သမ္မတ ဒေါ်နယ်ထရမ့်က ရုရှားသမ္မတ ဗလာဒီမာ ပူတင်နှင့် ပြုလုပ်ခဲ့သည့် ဆွေးနွေးပွဲအပြီး “တစ်ခုခုဖြစ်လာလိမ့်မည်” ဟု မျှော်လင့်ကြောင်း ဖွင့်ဟခဲ့သော်လည်း ယူကရိန်းသမ္မတ ဗလာဒီမာ ဇီလန်စကီးသည် မော်စကိုနှင့် ပဋိပက္ခကို အပြီးအပိုင် အဆုံးသတ်ရန် အပြည့်အဝ ကတိကဝတ် ပြုထား ခြင်း ရှိ၊ မရှိ မရှင်းလင်းသေးကြောင်း ပြောကြားခဲ့သည်။

နှစ်နိုင်ငံကြား ငြိမ်းချမ်းရေးအတွက် ကြားဝင်ဆောင်ရွက်ရာတွင် ကိယက်ဗ် ထက် မော်စကိုနှင့် ဆက်ဆံရေးက ပိုမိုလွယ်ကူကြောင်း မကြာခဏ ပြောဆိုခဲ့သည့် ထရမ့်သည် ယူကရိန်းသည် ပဋိပက္ခကို အဆုံးသတ်ရန် “လုံလောက်စွာ လုပ်ဆောင်နေပြီလား” ဟု မေးမြန်းခံရသည့်အခါ အလားတူ ခံစားချက်ကို ထပ်လောင်းဖော်ပြခဲ့သည်။

“ယူကရိန်းအနေဖြင့် ပဋိပက္ခကိုအဆုံးသတ်ရန် လုပ်ဆောင်မှုနှင့် ပတ်သက်၍ လာမည့်သီတင်းနှစ်ပတ်အတွင်း သိရှိနိုင်မည်ဖြစ်ပြီး ဇီလန် စကီးသည် ဆက်ဆံရ ခက်ခဲသူတစ်ဦးဖြစ်သော်လည်း ပြဿနာကို ဖြေရှင်းလိုသည်ဟု မျှော်လင့်ပါကြောင်း” ထရမ့်က ပူတင်နှင့် ဇီလန်စကီးတို့နှင့် သီးသန့်ဆွေးနွေးပြီးနောက် အိမ်ဖြူတော်တွင် သတင်းထောက်များအား ပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဂရင်းလန်းကျွန်းနှင့်ပတ်သက်၍ ဒိန်းမတ်နိုင်ငံ၏အချုပ်အခြာအာဏာနှင့် နယ်နိမိတ်ဆိုင်ရာ ဂုဏ်သိက္ခာကို တရုတ်နိုင်ငံအနေဖြင့် အပြည့်အဝလေးစားကြောင်း မေလ ၁၉ ရက်နေ့တွင် တရုတ်နိုင်ငံခြားရေးဝန်ကြီး ဝမ်ယိက ဒိန်းမတ်နိုင်ငံခြားရေးဝန်ကြီး လာရ်စ် လုခ် ရက်စ်မူဆန်နှင့်တွေ့ဆုံစဉ် ပြောကြားခဲ့ပြီး တရုတ်နိုင်ငံ၏ အချုပ်အခြာအာဏာနှင့်သက်ဆိုင်သည့်ကိစ္စရပ်များတွင်လည်း တရုတ်နိုင်ငံဘက်မှ ရပ်တည်သွားရန်လည်း ဒိန်းမတ်အား တိုက်တွန်းခဲ့ကြောင်း တရုတ်နိုင်ငံခြားရေး ဝန်ကြီးဌာန၏ သတင်းထုတ်ပြန်ချက်တွင် ဖော်ပြထားသည်။ 

အမေရိကန်သမ္မတ ဒေါ်နယ်ထရမ့်သည် မကြာသေးမီလများအတွင်း ဒိန်းမတ်၏ ကိုယ်ပိုင်အုပ်ချုပ်ခွင့်ရဒေသဖြစ်ပြီး မဟာဗျူဟာအရ အရေးပါသော ဂရင်းလန်းကျွန်းကို အမေရိကန်က ဝယ်ယူသင့်ကြောင်း အခိုင်အမာပြောဆိုခဲ့သည်။ 

ပြီးခဲ့သည့်သီတင်းပတ်တွင် ဒိန်းမတ်နိုင်ငံသို့ ထိုင်ဝမ်အကြီးအကဲဟောင်း ချိုင်းအင့်ဝမ် (Tsai Ing-wen) လာရောက်ခဲ့ခြင်းအပေါ် တရုတ်နိုင်ငံက ဝေဖန်ပြောဆိုခဲ့ပြီးနောက် ယခုလို နှစ်နိုင်ငံ နိုင်ငံခြားရေးဝန်ကြီးများ တွေ့ဆုံခဲ့ခြင်းဖြစ်သည်။ ဒိန်းမတ်-ထိုင်ဝမ်နှစ်နိုင်ငံအကြား ရင်းနှီးသော ဆက်ဆံရေးရှိခြင်းကိုလည်း တရုတ်နိုင်ငံက ကန့်ကွက်လျက်ရှိသည်။ 

၂၀၀၉ ခုနှစ်တွင် ဒိန်းမတ်သို့ တိဘက်ဘာသာရေးခေါင်းဆောင် ဒလိုင်း လားမား လာရောက်ခဲ့သည့်ခရီးစဉ်ကြောင့် တရုတ်-ဒိန်းမတ်နှစ်နိုင်ငံ ဆက်ဆံရေး အနိမ့်ဆုံးသို့ ရောက်ရှိခဲ့ဖူးသည်။ သို့သော် တရုတ်နိုင်ငံ၏ ပန်ဒါသံတမန်ရေး (Panda Diplomacy) အရ တရုတ်က ဒိန်းမတ်သို့ ပန်ဒါဝက်ဝံများ လက်ဆောင်ပေးခဲ့ပြီးနောက် နှစ်နိုင်ငံဆက်ဆံရေး ပြန်လည် တိုးတက်‌ကောင်းမွန်လာခဲ့သည်။ 

တရုတ်နိုင်ငံသည် သိပ္ပံနှင့် နည်းပညာဆန်းသစ်တီထွင်မှုနယ်ပယ်နှင့် အစိမ်းရောင်စီးပွားရေးဖွံ့ဖြိုးတိုးတက်မှု (သဘာဝပတ်ဝန်းကျင်ကို မထိခိုက်စေဘဲ စီးပွားရေးဖွံ့ဖြိုးတိုးတက်မှု) ပူးပေါင်းဆောင်ရွက်မှုများအပြင် ဒိန်းမတ်နိုင်ငံနှင့် အခြားစီးပွားရေးနှင့် ကုန်သွယ်ရေးဆိုင်ရာ ပူးပေါင်းဆောင်ရွက်မှုကို နက်နက်ရှိုင်းရှိုင်း လုပ်ဆောင်လိုကြောင်း ဝမ်ယိ က ပြောကြားခဲ့သည်။

ထို့ပြင် ဘက်ပေါင်းစုံပူးပေါင်းဆောင်ရွက်မှုနှင့် လွတ်လပ်သောကုန်သွယ်ရေးကို ထိန်းသိမ်းကာကွယ်ရန် နှစ်နိုင်ငံသဘောတူညီခဲ့ကြပြီး EU နှင့်လည်း ဆွေးနွေးမှုခိုင်မာစေရန်နှင့် ပူးပေါင်းဆောင်ရွက်မှုမြှင့်တင်ရန် ဆန္ဒရှိကြောင်း ဝမ်ယိက ဖြည့်စွက်ပြောကြားခဲ့သည်။

ကိုးကား - MSN

ဘာသာပြန်ဆိုသူ-ဒေါ်မေသူခိုင်၊ လက်ထောက်ညွှန်ကြားရေးမှူး၊ နစက-၃

ကရင်မလင် ပြောရေးဆိုခွင့်ရှိသူ ဒီမီထရီ ပက်စ်ကော့ဗ်က ရိုမေးနီးယား ၏ မကြာသေးမီက သမ္မတရွေးကောက်ပွဲကို “ပုံမှန်မဟုတ်” ဟု သုံးသပ် ခဲ့ပြီး အနိုင်ရသူသည် အဓိကပြိုင်ဘက်မရှိဘဲ အနိုင်ရရှိခဲ့ကြောင်း ဖော်ပြ ခဲ့သည်။

တနင်္ဂနွေနေ့ (မေ ၁၈) တွင် ဥရောပသမဂ္ဂထောက်ခံသူ Nicusor Dan က ဥရောပသမဂ္ဂဆန့်ကျင်ရေး George Simion အား ရာခိုင်နှုန်းအနည်းငယ်ဖြင့် အနိုင်ရကာ ရိုမေးနီးယား သမ္မတအဖြစ် ရွေးချယ်ခံခဲ့ရသည်။

အဆိုပါ ရွေးကောက်ပွဲပြန်လည်ကျင်းပခြင်းမှာ ရိုမေးနီးယား ဖွဲ့စည်းပုံအခြေခံဥပဒေဆိုင်ရာတရားရုံးက နိုဝင်ဘာလကကျင်းပခဲ့သော ရွေးကောက်ပွဲရလဒ်များကို ပယ်ဖျက်ပြီးနောက် ဖြစ်ပေါ်လာခြင်း ဖြစ်သည်။ ထိုရွေးကောက်ပွဲတွင် ဥရောပသမဂ္ဂနှင့် နေတိုးကို ဝေဖန်သူ လွတ်လပ်သည့်အမတ်လောင်း Calin Georgescu က ၂၃% ဖြင့် ထိပ်ဆုံးမှ ရပ်တည်နိုင်ခဲ့သည်။ အစိုးရက ၎င်း၏ရွေးကောက်ပွဲ ကမ်ပိန်း တွင် “မမှန်ကန်သောလုပ်ရပ်များ” ပါဝင်သည်ဟုဆိုကာ ရုရှား၏ ဝင်ရောက် စွက်ဖက်မှုဆိုင်ရာ ထောက်လှမ်းရေးအစီရင်ခံစာများကို ကိုးကားခဲ့သည်။ သို့သော် မော်စကိုက အဆိုပါအချက်ကို ငြင်းဆိုခဲ့သည်။

တနင်္လာနေ့ (မေ ၁၉) တွင် သတင်းထောက်များအား ပြောကြားရာတွင် ပက်စ်ကော့ဗ်က ထိုရွေးကောက်ပွဲကို “ပုံမှန်မဟုတ်သော ရွေးကောက်ပွဲ” ဟု ခေါ်ဆိုခဲ့ပြီး အနိုင်ရရှိရန် အခွင့်အလမ်းအများဆုံး အမတ်လောင်းကို အကြောင်းပြချက်များ မပြည့်စုံစွာဖြင့် အတင်းအဓမ္မ ဖယ်ရှားခံခဲ့ ရကြောင်း ထောက်ပြခဲ့သည်။

“သို့သော် ထိုကဲ့သို့သော အဓိကပြိုင်ဘက်မရှိဘဲ အနိုင်ရသူက အနိုင်ရသူပါပဲ။ ဤသည်မှာ မိမိတို့ ရင်ဆိုင်နေရသော အမှန်တရားဖြစ်သည်” ဟု ၎င်းက ဖြည့်စွက်ပြောကြားခဲ့သည်။

Telegram ပလက်ဖောင်း တည်ထောင်သူ Pavel Durov ၏ ရွေးကောက်ပွဲမတိုင်မီ “ရိုမေးနီးယားရှိ ရှေးရိုးစွဲသမားများ၏ ထုတ်လွှင့်ရေးသားမှုများကိုပိတ်ရန်” ဥရောပသမဂ္ဂနိုင်ငံတစ်ခုမှ အစိုးရက ၎င်းအား တောင်းဆိုခဲ့သည်ဟူသော အချက်နှင့်ပတ်သက်၍ မေးမြန်းခံရသည့်အခါ ပက်စ်ကော့ဗ်က ဥရောပသမဂ္ဂတွင် အခြားနိုင်ငံများ၏ ကိစ္စရပ်များတွင် ဝင်ရောက်စွက်ဖက်ခြင်း၏ ရှည်လျားသော သမိုင်းကြောင်းရှိကြောင်း ပြောကြားခဲ့ပြီး “ပြင်သစ်၊ ဗြိတိန်နှင့် ဂျာမနီကဲ့သို့သော ဥရောပ နိုင်ငံများ ၏ အခြားနိုင်ငံများ၏ကိစ္စရပ်များတွင် ဝင်ရောက်စွက်ဖက်မှုမှာ အထူး အဆန်းမဟုတ်” ဟု ပြောကြားခဲ့သည်။ 

Telegram ပလက်ဖောင်းတည်ထောင်သူ ရုရှားနွယ်ဖွား ပါဗယ် ဒူရိုဗ်က တနင်္ဂနွေနေ့ (မေ ၁၈) တွင် အနောက်ဥရောပ အစိုးရတစ်ရပ်ထံမှ ရိုမေးနီးယား သမ္မတရွေးကောက်ပွဲမတိုင်မီ ရိုမေးနီးယား Telegram ချန်နယ်များကို ဖယ်ရှားရန် တောင်းဆိုမှုကို ငြင်းဆိုခဲ့ကြောင်း ပြောကြား ခဲ့ပြီး ပြင်သစ်၏ ပြည်တွင်းထောက်လှမ်းရေးအဖွဲ့ (DGSI) ၏ ခေါင်းဆောင် နီကိုလပ်စ် လာနာက ၎င်းထံချဉ်းကပ်ခဲ့ကြောင်း ဖော်ပြခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အမေရိကန်သမ္မတ ဒေါ်နယ်ထရမ့်က ရုရှားသမ္မတ ဗလာဒီမာ ပူတင်နှင့် ပြုလုပ်ခဲ့သည့် ဆွေးနွေးပွဲသည် အလွန်ကောင်းမွန်စွာ ပြီးဆုံးခဲ့ကြောင်း ပြောကြားခဲ့ပြီး မော်စကိုနှင့် ကိယက်ဗ်တို့အကြား ဆွေးနွေးပွဲများကို “ချက်ချင်း” စတင်မည်ဟု ပြောကြားခဲ့သည်။

ခေါင်းဆောင်နှစ်ဦးသည် တနင်္လာနေ့ (မေ ၁၉) တွင် ဖုန်းဖြင့် နှစ်နာရီ ကျော်ကြာ ပြောဆိုဆွေးနွေးခဲ့ကြပြီး အဓိကအားဖြင့် ယူကရိန်း ပဋိပက္ခနှင့် ပတ်သက်၍ ဆွေးနွေးခဲ့ကြသည်။ ပူတင်ကလည်း ဆွေးနွေးပွဲသည် “အလွန် အကျိုးရှိသည်” ဟု ဖော်ပြခဲ့သည်။

“ရုရှားနှင့်ယူကရိန်းတို့သည် စစ်ပြေငြိမ်းရေးနှင့် ပိုမိုအရေးကြီးသည့် စစ်ပွဲအဆုံးသတ်ရန် ညှိနှိုင်းမှုများကိုချက်ချင်း စတင်မည်ဖြစ်ပြီး အခြေ အနေများကို နှစ်ဖက်ညှိနှိုင်းရမည်။ အဘယ်ကြောင့်ဆိုသော် ၎င်းတို့သာ မည်သူမျှမသိသည့် ညှိနှိုင်းမှုအသေးစိတ်များကို သိရှိထားသောကြောင့် ဖြစ်သည်” ဟု အမေရိကန်သမ္မတက ပြောကြားခဲ့သည်။

ရုရှားသည် အမေရိကန်နှင့် ကြီးမားသော ကုန်သွယ်မှုလုပ်ဆောင်လိုကြောင်း ဒေါ်နယ်ထရမ့်က ပြောကြားခဲ့ပြီး ပဋိပက္ခ အဖြေရှာနိုင်ပါက ယူကရိန်းသည်လည်း ကုန်သွယ်ရေးတွင် ကြီးမားသော အကျိုးကျေးဇူးခံစားရနိုင်မည်ဖြစ်ကြောင်း ဖြည့်စွက်ပြောဆိုခဲ့သည်။

“ရုရှားအတွက် အလုပ်အကိုင်နှင့် ဘဏ္ဍာငွေများစွာ ဖန်တီးရန် အလားအလာ အလွန်ကြီးမားပြီး အဆိုပါအခွင့်အလမ်းသည် အကန့်အသတ်မရှိ” ဟု ထရမ့်က ရေးသားခဲ့သည်။

အမေရိကန်သမ္မတက ပူတင်နှင့် ဖုန်းဖြင့်ဆွေးနွေးမှုအပြီးတွင် ယူကရိန်း သမ္မတ ဇီလန်စကီး၊ ဥရောပကော်မရှင်ဥက္ကဋ္ဌ အာဆူလာ ဗွန်ဒါလိုင်းယန်၊ ပြင်သစ်သမ္မတ အီမန်နူရယ် မာခရွန်၊ အီတလီဝန်ကြီးချုပ် ဂျော်ဂျီယာ မယ်လိုနီ၊ ဂျာမနီဝန်ကြီးချုပ် ဖရီဒရစ် မာ့ဇ်နှင့် ဖင်လန်သမ္မတ အလက်ဇန်ဒါး စတပ်တို့နှင့် ဆက်သွယ်ပြောဆိုခဲ့ကြောင်း၊ ရုရှားသမ္မတနှင့် ၎င်း၏ ဆွေးနွေးပွဲအကြောင်းကို အဆိုပါ ပုဂ္ဂိုလ်များအား အသိပေးခဲ့ကြောင်း ပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

တရားဝင်ရေတွက်မှုများအရ ဥရောပသမဂ္ဂ (EU) ကို ထောက်ခံသည့် ဘူချာရက်စ်မြို့တော်ဝန် Nicusor Dan သည် ရိုမေးနီးယား သမ္မတ ရွေးကောက်ပွဲပြန်လည်ကျင်းပချိန်တွင် EU အဆိုးမြင်ဝါဒီ ကိုယ်စားလှယ်လောင်း George Simion အား အနိုင်ရရှိခဲ့သည်။

တနင်္ဂနွေနေ့ (မေ ၁၈) တွင် မဲအားလုံး၏ ၉၉ % ကျော် ရေတွက်ပြီးချိန်တွင် Dan သည် မဲအရေအတွက် ၅၄ % ရရှိခဲ့ပြီး Simion က ၄၆ % ရရှိခဲ့ပါတယ်။

Dan က ၎င်းကိုထောက်ခံသူများအား “အံ့အားသင့်ဖွယ် စည်းလုံးမှု” အတွက် ကျေးဇူးတင်ကြောင်း ပြောကြားခဲ့သည်။

“မိမိတို့သည် ဥပဒေလေးစားလိုက်နာမှုကိုအခြေခံပြီး နိုင်ငံသားအားလုံး အတွက် စည်းလုံးညီညွတ်ပြီး ရိုးသားသည့် ရိုမေးနီးယားနိုင်ငံကို မနက်ဖြန် ကစပြီး ပြန်လည်တည်ဆောက်ရေး စတင်နေပါပြီ” ဟု ၎င်းက X တွင် ရေးသားခဲ့သည်။

လက်ယာပါတီ Alliance for the Union of Romanians (AUR) ခေါင်းဆောင် Simion သည် အစောပိုင်းတွင် ရှုံးနိမ့်မှုကိုဝန်မခံဘဲ တနင်္ဂနွေည (မေ ၁၈) က X တွင် “မိမိသည် သမ္မတအသစ်ပါ” ဟု ကြေညာခဲ့သော်လည်း နာရီများစွာကြာပြီးနောက် Dan အား ဂုဏ်ပြု ခဲ့သည်။

“ဒါဟာ ရိုမေးနီးယားပြည်သူများ၏ ဆန္ဒပါ၊ ရှုံးနိမ့်မှု၏ ခါးသက်သည့် အရသာကို ခံစားရခက်ပေမယ့် မိမိတို့အနေဖြင့် ဆက်လက်ရုန်းကန်မှာပါ” ဟု တနင်္လာနေ့ (မေ ၁၉) တွင် ရုပ်သံဖော်ပြမှုတစ်ခုတွင် ပြောကြားခဲ့သည်။

“မိမိတို့ တိုက်ပွဲတစ်ခုရှုံးနိုင်ပေမယ့် စစ်ပွဲတော့ ဘယ်တော့မှ မရှုံးပါ” ဟု ၎င်းက ဖြည့်စွက်ပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ရုရှားနိုင်ငံသည် နိုင်ငံတကာလေကြောင်းခရီးစဉ်များ ပြန်လည်စတင်ရန် နိုင်ငံအများအပြားနှင့် ဆွေးနွေးလျက်ရှိကြောင်း ရုရှား၏ လေကြောင်းသယ်ယူပို့ဆောင်ရေး ဖက်ဒရယ်အေဂျင်စီ ဥက္ကဋ္ဌ ဒီမီထရီ ယာဒရော့ဗ် က သတင်းထောက်များအား ပြောကြားလိုက်ပါသည်။

“မိမိတို့အနေဖြင့် နိုင်ငံတကာလေကြောင်းခရီးစဉ်များနှင့်ပတ်သက်၍နိုင်ငံခြားရေးဝန်ကြီးဌာန၊ သယ်ယူပို့ဆောင်ရေးဝန်ကြီးဌာနနှင့် စီးပွားရေး ဖွံ့ဖြိုးတိုးတက်ရေးဝန်ကြီးဌာနတို့နှင့် အဆက်မပြတ် ပူးပေါင်း ဆောင်ရွက် လျက်ရှိပါသည်၊ နိုင်ငံများစွာက လေကြောင်းအာဏာပိုင်များနှင့်လည်း ဆွေးနွေးမှုများ ပြုလုပ်နေပါသည်၊ လေကြောင်းခရီးစဉ်များကို ယာယီ ရပ်ဆိုင်းထားသည့် နိုင်ငံများကလည်း ပြန်လည်စတင်ရန် အဆင်သင့် ဖြစ်နေကြပါပြီ” ဟု ၎င်းက ရှင်းပြခဲ့ပါသည်။

ယာဒရော့ဗ်၏ ပြောကြားချက်အရ ရုရှားလေကြောင်းလိုင်းများသည် အချို့နိုင်ငံများသို့ ပျံသန်းရန် အဆင်သင့်ဖြစ်နေသော်လည်း ၎င်းတို့၏ လေယာဉ်များအား လိုအပ်သော ထိန်းသိမ်းမှုများနှင့် ပိတ်ဆို့မှုဆိုင်ရာ ကန့်သတ်ချက်များ မခံရစေရေးအတွက် အာမခံချက်လိုအပ်နေကြောင်း ဖော်ပြခဲ့သည်။

လက်ရှိတွင် ရုရှားသည် တစ်ဆင့်ခံ မလိုဘဲ နိုင်ငံပေါင်း ၃၈ နိုင်ငံသို့ တိုက်ရိုက်ပျံသန်းနိုင်သော်လည်း ၎င်းတို့အနက် ၁၇ နိုင်ငံသို့ ရုရှားနှင့် နိုင်ငံခြားလေကြောင်းလိုင်းများက ဝန်ဆောင်မှုပေးလျက်ရှိပါသည်။

ကိုးကား- TASS

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊နစက-၃

ဥရောပအင်အားကြီးနိုင်ငံများနှင့် ယုံကြည်မှုပြန်လည်တည်ဆောက်ရန် အီရန်က အဆင်သင့်ရှိသည်ဟု အီရန်နိုင်ငံခြားရေးဝန်ကြီး အာဘတ်စ် အာဂရာချီက ပြောကြားခဲ့ပါသည်။ အာဘတ်စ်အာဂရာချီက “ဥရောပနှင့် ဆက်ဆံရေးမှာ ကဏ္ဍသစ်တစ်ခုစတင်ပြီး ယုံကြည်မှုပြန်လည်တည်ဆောက်ရန်အတွက် အီရန်က အဆင်သင့်ဖြစ်နေပါပြီ။ ဥရောပက အဆိုပါလမ်းကြောင်းကို ပြုပြင်ရန်အတွက် ဆန္ဒရှိသည်ဆိုပါက ယုံကြည်မှု ပြန်လည်တည်ဆောက်ရန်နှင့် ဆက်ဆံရေးများ တိုးချဲ့ရန် အီရန်က တုံ့ဆိုင်းနေမည်မဟုတ်ပါ” ဟု ပြောခဲ့ပါသည်။ လွန်ခဲ့သောရက်ပိုင်းက အီရန်အကြီးတန်းသံတမန်များသည် အီရန်-အမေရိကန် နျူကလီးယားဆိုင်ရာ ဆွေးနွေးညှိနှိုင်းမှု အခြေအနေများ ဆွေးနွေးရန်အတွက် ပြင်သစ်၊ ဗြိတိန်နှင့် ဂျာမနီတို့၏ အကြီးတန်းသံတမန်များနှင့် တွေ့ဆုံမှုများ လုပ်ဆောင်ခဲ့ကြောင်း သိရပါသည်။ အီရန်သည် အမေရိကန်နှင့် လေးကြိမ်မြောက် နျူကလီးယားဆိုင်ရာဆွေးနွေးပွဲကို လုပ်ဆောင်ခဲ့သော်လည်း လက်ရှိအချိန်အထိ သိသာထင်ရှားသည့်တိုးတက်မှုများ မရှိသေးကြောင်း သိရပါသည်။ အဆိုပါဆွေးနွေးမှုများသည် အမေရိကန် က (၂၀၁၅)ခုနှစ် နျူကလီးယားသဘောတူစာချုပ်မှ နှုတ်ထွက်ခဲ့ပြီးနောက်ပိုင်း အီရန်နှင့် အမေရိကန်ကြားလုပ်ဆောင်သည့် အဆင့်မြင့် ဆက်သွယ်မှုတစ်ခုဖြစ်ကြောင်းလည်း သိရပါသည်။

ကိုးကား- NP News

ပါကစ္စတန် ဝန်ကြီးချုပ် ရှာဘတ်ဇ်က ငြိမ်းချမ်းရေးအတွက် အိန္ဒိယနိုင်ငံနှင့် တွေ့ဆုံဆွေးနွေးလိုကြောင်း အဆိုပြုကမ်းလှမ်းလိုက်သည်။ အိန္ဒိယ နှင့် ပါကစ္စတန်တို့သည် ပြီးခဲ့သော ဧပြီ (၂၂) ရက်က ကက်ရှ်မီးယား ပြည်နယ်တွင် လူပေါင်း (၂၆) ဦး သေဆုံးစေခဲ့သော အကြမ်းဖက်တိုက်ခိုက်မှုနှင့်ပတ်သက်ပြီး အငြင်းပွားမှုများဖြစ်ပွားခဲ့ကာ အပြန်အလှန် ပစ်ခတ်တိုက်ခိုက်မှုများဖြစ်ပွားခဲ့ကြောင်း သိရသည်။

 အိန္ဒိယစစ်တပ်သည် ကက်ရှ်မီးယားပြည်နယ်တွင် လူပေါင်း (၂၆) ဦး သေဆုံးစေခဲ့သော အကြမ်းဖက်တိုက်ခိုက်မှုနှင့်ပတ်သက်ပြီး မေလ (၇) ရက်တွင် ဆင်ဒူး စစ်ဆင်ရေးတစ်ရပ်ကို စတင်ခဲ့ပြီး ပါကစ္စတန်နိုင်ငံအခြေစိုက် အကြမ်းဖက်သမားများကို အဓိက ပစ်မှတ်ထား တိုက်ခိုက်ခဲ့ကြောင်း သိရသည်။

ပါကစ္စတန်စစ်တပ်ကလည်း အိန္ဒိယကို ပြန်လည်တုံ့ပြန်တိုက်ခိုက်ခဲ့ပြီး အိန္ဒိယစစ်အခြေစိုက်စခန်းများကို မေလ (၁၁) ရက်တွင် စစ်ဆင်ရေး တစ်ရပ် ဆင်နွှဲကာ တုံ့ပြန်တိုက်ခိုက်ခဲ့ကြောင်း သိရသည်။ အိန္ဒိယနှင့် ပါကစ္စတန် နိုင်ငံကြား အပြန်အလှန်တိုက်ခိုက်နေချိန်အတွင်း အမေရိကန် နိုင်ငံက အပစ်အခတ်ရပ်စဲရေးရယူနိုင်ရန် ကြားဝင် စေ့စပ်ဆွေးနွေးခဲ့ရာ အပစ်ခတ်ရပ်စဲရေးရယူနိုင်ခဲ့ကြောင်း သိရသည်။ 

ပါကစ္စတန်ဝန်ကြီးချုပ်သည် မေလ (၁၆) ရက်တွင် ပါကစ္စတန်နိုင်ငံ ပန်ဂျပ်ပြည်နယ်ရှိ လေတပ်အခြေစိုက်စခန်းကို သွားရောက်ချိန်အတွင်း အိန္ဒိယနှင့် ငြိမ်းချမ်းရေးဆွေးနွေးရန် ကမ်းလှမ်းခဲ့ကြောင်း သိရသည်။ ပါကစ္စတန်ဝန်ကြီးချုပ်က “ငြိမ်းချမ်းရေးအတွက် အိန္ဒိယနှင့်ဆွေးနွေးရန် အဆင်သင့်ရှိနေပါသည်။ ကက်ရှ်မီးယားပြည်နယ် အရေးကိစ္စ အပါအဝင် ငြိမ်းချမ်းရေးအတွက် ဆွေးနွေးလိုပါသည်” ဟု ပြောသည်။

ပါကစ္စတန် နိုင်ငံခြားရေးဝန်ကြီးကလည်း နှစ်ဖက်အကြား အငြင်းပွားဖွယ် ရာပြဿနာများကို ဖြေရှင်းရန်အတွက် အိန္ဒိယနှင့် ပေါင်းစပ်ညှိနှိုင်းမှု ပြုလုပ်ရန် တောင်းဆိုခဲ့သည်။ ပါကစ္စတန်နိုင်ငံခြားရေးဝန်ကြီးက အိန္ဒိယ သည် အပစ်အခတ်ရပ်စဲရေးကိုမေလ (၁၈) ရက်အထိ သက်တမ်းတိုး ခဲ့သော်လည်း နိုင်ငံရေးအရ တွေ့ဆုံဆွေးနွေးမှသာ နှစ်နိုင်ငံကြား အခက် အခဲပြဿနာများကို ဖြေရှင်းနိုင်မည်ဟု ပြောသည်။

ပါကစ္စတန်ဝန်ကြီးချုပ်က ငြိမ်းချမ်းရေးအတွက် ဆွေးနွေးရန် ပြောဆို ထားသော်လည်း အိန္ဒိယကာကွယ်ရေးဝန်ကြီးက ပါကစ္စတန်နိုင်ငံအပေါ် ပြုလုပ်ခဲ့သောဆင်ဒူးစစ်ဆင်ရေးက မပြီးဆုံးသေးကြောင်းပြောသည်။ အိန္ဒိယကာကွယ်ရေးဝန်ကြီးက “နှစ်နိုင်ငံအကြား လက်ရှိ အပစ်အခတ် ရပ်စဲရေးသည် ပါကစ္စတန်အတွက် အစမ်းသပ်ခံကာလတစ်ခုကဲ့သို့သာ ဖြစ်ပါသည်။ ပါကစ္စတန်သည် မကောင်းသောအပြုအမူကို ပြန်ပြောင်းရွေးချယ်ပါက အိန္ဒိယနိုင်ငံကလည်း သင့်တော်သည့် နည်းလမ်းဖြင့် တုံ့ပြန်မည်”ဟု ပြောခဲ့ကြောင်း သိရှိရပါသည်။

ကိုးကား- NP News

ဗီယက်နမ်ကွန်မြူနစ်ပါတီဗဟိုကော်မတီ အထွေထွေအတွင်းရေးမှူးချုပ် တိုလမ်သည် ဘယ်လာရုစ်နိုင်ငံသို့သွားရောက်စဉ် သမ္မတ အလက်ဇန်းဒါး လူကာရှန်ကိုအား ကျောက်မျက်ရတနာများဖြင့်ပြုလုပ်ထားသော ၎င်း၏ ပုံတူပန်းချီကို လက်ဆောင်ပဏ္ဍာအဖြစ် ပေးအပ်ခဲ့သည်။ လက်ဆောင် ဖလှယ်ပွဲအား မေလ ၁၂ ရက်နေ့တွင် မင့်စ်ခ်မြို့ ရှိ လွတ်လပ်ရေး နန်းတော်၌ ပြုလုပ်ခဲ့သည့်အကြောင်းကို “ဘယ်လာရုစ်-၁” ရုပ်သံလိုင်း က ထုတ်လွှင့်ခဲ့ပါသည်။ 

တိုလမ်က “သမ္မတကြီးအတွက် ကျောက်မျက်ရတနာများဖြင့် ပြုလုပ် ထားသည့် ပုံတူပန်းချီကားတစ်ချပ်ရှိပါသည်” ဟု ပြောကြားခဲ့ရာ သမ္မတ လူကာရှန်ကိုက “စိတ်ဝင်စားဖို့ကောင်းပါသည်” ဟု ပြန်လည် မှတ်ချက် ပြုခဲ့ပါသည်။ အပြန်အလှန်အနေဖြင့် ဘယ်လာရုစ်သမ္မတက တိုလမ် အား သီးသန့်ထုတ်လုပ်ထားသော ချောကလက်မျိုးစုံနှင့် ဘယ်လာရုစ် ထုတ်ကုန် မျိုးစုံကို လက်ဆောင်ပေးခဲ့ပါသည်။ သမ္မတလူကာရှန်ကိုက တိုလမ်အား “ချောကလက်အကြောင်း ပြောခဲ့ဖူးတယ်မလား။ ဒါတွေက မိမိတို့၏ ထုတ်ကုန်နမူနာတွေပါ” ဟု ဖြည့်စွက်ပြောကြားခဲ့ပါသည်။

၎င်းနှင့်တိုလမ်တို့သည် လက်ရှိအရေးပါသောကိစ္စရပ်များနှင့် အနာဂတ် ပူးပေါင်းဆောင်ရွက်မှုအလားအလာများကို ပွင့်လင်းစွာ ဆွေးနွေးခဲ့ကြောင်း ဘယ်လာရုစ်သမ္မတက ထည့်သွင်းပြောကြားခဲ့ပါသည်။ လူကာရှန်ကိုက တိုလမ်အား “လူမျိုးစုံ ချစ်ကြည်ရေးဆုတံဆိပ်” ချီးမြှင့်ခဲ့ပြီး အဆိုပါ ဆုတံဆိပ်သည် သမ္မတအားဂုဏ်ပြုသည့် ဓလေ့ထုံးတမ်း သက်သက် မဟုတ်ဘဲ နှစ်နိုင်ငံပူးပေါင်းရေးအားကောင်းစေရန်အတွက် တိုလမ်၏ ကြိုးပမ်းမှုများကို အသိအမှတ်ပြုခြင်းဖြစ်ကြောင်း အတိအလင်း ဖော်ပြခဲ့  ပါသည်။ ထို့ပြင် ဘယ်လာရုစ်သမ္မတသည် ဗီယက်နမ်သို့ လာရောက် လည်ပတ်ရန် ဗီယက်နမ် သမ္မတ၏ ဖိတ်ကြားခြင်းကို ခံခဲ့ရကြောင်း သိရှိ ရပါသည်။

ကိုးကား - Tass

ယူကရိန်းပဋိပက္ခကို စစ်ရေးနည်းလမ်းဖြင့် အဆုံးမသတ်စေနိုင်ကြောင်းနှင့် ဆွေးနွေးမှုများ လုပ်ဆောင်ရန် မဖြစ်မနေ လိုအပ်ကြောင်း တူကီယဲသမ္မတ ရီဆပ်တေယစ်အာဒိုဂန်က ပြောသည်။

“ပထမဆုံးအနေနဲ့ပြောချင်တာက စစ်ပွဲတစ်ပွဲကို အဆုံးသတ်စေချင်တယ်ဆိုရင် စစ်ဖြစ်နေတဲ့အဖွဲ့တွေအားလုံး လက်နက်ချပြီး သံတမန်ရေးနည်းအရ ဖြေရှင်းဖို့ကို ဦးတည်သွားရမှာပါ။ ငြိမ်းချမ်းရေးဆွေးနွေးပွဲတွေကို စတင်ရမှာပါ။ကျွန်တော်တို့အနေနဲ့အလိုချင်ဆုံး ရည်မှန်းချက်က ငြိမ်းချမ်းရေးဆွေးနွေးပွဲတွေကနေ နောက်ဆုံးရလဒ် ထွက်ပေါ်လာဖို့ဖြစ်ပါတယ်။ ကျွန်တော်တို့ကတော့ စစ်ပွဲကြီးအဆုံးသတ်သည်အထိ ကြားဝင်ဖျန်ဖြေပေးသွားမှာပါ” ဟု အာဒိုဂန်ကပြောကြောင်း နိုင်ငံပိုင်သတင်းဌာနက မေလ ၁၇ ရက်တွင် ဖော်ပြထားသည်။

ရုရှားနှင့်ယူကရိန်းတို့ကြား သုံးနှစ်အတွင်း ပထမဆုံးတိုက်ရိုက်ဆွေးနွေးမှုကို မေလ ၁၆ ရက်တွင် အစ္စတန်ဘူမြို့၌ လုပ်ဆောင်ရာ နှစ်ဖက်သုံ့ပန်းများ လဲလှယ်ရန်နှင့် ဆက်လက်ဆွေးနွေးရန် သဘောတူထားကြောင်းသိရသည်။

Source: https://myawady.net.mm/