ဗီယက်နမ်နိုင်ငံသည် ဘဏ္ဍာရေးအသုံးစရိတ်များကို လျှော့ချရန်နှင့် စီမံခန့်ခွဲရေးဆိုင်ရာ စွမ်းဆောင်ရည်မြှင့်တင်ရန် ကြိုးစားနေချိန်တွင် အစိုးရယန္တရားကို ငါးပုံတစ်ပုံအထိ လျှော့ချမည့် ဗျူရိုကရေစီ ပြုပြင် ပြောင်းလဲရေးအစီအစဉ်ကို ဖေဖော်ဝါရီ ၁၈ ရက်(အင်္ဂါနေ့)တွင် ဗီယက်နမ် လွှတ်တော်မှ အတည်ပြုခဲ့သည်။

မတ်လ ၁ ရက်နေ့မှစတင်၍ အစိုးရဝန်ကြီးဌာန အရေအတွက်ကို လက်ရှိ ၁၈ ခုမှ ၁၄ ခုသို့ လျှော့ချသွားမည်ဖြစ်ကြောင်း အဆိုပါအစည်းအဝေး ထုတ်ပြန်ချက်တွင် ဖော်ပြထားသည်။

လွှတ်တော်ကိုယ်စားလှယ်များ၏ ၉၇ ရာခိုင်နှုန်းကျော်က ထိုအစီအစဉ် ကို အတည်ပြုခဲ့ခြင်းဖြစ်သည်။

အင်္ဂါနေ့အစောပိုင်းက အစည်းအဝေးတွင် ပြင်ဆင်ချက်ဥပဒေတစ်ရပ်ကို အတည်ပြုခဲ့ပြီးနောက် အေဂျင်စီလေးခုနှင့် နိုင်ငံပိုင်ရုပ်သံချန်နယ် ငါးခု တို့ အပါအဝင် အခြားလျှော့ချမှုများ ပါဝင်သည့် အစိုးရယန္တရား၏ ၁၅ ရာခိုင်နှုန်းမှ ၂၀ ရာခိုင်နှုန်းအထိ လျှော့ချမည့်အစီအစဉ်ကို အတည်ပြုရန် ဆွေးနွေးခဲ့ကြသည်။

ထိုသို့ဆောင်ရွက်မှုသည် “နိုင်ငံတော်ဘဏ္ဍာငွေ သက်သာစေရုံသာမက ပိုအရေးကြီးသည်မှာ စနစ်၏ စွမ်းဆောင်ရည်ကိုပါ မြှင့်တင်ပေးနိုင်လိမ့်မည်” ဟု ဗီယက်နမ်အာဏာရ ကွန်မြူနစ်ပါတီ အထွေထွေအတွင်းရေးမှူး To Lam က ပြီးခဲ့သည့်အပတ်က လွှတ်တော်သို့ ပြောကြားခဲ့သည်။

ရင်းနှီးမြုပ်နှံသူများ၊ သံတမန်များနှင့် တာဝန်ရှိသူများက အဆိုပါ အစီအစဉ်ကို ကျယ်ကျယ်ပြန့်ပြန့် ကြိုဆိုခဲ့ကြသော်လည်း နိုင်ငံခြားရင်းနှီးမြုပ်နှံမှု များကို ကြီးကြီးမားမားမှီခို နေရသည့် ဒေသတွင်းစက်မှုဗဟိုဖြစ်သည့် ဗီယက်နမ်နိုင်ငံတွင် ရေတိုကာလအတွင်း စီမံခန့်ခွဲရေးဆိုင်ရာ ကြန့်ကြာမှု အချို့ကို ကြုံတွေ့လာရဖွယ်ရှိသည်။

ပြုပြင်ပြောင်းလဲမှုသည် စီမံကိန်းအတည်ပြုချက်အပေါ် သက်ရောက်မှု ရှိမည်မဟုတ်ကြောင်း အစိုးရက ပြောကြားခဲ့သည်။

စီမံကိန်းနှင့် ရင်းနှီးမြှုပ်နှံမှုဝန်ကြီးဌာနသည် နိုင်ငံခြားရင်းနှီးမြှုပ်နှံမှု စီမံကိန်းများကို အတည်ပြုပေးမည့် ဘဏ္ဍာရေးဝန်ကြီးဌာနနှင့် ပူးပေါင်းမည်ဖြစ်ပြီး ပို့ဆောင်ရေးဝန်ကြီးဌာနနှင့် ဆောက်လုပ်ရေးဝန်ကြီးဌာနတို့ ပေါင်းစည်းမည်ဖြစ်သည်။

ထို့အပြင် သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနနှင့် စိုက်ပျိုးရေးဝန်ကြီးဌာနတို့လည်း ပေါင်းစည်းမည်ဖြစ်သည်။ လက်ရှိ ရင်းနှီးမြှုပ်နှံမှုဝန်ကြီး အပါအဝင် ဒုတိယ၀န်ကြီးချုပ် အသစ်နှစ်ဦးကို ခန့်အပ်ရန် လွှတ်တော်ကိုယ်စားလှယ်များက ယင်းနေ့တွင် အတည်ပြုခဲ့သည်။ ထို့ကြောင့် ဒုတိယဝန်ကြီးချုပ် အရေအတွက်သည် ငါးဦးမှ ခုနစ်ဦး အထိ တိုးလာမည်ဖြစ်သည်။

ဝန်ကြီးဌာနများ ပြင်ဆင်ဖွဲ့စည်းမှုသည် နိုင်ငံ့ဝန်ထမ်းပေါင်း ၁၀၀,၀၀၀ ကို ထိခိုက်စေနိုင်သည်ဟု ပြီးခဲ့သည့်လတွင် ဗီယက်နမ်နိုင်ငံပိုင် မီဒီယာက ဖော်ပြခဲ့သည်။

“စွမ်းဆောင်ရည်ညံ့ဖျင်းသည့် ဝန်ထမ်းများကို စနစ်ကနေ ဖယ်ရှားရမည် ဖြစ်ကြောင်း” ဒုတိယဝန်ကြီးချုပ် ငုယင်ဟွာဘင်း၏ ပြောကြားချက်ကို ကိုးကား၍ ဖော်ပြခဲ့ခြင်းဖြစ်သည်။

ကိုးကား-Reuters

ဖေဖော်ဝါရီ ၁၈

အစ္စရေးဓားစာခံ ၆ ဦးအား ဖေဖော်ဝါရီ ၂၂ ရက်(စနေနေ့)တွင် ပြန်လည်လွှဲပြောင်းပေးရေးနှင့် အခြား ၈ ဦး၏ ရုပ်အလောင်းများအား ယခုသီတင်းပတ်နှင့် လာမည့်သီတင်းပတ်အတွင်း လွှဲပြောင်း ပေးရေး အစ္စရေးနှင့် ဟားမက်စ် တို့အကြား သဘောတူညီမှုရရှိခဲ့ပါသည်။

အဆိုပါသဘောတူညီချက်ကို ဖေဖော်ဝါရီ ၁၈ ရက်(အင်္ဂါနေ့)က ကိုင်ရိုမြို့တွင် ချမှတ်နိုင်ခဲ့ကြောင်း အစ္စရေး ဝန်ကြီး ချုပ်ရုံးက အတည်ပြုပြောကြားခဲ့ပါသည်။

ယခင်က အစ္စရေးနိုင်ငံသား ဓားစာခံ ၃ ဦးကို လွှတ်ပေးရန် စီစဉ်ထားသော်လည်း အသက်ရှင် ကျန်ရစ်သည့် ဓားစာခံ ၆ ဦးစလုံးကို လွှဲပြောင်းပေးမည်ဖြစ်ကြောင်း ဟားမက်ဘက်က ပြောကြားခဲ့သည်။ ဓားစာခံများအနက် သေဆုံး သွားသည့်ဓားစာခံ ၄ ဦး၏ ရုပ်အလောင်းများကို ဖေဖော်ဝါရီ ၂၀ ရက်(ကြာသပတေးနေ့)တွင်လည်းကောင်း၊ ကျန် ၄ ဦး၏ ရုပ်အလောင်းများကို လာမည့်သတင်းပတ် အတွင်း ဖေဖော်ဝါရီ ၂၇ ရက်(ကြာသပတေးနေ့)တွင်လည်းကောင်း ပြန်လည်လွှဲပြောင်းပေးရန် စီစဉ်ထားရှိကြောင်း ဝန်ကြီးချုပ် နေတန်ယာဟု၏ သတင်းထုတ်ပြန်ချက်တွင် ဖော်ပြ ထားပါသည်။

အဆိုပါ ရုပ်အလောင်းများထဲတွင် Bibas မိသားစုဝင်များလည်း ပါဝင်နိုင်ကြောင်း ဂါဇာရှိ ဟားမက်ခေါင်းဆောင် ခါလစ်လ် အယ် ဟေးယား(Khalil al-Hayya)က ရုပ်သံထုတ်လွှင့်ချက် တစ်ခုတွင် ဖေဖော်ဝါရီ ၁၈ ရက်(အင်္ဂါနေ့)က ထုတ်ပြန်ပြောကြားခဲ့ပါသည်။

ဟားမက် စစ်သွေးကြွများသည် Yarden ၊ Shiri Bibas နှင့် ၎င်းတို့၏ ကလေးနှစ်ဦးဖြစ်သည့် လေးနှစ်သား အရွယ် Ariel နှင့် ကိုးလသားအရွယ် Kfir တို့ကို ဓားစာခံများအဖြစ် ဖမ်းဆီးခေါ်ဆောင် သွားခဲ့သည်။ Yarden သည် ဖေဖော်ဝါရီလ ၁ ရက်နေ့က ပြန်လည်လွှတ်မြောက်လာခဲ့ပြီး ၎င်း၏ ဇနီးနှင့် သားသမီးများမှာ အသက်ရှင်လျက် ရှိနေမည်ဟု မျှော်လင့်လျက်ရှိသည်။ ဟားမက်တို့က ၎င်း၏ မိသားစုဝင်များမှာ သေဆုံးသွားပြီဖြစ်ကြောင်း ပြောကြားခဲ့သော်လည်း အစ္စရေးအနေဖြင့် ယင်းအချက်ကို အတည်ပြုနိုင်ခြင်းမရှိပေ။

ပါလက်စတိုင်းစစ်သွေးကြွအဖွဲ့က အစ္စရေးအား စတင်တိုက်ခိုက်သည့်ဖြစ်စဉ်မှစ၍ အစ္စရေးနှင့် ဟားမက်တို့အကြား ၁၅ လကျော် တိုက်ခိုက်မှုများဖြစ်ပွားပြီးနောက်ပိုင်း ဂါဇာဒေသ အပစ်အခတ်ရပ်စဲရေး သဘောတူညီချက်သည် ဇန်နဝါရီ ၁၉ ရက်မှ စတင်အသက်ဝင်ခဲ့သည်။

အပစ်အခတ်ရပ်စဲရေးသဘောတူညီချက်၏ ပထမအဆင့်အနေဖြင့် အစ္စရေးဓားစာခံ ၃၃ ဦးကို လွှတ်ပေးရန် စီစဉ်ခဲ့ သော်လည်း ဟားမက်တို့က အစ္စရေး ဓားစာခံ ၁၉ ဦးကိုသာ ပြန်လွှတ်ခဲ့ပြီး အပြန်အလှန်အားဖြင့် အစ္စရေး တို့ကလည်း ပါလက်စတိုင်းအကျဉ်းသား ၁၁၀၀ ဦးကို ပြန်လည် လွှဲပြောင်းပေးခဲ့သည်။ ဓားစာခံ ၁၄ ဦး လွှဲပြောင်းရန် ကျန်ရှိနေသေးပြီး ၎င်းတို့အနက် ၈ ဦးမှာ သေဆုံးသွားပြီဖြစ်ကြောင်း အစ္စရေးဖက်က ထုတ်ဖော်ပြောကြားခဲ့ပါသည်။

၂၀၂၃ ခုနှစ် တိုက်ခိုက်မှုဖြစ်စဉ်ဖြစ်ပွားစဉ်ကတည်းက ဂါဇာတွင် ဖမ်းဆီးထိန်းသိမ်းခြင်း ခံထားရသည့် ထိုင်းနိုင်ငံသား ၅ ဦးတို့သည်လည်း အပစ်အခတ်ရပ်စဲရေးသဘောတူညီချက်၏ ပြင်ပမှ ပြန်လည်လွတ်မြောက်လာခဲ့သည်။

အပစ်အခတ်ရပ်စဲရေးဆိုင်ရာ စေ့စပ်ညှိနှိုင်းသူများအနေဖြင့် အပြုသဘောဆောင်သည့် လုပ်ဆောင်မှုတစ်ရပ်ကို ဖော်ဆောင်နိုင်ရန်နှင့် အပစ်အခတ်ရပ်စဲရေးကို ဆက်လက်တည်မြဲနေစေရေးအတွက် ဓားစာခံများနှင့် အကျဉ်းသားများ အပြန်အလှန်လဲလှယ်ရေးအစီအစဉ်အသစ်များ ထပ်မံလုပ်ဆောင်ရန် တိုက်တွန်းခဲ့ကြောင်း စေ့စပ်ညှိနှိုင်းရေးနှင့် နီးစပ်သည့် ပါလက်စတိုင်း သတင်းရင်းမြစ်တစ်ခုက ထုတ်ဖော်ပြောကြားခဲ့ပါသည်။

အပစ်အခတ်ရပ်စဲရေးသဘောတူညီချက်၏ပထမအဆင့်သည် မတ်လ ၁ ရက်နေ့တွင် ပြီးဆုံးမည်ဖြစ်ပြီး ထာဝရ စစ်ပြေငြိမ်းရေးအပါအဝင် နောက်ထပ်အဆင့်များအတွက်ကိုလည်း ဆက်လက်ဆွေးနွေးလျက်ရှိသည်။

ရရှိထားသည့် အပစ်အခတ်ရပ်စဲရေးသဘောတူညီချက်အပေါ် ချိုးဖောက်မှုများရှိသည့်အပြင် အမေရိကန်သမ္မတ ဒေါ်နယ်ထရမ့်၏ ဂါဇာဒေသအားထိန်းချုပ်ပြီး ပါလက်စတိုင်းများအား အဆိုပါဒေသမှ ဖယ်ရှားပစ်မည့် ပြောဆိုချက် အပေါ် တင်းမာမှုများရှိသော်လည်း သဘောတူညီချက်ကို ယခုအချိန်အထိ ထိန်းသိမ်းထားနိုင်ဆဲပင်ဖြစ်သည်။

ပါလက်စတိုင်းများ ၎င်းတို့၏နေရင်းတွင် ဆက်လက်နေထိုင်နိုင်ရေးအတွက် ဂါဇာဒေသပြန်လည် တည်ဆောက်ရေး ဆိုင်ရာအစီအစဉ်ကို ဆွေးနွေးရန်အတွက် ဆော်ဒီအာရေးဗီးယားက အိမ်ရှင်အဖြစ် တာဝန်ယူ၍ အီဂျစ်၊ ဂျော်ဒန်၊ ကာတာနှင့် ယူအေအီးတို့ပါဝင်သည့် ၅ ပွင့်ဆိုင်အစည်းအဝေးကို ဖေဖော်ဝါရီ ၂၁ ရက်နေ့တွင် ကျင်းပပြုလုပ်ရန် စီစဉ်လျက်ရှိကြောင်း Bangkokpost သတင်းစာတွင် ရေးသားဖော်ပြထားပါသည်။

ကိုးကား- Bangkokpost.com            

ဘာသာပြန်ဆိုသူ

ဦးထက်ထက်အောင်(နစက-၄)

ရုရှားဖက်ဒရေးရှင်းကောင်စီဥက္ကဋ္ဌ Valentina Matviyenko ဦးဆောင်သော အဆင့်မြင့် ကိုယ်စားလှယ်အဖွဲ့သည် အီသီယိုးပီးယား နိုင်ငံသို့ ဖေဖော်ဝါရီ ၁၉ ရက်မှ စတင်၍ ၃ ရက်ကြာ ခရီးစဉ်တစ်ခု သွားရောက်နေကြောင်း၊ ခရီးစဉ်အတွင်း အီသီယိုးပီးယား ဝန်ကြီးချုပ် Ably Ahmed Ali နှင့် တွေ့ဆုံဆွေးနွေးခဲ့ကြောင်း သိရပါသည်။

အဆိုပါအဆင့်မြင့်ကိုယ်စားလှယ်အဖွဲ့တွင် Matviyenko နှင့်အတူ ရုရှား စီးပွားရေးဝန်ကြီး၊ ကျန်းမာရေးဝန်ကြီးနှင့် အဆင့်မြင့်အရာရှိကြီးများ လိုက်ပါသွားကြပါသည်။ 

Matviyenko က ရုရှားသမ္မတဗလာဒီမာပူတင်၏ နှုတ်ခွန်းဆက်သစကားကို ပြောကြားခဲ့ပြီး ရုရှားနှင့် အီသီယိုးပီးယားအကြား ဆက်ဆံရေး ဖွံ့ဖြိုးတိုးတက်လာရန် တာဝန်ယူပါကြောင်း၊ အီသီယိုးပီးယားသည် အာဖရိကတွင် ရုရှား၏ အရေးအပါဆုံး မိတ်ဖက်ဖြစ်ကြောင်း ပြောကြားခဲ့ပါသည်။

ခရီးစဉ်ရည်ရွယ်ချက်မှာ ရုရှားနှင့်အီသီယိုးပီးယားအကြား ဆွေးနွေးမှုများ ပိုမိုတိုးတက်လာစေရန်ဖြစ်ကြောင်း၊ ၂၀၂၄ ခုနှစ်တွင် နှစ်နိုင်ငံ စီးပွားရေး ကူးသန်းမှုမှာ လေးဆတိုးတက်လာခဲ့ကြောင်း Matviyenkoက ပြောထား ပါသည်။

ရုရှားစီးပွားရေးလုပ်ငန်းများအနေဖြင့် အာဖရိကတွင် လူဦးရေအများဆုံး ဖြစ်သည့် အီသီယိုးပီးယားနိုင်ငံသည် စွမ်းအင်၊ ဆေးဝါး၊ လယ်ယာ စိုက်ပျိုးရေး၊ နျူကလီးယားစွမ်းအင် နယ်ပယ်များတွင် စိတ်ဝင်စားမှု အပြည့်ရှိကြောင်း ဖော်ပြခဲ့ပါသည်။ 

ရုရှားအနေဖြင့် အိမ်နီးချင်း အနောက်ဥရောပနိုင်ငံများကို လျစ်လျူရှုရန် အာဖရိကနိုင်ငံများနှင့် ဆက်ဆံရေးတိုးတက်လာစေရေး ကြိုးပမ်းလျက် ရှိရာ အီသီယိုးပီးယားသည် လွတ်လပ်သည့် နိုင်ငံတစ်နိုင်ငံဖြစ်ပြီး အမေရိကန်နှင့် အနောက်နိုင်ငံများ၏ အားပြိုင်မှု ပစ်မှတ်မရှိသော နိုင်ငံလည်းဖြစ်သည်။ 

ဆက်လက်၍ ရုရှားဖက်ဒရေးရှင်းကောင်စီဥက္ကဋ္ဌ Valentina Matviyenko က အီသီယိုးပီးယားခေါင်းဆောင်များအား လာမည့် ၂၀၂၅ ခုနှစ်၊ မေ ၉ ရက်တွင် မော်စကို၌ ကျင်းပမည့် မဟာမျိုးချစ်စစ်ပွဲအောင်ပွဲနေ့၏ နှစ် ၈၀ ပြည့်အခမ်းအနားတက်ရောက်ရန် ဖိတ်ကြားခဲ့ကြောင်း သိရပါသည်။

ကိုးကား- RT

အမေရိကန်သမ္မတဒေါ်နယ်ထရမ့်၏ ယူကရိန်းဆိုင်ရာ အထူးကိုယ်စားလှယ် Keith Kellogg သည် ဖေဖော်ဝါရီ ၁၉ ရက်တွင် ယူကရိန်းနိုင်ငံ၊ ကိယက်ဗ်မြို့သို့ ရောက်ရှိနေပြီဖြစ်ကြောင်း ယူကရိန်းမီဒီယာ Obshchestvennoye က ဖော်ပြထားပါသည်။

အထူးကိုယ်စားလှယ် Keith Kellogg သည် မြို့တော်ကိယက်ဗ်တွင် ဖေဖော်ဝါရီ ၂၂ ရက်အထိ နေထိုင်မည်ဖြစ်ကြောင်း ယူကရိန်းသမ္မတ ဇီလန်စကီးက အစောပိုင်းတွင် ပြောကြားထားပါသည်။ 

၎င်း၏ ခရီးစဉ်တွင် ယူကရိန်းသမ္မတဇီလန်စကီး၊ ကာကွယ်ရေးဝန်ကြီး Rustem Umerov ၊ ကာကွယ်ရေးဦးစီးချုပ် Alexander Syrsky နှင့် စစ်ဖက်ထောက်လှမ်းရေး အကြီးအကဲ Kirill Budanov တို့နှင့် တွေ့ဆုံရန် မျှော်လင့်ထားကြောင်း သိရပါသည်။

ဝါရှင်တန်နှင့် ကိယက်ဗ်ကြား မြေရှားသတ္တုသဘောတူညီချက် လက်မှတ်ရေးထိုးရန် မအောင်မြင်ခြင်းနှင့် ရုရှားနှင့်အမေရိကန်တို့ ရီယာ့ဒ်မြို့ တွင် တွေ့ဆုံမှုအပေါ် ဇီလန်စကီးက အမေရိကန်အပေါ် အပြစ်တင် ဝေဖန် ပြီးနောက် Keith Kellogg က ယူကရိန်းသို့ ရောက်ရှိလာခြင်း ဖြစ်ပါသည်။

ယခု Keith Kellogg   ၏ ခရီးစဉ်သည် အမေရိကန်၏ ယူကရိန်းအပေါ် မူဝါဒဆိုင်ရာ အရေးပါသည့် ခရီးစဉ်ဖြစ်ပြီး အမေရိကန်က ဆက်လက် ပံ့ပိုးမည်လား စိတ်ဝင်စားစရာကောင်းနေပါသည်။

ကိုးကား- TASS

အသစ်ဖန်တီးလိုက်သည့် ခရစ်တိုငွေကြေးအသစ် $ Libra ကို ၎င်း၏ X လူမှုကွန်ယက်စာမျက်နှာတွင် ကြော်ငြာပေးခဲ့သည်ဟူသော စွပ်စွဲချက်ကို အာဂျင်တီးနားသမ္မတ Javier Milei က ငြင်းဆိုခဲ့သည်။

Milei က ဖေဖော်ဝါရီ ၁၄ ရက်တွင် $ Libra ခရစ်တိုငွေကြေးအကြောင်း ပို့စ်တင်ပြီး မကြာမီဈေးကွက်တန်ဖိုး သိသိသာသာတက်လာသော်လည်း နာရီပိုင်းအတွင်း ရုတ်တရက် ကျဆင်းသွားခဲ့ခြင်းကြောင့် ရင်းနှီးမြှုပ်နှံသူ အများစုအတွက် ကြီးမားသော ဆုံးရှုံးမှုများ ဖြစ်ပေါ်စေခဲ့သည်။

အဆိုပါအခြေအနေကို Rug Pull ($ Libra ငွေကြေးပရောဂျက် တည်ထောင်သူများသည် ရင်းနှီးမြှုပ်နှံသူများထံမှ ရန်ပုံငွေများရရှိပြီးနောက် ပရောဂျက်ကို ရုတ်တရက် ပိတ်လိုက်ခြင်း သို့မဟုတ် ရောင်းချလိုက်ခြင်း) ဖြစ်ကြောင်း အာဂျင်တီးနား Fintech အဖွဲ့ချုပ်က ကောက်ချက်ချခဲ့ပြီး Milei အနေဖြင့် အဆိုပါပရောဂျက်ကြောင့် သမ္မတရာထူးမှ ထုတ်ပယ်ခံရမည့် အခြေအနေနှင့် ရင်ဆိုင်နေရသည်။

Milei က ၎င်းအနေဖြင့် အဆိုပါကိစ္စကို “သဘောရိုးဖြင့် ဆောင်ရွက်ခြင်းဖြစ်‌ကြောင်း” ဖေဖော်ဝါရီ ၁၇ ရက်(တနင်္လာနေ့)တွင် ပြောကြားကာ ရင်းနှီးမြှုပ်နှံသူများ၏ စွပ်စွဲချက်များကို ပယ်ချခဲ့ပြီး ခရစ်တို ငွေကြေးအသစ် $Libra ရောင်းချသည့် ဝက်ဘ်ဆိုက်လင့်ခ်ပါသော ပို့စ်တင်ခဲ့သည်မှာ အဆိုပါငွေကြေးကို ကြော်ငြာပေးခြင်းမဟုတ်ဘဲ မျှဝေခြင်းသာ ဖြစ်ကြောင်း ပြောကြားခဲ့သည်။

Milei သည် ၎င်း၏ X လူမှုကွန်ယက်စာမျက်နှာရှိ ပို့စ်ကို နာရီပိုင်းအတွင်း ဖျက်လိုက်ပြီးနောက် အာဂျင်တီးနားရှိ ၎င်း၏ နိုင်ငံရေးပြိုင်ဘက်များ သာမက ခရစ်တိုငွေကြေးတွင် ရင်းနှီးမြှုပ်နှံထားသူများထံမှလည်း ပြင်းထန်သော ဝေဖန်မှုများ ရရှိခဲ့သည်။

ခရစ်တိုငွေကြေး လိမ်လည်မှုဖြင့် သမ္မတအပေါ် စွဲဆိုထားသည့်စွဲချက်ကို ဆက်လက် လုပ်ဆောင်သင့်၊ မသင့် ဆုံးဖြတ်ရန် တရားသူကြီးတစ်ဦးကို တာဝန်ပေးထားသည်။

ကိုးကား-BBC

ပြင်သစ်တပ်များကို ယူကရိန်းသို့ ပို့ရန် အစီအစဉ်မရှိကြောင်း La Depeche သတင်းစာနှင့် အင်တာဗျူးတွင် ပြင်သစ်သမ္မတ အီမန်နျူရယ်မက်ခရွန် က ပြောကြားခဲ့သည်။

မက်ခရွန်သည် ဂျာမနီ၊ အီတလီ၊ ပိုလန်၊ စပိန်၊ နယ်သာလန်၊ UK နှင့် ဒိန်းမတ်နိုင်ငံတို့၏ နိုင်ငံ့ခေါင်းဆောင်အကြီးအကဲများနှင့် အလွတ်သဘော ဆွေးနွေးပွဲတစ်ခုကို ဖေဖော်ဝါရီ ၁၇ ရက်တွင် ပဲရစ်မြို့၌ ကျင်းပခဲ့သည်။ ဆွေးနွေးပွဲသို့ ဥရောပကော်မရှင် (European Commission) နှင့် ဥရောပ ကောင်စီ (European Council) ဥက္ကဋ္ဌများနှင့် NATO တပ်ဖွဲ့၏ အထွေထွေ အတွင်းရေးမှူးချုပ်တို့လည်း တက်ရောက်ခဲ့ကြသည်။ 

အဆိုပါဆွေးနွေးပွဲတွင် ယူကရိန်းနိုင်ငံအတွက် လုံခြုံရေးအာမခံချက် ပေးမည့်ကိစ္စရပ်များလည်း ထည့်သွင်းဆွေးနွေးမည်ဖြစ်ကြောင်း Elysee နန်းတော်က ဆွေးနွေးပွဲမတိုင်မီ ထုတ်ပြန်ခဲ့သည်။

ဥရောပနိုင်ငံများသည် ဘဏ္ဍာရေးအကျပ်အတည်းများ ရှိနေခြင်းကြောင့် ယူကရိန်းအတွက် ငွေကြေးအကူအညီများ ထပ်မံပေးအပ်ရန် ခက်ခဲနေကြောင်း ဂျာမနီဝန်ကြီးချုပ် Olaf Scholz က ဆွေးနွေးပွဲအပြီးတွင် သတင်းထောက်များကို ပြောကြားခဲ့သည်။ ကိယက်ဗ်အပေါ် ဆက်လက်ထောက်ပံ့မှုများသည် ဥရောပနိုင်ငံများရှိ စက်မှုလုပ်ငန်းနှင့် လူမှုဘေးအန္တရာယ်ကင်းရှင်းရေးလုပ်ငန်းများအပေါ် ထိခိုက်မှုမရှိစေရန် သီးခြားငွေကြေး အစီအစဉ် တစ်ရပ်ကို ဖော်ဆောင်သင့်ကြောင်း Scholz က ပြောကြားခဲ့သည်။

ကိုးကား-TASS

Photo: en.iz.ru

အိန္ဒိယနှင့်ကာတာနိုင်ငံတို့သည် နှစ်နိုင်ငံကြားဆက်ဆံရေးကို ကုန်သွယ်ရေး၊ ရင်းနှီးမြှုပ်နှံမှု၊နည်းပညာ၊စွမ်းအင်နှင့် ပြည်သူအချင်းချင်းဆက်ဆံရေးကို အဓိကအာရုံစိုက်သည့် မဟာဗျူဟာမြောက်မိတ်ဖက်ဆက်ဆံရေးအဖြစ် မြှင့်တင်ခဲ့သည်ဟု သိရှိရပါသည်။

ထို့အပြင် နှစ်နိုင်ငံစလုံးသည် ၂၀၃၀ ပြည့်နှစ်တွင် ကုန်သွယ်မှု နှစ်ဆတိုးမြှင့်ရန် ရည်မှန်းထားကြောင်းလည်း သိရပါသည်။ ကာတာနိုင်ငံ မင်းသား Sheikh Tamim bin Hamad Al Thani သည် အိန္ဒိယနိုင်ငံ၊ နယူးဒေလီမြို့သို့ သွားရောက်လည်ပတ်စဉ်အချိန်အတွင်း အဆိုပါ သဘောတူညီချက်များကို လက်မှတ်ရေးထိုးခဲ့ခြင်း ဖြစ်သည်ဟုလည်း သိရပါသည်။

ဖေဖော်ဝါရီ ၁၇ ရက် ညပိုင်း၌ နယူးဒေလီမြို့သို့ Sheikh Tamim bin Hamad Al Thani ရောက်ရှိလာသည့် အချိန်တွင် အိန္ဒိယဝန်ကြီးချုပ်မိုဒီ ကိုယ်တိုင် ကြိုဆိုခဲ့သည်ဟုလည်း သိရပါသည်။ မိုဒီနှင့် Sheikh Tamim bin Hamad Al Thani တို့သည် စီးပွားရေးပူးပေါင်းဆောင်ရွက်မှု၊ စွမ်းအင် ပူးပေါင်းဆောင်ရွက်မှုနှင့် အာကာသနည်းပညာများ အပါအဝင် အဓိက ပူးပေါင်းဆောင်ရွက်မှုကဏ္ဍများကို ဖေဖော်ဝါရီ ၁၈ ရက်တွင် ဆွေးနွေးခဲ့ ကြကြောင်းလည်း သိရပါသည်။ လက်ရှိအချိန်၌ ကာတာနှင့် အိန္ဒိယ နိုင်ငံကြားကုန်သွယ်မှုသည် အမေရိကန်ဒေါ်လာ ၂၀ ဘီလီယံ ဝန်းကျင်ရှိပြီး လာမည့် ၅ နှစ်အတွင်း နှစ်နိုင်ငံကြားကုန်သွယ်မှုသည် အမေရိကန် ဒေါ်လာ ၂၈ ဘီလီယံ ဝန်းကျင်ထိ ရှိလာနိုင်သည်ဟု အိန္ဒိယနိုင်ငံခြားရေး ဝန်ကြီးဌာနက ထုတ်ပြန်ပြောကြားခဲ့ပါသည်။ အိန္ဒိယနှင့် ကာတာနိုင်ငံ တို့သည် အခွန်နှစ်ဆကောက်ခံခြင်းကို ရှောင်ရှားရန်နှင့် အခွန်နှင့် ပတ်သက်သော ဘဏ္ဍာရေးဆိုင်ရာရှောင်လွှဲမှုများကို တားဆီးရန်အတွက် ပြန်လည်ပြင်ဆင်သည့် သဘောတူညီချက်တစ်ရပ်ကိုလည်း လက်မှတ်ရေးထိုးခဲ့ကြသည်ဟုလည်း သိရှိရပါသည်။

ကိုးကား-NP News

ရုရှားတောင်ပိုင်းရှိ ရေနံပန့်စက်ရုံတစ်ခုသည် ယူကရိန်းဒရုန်း တိုက်ခိုက်မှုများကြောင့် ပျက်စီးခဲ့ရာ ထိုစက်ရုံ၏ ပူးတွဲပိုင်ရှင်များ ဖြစ်သော အနောက်နိုင်ငံများက ပြုပြင်ရန်စရိတ်ကို ကျခံသင့်ကြောင်း ရုရှားသမ္မတ ဗလာဒီမာပူတင်က အဆိုပြုခဲ့သည်။ ထိုစက်ရုံလည်ပတ်မှုကို Caspian Pipeline Consortium (CPC) မှ လုပ်ကိုင်ဆောင်ရွက်ပြီး ၎င်းကို အမေရိကန်နှင့် ဥရောပသမဂ္ဂကုမ္ပဏီများက တစ်စိတ်တစ်ပိုင်း ထိန်းချုပ် ထားသည်။

ရုရှားဒုဝန်ကြီးချုပ် နှင့် ယခင်စွမ်းအင်ဝန်ကြီး အလက်ဇန္ဒားနိုဗာက ဖေဖော်ဝါရီ ၁၈ ရက်နေ့တွင် အစိုးရအဖွဲ့အစည်းအဝေး၌ ယူကရိန်း ဒရုန်းအနည်းဆုံး ၇ စီးဖြင့် စက်ရုံကိုတိုက်ခိုက်ခဲ့ကြောင်းနှင့် ထိုတိုက်ခိုက်မှုကြောင့် အရေးကြီးအစိတ်အပိုင်းများ ပျက်စီးခဲ့ရကာ စက်ရုံဝန်ထမ်းများက အရံပန့်စနစ်ကို အသုံးပြုခဲ့ရပြီး စွမ်းဆောင်ရည်ကို ၃၀-၄၀% အထိ လျှော့ချခဲ့ရကြောင်း ပူတင်အား ပြောကြားခဲ့သည်။

နိုဗာ၏ ပြောကြားချက်အရ စက်ရုံ၏စွမ်းဆောင်ရည်အပြည့်အဝ ပြန်လည်ရရှိရန် အကြီးစားပြင်ဆင်မှုများ ပြုလုပ်ရန်လိုအပ်မည်ဖြစ်ပြီး ၎င်းလည်ပတ်မှု တွင် ဂျာမနီ၏ Siemens အပါအဝင် အနောက်နိုင်ငံများမှ စက်ပစ္စည်းများ ပါဝင်သည်ဟု ဆိုသည်။ Siemens က ရုရှားဓာတ်ငွေ့ပိုက်လိုင်းများအတွက် စက်ပစ္စည်းများထောက်ပံ့ရန် ယခင်က ငြင်းဆန်ခဲ့ဖူးသည်။ နိုဗာ၏ အဆိုအရ စက်ရုံကို စွမ်းအားပြည့် လည်ပတ်နိုင်ရေးပြုပြင်ရန် အချိန် ကြာမြင့်မည်ဟု သိရှိရသည်။

Western CPC အစုရှယ်ယာရှင်များသည် ပျက်စီးဆုံးရှုံးမှုများအား စစ်ဆေးရာတွင် ပါဝင်ဆောင်ရွက်လျက်ရှိပြီး လုပ်ငန်းစုအဖွဲ့ဝင်များ စာရင်းတွင် အမေရိကန်ကုမ္ပဏီကြီး Chevron နှင့် ExxonMobil တို့ ပါဝင်ကြောင်း နိုဗာက ပြောကြားခဲ့သည်။ 

ရုရှားသမ္မတပူတင်က အနောက်နိုင်ငံများမှကုမ္ပဏီများသည် စက်ရုံ ပြုပြင်ရေးကို အထောက်အကူပြုပြီး လိုအပ်သော ပစ္စည်းကိရိယာများအားလုံးကို ထောက်ပံ့ပေးသင့်သည်ဟု တုံ့ပြန်ပြောကြားခဲ့သည်။

ကိုးကား-RT

ဖေဖော်ဝါရီ ၁၈

၂၀၂၅ ခုနှစ်၊ ဖော်ဖော်ဝါရီလ ၅ ရက်မှစ၍ တရားမဝင်အွန်လိုင်းလောင်းကစားနှင့် ငွေကြေး လိမ်လည်မှုလုပ်ငန်းများ လုပ်ကိုင်နေသည့် မြန်မာနိုင်ငံအတွင်းမှ နေရာ ၅ ခုအား လျှပ်စစ်မီး၊ လောင်စာဆီနှင့် အင်တာနက်ဝန်ဆောင်မှုများ ဖြတ်တောက်ခြင်းလုပ်ငန်းစဉ်ကို ဆက်လက်လုပ်ဆောင်သွားရန် ထိုင်းနိုင်ငံအား တရုတ်နိုင်ငံမှ တိုက်တွန်းခဲ့ပါသည်။

တရုတ်နိုင်ငံ၏ အဆိုပါတောင်းဆိုချက်သည် တရုတ်နိုင်ငံသား ၁၀၄၁ ဦးအပါအဝင် နိုင်ငံပေါင်း ၁၂ နိုင်ငံမှ နိုင်ငံသား ၁၂၁၉ ဦးအား သက်ဆိုင်ရာနိုင်ငံများသို့ ပြန်လည်လွှဲပြောင်းပေးရန် မြန်မာအစိုးရနှင့် ကရင်နီနယ်ခြားစောင့် တပ်ဖွဲ့ တို့အကြား သဘောတူညီမှုရရှိပြီးနောက် ပေါ်ထွက်လာခြင်းဖြစ်သည်။

မြန်မာနိုင်ငံအတွင်းရှိ အွန်လိုင်းလောင်းကစားနှင့် ငွေကြေးလိမ်လည်မှုလုပ်ငန်းနေရာများ အားလုံးနှင့်ပတ်သက်၍ မည်ကဲ့သို့ ဖြေရှင်းဆောင်ရွက်ရမည်နှင့်ပတ်သက်သည့် အဆိုပြုချက် ၄ ချက်ကို တရုတ်ပြည်သူ့လုံခြုံရေးဆိုင်ရာ လက်ထောက်ဝန်ကြီး Liu Zhongyi က ချမှတ်ခဲ့ကြောင်း ထိုင်းကာကွယ်ရေးဝန်ကြီးဌာန၏ ပြောရေးဆိုခွင့်ရှိသူ ဗိုလ်ချုပ် Thanathip Sawangsaeng က ထုတ်ဖော်ပြောကြားခဲ့ပါသည်။

အဆိုပြုချက် ၄ ချက်မှာ မြန်မာနိုင်ငံအတွင်းရှိ မြို့နယ်များရှိ အွန်လိုင်းလောင်းကစားနှင့် ငွေကြေးလိမ်လည်မှု လုပ်ငန်းနေရာများအား ထိန်းချုပ်နိုင်ရေးအတွက် လျှပ်စစ်မီး၊ လောင်စာဆီနှင့် အင်တာနက် ဝန်ဆောင်မှုများ ဖြတ်တောက်ခြင်းလုပ်ငန်းစဉ်များအား ထိုင်းနိုင်ငံအနေဖြင့် ဆက်လက် ဆောင်ရွက်ရန်၊ မြန်မာနိုင်ငံအတွင်းမှ ငွေကြေးလိမ်လည်သူများ ထွက်ပြေးခြင်းတိမ်းရှောင်ခြင်းမှ ကာကွယ်တားဆီးနိုင်ရန်နှင့် တရုတ်နိုင်ငံသားများ နေရပ် ပြန်ရေးလုပ်ငန်းစဉ်များ အဆင်ပြေချောမွေ့စေရေးတို့အတွက် နယ်စပ်ဒေသလုံခြုံရေးကို တင်းတင်းကြပ်ကြပ် လုပ်ဆောင်သွားရန်၊ တရုတ်နိုင်ငံသားများ၏ အချက်အလက်များ တိုက်ဆိုင်စစ်ခြင်းနှင့် နေရပ်ပြန်ရေး ဆိုင်ရာ တို့တွင် အထောက်အကူပြုရန်အတွက် ထိုင်းနိုင်ငံသို့ တရုတ်နိုင်ငံမှ တာဝန်ရှိသူများစေလွှတ်ရေး၊ တစ်နိုင်ငံ၏ အချုပ်အခြာ အာဏာပိုင်ဆိုင်မှုကို လေးစားပြီး အပြည်ပြည်ဆိုင်ရာနှင့် ပြည်တွင်းဥပဒေများကို အပြန်အလှန် လေးစားမှုတို့ဖြင့် တရုတ်-ထိုင်း-မြန်မာ သုံးနိုင်ငံပူးပေါင်းဆောင်ရွက်မှုကို တိုးမြှင့်လုပ်ဆောင်ရန် စသည်တို့ ဖြစ်ကြောင်း Thanathip က ပြောကြားခဲ့ပါသည်။

ထို့အပြင် ယခုကဲ့သို့ တရုတ်နိုင်ငံ၏ ပူးပေါင်းပါဝင်ဆောင်ရွက်မှုကဲ့သို့သော ထိုင်းနိုင်ငံမှ စီစဉ်ဆောင်ရွက်သည့် တွေ့ဆုံဆွေးနွေးမှုများတွင် အခြားသောနိုင်ငံများပါ ပူးပေါင်းပါဝင်လာစေရေး ဖိတ်ခေါ်သွားမည်ဖြစ်ကြောင်း၊ Liu Zhongyi သည် အွန်လိုင်းလောင်းကစားနှင့် ငွေကြေးလိမ်လည်မှု လုပ်ငန်းများလုပ်ကိုင်နေသည့်နေရာများအား ထိန်းချုပ်ဆောင်ရွက်ရေးကိစ္စရပ်များအား ဆွေးနွေးညှိနှိုင်းရန်အတွက် ဖေဖော်ဝါရီလ ၁၉ ရက်နေ့တွင် ထိုင်းနိုင်ငံ ကာကွယ်ရေးဝန်ကြီး Phumtham Wechayachai နှင့် တွေ့ဆုံသွားမည်ဖြစ်ကြောင်း Thanathip က ထုတ်ဖော် ပြောကြားခဲ့မှုကို world.thaipbs.or.th website တွင် ရေးသားဖော်ပြထားပါသည်။

ကိုးကား- world.thaipbs.or.th 

ဘာသာပြန်ဆိုသူ- ဦးထက်ထက်အောင်(နစက-၄)

အီဂျစ်အစိုးရသည် ဂါဇာကို ပြန်လည်တည်ဆောက်ရန် အစီအစဉ်တစ်ရပ်ကို ရေးဆွဲလျက်ရှိပြီး ထိုသို့ ပြန်လည်တည်ဆောက်ရာတွင် ဂါဇာမှ ပါလက်စတိုင်းလူမျိုးများကို ဖယ်ရှားခြင်းမပြုဘဲ ဆောင်ရွက်ရန် ရည်ရွယ် ထားသည်။ အဆိုပါ အစီအစဉ်သည် အမေရိကန်သမ္မတ ဒေါ်နယ်ထရမ့်၏ “ဂါဇာနယ်မြေကို ထိန်းချုပ်ပြီး ပါလက်စတိုင်းများကို ဖယ်ရှားပစ်မည်”ဟူသည့်  ပြောဆိုချက်ကို တုံ့ပြန်ရန်ရည်ရွယ်သည့် ကြိုးပမ်းမှုတစ်ရပ်လည်း ဖြစ်သည်။

မိမိတို့အနေဖြင့် ဂါဇာ ပြန်လည်ထူထောင်ရေးကို မြန်ဆန်စွာဆောင်ရွက်နိုင်ရန်အတွက် ပြီးပြည့်စုံပြီး အဆင့်လိုက်သတ်မှတ်ထားသည့် အစီအစဉ်တစ်ရပ်ကို အလေးထားဆောင်ရွက်လျက် ရှိကြောင်း အီဂျစ်နိုင်ငံခြားရေး ဝန်ကြီး Badr Abdelatty ၏ ပြောကြားချက်ကို အီဂျစ်အစိုးရပိုင် သတင်းစာဖြစ်သည့် Al-Ahram က ၁၇-၂-၂၀၂၅ ရက်နေ့တွင် ရေးသားဖော်ပြခဲ့ပါသည်။

ကိုးကား- ALJAZEERA 

ဘာသာပြန်ဆိုသူ- ဦးထက်ထက်အောင်(နစက-၄)