မက်ဒရစ် ဇူလိုင် ၁၅ 
စပိန်နိုင်ငံတွင် အပူလှိုင်းကြောင့် သေဆုံးသူဦးရေ ၁၁၈၀ ထိရှိလာကြောင်း သဘာဝပတ်ဝန်းကျင်ထိန်းသိမ်းရေး၀န်ကြီး ဌာနက ဇူလိုင် ၁၄ ရက်တွင် ထုတ်ပြန်ခဲ့သည်ဟု ယနေ့သတင်းများအရ သိရသည်။

မေ ၁၆ ရက်မှ ဇူလိုင် ၁၃ ရက် အတွင်း အပူချိန်မြင့်တက်မှုကြောင့် စပိန်နိုင်ငံတွင် လူဦးရေ ၁၁၈၀ သေဆုံးခဲ့ပြီး ၂၀၂၄ခုနှစ် အလားတူကာလက ၁၁၄ ဦး သေဆုံးမှုနှင့်နှိုင်းယှဉ်ပါက သိသိသာသာ တိုးလာကြောင်း၊ သေဆုံးသူအများစုမှာ အသက် ၆၅ နှစ် အထက်ဖြစ်ပြီး ထက်ဝက်ကျော်မှာ

အမျိုးသမီးများ ဖြစ်ကြောင်း၊ ထိခိုက်မှုအရှိဆုံး ဒေသများမှာ နိုင်ငံမြောက်ပိုင်းရှိ Galicia၊ La Rioja၊ Asturias နှင့် Cantabria မြို့တို့ဖြစ်ကြောင်း သိရသည်။

စပိန်နိုင်ငံတွင် ဇူလိုင်လ ပထမပတ်တွင် သေဆုံးမှု အရေအတွက် သိသိသာသာ တိုးလာခဲ့ပြီး ထိုအရေအတွက်သည် မကြုံစဖူး အရေအတွက်ဖြစ်သည့်အတွက် လက်ရှိအချိန်တွင် အနီရောင်သတိပေးချက် ၇၆ ခု ထုတ်ပြန်ခဲ့သည်ဟု အဆိုပါ ဝန်ကြီးဌာနကထုတ်ပြန်ခဲ့ကြောင်း သိရသည်။

Ref: Sputnik News

Trs: KZ

YDNB Newspaper
 

ကျောက်ဆည်၊ ဇူလိုင်-၁၆

မန္တလေးတိုင်းဒေသကြီး၊ ကျောက်ဆည်ခရိုင်၊ ကျောက်ဆည်မြို့နယ်တွင် ပန်းခင်းစီမံချက်အဆင့်(၃)ဖြင့် ကျောင်းသား၊ ကျောင်းသူများအား နိုင်ငံသားစိစစ်ရေးကတ်ပြားများ ပြုလုပ်ပေးခြင်းကို ယနေ့နံနက်ပိုင်းက အမှတ်(၁)အခြေခံပညာအထက်တန်းကျောင်း ဧရာဝတီကျောင်းဆောင်တွင် ပြုလုပ်ပေးခဲ့ကြောင်း သိရသည်။

နိုင်ငံသားစိစစ်ရေးကတ်ပြားများ ပြုလုပ်ပေးရာသို့ ကျောက်ဆည်ခရိုင်စီမံအုပ်ချုပ်ရေးအဖွဲ့ဥက္ကဋ္ဌ ဦးကောင်းမြတ်နိုင်၊ မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးထိုက်ထိုက်ဇော်နှင့်အဖွဲ့ဝင်များ၊ လူဝင်မှုကြီးကြပ်ရေးနှင့် ပြည်သူ့အင်အား ဝန်ကြီးဌာန မြို့နယ်ဦးစီးမှူး ဦးအောင်ထားရွှေနှင့် ဒုတိယမြို့နယ်ပညာရေးမှူး ဦးညွှန့်ဝင်းတို့က လုပ်ငန်းများ ဆောင်ရွက်ရာ၌ အခက်အခဲမရှိစေရေး ကွင်းဆင်းကြည့်ရှု ဖြည့်ဆည်းပေးခဲ့ကြောင်း သိရသည်။

နိုင်ငံသားစိစစ်ရေးကတ်ပြားများ ပြုလုပ်ပေးရာတွင် ကျောင်းသား၊ ကျောင်းသူ(၂၄၁)ဦးအား ပန်းခင်းစီမံချက်ဖြင့် ဆောင်ရွက်ပေးလျက်ရှိရာ ကျောင်းအုပ်ဆရာမကြီး ဒေါ်ညိုညိုအေးနှင့် ဆရာ၊ ဆရာမများမှ ပူးပေါင်းဆောင်ရွက် ပေးလျက်ရှိကြောင်းနှင့် နေ့ချင်းပြီးပြုလုပ်ပေးသည့် နိုင်ငံသားစိစစ်ရေးကတ်များအား ခရိုင်စီမံအုပ်ချုပ်ရေးအဖွဲ့ ဥက္ကဋ္ဌ ဦးကောင်းမြတ်နိုင်နှင့် တာဝန်ရှိသူများက ကျောင်းသား၊ ကျောင်းသူများ၏ လက်ဝယ်အရောက်ပေးအပ် ခဲ့ကြောင်းနှင့် UID ထုတ်ပေးခြင်းလုပ်ငန်းစဉ်များပါ တစ်ပြိုင်တည်းပြုလုပ်ပေးခဲ့ကြောင်း သိရသည်။

သက်မောင်(ကျောက်ဆည်)

အော့တဝါ ဇူလိုင် ၁၅ 
ကနေဒါနိုင်ငံတွင် ပြင်းထန်သော အပူချိန်ကြောင့် Environment Canada မှ သဘာဝပတ်ဝန်းကျင်ဆိုင်ရာ တာဝန်ရှိသူများ က အပူချိန်သတိပေးချက်များ ထုတ်ပြန်ခဲ့ကြောင်း ယနေ့သတင်းများအရ သိရသည်။

Environment Canada ၏ အစီရင်ခံစာအရ အွန်တာရီယိုပြည်နယ်၊ ကွီဘက်ပြည်နယ်၊အတ္တလန် တိတ်ပြည်နယ်၊ တော်ရွန်တိုမြို့၊ အော့တဝါမြို့၊ မွန်ထရီရယ်မြို့ များအပါအဝင် အခြားမြို့နှင့် ပြည်နယ်အများအပြားတွင် ဇူလိုင် ၁၄ ရက်နေ့လယ်ပိုင်းတွင် အပူချိန် သတိပေးချက် အများအပြားကို ထုတ်ပြန်ခဲ့ရကြောင်း သိရသည်။ အပူချိန် သတိပေးချက်များ အရ ထိုပြည်နယ်နှင့် မြို့ကြီးများတွင် နေ့အပူချိန်သည် ပုံမှန်အပူချိန် ၃၅  ဒီဂရီစင်တီဂရိတ်မှ ၄၂ ဒီဂရီစင်တီဂရိတ်ထိ မြင့်မားနိုင် ပြီး အဆိုပါအခြေအနေသည် ဇူလိုင် ၁၇ ရက်ထိ ဖြစ်ပေါ်နိုင်ကြောင်း နိုင်ငံပိုင် မိုးလေဝသဌာန ကခန့်မှန်းထားသည်။

အပူလွန်ကဲမှုက လူတိုင်းရဲ့ ကျန်းမာရေးကို ထိခိုက်စေနိုင်ပါ တယ်။ သက်ကြီးရွယ်အိုတွေ၊ ကလေးတွေနဲ့ ပြင်ပမှာ အလုပ် ထွက်လုပ်ရသူတွေ အထူးဂရုစိုက်ရမဲ့ အခြေအနေဖြစ်တာကြောင့်အခုလိုသတိပေးချက်တွေ ထုတ်ပြန်ခဲ့ရတာပါ”ဟု Environment Canada သဘာဝပတ်ဝန်းကျင်ဆိုင်ရာ တာဝန်ရှိသူများက ပြောကြားခဲ့ကြောင်း သိရသည်။

Ref: Sputnik News

Trs: KZ

YDNB Newspaper
Photo - CBC

ဂျကာတာ ဇူလိုင် ၁၅
အင်ဒိုနီးရှားနိုင်ငံ မင်တာဝေ ကျွန်းစု ကမ်းလွန်ရေပြင်အတွင်း ဇူလိုင် ၁၄ ရက်က အမြန်ရေယာဉ် တစ်စီးတိမ်းမှောက်ခဲ့ရာ ကလေး သုံးဦးအပါအဝင် ၁၁ ဦးပျောက်ဆုံး နေကြောင်း သိရသည်။

ယင်း အမြန်ရေယာဉ်သည် ခရီးသည် ၁၆ ဦး၊ ရေယာဉ်၀န်ထမ်း နှစ်ဦးတို့နှင့်အတူ မင်တာဝေကျွန်း ဆီကာကတ်မြို့ဆိပ်ကမ်းမှစတင် ထွက်ခွာခဲ့ပြီးနောက် ဆီပိုရာ ရေလက်ကြားရေပြင်၌ တိမ်းမှောက်ခဲ့ခြင်းဖြစ်သည်။

ရေယာဉ် တိမ်းမှောက်ခဲ့ပြီးနောက် ကယ်ဆယ်ရေးသမားများက ရေယာဉ်ဝန်ထမ်းနှစ်ဦး အပါအဝင် လူပေါင်း ခုနစ်ဦးကို ကယ်တင်နိုင်ခဲ့ကြောင်း သိရသည်။

ယင်း အမြန်ရေယာဉ်ငယ်သည်  မုန်တိုင်းတိုက်ခတ်နေစဉ် လှိုင်းရိုက်မှုကြောင့် တိမ်းမှောက်ခဲ့ရခြင်းဖြစ်ကြောင်း အသက်ရှင် ကျန်ရစ်သူများက ပြောကြားခဲ့သည်။

လက်ရှိအချိန်တွင် အင်ဒိုနီးရှား ရှာဖွေကယ်ဆယ်ရေးသမားက ဒေသခံရေလုပ်သားများအကူအညီဖြင့် ပျောက်ဆုံးနေသူများကို ရှာဖွေနေဆဲဖြစ်သည်။

ကျွန်းပေါင်း ၁၇၀၀၀ကျော်ဖြင့် ဖွဲ့စည်းထားသည့် အင်ဒိုနီးရှားနိုင်ငံ၌ ရေလမ်းခရီးအသုံးများသည်နှင့်အမျှ ရေကြောင်း မတော်တဆမှုများလည်း မကြာခဏ ဖြစ်ပွားတတ်ကြောင်း သိရသည်။

Ref: Xinhua

Trs: KKO

YDNB Newspaper
 

မြန်မာနိုင်ငံတွင် လူဦးရေ (၅၂)သန်းရှိသည့်အနက် အသက် အာမခံထားသူ (၂)သန်းခန့်သာရှိကြောင်း မြန်မာ့အာမခံလုပ်ငန်းမှ ဦးဆောင်ညွှန်ကြားရေးမှူး ဒေါ်စန္ဒာဦးက ပြောသည်။

ထိုနည်းတူ ကုန်းလမ်းပို့ဆောင်ရေးနှင့် ညွှန်ကြားမှုဦးစီးဌာနတွင် အိမ်စီးကားစီးရေပေါင်း (၆)သိန်းကျော်ရှိသည့်အနက် (၄)သိန်းခန့်က ကားအာမခံထားခြင်းမရှိကြောင်း သိရသည်။

ဇူလိုင်လ (၁၃) ရက်က လမ်းမတော်မြို့နယ်ရှိ ကုန်သည်ကြီးများနှင့် စက်မှုလက်မှု လုပ်ငန်းရှင်များအသင်းချုပ် (UMFCCI)တွင် ကျင်းပသော အာမခံဆိုင်ရာဟောပြောပွဲတွင် ၎င်းက ပြောသည်။

လတ်တလောတွင် မန္တလေးငလျင်ကြီး လှုပ်ခဲ့ပြီးနောက်ပိုင်း ရန်ကုန်မြို့ရှိ ကွန်ဒိုများ ငလျင်အာမခံထားရှိမှု များပြားလာသည်ဟုလည်း မြန်မာ့အာမခံလုပ်ငန်းထံမှ သိရသည်။

ငလျင်ဖြစ်စဉ်ကြောင့် သဘာဝဘေး အာမခံထားရှိမှုအပေါ် ပြည်သူများက စိတ်ဝင်စားမှုမြင့်တက်လာခြင်း ဖြစ်သည်ဟုလည်း ဆိုသည်။

မြန်မာ့အာမခံ လုပ်ငန်းအနေဖြင့် ပြည်သူလူထု အာမခံအသိ ပညာတိုးပွားစေရန်၊ ပြည်သူလူထု၏ လိုအပ်ချက်နှင့် ကိုက်ညီသောအာမခံအမျိုးအစားများထီထွင်ရန် ၊ အာမခံကုမ္ပဏီများဝန်ဆောင်မှုများ ခေတ်မီတိုးတက်လာစေရန်၊ အာမခံပညာရှင်များ‌ မွေးထုတ်ရန်နှင့် အာမခံစနစ်အပေါ်ပြည်သူများအားကိုးယုံကြည်လာစေရန်တို့ဖြစ်ကြောင်း သိရသည်။

Popular Myanmar

ဟနွိုင်း ဇူလိုင် ၁၄
ဗီယက်နမ်နိုင်ငံသည် ရုပ်ကြွင်း လောင်စာသုံးမော်တော်ဆိုင်ကယ် များ ဟနွိုင်းမြို့လယ်၌ စီးနင်းခွင့် ကို ၂၀၂၆ ခုနှစ် ဇူလိုင်လတွင် စတင်ပိတ်ပင်မည် ဖြစ်ကြောင်း နိုင်ငံပိုင်မီဒီယာများက ယနေ့တွင် သတင်းထုတ်ပြန်ထားသည်။

လေထုညစ်ညမ်းမှုပြဿနာ လျှော့ချရေး ပြည်လုံးကျွတ် လှုပ်ရှားမှုအစီအစဉ်အရ ရုပ်ကြွင်းလောင်စာသုံးမော်တော်ဆိုင်ကယ်များ ဟနွိုင်းမြို့လယ်၌ မောင်းနှင် ခွင့်ကိုပိတ်ပင်ရန် ဗီယက်နမ်နိုင်ငံ က စီစဉ်ထားခြင်းဖြစ်သည်။
ဟနွိုင်းမြို့လယ်ပိုင်း၌ ရုပ်ကြွင်း လောင်စာသုံးမော်တော်ဆိုင်ကယ် များစီးနင်းမှုကို ပိတ်ပင်ရန် ဗီယက်နမ်ဝန်ကြီးချုပ် ဖမ်မင်ချင်း က ညွှန်ကြားထားခြင်းဖြစ်သည်။ ကျန်သည့်ဗီယက်နမ်မြို့များ ကဲ့သို့ပင် ဟနွိုင်းမြို့သူ၊ မြို့သား ရှစ်သန်းတို့အတွက် မော်တော် ဆိုင်ကယ်များသည် အဓိက သယ်ယူပို့ဆောင်ရေး ယာဉ်များ ဖြစ်ကြသည်။

ဟနွိုင်းမြို့၌ မော်တော်ယာဉ် အစီးရေမှာ တစ်သန်းကျော်မျှသာ ရှိပြီး မော်တော်ဆိုင်ကယ်အစီးရေ မှာ ခုနစ်သန်းနီးပါးရှိသည်။

ဗီယက်နမ်နိုင်ငံသည် လေထု ညစ်ညမ်းမှုပြဿနာကို လျှော့ချ ရေးအတွက် ရုပ်ကြွင်းလောင်စာ သုံးယာဉ်များကို လျှပ်စစ်စွမ်းအင် သုံးယာဉ်များဖြင့် အစားထိုးရန် ဆန္ဒရှိနေကြောင်း သိရသည်။

Ref: Xinhua

Trs: KKO

YDNB Newspaper
Photo- SCMP

တရုတ်နိုင်ငံမှ လေယာဉ်နှစ်စီး သည် အမြင့်အကွာဝေး မီတာ ၁၀၀ ခန့် သာ ကွာခြားပြီး ဆန့်ကျင်ဘက်လမ်းကြောင်းမှ ပျံသန်းခဲ့ကြောင်း သိရသည်။ လေကြောင်းလုံခြုံရေးသတ်မှတ်ချက်အရ အနည်းဆုံး မီတာ ၃၀၀ အကွာ မှ ပျံသန်းရမည်ဖြစ်သည်။

အဆိုပါဖြစ်စဉ်သည် ဇူလိုင်လ ၆ ရက်နေ့ညက ရုရှားနိုင်ငံ၊ တူဗာဒေသ လေကြောင်းနယ်နိမိတ်အတွင်း ဖြစ်ပွားခဲ့သော်လည်း၊ တရုတ်မီဒီယာ များက ဇူလိုင် ၁၄ ရက်နေ့မှသာ ထုတ်ဖော်ပြောဆိုခဲ့သည်။

ရှန်ဟိုင်းမှ မီလန်သို့ ပျံသန်းနေသော Air China ၏ CA967 ခရီးစဉ်သည် မီတာ ၁၀,၄၀၀ အမြင့်မှ ၁၁,၀၀၀ မီတာအထိ မြင့်တက်ပျံသန်းခဲ့သည်။ ထိုသို့ပျံသန်းမှုကြောင့် ဆန့်ကျင်ဘက်လမ်းကြောင်းမှ ပျံသန်းနေသော SF Airlines ၏ CSS128 ကုန်တင်လေယာဉ်နှင့် အမြင့်အကွာဝေး သိသိသာသာ နီးကပ်သွားခဲ့သည်။

လေကြောင်းခရီးစဉ်ခြေရာခံဝက်ဘ်ဆိုဒ် FlightRadar24 ၏ အချက်အလက် များအရ လေယာဉ်နှစ်စီးသည် မျက်နှာချင်းဆိုင်ပျံသန်းခဲ့ကြပြီး အမြင့် အကွာဝေးမှာ မီတာ ၉၀-၁၂၀ ခန့်သာ ရှိခဲ့သည်။ ၎င်းမှာ လုံခြုံရေးအတွက် သတ်မှတ်ထားသော အနည်းဆုံး မီတာ ၃၀၀ ထက် သိသိသာသာ နည်းနေခြင်း ဖြစ်သည်ဟု ဆိုသည်။

Air China လေယာဉ်မှူး မည်သည့်အတွက်ကြောင့် အမြင့်တက်ခဲ့သည်ကို ရှင်းရှင်းလင်းလင်း မသိရှိရသေးဘဲ ဒေသဆိုင်ရာ လေကြောင်း ထိန်းသိမ်းရေး (ATC) တာဝါမှ ထိုသို့အမြင့်တက်ရန် ညွှန်ကြားချက်မပေးထားခဲ့ဟု ဆိုသည်။

တရုတ်မီဒီယာများက လေယာဉ်မှူးသည် ညွှန်ကြားချက်ကို မှားယွင်း နားထောင် (သို့မဟုတ်) မှားယွင်းနားလည်ခဲ့ဟန်ရှိကြောင်း ဖော်ပြခဲ့သည်။ Air China ၊ SF Airlines နှင့် တရုတ် လေကြောင်းပြည်သူ့စီမံခန့်ခွဲမှုဌာန (CAAC)တို့မှ ယခုကိစ္စနှင့်ပတ်သက်၍ တရားဝင်ထုတ်ပြန်ခြင်း မပြုသေးပေ။

ကိုးကား VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

BRICS အဖွဲ့က အထိမ်းအမှတ် ငွေစက္ကူ ထုတ်ဝေခဲ့ကြောင်း RIA ၏ ဖော်ပြချက်အရ သိရှိရသည်။

အဆိုပါ BRICS ငွေစက္ကူသည် အဖွဲ့ဝင်နိုင်ငံများအကြား ဘက်ပေါင်းစုံ၊ တန်းတူညီမျှမှုနှင့် မဟာဗျူဟာမြောက် မိတ်ဖက်ဆက်ဆံမှုကို သင်္ကေတပြုရန် ဒီဇိုင်းထုတ်ထားသည်ဟု RIA သတင်းက ရေးသားဖော်ပြပါသည်။

ကိုးကား- RIA

ကိယက်ဗ်မြို့၏ ကောင်းကင်ယံတွင် AN-124 အကြီးစား သယ်ယူ ပို့ဆောင်ရေး လေယာဉ်ကြီး ပေါ်ထွက်လာပြီးနောက် နိုင်ငံပြင်ပသို့ ပျံသန်းခဲ့ပြီး ယင်းသည် ယူကရိန်းတပ်မတော်၏ စိတ်ဓာတ်တက်ကြွမှုကို မြှင့်တင်ရန် အထောက်အကူဖြစ်စေသည်ဟု ယူဆရသည်။

၃ နှစ်ကျော်အတွင်း ကိယက်ဗ်ကောင်းကင်ယံတွင် AN-124 ကို ပထမဆုံး အကြိမ် တွေ့မြင်ရခြင်းဖြစ်ပြီး ၂၀၂၂ ခုနှစ်အစောပိုင်းတွင် စစ်ပွဲ စတင်ခဲ့ ပြီးနောက် ယူကရိန်းအာဏာပိုင်များသည် စစ်ဘက်သုံးမဟုတ်သော လေယာဉ်အားလုံးအတွက် မြို့တော်၏ လေကြောင်းနယ်နိမိတ်ကို ပိတ် ထားခဲ့သည်။

အမေရိကန်စစ်ဘက်ဆိုင်ရာဝက်ဘ်ဆိုဒ် War Zone ၏ ဂြိုလ်တုဓာတ်ပုံ ဆိုင်ရာဆန်းစစ်ချက်အရ AN-124 သယ်ယူပို့ဆောင်ရေးလေယာဉ်သည် ကိယက်ဗ်ရှိ Svyatoshino လေဆိပ်မှ ပျံတက်ခဲ့ခြင်းဖြစ်နိုင်ကြောင်း ဖော်ပြထားသည်။ ထိုလေဆိပ်တွင် လေယာဉ်သည် လေးနှစ်ကျော်ကြာ ရပ်နားထားခဲ့ပြီး ၎င်းသည် Antonov လေယာဉ်ထုတ်လုပ်ရေးကုမ္ပဏီ၏ ဌာနချုပ်လည်းဖြစ်သည်။

အနီးရှိ Hostomel လေဆိပ်နှင့် ထိုနေရာတွင် ရပ်နားထားသည့် An-225 သယ်ယူပို့ဆောင်ရေး လေယာဉ်အပါအဝင် အခြားလေယာဉ်များစွာကို စစ်ပွဲအစောပိုင်းကာလများတွင် ဖျက်ဆီးခံခဲ့ရသော်လည်း Svyatoshino လေဆိပ်မှာ ထိခိုက်မှုမရှိခဲ့ပေ။ အချက်အလက်များအရ ယူကရိန်း၏ AN-124 လေယာဉ်သည် ဂျာမနီနိုင်ငံ Leipzig မြို့ရှိ Antonov ၏ အခြေစိုက်စခန်းသို့ ဆင်းသက်ခဲ့သည်။ 

ရုရှားစစ်ဘက်ဆိုင်ရာ ဆန်းစစ်သူအချို့က AN-124 လေယာဉ်ကို ရန်သူ၏ တိုက်ခိုက်မှုမှကာကွယ်ရန် ယူကရိန်းတပ်များက Dnipro မြို့မှ အရေးပေါ် ရွှေ့ပြောင်းခဲ့ဟု ယုံကြည်ကြသည်။

Flightradar24 ၏ အချက်အလက်များအရ ယူကရိန်း AN-124 လေယာဉ်သည် ယူကရိန်းအနောက်ပိုင်းနှင့် ပိုလန်နယ်စပ်အနီးမှ ညနေပိုင်းတွင် ပျံသန်းခဲ့သော်လည်း ၎င်း၏ ပျံတက်ရာနေရာအချက်အလက်ကို ဖော်ပြ ထားခြင်းမရှိဘဲ AN-124 သည် ပိုလန်အပေါ်မှ ဖြတ်ကျော်ပျံသန်းပြီး ဂျာမနီနိုင်ငံသို့ ဆင်းသက်ခဲ့သည်။ ယူကရိန်း AN-124 ၏ အဆိုပါ ပျံသန်းမှု သည် ရုရှားစစ်ဘက်ဆိုင်ရာ ဆန်းစစ်သူများအကြား အငြင်းပွားဖွယ် အကြောင်းအရာတစ်ခုဖြစ်လာခဲ့သည်။

ထောက်လှမ်းရေးအချက်အလက် မလုံလောက်မှုနှင့် ကိယက်ဗ်၏ ထူထပ်သည့် လေကြောင်းကာကွယ်ရေးစနစ်များကလည်း AN-124 လေယာဉ် ပျံမတက်မီ ဖျက်ဆီးခြင်းမခံရသည့် အခြားအကြောင်းရင်းများ ဖြစ်နိုင်ကြောင်း War Zone မှ စစ်ရေးသုံးသပ်သူ Howard Altman က ထောက်ပြခဲ့သည်။

"AN-124 ကို နိုင်ငံခြားသို့ ရွှေ့ပြောင်းခြင်းဖြင့် စီးပွားဖြစ် ကုန်စည်သယ်ယူ ပို့ဆောင်ရေးဝန်ဆောင်မှုများ ဆက်လက်လည်ပတ်နိုင်မည်ဆိုပါက ၎င်းသည် Antonov ကုမ္ပဏီအတွက်သာမက ယူကရိန်းနိုင်ငံအတွက်ပါ ကြီးမားသောအောင်ပွဲတစ်ရပ်ဖြစ်လာမည်ဖြစ်ပြီး အဆိုပါ ဝန်ဆောင်မှုများသည် အရေးကြီးသောဝင်ငွေအရင်းအမြစ်ဖြစ်ပြီး စစ်ဆင်ရေးလုပ်ငန်းများကို အထောက်အကူပြုမည်" ဟု Altman က မှတ်ချက်ပြုခဲ့သည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂