တိုကျို  မတ် ၂၁

ကမ္ဘာ့ဖလားခြေစစ်ပွဲ (အာရှဇုန်) တတိယအဆင့် အုပ်စုပွဲစဉ်အဖြစ်ကစားခဲ့သည့် ဂျပန်အသင်းနှင့် ဘာရိန်းအသင်းတို့ပွဲစဉ်တွင် ဂျပန်အသင်းက နှစ်ဂိုး ဂိုးမရှိဖြင့် အနိုင်ရရှိခဲ့ပြီးနောက် အုပ်စုပွဲစဉ်များမပြီးဆုံးမီ ခြေစစ်ပွဲအောင်မြင်ခဲ့သကဲ့သို့ ၂၀၂၆ ကမ္ဘာ့ဖလားပြိုင်ပွဲတွင် ပထမဆုံးခြေစစ်ပွဲအောင်မြင်ခဲ့သည့်အသင်းအဖြစ် မှတ်တမ်းဝင်ခဲ့ကြောင်း သိရသည်။

ဂျပန်အသင်းသည် ကမ္ဘာ့ဖလားခြေစစ်ပွဲ (အာရှဇုန်) တတိယအဆင့် အုပ်စု (C) တွင် ဩစတြေးလျအသင်း၊ ဆော်ဒီအာရေဗျအသင်း၊ အင်ဒိုနီးရှားအသင်း၊ ဘာရိန်းအသင်း၊ တရုတ်အသင်းတို့နှင့် တစ်အုပ်စုတည်းကျရောက်ခဲ့ပြီး ယခုအခါ ဘာရိန်းအသင်းကို အနိုင်ရရှိခဲ့ပြီးနောက် အုပ်စုခုနစ်ပွဲကစားပြီးချိန်တွင် ခြောက်ပွဲအနိုင်ရရှိခဲ့ကာ တစ်ပွဲသရေရလဒ်ဖြင့် တစ်ပွဲမှ ရှုံးနိမ့်ခြင်းမရှိဘဲ ရမှတ် ၁၉ မှတ်ဖြင့် အုပ်စုပထမနေရာတွင် ရပ်တည်နေပြီး အုပ်စုပွဲစဉ် သုံးပွဲကစားရန် ကျန်ရှိနေသည့်အချိန်တွင် ဒုတိယနေရာမှ ဩစတြေးလျအသင်းကို ရမှတ်ကိုးမှတ်ထိ ဖြတ်တောက်နိုင်ခဲ့သည့်အတွက် ခြေစစ်ပွဲအောင်မြင်ခဲ့ခြင်းဖြစ်သည်။

ဂျပန်အသင်းသည် ကမ္ဘာ့ဖလားခြေစစ်ပွဲ (အာရှဇုန်) တတိယအဆင့် အုပ်စုလက်ကျန်ပွဲစဉ်များအဖြစ် မတ် ၂၅ ရက်တွင် ဆော်ဒီအာရေဗျအသင်း၊ ဇွန် ၅ ရက်တွင် ဩစတြေးလျအသင်းနှင့် ဇွန် ၁၀ ရက်တွင် အင်ဒိုနီးရှားအသင်းတို့နှင့် ဆက်လက်ကစားသွားရမည်ဖြစ်ကြောင်း သိရသည်။

Source: ရတနာပုံသတင်းစာ

မက်ဒရစ်  မတ် ၆

ရီးရဲလ်မက်ဒရစ် အသင်းက လက်ရှိအိမ်ကွင်းအဖြစ် အသုံးပြုနေသည့် ဘာနေဗျူးအားကစားကွင်းကို ပရိသတ်ဦးရေ ၈၅၀၀၀ ထိ ဝင်ဆံ့နိုင်သည့် အားကစားကွင်းဖြစ်အောင် ကွင်းတိုးချဲ့မှုများလုပ်ဆောင်သွားမည်ဖြစ်ကြောင်း သိရသည်။

ရီးရဲလ်မက်ဒရစ် အသင်းသည် ပြီးခဲ့သည့် ၂၀၁၉ ခုနှစ်က စတာလင်ပေါင် ၁ ဒသမ ၅ ဘီလီယံထိ အကုန်ကျခံကာ ကွင်းအဆင့်မြှင့်တင်မှုများ လုပ်ဆောင်ခဲ့ပြီးနောက် ပြီးခဲ့သည့် ၂၀၂၄ ခုနှစ်တွင် အဆင့်မြှင့်တင်မှုများ ရာနှုန်းပြည့်လုပ်ဆောင်ခဲ့ပြီး လက်ရှိအချိန်ထိ အသုံးပြုနေခြင်းဖြစ်သည်။

သို့သော် ရီးရဲလ်မက်ဒရစ်အသင်းက အိမ်ကွင်း ဘာနေဗျူးကစားကွင်းကို နောက်ထပ်တိုးချဲ့မှုများ ဆက်လက်လုပ်ဆောင်သွားမည်ဖြစ်ပြီး လက်ရှိပရိသတ်ဦးရေ ၇၉၀၀၀ ဝင်ဆံ့ရာမှ ပရိသတ်ဦးရေ ၈၅၀၀၀ ထိ ဝင်ဆံ့နိုင်ရန်အတွက် ကွင်းတိုးချဲ့မှုများ လုပ်ဆောင်သွားမည်ဖြစ်သည်။

စပိန်နိုင်ငံသည် လာမည့် ၂၀၃၀ ကမ္ဘာ့ဖလားပြိုင်ပွဲကို မော်ရိုကိုနိုင်ငံ၊ ပေါ်တူဂီနိုင်ငံတို့နှင့်အတူ ပူးတွဲကျင်းပခွင့်ရရှိထားပြီး ဗိုလ်လုပွဲစဉ်ကို လက်ခံကျင်းပခွင့်ရရှိရေး ပရိသတ်များများဝင်ဆံ့ရန် လိုအပ်သည့်အတွက် နောက်ထပ်ကွင်းတိုးချဲ့မှုများ လုပ်ဆောင်ရန် ပြင်ဆင်နေခြင်းဖြစ်ပြီး ကွင်း တိုးချဲ့မည့်စီမံကိန်းကို ၂၀၃၀ ပြည့်နှစ်မပြီးဆုံးမီ အပြီးသတ်လုပ်ဆောင်သွားမည်ဖြစ်သည်။

ကမ္ဘာ့ဘောလုံးအဖွဲ့ချုပ်၏ စည်းမျဉ်းများတွင် ကမ္ဘာ့ဖလားဗိုလ်လုပွဲစဉ်ကို လက်ခံကျင်းပမည့် အားကစားကွင်းအနေဖြင့် အနည်းဆုံး ပရိသတ်ဦးရေ ၈၀၀၀၀ ဝင်ဆံ့ရန်လိုအပ်သည့်အတွက် ရီးရဲလ်မက်ဒရစ်အသင်းက ပရိသတ်ဦးရေ ၈၅၀၀၀ ဝင်ဆံ့နိုင်သည့် အားကစားကွင်းအဖြစ် တိုးချဲ့ရန် ဆုံးဖြတ်ခဲ့ခြင်းဖြစ်ကြောင်း သိရသည်။ 

Source: ရတနာပုံသတင်းစာ

၂၀၂၅ ခုနှစ်၊ ဂျပန်နိုင်ငံ၏ အကြီးဆုံးသော တိုကျိုမာရသွန်အပြေးပြိုင်ပွဲတွင် အားကစား သမားပေါင်း ၃၈,၀၀၀ ခန့် ပါဝင်ယှဉ်ပြိုင်ခဲ့သည်။

၎င်းအပြေးပြိုင်ပွဲကို ကံစမ်းမဲပေါက်သည့်သူများသာ မတ်လ ၂ ရက်နေ့တွင်ကျင်းပခဲ့သည့် ပြိုင်ပွဲတွင် ပါဝင် ယှဉ်ပြိုင်ခွင့်ရခြင်းဖြစ်သည်။ ဒေသတွင်းနှင့် နိုင်ငံတကာမှ လက်ရွေးစင်အပြေးသမားများကိုလည်း ဖိတ်ကြားခဲ့ပြီး အဆိုပါပြိုင်ပွဲကို တိုကျိုမြို့တော်၊ Shinjuku အဆောက်အအုံ၌ နံနက် ၉ နာရီခန့်တွင် စတင်ခဲ့သည်။

Saitama ခရိုင်မှ အသက် (၅၀) အရွယ် အမျိုးသားတစ်ဦးက “၎င်းအနေဖြင့် နိုင်ငံအတွင်းရှိ ပြေးပွဲများတွင် ပါဝင်ယှဉ်ပြိုင်ခဲ့ဖူးသော်လည်း တိုကျိုမာရသွန်အပြေးပြိုင်ပွဲကို ကံစမ်းမဲပေါက်၍ ပထမဆုံးပါဝင်ခွင့်ရခြင်း ဖြစ်ကြောင်း နှင့် ၎င်း၏ ရည်မှန်းချက်မှာ လမ်းတစ်လျှောက်ရှိ ပရိတ်သတ် များ၏ အားပေးမှုကိုခံယူ၍ ထိခိုက်မှု တစ်စုံတစ်ရာ မရှိဘဲ ပြိုင်ပွဲကို ပြီးဆုံးအောင်မြင်ရန်ဖြစ်ကြောင်း” ပြောကြားခဲ့သည်။

Osaka မှ အသက် (၄၀) အရွယ် အမျိုးသမီးတစ်ဦးက အဆိုပါပြိုင်ပွဲ၏ ဆွဲဆောင်မှုမှာ တိုကျိုမြို့လယ်ရှိ လူသိ ထင်ရှားသော နေရာများကို ဖြတ်သန်းယှဉ်ပြိုင်ခြင်းဖြစ်ကြောင်းနှင့် ၎င်းသည် Seneo-Ji ဘုရားကျောင်းနှင့် ToKyo Skytree တို့ကို တွေ့မြင်နိုင်ရန် မျှော်လင့်နေကြောင်း ပြောကြားခဲ့သည်။

မာရသွန်ပြေးပွဲလမ်းကြောင်းသည် Asakusa၊ Ginza နှင့် တိုကျိုမြို့ရှိ အခြားထင်ရှားသောနေရာများသို့ ဖြတ်သန်းသွားပြီး တိုကျိုဘူတာရုံတွင် ပန်းဝင်မည်ဖြစ်ပါသည်။ လမ်းကြောင်းတစ်လျှောက်တွင် ပရိတ်သတ်များက ပြိုင်ပွဲဝင် အားကစားသမားများကို အားပေးခဲ့ကြပြီး ပြိုင်ပွဲဝင် အားကစားသမားများကလည်း လက်များဝှေ့ယမ်းကာ အပြန် အလှန် အားပေးခဲ့ကြသည်။

ပြိုင်ပွဲဝင်အားကစားသမားများသည် ပန်းဝင်ချိန်တွင် ပြုံးပျော်နေကြသည်။ Kanagawa ခရိုင်မှ အသက် (၅၀) အရွယ် အမျိုးသမီးတစ်ဦးက “နေပူသည်ဟုအနည်းငယ်ခံစားရသော်လည်း ပရိတ်သတ်များက သူမကို အားပေးခဲ့ကြ သဖြင့် ပြိုင်ပွဲကိုပျော်ရွှင်စွာပါဝင်ခဲ့ကြောင်း” ပြောကြားခဲ့သည်။

တိုကျိုမြို့မှ အသက်(၆၀)အရွယ်အမျိုးသားတစ်ဦးက “၎င်းသည် အသက် (၇၀)၊ (၈၀)အရွယ်ထိပြေးနိုင်ရန် စိတ်ပိုင်း ဖြတ်ထားကြောင်း” ပြောကြားခဲ့သည်။ မာရသွန်ပြေးပွဲလမ်းကြောင်းတစ်လျှောက် အချို့နေရာများတွင် ယာဉ်ကြော ပိတ်ဆို့မှု များရှိခဲ့သည်။ အချို့သောလမ်းများကို ည ၉ နာရီအချိန်ထိ ယာဉ်ကြောပိတ်ထားခဲ့ရသည်။

ကိုးကား- NHK

ယူကရိန်း-ရုရှားပဋိပက္ခ ပြန်လည်ပြေလည်သွားပါက ရုရှားကစားသမားများကို အိုလံပစ်ပြိုင်ပွဲများတွင် ပြန်လည်ယှဉ်ပြိုင်ခွင့် ပေးသွားမည်ဟု အိုလံပစ်ပြိုင်ပွဲ ကြီးကြပ်ရေးကော်မတီအဖွဲ့ဝင် ဆီဘတ်ရှန်ကိုး က လွန်ခဲ့သည့်သီတင်းပတ်က ထုတ်လွှင့်ခဲ့သည့် သတင်းထောက် ပီးယာ မော်ဂန်နှင့် အင်တာဗျူးတွင် ပြောကြားခဲ့သည်။ 

အပြည်ပြည်ဆိုင်ရာ အိုလံပစ်ကော်မတီ (IOC) ဥက္ကဋ္ဌအသစ် နေရာအတွက် လက်ရှိဥက္ကဋ္ဌ သောမတ်ဘတ်ချ်၏နေရာတွင် အစားထိုးရန် ယှဉ်ပြိုင်မည့် ကိုယ်စားလှယ် ၇ ဦးအနက်မှ တစ်ဦးဖြစ်သည့် ကိုး က အိုလံပစ်ပြိုင်ပွဲများတွင် ရုရှားကစားသမားများကို တားမြစ်ခြင်းထက် ဝင်ရောက်ယှဉ်ပြိုင်စေခြင်းက ပိုကောင်းသည်ဟု ဆိုသွားပါသည်။ ၂၀၂၂ ခုနှစ်၊ ဖေဖော်ဝါရီလတွင် ယူကရိန်းပဋိပက္ခ အရှိန်မြင့်လာပြီးနောက် ရုရှားနှင့် ဘယ်လာရုစ် အားကစားသမားများအား ယှဉ်ပြိုင်ခြင်းမပြုရန် IOC မှ တားမြစ်ခဲ့ပြီး နိုင်ငံနှစ်ခုလုံးအား ကမ္ဘာလုံးဆိုင်ရာ အားကစားပွဲအများစုတွင် ချန်လှပ်ထားခဲ့သည်။ နောက်ပိုင်းတွင် IOC သည် ရုရှားနှင့် ဘယ်လာရုစ် အားကစားသမားအချို့ကို ပါဝင်ယှဉ်ပြိုင်ခွင့်ပြုခဲ့သော်လည်း ယမန်နှစ် ပါရီအိုလံပစ်ပွဲတွင် ၎င်းတို့ကို တားမြစ်ထားခဲ့ပါသည်။ 

“ငြိမ်းချမ်းရေးစာချုပ်များကို ရေးဆွဲနိုင်ရေးသည် ၎င်းတို့နှင့် မသက်ဆိုင် သော်လည်း သဘောတူညီချက်တစ်ခုရပြီး နှစ်ဖက်စလုံး ကျေနပ်မှုနှင့် ကိုက်ညီသည့် အခြေအနေမျိုးရောက်ရှိပါက ရုရှားကစားသမားများကို ပိတ်ပင်ထားမည့်အစား ပြိုင်ပွဲများတွင် ပါဝင်ခိုင်းခြင်းက ပိုကောင်းစေမည်” ဟု  IOC ဥက္ကဋ္ဌ ဖြစ်လာပါက ရုရှားနိုင်ငံအား အိုလံပစ် ပြိုင်ပွဲများသို့ ပြန်လည်ဝင်ရောက်ခွင့်ရှိ၊မရှိ မေးမြန်းရာ၌ ကိုး က ပြောဆိုခဲ့ပါသည်။  IOC သည် အခြေအနေကို စောင့်ကြည့်ရမည်ဖြစ်သော်လည်း ရုရှားကို ပြန်လည်လက်ခံရေးနှင့်ပတ်သက်၍ ပြဿနာမရှိကြောင်း ၎င်းက ပြောပါသည်။

ကိုးကား-Myanmar National Post

နေပြည်တော် ဖေဖော်ဝါရီ ၂၅

ပညာရေးဝန်ကြီးဌာန ဆရာအတတ်ပညာဦးစီးဌာန ကာယပညာနှင့် အားကစားနည်းပြ မွမ်းမံ သင်တန်း (၁/၂၀၂၅) ဖွင့်ပွဲအခမ်းအနားကို ယနေ့နံနက်ပိုင်းတွင် လယ်ဝေးအားကစား လေ့ကျင့်ရေး စခန်း၌ ကျင်းပသည်။

ဖွင့်ပွဲသို့ ပညာရေးဝန်ကြီးဌာန ဒုတိယဝန်ကြီး ဒေါက်တာဇော်မြင့်၊ ဆရာအတတ်ပညာဦးစီးဌာန ညွှန်ကြားရေးမှူးချုပ် ဒေါ်နှင်းကြည်၊ ဒုတိယညွှန်ကြားရေးမှူးချုပ်များနှင့် တာဝန်ရှိသူများ၊ အားကစားနှင့် ကာယပညာဦးစီးဌာနနှင့် အားကစားအဖွဲ့ချုပ်များမှ တာဝန်ရှိသူများ၊ သင်တန်း နည်းပြများ၊ ဒိုင်လူကြီးများ၊ ပညာရေးဒီဂရီ ကောလိပ် များမှ အားကစားနည်းပြဆရာ သင်တန်းသား သင်တန်းသူများနှင့် ဖိတ်ကြားထားသူများ တက်ရောက်ကြသည်။

ဦးစွာ ဒုတိယဝန်ကြီးက ပညာရေးဒီဂရီကောလိပ်ပေါင်းစုံ အားကစားပြိုင်ပွဲများကို နှစ်စဉ် အောင်မြင်စွာ ကျင်းပနိုင်ခဲ့ပြီး ၂၀၂၄ ခုနှစ်၊ ပဉ္စမအကြိမ် အမျိုးသားအားကစားပွဲတော်တွင် အားကစားနည်း ခြောက်မျိုးမှာ ပါဝင် ယှဉ်ပြိုင်ခဲ့ခြင်းအတွက် မှတ်တမ်းတင်ဂုဏ်ပြုကြောင်း၊ ပါဝင်ယှဉ်ပြိုင်ခြင်းမှသည် အနိုင်ရဗိုလ်စွဲရန် လေ့ကျင့် ပေးရမည်ဖြစ်ကြောင်း၊ ထိုမှတစ်ဆင့် စံချိန်သစ်များ တင်နိုင်သည်အထိ ကြိုးစားလေ့ကျင့်ပေးရမည် ဖြစ်ကြောင်း၊ ပညာရေးဒီဂရီကောလိပ် ဆရာ ဆရာမများက အားကစား နည်းစနစ် မှန်ကန်စွာဖြင့် လေ့ကျင့်သင်ကြားပေးနိုင်မှသာ အခြေခံပညာတွင် အားကစားထူးချွန်သည့် ဆရာ၊ ဆရာမများ ပေါ်ထွန်းလာနိုင်မည်ဖြစ်ကြောင်း၊ ထိုမှတစ်ဆင့် ကိုယ်ကာယကြံ့ခိုင်ပြီး အားကစား ထူးချွန်သည့် နိုင်ငံ့သားကောင်းမျိုးဆက်သစ်များကို ပြုစုပျိုးထောင်နိုင်မည်ဖြစ်ကြောင်း ပြောကြားပြီး သင်တန်းသား၊ သင်တန်းသူများကို ရင်းရင်းနှီးနှီး လိုက်လံနှုတ်ဆက်၍ အားပေးစကားပြောကြားသည်။

ယနေ့ဖွင့်လှစ်သည့် ကာယပညာနှင့် အားကစားနည်းပြမွမ်းမံသင်တန်း (၁/၂၀၂၅) ကို ဖေဖော်ဝါရီ ၂၀ ရက်မှ မတ် ၉ ရက်အထိ လယ်ဝေးအားကစားလေ့ကျင့်ရေးစခန်းတွင် ဒုတိယအကြိမ် မွမ်းမံသင်တန်း ဖွင့်လှစ် လေ့ကျင့် ပေးလျက်ရှိပြီး ပညာရေးဒီဂရီကောလိပ်များမှ အားကစားနည်းပြဆရာ သင်တန်းသား သင်တန်းသူ ၇၅ ဦး တက်ရောက်လျက်ရှိပြီး မြန်မာနိုင်ငံ အားကစားအဖွဲ့ချုပ်များမှ တာဝန်ရှိသူများက အားကစားအခြေခံနည်းစနစ်များ၊ စည်းမျဉ်း၊ စည်းကမ်း၊ ဥပဒေများကို သင်ကြားပို့ချသွားမည် ဖြစ်ကြောင်းသိရသည်။

ကိုးကား- MOI

ရန်ကုန်   ဖေဖော်ဝါရီ ၂၆

နီပေါနိုင်ငံက အိမ်ရှင်အဖြစ်လက်ခံကျင်းပလျက်ရှိသည့် နီပေါဖိတ်ခေါ်ဖလားပြိုင်ပွဲ ဗိုလ်လုပွဲစဉ်အဖြစ် ယနေ့မြန်မာစံတော်ချိန် ည ၆ နာရီ ၄၅ မိနစ်တွင် မြန်မာအမျိုးသမီးအသင်းနှင့် နီပေါအမျိုးသမီးအသင်းတို့ကစားခဲ့ရာ မြန်မာအမျိုးသမီးအသင်းက နှစ်ဂိုး ဂိုးမရှိဖြင့် အနိုင်ရရှိခဲ့ပြီး ချန်ပီယံဆုဆွတ်ခူးနိုင်ခဲ့ကြောင်း သိရသည်။

အဆိုပါပြိုင်ပွဲတွင် အိမ်ရှင် နီပေါအမျိုးသမီးအသင်းနှင့်အတူ မြန်မာအမျိုးသမီးအသင်း၊ လက်ဘနွန်အမျိုးသမီးအသင်းနှင့် ကာဂျစ်စတန်အမျိုးသမီးအသင်း စသည့် အသင်းလေးသင်းဖြင့် ကျင်းပခဲ့ခြင်းဖြစ်သည်။

အဆိုပါပွဲစဉ်တွင် ပွဲစကတည်းက နှစ်သင်းစလုံးအပြန်အလှန် ဖိအားပေးမှုများဖြင့် အကြိတ်အနယ်ရှိခဲ့သော်လည်း ဂိုးသွင်းယူနိုင်ခြင်းမရှိခဲ့သည့်အတွက် ပထမပိုင်းတွင် ဂိုးမရှိသရေရလဒ်ထွက်ပေါ်ခဲ့သော်လည်း ဒုတိယပိုင်းပြန်လည်စတင်ချိန်တွင် မြန်မာအမျိုးသမီးအသင်းက ပိုမိုတိုက်စစ်ဆင် ဖိအားပေးကစားခဲ့ရာမှ ပွဲချိန် ၆၁ မိနစ်တွင် ရူပါခိုင်ကလည်းကောင်း၊ ပွဲချိန် ၆၃ မိနစ်တွင် ဝင်းသိင်္ဂီထွန်းကလည်းကောင်း မြန်မာအမျိုးသမီးအသင်းအတွက် ဦးဆောင်ဂိုးများသွင်းယူပေးနိုင်ခဲ့သောကြောင့် ပွဲပြီးဆုံးချိန်တွင် မြန်မာအမျိုးသမီးအသင်းက နှစ်ဂိုး ဂိုးမရှိဖြင့် အနိုင်ရရှိခဲ့ပြီး ချန်ပီယံဆု ဆွတ်ခူးနိုင်ခဲ့သည်။

မြန်မာအမျိုးသမီအသင်းသည် အုပ်စုပွဲစဉ်များကစားခဲ့ရာ လက်ဘနွန်အမျိုးသမီးအသင်းကို သုံးဂိုးတစ်ဂိုး၊ ကာဂျစ်စတန် အမျိုးသမီးအသင်းကို ငါးဂိုး ဂိုးမရှိဖြင့် အနိုင်ရရှိခဲ့ပြီး နီပေါအသင်းနှင့်ပွဲစဉ်တွင် နှစ်ဂိုးစီသရေရလဒ် ထွက်ပေါ်ခဲ့သော်လည်း ဗိုလ်လုပွဲစဉ်တွင် နီပေါအမျိုးသမီးအသင်းကို နှစ်ဂိုး ဂိုးမရှိဖြင့် အနိုင်ရရှိခဲ့ပြီး ချန်ပီယံဆု ဆွတ်ခူးနိုင်ခဲ့ခြင်း ဖြစ်ကြောင်း သိရသည်။ 

STA

Source: ရတနာပုံသတင်းစာ

နေပြည်တော် ဖေဖော်ဝါရီ ၂၄

မြန်မာနိုင်ငံ ဂေါက်သီးအားကစားအဖွဲ့ချုပ်မှကြီးမှူး၍ Burmese Golf (BG) မှ အဓိကကူညီပံ့ပိုးသော (President Cup) ဥက္ကဋ္ဌဖလား ဂေါက်သီးရိုက်ပြိုင်ပွဲ၏ ဝါသနာရှင်အဆင့်နှင့် သက်ကြီးတန်းဝါသနာရှင်အဆင့် ပြိုင်ပွဲများ၏ဖွင့်ပွဲကို ယနေ့နံနက်ပိုင်းက ရန်ကုန်မြို့ ရန်ကုန်ဂေါက်ကွင်း (တညင်းကုန်း) ၌ပြုလုပ်ရာ မြန်မာနိုင်ငံ ဂေါက်သီးအားကစားအဖွဲ့ချုပ် ရန်ကုန်ဂေါက်ကွင်းတို့မှ တာဝန်ရှိသူများ၊ ပြိုင်ပွဲဝင်အားကစားသမားများနှင့် ဖိတ်ကြားထားသူများ တက်ရောက်ကြသည်။

ဦးစွာ မြန်မာနိုင်ငံဂေါက်သီးအားကစားအဖွဲ့ချုပ် နာယက ဦးဝင်းလှိုင်၊ ဥက္ကဋ္ဌ ဦးကိုကိုအေး၊ ဗဟိုအလုပ်အမှုဆောင်နှင့် အထက်မြန်မာပြည် ဂေါက်သီးအားကစားဆပ်ကော်မတီ ဒုတိယဥက္ကဋ္ဌ ဦးစိုး၊ ဗဟိုအလုပ်အမှုဆောင် ဦးအောင်ကိုဇော်၊ ရန်ကုန်ဂေါက်ကွင်းအတွင်းရေးမှူး ဦးခင်မောင်တင့်နှင့် အလုပ်အမှုဆောင် ဦးအောင်ဌေးလှိုင်တို့က အလှည့်ကျ ဂေါက်သီးရိုက်၍ ဖွင့်လှစ်ပေးပြီး ပထမနေ့ ၁၈ ကျင်းပြိုင်ပွဲကို စတင်ယှဉ်ပြိုင်ကြသည်။

ယနေ့ပြိုင်ပွဲတွင် ဝါသနာရှင်အဆင့် (အမျိုးသား) ၁၄၇ ဦး၊ ဝါသနာရှင်အဆင့် သက်ကြီးတန်း (အသက်၅၅) နှစ်နှင့်အထက် ၂၇ ဦး စုစုပေါင်းအားကစားသမား ၁၇၄ ဦး ဝင်ရောက်ယှဉ်ပြိုင်မည်ဖြစ်ပြီး ပြိုင်ပွဲကို မျိုးဆက်သစ်ဂေါက်သီးအားကစားသမားများ၏ လက်ရည်အဆင့်အတန်း တိုးတက်လာစေရန်နှင့် နိုင်ငံတကာအဆင့်မီယှဉ်ပြိုင်နိုင်စေရန် ရည်ရွယ်ကျင်းပခြင်းဖြစ်သည်။

ပြိုင်ပွဲကို ရန်ကုန်မြို့ရှိ ရန်ကုန်ဂေါက်ကွင်း (တညင်းကုန်း) ၌ ဖေဖော်ဝါရီ ၂၄ ရက်မှ ၂၇ ရက်အထိ လေးရက်ကြာ ပြုလုပ်သွားမည်ဖြစ်ကြောင်း သတင်းရရှိသည်။

Source: Myanmar.gov.mm
 

လန်ဒန်   ဖေဖော်ဝါရီ ၁၉ 

မန်စီးတီးအသင်းနှင့် လီဗာပူးအသင်းတို့ကစားမည့် အရေးကြီးပွဲစဉ်ဖြစ်သည့် ပရီးမီးယားလိဂ်ပြိုင်ပွဲ ပွဲစဉ်(၂၆)ပွဲစဉ်ကို ကွင်းလယ်ဒိုင်လူကြီးအဖြစ် ထိပ်တန်းဒိုင်လူကြီးတစ်ဦးဖြစ်သည့် အန်တိုနီတေလာက တာဝန်ယူကိုင်တွယ်သွားမည်ဖြစ်ကြောင်း သိရသည်။

မန်စီးတီးအသင်းနှင့် လီဗာပူးအသင်းတို့သည် ပရီးမီးယားလိဂ်ပြိုင်ပွဲ ပွဲစဉ်(၂၆)အဖြစ် လာမည့် ဖေဖော်ဝါရီ ၂၃ ရက်တွင် မန်စီးတီးအသင်း အိမ်ကွင်းတွင် ကစားသွားရမည်ဖြစ်သည်။

မန်စီးတီးအသင်းသည် ယခုနှစ်ဘောလုံးရာသီတွင် အသင်းရလဒ်ပိုင်းမတည်ငြိမ်မှုများကြောင့် ရလဒ်ပိုင်းများ မတည်မငြိမ်ဖြစ်ခဲ့သည့်အတွက် ချန်ပီယံဆုလက်လွှတ်ရရန် ရာခိုင်နှုန်းများနေသော်လည်း ချန်ပီယံလိဂ် ပြိုင်ပွဲဝင်ခွင့်အတွက်လည်း အဆင့်(၅)နေရာမှ ဘုန်းမောက်အသင်းနှင့် တစ်မှတ်၊ အဆင့်(၆)နေရာမှ ချဲလ်ဆီးအသင်းနှင့် ရမှတ်တစ်မှတ်၊ အဆင့်(၇)နေရာမှ နယူးကာဆယ်အသင်းနှင့် ရမှတ်သုံးမှတ်သာ ကွာဟနေသည့်အတွက် လက်ကျန်ပွဲစဉ်များတွင် ရုန်းကန်ရဖွယ်ရှိနေသည်။

အလားတူ လီဗာပူးအသင်းသည်လည်း အမှတ်ပေးဇယားထိပ်ဆုံးမှ ဦးဆောင်လျက် ရှိနေသော်လည်း အဆင့်(၂)နေရာမှ အာဆင်နယ်အသင်းနှင့် ရမှတ်ကွာဟမှု ကျဉ်းမြောင်းနေသည့်အတွက် လက်ကျန်ပွဲစဉ်များတွင် ချန်ပီယံဆုအတွက် ရမှတ်လိုအပ်ချက်များရှိနေဆဲဖြစ်သောကြောင့် မန်စီးတီးအသင်းနှင့် လီဗာပူးအသင်းတို့ကြား ထိပ်တိုက်တွေ့ဆုံသည့်ပွဲစဉ်မှာ နှစ်သင်းစလုံးအတွက် အရေးပါသည့်ပွဲစဉ် ဖြစ်လာမည်ဖြစ်သည်။ 

ကွင်းလယ်ဒိုင်လူကြီး အန်တိုနီတေလာသည် ပရီးမီးယားလိဂ်ပြိုင်ပွဲတွင် ကာလရှည်တာဝန်ထမ်းဆောင်လျက်ရှိနေသည့် ကွင်းလယ်ဒိုင်တစ်ဦးဖြစ်သည့် ယခုနှစ်ဘောလုံးရာသီတွင်လည်း မန်စီးတီးအသင်းနှင့် လီဗာပူးအသင်းတို့ ပွဲစဉ်မတိုင်မီကလည်း အသင်းကြီးများ ထိပ်တိုက်တွေ့ဆုံသည့်ပွဲစဉ်အများစုကိုလည်း တာဝန်ယူကြီးကြပ်ခဲ့သူတစ်ဦးဖြစ်ကြောင်း သိရသည်။

Source: ရတနာပုံသတင်းစာ

နေပြည်တော် ဖေဖော်ဝါရီ ၁၇

အားကစားနှင့်လူငယ်ရေးရာဝန်ကြီးဌာန ပြည်ထောင်စုဝန်ကြီး Jeng Phang နော်တောင်သည် မြန်မာနိုင်ငံမြင်းစီးအားကစားအဖွဲ့ချုပ်ဥက္ကဋ္ဌ ဦးပြုံးမောင်မောင်နှင့် အဖွဲ့အား ယနေ့မွန်းလွဲပိုင်းတွင် နေပြည်တော်ရုံးအမှတ်(၃၁)ရှိ ဧည့်ခန်းမ၌ လက်ခံတွေ့ဆုံသည်။

တွေ့ဆုံပွဲသို့ ဒုတိယဝန်ကြီး ဦးထိန်လင်းနှင့် ဌာနဆိုင်ရာတာဝန်ရှိသူများ၊ မြန်မာနိုင်ငံ မြင်းစီးအားကစားအဖွဲ့ချုပ်မှ အဖွဲ့ဝင်များနှင့် တာဝန်ရှိသူများ တက်ရောက်ကြသည်။

တွေ့ဆုံစဉ် အဖွဲ့ချုပ်ဥက္ကဋ္ဌက အဖွဲ့ချုပ်အနေဖြင့် ဝန်ကြီးဌာနနှင့် ပေါင်းစပ်ညှိနှိုင်းပြီ အလားအလာရှိသည့် အားကစားသမားများကို စနစ်တကျ ရွေးချယ်၍ နိုင်ငံတကာ မြင်းစီးအားကစားပြိုင်ပွဲများကို စေလွှတ်ပေးနိုင်ရန် စီစဉ်ဆောင်ရွက်ပေးသွားမည့် အခြေအနေ၊ (၃၃) ကြိမ်မြောက် အရှေ့တောင်အာရှအားကစားပြိုင်ပွဲတွင် မြင်းစီးအားကစားနည်း ပါဝင်ယှဉ်ပြိုင်နိုင်ရန်အတွက် လက်ရှိပြင်ဆင်ဆောင်ရွက်နေမှုနှင့် ဆက်လက်ဆောင်ရွက်မည့် အစီအစဉ်များကို ရှင်းလင်းတင်ပြသည်။

ထို့နောက် ပြည်ထောင်စုဝန်ကြီးက မြင်းစီးအားကစားလောက တိုးတက်မြင့်မားစေရေးအတွက် ဝန်ကြီးဌာနအနေဖြင့် လိုအပ်သည်များကို ပေါင်းစပ်ဖြည့်ဆည်းဆောင်ရွက်ပေးသွားမည့် အခြေအနေများကို ဆွေးနွေးပြောကြားခဲ့ကြောင်း သိရသည်။

Source: Myanmar National Portal

မက်ဒရစ်   ဖေဖော်ဝါရီ   ၁၂

စပိန်လာလီဂါအဖွဲ့ချုပ်က ဒိုင်လူကြီးများကို ပြင်းထန်စွာ ဝေဖန်မှုများအတွက် ရီးယဲလ်မက်ဒရစ် အသင်းကို  ဥပဒေအရ  အရေးယူပေးရန်   တော်ဝင် စပိန်ဘောလုံး အဖွဲ့ချုပ်ထံ တောင်းဆိုမှုများ ပြုလုပ်ခဲ့ ကြောင်း သိရသည်။

စပိန်လာလီဂါပွဲစဉ်  (၂၃)  ဖြစ်ပြီး  မက်ဒရစ်ဒါဘီ ပွဲစဉ်အဖြစ်ကစားသည့် ရီးယဲလ်မက်ဒရစ် အသင်းနှင့် အက်သလက်တီကို အသင်းတို့ တစ်ဂိုးစီသရေရလဒ် ထွက်ပေါ်သည့်ပွဲစဉ်တွင်   ရီးယဲလ်မက်ဒရစ်အသင်းက   ကွင်းလယ်ဒိုင်လူကြီး   ဆီဆာဆိုတိုနှင့်   VAR ဒိုင်များ၏  ဆုံးဖြတ်ချက်နှင့် ပတ်သက်ပြီး  ပြင်းပြင်းထန်ထန် ဝေဖန်မှုများ ပြုလုပ်ခဲ့ခြင်းဖြစ်သည်။

အဆိုပါ  မက်ဒရစ်ဒါဘီပွဲစဉ်၌  အက်သလက်တီကို အသင်းက ပွဲချိန် ၃၅ မိနစ်တွင် သွင်းယူသည့် အယ်လ် ဗာရက်၏သွင်းဂိုးဖြင့်  ဦးဆောင်နိုင်ခဲ့သော်လည်းပွဲချိန် မိနစ် ၅၀ တွင် အမ်ဘတ်ပီက ရီးယဲလ်မက်ဒရစ် အသင်းအတွက်  ချေပဂိုးပြန်လည် သွင်းယူပေးနိုင်သဖြင့်  တစ်ဂိုးစီသရေရလဒ် ထွက်ပေါ်ပြီး  ရီးယဲလ် မက်ဒရစ်အသင်းသည်   ပွဲချိန်အတွင်း   ပယ်နယ်တီပြစ်ဒဏ်ရရှိနိုင်သည့်   အခွင့်အရေး ရှိခဲ့သော်လည်း ကွင်းလယ်ဒိုင်လူကြီး  ဆီဆာဆိုတိုက  ပယ်နယ်တီ သတ်မှတ်ပေးခြင်းမရှိဘဲ VAR   ဒိုင်များကလည်း သတ်မှတ်ပေးခြင်း မရှိသည့်အတွက် ရီးယဲလ်မက်ဒရစ် အသင်းက အသင်းတရားဝင် လူမှုကွန်ရက်စာမျက်နှာတွင်  ဒိုင်လူကြီးအဖွဲ့ကို    ပြင်းပြင်းထန်ထန် ဝေဖန်မှုများ ပြုလုပ်သည့်အတွက်   စပိန်လာလီဂါ အဖွဲ့ချုပ်က  ရီးယဲလ်မက်ဒရစ် အသင်းကို   အ‌ရေးယူပေးရန်  တော်ဝင်စပိန်ဘောလုံး အဖွဲ့ချုပ်ထံ တောင်းဆိုခဲ့ခြင်းဖြစ်ကြောင်း သိရသည်။    

Source:Myawady Web Portal