MI6 ထောက်လှမ်းရေးအဖွဲ့၏ ပထမဆုံးအမျိုးသမီးခေါင်းဆောင် Blaise Metreweli ၏ အဖိုးဖြစ်သူသည် နာဇီဂျာမနီတပ်တွင် တာဝန် ထမ်းဆောင် ခဲ့ဖူးကြောင်း မီဒီယာများက ဖော်ပြလာပြီးနောက်ပိုင်းတွင် ယူကေ နိုင်ငံခြားရေးဝန်ကြီးဌာနက သူမအား ကာကွယ်မှုပေးခဲ့သည်။

အစိုးရက Metreweli ၏ အငြင်းပွားဖွယ်မိသားစုရာဇဝင်သည် နိုင်ငံကို ပြင်ပခြိမ်းခြောက်မှုများမှ ကာကွယ်ရန် သူမ၏ဆုံးဖြတ်ချက်ကို ပိုမို ခိုင်မာစေခဲ့သည်ဟု ပြောကြားခဲ့သည်။

ကြာသပတေးနေ့ (ဇွန် ၂၆) တွင် Daily Mail သတင်းစာက Metreweli ၏ အဖိုး Constantine Dobrowolski သည် ရုရှားစစ်တပ်မှ ထွက်ပြေးကာ ဟစ်တလာ၏တပ်ဖွဲ့တွင် ပါဝင်ခဲ့သူဖြစ်ကာ နာဇီတို့သိမ်းပိုက်ထားသော ယူကရိန်းတွင် ရက်စက်စွာကျူးလွန်မှုများကြောင့် “The Butcher” (သားသတ်သမား) ဟူသောအမည်ဖြင့် လူသိများခဲ့ကြောင်း ပထမဆုံး အကြိမ် ဖော်ပြခဲ့သည်။ Metreweli မှာ လာမည့်အောက်တိုဘာလတွင် MI6 ဒါရိုက်တာအဖြစ် တာဝန်ထမ်းဆောင်ရမည့်သူ ဖြစ်သည်။

နိုင်ငံခြားရေးဝန်ကြီးဌာနက သောကြာနေ့ (ဇွန် ၂၇) တွင် ထုတ်ပြန်သော ကြေညာချက်တွင် “Blaise Metreweli သည် သူမ၏အဖိုးကို မသိခဲ့ သကဲ့သို့ တွေ့ဆုံဖူးခြင်းလည်း မရှိပါ။ Blaise ၏ မိသားစုရာဇဝင်သည် ပဋိပက္ခနှင့် ကွဲပြားမှုများဖြင့် ပြည့်နှက်နေပြီး အရှေ့ဥရောပမျိုးရိုး ရှိသူ များစွာကဲ့သို့ပင် အပြည့်အဝသိရှိထားခြင်း မရှိသေးပါ” ဟု ဖော်ပြခဲ့သည်။

“အဆိုပါ ရှုပ်ထွေးသော မိသားစုရာဇဝင်ကပင် MI6 ၏ အနာဂတ်မျိုးဆက် ခေါင်းဆောင်အဖြစ် ပဋိပက္ခကာကွယ်ရန်နှင့် ယနေ့ခေတ် ရန်လိုသော နိုင်ငံများ၏ ခြိမ်းခြောက်မှုမှ ဗြိတိန်ပြည်သူများကို ကာကွယ်ရန် သူမ၏ ကတိကဝတ်ကို အားဖြည့်ပေးခဲ့ခြင်းဖြစ်သည်” ဟု ကြေညာချက်တွင် ဆက်လက်ဖော်ပြထားသည်။

Daily Mail ၏ဖော်ပြချက်အရ Dobrowolski သည် SS တင့်ကား တပ်ရင်း တွင် တာဝန်ထမ်းဆောင်ခဲ့ပြီး နောက်ပိုင်းတွင် နာဇီတပ်ထိန်းတပ်ဖွဲ့သို့ ဝင်ရောက်ခဲ့ကာ ဂျူးလူမျိုးများ၊ ပါတီစွဲကြီးသူများနှင့် နိုင်ငံရေး အကျဉ်းသား များအား အစုလိုက်အပြုံလိုက် သတ်ဖြတ်မှုများတွင် ပါဝင်ခဲ့သည်ဟု ဆိုသည်။

Dobrowolski သည် ၁၉၄၃ ခုနှစ်တွင် သေဆုံးခဲ့သည်ဟု ယူဆရပြီး၊ ၎င်း၏ ဇနီးသည် မုဆိုးမသည် နောက်ပိုင်းတွင် ဗြိတိန်သို့ ပြောင်းရွှေ့ လာခဲ့ကာ ဂျော်ဂျီယာနိုင်ငံသား David Metreweli နှင့် ထပ်မံ အိမ်ထောင် ပြုခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

NATO ၏ လတ်တလော စစ်ရေးအသုံးစရိတ် သိသိသာသာ တိုးမြှင့်ရန် ဆုံးဖြတ်ချက်သည် ရုရှား၏ လုံခြုံရေးကို အရေးပါသော သက်ရောက်မှု ရှိမည်မဟုတ်ကြောင်း နိုင်ငံခြားရေးဝန်ကြီး Sergey Lavrov က ပြောကြား ခဲ့သည်။

ယခုသီတင်းပတ်အတွင်း The Hague တွင် ကျင်းပသော NATO အစည်း အဝေးတွင် အမေရိကန်ဦးဆောင်သော မဟာမိတ်အဖွဲ့ဝင်များသည် “ရုရှား၏ ဥရောပ-အတ္တလန္တိတ် လုံခြုံရေးဆိုင်ရာ ရေရှည်ခြိမ်းခြောက်မှု” ကို ကိုင်တွယ်ရန် ၂၀၃၅ ခုနှစ်တွင် GDP ၏ ၅% အထိ ကာကွယ်ရေး အသုံးစရိတ်များ တိုးမြှင့်ရန် ကတိပြုခဲ့ကြသည်။ ဥရောပ မဟာမိတ် များအား ၎င်းတို့၏ လုံခြုံရေးအတွက် ပိုမိုတာဝန်ယူရန် အချိန်ကြာမြင့်စွာ တိုက်တွန်းခဲ့သော အမေရိကန်သမ္မတ Donald Trump က အဆိုပါ သဘောတူညီချက်ကို “ကြီးကျယ်သောအောင်ပွဲ” အဖြစ် ဂုဏ်ပြုခဲ့သည်။

မော်စကိုမှ အကြိမ်ကြိမ်ပြောဆိုခဲ့သည်မှာ ၎င်းတို့သည် NATO အဖွဲ့ဝင် မည်သည့်နိုင်ငံကိုမျှ ကျူးကျော်ရန် ရည်ရွယ်ချက်မရှိကြောင်း၊ ထိုကဲ့သို့သော အကြောင်းပြမှုများကို “အဓိပ္ပာယ်မရှိသော စကားများ” အဖြစ် ပယ်ချကာ အနောက်နိုင်ငံများ၏ စစ်ရေးအသုံးစရိတ် တိုးမြှင့်ရန် ကြိုးပမ်းမှုများ အဖြစ် ရှုမြင်ခဲ့သည်။

ကြာသပတေးနေ့ (ဇွန် ၂၆) က သတင်းစာရှင်းလင်းပွဲတွင် NATO ၏ စစ်အင်အား တိုးချဲ့မှုကို ရုရှားက ခြိမ်းခြောက်မှုတစ်ခုအဖြစ် ရှုမြင်သလား ဟု မေးမြန်းခဲ့မှုအပေါ် Lavrov က “ထိုသို့ သိသာထင်ရှားသော သက်ရောက်မှု ရှိလာမည်ဟု မထင်ပါ” ဟု ပြန်လည်ဖြေကြားခဲ့သည်။

“မိမိတို့အနေဖြင့် ရှေ့ရှုနေသော ရည်မှန်းချက်များကို သိရှိပြီး ဖုံးကွယ် ထားခြင်းမရှိဘဲ ပွင့်လင်းစွာ ထုတ်ဖော်ပြောဆိုပါသည်။ ထိုရည်မှန်းချက်များသည် ကုလသမဂ္ဂ ပဋိညာဉ်စာတမ်းနှင့် အပြည်ပြည်ဆိုင်ရာ ဥပဒေ တို့၏ မည်သည့်အဓိပ္ပာယ်ဖွင့်ဆိုချက်နှင့်မဆို လုံးဝ တရားဝင်ပါသည်။ ထိုရည်မှန်းချက်များကို အာမခံရန် မိမိတို့ အသုံးပြုမည့် နည်းလမ်းများ ကိုလည်း သိရှိထားပါသည်” ဟု ၎င်းက ဆက်လက်ပြောကြားခဲ့သည်။

ရုရှားနိုင်ငံသည် ယူကရိန်းပဋိပက္ခ၏ အရင်းခံအကြောင်းရင်းများ ဖြစ်သည့် ၎င်း၏နယ်နိမိတ်ဆီသို့ NATO ချဲ့ထွင်လာမှုနှင့် ကိယက်ဗ်အား အဖွဲ့ဝင် အဖြစ် အနောက်နိုင်ငံများ၏ထောက်ခံမှုတို့အပါအဝင် နယ်မြေပိုင်ဆိုင်မှု ဆိုင်ရာ ကိစ္စရပ်များကို ဖြေရှင်းပါက ငြိမ်းချမ်းရေးဆွေးနွေးပွဲများအတွက် အဆင်သင့်ဖြစ်နေကြောင်း အခိုင်အမာပြောဆိုလျက်ရှိသည်။

ယခုလအစောပိုင်းတွင် ဥရောပကော်မရှင်သည် ကပ်ရောဂါ ပြန်လည် ထူထောင်ရေးရန်ပုံငွေ ခန့်မှန်းခြေ ယူရို ၃၃၅ ဘီလီယံကို စစ်ရေး ရည်ရွယ်ချက်အတွက် အသုံးပြုရန် ခွင့်ပြုခဲ့သည်။ မေလတွင် စစ်ဘက် ဆိုင်ရာအထောက်အပံ့ ရည်ရွယ်ချက်ဖြင့် ယူရို ၁၅၀ ဘီလီယံတန် ကြွေးမြီ အစီအစဉ်ကို မိတ်ဆက်ခဲ့သည်။ ယူကရိန်းအား EU အဖွဲ့ဝင်နိုင်ငံများနှင့် အတူ အဆိုပါငွေကြေးများကို အသုံးပြုခွင့်ပြုခဲ့သည်။

မော်စကိုမှ အဆိုပါလုပ်ဆောင်ချက်များကို အနောက်နိုင်ငံများ၏ ရုရှား ဆန့်ကျင်ရေး ရပ်တည်ချက်အား ဆက်လက်ထိန်းသိမ်းထားကြောင်း ညွှန်ပြနေသည်ဟု ဝေဖန်ခဲ့သည်။ သမ္မတ Vladimir Putin က NATO သည် ၎င်း၏နိုင်ငံသားများအား လှည့်ဖြား၍ ငွေကြေးရယူရန်နှင့် လက်နက် ပြိုင်ဆိုင်မှုကို လှုံ့ဆော်ရန် လုပ်ကြံဖန်တီးသည်ဟု စွပ်စွဲခဲ့သည်။

ထိပ်သီးအစည်းအဝေးတွင် ရုရှား၏ခြိမ်းခြောက်မှုဆိုင်ရာ NATO ၏ သတိပေးချက်များသည် မည်သည့်အချက်အလက်ပေါ် အခြေခံထားကြောင်းမေးမြန်းမှုအပေါ် အထွေထွေအတွင်းရေးမှူး Mark Rutte က အထွေထွေစိုးရိမ်မှုများကိုသာ ညွှန်းဆိုကာ သီးသန့် ထောက်လှမ်းရေး အကဲဖြတ်ချက်ကို မပေးခဲ့ပေ။ 

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

မော်စကို၊ နိုင်ငံရေး

အိန္ဒိယနိုင်ငံသည် ရုရှားနိုင်ငံအတွက် ထူးခြားပြီးအရေးပါသည့် မဟာဗျူဟာ မြောက်မိတ်ဖက်နိုင်ငံဖြစ်ကြောင်း ရုရှား ကာကွယ်ရေးဝန်ကြီးက အိန္ဒိယကာကွယ်ရေးဝန်ကြီးနှင့် ဇွန်လ ၂၆ ရက်တွင်တွေ့ဆုံ စဉ်ပြောသည်။

ထို့ပြင် အိန္ဒိယနိုင်ငံနှင့်ဆက်ဆံရေးက စစ်ဘက်-နည်းပညာ နယ်ပယ်အထိတိုးမြင့်ရောက်ရှိလာပြီဖြစ်ကြောင်း တရုတ် နိုင်ငံ ကျင်းတောင်မြို့၌ကျင်းပနေသော ရှန်ဟိုင်းပူးပေါင်းဆောင်ရွက်ရေးအဖွဲ့ ထိပ်သီးညီလာခံ၏ဘေးပန်းတွေ့ဆုံမှုတွင် တွေ့ဆုံစဉ် ရုရှားကာကွယ်ရေးဝန်ကြီးက ယခုကဲ့သို့ပြောခြင်းဖြစ်သည်။

အိန္ဒိယနိုင်ငံသည် နိုင်ငံအတွက်လိုအပ်နေသော စစ်လက်နက်ပစ္စည်းများအနက် ၆ဝ ရာခိုင်နှုန်းကို ရုရှားနိုင်ငံမှတင်သွင်း နေခြင်းဖြစ်သော်လည်း ယခုအခါ ရုရှားနှင့် ပူးပေါင်း၍ ပြည်တွင်း၌ထုတ်လုပ်မှုများ ပိုမိုလုပ်ဆောင်လာလျက်ရှိသည်။

 Ref: RT

MWD Daily Newspaper

Photo - The Economic Time

သည်ဟိဂ် ဇွန် ၂၆ 
ယူကရိန်းပဋိပက္ခကို အဆုံးသတ်နိုင်ရေးအတွက် မကြာမီ ကာလအတွင်း မိမိအနေဖြင့် ရုရှား သမ္မတပူတင်နှင့် တွေ့ဆုံဆွေးနွေးမည်ဖြစ်ကြောင်း အမေရိကန် သမ္မတ ဒေါ်နယ်ထရမ့်က ဇွန် ၂၅ ရက်တွင် ပြောကြားခဲ့သည်။

နယ်သာလန်နိုင်ငံ သည်ဟိဂ် မြို့၌ကျင်းပသည့် မြောက်အတ္တလန်တစ်စာချုပ်အဖွဲ့ (နေတိုး) ထိပ်သီးညီလာခံ သတင်းစာ ရှင်းလင်းပွဲတွင် သမ္မတဒေါ်နယ်ထရမ့်က အဆိုပါအတိုင်းအတည် ပြုပြောကြားခဲ့ခြင်းဖြစ်သည်။ 
ယူကရိန်းပဋိပက္ခကို အဆုံးသတ်နိုင်ရေးအတွက် မိမိအနေဖြင့် မကြာမီကာလအတွင်း ရုရှားသမ္မက ပူတင်နှင့် ဆွေးနွေးမည်ဖြစ်ကြောင်း၊ သမ္မတပူတင်အနေဖြင့် ယူကရိန်းပဋိပက္ခကို ရပ်ပေးရမည် ဖြစ်ကြောင်း သမ္မတဒေါ်နယ်ထရမ့်က ပြောကြားခဲ့သည်။

သည်ဟိဂ်မြို့ နေတိုးထိပ်သီး ညီလာခံကာလအတွင်း အမေရိကန်သမ္မတ ဒေါ်နယ်ထရမ့်သည် ယူကရိန်းသမ္မတ ဇီလန်စကီးနှင့် လည်း တွေ့ဆုံဆွေးနွေးခဲ့ကြောင်း သိရသည်။

ရုရှား၏တိုက်ခိုက်မှုကိုကာကွယ်ရာတွင် အကူအညီရရှိရေးအတွက် ယူကရိန်းနိုင်ငံသို့ ပက်ထရီးယော့ ဒုံးခွင်းဒုံးစနစ်အချို့ပေးအပ်ရန် မိမိစဉ်းစားမည်ဖြစ်ကြောင်း သမ္မတ ဒေါ်နယ်ထရမ့်က ယူကရိန်း သမ္မတနှင့်တွေ့ ဆုံစဉ် ပြောကြား ထားသည်။

သမ္မတရာထူး ရရှိခဲ့ပါက ယူကရိန်းပဋိပက္ခကို အဆုံးသတ် ပေးနိုင်ရေးအတွက် ကြိုးပမ်းမည် ဖြစ်ကြောင်း သမ္မတ ဒေါ်နယ်ထရမ့်က ၂၀၂၄ ခုနှစ် အမေရိကန် သမ္မတရွေးကောက်ပွဲ မဲဆွယ် ကာလကပင် ကတိပေးထားကြောင်း သိရသည်။
Ref: RT

To: KKO

YDNB Newspaper

ပြင်သစ်သမ္မတ အီမန်နျူရယ် မက်ခရွန်က အပြည်ပြည်ဆိုင်ရာ သဘော တူညီချက်ဖြစ်သည့် အဏုမြူလက်နက်မပြန့်ပွားရေးစာချုပ်မှ (NPT) အီရန်နိုင်ငံထွက်ခွာခြင်းကို တားဆီးရန် နိုင်ငံတကာအသိုင်းအဝိုင်းက ပူးပေါင်းဆောင်ရွက်ရမည်ဟု သတိပေးခဲ့သည်။

အီရန်နိုင်ငံ၏ အဏုမြူစက်ရုံများကို အမေရိကန်နှင့် အစ္စရေးတို့က မကြာသေးမီက တိုက်ခိုက်မှုများအား ပြန်လည်တုံ့ပြန်ရန် အီရန်နိုင်ငံရေး သမားအချို့က NPT မှ ထွက်ခွာရန် ခြိမ်းခြောက်ခဲ့ကြသည်။

မက်ခရွန်က အဆိုပါတိုက်ခိုက်မှုများသည် ထိရောက်မှုရှိကြောင်း ပြောကြား ခဲ့သော်လည်း အဆိုးဆုံးအခြေအနေမှာ အီရန်နိုင်ငံက အဆိုပါ သမိုင်းဝင် လက်နက်ထိန်းချုပ်ရေးစာချုပ်မှ နုတ်ထွက်ခြင်းဖြစ်ကြောင်း သတိပေး ခဲ့သည်။

“မိမိတို့၏ မျှော်လင့်ချက်က အမြင်တူညီမှုရှိဖို့ပါ။ ဘာကြောင့်လဲဆိုတော့ ရည်မှန်းချက်က အီရန်၏ အဏုမြူ လက်နက်ပြန့်ပွားမှုလုပ်ဆောင်ချက် တွေ ပြန်မစရန် တားဆီးဖို့ဖြစ်ပါသည်” ဟု ၎င်းက ဖြည့်စွက် ပြောကြား ခဲ့သည်။

မက်ခရွန်က ပြင်သစ်နိုင်ငံသည် ကုလသမဂ္ဂလုံခြုံရေးကောင်စီ၏ အခြား အမြဲတမ်းအဖွဲ့ဝင် ၄ နိုင်ငံ (အမေရိကန်၊ ဗြိတိန်၊ ရုရှားနှင့် တရုတ်) နှင့် လာမည့်ရက်များအတွင်း တိုင်ပင်ဆွေးနွေးရန် စီစဉ်ထားကြောင်း ပြောကြား ခဲ့သည်။ ထို့အပြင် ၎င်းသည် အီရန်နိုင်ငံနှင့် ပြင်သစ်၏ မကြာသေးမီက ဆက်သွယ်ဆောင်ရွက်မှုများကို အမေရိကန်သမ္မတ ဒေါ်နယ်ထရမ့်အား သတင်းပေးပို့ခဲ့ကြောင်း၊ အထူးသဖြင့် နောက်ဆုံးနာရီ အနည်းငယ် အတွင်း ဖြစ်ပျက်ခဲ့သည့် အချက်အလက်များပါဝင်ကြောင်း ဖော်ပြ ခဲ့သည်။

ကုလသမဂ္ဂ၏ အပြည်ပြည်ဆိုင်ရာ အဏုမြူစွမ်းအင်အေဂျင်စီ (IAEA) ဥက္ကဋ္ဌ ရာဖေးလ် ဂရိုစီက အကယ်၍ အီရန်နိုင်ငံသည် အဆိုပါစာချုပ်မှ နုတ်ထွက်ပါက အလွန်ဝမ်းနည်းဖွယ်ကောင်းသော အခြေအနေ ဖြစ်လိမ့်မည် ဟု ပြောကြားခဲ့သည်။

အီရန်လွှတ်တော်၏ နိုင်ငံခြားဆက်ဆံရေးကော်မတီဥက္ကဋ္ဌ အစ္စဘစ် ဂိုလ်ရူးက အမေရိကန်က ဖော်ဒိုးရှိ ယူရေနီယမ် ထပ်တိုးသန့်စင်ရေးစက်ရုံ အပါအဝင် အဏုမြူစက်ရုံ ၃ ခုကို တိုက်ခိုက်ခဲ့သည့် ဇွန်လ ၂၂ ရက်နေ့ တွင် အီရန်နိုင်ငံသည် စာချုပ်မှ နုတ်ထွက်ရန် တရားဝင် အခွင့်အရေး ရှိသည်ဟု ပြောကြားခဲ့သည်။ နောက်ပိုင်းတွင် ၎င်းက လွှတ်တော် အမတ် များသည် NPT တွင် ဆက်လက်ပါဝင်မှုကို ပြန်လည်သုံးသပ်မည်ဟု ဖြည့်စွက်ပြောကြားခဲ့သည်။

ယခုသီတင်းပတ်အစောပိုင်းတွင် အီရန်လွှတ်တော်က IAEA နှင့် ပူးပေါင်း ဆောင်ရွက်မှုကို ယာယီရပ်ဆိုင်းရန် မဲခွဲဆုံးဖြတ်ခဲ့သည်။ ထိုဆုံးဖြတ်ချက်သည် အီရန်၏ အမြင့်ဆုံးခေါင်းဆောင် အယ်လီ ခါမေနီက အေဂျင်စီသည် တိုက်ခိုက်မှုများကို မျှတစွာ ဝေဖန်ရှုတ်ချခြင်းမပြုဟု စွပ်စွဲ ပြောဆို ပြီးနောက် ပေါ်ပေါက်လာခြင်းဖြစ်သည်။ စစ်ရေးရည်မှန်းချက်အရ အဏုမြူ အစီအစဉ် ကို ဖော်ဆောင်ခြင်းမရှိဟု ငြင်းဆိုထားသော အီရန်နိုင်ငံသည် အရပ်ဘက် ရည်ရွယ်ချက်များအတွက် ယူရေနီယမ်ထပ်တိုးသန့်စင်ရန် အခွင့်အရေးရှိသည် ဟူသော ရပ်တည်ချက်ကို ဆက်လက်ကိုင်စွဲထားသည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

စပိန်ဝန်ကြီးချုပ် Pedro Sanchez က EU ၏ စံနှစ်မျိုးရပ်တည်မှုကို ဝေဖန်လျက် ယူကရိန်းပဋိပက္ခနှင့်ပတ်သက်၍ ရုရှားအပေါ် ပိတ်ဆို့ အရေးယူမှုမျိုးစုံချမှတ်ထားသော်လည်း ဂါဇာစစ်ပွဲအတွက် အစ္စရေးကို အလားတူအရေးယူမှုမပြုခြင်းကို ထောက်ပြခဲ့သည်။

ကြာသပတေးနေ့ (ဇွန် ၂၆) တွင် သတင်းမီဒီယာများအား ပြောကြားရာ တွင် Sanchez က အစ္စရေးနှင့် EU ၏ ကုန်သွယ်ရေး သဘောတူညီ ချက်ကို ဆိုင်းငံ့ရန် အဆိုပြုမည်ဟု ပြောကြားခဲ့သည်။ ထိုသဘောတူညီချက် ၏ အပိုဒ် ၂ တွင် လူ့အခွင့်အရေးကို သဘောတူညီချက်၏ "အခြေခံ အကျဆုံးအချက်" အဖြစ် သတ်မှတ်ထားသည်။

၂၀၂၃ ခုနှစ်၊ အောက်တိုဘာလမှစတင်၍ ဂါဇာတွင် ပါလက်စတိုင်းလူမျိုး ၅၆,၀၀၀ ကျော် သေဆုံးခဲ့ရသည့် "ကပ်ဘေးဆိုက်ရောက်နေသော အခြေအနေ" နှင့်ပတ်သက်၍ ကုလသမဂ္ဂ၏ အစီရင်ခံစာများက သတိပေးနေကြောင်း လည်း ၎င်းက ထောက်ပြခဲ့သည်။

"ယူကရိန်းအပေါ် ရုရှား၏ ကျူးကျော်မှုအတွက် ပိတ်ဆို့အရေးယူမှု ၁၈ ကြိမ်အထိ မိမိတို့ချမှတ်ထားပြီး၊ အစ္စရေးက လူ့အခွင့်အရေးဆိုင်ရာ အပိုဒ် ၂ ကို ထင်ရှားစွာချိုးဖောက်နေသော်လည်း EU က သဘောတူညီချက်ကို ဆိုင်းငံ့နိုင်ခြင်းမရှိသည်မှာ လုံးဝအဓိပ္ပာယ်မရှိပါ" ဟု Sanchez က ပြောကြားခဲ့သည်။

မက်ဒရစ်မြို့ရှိ အစ္စရေးသံရုံးသည် Sanchez ၏ ထုတ်ဖော် ပြောဆိုချက် များကို ကျင့်ဝတ်နှင့်မညီသော စကားများအဖြစ် ရှုတ်ချကာ ၎င်းအား အစ္စရေးဆန့်ကျင်ရေး စည်းရုံးလှုံ့ဆော်မှုများ လုပ်ဆောင်နေသည်ဟု စွပ်စွဲခဲ့သည်။

"ဘက်ပေါင်းစုံမှ အသက်ရှင်ရေးခြိမ်းခြောက်မှုများနှင့် ရင်ဆိုင်နေရသော ဒီမိုကရေစီနိုင်ငံတစ်နိုင်ငံဖြစ်သည့် အစ္စရေးတွင် ၎င်း၏ နိုင်ငံသားများကို ကာကွယ်ရန် အခွင့်အရေးရော တာဝန်ပါရှိသည်" ဟု အဆိုပါသံရုံးက X တွင် ထုတ်ပြန်ချက်၌ ဖော်ပြခဲ့သည်။

ထိုသို့သော သံရုံး၏ လက်သင့်မခံနိုင်ဖွယ်ဝေဖန်မှုများအပေါ် တုံ့ပြန်သည့် အနေဖြင့် စပိန်နိုင်ငံခြားရေးဝန်ကြီးဌာနသည် အစ္စရေးသံတမန်အား ဆင့်ခေါ်သတိပေးခဲ့သည်။

၂၀၂၃ ခုနှစ်၊ အောက်တိုဘာ ၇ ရက်နေ့တွင် ဟားမက် နှင့် မဟာမိတ် ပါလက်စတိုင်းအုပ်စုများက အစ္စရေး ၁,၂၀၀ ခန့်သတ်ဖြတ်ခံရပြီး ၂၀၀ ကျော်ကို အကျဉ်းသားအဖြစ်ဖမ်းဆီးခေါ်ဆောင်သွားသည့် ရုတ်တရက် တိုက်ခိုက်မှုအပြီး အစ္စရေးသည် ဂါဇာတွင် စစ်ဆင်ရေး စတင်ခဲ့ခြင်းဖြစ်သည်။ ၂၀၂၄ မတ်လတွင် စစ်ပြေငြိမ်းရေးပျက်ပြားပြီးနောက် အစ္စရေး ကာကွယ်ရေးတပ်မတော် (IDF) သည် ပါလက်စတိုင်းနယ်မြေတွင် ၎င်း၏ တိုက်ခိုက်ရေးလုပ်ငန်းစဉ်ကို ပြန်လည်စတင်ခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အနောက်နိုင်ငံများက ရုရှား၏အရန်ငွေကြေးများကို သိမ်းဆည်းရန် ကြိုးပမ်းမှုမှန်သမျှသည် ဒေသတွင်းငွေပေးချေမှုစနစ်များဆီသို့ ပြန်လည် ပြောင်းလဲ၍မရသော အပြောင်းအလဲကို ဖြစ်ပေါ်စေမည်ဖြစ်ပြီး နောက်ဆုံး တွင် ကမ္ဘာ့စီးပွားရေးအတွက် အကျိုးကျေးဇူးဖြစ်ထွန်းစေမည်ဟု သမ္မတ ဗလာဒီမာ ပူတင်က ပြောကြားခဲ့သည်။

၂၀၂၂ ခုနှစ်၊ ဖေဖော်ဝါရီလတွင် ယူကရိန်းပဋိပက္ခ မြင့်တက်လာ ပြီးနောက် အနောက်နိုင်ငံများက ရုရှားပိုင်အရန်ငွေကြေး အမေရိကန်ဒေါ်လာ ဘီလီယံ ၃၀၀ ခန့်ကို သိမ်းဆည်းခဲ့သည်။ ယင်းငွေများ၏ ယူရို ၂၀၀ ဘီလီယံ (အမေရိကန်ဒေါ်လာ ၂၀၉ ဘီလီယံ) ခန့်ကို ဘရပ်ဆဲလ် အခြေစိုက် စာရင်းရှင်းလင်းရေးဌာန Euroclear တွင် သိမ်းဆည်း ထားသည်။ အီးယူ၏ နိုင်ငံခြားရေးမူဝါဒအကြီးအကဲ Kaja Kallas က ယူကရိန်းပြန်လည်တည်ဆောက်ရေးအတွက် ထိုငွေများကို အသုံးပြုရန် အကြိမ်ကြိမ်တောင်းဆိုခဲ့သော်လည်း အီးယူအဖွဲ့ဝင်နိုင်ငံအချို့က ယင်း အဆိုကို ကန့်ကွက်ခဲ့ကြသည်။

ပူတင်က မင့်စ်မြို့တွင် ကျင်းပသော ယူရေးရှားစီးပွားရေးဖိုရမ်တွင် “၎င်းတို့အနေဖြင့် မိမိတို့၏ ငွေကြေးများကို မည်သို့ ခိုးယူမလဲဆိုသည်ကို အမြဲဆွေးနွေးလျက်ရှိကြောင်း” ပြောကြားခဲ့သည်။ “ထိုသို့ ခိုးယူ လိုက်သည် နှင့် ဒေသတွင်းငွေပေးငွေယူစနစ်တွေဆီ ပြောင်းလဲမှုက ပိုမြန်လာပြီး မည်သည့်နည်းနှင့်မျှ နောက်ပြန်မလှည့်နိုင်တော့” ဟု ၎င်းက ဆိုသည်။ နောက်ဆုံးတွင် ယင်းအခြေအနေသည် ကမ္ဘာ့စီးပွားရေးအတွက် ကောင်းမွန် သောအရာဖြစ်လာမည်ဟု ၎င်းက ဖြည့်စွက်ပြောကြားခဲ့ပြီး ယင်းအတွက် တန်ဖိုးတစ်ခု ပြန်လည်ပေးဆပ်ရခြင်းသည် ထိုက်တန်သည်ဟု ပြောဆို ခဲ့သည်။

ပူတင်က ထပ်မံ၍ “ခိုးယူခြင်း” ဆိုသည့် အသုံးအနှုန်းသည် မလုံ လောက်ကြောင်း ဖြည့်စွက်ပြောကြားခဲ့ကာ “ခိုးယူခြင်းဆိုတာ ပစ္စည်းကို တိတ်တဆိတ်ယူတာပါ။ ဒါကတော့ ပွင့်ပွင့်လင်းလင်းလုယူတာပါ။ ဒါက လုယက်တာ (Robbery) ပါ” ဟု ၎င်းကပြောခဲ့သည်။

“အဆိုပါကိစ္စနှင့်ပတ်သက်ပြီး မိမိတို့၏ ဘဏ္ဍာရေးနှင့် ငွေပေးချေမှု စနစ် တွေကို ပိုမိုအားကောင်းအောင် ဆက်လုပ်သွားရန် စိတ်ပိုင်းဖြတ်ထား ပါသည်” ဟု ပူတင်က တက်ရောက်လာသူများအား အသိပေး ပြောကြား ခဲ့သည်။

သိမ်းဆည်းထားသည့်ရန်ပုံငွေများမှ ယူရိုဘီလီယံချီသော အတိုးများ ရရှိထားပြီးဖြစ်ကာ၊ ယင်းအနက် ဒေါ်လာ ၁.၆၃ ဘီလီယံကို G7 မှ ယူကရိန်း အားပေးအပ်သည့် ဒေါ်လာ ၅၀ ဘီလီယံချေးငွေအတွက် ပြန်လည် ပေးဆပ်ရန် Euroclear က ယမန်နှစ် ဇူလိုင်တွင် ကိယက်ဗ်သို့ လွှဲပြောင်း ပေးခဲ့သည်။

ဘရပ်ဆဲလ်သည် လက်ရှိတွင် အပြည်ပြည်ဆိုင်ရာဥပဒေစံနှုန်းများကို မချိုးဖောက်ဘဲ သိမ်းဆည်းထားသော ရုရှား၏ပိုင်ဆိုင်မှုများမှ ဝင်ငွေ ပိုမို ထုတ်ယူနိုင်မည့်နည်းလမ်းများကို ဆွေးနွေးလျက်ရှိသည်။ အပြည်ပြည် ဆိုင်ရာငွေကြေးရန်ပုံငွေအဖွဲ့က အပြီးတိုင်သိမ်းဆည်းမှုသည် အနောက် နိုင်ငံများ၏ ဘဏ္ဍာရေးအဖွဲ့အစည်းများအပေါ် ကမ္ဘာလုံးဆိုင်ရာ ယုံကြည်မှု ကို ထိခိုက်စေနိုင်ကြောင်း သတိပေးထားသည်။

အဖွဲ့ဝင်နိုင်ငံများအကြား ရုရှား၏ ပိုင်ဆိုင်မှုများသိမ်းဆည်းရန် ဆွေးနွေးမှု များသည် သုံးနှစ်ကျော်ကြာမြင့်ခဲ့သော်လည်း အဆုံးအဖြတ် မရရှိ သေးပေ။

မော်စကိုသည် ၎င်း၏ပိုင်ဆိုင်မှုများ သိမ်းဆည်းခံရမှုကို ပြင်းပြင်းထန်ထန် ရှုတ်ချခဲ့ပြီး ရုရှားရှိအနောက်နိုင်ငံများ၏ ရင်းနှီးမြှုပ်နှံမှုများနှင့် ပိုင်ဆိုင်မှုများအပေါ် ပြန်လည်အရေးယူမှုများပြုလုပ်နိုင်ကြောင်း အရိပ်အမြွက် ပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ကင်ညာနိုင်ငံ၏ နိုင်ငံတကာလွတ်ငြိမ်းချမ်းသာခွင့်အဖွဲ့က ဗုဒ္ဓဟူးနေ့ (ဇွန် ၂၅) တွင် ဖြစ်ပွားခဲ့သော အစိုးရဆန့်ကျင်ဆန္ဒပြမှုများကြောင့် လူ ၁၆ ဦး သေဆုံးပြီး ၄၀၀ ခန့်ဒဏ်ရာရရှိခဲ့ကြောင်း ထုတ်ပြန်ခဲ့သည်။

လူ့အခွင့်အရေးအဖွဲ့၏ အမှုဆောင်ဒါရိုက်တာ Irungu Houghton က CNN သို့ ကြာသပတေးနေ့ (ဇွန် ၂၆) တွင် သေဆုံးသူအရေအတွက်ကို အတည်ပြုပြောကြားခဲ့သည်။

ယခုသီတင်းပတ် ဆန္ဒပြမှုများသည် ၂၀၂၃ ခုနှစ်၊ ဇွန်လက အခွန်မူဝါဒ ဆန့်ကျင်ဆန္ဒပြမှုများ၏ တစ်နှစ်ပြည့်အထိမ်းအမှတ်ဖြစ်ပြီး ယခင် ကလည်း လူပေါင်းများစွာသေဆုံးကာ တစ်နိုင်ငံလုံး အမျက်ထွက်မှု ဖြစ်စေခဲ့သည်။

၂၀၂၄ ခုနှစ် ဆန္ဒပြမှုများကြောင့် အခွန်တိုးမြှင့်သော ငွေကြေးဥပဒေကြမ်း ကို ရုပ်သိမ်းခဲ့ရသော်လည်း၊ ရဲတပ်ဖွဲ့၏ ရက်စက်မှုများ (ဆရာတစ်ဦး အဖမ်းခံရစဉ်သေဆုံးမှု၊ လက်နက်မဲ့လမ်းဘေးဈေးသည်ကို ပစ်ခတ်မှု စသည်) နှင့်ပတ်သက်၍ လူငယ်များအမျက်ထွက်နေဆဲဖြစ်သည်။

ဗုဒ္ဓဟူးနေ့ (ဇွန် ၂၅) တွင် နိုင်ရိုဘီမြို့တော်၊ မွန်ဘာဆာကမ်းခြေမြို့နှင့် အခြားမြို့များတွင် လူထုထောင်ချီ၍ ဆန္ဒပြခဲ့ကြပြီး နိုင်ရိုဘီတွင် ဆန္ဒပြမှုမတိုင်မီကပင် ပါလီမန်နှင့် သမ္မတရုံးသို့ သွားရောက်သည့်လမ်း များကို ပိတ်ဆို့ထားခဲ့သည်။

နိုင်ရိုဘီတွင် ငြိမ်းချမ်းစွာဆန္ဒပြသူများကို လူစုခွဲရန် ရဲများက မျက်ရည်ယို ဗုံးများ၊ သေနတ်များဖြင့် ပစ်ခတ်မှုများ ပြုလုပ်ခဲ့သည်ဟု CNN က ဖော်ပြ ထားသည်။ ထို့အပြင် ကင်ညာဆက်သွယ်ရေးအာဏာပိုင်အဖွဲ့ (CAK) က လူငယ်ဦးဆောင်ဆန္ဒပြပွဲများအား တိုက်ရိုက်ထုတ်လွှင့်မှုများ ရပ်ဆိုင်းရန် တိုင်းပြည်အတွင်းရှိ ရုပ်မြင်သံကြားနှင့် ရေဒီယိုဌာနအားလုံးကို အမိန့် ထုတ်ပြန်ခဲ့သည်။ ဆန္ဒပြသူအချို့က အသုံးပြုပြီးကျည်ခွံများကို ပြသခဲ့ ကြသည်။

ကိုးကား- CNN

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

US Immigration and Customs Enforcement (ICE) ၏ ဖမ်းဆီးခံ ခဲ့ရသည့် ကနေဒါနိုင်ငံသားတစ်ဦး ဖလော်ရီဒါအကျဉ်းစခန်းတွင် သေဆုံး ခဲ့ပြီးနောက် ကနေဒါ ဝန်ကြီးချုပ်ရုံးအရာရှိများက အမေရိကန် အစိုးရ ထံမှ အချက်အလက်များ ထပ်မံတောင်းဆိုနေသည်။ 

ICE အရာရှိများ၏ ပြောကြားချက်အရ Johnny Noviello (၄၉ နှစ်) သည် အမေရိကန်တွင် တရားဝင်နေထိုင်ခွင့်ရသူဖြစ်ပြီး ၂၀၂၃ ခုနှစ်က မှုခင်း အဖွဲ့အစည်းဆိုင်ရာ ဥပဒေချိုးဖောက်မှုနှင့် မူးယစ်ဆေးဝါး တရားမဝင် ကုန်ကူးမှုများဖြင့် အပြစ်ရှိကြောင်းတွေ့ရှိခဲ့ပြီး ပြည်နှင်ဒဏ်ခံရနိုင်သည့် အခြေအနေကြောင့် Miami ရှိ ဖက်ဒရယ်အကျဉ်းစခန်းတွင် ထိန်းသိမ်းခံ ထားရသူဖြစ်သည်။

ICE ၏ထုတ်ပြန်ချက်အရ တနင်္လာနေ့ (ဇွန် ၂၃) မွန်းလွဲပိုင်းတွင် Noviello အား အသက်ရှူလမ်းကြောင်းပိတ်ဆို့နေသည့်အနေအထားဖြင့် တွေ့ရှိခဲ့ပြီး Miami Fire Rescue Department မှ သေဆုံးကြောင်း အတည်ပြုခဲ့သည်။ သေဆုံးရသည့်အကြောင်းရင်းကိုမူ စုံစမ်းစစ်ဆေးဆဲ ဖြစ်သည်။

“ကျန်းမာရေးဝန်ထမ်းများက ချက်ချင်းတုန့်ပြန်ကာ အသက်ရှူပြန်လည် နိုးကြားစေရေးနည်းလမ်း (CPR)၊ အလိုအလျောက်နှလုံးခုန်စက်တို့ဖြင့် ကုသမှုများပြုလုပ်ခဲ့ပြီး 911 သို့ အရေးပေါ်ခေါ်ဆိုခဲ့သည်” ဟု ICE မှ ပြောကြားခဲ့သည်။

ICE ၏ သတင်းထုတ်ပြန်ချက်အရ Noviello အား မေလ ၁၅ ရက်နေ့က ကနဦး စစ်ဆေးရေးရုံးတစ်ခုတွင် ICE မှ ဖမ်းဆီးခဲ့ပြီး “ထိန်းချုပ်ထားသော မူးယစ်ဆေးဝါးဆိုင်ရာ ဥပဒေနှင့် ညီညွတ်မှုမရှိသည့် ပြစ်မှုတစ်ခုအတွက် အပြစ်ရှိကြောင်းတွေ့ရှိထားသူ” အဖြစ် ပြည်နှင်ဒဏ်ပေးရန် စီရင်ချက် ချမှတ်နိုင်ရေး အကြောင်းကြားစာထုတ်ပြန်ခဲ့ကြောင်း သိရှိရသည်။

ထိုဖမ်းဆီးမှုသည် Trump အစိုးရ ၏ ရာဇဝတ်မှုကျူးလွန်ခဲ့သည့် တရားမဝင် ဝင်ရောက်နေထိုင်သူများအား အဓိကထားဖမ်းဆီးနေသော ပြည်နှင်ဒဏ်ပေးနိုင်ရေးလုပ်ငန်းစဉ် ကျယ်ပြန့်လာချိန်တွင် ဖြစ်ပွားခဲ့သည်။

ကနေဒါနိုင်ငံခြားရေးဝန်ကြီး Anita Anand က ကြေညာချက် တစ်စောင် တွင် Noviello သေဆုံးမှုနှင့်ပတ်သက်၍ ကနေဒါအစိုးရအား ကြာသပတေးနေ့ (ဇွန် ၂၆) က အသိပေးခဲ့ကြောင်း ဖော်ပြခဲ့သည်။ “ကနေဒါ ဝန်ကြီးချုပ်ရုံး အရာရှိများသည် အမေရိကန်အရာရှိများထံမှ အရေးပေါ် အချက်အလက် များ ရယူနေပါသည်” ဟု ၎င်းကြေညာချက်တွင် ဖော်ပြထားပြီး မိသားစု ၏ ကိုယ်ရေးကိုယ်တာအချက်အလက်များကို လေးစားမှုဖြင့် နောက်ထပ် အသေးစိတ်များ ထုတ်ပြန်မည်မဟုတ်ကြောင်း ဖြည့်စွက်ဖော်ပြထားသည်။

ကိုးကား- CNN

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

US Immigration and Customs Enforcement (ICE) ၏ ဖမ်းဆီးခံ ခဲ့ရသည့် ကနေဒါနိုင်ငံသားတစ်ဦး ဖလော်ရီဒါအကျဉ်းစခန်းတွင် သေဆုံး ခဲ့ပြီးနောက် ကနေဒါ ဝန်ကြီးချုပ်ရုံးအရာရှိများက အမေရိကန် အစိုးရ ထံမှ အချက်အလက်များ ထပ်မံတောင်းဆိုနေသည်။ 

ICE အရာရှိများ၏ ပြောကြားချက်အရ Johnny Noviello (၄၉ နှစ်) သည် အမေရိကန်တွင် တရားဝင်နေထိုင်ခွင့်ရသူဖြစ်ပြီး ၂၀၂၃ ခုနှစ်က မှုခင်း အဖွဲ့အစည်းဆိုင်ရာ ဥပဒေချိုးဖောက်မှုနှင့် မူးယစ်ဆေးဝါး တရားမဝင် ကုန်ကူးမှုများဖြင့် အပြစ်ရှိကြောင်းတွေ့ရှိခဲ့ပြီး ပြည်နှင်ဒဏ်ခံရနိုင်သည့် အခြေအနေကြောင့် Miami ရှိ ဖက်ဒရယ်အကျဉ်းစခန်းတွင် ထိန်းသိမ်းခံ ထားရသူဖြစ်သည်။

ICE ၏ထုတ်ပြန်ချက်အရ တနင်္လာနေ့ (ဇွန် ၂၃) မွန်းလွဲပိုင်းတွင် Noviello အား အသက်ရှူလမ်းကြောင်းပိတ်ဆို့နေသည့်အနေအထားဖြင့် တွေ့ရှိခဲ့ပြီး Miami Fire Rescue Department မှ သေဆုံးကြောင်း အတည်ပြုခဲ့သည်။ သေဆုံးရသည့်အကြောင်းရင်းကိုမူ စုံစမ်းစစ်ဆေးဆဲ ဖြစ်သည်။

“ကျန်းမာရေးဝန်ထမ်းများက ချက်ချင်းတုန့်ပြန်ကာ အသက်ရှူပြန်လည် နိုးကြားစေရေးနည်းလမ်း (CPR)၊ အလိုအလျောက်နှလုံးခုန်စက်တို့ဖြင့် ကုသမှုများပြုလုပ်ခဲ့ပြီး 911 သို့ အရေးပေါ်ခေါ်ဆိုခဲ့သည်” ဟု ICE မှ ပြောကြားခဲ့သည်။

ICE ၏ သတင်းထုတ်ပြန်ချက်အရ Noviello အား မေလ ၁၅ ရက်နေ့က ကနဦး စစ်ဆေးရေးရုံးတစ်ခုတွင် ICE မှ ဖမ်းဆီးခဲ့ပြီး “ထိန်းချုပ်ထားသော မူးယစ်ဆေးဝါးဆိုင်ရာ ဥပဒေနှင့် ညီညွတ်မှုမရှိသည့် ပြစ်မှုတစ်ခုအတွက် အပြစ်ရှိကြောင်းတွေ့ရှိထားသူ” အဖြစ် ပြည်နှင်ဒဏ်ပေးရန် စီရင်ချက် ချမှတ်နိုင်ရေး အကြောင်းကြားစာထုတ်ပြန်ခဲ့ကြောင်း သိရှိရသည်။

ထိုဖမ်းဆီးမှုသည် Trump အစိုးရ ၏ ရာဇဝတ်မှုကျူးလွန်ခဲ့သည့် တရားမဝင် ဝင်ရောက်နေထိုင်သူများအား အဓိကထားဖမ်းဆီးနေသော ပြည်နှင်ဒဏ်ပေးနိုင်ရေးလုပ်ငန်းစဉ် ကျယ်ပြန့်လာချိန်တွင် ဖြစ်ပွားခဲ့သည်။

ကနေဒါနိုင်ငံခြားရေးဝန်ကြီး Anita Anand က ကြေညာချက် တစ်စောင် တွင် Noviello သေဆုံးမှုနှင့်ပတ်သက်၍ ကနေဒါအစိုးရအား ကြာသပတေးနေ့ (ဇွန် ၂၆) က အသိပေးခဲ့ကြောင်း ဖော်ပြခဲ့သည်။ “ကနေဒါ ဝန်ကြီးချုပ်ရုံး အရာရှိများသည် အမေရိကန်အရာရှိများထံမှ အရေးပေါ် အချက်အလက် များ ရယူနေပါသည်” ဟု ၎င်းကြေညာချက်တွင် ဖော်ပြထားပြီး မိသားစု ၏ ကိုယ်ရေးကိုယ်တာအချက်အလက်များကို လေးစားမှုဖြင့် နောက်ထပ် အသေးစိတ်များ ထုတ်ပြန်မည်မဟုတ်ကြောင်း ဖြည့်စွက်ဖော်ပြထားသည်။

ကိုးကား- CNN

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂