ဘရပ်ဆဲလ်မြို့အခြေစိုက် အီးယူဆိုင်ရာ အာဆီယံသံအမတ်ကြီးများ ပါဝင်သည့် အာဆီယံ-ဘရပ်ဆဲလ် ကော်မတီ (ASEAN Brussels Committee - ABC) နှင့် ပင်လယ်ကွေ့ ပူးပေါင်းဆောင်ရွက်ရေးကောင်စီ (Gulf Cooperation Council - GCC) အဖွဲ့ဝင်နိုင်ငံများမှ သံအမတ်ကြီး များအကြား အလုပ်သဘော နေ့လယ်စာစားပွဲကို ဖေဖော်ဝါရီ ၁၉ ရက်တွင် ABC ၏ အလှည့်ကျဥက္ကဋ္ဌဖြစ်သည့် ဖိလစ်ပိုင်သံရုံးနှင့် မြန်မာသံရုံးတို့က ဘရပ်ဆဲလ်မြို့၌ ပူးပေါင်းစီစဉ် ကျင်းပခဲ့ကြသည်။ 

အဆိုပါအလုပ်သဘော နေ့လယ်စာစားပွဲတွင် အာဆီယံနှင့် GCC သံအမတ်ကြီးများသည် ၂၀၂၃ ခုနှစ်၊ အောက်တိုဘာလက ကျင်းပခဲ့သော အာဆီယံ- GCC ထိပ်သီးအစည်းအဝေးမှ ဒေသ နှစ်ခုအကြား ပူးပေါင်း ဆောင်ရွက်ရေးမူဘောင် (၂၀၂၄-၂၀၂၈) ထွက်ပေါ်ခဲ့ပါကြောင်း၊ အဆိုပါ မူဘောင်တွင် ဒေသနှစ်ခုအကြား စီးပွားရေးပူးပေါင်းဆောင်ရွက်မှုနှင့် ပြည်သူများအကြား ထိတွေ့ဆက်ဆံမှု (people-to-people ties) အား မြှင့်တင်ဆောင်ရွက်ရေးကို မီးမောင်းထိုးပြနိုင်ခဲ့ကြောင်း၊ ယခုနှစ်အတွင်း အာဆီယံအလှည့်ကျဥက္ကဋ္ဌဖြစ်သည့် မလေးရှားနိုင်ငံ၌ အာဆီယံ- GCC- တရုတ် ထိပ်သီးအစည်းအဝေးကိုလည်း ကျင်းပသွားမည်ဖြစ်ကြောင်း၊ GCC အဖွဲ့ဝင်နိုင်ငံများသည် အာဆီယံနိုင်ငံများ၌ အိမ်ခြံမြေ၊ ဟိုတယ်နှင့် ခရီးသွားလုပ်ငန်း၊ ဝန်ဆောင်မှုနှင့် ငွေရေးကြေးရေးကဏ္ဍတို့တွင် ရင်းနှီးမြှုပ်နှံမှုများ ဆောင်ရွက်လျက်ရှိပါကြောင်း၊ သို့ဖြစ်ရာ ယခုကဲ့သို့ ဘရပ်ဆဲလ် မြို့ရှိ အာဆီယံနှင့် GCC သံအမတ်ကြီးများ တွေ့ဆုံခြင်းသည် ဒေသ နှစ်ရပ်စလုံးနှင့် မိတ်ဖက်ဖြစ်လျက်ရှိသော အီးယူ စသည့် မိတ်ဖက်များနှင့် ဆက်ဆံရေး၌ ကြုံတွေ့နေရသည့် ဘုံစိန်ခေါ်မှုများနှင့် ပတ်သက်ပြီး အပြန်အလှန် ဆွေးနွေးဖလှယ်မှုပြုနိုင်ကာ ဘုံအကျိုးစီးပွား နယ်ပယ်များတွင် ပူးပေါင်းဆောင်ရွက်မှုပြုနိုင်မည့် အလားအလာများကို ရှာဖွေနိုင်ရေး ယန္တရားတစ်ရပ်ဖြစ်လာရန် မျှော်လင့်ပါကြောင်း၊ ဘရပ်ဆဲလ်မြို့ ရှိ အာဆီယံနှင့် GCC တို့၏ လှုပ်ရှားမှုများတွင် အပြန်အလှန် ပူးပေါင်း ပါဝင်သွားကြရန်လည်း မျှော်လင့်ပါကြောင်း စသည်ဖြင့် ဆွေးနွေးပြောကြားခဲ့ကြကြောင်း သိရသည်။

ကိုးကား-Myanmar National Post

ရုရှားနှင့်အမေရိကန်တို့ကြား သံတမန်ဆက်ဆံရေး ပြန်လည်စတင်ရန်အတွက် နှစ်နိုင်ငံစလုံးမှ သံအမတ်များက ၎င်းတို့၏ လုပ်ငန်းများကို မကြာမီပြန်လည်စတင်မည်ဟု ရုရှားလွှတ်တော်မှ အရင်းအမြစ်တစ်ခုက ပြောသည်။

ရုရှားနှင့်အမေရိကန် သံအမတ်များက ၎င်းတို့၏တာဝန်များကို အပြည့်အဝပြန်လည်ထမ်းဆောင်မည်ဖြစ်သောကြောင့် ၎င်းအချက်သည် နှစ်နိုင်ငံကြား သံတမန်ဆက်ဆံရေး ပုံမှန်ပြန်ဖြစ်စေရေးအတွက် အလွန်အရေးပါကြောင်း အဆိုပါ သတင်းအရင်းအမြစ်က ဆက်ပြောသည်။

ယခင် အမေရိကန်ပြည်ထောင်စုဆိုင်ရာ ရုရှားသံအမတ်ဟောင်း အန်နတိုလီ အန်တိုနော့သည် ၎င်း၏ သံအမတ်တာဝန်များကို ၂၀၂၄  ခုနှစ် အောက်တိုဘာလတွင် အဆုံးသတ်ခဲ့ခြင်း ဖြစ်သည်။

ရုရှားအစိုးရသည် အမေရိကန်ပြည်ထောင်စုဆိုင်ရာ ရုရှားသံအမတ် အသစ်အဖြစ် ရုရှားနိုင်ငံခြားရေးဝန်ကြီးဌာနရှိ မြောက်အမေရိကရေးရာဌာနမှ ညွှန်ကြားရေးမှူး အလက်ဇန္ဒား ဒါချီယက်အား ခန့်အပ်ရန် လျာထားသည်ဟု ရုရှားမီဒီယာတချို့က ဖော်ပြခဲ့သော်လည်း ယင်းကိစ္စရပ်နှင့် စပ်လျဉ်း၍ ရုရှားအစိုးရက   တရားဝင်ထုတ်ပြန်ထားခြင်း မရှိသေးပေ။

သို့သော် အမေရိကန်ပြည်ထောင်စုဆိုင်ရာ ရုရှားသံအမတ်သစ်ကို မကြာမီခန့်အပ်မည်ဟု ရုရှားအစိုးရအဖွဲ့မှ ပြောရေးဆိုခွင့်ရှိသူ ဒီမီထရီ ပက်စကော့က ပြောကြားထားသည်။

လက်ရှိ   ရုရှားနိုင်ငံဆိုင်ရာ အမေရိကန်သံအမတ်မှာ လင်းထရေစီဖြစ်ပြီး သူမအား ယခင်သမ္မတဟောင်း ဂျိုးဘိုင်ဒင်က ခန့်အပ်ခြင်းဖြစ်သောကြောင့် လက်ရှိသမ္မတ ဒေါ်နယ်ထရမ့်က ၎င်းနေရာတွင် အခြားသူတစ်ဦးအား အစားထိုး ခန့်အပ်နိုင်သူဟူသော  ပြောဆိုယူဆမှုများ ထွက်ပေါ်လျက်ရှိကြောင်း သိရသည်။

Source: Myawady Web Portal

အမေရိကန်သမ္မတဒေါ်နယ်ထရမ့် အစိုးရအဖွဲ့သည် ဆော်ဒီအာရေးဗီးယား တွင် ရုရှားသမ္မတပူတင်နှင့် သမ္မတထရမ့်တို့ ပြုလုပ်မည့် ငြိမ်းချမ်းရေး‌ ဆွေးနွေးပွဲမတိုင်မီ ယူကရိန်းနှင့် သတ္တုသယံဇာတဆိုင်ရာ သဘောတူညီချက်တစ်ရပ်ကို ရယူလိုကြောင်း၊ အစီအစဉ်အသေးစိတ်ကို နောက်ပိုင်း တွင်မှသာ ဆွေးနွေးရန် ရည်ရွယ်ထားကြောင်း၊ နှစ်ဖက်လုံးအတွက် ရိုးရှင်းသော သဘောတူညီချက်တစ်ရပ်ကို ရယူလိုကြောင်း ရိုက်တာသတင်းဌာနကို ကိုးကား၍ TASS က ဖော်ပြထားပါသည်။ 

ပြီးခဲ့သည့်မြူးနစ်လုံခြုံရေးညီလာခံတွင် အမေရိကန်ဘက်က ကမ်းလှမ်းထားသည့် သယံဇာတလဲလှယ်ရေးဆိုင်ရာ သဘောတူညီချက်ကို ယူကရိန်း သမ္မတဇီလန်စကီးက ငြင်းပယ်ခဲ့ပါသည်။ ထိုကမ်းလှမ်းချက်တွင် ယူကရိန်း၏ မြေရှားသတ္တုသယံဇာတ ၅၀ % ကို အမေရိကန်က ပိုင်ဆိုင်ရန် အဆိုပြုထားပြီး ယူကရိန်းအတွက် လုံခြုံရေးအာမခံချက်များ မပါဝင်ခဲ့ချေ။ ယူကရိန်းအကျိုးစီးပွားကို ကာကွယ်ရန် လုံခြုံရေး အာမခံ ချက်များ ပါဝင်သည့် သဘောတူညီချက် တစ်ရပ်ကိုသာ လက်ခံနိုင်မည် ဖြစ်ကြောင်း ဇီလန်စကီးက တုံ့ပြန်ပြောကြားခဲ့ပါသည်။ 

ယခုအခြေအနေတွင် ယူကရိန်းနှင့် အမေရိကန်အကြား သတ္တု သယံဇာတ ဆိုင်ရာ သဘောတူညီချက်ရရှိရေး ဆွေးနွေးမှုများမှာ အဓိကအခန်းကဏ္ဍ တစ်ခုဖြစ်နေပြီး ယူကရိန်း၏ အနာဂတ်နှင့် လုံခြုံရေးအပေါ် အကျိုးသက်ရောက်မှု ရှိနိုင်ပါသည်။

ကိုးကား-TASS

သဘောထားချင်းတူညီသည့် နိုင်ငံများနှင့်အတူ ယူကရိန်းကို ဆက်လက် ထောက်ပံ့မည်ဟု နိုင်ငံ၏သန္နိဋ္ဌာန်ကို ဂျပန်နိုင်ငံခြားရေးဝန်ကြီးက ပြောဆိုခဲ့ပြီး ကူညီမှုများ၌ ကာလလတ်မှ ကာလရှည် ပြန်လည်ထူထောင်ရေးနှင့် ပြန်လည်တည်ဆောက်ရေး လုပ်ငန်းများအတွက်အကူအညီများပါဝင်ကြောင်း Iwaya Takeshi က ဖေဖော်ဝါရီ ၂၀ ရက်နေ့တွင် တောင်အာဖရိက၌ စတင်ခဲ့သည့် G20 နိုင်ငံခြားရေးဝန်ကြီး များ၏ ဆွေးနွေးပွဲတွင် ပြောကြားခဲ့ခြင်းဖြစ်ပါသည်။

သံတမန်ရေးရာ ကြိုးပမ်းမှုများသည် ယူကရိန်း၌ဖြစ်ပွားနေသော တိုက်ပွဲများကို အဆုံးသတ်ရန်နှင့် ခက်ခဲသည့်အခြေအနေများကို ကျော်လွှားနိုင်ရန် လမ်းခင်းပေးလိမ့်မည်ဟု မျှော်လင့်ကြောင်း ၎င်းက ပြောကြားခဲ့ ပါသည်။

ရုရှားနှင့် မြောက်ကိုရီးယားတို့အကြား စစ်ရေးပူးပေါင်းဆောင်ရွက်မှု တိုးလာခြင်းအပေါ် အလွန်အမင်းစိုးရိမ်သည်ဟု Iwaya က ပြောခဲ့ပြီးယူကရိန်းတပ်များကို တိုက်ခိုက်ရန် မြောက်ကိုရီးယားစစ်သားများ ပါဝင်နေမှုကို ရှုတ်ချခဲ့ပါသည်။

နိုင်ငံတကာအသိုက်အဝန်းသည် တရားဥပဒေစိုးမိုးရေး၌ ကြီးမားသော စိန်ခေါ်မှုနှင့် ရင်ဆိုင်နေရကြောင်း Iwaya က ပြောကြားခဲ့ပြီး တောင်တရုတ်ပင်လယ် အပါအဝင် ကမ္ဘာပေါ်ရှိ မည်သည့်နေရာ၌မဆို လက်ရှိအခြေအနေကို အင်အားသုံးပြီး ပြောင်းလဲရန် တစ်ဖက်သတ် ကြိုးပမ်းမှုများကို ဂျပန်အနေဖြင့် မည်သည့်အခါတွင်မှ လက်ခံမည် မဟုတ်ကြောင်း ၎င်းက ဖြည့်စွက်ပြောကြားခဲ့သည်။

G20 အနေဖြင့် နိုင်ငံတကာ ပူးပေါင်းဆောင်ရွက်မှုတွင် ဦးဆောင် အခန်းကဏ္ဍမှ ပါဝင်လုပ်ဆောင်ရန် လိုအပ်နေသည်ဟုလည်း ၎င်းက အလေးပေး ပြောကြားခဲ့ပါသည်။

ကိုးကား-NHK World

ဇီလန်စကီးအနေဖြင့် အမေရိကန်အစိုးရက ယူကရိန်းအတွက် လုပ်ဆောင်ပေးနေသည့် အစီအစဉ်ကောင်းတစ်ခုအပေါ် အမြင်ကျဉ်းစွာဖြင့် ငြင်းပယ် လိုက်ကြောင်း ပြောကြားလိုက်ပါသည်။ 

ဇီလန်စကီးသည် အမေရိကန်အား ယူကရိန်းရှိ သဘာဝသယံဇာတများ အသုံးပြုခွင့်ပေးမည့် သဘောတူညီချက်ကို လက်မှတ်ရေးထိုးရန် ငြင်းဆိုလိုက်ခြင်းအပေါ် ပြောကြားလိုက်ခြင်းဖြစ်ပါသည်။

၄င်းမှာလည်း မြူးနစ်လုံခြုံရေးညီလာခံတွင် အမေရိကန်ဒုတိယသမ္မတ ဂျေဒီဗန့် ဆွေးနွေးခဲ့သော အဓိကအကြောင်းအရာ တစ်ခုဖြစ်ခဲ့သည်။ ဒေါ်နယ်ထရမ့်က ယူကရိန်းအပေါ် အမေရိကန်က ပံ့ပိုးခဲ့မှုမှာ ဒေါ်လာ ၃၀၀ ဘီလီယံထက် များပြားနေကြောင်း၊ အဆိုပါအကူအညီများအတွက် ဘီလီယံ ၅၀၀ တန်ဖိုးရှိ ရှားပါးသတ္တုများ တောင်းဆိုခဲ့ပါသည်။ အဆိုပါ တောင်းဆိုချက်ကို ဇီလန်စကီးက  နှစ်ဖက်အကျိုးရှိစေမည့် မိတ်ဖက် ဆက်ဆံမှုတစ်ခုလိုအပ်ကြောင်း ပြောဆိုကာ ငြင်းပယ်လိုက်ပါသည်။ ထိုသဘောတူညီမှုအဆိုပြုချက်ကို အမေရိကန် ဘဏ္ဍာရေးဝန်ကြီး စကော့ ဘက်ဆင့်က ပြီးခဲ့သည့်အပတ်က ကိယက်စ်မြို့သို့ သွားရောက် ဆွေးနွေးခဲ့ပါသည်။

ယူကရိန်းအရာရှိကြီးများက အမေရိကန်၏ သဘောတူညီချက်သည် လုံခြုံရေးအာမခံချက်မပါဝင်သဖြင့် Colonial Agreement မျိုးသာ ဖြစ်ကြောင်း ပြောဆိုခဲ့ကြပြီး၊ ဇီလန်စကီးကလည်း လုံခြုံရေးအာမခံချက်နှင့် ရင်းနှီးမြှုပ်နှံမှုများကို ချိတ်ဆက်ထားရန် အရေးကြီးကြောင်း တုံ့ပြန် ပြောကြားခဲ့ပါသည်။

ယူကရိန်းတွင် စစ်ရေးနှင့် စက်မှုလုပ်ငန်းများအတွက် အရေးပါသည့် တိုင်တန်နီယမ်နှင့် လီသီယမ်ရှားပါးသတ္တုများ လွန်စွာပေါကြွယ်ဝပြီး ယူကရိန်းတစ်နိုင်ငံလုံးရှိ သဘာဝသယံဇာတ အားလုံးတန်ဖိုးမှာ ဒေါ်လာ ၇ ထရီလီယီ (ဒေါ်လာ ၇၀၀၀ ဘီလီယံ) ခန့်ရှိကြောင်း သိရပါသည်။

ကိုးကား- RT

ရုရှားနှင့် အီသီယိုးပီးယားတို့သည် “ငြိမ်းချမ်းရေးရည်ရွယ်ချက်များ” အတွက် နျူကလီးယားနည်းပညာများအသုံးပြုရာတွင် ပူးပေါင်းဆောင်ရွက်မှုများ ဖွံ့ဖြိုးတိုးတက်စေရန် သဘောတူညီခဲ့ကြောင်း ဖေဖော်ဝါရီ ၁၉ ရက်နေ့တွင် ရုရှားအစိုးရ၏ Telegram ချန်နယ်တွင် ဖော်ပြထားချက်အရ သိရသည်။

အရှေ့အာဖရိကနိုင်ငံ၏ မြို့တော် အဒီစ်အဘာဘာတွင် ရုရှား၏ စီးပွားရေး ဖွံ့ဖြိုးတိုးတက်မှုဝန်ကြီး Maksim Reshetnikov နှင့် အီသီယိုးပီးယား၏ ဆန်းသစ်တီထွင်မှုနှင့်နည်းပညာဆိုင်ရာဝန်ကြီး Belete Molla တို့အကြား ဆွေးနွေးမှုများပြုလုပ်ခဲ့စဉ် ထိုသဘောတူညီချက်ကို ရရှိခဲ့သည်။

ထို့အပြင် တာဝန်ရှိသူများသည် ကုန်သွယ်ရေး၊ စိုက်ပျိုးရေးနှင့် ခရီးသွား လုပ်ငန်းအပါအဝင် ကဏ္ဍပေါင်းစုံတွင် နှစ်နိုင်ငံဆက်ဆံရေး ချဲ့ထွင်ရန်နှင့် သတင်းအချက်အလက်နှင့် ဆက်သွယ်ရေးနည်းပညာ၊ ပညာရေးနှင့် ဆေးဘက်ဆိုင်ရာကဏ္ဍများတွင် ပူးပေါင်းဆောင်ရွက်မှုများ အကောင်အထည်ဖော်နိုင်ခြင်းရှိ၊ မရှိကိုလည်း ဆွေးနွေးခဲ့ကြောင်း မော်စကို၏ သတင်းရင်းမြစ်များအရ သိရသည်။

ထုတ်ပြန်ချက်အရ၊ အစည်းအဝေးအတွင်း လမ်းညွှန်တစ်ခုကို လက်မှတ် ရေးထိုးခဲ့ပြီး၊ “အီသီယိုးပီးယားတွင် နျူကလီးယားစွမ်းအင် ဖွံ့ဖြိုးတိုးတက်မှုအတွက် အလားအလာများကို အကဲဖြတ်ရန်နှင့် နျူကလီးယား အခြေခံအဆောက်အအုံနှင့် လူ့စွမ်းအားအရင်းအမြစ်များ ဖွံ့ဖြိုးတိုးတက်ရေးအတွက် ပူးပေါင်းဆောင်ရွက်မည့် အစီအစဉ်များ” ကို ရေးဆွဲခဲ့ကြောင်း ဖော်ပြထားသည်။

ကိုးကား-RT

ဘင်္ဂလားဒေ့ရှ်နိုင်ငံ၏ ယာယီအစိုးရကို “အကြမ်းဖက်သမား” တစ်ဦးက ဦးဆောင်နေပြီး ထိုသူသည် “အကြမ်းဖက်သမားများ” ကို လွှတ်ပေးကာ နိုင်ငံတွင် “ဥပဒေမဲ့အခြေအနေ” ကို အားပေးနေသည်ဟု ဝန်ကြီးချုပ်ဟောင်း ရှိတ်ဟာဆီနာက ပြင်းထန်စွာဝေဖန်ခဲ့သည်။ ဆန္ဒပြမှုများကြောင့် ဩဂုတ်လတွင် နှုတ်ထွက်ခဲ့ရပြီး ယခုအခါ အိန္ဒိယနိုင်ငံတွင် ခိုလှုံနေရသည့် ရှိတ်ဟာဆီနာက ဘင်္ဂလားဒေ့ရှ်နိုင်ငံသို့ ပြန်လာပြီး အာဏာပြန်လည်ရယူမည်ဟု ကတိပြုထားသည်။

အိန္ဒိယမီဒီယာများ၏ ဖော်ပြချက်အရ ရှိတ်ဟာဆီနာသည် ယမန်နှစ်က သူမအား အာဏာမှ ဖယ်ရှားခဲ့သည့် အရေးအခင်းအတွင်း သေဆုံးခဲ့သည့် ရဲအရာရှိလေးဦး၏ဇနီးများနှင့် အွန်လိုင်းမှ တွေ့ဆုံခဲ့ပြီး “အဆိုပါ သတ်ဖြတ်မှုများသည် မိမိကိုအာဏာကနေ ဖယ်ရှားရန်အတွက် စနစ်တကျ စီစဉ်ခဲ့ကြသည့် လျှို့ဝှက်အကြံအစည်၏ တစ်စိတ်တစ်ပိုင်းပါကြောင်း” NDTV က သူမ၏ ပြောကြားချက်ကို ကိုးကားဖော်ပြခဲ့ပြီး “မိမိအနေဖြင့် ရဲများ၏ သေဆုံးမှုအတွက် ပြန်လာပြီး လက်စားချေမည်" ဟု ကတိပြုခဲ့သည်။

၂၀၂၄ ခုနှစ်၊ ဩဂုတ်လတွင် ကျောင်းသားများဦးဆောင်သည့် အကြမ်းဖက် အရေးအခင်းများကြောင့် သူမ၏အစိုးရ ပြုတ်ကျပြီးနောက် ရှိတ်ဟာဆီနာသည် အိန္ဒိယသို့ ထွက်ပြေးခဲ့ရသည်။ ဘင်္ဂလားဒေ့ရှ်တွင် နိုဘယ် ငြိမ်းချမ်းရေးဆုရှင် မိုဟာမက်ယူနွတ်ကို ယာယီအစိုးရ၏ အတိုင်ပင်ခံ အကြီးအကဲအဖြစ် ခန့်အပ်ခဲ့ပြီး အစိုးရ၏အဓိကရည်မှန်းချက်များမှာဥပဒေနှင့် ငြိမ်းချမ်းရေးကို ပြန်လည်ထူထောင်ရန်နှင့် ရွေးကောက်ပွဲသစ်များမှတစ်ဆင့် ဒီမိုကရေစီအသွင်ကူးပြောင်းရေးကို ကြီးကြပ်ရန် ဖြစ်သည်။

ရှိတ်ဟာဆီနာ ထွက်ခွာပြီးနောက် သူမနှင့် သူမ၏အစိုးရအဖွဲ့ဝင်များအပေါ် လူသတ်မှု၊ ညှဉ်းပန်းနှိပ်စက်မှု၊ ပြည်သူ့လွတ်လပ်ခွင့်ဆိုင်ရာ ရာဇဝတ်မှုများနှင့် လူမျိုးတုံးသတ်ဖြတ်မှုများအပါအဝင် များပြားလှသော ရာဇဝတ်မှုများဖြင့် တရားစွဲဆိုခံခဲ့ရသည်။ ဒါကာရှိ ယာယီအစိုးရက အိန္ဒိယအစိုးရအား ရှိတ်ဟာဆီနာကို ပြည်နှင်ဒဏ်ပေးရန် တောင်းဆိုခဲ့ပြီး သူမအား နိုင်ငံသို့ပြန်လာစေကာ တရားရင်ဆိုင်စေရန် လိုအပ်ကြောင်း ပြောကြားခဲ့သည်။ နယူးဒေလီမှ ယခုအချိန်ထိ တရားဝင် အကြောင်းပြန်ခြင်းမရှိသေးဘဲ ဟာဆီနာအား နေထိုင်ခွင့်သက်တမ်း တိုးမြှင့်ပေးခဲ့သည်။

ကိုးကား-RT

ရာထူးမှဖြုတ်ချခံခဲ့ရသည့် တောင်ကိုရီးယားသမ္မတ ယွန်းဆက်ယိုးလ် သည် ရာဇဝတ်မှုဆိုင်ရာ ရုံးတင်စစ်ဆေးမှုခံရမည့် တောင်ကိုရီးယား၏ ပထမဆုံးသမ္မတဖြစ်လာခဲ့သည်ဟု သိရပါသည်။ယွန်းဆက်ယိုးလ်သည် စစ်အုပ်ချုပ်ရေးဥပဒေ ပြဋ္ဌာန်းခဲ့ခြင်းနှင့်ပတ်သက်၍ စစ်ဆေးမေးမြန်းမှုများလုပ်ဆောင်ရန်အတွက် တောင်ကိုရီးယားအာဏာပိုင်များ၏ ဖမ်းဆီးထိန်းသိမ်းမှုကို ခံခဲ့ရခြင်းလည်းဖြစ်ပါသည်။ ပြီးခဲ့သည့်နှစ် ဒီဇင်ဘာလ ၃ ရက်တွင် ယွန်းဆက်ယိုးလ်က စစ်အုပ်ချုပ်ရေးဥပဒေကို ပြဋ္ဌာန်းခဲ့ခြင်း ဖြစ်သည်ဟုလည်း သိရပါသည်။

သို့သော်လည်း လွှတ်တော်၌ မဲခွဲဆုံးဖြတ်မှုများ လုပ်ဆောင်ခဲ့ပြီးနောက် ယွန်းဆက်ယိုးလ်သည် စစ်အုပ်ချုပ်ရေးဥပဒေပြဋ္ဌာန်းမှုကို နာရီပိုင်း အကြာ တွင် ပြန်လည်ရုတ်သိမ်းခဲ့ရကြောင်း သိရပါသည်။

၂၀၂၄ ခုနှစ်၊ ဒီဇင်ဘာလ ၁၄ ရက်တွင် ယွန်းဆက်ယိုးလ်သည် လွှတ်တော်အတွင်း စွပ်စွဲပြစ်တင်မှုများကို ခံခဲ့ရကြောင်းလည်း သိရသည်။ ယွန်းဆက်ယိုးလ် ကို ဖမ်းဆီးရန်အတွက် ဖမ်းဝရမ်းကို ဇန်နဝါရီလ ၁၅ ရက်၊ နံနက် ၁၀ နာရီ ၃ဝ မိနစ်အချိန်တွင်ထုတ်ပြန်ခဲ့သည်ဟု အကျင့်ပျက်ခြစားမှု စုံစမ်း စစ်ဆေးရေး အဆင့်မြင့်အရာရှိများရုံး (CIO)က ပြောကြားခဲ့ပါသည်။

ယခင်လ(ဇန်နဝါရီ)ကတည်းက ဖမ်းဆီးခံခဲ့ရသည့် ယွန်းဆက်ယိုးလ် သည် ထောင်ဒဏ်တစ်သက်တစ်ကျွန်း သို့မဟုတ် သေဒဏ်ပေးခံရနိုင်ဖွယ်ရှိနေကြောင်းသိရပြီး ယွန်းဆက်ယိုးလ်၏ အမှုကြားနားမှုကို ဖေဖော်ဝါရီ လ ၂၀ ရက်၊ နံနက် ၁၀ နာရီအချိန်တွင် လုပ်ဆောင်သွားမည်ဟုလည်းသိရပါသည်။

ကိုးကား-NP News

အမေရိကန်သမ္မတ ဒေါ်နယ်ထရမ့်က ယူကရိန်းခေါင်းဆောင် ဗလာ ဒီမာဇီလန်စကီးကို “ရွေးကောက်ပွဲမရှိသော အာဏာရှင်” ဟု ခိုင်းနှိုင်း ခေါ်ဆိုကာ ရုရှားနှင့်ဖြစ်ပွားနေသော ပဋိပက္ခကို စီမံခန့်ခွဲမှုညံ့ဖျင်းပြီး အမေရိကန်ငွေကြေးအကူအညီများကို အလွဲသုံးစားလုပ်သည်ဟု စွပ်စွဲခဲ့သည်။ ဖေဖော်ဝါရီ တတိယပတ်အတွင်း ဆော်ဒီအာရေးဗီးယားနိုင်ငံ တွင် အမေရိကန် - ရုရှားတွေ့ဆုံဆွေးနွေးပွဲပြီးနောက် ဝါရှင်တန်နှင့် ကိယက်ဗ်အကြား တင်းမာမှုများ ပိုမိုမြင့်တက်လာခဲ့သည်။

ဖေဖော်ဝါရီ ၁၉ ရက်နေ့တွင် ၎င်း၏ Truth Social ပလက်ဖောင်း၌ ထရမ့်က ဇီလန်စကီးကို ဝေဖန်ကာ “ယူကရိန်းခေါင်းဆောင်သည် အမေရိကန်ပြည်ထောင်စုအား မအောင်မြင်နိုင်သော စစ်ပွဲတစ်ခုထဲသို့ ဒေါ်လာ ၃၅၀ ဘီလီယံ သုံးစွဲရန် စည်းရုံးခဲ့သည်” ဟု ရေးသားခဲ့သည်။ ထို့အပြင် ၎င်းက ဇီလန်စကီးသည် “ရွေးကောက်ပွဲများ ကျင်းပရန် ငြင်းဆိုနေပြီး ယူကရိန်းရွေးကောက်ပွဲအပေါ် စိတ်ဝင်စားမှု အားနည်းသည်” ဟု ဆိုသည်။

“ရွေးကောက်ပွဲမရှိသော အာဏာရှင် ဇီလန်စကီးအနေဖြင့် ရွေးကောက်ပွဲ ကို အမြန်ဆုံးလုပ်ဆောင်ခြင်းက ၎င်းအတွက် ကောင်းမွန်သော အဖြေရရှိမည်ဖြစ်ပြီး ထိုသို့မဟုတ်ပါက နိုင်ငံမဲ့ဖြစ်သွားနိုင်သည်” ဟု ထရမ့်က သတိပေးခဲ့သည်။

ကိုးကား-RT

မော်စကို၊ နိုင်ငံရေး

ရုရှားသမ္မတ  ဗလာဒီမာပူတင်နှင့် အမေရိကန်သမ္မတ ဒေါ်နယ်ထရမ့်တို့သည် ဖေဖော်ဝါရီလ အကုန်ပိုင်းတွင် တွေ့ဆုံနိုင်သည်ဟု ရုရှားအစိုးရအဖွဲ့မှ ပြောရေးဆိုခွင့်ရှိသူ ဒီမီထရီပက်စကော့က ဖေဖော်ဝါရီလ၁၉ ရက်တွင် ပြောသည်။

သို့သော် ခေါင်းဆောင်နှစ်ဦး၏ တွေ့ဆုံမှုသည်  ၂၀၂၁  ခုနှစ်နောက်ပိုင်းမှစ၍ ရုရှားနှင့် အမေရိကန်တို့ကြား ပထမဆုံးအကြိမ်  မျက်နှာချင်းဆိုင်တွေ့ဆုံမှုဖြစ်သောကြောင့်  ကြိုတင်ပြင်ဆင်ရန် အချိန်ပိုမိုကြာမြင့်နိုင်ကြောင်း ပက်စကော့က ဆက်ပြောသည်။

မိမိအနေဖြင့် သမ္မတဗလာဒီမာပူတင်နှင့် ယခုလအတွင်း တွေ့ဆုံဖွယ်ရှိသည်ဟု ထရမ့်က ဖေဖော်ဝါရီလ  ၁၈ ရက်တွင် ပြောကြားခဲ့ပြီး ဆော်ဒီအာရေဗျနိုင်ငံတွင် ကျင်းပသည့် အမေရိကန်-ရုရှားဆွေးနွေးမှု၌ ယူကရိန်းကပါဝင်မှုမရရှိခြင်းနှင့် ပတ်သက်၍ ယူကရိန်းအစိုးရ၏ စိုးရိမ်မှုကို ပယ်ချခဲ့ကြောင်း သိရသည်။

ယူကရိန်းနိုင်ငံအနေဖြင့် ရုရှားအစိုးရနှင့် သဘောတူညီချက်တစ်ရပ်ကို အစောပိုင်းကတည်းက ချမှတ်နိုင်ရန် အခွင့်အရေးရှိခဲ့သော်လည်း ထိုသို့သဘောတူညီချက်ရရှိစေရန် ဆောင်ရွက်နိုင်ခြင်းမရှိခဲ့ဟု ထရမ့်က ဆက်လက်ပြောကြားသည်။

အမေရိကန်နှင့် ရုရှားအရာရှိကြီးများကြား ဆော်ဒီအာရေဗျနိုင်ငံ ရီယက်မြို့၌ တွေ့ဆုံဆွေးနွေးမှုသည် နှစ်နိုင်ငံကြား ဆက်ဆံရေးအပေါ် အဓိကအာရုံစိုက် လုပ်ဆောင်ခြင်းဖြစ်သော်လည်း  ၎င်းဆွေးနွေးမှုသည်    ယူကရိန်းစစ်ပွဲကို အဆုံးသတ်ရေးအတွက် အလွန့်အလွန် အရေးကြီးသော ခြေလှမ်းတစ်ရပ်လည်း ဖြစ်ကြောင်း  ပက်စကော့က ဆက်လက် ပြောကြားထားကြောင်း သိရသည်။

Source: Myawady Web Portal