အီလက်ထရွန်နစ်စစ်ဆင်ရေးဆိုတာ အနာဂတ်စစ်ပွဲတွေမှာမရှိ မဖြစ်ပါဝင်လာမယ့် စစ်ဆင်ရေးတစ်မျိုး ဖြစ်ပါတယ်။ အဲဒီစစ်ဆင်ရေးက အင်မတန်မှလည်း အဆင့်မြင့်မားပြီး ထိရောက်မှုပမာဏကလည်း ပြင်းထန်လွန်းပါတယ်။

အခုတရုတ်နိုင်ငံမှသိပ္ပံပညာရှင်များက 6G ဆက်သွယ်ရေးနည်းပညာကိုအသုံးပြုထားတဲ့ အီလက်ထရွန်နစ်စစ်ဆင်ရေး လက်နက်စနစ်တစ်မျိုးကို ဖန်တီးတီထွင်လိုက်ပါတယ်။ ဒီလက်နက်စနစ်က လက်ရှိအသုံးပြုနေတဲ့ ခေတ်မီစစ်သုံးရေဒါများထက် ပိုမိုစွမ်းအားပြင်းတယ်လို့ တီထွင်သူများက ပြောပါတယ်။

တရုတ်နိုင်ငံဆိုတာ 6G နည်းပညာမှာ ကမ္ဘာ့ထိပ်တန်းသို့ရောက်ရှိနေတဲ့နိုင်ငံကြီးတစ်ခုဖြစ်ပါတယ်။ South China Morning Post သတင်းဌာနရဲ့ထုတ်ပြန်ချက်အရဆိုရင် တရုတ်နိုင်ငံက 6G နည်းပညာနဲ့ပတ်သက်လို့ မူပိုင်ခွင့်အများဆုံးတင်ထားတဲ့နိုင်ငံတစ်ခုဖြစ်တယ်လို့သိရပါတယ်။

အခု 6G နည်းပညာသုံး လက်နက်စီမံကိန်းကို တရုတ်နိုင်ငံရှိ ဟွကျောင်းသိပ္ပံ နှင့်နည်းပညာတက္ကသိုလ်မှ ပါမောက္ခတိန့်လိုင်ဦးဆောင်တဲ့ ပညာရှင်များက ဖန်တီးထားတာဖြစ်ပြီး မထင်ရလောက်အောင် များပြားတဲ့ ဆက်သွယ်ရေးစွမ်းဆောင်ရည်များနဲ့လှိုင်းနှုန်းဖျက်နိုင်စွမ်း၊ လှိုင်းနှုန်းဖျက်မှုမှ ရှောင်ကွင်းနိုင်စွမ်းတို့ရှိတယ်လို့ ကုမ္ပဏီကထုတ်ပြန်ထားပါတယ်။

ဒါ့အပြင် ဒီစနစ်က Northrop Gru-mman ရဲ့ AN/APG-85 အဆင့်မြင့်ရေဒါ စနစ်ကို အဓိကပစ်မှတ် ထားတယ်လို့ဆို ပါတယ်။ အဲဒီရေဒါစနစ်ကို F-35 ကိုယ်ပျောက်တိုက်လေယာဉ်မှာ အသုံးပြုထားတာပါ။ ဒီစနစ်က ၁၂ ဂစ်ဂါဟတ်အထိရှိတဲ့ လှိုင်းနှုန်းများနဲ့ X-band မှာ အသုံးပြုထားတာဖြစ်ပါတယ်။

ရေဒါရှောင်ကွင်းနိုင်တဲ့စွမ်းဆောင်ရည်ပိုင်းမှာဆိုရင်လည်း ဒီစနစ်က ရန်သူ့လေယာဉ်မှူးများကို စိတ်ရှုပ်ထွေးစေမယ့် ပစ်မှတ်အတုပေါင်း ၃၆၀၀ ကျော်ကိုဖန်တီးပေးနိုင်စေပါတယ်။ သူ့မှာရှိတဲ့ တခြားစွမ်းဆောင်ရည်တွေထဲမှာ မြေပြင်အခြေ ပြုလှိုင်းနှုန်းဖျက်စနစ်၊ မြန်နှုန်းမြင့်ဆက်သွယ်ရေး ဗဟိုချက်၊ ဖန်ကြိုးမျှင်လေးတွေကနေတစ်ဆင့် သက်ဆိုင်ရာဆက်စပ်ကိရိယာပေါင်း ၃၀၀ ကျော်ဆီကို အလွန်များပြားလှတဲ့ တိုက်ပွဲသတင်းအချက်အလက်တွေပေးပို့သူအဖြစ် တာဝန်ထမ်းဆောင်နိုင်ခြင်း ပါဝင်ပါတယ်။

တရုတ်သိပ္ပံပညာရှင်များက သူတို့ရဲ့ နည်းပညာအဆင့်မြှင့်တင်နိုင်ဖို့အတွက် ဖိုတွန်နဲ့အီလက်ထရွန်တို့ကို ပေါင်းစပ်ပြီး မိုက်ခရိုဝေ့ဖိုတွန်နစ်စနစ်ကိုဖန်တီးကာအီလက်ထရွန်နစ်ရဲ့ကန့်သတ်ချက်တွေကို ကျော်လွှားသွားတာဖြစ်ပါတယ်။

သမားရိုးကျစနစ်တွေက လုပ်ငန်းတစ်ခုတည်းကိုသာ အာရုံစိုက်လုပ်ဆောင်နိုင်ပေမယ့် အခုစနစ်ကတော့ အာရုံခံခြင်း၊ ခွဲခြမ်းစိတ်ဖြာခြင်းနဲ့ ထုတ်လွှင့်ခြင်းဆိုတဲ့လုပ်ငန်းတွေကို စွမ်းအင်ပမာဏအနည်းဆုံး အသုံးပြုပြီး ပေါင်းစပ်လုပ်ဆောင်နိုင်စွမ်းရှိတာဖြစ်ပါတယ်။

သုတေသနပညာရှင်များရဲ့လေ့လာတွေ့ရှိချက်အရဆိုရင် အလွန်မြင့်မားလှတဲ့ဆက်သွယ်ရေး အမြန်နှုန်းနဲ့ လှိုင်းနှုန်း ဖိဖျက်မှုစွမ်းရည်တွေကို တစ်ချိန်တည်း တစ်ပြိုင်တည်းရရှိစေနိုင်မယ့် ကမ္ဘာ့ပထမဆုံးသော   အတည်ပြုနိုင်တဲ့စနစ်တစ်ခု ဖြစ်တယ်လို့ဆိုနိုင်ပါတယ်။

နောက်တစ်ခုက 6G နည်းပညာကိုတိုးတက်ထွန်းကားအောင် ဖန်တီးနိုင်ခြင်းက ဆက်သွယ်ရေးစနစ်၊ ရေဒါစနစ်နဲ့ အီလက်ထရွန်နစ်စစ်ဆင်ရေးစနစ်တို့ရဲ့လုပ်ဆောင်ချက်တွေကို တစ်နေရာတည်းမှာ ပေါင်းဆုံမိစေတာဖြစ်တယ်လို့ Acta Optica Sin-ica ဂျာနယ်မှာ သုတေသနပညာရှင်များက ရေးသားဖော်ပြ ထားတာ တွေ့ရှိရပါတယ်။                          

Ref: IE

ကိုထက်

MWD Web Portal

နည်းပညာသတင်း

မိမိတို့ခန္ဓာကိုယ်မှထွက်ရှိတဲ့ ကျင်ငယ်ရည်ကို စွန့်ပစ်ပစ္စည်းအဖြစ်သာသတ်မှတ်ထားပေမယ့် တကယ်တမ်း သုတေသနပြုမှုတွေနဲ့အတူ အသုံးပြုတတ်မယ်ဆိုရင် တန်ဖိုးကြီးမား လှတဲ့အရာတွေကို ဖန်တီးပေးနိုင်စေမယ့်အရာဖြစ်ပါတယ်။အဲဒါတွေထဲမှာဆေးဘက်ဆိုင်ရာအသုံးပြုနိုင်တဲ့ပစ္စည်းများလည်း ပါဝင်ပါတယ်။

ကယ်လီဖိုးနီးယားတက္ကသိုလ်မှ သုတေသနပညာရှင်များက တခြားအမေရိကန်၊ ဂျပန်ပညာရှင်များနဲ့ ပူးပေါင်းပြီး ကျင်ငယ်ရည်ကို ဟိုက်ဒရောဆီယာပတ်တိုက်သို့ ပြောင်းလဲပေးမယ့် တဆေးအတုစနစ်ကို ဖန်တီးလိုက်နိုင်ပါတယ်။ ဟိုက်ဒရောဆီ ယာပတ်တိုက်ဆိုတာ သွားတုတွေ၊ အရိုး တုတွေထုတ်လုပ်ရာ၊ ရှေးဟောင်းပစ္စည်း တွေကို တူးဖော်ထိန်းသိမ်းရာနဲ့ ဇီဝနည်းအရဆွေးမြည့်နိုင်တဲ့အရာတွေဖန်တီးရာမှာ ကျယ်ပြန့်စွာအသုံးပြုလျက်ရှိတဲ့ ကယ်ဆီယံဖော့စဖိတ်သတ္တုဖြစ်ပါတယ်။

ပညာရှင်များက  အခုတီထွင်လိုက်တဲ့ နည်းပညာဟာ ခဲတစ်လုံးနဲ့ငှက်နှစ်ကောင်ပစ်ခြင်း ဒါမှမဟုတ် တစ်ချိန်တည်းမှာရည်မှန်းချက်နှစ်ခုကိုအောင်မြင်ခြင်းပင်ဖြစ်ပါတယ်။ အကြောင်းရင်းကတော့ တစ်ဖက်မှာ စွန့်ပစ်ပစ္စည်းများကိုအလဟဿမဖြစ်စေခြင်းနဲ့ အခြားတစ်ဖက်မှာတော့ စီးပွားဖြစ်အသုံးပြုနိုင်တဲ့ ကုန်ကြမ်းပစ္စည်းများကို ပြန်လည်ထုတ်လုပ်ပေးနိုင်ခြင်းဖြစ်ပါတယ်။ အခုလိုအသုံးဝင်တဲ့အရာတွေ ထွက်ပေါ်လာစေဖို့အချိန်ယူရတာကတစ်ရက်တာမျှသာဖြစ်တာကြောင့် ငွေကြေးကုန်ကျမှုနဲ့ အချိန်ကြာမြင့်မှုကိုသက်သာစေပါတယ်။                           

Ref: IE

ကိုထက်

၁။        ယနေ့မြန်မာစံတော်ချိန် ၁၇:၃၀ နာရီအချိန် တိုင်းထွာချက်များအရ အိန္ဒိယနိုင်ငံ၊ အနောက် ဘင်္ဂလားပြည်နယ်တွင် ဖြစ်ပေါ်နေသော အားကောင်းသောလေဖိအားနည်းရပ်ဝန်း၏အရှိန်ကြောင့် လည်းကောင်း၊ ကပ္ပလီပင်လယ်ပြင်နှင့် ဘင်္ဂလားပင်လယ်အော်တို့တွင် မုတ်သုံ‌လေအားကောင်းရာမှ အားအလွန်ကောင်းနေခြင်းကြောင့်လည်းကောင်း၊ အရှေ့ဘက်မှ ရွေ့လျားလာသော လေပွေလှိုင်း များ၏ အရှိန်ကြောင့်လည်းကောင်း၊ အနောက်ဘက်မှ ရွေ့လျားလာသော လေပွေလှိုင်းများ၏ အရှိန်ကြောင့်လည်းကောင်း ယနေ့ညမှ ၂၄-၆-၂၀၂၅ ရက်နေ့အတွင်း နေပြည်တော်၊ ရန်ကုန်တိုင်း ဒေသကြီး၊ မန္တလေးတိုင်းဒေသကြီး၊ ပဲခူးတိုင်းဒေသကြီး၊ မကွေးတိုင်းဒေသကြီး၊ စစ်ကိုင်းတိုင်း ဒေသကြီး၊ ဧရာဝတီတိုင်းဒေသကြီး၊ တနင်္သာရီတိုင်းဒေသကြီး၊ ကချင်ပြည်နယ်၊ ကယားပြည်နယ်၊ ကရင်ပြည်နယ်၊ ချင်းပြည်နယ်၊ မွန်ပြည်နယ်၊ ရခိုင်ပြည်နယ်နှင့် ရှမ်းပြည်နယ်တို့ တွင် နေရာစိပ်စိပ်မှ နေရာအနှံ့အပြား မိုးထစ်ချုန်းရွာပြီး၊ အချို့ဒေသများတွင် ဒေသအလိုက်နှင့် နေရာကွက်၍ မိုးကြီး မည်။ မြစ်ဝကျွန်းပေါ်၊ ရခိုင်ကမ်းရိုးတန်းတစ်လျှောက်နှင့် ကမ်းလွန်ပင်လယ်ပြင်တို့တွင် ရံဖန်ရံခါ မိုးသက်လေပြင်းများကျရောက်ပြီး လှိုင်းကြီးမည်။ မိုးသက်လေပြင်းကျစဉ် ရေပြင်/မြေပြင်လေသည် တစ်နာရီလျှင် ၃၅ မိုင်အထိ တိုက်ခတ်နိုင်ပါသည်။ လှိုင်းအမြင့်မှာ မြစ်ဝကျွန်းပေါ်၊ ရခိုင်ကမ်းရိုးတန်း တစ်လျှောက်နှင့် ကမ်းလွန်ပင်လယ်ပြင်တို့တွင် ၁၀ ပေမှ ၁၃ ပေခန့်ရှိနိုင်ပါသည်။ မုတ္တမကွေ့၊ မွန်-တနင်္သာရီကမ်းရိုးတန်းတစ်လျှောက်နှင့် ကမ်းလွန်ပင်လယ်ပြင်တို့တွင် တစ်ခါတစ်ရံ မိုးသက်လေပြင်း များကျရောက်ပြီး လှိုင်းကြီးနိုင်ပါသည်။ မိုးသက်လေပြင်းကျစဉ် ရေပြင်/မြေပြင်လေသည် တစ်နာရီလျှင် မိုင် ၃၀ အထိ တိုက်ခတ်နိုင်ပါသည်။ လှိုင်းအမြင့်မှာ မုတ္တမကွေ့၊ မွန်-တနင်္သာရီကမ်းရိုးတန်းတစ်လျှောက် နှင့် ကမ်းလွန်ပင်လယ်ပြင်တို့တွင် ၁၀ ပေမှ ၁၂ ပေခန့် ရှိနိုင်ပါသည်။

အကြုံပြုချက်

၂။       သို့ဖြစ်ပါ၍ မိုးသည်းထန်စွာရွာသွန်းခြင်းနှင့်အတူ လေပြင်းတိုက်ခတ်ခြင်း၊ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်း၊ မိုးသီးကြွေခြင်း၊ လျှပ်တစ်ပြက်ရေကြီးခြင်းနှင့် မြေပြိုခြင်းစသည့် သဘာဝဘေးအန္တရာယ်များ ဖြစ်ပေါ်နိုင်ပါသဖြင့် အဆိုပါဒေသများရှိ ကုန်းမြင့်ဒေသအနီးတွင် နေထိုင် ကြသူများအနေဖြင့် မြေပြိုမှုအန္တရာယ်၊ မြစ်ငယ်၊ ချောင်းငယ်များအနီးတွင် နေထိုင်ကြသူများအနေဖြင့် ရေကြီး၊ ရေလျှံမှုများကို ကြိုတင်သတိပြုရှောင်ရှားနိုင်ပါရန်နှင့် ပြည်တွင်းရေကြောင်းသွားလာရေး၊ လေကြောင်းပျံသန်းရေးနှင့် ဆည်မြောင်းတာတမံများအနေဖြင့် လိုအပ်သည်များ ကြိုတင်ပြင်ဆင်ဆောင်ရွက် ထားနိုင်ပါရန် သတိပေးနှိုးဆော်အပ်ပါသည်။

မိုးဇလ

ဝါရှင်တန် ဇွန် ၁၈

အမေရိကန်အစိုးရအမျိုးသား လေကြောင်းနှင့် အာကာသစီမံခန့်ခွဲရေးအေဂျင်စီ(နာဆာ) ၏ ဂျိမ်းစ်ဝက်ဘဲ အာကာသရေဒီယို တယ်လီစကုပ်သည် အအေးဓာတ် အပြင်းထန်ဆုံး သက်တမ်း ရှေးအကျဆုံးနှင့် အလင်းအားအနည်းဆုံး ဂြိုဟ်တစ်စင်းကို တိုက်ရိုက် ဓာတ်ပုံ ရိုက်ကူးနိုင်ခဲ့ကြောင်း ဇွန် ၁၇ ရက် သတင်းများအရ သိရသည်။

14 Her C အမည်ရှိ အဆိုပါ ဂြိုဟ်သည် ကမ္ဘာမြေနှင့် အလင်း နှစ် ၆၀ ခန့်အကွာတွင်ရှိသည့် ကြယ်တစ်စင်းကို ဗဟိုပြုလှည့် ပတ်လျက်ရှိသည်။

ဂျိမ်းစ်ဝက် အာကာသရေဒီယို တယ်လီစကုပ်ရိုက်ကူးထားသော ဓာတ်ပုံများထဲတွင် 14 Her C ဂြိုဟ်ကို လိမ္မော်ရောင်အစက် အပြောက်ငယ်တစ်ခုအဖြစ် တွေ့

မြင်နိုင်သည်။ 
14 Her C ဂြိုဟ်သည် သက် တမ်းအားဖြင့် နှစ်ပေါင်း လေး ဘီလီယံခန့်ရှိပြီး လေထုလွှာအပူ ချိန်မှာ အနှုတ် သုံးဒီဂရီဆဲလ်စီယပ်စ်ထိသာရှိရာ အအေးဓာတ် အလွန်ပြင်းထန်သော ဂြိုဟ်တစ် စင်းဖြစ်ကြောင်း သိပ္ပံပညာရှင်များ က ပြောကြားသည်။

အဆိုပါဂြိုဟ်သည် မိခင်ကြယ် ဖြစ်သည့် 14 Her ကြယ်ကို မိုင် ပေါင်း ၁ ဒသမ ၄ ဘီလီယံအကွာ မှတစ်ဆင့် လှည့်ပတ်နေကြောင်း သိရသည်။

အအေးဓာတ်ပြင်းထန်သော၊ သက်တမ်းရှေးကျသော 14 Her C ကဲ့သို့သော ဂြိုဟ်များမှာ တိုက်ရိုက် ဓာတ်ပုံရိုက်ကူးရန် အလွန်ခက်ခဲ သည့် ဂြိုဟ်များဖြစ်ကြောင်း သိရသည်။

Ref: Sputnik News

YDNB Newspaper

ဗြိတိန်တပ်မတော်၏ F-35B Lightning II ကိုယ်ပျောက်တိုက်လေယာဉ် တစ်စီးသည် စနေနေ့ (ဇွန် ၁၄) က အိန္ဒိယနိုင်ငံတောင်ပိုင်းရှိ Thiruvananthapuram လေဆိပ်တွင် အရေးပေါ်ဆင်းသက်ခဲ့ရပြီးနောက် ယခုအချိန်ထိ လေယာဉ် ပြေးလမ်းပေါ်တွင် ရပ်နားထားရသည်ဟု သတင်းများအရ သိရသည်။ ဒေသခံသတင်းများအရ ထိုလေယာဉ်သည် နည်းပညာဆိုင်ရာ ချို့ယွင်းချက်ကြောင့် ပျံသန်းနိုင်ခြင်းမရှိသေးဘဲ ဗြိတိန်လေယာဉ်ပညာရှင်များက ပြင်ဆင်မှုများ ပြုလုပ်နေကြသည်။

အဆိုပါ F-35B လေယာဉ်သည် HMS Prince of Wales လေယာဉ်တင် သင်္ဘော၏ တစ်စိတ်တစ်ပိုင်းဖြစ်ပြီး အိန္ဒိယရေတပ် နှင့် ပူးတွဲလေ့ကျင့်မှု များ ပြုလုပ်ပြီးနောက် အင်ဒို-ပစိဖိတ်ဒေသတွင် လှုပ်ရှားလျက်ရှိသည်။ Lockheed Martin က ဒီဇိုင်းရေးဆွဲထားသော F-35B သည် လေယာဉ် တင်သင်္ဘောများတွင် အသုံးပြုရန်သင့်လျော်သော ဒေါင်လိုက် အတက်အဆင်း ပြုလုပ်နိုင်သည့် တိုက်လေယာဉ်အမျိုးအစားဖြစ်သည်။

NDTV ၏ သတင်းအရ စနေနေ့ညက ထိုလေယာဉ်သည် လောင်စာဆီ နည်းပါးမှုကြောင့် Thiruvananthapuram လေဆိပ်သို့ အရေးပေါ် ဆင်းသက်ခဲ့ရခြင်းဖြစ်ပြီး ရာသီဥတုအခြေအနေဆိုးရွားမှုကြောင့်လည်း ၎င်း၏လေယာဉ်တင်သင်္ဘောဆီသို့ ပြန်လည်မဆင်းသက်နိုင်ဘဲ အရေးပေါ် ဆင်းသက်ခဲ့ရသည်။

အိန္ဒိလေတပ် (IAF) သည် ၎င်း၏ ရေဒါကွန်ရက်များဖြင့် အကူအညီပေးကာ လေကြောင်းထိန်းသိမ်းရေးဌာနနှင့် ညှိနှိုင်းမှုများပြုလုပ်ကာ ဘေးကင်းစွာ ဆင်းသက်နိုင်ရန် ထောက်ပံ့ပေးခဲ့သည်ဟု The Times of India က ဖော်ပြသည်။

တနင်္လာနေ့က ဗြိတိန်ဘုရင့်ရေတပ် (Royal Navy) ၏ ရဟတ်ယာဉ် တစ်စင်းသည် Thiruvananthapuram လေဆိပ်သို့ ရောက်ရှိလာကာ F-35B လေယာဉ်မှူးအား လေယာဉ်တင်သင်္ဘောဆီသို့ ပြန်လည် ခေါ်ဆောင် သွားခဲ့သည်။ အဆိုပါဖြစ်စဉ်က F-35B ပြန်လည်အသုံးပြုနိုင်ရန် အချိန် အနည်းငယ် နောက်ကျနိုင်ကြောင်း ညွှန်းဆိုနေသည်။ 

အိန္ဒိလေတပ် (IAF) က အဆိုပါအရေးပေါ်ဆင်းသက်မှုသည် ပုံမှန်ဖြစ်စဉ် တစ်ခုသာဖြစ်ကြောင်း ပြောကြားခဲ့ပြီး ယခုအခြေအနေကို ကူညီဖြေရှင်း နိုင်ရန် နည်းပညာဆိုင်ရာနှင့် လက်တွေ့အထောက်အပံ့များ ပေးနေကြောင်း ဖြည့်စွက်ထုတ်ဖော်ခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

(ရိုက်တာ၊ ဇွန် ၁၈)

တရုတ်ဗဟိုဘဏ်အကြီးအကဲက ဒီဂျစ်တယ် ယွမ်ကို နိုင်ငံတကာအဆင့်တွင် တွင်တွင်ကျယ်ကျယ် အသုံးပြုနိုင်ရေး ဆောင်ရွက်သွားမည်ဖြစ်ကြောင်းကတိပေး ပြောကြားပြီး၊ ငွေကြေးအမျိုးအစား များစွာ လွှမ်းမိုးနေသည့် ကမ္ဘာ့စီးပွားရေးစနစ်တွင် ဗဟုမဏ္ဍိုင်ကမ္ဘာသုံးငွေကြေးစနစ် ဖွံ့ဖြိုးတိုးတက် လာစေရေး တောင်းဆိုလိုက်ပါသည်။ 

တရုတ်နိုင်ငံသည် ရှန်ဟိုင်းမြို့တွင် နိုင်ငံတကာ e-CNY အော်ပရေးရှင်းဗဟိုဌာနကို တည်ထောင် သွားရန်ရှိကြောင်း၊ တရုတ်ပြည်သူ့ဘဏ်ဥက္ကဋ္ဌဖြစ်သူ Pan Gongshengက ဒေသတွင်းနှင့် နိုင်ငံ တကာ ဘဏ္ဍာရေးဆိုင်ရာ အဆင့်မြင့်အရာရှိကြီးများ၏ Lujiazui Forumတွင် ဗုဒ္ဓဟူးနေ့ (ဇွန် ၁၈) က ပြောကြားလိုက်ပါသည်။

အမေရိကန်ပြည်ထောင်စု၏ အကောက်အခွန်နှုန်းထား မူဝါဒများကြောင့် နိုင်ငံတကာကုန်သွယ်ရေး တင်းမာမှုနှင့် ဒေါ်လာအခြေခံ ရင်းနှီးမြှုပ်နှံသူများအတွက် အခြားရွေးချယ်စရာရန် အားပေးသည့် ကမ္ဘာသုံး ယွမ်ငွေကို နှစ်သက်သဘောတွေ့လာကြမည်ဖြစ်ကြောင်း မှတ်ချက်ပြု ပြောကြားခဲ့ပါသည်။

တစ်ချိန်တည်းမှာပင် တရုတ်နိုင်ငံသည် အနောက်နိုင်ငံအဖွဲ့အစည်းများ၏ ဘဏ္ဍာရေးစနစ် လွတ်လပ်ပြီး တိုးတက်မှုရှိလာစေရန် ကြိုးပမ်းမြှင့်တင် ဆောင်ရွက်လျက်ရှိပါကြောင်း၊ ကုန်သွယ်မှု ပုံသဏ္ဍာန် အရွှေ့အပြောင်းနှင့် ကမ္ဘာ့ပထဝီနိုင်ငံရေး ချိန်ညှိမှုတို့၏ ကမ္ဘာ့စီးပွားရေးအပေါ် သက်ရောက်မှု တို့၏ တွန်းအားရရှိရေးသည်လည်း အရေးကြီးပါကြောင်း၊ “ဗဟုမဏ္ဍိုင် နိုင်ငံတကာ ငွေကြေးစနစ် ဖြစ်ထွန်းရေးသည် အချုပ်အခြာပိုင် နိုင်ငံများ၏ငွေကြေးအပေါ် မူဝါဒဆိုင်ရာ ကန့်သတ်ချက်များကို ခိုင်မာစေခြင်း၊ ဘဏ္ဍာရေးစနစ်၏ တုန့်ပြန်နိုင်ငံစွမ်းကို မြှင့်တင်ပေးခြင်းနှင့် ကမ္ဘာ့ဘဏ္ဍာရေးစနစ် ပိုမိုတည်ငြိမ်စေရေးအတွက် ထိန်းချုပ်နိုင်ငံခြားစသည့် အကျိုးကျေးဇူးများ ရရှိမှာဖြစ်ကြောင်း” ၎င်းက ပြောကြားလိုက်ပါသည်။

ကိုးကား -Reuters

ဘာသာပြန်ဆိုသူ- ဦးခိုင်ထွဋ်လှ

ရုရှားနိုင်ငံတွင် တရုတ်ဘာသာစကားအပေါ် စိတ်ဝင်စားမှု တိုးပွားလာ နေကြောင်း သမ္မတ ဗလာဒီမာ ပူတင်က SPIEF 2025 ဖိုရမ်အပြီး သတင်းထောက်များအား ပြောကြားခဲ့သည်။ ၎င်း၏မြေးမဖြစ်သူသည် ပေကျင်းမှ ဆရာမတစ်ဦးနှင့်သင်ကြားနေပြီး တရုတ်ဘာသာကို ကျွမ်းကျင်စွာ ပြောဆိုနိုင်ကြောင်း ဖွင့်ဟခဲ့သည်။

အပြည်ပြည်ဆိုင်ရာ သတင်းဌာနများ၏ အကြီးအကဲများနှင့် ညနေပိုင်း အမေးအဖြေအစီအစဉ်တွင် ရှင်ဟွာသတင်းဌာန၏ ဥက္ကဋ္ဌ ဖူဟွာက ရုရှား- တရုတ် လူမှုရေးဖလှယ်မှု နက်ရှိုင်းလာပုံနှင့် ပူတင်၏ “မိသားစုဝင် အချို့က တရုတ်ဘာသာစကားကို လေ့လာနေကြသည်” ဆိုသည့် ယခင် က ပြောကြားချက်အကြောင်း မေးမြန်းခဲ့သည်။

ပူတင်က “မိမိ၏ မိသားစုဝင်တွေထဲမှာ တရုတ်စာလေ့လာနေသည့် သူတွေရှိကြောင်း ပြောတုန်းက မိမိ၏ မြေးမဖြစ်သူကို ရည်ညွှန်းတာပါ။ သူမတွင် ပေကျင်းက ဆရာမရှိပြီး တရုတ်စကားကို ကျွမ်းကျင်စွာ ပြောနိုင် ပါသည်” ဟု ပြန်လည်ဖြေကြားခဲ့သည်။

“မိမိ၏မြေးက ၂၀၀၀ ပြည့်နှစ်အစောပိုင်းတုန်းက ၎င်း၏ ဆန္ဒ အလျောက် တရုတ်စာကို စတင်လေ့လာခဲ့သည်၊ ဆရာတစ်ဦးခန့်ပြီး သင်ယူခဲ့သည်” ဟု ၎င်းက ဖြည့်စွက်ပြောကြားခဲ့သည်။

ရုရှားသမ္မတက ရုရှားနိုင်ငံတွင် တရုတ်ကျောင်းသား ၅၀,၀၀၀ ကျော် ပညာသင်ကြားလျက်ရှိပြီး တရုတ်နိုင်ငံတွင်လည်း ရုရှားကျောင်းသား ၂၁,၀၀၀ ကျော် ရှိနေကြောင်း၊ နှစ်နိုင်ငံရှိ တက္ကသိုလ်များအကြား တိုက်ရိုက် ဆက်သွယ်မှုများ ရှိနေပြီး ဤသို့ဖြင့် နှစ်နိုင်ငံကြား နယ်ပယ်အားလုံး ဆိုင်ရာ ဆက်ဆံရေးများ ပိုမိုခိုင်မာလာကြောင်း ထည့်သွင်းပြောကြား ခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

လုပ်အားခများကို ခေါင်းပုံဖြတ်ရယူခဲ့သူအား လူကုန်ကူးမှုတားဆီးနှိမ်နင်းရေးဥပဒေပုဒ်မ ၃၅၊ ၃၆ ဖြင့် အလုပ်နှင့် ထောင်ဒဏ်များ ကျခံစေရန်အမိန့်ချမှတ်ခဲ့ကြောင်း မြန်မာနိုင်ငံရဲတပ်ဖွဲ့မှ သိရသည်။

ဧရာဝတီတိုင်းဒေသကြီး ဖျာပုံမြို့နယ်နေ ဦး---/၅၁/၂၀၂၅ ခုနှစ် နေသူသည် ဖျာပုံမြို့ အမှတ်(၁)ရပ်ကွက်ရှိ ဖျာပုံတံတားအောက်တွင် အရက်သေစာသောက်စားပြီး အိပ်ပျော်နေစဉ် မောင်ထွန်း၊ ရွာလယ်ပိုင်းလမ်း၊ ကျုံကူကျေးရွာ၊ ဖျာပုံမြို့နယ်၊ ဧရာဝတီတိုင်းဒေသကြီးနေသူက အိပ်ရန်နေရာမရှိပါက ၎င်း၏ နေအိမ်သို့လိုက်ခဲ့ရန် ခေါ်ဆောင်သဖြင့် လိုက်ပါသွားခဲ့ကြောင်း။

ထို့နောက် နေအိမ်အရောက်တွင် ၎င်းအား မောင်ထွန်းက ငါးဖမ်းစက်လှေတွင် လိုက်ပါလုပ်ကိုင်ရန် စည်းရုံးရာ မလုပ်ကိုင်လိုကြောင်း ငြင်းဆန်ခဲ့သော်လည်း ဖျာပုံမြို့နယ်၊ မှော်ဘီကျေးရွာရှိ “ဓူဝံ” ငါးဖမ်း အလုပ်ရုံသို့ပို့ဆောင်ကာ ကြိုတင်ငွေကျပ် ၂ သိန်းထုတ်ယူသွားခဲ့ကြောင်း၊ အဆိုပါနေရာ၌ လုပ်အားခအနေဖြင့် တစ်လလျှင် ငွေကျပ် ၂၂၀၀၀၀ နှုန်းဖြင့် ၉ လခန့်လုပ်ကိုင်ခဲ့ရာ မောင်ထွန်းမှ ငွေကျပ် ၁၁၅၀၀၀၀ ကို ထပ်မံထုတ်ယူသွားခဲ့သဖြင့် ၎င်းအား ငွေကျပ် ၁၃၆၅၀၀ သာ ထုတ်ပေးခဲ့သဖြင့် ၎င်း၏ လုပ်အားခများအား ခေါင်းပုံဖြတ်ရယူသွားခဲ့သည့် မောင်ထွန်းအား ဖျာပုံမြို့မရဲစခန်း (ပ)၅၉/၂၀၂၅၊ လူကုန်ကူးမှုတားဆီးနှိမ်နင်းရေးဥပဒေပုဒ်မ ၃၆ ဖြင့် အမှုရေးဖွင့် တရားစွဲတင်ပို့ခဲ့သည်။ ဖျာပုံခရိုင်တရားရုံးမှ ဇွန် ၁၂ ရက်တွင် တရားခံမောင်ထွန်းအား လူကုန်ကူးမှုတားဆီးနှိမ်နင်းရေးဥပဒေပုဒ်မ ၃၆ ဖြင့် အလုပ်နှင့် ထောင်ဒဏ် ၈ နှစ်ကျခံစေရန် အမိန့်ချမှတ်ခဲ့သည်။

ထို့ပြင် ရန်ကုန်တိုင်းဒေသကြီး သာကေတမြို့နယ်နေ မ---/ ၂၄/၂၀၂၅ ခုနှစ်နေသူသည် ၈-၂-၂၀၂၅ ရက်နေ့ money@dawwai998 Tik Tok အကောင့်၌ တရုတ်အငှားရည်းစား ၅ ယောက်ခေါ်ယူမည်၊ ၃/၄ လခန့်လုပ်ကိုင်ရမည်ဟု ကြော်ငြာထားသည်ကို တွေ့ရှိသဖြင့် ဆက်သွယ်ခဲ့ရာ အကောင့်ပိုင်ရှင် နေခြည်စိုး(ကျား)၊ ဆိတ်ချိုရွာ၊ ပျော်ဘွယ်မြို့နယ်၊ မန္တလေးတိုင်းဒေသကြီးနှင့် သန်းမိုးဇင်(မ)၊ မူဆယ် မြို့နေ၊ ရှမ်းပြည်နယ်နေသူတို့က ၎င်းအား တရုတ်ယောကျ်ားယူပါက တစ်လလျှင် ငွေကျပ်သိန်း ၅၀ ရမည်၊ ၃ လ လုပ်ကိုင်ပြီးပါက ပြန်လည်ခေါ်ဆောင်ပေးမည်ဟု ပြောဆိုစည်းရုံးပြီး တရုတ်နိုင်ငံသို့ ပို့ဆောင်ရန် စီစဉ်ဆောင်ရွက်ခဲ့သဖြင့် မဟာအောင်မြေမြို့နယ်၊ အမှတ်(၉)မြို့မ ရဲစခန်း (ပ)၃၈/ ၂၀၂၅၊ လူကုန်ကူးမှုတားဆီးနှိမ်နင်းရေးဥပဒေပုဒ်မ ၃၅/၄၄ ဖြင့် အမှုရေးဖွင့်တရားစွဲတင်ပို့ခဲ့သည်။

အဆိုပါအမှုအား မဟာအောင်မြေခရိုင်တရားရုံးမှ ဇွန် ၁၂ ရက်တွင် တရားခံနေခြည်စိုး(ကျား)ကို လူကုန်ကူးမှုတားဆီးနှိမ်နင်းရေးဥပဒေပုဒ်မ ၃၅ ဖြင့် အလုပ်နှင့် ထောင်ဒဏ် ၁၂ နှစ် ကျခံစေရန်နှင့် တိမ်းရှောင်တရားခံ သန်းမိုးဇင်(မ)အား ရာဇဝတ်ကျင့်ထုံးဥပဒေပုဒ်မ ၈၇/၈၈ အတည်ပြုထုတ်ဆင့်ခဲ့ကြောင်း သိရှိရသည်။

MOI

အစ္စရေးသည် လေကြောင်းခရီးစဉ်များ ဖျက်သိမ်းခံရခြင်းကြောင့် နိုင်ငံရပ်ခြား၌ သောင်တင်နေသော နိုင်ငံသားများအား ပြန်လည်ခေါ်ယူရန် စီမံချက်ကို စတင်ခဲ့ပြီး ပထမဆုံးလေယာဉ်သည် ဗုဒ္ဓဟူးနေ့ (ဇွန် ၁၈) တွင် Ben Gurion လေဆိပ်သို့ ဆင်းသက်ခဲ့ကြောင်း ကြေညာချက် ထုတ်ပြန်ခဲ့သည်။

အစ္စရေး လေဆိပ်အာဏာပိုင်အဖွဲ့က “အဆိုပါလုပ်ငန်းစဉ်ကို အဆင့်ဆင့် စီမံကာ ဖြစ်ပေါ်လာနိုင်သည့် အန္တရာယ်အဆင့်နှင့် လုံခြုံရေး အခြေအနေအရ ခရီးသည်၊ လေယာဉ်အဖွဲ့သားများနှင့် လေယာဉ်များ၏ ဘေးကင်းရေး ကို အလေးထား ဆောင်ရွက်လျက်ရှိသည်” ဟု ပြောကြားခဲ့သည်။

လွန်ခဲ့သည့် သောကြာနေ့ (ဇွန် ၁၃) က အီရန်နှင့် ပဋိပက္ခ ပိုမိုပြင်းထန် လာခြင်းနှင့်အတူ အစ္စရေးနိုင်ငံသည် အထူးအရေးပေါ်အခြေအနေကို ကြေညာကာ လေကြောင်းလိုင်းများပိတ်ပင်ခြင်း၊ ကျောင်းများ ပိတ်ခြင်း နှင့် လူစုလူဝေးများ တားမြစ်ခြင်းတို့ကို ပြုလုပ်ခဲ့သည်။

ပထမဆုံး ပြန်လည်ခေါ်ယူရေး လေယာဉ်သည် ဗုဒ္စဟူးနေ့ (ဇွန် ၁၈) နံနက်ပိုင်းတွင် ဆိုက်ပရပ်စ်နိုင်ငံ လာနာကာမြို့မှ ဆင်းသက်ခဲ့ပြီး ခရီးသည် များသည် “အစ္စရေးသို့ အမြန်ဝင်ရောက်ခြင်းနှင့် ခရီးဆောင်အိတ်များ ပြန်လည်ရယူခြင်း လုပ်ငန်းစဉ်များကို ချောမွေ့စွာ ပြီးမြောက်ခဲ့သည်” ဟု ကြေညာချက်တွင် ဖော်ပြထားသည်။

“လေဆိပ်အာဏာပိုင်အဖွဲ့အနေဖြင့် လုံခြုံရေးအခြေအနေအရ လေဆိပ်တွင် ခရီးသည်များ၏ နေထိုင်ချိန်ကို အနည်းဆုံးဖြစ်စေရေးလျှော့ချရန် အရေးကြီးပါကြောင်း” ထပ်မံအလေးထားပြောကြားကာ လေဆိပ်သို့ခရီးသည်များကို ကြိုဆိုရန် လူစုလူဝေးများ မလာရောက်ကြရန် တိုက်တွန်း ထားသည်။

ကိုးကား- CNN

Photo: France 24

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ပေကျင်း ဇွန် ၁၇ 
တရုတ်နိုင်ငံ အခြေစိုက် ကန်ဂျူး အာကာသနည်းပညာကုမ္ပဏီသည် ပုဂ္ဂလိကသတင်း အချက်အလက် လက်ဆင့်ကမ်း ပေးပို့ရေးဂြိုဟ်တုကွန်ရက်တစ်ခု ၁၅ ကို တည်ဆောက်ရန် စီစဉ်ထားကြောင်း ဇွန် ၁၆ ရက်သတင်းများ အရ သိရသည်။
မိမိတို့၏ သတင်းအချက်အလက်လက်ဆင့်ကမ်းပေးပို့ရေး ဂြိုလ်တုကွန်ရက်သည် ဝင်ရိုးစွန်းဒေသများအပါအဝင် တစ်ကမ္ဘာလုံးအတွက် ဝန်ဆောင်မှုပေးနိုင်ကြောင်း ကန်ဂျူးကုမ္ပဏီ တာဝန်ရှိသူများက ပြောကြားသည်။ 
ကန်ဂျူးကုမ္ပဏီ ၏ သတင်းအချက်အလက် လက်ဆင့်ကမ်း ပေးပို့ရေး ဂြိုဟ်ကုကွန်ရက်ကို ပတ်လမ်းနေရာ သုံးနေရာ၌ ထားရှိမည့် ဂြိုဟ်တု ၁၃ စင်းဖြင့်

ဖွဲ့စည်းထားမည် ဖြစ်ကြောင်း သိရသည်။

လက်ရှိ အချိန်တွင် အထက်ပါ သတင်းအချက်အလက် လက်ဆင့်ကမ်းပေးပို့မှု ဂြိုဟ်တုကွန်ရက်၏ ပထမဆုံးဂြိုဟ်တုဖြစ်သည့် ကန် ဂျူး-၁ ဂြိုဟ်တုကို တည်ဆောက်နေပြီဖြစ်ကြောင်း သိရသည်။ 
ကန်ဂျူးကုမ္ပဏီသည် အလေး ချိန် ကီလိုဂရမ် ၁၇၀၀ ရှိသည့် ကန်ဂျူး ၁ ဂြိုဟ်တုကို ၂၀၂၆ ခုနှစ် နှစ်ကုန်ပိုင်းတွင် လွှတ်တင်ရန် စီစဉ်ထားသည်။
ကန်ဂျူးကုမ္ပဏီသည် ၎င်း၏ ကန်ဂျူး သတင်းအချက်အလက် လက်ဆင့်ကမ်းပေးပို့ရေး ဂြိုဟ်တုကွန်ရက်ကို အာကာသပိုးလမ်းမ၏ တစ်စိတ်ပိုင်းအဖြစ် ရည်ညွှန်းထားကြောင်း သိရသည်။

Ref: Xinhua News

Τrs: KKO

YDNB Newspaper

နည်းပညာသတင်း