လျှပ်စစ်စွမ်းအင်သုံးကားများနဲ့ ပတ်သက်လို့ လူပြောများနေတဲ့အချက်တစ်ချက်က သူ့မှာပါဝင်တဲ့ ဘက်ထရီအကြောင်းပါ။ အဲဒီဘက်ထရီတွေက အရွယ်အစားလည်းကြီးသလို ဈေးနှုန်းကလည်းမြင့်မားပါတယ်။ သူတို့ကိုလဲလှယ်မယ်ဆိုရင်လည်း ကားတစ်စီးစာလောက်ကို ကုန်ကျနိုင်တယ်လို့ ဆိုကြပါတယ်။ အပြောများတဲ့တစ်ချက်ကတော့ သူ့ရဲ့သက်တမ်းပါ။ အဲဒီဘက်ထရီတွေက  ၁၀   နှစ်ပဲ  သက်တမ်းခံမယ်ဆို ပြီးပြောနေကြတာဖြစ်ပါတယ်။ လူအများ စုကလည်း အဲဒီပြောဆိုချက်တွေအတိုင်း မှတ်သားထားကြပါတယ်။ ဒါပေမဲ့ အဲဒီပြောဆိုမှုတွေက တကယ်လား။ အထူးသဖြင့်   ဘက်ထရီတွေရဲ့သက်တမ်းက နည်းတယ်ဆိုတာ  တကယ်ပဲလားဆိုတာကို  သုတေသနပညာရှင်တွေက လက်တွေ့လေ့လာမှုတွေလုပ်ခဲ့ကြပါတယ်။

ဒီလေ့လာမှုကိုတော့ Geotab ဆိုတဲ့ ကုမ္ပဏီကလုပ်တာပါ။ သူတို့က လျှပ်စစ်စွမ်းအင်သုံးကားပေါင်း ၁၀၀၀၀ ကျော်ကို စောင့်ကြည့်မှုတွေနဲ့အတူ လေ့လာမှုတွေ လုပ်ခဲ့ရာမှာ ဒီကားတွေရဲ့ဘက်ထရီသက်တမ်းက မထင်ထားလောက်အောင် မြင့်မားတာတွေ့ရပါတယ်။ သူတို့တွေ့ရှိတဲ့ အချက်အလက်တွေအရ လျှပ်စစ်ကား တစ်စီးမှာပါတဲ့   ဘက်ထရီရဲ့ပျမ်းမျှသက်တမ်းဟာ  နှစ်ပေါင်း  ၂၀  တောင်ရှိတယ်လို့ ဆိုပါတယ်။

ဘက်ထရီဆိုတာက အချိန်ကာလကြာ မြင့်လာတာနဲ့အမျှ စွမ်းဆောင်ရည်လျော့ ကျတတ်တာကပုံမှန်ပါပဲ။ စွမ်းဆောင်ရည် ကျဆင်းမှုက တစ်နှစ်ကို ၁ ဒသမ ၈   ရာခိုင်နှုန်းရှိပါတယ်။ ဒီလိုကျဆင်းမှုနဲ့အတူ လျှပ်စစ်စွမ်းအင်သုံးကားရဲ့ မူလရောက်ရှိနိုင်တဲ့မိုင်နှုန်းကလည်း ကျဆင်းသွားပါတယ်။ ဒါပေမဲ့ ဒီလောက်ကျဆင်းမှုက သိပ်တော့မပြောပပါဘူး။ နှစ်ပေါင်း ၂၀ ကြာတဲ့အခါမှာ လျှပ်စစ်စွမ်းအင်သုံးကားတစ်စီးက သူ့ရဲ့မူလမိုင်နှုန်းထက် ၆၄ ရာခိုင်နှုန်းအထိ ဆက်သွားနိုင်နေဦးမယ်လို့ ပညာရှင်များရဲ့ ထုတ်ပြန်ချက်ထဲမှာ ဖော်ပြထားပါတယ်။

ဘက်ထရီရဲ့စွမ်းဆောင်ရည်ကိုကျဆင်း စေတဲ့အကြောင်းရင်းများအနက် အဓိက အကျဆုံးတစ်ခုက ရာသီဥတုပါ။ ပူပြင်းတဲ့ပတ်ဝန်းကျင်မှာမောင်းရင်တော့ ဘက်ထရီရဲ့စွမ်းဆောင်ရည်အပေါ်မှာ သက်ရောက်မှုရှိစေမှာဖြစ်ပြီး ဂရုစိုက်မှုအပေါ် မူတည်လို့ ဘက်ထရီရဲ့သက်တမ်းနဲ့သူ့ရဲ့ စွမ်းဆောင်ရည်ကလည်း ကွာခြားသွားနိုင်ပါတယ်။ ခေတ်မီကားတွေမှာတော့ ဘက်ထရီအအေးပေးစနစ်ကို ကောင်းစွာ အသုံးပြုထားတာကြောင့် ဒီတစ်ချက်ကလည်း သိပ်တော့ပြောပလောက်တဲ့အခြေအနေမရှိပါဘူး။ ဒါပေမဲ့ အတတ်နိုင်ဆုံး ကားကိုအရိပ်ထဲမှာရပ်တာ၊ အားသွင်းရင်လည်း အရိပ်ထဲမှာသွင်းတာမျိုးတွေတော့ လုပ်ပေးသင့်ပါတယ်လို့ လေ့လာသူများ ကအကြံပြုထားပါတယ်။  

Ref: AE

MWD Web Portal

တရုတ်နိုင်ငံသည် ၎င်းနိုင်ငံထုတ် တိုက်လေယာဉ်များကို ပြင်သစ်နိုင်ငံတွင် ကျင်းပပြုလုပ်သည့် ကမ္ဘာ့အကြီးဆုံး လေကြောင်းပြပွဲတစ်ခုတွင် ခင်းကျင်းပြသလျက်ရှိပြီး တရုတ်နိုင်ငံမှ ကုမ္ပဏီများ၊ အခြားအဖွဲ့အစည်း များအပြင် အခြားနိုင်ငံပေါင်း ၄၇ နိုင်ငံမှ အဖွဲ့အစည်းများလည်း ပြပွဲတွင် ပါဝင်လျက်ရှိသည်။ 

ယခုနှစ်တွင် တရုတ်နိုင်ငံမှ အဖွဲ့အစည်းပေါင်း ၇၆ ခုက ပါဝင်ပြသမည် ဖြစ်ပြီး ၂၀၂၃ ခုနှစ်တွင် ပြုလုပ်ခဲ့သည့် ပြပွဲတွင် ပါဝင်ခဲ့သည့် အရေအတွက် ထက် နှစ်ဆကျော် ပိုမိုပါဝင်လာသည်။ အကြောင်းမှာ လက်နက် တင်ပို့မှု ဈေးကွက်တွင် တရုတ်၏အခန်းကဏ္ဍကို မြှင့်တင်လို၍ အခွင့်အလမ်း ရှာဖွေခြင်းဖြစ်ပြီး ၎င်းတို့ပြသထားသည့် တိုက်လေယာဉ်များတွင် J-10 အမျိုးအစား တိုက်လေယာဉ်နှင့် နောက်ဆုံးပေါ် ကိုယ်ပျောက်တိုက် လေယာဉ် J-35 အမျိုးအစားတို့လည်း ပါဝင်သည်။ 

တရုတ်နိုင်ငံသည် J-10 အမျိုးအစား တိုက်လေယာဉ်ကို ပါကစ္စတန် နိုင်ငံသို့ တင်ပို့ပြီး ပြီးခဲ့သည့်လတွင် အိန္ဒိယစစ်တပ်က အသုံးပြုနေသည့် ပြင်သစ်နိုင်ငံထုတ် Rafale တိုက်လေယာဉ်ကို J-10 အမျိုးအစား တိုက် လေယာဉ်က ပစ်ချနိုင်ခဲ့ကြောင်း ပါကစ္စတန်စစ်တပ်က အခိုင်အမာ ပြောဆို ထားသည်။ 

အဆိုပါလေကြောင်းပြပွဲတွင် ခင်းကျင်းပြသထားသည့် တရုတ်နိုင်ငံထုတ် တိုက်လေယာဉ်များနှင့်ပတ်သက်၍ ဖွံ့ဖြိုးရေးကုမ္ပဏီတစ်ခု၏အကြီးတန်းအရာရှိတစ်ဦးက တရုတ်နိုင်ငံ၏ လေကြောင်းဆိုင်ရာ လုပ်ငန်း များသည် နောက်လိုက်နေရာမှ ဈေးကွက်အတွင်း ယှဉ်ပြိုင်နိုင်သည့် အနေအထားသို့ ပြောင်းလဲလာပြီဖြစ်ကြောင်း ပြောကြားခဲ့ပါသည်။

ဥရောပလေကြောင်းလုပ်ငန်း ကိုယ်စားလှယ် တစ်ဦးကလည်း တရုတ် နိုင်ငံသည် ဈေးကွက်အတွင်း အခွင့်အလမ်းကြီးကြီးမားမားရရှိနေပြီး အားကောင်းသည့် ပြိုင်ဘက်တစ်ဦးဖြစ်လာနေပြီဖြစ်ကြောင်း ပြောကြား ခဲ့ပါသည်။

ကိုးကား - NHK

ဘာသာပြန်ဆိုသူ- ဒေါ်မေသူခိုင်၊ လက်ထောက်ညွှန်ကြားရေးမှူး၊ နစက-၃

Xiaomi ကုမ္ပဏီဆိုတာ တရုတ်နိုင်ငံရဲ့နည်းပညာကုမ္ပဏီတစ်ခုဖြစ်သလို အရင်တုန်းကဖုန်းများနဲ့ လူသုံးလျှပ်စစ်ပစ္စည်းများကိုသာ ထုတ်လုပ်ခဲ့ပေမယ့် အခုနောက်ပိုင်းမှာ လျှပ်စစ်စွမ်းအင်သုံး မော်တော်ကားများကိုပါ အောင်မြင်စွာ ထုတ်လုပ်လာနိုင်တာကိုတွေ့ရပါတယ်။ သူတို့ရဲ့ ပထမဆုံးသော လျှပ်စစ်ကားအမျိုးအစားက SU7 ဖြစ်ပါတယ်။ SU7 ကိုထုတ်လုပ်မှုနဲ့အတူ အောင်မြင်မှုလည်းရရှိထားပါတယ်။ ဒါကြောင့် Xiaomi အနေနဲ့ သူတို့ရဲ့အောင်မြင်မှုကို ဆက်လက်ထိန်းသိမ်းထားနိုင်ဖို့အတွက် နောက်ထပ် လျှပ်စစ်စွမ်းအင်သုံးကား တစ်မျိုးကို ထုတ်လုပ်လိုက်ပါတယ်။ အဲဒါကတော့ YU7 ပါပဲ။ SU7 က Sedan ကားဖြစ်ပေမယ့် YU7 ကတော့ SUV အမျိုးအစားဖြစ်ပါတယ်။

Xiaomi ကုမ္ပဏီက YU7 SUV ကိုထုတ်လုပ်ထား ပြီးဖြစ်ပေမယ့်လည်း ဇူလိုင်လမှသာ တရားဝင်ဖြန့်ချိသွားမှာ ဖြစ်တယ်လို့ ကုမ္ပဏီကအစောပိုင်းမှာပြော ထားပါတယ်။ ဒါပေမဲ့ မကြာသေးမီကထွက်ပေါ်လာတဲ့ ကုမ္ပဏီအမှုဆောင်ချုပ်နဲ့တည်ထောင်သူရဲ့ ပြောစကားတစ်ခုကြောင့် YU7 SUV က ယခင်သတ်မှတ်ထားတဲ့အချိန်ထက် ပိုစောပြီးထွက်ပေါ်လာဖို့ရှိနေပါတယ်။ ကုမ္ပဏီအမှုဆောင်ချုပ်နဲ့တည်ထောင်သူ လေးကျွန်းက သူတို့အနေနဲ့ YU7 SUV ကို ဒီလကုန် မှာမြင်တွေ့ရစေဖို့ ကြိုတင်ပြင်ဆင်မှုတွေလုပ်ဆောင်နေတယ်ဆိုပြီး လူမှုကွန်ရက်မှာတင်ထားတာဖြစ်ပါတယ်။ ဒါကြောင့် အရင်တုန်းက ဇူလိုင်လမှသာထွက် ပေါ်လာဖို့ရှိနေတဲ့ YU7 SUV ကို အခုလကုန်မှာမြင်တွေ့ရတော့မှာပါ။ အခုဆိုရင်ပဲ တရုတ်နိုင်ငံရဲ့မြို့ပေါင်း ၈၆ မြို့နယ်ရှိ အရောင်းဆိုင်ပေါင်း ၃၁၇ ဆိုင်မှာပြသမယ့် YU7 SUV တွေက ဇွန်လလယ်ကတည်းကရောက်ရှိနေပါပြီ။

SU7 လျှပ်စစ်စွမ်းအင်သုံးကားနဲ့အောင်မြင်မှုရရှိထားတဲ့ Xiaomi ကုမ္ပဏီက အခုတစ်ခေါက်မှာလည်း ဝယ်ယူသူများရဲ့ စိတ်ဝင်စားမှုကိုအမြင့်ဆုံးရရှိထား ပါတယ်။ မေလနှောင်းပိုင်းမှာ Xiaomi ကုမ္ပဏီရဲ့ ဥက္ကဋ္ဌ လုဝေဘင်းက အခုတစ်ကြိမ် YU7 SUV ကိုမှာယူဖို့အတွက် ကြိုတင်ငွေပေးချေကြသူအရေအတွက် က SU7 မှာတုန်းက  ကြိုတင်ငွေပေးချေသူအရေအတွက်ထက် သုံးဆပိုများတယ်လို့ဆိုထားပါတယ်။ ကုမ္ပဏီက YU7 SUV နဲ့ပတ်သက်ပြီး အမွှမ်းတင် ပြောဆိုထားမှုတွေ ရှိပေမယ့်လည်း အရေးကြီးတဲ့ အရာတစ်ခုကိုတော့ ထုတ်ဖော်ပြောဆိုထားခြင်းမရှိသေးပါဘူး။ အဲဒါကတော့ YU7 SUV ရဲ့ဈေးနှုန်းပါပဲ။

တချို့ကလည်း YU7 SUV ရဲ့ဈေးနှုန်းက ယွမ် ၂၃၅၉၀၀ ရှိတယ်လို့ဆိုကြပေမယ့် လေးကျွန်းက ဒီပြောဆိုမှုတွေကို ငြင်းဆိုထားပါတယ်။ ဒါ့အပြင် YU7 SUV ရဲ့ဈေးနှုန်းက SU7 ရဲ့ဈေးနှုန်းကြားကွာခြားမှု ရှိမှာဖြစ်ပြီး အဲဒီကွာခြားမှုက ယွမ် ၂၀၀၀၀ ထက်ပိုမယ်လို့လည်း ပြောထားပါတယ်။ အရင်ထုတ်လုပ် ခဲ့တဲ့ SU7 ရဲ့ဈေးနှုန်းက ယွမ် ၂၁၅၉၀၀ ကနေစတင်တာပါ။ ဒါကြောင့် YU7 SUV ရဲ့ဈေးနှုန်းအတိအကျက တရားဝင်မိတ်ဆက်ပွဲ ဒါမှမဟုတ် အဲဒီမိတ်ဆက် ပွဲမတိုင်မီ တစ်ရက်၊ နှစ်ရက်အလိုမှာ ထွက်ပေါ်လာနိုင်တယ်လို့ယူဆရပါတယ်။

Xiaomi ကုမ္ပဏီအနေနဲ့ အခုထုတ်လုပ်ထားတဲ့ YU7 SUV မှာ အဓိကကျတဲ့အခန်းကဏ္ဍက သူ့ရဲ့ လေခွင်းအားပုံစံဖြစ်ပါတယ်။ သူ့မှာ လေဖြတ်သန်း စီးဆင်းနိုင်တဲ့လမ်းကြောင်းစုစုပေါင်း ၁၀ ခုအပြင် အဆင်ပြေအောင်ဖန်တီးထားတဲ့ လေပေါက်ပေါင်း ၁၉ ခုအထိပါဝင်နေတာကိုတွေ့ရပါတယ်။ YU7 SUV ကမြင်းကောင်ရေ ၃၁၆ ကောင်အားထုတ်ပေးနိုင်မယ့် လျှပ်စစ်မော်တာတစ်လုံးကိုတပ်ဆင်ထားပြီး အမြင့် ဆုံးအမြန်နှုန်းအနေနဲ့ တစ်နာရီကို ကီလိုမီတာ ၂၄၀ နှုန်းအထိမောင်းနှင်နိုင်စေမှာပါ။ သူ့မှာတပ်ဆင်ထားတဲ့ ဘက်ထရီစွမ်းအင်ပမာဏက ၉၆ ဒသမ ၃ ကီလို ဝပ်နာရီရှိတာကြောင့် အားအပြည့်သွင်းရင် ၈၃၅ ကီလိုမီတာအထိသွားနိုင်မှာဖြစ်ပါတယ်။ ဘက်ထရီအားသွင်းတဲ့အခါမှာလည်း ၁၀ ရာခိုင်နှုန်းကနေ ၈၀ ရာခိုင်နှုန်းအထိကို ၁၂ မိနစ်ပဲကြာမှာဖြစ်ပြီး ၁၅မိနစ်အထိအားသွင်းပြီးတဲ့အခါမှာတော့ ကီလိုမီတာ ၆၂၀ အထိမောင်းနှင်နိုင်စေမှာဖြစ်ပါတယ်။ နောက်ထပ်အားသာချက်တစ်ခုက သူ့မှာအသုံးပြုထားတဲ့ အောက်ပိုင်းစနစ်က အနိမ့်အမြင့်ကို  ငါးမျိုးအထိချိန်ညှိလို့ရတာကြောင့် မြေပြင်ကင်းလွတ်အမြင့်ကို ၈ ဒသမ ၇ လက်မအထိ ရရှိစေမှာပါ။ ယာဉ်မောင်းသူ အထောက်အပံ့စနစ်အတွက် LiDar sensor၊ 4D milimeter-wave ရေဒါ၊ အဆင့်မြင့်ကင်မရာ ၁၁ လုံးနဲ့ အသံလှိုင်းရေဒါ ၁၂ လုံးတို့ တပ်ဆင်ထားတယ်လို့ ဆိုပါတယ်။                        

Ref: AE

ကိုထက်

MWD Web Portal

အိန္ဒိယနိုင်ငံအနေဖြင့် ဆိုင်းငံ့ထားသော ပါကစ္စတန်နှင့် အိန္ဒုမြစ်ကြောင်းသဘောတူညီချက်ကို ပြန်လည် အသက်သွင်းသွားမည် မဟုတ်ကြောင်း အိန္ဒိယပြည်ထဲရေးဝန်ကြီးအမစ်ရှားက အင်တာဗျူးတစ်ခုတွင် ပြောသည်ဟု Times of India သတင်းစာက ဇွန်လ ၂၁ ရက်တွင် ဖော်ပြထားသည်။ ထို့ပြင် အိန္ဒုမြစ်မှနေ၍ ပါကစ္စတန်နိုင်ငံ အတွင်းသို့စီးဆင်းလျက်ရှိသော ရေလမ်း ကြောင်းကိုပြောင်းလဲ၍ ပြည်တွင်း၌သုံးနိုင်ရေးဆောင်ရွက်သွားမည်ဖြစ်ကြောင်းအမစ်ရှားကဆက်ပြောသည်။ အိန္ဒိယနိုင်ငံပိုင် ကက်ရှမီးယားဒေသ၌ ဖြစ်ပွားသောအကြမ်းဖက်တိုက်ခိုက်မှုတွင် အရပ်သား ၂၆ ဦးသေဆုံးပြီးနောက် ယင်းအကြမ်းဖက်တိုက်ခိုက်မှု၏ နောက်ကွယ်၌ ပါကစ္စတန်နိုင်ငံပါဝင်နေသည်ဟုဆိုကာ အိန္ဒိယနိုင်ငံက ထိုနိုင်ငံနှင့်ရရှိထားသော အိန္ဒုမြစ်ကြောင်းမှ ရေခွဲဝေအသုံးပြုရေး သဘောတူညီချက်ကို ဆိုင်းငံ့ထားခြင်းဖြစ်သည်။ ပါကစ္စတန်နိုင်ငံ၏ လယ်ယာစိုက် ပျိုးရေးကဏ္ဍအတွက်ရေအရင်းအမြစ် ၈၀ ရာခိုင်နှုန်းက အိန္ဒိယနိုင်ငံ၌ မြစ်ဖျားခံသော အိန္ဒုမြစ်မှရရှိခြင်း ဖြစ်ကြောင်း သိရသည်။ 

Ref: TOI

တီဟီရန်၏ ကုလသမဂ္ဂ နျူကလီးယားလက်နက်မပြန့်ပွားရေးစာချုပ် (NPT) ကို လိုက်နာနေသည်ဆိုသော အခိုင်အမာပြောဆိုချက်မှာ “လှည့်ဖြားမှု များနှင့် ပြည့်နှက်နေသည်” ဟု အဆင့်မြင့် သုတေသီတစ်ဦးက ပြောကြား ခဲ့သည်။

အမေရိကန်နှင့် အစ္စရေးတို့၏ အီရန်အတွင်းရှိ နျူကလီးယား အဆောက် အအုံများကို စီးနင်းတိုက်ခိုက်မှုများအပြီးတွင် ဝါရှင်တန်ဒီစီအခြေစိုက် Institute for Science and International Security ခေါင်းဆောင် ဒေးဗစ် အယ်လ်ဘရိုက်က တနင်္ဂနွေနေ့ (ဇွန် ၂၂) တွင် ကုလသမဂ္ဂ အရာရှိ များသည် အီရန်၏ “နျူးကလီးယားလက်နက် ထုတ်လုပ်နိုင်ရန် ပြင်ဆင်မှု များကို ထိန်းချုပ်ရန် ရုန်းကန်နေရဆဲ” ဖြစ်ကြောင်း ဖွင့်ဟခဲ့သည်။

“အဆိုပါအခြေအနေကို အီရန်ကိုယ်တိုင် ဖန်တီးခဲ့ခြင်းဖြစ်သည်” ဟု အမေရိကန်က အီရန်ရှိ နျူကလီးယား အချက်အချာ နေရာသုံးခုကို ညအချိန် လေကြောင်းတိုက်ခိုက်မှုနှင့်ပတ်သက်၍ ပြောဆိုမှုတွင် အယ်လ် ဘရိုက်က CNN ၏ ဘက်ကီအန်ဒါဆင်အား CNN Newsroom တွင် ပြောကြားခဲ့သည်။

ယခုလအတွင်း အစ္စရေးက အီရန်၏ နျူကလီးယား စက်ရုံများကို ပစ်မှတ် ထားသည်ဟု ဆိုကာ စီးနင်းတိုက်ခိုက်မှုကြီး ပြုလုပ်ခဲ့ပြီး တီဟီရန်၏ ပြန်လည်တိုက်ခိုက်မှုများကို ဖြစ်ပေါ်စေခဲ့သည်။

ထို့နောက် စနေ (ဇွန် ၂၁) ညနေပိုင်းတွင် ဝါရှင်တန်က Natanz ၊ Isfahan နှင့် Fordow စသော အဓိက နျူကလီးယား စက်ရုံများကို ကြီးမားသော ဘန်ကာဖျက်ဗုံးကြီးများဖြင့် တိုက်ခိုက်ခဲ့ပြီး လက်ရှိတွင် ခါးသီးသော လူမှုဘဝထိခိုက်မှုများစွာ ပေးဆပ်နေရသည့် ပဋိပက္ခကို ပိုမို အရှိန်မြှင့် လိုက်သည်။

အမေရိကန်စီးနင်းတိုက်ခိုက်မှု၏ ကနဦး အကျိုးသက်ရောက်မှုကို မသိရှိ ရသေးသော်လည်း ကနဦး ဗီဒီယိုများတွင် အီရန် အနောက်မြောက်ပိုင်း တောင်တန်းများတွင် အလွန်လျှို့ဝှက်စွာ လုပ်ဆောင်နေသည့် Fordow စက်ရုံနေရာတွင် မီးခိုးများ ထူထပ်စွာ ထွက်ပေါ်နေသည်ကို တွေ့ရသည်။

အယ်လ်ဘရိုက်က CNN အား အမေရိကန်၏ ဗုံးများသည် လှိုင်ဂူ ဝင်ပေါက် များနှင့် မြေအောက်ရှိ ယူရေနီယမ် ထပ်တိုးသန့်စင်သည့် ခန်းမဆီသို့ ဦးတည်သည့် ဝင်ပေါက်များကို ပြင်းထန်စွာ ပျက်စီးစေရန် ရည်ရွယ်သည် ဟု ခန့်မှန်းပြောကြားခဲ့သည်။

ကိုးကား- CNN

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အမေရိကန်သမ္မတ၏ အထူးကိုယ်စားလှယ် Richard Grenell က SpaceX ၏ CEO Elon Musk အား အီရန်တစ်ဝှမ်းတွင် Starlink အင်တာနက်ဝန်ဆောင်မှုကို အခမဲ့ဖွင့်ပေးရန် တိုက်တွန်းခဲ့သည်။ ၎င်း၏ အမေရိကန်စပိုင်များအနေဖြင့် အစ္စရေး၏ တိုက်ခိုက်မှုများ မြင့်တက် နေချိန်တွင် သတင်းအချက်အလက်များကို မပြတ်တောက်စေရန် ရည်ရွယ်ခြင်း ဖြစ်သည်။ Musk က အဆိုပါတောင်းဆိုမှုကို တုံ့ပြန်မှုမပြုသေးပေ၊ သို့သော် ယခင်က လှိုင်းများဖွင့်ထားပြီ ဟု ပြောဆိုခဲ့ဖူးပြီး Starlink ကို အသုံးပြုရန် သီးသန့်ဂြိုလ်တုအင်တင်နာလိုအပ်ကြောင်း ပြောဆိုခဲ့သည်။

Starlink ၏ ကမ္ဘာမြေအနိမ့်ပတ်လမ်း ဂြိုလ်တုများကို မူလက ကျေးလက်နှင့် ဝေးလံခေါင်ဖျားဒေသများသို့ မြန်နှုန်းမြင့် အင်တာနက် ဝန်ဆောင်မှုများ ပေးစွမ်းရန် အဖြေတစ်ရပ်အဖြစ် မြှင့်တင်ခဲ့သည်။ အဆိုပါစနစ်သည် ရှေ့တန်းစစ်မျက်နှာများတွင် ဒရုန်းစစ်ဆင်ရေးအတွက်လည်း အရေးပါကြောင်း သက်သေပြခဲ့သည်။ SpaceX က ၂၀၂၂ ခုနှစ်တွင် ရုရှားနှင့် ပဋိပက္ခ မြင့်တက်လာချိန်မှစ၍ ယူကရိန်းစစ်တပ်အား Starlink ဝန်ဆောင်မှုများပေးခဲ့ပြီး ဆက်စပ်ကိရိယာအစုံ ၄၀,၀၀၀ ကျော် ပို့ဆောင် ပေးခဲ့သည်။ 

အစ္စရေးက အီရန်နျူကလီးယားစက်ရုံများကို တိုက်ခိုက်မှုများ လုပ်ဆောင် နိုင်ရန်အတွက် Mossad က အီရန်အတွင်းသို့ လျှို့ဝှက် အေးဂျင့်များကို စေလွှတ်ထားခဲ့သည်ဟူသော သတင်းများထွက်ပေါ်ခဲ့သည်။ ဝါရှင်တန် က တိုက်ခိုက်မှုတွင် ပါဝင်လာနိုင်ခြေမြင့်တက်လာသည်နှင့်အမျှ အီရန် အာဏာပိုင်များက ဆက်သွယ်ရေးကွန်ယက်ကို ကန့်သတ်ကာ ၎င်းတို့ နိုင်ငံ၏ အင်တာနက်လိုင်းများကို ကမ္ဘာ့ကျန်အပိုင်းများမှ သီးခြား ခွဲထုတ်ခဲ့သည်။ ထို့အပြင် ၎င်းတို့က WhatsApp ကို ဖျက်ရန် နိုင်ငံသားများအား တိုက်တွန်းခဲ့ပြီး အစ္စရေးက Meta ပိုင်အက်ပ် အသုံးပြုသူများသည် နိုင်ငံအတွင်းမှ အရေးကြီးအချက်အလက်များကို ခြေရာခံနေသည် ဟု စွပ်စွဲခဲ့သည်။

Richard Grenell သည် အမေရိကန်၏ ဂျာမနီသံအမတ်ဟောင်းနှင့် ယာယီအမျိုးသားထောက်လှမ်းရေးညွှန်ကြားရေးမှူးတာဝန်ထမ်းဆောင်ခဲ့သူဖြစ်ပြီး ယခုအခါ Donald Trump လက်ထက် သမ္မတ၏ အထူး တာဝန်ခံကိုယ်စားလှယ်အဖြစ် တာဝန်ထမ်းဆောင်လျက်ရှိပြီး ၎င်းသည် သံတမန်ရေးအရှုပ်တော်ပုံများနှင့် နိုင်ငံတကာ လျှို့ဝှက်ဆက်သွယ်ရေး လုပ်ငန်းများကို ကိုင်တွယ်ဖြေရှင်းခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

သမ္မတ ဒေါ်နယ်ထရမ့်က ဟားဗတ်တက္ကသိုလ်နှင့် သောကြာနေ့ (ဇွန် ၂၀) က ညှိနှိုင်းဆွေးနွေးပွဲများ ဆောင်ရွက်ခဲ့ကြောင်း ပြောကြားခဲ့ပြီး သဘောတူညီချက်တစ်ခု မကြာမီ ရရှိနိုင်ကြောင်း ဖော်ပြခဲ့သည်။ ထိုအချက်သည် ၎င်း၏အစိုးရအဖွဲ့၏ တက္ကသိုလ်ကို ဦးတည်ထားသော လုပ်ဆောင်ချက်များတွင် ကြီးမားသော ပြောင်းလဲမှုတစ်ခု ဖြစ်နိုင်ကြောင်း ညွှန်းဆိုနေသည်။

“အဆိုပါညှိနှိုင်းဆွေးနွေးပွဲတွေမှာ ၎င်းတို့သည် သင့်တင့်လျောက်ပတ်စွာ ဆောင်ရွက်ခဲ့ကြပြီး မှန်ကန်သည့်အရာကို လုပ်ဆောင်ဖို့ ကတိကဝတ်ပြုထားပုံရသည်။ ယခုဆွေးနွေးနေသည့် အခြေအနေအတိုင်း သဘောတူညီချက်ရရှိခဲ့ပါက အဲဒါဟာ သမိုင်းမှာ 'အံ့သြဖွယ်ကောင်းလောက်အောင်' အရေးပါသည့် အရာဖြစ်ပြီး မိမိတို့နိုင်ငံအတွက် အလွန်ကောင်းမွန်ပါလိမ့်မည်” ဟု ၎င်းက ဖြည့်စွက်ပြောကြားခဲ့သည်။

ဟားဗတ်တက္ကသိုလ်၏ ထိပ်တန်းတာဝန်ရှိသူများနှင့် အိမ်ဖြူတော်အကြား ဆွေးနွေးမှုများ ဆက်လက်ရှိနေပြီး ထိုဆွေးနွေးပွဲများနှင့် ရင်းနှီးသော အရင်းအမြစ်တစ်ဦးက နောက်ဆုံးသဘောတူညီချက် မရရှိသေးကြောင်း ပြောဆိုခဲ့ပြီး သဘောတူညီချက်ရရှိရန် အလားအလာများကြောင်း ဖော်ပြခဲ့သည်။

သဘောတူညီချက်တစ်ခုသည် အစိုးရအဖွဲ့နှင့် တက္ကသိုလ်အကြား ကျန်ရှိနေသော တရားစွဲဆိုမှုများကို ဖြေရှင်းနိုင်မည်ဟု အရင်းအမြစ်က ညွှန်းဆိုခဲ့သည်။

ကိုးကား-CNN

ဘာသာပြန်ဆိုသူ-ဦးဝင်းဇော်ထွန်း၊ဒုတိယညွှန်ကြားရေးမှူး၊နစက-၂

တရုတ်နိုင်ငံသည် လက်ရှိအချိန်တွင် သန့်ရှင်းစွမ်းအင်ကို ဦးစားပေးပြီး စီးပွားရေးဆောင်ရွက်နေသည့် ထိပ်တန်းနိုင်ငံ ဖြစ်လာလျက်ရှိကြောင်း၊ ယခုအတိုင်းဆက်သွားပါက ကာဗွန်ထွက်ရှိမှုကို လျှော့ချပြီး တရုတ်နိုင်ငံ၏ ၂၀၃၅ ခုနှစ် စီးပွားရေးရည်မှန်းချက်များကို ဖြည့်ဆည်းပေးနိုင်မည် ဖြစ်ကြောင်း သုတေသန ပညာရှင်များက ပြောသည်။

ထို့ကြောင့် အဆိုပါအနေအထားမျိုးသို့ ရောက်ရှိနိုင်စေရေးအတွက် တရုတ်နိုင်ငံအနေဖြင့် ပြည့်ဖြိုးမြဲစွမ်းအင်နှင့် အစိမ်းရောင်နည်းပညာ ဖန်တီးတီထွင်ထုတ်လုပ်မှုများတွင် ရင်းနှီးမြှုပ်နှံမှုများကို တိုးမြှင့်နိုင်စေရေးအတွက်   မူဝါဒများချမှတ်ပေးရမည်ဖြစ်ကြောင်း  ဟယ်ဆင်ကီမြို့ အခြေစိုက်စွမ်းအင်နှင့်   သန့်ရှင်းလေထု သုတေသနဌာနက ထုတ်ပြန်ထားသည်။

၂၀၃၅ ခုနှစ်အရောက်တွင် တရုတ်နိုင်ငံ၏ သန့်ရှင်းစွမ်းအင် လုပ်ငန်းသည်နှစ်ဆ တိုးပွားလာနိုင်ပြီး စီးပွားရေး၌ အမေရိကန်ဒေါ်လာ ၂ ဒသမ ၁ ထရီလီယံအထိမြင့် တက်လာစေနိုင်ကြောင်း ပညာရှင်များ၏ ထုတ်ပြန်ချက်တွင် ဖော်ပြထားသည်။

လက်ရှိတွင် ကမ္ဘာပေါ်ရှိပြည့်ဖြိုးမြဲ စွမ်းအင်ကဏ္ဍတွင် တရုတ်နိုင်ငံကဦးဆောင် ရင်းနှီးမြှုပ်နှံသူအဖြစ် ရပ်တည်နေသည်။ ထို့ကြောင့် စဉ်ဆက်မပြတ် အစိမ်းရောင် ရင်းနှီးမြှုပ်နှံမှုသည် ၁၀ စုနှစ်တစ်ခုအတွင်း တရုတ်နိုင်ငံကို  အတန်အသင့် ချမ်းသာကြွယ်ဝသော နိုင်ငံအဖြစ်သို့ရောက်ရှိလာ စေမည်ဖြစ်ကြောင်း လေ့လာသူများက ပြောသည်။

ဧပြီလအထိရရှိသော စာရင်းများအရ တရုတ်နိုင်ငံသည် လေစွမ်းအင်နှင့်နေစွမ်းအင်တို့မှ လျှပ်စစ်ဓာတ်အားပမာဏကို 1533 GW အထိထုတ်ယူ အသုံးပြုလျက်ရှိ ကြောင်းသိရသည်။

MWD Web Portal

ဘရာဇီးလ်နိုင်ငံတောင်ပိုင်း Santa Catarina ဒေသတွင် စနေနေ့ (ဇွန် ၂၁) က မိုးပျံပူဖောင်း မတော်တဆမှုဖြစ်ပွားပြီး အနည်းဆုံး လူ ၈ ဦး သေဆုံး ခဲ့ပြီး မိုးပျံပူဖောင်းပေါ်တွင် လူ ၂၁ ဦးပါဝင်ခဲ့ကာ အခြား ၁၃ ဦးမှာ အသက်ရှင် ကျန်ရစ်ခဲ့ကြောင်း ဒေသဆိုင်ရာအုပ်ချုပ်ရေးမှူး Jorginho Mello က ပြောကြားခဲ့သည်။

လူမှုမီဒီယာပေါ်တွင် တင်ထားသည့် ဗီဒီယိုတစ်ခုတွင် မိုးပျံပူဖောင်းသည် ကောင်းကင်ယံတွင် မီးလောင်သည့်အခြေအနေကို မြင်တွေ့ရပြီးနောက် မြေပြင်သို့ ပြုတ်ကျသွားခဲ့သည်။

သမ္မတ Luiz Inácio Lula da Silva က X တွင် သေဆုံးသူများ၏ မိသားစုများအား စာနာထောက်ထားမှု သတင်းစကားများပေးပို့ခဲ့ပြီး “အစိုးရအနေဖြင့် ကယ်ဆယ်ရေးလုပ်ငန်းများနှင့် အသက်ရှင် ကျန်ရစ်သူ များကို ကူညီရန် ပြည်နယ်နှင့် မြို့ပြအာဏာပိုင်များကို အကူအညီပေးရန် အဆင်သင့်ဖြစ်နေပါသည်” ဟု ၎င်းက ဖော်ပြခဲ့သည်။

Praia Grande သည် ဘရာဇီးလ်တောင်ပိုင်းတွင် ဇွန်လအတွင်း Saint John အပါအဝင် ကက်သလစ်သူတော်စင်များ၏ ပွဲတော်များကို ကျင်းပသည့်အခါတွင် လူကြိုက်များသော မိုးပျံပူဖောင်းစီးခရီးစဉ်များ ကျင်းပလေ့ရှိသည့် နေရာတစ်ခုဖြစ်ကြောင်း AP သတင်းတွင် ဖော်ပြထားသည်။

ကိုးကား- CNN

Photo: Arab News

ဘာသာပြန်ဆိုသူ-ဦးဝင်းဇော်ထွန်း၊ဒုတိယညွှန်ကြားရေးမှူး၊နစက-၂

ဆီးရီးယားသမ္မတဟောင်း ဘာရှာအာဆတ်၏ တပ်မတော်တွင် တာဝန် ထမ်းဆောင်ခဲ့ဖူးသော ဗိုလ်ချုပ်ကြီးဟောင်းတစ်ဦးသည် ရုရှားအလယ်ပိုင်းတွင် ခိုလှုံနေထိုင်လျက်ရှိပြီး ဒေသခံမီဒီယာများနှင့် တွေ့ဆုံမေးမြန်းမှု ပြုလုပ်ခဲ့သည်။ 66.RU သတင်းဌာနနှင့် အမည်မဖော်ပြရန် တောင်းဆိုချက်ဖြင့် တွေ့ဆုံမေးမြန်းမှုတစ်ခုတွင် ၎င်းက ရုရှားလူမှုအဖွဲ့အစည်းတွင် ပေါင်းစည်းရန် ရည်မှန်းထားပြီး ဆီးရီးယားသို့ ပြန်လည်အခြေချရန် စဉ်းစားမထားကြောင်း ပြောကြားခဲ့သည်။ 

၎င်းကို “Wolf” ဟူသော အမည်ဖြင့်သာ ဖော်ပြရန် တောင်းဆိုခဲ့သည့် ဗိုလ်ချုပ်ကြီးဟောင်းက ဒီဇင်ဘာလတွင် အစ္စလာမ်မစ် အစိုးရ ဆန့်ကျင်ရေး အုပ်စုများ၏ လျင်မြန်စွာ တိုက်ခိုက်သိမ်းပိုက်မှုကြောင့် အာဆတ်အစိုးရ ပြုတ်ကျခဲ့ပုံကို ပြန်လည်သတိရနေခဲ့သည်။ ထိုအချိန်က ၎င်း၏ အကြီးအကဲများအပါအဝင် တပ်ဖွဲ့ဝင်များစွာ တာဝန်မှ စွန့်ခွာထွက်ပြေးခဲ့ရကြသည် ကို ပြန်လည်မြင်ယောင်နေခဲ့သည်။

“မိမိ နားလည်ဖို့ ခက်ခဲပါသည်။ ဒါဟာ သစ္စာဖောက်မှုပါပဲ၊ အခြား နည်းလမ်း မရှိပါ” ဟု Wolf က ရုရှားသတင်းထောက်များအား ပြောကြားခဲ့သည်။

အာဏာသိမ်းခံရပြီးနောက် ထိုဗိုလ်ချုပ်ကြီးဟောင်းသည် အကြမ်းဖက် သမားများ၏ ညှဉ်းပန်းနှိပ်စက်မှုကို စိုးရိမ်သည့်အတွက် ဇနီးနှင့် သားသမီးများကို ပုန်းအောင်းရာတွင် ချန်ထားခဲ့ပြီး ညီမနှင့် တူနှစ်ဦးတို့နှင့်အတူ ရုရှား Khmeimim လေတပ်စခန်းသို့ ထွက်ပြေးရောက်ရှိခဲ့သည်။ ၎င်း၏ သားသမီးများအနေဖြင့် ထိုအန္တရာယ်များပြားသည့်ခရီးကို ပြီးဆုံးအောင် သွားရောက်နိုင်မည် မဟုတ်ကြောင်း ရှင်းပြခဲ့သည်။

ရုရှားသို့ ရောက်ရှိပြီးနောက် Sverdlovsk ဒေသသို့ ရောက်ရှိခဲ့သည်။ ဆိုဗီယက်ယူနီယံခေတ်က Leningrad (ယခု St. Petersburg) တွင် ပညာသင်ကြားခဲ့ဖူးသော Wolf သည် ရောက်ရှိချိန်တွင် ရုရှားစကားကို ကောင်းစွာပြောနိုင်သော်လည်း ဆက်လက်လေ့လာနေဆဲဖြစ်သည်။ 

ယာယီကာကွယ်စောင့်ရှောက်မှု (temporary protection status) ရရှိထားသော ၎င်းသည် ၎င်းနှင့်မိသားစုအတွက် ငွေကြေး အခက်အခဲ မရှိစေရန် အချိန်ပိုင်းအလုပ်တစ်ခုကို ရှာဖွေလုပ်ကိုင်နေရသည်။

“မိမိအနေဖြင့် စက်ရုံတစ်ခုခုမှာ တရားဝင်အလုပ်လုပ်နိုင်ရန်အတွက် စာရွက်စာတမ်းများကို စောင့်နေပါသည်။ နေထိုင်ခွင့်လျှောက်ထားချက် ကိုလည်း လုပ်ဆောင်နေပါသည်” ဟု ဗိုလ်ချုပ်ကြီးဟောင်းက ပြောကြား ခဲ့ပြီး တစ်နေ့လျှင် ၁၀ နာရီမှ ၁၂ နာရီအထိ မည်သည့်အလုပ်ကိုမဆို လုပ်ကိုင်ရန် အဆင်သင့်ရှိကြောင်း ဖြည့်စွက်ပြောကြားခဲ့သည်။

ဆီးရီးယားနိုင်ငံသည် နောက်ထပ်အနည်းဆုံး ၁၀ နှစ်ခန့် မငြိမ်မသက် ဖြစ်နေဦးမည်ဟု ၎င်းယုံကြည်သောကြောင့် ပြန်လည်အခြေချရန် မရည်ရွယ်ကြောင်း ဆက်လက်ပြောကြားခဲ့သည်။ “မိမိ၏ သားသမီး များကို ရုရှားမှာ သာမန်လူတွေလို နေထိုင်ခွင့်ပေးပါ” ဟု ဗိုလ်ချုပ်ကြီး ဟောင်းက အဆုံးသတ်ပြောကြားရင်း ယခုအခါ ၎င်းသည် “ဆီးရီးယား ထက် ရုရှားလူမျိုးတစ်ဦးကဲ့သို့ ပိုခံစားရကြောင်း” ခိုင်ခိုင်မာမာ ပြောကြား ခဲ့သည်။

၂၀၂၄ နှစ်ကုန်ပိုင်းတွင် လက်နက်ကိုင်ဆန့်ကျင်ရေးအုပ်စုများ အာဏာရလာပြီးနောက် အစ္စလာမ်မစ်ဝါဒီသမားများသည် အလာဝှိုတ်ဘာသာဝင် အနည်းစုအပါအဝင် ခရစ်ယာန်နှင့် ဒရူဇ်အသိုင်းအဝိုင်းများကို ဆီးရီးယား နိုင်ငံတစ်ဝှမ်း လူမျိုးတုံးသတ်ဖြတ်မှုများ ကျူးလွန်ခဲ့သည်ဟု သတင်းများအရ သိရသည်။

ကိုးကား- RT

ဘာသာပြန်ဆိုသူ-ဦးဝင်းဇော်ထွန်း၊ဒုတိယညွှန်ကြားရေးမှူး၊နစက-၂