပ်စွဲကာ အဓိကရေခွဲဝေမှု အိန္ဒုမြစ်ရေခွဲဝေသုံးစွဲရေး စာချုပ်ကို မကြာမီက ဆိုင်းငံ့လိုက်ပါသည်။ အစ္စလာမာဘတ်က အဆိုပါ စွပ်စွဲချက်များကို ငြင်းဆိုထားပါသည်။

တနင်္ဂနွေနေ့ (မေ ၄) တွင် အိန္ဒိယ၏အကြီးဆုံးသတင်းအေဂျင်စီ PTI က ချီနဘ် မြစ်ပေါ်ရှိ ဘဂ်လီဟာ ရေလှောင်တမံမှတစ်ဆင့် ရေစီးဆင်းမှုကို ပိတ်ဆို့ထားကြောင်း အမည်မဖော်လိုသည့် သတင်းရင်းမြစ်ကို ကိုးကားပြီး ဖော်ပြခဲ့ပါသည်။ အလားတူ အိန္ဒိယအုပ်ချုပ်သည့် ဂျမူးနှင့် ကက်ရှ်မီးယား ဒေသ မြောက်ဘက်ရှိ ဂျယ်လမ်မြစ်ပေါ်ရှိ ကီရှန်ဂန်ဂါဆည်ကိုလည်း ပိတ်ဆို့ရန် စီစဉ်နေကြောင်းလည်း ဆိုပါသည်။ 

ကမ္ဘာ့ဘဏ်၏ ပံ့ပိုးကူညီမှုဖြင့် ၁၉၆၀ ပြည့်နှစ်တွင် လက်မှတ်ရေးထိုး ခဲ့သောအိန္ဒုမြစ်ရေစာချုပ် (IWT) သည် စစ်ပွဲလေးကြိမ် ဖြစ်ပွားပြီးနောက် တွင် ပေါ်ထွက်လာခဲ့ခြင်း ဖြစ်ပါသည်။ ပါကစ္စတန်သည် ကမ္ဘာပေါ်တွင် မြစ်ရေအပေါ် အလေးပေးမှီခို အားအထားရဆုံး နိုင်ငံတစ်ခုဖြစ်ပြီး စိုက်ပျိုးရေး၊ သောက်သုံးရေနှင့် စွမ်းအင်ထုတ်လုပ်ရေးတို့အတွက် အိန္ဒုမြစ်ကို မှီခိုအားထားနေရပါသည်။ ခန့်မှန်းချက်များအရ အိန္ဒိယနိုင်ငံသည် ပါကစ္စတန်သို့ရေပေးဝေမှုကို ဖြတ်တောက်ပါက အဆိုပါနိုင်ငံအနေဖြင့် ဂျုံ၊ ဆန်နှင့် ဝါဂွမ်းကဲ့သိုသော မရှိမဖြစ်လိုအပ်သည့် စိုက်ပျိုးမြေ ၈၀ % ကျော် ထိခိုက်မည်ဖြစ်ကြောင်း သိရ ပါသည်။

ကိုးကား-Myanmar National Post

လကမ္ဘာနှင့် အင်္ဂါဂြိုဟ်တို့စံပြပုံစံငယ်များအား 3D ပုံစံဖြင့် အတိကျဆုံးဖန်တီးနိုင်မည့် စီမံကိန်းတစ်ရပ်ကို ရုရှားသိပ္ပံပညာရှင်များက စတင်လိုက်ပြီဖြစ်သည်။

ရုရှားအာကာသနည်းပညာနှင့် ဝန်ဆောင်မှုစင်တာမှ ပညာရှင်များသည် အဆိုပါစီမံကိန်းကို အသုံးချသင်္ချာပညာ၊ M.V. Keldysh RAS သုတေသနစင်တာနှင့် ပုဂ္ဂလိကကုမ္ပဏီများနှင့် ပူးပေါင်း၍ဖော်ဆောင်မည်ဖြစ်သည်။

သိပ္ပံပညာရှင်များသည် အဆိုပါစီမံကိန်းအား ပြည်တွင်းဖြစ်အဆင့်မြင့်နည်းပညာများ၊ ပလပ်ဇမာ ဒုံးပျံအင်ဂျင်များ၊ လမ်းကြောင်းပြစနစ်များ၊ ရုပ်သံကြည်လင်မှုရှိသော အလင်းနှင့် အီလက်ထရွန်နစ်စနစ်သုံးကင်မရာများ၊ 3D ပုံစံဖော်ထုတ်ရေးပရိုဂရမ်များအပြင် အခြားအဆင့်မြင့်နည်းပညာများအပေါ် အခြေခံ၍ အကောင်အထည်ဖော်ဆောင်မည်ဖြစ်သည်။

ရုရှားပညာရှင်များက ဖော်ဆောင်မည့် အဆိုပါစီမံကိန်းသည် ရုရှားသိပ္ပံပညာရှင်များ၏ ကျွမ်းကျင်မှုကို ပိုမိုတိုးတက်စေသည့်အပြင် ပြည်တွင်းဖြစ် အာကာသနည်းပညာများဖွံ့ဖြိုးတိုးတက်လာစေရေးအတွက်လည်း တွန်းအားဖြစ်စေနိုင်ကြောင်း ကျွမ်းကျင်သူများက ပြောကြားသည်။

လကမ္ဘာနှင့် အင်္ဂါဂြိုဟ်တို့စံပြပုံစံငယ်များအား 3D ပုံစံဖြင့် အတိကျဆုံးဖန်တီးနိုင်မည့်   စီမံကိန်းကိုဖော်ဆောင်ရာတွင် အသုံးပြုရန်လိုအပ်သည့် ဂြိုဟ်တုများကို ရုရှားအာကာသအဖွဲ့ ကြီးဖြစ်သည့် Roscosmos က အကူအညီပေးအပ်မည်ဖြစ်သည်။

Source: https://myawady.net.mm/

ကာဒစ်    မေ ၅

ဝေလနိုင်ငံ၏ အကြီးဆုံးသဘာဝရေကန် ဘာလာရေကန်တွင် အန္တရာယ်ရှိသော ရေညှိများကြောင့် ဂွိုင်နက်ကောင်တီအာဏာပိုင်များက ရေညှိသတိပေးချက် ထုတ်ပြန်ထားကြောင်း ယနေ့သတင်းများအရ သိရသည်။

အာရစ် အမျိုးသားဥယျာဉ်အတွင်းရှိ ဂွိုင်နက်ကောင်တီရှိ ဘာလာရေကန်၏ အစိတ်အပိုင်းများတွင် အန္တရာယ်ရှိသော ရေညှိများတွေ့ရှိပြီးနောက် ရေကန်သို့ လည်ပတ်သည့်အခါ အထူးသတိထားရန် သတိပေးချက်ထုတ်ပြန်ထားပြီး ရေကန်အတွင်းမှ ရေညှိများနှင့် တိုက်ရိုက်ထိတွေ့ခြင်းမှ ရှောင်ကြဉ်ရန် အာဏာပိုင်များက ပြည်သူများကို သတိပေးထားကြောင်း သိရသည်။

အဆိုပါ ရေကန်အတွင်းမှ ရေညှိများသည် တိရစ္ဆာန်များအတွက် အလွန်အန္တရာယ်များနိုင်ပြီး ၎င်းရေကန်မှတစ်ဆင့် အနီးရှိရေကန်များ၊ စမ်းချောင်းများအတွင်း စီးဆင်းပါက ပို၍ အန္တရာယ်များကြောင်း၊ အဆိုပါ ရေညှိများနှင့် တိုက်ရိုက်ထိတွေ့မိပါက အရေပြားနီမြန်းခြင်း၊ ပျို့အန်ခြင်း၊ မျက်စိယားယံခြင်း၊ အော့အန်ခြင်း၊ ဝမ်းလျှောခြင်းနှင့် ကြွက်သားများ သို့မဟုတ် အဆစ်အမြစ်နာကျင်ခြင်းများကို ဖြစ်စေနိုင်ကြောင်း ဆေးဝါးကျွမ်းကျင် ပညာရှင်များက ပြောကြားထားကြောင်း သိရသည်။

Source: ရတနာပုံသတင်းစာ 

မေလ ၉ ရက်တွင် ကျင်းပမည့် V-Day ကာလဖြစ်သည့် မေလ ၇ ရက်မှ ၉ ရက်အတွင်း အခမ်းအနား လုံခြုံရေးအာမခံရန် အင်တာနက်အသုံးပြုမှုကို ယာယီကန့်သတ်နိုင်ကြောင်း ရုရှားတာဝန်ရှိသူများက ယခင်က ထုတ်ပြန် ထားပါသည်။

ယင်းကိစ္စနှင့်ပတ်သက်၍ မိုဘိုင်းအော်ပရေတာများ၏ လုပ်ငန်းလည်ပတ်မှုကန့်သတ်ချက်များသည် ဘဏ်လုပ်ငန်းအခြေခံအဆောက်အအုံ၏ လုပ်ဆောင် ချက်များကို မထိခိုက်စေကြောင်း OTP Bank မှ ဒစ်ဂျစ်တယ် စီးပွားရေးဖွံ့ဖြိုးရေးဒါရိုက်တာ အိုင်ဗန် ဘက်မတ်က TASS သို့ ပြောကြား လိုက်ပါသည်။

ရုရှားနိုင်ငံ၏ ပြည်ထောင်စုအရေးပေါ်သတိပေးနှင့်တုံ့ပြန်ရေးစနစ်က မော်စကိုတွင် မေလ ၇ ရက်မှ ၉ ရက်အတွင်း နိုင်ငံတော်အဆင့် အခမ်းအနား လုံခြုံရေးအတွက် အာမခံနိုင်ရန် အင်တာနက်အသုံးပြုမှုကို ယာယီကန့်သတ်နိုင်ကြောင်း ယခင်က ထုတ်ပြန်ခဲ့သည်။ 

ထို့အပြင် POS ငွေပေးချေမှုများသည်လည်း မိုဘိုင်းအင်တာနက် မလိုအပ်ဘဲ ပုံမှန်အတိုင်း လုပ်ဆောင်နိုင်မည်ဖြစ်ကြောင်း၊ အင်တာနက်မရှိသည့်တိုင်အောင် ဘဏ်စနစ်သည် ဒစ်ဂျစ်တယ်ကတ်များဖြင့် ငွေထုတ်ယူမှုကို မှန်ကန်စွာ အလုပ်လုပ်ဦးမည်ဟု အိုင်ဗန်ဘက်မတ်က ထပ်လောင်း ပြောကြားထားပါသည်။ 

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ဇူးရစ်ချ် တက္ကသိုလ် (University of Zurich) မှ သုတေသီများသည် လူမှုကွန်ရက် Reddit ပေါ်ရှိ အသုံးပြုသူများ၏ အမြင်များကို AI ဖြင့် လွှမ်းမိုးနိုင်ခြင်းရှိ/မရှိ ကို စမ်းသပ်ရန် လျှို့ဝှက်စမ်းသပ်မှု တစ်ခုပြုလုပ်ခဲ့ပြီး ယခုအခါ ပြင်းထန်သောဝေဖန်မှုနှင့် တရားဥပဒေဆိုင်ရာအရေးယူမှုများနှင့် ရင်ဆိုင်နေရသည်။ Reddit ကုမ္ပဏီကလည်း တရားစွဲဆိုရန် စဉ်းစားနေကြောင်း ထုတ်ဖော်ပြောဆိုခဲ့သည်။

ထိုကဲ့သို့သော စမ်းသပ်မှုများသည် လူမှုကွန်ရက်အသုံးပြုသူများ၏ ယုံကြည်မှုကိုထိခိုက်စေနိုင်ပြီး AI ကို လူထုထိန်းချုပ်ရေးအတွက် အလွဲသုံးစားလုပ်နိုင်သည့် နည်းလမ်းသစ် တစ်ခုအဖြစ် ဖော်ပြနေသည်။

ပါဝင်သူများ၏ သဘောတူညီချက်မရှိဘဲ စမ်းသပ်ခြင်းသည် သိပ္ပံနည်းကျလေ့လာမှုဆိုင်ရာ စံနှုန်းများကို ချိုးဖောက်ခြင်းဖြစ်သည်။

အဆိုပါဖြစ်ရပ်သည် AI နည်းပညာ၏ စွမ်းအားနှင့် အန္တရာယ်ကို ထပ်မံသတိပေးလိုက်ခြင်းဖြစ်ပြီး နည်းပညာတိုးတက်မှုနှင့်အတူ လူ့အခွင့်အရေး၊ ကိုယ်ရေးကိုယ်တာ လုံခြုံမှုနှင့် ကျင့်ဝတ်ဆိုင်ရာ ထိန်းညှိမှုများ လိုအပ်နေဆဲဖြစ်ကြောင်း မီးမောင်းထိုးပြလိုက်ခြင်းဖြစ်သည်။

ကိုးကား- RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အမေရိကန်အစိုးရသည် NASA ရန်ပုံငွေကို လာမည့် ဘဏ္ဍာနှစ်တွင် လေးပုံတစ်ပုံနီးပါးဖြတ်တောက်ရန် ဆန္ဒရှိနေပါသည်။ အိမ်ဖြူတော်က ထုတ်ပြန်သည့် ဘဏ္ဍာနှစ်အဆိုပြုချက်အရ လက်ရှိနှစ်တွင် အမေရိကန် အစိုးရက NASA အတွက် ဒေါ်လာ ၂၄.၈ ဘီလီယံ ခွဲဝေချထားပေးသော်လည်း လာမည့်နှစ်အတွက် ဒေါ်လာ ၁၈.၈ ဘီလီယံသာ ခွဲဝေချထား ပေးလိုကြောင်း သိရပါသည်။ ၎င်းမှာ စုစုပေါင်းဘတ်ဂျက်၏ ၂၄ % ကို လျှော့ချလိုက်ခြင်းပင် ဖြစ်ပါသည်။

ထိုသို့ ဘတ်ဂျက်လျှော့ချလိုက်ပါက နိုင်ငံတကာ အာကာသစခန်း အပါအဝင် NASA ၏ လုပ်ဆောင်ချက်အားလုံးနီးပါး ထိခိုက်မည်ဖြစ်ပါသည်။ ထိုဖြတ်တောက်မှုထဲတွင် အာကာသယာဉ်ခရီးစဉ်အဖွဲ့နှင့် မသက်ဆိုင်သည့် အချို့သော သုတေသနအစီအစဉ်များလည်း ပါဝင်သွားပါသည်။ ၎င်းတို့ထဲတွင် အင်္ဂါဂြိုဟ်ကျောက်တုံးနမူနာများကို စုဆောင်းပြီး ကမ္ဘာမြေသို့ ယူဆောင်လာမည့် စီမံကိန်းလည်း ပါဝင်သွားပါသည်။

တရုတ်နိုင်ငံ မတိုင်မီ လပေါ်သို့ အမေရိကန်က ပြန်လည်သွားရောက်ရန် ကြိုးပမ်းနေပြီး အင်္ဂါဂြိုဟ်သို့ လူသားများ စေလွှတ်လိုကြောင်း အိမ်ဖြူတော် က ပြောကြားထားပါသည်။

ကိုးကား- TASS

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

တရုတ်နိုင်ငံမြောက်ပိုင်း ထျန်းကျင်းဆိပ်ကမ်းမြို့တွင် ၁၀ နှစ်နီးပါး ဆောက်လုပ်မှုရပ်နားထားသည့် ၁၁၇ ထပ်အမြင့်ရှိ Goldin Finance 117 မိုးမျှော်တိုက်ကို ဆောက်လုပ်မှုပြန်စတင်မည်ဟု တရုတ်နိုင်ငံပိုင် သတင်း ဌာနက ကြေညာထားသည်။ အမြင့်ပေ ၁၉၅၉ ပေရှိပြီး ဘဏ္ဍာရေး အကျပ်အတည်းကြောင့် ၂၀၁၅ ခုနှစ်ကတည်းက ဆောက်လုပ်မှု ရပ်နား ခဲ့ကာ ယခုဆောက်လုပ်ရေးကို ၂၀၂၇ ခုနှစ်တွင်အပြီးသတ်ရန် ရည်မှန်း ထားသည်။

လေဒဏ်၊ ငလျင်ဒဏ်တို့ကိုခံနိုင်ရည်ရှိစေရန် mega columns စနစ်ဖြင့် တည်ဆောက်ထားပြီး ထိပ်ဆုံးအလွှာက ရေကူးကန်နှင့် ရှုခင်းကြည့်ရန် နေရာပါသည့် အလွှာဖြစ်မည်။ ဟောင်ကောင်ဗိသုကာကုမ္ပဏီ P&T Group အဆိုအရ အပေါ်ထပ်အလွှာများတွင် ရုံးခန်းများနှင့် ကြယ်ငါးပွင့် ဟိုတယ် တစ်ခု ထည့်ဆောက်ရန် စီစဉ်ထားသည်။

အဆိုပါ မိုးမျှော်တိုက်ကို ၂၀၁၅ ခုနှစ် တရုတ်စတော့ စျေးကွက် ပျက်ပြီး ကတည်းက ဆောက်လုပ်မှုရပ်လိုက်ရခြင်းဖြစ်သည်။ China 117 ဟုလည်း ခေါ်သည့် ယခုအဆောက်အအုံ တည်ဆောက်ရေးကို ဟောင်ကောင် အခြေစိုက် Goldin Properties Holdings အိမ်ခြံမြေကုမ္ပဏီက တာဝန် ယူခဲ့ပြီး ကုမ္ပဏီတည်ထောင်သူ ဖန်းဆူးထုံးသည် တစ်ချိန်က ဟောင်ကောင် ၏ အချမ်းသာဆုံး စီးပွားရေးသမားများထဲမှ တစ်ဦးဖြစ်သော်လည်း ၂၀၁၅ ဂယက်ကြောင့် လုပ်ငန်းပိတ်သိမ်းလိုက်ရသည်။ ယခု ဆောက်လုပ်ရေး ပြန်စရန်ပါမစ်အရ အဆောက်အအုံနာမည်တွင် ယခင်ကုမ္ပဏီဟောင်း၏ အမည် ပါဝင်မည်မှာ သေချာမှုမရှိပါ။

စည်းမျဉ်းတင်းကြပ်မှုများရှိသည့်ကြားမှ တရုတ်နိုင်ငံသည် ကမ္ဘာပေါ်တွင် မိုးမျှော်တိုက်ဆောက်လုပ်မှု အများဆုံးနိုင်ငံဖြစ်နေသည်။ ယခင်နှစ်က ကမ္ဘာတစ်ဝန်းတည်ဆောက်ပြီးစီးခဲ့သည့် မီတာ ၂၀၀ နှင့်အထက် မိုးမျှော်တိုက် ၁၃၃ ခုအနက် ၉၁ ခုသည် တရုတ်နိုင်ငံတွင်ရှိသည်။

တရုတ်တွင် အမြင့်ဆုံးအဆောက်အအုံနှစ်ခုက ရှန်ဟိုင်းတာဝါနှင့် ရှင်းကျန့် မြို့ရှိ ဖင်အန်းဘဏ္ဍာရေးစင်တာတို့ဖြစ်ပြီး China 117 ဆောက်လုပ်ပြီး ပါကတရုတ်နိုင်ငံ၏တတိယမြောက်၊ ကမ္ဘာပေါ်တွင် ဆဋ္ဌမမြောက် အမြင့်ဆုံး မိုးမျှော်တိုက်ဖြစ်လာမည်။

ကိုးကား- Eleven

ဘိုလီးဗီးယားနိုင်ငံတွင် လူ (၅) ဦး လိုက်ပါလာသည့် လေယာဉ်တစ်စင်း သည် ဘိုလီးဗီးယားအမေဇုန်တောအတွင်းက မိကျောင်းများ ပေါများသည့်  ရွှံ့နွံအိုင်တစ်ခုထဲသို့ အရေးပေါ်ဆင်းသက်မှုလုပ်ဆောင်ခဲ့ရသော်လည်းအားလုံးအသက်ရှင်လွတ်မြောက်ခဲ့သည်ဟု ဒေသတွင်းအာဏာပိုင်များက ပြောကြားခဲ့ပါသည်။ အမျိုးသမီး(၃)ဦး၊ ကလေးငယ်တစ်ဦးနှင့် အသက် (၂၉)နှစ် အရွယ် လေယာဉ်မှူးတို့ကို ရွှံ့နွံအိုင်အတွင်းမှ ကောင်းမွန်သော အခြေအနေနှင့် အောင်မြင်စွာကယ်ဆယ်နိုင်ခဲ့သည်ဟု Beni ဒေသက အရေးပေါ်ကယ်ဆယ်ရေးစင်တာ၏ ဒါရိုက်တာ Wilson Ávila က ပြောကြားခဲ့ပါသည်။ အင်ဂျင်တစ်လုံးတပ်လေယာဉ်သည် Baures မြို့မှ (၁၈၀) ကီလိုမီတာခန့်ဝေးသည့် Trinidad မြို့ကို ပျံသန်းလာစဉ်အချိန်အတွင်း ယခုကဲ့သို့ အရေးပေါ်ဆင်းသက်မှုကို လုပ်ဆောင်ခဲ့ရခြင်းဖြစ်သည် ဟု လည်း သိရပါသည်။ လေယာဉ်သည် လက်ရှိပျံသန်းနေသည့် အမြင့်ပေမှ နိမ့်ကျလာမှုနှင့်အတူ  ရွှံ့နွံအိုင်တစ်ခုအတွင်းသို့ အရေးပေါ်ဆင်းသက်မှု လုပ်ဆောင်ခဲ့ရခြင်းဖြစ်သည်ဟု အသက်(၂၉)နှစ်အရွယ် လေယာဉ်မှူးက ပြောကြားခဲ့ပါသည်။ ၎င်းတို့နှင့် (၃) မီတာအကွာခန့်တွင် မိကျောင်းများ ရှိနေခဲ့သော်လည်း လေယာဉ်မှထွက်လာသည့် ဆီယိုစိမ့်မှုက မိကျောင်းများကို တားဆီးခဲ့သည်ဟု ထင်မြင်ကြောင်း ၎င်းက ထပ်မံပြောကြားခဲ့ ပါသည်။ ရွှံ့နွံအိုင်အတွင်း အန်နာကွန်ဒါမြွေတစ်ကောင်ကိုလည်း တွေ့ခဲ့ ရသည်ဟု လေယာဉ်မှူးက ပြောကြားခဲ့ပါသည်။ ထို့အပြင် ၎င်းတို့ (၅) ဦး သည် ရွှံနွံအိုင်အတွင်း (၃၆)နာရီကြာ ပိတ်မိနေခဲ့ခြင်းဖြစ်ပြီး ခရီးသည် တစ်ဦးယူလာသည့် ဒေသထွက်ဂျုံမှုန့်များကိုသာ စားသောက်ခဲ့ရသည်ဟု လေယာဉ်မှူးက ပြောကြားခဲ့ပါသည်။

ကိုးကား-NP News

Photo: Yahoo

ကုလသမဂ္ဂတရားသူကြီးတစ်ဦးဖြစ်သူ အသက် ၅၀ အရွယ် ယူဂန်ဒါ နိုင်ငံသူ Lydia Mugambe သည် ဗြိတိန် အောက်စဖို့ဒ်၌ ပါရဂူဘွဲ့သင်တန်းတက်နေစဉ် အိမ်ဖော်အစေခံ ယူဂန်ဒါအမျိုးသမီးငယ်တစ်ဦးကို ခေတ်သစ် ကျွန်ပြုစေခိုင်းအနိုင်ကျင့်မှုကြောင့် သူမအား ဗြိတိန် အောက်စဖို့ဒ် ခရောင်း တရားရုံးက မေလ ၂ရက်(သောကြာနေ့)တွင် ထောင်ဒဏ် ၆ နှစ် ၄ လ ချမှတ်လိုက်ပါသည်။

ဗြိတိသျှရဲတပ်ဖွဲ့ ဖော်ထုတ်ချက်အရ Lydia Mugambe သည် သူမ၏ အောက်စဖို့ဒ်ရှိအိမ်တွင် အိမ်ဖော်ယူဂန်ဒါအမျိုးသမီးငယ်တစ်ဦးအား လစာ မပေးဘဲ ၁၈ နာရီနီးပါး အလုပ်စေခိုင်းခြင်း၊ အိမ်သာထဲတွင် အိပ်စေခြင်း၊ ခရီးသွားလိုက်ပါခွင့်မပြုခြင်း၊ မိသားစုနှင့်ဆက်သွယ်ခွင့်မပြုခြင်း စသည် တို့ကို ကျူးလွန်ခဲ့ပါသည်။

အောက်စဖို့ဒ်ခရောင်းတရားရုံးတရားသူကြီး David Foxton က “လူ့ဂုဏ်သိက္ခာကို အလွန်အမင်းချိုးနှိမ်သည့် ရက်စက်ကြမ်းကြုတ်သော ပြုမူချက်” ဟု သတ်မှတ်ပြီး ကုလသမဂ္ဂတရားသူကြီး Mugambe ကို ထောင်ဒဏ် ၆ နှစ် ၄ လ ချမှတ်လိုက်ခြင်းဖြစ်ပါသည်။

ထို့ပြင် Mugambe သည် UN သံတမန်အခွင့်အရေးကို ကိုယ်ကျိုးအတွက် အသုံးချကာ အိမ်အစေခံအတွက် ဗီဇာလိမ်လည် လျှောက်ထားရယူခဲ့သည် ဟု သိရပါသည်။

ကိုးကား- The Guardian

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃