အင်္ဂါဂြိုဟ်မှပဲ့ထွက်လာသည့် အကြီးမားဆုံး   ဂြိုဟ်ပဲ့အစိတ်အပိုင်းတစ်ခုအား ဒေါ်လာ ၅ ဒသမ ၃ သန်းဖြင့်  စံချိန်တင် ရောင်းချနိုင်ခဲ့ကြောင်း သိရသည်။

အဆိုပါဂြိုဟ်ပဲ့ကြီးကို   အမေရိကန်ပြည်ထောင်စုရှိ sotheby's လေလံကုမ္ပဏီမှ ပြီးခဲ့သည့် ရက်သတ္တပတ်အတွင်းက ကျင်းပခဲ့သည့် လေလံပွဲတစ်ခု၌ ရောင်းချနိုင်ခဲ့ခြင်းဖြစ်သည်။ အဆိုပါဂြိုဟ်ပဲ့ကြီးသည် အလေးချိန်အားဖြင့် ၂၄ ဒသမ ၆၇ ကီလိုဂရမ်ရှိပြီး ၎င်းအား ဆာဟာရသဲကန္တာရရှိ နိုင်ဂျာနိုင်ငံအတွင်း၌ ၂၀၂၃ ခုနှစ် နိုဝင်ဘာလအတွင်းက  ရှာဖွေတွေ့ရှိခဲ့ခြင်းဖြစ်သည်။

NWA 16788 ဟုအမည်ပေးထားသည့် အဆိုပါဂြိုဟ်ပဲ့ကြီးသည် ဂြိုဟ်သိမ်ဂြိုဟ်မွှားများ ဝင်တိုက်မှုကြောင့် အင်္ဂါဂြိုဟ်မျက်နှာပြင်မှ ပဲ့ထွက်လာခြင်းဖြစ်သည်။

ယခု  လေလံတင်ရောင်းချနိုင်ခဲ့သည့် အင်္ဂါဂြိုဟ်ပဲ့ကြီးသည် ကမ္ဘာမြေမျက်နှာပြင်ပေါ်သို့ ကျရောက်လာသည့် အဆိုပါဂြိုဟ်ပဲ့များထက် အရွယ်အစားအားဖြင့် ၇၀ ရာခိုင်နှုန်းခန့် ပိုမိုကြီးမားကြောင်း သိရသည်။

အဆိုပါ NWA 16788 ဂြိုဟ်ပဲ့ကြီး၏ ပိုင်ရှင်မှာ မည်သူဖြစ်ကြောင်း သို့မဟုတ် ဝယ်ယူသွားသူမှာ မည်သူဖြစ်ကြောင်းကို လေလံကုမ္ပဏီက ထုတ်ပြန်ခဲ့ခြင်း မရှိပေ။

MWD  Portal

ရှီအန်း ဇူလိုင် ၁၈

ရှန်ဟိုင်းပူးပေါင်းဆောင်ရွက်မှု အဖွဲ့ဝင်နိုင်ငံများ၏ ရုပ်မြင်သံကြားပွဲတော်ကို ဒုတိယအကြိမ်အဖြစ် ဇူလိုင် ၁၆ ရက် နံနက်ပိုင်းက တရုတ်နိုင်ငံ ရှန်ရှီးပြည်နယ် ရှီအန်းမြို့တော်ရှိ Xi’an Chanba International Conference Center ၌ ကျင်းပရာ အဖွဲ့ဝင်နိုင်ငံများအပြင် လေ့လာသူနှင့် ဆွေးနွေးဖက်နိုင်ငံများမှ ကိုယ်စားလှယ်အဖွဲ့များ တက်ရောက်ကြသည်။

အဆိုပါအဖွဲ့ကို ၂၀၁၁ ခုနှစ်က တရုတ်၊ ရုရှား၊ ဘယ်လာရုစ်၊ ကာဇက်စတန်၊ ကာဂျစ္စတန်၊ တာဂျစ္စတန်၊ ဥဇဘက်ကစ္စတန်၊ အိန္ဒိယ၊ ပါကစ္စတန်နှင့် အီရန် ၁၀ နိုင်ငံတို့ဖြင့် စတင်ဖွဲ့စည်းခဲ့ပြီး ယခုပွဲတော်သို့ လေ့လာသူများအဖြစ် မွန်ဂိုလီးယားနှင့် အာဖဂန်နစ္စတန်နိုင်ငံတို့ အပြင် ဆွေးနွေးဖက်နိုင်ငံများအဖြစ် အီဂျစ်၊ ကာတာ၊ ဆော်ဒီအာရေဗျ၊ ဘာရိန်း၊ ကူဝိတ်၊ ယူအေအီး၊ တူကီယဲ၊ အဇာဘိုင်ဂျန်၊ အာမေးနီးယား၊ မော်လ်ဒိုက်၊ ကမ္ဘောဒီးယား၊ နီပေါ၊ သီရိလင်္ကာနိုင်ငံတို့နှင့်အတူ မြန်မာနိုင်ငံမှ မြန်မာ့အသံနှင့်ရုပ်မြင်သံကြား ညွှန်ကြားရေးမှူး ချုပ်နှင့်အဖွဲ့ တက်ရောက်သည်။

အဆိုပါ ရုပ်မြင်သံကြားပွဲတော် ဖွင့်ပွဲအခမ်းအနားတွင် ရှန်ရှီးပြည်နယ်အစိုးရအဖွဲ့အကြီးအကဲ Mr. Zhao Gang က အဖွင့် အမှာစကားပြောကြားပြီး တရုတ်နိုင်ငံ အမျိုးသား ရေဒီယိုနှင့်ရုပ်မြင်သံကြားအုပ်ချုပ်ရေးဝန်ကြီးဌာန ဝန်ကြီး Ms. Cao Shumin က ရှင်းလင်းပြောကြားကာ တက်ရောက်လာကြသည့် နိုင်ငံများမှ တာဝန်ရှိသူများနှင့်အတူ ဖွင့်ပွဲအခမ်းအနားကို စက်ခလုတ်များ တစ်ပြိုင်တည်း နှိပ်၍ ဖွင့်လှစ်ပေးကြသည်။

ထိုသို့ဖွင့်လှစ်မှုနှင့် တစ်ချိန်တည်းတွင် တရုတ်နိုင်ငံ၏ ပိုး လမ်းမကြီးမှ မိုင်ပေါင်းတစ်သောင်း ချစ်ကြည်ရေးခရီးစဉ်ကို ယာဉ်ငယ် ၁၂ စီး ခရီးသွား ၄၆ ဦး ပါဝင် သောယာဉ်တန်းဖြင့် တရုတ်နိုင်ငံ ရှီအန်းမြို့မှ SCO အဖွဲ့ဝင်နိုင်ငံများဖြစ်သည့် ကာဇက်စတန်၊ ကာဂျစ္စတန်၊ တာဂျစ္စတန်၊ ဥဇဘက်ကစ္စတန်နိုင်ငံတို့သို့ စုဖွဲ့ ထွက်ခွာသွားကြသည်။

ဆက်လက်၍ ဖွင့်ပွဲအခမ်းအနားကို ကျင်းပရာ တက်ရောက်လာကြသည့်နိုင်ငံများမှ တာဝန်ရှိသူများနှင့်အတူ တရုတ်နိုင်ငံမှ မီဒီယာအဖွဲ့အစည်းကြီးများ ဖြစ်ကြသော People’s Daily, Xinhwa News Agency, CGTN, Xian ရုပ်သံဌာနတို့မှ တာဝန်ရှိသူ များက မိတ်ဆက်ပြောကြားကြ သည်။

မွန်းလွဲပိုင်းတွင် Audio and Video Content Trade Market, Convergence and Communication of Audio Visual Content and Audio - Video Industry Exchange and Cooperation ခေါင်းစဉ်အကြောင်းအရာများဖြင့် Parallel Session များကို နေရာများခွဲ၍ ကျင်းပရာ မြန်မာ့အသံနှင့်ရုပ်မြင်သံကြား ညွှန်ကြားရေးမှူးချုပ် ဦးရဲနိုင်က နိုင်ငံတကာရုပ်သံများနှင့် မြန်မာရုပ်သံ ဖြစ်ပေါ်ပြောင်းလဲတိုးတက်မှုများ၊ စိန်ခေါ်မှုများနှင့် အခွင့်အလမ်းများအား ရှင်းလင်းဆွေးနွေးပြောကြား သည်။

ညပိုင်းတွင် တက်ရောက်လာကြသည့် နိုင်ငံများမှ တာဝန်ရှိသူများသည် ပွဲတော်ကျင်းပရေး တာဝန်ရှိသူများနှင့်အတူ ရှီအန်းမြို့ရှိ OMNI CHANG’AN CONCERT HALL တွင် SCO Night Show ကို Orchestra သံစုံတီးဝိုင်းဖြင့် ဖျော်ဖြေတင်ဆက်မှုကို ကြည့်ရှုအားပေးကြသည်။

အဆိုပါ အဖွဲ့များသည် ဇူလိုင် ၁၇ ရက် နံနက်ပိုင်းတွင် ရှီအန်းအသံလွှင့်နှင့် ရုပ်သံဌာနကိုလည်းကောင်း၊ မွန်းလွဲပိုင်းတွင် ရှင်ချွိဟန်ရှေးဟောင်းယဉ်ကျေးမှုနယ်မြေနှင့် ဂူဗိမာန်ကိုလည်းကောင်း သွားရောက်လေ့လာခဲ့ကြကြောင်း သိရသည်။ 

MOI

စင်ကာပူအစိုးရသည် မောင်းသူမဲ့ယာဉ်ပေါ်တွင် ခရီးသည်များ ဘေးကင်းရေးအတွက် ကြီးကြပ်ပေးမည့် လူလိုက်ပါခြင်း မရှိသည့် မောင်းသူမဲ့ဘတ်စကားအား ပြေးဆွဲခွင့်ပြု လိုက်ပြီဖြစ်သည်။

အဆိုပါ မောင်းသူမဲ့ဘတ်စကားပြေးဆွဲမည့် အစီအစဉ်အား စင်ကာပူ ကုန်းလမ်းပို့ဆောင်ရေးအာဏာပိုင်အဖွဲ့က မောင်းသူမဲ့ဘတ်စကားတွင် တပ်ဆင်ထားသည့်  ဘေးအန္တရာယ်ကင်းရှင်းရေး စနစ်များကို အသေးစိတ် စစ်ဆေးခဲ့ပြီးနောက် ဇူလိုင်လ ၁၇ ရက်တွင် ခွင့်ပြုခဲ့ခြင်းဖြစ်သည်။

ကြီးကြပ်သူလိုက်ပါခြင်းမရှိသည့် မောင်းသူမဲ့ဘတ်စကား ပြေးဆွဲခွင့်ကို စင်ကာပူအစိုးရက ယခုကဲ့သို့ ခွင့်ပြုလိုက်ခြင်းသည် အရှေ့တောင်အာရှဒေသတွင် ပထမဆုံးအကြိမ် ဖြစ်လာခဲ့ကြောင်း ကွေ့ကျိုးအခြေပြု WeRide ကုမ္ပဏီကပြောသည်။ အဆိုပါမောင်းသူမဲ့ ဘတ်စကားသည် ဆန်တိုဆာ အပန်းဖြေစခန်းတွင် ပြေးဆွဲသွားမည်ဖြစ်သည်။

ခရီးသည် ရှစ်ဦးလိုက်ပါ စီးနင်းနိုင်သည့် အဆိုပါမောင်းသူမဲ့ ဘတ်စကားတွင် ကင်မရာများ၊ ညကြည့်ဆင်ဆာများနှင့် အခြားနည်းပညာ အဆင့်မြင့်မားသည့်  ကိရိယာများတပ်ဆင်ထားသည်။

WeRide ကုမ္ပဏီသည် အဆိုပါမောင်းသူမဲ့ဘတ်စကား ပြေးဆွဲမှုကို ၂၀၂၄ ခုနှစ်၊ ဇွန်လမှ စတင်ခဲ့ခြင်းဖြစ်သည်။ သို့သော် ထိုအချိန်က မောင်းသူမဲ့ဘတ်စကားတွင် ခရီးသည်များ ဘေးကင်းရေးအတွက် ကြီးကြပ်သူတစ်ဦးအား လိုက်ပါစေခဲ့သော်လည်း ၎င်းကြီးကြပ်သူအား နောက်ပိုင်းတွင် အစိုးရက ဖယ်ရှား ခွင့်ပြုခဲ့ခြင်းဖြစ်သည်။     

MWD Portal

ဟနွိုင်းမြို့ရှိ ဓာတ်ပုံဆိုင်တစ်ခုတွင် ကိုရီးယားအမျိုးသမီး ခရီးသွားတစ်ဦး က ဗီယက်နမ်အမျိုးသမီးကို ရိုက်နှက်ပြီး ၆ ရက်အကြာတွင် ၎င်း အမျိုးသမီး သည် သူမ၏ကုမ္ပဏီမှ ထုတ်ပယ်ခံခဲ့ရသည်။ 

ဖြစ်စဉ်တွင် ပါဝင်ခဲ့သည့် ကိုရီးယားနှစ်ဦးအနက် တစ်ဦးအလုပ်လုပ်ကိုင် နေသော Segyung Vina ကုမ္ပဏီက ၎င်း၏ အမျိုးသမီးဝန်ထမ်းကို အလုပ်မှထုတ်ပယ်ခဲ့ပြီး ဗီယက်နမ်လူမျိုးများနှင့် ဖြစ်စဉ်ကြောင့် ထိခိုက် ခံစားရသူများအား တောင်းပန်ကြောင်း ထုတ်ပြန်ခဲ့သည်။

Segyung Vina ကုမ္ပဏီ၏ CEO ဖြစ်သူ Mr. Jeon Sung-wook က ဇူလိုင် ၁၆ ရက်ထုတ်ပြန်ချက်တွင် "မိမိတို့အနေဖြင့် ကိုယ်ထိလက်ရောက် ရန်ပြုခံရသူအား စိတ်ရင်းမှန်ဖြင့် တောင်းပန်ရန်နှင့် အကျိုးဆက်များကို ဖြေရှင်းနိုင်ရေး ကောင်းစွာထောက်ပံ့ပေးရန် အကောင်းဆုံး ကြိုးစား ပါမည်" ဟု ပြောကြားခဲ့သည်။

မစ္စတာ Jeon ၏ပြောကြားချက်အရ အဆိုပါဖြစ်စဉ်တွင် ပါဝင်ခဲ့သော အမျိုးသမီးဝန်ထမ်းသည် ကိုရီးယားရှိ ဌာနချုပ်တွင် အလုပ်လုပ်ကိုင် နေပြီး ဗီယက်နမ်ရှိ လုပ်ငန်းခွဲသို့ တာဝန်ဖြင့် စေလွှတ်ထားသူဖြစ်ပြီး သူမ၏ ဗီယက်နမ်သို့ လုပ်ငန်းကိစ္စခရီးစဉ်အတွင်း ခိုက်ရန်ဖြစ်ပွားခဲ့ခြင်း ဖြစ်သည်။

Segyung Vina ၏ CEO က ကုမ္ပဏီအနေဖြင့် နိုင်ငံခြားသို့ လုပ်ငန်း ကိစ္စခရီးစဉ်များအတွက် သွားရောက်မည့်ဝန်ထမ်းများ၏ ကျင့်ဝတ်သိက္ခာ စည်းမျဉ်းများကို ရေးဆွဲသတ်မှတ်သွားမည်ဖြစ်ပြီး၊ ပြည်တွင်း/ ပြည်ပ ဝန်ထမ်း အားလုံးအတွက် ပုံမှန်လေ့ကျင့်သင်တန်းများ စီစဉ်ပေးကာ အလားတူဖြစ်ရပ်များ ထပ်မံမဖြစ်ပွားစေရန် ကာကွယ်သွားမည်ဟု ဆိုသည်။

ဗီယက်နမ်ရှိ တောင်ကိုရီးယားသံရုံးမှ အရာရှိတစ်ဦးက ဒေသခံရဲတပ်ဖွဲ့မှ ဖြစ်စဉ်ကို တက်ကြွစွာ စုံစမ်းစစ်ဆေးနေပြီး၊ သံရုံးအနေဖြင့်လည်း နီးကပ်စွာ ညှိနှိုင်းဆောင်ရွက်ပေးနေကြောင်း ပြောကြားခဲ့သည်။

တောင်ကိုရီးယားနိုင်ငံခြားရေးဝန်ကြီးဌာနကလည်း ဖြစ်စဉ်ကို သင့်တင့်မျှတစွာ ကိုင်တွယ်ဖြေရှင်းနိုင်ရန်နှင့် နှစ်နိုင်ငံဆက်ဆံရေးအပေါ် ဆိုးကျိုး မသက်ရောက်စေရန် ဗီယက်နမ်အစိုးရနှင့် ဆက်သွယ်ညှိနှိုင်းလျက် ရှိကြောင်း ကြေညာခဲ့သည်။

အဆိုပါ ခိုက်ရန်ဖြစ်ပွားမှုဖြစ်စဉ်မှာ ဇူလိုင် ၁၁ ရက်က ဖြစ်ပွားခဲ့ခြင်း ဖြစ်ပြီး အရက်မူးနေသော ကိုရီးယားအမျိုးသမီးခရီးသွားက ဗီယက်နမ် အမျိုးသမီးအား ဓာတ်ပုံမြန်မြန်ရိုက်ရန် တွန်းအားပေးခဲ့ပြီးနောက် ရုတ်တရက် ရန်စကာ လက်သီးဖြင့်ထိုး၊ ခေါင်းကို အိတ်ဖြင့် ရိုက်ခဲ့ခြင်းမှ အစပြု ခဲ့ခြင်း ဖြစ်သည်။

အဆိုပါဖြစ်စဉ် အွန်လိုင်းပေါ်တွင် ပျံ့နှံ့သွားချိန်၌ ကိုရီးယား နိုင်ငံသားများစွာ အလွန် အမျက်ဒေါသထွက်ခဲ့ကြပြီး Yonhap News TV က ယင်းဖြစ်စဉ်ကို "နိုင်ငံ့ဂုဏ်သိက္ခာကျဆင်းမှု" အဖြစ် သတ်မှတ်ခဲ့သည်။ Theqoo ကဲ့သို့သော အဓိကအွန်လိုင်းဖိုရမ်များတွင် ထောင်နှင့်ချီသော မှတ်ချက်များက ပြင်းထန်စွာအပြစ်ပေးရန် တောင်းဆိုခဲ့ကြပြီး၊ များစွာသော တောင်ကိုရီးယားနိုင်ငံသားတို့က သူမအား ဖမ်းဆီးကာ ဗီယက်နမ် သို့ ပြန်လည်ပို့ဆောင်ပြီး အပြစ်ပေးခံရစေရန် မျှော်လင့်ခဲ့ကြသည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဘဂ္ဂဒက် ဇူလိုင် ၁၇

အီရတ်နိုင်ငံ အရှေ့ပိုင်း အယ်လ် ကွတ်မြို့ရှိ အဆင့်မြင့် ဈေး၀ယ်ကုန်တိုက်တစ်ခု၌ ယနေ့တွင် မီးလောင်ကျွမ်းမှု ဖြစ်ပွားခဲ့ရာ အနည်းဆုံး လူပေါင်း ၆၀ ထိသေဆုံး ခဲ့ရကြောင်း အီရတ်တာဝန်ရှိသူ များက ပြောကြားခဲ့သည်။

အထပ်ငါးထပ်ပါ ဈေးဝယ် ကုန်တိုက်အဆောက်အအုံ မီး လောင်မှုသည် ဇူလိုင် ၁၆ ရက် ညပိုင်းတွင် ဖြစ်ပွားခဲ့ခြင်း ဖြစ်သည်။ 

ကုန်တိုက် အဆောက်အအုံ မီးလောင်မှုကြောင့် အနည်းဆုံး လူပေါင်း ၆ဝ သေဆုံး၍ ၁၁ ဦး ပျောက်ဆုံးနေကြောင်း အယ်လ်ကွတ်မြို့ တာဝန်ရှိသူများက  ပြော

ကြားထားသည်။

လက်ရှိအချိန်တွင် ဈေး၀ယ်ကုန်တိုက်အဆောက်အအုံ မီးလောင်ကျွမ်းမှုဖြစ်စဉ်ကို တာဝန်ရှိသူများက စုံစမ်းစစ်ဆေးနေဆဲ ဖြစ်သည်။

စုံစမ်းစစ်ဆေးမှုမှ ပေါ်ထွက်လာမည့် ပဏာမရလဒ်များကို ၄၈ နာရီအတွင်း ကြေညာပေးမည်ဖြစ်ကြောင်းအီရတ်တာဝန်ရှိသူများက ပြောကြားထားသည်။

လက်ရှိအချိန်တွင် ကုန်တိုက်အဆောက်အအုံပိုင်ရှင်ကို အီရတ်တာဝန်ရှိသူများက အမှုဖွင့်တရားစွဲဆိုမှုများ ပြုလုပ်ထားကြောင်း သိရသည်။

Ref: RT

Trs: KKO

YDNB Newspaper
 

သမိုင်းဝင် စံချိန်တင် လေထီးအလွတ်ခုန်ခြင်းတွင် ကျော်ကြားခဲ့သူ ဩစတြီးယားအားကစားသမား ဖီလစ်ဘောမ်ဂတ်နာ (Felix Baumgartner) သည် အီတလီနိုင်ငံတွင် ပါရာဂလိုက်ဒါ မတော်တဆမှုကြောင့် သေဆုံး သွားခဲ့သည်။

ဒေသခံမီဒီယာများ၏ ဖော်ပြချက်အရ အသက် ၅၆ နှစ်အရွယ် ဘောမ်ဂတ်နာသည် ဇူလိုင် ၁၇ ရက်နေ့က အီတလီကမ်းခြေမြို့ Porto Sant'Elpidio တွင် ဟိုတယ်တစ်ခု၏ ရေကူးကန်အတွင်းသို့ ပါရာ ဂလိုက်ဒါထိန်းချုပ်မှုလွဲမှားပြီး ကျရောက်ကာ သေဆုံးခဲ့သည်ဟု သိရသည်။

အီတလီနိုင်ငံ၊ Marche ခရိုင်၊ Fermo စီရင်စုရှိ ကမ်းခြေမြို့ဖြစ်သော Porto Sant'Elpidio ၏ မြို့တော်ဝန် Massimiliano Ciarpella က ဘောမ်ဂတ်နာသည် လေထဲတွင် ရုတ်တရက်ကျန်းမာရေးပြဿနာ (ဥပမာ -နှလုံးရပ်ခြင်း) ကြုံတွေ့ခဲ့ဟန်ရှိကြောင်း ပြောကြားခဲ့သည်။ အခြားသတင်း များအရ ၎င်းသည် ရေကူးကန်အတွင်းသို့မကျမီကတည်းက နှလုံးရပ်ကာ သေဆုံးခဲ့ဟန် ရှိသည်ဟုဆိုသည်။

မြို့တော်ဝန် Ciarpella က "ရဲရင့်မှုနှင့် စွန့်စားပျံသန်းမှုတို့အပေါ် စွဲမက်မှုတို့၏ သင်္ကေတ" ဖြစ်သူ၏ ကွယ်လွန်မှုအတွက် မြို့သူမြို့သား အားလုံးထံ ဝမ်းနည်းကြောင်း သဝဏ်လွှာပေးပို့ခဲ့သည်။

အီတလီသတင်းစာ Corriere dello Sport က "စွန့်စားရှာဖွေမှုများ၏ ဘုရင်သည် နောက်ဆုံးတွင် ကံကြမ္မာ၏စေစားရာကို မလွန်ဆန်နိုင်တော့ပါ" ဟူသော ခေါင်းစဉ်ဖြင့် ရေးသားခဲ့သည်။

ဖီလစ်ဘောမ်ဂတ်နာသည် အသက်အန္တရာယ်ရှိသော နာမည်ကျော် အလွတ်ခုန်မှုများစွာကို ပြုလုပ်ခဲ့သူဖြစ်ပြီး ၎င်းတွင် မလေးရှားနိုင်ငံရှိ ပီထရိုနာ့စ် မျှော်စင် (Petronas Towers) ၊ ဘရာဇီးနိုင်ငံရှိ ခရစ်တော် ကယ်တင်ရှင်ရုပ်တု (Christ the Redeemer statue) များမှ ခုန်ချခဲ့သည့် စွန့်စားမှုများလည်း ပါဝင်သည်။

၎င်း၏ ကမ္ဘာကျော်အလွတ်ခုန်မှုမှာ ၂၀၁၂ ခုနှစ်က မြေပြင်အထက် ပေ ၁၄၀,၀၀၀ အမြင့်မှ ခုန်ချခဲ့ခြင်းဖြစ်သည်။ ထိုအချိန်က ၎င်းသည် အမြင့်ဆုံး အမြန်နှုန်း Mach 1.25 (တစ်နာရီ မိုင် ၈၅၀ ကျော်) ဖြင့် ၄ မိနစ်နှင့် ၁၉ စက္ကန့်ကြာ ပြုတ်ကျခဲ့ပြီး မော်တာမပါဘဲ အသံထက် မြန်သည့် အရှိန်ကို စံချိန်တင်ရရှိခဲ့သည်။

အဆိုပါ ခုန်ချမှုများသည် လူသား၏ စွန့်စားလိုစိတ်နှင့် နည်းပညာ စွမ်းရည်တို့၏ အစွန်းရောက်ဆုံးစမ်းသပ်မှုများဖြစ်ပြီး အာကာသယာဉ်မှူး များအတွက် အရေးပေါ်ထွက်ခွာနည်းများ သုတေသနပြုရာတွင် အထောက် အကူပြုနိုင်သည်ဟု ဆိုသည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

မြောက်ကိုရီးယားမှ ထွက်ပြေးတိမ်းရှောင်လာပြီး ဂီတအိပ်မက်ကို အကောင်အထည်ဖော်ရန် တောင်ကိုရီးယားသို့ ရောက်ရှိခဲ့ပြီးနောက် နှစ်များစွာအကြာတွင် K-pop ယောက်ျားလေးအဖွဲ့သစ်တစ်ခုဖြစ်သော 1VERSE တွင် မြောက်ကိုရီးယားမှ ထွက်ပြေးတိမ်းရှောင်ခဲ့သူ နှစ်ဦး ပါဝင်လာခဲ့သည်။

ဇူလိုင် ၁၈ ရက်တွင် ကမ္ဘာတစ်ဝှမ်း စတင်မိတ်ဆက်ခဲ့သော 1VERSE အဖွဲ့ တွင် မြောက်ကိုရီးယား၊ ဂျပန်နှင့် အမေရိကန်မှ အသက် ၂၀ ကျော် အမျိုးသား ၅ ဦး ပါဝင်ပြီး မြောက်ကိုရီးယားမှ အဖွဲ့ဝင်နှစ်ဦးမှာ Hyuk (ဟျုက်) နှင့် Seok (ဆောက်) တို့ဖြစ်သည်။

Yu Hyuk (၂၅ နှစ်) သည် မြောက်ကိုရီးယား အရှေ့မြောက်ပိုင်း Kyongsong ဒေသမှ ဖြစ်ပြီး ငယ်စဉ်ကတည်းက တရုတ်နိုင်ငံသို့ ထွက်ပြေးခဲ့ကာ ထိုစဉ်က တောင်ကိုရီးယားတွင် ရှိနေသည့် မိခင်မှ စီစဉ်ပေးထားသော ပို့ဆောင်ပေးသူ၏ အကူအညီဖြင့် တောင်ကိုရီးယားသို့ ၂၀၁၃ ခုနှစ်တွင် ရောက်ရှိခဲ့သည်။ Hyuk က ၎င်း၏ ပထမဆုံး သီချင်း "Shattered" သည် မြောက်ကိုရီးယားတွင် ဖခင်ဆုံးပါးသည့်သတင်းကို ကြားသိချိန်က ခံစားချက်များကို ထင်ဟပ်စေသည်ဟု ပြောကြားခဲ့သည်။

Kim Seok (၂၅ နှစ်) သည်လည်း တရုတ်နှင့်နယ်စပ်ချင်းထိစပ်နေသော မြောက်ကိုရီးယားမြို့တစ်မြို့တွင် ကြီးပြင်းခဲ့သူဖြစ်ပြီး K-pop ကို မိတ်ဆွေ တစ်ဦးထံမှတစ်ဆင့် စတင်သိရှိခဲ့သည်။ အသက် ၁၈ နှစ်အရွယ်တွင် ဖခင် နှင့် အဖွားတို့နှင့်အတူ မြောက်ကိုရီးယားမှ ထွက်ပြေးခဲ့သည်။

1VERSE အဖွဲ့ကို စီမံအုပ်ချုပ်သည့် Singing Beetle ကုမ္ပဏီ၏ ထုတ်လုပ် သူနှင့် CEO Michelle Cho က "ပြည့်စုံပြီး အလှပဆုံးဟု မြင်ရသည့် K-pop လောကထဲမှာ ပိုမိုစစ်မှန်သည့် အဖွဲ့တစ်ခုကို ဖန်တီးချင်ခဲ့ပါသည်" ဟု ပြောကြားခဲ့သည်။ "ချို့တဲ့သည့်ဘဝမှ အိပ်မက်တစ်ခုကို လိုက်စားသူ ၏ ဇာတ်လမ်းကို မည်သူက မနှစ်သက်ဘဲနေနိုင်မည်နည်း၊ အထူးသဖြင့် K-pop မှာပေါ့" ဟု Cho က ဆိုသည်။

မြောက်ကိုရီးယားမှ ထွက်ပြေးတိမ်းရှောင်လာသူ အဖွဲ့ဝင်ပါရှိသည့်အတွက် အဖွဲ့သည် အများ၏ စိတ်ဝင်စားမှုရရှိထားသော်လည်း Hyuk က ၎င်းတို့၏ စွမ်းရည်အပေါ်တွင်သာ အကဲဖြတ်ခံကြရန် မျှော်လင့်နေသည်။

"လူများစွာအတွက် အားအင်နှင့် အားတက်ဖွယ်သတင်းစကားကို ယူဆောင်လာပေးနိုင်သည့် idol တစ်ယောက်ဖြစ်ချင်ပါသည်။ ၎င်းတို့သာလျှင် မဟုတ်ပါ၊ မိမိတို့ကဲ့သို့ သူများလည်း ရှိကြောင်း ပြချင်ပါသည်" ဟု ၎င်းက ပြောကြားခဲ့သည်။

1VERSE မတိုင်မီက Be Boys အမည်ရှိ အခြားတောင်ကိုရီးယား တေးဂီတအဖွဲ့တစ်ခုတွင်လည်း မြောက်ကိုရီးယားမှ ထွက်ပြေးတိမ်းရှောင်လာသူ အဖွဲ့ဝင်တစ်ဦး ပါဝင်ခဲ့ဖူးသည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဩစတြေးလျနိုင်ငံ၌     စိမ့်မြေများ ပြန်လည်ဖြစ်ထွန်းမှုသည် ကာဗွန်ဓာတ်ငွေ့ ထုတ်လွှတ်မှုကို သိသိသာသာလျော့ကျ စေပြီး ရေကြီးမှုနှင့်  မိုးခေါင်ရေရှားမှု ဒဏ်များကို ပိုမိုခံနိုင်ရည်ရှိလာစေသည်ကို တွေ့ရကြောင်း သုတေသနပညာရှင်များက ဇူလိုင်လ ၁၇ ရက်တွင်ထုတ်ပြန်သည်။

ဩစတြေးလျနိုင်ငံရှိ တော်ဝင်မဲဘုန်း နည်းပညာတက္ကသိုလ်မှ သုတေသနပညာရှင်များက ဗစ်တိုးရီးယားပြည်နယ် လော့ဒန်မြစ်ကြောင်း တစ်လျှောက်ရှိ စိမ့်မြေ များကို လေ့လာမှုများ လုပ်ဆောင်ခြင်းဖြစ်သည်။ အဆိုပါ လေ့လာမှုအရ စိမ့်မြေများ ပြန်လည်ဖြစ်ထွန်းခြင်းက ရာသီဥတုနှင့် ရေစီမံခန့်ခွဲမှုများအပေါ် လျင်မြန်စွာ သက်ရောက်မှုရှိစေကြောင်း တွေ့ရှိရခြင်းဖြစ်သည်။

“စိမ့်မြေများကိုပြန်လည်ဖော်ထုတ်ပြီး ထိန်းသိမ်းခြင်းက ရာသီဥတုပြောင်းလဲမှု ကိုတိုက်ဖျက်ရေးအတွက်  လျှို့ဝှက်လက်နက် တစ်ခုဖြစ်လာနိုင်ပါတယ်” ဟု သုတေသနအဖွဲ့ခေါင်းဆောင် လူးကပ်ရှူစတာကပြောသည်။

ပြန်လည်ဖြစ်ထွန်းလာသော စိမ့်မြေ များသည် တစ်နှစ်အတွင်း ကာဗွန်ထုတ်လွှတ်မှုကို ၃၉ ရာခိုင်နှုန်းလျှော့ချနိုင်ကာ မြေဆီလွှာရှိ ကာဗွန်ပမာဏကို ၁၂ ရာခိုင် နှုန်းမြင့်တက်လာစေကြောင်း၊ ပြန်လည် ဖြစ်ထွန်းခြင်း မရှိသည့်   စိမ့်မြေများမှာ ကာဗွန်ထုတ်လွှတ်မှု  ၁၆၉   ရာခိုင်နှုန်းမြင့်တက်ပြီး မြေဆီလွှာရှိ ကာဗွန်ပမာဏကိုလည်း ၁၀ ရာခိုင်နှုန်း လျော့ကျသွားစေကြောင်း သုတေသနစာတမ်းတွင် ဖော်ပြထားသည်။

MWD Web Portal
 

အမေရိကန်သမ္မတ ဒေါ်နယ်ထရမ့်သည် သေဆုံးသွားပြီဖြစ်သော ဂျက်ဖရီ အပ်စတိန်း၏ ငွေကြေးအရှုပ်တော်ပုံနှင့် လိင်ကုန်ကူးမှုဖြစ်စဉ်အား ကိုင်တွယ်ပုံနှင့်ပတ်သက်၍ ဝေဖန်မှုများ အရှိန်မြင့်လာပြီးနောက် နောက်ထပ်အချက်အလက်များ ထုတ်ပြန်ရန် ကတိပြုခဲ့သည်။

မှုခင်းဖိုင်အပြည့်အစုံကို ထုတ်ပြန်ရန် လပေါင်းများစွာ ကတိပေးပြီးနောက် အမေရိကန်တရားရုံးချုပ်က လွန်ခဲ့သည့်သီတင်းပတ်က ထုတ်ပြန်ချက်တွင် နောက်ထပ်စာရွက်စာတမ်းများ ထုတ်ပြန်မည် မဟုတ်ကြောင်း ဖော်ပြခဲ့သည်။ ယင်းက ထရမ့်၏ အနီးကပ်ဆုံး ထောက်ခံသူအချို့ကို မကျေနပ်မှုများ ဖြစ်ပေါ်စေခဲ့သည်။

ထရမ့်က ၎င်း၏ Truth Social စာမျက်နှာတွင် "ဂျက်ဖရီ အပ်စတိန်း ကိစ္စနှင့်ပတ်သက်ပြီး အလွန်အမင်းပျံ့နှံ့နေသော သတင်းများကြောင့် တရားရုံး၏ခွင့်ပြုချက်ဖြင့် Grand Jury သက်သေခံချက်များအားလုံးကို ထုတ်ပြန်ရန် ရှေ့နေချုပ် Pam Bondi အား တောင်းဆိုခဲ့ပါသည်" ဟု ကြာသပတေးနေ့ (ဇူလိုင် ၁၇) က ရေးသားခဲ့သည်။ “ဒီမိုကရက်တို့ ဖန်တီးထားသည့် လှည့်ဖြားမှုကြီး ယခုပင် အဆုံးသတ်သင့်ပါပြီ" ဟု ၎င်းက ဖြည့်စွက်ခဲ့သည်။

Bondi က သူမ၏ရုံးသည် Grand Jury မှတ်တမ်းများကိုချပြနိုင်ရေး ဇူလိုင် ၁၈ တွင် တရားရုံးသို့ တင်ပြရန် အဆင်သင့်ဖြစ်နေပြီ" ဟု အတည် ပြုခဲ့သော်လည်း မည်သည့်စာရွက်စာတမ်းများကို မည်သည့်အချိန်တွင် ထုတ်ပြန်မည်ဆိုသည်ကို ရှင်းလင်းစွာဖော်ပြခဲ့ခြင်းမရှိပေ။

အပ်စတိန်းကို အရွယ်မရောက်သေးသူများအား လိင်ကုန်ကူးမှုဖြင့် ၂၀၁၉ ခုနှစ်တွင် စွဲချက်တင်ခဲ့ပြီး ဖမ်းဆီးအမှုရင်ဆိုင်စေခဲ့သည်။ ၎င်းသည် စစ်ဆေးမှုမတိုင်မီ နယူးယောက်အကျဉ်းထောင်အတွင်း၌ မိမိကိုယ်ကို အဆုံးစီရင်၍ သေဆုံးခဲ့သည်ဟု ဆိုသည်။ သို့သော် အချို့က အပ်စတိန်း၏ သေဆုံးမှုကို သံသယရှိနေဆဲဖြစ်ပြီး တရားရုံးက အထောက်အထား အပြည့်အစုံ ထုတ်ပြန်ခြင်းမပြုမှုကို အတိအလင်းဝေဖန်လျက်ရှိသည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အက်ကရာ ဇူလိုင် ၁၆ 
ဂါနာနိုင်ငံ၏ ကိုကိုးလုပ်ငန်း အပါအဝင် စိုက်ပျိုးရေးလုပ်ငန်းများ မိုးသည်းထန်စွာရွာသွန်းမှုကြောင့် အထွက်နှုန်းကျဆင်းခဲ့ရကြောင်း ဂါနာနိုင်ငံ၏ ကိုကိုး လုပ်ငန်းမှ တာဝန်ရှိသူများက ဇူလိုင် ၁၅ ရက်တွင် ပြောကြားခဲ့ကြောင်း ယနေ့ သတင်းများအရ သိရသည်။ 
နိုင်ငံအတွင်းတွင် မိုးကြာရှည် ရွာသွန်းမှုကြောင့် စိုက်ပျိုးသည့် အပင်များ နေရောင်ခြည်မလုံ လောက်မှုများဖြစ်ကာ အထွက်နှုန်းလျော့ကျစေပြီး မှိုရောဂါများ ဖြစ်ပွားနိုင်ခြေတိုးမြင့်လာသည်ဟု ဂါနာလယ်သမားအသင်းက သတိပေးခဲ့ကြောင်း၊ မိုးသည်းထန်စွာ ရွာသွန်းမှုအပါအဝင် ရာသီဥတု ဖောက်ပြန်မှုဖြစ်စဉ်များကို လျော့ ပါးစေရေးဆောင်ရွက်ပေးရန် စိုက်ပျိုးရေးလုပ်ငန်း လုပ်ကိုင်သူများက နိုင်ငံအစိုးရကို တောင်းဆိုခဲ့ကြ ကြောင်း သိရသည်။

"နိုင်ငံတွင်း ကိုကိုးစိုက်ပျိုးတဲ့ ခရိုင် ၇၂ ခရိုင်ကို သွားရောက် လေ့လာခဲ့ပါတယ်။ ခရိုင်တော် တော်များများမှာ မိုးကြာရှည်ရွာ သွန်းမှုကြောင့် စိုက်ပျိုးတဲ့အပင် တွေ နေရောင်ခြည်မလုံလောက်မှု များဖြစ်ကာ အထွက်နှုန်းလျော့ကျ စေပြီး ကိုကိုးပင်တွေမှာ မှိုရောဂါ တွေဖြစ်ပွားနေတာကို တွေ့ခဲ့ရပါ တယ်။ အခြားစိုက်ခင်းတွေမှာလည်း အခုလိုအဖြစ်တွေကြောင့် အထွက် နှုန်းကျဆင်းနေပါတယ်။ ဒါဟာ စိုးရိမ်ဖွယ်ရာပါ”ဟု ဂါနာလယ် သမားအသင်းဥက္ကဋ္ဌ နာနာအိုဘာ ဒီဘွန်စုက ပြောကြားခဲ့သည်။

ယခုနှစ် ပထမနှစ်ဝက် ကိုကိုး ရာသီတွင် ဂါနာနိုင်ငံသည် ကိုကိုး မက်ထရစ်တန်ချိန် ၆၅၀၀၀၀ သာ ထွက်ရှိနိုင်ဖွယ်ရှိကြောင်း ဂါနာ နိုင်ငံ၏ ကိုကိုးလုပ်ငန်းက ထုတ်ပြန်ခဲ့ကြောင်း သိရသည်။

Ref: Russia Today

Tre: KZ

Photo - Energy News