မော်စကို နိုဝင်ဘာ ၂၆

လူမှုမီဒီယာတစ်ခုဖြစ်သည့် တယ်လီဂရမ်သည် ရုရှားနိုင်ငံတွင် တားမြစ်ထားသည့် သတင်းအချက်အလက်များကို ၎င်း၏ စာမျက်နှာမှဖယ်ရှားရန် ငြင်းဆန်ခဲ့သည့်အတွက် ရုရှားတရားရုံးတစ်ရုံးက တယ်လီဂရမ်အား ဒဏ်ငွေ ရူဘယ် ခုနစ်သန်းဒဏ်ရိုက်ခဲ့ကြောင်း အဆိုပါ တရားရုံးသတင်းထုတ်ပြန်ရေးအဖွဲ့က နိုဝင်ဘာ ၂၅ ရက်တွင် ပြောကြားသည်။

တားမြစ်ရန်ပျက်ကွက်

ရုရှားနိုင်ငံ၏ ဥပဒေအရ တားမြစ်ရန်လိုအပ်သည့် သတင်းအချက်အလက်များကို တားမြစ်ရန် ပျက်ကွက်သည့်အတွက် လူမှုမီဒီယာဖြစ်သည့် တယ်လီဂရမ်တွင် အပြစ်ရှိကြောင်း တရားရုံး၏ ထုတ်ပြန်ချက်တွင် ဖော်ပြထားသည်။

မည်သည့်သတင်းများ ဖော်ပြခဲ့ခြင်းဖြစ်ကြောင်း တရားရုံးက ပြောကြားခြင်းမရှိချေ။ ပြီးခဲ့သည့် လအတွင်းကလည်း တယ်လီဂရမ်အား အလားတူအမှုဖြင့် ဒဏ်ငွေ ရူဘယ် ‌လေးသန်း ဒဏ်ရိုက်ခဲ့သည်။

ကမ္ဘာတစ်ဝန်း၌ လက်ရှိအချိန်တွင် တယ်လီဂရမ် သုံးစွဲသူ သန်း ၉၀၀ နီးပါးရှိသည်။

ကိုးကား- ဆင်ဟွာ

Source- မြန်မာ့အလင်းသတင်းစာ

ရုရှားအနေဖြင့် ယူကရိန်းက မိမိနိုင်ငံအတွင်းကို အမေရိကန်နိုင်ငံထုတ်လက်နက်များ၊ ဗြိတိန်နိုင်ငံထုတ် လက်နက်များနှင့် ပစ်ခတ်တိုက်ခိုက်မှုကို တုံ့ပြန်သည့် အနေဖြင့် ယူကရိန်းရှိ Dnipro မြို့ကို Oreshnik အမည်ရှိ တာလတ်ပစ် ပဲ့ထိန်းဒုံးကျည်သစ်တစ်မျိုးဖြင့် ပစ်လွှတ်လိုက်ပါသည်။ ထိုလက်နက်မျိုး ရုရှားဖက်က ထွက်ပေါ်လာခြင်းသည် ကမ္ဘာတစ်ဝှမ်းကို တုန်လှုပ်ချောက်ခြားစေပါသည်။ ရုရှားက အမေရိကန်နှင့် အနောက်နိုင်ငံများကို သတိပေးလိုက်ခြင်းလည်း ဖြစ်ပါသည်။ 

ရုရှားက ယင်းဒုံးကျည်ကို Oreshnik ဟု အမည်ပေး ထားပါသည်။ စမ်းသပ်ဆဲ တာလတ်ပစ်ပဲ့ထိန်းဒုံးကျည် တစ်မျိုးဖြစ်ပါသည်။ Oreshnik ဆိုသည်မှာ ရုရှားနိုင်ငံတွင် ပေါက်ရောက်သော သစ်အယ်ပင်၏ နာမည်ဖြစ်ပါသည်။ ရုရှားအနေဖြင့် ယင်းလက်နက်ကို တစ်ခါမျှ ချပြဖူးခြင်းမရှိသေးကြောင်း သိရှိရသည်။ 

ပင်တဂွန်ဖက်ကမူ Oreshnik သည် RS-26 Rubezh ဟုခေါ်သည့် တိုက်ချင်းပစ်ပဲ့ထိန်းဒုံးကျည် (intercontinental ballistic missile – ICBM )ကို အခြေခံထားခြင်း ဖြစ်ကြောင်း ပြောထားပါသည်။ ၎င်းဟိုက်ပါဆိုးနစ် ဒုံးကျည်သည် အသံထက် အနည်းဆုံး ၅ ဆမြန်ကြောင်း၊ စနစ်တကျ ပျံသန်းတိုက်ခိုက်ခြင်းကို ကြားဖြတ်ပစ်ချဖို့ တော်တော်ခက်ခဲကြောင်း၊  ယင်းဒုံးကျည်တွင် ဒုံးကျည် ထိပ်ဖူး ၃ ခု (သို့မဟုတ်) ၆ ခု ပါရှိနိုင်ကြောင်း အမေရိကန် စစ်ဖက်ဆိုင်ရာကျွမ်းကျင်ပညာရှင် Viktor Baranets က ရေးသားထားပါသည်။

မော်စကိုအခြေစိုက် အမျိုးသားကာကွယ်ရေးဂျာနယ်က လွှတ်တင်သည့် ဗီဒီယိုများအရ Oreshnik တွင် ဒုံးကျည်ထိပ်ဖူး မြောက်မြားစွာ ပါရှိသည်ဟု ရေးသား ဖော်ပြထားပါသည်။

ရုရှားသမ္မတ ဗလာဒီမာပူတင်က ကြာသပတေးနေ့က တီဗီအစီအစဉ်တစ်ခုမှာ ရုတ်တရက်ပေါ်ပေါက်လာပြီး “Dnipro မြို့ကို Oreshnik တာလတ်ပစ်ပဲ့ထိန်းဒုံးကျည် အသစ်ဖြင့် ပစ်လွှတ်ခြင်းသည် ရုရှားလူမျိုးများ တီထွင်ထားသည့် တာလတ်ပစ်ဒုံးကျည်စနစ်အသစ်များထဲက တစ်ခုဖြစ်ပြီး  ယခုကဲ့သို့ စစ်ရေးတင်းမာလာချိန်တွင် စမ်းသပ်ပစ်လွှတ်လိုက်ခြင်းဖြစ်ကြောင်း၊ နျူကလီးယားထိပ်ဖူး တပ်ဆင်မထားသည့် ဟိုက်ပါ ဆိုးနစ် ဖွဲ့စည်းပုံစနစ်တစ်ခုဖြင့် တည်ဆောက်ထားကြောင်း၊ မည်သည့် ခေတ်မီလေကြောင်းကာကွယ်ရေး လက်နက်ကိရိယာများကမျှ ယင်းကို ကြားဖြတ်ပစ်ချနိုင်ခြင်းမရှိကြောင်း၊ ယနေ့အထိ ယင်းလက်နက်မျိုးကို တိုက်ဖျက်နိုင်သည့် နည်းလမ်းလည်း ကမ္ဘာမှာမပေါ် သေးကြောင်း” ၎င်းက ပြောကြားပါသည်။ 

ယူကရိန်းနိုင်ငံအနေဖြင့် Oreshnik သည် ရုရှားတွေ၏ စတုတ္တမြောက် ဒုံးကျည်စမ်းသပ် ပစ်လွှတ်မှုတစ်ခုဖြစ်ကြောင်း  ပြောကြားထားပါသည်။  ရုရှား၏ Astrakhan ဒေသကနေ Oreshnik ကို မတိုက်မီ ၁၅ မိနစ်ကြာ ပျံသန်းခဲ့ကြောင်း၊ ဒုံးကျည်ထိပ်ဖူး ၆ ခုပါရှိပြီး ထိပ်ဖူး တစ်ခုစီမှာ လက်နက် ၆ တွဲစီ သယ်ဆောင်လာခြင်း ဖြစ်ကြောင်း၊ ယင်း၏ အမြင့်ဆုံးအမြန်နှုန်းက  အသံထက် ၁၁ ဆ မြန်ဆန်ကြောင်း ပြောကြားပါသည်။ 

နေတိုးကတော့ ရုရှား၏ Oreshnik ဒုံးကျည် စမ်းသပ်အသုံးပြုလိုက်မှုကြောင့် လာမည့်အင်္ဂါနေ့တွင် နေတိုး ဌာနချုပ်ရှိရာ ဘရပ်ဆဲလ်မြို့တွင် အရေးပေါ်အစည်း အဝေးတစ်ခုခေါ်ယူထားကြောင်း၊ မည်သည့်အကြောင်း အရာ ဆွေးနွေးကြမည်အား မသိရသေးကြောင်း နေတိုး ဖက်က ပြောထားပါသည်။ မည်သို့ပင်ဆိုစေကာမူ  ရုရှား ၏ နောက်ဆုံးပေါ်  ဟိုက်ပါဆိုးနစ်တာလတ်ပဲ့ထိန်း ဒုံးကျည် Oreshnik ကို စမ်းသပ်ပစ်လွှတ်ပြလိုက်ခြင်း ကြောင့် ယခုအခါတွင် ရုရှား-ယူကရိန်းစစ်ပွဲသည် တစ်ကမ္ဘာလုံးက အထူးအာရုံစိုက် စောင့်ကြည့်ရမည့် အခြေအနေတစ်ခုဖြစ်လာခဲ့ကြောင်း ပြောရမည်ဖြစ်ပါသည်။ 

ကိုးကား - ALJAZEERA

လိင်ပိုင်းဆိုင်ရာအကြမ်းဖက်သည်ဟု သံသယဖြင့် တနင်္လာနေ့တွင် အဖမ်းခံရသည့် နော်ဝေးနိုင်ငံအိမ်ရှေ့မင်းသမီး၏ သားတော် Marius Borg Hoiby သည် ဒုတိယကြိမ်မြောက် အလားတူ လိင်ပိုင်းဆိုင်ရာ အကြမ်းဖက်မှုဖြင့် ထပ်မံအဖမ်းခံလိုက်ရကြောင်း နော်ဝေးရဲတပ်ဖွဲ့က ထုတ်ပြန်လိုက်ပါသည်။ 

ပထမအကြိမ် လိင်ပိုင်းဆိုင်ရာအကြမ်းဖက်သည်ဟု သံသယဖြင့် အဖမ်းခံရသည့် မင်းသားကို Oslo ခရိုင် တရားရုံး၏ကြားနာချက်အရ Oslo ခရိုင်ရဲတပ်ဖွဲ့အနေဖြင့် မင်းသားအား နေအိမ်အကျယ်ချုပ် ရက်သတ္တပတ် ၂ ပတ်ထားရှိရန် တင်ပြထားကြချိန်တွင် ကြာသပတေးနေ့တွင် ယခုကဲ့သို့ ဒုတိယအကြိမ်မြောက် ကျူးလွန်ခဲ့ခြင်းဖြစ်ကြောင်း သိရှိရပါသည်။

နော်ဝေးနိုင်ငံတွင်  လိင်ပိုင်းဆိုင်ရာအကြမ်းဖက်မှု ကျူးလွန်ပါက  နော်ဝေးတည်ဆဲဥပဒေအရထောင်ဒဏ် ၁၀ နှစ် ကျခံရပါမည်။

ကိုးကား - CNN

Ford ကားကုမ္ပဏီသည် ၂၀၂၇ ခုနှစ်အကုန်တွင် ဥရောပ နှင့်ဗြိတိန်၌  အလုပ်သမား ၄၀၀၀ လျှော့ချသွားရန် စီစဉ် လျက်ရှိကြောင်း ကြေညာလိုက်ပါသည်။ ဥရောပကား စျေးကွက် ပြင်ဆိုင်မှုများလာခြင်း၊ စီးပွားရေးရိုက်ခတ်မှု ဒဏ်ခံနေရခြင်း၊ မျှော်မှန်းထားသလို လျှပ်စစ်ကားများ မရောင်းချရခြင်း စသည့်အခက်အခဲများကြောင့် ထိုသို့ ဆုံးဖြတ်ခဲ့သည်ဟု သိရှိပါသည်။ ယခုအခါ အလုပ်သမား လျှော့ချရေးကိစ္စအတွက် သက်ဆိုင်ရာ အလုပ်သမား ကိုယ်စားလှယ်များနှင့် ဆွေးနွေးညှိနှိုင်းမှုများ ပြုလုပ် လျက်ရှိပါသည်။

ထိုဆုံးဖြတ်ချက်အရ ဂျာမနီတွင် အလုပ်အကိုင် (၂၉၀၀) နေရာ၊ ဗြိတိန်တွင် (၃၀၀) နေရာနှင့် အခြားနိုင်ငံတို့တွင် အလုပ်အကိုင်အချို့ ဆုံးရှုံးမည်ဖြစ်ပါသည်။ ထိုဆုံးဖြတ် ချက်မှာ Volkswagen ကားကုမ္ပဏီက အလုပ်သမား ဝန်ထမ်းလစာ ၁၀ ရာခိုင်နှုန်းလျှော့ချမည်ဟု ပြောကြား ပြီးနောက် သီတင်းပတ်များအကြာတွင် ထွက်ပေါ် လာခြင်းဖြစ်ပါသည်။ 

ဥရောပကားလောကတွင် အနောက်နိုင်ငံထုတ်ကားများ ရောင်းလိုအားကျဆင်းလာခြင်းမှာ တန်ဖိုးမျှပြီး လောင် စာဆီ မလိုအပ်သော အဆင့်မြင့် တရုတ်နိုင်ငံထုတ် EV ကားများနေရာယူလာခြင်းသည်လည်း အဓိကအချက် တချက်ဖြစ်နေသည်။ ဥရောပသည် ၂၀၃၅ ခုနှစ်အရောက် တွင် ကာဗွန်ဒိုင်အောက်ဆိုက်ထုတ်လွှင့်မှု သုညဖြစ်သည် အထိ တစ်နှစ်ထက်တစ်နှစ် အတက်နိုင်ဆုံး လျှော့ချ နေကြပါသည်။ 

ကိုးကား - AP

ပြီးခဲသည့် အမေရိကန်သမ္မတ ရွေးကောက်ပွဲအပြီးတွင်  ကမ္ဘာ့အချမ်းသာဆုံးပုဂ္ဂိုလ်(၁၀)ဦး၏ ကြွယ်ဝမှုဓနအင်အား ခုန်ပျံမြင့်တက်သွားကြောင်း၊ အကျိုးအမြတ်အများဆုံး ရရှိသူသည် လက်ရှိကမ္ဘာ့အချမ်းသာဆုံးပုဂ္ဂိုလ်လည်း ဖြစ်ပြီး ရွေးကောက်ပွဲတစ်လျှောက် ဒေါ်နယ်ထရန့်ဘက် မှရပ်တည်ပြောကြားသူ Elon Musk  ဖြစ်ကြောင်း၊ ယခင် ၂၇၀ ဘီလီယံမှ နိုဝင်ဘာ ၆ ရက်၊  ဗုဒ္ဓဟူးနေ့တွင် ဒေါ်လာ ၂၆.၅ ဘီလီယံ ထပ်မံမြင့်တက်သွားသဖြင့် ယခု ၎င်း၏ပိုင်ဆိုင်မှုသည် ဒေါ်လာ ၂၉၀ ဘီလီယံ ဖြစ်သွား ပါကြောင်း၊ အမေဇုန်တည်ထောင်သူ Jeff Bezo ၏ ဓနအင်အားသည် ၇.၁ ဘီလီယံ ထပ်မံမြင့် တက်သွား ပါကြောင်း၊ ထရန့်ကို အစဉ်တစိုက်ထောက်ခံသူ Oracle ပူးတွဲတည်ထောင်သူ Larry Ellison၏ ပိုင်ဆိုင်မှုသည် ဒေါ်လာ ၅.၅ ဘီလီယံ ထပ်မံ မြင့်တက်သွားကြောင်း၊ 

ထို့ပြင် Bill Gates အပါအဝင် အခြားဘီလျံနာများ၏ ဓနအင်အားများလည်း မြင့်တက်သွားပြီး  ရွေးကောက်ပွဲ အပြီး အချမ်းသာဆုံးပုဂ္ဂိုလ်(၁၀)ဦး၏ အကျိုးအမြတ် ရရှိလိုက်သည့် စုစုပေါင်းဓနအင်အားသည် ဒေါ်လာ ၆၄ ဘီလီယံဖြစ်သည်ဟုBloomberg Billionaire ညွှန်ကိန်း များအရ သိရပါကြောင်း၊ ၎င်းတို့၏ ဓနအင်အား ရုတ်တရက် ခုန်တက်သွားခြင်းမှာ ဒေါ်နယ်ထရန့်က ကန့်သတ်ထိန်းချုပ်မှုဆိုင်ရာခေတ်သစ်တစ်ခုနှင့် အခြား စီးပွားရေးဥပဒေများ၊မူဝါဒများနှင့်ပတ်သက်၍ အခန်း ကဏ္ဍသစ်တစ်ခုကို ဖွင့်လှစ်ပေးနိုင်မည်ဟု မျှော်လင့် ကြပြီး ကမ္ဘာ့ဓနအင်အား အများစုကို လက်ဝယ် ပိုင်ဆိုင် ထားသည့် ဘီလျံနာများအပါအဝင် အမေရိကန်ရင်းနှီး မြှုပ်နှံသူများက စတော့ရှယ်ယာဈေးကွက်ပေါင်းစုံမှ အကျိုးအမြတ်များရရှိလာမည်ဟု  ယုံကြည်နေကြခြင်း ကြောင့်ဖြစ်သည်ဟု  CNN သတင်းဌာနက ဖော်ပြထား ပါသည်။

ကိုးကား-CNN  https://www.cnn.com/2024/11/07/investing/billionaires-net-worth-trump-win/index.html

၂၀၂၄ ခုနှစ် ကမ္ဘာ့တန်ဖိုးအမြင့်ဆုံးငွေကြေးမှာ ကူဝိတ် နိုင်ငံ၏ “ဒီနာ” ငွေကြေးဖြစ်ပါသည်။ ကူဝိတ်နိုင်ငံသည် စီးပွားရေး တည်ငြိမ်၍ ရေနံကြွယ်ဝသည့် နိုင်ငံဖြစ်ပြီး ထိုငွေကြေးကို ၁၉၆၀ ပြည့်နှစ်တွင် စတင်ထုတ်ဝေ ခဲ့သည်။ အမေရိကန်ဒေါ်လာ ၃.၂၅ နှင့်ညီမျှသည်။

ဒုတိယတန်ဖိုးအမြင့်ဆုံးမှာ ရေနံနိုင်ငံ ဘာရိန်း၏ “ဒီနာ” ငွေကြေးဖြစ်ပြီး အမေရိကန်ဒေါ်လာ ၂.၆၅ နှင့်ညီမျှ သည်။ 

နိုင်ငံစီးပွားရေးတည်ငြိမ်ပြီး ရေနံကြွယ်ဝသည့် အိုမန် ငွေကြေးသည် တတိယအခိုင်မာဆုံး ငွေကြေးဖြစ်ပြီး အမေရိကန်ဒေါ်လာ ၂.၆၀ နှင့်ညီမျှသည်။

 ဗြိတိန်နိုင်ငံသုံး စတာလင်ပေါင်မှာ အဆင့် ၅ တွင် ရပ်တည်နေပြီး အမေရိကန်ဒေါ်လာ ၁.၂၆ နှင့်ညီမျှ သည်။ ကမ္ဘာသုံး အမေရိကန်ဒေါ်လာမှာ အဆင့် ၁၀ တွင် ရပ်တည်နေသည်။

ကိုးကား - Forbes

အိန္ဒိယနိုင်ငံ Adani Group အကြီးအကဲ Gautam Adani အပါအဝင် အခြားပုဂ္ဂိုလ်၇ဦးကို ဒေါ်လာ ဘီလီယံပေါင်းများစွာ လာဘ်ပေးလာဘ်ယူမှုဖြင့် အမေရိကန် အစိုးရကစွဲချက်တင်၍ တရားစွဲဆိုလိုက်ကြောင်း ရိုက်တာသတင်းဌာနနှင့် Bloomberg သတင်းဌာနတို့အပါအဝင် အခြားသတင်းဌာနများက နိုဝင်ဘာလ ၂၁ ရက် တွင် ဖော်ပြလိုက်ကြသည်။ 

Adani အဖွဲ့အစည်းသည် ဆိုလာစွမ်းအင်စာချုပ်များရရှိစေရန် အိန္ဒိယအရာရှိများကို လာဘ်ထိုးခဲ့သဖြင့် ဗုဒ္ဓဟူးနေ့တွင် တရားစွဲဆိုခံလိုက်ခြင်းဖြစ်ကြောင်း အစိုးရရှေ့နေများက ကြေညာလိုက်သည်။ 

အိန္ဒိယဘီလျံနာသူဌေးကြီး Adani သည် ပြီးခဲ့သည့် ရက်သတ္တပတ်က ဒေါ်နယ်ထရန့်၏ သမ္မတရွေးကောက်ပွဲ အနိုင်ရရှိမှုအပေါ် ချီးကျူးဂုဏ်ပြုသည့် အနေဖြင့် အမေရိကန်တွင် ဒေါ်လာသန်းပေါင်းများစွာတန်သည့် ရင်းနှီးမြှုပ်နှံမှုကို ကြေညာခဲ့ပြီး ဒေါ်နယ်ထရန့်ကလည်း အမေရိကန်တွင် စွမ်းအင်ကုမ္ပဏီများအတွက် ရိုးရှင်းသည့် စည်းမျဉ်းများချမှတ်ရန်နှင့် ပိုက်လိုင်းများ တူးဖော်ဖောက်လုပ်မှုလွယ်ကူစေရေးဆောင်ရွက်ပေးရန် ကတိပြုပြောကြားခဲ့ကြောင်း The Economic Times ဖော်ပြထားပါသည်။ 

ကိုးကား - The Economic Times

အမေရိကန်ဘီလျံနာ Tesla, SpaceX ပိုင်ရှင် အီလွန်မတ်စ်ခ် သည် ကမ္ဘာ့အချမ်းသာဆုံးပုဂ္ဂိုလ်ဖြစ်ပြီး အမေရိကန် ဒေါ်လာ ၂၇၄.၇ ဘီလီယံပိုင်ဆိုင်ကြောင်း၊ လာရီအယ်လီဆင် သည် အမေရိကန်ဒေါ်လာ ၂၁၁.၇ ဘီလီယံပိုင်ဆိုင်သည့် ဒုတိယအချမ်းသာဆုံး ပုဂ္ဂိုလ်ဖြစ်ကြောင်း၊ ဂျက်ဖ်ဘီးဇော့ဖ် သည် အမေရိကန်ဒေါ်လာ ၂၀၅.၆ ဘီလီယံပိုင်ဆိုင်ပြီး တတိယအချမ်းသာဆုံးပုဂ္ဂိုလ်ဖြစ်ကြောင်း၊  Facebook နှင့် Instagram ပိုင်ရှင် ဇူကာဘတ်သည် အမေရိကန်ဒေါ်လာ ၁၉၈.၃ ဘီလီယံပိုင်ဆိုင်ပြီး စတုတ္တအချမ်းသာဆုံးပုဂ္ဂိုလ်စာရင်းတွင် ရပ်တည်နေပါသည်။ 

ကမ္ဘာ့အချမ်းသာဆုံးပုဂ္ဂိုလ်စာရင်း၌ အဆင့် ၁ မှ ၄ အထိသည် အမေရိကန်နိုင်ငံလုပ်ငန်းရှင်များ ဖြစ်ကြပါသည်။

ကိုးကား - www.forbesindia.com

အမေရိကန် ရွေး‌ကောက်ခံသမ္မတ ဒေါ်နယ်ထရမ့်သည် လူမှုမီဒီယာ အိက်စ်တည်ထောင်သူ အီလွန်မတ်စ်၏ SpaceX မှ တီထွင်ထားသည့် ဧရာမ အာကာသယာဉ် စမ်းသပ်ပစ်လွှတ်မှုကို ယမန်နေ့က ကြည့်ရှုအားပေးခဲ့ကြောင်း သိရသည်။

 SpaceX အာကာသနည်းပညာကုမ္ပဏီသည် အမေရိကန်တောင်ပိုင်း တက္ကဆက်ပြည်နယ်ရှိ အာကာသယာဉ်လွှတ်တင်ရေးစခန်းမှ Starship ဒုံးပျံကို နိုဝင်ဘာ ၁၉ ရက်တွင် လွှတ်တင်ခဲ့သည်။

ထရမ့်ရွေးကောက်ပွဲတွင် အနိုင်ရရှိရေးအတွက် အီလွန်မတ်စ်သည် ငွေကြေးအမြောက်အမြား ကုန်ကျခံကာ ကြိုးပမ်းခဲ့သည်။ ထရမ့်ကလည်း ရွေးကောက်ပွဲတွင် အနိုင်ရရှိပြီးနောက် အီလွန်မတ်စ်အား အစိုးရအသုံးစရိတ်များကို လျှော့ချရန် စဉ်းစားသုံးသပ်သည့် အဖွဲ့အစည်းသစ်၏ ပူးတွဲခေါင်းဆောင်အဖြစ် ခန့်အပ်ရန် စာရင်းသွင်းထားကြောင်း သိရသည်။

အီလွန်မတ်စ်၏ SpaceX မှ တီထွင်ထားသည့် ဧရာမ အာကာသယာဉ် စမ်းသပ်ပစ်လွှတ်မှုကို ဒေါ်နယ်ထရမ့်လာရောက်ကြည့်ရှုခြင်းသည် ၎င်းတို့နှစ်ဦးအကြား နီးကပ်သည့်ဆက်ဆံ‌ရေးနှင့် ထရမ့်၏ ဆုံးဖြတ်ချက်ချမှတ်ခြင်းအပေါ် အီလွန်မတ်စ်၏ ဩဇာလွှမ်းမိုးမှု မြင့်တက်လာခြင်း၏ လက္ခဏာတစ်ရပ်ဖြစ်ကြောင်း အမေရိကန် မီဒီယာများက သတင်းဖော်ပြသည်။

ကိုးကား- အင်န်အိတ်ချ်ကေ

Source- မြန်မာ့အလင်းသတင်းစာ

ဂျကာတာ နိုဝင်ဘာ ၁၉

အင်ဒိုနီးရှားနိုင်ငံ၏ မြို့တော်ဟောင်းဖြစ်သည့် ဂျကာတာအား အထူးဒေသအဖြစ် သတ်မှတ် ကြေညာသည့် ဥပဒေကို ပါလီမန်က နိုဝင်ဘာ ၁၉ ရက်တွင် အတည်ပြုပြဋ္ဌာန်းခဲ့ကြောင်း ဆင်ဟွာ သတင်းအရ သိရသည်။

မိမိတို့သည် နိုင်ငံ၏ မြို့တော်သစ်အား နျူဆန်တာရာသို့ ပြောင်းရွှေ့ခဲ့ပြီးဖြစ်သဖြင့် ဂျကာတာအား အထူးဒေသအဖြစ် သတ်မှတ်လိုက်ကြောင်း ပါလီမန်ဒုတိယဥက္ကဋ္ဌ အေဒီးကာဒါက ပြောကြား သည်။

အင်ဒိုနီးရှားနိုင်ငံသည် ၎င်း၏ မြို့တော်သစ်အား လက်ရှိ ဂျကတာမြို့မှ အရှေ့ကာလီမန်တန် ပြည်နယ်ရှိ နျူဆန်တာရာမြို့သို့ ပြောင်း‌ရွှေ့သတ်မှတ်ခဲ့သည်။

မြို့တော်သစ် နျူဆန်တာရာအား လက်ရှိအချိန်တွင် တည်ဆောက်နေဆဲဖြစ်ကာ နိုင်ငံ့ဝန်ထမ်းများ ပြောင်းရွှေ့မှုကို ၂၀၂၅ ခုနှစ်အစပိုင်းတွင် စတင်ဆောင်ရွက်မည်ဖြစ်သည်။

ယခုကဲ့သို့ နျူဆန်တာရာအား မြို့တော်သစ်အဖြစ် သတ်မှတ်ပြောင်းရွှေ့ရခြင်းမှာ ဂျကာတာမြို့၏ လူနေထူထပ်မှုနှင့် ယာဉ်ကြောပိတ်ဆို့မှုများကြောင့်ဖြစ်သည်ဟု အင်ဒိုနီးရှားသမ္မတဟောင်း ဂျိုကိုဝီဒိုဒိုက ပြောကြားသည်။ ဂျကတာမြို့အား အထူးဒေသအဖြစ် သတ်မှတ်ခဲ့သော်လည်း ၎င်းသည် စီးပွားရေးနှင့် ယဉ်ကျေးမှုဆိုင်ရာလုပ်ငန်းများ ဆက်လက်ပါဝင်ဆောင်ရွက်နေမည် ဖြစ်ကြောင်း ပြည်ထဲရေးဝန်ကြီး မိုဟာမက် တီကိုကာနာဗီယန်က ပြောကြားသည်။

ကိုးကား- ဆင်ဟွာ

Source- ကြေးမုံသတင်းစာ