ရုရှား-ယူကရိန်း ပဋိပက္ခအတွင်း ယူကရိန်းကို ထောက်ပံ့ရန် အီးယူတွင် လက်တွေ့ကျသော နည်းလမ်းမရှိကြောင်း ဟန်ဂေရီဝန်ကြီးချုပ် Viktor Orban က ပြောကြားခဲ့သည်။ ဘရပ်ဆဲလ်တွင် ကျင်းပသော အီးယူ ခေါင်းဆောင်များ အစည်းအဝေးအပြီး မတ်လ ၂၀ ရက်နေ့က ၎င်း၏ မှတ်ချက်များကို ပြောကြားခဲ့သည်။

အီးယူသည် ယူကရိန်းကို လက်နက်များ ဆက်လက်ထောက်ပံ့ရန်၊ ယူကရိန်းတပ်မတော်ကို ထိန်းသိမ်းရန်နှင့် ပြန်လည်ထူထောင်ရေးလုပ်ငန်းများအတွက် ငွေကြေးထောက်ပံ့ရန် ဆွေးနွေးနေသော်လည်း ၎င်းတို့တွင် လုံလောက်သော ဘဏ္ဍာငွေမရှိကြောင်း Orban ကဆိုသည်။ အီးယူ၏ ယူကရိန်းထောက်ပံ့ရေးအစီအစဉ်များသည် အချည်းနှီးသော ကတိများဟု ထင်မြင်ကြောင်း ဝန်ကြီးချုပ်က ပြောကြားခဲ့သည်။

ပဋိပက္ခက အီးယူအဖွဲ့ဝင်များ၏ စီးပွားရေးကို ထိခိုက်စေခဲ့ကြောင်း၊ ရုရှားနှင့် ယူကရိန်းအကြား ငြိမ်းချမ်းရေးအတွက် အမေရိကန်သမ္မတDonald Trump ၏ ကြားဝင်ဆောင်ရွက်မှုများကို ဘရပ်ဆဲလ်ကထောက်ခံသင့်ကြောင်း ၎င်းကတိုက်တွန်းခဲ့သည်။ “ဟန်ဂေရီမိသားစုများကိုစစ်၏ စီးပွားရေးအကျိုးဆက်များအတွက် ဆက်လက်ပေးဆပ်ခွင့် မပြုသင့်ပါ” ဟုလည်း ပြောကြားခဲ့သည်။ ထို့အပြင် ဘူဒါပက်စ်က Kiev သို့ စစ်ရေးအကူအညီများ တိုးမြှင့်ပေးရန် တောင်းဆိုသည့် အီးယူ ပူးတွဲကြေညာချက်ကို လက်မှတ်ရေးထိုးရန် ငြင်းဆန်ခဲ့သည်။ “ဟန်ဂေရီ နိုင်ငံပါဝင်ပြီး စစ်ထောက်ခံသော ဥရောပ၏ ညီညွတ်သော သဘောထားတစ်ခု ဖြစ်ပေါ်လာစေရန် မိမိတို့အနေဖြင့် ခွင့်မပြုပါ” ဟု Orban က အီးယူခေါင်းဆောင်များ အစည်းအဝေးအပြီးတွင် သတင်းထောက်များ အား ပြောကြားခဲ့သည်။

ဘူဒါပက်စ်သည် ရုရှားနှင့် ထပ်မံအရှိန်မြှင့်တင်မှုကို ရှောင်ရှားသင့်ပြီး သံတမန်ရေးရာကို အာရုံစိုက်သင့်ကြောင်းပြောကြားခဲ့ကာ ကူညီထောက်ပံ့မှု များကို ပိတ်ပင်ရန် သို့မဟုတ် ရွှေ့ဆိုင်းရန် ၎င်း၏ ဗီတိုအာဏာကို အခါခါ အသုံးပြုခဲ့သည်။

အီးယူအဖွဲ့ဝင်များသည် ယူကရိန်းအတွက် စစ်ရေးအကူအညီ ယူရို ၄၀ ဘီလီယံ (ဒေါ်လာ ၄၃ ဘီလီယံ) စုစည်းကျခံရန်အတွက် သဘောတူညီမှု မရရှိခဲ့ပေ။ အီတလီနှင့် စပိန်တို့သည် အီးယူ၏ ထိပ်တန်းသံတမန် Kaja Kallas ဦးဆောင်သော အစီအစဉ်ကို ကုန်ကျစရိတ်များလွန်းသည်ဟု ငြင်းဆန်ခဲ့ကြောင်း သတင်းများအရ သိရသည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

နေပြည်တော် မတ် ၂၀

နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်ထံ မြန်မာနိုင်ငံဆိုင်ရာ ရုရှားဖက်ဒရေးရှင်းနိုင်ငံ သံအမတ်ကြီး H.E. Mr. Iskander Azizov က ယနေ့နံနက်ပိုင်းတွင် နေပြည်တော်ရှိ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌရုံး ဧည့်ခန်းမ၌ လာရောက်ဂါရဝပြု တွေ့ဆုံသည်။                   

အဆိုပါတွေ့ဆုံပွဲသို့ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့်အတူ ကောင်စီတွဲဖက်အတွင်းရေးမှူး ဗိုလ်ချုပ်ကြီးရဲဝင်းဦး၊ နိုင်ငံခြားရေးဝန်ကြီးဌာန ဒုတိယဝန်ကြီး ဦးလွင်ဦးတို့ တက်ရောက်ကြပြီး မြန်မာနိုင်ငံဆိုင်ရာ ရုရှားဖက်ဒရေးရှင်းနိုင်ငံ သံအမတ်ကြီးနှင့်အတူ မြန်မာနိုင်ငံဆိုင်ရာ ရုရှားစစ်သံမှူးနှင့် တာဝန်ရှိသူများ တက်ရောက်ကြသည်။

အမြင်ချင်းဖလှယ်ဆွေးနွေး

ထိုသို့တွေ့ဆုံရာတွင် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်၏ ရုရှားဖက်ဒရေးရှင်းနိုင်ငံသို့ သွားရောက်ခဲ့သည့် နိုင်ငံတော်အဆင့် ချစ်ကြည်ရေးခရီးစဉ်အတွင်း နှစ်နိုင်ငံအကြားချစ်ကြည်ရင်းနှီးမှုနှင့် ပူးပေါင်းဆောင်ရွက်မှုများ ပိုမိုတိုးတက်အောင် ဆောင်ရွက်နိုင်ခဲ့မှုကြောင့် အောင်မြင်သည့် ခရီးစဉ်ဖြစ်ခဲ့မှုအခြေအနေများ၊ ချစ်ကြည်ရေးခရီးစဉ်အတွင်း ရရှိခဲ့သည့် သဘောတူညီချက်များကို ဆက်လက်အကောင်အထည်ဖော်ဆောင်ရွက်လျက်ရှိမှု အခြေအနေများနှင့် ဆွေးနွေးရန် ကျန်ရှိသည့် အချက်များကို ဆက်လက်ဆွေးနွေးအကောင်အထည်ဖော်ဆောင်ရွက်သွားမည့် အခြေအနေများ၊ မြန်မာနိုင်ငံနှင့် ရုရှားနိုင်ငံလွှတ်တော်များအကြား ပူးပေါင်းဆောင်ရွက်မှုများ တိုးမြှင့်ဆောင်ရွက်သွားမည့် အခြေအနေများနှင့် ရုရှားဖက်ဒရေးရှင်းနိုင်ငံလွှတ်တော်များသို့ လေ့လာရေးအဖွဲ့များ စေလွှတ်သွားမည့် အခြေအနေများ၊ ကာကွယ်ရေးပိုင်းဆိုင်ရာများ၊ လူသားချင်းစာနာထောက်ထားမှုဆိုင်ရာ ကိစ္စရပ်များနှင့် အခြားကဏ္ဍပေါင်းစုံ၌ ပူးပေါင်းဆောင်ရွက်မှုများ ဆက်လက်တိုးမြှင့်သွားမည့် အခြေအနေများနှင့် နှစ်နိုင်ငံအကြား ချစ်ကြည်ရေးခရီးစဉ်များ အပြန်အလှန်လည်ပတ်ရေးဆိုင်ရာ ကိစ္စရပ်များကို ရင်းနှီးပွင့်လင်းစွာ အမြင်ချင်းဖလှယ်ဆွေးနွေးခဲ့ကြကြောင်း သတင်းရရှိသည်။ 

Source: MOI

တစ်တန်လျှင် ငါးသိန်းဈေးဖြင့် လတ်တလော ပြည်ပမှ တင်သွင်းလာသောဘိလပ်မြေများကြောင့် မြင့်တက်နေသော ဘိလပ်မြေဈေးများ ပြန်လည်ကျဆင်းလာသော်လည်း ရေရှည်တွင် အရည်အသွေးနှင့် ဈေးနှုန်းပိုင်းအတွက် သေချာစွာ ပြန်လည်စိစစ်သင့်ကြောင်း ဆောက်လုပ်ရေးလုပ်ငန်းရှင်များအကြား ဝေဖန်မှုများထွက်ပေါ်နေသည်။

“ဘိလပ်မြေ ပါမစ်ဈေးမှာကတည်းက တစ်တန်ကို ငါးသိန်းတန်ပါကြောင်း၊ တစ်တန်ကို အိတ်နှစ်ဆယ် ရှိသောကြောင့် တစ်အိတ်ကို နှစ်သောင်းခွဲ ဈေးပေါက်ပါကြောင်း၊ နိုင်ငံခြားက တင်သွင်းလာသည့် သွင်းကုန်ပါမစ်ဈေးတောင် ပြန် မရသည့်ဈေးဖြင့် ‌ရောင်းနေခြင်းဖြစ်ပါကြောင်း၊ ယခုဆိုဈေးကွက်ထဲတွင် တစ်အိတ်ကို နှစ်သောင်းနှစ်ထောင်နှုန်းဖြင့် ပြန်ရောင်းနေသည်များ ရှိလာသဖြင့် ထိုဘိလပ်မြေများ၏ အရည်အသွေးက စံချိန်မီလားဆိုသည်ကို သက်ဆိုင်ရာ က စစ်ဆေးသင့်ပါကြောင်း” ရန်ကုန်မြို့ တောင်ဥက္ကလာပမြို့နယ်ရှိ ကန်ထရိုက်တစ်ဦးကTheStateman သို့ပြောသည်။
ဖေဖော်ဝါရီလပိုင်းအတွင်းက ပြည်တွင်းရှိဘိလပ်မြေစက်ရုံများ ထုတ်လုပ်မှုကျဆင်းလာရာမှတစ်ဆင့် ဘိလပ်မြေ ဈေးများ အဆမတန်မြင့်တက်ခဲ့ရာ ဘိလပ်မြေ တစ်အိတ်လျှင် သုံးသောင်းခွဲအထိ မြင့်တက်ခဲ့ခြင်းဖြစ်သည်။

သက်ဆိုင်ရာက ကော့သောင်းနယ်စပ်မှတစ်ဆင့် ဘိလပ်မြေများ ရန်ကုန်သို့ တင်သွင်းခွင့်ပြုခဲ့ရာ လတ်တလောတွင် ဘိလပ်မြေဈေးကျဆင်းသွားသည်။ ဘိလပ်မြေဈေးကျဆင်းမှုသည် ရေရှည်အနေအထားဖြစ်ရန် လိုအပ်ချက်များရှိနေကြောင်းနှင့် အရည်အသွေးပိုင်း သေချာစွာစိစစ်ရန် လိုအပ်ကြောင်း သိရသည်။ “ပြည်တွင်းထုတ် လူရိုင်းခေါင်း တံဆိပ်အယ်ဖာ ဘိလပ်မြေက ယခုဆိုရင် တစ်အိတ်ကို တစ်သောင်း ကိုးထောင်အထိပြန်ကျသွားပါကြောင်း၊ တကယ်ဆိုရင် ဘိလပ်မြေဈေးက ဘာကြောင့်ဒီလောက်ဈေးတက်ပြီးမှ ပြန်ကျသလဲဆိုသည်မှာ အံသြစရာကောင်း၍ လက်ဝါးကြီး အုပ်ပြီးဈေးကွက်ကို လိုသလိုခြယ်လှယ်နေသည့်သူများကို သေချာစိစစ်သင့်ပါကြောင်း” ဆောက်လုပ်ရေး လောကသား တစ်ဦးက ဆိုသည်။ ပြည်တွင်းတွင် ပုဂ္ဂလိကပိုင် ဘိလပ်မြေ စက်ရုံ (၁၆) ရုံ နှင့် နိုင်ငံပိုင် ဘိလပ်မြေစက်ရုံ (၃)ရုံရှိပြီး အဆိုပါစက်ရုံများ စက်စွမ်းအားပြည့်လည်ပတ်ပါက ဘိလပ်မြေတန်ချိန် (၁၆) သန်းခန့် ထုတ်လုပ်နိုင်ကြောင်းသိရသည်။ လက်ရှိပြည်တွင်း အသုံးပြုနေသည့် ဘိလပ်မြေသည် တစ်နှစ်လျှင် တန်ချိန် (၁ဝ) သန်းနှင့် (၁၁)သန်း ကြား ရှိကြောင်း သိရသည်။ ရန်ကုန်မြို့တွင်သာ ပြည်ပမှ တင်သွင်းသောဘိလပ်မြေများကြောင့် ဈေးနှုန်းများ ကျဆင်းလာသော်လည်း နယ်မြို့များတွင် ဈေးနှုန်းကျဆင်းခြင်းမရှိဘဲ မြင့်တက်နေဆဲဖြစ်ကြောင်းသိရသည်။

ကိုးကား-NP News

ထိုင်းလေကြောင်းစီမံခန့်ခွဲမှုအာဏာပိုင် (CAAT) သည် ထိုင်းလေယာဉ်မှူးများအသင်းက အစိုးရကို တရားစွဲဆိုပြီးနောက် ပြည်တွင်း လေကြောင်းလိုင်း များတွင် နိုင်ငံခြားလေယာဉ်မှူးများ လုပ်ကိုင်ခွင့်ပြုသည့် ယာယီ ခွင့်ပြုချက်ကို ဆက်လက်တိုးမြှင့်မည်မဟုတ်ကြောင်း ထုတ်ပြန်ခဲ့သည်။

CAAT သည် အလုပ်လက်မဲ့ဖြစ်နေသော ဒေသခံလေယာဉ်မှူးများ အလုပ်ရရှိရေးတွင် ကြုံတွေ့နေရသည့် အခက်အခဲများကို အသိအမှတ်ပြုခဲ့ပြီး ၎င်းတို့ကိုကူညီပေးရန် ကတိပြုခဲ့ကြောင်း ထိုင်းလေယာဉ်မှူးများအသင်း ဥက္ကဋ္ဌ ဒေါက်တာ တီရာဝပ် အန်ကဆာကုလီယက်၏ ပြောကြားချက်ကို ကိုးကား၍ South China Morning Post သတင်းစာက ဖော်ပြခဲ့သည်။

တီရာဝပ်က အသင်းအနေဖြင့် CAAT ၏ ယခုနှစ်အတွင်း ဤအစီအမံကို ရပ်ဆိုင်းမည်ဟူသော အာမခံချက်နှင့် ဒေသခံလေယာဉ်မှူးများအတွက် ထောက်ပံ့မှုတို့ကို ကြိုဆိုကြောင်း ပြောကြားခဲ့သည်။

ထိုင်းလေယာဉ်မှူးများအသင်းသည် လွန်ခဲ့သည့်သီတင်းပတ်က နိုင်ငံခြားလေယာဉ်မှူးများအား ပြည်တွင်းလေကြောင်းလိုင်းများတွင် အလုပ်လုပ်ကိုင်ခွင့်ကို တားမြစ်ပေးရန် တောင်းဆိုသည့် လျှောက်လဲချက်ကို ထိုင်းအလုပ်သမားဝန်ကြီးဌာနထံ တင်ပြတောင်းဆိုခဲ့သည်။ ထိုင်းသတင်းစာ The Nation ၏ ဖော်ပြချက်အရ ခရီးသွားလုပ်ငန်း တိုးတက်မှုကို ဖြည့်ဆည်းပေးနိုင်ရန် ၂၀၂၄ ခုနှစ်၊ ဒီဇင်ဘာလက ဝန်ကြီးချုပ်ရုံး၏ ဆုံးဖြတ်ချက်ဖြစ်သည့် နိုင်ငံခြားလေယာဉ်မှူးများအား ထိုင်းနိုင်ငံတွင် ယာယီခွင့်ပြုချက်ဖြင့် wet lease သဘောတူညီချက်များအရ အလုပ်ခန့်ထားရန် ခွင့်ပြုခဲ့ခြင်းအပေါ် စိန်ခေါ်မှုတစ်ရပ် ဖြစ်စေခဲ့သည်ဟု ဆိုသည်။

ကိုးကား-VN Express

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

လန်ဒန် Heathrow လေဆိပ်အနီးတွင် မီးလောင်မှုဖြစ်ပွားခဲ့ခြင်းကြောင့် ဓာတ်အားပြတ်တောက်မှုဖြစ်ပွားပြီး ကမ္ဘာ့ခရီးသည် အဝင်အထွက် အများဆုံးလေဆိပ်များထဲမှ တစ်ခုဖြစ်သော Heathrow လေဆိပ်ကို လုံးဝပိတ်သိမ်းထားရကြောင်း ကြေညာခဲ့သည်။

Heathrow လေဆိပ်ပိတ်သိမ်းမှုသည် ခရီးသည် သောင်းနှင့်ချီပြီး နှောင့်နှေး ကြန့်ကြာစေနိုင်ကာ လေယာဉ်ခရီးစဉ် ၁,၃၀၀ ကျော်ကို ထိခိုက်စေမည် ဟု မျှော်မှန်းထားသည်။ လေကြောင်းလိုင်းဆိုင်ရာစီမံခန့်ခွဲမှုကုမ္ပဏီ တစ်ခု က ခရီးသည် ၁၄၅,၀၀၀ ကျော် ထိခိုက်နိုင်ကြောင်း ခန့်မှန်းခဲ့သည်။

လေဆိပ်က လာမည့်ရက်များအတွင်း ခရီးစဉ်နှောင့်နှေးမှုများ ဆက်လက် ဖြစ်ပွားနိုင်ကြောင်း သတိပေးထားသည်။ Heathrow လေဆိပ်တာဝန်ရှိ သူများက လေဆိပ်ပြန်မဖွင့်မီအချိန်ထိ လေဆိပ်သို့ လာရောက်ခြင်း မပြုကြရန်နှင့် ပိုမိုသိရှိလိုပါက သက်ဆိုင်ရာလေကြောင်းလိုင်းများကို ဆက်သွယ်ရန် အကြံပြုထားသည်။

မီးသတ်သမားများက ဓာတ်အားခွဲရုံမီးလောင်မှုကို ငြှိမ်းသတ်နေစဉ် Heathrow လေဆိပ်အနီးရှိ အိမ်ရာအချို့တွင် ဓာတ်အားပြန်လည် ရရှိကြောင်း ပြောကြားခဲ့သည်။

မီးလောင်မှု၏ အကြောင်းရင်းကို စုံစမ်းစစ်ဆေးဆဲဖြစ်ကြောင်း မီးသတ်ဌာန၏ပြောကြားချက်အရ သိရသည်။

ကိုးကား-CNN

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဗီယက်နမ်၏ မိုဘိုင်းအင်တာနက်အမြန်နှုန်းသည် ဖေဖော်ဝါရီလတွင် 144 Mbps သို့ ရောက်ရှိခဲ့ပြီး ပထမဆုံးအကြိမ်အဖြစ် ကမ္ဘာ့ထိပ်တန်း မိုဘိုင်းအင်တာနက်အမြန်နှုန်း အမြင့်ဆုံး နိုင်ငံ ၂၀ စာရင်းတွင် ပါဝင်လာ ခဲ့ပြီး Broadband အမြန်နှုန်းနှင့် နီးစပ်လာခဲ့သည်။

ကမ္ဘာလုံးဆိုင်ရာ အင်တာနက်အမြန်နှုန်းများကို စာရင်းပြုစုလျက်ရှိသော Ookla ၏အချက်အလက်များအရ Vietnam သည် အဆင့် ၁၉ တွင် ရပ်တည်နေပြီး အိန္ဒိယ၊ ဖင်လန်နှင့် ပြင်သစ်တို့ကို ကျော်တက်သွားခဲ့သည်။

ယူအေအီးသည် 543.91 Mbps ဖြင့် မိုဘိုင်းအင်တာနက်အမြန်နှုန်းတွင် ဦးဆောင်နေဆဲဖြစ်ပြီး စင်္ကာပူသည် 345.33 Mbps ဖြင့် Broadband အမြန်နှုန်းတွင် ထိပ်ဆုံးမှ ရပ်တည်နေသည်။

5G ကွန်ယက်စနစ်ကို Viettel မှ ၂၀၂၄ ခုနှစ်၊ အောက်တိုဘာလ နှင့် VinaPhone မှ ၂၀၂၄ ခုနှစ်၊ ဒီဇင်ဘာလတွင် စတင်မိတ်ဆက်ခဲ့ခြင်းတို့သည် အချိန်ကြာမြင့်စွာ ရပ်တန့်နေခဲ့သည့် အင်တာနက် အမြန်နှုန်းများ အရှိန်မြင့်တက်လာခြင်းကို အဓိကအထောက်အကူပြုခဲ့သည်။ ၂၀၂၄ ခုနှစ်၊ စက်တင်ဘာလတွင် Vietnam ၏ မိုဘိုင်းအင်တာနက်အမြန်နှုန်းမှာ 54.17 Mbps နှင့် ကမ္ဘာ့အဆင့် ၅၁ ဖြစ်ခဲ့သော်လည်း ခြောက်လအတွင်း သုံးဆနီးပါး တိုးတက်လာခဲ့ခြင်းဖြစ်သည်။

ဗီယက်နမ်၏ သိပ္ပံနှင့်နည်းပညာဝန်ကြီးဌာနမှ iSpeed ဖြင့် စမ်းသပ်တွေ့ရှိချက်များအရ ယင်းအင်တာနက်အမြန်နှုန်းကို အတည်ပြုခဲ့ပြီး ဗီယက်နမ်၏ 5G Download Speed ကို ဖေဖော်ဝါရီလတွင် 187.58 Mbps အဖြစ် မှတ်တမ်းတင်ခဲ့သည်။ Viettel သည် ပျမ်းမျှ 5G Download Speed 226.27 Mbps ဖြင့် ပြည်တွင်းအင်တာနက်ဝန်ဆောင်မှုများ၌ ဦးဆောင်နေပြီး VNPT သည် 157.17 Mbps ဖြင့် ဒုတိယနေရာတွင် ရပ်တည်နေသည်။

ကိုးကား-VN Express

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

ဂျိုဟန်နစ္စဘတ်  မတ် ၁၉

တောင်အာဖရိကနိုင်ငံသည် ၂၀၂၅ ခုနှစ် စက်တင်ဘာ ၂၄ ရက်ကို အမျိုးသားသစ်ပင်စိုက်ပျိုးရေးနေ့အဖြစ် သတ်မှတ်ပြီး ရာသီဥတုဖောက်ပြန်ပြောင်းလဲမှုကို တိုက်ဖျက်ရန် တစ်ရက်အတွင်း သစ်ပင်တစ်သန်း စိုက်ပျိုးသွားရန် ရည်မှန်းလုပ်ဆောင်လျက်ရှိကြောင်း တောင်အာဖရိက အကြီးတန်း အရာရှိတစ်ဦးက မတ် ၁၈ ရက်တွင် ပြောသည်။ 

တောင်အာဖရိကနိုင်ငံ၏ အကြီးမားဆုံးမြို့နှင့် စီးပွားရေးအချက်အချာမြို့ဖြစ်သော ဂျိုဟန်နစ္စဘတ်မြို့တွင် ကျင်းပသည့် ဒုတိယအကြိမ် အာဖရိကမြို့ပြသစ်တောဆိုင်ရာ ဖိုရမ်တွင် သစ်တော၊ ငါးလုပ်ငန်းနှင့် သဘာဝပတ်ဝန်းကျင်ရေးရာ ဒုတိယဝန်ကြီး ဘာနိုက်စ်ဆဝတ်စ်က မတ် ၁၈ ရက်တွင် ကြေညာခဲ့သည်။ အဆိုပါဖိုရမ်ကို ဂျိုဟန်နစ္စဘတ်မြို့တော်နှင့် ကုလသမဂ္ဂစားရေရိက္ခာနှင့် စိုက်ပျိုးရေးအဖွဲ့ (အက်ဖ်အေအို) တို့ ပူးပေါင်းကျင်းပခဲ့ခြင်းဖြစ်သည်။

တောင်အာဖရိကနိုင်ငံသည် သဘာဝပတ်ဝန်းကျင်ထိန်းသိမ်းရေး လှုပ်ရှားမှုမှတစ်ဆင့် ကင်ညာနိုင်ငံတစ်ဝန်း သစ်ပင်ပေါင်း ၅၁ သန်းကျော်စိုက်ပျိုးကာ နိုဘယ်ငြိမ်းချမ်းရေးဆုရရှိခဲ့သော ဝန်ဂါနီမာသာရီထံမှ ထိုကဲ့သို့ လုပ်ဆောင်ရန် စိတ်ကူးစိတ်သန်းများကို ရရှိခဲ့ကြောင်း ၎င်းက ရှင်းပြခဲ့သည်။ 

ကိုးကား : မြန်မာ့အလင်းသတင်းစာ

Photo: News24

ရုရှားနိုင်ငံသည်  ယူကရိန်းနိုင်ငံနှင့် နှိုင်းယှဉ်ပါက မြေရှားသတ္တု အများအပြားကို ပိုင်ဆိုင်ထားပြီး  အဆိုပါသတ္တုများ ထုတ်ယူရေးတွင် အမေရိကန်နှင့်သာမက အခြားနိုင်ငံများနှင့်လည်း ပူးပေါင်းဆောင်ရွက်နိုင်သည်ဟု ရုရှားသမ္မတ ဗလာဒီမာပူတင်၏ အထူးသံတမန်ဖြစ်သူ   ကီရေး ဒီမီထရီယက်က ပြောသည်။

နိုင်ငံအတွင်းရှိ  မြောက်မြားစွာသော မြေရှားသတ္တု အရန်တွင်းများအား ထုတ်လုပ်ရန်အတွက် ပူးပေါင်းဆောင်ရွက်မှုများ လုပ်ဆောင်မည်ဟု ရုရှားသမ္မတ ဗလာဒီမာပူတင်က ရှင်းလင်းစွာ ပြောကြားခဲ့ပြီးဖြစ်ကြောင်း၊ ထိုသို့ထုတ်ယူရန်အတွက်လည်း ရုရှားနိုင်ငံက အမေရိကန်နှင့်သာမက အခြားနိုင်ငံများနှင့်လည်း ပူးပေါင်းဆောင်ရွက်မည်ဖြစ်ကြောင်း  ရင်းနှီးမြှုပ်နှံမှုနှင့် စီးပွားရေးပူးပေါင်း ဆောင်ရွက်မှုဆိုင်ရာ ရုရှားသမ္မတ၏ အထူးသံတမန် ကီရေး ဒီမီထရီယက်က   မတ်လ ၁၈ ရက်တွင် ပြောကြားခြင်းဖြစ်သည်။

လက်ရှိတွင် အမေရိကန်အစိုးရသည် ရုရှားနှင့် မြေရှားသတ္တုကဏ္ဍ၊ အာတိတ်ဒေသ ပူးပေါင်းဆောင်ရွက်မှုအပါအဝင် ကဏ္ဍအများအပြား၌ ပူးပေါင်း လုပ်ဆောင်ရန် စိတ်ဝင်စားလျက်ရှိသည်။

ထို့ကြောင့် ထရမ့်ဦးဆောင်သည့် အမေရိကန်အစိုးရသည် ယခင်ဂျိုးဘိုင်ဒင် လက်ထက်က ယိုယွင်းခဲ့သည့် ရုရှားနိုင်ငံနှင့် ဆက်ဆံရေးအား ပြန်လည်ကောင်းမွန် တိုးတက်စေရန်အတွက် ကြိုးပမ်းနေခြင်း ဖြစ်ကြောင်း သိရသည်။

Source: https://myawady.net.mm/

ကူဝိတ်စီးတီး၊ မတ် ၁၉ ရက် 

အစ္စရေးက ဂါဇာကမ်းမြောင်ဒေသ၌ အကြီးစားလေကြောင်းတိုက်ခိုက်မှု လုပ်ဆောင်ခဲ့သဖြင့် ဟူသီလက်နက်ကိုင် အဖွဲ့သည် “အဆင့်အမြင့်ဆုံး အဆင့်မြှင့်လှုပ်ရှားမှု” ဖြင့် အစ္စရေးအား တိုက်ခိုက်သွားမည်ဟု ယီမင် ဟူသီ လက်နက်ကိုင် အဖွဲ့ခေါင်းဆောင် Abdul Malik Houthi က မတ် ၁၈ ရက် ညပိုင်းတွင် ထုတ်ပြန်ခဲ့သည်။

ဟူသီလက်နက်ကိုင်အဖွဲ့သည် “အဆင့်အမြင့်ဆုံး အဆင့်မြှင့်လှုပ်ရှားမှု” အား ပြန်လည်ဖော်ဆောင်သွားမည်ဖြစ်ပြီး အစ္စရေးအား အစွမ်းကုန်တိုက်ခိုက်သွားမည်ဖြစ်ကြောင်း၊ တစ်ချိန်တည်းတွင် ယင်းကြောင့် “ဖြစ်ပွားလာနိုင်သော အမေရိကန်၏ ယီမင်အပေါ် ကျူးကျော်မှု” ကိုလည်း ရင်ဆိုင်သွားမည်ဖြစ်ကြောင်း Abdul Malik Houthi က ထိုနေ့၌ အဆိုပါအဖွဲ့အစည်းထိန်းချုပ်ထားသည့် Al Masirah ရုပ်သံလွှင့်ဌာနမှတစ်ဆင့် ရုပ်သံမိန့်ခွန်းတွင် ထည့်သွင်းပြောကြားခဲ့သည်။
အစ္စရေး၏ Nevatim လေတပ်အခြေစိုက်စခန်းအား တိုက်ခိုက်ရန် “ဟိုက်ပါဆိုးနစ် ပဲ့ထိန်းဒုံးကျည်” တစ်လုံး ပစ်လွှတ်ခဲ့ကြောင်း ဟူသီလက်နက်ကိုင်က ထိုနေ့တွင် ထုတ်ပြန်ကြေညာခဲ့သည်။ အစ္စရေးစစ်တပ်က ထိုနေ့ညပိုင်း၌ ယီမင်မှပစ်လွှတ်သော ပဲ့ထိန်းဒုံးကျည်တစ်လုံးအား အောင်မြင်စွာ တားဆီးနိုင်ခဲ့ကြောင်း အစ္စရေးကာကွယ်ရေးတပ် က ထိုနေ့တွင် ကြေညာချက်ထုတ်ပြန်ခဲ့သည်။

အမေရိကန် စစ်တပ်က မတ် ၁၈ ရက်တွင် ယီမင်နိုင်ငံမြောက်ပိုင်း Saada ပြည်နယ်၊ အနောက်မြောက်ပိုင်းရှိ Hajjah ပြည်နယ်၊ အနောက်ပိုင်းရှိ Al Hudaydah ပြည်နယ် စသည့်ဒေသများအား ထပ်မံလေကြောင်း တိုက်ခိုက်မှု လုပ်ဆောင်ခဲ့ကြောင်း Al Masirah ရုပ်သံလွှင့်ဌာန သတင်းဖော်ပြချက်အရ သိရသည်။

အစ္စရေးစစ်တပ်သည် မတ် ၁၈ ရက်တွင် ဂါဇာကမ်းမြောင်ဒေသရှိ နေရာအများအပြားအား လေကြောင်းတိုက်ခိုက်မှု လုပ်ဆောင်ခဲ့သည်။ အစ္စရေးစစ်တပ်၏ ထိုနေ့တွင် ဂါဇာကမ်းမြောင်ဒေသရှိ နေရာအများအပြားအား လေကြောင်း တိုက်ခိုက်မှုကြောင့် လူ ၄၁၂ ဦးထက်မနည်း သေဆုံးခဲ့ပြီး အခြား လူ ၅၀၀ ကျော် ဒဏ်ရာရရှိခဲ့ကြောင်း ပါလက် စတိုင်း ဂါဇာကမ်းမြောင်ဒေသ ကျန်းမာရေးဌာန၏ မတ် ၁၈ ရက်တွင် ထုတ်ပြန်သော ကြေညာချက်အရ သိရသည်။ ကိုးကား-ဆင်ဟွာ

ဆရာဝန်များက ရှစ်နှစ်အရွယ် Sama Tubail သည် ၂၀၂၃ ခုနှစ်တွင် အစ္စရေး၏ စစ်ရေးတိုက်ခိုက်မှုစတင်ချိန်မှစ၍ သူမခံစားခဲ့ရသော စိတ်ဒဏ်ရာကြောင့် သူမ၏ဆံပင်အားလုံးနီးပါးဆုံးရှုံးခဲ့ရသည်ဟု ဆိုသည်။ ကုလသမဂ္ဂက“မျိုးဆက်တစ်ခုလုံး စိတ်ဒဏ်ရာရခဲ့ပြီ” ဟုဆိုကာ Gaza ရှိ ကလေး ၁.၂ သန်း၏ အားလုံးနီးပါးသည် စိတ်ပိုင်းဆိုင်ရာ ပံ့ပိုးမှုများ လိုအပ်နေသည်ဟု ဆိုသည်။ အစ္စရေးသည် မတ်လ ၁၈ ရက်(အင်္ဂါ) နေ့ တွင် တိုက်ခိုက်မှုအသစ်များစတင်ခဲ့ပြီး စစ်ပြေငြိမ်းရေးကိုချိုးဖျက်ကာ ပါလက်စတိုင်း ရာနှင့်ချီသေဆုံးစေခဲ့သည်ဟု Gaza ကျန်းမာရေးအရာရှိ များက ဆိုသည်။

Gaza ရှိ ပဋိပက္ခများသည် ဒေသခံများ၏ ရုပ်ပိုင်းဆိုင်ရာနှင့် စိတ်ပိုင်းဆိုင်ရာ ကျန်းမာရေးကို ပြင်းထန်စွာ ထိခိုက်စေခဲ့ပါသည်။ အထူးသဖြင့် ကလေးငယ်များတွင်ပိုမိုထိခိုက်စေပြီး ဆရာဝန်များက ဆက်လက် ဖြစ်ပွားနေသော အကြမ်းဖက်မှုများကြောင့် ပြင်းထန်သည့် စိတ်ဖိစီးမှုနှင့် စိတ် ဒဏ်ရာများကို ခံစားနေရသောကလေးများ၏ ဖြစ်ရပ်များကို မှတ်တမ်းတင်ခဲ့ကြပါသည်။ ဤအချင်းအရာများသည် ဆံပင်ကျွတ်ခြင်းကဲ့သို့ရုပ်ပိုင်းဆိုင်ရာ လက္ခဏာများအဖြစ်ပြသနိုင်ပြီး ၎င်းအခြေအနေကို Telogen effluvium ဟုခေါ်ကာ စိတ်ဖိစီးမှု၊ အာဟာရချို့တဲ့မှု သို့မဟုတ် စိတ်ပိုင်းဆိုင်ရာဒဏ်ရာများကြောင့် ဖြစ်ပေါ်တတ်ပါသည်။ ဤသို့သော ဖြစ်စဉ်များသည် Gaza ကဲ့သို့ စစ်ပွဲဒဏ်ခံနေရသည့် ဒေသများ၌ မကြာ ခဏ ဖြစ်ပွားနေတတ်ပါသည်။

လုံခြုံသည့် ပတ်ဝန်းကျင်ဆုံးရှုံးမှု၊ အကြမ်းဖက်မှုများကို မပြတ်ကြုံတွေ့ နေရမှု၊ လုံလောက်သော အာဟာရနှင့် ကျန်းမာရေးစောင့်ရှောက်မှုများ မရရှိနိုင်ခြင်းတို့သည် ကျန်းမာရေးပြဿနာများကို ပိုမိုဆိုးရွားစေပါသည်။ 

ကိုးကား-CNN

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂