ဝါရှင်တန် ဇွန် ၂၃

အမေရိကန်နိုင်ငံ အခြေစိုက် ဘလူးအော်ရီဂျင် ကုမ္ပဏီသည် ပုဂ္ဂလိက အာကာသယာဉ်မှူး ခြောက်ဦး လိုက်ပါမည့် New Shepard ဒုံးပျံယာဉ်လွှတ်တင်ရေး အစီအစဉ်ကို လေပြင်းတိုက်ခတ်နေမှုကြောင့် ဆိုင်းငံ့ထားရကြောင်း ဇွန် ၂၂ ရက် သတင်းများအရ သိရသည်။

ဘလူးအော်ရီဂျင် ကုမ္ပဏီသည် မူလက အဆိုပါ New Shepard ဒုံးပျံယာဉ်ကို ဇွန် ၂၂ ရက်တွင် အနောက်တက္ကဆက်ဒေသမှတစ်ဆင့် လွှတ်တင်ရန် စီစဉ်ထားသည်။

သို့ရာတွင် အနောက်တက္ကဆက်ဒေသ ဘလူးအော်ရီဂျင်ကုမ္ပဏီ လွှတ်တင်ရေးစခန်း နယ်မြေ၌ လေပြင်းတိုက်ခတ်နေမှုကြောင့် လွှတ်တင်ရေးအစီအစဉ်ကို ဆိုင်းငံ့ထားရသည်ဟု ဘလူးအော်ရီဂျင် ကုမ္ပဏီက သတင်းထုတ်ပြန်ထားကြောင်း သိရသည်။

ဘလူးအော်ရီဂျင်ကုမ္ပဏီ အနေဖြင့် အဆိုပါ New Shepard ဒုံးပျံယာဉ်ကို လွှတ်တင်ရန် ဇွန်၂၃ ရက်တွင်ထပ်မံကြိုးစားဖွယ်ရှိသည်။ NS-33 ဟူ၍အမည်ပေးထားသော အဆိုပါမစ်ရှင်သည် New Shepard ဒုံးပျံများ၏ ၃၃ ကြိမ် မြောက် မစ်ရှင်ဖြစ်သည်။

NS-33 မစ်ရှင်သည် ဘလူးအော်ရီဂျင်ကုမ္ပဏီ၏ ၂၀၂၅ အတွက် စတုတ္ထမြောက် မစ်ရှင်ဖြစ်ကြောင်း သိရသည်။

Ref: Sputnik New

Trs: KKO

YDNB Newspaper

စွမ်းအင်စနစ်တစ်ခုကနေ အများဆုံးပြန်ထုတ်ပေးနိုင်တာက စွမ်းအင်တစ်ခု သို့မဟုတ် စွမ်းအင်တစ်ခုနဲ့ ထွက်ကုန်တစ်ခုဖြစ်ပါတယ်။ ဒါကို သမားရိုးကျစနစ်မှာ အများဆုံးတွေ့ရှိရတာပါ။ ဒါပေမဲ့ စွမ်းအင်စနစ်တစ်ခုတည်းကနေပြီး ရေသန့်ကိုလည်းထုတ်မယ်၊ ဟိုက်ဒရိုဂျင်ကိုလည်းထုတ်မယ်၊ ကာဗွန်ဓာတ်ငွေ့ ထုတ်လွှတ်မှုကင်းစင်မယ့် လျှပ်စစ်ဓာတ်အားကိုလည်း ထုတ်မယ်ဆိုတာကတော့ မဖြစ်နိုင်လောက်ဘူးလို့ ယူဆစရာရှိပါတယ်။ တကယ်တော့မဖြစ်နိုင်တာ မရှိဘူးဆိုတာကို သက်သေပြလိုက်တာကတော့   အမေရိကန်ပြည်ထောင်စုအခြေစိုက် NuScale Power Corporation ဆိုတဲ့ ကုမ္ပဏီပါပဲ။

သူတို့က ပေါင်းစပ်စွမ်းအင်စနစ်တစ်ခုကိုဖန်တီးနိုင်ရေးအတွက် သုတေသနအစီအစဉ်များကို စတင်လုပ်ဆောင်လိုက်ပါပြီ။ သူတို့ရဲ့အစီအစဉ်ကနေထွက် ပေါ်လာမယ့် ပေါင်းစပ်စွမ်းအင်စနစ်က သန့်ရှင်းတဲ့ သောက်သုံးရေ၊ ဟိုက်ဒရိုဂျင်ဓာတ်ငွေ့နဲ့ ကာဗွန်ဓာတ်ငွေ့ထုတ်လွှတ်မှု ကင်းစင်တဲ့ လျှပ်စစ်ဓာတ်အားတို့ ကိုတစ်ပြိုင်နက်တည်း ထုတ်လုပ်ပေးမှာ ဖြစ်ပါတယ်။ အဲဒီကုမ္ပဏီက အစောပိုင်းမှာအသေးစား မော်ဂျူးပုံစံဓာတ်ပေါင်းဖို နည်းပညာကို အသုံးပြုပြီး စက်မှုလုပ်ငန်းနဲ့ ပတ်ဝန်းကျင်ဆိုင်ရာ စိန်ခေါ်မှုတွေကို ကိုင်တွယ်နေတာပါ။ အခုလိုမျိုးထုတ်ပြန်လိုက်ချိန်မှာတော့  သူတို့အနေနဲ့ အဲဒီနည်းပညာကို တိုးချဲ့အသုံးပြုသွားဖို့ လုပ်ဆောင်မယ်ဆိုပြီး ပြောလိုက်တာနဲ့ အတူတူပါပဲ။

အခုဖန်တီးမယ့်စနစ်မှာ NuScale Power Module (NPM) တစ်ခုကို R.O ရေသန့်စင်စနစ်နဲ့ပေါင်းစပ်မှာ ဖြစ်ပါတယ်။ ကုမ္ပဏီရဲ့ထုတ်ပြန်ချက်အရဆိုရင် NPM တစ်ခုတည်းက ရေသန့်ဂါလန်ပေါင်းသန်း ၁၅၀ ခန့်ကို ထုတ်လုပ်ပေးနိုင်တယ်လို့ ဆိုပါတယ်။ အဲဒီလိုထုတ် လုပ်ပေးရာမှာလည်း ကာဗွန်ဓာတ်ငွေ့ကိုထုတ်လွှတ်မှုလုံးဝမရှိပါဘူး။ ဒါကြောင့် NPM ၁၂ လုံးရှိရင် လူဦး ရေ ၂ ဒသမ ၃ သန်းလောက်နေထိုင်တဲ့ မြို့တစ်မြို့ကို ရေသန့်လုံလောက်စွာ ဖြန့်ဖြူးပေးနိုင်မှာဖြစ်ပြီး တစ်ချိန်တည်းမှာပဲ  အိမ်ခြေ ၄ သိန်းကို လျှပ်စစ်ဓာတ်အား ထောက်ပံ့ပေးနိုင်မှာဖြစ်တယ်လို့ ကုမ္ပဏီရဲ့ ထုတ်ပြန်ချက်ထဲမှာ ဖော်ပြထားပါတယ်။

ရေကိုသန့်စင်တဲ့နေရာမှာ ဘေးထွက်ပစ္စည်းအဖြစ် ထွက်လာတာက ဆားရည်ဖြစ်ပါတယ်။ ဆားရည်ဆိုတာ သဘာဝ ပတ်ဝန်းကျင်အတွက် ဆိုးကျိုးဖြစ်စေတဲ့ ပစ္စည်းတစ်ခုပါ။ ဒါကြောင့် NuScale မှသုတေသန ပညာရှင်များက ဆားရည်ကိုအသုံးချပြီး အကျိုးရှိစေမယ့်ပစ္စည်းတစ်မျိုးကို ထုတ်လုပ်ဖို့ စိတ်ကူးလာ ပါတယ်။ သူတို့ရဲ့စိတ်ကူးအရဆိုရင် ထွက်လာမယ့်အရာက သန့်ရှင်းစွမ်းအင်ကမ္ဘာကြီးအတွက်လိုအပ်တဲ့ဟိုက်ဒရိုဂျင်စွမ်းအင်ပါပဲ။ ဟိုက်ဒရိုဂျင် ထုတ်လုပ်ရာမှာ သမားရိုးကျ လျှပ်စစ်သုံးဓာတ်ခွဲနည်းကို အသုံးမပြုတဲ့အတွက် စွမ်းအင်သုံးစွဲမှုနဲ့ ရေအသုံးပြုမှုတို့ကိုလည်း လျော့နည်းစေမှာဖြစ်ပါတယ်။    

MWD Web Portal
 

အိန္ဒိယနိုင်ငံ၌ လာမည့်သီတင်းပတ်ပေါင်းများစွာအထိ လုံလောက်မှုရှိသည့် ရေနံစိမ်းများရှိကြောင်းနှင့် နိုင်ငံအနေဖြင့် လိုအပ်သောရေနံစိမ်းများကို အရင်းအမြစ် ပြောင်းလဲတင်သွင်းထားကြောင်း အိန္ဒိယရေနံနှင့်သဘာဝဓာတ်ငွေ့ဝန်ကြီး ဟားဒိဆင်းပူရီက ဇွန်လ ၂၂ ရက်တွင်ပြောထားသည်။

အမေရိကန်က အီရန်အပေါ်တိုက်ခိုက်မှုများလုပ်ဆောင်ပြီးနောက် အီရန်နိုင်ငံက ၎င်းတို့ထိန်းချုပ်ထားသော ဟော်မုရေလက်ကြားကို ပိတ်လာနိုင်သည့်အခြေ

အနေနှင့်ပတ်သက်၍ ဆင်းပူရီကယခုကဲ့ သို့ပြောလာခြင်းဖြစ်သည်။

ကမ္ဘာပေါ်တွင်ရေနံတင်သွင်းမှုတတိယအများဆုံးနိုင်ငံဖြစ်သည့် အိန္ဒိယနိုင်ငံသည် လွန်ခဲ့သောနှစ်အနည်းငယ်မှစ၍ ရေနံစိမ်းပမာဏအများအပြားကို ဟော်မု ရေလက်ကြားမှ ဖြတ်သန်းရခြင်းမရှိသည့် အရင်းအမြစ်များမှရယူခြင်းဖြစ်ကြောင်း၊ နိုင်ငံကတင်သွင်းနေသည့် ရေနံစိမ်းစည် ၅ သန်းခွဲတွင်၂ သန်းခန့်ကသာ ထိုရေလက် ကြားမှ ဖြတ်သန်းခြင်းဖြစ်ကြောင်း ဆင်းပူရီကပြောထားသည်။

Ref: RT

MWD Daily Newspaper

Photo - Sia Sat

အမေရိကန် ဖက်ရှင် အမှတ်တံဆိပ်တစ်ခုဖြစ်သော Calvin Klein သည် ယူကရိန်းပဋိပက္ခ အရှိန်မြင့်တက်လာပြီး အနောက်နိုင်ငံများ၏ ပိတ်ဆို့ အရေးယူမှုများကြောင့် လုပ်ငန်းများကို ရပ်ဆိုင်းခဲ့သည့် သုံးနှစ်ကျော်အကြာတွင် ရုရှားနိုင်ငံ၌ ၎င်း၏ ကုန်အမှတ်တံဆိပ်များကို ပြန်လည် မှတ်ပုံတင်ရန် ကြိုးပမ်းလာသည့် နိုင်ငံခြားကုမ္ပဏီများစာရင်းတွင် ပါဝင်လာခဲ့သည်။

ရုရှား မူပိုင်ခွင့်ရုံး (Rospatent) တွင် မှတ်တမ်းတင်ထားသည့် စာရွက် စာတမ်းအရ၊ ကုမ္ပဏီသည် ဇွန် ၁၆ ရက်နေ့တွင် ပစ္စည်းအမျိုးမျိုး (အလှကုန်၊ အဝတ်အစား၊ ဆက်စပ်ပစ္စည်း၊ ပရိဘောဂ၊ ချည်ထည်နှင့် ကြော်ငြာဝန်ဆောင်မှုများအထိ) အတွက် ခွင့်ပြုချက်တောင်းခံခဲ့သည်။

အတည်ပြုခံရပါက Calvin Klein သည် ရေမွှေး၊ ဆပ်ပြာ၊ ချွေးနံ့ ပျောက်ဆေး၊ ခေါင်းလျှော်ရည်၊ နေကာမျက်မှန်၊ ကျောပိုးအိတ်၊ တီရှပ်၊ နာရီများမှသည် ပရိဘောဂနှင့် ကော်ဇောများအထိ ၎င်း၏အမည်ဖြင့် ရောင်းချနိုင်မည်ဖြစ်သည်။ စာအုပ်စင်နှင့် အဝတ်ဘီရိုများလည်း ပါဝင် သည့်အတွက် ဖက်ရှင်လိုင်းမဟုတ်သော ထုတ်ကုန်များကိုပါ ချဲ့ထွင်ရန် ရည်ရွယ်ဟန်ရှိသည်။

အဆိုပါမူပိုင်ခွင့်ကို Calvin Klein နှင့် Tommy Hilfiger တို့၏ ပိုင်ရှင် အမေရိကန်ကုမ္ပဏီ PVH မှ တောင်းဆိုခြင်းဖြစ်သည်။ ၂၀၂၂ ခုနှစ်က PVH သည် ပိတ်ဆို့မှုများ၊ ကုန်ပစ္စည်းဖြတ်တောက်မှုများနှင့် လူထုဖိအား များကြောင့် ရုရှားမှ ထွက်ခွာခဲ့သော အနောက်နိုင်ငံ ကုမ္ပဏီများအနက်မှ တစ်ခုဖြစ်ကာ နိုင်ငံတစ်ဝှမ်းရှိ ဆိုင်ခွဲ ၁၅၀ ကျော်ကို ပိတ်သိမ်းခဲ့သည်။

Calvin Klein သည် ရုရှားတွင် လုပ်ငန်းပြန်လည်စတင်ရန် အစီအစဉ်နှင့် ပတ်သက်၍ တရားဝင်ထုတ်ပြန်ခြင်း မပြုသေးသော်လည်း၊ လိုင်စင် သဘောတူညီချက်များ သို့မဟုတ် တတိယပါတီမှတစ်ဆင့် ဈေးကွက်ကို ပြန်ဝင်ရောက်လာသည့် နိုင်ငံခြားအမှတ်တံဆိပ်များ၏ လှုပ်ရှားမှုများ နှင့်အတူ အဆိုပါကြိုးပမ်းမှုကို ဆောင်ရွက်ခြင်းဖြစ်သည်။

Rospatent သည် Calvin Klein ၏ လျှောက်လွှာကို ယခုအချိန်ထိ ဆုံးဖြတ်ချက် မချမှတ်ရသေးပေ။ Calvin Klein သည် McDonald's၊ Hyundai၊ Intel၊ Microsoft၊ LG၊ IKEA၊ Chanel၊ Rolex နှင့် Louis Vuitton အပါအဝင် လက်ရှိတွင် ရုရှား၌ လုပ်ငန်းလည်ပတ်နေသည် ဖြစ်စေ မလည်ပတ်သည်ဖြစ်စေ ကုန်အမှတ်တံဆိပ်မူပိုင်ခွင့်များကို ထိန်းသိမ်းရန် သို့မဟုတ် ပြန်လည်ရယူရန် ကြိုးပမ်းနေသည့် ကမ္ဘာ့ ထိပ်တန်း အမှတ်တံဆိပ်များစာရင်းတွင် ပါဝင်လာခဲ့သည်။

မတ်လတွင် သမ္မတ Putin သည် ပြည်တွင်းထုတ်လုပ်သူများကို ကာကွယ်ရန်ရည်ရွယ်၍ ရုရှားသို့ ပြန်လည်ဝင်ရောက်လိုသော အနောက် နိုင်ငံကုမ္ပဏီများအတွက် ပိုမိုရှင်းလင်းသည့် စည်းမျဉ်းများ ရေးဆွဲရန် အစိုးရအား အမိန့်ပေးခဲ့သည်။

ကိုးကား- RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

ယနေ့ (ဇွန် ၂၃) ရေနံစျေးနှုန်းများသည် အနှုတ်ဖြင့် ပိတ်သိမ်းသွားခဲ့ပြီး အမေရိကန်က အီရန်ကို တိုက်ခိုက်မှုကြောင့် ဒေသတွင်း ပိုမိုမတည်ငြိမ်မှု ဖြစ်နိုင်ခြေကို စွမ်းအင်ဈေးကွက်က လျစ်လျူရှုလိုက်ကြောင်း သိရသည်။

အမေရိကန်ရေနံဈေးနှုန်းသည် ယမန်နေ့က ၆ ဒသမ ၂ ရာခိုင်နှုန်းအထိ မြင့်တက်ခဲ့ပြီး တစ်စည်လျှင် ၇၈ ဒသမ ၄၀ ဒေါ်လာအထိ ခေတ္တ ရောက်ရှိခဲ့သည်။

အမေရိကန်စျေးကွက်များ စတင်ဖွင့်လှစ်ချိန်တွင် သမ္မတ ဒေါ်နယ်ထရမ့် က ၎င်း၏ Truth Social စာမျက်နှာတွင် “ရေနံစျေးနှုန်းများကို တည်ငြိမ်စွာ ထားရှိကြရန်နှင့် ၎င်းက ဈေးကွက်ကို စောင့်ကြည့်နေကြောင်း၊ ရန်သူ့ အလိုကျ မလုပ်ဆောင်ကြရန် သတိပေးသည်” ဟု တိုက်တွန်းခဲ့သည်။

အီရန်က အမေရိကန်တိုက်ခိုက်မှုကို ပြန်လည်တုံ့ပြန်ရန် ကမ္ဘာ့ အရေးပါဆုံး ရေနံသယ်ယူမှုလမ်းကြောင်းဖြစ်သော ဟော်မုဇ်ရေလက်ကြားကို ပိတ်ပစ် နိုင်ခြေကို ဈေးကွက်က စိုးရိမ်နေသည်။ ထိုရေလက်ကြားမှ တစ်နေ့လျှင် ရေနံစည်ပေါင်း ၂၀ သန်းခန့် ဖြတ်သန်းစီးဆင်းလျက်ရှိသည်။

Rapidan Energy Group ၏ ဥက္ကဋ္ဌ Bob McNally က CNN သို့ ပြောကြား ရာတွင် “ရေနံဈေးကွက်တွင် နိုင်ငံရေးအရ တည်ငြိမ်မှုမရှိခြင်းနှင့်ပတ်သက်၍ အချက်ပေးသံများစွာကို ကုန်သည်များ မြင်တွေ့ဖူးပြီး ဖြစ်သည်။ ပင်လယ်ကွေ့ဒေသမှ ရေနံထုတ်လုပ်မှု သို့မဟုတ် သယ်ယူပို့ဆောင်မှုတွင် ကြီးမားသော အဟန့်အတား မဖြစ်မချင်း စျေးနှုန်း မြင့်တက်မှုများသည် ကန့်သတ်ခံရမည်ဟု ယုံကြည်သည်” ဟု ဆိုသည်။

ကိုးကား- CNN

Photo: Bloomberg

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

တိုကျို ဇွန် ၂၂

အရှေ့တရုတ် ပင်လယ်ဒေသပိုင်ဆိုင်ခွင့်အငြင်းပွားကျွန်းများအနီး လှုပ်ရှားသွားလာနေသော တရုတ်သင်္ဘောများကို ၂၁၆ ရက် မြောက်နေ့အဖြစ် တွေ့ရှိထား ကြောင်း ဂျပန်အစိုးရက ယနေ့တွင် သတင်းထုတ်ပြန်ထားသည်။

ဂျပန်နိုင်ငံက ဆန်ကာကူ ကျွန်းစုဟူ၍ သတ်မှတ်ထားပြီး တရုတ်နိုင်ငံက တောင်ယုကျွန်းစုဟုခေါ်ဝေါ်သည့် အဆိုပါအရှေ့ တရုတ်ပင်လယ် ကျွန်းစုဒေသ သည် တရုတ်နှင့် ဂျပန်တို့ကြား ပိုင်ဆိုင်ခွင့် အငြင်းပွားနေသည့် နယ်မြေဖြစ်သည်။

သို့ရာတွင် လက်ရှိအချိန်တွင် ဆန်ကာကူ၊ ကျွန်းစုကို ဂျပန်နိုင်ငံက ထိန်းချုပ်ထားပြီး တရုတ်နိုင်ငံက ပိုင်ဆိုင်ခွင့်တောင်းဆိုထားသည်။ ယနေ့တွင် ဆန်ကာကူကျွန်း၏ ရေပိုင် ၁၂ မိုင် ရေပိုင်နက် အတွင်းမောင်းနှင်နေသည့် တရုတ် ကမ်းခြေစောင့်တပ် သင်္ဘောလေးစီးကို တွေ့ရှိထားကြောင်း ဂျပန်အစိုးရသတင်းထုတ်ပြန်ချက်တွင် ဖော်ပြထားသည်။
ပြီးခဲ့သည့်နှစ်အတွင်း တရုတ်သင်္ဘောများသည် ဆန်ကာကူကျွန်းစု၀န်းကျင်၌ ရက်ပေါင်း ၂၁၅ ရက်ဆက်တိုက်မောင်းနှင်လှုပ်ရှားခဲ့ကြောင်း ဂျပန်အစိုးရတာဝန်ရှိသူများက ပြောကြားထားသည်။

ဆန်ကာကူ ကျွန်းစုအနီး တရုတ်သင်္ဘောများလာရောက်မှုကို ဂျပန်အစိုးရက သံတမန်ရေးအရ ကန့်ကွက်လေ့ရှိကြောင်း သိရသည်။ 

Ref: RT

Τrs: KKO

YDNB Newspaper

မလေးရှားနိုင်ငံ ဂျိုဟိုးပြည်နယ်၌ရှိသော စက်မှုဇုန်တစ်ခု၏ အင်ဂျင်ဝိုင်သိုလှောင်ရုံတစ်ခုတွင် မီးအကြီးအကျယ်လောင်ကျွမ်းမှုဖြစ်ပွားကြောင်း တာဝန်ရှိသူများကပြောသည်။

အဆိုပါမီးလောင်မှုကြောင့် မီးခိုးလုံးများ အလိပ်လိုက်တက်လာကာ အနီးနားရှိ ဒေသခံများကို ဘေးကင်းရာသို့ပြောင်းရွှေ့ပေးလိုက်ရကြောင်း တာဝန်ရှိသူများ က ဇွန်လ ၂၁ ရက်တွင်ပြောသည်။

မီးလောင်မှုသည် ဇွန်လ ၂၁ ရက်မွန်း လွဲဝိုင်းတွင် ဖြစ်ပွား​ခြင်းဖြစ်ပြီး လေပြင်းများတိုက်ခတ်မှု၊ မီးတောက်က အနီးရှိဆီဟောင်းသိုလှောင်ရုံသို့ကူးစက်သွားမှု တို့ကြောင့် မီးလောင်မှုကြီးမားရခြင်းဖြစ်သည်။

ထိုမီးလောင်မှုကြောင့် ထိခိုက်ဒဏ်ရာ ရရှိသူရှိသည်ဟု သတင်းများမတက်လာသေးကြောင်း၊ အင်ဂျင်ဝိုင်သိုလှောင်ရုံ၌ လောင်သည့်မီးသည် အခင်းဖြစ်ပွားရာနေ ရာမှ မီတာ ၅၀ အကွာတွင်ရှိသည့် လူနေအိမ်ရာဘက်အထိ ကူးစက်သွားကြောင်း မလေးရှားနိုင်ငံပိုင်သတင်းဌာနကဖော်ပြထားသည်။

Ref: Xinhua

MWD Daily Newspaper

အမေရိကန်က အီရန်၏နျူကလီးယားစက်ရုံသုံးခုကို တိုက်ခိုက်ခဲ့ခြင်းသည် အီရန်-အစ္စရေး ပဋိပက္ခကို ပိုမိုကြီးထွားစေသည့် အကြောင်းအရင်းလည်း ဖြစ်သည်။ အဆိုပါတိုက်ခိုက်မှုကြောင့် ဇွန် ၂၂ ရက် (တနင်္ဂနွေနေ့) ညနေပိုင်းတွင် ရေနံစျေးများ ရုတ်တရက် မြင့်တက်လာခဲ့သည်။ အမေရိကန် ၏ ရေနံစျေးသည် ၃.၆% တက်ကာ ရေနံတစ်စည်လျှင် ၇၆.၄၇ ဒေါ်လာ အထိ မြင့်တက်ခဲ့ပြီး ကမ္ဘာ့ရေနံ သတ်မှတ်ရည်ညွှန်းဈေးမှာလည်း ၃.၂% တက်ကာ ရေနံတစ်စည်လျှင် ၇၄.၅၉ ဒေါ်လာအထိ မြင့်တက်ခဲ့သည်။ 

ထိုတိုက်ခိုက်မှုဖြစ်စဉ်ကြောင့် အမေရိကန်စတော့စျေးကွက်မှာမူ ကျဆင်း ခဲ့သည်။ သို့သော် အမေရိကန် ဒေါ်လာမှာ ၀.၃% မြင့်တက်လာခဲ့ပြီး ထရမ့် အစိုးရက ပြည်ပမှ သွင်းကုန်များအပေါ် အခွန်နှုန်းများ တိုးမြှင့်လိုက် ပြီးနောက် ဒေါ်လာစျေး ရုတ်တရက်ကျဆင်းခဲ့ရာမှ ယခုအခါ ပြန်လည် မြင့်တက်လာခြင်းဖြစ်သည်။ 

အမေရိကန်သည် တစ်နေ့လျှင် ပျမ်းမျှ ရေနံစည် ၁၃.၄ သန်း ထုတ်လုပ် နိုင်ပြီး ဇန်နဝါရီလအစမှစတင်၍ ရေနံသိုလှောင်မှုမှာ ရေနံစည်ပေါင်း သန်း ၂၀၀ ကျော် တိုးလာခဲ့သည်။ ထို့ပြင် အီရန်က အမေရိကန်၏ တိုက်ခိုက်မှု အပေါ် လက်တုံ့ပြန်ဆောင်ရွက်မှုအဖြစ် ရေနံသယ်ယူပို့ဆောင်သည့် ဟော်မုဇ် ရေလက်ကြားအား ပိတ်ပစ်မည်ကို စီးပွားရေးပညာရှင်များကလည်းစိုးရိမ်နေကြသည်။ ရေနံစျေး ရုတ်တရက် မြင့်တက်ပါက အမေရိကန် စီးပွားရေး၏ ငွေကြေးဖောင်းပွမှုမှာ ပိုမိုဆိုးရွားလာနိုင်သည်။ 

အမေရိကန်စွမ်းအင်ဆိုင်ရာ သတင်းအချက်အလက်ဌာနအရ ၂၀၂၄ ခုနှစ် နှင့် ၂၀၂၅ ခုနှစ် ပထမသုံးလပတ်အတွင်း ပင်လယ်ကြောင်း ရေနံ ကုန်သွယ်မှု၏ ၂၅% ကျော်မှာ ဟော်မုဇ်ရေလက်ကြားမှတစ်ဆင့် သယ်ယူ ပို့ဆောင်ခဲ့ပြီး အမေရိကန်နိုင်ငံအနေဖြင့် အဆိုပါရေလက်ကြားမှ တစ်နေ့လျှင် ရေနံစည်ပေါင်း ၅၀၀,၀၀၀ သိန်းခန့် တင်သွင်းကာ ထိုပမာဏမှာ အမေရိကန်နိုင်ငံ၏ စုစုပေါင်းရေနံဆီနှင့် လေယာဉ်ဆီ တင်သွင်းမှု၏ ၇% ခန့် ရှိသည်။

ကိုးကား - CNN

ဘာသာပြန်ဆိုသူ-ဒေါ်မေသူခိုင်၊လက်ထောက်ညွှန်ကြားရေးမှူး၊နစက-၃

ဝီကီလိခ်၏ ထုတ်ပြန်ချက်အရ ဟောလိဝုဒ်ရှိ ဂျူးလူမျိုး ဇာတ်ညွှန်းရေး ဆရာများသည် ဆယ်စုနှစ်ကျော်ကြာ အီရန်နှင့်စပ်လျဉ်းသည့် စစ်ရေး အရ အရေးယူမှုတိုးမြှင့်ရန် လှုံ့ဆော်သော အကြောင်းအရာများကို ရုပ်ရှင်ဇာတ်လမ်းများတွင် တစ်ဆင့်ပြီးတစ်ဆင့် ထည့်သွင်းခဲ့ကြောင်း ဖော်ပြခဲ့သည်။

အစ္စရေးသည် လွန်ခဲ့သော ရက်သတ္တပတ်က အီရန်အပေါ် လေကြောင်း တိုက်ခိုက်မှုများ ပြုလုပ်ခဲ့ပြီး တီဟီရန်သည် နျူကလီးယား လက်နက်ထုတ်လုပ်ရန် နီးကပ်နေပြီဟု ဆိုခဲ့သည်။ လွန်ခဲ့သည့် သီတင်းပတ်တွင် အမေရိကန်သည်လည်း အီရန်၏ နျူကလီးယားစက်ရုံများကို ဗုံးကြဲ တိုက်ခိုက်ကာ အဆိုပါပဋိပက္ခတွင် တိုက်ရိုက်ပါဝင်လာခဲ့သည်။

တနင်္ဂနွေနေ့ (ဇွန် ၂၂) က X တွင် ဝီကီလိခ်၏ ပို့စ်တစ်ခုတွင် “ဂျူးလူမျိုး များဟု ဆိုကြသော” ဟောလိဝုဒ်ဇာတ်ညွှန်းရေးဆရာများသည် နှစ်ပေါင်း များစွာ အီရန်နှင့်စစ်ဖြစ်ရန် စိတ်ပိုင်းဆိုင်ရာ လှုံ့ဆော်စည်းရုံးမှုများ ဖော်ပြ ခဲ့သည်။ ထိုသို့သော လုပ်ဆောင်မှုများကို Top Gun: Maverick၊ Homeland၊ 24 နှင့် The Fifth Estate ကဲ့သို့သော ရုပ်ရှင် ဇာတ်ကား များတွင် တွေ့မြင်နိုင်သည်ဟု ဆိုသည်။

ဝီကီလိခ်သည် ၂၀၁၃ ခုနှစ်က Oxford Union တွင် ဝီကီလိခ် တည်ထောင်သူ ဂျူလီယန်အာဆန်းချ် ပြောကြားခဲ့သည့် မိန့်ခွန်းတစ်ခုကို မျှဝေခဲ့ပြီး ထိုဗီဒီယိုတွင် ၎င်းသည် The Fifth Estate (ဝီကီလိခ် အကြောင်း ရိုက်ကူးထားသော ဇီဝဇာတ်လမ်း) အကြောင်း ဆွေးနွေးခဲ့သည်။ ထို ဇာတ်ကားတွင် အီရန်၏ နျူကလီးယားဗုံးစီမံကိန်း (ဇာတ်လမ်းဖြည့်) ကို အစပိုင်းတွင် ပြသထားသည်။

အာဆန်းက တီဟီရန်ရှိ အီရန်သိပ္ပံပညာရှင်များ ဗုံးတစ်လုံးကို စုစည်းနေပုံကို ဖော်ပြထားသော ဇာတ်လမ်းအစပိုင်းကို ပြန်လည်ရည်ညွှန်းခဲ့ပြီး ဇာတ်ကောင်တစ်ဦးက “အဆိုပါလက်နက်ကို ခြောက်လအတွင်း အသုံးပြု နိုင်ပြီ” ဟု ပြောဆိုထားသည်။

“ဝီကီလိခ်အကြောင်း ဇာတ်ညွှန်းတွင် ထိုကဲ့သို့ မဟုတ်မမှန်သော အချက် ကို မည်သို့ထည့်သွင်းနိုင်သနည်း” ဟု အာဆန်းက မေးခွန်းထုတ်ခဲ့သည်။ ထိုအချိန်က အမေရိကန်ထောက်လှမ်းရေး အဖွဲ့ ၁၆ ဖွဲ့သည် အီရန်တွင် နျူကလီးယားလက်နက်စီမံကိန်း မရှိကြောင်း ရှာဖွေတွေ့ရှိပြီး ဖြစ်သည်ကို ၎င်းက ထောက်ပြခဲ့သည်။

အစ္စရေး၏ လတ်တလော တိုက်ခိုက်မှုများမတိုင်မီ အပြည်ပြည်ဆိုင်ရာ အဏုမြူစွမ်းအင်အေဂျင်စီ (IAEA) နှင့် အမေရိကန် ထောက်လှမ်းရေးအဖွဲ့များက အီရန်၌ နျူကလီးယားလက်နက် စီမံကိန်းရှိသည့် အထောက်အထား မတွေ့ရှိရကြောင်း ထုတ်ပြန်ခဲ့ပါသည်။

ကိုးကား- CNN

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

လန်ဒန် ဇွန် ၂၂

အီရန်နျူကလီးယား အဆောက်အအုံများကို အမေရိကန်နိုင်ငံက ယနေ့တွင်တိုက်ခိုက်ခဲ့ပြီးနောက် နိုင်ငံတကာလေကြောင်းလိုင်းများအနေဖြင့် အရှေ့အလယ်ပိုင်း ဝေဟင်ပိုင်နက် အတော်များများကို ဆက်လက်ရှောင်ကွင်းပျံသန်းနေရကြောင်း သိရသည်။ လေကြောင်းခရီးစဉ်စောင့်ကြည့်ရေးဝက်ဘ်ဆိုက်များ၏အဆိုအရ ယနေ့တွင် နိုင်ငံတကာလေကြောင်း လိုင်းများအနေဖြင့်အီရန်၊ အစ္စရေး၊ အီရတ်နှင့်ဆီးရီးယားဝေဟင်များကို ရှောင်ကွင်းပျံသန်းနေကြဆဲ ဖြစ်ကြောင်း သိရသည်။

အဆိုပါဝေဟင်ပိုင်နက်များကို ဖြတ်သန်းရမည့် လေကြောင်းလမ်းများနေရာတွင် ကက်စပီယံ ပင်လယ်ဖြတ် လေကြောင်းလမ်းများ၊ အီဂျစ်နှင့် ဆော်ဒီအာရေဗျ ဝေဟင်ပိုင်နက်လေလမ်းကြောင်းများအစားထိုးအသုံးပြုနေရကြောင်း လေကြောင်းခရီးစဉ် စောင့်ကြည့်ရေးဝက်ဘ်ဆိုက်များက သတင်း ထုတ်ပြန်ထားသည်။

အစ္စရေးနိုင်ငံက ဇွန် ၁၃ ရက် တွင်အီရန်နျူကလီးယားအဆောက်အအုံများကို စစ်ရေးအရစတင် တိုက်ခိုက်ခဲ့ပြီးနောက် နိုင်ငံတကာလေကြောင်းလိုင်းများ အနေဖြင့် အရှေ့အလယ်ပိုင်းဝေဟင်ပိုင်နက်များကို စတင်ရှောင်ရှားခဲ့ရသည်။

လက်ရှိအချိန်တွင် အစ္စရေးနှင့် အီရန်ပဋိပက္ခမှာ ယနေ့တွင် ၁၀ ရက်တာကာလအတွင်း ဝင်ရောက်လာပြီဖြစ်ကြောင်း သိရသည်။

Ref: Xinhua

Trs: KKO

YDNB Newspaper

Photo - CNA