Nio ကုမ္ပဏီက Firefly EV ဆိုတဲ့ လျှပ် စစ်ကားအမျိုးအစား တစ်မျိုးကို ဖန်တီး ထုတ်လုပ်လိုက်ပါတယ်။ တန်ဖိုးအားဖြင့် ယူရို ၁၅၁၁၀ မှ ယူရို ၁၅၉၀၀ အထိရှိတဲ့ Firefly EV ကိုတော့ ဥရောပဈေးကွက် အတွက်သာ ရည်မှန်းထားတယ်လို့ Nio ကုမ္ပဏီက ထုတ်ပြန်ထားပါတယ်။

Nio က Firefly EV ကို Nio Day 2024 မှာ စတင်မိတ်ဆက်ခဲ့တာပါ။ အဲဒီအချိန်တုန်းက သူ့ရဲ့တန်ဖိုးကို ယူရို ၁၈၇၇၀ လို့ သတ်မှတ်ခဲ့ပေမယ့် နောက်ပိုင်းမှာ ဈေး နှုန်းကို ၂၀ ရာခိုင်နှုန်းအထိ လျှော့ချပေးလိုက်တာဖြစ်ပါတယ်။

Firefly EV ရဲ့ပုံစံကတော့ Nio ရဲ့သမားရိုးကျပုံစံကနေ ကွဲထွက်နေပြီး အမြင်မှာ စွဲမက်စေမယ့် ရှေ့မီးလုံးနဲ့နောက်မီးလုံး ဒီဇိုင်းတွေနဲ့ အလှဆင်ထားတာပါ။ အတွင်းပိုင်းမှာ ခေတ်မီနည်းပညာနဲ့ သက်သောင့်သက်သာရှိမှုတို့ကို ပေါင်းစပ်ပေးထားတာဖြစ်ပြီး ခရီးအကွာအဝေး ၄၂၀ ကီလိုမီတာ အထိသွားနိုင်ပါတယ်။

Source: https://myawady.net.mm/

နည်းပညာသတင်း

BYD ဆိုတာ လျှပ်စစ်ကားလောကမှာ ရောင်းအားအကောင်းဆုံး ကားကုမ္ပဏီ တစ်ခုဖြစ်ပါတယ်။ အလားတူပဲ သူ့ကုမ္ပဏီ ကထုတ်လုပ်တဲ့ Sealion ဆိုတာကလည်း နာမည်ကျော် လျှပ်စစ်ကားအမျိုးအစား တစ်မျိုးဖြစ်ပါတယ်။

အခု BYD က သူတို့ရဲ့နာမည်ကျော် Sealion လျှပ်စစ်ကား အမျိုးအစားထဲမှာ Sealion 06 ဆိုတဲ့ မော်ဒယ်တစ်မျိုးကို ထပ်မံ ထည့်သွင်းပေးလိုက်ပါပြီ။ ဒီမော်ဒယ်မှာတော့ အရင်လိုမျိုးလျှပ်စစ်ကား စွမ်းအင်သက်သက်ကိုသာ အသုံးပြုထားတဲ့မော်ဒယ်တစ်မျိုးတည်း မဟုတ်ဘဲ လျှပ်စစ်မော်တာနဲ့ အတွင်းလောင်အင်ဂျင်ကို ပေါင်းစပ်အသုံးပြုထားတဲ့ မော်ဒယ်ကိုပါ  ထုတ်ဖော်ပြသလိုက်တာပါ။

အမြန်နှုန်းအနေနဲ့  လျှပ်စစ်စွမ်းအင် သီးသန့်သုံးကားက တစ်နာရီမှာ ၁၈၅ ကီလိုမီတာနှုန်းနဲ့သွားနိုင်ပြီး စွမ်းအင်နှစ်မျိုးစပ်သုံးကားက ကီလိုမီတာ ၁၈၀ နှုန်းနဲ့သွားနိုင်မှာဖြစ်တယ်လို့ သူတို့ရဲ့ထုတ်ပြန်ချက်ထဲမှာ ဖော်ပြထားပါတယ်။

Source: https://myawady.net.mm/

နည်းပညာသတင်း

အပ်ပဲကုမ္ပဏီက ဒီနှစ်ထဲမှာ iPhone 17 ကို ထုတ်လုပ်သွားဖို့ရှိနေပါတယ်။ သူတို့က တစ်နှစ်ကိုထင်ရှားတဲ့ အရောင်တစ်မျိုးနဲ့ ဖုန်းတွေကိုထုတ်လုပ်လေ့ရှိတာပါ။ ဒီနှစ်မှာတော့ အပ်ပဲက iPhone 17 Pro ကိုမိုးပြာရောင်အရောင်နဲ့ ထွက်ပေါ်လာမယ်လို့သတင်းတွေ ထွက်နေပါတယ်။ ဒီသတင်းကို ထုတ်ပြန်လိုက်တာက Majin Bu ဆိုတဲ့ဝက်ဆိုက်ပါ။ သူတို့က အပ်ပဲထုတ်ကုန်တွေနဲ့ ပတ်သက်ပြီး နောက်ဆုံးသတင်းတွေကို ထုတ်ပြန်လေ့ရှိပါတယ်။၊

အခုသူတို့ရဲ့ထုတ်ပြန်ချက်ထဲမှာ ဖော်ပြထားတာက iPhone 17 Pro နဲ့ Pro Max တို့အတွက် ထင်ရှားတဲ့အရောင်က M4 MacBook Air အရောင်နဲ့ ဖြစ်လာမယ်လို့ဆိုပါတယ်။ အပ်ပဲက M4 MacBook Air ကို ပြီးခဲ့တဲ့လကမှ   ထုတ်လုပ်လိုက်တာပါ။

ဒါ့အပြင် သူတို့ရဲ့ထုတ်ပြန်ချက်က မှန်ကန်ကြောင်း သက်သေပြနိုင်တဲ့အချက်တစ်ချက်က အပ်ပဲအနေနဲ့ iPhone 17 Pro ကို ရှေ့ပြေးပုံစံတွေ ထုတ်လုပ်နေပြီ လို့ အတွင်းသတင်းတွေက ဖော်ပြထားတာကိုလည်း တွေ့ရပါတယ်။

အပ်ပဲက သူတို့ရဲ့ဖုန်းတွေကိုအပြာနုရောင်နဲ့ မထုတ်လုပ်တာကြာပါပြီ။ ၂၀၂၁ ခုနှစ်ကတည်းကပါ။ အဲဒီအချိန်တုန်းက အပ်ပဲရဲ့ iPhone 13 Pro တွေကို Sierra Blue လို့ခေါ်တဲ့ အပြာနုရောင်ကို အသုံးပြုခဲ့တာဖြစ်ပါတယ်။ အဲဒီနောက်ပိုင်းမှာတော့ အဲဒီအရောင်ကို အသုံးမပြုခဲ့ဘဲ အခုမှပဲ မိုးပြာရောင်နဲ့ ဖုန်းထုတ်လုပ်ဖို့  လုပ်လာတာဖြစ်ပါတယ်။   

Source: https://myawady.net.mm/

မေလ ၉ ရက်တွင် မော်စကိုမြို့၌ ကျင်းပမည့် Victory Day နှစ် (၈၀) ပြည့် အခမ်းအနားသို့ တက်ရောက်မည့် တရုတ်သမ္မတရှီကျင့်ဖျင်သည် အဆိုပါ ခရီးစဉ်အတွင်း Hongqi N710 မော်တော်ယာဉ်ကို အသုံးပြုမည် ဖြစ်ကြောင်း သိရပါသည်။

TASS သတင်းဌာန၏ ရရှိထားသော သတင်းအချက်အလက်များအရ Hongqi ကုမ္ပဏီသည် အဆိုပါ ဒုတိယကမ္ဘာစစ်အောင်ပွဲနေ့ နှစ် (၈၀) ပြည့် အခမ်းအနားတွင် အသုံးပြုရန် Hongqi H9 အဆင့်မြင့်မော်တော်ယာဉ် အစီး (၂၀) နှင့် Hongqi H10 လုပ်ငန်းသုံးမီနီဗင် ၁၀ စီး ပေးအပ်မည် ဖြစ်ပါသည်။

Hongqi ဆိုသည်မှာ “အနီရောင်အလံ” ဟု အဓိပ္ပာယ်ရပြီး တရုတ်နိုင်ငံ၏ အထင်ကရ Luxury car brand ဖြစ်ပါသည်။ Hongqi N710 မော်တော်ယာဉ်မှာ တရုတ်နိုင်ငံ၏ နိုင်ငံတော်အကြီးအကဲအဆင့် စီးနင်းရန် အထူးထုတ်လုပ်ထားသော Limousine ကားအမျိုးအစား ဖြစ်ပါသည်။

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

Meta ၏ FAIR အဖွဲ့သည် စက်ရုပ်၏မြင်သိနားလည်မှုနှင့် ဉာဏ်ရည်ကို တော်လှန်ရန် ရည်ရွယ်၍ ဒီဇိုင်းထုတ်တီထွင်ထားသော အစဉ်အလာမှ ဖေါက်ထွက်သော ကိရိယာငါးခုကို ထုတ်ဖော်ပြသခဲ့သည်။ ဤကိရိယာများသည် ပိုမိုပြတ်သားသောအမြင်၊ လေးနက်သော ကျိုးကြောင်းဆင်ခြင်မှုနှင့် လူမှုဆက်ဆံရေးအသိအမြင်ကို မြှင့်တင်ပေးပါသည်။

စက်ရုပ်များသည် သဘာဝဘာသာစကားကို အသုံးပြု၍ အရာဝတ္တုများကို မှတ်သားရှာဖွေဖော်ထုတ်နိုင်သည်၊ လူသားများနှင့် ထိထိရောက်ရောက် ပူးပေါင်းလုပ်ဆောင်နိုင်သည်၊ ကိုယ်တိုင်လည်း လွတ်လပ်စွာ လေ့လာသင်ယူနိုင်ပြီဖြစ်သည်။ ၎င်းသည် ပိုမိုထက်မြက်သော AI သက်သက်မျှသာ မဟုတ်ပါ။ ဉာဏ်ရည်တု AI သည် အာရုံဖြင့်သိနိုင်စွမ်းရှိသည်၊ တွေးခေါ်နိုင်စွမ်းရှိသည်၊ ညှိနှိုင်းနိုင်စွမ်းရှိသော မိတ်ဖက်တစ်ဦးကဲ့သို့လည်း ဖြစ်လာပါသည်။

Source: Popular Myanmar

ဂါဇာ   ဧပြီ ၂၃

၂၀၂၃ ခုနှစ်‌ အောက်တိုဘာ ၇ ရက်က အစ္စရေး-ဟားမားစ် ပဋိပက္ခဖြစ်ပွားချိန်မှစတင်ကာ ကုသခံယူမှုနှင့် အရေးတကြီးလိုအပ်သော ဆေးဝါးပြတ်တောက်မှုကြောင့် ကျောက်ကပ်ရောဂါခံစားနေရသည့် လူနာ ၄၀၀ ကျော် သေဆုံးမှုဖြစ်ပွားကြောင်း ပါလက်စတိုင်း ဆေးဘက်ဆိုင်ရာ တာဝန်ရှိသူများက ဧပြီ ၂၃ ရက်တွင် ပြောသည်။

သေဆုံးသူများသည် ဂါဇာကမ်းမြောင်ရှိ ကျောက်ကပ်ဝေဒနာရှင် စုစုပေါင်း၏ ၄၂ ရာခိုင်နှုန်းခန့်ရှိကြောင်း ဂါဇာရှိ အယ်ရှီဖာဆေးရုံ၌ တာဝန်ရှိသူများက သတင်းထောက်များကိုပြောသည်။ ဆက်လက်ဖြစ်ပွားနေသော အစ္စရေး၏ တိုက်ခိုက်မှုများနှင့် ဆေးဝါးထောက်ပံ့မှု ဆိုးရွားစွာ ပြတ်တောက်မှုများအောက် ကျန်းမာရေးစနစ် ဆက်လက်ပြိုလဲနေသည့်အတွက် မတ်လနောက်ပိုင်း ကျောက်ကပ်ဆေးကြောရန် လိုအပ်သည့် လူနာ ၁၁ ဦးခန့် သေဆုံးခဲ့ရကြောင်း သိရသည်။

အယ်ရှီဖာဆေးရုံရှိ ကျောက်ကပ်ဌာနအကြီးအကဲ အဗ္ဗဒူလာအယ်ကီရှာဝီက ပဋိပက္ခမဖြစ်ပွားမီ ကျောက်ကပ်ဝေဒနာရှင် ၁၁၀၀ ခန့်မှာ ကျောက်ကပ်ဆေးကြောမှု ခံယူခဲ့ရကြောင်းနှင့် ၎င်းတို့အထဲမှ ၄၁၆ ဦးမှာ အသက်ဆုံးရှုံးမှုဖြစ်ပွားခဲ့ခြင်းဖြစ်ကြောင်း ပြောသည်။

Source: မြန်မာ့အလင်းသတင်းစာ

တောင်ကိုရီးယားနိုင်ငံက ပြည်တွင်းဖြစ် လေးစင်းမြောက် ထောက်လှမ်းရေးဂြိုဟ်တုကို ဧပြီလ ၂၂ ရက်တွင် ကမ္ဘာပတ်လမ်းအတွင်းသို့ အောင်မြင်စွာ လွှတ်တင်လိုက်နိုင်ကြောင်း သိရသည်။

အဆိုပါဂြိုဟ်တုကို အမေရိကန်နိုင်ငံ ဖလော်ရီဒါရှိ အာကာသအခြေစိုက်စခန်းမှလွှတ်တင်ခြင်းဖြစ်ကြောင်းနှင့် ယင်းသို့လွှတ်တင်ရခြင်းသည် နိုင်ငံအနေဖြင့်မှီခို မှုကင်းမဲ့သည့် ထောက်လှမ်းရေး စွမ်းရည်များကို ပိုင်ဆိုင်လာနိုင်စေရန်ဖြစ်ကြောင်း ကာကွယ်ရေးဝန်ကြီးဌာနက ထုတ်ပြန်ထားသည်။

ယင်းဂြိုဟ်တုကို SpaceX ၏ Falcon 9 ဒုံးပျံက သယ်ဆောင်သွားခြင်းဖြစ်ပြီး ဒုံးပျံ ကိုလွှတ်တင်ပြီးနောက် ငါးမိနစ်အကြာတွင် ဂြိုဟ်တုကို ကမ္ဘာပတ်လမ်းအတွင်း နေရာချထားပေးနိုင်ခြင်းဖြစ်သည်။

ယင်းသို့နေရာချထားပြီးနောက် ၅၆ မိနစ်အကြာတွင် ထိုဂြိုဟ်တုသည် ပြည်ပ ရှိမြေပြင် ထိန်းချုပ်ရေးစခန်းနှင့် အဆက်အသွယ်ရရှိကြောင်း၊ ထို့ကြောင့် ဂြိုဟ်တုသည် ပုံမှန်လုပ်ငန်းများကို ဆောင်ရွက်နိုင်နေပြီ ဖြစ်ကြောင်း သိရသည်။

Source: https://myawady.net.mm/

ဧပြီ ၂၁ ရက်တွင် သက်တော် ၈၈ နှစ်ဖြင့် ကွယ်လွန်သွားသော ပုပ်ရဟန်း မင်းကြီးဖရန်စစ်၏ ဈာပနာအခမ်းအနားသို့ အမေရိကန် သမ္မတ ဒေါ်နယ် ထရမ့် တက်ရောက်မည် ဖြစ်ကြောင်း အိမ်ဖြူတော်ပြောရေးဆိုခွင့်ရှိသူ   ကယ်ရိုလိုင်းလီဗစ်က သတင်းထောက်များအား တရားဝင် ပြောကြားလိုက်ပါသည်။

ပုပ်ရဟန်းမင်းကြီး ဖရန်စစ်၏ ဈာပနာအခမ်းအနားကို ဧပြီ ၂၆ ရက် (စနေနေ့) တွင် ဗာတီကန်မြို့ရှိ St. Peter’s Basilica ဘုရားကျောင်း၌ ကျင်းပမည်ဟု သိရပါသည်။ 

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ရှန်ကျိုး-၂၀ လူတင်အာကာသယာဉ်ကို တရုတ်နိုင်ငံ အနောက်မြောက်ပိုင်း ကျိုချွမ် ဂြိုဟ်တုလွှတ်တင်ရေးစင်တာမှ ဧပြီ ၂၄ ရက် ပေကျင်း စံတော်ချိန် ညနေ ၅:၁၇ နာရီ၌ လွှတ်တင်ရန်စီစဉ်ထားကြောင်း တရုတ်နိုင်ငံ လူလိုက်ပါသောအာကာသအေဂျင်စီ (CMSA) က ဧပြီ ၂၃ ရက်၌ ပြောကြားခဲ့သည်။ အဆိုပါ အာကာသယာဉ်သည် ရှန်ကျိုး-၂၀ အာကာသ ယာဉ်ပျံသန်းရေးမစ်ရှင် ထမ်းဆောင်မည့် အာကာသယာဉ်မှူးများဖြစ်သော ချန်တုန်း (Chen Dong) ၊ ချန်ကျုံးရွှေ့ (Chen Zhongrui) နှင့် ဝမ်ကျယ် (Wang Jie) တို့ကို ခေါ်ဆောင်သွားမည်ဖြစ်ကာ ချန်တုန်းက ခေါင်းဆောင် အဖြစ် တာဝန်ယူမည်ဖြစ်ကြောင်း CMSA ပြောခွင့်ရပုဂ္ဂိုလ် လျင်ရှီးချန်က သတင်းစာရှင်းလင်းပွဲ၌ ပြောကြားခဲ့သည်။ ထိုအာကာသယာဉ် လွှတ်တင်မည့်နေ့မှာ တရုတ်နိုင်ငံ၏ ၁၀ နှစ်မြောက် အာကာသနေ့နှင့် တစ်ထပ်တည်း ကျလျက်ရှိကြောင်း ၎င်းက မှတ်ချက်ပြုခဲ့သည်။ တရုတ်နိုင်ငံသည် ၁၉၇၀ ပြည့်နှစ် ဧပြီ ၂၄ ရက်က ၎င်းတို့၏ ပထမဆုံး ဂြိုဟ်တု Dongfanghong-1 ကို အောင်မြင်စွာလွှတ်တင်ခဲ့ခြင်း အထိမ်းအမှတ်အနေဖြင့် ဧပြီ ၂၄ ရက် ကို အာကာသနေ့အဖြစ် ၂၀၁၆ ခုနှစ်က သတ်မှတ်ခဲ့ခြင်းဖြစ်သည်။ ဧပြီ ၂၄ ရက်၌ လွှတ်တင်မည့်အစီအစဉ်တွင် Long March-2F သယ်ဆောင်ရေး ဒုံးပျံကို အသုံးပြုမည်ဖြစ်ကာ မကြာမီ တွန်းကန်ပစ္စည်းကို ဖြည့်တင်းမည် ဖြစ်ကြောင်း၊ မစ်ရှင်လွှတ်တင်မှုပြင်ဆင်ရေးလုပ်ငန်းအားလုံးမှာလည်းအဆင်ပြေချောမွေ့စွာ တိုးတက်လျက်ရှိကြောင်း လျင်က ဖြည့်စွက် ပြောကြားခဲ့သည်။ ရှန်ကျိုး-၂၀ သည် တရုတ်နိုင်ငံ၏ လူလိုက်ပါသော အာကာသအစီအစဉ်၏ ၃၅ ကြိမ်မြောက် ပျံသန်းရေးမစ်ရှင်ဖြစ်ကာ တရုတ်နိုင်ငံ၏ အာကာသစခန်း အသုံးပြုမှုနှင့် တိုးတက်မှုအဆင့်အတွင်း ပဉ္မမအကြိမ် လူလိုက်ပါသောမစ်ရှင်လည်းဖြစ်သည်။ အဆိုပါ အာကာသယာဉ်မှူးများသည် ယခုနှစ် အောက်တိုဘာလကုန်ပိုင်းတွင် တရုတ်နိုင်ငံ မြောက်ပိုင်းရှိ တုန်းဖုန်းမြေပြင်ဆင်းသက်နေရာသို့ ပြန်လည်ရောက်ရှိမည် ဖြစ်ကြောင်း သိရသည်။ 

ကိုးကား-ဆင်ဟွာ

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ရုရှားသမ္မတ ဗလာဒီမာပူတင်က လက်ဆောင်အဖြစ်ပေးအပ်ခဲ့သော အမေရိကန်သမ္မတ ဒေါ်နယ်ထရမ့် ပုံတူပန်းချီကားမှာ တန်ဖိုးမဖြတ်နိုင်ကြောင်း ပန်းချီဆရာ နိကက်စ် ဆာဖရိုနော့ဖ်က ပြောကြားခဲ့ပါသည်။

ရုရှားသမ္မတ ဗလာဒီမာပူတင်က မတ်လတွင် အမေရိကန်သမ္မတ ဒေါ်နယ်ထရမ့်အား လက်ဆောင်ပေးခဲ့သော ပုံတူပန်းချီကားသည် သမိုင်းဆိုင်ရာရှုထောင့်နှင့် ပထဝီနိုင်ငံရေးတင်းမာမှုများအရ တန်ဖိုးမဖြတ်နိုင်ကြောင်း ထိုပန်းချီကားရေးဆွဲသူ ပန်းချီဆရာ နိကက်စ် ဆာဖရို နော့ဖ်က သတင်းမီဒီယာများအား ပြောကြားခဲ့ပါသည်။

ပန်းချီဆရာက ၎င်း၏ အနုပညာလက်ရာများတွင် နိုင်ငံ့ခေါင်းဆောင်ပေါင်း ၅၀ ကျော်၏ ပုံတူများကို ရေးဆွဲခဲ့သော်လည်း ယခုလက်ရာမှာ အထူး အရေးပါကြောင်း ထည့်သွင်းပြောကြားခဲ့ပါသည်။ “ဤပုံတူသည် ရိုးရိုး ပန်းချီကားတစ်ခုထက် သမိုင်းဝင်အခိုက်အတန့်ကို ဖမ်းယူထားသည့် အနုပညာလက်ရာဖြစ်ပြီး စိတ်ခံစားမှုများကို အရောင်အသွေးစုံလင်စွာ ထည့်သွင်းထားသည်” ဟု ၎င်းက ဖွင့်ဟခဲ့ပါသည်။

ဆာဖရိုနော့ဖ်၏ အဆိုအရ ၎င်းသည် အရေးကြီးသော သင်္ကေတအချို့ကို ထည့်သွင်းစဉ်းစားပြီး ထိုပန်းချီကားပေါ်တွင် အမေရိကန်၏ သင်္ကေတများ ဖြစ်သော “လွတ်လပ်ရေးရုပ်တု” နှင့် နယူးယောက်ကမ်းခြေမြင်ကွင်းကို နောက်ခံထည့်သွင်းထားပြီး၊ ထို့အပြင် ဒေါ်နယ်ထရမ့်၏ ဒဏ်ရာမှ သွေးများ၊ လက်တစ်ဖက်ကို မြှောက်ထားပြီး လျှော့ချထားသော အလံ (အမေရိကန်၏ ခိုင်မာမှုနှင့် ကြီးကျယ်မှုပြန်လည်ရရှိရေး သင်္ကေတ) နှင့် “အမေရိကကို ပြန်လည်ကြီးကျယ်စေမည်” ဟူသော စာသားပါသည့် ဒေါ်နယ်ထရမ့်၏ ထင်ရှားသည့် ဦးထုပ်ကို အခြားလက်တွင် သရုပ်ဖော်ထားပါသည်။

ပန်းချီဆရာက ကမ္ဘာ့နိုင်ငံရေးအခြေအနေ တင်းမာနေစဉ် ခေါင်းဆောင် နှစ်ဦးအကြား လက်ဆောင်ပန်းချီကား ဖလှယ်မှုသည် တန်ဖိုးကြီးမားသည် ဟု မှတ်ချက်ပြုခဲ့ပါသည်။ “အနုပညာသည် ငြိမ်းချမ်းရေးလုပ်ငန်းစဉ်၏ အစိတ်အပိုင်းတစ်ခု ဖြစ်နိုင်သည့်အတွက် မိမိပျော်ရွှင်မိပါသည်” ဟု ဆာဖရိုနော့ဖ်က ကောက်ချက်ချပြောဆိုခဲ့ပါသည်။

ကိုးကား - Tass