ဂါဇာကမ်းမြောင်ဒေသရှိ ကလေးသူငယ်များအတွက် ယာယီစာသင်ကျောင်းများ ပြန်လည်ဖွင့်လှစ်သင်ကြားနေပြီ ဖြစ်သော်လည်း ကလေးများအနေဖြင့် စိတ်ဒဏ်ရာများခံစားနေရကာ အစ္စရေးနှင့် ဟားမက်တို့အကြား ယာယီ အပစ်အခတ်ရပ်စဲရေးကို “ဆက်လက်ဖော်ဆောင်နိုင်ပါ့မလား” ဆိုသည့်အပေါ် စိုးရိမ်စိတ်များ ရှိနေကြကြောင်း UNICEF က ပြောကြားခဲ့ပါသည်။

UNICEF ၏ ခန့်မှန်းချက်အရ ဂါဇာဒေသရှိ စာသင်ကျောင်းများ၏ ၉၀ ရာခိုင်နှုန်း ကျော်သည် အစ္စရေး၏ တိုက်ခိုက်မှုကြောင့် ပျက်စီးခဲ့ရကြောင်း၊ ကျန်ရှိသည့်စာသင်ကျောင်းအနည်းငယ်မှာလည်း ကယ်ဆယ်ရေးစခန်းများ အဖြစ် အသုံးပြုလျက်ရှိကြောင်း သိရှိရပါသည်။

UNICEF အနေဖြင့် ဂါဇာကမ်းမြောင်ဒေသရှိ ကလေးသူငယ်များ ပညာပြန်လည်သင်ကြားနိုင်ရေးအတွက် ယာယီစာသင်ကျောင်းများကို တည်ဆောက်ပေးလျက်ရှိပြီး စာသင်ကျောင်းအများစုမှာ ရွက်ဖျင်တဲများဖြင့် တည်ဆောက်ထားကြောင်း၊ ကလေးသူငယ်များအနေဖြင့် အာရေဗျဘာသာ၊ အင်္ဂလိပ်ဘာသာ၊ သင်္ချာဘာသာနှင့် အခြားသော ဘာသာရပ်များကိုလည်း သင်ယူနိုင်ကြောင်း၊ စာရေးကိရိယာ၊ ကျောင်းလွယ်အိတ်နှင့် အစာအာဟာရတို့ကို ထောက်ပံ့ပေးထားကြောင်း UNICEF က ပြောကြားခဲ့ပါသည်။

ဂါဇာကမ်းမြောင်ဒေသရှိ ကလေးသူငယ်များသည် ၎င်းတို့၏ ပျော်ရွှင်စရာကလေးဘဝ လွတ်လပ်မှုများဆုံးရှုံး နေကြရကြောင်းနှင့် စာသင်ကျောင်းများသည် ၎င်းတို့အတွက် ခေတ္တစိတ်အေးချမ်းသာမှုရစေသည့် နေရာတစ်ခု ဖြစ်ကြောင်း၊ ကလေးသူငယ်အများစုသည် ပြင်းထန်သည့်စစ်ပွဲများကြောင့် ကြီးစွားသော စိတ်ဒဏ်ရာများရရှိခံစားနေကြရကြောင်း၊ အချို့သောကလေးသူငယ်များသည် ဒရုန်းသံကြားသည့်အခါမျိုးတွင် စကားလုံးဝမပြောဘဲ တိတ်ဆိတ်နေတတ်ကြပြီး အချို့မှာကြောက်လန့်တုန်လှုပ်ပြီး အော်ဟစ်ကြကြောင်း UNICEF တာဝန်ရှိသူတစ်ဦးက မှတ်ချက်ပြုပြောကြားခဲ့ပါသည်။

ဂါဇာဒေသ၌ သူမကိုမြင်သည့်အခါ ကလေးငယ်များသည် သူမထံသို့ ပြေးလာကြကြောင်း၊ သူမ၏ လက်ကိုဆွဲကာ “တိုက်ပွဲတွေပြန်ဖြစ်အုံးမလား၊ အကူအညီအထောက်ပံတွေ ဘာလို့ထပ်မလာတော့တာလဲ” ဟု မေးကြကြောင်း၊ အကူအညီအထောက်အပံ့များ လုံးဝရပ်တန့်သွားခြင်း သို့မဟုတ် အပစ်အခတ်ရပ်စဲရေး သဘောတူညီချက်ပျက်ပြယ်သွားခြင်းတို့ဖြစ်လာမည်ကို ဂါဇာဒေသရှိပြည်သူများအနေဖြင့် လွန်စွာစိုးရိမ်ပူပန်နေကြကြောင်း သူမက ထပ်လောင်း ပြောကြားခဲ့ပါသည်။

ကိုးကား-NHK World

အလွတ်သဘောဘာသာပြန်ဆိုသူ-ဦးထက်ထက်အောင် (နစက-၄)

ဝါရှင်တန်  မတ် ၆

အမေရိကန်နိုင်ငံ အခြေစိုက် Colossal Biosciences ကုမ္ပဏီသည် အမွေးထူဆင်ကြီးများ၏ မျိုးရိုးဗီဇ အခြေခံမော်လီကျူး (DNA) များကိုအသုံးပြု၍ ကမ္ဘာ့ပထမဆုံး အမွေးထူကြွက်များကို ဖန်တီးနိုင်ခဲ့ကြောင်း မတ် ၅ ရက် သတင်းများအရ သိရသည်။

ကမ္ဘာ့ပထမဆုံး အမွေးထူကြွက်များကို ဇီဝအင်ဂျင်နီယာနည်းပညာဖြင့် ဖန်တီးနိုင်ခဲ့မှုသည် မျိုးသုဉ်းပျောက်ကွယ်သွားပြီဖြစ်သော ရှေးသက်ရှိသတ္တဝါများကို ပြန်လည်ဖန်တီးရေးအတွက် လမ်းဖွင့်ပေးနိုင်ကြောင်း Colossal Biosciences ကုမ္ပဏီတာဝန်ရှိသူများက ပြောကြားသည်။

Colossal Biosciences သိပ္ပံပညာရှင်များသည် အမွေးထူဆင်ကြီးများ၏ DNA ကိုအသုံးပြု၍ ကြွက်များ၏ အဓိက DNA ရှစ်မျိုးကို မျိုးဗီဇအင်ဂျင်နီယာနည်းပညာဖြင့် ပြောင်းလဲပေးကာ အမွေးထူကြွက်များကို ဖန်တီးနိုင်ခဲ့သည်။

Colossal Biosciences ကုမ္ပဏီသည် ကမ္ဘာပေါ်မှပျောက်ကွယ်သွားပြီဖြစ်သော အမွေးထူဆင်ကြီးများကို ပြန်လည်ဖန်တီးရေးအတွက် ကြိုးပမ်းနေသော ဇီဝနည်းပညာကုမ္ပဏီဖြစ်သည်။

အမွေးထူကြွက်များအား ဖန်တီးခဲ့သော မျိုးဗီဇအင်ဂျင်နီယာနည်းပညာကို အမွေးထူဆင်ကြီးများ ပြန်လည်ဖန်တီးရေးအတွက် အသုံးချနိုင်ကြောင်း၊ အမွေးထူဆင်ကြီးများကို ၂၀၂၈ ခုနှစ် နှစ်ကုန်ပိုင်းတွင် ဖန်တီးနိုင်ရန် မျှော်လင့်ထားကြောင်း ကုမ္ပဏီသိပ္ပံပညာရှင်များက ပြောကြားသည်။

Source: ရတနာပုံသတင်းစာ

၂၀၂၅ ခုနှစ်၊ မတ် ၄ ရက် နံနက် ၁၀ နာရီတွင် မန္တလေးတိုင်းဒေသကြီး၊ မိတ္ထီလာခရိုင်၊ သာစည်မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ၊ မြို့နယ်အုပ်ချုပ်ရေးမှူး ဦးမျိုးသက်ကျော်သည် မြို့နယ်စီမံအုပ်ချုပ်ရေးအဖွဲ့ အဖွဲ့ဝင်များ၊ မြို့နယ်အမျိုးသမီးရေးရာအဖွဲ့ဥက္ကဋ္ဌနှင့် အဖွဲ့ဝင်များ၊ မြို့နယ်ပြည်သူ့ ကျန်းမာရေးဦးစီးဌာနမှ တာဝန်ရှိသူများနှင့်အတူ မြို့နယ်စည်ပင်သာယာခန်းမ၌ အသက် နှစ်လမှ ငါးနှစ်အရွယ် ကလေးငယ်များအား ပိုလီယိုရောဂါကာကွယ်ဆေး(အစက်ချဆေး) အရှိန်အဟုန်မြှင့် တိုက်ကျွေးနေမှုအခြေအနေအား ကြည့်ရှုစစ်ဆေးခဲ့ကြောင်း သတင်းရရှိပါသည်။

Source: www.moha.gov.mm

နယူးယောက်  မတ် ၅

မျိုးဗီဇစမ်းသပ်မှု ပုံစံသစ်တစ်ရပ်သည် ဦးနှောက်ကင်ဆာရောဂါလူနာများ၏ ကင်ဆာ ဆဲလ်များကို ခွဲစိတ်ဖယ်ရှားရာတွင် များစွာ အထောက်အကူပေးနိုင်ကြောင်း မတ် ၄ သတင်း များတွင် ရေးသားဖော်ပြထားသည်။ 

အဆိုပါ မျိုးဗီဇစမ်းသပ်မှုနည်းသည် တစ်ရှူးနမူနာတစ်ခုအတွင်းရှိ ကင်ဆာဆဲလ်များပါဝင်မှု အဆင့်ကို ၁၅ မိနစ်အတွင်း တိုင်းတာဖော်ထုတ်ပေးနိုင်ကြောင်း နယူးယောက်တက္ကသိုလ်မှ သုတေသနပညာရှင်များက ပြောကြားသည်။

အမေရိကန်သုတေသနပညာရှင်များ၏ မျိုးဗီဇစစ်ဆေးနည်းသည် တစ်ရှူးနမူနာ တစ်စတုရန်း မီလီမီတာတွင် အနည်းဆုံးကင်ဆာဆဲလ်ငါးခုထိ ရှာဖွေဖော်ထုတ်ပေးနိုင်ကြောင်း သိရသည်။

မိမိတို့၏ မျိုးဗီဇစစ်ဆေးနည်းသည် ဦးနှောက်ခွဲစိတ်မှုပြုလုပ်နေချိန်တွင် အချိန်နှင့်တစ်ပြေးညီ ကင်ဆာဆဲလ်များကို ထောက်လှမ်းဖော်ထုတ်ပေးနိုင်ကြောင်း သိရသည်။

ကင်ဆာခွဲစိတ်မှု အောင်မြင်ရေး၊ ကင်ဆာဆဲလ်များ တစ်ကျော့ပြန်လည်ပေါ်ထွက်မှုကို တားဆီးရေးတို့မှာ ကင်ဆာဆဲလ်များကို မည်မျှ ဖယ်ရှားပေးနိုင်သည်ဟူသော အချက်ပေါ် မူတည်ကြောင်း၊ ၎င်းတို့၏ မျိုးဗီဇစစ်ဆေးမှုပုံစံသစ်ကို Ultra-Rapid droplet digital PCR ဟူ၍ အမေရိကန်သုတေသနပညာရှင်များက အမည်ပေးထားကြောင်း သိရသည်။

Source: ရတနာပုံသတင်းစာ

စစ်ကိုင်းတိုင်းဒေသကြီး၊ ကန့်ဘလူမြို့နယ်၊ ပြည်သူ့ကျန်းမာရေးဦးစီးဌာန မိခင်နှင့်ကလေးကျန်းမာရေးဌာန၌ ကိုယ်ဝန်ဆောင်မိခင်များအား ကျန်းမာရေးစောင့်ရှောက်မှု လုပ်ငန်းများကို မတ်လ ၄ ရက် နံနက်ပိုင်းတွင် ဆောင်ရွက်ပေးလျက် ရှိကြောင်း သိရသည်။

ထိုသို့ဆောင်ရွက်ပေးရာတွင် ကျန်းမာရေးဝန်ထမ်းများက ကိုယ်ဝန်ဆောင်မိခင်များကို ကိုယ်အလေးချိန် ချိန်ခြင်း၊ သွေးပေါင်ချိန်တိုင်းတာခြင်း၊ သန္ဓေသားအနေအထား မှန်ကန်စေရေးပြုပြင်ပေးခြင်း၊ သွေးဖောက်စစ်ဆေးခြင်း၊ မတည့်သည့်ဆေးရှိ၊ မရှိနှင့် အခြားရောဂါရှိ၊ မရှိတို့ကို မေးမြန်းစစ်ဆေးပြီး ထုံနာကျဉ်နာ ပျောက်ဆေး၊ ဖောလစ်အက်စစ်၊ သံဓာတ်အားဆေးတို့ကို အခမဲ့ပေးအပ်သည်။ ထို့နောက် ကိုယ်ဝန်ဆောင်မိခင်များ ကျန်းမာရေး စောင့်ရှောက်မှုလုပ်ငန်းများကို လစဉ် ဆောင်ရွက်ပေးလျက်ရှိကြောင်းသိရသည်။

အောင်ဝင်းငြိမ်း(ကန့်ဘလူ)

Source: Myawady Daily Newspaper

စတော့ဟုမ်း  မတ် ၄

ပန်းဂေါ်ဖီစိမ်းနှင့် ဂေါ်ဖီတို့တွင် ပါဝင်သည့် ဓာတုဒြပ်ပေါင်းတစ်မျိုးသည် သွေးအတွင်း သကြားဓာတ်ပါဝင်မှုအဆင့်ကို လျှော့ချပေးနိုင်ကြောင်း သုတေသန ပညာရှင်များ၏ အဆိုကို ကိုးကား၍ မတ် ၃ ရက်သတင်းများအရ သိရသည်။

ဆွီဒင်နိုင်ငံ ဂူတင်ဘာ့ဘ်တက္ကသိုလ်မှ သုတေသနပညာရှင်များသည် သွေးအတွင်း သကြားဓာတ်ပါဝင်မှု ပုံမှန်ထက်မြင့်မားသူများကို Sulforaphane ခေါ် ဓာတုဒြပ်ပေါင်းတစ်မျိုးဖြင့် လက်တွေ့စမ်းသပ်မှုများ ပြုလုပ်ခဲ့သည်။

စမ်းသပ်မှုမှ ပေါ်ထွက်လာသည့် ရလဒ်များအရ Sulforaphane ‌ဓာတုဒြပ်ပေါင်းသည် သွေးအတွင်း သကြားဓာတ်ပါဝင်မှုအဆင့်ကို သိသိသာသာ လျှော့ချနိုင်သည်ကို တွေ့ရကြောင်း သုတေသနပညာရှင်များက ပြောကြားသည်။

Sulforaphane ဓာတုဒြပ်ပေါင်းသည် ဂေါ်ဖီ၊ ပန်းဂေါ်ဖီစိမ်းစသည့် အသီးအရွက်များ၌ တွေ့ရသော ဓာတုဒြပ်ပေါင်း ဖြစ်သည်။

အဆိုပါ ဓာတုဒြပ်ပေါင်းသည် ဆီးချိုရောဂါ မဖြစ်သေးသော်လည်း သွေးအတွင်း သကြားဓာတ်ပါဝင်မှုအဆင့် မြင့်တက်နေသူများအတွက် ကုထုံးတစ်မျိုးဖြစ်လာနိုင်ကြောင်း သုတေသနပညာရှင်များက ပြောကြားသည်။

Source: ရတနာပုံသတင်းစာ

၂၀၂၅ ခုနှစ်၊ ဂျပန်နိုင်ငံ၏ အကြီးဆုံးသော တိုကျိုမာရသွန်အပြေးပြိုင်ပွဲတွင် အားကစား သမားပေါင်း ၃၈,၀၀၀ ခန့် ပါဝင်ယှဉ်ပြိုင်ခဲ့သည်။

၎င်းအပြေးပြိုင်ပွဲကို ကံစမ်းမဲပေါက်သည့်သူများသာ မတ်လ ၂ ရက်နေ့တွင်ကျင်းပခဲ့သည့် ပြိုင်ပွဲတွင် ပါဝင် ယှဉ်ပြိုင်ခွင့်ရခြင်းဖြစ်သည်။ ဒေသတွင်းနှင့် နိုင်ငံတကာမှ လက်ရွေးစင်အပြေးသမားများကိုလည်း ဖိတ်ကြားခဲ့ပြီး အဆိုပါပြိုင်ပွဲကို တိုကျိုမြို့တော်၊ Shinjuku အဆောက်အအုံ၌ နံနက် ၉ နာရီခန့်တွင် စတင်ခဲ့သည်။

Saitama ခရိုင်မှ အသက် (၅၀) အရွယ် အမျိုးသားတစ်ဦးက “၎င်းအနေဖြင့် နိုင်ငံအတွင်းရှိ ပြေးပွဲများတွင် ပါဝင်ယှဉ်ပြိုင်ခဲ့ဖူးသော်လည်း တိုကျိုမာရသွန်အပြေးပြိုင်ပွဲကို ကံစမ်းမဲပေါက်၍ ပထမဆုံးပါဝင်ခွင့်ရခြင်း ဖြစ်ကြောင်း နှင့် ၎င်း၏ ရည်မှန်းချက်မှာ လမ်းတစ်လျှောက်ရှိ ပရိတ်သတ် များ၏ အားပေးမှုကိုခံယူ၍ ထိခိုက်မှု တစ်စုံတစ်ရာ မရှိဘဲ ပြိုင်ပွဲကို ပြီးဆုံးအောင်မြင်ရန်ဖြစ်ကြောင်း” ပြောကြားခဲ့သည်။

Osaka မှ အသက် (၄၀) အရွယ် အမျိုးသမီးတစ်ဦးက အဆိုပါပြိုင်ပွဲ၏ ဆွဲဆောင်မှုမှာ တိုကျိုမြို့လယ်ရှိ လူသိ ထင်ရှားသော နေရာများကို ဖြတ်သန်းယှဉ်ပြိုင်ခြင်းဖြစ်ကြောင်းနှင့် ၎င်းသည် Seneo-Ji ဘုရားကျောင်းနှင့် ToKyo Skytree တို့ကို တွေ့မြင်နိုင်ရန် မျှော်လင့်နေကြောင်း ပြောကြားခဲ့သည်။

မာရသွန်ပြေးပွဲလမ်းကြောင်းသည် Asakusa၊ Ginza နှင့် တိုကျိုမြို့ရှိ အခြားထင်ရှားသောနေရာများသို့ ဖြတ်သန်းသွားပြီး တိုကျိုဘူတာရုံတွင် ပန်းဝင်မည်ဖြစ်ပါသည်။ လမ်းကြောင်းတစ်လျှောက်တွင် ပရိတ်သတ်များက ပြိုင်ပွဲဝင် အားကစားသမားများကို အားပေးခဲ့ကြပြီး ပြိုင်ပွဲဝင် အားကစားသမားများကလည်း လက်များဝှေ့ယမ်းကာ အပြန် အလှန် အားပေးခဲ့ကြသည်။

ပြိုင်ပွဲဝင်အားကစားသမားများသည် ပန်းဝင်ချိန်တွင် ပြုံးပျော်နေကြသည်။ Kanagawa ခရိုင်မှ အသက် (၅၀) အရွယ် အမျိုးသမီးတစ်ဦးက “နေပူသည်ဟုအနည်းငယ်ခံစားရသော်လည်း ပရိတ်သတ်များက သူမကို အားပေးခဲ့ကြ သဖြင့် ပြိုင်ပွဲကိုပျော်ရွှင်စွာပါဝင်ခဲ့ကြောင်း” ပြောကြားခဲ့သည်။

တိုကျိုမြို့မှ အသက်(၆၀)အရွယ်အမျိုးသားတစ်ဦးက “၎င်းသည် အသက် (၇၀)၊ (၈၀)အရွယ်ထိပြေးနိုင်ရန် စိတ်ပိုင်း ဖြတ်ထားကြောင်း” ပြောကြားခဲ့သည်။ မာရသွန်ပြေးပွဲလမ်းကြောင်းတစ်လျှောက် အချို့နေရာများတွင် ယာဉ်ကြော ပိတ်ဆို့မှု များရှိခဲ့သည်။ အချို့သောလမ်းများကို ည ၉ နာရီအချိန်ထိ ယာဉ်ကြောပိတ်ထားခဲ့ရသည်။

ကိုးကား- NHK

အရွယ်ရောက်ပြီးသူအားလုံး၏ ၆၀ ရာခိုင်နှုန်းနီးပါးနှင့် ကမ္ဘာပေါ်ရှိ ကလေးအားလုံး၏ သုံးပုံတစ်ပုံသည် ၂၀၅၀ ပြည့်နှစ်တွင် အဝလွန်ခြင်းနှင့် ကြုံတွေ့ရနိုင်ကြောင်း လေ့လာမှုအသစ် တစ်ခုက ဆိုသည်။

မတ် ၄ ရက်(အင်္ဂါ)နေ့က Lancet ဆေးပညာဂျာနယ်တွင် ရေးသားထားသည့် သုတေသနသည် နိုင်ငံပေါင်း ၂၀၄ နိုင်ငံမှ အချက်အလက်များကို အသုံးပြု၍လေ့လာထားခြင်းဖြစ်ပြီး ရာစုနှစ်အတွင်း ကြီးမားသော ကျန်းမာရေးစိန်ခေါ်မှုများထဲမှ တစ်ခုအဖြစ် ဖော်ပြထားသည်။

“မကြုံစဖူး အဝလွန်ခြင်းသည် ဝမ်းနည်းဖွယ်ရာဖြစ်ပြီး လူ့အဖွဲ့အစည်း၏ ကြီးမားသော ကျရှုံးမှုဖြစ်သည်” ဟု အမေရိကန်ပြည်ထောင်စုအခြေစိုက် ကျန်းမာရေးတိုင်းတာမှုနှင့် အကဲဖြတ်မှု အင်စတီကျု (IHME) မှ ဦးဆောင် စာရေးဆရာ Emmanuela Gakidou က ထုတ်ပြန်ချက်တွင် ဖော်ပြထားသည်။

ကမ္ဘာတစ်ဝှမ်းတွင် အဝလွန်သူများ အရေအတွက်သည် ၁၉၉၀ ခုနှစ်တွင် ၉၂၉ သန်းမှ ၂၀၂၁ ခုနှစ်တွင် ၂.၆ ဘီလီယံအထိ မြင့်တက်လာကြောင်း လေ့လာမှုက တွေ့ရှိခဲ့သည်။

ပြင်းထန်သောပြောင်းလဲမှုမရှိဘဲ ၁၅ နှစ်အတွင်း အရွယ်ရောက်ပြီးသူ ၃.၈ ဘီလီယံသည် အဝလွန်ခြင်း သို့မဟုတ် ၂၀၅၀ ပြည့်နှစ်တွင် ကမ္ဘာ့ အရွယ်ရောက်ပြီးသူလူဦးရေ၏ ၆၀ ရာခိုင်နှုန်း နီးပါးဖြစ်မည်ဟု သုတေသီ များက ခန့်မှန်းထားသည်။

ကမ္ဘာ့ကျန်းမာရေးစနစ်များသည် ဆိုးရွားသောဖိအားများအောက်တွင် ကြုံတွေ့ရလိမ့်မည် ဟု သုတေသီများက သတိပေးခဲ့ပြီး ကမ္ဘာပေါ်တွင် အဝလွန်သူ၏ လေးပုံတစ်ပုံခန့်သည် ထိုအချိန်တွင် အသက် ၆၅ နှစ် အထက်ဖြစ်မည်ဟု ခန့်မှန်းထားသည်။

ကမ္ဘာတစ်ဝှမ်းရှိ ကလေးများနှင့် ဆယ်ကျော်သက်များကြား အဝလွန်မှု ၁၂၁ ရာခိုင်နှုန်း တိုးလာမည်ဟုလည်း ၎င်းတို့က ခန့်မှန်းထားသည်။ အဝလွန်သူ လူငယ်အားလုံး၏ သုံးပုံ တစ်ပုံသည် အရှေ့အလယ်ပိုင်းနှင့် မြောက်အာဖရိက (MENA) နှင့် လက်တင်အမေရိကနှင့် ကာရေဘီယံ ဒေသနှစ်ခုမှဖြစ်မည်ဟု သုတေသီများက သတိပေးခဲ့သည်။ ကမ္ဘာ့အဝ လွန်သူ ထက်ဝက်ကျော်သည် တရုတ်၊ အိန္ဒိယ၊ အမေရိကန်၊ ဘရာဇီး၊ ရုရှား၊ မက္ကဆီကို၊ အင်ဒိုနီးရှားနှင့် အီဂျစ်နိုင်ငံ စသည့် နိုင်ငံရှစ်နိုင်ငံမှဟု လေ့လာမှုတွင် ဖော်ပြထားသည်။

အာဟာရမပြည့်ဝသော အစားအစာနှင့် အထိုင်များသောလူနေမှုပုံစံ များသည် အဝလွန်ရောဂါကို ဖြစ်စေသည်မှာ ရှင်းလင်းသော်လည်း ယင်း အတွက် အရင်းခံအကြောင်းရင်းများနှင့် ပတ်သက်၍ “သံသယရှိနေဆဲ ဖြစ်သည်” ဟု ကိုပင်ဟေဂင်တက္ကသိုလ်မှ သုတေသီ Thorkild Sorensen က ဆိုသည်။

World Obesity Federation မှ တနင်္လာနေ့တွင် ထုတ်ပြန်သည့် သီးခြားလေ့လာမှုတစ်ခုတွင်လည်း ယင်းကိစ္စကို တင်ပြခဲ့သည်။ “အထိခိုက်ဆုံး ဒေသတွေက ဖွံ့ဖြိုးဆဲနိုင်ငံတွေပါပဲ” ဟု အဖွဲ့ချုပ်ဥက္ကဋ္ဌ Barquera က ပြောသည်။

အဝလွန်သော အရွယ်ရောက်ပြီးသူ ၇၉ ရာခိုင်နှုန်းနှင့် ကလေး ၈၈ ရာခိုင်နှုန်းသည် ဝင်ငွေနည်းသော၊ ဝင်ငွေအလယ်အလတ်ရှိသော နိုင်ငံများတွင် နေထိုင်ကြလိမ့်မည်ဖြစ်ပြီး နိုင်ငံအားလုံး၏ ၇ ရာခိုင်နှုန်းသာ ယင်းကို ဖြေရှင်းရန် လုံလောက်သော ကျန်းမာရေးစနစ်များ ရှိမည်ဟု ဆိုသည်။ “ဒါဟာ တစ်ကမ္ဘာလုံးက ပြည်သူ့ကျန်းမာရေး စိန်ခေါ်မှုတွေထဲက တစ်ခုပါ” ဟု Barquera က ပြောကြားခဲ့သည်။

Source: Aljazeera

ဘာသာပြန်ဆိုသူ-ဦးရဲကျော်တေဇ၊ ဒုတိယညွှန်ကြားရေးမှူး၊ နစက-၂

လွန်ခဲ့သော(၁၁)ရာစု ပုဂံခေတ်ကတည်းက သနပ်ခါးလိမ်းခြယ်ခြင်း ရှိနေကြောင်းကို အပယ်ရတနာဘုရား နံရံဆေးရေးပန်းချီမှလည်း မှတ်တမ်းပြုစုနိုင်ခဲ့ကြောင်း ပြန်ကြားရေးဝန်ကြီးဌာနမှ သိရသည်။

မြန်မာ့သနပ်ခါးကို ရှေးဘုရင်များလက်ထက်ကတည်းက မြတ်မြတ်နိုးနိုး သုံးစွဲခဲ့ကြောင်း ပုဂံရှေးဟောင်းယဉ်ကျေးမှုဒေသမှ နံရံဆေးပန်းချီများ၌ တွေ့ရှိနိုင်ပြီး ပုဂံက စူဠာမဏိစေတီရှိ သနပ်ခါးလိမ်းခြယ်နေသောပုံကို လူသိများသော်လည်း အပယ်ရတနာဘုရားမှ နံရံဆေးပန်းချီရှိသည်ကို သိသူနည်းပါးပြီး အဆိုပါပုံများမှာ ရှေးဟောင်းယဉ်ကျေးမှုအတွက် တန်ဖိုးဖြတ်မရသော သမိုင်းအမွေအနှစ်ပုံများ ဖြစ်ကြောင်း သိရသည်။

ရှေးဟောင်းသုတေသနနှင့်အမျိုးသားပြတိုက်ဦးစီးဌာနသည် ပုဂံဒေသရှိ ရှေးဟောင်းယဉ်ကျေးမှုအမွေအနှစ်များကို ထိန်းသိမ်းပြုပြင် စောင့်ရှောက် လျက်ရှိပြီး အပယ်ရတနာဘုရားရှိ သနပ်ခါးလိမ်းခြယ်မှုဟန်ပါဝင်သည့် နံရံဆေးပန်းချီများကို မှတ်တမ်းပြုစုထားရှိပြီးလည်း ဖြစ်ကြောင်း သိရ သည်။

ထို့ပြင် ၁၉၉၁ - ၁၉၉၂ ခုနှစ်တွင် ရှေးဟောင်းသုတေသနနှင့် အမျိုးသားပြတိုက်ဦးစီးဌာနနှင့် ကုလသမဂ္ဂဖွံ့ဖြိုးမှုအစီအစဉ်တို့ ပူးပေါင်း၍ ပြုပြင် ထိန်းသိမ်းရေးစီမံကိန်းလုပ်ငန်း ဆောင်ရွက်ခဲ့ရာ စူဠာမဏိစေတီ အတွင်း ရှိ နံရံဆေးပန်းချီကားများကို သန့်စင်ချေးချွတ်ရာမှ သနပ်ခါးလိမ်းခြယ် နေသောပုံများကို တွေ့ရှိမှတ်တမ်းပြုစုနိုင်ခဲ့ခြင်းဖြစ်ကြောင်း သိရသည်။

“မြန်မာ့ရိုးရာနှစ်သစ်ကူးအတာသင်္ကြန်ပွဲတော်” ကို ကမ္ဘာ့ဒြပ်မဲ့ ယဉ်ကျေးမှုအမွေအနှစ်စာရင်းတွင် ပါဝင်စေရန်လုပ်ဆောင်ခဲ့ပြီးနောက်" မြန်မာ့ သနပ်ခါးယဉ်ကျေးမှုဓလေ့" ကိုလည်း UNESCO ၏ Representative List of the Intangible Cultural Heritage of Humanity တွင် စာရင်းဝင်နိုင်ရန် ရှေးဟောင်းသုတေသနနှင့် အမျိုးသားပြတိုက်ဦးစီးဌာနက ၂၀၂၅ ခုနှစ်၊ မတ်လ ၃၁ ရက်မတိုင်မီ ပြန်လည်တင်သွင်းရန် ဆောင်ရွက်လျက်ရှိကြောင်း သိရသည်။

ကိုးကား- ပြန်ကြားရေးဝန်ကြီးဌာန

နေပြည်တော် မတ် ၄
လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာစိုးဝင်းသည် ဧရာဝတီတိုင်းဒေသကြီးအစိုးရအဖွဲ့ လူမှုရေးဝန်ကြီးနှင့် တာဝန်ရှိသူများနှင့်အတူ ယနေ့တွင် ကိုယ်ဝန်ဆောင်မိခင်များနှင့် ၎င်းတို့မှ မွေးဖွားလာသော အသက် (၂) နှစ်အောက် ကလေးသူငယ်များအား ငွေကြေးထောက်ပံ့ခြင်း (MCCT) အစီအစဉ်နှင့် အသက် (၈၅) နှစ်အထက် သက်ကြီးများကို ထောက်ပံ့သော လူမှုရေးပင်စင်အစီအစဉ်တို့မှ အကျိုးခံစားခွင့်ရှိသူများ ပုသိမ်မြို့ရှိ မြန်မာ့စီးပွားရေးဘဏ်၌ ထောက်ပံ့ကြေးငွေထုတ်ယူနေမှုကို ကြည့်ရှုအားပေးသည်။
ထို့နောက် ပြည်‌ထောင်စုဝန်ကြီးနှင့်အဖွဲ့သည် ပုသိမ်မြို့တွင် လူမှုဝန်ထမ်းဦးစီးဌာနမှ ဆောင်ရွက်လျက်ရှိသည့် အစီအစဉ် (၂) ရပ်၏ အကျိုးခံစားခွင့်ရှိသူများကို ထောက်ပံ့ကြေးဖြန့်ဝေပြီး အခြေအနေလေ့လာဆန်းစစ်ခြင်း (Post Distribution Monitoring – PDM) နှင့် Case Study များ ပြုလုပ်နေခြင်းတို့ကို ကြည့်ရှုပြီး ကိုယ်ဝန်ဆောင်မိခင်များနှင့် အဘိုးအဘွားများ၊ ကိုယ်စားလာရောက်ထုတ်ယူသူများအား ကြက်ဥနှင့် ခေါက်ဆွဲခြောက်ထုပ်များ ထောက်ပံ့ကာ ရင်းရင်းနှီးနှီး လိုက်လံနှုတ်ဆက်သည်။
ယင်းနောက် ပြည်ထောင်စုဝန်ကြီးသည် အိမ်တွင်းမှုသက်မွေး သင်တန်းကျောင်းရှိ ဝါးလက်မှုပစ္စည်းထုတ်လုပ်မှုသင်တန်း၊ အခြေခံ၊ အဆင့်မြင့် စက်ချုပ်သင်တန်းများ ဖွင့်လှစ်ဆောင်ရွက်နေမှုကို လှည့်လည်ကြည့်ရှုစစ်ဆေးပြီး သင်တန်းသား/ သူများအား ရင်းရင်းနှီးနှီး တွေ့ဆုံအားပေးကာ သင်ကြားရရှိသည့် ပညာရပ်များဖြင့် အလုပ်အကိုင်အခွင့်အလမ်းများ တိုးမြှင့်ရရှိရေး ဆက်လက်ဆောင်ရွက်သွားရေးနှင့် စပ်လျဉ်း၍ မှာကြားသည်။
ဆက်လက်၍ ပြည်ထောင်စုဝန်ကြီးသည် မူလတန်းကြိုကျောင်းသို့ သွားရောက်ပြီး ကလေးများအား သင်ကြားလေ့ကျင့်နေမှုကို ကြည့်ရှုကာ လိုအပ်သည်များ မှာကြားသည်။
ထို့နောက် လူမှုဝန်ထမ်းရုံး၌ ဝန်ကြီးဌာနအောက်ရှိ ဝန်ထမ်းများနှင့် တွေ့ဆုံပြီး ဝန်ထမ်းများ၏ တင်ပြချက်များအပေါ် ဖြည့်ဆည်းဆောင်ရွက်ပေးသည်။
ယင်းနောက် ဘေးအန္တရာယ်ဆိုင်ရာစီမံခန့်ခွဲမှုဦးစီးဌာန တိုင်းဒေသကြီးဦးစီးမှူးရုံးရှိ သိုလှောင်ရုံ၌ ကယ်ဆယ်ရေးပစ္စည်း၊ အထောက်အကူပစ္စည်းနှင့် အလှူပစ္စည်းများ သိုလှောင်ထားရှိမှုကို ကြည့်ရှုစစ်ဆေးပြီး ကယ်ဆယ်ရေးပစ္စည်းများအား ဘေးသင့်ပြည်သူများထံ အချိန်မီထောက်ပံ့နိုင်ရန် စီမံဆောင်ရွက်ရေးနှင့် စပ်လျဉ်း၍ မှာကြားခဲ့ကြောင်း သိရသည်။

Source: https://www.myanmardigitalnewspaper.com/