ဝါရှင်တန်၊ မတော်တဆမှု

အမေရိကန်ပြည်ထောင်စု ဝါရှင်တန်မြို့    ရော်နယ်ရေဂင်လေဆိပ်အနီးတွင် ဖြစ်ပွားခဲ့သည့် လေယာဉ်မတော်တဆမှုတွင် လိုက်ပါလာသူအားလုံး သေဆုံးနိုင်ဖွယ်ရှိကြောင်း ဝါရှင်တန်မီးသတ်တပ်ဖွဲ့အကြီးအကဲက ဇန်နဝါရီလ ၃၀ ရက်တွင်ပြောသည်။

ရော်နယ်ရေဂင်  လေဆိပ်အနီးတွင်ဇန်နဝါရီလ ၂၉ ရက် ညပိုင်းက  ခရီးသည်တင်လေယာဉ်တစ်စင်းက လေဆိပ်သို့ ဆင်းသက်မည့်လမ်းကြောင်းအတွင်းသို့   စစ်ဘက်သုံး Blackhawk ရဟတ်ယာဉ်က   ပျံသန်းဝင်ရောက်လာစဉ် ဝေဟင်ပေါ်၌တိုက်မိခဲ့ခြင်းဖြစ်သည်။

လေယာဉ်မတော်တဆဖြစ်ပွားစဉ် ခရီးသည်တင်လေယာဉ်ပေါ်၌ ခရီးသည်၆၀ ဦး၊ လေယာဉ်အမှုထမ်းလေးဦးလိုက်ပါလာခဲ့ကြောင်းသိရသည်။ မတော်တဆမှုဖြစ်ပွားပြီးနောက် လေယာဉ်များမှာ အနီးအနားရှိ ပိုတိုမက်မြစ်အတွင်းသို့ ထိုးကျသွားခဲ့ခြင်းဖြစ်ကြောင်း အာဏာပိုင်အဖွဲ့က ထုတ်ပြန်ထားသည်။

လက်ရှိအချိန်အထိ အနည်းဆုံးရုပ်အလောင်း ၃၀  ခန့်ကို   မြစ်အတွင်းမှ ပြန်လည်ဆယ်ယူနိုင်ခဲ့ပြီး ရှာဖွေမှုများကို ဆက်လက်လုပ်ဆောင်လျက်ရှိသော်လည်း မတော်တဆမှုအတွင်း အသက်ရှင်ကျန်ရစ်သူမရှိနိုင်ကြောင်း ဝါရှင်တန်မီးသတ်တပ်ဖွဲ့ အကြီးအကဲ ဂျွန်ဒေါ်နယ်လီကပြောသည်။

လက်ရှိတွင် ရဟတ်ယာဉ်၏ အပျက်အစီးများကို ပြန်လည်ရှာဖွေတွေ့ရှိထားပြီးဖြစ်သည်။ ယခုဖြစ်ပွားသည့် လေကြောင်းမတော်တဆမှုသည်    နိုင်ငံအတွင်း၌ နှစ်ပေါင်း ၂၀ ကျော်အတွင်း   လူအသေအပျောက်အများဆုံးမတော်တဆမှုတစ်ခုဖြစ်ကြောင်း သိရသည်။

Blackhawk ရဟတ်ယာဉ်ပေါ်တွင်လေယာဉ်ပျံသန်းရေးလေ့ကျင့်မှုအဖြစ် စစ်သည်သုံးဦးလိုက်ပါလာကြောင်း သိရသည်။           
Ref: Xinhua, Startribune

Source: Myawady Web Portal

ဆက်စပ်သတင်း- https://sacministry.gov.mm/my/news/2146

စပိန်နိုင်ငံ အရှေ့တောင်ပိုင်း Murcia ရှိ Rheinmetall ၏ လက်အောက်ခံကုမ္ပဏီခွဲ၏ ခဲယမ်းစက်ရုံတွင် ဇန်နဝါရီ ၃၀ ရက်နေ့က ပေါက်ကွဲမှုတစ်ခုဖြစ်ပွားခဲ့ရာ အလုပ်သမား ခြောက်ဦး ဒဏ်ရာရခဲ့ပြီး ၎င်းတို့အနက် တစ်ဦးမှာ ပြင်းထန်သောအခြေအနေတွင် ရှိနေသည်။ ဂျာမန် လက်နက်ကုမ္ပဏီကြီးသည် ယူကရိန်းသို့ လက်နက်များ အဓိကပံ့ပိုးပေးနေသည့် ကုမ္ပဏီဖြစ်သည်။

Javali Viejo တွင်ရှိသည့် စက်မှုဇုန်၌ ညနေ ၄ နာရီ ၂၀ ခန့်တွင် ဖြစ်ပွားခဲ့ခြင်းဖြစ်ကြောင်း အရေးပေါ်ဌာနက ပြောသည်။ အသက် ၃၀ နှင့် ၅၂ နှစ်ကြားရှိ ဝန်ထမ်း အများအပြား မီးလောင်ဒဏ်ရာများနှင့် မီးခိုးငွေ့များ ရှူရှိုက်မိခြင်းကြောင့် အသက်ရှူလမ်းကြောင်းဆိုင်ရာ ဆိုးရွားသောခံစားရမှုများ ခံစားခဲ့ရပြီး အသက် ၅၂ နှစ် အရွယ် အမျိုးသားတစ်ဦး ဦးခေါင်းထိခိုက် ဒဏ်ရာရရှိခဲ့သည်။ လူငါးဦးကို ဆေးရုံသို့ပို့ဆောင်ခဲ့ပြီး အခြားအမျိုးသားတစ်ဦးမှာ အဆိုပါနေရာ၌ ဆေးကုသမှုခံယူခဲ့သည်။

ဂျာမနီနိုင်ငံ Rheinmetall သည် စပိန်ကုမ္ပဏီ Expal Systems ကို ၂၀၂၃ ခုနှစ်၊ သြဂုတ်လတွင် ဒေါ်လာ ၁.၃ ဘီလီယံတန်ဖိုးရှိ သဘောတူညီချက်ဖြင့် ဝယ်ယူခဲ့သည်။ ယခု Expal Munitions ဟုခေါ်သော ကုမ္ပဏီခွဲသည် ဝေဟင်ဗုံးများ၊ မော်တာနှင့် အလတ်စားကျည်များ၊ ဖျူးစ်များနှင့် ဒုံးပျံတွန်းကန်စနစ်များအပြင် EU မှ ယူကရိန်းသို့ ထောက်ပံ့ပေးလျက်ရှိသော 155 mm အမြောက်ကျည်များ ထုတ်လုပ်လျက်ရှိသည်။

Expal Munitions သည် Murcia ရှိ စက်ရုံအပါအဝင် စပိန်တွင် စက်ရုံ ၇ ရုံ လည်ပတ်နေပြီး ကိယက်ဗ် အတွက် ခဲယမ်းများထုတ်လုပ်မှု အသေးစိတ် အချက်အလက်များကိုမူ ထုတ်ဖော်ပြောကြားထားခြင်းမရှိပေ။

ကိုးကား-RT

ရောမ   ဇန်နဝါရီ ၃၀

ဟာမီနီယာ မုန်တိုင်းသည် ပြင်သစ်နိုင်ငံသို့ ဝင်ရောက်တိုက်ခတ်ခဲ့ပြီးနောက် ဇန်နဝါရီ ၂၉ ရက်တွင် အီတလီနိုင်ငံသို့ ဝင်ရောက်တိုက်ခတ်ခဲ့ရာ အီတလီနိုင်ငံ တက်စ်ကာနီနယ်မြေနှင့် လီဂူရီယာနယ်မြေတို့တွင် ရေဘေးအန္တရာယ်ဖြင့် ရင်ဆိုင်နေရကြောင်း Civil Protection Agency က ထုတ်ပြန်ခဲ့သည်ဟု ယနေ့သတင်းများတွင် ဖော်ပြထားသည်။

ဖလောရင့်မြို့တွင် ရေကြီးရေလျှံမှုဖြစ်ပေါ်နေပြီး ဖလောရင့်မြို့ရှီ မြေအောက်လမ်းကူးလူသွားလမ်းများ ‌‌ရေလွှမ်းလျက်ရှိသကဲ့သို့ လမ်းမကြီးတချို့လည်း ရေလွှမ်းလျက်ရှိကြောင်း၊ ဂျီနိုအာမြို့တွင်လည်း ရေကြီးရေလျှံမှုအပြင် မြေပြိုကျမှုများဖြစ်ပေါ်နေပြီး လမ်းမကြီးတချို့ကို ယာယီပိတ်ထားကာ ရေဘေးအန္တရာယ်အရေးပေါ်အခြေအနေ ကြေညာထားကြောင်း၊ မြေပြိုကျမှုနှင့်အတူ သစ်ပင်ကြီးများလည်းလဲကျခဲ့ပြီး နေအိမ်တချို့ ပျက်စီးခဲ့ကြောင်း Civil Protection Agency ကထုတ်ပြန်ခဲ့သည်။

“ဟာမီနီယာမုန်တိုင်း ဝင်ရောက်တိုက်ခတ်မှုကြောင့် မိုးသည်းထန်စွာ ရွာသွန်းပြီး ရေကြီးရေလျှံမှုနဲ့အတူ မြေပြိုကျမှုတွေလဲဖြစ်ပေါ်နေပါတယ်။ မိုးသည်းထန်စွာ ရွာသွန်းမှုကြောင့် မြစ်ရေလျှံတက်မှုတွေ ဖြစ်ပေါ်လာနိုင်တယ်။ စီဗီမြစ်ရေပမာဏလဲ မြင့်တက်လာနေတဲ့အတွက် မြစ်ရေလျှံတက်မှုနဲ့ပတ်သက်ပြီး အချိန်မီသတိပေးချက်ထုတ်ပြန်နိုင်အောင် ဆောင်ရွက်နေပါတယ်” ဟု Civil Protection Agency မှ ပြောရေးဆိုခွင့်ရှိသူတစ်ဦးက ပြောကြားခဲ့ကြောင်း သိရသည်။

Source: ရတနာပုံသတင်းစာ

အာကာသစူးစမ်းလေ့လာရေးစွမ်းရည်၏ ထူးထူးခြားခြား သရုပ်ပြမှုတွင် နာဆာမှ အာကာသယာဉ်မှူး ဆူနီတာ ဝီလီယံ နှင့် ဘတ်ချ်ဝီလ်မိုးတိုက နိုင်ငံတကာ အာကာသ စခန်း (ISS) ပေါ်တွင် ဇန်နဝါရီ ၃၀ ရက်နေ့၌ စံချိန်တင် ၅.၅ နာရီကြာ အာကာသလမ်းလျှောက်ခြင်းကို ပြုလုပ်ခဲ့ကြကြောင်း သိရှိရပါသည်။ 

အာကာသလမ်းအတွင်းလျှောက်ခြင်းကို ဝီလီယံက ၉ ကြိမ်မြောက်နှင့် ဝီလ်မိုး က ၅ ကြိမ်မြောက်လမ်းလျှောက်ခဲ့ကြခြင်းဖြစ်ပြီး ၎င်းတို့အတွက် စံချိန်မှတ်တမ်းအသစ်များ စိုက်ထူနိုင်ခဲ့ခြင်းဖြစ်ပါသည်။ ဝီလီယံက စုစုပေါင်း အာကာသလမ်းလျှောက်ချိန် ၆၂နာရီ နှင့် ၆ မိနစ်ရှိပြီဖြစ်၍ နာဆာ၏ မှတ်တမ်းတွင် အာကာသအတွင်းနေထိုင်မှု နံပါတ် ၄ နေရာသို့ ရောက်သွားကြောင်း သိရှိရပါသည်။ 

ကမ္ဘာနှင့်မတူညီသည့်အခြေအနေရှိသော အာကာသအတွင်းလှုပ်ရှားမှု (EVA) အတွင်း အာကာသယာဉ်မှူးများသည် အရေးကြီးသော အလုပ်များစွာကို အောင်မြင်စွာ ပြီးမြောက်ခဲ့ကြောင်းနှင့် ၎င်းတို့သည် အာကာသစခန်းတွင် ချွတ်ယွင်းမှုဖြစ်ကာ အနှောင့်အယှက်ဖြစ်နေသော ရေဒီယိုလှိုင်းနှုန်းစုဆောင်းသည့် အင်တာနာကို ဖယ်ရှားခဲ့ပြီး အသေးစိတ်လေ့လာသုတေသနပြုရန်အတွက် Destiny ဓာတ်ခွဲခန်းနှင့် Quest airlock နှစ်ခုလုံးမှ မျက်နှာပြင်ပစ္စည်း နမူနာများကို စုဆောင်းခဲ့ကြောင်း သိရှိရပါသည်။ 

ကိုးကား-Myanmar National Post

ပြုံယမ်း   ဇန်နဝါရီ ၂၉

ယခုနှစ်အတွင်း နျူကလီးယားတပ်များ၏ အင်အားကိုမြှင့်တင်ရန် မြောက်ကိုရီးယားခေါင်းဆောင် ကင်ဂျုံအန်က တိုက်တွန်းခဲ့ကြောင်း ယနေ့သတင်းများတွင် ရေးသားဖော်ပြထားသည်။

မြောက်ကိုရီးယား ပြည်တွင်းတစ်နေရာတွင်ရှိသော နျူကလီးယားကုန်ကြမ်းထုတ်လုပ်ရေးစခန်းတစ်ခုနှင့် နျူကလီးယားလက်နက်သုတေသနတစ်ခုသို့ ဇန်နဝါရီ ၂၈ ရက်က သွားရောက်စစ်ဆေးစဉ် အဆိုပါအတိုင်းတိုက်တွန်းခဲ့ခြင်းဖြစ်သည်။

အဆိုပါ ခရီးစဉ်အတွင်း ကင်ဂျုံအန်သည် နျူကလီးယားသိပ္ပံပညာရှင်များနှင့် တွေ့ဆုံ၍ ၂၀၂၄ ခုနှစ်အတွင်း ရယူနိုင်ခဲ့သည့် အောင်မြင်မှုများအတွက် ဂုဏ်ပြုစကားပြောကြားခဲ့ကြောင်း မြောက်ကိုရီးယားအစိုးရအာဘော် ကေစီအင်န်အေသတင်းဌာနက သတင်းထုတ်ပြန်ထားသည်။

ယင်းအပြင် ယခုနှစ်အတွင်း လက်နက်ထုတ်လုပ်နိုင်သည့် အရည်အသွေးရှိသော နျူကလီးယားကုန်ကြမ်းများကို အောင်အောင်မြင်မြင် ဆက်လက်ထုတ်လုပ်ကြရန်လည်း ကင်ဂျုံအန်က သိပ္ပံပညာရှင်များကို တိုက်တွန်းခဲ့သည်။

ယခုနှစ်သည် နျူကလီးယားတပ်များ အင်အားမြှင့်တင်ရေးအစီအစဉ်အရ အရေးကြီးသည့်လုပ်ငန်းတာဝန်များ အကောင်အထည်ဖော်ရမည့်နှစ်ဖြစ်ကြောင်း မြောက်ကိုရီးယားခေါင်းဆောင် ကင်ဂျုံအန်က ပြောကြားခဲ့သည်။

မြောက်ကိုရီးယားနိုင်ငံအနေဖြင့် လက်ရှိအချိန်တွင် နျူကလီးယားလက်နက် ၉၀ ထိ ထုတ်လုပ်နိုင်သည့် နျူကလီးယားကုန်ကြမ်းများကို ပိုင်ဆိုင်ထားကြောင်း သိရသည်။

Ref: RT၊ Trs: KKO

Source: ရတနာပုံသတင်းစာ

ဇန်နဝါရီ ၂၉ ရက် ဒေသစံတော်ချိန် ည ၈:၄၇ အချိန်တွင် အမေရိကန်လေကြောင်းလိုင်း၏ ဂျက်လေယာဉ် (Flight 5342) နှင့် အမေရိကန်တပ်မတော် Black Hawk ရဟတ်ယာဉ် (Sikorsky UH-60) တို့သည် ရော်နယ်ရီဂန် ဝါရှင်တန်ဒီစီ အမျိုးသားလေဆိပ်အနီး တွင် တိုက်မိမှုဖြစ်ပွားခဲ့သည်။

ဂျက်လေယာဉ်တွင် ခရီးသည် ၆၀ ဦးနှင့် လေယာဉ်မှူး အပါအဝင် ဝန်ထမ်း ၄ ဦး တို့ လိုက်ပါလာကြပြီး တပ်မတော်ရဟတ်ယာဉ်တွင် အမေရိကန်စစ်သား ၃ ဦး တို့ လိုက်ပါလာကြသည်။ 

တိုက်မိပြီးနောက် ဂျက်လေယာဉ်သည် အလယ်မှ ထက်ပိုင်းကျိုးသွားပြီး Potomac မြစ်ထဲသို့ ပြုတ်ကျသွားခဲ့သည်။ ရဟတ်ယာဉ်မှာလည်း လှည့်လည် ပြုတ်ကျသွားခဲ့သည်။ မီးသတ်တပ်ဖွဲ့နှင့် တပ်ဖွဲ့ဝင်များက မြစ်ထဲရှိ လေယာဉ်အပျက်အစီးအကြား ခရီးသည်များကို အရေးပေါ် လိုက်လံရှာဖွေခဲ့သည်။ ဖြစ်စဉ်အတွင်း သေဆုံးသူဦးရေကို အတည်ပြုနေဆဲ ဖြစ်ပါသည်။

ရော်နယ်ရီဂန် အမျိုးသားလေဆိပ်အနေဖြင့် လေယာဉ်များ ဆင်းသက်မှုမရှိစေရေး လေဆိပ်ကို ခေတ္တပိတ်ထားပြီး အနီးအနားရှိ အခြားလေဆိပ်များသို့သာ ပြောင်းလဲဆင်းသက်ကြရန် လေကြောင်းလိုင်းများကို အကြောင်းကြားထားပါသည်။ မြစ်ထဲရှိ ကျိုးပဲ့ပျက်စီးနေသည့်လေယာဉ်ထဲရှိ ခရီးသည်များကို အရေးပေါ် ရှာဖွေကယ်ထုတ်ကြရန် သမ္မတဒေါ်နယ်ထရမ့်က ညွှန်ကြားထားပါသည်။ 

ကိုးကား-CNN

Photo: ABC News

စကြဝဠာအပြင်ဘက်တွင် မကြာသေးမီက ရှာဖွေတွေ့ရှိခဲ့သည့် ဂြိုဟ်တစ်လုံး၌ သက်ရှိများ   နေထိုင်နိုင်ရေးအတွက် အထောက်အကူပြုနိုင်သည့် ရေတည်ရှိနိုင်သည့် အလားအလာရှိကြောင်း နိုင်ငံတကာ သုတေသီများက အတည်ပြုပြောကြားသည်။

အဆိုပါဂြိုဟ်ကို   HD 20794 d ဟုအမည်ပေးထားပြီး ဗြိတိန်နိုင်ငံ အောက်စဖို့တက္ကသိုလ်မှ သိပ္ပံပညာရှင်တစ်ဦးဖြစ်သူ ဒေါက်တာ မိုက်ကယ်ကရစ်တီးနီးယားက ၂၀၂၂ ခုနှစ်တွင်   ရှာဖွေတွေ့ရှိခဲ့ခြင်းဖြစ်သည်။ ၎င်းဂြိုဟ်သည်  ကမ္ဘာမြေကြီး၏ထုထက် ၆ဆ ပိုမိုကြီးမားလျက်ရှိသည်ဟု သိပ္ပံပညာရှင်များကပြောသည်။

၎င်းဂြိုဟ်သည် အလင်းနှစ် ၂၀ အကွာ အဝေးတွင် တည်ရှိနေသည့် နေနှင့်အလားသဏ္ဌာန်တူသော ကြယ်တစ်လုံးကို လှည့်ပတ်နေရာ    ၎င်းလှည့်ပတ်သည့်နေရာသည် လူသားများအသက်ရှင်နေထိုင်နိုင်သည့် ဇုန်အတွင်း၌ ကျရောက်နေခြင်းကြောင့် ယင်းဂြိုဟ်၏ မျက်နှာပြင်ပေါ်တွင် သက်ရှိများအသက်ရှင်နေထိုင်နိုင်ရေးအတွက်များစွာအရေးပါသည့် ရေတည်ရှိနိုင်ကြောင်း သိပ္ပံပညာရှင်များက Astronomy and Astrophysics ဂျာနယ်တွင် ဖော်ပြခဲ့သည်။

HD 20794 d ဂြိုဟ်လှည့်ပတ်ရာနေရာသည် ကမ္ဘာမြေကြီး၏   အနီးတွင်တည်ရှိခြင်းကြောင့် ၎င်းဂြိုဟ်သည် အနာဂတ်လုပ်ဆောင်မည့်   အာကာသမစ်ရှင်များအတွက် အရေးပါသည့်အခန်းကဏ္ဍမှ ပါဝင်လာနိုင်ကြောင်းဒေါက်တာကရစ်တီးနီးယားက ပြောကြားထားသည်။

Ref: Astrobiology, Discovermagazine

Source: Myawady Web Portal

မွမ်ဘိုင်း၊ မတော်တဆမှု

အိန္ဒိယနိုင်ငံမြောက်ပိုင်း  အွတ်တာပရာဒေ့ရှ်ပြည်နယ်ရှိ ဘာသာရေးပွဲတော်တစ်ခုတွင် ဇန်နဝါရီလ၂၉ ရက် အစောပိုင်းက လူအုပ်ပြိုကျခဲ့ရာ အနည်းဆုံးလူ ၃၉ ဦးသေဆုံးခဲ့ကြောင်းသိရသည်။

အဆိုပါဖြစ်စဉ်သည်  ဘက်ပက်ခရိုင်မဟာခမ့်မီလာတွင် ဘာသာရေးပွဲတော်ကျင်းပရာနေရာ၌ နံနက်အစောပိုင်းက ဖြစ်ပွားခြင်းဖြစ်ပြီး ၅၀ ကျော် ဒဏ်ရာရရှိသွားသည်။ အဆိုပါပွဲတော်သို့ လူသန်းပေါင်းများစွာလာရောက်ခဲ့ပြီး သေဆုံးသူအရေအတွက်အတိအကျကို အာဏာပိုင်များက ထုတ်ပြန်နိုင်ခြင်းမရှိသေးပေ။

လက်ရှိတွင်  လူအုပ်ပြိုကျမှုကြောင့်သေဆုံးသူများ၏ ရုပ်အလောင်းများကို တာဝန်ရှိသူများက ဆေးရုံသို့ပို့ဆောင်ပေးထားကြောင်းသိရသည်။

သေဆုံးသူဦးရေမှာ  မြင့်တက်လာဖွယ်ရှိကြောင်း အွတ်တာပရာဒေ့ရှ်ပြည်နယ်ရဲတပ်ဖွဲ့မှ   အရင်းအမြစ်တစ်ခုကပြောသည်။

အဆိုပါပွဲတော်သည် ဟိန္ဒူဘာသာဝင်များ အထွတ်အမြတ်ထားရာပွဲတော်တစ်ခုဖြစ်ပြီး ၎င်းပွဲတော်အား ရက်သတ္တခြောက်ပတ်ကြာကျင်းပရန် စီစဉ်ထားသည်။

အဆိုပါဘာသာရေးပွဲတော်သို့ လူသန်း၂၀၀ အထိ လာရောက်မည်ဟု တာဝန်ရှိသူများကခန့်မှန်းထားကြောင်းသတင်းဌာနတစ်ခု၏ထုတ်ပြန်ချက်အရသိရသည်။

Source: Myawady Web Portal

ဝါရှင်တန်     ဇန်နဝါရီ ၂၉

အမေရိကန်နိုင်ငံ အခြေစိုက်ဘလူးအော်ရီဂျင် ကုမ္ပဏီသည် New Shepard ဒုံးပျံလွှတ်တင်မည့် အစီအစဉ်ကို ပြဿနာနှစ်ရပ်ကြောင့် ဆိုင်းငံ့ထားရကြောင်း ဇန်နဝါရီ ၂၈ ရက် သတင်းများအရ သိရသည်။

ဘလူးအော်ရီဂျင်ကုမ္ပဏီသည် မူကလ New Shepard ဒုံးပျံကို ဇန်နဝါရီ ၂၈ ရက်တွင် တက္ကဆက်ပြည်နယ်အနောက်ပိုင်း အာကာသစခန်းမှတစ်ဆင့် လွှတ်တင်ရန်စီစဉ်ထားကြောင်း သိရသည်။

သို့ရာတွင် မိုးတိမ်များထူထပ်နေမှုပြဿနာနှင့် New Shepard ဒုံးပျံ ပျံသန်းရေးစနစ် ပြဿနာကြောင့် လွှတ်တင်ရေးအစီအစဉ်ကို ဆိုင်းငံ့ထားကြောင်း ဘလူးအော်ရီဂျင်ကုမ္ပဏီက သတင်းထုတ်ပြန်ထားသည်။

အင်န်အက်စ်-၂၉ ဟူ၍အမည်ပေးထားသည့် New Shepard ဒုံးပျံသည် ဇန်နဝါရီ ၂၈ ရက်မစ်ရှင်တွင် ကမ္ဘာ့လေထုလွှာနှင့် အာကာသဟင်းလင်းပြင်အနားစပ်၌ လကမ္ဘာဒြပ်ဆွဲအားအခြေအနေကို စမ်းသပ်ဖန်တီးရန် စီစဉ်ထားကြောင်း သိရသည်။

အင်န်အက်စ်-၂၉ မစ်ရှင်တွင် ဘလူးအော်ရီဂျင် ကုမ္ပဏီသည် New Shepard ဒုံးပျံကို ဒုံးကန်အားစနစ်များအကူအညီဖြင့် တစ်မိနစ်လျှင် အပတ်ရေ ၁၁ ပတ်နှုန်းလည်ပတ်ခြင်းဖြင့် လဆွဲအားကို ဖန်တီးရန် စီစဉ်ထားသည်။

ဘလူးအော်ရီဂျင်ကုမ္ပဏီသည် New Shepard ဒုံးပျံကို လက်ရှိအချိန်ထိ ၂၈ ကြိမ် လွှတ်တင်ထားပြီး ၁၉ ကြိမ်မှာ အာကာသယာဉ်မှူးများ လိုက်ပါခြင်းမရှိသည့်မစ်ရှင်များဖြစ်ကြောင်း သိရသည်။

Ref: Russia Today ၊ Trs: KKO

Source: ရတနာပုံသတင်းစာ

ယနေ့အချိန်တွင် ကမ္ဘာ့အမြင့်ဆုံးမိုးမျှော် အဆောက်အအုံအဖြစ် သတ်မှတ်ထားသည့် Burj Khalifa သည် အာရပ်စော်ဘွားနိုင်ငံရှိ ဒူဘိုင်းမြို့တွင် တည်ရှိပါသည်။ အမြင့် ၈၂၈ မီတာ (၂၇၁၇ ပေ) ရှိပြီး ၁၆၃ ထပ်ရှိပါ သည်။ 

Burj Khalifa ကို ၂၀၀၄ ခုနှစ်တွင် စတင်တည်ဆောက်ခဲ့ပြီး ၂၀၁၀ ပြည့်နှစ်၊ ဇန်နဝါရီ ၄ ရက်တွင် စတင်ဖွင့်လှစ်ခဲ့သည်။ Burj Khalifa အဆောက်အဦ ဒီဇိုင်းကို Skidmore Owing & Merrill (SOM) က ရေးဆွဲခဲ့ပြီး ပင်မအင်ဂျင်နီယာမှာ Bill Baker ဆိုသူဖြစ်ပါသည်။ အဆိုပါအဆောက်အအုံကို Emaar Properties အုပ်စုက တည်ဆောက်ခဲ့ခြင်းဖြစ်ပါသည်။ စုစုပေါင်း ကုန်ကျငွေမှာ အမေရိကန်ဒေါ်လာ ၁.၅ ဘီလီယံ (အမေရိကန် ဒေါ်လာ သန်း ၁၅၀၀) ဖြစ်ပါသည်။ 

Burj Khalifa သည် လူနေအိမ်များ၊ ဟိုတယ်များ၊ ရုံးခန်းများ၊ ဈေးဝယ်စင်တာများ၊ ရူခင်းကြည့်ရှုရန်နေရာများနှင့် လိုက်ဂူများ ပါဝင်တည်ဆောက်ထားပါသည်။ ပထမ ထပ်မှ ၃၉ ထပ်အထိကို Armani Hotel Dubai နေရာယူထားပြီး အထပ် ၄၀ မှ ၁၀၈ ထပ်အထိကို အဆင့်မြင့်လူနေအိမ်ရာများအဖြစ် အသုံးပြုလျက်ရှိပါသည်။ အထပ် ၁၁၂ ထပ်မှ ၁၅၄ ထပ်ကို ရုံးခန်းများ၊ ကုမ္ပဏီများဖွင့်လှစ်ထားပြီး ၁၄၈ ထပ်( ၅၅၅ မီတာ)တွင် ကမ္ဘာ့အမြင့်ဆုံးရှုခင်းကြည့်ရှုရာနေရာ သတ်မှတ်ထားပါသည်။ အထပ် ၁၆၀ အထက်တွင် ဆက်သွယ်ရေးနှင့်နည်းပညာဆိုင်ရာပစ္စည်းကိရိယာများ ထားရှိပါသည်။

Burj Khalifa သည် ကမ္ဘာ့အမြင့်ဆုံးမိုးမျှော် အဆောက်အအုံဖြစ်သလို အောက်ပါစံချိန်များကိုလည်း ပိုင်ဆိုင်ထားပါသည်-

          (၁)     ကမ္ဘာ့အမြင့်ဆုံးအဆောက်အုံ

          (၂)     ကမ္ဘာ့အမြင့်ဆုံးဓာတ်လှေကား  (၅၀၄  မီတာ)

          (၃)     ကမ္ဘာ့အမြင့်ဆုံးရှုခင်းမျှော်ခုံ (၅၅.၇ မီတာ)

          (၄)     ကမ္ဘာ့အမြင့်ဆုံးပြတိုက်နှင့် အနုပညာပြခန်းများ

          (၅)     တစ်နေ့လျှင် လူ ၁၀,၀၀၀ ကျော်သော ရင်းနှီးမြှုပ်နှံသူများနှင့် ခရီးသွားလည်ပတ်သူများ

Burj Khalifa သည် ကမ္ဘာ့အမြင့်ဆုံးအဆောက်အအုံတစ်ခုဖြစ်သလို ဒူဘိုင်း၏ ခေတ်မီမှု၊ နိုင်ငံတကာထင်ရှားမှုကို အကောင်းဆုံးဖော်ပြပေးနေသည့် သင်္ကေတတစ်ခုဖြစ်ပြီး ဒူဘိုင်းကို နိုင်ငံတကာခရီးသွားမြို့တော်တစ်ခုဖြစ်လာစေရန် ရည်ရွယ်၍ တည်ဆောက်ခဲ့ခြင်းဖြစ်ပါသည်။ 

ကိုးကား-Britannica