လူထုထင်မြင်ခံစားမှုဆိုင်ရာ သုံးသပ်ရေးအစီအစဉ်မှ ပြုလုပ်ခဲ့သော လေ့လာချက်အသစ်အရ ရုရှားနိုင်ငံသားများ၏ အမေရိကန်အပေါ် အမြင်များသည် လွန်ခဲ့သော ၁၀ နှစ်အတွင်း တိုးတက်ကောင်းမွန်လာ ခဲ့သော်လည်း ယေဘုယျအားဖြင့် ဆန့်ကျင်ဘက် ခံယူချက်များက လွှမ်းမိုး နေဆဲဖြစ်သည်။

အဆိုပါလေ့လာချက်တွင် ဇွန်လအစောပိုင်းက တစ်နိုင်ငံလုံးမှ လူပေါင်း ၁,၅၀၀ ကို စစ်တမ်းကောက်ယူခဲ့ပြီး အင်္ဂါနေ့ (ဇွန် ၂၄) တွင် ထုတ်ပြန် ခဲ့သော ရလဒ်များအရ ၂၀၁၅ ခုနှစ်နှင့် နှိုင်းယှဉ်ပါက အများပြည်သူတို့၏ ခံယူချက်များ သိသာစွာ ပြောင်းလဲလာသည်ကို တွေ့ရသည်။

စစ်တမ်းအရ အမေရိကန်နိုင်ငံအပေါ် အပြုသဘောဆောင်သော ခံယူချက် ရှိသည်ဟု ဖြေကြားသူ ၁၈% ရှိပြီး လွန်ခဲ့သော ၁၀ နှစ်က ၁၀% သာ ရှိခဲ့သည်နှင့် နှိုင်းယှဉ်ပါက နှစ်ဆနီးပါးမျှ တိုးတက်လာခြင်းဖြစ်သည်။ အမေရိကန်အပေါ် အပျက်သဘောဆောင်သော အမြင်ရှိသူများ၏ အချိုး မှာ ထိုကာလအတွင်း ၃၈% မှ ၃၁% သို့ ကျဆင်းသွားခဲ့သည်။

အမေရိကန်နိုင်ငံနှင့် ပတ်သက်၍ လုံးဝဂရုမစိုက်ဟု ဖြေကြားသူများ၏ အရေအတွက်လည်း ၄၆% မှ ၄၀% သို့ ကျဆင်းသွားခဲ့ပြီး ၁၁% မှာမူ ၎င်းတို့၏ ခံစားချက်ကို အတိအကျ မပြောနိုင်ကြောင်း ဖြေကြားခဲ့သည်။

လေ့လာချက်အရ ခံယူချက်များ ပြောင်းလဲလာသော်လည်း ရုရှား-အမေရိကန် ဆက်ဆံရေး၏ အနာဂတ်နှင့်ပတ်သက်၍ မျှော်လင့်ချက် များမှာ ရောထွေးနေဆဲဖြစ်ကြောင်း ဖော်ပြထားသည်။

ဖြေကြားသူများ၏ လေးပုံတစ်ပုံနီးပါး (၃၁%) က ဆက်ဆံရေး တိုးတက် ကောင်းမွန်လာနိုင်သည့် အကြောင်းရင်းများ ရှိသည်ဟု ယူဆကြပြီး ၇% ကမူ ဆက်ဆံရေး ပိုမိုဆိုးရွားလာမည်ဟု ယုံကြည်ကြသည်။ ဖြေကြားသူ ၏ သုံးပုံတစ်ပုံကျော် (၃၉%) က ဘာမျှမပြောင်းလဲဘဲ ရှိနေဦးမည်ဟု မျှော်လင့်ထားကြပြီး ၂၃% ကမူ အတိအကျ မပြောနိုင်ကြောင်း ဖြေကြား ခဲ့သည်။

ထို့အပြင် စစ်တမ်းဖြေကြားသူများ၏ ၄၈% က နောက်ဆုံးတွင် မော်စကိုနှင့် ဝါရှင်တန်တို့သည် မိတ်ဖက်ဆန်သော ဆက်ဆံရေးကို တည်ဆောက်နိုင်မည်ဟု ယုံကြည်ကြောင်း ဖော်ပြခဲ့သည်။ ထိုသို့ ဖြစ်လာရန် လိုအပ်သည့် အခြေအနေများအဖြစ် ယူကရိန်းပဋိပက္ခ ရပ်စဲရေး၊ ညှိနှိုင်းဆွေးနွေးမှုများ၊ အပြန်အလှန် နားလည်မှုနှင့် ယုံကြည်မှု ပြန်လည်တည်ဆောက်ရေးတို့ကို အဓိကထား ဖော်ပြခဲ့ကြသည်။

ပြည်ပရေးရာမူဝါဒဆိုင်ရာ မေးခွန်းတွင် အများစု (၆၁%) က ရုရှားသည် အမေရိကန်နှင့် ရင်းနှီးသော ဆက်ဆံရေးကို ဦးတည်သင့်ကြောင်း ဖြေကြားခဲ့သည်။ သို့သော် လေးပုံတစ်ပုံနီးပါး (၃၁%) က “တန်ဖိုးထား မှုနှင့် အတွေးအခေါ်ဆိုင်ရာ” နက်ရှိုင်းသော ကွာခြားချက်များကြောင့် ထိုသို့သော ချိတ်ဆက်မှုသည် မဖြစ်နိုင်ဟု ထောက်ပြခဲ့သည်။

အမေရိကန်သမ္မတ ဒေါ်နယ်ထရမ့်နှင့်ပတ်သက်၍ ၃၆% က အပြုသဘောဆောင်သော အမြင်ရှိကြောင်း၊ ၂၆% က အပျက်သဘောဆောင်သော အမြင်ရှိကြောင်း ဖော်ပြခဲ့သည်။ ထို့အပြင် ၄၇% က ထရမ့်၏ ဆုံးဖြတ်ချက်များသည် စိတ်ခံစားမှုအပေါ် အခြေခံသည်ဟု ယူဆကြပြီး ၂၈% ကမူ ၎င်း၏ဆုံးဖြတ်ချက်များ ယုတ္တိရှိသည်ဟု ဖြေကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဖနွမ်းပင် ဇွန် ၂၄ 

ကမ္ဘောဒီးယားနိုင်ငံ ကမ်းခြေဒေသများဖြစ်သည့် ဖရဲသီဟာနု ပြည်နယ်နှင့် ကော့ကုံးပြည်နယ်တို့တွင် မိုးသည်းထန်စွာရွာသွန်းကာ ရေကြီးရေလျှံမှုဖြစ်ပေါ်နေမှုကြောင့် ဇွန် ၂၃ ရက်က မြေပြိုကျကာ ဒေသခံနှစ်ဦး ပျောက်ဆုံးနေကြောင်း ကမ္ဘောဒီးယား အာဏာပိုင်အဖွဲ့အစည်းက ထုတ် ပြန်ခဲ့သည်ဟု ယနေ့သတင်းများ တွင် ဖော်ပြထားသည်။ 

ပျောက်ဆုံးနေသူ နှစ်ဦးအနက် တစ်ဦးမှာ ဖရဲသီဟာနုပြည်နယ် သီဟာနှောင့်ဗီးလ်မြို့မှ အသက် ၅၄ နှစ်အရွယ် ထရိုင်ဖဲလေဆိုသည့်အမျိုးသမီးဖြစ်ပြီး ကျန်တစ်ဦးကိုမူ အတည်မပြုနိုင်သေးဘဲ ရဲတပ်ဖွဲ့ဝင်များက ကြိုးစား ရှာဖွေနေဆဲဖြစ်ကြောင်း သီဟာနှောင့်ဗီးမြို့ ရဲတပ်ဖွဲ့က ထုတ်ပြန်ခဲ့သည်။ "မြေပြိုကျမှုကြောင့် ပျောက်ဆုံးနေတဲ့အမျိုးသမီးဟာ စားဖိုမှူး တစ်ယောက်ဖြစ်ပြီး အလုပ်ပြီးလို့ မော်တော်ဆိုင်ကယ်နဲ့ နေအိမ် ကို ပြန်လာရာမှာ ရေလွှမ်းနေတဲ့ လမ်းကို ဖြတ်သန်းမောင်းနှင်စဉ် မြေပြိုကျသွားခဲ့ပြီး ရေစီးနဲ့အတူ ပျောက်ဆုံးသွားခဲ့ပါတယ်။ ကယ်ဆယ်ရေးဝန်ထမ်းတွေနဲ့ ရဲတပ်ဖွဲ့ ဝင်တွေကလည်း အမြန်ဆုံးရှာဖွေတွေ့ ရှိနိုင်ဖို့ ကြိုးစားနေပါတယ်”ဟု သီဟာနှောင့်ဗီးလ်မြို့ အာဏာပိုင် အဖွဲ့အစည်းမှ ပြောရေးဆိုခွင့်ရှိသူ ဒါရာဗူသ်က ပြောကြားခဲ့သည်။ 

မိုးရေချိန်မြင့်မားစွာ ရွာသွန်းနေဆဲဖြစ်သည့်အတွက် ရေကြီးရေလျှံမှုအခြေအနေမှာ ပိုမိုဆိုးရွား လာနိုင်ကြောင်းလည်း ကမ္ဘောဒီးယား မိုးလေ၀သဦးစီးဌာနက ထုတ်ပြန်ခဲ့သည်။

 Ref: Russia Today 

Trs: Sai Sat

YDNB Newspaper

Photo : Asian News Network

ဝါရှင်တန် ဇွန် ၂၄

အမေရိကန်နိုင်ငံ အခြေစိုက် Space- X ကုမ္ပဏီသည် Transporter-14 မစ်ရှင်ဖြင့် ဂြိုဟ်တု အမျိုးမျိုး အစင်း ၇ဝ ကို ဇွန် ၂၃ ရက်တွင် လွှတ်တင်ခဲ့ကြောင်း သိရသည်။

အထက်ပါဂြိုဟ်တုများ သယ်ဆောင်ထားသော ဖယ်လ်ကွန် ဒုံးပျံကို ကယ်လီဖိုးနီးယားပြည်နယ် ဗင်ဒန်ဘာ့ဂ် အာကာသစခန်း မှတစ်ဆင့် လွှတ်တင်ခဲ့သည်။ Transporter-14 မစ်ရှင်လွှတ်တင်ပြီး ၈ ဒသမ၅ မိနစ်အကြာတွင် ဖယ်လ်ကွန် ၉ ဒုံးပျံ၏ ပထမအဆင့် ပင်မဒုံးယာဉ်သည် ပစိဖိတ်သမုဒ္ဒရာအတွင်း စောင့်ဆိုင်းနေသည့် မောင်းသူမဲ့ တွဲရေယာဉ်ပေါ်သို့ အောင်မြင်စွာပြန်လည် ဆင်းသက်နိုင်ခဲ့သည်။

လွှတ်တင်ပြီး ၅၄ မိနစ်ခန့်အကြာတွင် ဖယ်လ်ကွန် ၉ ၏ ထိပ်ဖူးအဆင့်ဒုံးယာဉ်သည် သယ်ဆောင်ထားသော ဂြိုဟ်တုအစင်း ၇၀ ကို နှစ်နာရီကြာအချိန်ယူ၍ သက်ဆိုင်ရာပတ်လမ်းများပေါ်သို့ ပို့ဆောင်ပေးနိုင်ခဲ့ပြီး Transporter 14 မစ်ရှင်ဖြင့် လွှတ်တင်ခဲ့သော ဂြိုဟ်တုများထဲတွင် အငယ်စားဂြိုဟ်တုများ ကျူဆက်ဂြိုဟ်တုငယ်များ ကမ္ဘာ့လေထုလွှာအတွင်း ပြန်လည်ဝင်ရောက်မည့် စမ်းသပ်ဂြိုဟ်တုငယ်များပါဝင်ပြီး ကွယ်လွန်သူများ၏ အရိုးပြာများနှင့် လူသားတို့၏ မျိုးဗီဇအခြေခံမော်လီကျုး(ဒီအင်န်အေ)များ ထည့်သွင်းထားသည့် ဂြိုဟ်တု တစ်စင်းလည်း ပါဝင်သည်။

Ref: Russia Today

Trs: KKD

Photo - Space

YDNB Newspaper

ရုရှားနိုင်ငံပိုင် ကာကွယ်ရေးလုပ်ငန်းအဖွဲ့ကြီး Rostec က အလွန် အားကောင်းသော လေဆာရောင်ခြည်ကိုအသုံးပြု၍ မပေါက်ကွဲသေးသောခဲယမ်းများကို ဖျက်ဆီးရန်အတွက် အဝေးထိန်းစနစ်ဖြင့် ထိန်းချုပ်မောင်းနှင်နိုင်သည့် စက်ရုပ်၏ရှေ့ပြေးပုံစံကို ထုတ်ဖော်ပြသခဲ့သည်။ အဆိုပါ စနစ်ကို ရုရှား၏ Tula ဒေသ၌ ကျင်းပသော စက်မှုအင်ဂျင်နီယာပြပွဲတွင် ပြသခဲ့ပြီး Rostec မှ အင်္ဂါနေ့ (ဇွန် ၂၄) တွင် အသေးစိတ်ဖော်ပြ မိတ်ဆက်ခဲ့သည်။

ဖော်ပြချက်အရ အဆိုပါစက်ရုပ်သည် အဝေးထိန်းဖောက်ခွဲမှုစနစ် တပ်ဆင်ထားသောမိုင်းများကို ဖျက်သိမ်းရန်အတွက် ဒီဇိုင်းထုတ်ထားပြီး လက်ဖြင့် ကိုင်တွယ်ဖျက်သိမ်းရန် အလွန်အန္တရာယ်များသော အခြေအနေများတွင် အသုံးပြုနိုင်သည်။ လေဆာရောင်ခြည်သည် မိုင်းအခွံကို အရည်ပျော်စေနိုင်ပြီး အတွင်းရှိပေါက်ကွဲစေနိုင်သောပစ္စည်းများကို အရည်အဖြစ် ပြောင်းလဲနိုင်သည်ဟု သိရသည်။

Rostec ၏ အဆိုအရ ထိုစက်ရုပ်သည် ဘက်ထရီဖြင့်လည်ပတ်ပြီး ကီလိုမီတာများစွာ အကွာအဝေးအထိ ထိန်းချုပ်နိုင်သည်။ ၎င်း၏အလိုအလျောက် မောင်းနှင်လည်ပတ်နိုင်စွမ်းကြောင့် ရှေ့တန်းစစ်မျက်နှာနှင့် နီးကပ်သော အန္တရာယ်ရှိသည့်နေရာများတွင်ပင် အသုံးပြုနိုင်သည်။

စက်ရုပ်ကို ခြေရာခံကိုယ်ထည်စနစ်ဖြင့် တည်ဆောက်ထားပြီး တစ်နာရီ လျှင် ၂၅ ကီလိုမီတာအမြန်နှုန်းအထိ မောင်းနှင်နိုင်သော လျှပ်စစ်မော်တာ တပ်ဆင်ထားသည်။ ကင်မရာနှစ်လုံးပါရှိပြီး တစ်ခုသည် အမှောင်ထဲတွင် မြင်နိုင်စွမ်းရှိသော အနီအောက်ရောင်ခြည်သုံး ကင်မရာဖြစ်ကြောင်း ကုမ္ပဏီမှ ဖော်ပြခဲ့သည်။ လက်ရှိတွင် အဆင့်မြှင့်တင်မှုများပြီးစီးကာ အမြောက်အမြားထုတ်လုပ်ရန် အဆင်သင့်ဖြစ်နေသည်ဟု သတင်းများအရ သိရှိရပါသည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဝါရှင်တန် ဇွန် ၂၄ 
Amazon ကုမ္ပဏီ၏ ပရောဂျက်ကွီပါ အင်တာနက်ဝန်ဆောင် မူဂြိုဟ်တုကွန်ရက်အတွက် ဂြိုဟ်တု ၂၇ စင်းကို United Launch Alliance (ULA) ၏ အက်တလပ်စ်-၅ ဒုံးပျံဖြင့် ဖလော်ရီဒါပြည်နယ် ကိပ်ကာနေဗာရယ်လ် အာကာသ စခန်းမှတစ်ဆင့် ဇွန် ၂၃ ရက်တွင် လွှတ်တင်ခဲ့ကြောင်း သိရသည်။ 
Amazon ကုမ္ပဏီသည် မူလ က အဆိုပါဂြိုဟ်တု ၂၇ စင်းကို ဇွန် ၁၆ ရက်တွင် လွှတ်တင်ရန်စီစဉ် ခဲ့သော်လည်း အက်တလပ်စ်ဒုံးပျံယာဉ် ဒုံးအင်ဂျင်ပြဿနာတစ်ရပ်ကြောင့် ဇွန် ၂၃ ရက်မှပင် လွှတ်တင်နိုင်ခဲ့ခြင်း ဖြစ်ကြောင်း သိရသည်။

၎င်းဂြိုဟ်တုများသည် ပရော ဂျက်ကွီပါ ဂြိုဟ်တုကွန်ရက် အတွက် United Launch Alliance ကုမ္ပဏီက လွှတ်တင်ပေးခဲ့သော ဒုတိယအသုတ်ဂြိုဟ်တု များဖြစ်ကြသည်။

ပရောဂျက်ကွီပါ ဂြိုဟ်တု ကွန်ရက်အတွက် ပထမအသုတ် ဂြိုဟ်တု ၂၇ စင်းကို ယခုနှစ် ဧပြီ၂၈ ရက်တွင်United Launch Alliance ကုမ္ပဏီက လွှတ်တင်ပေးခဲ့ပြီးဖြစ်သည်။

Amazon ကုမ္ပဏီသည် ပရောဂျက်ကွီပါ အင်တာနက်ဝန်ဆောင်မှု ဂြိုဟ်တုကွန်ရက်ကို ဂြိုဟ်တု အစင်းပေါင်း ၃၂၀၀ ဖြင့် ဖွဲ့စည်း တည်ဆောက်ရန် စီစဉ်ထားကြောင်း သိရသည်။

Amazon ၏ ပရောဂျက်ကွီပါ ဂြိုဟ်တုကွန်ရက် တည်ဆောက်ရေးမစ်ရှင်များအနက် အများစုကို United Launch Alliance ကုမ္ပဏီ က တာဝန်ယူ လွှတ်တင်ပေးမည် ဖြစ်ကြောင်း သိရသည်။

Ref: Sputnik News

Trs: KKO

YDNB Newspaper

ရုရှား၏ နိုင်ငံပိုင် လျှပ်စစ်ဓာတ်အားတင်ပို့ရေးကုမ္ပဏီ Inter RAO ၏ ခန့်မှန်းချက်အရ ၂၀၂၅ ခုနှစ် ပထမနှစ်ဝက်အတွင်း တရုတ်သို့ လျှပ်စစ် ဓာတ်အား တင်ပို့မှုမှာ ယခင်နှစ်နှင့် နှိုင်းယှဉ်ပါက ကြီးမားစွာ ကျဆင်း သွားခဲ့သည်။ အဆိုပါကျဆင်းမှုသည် ရုရှား၏အရှေ့ဖျားဒေသတွင် လျှပ်စစ် အသုံးပြုမှု တိုးမြင့်လာခြင်းကြောင့် ပြည်တွင်း လိုအပ်ချက်များအတွက် ကန့်သတ်မှုများ ချမှတ်ရခြင်းနှင့် ဆက်စပ်နေသည်။

တရုတ်သည် ကမ္ဘာ့အကြီးဆုံး လျှပ်စစ်စွမ်းအင်သုံးစွဲသည့် နိုင်ငံဖြစ်ပြီး Ember Energy ၏ အချက်အလက်များအရ ၂၀၂၄ ခုနှစ်တွင် ကမ္ဘာ့ လျှပ်စစ်လိုအပ်ချက်၏ သုံးပုံတစ်ပုံကို တရုတ်မှ အသုံးပြုခဲ့သည်။

Inter RAO ၏ CEO Sergey Drevgal က Vedomosti သတင်းစာနှင့် ပြောကြားရာတွင် ယခုနှစ် ပထမနှစ်ဝက်အတွင်း တရုတ်သို့ လျှပ်စစ် ဓာတ်အား တင်ပို့မှုမှာ ၄၄% ကျဆင်းခဲ့ကြောင်း ဖော်ပြခဲ့သည်။ ထို့အပြင် ၂၀၂၄ ခုနှစ်တွင် ရုရှား၏ စုစုပေါင်းလျှပ်စစ်ဓာတ်အား တင်ပို့မှုမှာ ၁၇.၆% ကျဆင်းကာ ၈.၅၃ ဘီလီယံ ကီလိုဝပ်နာရီသာ ရှိခဲ့ကြောင်း ၎င်းက ထည့်သွင်း ပြောကြားခဲ့သည်။

စိန့်ပီတာစဘတ် အပြည်ပြည်ဆိုင်ရာ စီးပွားရေးဖိုရမ် (SPIEF) တွင် ကျင်းပသည့် သတင်းစာရှင်းလင်းပွဲ၌ Drevgal က အိမ်နီးချင်းနိုင်ငံ ဖြစ်သည့် တရုတ်သို့ လျှပ်စစ်ဓာတ်အားပေးဝေမှု ကျဆင်းရခြင်း၏ အဓိက အကြောင်းရင်းမှာ ရုရှား၏အရှေ့ဖျားဒေသတွင် လျှပ်စစ်လိုအပ်ချက်မြင့်တက်လာခြင်းနှင့် အရှေ့ပိုင်းရှိ ရေအားလျှပ်စစ်ဆည်များတွင် ရေအရင်းအမြစ် နည်းပါးမှုတို့ကြောင့် ဖြစ်ကြောင်း ရှင်းပြခဲ့သည်။

"လက်ရှိကန့်သတ်ချက်များကို ထည့်သွင်းစဉ်းစားပါက၊ ယခုနှစ်အတွက် တရုတ်သို့ လျှပ်စစ်ဓာတ်အားပေးဝေမှုမှာ ၂၀၂၄ ခုနှစ်အဆင့်ထက် ပိုမို နည်းပါးလာမည်ဟု ခန့်မှန်းရပါသည်" ဟု Drevgal က ပြောကြား ခဲ့သည်။

၂၀၂၄ ခုနှစ်တွင် ရုရှားမှ တရုတ်သို့ လျှပ်စစ်ဓာတ်အားပေးဝေမှုမှာ ကီလို ဝပ်နာရီ ၀.၉ ဘီလီယံသာ ရှိခဲ့ပြီး၊ ၂၀၂၃ ခုနှစ်က စံချိန်တင် ၃.၁ ဘီလီယံ ကီလိုဝပ်နာရီနှင့် နှိုင်းယှဉ်ပါက သိသိသာသာ ကျဆင်းသွားခဲ့သည်။

Inter RAO ၏ CEO Sergey Drevgal က ဆက်လက်ပြောကြားရာတွင် ၂၀၂၅ ခုနှစ်အတွင်း ရုရှား၏ လျှပ်စစ်ဓာတ်အား အဓိက တင်ပို့ရာ နိုင်ငံများဖြစ်သည့် ကာဇက်စတန်နှင့် မွန်ဂိုးလီးယားသို့ပေးဝေမှုမှာ မြင့်မား စွာ ဆက်ရှိနိုင်ကြောင်း မှတ်ချက်ပြုခဲ့သည်။

ထို့အပြင် ၎င်းက ကာဂျစ္စတန် သို့တင်ပို့မည့် လျှပ်စစ်ပမာဏသည် အိမ်နီးချင်းနိုင်ငံဖြစ်သည့် ကာဇက်စတန်၏ ဓာတ်အားလိုင်း သယ်ဆောင် နိုင်စွမ်းအပေါ် တိုက်ရိုက်မူတည်မည်ဖြစ်ကြောင်း ဖြည့်စွက် ပြောကြား ခဲ့သည်။

သို့သော် ၎င်းသည် စုစုပေါင်းလျှပ်စစ်ဓာတ်အား တင်ပို့မှုပမာဏနှင့် ပတ်သက်၍ ခန့်မှန်းချက်များ မပြုလုပ်ဘဲ၊ နောက်ဆုံးရလဒ်သည် ရုရှား နှင့် နိုင်ငံတကာရှိ လျှပ်စစ်သုံးစွဲမှုအလေ့အထများ၊ ပြည်တွင်းနှင့် နိုင်ငံတကာ လျှပ်စစ်စျေးကွက်၏ စျေးနှုန်းအတက်အကျများ၊ ငွေလဲနှုန်းနှင့် အခြားအချက်များစွာအပေါ် မူတည်နေကြောင်း ရှင်းပြခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

နိုက်ထရိတ်ဆိုတာကို စွန့်ပစ်ရေဆိုးတွေထဲမှာ အများဆုံးတွေ့ရလေ့ရှိပါတယ်။ အဲဒီ နိုက်ထရိတ်ဆိုတာတွေက အပင်တွေ ကြီးထွားရှင်သန်မှုအတွက် တကယ့်ကိုအရေးပါတဲ့ အရာဖြစ်ပေမယ့်လည်း ရေထဲမှာ ပမာဏအလွန်များပြားစွာ ပါဝင်နေရင်တော့ အဲဒီရေရဲ့အရည်အသွေးကလည်း ဆိုးဝါးစွာ ကျဆင်းသွားရပါတယ်။ ဒါဆိုရင် ရေထဲကနေ အဲဒီနိုက်ထရိတ်တွေကို ဘယ်လိုဖယ်ရှား ရင်ကောင်းမလဲဆိုတာကို သုတေသန ပညာရှင်များ ကလေ့လာမှုတွေ လုပ်ဆောင်ခဲ့ကြပါတယ်။

ယေးတက္ကသိုလ်မှသုတေသန ပညာရှင်များဟာ ရေဆိုးရေညစ်တွေထဲကနေ နိုက်ထရိတ်ကို ခွဲထုတ်ပြီး အမိုးနီးယားအဖြစ် ပြောင်းလဲပေးနိုင်မယ့်နည်း လမ်းတစ်ခုကို ဖော်ထုတ်လိုက်ပါတယ်။ အဲဒီနည်းလမ်းက တော်တော်လေးကို အကျိုးရှိတယ်လို့ ပြောရမှာပါ။ ဘာကြောင့်လဲဆိုရင် နိုက်ထရိတ်ကိုခွဲထုတ်လိုက်ခြင်းအားဖြင့် သန့်ရှင်းတဲ့ရေကိုလည်း ရရှိမယ်။ ဓာတ်မြေဩဇာနဲ့ ကာဗွန်ကင်းစင်တဲ့လောင်စာဆီကို ထုတ်လုပ်နိုင်စေမယ့် အဖိုးတန်လှသော အရင်းအမြစ် ကိုလည်း ရရှိမှာဖြစ်ပါတယ်။

နိုက်ထရိတ်ကိုခွဲထုတ်ပြီး ဓာတ်မြေဩဇာဖြစ်တဲ့ အမိုးနီးယားအဖြစ် ပြောင်းလဲဖို့ဆိုတာက တကယ့် ကိုထူးခြားလှတဲ့ လုပ်ငန်းစဉ်ကြီးတစ်ခုမဟုတ်ဘူး လို့ဆိုနိုင်ပေမယ့်လည်း အဲဒီပြောင်းလဲမှုကိုပဲ  ထိထိရောက်ရောက်နဲ့ ကျယ်ကျယ်ပြန့်ပြန့် လုပ်နိုင်စေဖို့ ဆိုတာကတော့ တကယ့်ကိုစိန်ခေါ်မှုကြီး တစ်ခုပါပဲ။ အဲဒီစိန်ခေါ်မှုတွေက မလိုလားအပ်တဲ့ ဘေးထွက် ပစ္စည်းအနည်းဆုံးနဲ့ အမိုးနီးယားကိုရရှိစေဖို့ နိုက်ထရိတ်ကိုဘယ်လို ခွဲထုတ်မလဲ ဆိုတာရယ်၊  အဲဒီနည်းလမ်းကို ဘယ်လိုမျိုးအမြန်ဆုံး လုပ်မလဲဆိုတာရယ်တို့ဖြစ်ပါတယ်။

ဒီအတွက် ယေးတက္ကသိုလ်မှ သုတေသနပညာရှင်များက အိုင်းယွန်းနိုဖိုးဆိုတဲ့ မော်လီကျူးတစ်ခုကို မိတ်ဆက်လိုက်ပါတယ်။ အဲဒီမော်လီကျူးကဘယ် လိုအလုပ်လုပ်လဲဆိုရင် နိုက်ထရိတ်ကို အမိုးနီးယား အဖြစ်ပြောင်းလဲတဲ့ လုပ်ငန်းစဉ်မှာ ပေါ်ထွက်လာတဲ့ နိုက်ထရိုက်တွေကိုဆွဲယူမယ့် သံလိုက်တုံးလိုမျိုး လုပ်ဆောင်တာပါ။   ဒါကိုအသုံးပြုပြီး  ပြောင်းလဲမှု လုပ်ငန်းစဉ်ကို လုပ်ဆောင်လိုက်တဲ့အတွက် အမိုးနီးယားကို အသုံးပြုနိုင်လောက်တဲ့ ပမာဏအထိ ထွက်လာစေတာဖြစ်ပါတယ်။

နောက်တစ်ခုတီထွင်မှုက လျှပ်စစ်စက်ကွင်းပါရှိတဲ့ အလွှာပါးတစ်ခုဖြစ်ပါတယ်။ အဲဒီအလွှာပါးထဲမှာ ကြေးနဲ့ကာဗွန်နန်နိုအချောင်းလေးများပါဝင်ပါတယ်။ သူကပြောင်းလဲမှု လုပ်ငန်းစဉ်ကို အလွန်မြန်ဆန်စွာ လုပ်ဆောင်ပေး နိုင်စွမ်း ရှိတာကိုတွေ့ရပါတယ်။ ပုံမှန် အားဖြင့်ဆိုရင် နိုက်ထရိတ်ကနေ အမိုးနီးယားရရှိဖို့ ပြောင်းလဲတဲ့ လုပ်ငန်းစဉ်က နာရီနဲ့ချီပြီးကြာမြင့်လေ့ ရှိပါတယ်။ အခုတော့ အချိန် ၆ စက္ကန့်အတွင်းမှာပဲ လုပ်ငန်းစဉ်တစ်ခုလုံး   အပြီးသတ်သွားနိုင်တာကို တွေ့ရတာကြောင့်  ဒီနည်းလမ်းက  လက်တွေ့ပိုပြီး အလုပ်တွင်မှာ အမှန်ပါပဲ။

MWD Web Portal

နည်းပညာသတင်း

မက္ကဆီကိုသို့ ကားအသစ်များ ပို့ဆောင်နေသော ကုန်တင်သင်္ဘော တစ်စီးသည် သင်္ဘောပေါ်တွင် မီးလောင်မှုဖြစ်ပွားပြီး မီးငြှိမ်းသတ်၍မ ရသည့်အတွက် သင်္ဘောသားများ သင်္ဘောစွန့်ခွာထွက်ပြေးခဲ့ရကာ ရက် သတ္တပတ်အတန်ကြာပြီးနောက် မြောက်ပစိဖိတ်သမုဒ္ဒရာတွင် နစ်မြုပ် သွားခဲ့သည်။

အဆိုပါ "Morning Midas" သင်္ဘောသည် အလာစကာပြည်နယ်ရှိ အလူရှီယန်ကျွန်းစုများအနီး အပြည်ပြည်ဆိုင်ရာရေပိုင်နက်အတွင်းတနင်္လာနေ့ (ဇွန် ၂၃) က နစ်မြုပ်သွားခဲ့ကြောင်း လန်ဒန်အခြေစိုက် Zodiac Maritime သင်္ဘောစီမံခန့်ခွဲမှုကုမ္ပဏီက ထုတ်ပြန်ချက်တွင် ဖော်ပြ ထားသည်။ 

အမေရိကန်ကမ်းခြေစောင့်တပ်ဖွဲ့၏ အလာစကာအခြေစိုက် ပြောရေး ဆိုခွင့်ရှိသူ Petty Officer Cameron Snell က “လက်ရှိအချိန်တွင် မည်သည့်ပင်လယ်ပြင်ညစ်ညမ်းမှုမျှ မတွေ့ရသေးပါ” ဟုပြောကြားခဲ့ပြီး “ညစ်ညမ်းမှုများကို ကာကွယ်နိုင်ရန် ကယ်ဆယ်ရေးသင်္ဘောများလည်း နေရာတွင် အဆင်သင့်ရှိနေပါသည်” ဟု ဖြည့်စွက်ပြောကြားခဲ့သည်။

ထုတ်ပြန်ချက်အရ မီးလောင်ပျက်စီးမှုနှင့်အတူ ဆိုးရွားသော ရာသီဥတု နှင့် ရေစိမ့်ဝင်မှုတို့ကြောင့် ကုန်တင်သင်္ဘောသည် ကုန်းမြေမှ မိုင် ၄၁၅ (ကီလိုမီတာ ၇၇၀) အကွာ၊ ပေ ၁၆,၄၀၄ (မီတာ ၅,၀၀၀) အနက်ရှိ ပင်လယ်ပြင်တွင် နစ်မြုပ်သွားခဲ့ကြောင်း သိရသည်။

သင်္ဘောပေါ်တွင် မက္ကဆီကိုရှိ ပစိဖိတ်သမုဒ္ဒရာဆိပ်ကမ်းကြီးတစ်ခုသို့ ပို့ဆောင်ရန်ရှိသည့် ကားအသစ် ၃,၀၀၀ ခန့် တင်ဆောင်ထားခဲ့သည်။ သင်္ဘောမနစ်မြုပ်မီ ကားများအား ဖယ်ရှားနိုင်ခဲ့ခြင်း ရှိ/မရှိကို ချက်ချင်း မသိရှိရသေးဘဲ Zodiac Maritime ကုမ္ပဏီကလည်း မေးမြန်းမှုများကို ချက်ချင်းဖြေကြားခြင်း မရှိခဲ့ပေ။

မီးလောင်မှုဖြစ်ပွားပြီး သင်္ဘော ရွေ့လျားမရဖြစ်သွားသည့်နောက် ရက် အနည်းငယ်အကြာတွင် ကယ်ဆယ်ရေးအဖွဲ့ ရောက်ရှိလာခဲ့သည်။

ကုမ္ပဏီ၏ထုတ်ပြန်ချက်အရ ညစ်ညမ်းမှုထိန်းချုပ်ရေး စက်ကိရိယာများ တပ်ဆင်ထားသော ကယ်ဆယ်ရေးသင်္ဘောနှစ်စီးသည် နစ်မြုပ်ရာနေရာ တွင် ညစ်ညမ်းမှုနှင့် အမှိုက်သရိုက်လက္ခဏာများအား စောင့်ကြည့်မည် ဖြစ်သည်။ "Morning Midas" နစ်မြုပ်စဉ်က သင်္ဘောသားများ ထိခိုက် ဒဏ်ရာရရှိခြင်းမရှိကြောင်း သိရသည်။

Zodiac Maritime ကုမ္ပဏီသည် အခြားညစ်ညမ်းမှု တုံ့ပြန်ရေး အထူး သင်္ဘောတစ်စီးကိုလည်း စိုးရိမ်ဖွယ်ရာ အခြေအနေများအတွက် နစ်မြုပ်ရာ နေရာသို့ စေလွှတ်မည်ဖြစ်သည်။

အမေရိကန်ကမ်းခြေစောင့်တပ်ဖွဲ့အဆိုအရ Adak ကျွန်း၏ အနောက် တောင်ဘက် မိုင် ၃၀၀ (ကီလိုမီတာ ၄၉၀) ခန့်အကွာတွင် ဇွန် ၃ ရက်က "Morning Midas" သင်္ဘောပေါ်မီးလောင်မှုအချက်ပြမှုကို လက်ခံ ရရှိ ခဲ့သည်။ သင်္ဘောပေါ်ရှိ လူအားလုံး (၂၂ ဦး) သည် ကယ်ဆယ်ရေးလှေဖြင့် ဘေးကင်းစွာထွက်ပြေးနိုင်ခဲ့ပြီး အနီးရှိကုန်သင်္ဘောတစ်စီးက ကယ်တင် ခဲ့သည်။

နစ်မြုပ်သွားသောကားများတွင် လျှပ်စစ်ကား ၇၀ စီးနှင့် ဟိုက်ဘရစ်ကား ၆၈၀ စီးပါဝင်ပြီး၊ ကမ်းခြေစောင့်တပ်ဖွဲ့နှင့် Zodiac Maritime တို့က မီးလောင်မှုစတင်ချိန်တွင် လျှပ်စစ်ကားများတင်ထားသောနေရာမှ မီးခိုးများ ထပ်စွာထွက်ပေါ်နေသည်ကို တွေ့ရှိရသည်ဟု ဆိုသည်။

အလျား ၆၀၀ ပေ (၁၈၃ မီတာ) ရှိ " Morning Midas" သင်္ဘောကို ၂၀၀၆ ခုနှစ်တွင်တည်ဆောက်ခဲ့ပြီး လိုက်ဘေးရီးယားအလံ လွှင့်ထူထားခဲ့သည်။ marinetraffic.com ဝက်ဘ်ဆိုဒ်အရ ကားများသယ်ယူသည့် အဆိုပါသင်္ဘောသည် မေလ ၂၆ ရက်က တရုတ်နိုင်ငံ Yantai ဆိပ်ကမ်းမှ မက္ကဆီကို သို့ ထွက်ခွာခဲ့ခြင်းဖြစ်သည်။

ကိုးကား- CNN

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အစိမ်းရောင်စွမ်းအင်ကို ပိုမိုအသုံးပြုလာသော တရုတ်နိုင်ငံသည် ယခုအခါ နေရောင်ခြည်စွမ်းအင်ကို အများဆုံးအသုံးပြုသည့်နိုင်ငံအဖြစ် စံချိန်အသစ်ထပ်တင်လိုက်နိုင်ပြီဖြစ်ကြောင်း သိရသည်။

မေလအတွင်း တရုတ်နိုင်ငံက ဆိုလာပြားများ တပ်ဆင်ပြီး ရယူအသုံးပြုသော နေရောင်ခြည်စွမ်းအင်သုံး လျှပ်စစ်ဓာတ်အားပမာဏသည် ၉၃ ဂစ်ဂါဝပ်အထိရှိရာ ထိုပမာဏသည် ပြီးခဲ့သည့်တစ်နှစ်တာကာလအတွင်း အခြားနိုင်ငံများတပ်ဆင်အသုံးပြုသော နေရောင်ခြည်စွမ်းအင်သုံး လျှပ်စစ်ဓာတ်အား ပမာဏထက် များပြားကြောင်း တရုတ်နိုင်ငံ အမျိုးသားစွမ်းအင် အာဏာပိုင်အဖွဲ့က ထုတ်ပြန်ထားသည်။

ထို့ပြင် ယင်းပမာဏသည် တရုတ်နိုင်ငံကပြီးခဲ့သည့်နှစ် အလားတူကာလအတွင်း ရယူအသုံးပြုခဲ့သည့် နေရောင်ခြည်စွမ်းအင်သုံး လျှပ်စစ်ဓာတ်အား ပမာဏထက် ၄ ဆပိုများကြောင်းနှင့် လစဉ်ဆိုလာပြား များတပ်ဆင် ထုတ်လုပ် သုံးစွဲလျက်ရှိသည့် နေရောင်ခြည်စွမ်းအင်သုံး လျှပ်စစ်ဓာတ်အားပမာဏတွင် အများဆုံးဖြစ်ကြောင်း ထုတ်ပြန်ချက်၌ ဆက်လက်ဖော်ပြထားသည်။

ယခုနှစ်၏ ငါးလတာကာလအတွင်း တရုတ်နိုင်ငံက ထုတ်လုပ်အသုံးပြုလျက်ရှိသော နေရောင်ခြည်စွမ်းအင်သုံးလျှပ်စစ်ဓာတ်အားပမာဏသည် ၁၉၈ ဂစ်ဂါဝပ် အထိရောက်ရှိလာသောကြောင့် တစ်ရက်လျှင် ထုတ်လုပ်အသုံးပြုနေသည့် လျှပ်စစ်ဓာတ်အားပမာဏ ၁ ဂစ်ဂါဝပ်အထိရှိသည် ဟုဆိုနိုင်သည်။

တရုတ်နိုင်ငံအတွင်းရှိ နေရောင်ခြည် စွမ်းအင်သုံး လျှပ်စစ်ဓာတ်အား ထုတ်လုပ်ရေးကုမ္ပဏီများသည် အစိုးရကနောက်ထပ်ချမှတ်လာနိုင်သော ပြည့်ဖြိုးမြဲစွမ်းအင် ဈေးနှုန်းများ ကျဆင်းစေမည့် မူဝါဒပြောင်းလဲမှုများ မတိုင်မီ ယခုကဲ့သို့ဆိုလာပြားများ တပ်ဆင်မှုကို အလျင်စလို လုပ်ဆောင်လာခြင်း ဖြစ်ကြောင်း သိရသည်။

MWD Web Portal

ဂျကာတာ ဇွန် ၂၄

အင်ဒိုနီးရှားနိုင်ငံတွင် နွေရာသီကာလအတွင်း ပူပြင်းခြောက်သွေ့သည့် ကာလရှည်ကြာလေ့ရှိသော်လည်း ယခုနှစ်အတွင်း ပူပြင်းခြောက်သွေ့သည့် ရာသီဥတုသည် ကာလတိုတောင်းနိုင်ကြောင်း အင်ဒိုနီးရှားမိုးလေဝသအေဂျင်စီက ထုတ်ပြန်ခဲ့သည်ဟု ယနေ့သတင်းများတွင် ဖော်ပြထားသည်။

အင်ဒိုနီးရှားနိုင်ငံတွင် ယခုနှစ် နွေရာသီကာလသည် ပုံမှန်အတိုင်းပင် ပူပြင်းခြောက်သွေ့မည်ဖြစ်ကြောင်း အင်ဒိုနီးရှားမိုးလေ၀သ နှင့် ဘူမိရူပအေဂျင်စီက ယခုနှစ် အစောပိုင်းတွင် ကြိုတင်ခန့်မှန်းချက် ထုတ်ပြန်ထားကြောင်း၊ ပုံမှန်အားဖြင့် နွေရာသီကာလသည် ဧပြီလတွင် စတင်ခဲ့ခြင်းဖြစ်သော် လည်း ယခုနှစ်တွင် ဧပြီလ၌ပင် ပူပြင်းခြောက်သွေ့မှုနှုန်း မြင့်မားလာခြင်းမရှိသည့်အတွက် ယခင် နှစ်များကထက် ပူပြင်းခြောက် သွေ့မှုကာလ တိုတောင်းမည်ဖြစ်ကြောင်း၊ ပူပြင်းခြောက်သွေ့သည့် ကာလ တိုတောင်းနိုင်သဖြင့် စပါးစိုက်ပျိုးသူများအတွက် အခွင့်အလမ်းကောင်းများရရှိနိုင်ပြီး စပါးအထွက်နှုန်းမှာလည်း ယခင်နှစ်များကထက် မြင့်တက်လာနိုင်သည့် အခြေအနေကောင်းတစ်ရပ် ဖြစ်လာနိုင်ပြီး စပါးအထွက်နှုန်းမှာ ပုံမှန်ပမာဏဖြစ်သည့် တန်ချိန် ၁၄ ဒသမ ၉၃ သန်း ၂၁ ဒသမ ဒသမ ၇၆ သန်းထိ မြင့်တက်လာနိုင်သည်ဟု အင်ဒိုနီးရှား မိုးလေဝသအေဂျင်စီ က ခန့်မှန်းထားကြောင်း သိရသည်။

"ဒီနှစ်အစောပိုင်းက ကြိုတင် ခန့်မှန်းချက်တွေအရ ၂၀၂၅ ခုနှစ် မှာ ပူပြင်းခြောက်သွေ့မှုနှုန်းဟာ ပုံမှန်ထက် မြင့်တက်လာနိုင်တယ် လို့ ထုတ်ပြန်ထားပြီးဖြစ်ပါတယ်။ ဒါပေမဲ့ ပုံမှန်ဧပြီလမှာ ပူပြင်း ခြောက်သွေ့မှုနှုန်း မြင့်တက်နေပေမဲ့ ဒီနှစ်မှာတော့ ပူပြင်းခြောက် သွေ့တဲ့ရာသီဥတု ဖြစ်မလာသေးဘူး။ ဒါကြောင့် ပုံမှန်နှစ်ထက် ပူပြင်းခြောက်သွေ့တဲ့ ကာလတိုသွားနိုင်တယ်”ဟု အင်ဒိုနီးရှား မိုးလေဝသအေဂျင်စီမှ ပြောရေး ဆိုခွင့်ရှိသူ ကာနာဝါကီက ပြော ကြားခဲ့သည်။

Ref: Russia Today

Trs: Sai Sat

YDNB Newspaper

Photo - Reuters