အေသင် ဇွန် ၁၇

ဂရိနိုင်ငံတွင် လောင်ကျွမ်းနေသောတောမီးများကြောင့် အေသင် မြို့ရှိ ပြည်သူများကို ဘေးလွတ်ရာ ရွှေ့ပြောင်းခဲ့ရသည်ဟု အေသင်မြို့ မီးသတ်တပ်ဖွဲ့မှ တာဝန်ရှိသူများ က ပြောကြားခဲ့ကြောင်း ယနေ့ သတင်းများအရ သိရသည်။

အေသင်မြို့ရှိ မီးသတ်တပ်ဖွဲ့သည် မီးငြှိမ်းသတ်ရာတွင် တောမီး အရှိန်ပြင်းထန်သဖြင့် မီးငြှိမ်း သတ်ရေး လေယာဉ်များကိုပါ အသုံးပြု၍ မီးငြှိမ်းသတ်နေရ ကြောင်း၊ အေသင်မြို့၏ အရှေ့ မြောက်ဘက် ၂၅ မိုင်ခန့် အကွာ တွင်ရှိသော အန်နိုဆိုအူလီရွာအနီးသစ်ပင်များထူထပ်သော နေရာ တွင် ဇွန် ၁၅ ရက်က တောမီးစတင် လောင်ကျွမ်းခဲ့ခြင်းဖြစ်ပြီး ဇွန် ၁၆ ရက်တွင် တောမီးလောင်ကျွမ်းမှု ပြင်းထန်ကာ ထိန်းချုပ်ရန်ခက်ခဲ သဖြင့်ဂရိမီးသတ်သမားဦးရေ ၁၂ဝ ခန့်၊ မီးငြိမ်းသတ်ရေးလေယာဉ် ၁၇ စင်းနှင့် မီးသက်ယာဉ်အစီး ၃ဝ ဖြင့် မီးငြှိမ်းသတ်ခြင်းနှင့် ဒေသခံ များ ဘေးလွတ်ရာရွှေ့ပြောင်းခြင်း လုပ်ငန်းများကို ဆောင်ရွက်နေ ကြောင်း သိရသည်။

ဥရောပ၏ တောင်ဘက်စွန်းစွန်းတွင်ရှိသည့် ဂရိနိုင်ငံသည် မကြာသေးမီ နှစ်များအတွင်း မကြာခဏ တောမီးလောင်ကျွမ်းမှုများနှင့် ရေကြီးမှုများဖြစ်ပွားနေ ခြင်းကြောင့် စီးပွားရေးနှင့်သဘာဝပတ်ဝန်းကျင်ဆိုင်ရာ သက်ရောက်မှုများကို ခံစားခဲ့ရကြောင်း၊ လျင်မြန်စွာ ပြောင်းလဲနေသော ရာသီဥတုကြောင့် ပိုမိုဆိုးရွားလာကြောင်း၊ ဂရိသိပ္ပံပညာရှင်များက ပြောကြားခဲ့ပြီး ပြင်းထန်သော ရာသီဥတုကြောင့် ပျက်စီးဆုံးရှုံးမှုများအတွက် အိမ်ထောင်စုများနှင့် တောင်သူများကို လျော်ကြေးပေးရန် နိုင်ငံအစိုးရက စီစဉ်နေကြောင်း သိရသည်။

Ref: Russia Today

Trs: KZ

YDNB Newspaper

အမေရိကန် ပြည်တွင်းလုံခြုံရေးဝန်ကြီး Kristi Noem သည် အလာဂျစ် တုံ့ပြန်မှုကြောင့် အင်္ဂါနေ့ (ဇွန် ၁၇) တွင် ဝါရှင်တန် DC ရှိ ဆေးရုံသို့ လူနာတင်ယာဉ်ဖြင့် အရေးပေါ်ပို့ဆောင်ခံခဲ့ရကြောင်း ပြည်တွင်း လုံခြုံရေး ဌာန (DHS) က ထုတ်ပြန်သည်။

DHS ပြောရေးဆိုခွင့်ရှိသူ Tricia McLaughlin က “ဝန်ကြီး Noem သည် အလာဂျစ် တုံ့ပြန်မှုဖြစ်ပွားခဲ့ပြီး ကြိုတင်ကာကွယ်သည့်အနေဖြင့် ဆေးရုံ သို့ပို့ဆောင်ခဲ့ရပြီး လက်ရှိအချိန်တွင် သတိပြန်ရလာပြီး သက်သာလာ နေပါပြီ” ဟု ပြောကြားခဲ့သည်။

CNN ၏ သတင်းထောက်များက ဝန်ကြီး Noem တက်ရောက် ကုသမှု ခံယူနေသည့် ဆေးရုံ၏ အရေးပေါ်ခန်းအဝင်များတွင် Secret Service အေးဂျင့်များ စောင့်ကြပ်နေသည်ကို မြင်တွေ့ခဲ့သည်။

၎င်းသည် South Dakota ပြည်နယ်အုပ်ချုပ်ရေးမှူးအဖြစ် တာဝန် ထမ်းဆောင်ခဲ့ပြီး လွှတ်တော် အမတ်ဖြစ်ခဲ့ဖူးသည့် အသက် ၅၃ နှစ် အရွယ် Noem အား ဒုတိယသက်တမ်း ရွေးကောက်ပွဲအနိုင်ရပြီး ရက်ပိုင်း အကြာတွင် သမ္မတ Donald Trump က ပြည်တွင်းလုံခြုံရေး ဝန်ကြီး အဖြစ် ခန့်အပ်ခဲ့ခြင်းဖြစ်သည်။ ရွေးကောက်ပွဲတွင် ရွှေ့ပြောင်း နေထိုင်မှု မူဝါဒကို အဓိကထားခဲ့သည့် Trump ၏ အစိုးရအဖွဲ့တွင် Noem သည် အရေးပါသော ဝန်ကြီးတစ်ဦး ဖြစ်လာခဲ့သည်။ သူမအား ဇန်နဝါရီလ ကုန်ပိုင်းတွင် ဆီးနိတ်လွှတ်တော်က အတည်ပြုပေးခဲ့သည်။

သမ္မတ Trump သည် ရာထူးတာဝန် ပြန်လည်ထမ်းဆောင်ပြီးနောက် နယ်စပ်တပ်ဖြန့်ခြင်း၊ စစ်အာဏာသုံး၍ မှတ်ပုံတင်မထားသည့် ရွှေ့ပြောင်း နေထိုင်သူများအား နှင်ထုတ်ခြင်း အပါအဝင် ကြီးမားသော ရွှေ့ပြောင်း နေထိုင်မှု ထိန်းချုပ်ရေး မူဝါဒများကို အားတက်သရော ဆောင်ရွက် လျက်ရှိပြီး Noem ကလည်း သမ္မတ၏ မူဝါဒများကို အကောင်အထည် ဖော်လျက်ရှိသည်။

ဖက်ဒရယ်အရေးပေါ်စီမံခန့်ခွဲရေးအေဂျင်စီ (FEMA) ကိုလည်း တာဝန်ယူ ထားသည့် Noem သည် ယခင်က FEMA အား “ထိရောက်မှုမရှိ၊ မလိုအပ်ပါ” ဟု ဝေဖန်ကာ ဖျက်သိမ်းရန် တောင်းဆိုခဲ့ဖူးသည်။ လွန်ခဲ့သည့် သီတင်းပတ်တွင် Trump က “ယခုနှစ် မုန်တိုင်းရာသီအပြီးတွင် FEMA ကို အဆင့်ဆင့်ဖျက်သိမ်းရန် အစီအစဉ်ရှိသည်” ဟု ပြောကြားခဲ့သည်။

ကိုးကား- CNN

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

စင်ကာပူ ဇွန် ၁၆ 
အစ္စရေးနှင့် အီရန်တို့ကြား လက်ရှိဖြစ်ပွားနေသည့် စစ်ရေး  ပဋိပက္ခများကြောင့် ယနေ့တွင် ကမ္ဘာ့ရေနံဈေးကွက်၌ ရေနံ ဈေးနှုန်းများ မြင့်တက်လာခဲ့ ပြုကြောင်း သိရသည်။ အစ္စရေးနှင့် အီရန်တို့ကြား ဇွန် ၁၅ ရက်တွင် တတိယမြောက်နေ့အဖြစ် အပြန်အလှန်တိုက်ခိုက်ခဲ့ကြပြီးနောက် ယနေ့တွင် ကမ္ဘာ့ ရေနံဈေးကွက်၌ ရေနံဈေးနှုန်းများ မြင့်တက်လာခြင်း ဖြစ်ကြောင်း သိရသည်။

ယနေ့တွင်ကမ္ဘာ့ရေနံဈေးကွက် ၌ စံမှတ်ရေနံဈေးနှုန်းများမှာ တစ်စည်လျှင် အမေရိကန်ဒေါ်လာ ၁ ဒသမ ၇၀ ဒေါ်လာ တစ်နည်း အားဖြင့် ၂ ဒသမ ၃ ရာခိုင်နှုန်း မြင့်တက်လာပြီး ရေနံစိမ်းတစ်စည် လျှင် အမေရိကန်ဒေါ်လာ ၇၅ ဒသမ ၉၃ ဒေါ်လာထိ ရောက်ရှိခဲ့သည်။

အစ္စရေးနှင့်အီရန်ကြား ပဋိပက္ခများ ကျယ်ပြန့်လာခဲ့ပါက အရှေ့အလယ်ပိုင်းဒေသမှ ရေနံ ပို့ကုန်လုပ်ငန်းများ ထိခိုက်မည့် အရေးစိုးရိမ်နေကြချိန်တွင် ကမ္ဘာ့ ဈေးကွက်၌ ရေနံဈေးနှုန်းများ မြင့်တက်လာခဲ့ခြင်း ဖြစ်ကြောင်း သိရသည်။

ထို့နည်းတူ ပဋိပက္ခများ ကြောင့် ဟော်မုဇ်ရေလက်ကြား တစ်လျှောက် ရေနံသယ်ပို့ရေး လုပ်ငန်းများထိခိုက်မည့်အရေးကို လည်း ကမ္ဘာ့နိုင်ငံများက စိုးရိမ် လျက်ရှိသည်။

ဟော်မုဇ်ရေလက်ကြားသည် ကမ္ဘာ့နေ့စဉ် ရေနံထုတ်လုပ်မှု ပမာဏ၏ငါးပုံတစ်ပုံခန့် တစ်နည်း အားဖြင့် ရေနံစည်ပေါင်း ၁၈ သန်း နှင့် ၁၉ သန်းကြား နေ့စဉ်ဖြတ်သန်း နေသော ရေလမ်းကြောင်းဖြစ်ကြောင်း သိရသည်။

Act Ref: Xinhua

Trs: KKO

Photo - The Economic Times

YDNB Newspaper

တရုတ်နိုင်ငံ ဝူဟန်မြို့ရှိ ဝူချန်း၊ ဟန့်ခို၊ ဟန့်ယန်ခရိုင်တို့ကို ချိတ်ဆက်ထားသော ဒရုန်းပျံသန်းမှု လမ်းကြောင်းသစ် ၁၀ ခုအား ဇွန် ၁၆ ရက်က တရားဝင် ပြေးဆွဲနေပြီဖြစ်ကြောင်း သိရသည်။ အဆိုပါ ဝေဟင်နိမ့် ပျံသန်းရေး ဝန်ဆောင်မှု၌ အချိန်နှင့်တစ်ပြေးညီ လွှတ်တင်သည့် ဒစ်ဂျစ်တယ်ပလက်ဖောင်းတစ်ခု၊ စမတ်နည်းပညာသုံး ထိန်းချုပ်ကွပ်ကဲရေး စင်တာနှစ်ခု၊ ဝေဟင်နိမ့်လမ်းကြောင်း ၁၀ ခုနှင့် ဉာဏ်ရည် ထည့်သွင်းထားသော ဒရုန်းရပ်နားသည့်နေရာ ၂၂ ခုတို့ ပါဝင်ရာ ပင်လယ်စာ၊ ဆေးဝါးနှင့် လတ်လတ်ဆတ်ဆတ် ခူးဆွတ်ထားသောပန်းများ စသည့် ကုန်ပစ္စည်းများ သယ်ယူပို့ဆောင်ခြင်းကို လွယ်ကူမြန်ဆန်စေကြောင်း သိရသည်။ 

ကိုးကား- Xinhua Myanmar

Air India လေယာဉ်ပျက်ကျမှုနှင့်ပတ်သက်၍ ကျွမ်းကျင်သူများက လေယာဉ် အင်ဂျင် နှစ်လုံးလုံး တစ်ပြိုင်နက် အလုပ်မလုပ်တော့သည့် အတွက် လေယာဉ်၏ကန်အား ဆုံးရှုံးခဲ့ကြောင်း ထောက်ပြခဲ့သည်။

ဇွန်လ ၁၂ ရက်က Ahmedabad တွင် လေယာဉ်ပျက်ကျမှုဖြစ်ပွားပြီး လူ ၂၇၉ ဦး သေဆုံးခဲ့ပြီးနောက် အိန္ဒိယ ပြည်သူ့လေကြောင်း ညွှန်ကြားမှု ဦးစီးဌာန (DGCA) သည် ဇွန် ၁၅ ရက်တွင် နိုင်ငံ၏ Boeing 787 လေယာဉ်များ၏ လောင်စာစနစ်၊ အင်ဂျင်ထိန်းချုပ်မှုနှင့် အခြား အစိတ် အပိုင်းများကို အထူးစစ်ဆေးမှုများ ပြုလုပ်ခဲ့သည်။

အမေရိကန် ရေတပ်လေယာဉ်မှူးဟောင်းနှင့် လေကြောင်းကျွမ်းကျင်သူ Steve Scheibner က အဆိုပါဖြစ်စဉ်သည် လေယာဉ်အင်ဂျင် နှစ်လုံး စလုံး အလုပ်မလုပ်တော့သည့် “အလွန်ရှားပါးသော” အဖြစ်အပျက် ဖြစ်နိုင် ကြောင်း သက်သေအထောက်အထားများကို ညွှန်ပြခဲ့သည်။

အိန္ဒိယလေယာဉ်၏ ပျံတက်စဉ် အသံနှင့်ဗီဒီယိုဖိုင် အချက်အလက်များကို ဆန်းစစ်ပြီးနောက် Mr. Scheibner က လေယာဉ်ပျံတက်ပြီးချိန်တွင် Ram Air Turbine (RAT) စနစ် အလိုအလျောက် အသက်ဝင်လာသည့် လက္ခဏာများရှိကြောင်း ပြောကြားခဲ့သည်။ RAT (Ram Air Turbine) သည် လေယာဉ်ရွေ့လျားနေစဉ် လေစီးကြောင်းကို အသုံးပြု၍ တာဘိုင်လှည့်ပေးနိုင်သော အရေးပေါ်လေတာဘိုင်စနစ်ဖြစ်သည်။ လေယာဉ်၏ လျှပ်စစ်ဓာတ်အား အားလုံးဆုံးရှုံးသွားခြင်း (သို့မဟုတ်) အင်ဂျင်နှစ်လုံးစလုံး အလုပ်မလုပ်တော့ပါက RAT စနစ်သည် အလိုအလျောက် အသက်သွင်းကာ အရေးပေါ်ဓာတ်အားကို ထုတ်လုပ်ပေးသည်။ လေယာဉ်မှူးသည် cockpit မှ RAT ကို လက်ဖြင့်လည်း ဖွင့်နိုင်သည်။

Mr. Scheibner ၏ သုံးသပ်ချက်အရ လေယာဉ်ပျံတက်ပြီးနောက် အမြင့် ရုတ်တရက်ကျဆင်းလာခြင်းနှင့် RAT စနစ် အလိုအလျောက် အသက်ဝင်လာခြင်းတို့သည် အင်ဂျင်မှ ကန်အား (thrust) အပြည့်အဝ ဆုံးရှုံးသွား ခြင်းကြောင့် လေယာဉ်အမြင့်မတက်နိုင်ခဲ့ဟူသော ယူဆချက်ကို ပိုမို ခိုင်မာ စေပါသည်။ ထိုသို့သောအခြေအနေတွင် လေယာဉ်မှူးသည် အရေးပေါ် စွမ်းအင်နှင့် ထိန်းချုပ်ရေးစနစ်များကိုသာအမှီပြု၍ လေယာဉ်ကို ထိန်းသိမ်းနိုင်ရေး လုပ်ဆောင်နိုင်သည်ဟု ဆိုနိုင်ပါသည်။ သို့သော် Scheibner က Air India လေယာဉ်အတွက် အမြင့်ပေ ၁၂၀-၁၅၀ ကဲ့သို့ နိမ့်သောအမြင့်တွင် RAT စနစ်သည် ထိရောက်စွာ အလုပ်မလုပ်နိုင်ကြောင်း ထောက်ပြခဲ့သည်။ “RAT အသက်ဝင်နေသည့်တိုင် လေယာဉ်မှူး အနေဖြင့် အင်ဂျင်ကို ပြန်လည်စတင်ရန် အချိန်မလုံလောက်ပါ” ဟု ၎င်းက ရှင်းပြခဲ့သည်။

အိန္ဒိယအာဏာပိုင်များသည် ပျက်ကျသွားသော လေယာဉ်၏ Black box ကို ပြန်လည်ရရှိထားပြီဖြစ်သည်။ Scheibner က လေကြောင်း ထိန်းသိမ်းရေး ဌာနနှင့် ဆက်သွယ်မှုမှတ်တမ်းများသည် လေယာဉ်မှူး၏ “Mayday၊ ကန်အားမရှိ၊ ပါဝါမရှိ၊ အမြင့်မတက်နိုင်” ဟူသော အရေးပေါ် အချက်ပြမှု သည် အင်ဂျင်နှစ်လုံးစလုံး ပျက်စီးမှုကြောင့်ဟုတ်၊ မဟုတ် ရှင်းလင်းစွာ သိရှိရမည်ဟု ပြောကြားခဲ့သည်။

လေကြောင်းကျွမ်းကျင်သူများ၏ အင်ဂျင်နှစ်လုံးစလုံး ပျက်စီးနိုင်သည်ဟူသော လေ့လာသုံးသပ်ချက်နှင့်ပတ်သက်၍ အိန္ဒိယလေကြောင်း အာဏာပိုင်များက ယခုအချိန်တွင် မှတ်ချက်ပြုထုတ်ပြန်ခြင်း မရှိသေးပေ။

ကိုးကား- VN Express 

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဂျပန်နိုင်ငံရှိ ကုန်တိုက်ကြီးများတွင် ရောင်းချလျက်ရှိသော ဆန်ဈေးနှုန်းများသည် သီတင်းပတ်သုံးပတ်အထိဆက်လက်ကျဆင်းလာကြောင်း ဇွန်လ ၁၆ ရက်တွင် ထုတ်ပြန်သောအချက် အလက်များတွင် တွေ့ရသည်။

အစိုးရကသိုလှောင်ထားသည့်အရန် ဆန်များကို ဈေးနှုန်းလျှော့ချ၍ ဈေးကွက် အတွင်းရောင်းချပေးမှုကြောင့် ယခုကဲ့သို့ ဈေးနှုန်းများကျဆင်းလာခြင်းဖြစ်သည်။ 
ဂျပန်နိုင်ငံ၌ ဆန်ဈေးနှုန်းများတစ်ဟုန်ထိုးမြင့်တက်လာပြီးနောက် လယ်ယာ ဝန်ကြီးအသစ်က အရေးပေါ်ဆန်များကို လေလံဆွဲခြင်းမှတစ်ဆင့် ရောင်းချဖြန့်ဖြူး ပေးမှုစနစ်ကိုဖျက်သိမ်းလိုက်သည်။

ထိုစနစ်အစား လက်ကားကိုယ်စား လှယ်များထံသို့ လိုအပ်သလောက်သာ ထုတ်ပေးသောစနစ်သို့ပြောင်းလဲပြီး စားသုံး သူများအနေဖြင့် ဆန် ၅ ကီလိုဂရမ်လျှင် ယန်း ၂၀ဝ၀ ဝန်းကျင်ဖြင့် ဝယ်ယူနိုင်စေ ရေးကို စီစဉ်ပေးလာခြင်းဖြစ်ကြောင်း သိရသည်။

Ref: RTA

GAC ကုမ္ပဏီက တရုတ်နိုင်ငံရဲ့နာမည်ကျော် မော်တော်ကားထုတ်လုပ်တဲ့ ကုမ္ပဏီဖြစ်ပါတယ်။ အခုတော့ သူတို့က သမားရိုးကျ ကားတွေအပြင် ကားပျံကိုပါထုတ်ဖော်ပြသလိုက်ပါ ပြီ။ အဲဒီကားပျံကို Govy AirCab လို့နာမည်ပေးထားပါတယ်။

Govy AirCab က ထိုင်ခုံနှစ်လုံးပါပြီး ဒေါင်လိုက် အတက်အဆင်း လုပ်နိုင်တဲ့ ကားပျံအမျိုးအစားဖြစ်ပါတယ်။ GAC ကုမ္ပဏီက အခုလိုမျိုးကားပျံတွေကို ထုတ်လုပ်ခြင်းက ဝေဟင်အငှားယာဉ်ဈေးကွက်ကို ပိုမို တွင်ကျယ်လာစေဖို့ ဖြစ်တယ်လို့ဆိုပါတယ်။

သူ့ရဲ့တန်ဖိုးကိုတော့ ယွမ် ၁ ဒသမ ၆၉ သန်းဝန်းကျင် သတ်မှတ်ထားပါတယ်။

သူ့ကိုလျှပ်စစ်စွမ်းအင် အသုံးပြုထားတာဖြစ်ပြီး တစ်ကြိမ်အားအပြည့် သွင်းထားရုံနဲ့ ကီလိုမီတာ ၃၀ အထိ သွားနိုင်စေမယ်လို့ဆိုပါတယ်။ ဒါကြောင့်သူ့ကို အဓိကအသုံးပြုနိုင်တဲ့ နေရာက ဝေးကွာတဲ့ခရီးစဉ်တွေထက် မြို့တွင်းမှာ အသုံးပြုနိုင်မှာဖြစ်ပါတယ်။

သူ့ကိုအားသွင်းမယ်ဆိုရင် အပြည့်သွင်းပါက ၂၅ မိနစ်ကြာမြင့်မှာဖြစ်ပြီး ၅၀ ရာခိုင်နှုန်းသာသွင်းပါက ၁၅ မိနစ်ကြာမြင့်မယ်လို့ GAC ကုမ္ပဏီက ထုတ်ပြန် ထားပါတယ်။ သူ့မှာလိုအပ်တဲ့ လျှပ်စစ်စွမ်းအင်ကိုတော့ ထုလုံးပုံဘက်ထရီတွေကနေ ရယူတာဖြစ်ပြီး အဲဒီဘက်ထရီတွေက သိပ်သည်းဆမြင့်မားတယ်လို့ ဆိုပါတယ်။

ဒါ့အပြင် တခြားလုပ်ဆောင်ချက်တွေအနေနဲ့ 5G ကွန်ရက်ကို အသုံးပြုခြင်း၊ အသံလက်ထောက်စနစ်ပါဝင်ခြင်း၊ မွှေးရနံ့၊ အပူချိန်နဲ့ ဂီတသံတို့ကို ချိန်ညှိ နိုင်ခြင်းတို့အပြင် တခြားသော အဆင့်မြင့်လုပ်ဆောင် ချက်တွေကို ထည့်သွင်းပေးထားတယ်လို့ GAC ရဲ့ ထုတ်ပြန်ချက်ထဲမှာ‌ ဖော်ပြထားပါတယ်။

နည်းပညာသတင်း

Fulwin A9L ဆိုတာ တရုတ်နိုင်ငံ မှမော်တော်ကား ထုတ်လုပ်ရေး ကုမ္ပဏီတစ်ခုဖြစ်တဲ့ Chery က ထုတ်လုပ်ထားတဲ့ စွမ်းအင်နှစ်မျိုးသုံး ဇိမ်ခံကားတစ်စီး  ဖြစ်ပါတယ်။ ဇူလိုင်လရဲ့ အစောပိုင်းရက်တွေမှာ တရုတ်ပြည်တွင်း ရောင်းချမှုအတွက် ကြိုတင်ပြင်ဆင်နေပြီ ဖြစ်ပါတယ်။ လက်ရှိမှာတော့ ကြိုတင် အမှာစာတွေကို လက်ခံနေပါပြီ။

အရင်တုန်းကသူ့ကို Fulwin A9 လို့ သတ်မှတ်ထားခဲ့ပေမယ့် အခုတော့ ပြည်တွင်းရှိ BYD ကုမ္ပဏီရဲ့Han DM-i ကားနဲ့ Geely ရဲ့ Galaxy Starshine 8 ဆိုတဲ့ကားများနဲ့ ယှဉ်ပြိုင်နိုင်စေဖို့  အခုလိုမျိုး အဆင့်မြင့်ဇိမ်ခံ အမျိုးအစားကို ထုတ်လုပ်လာတာဖြစ်ပါတယ်။

ဟောင်ကောင်မြို့မှာကျင်းပတဲ့ အပြည်ပြည်ဆိုင်ရာ မော်တော်ကားနှင့် ဆက်စပ်ပစ္စည်းများပြပွဲမှာ ပါဝင်ပြသခဲ့တဲ့ A9L ရဲ့ ဈေးနှုန်းကိုတော့ ဒေါ်လာ ၂၀၇၀၀ ကနေ ဒေါ်လာ ၂၇၆၀၀ ကြားရှိမယ်လို့ခန့်မှန်း ထားပါတယ်။ ကားရဲ့အရွယ်အစားမှာ အလျား ၅ ဒသမ ၀၁၈ မီတာနဲ့ အနံက ၁ ဒသမ ၉၆၅ မီတာရှိကာ အမြင့်ကတော့ ၃ မီတာအထိရှိပါတယ်။

ရှေ့အင်ဂျင်အဖုံးရဲ့အောက်မှာဆိုရင် Chery ကုမ္ပဏီက ထုတ်လုပ်ထားရှိတဲ့ အဆင့်မြင့် Kunpeng Super Hybrid Electric 6.0 စနစ်ကိုတပ်ဆင်ပေးထား ပါတယ်။ ဂီယာဘောက်ကိုတော့ ခြေနင်း စရာမလိုတဲ့ DHT Pro ဂီယာကိုတွဲဖက် တပ်ဆင်ပေးထားတာပါ။

အထူးသဖြင့် သူ့ရဲ့စွမ်းဆောင်ရည်က 1.5T တာဘိုအင်ဂျင်က‌နေ အမြင့်ဆုံး စွမ်းအားအဖြစ် ကီလိုဝပ် ၁၆၀ ကိုထုတ်လုပ် ပေးပြီး  စွမ်းအင်ပမာဏ ၃၃ ဒသမ ၇ ကီလိုဝပ်နာရီရှိတဲ့ ဖော့စဖိတ် Kunpeng Blade  ဘက်ထရီနဲ့တွဲဖက်အသုံးပြုထားခြင်းဖြစ်ပါတယ်။ ဒါက စွမ်းအင်နှစ်မျိုးကို တွဲဖက်အသုံးပြုထားတဲ့ စနစ်ဖြစ်ပါတယ်။

ဒီစနစ်မှာ လျှပ်စစ်စွမ်းအင်သီးသန့်ကိုသာ အသုံးပြုမယ်ဆိုရင် မိုင်အားဖြင့် ၁၆၁ မိုင်သာ ခရီးရောက်ပေမယ့် နှစ်မျိုးပေါင်း အသုံးပြုလိုက်မယ်ဆိုပါက အကြမ်းဖျင်းအားဖြင့် မိုင်ပေါင်း ၁၂၄၃ မိုင်အထိရောက် ရှိနိုင်စေမှာဖြစ်ပါတယ်။

ဒါ့အပြင် A9L ကို အဆင့်မြင့်ဇိမ်ခံကား တစ်စီးအဖြစ်ဖန်တီးထားခြင်း ဖြစ်တာနဲ့အညီ သတင်းပေးဖျော်ဖြေရေးစနစ်မှာဆိုရင်လည်း Qualcomm ကုမ္ပဏီထုတ်လုပ်ထားတဲ့ Snapdragon 8255 ချစ်ဆက်ကို အသုံးပြုထားပါတယ်။

ဒါ့အပြင် ယာဉ်မောင်းအထောက်အကူပြုစနစ်နဲ့ အလိုအလျောက်မောင်းနှင်နိုင်မယ့်စနစ်များအတွက် LiDAR စနစ် အပါအဝင် အဆင့်မြင့်အာရုံခံကိရိယာပေါင်း ၂၇ ခု၊ မီလီမီတာလှိုင်းနှုန်း ထုတ်လွှင့်ပေးသည့် ရေဒါများ၊ ပတ်ပတ်လည်အမြင်နှင့် မြင်ကွင်းကျယ်ကင်မရာများအပြင် အသံနှုန်းလွန် အာရုံခံကိရိယာများကို Orin Y 200T ဆိုတဲ့တွက်ချက်မှု စနစ်နဲ့တွဲဖက်ပြီး အသုံးပြုပေးထားပါတယ်။

ဒီလိုမျိုး အာရုံခံကိရိယာတွေနဲ့ တွက်ချက်မှုစနစ်တွေကြောင့် A9L ဟာ ပါကင်ထိုးခြင်းကိုမှတ်သားသည့် စွမ်းရည်၊ အမြန် လမ်းနဲ့မြို့တွင်းလမ်းတွေမှာ လမ်းညွှန် အော်တိုမောင်းစနစ်၊ အတားအဆီးများကို အသိဉာဏ်ရှိစွာ ကျော်လွှားနိုင်သည့်စွမ်းဆောင်ရည်၊ မျက်ကွယ်သတိပေးစနစ်နဲ့ လမ်းကျော်သတိပေး စနစ်တို့က ပိုမိုအလုပ် ဖြစ်လာစေပါတယ်။

ဒီကားတွေကို တရုတ်ပြည်တွင်းမှာ လာမယ့်လကစပြီး ရောင်းချသွားမှာဖြစ်ပေမယ့် ကမ္ဘာတစ်ဝန်းသို့ တင်ပို့ရောင်းချမှုကိုတော့ လာမယ့်နှစ် ပထမသုံးလပတ် အတွင်းလုပ်ဆောင် သွားမယ်လို့ Chery ကုမ္ပဏီမှ ဥက္ကဋ္ဌ ယင်တောင်ယွီကပြောပါတယ်။

ဒါ့အပြင် Chery ကုမ္ပဏီဟာ မကြာခင် မှာ ကမ္ဘာတစ်ဝန်းဆီ မော်တော်ကားအစီး ရေပေါင်း ၅ သန်းအထိ တင်ပို့ရောင်းချထား နိုင်တဲ့ တရုတ်နိုင်ငံရဲ့ ပထမဆုံး ကုမ္ပဏီဖြစ်လာမှာဖြစ်ပါတယ်။

နည်းပညာသတင်း

နေပြည်တော် ဇွန် ၁၆

မြန်မာနိုင်ငံတွင် လှုပ်ခတ်ခဲ့သော မန္တလေးငလျင်ကြီးကြောင့် ထိခိုက်ပျက်စီးခဲ့ရသည့် နေရာများ၌ ကူညီကယ်ဆယ်ရေးနှင့်ပြန်လည်ထူထောင်ရေးလုပ်ငန်းများကို အဖွဲ့အစည်းအသီးသီးက ဒေသခံပြည်သူများနှင့် ပူးပေါင်း၍ အင်တိုက်အားတိုက် ကူညီဆောင်ရွက်ပေးလျက်ရှိသည်။

ထိုသို့ ဆောင်ရွက်ပေးလျက်ရှိရာ ယနေ့တွင် ကာကွယ်ရေးဦးစီးချုပ်ရုံး (ကြည်း) မှ ဒုတိယဗိုလ်ချုပ်ကြီး သက်ပုံနှင့် တာဝန်ရှိသူများသည် စစ်ကိုင်းမြို့အတွင်းရှိ ရာဇမဏိစူဠာကောင်းမှုတော်စေတီ၊ ဆွမ်းဦးပုညရှင်စေတီနှင့် မဟာစေတီတို့တွင် ငလျင်ပြီးနောက် သာသနိကအဆောက်အအုံများအား ဘက်စုံပြန်လည်ပြုပြင်ရေးအခြေအနေများ၊ သကျဓီတာသီလရှင်စာသင်တိုက်နှင့် ရွှေစေတီပရိယတ္တိစာသင်တိုက်ရှိ ငလျင်ဒဏ်ကြောင့် ပြိုကျပျက်စီးခဲ့သော သာသနိကအဆောက်အအုံများကို လုံခြုံရေးတပ်ဖွဲ့ဝင်များနှင့် စက်ယန္တရားကြီးများ အသုံးပြု၍ အရှိန်အဟုန်မြှင့်ဖယ်ရှားရှင်းလင်းနေမှုများ၊ အဆောက်အအုံအပြိုအပျက်ကြားမှ ဆယ်တင်ရရှိသည့် ရိက္ခာဆန်များကို အမိုးအကာအောက်ရောက်ရှိအောင် ရွှေ့ပြောင်းနေမှုအား ကြည့်ရှုအားပေးပြီး လိုအပ်သည်များကို တာဝန်ရှိသူများနှင့် ပေါင်းစပ်ညှိနှိုင်းဆောင်ရွက်ပေးသည်။ ထို့နောက် စစ်ကိုင်းမြို့အတွင်းရှိ ငလျင်ဘေးဒဏ်သင့် လူနေအဆောက်အအုံများအား လူအင်အားနှင့် စက်ယန္တရားကြီးများ အသုံးပြု၍ အရှိန်အဟုန်မြှင့်ဖယ်ရှားရှင်းလင်းနေမှုတို့ကို လိုက်လံကြည့်ရှုအားပေးသည်။

ဆက်လက်ပြီး စစ်ကိုင်းမြို့အတွင်း ငလျင်ဘေးဒဏ်သင့်သံဃာတော်များ၊ သီလရှင်များနှင့် လူပုဂ္ဂိုလ်များကို တပ်မတော်နယ်လှည့်ဆေးကုသရေးအဖွဲ့က ကျန်းမာရေးစောင့်ရှောက်ပေးနေမှု အခြေအနေများနှင့် တပ်မတော်ရေသန့်စက်ယာဉ်ဖြင့် ဧရာဝတီမြစ်ရေကို သန့်စင်၍ သန့်ရှင်းသော သောက်သုံးရေများ ပေးဝေနိုင်ရေးနှင့် ပြည်သူများ သောက်သုံးရေ ပြည့်ပြည့်ဝဝ ဖြန့်ဝေနိုင်ရေးတို့ကို ကြည့်ရှုစစ်ဆေးပြီး လိုအပ်သည်များ ညှိနှိုင်းဆောင်ရွက်ပေးသည်။

အလားတူ ကာကွယ်ရေးဦးစီးချုပ်ရုံး (ကြည်း) မှ ဒုတိယဗိုလ်ချုပ်ကြီး မျိုးမိုးအောင်၊ အလယ်ပိုင်းတိုင်းစစ်ဌာနချုပ် တိုင်းမှူး ဗိုလ်မှူးချုပ် ကျော်ကိုထိုက်တို့သည် တာဝန်ရှိသူများနှင့်အတူ ယနေ့တွင် မန္တလေးမြို့ နန်းမြို့အတွင်းရှိ နန်းမြို့ဆုတောင်းပြည့် ဘုရားသို့ သွားရောက်၍ ငလျင်ဒဏ်ကြောင့် ထိခိုက်ပျက်စီးခဲ့သည့် နန်းမြို့ဆုတောင်းပြည့်စေတီတော်မြတ်ကြီး၊ ဂန္ဓကုဋိတိုက်၊ အာရုံခံတန်ဆောင်းနေရာများ၌ ရှေးမူမပျက်ပြန်လည်တည်ဆောက်ရေးလုပ်ငန်းများ ဆောင်ရွက်နေမှုအခြေအနေများ၊ အောင်မြေသာစံမြို့နယ် မန္တလေးတောင်တော် ဆုတောင်းပြည့်စေတီတော်တွင် ရင်ပြင်တော် ပြန်လည်ပြုပြင်တည်ဆောက်နေမှုများကိုလည်းကောင်း၊ ဂန္ဓကုဋိတိုက်ရှိ အမိုး၊ တိုင်၊ ခုံးနေရာများအား ရှေးမူမပျက်ပြုပြင်ဆောင်ရွက်နေမှု အခြေအနေများကိုလည်းကောင်း၊ ဓာတ်လှေကားနှင့် စက်လှေကားများကို အမြန်ဆုံးပြန်လည်ပြုပြင်အသုံးပြုနိုင်ရေး ဆောင်ရွက်နေမှုအခြေအနေများအားလည်းကောင်း၊ မြွေကြီးနှစ်ကောင်ဘုရားရှိ ငလျင်ဒဏ်ကြောင့် ပြိုကျပျက်စီးခဲ့သော မြေသားထိန်းနံရံအား ပြန်လည်ပြုပြင်ဆောင်ရွက်နေမှု အခြေအနေများကိုလည်းကောင်း၊ တောင်ဘက်စောင်းတန်းရှိ ရှင်အရဟံသိမ်ဘုရား၊ စန္ဒာမုခိဆုတောင်းပြည့်ဘုရားများအား ရှေးမူမပျက်ပြန်လည်ပြုပြင်နေမှု အခြေအနေများကိုလည်းကောင်း လိုက်လံကြည့်ရှုစစ်ဆေး၍ တာဝန်ရှိသူများ၏ တင်ပြချက်များအပေါ် လိုအပ်သည်များ ပေါင်းစပ်ညှိနှိုင်းဆောင်ရွက်ပေးသည်။

ထို့နောက် အောင်မြေသာစံမြို့နယ်ရှိ Sky Villa နေရာသို့သွားရောက်၍ ငလျင်ဒဏ်ကြောင့် ထိခိုက်ပျက်စီးခဲ့သည့် ရှင်းလင်းရန်ကျန် (A) ဆောင်အား စက်ယန္တရားကြီးများအသုံးပြု၍ အပျက်အစီးများ ဖယ်ရှားရှင်းလင်းနေမှုအခြေအနေများအားလည်းကောင်း၊ လုပ်ငန်းခွင်အနီးရှိ ပစ္စည်းလက်ခံ/ထုတ်ပေးရေးအဖွဲ့ ယာယီရုံးတွင် ရှာဖွေတွေ့ရှိသော ပစ္စည်းများအား စနစ်တကျထိန်းသိမ်းထားရှိမှုနှင့် သက်ဆိုင်ရာပိုင်ရှင်အသီးသီးထံ စနစ်တကျလွှဲပြောင်း ပေးနိုင်မှုအခြေအနေများအား ကြည့်ရှုစစ်ဆေးပြီး တာဝန်ရှိသူများ၏ တင်ပြချက်များအပေါ် လိုအပ်သည်များ ပေါင်းစပ်ညှိနှိုင်းဆောင်ရွက်ပေးသည်။

ငလျင်ဒဏ်ကြောင့် ပြိုကျပျက်စီးခဲ့သည့် Sky Villa တွင် ၂၀၂၅ ခုနှစ် မတ် ၃၀ ရက်မှစ၍ ယနေ့အထိ အပျက်အစီးများ ဖယ်ရှားရှင်းလင်းစဉ်ရှာဖွေတွေ့ရှိရသော ငွေစက္ကူကျပ် ၉၁၆၇၄၄၇၀၀ (ကိုးထောင်တစ်ရာခြောက်ဆယ် ခုနစ်သိန်းလေးသောင်းလေးထောင်ခုနစ်ရာ)၊ ရွှေသားအလေး ချိန် ၄ ပိဿာ ၁ ကျပ်သား၊ ရွှေထည်ပစ္စည်းနှင့် အခြားလက်ဝတ်ရတနာများအား ပိုင်ရှင်များထံ စနစ်တကျလွှဲပြောင်းပေးအပ်ခဲ့ပြီးဖြစ်ကြောင်း သိရသည်။

ထို့အတူ ကာကွယ်ရေးဦးစီးချုပ်ရုံး (ကြည်း) မှ ဒုတိယဗိုလ်ချုပ်ကြီး စိုးတင့်နိုင်နှင့် တာဝန်ရှိသူများသည် မန္တလေးမြို့ ချမ်းမြသာစည်မြို့နယ် ကျွန်းလုံးဥသျှောင်ရပ်ကွက်ရှိ ဒက္ခိဏာရာမဘုရားကြီးကျောင်း တိုက်သို့ရောက်ရှိပြီး ကျောင်းတိုက်အတွင်း ငလျင်ဒဏ်ကြောင့် ပြိုကျပျက်စီးခဲ့သော တမ္ပဝတီကျောင်းတိုက်၊ အောင်မြေကျောင်း၊ ပိဋကတ်တိုက်နှင့် အသောကာရာမကျောင်းတိုက်အတွင်းရှိ ကျီးသဲရွှေတောင်ကျောင်းနှင့် ကြာငါးခိုင်ရတနာကျောင်းများတွင် တပ်မတော်သားစစ်သည်များက အပျက်အစီးများအား အင်တိုက်အားတိုက် ဖယ်ရှားရှင်းလင်းနေမှုအခြေအနေများကို ကြည့်ရှုအားပေးပြီး တာဝန်ရှိ သူများ၏ တင်ပြချက်များအပေါ် လိုအပ်သည်များ ပေါင်းစပ်ညှိနှိုင်းဆောင်ရွက်ပေးခဲ့ကြောင်း သတင်းရရှိသည်။

MOI

၂၀၂၅ ခုနှစ်၊ ဇွန်လ ၁၆ ရက်နေ့၊ မြန်မာစံတော်ချိန် ၁၈:၀၀ နာရီအချိန် ထုတ်ပြန်ချက်

ယနေ့မြန်မာစံတော်ချိန် ၁၆:၃၀ နာရီအချိန် တိုင်းထွာချက်များအရ ကပ္ပလီပင်လယ်ပြင်နှင့် ဘင်္ဂလားပင်လယ်အော်တို့တွင် မုတ်သုံ‌လေအားကောင်းရာမှ အားအလွန်ကောင်းနေခြင်းကြောင့် လည်းကောင်း၊ အရှေ့ဘက်မှရွေ့လျားလာသော လေပွေလှိုင်းများ၏ အရှိန်ကြောင့်လည်းကောင်း၊ အနောက်ဘက်မှရွေ့လျားလာသော လေပွေလှိုင်းများ၏ အရှိန်ကြောင့်လည်းကောင်း ယနေ့ညနေမှ ၂၂-၆-၂၀၂၅ ရက်နေ့အတွင်း နေပြည်တော်၊ ရန်ကုန်တိုင်းဒေသကြီး၊ မန္တလေးတိုင်းဒေသကြီး၊ ပဲခူးတိုင်းဒေသကြီး၊ မကွေးတိုင်းဒေသကြီး၊ စစ်ကိုင်းတိုင်းဒေသကြီး၊ ဧရာဝတီတိုင်းဒေသကြီး၊ တနင်္သာရီတိုင်းဒေသကြီး၊ ကချင်ပြည်နယ်၊ ကယားပြည်နယ်၊ ကရင်ပြည်နယ်၊ ချင်းပြည်နယ်၊ မွန်ပြည်နယ်၊ ရခိုင်ပြည်နယ်နှင့် ရှမ်းပြည်နယ်တို့တွင် နေရာစိပ်စိပ်မှ နေရာအနှံ့အပြား မိုးထစ်ချုန်းရွာပြီး၊ အချို့ဒေသများတွင် ဒေသအလိုက်နှင့် နေရာကွက်၍ မိုးကြီးမည်။ မြန်မာ့ကမ်းရိုးတန်းတစ်လျှောက်နှင့် ကမ်းလွန်ပင်လယ်ပြင်တို့တွင် ရံဖန်ရံခါ မိုးသက်လေပြင်းများကျရောက်ပြီး လှိုင်းကြီးမည်။ မိုးသက်လေပြင်း ကျစဉ် ရေပြင်/မြေပြင်လေသည် တစ်နာရီလျှင် ၃၅ မိုင်အထိ တိုက်ခတ်နိုင်ပါသည်။ လှိုင်းအမြင့်မှာ မြန်မာ့ကမ်းရိုးတန်းတစ်လျှောက်နှင့် ကမ်းလွန် ပင်လယ်ပြင်တို့တွင် ၁၀ ပေမှ ၁၂ ပေခန့် ရှိနိုင်ပါသည်။

အကြုံပြုချက်

 သို့ဖြစ်ပါ၍ မိုးသည်းထန်စွာရွာသွန်းခြင်းနှင့်အတူ လေပြင်းတိုက်ခတ်ခြင်း၊ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်း၊ မိုးသီးကြွေခြင်း၊ လျှပ်တစ်ပြက်ရေကြီးခြင်းနှင့် မြေပြိုခြင်းစသည့် သဘာဝဘေးအန္တရာယ်များ ဖြစ်ပေါ်နိုင်ပါသဖြင့် အဆိုပါဒေသများရှိ ကုန်းမြင့်ဒေသအနီးတွင် နေထိုင် ကြသူများအနေဖြင့် မြေပြိုမှုအန္တရာယ်၊ မြစ်ငယ်၊ ချောင်းငယ်များအနီးတွင် နေထိုင်ကြသူများအနေဖြင့် ရေကြီး၊ ရေလျှံမှုများကို ကြိုတင်သတိပြုရှောင်ရှားနိုင်ပါရန်နှင့် ပြည်တွင်းရေကြောင်းသွားလာရေး၊ လေကြောင်းပျံသန်းရေးနှင့် ဆည်မြောင်းတာတမံများအနေဖြင့် လိုအပ်သည်များ ကြိုတင်ပြင်ဆင် ဆောင်ရွက်ထားနိုင်ပါရန် သတိပေးနှိုးဆော်အပ်ပါသည်။

မိုးဇလ