Apple ကုမ္ပဏီသည် အမေရိကန်ပြည်ထောင်စုတွင် ရောင်းချမည့် ၎င်း၏ ပစ္စည်းများကို တရုတ်နိုင်ငံတွင် ထုတ်လုပ်ခြင်း မပြုတော့ဟု ကြေညာလိုက်ပါသည်။ ဒေါ်နယ်ထရမ့်၏ ကုန်သွယ်မှုအခွန်သစ်များကြောင့် ဖြစ်ပေါ် လာနိုင်သည့် ဆိုးကျိုးများကို လျှော့ချနိုင်ရန် ထိုသို့ ဆုံးဖြတ်ရခြင်းဖြစ် ပါသည်။ 

အမေရိကန်ဝယ်ယူသူများ ဈေးနှုန်းမြင့်တက်မှုဒဏ်မှ ကာကွယ်ရန် iPhone အများစုကို အိန္ဒိယနိုင်ငံမှလည်းကောင်း၊ iPad များကို ဗီယက်နမ်နိုင်ငံမှလည်းကောင်း ရယူသွားမည်ဖြစ်ပါသည်။ 

ဇန်နဝါရီမှ မတ်လအတွင်း ရရှိသည့် ဘဏ္ဍာရေးရလဒ်များကို ထုတ်ပြန်ရာတွင် iPhone က ထရမ့်၏ ကုန်သွယ်ရေးစစ်ပွဲ တိုးမြင့်လာမှုကြောင့် ယခုအချိန်အထိ ၎င်းတို့၏ စီးပွားရေးအပေါ် အကန့်အသတ်ဖြင့်သာ သက်ရောက်မှုရှိကြောင်း ဖော်ပြခဲ့ပါသည်။ 

သို့သော် Apple အမှုဆောင်အရာရှိချုပ် တင်မ်ကွတ်က ထရမ့်၏ မူဝါဒများ မပြောင်းလဲပါက အခွန်သစ်များကြောင့် လက်ရှိနှစ်ဝက်တွင် ကုန်ကျစရိတ် ဒေါ်လာ ၆၇၇ သန်း တိုးလာနိုင်ကြောင်း၊ ပထမသုံးလအတွင်း ဝင်ငွေသည် ပေါင် ၇၁.၈ ဘီလီယံ ရှိခဲ့ပြီး ပေါင် ၁၈.၆ ဘီလီယံ အမြတ် အစွန်းရရှိခဲ့ကာ ဆန်းစစ်သူများ၏ မျှော်မှန်းချက်ထက် ကျော်လွန်ခဲ့ကြောင်း ပြောကြားခဲ့ ပါသည်။

အဆိုပါကာလအတွင်း iPhone အတွက် ဝယ်လိုအား မြင့်တက်ရခြင်း၏ အကြောင်းရင်းမှာ အမေရိကန်စားသုံးသူများ အခွန်သစ်များ စတင်မကျင့်သုံးမီ အမြန်ဝယ်ယူခြင်းကြောင့် ဖြစ်နိုင်ပါသည်ဟု လေ့လာသူများ က သုံးသပ်ထားကြပါသည်။

ကိုးကား- News Sky

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊နစက-၃

အီရန်နိုင်ငံမှ ရေနံနှင့်ရေနံထွက်ကုန်ပစ္စည်းများဝယ်ယူသူများသည် ထပ်ဆင့်အရေးယူပိတ်ဆို့ခံရမည်ဟု အမေရိကန် သမ္မတဒေါ်နယ်ထရမ့်က လူမှုကွန်ရက်တွင် ရေးထားသည်။

အီရန်၏နျူကလီးယား အစီအစဉ်နှင့်ပတ်သက်၍ အမေရိကန်နှင့်အီရန်တို့ကြား ဆွေးနွေးမှုများ လုပ်ဆောင်နေစဉ် အမေရိကန်အစိုးရက ယခုကဲ့သို့ထုတ်ပြန်လာခြင်းဖြစ်သည်။

အကယ်၍ အမေရိကန်အနေဖြင့် ပိတ်ဆို့မှုများကို ဖြေလျှော့ပေးပါက ၎င်းတို့၏ နျူကလီးယားအစီအစဉ်များကို စစ်ဘက်အတွက်အသုံးမပြုရန်ဆန္ဒရှိကြောင်း အီရန်အစိုးရက ပြောထားသည်။

သို့သော် အီရန်နိုင်ငံနှင့်ရေနံကုန်သွယ်မှုလုပ်သောနိုင်ငံများအနေဖြင့် အမေရိကန်ပြည်ထောင်စုနှင့်မည်သို့သော ပုံစံ၊ နည်းလမ်းဖြင့်မဆိုစီးပွားရေးလုပ်ခွင့်မရှိကြောင်း၊ ထို့ကြောင့် အီရန်မှရေနံနှင့် ရေနံထွက်ကုန်ပစ္စည်းများဝယ်ယူမှုကို ချက်ချင်းရပ်တန့်သင့်ကြောင်း ထရမ့်က မေလ ၁ ရက်တွင်လူမှုကွန်ရက်၌ရေးထားသည်။

ကုမ္ပဏီခုနစ်ခုက အီရန်မှရေနံနှင့်ရေနံထွက်ကုန်ပစ္စည်းများကို တရားမဝင်ကုန်သွယ်မှုပြုလုပ်သည် ဟူသောစွပ်စွဲချက်ဖြင့် အမေရိကန်နိုင်ငံခြားရေးဝန်ကြီးဌာနက ထိုကုမ္ပဏီများအပေါ် အရေးယူပိတ်ဆို့မှုများချမှတ်ပြီးနောက် ထရမ့်ကယခုကဲ့သို့ ပြောလာခြင်းဖြစ်သည်။ ထိုကုမ္ပဏီများတွင် ယူအေအီးနိုင်ငံအခြေစိုက်ကုမ္ပဏီခြောက်ခုနှင့်  တူကီယဲနိုင်ငံအခြေစိုက်ကုမ္ပဏီတစ်ခုတို့ ပါဝင်ကြောင်း သိရသည်။

Ref: RT

Source: https://myawady.net.mm/

တရုတ်သည် အမေရိကန်နှင့် ကုန်သွယ်ရေးစစ်ပွဲကို ဆက်လက် ဆင်နွှဲမည်ဆိုပါက နောက်ပြန်ဆုတ်တော့မည် မဟုတ်ကြောင်း တရုတ်နိုင်ငံခြားရေးဝန်ကြီး ဝမ်ယိက ဘရာဇီးနိုင်ငံ ရီယိုဒီဂျနေးရိုးမြို့တွင် ကျင်းပသည့် BRICS နိုင်ငံခြားရေးဝန်ကြီးများ အစည်းအဝေးတွင် ပြောကြားလိုက်ပါသည်။

“ကုန်သွယ်ရေးစစ်ပွဲအတွက် တရုတ်၏တုံ့ပြန်မှုမှာ ရှင်းလင်းပြတ်သားပြီး ခိုင်မာပါသည်၊ မိမိတို့ကို လာစိန်ခေါ်လျှင် မိမိတို့က အဆုံးတိုင် တိုက်ပွဲဝင်သွားပါမည်၊ ဆွေးနွေးလိုပါက လေးစားမှုနှင့် တန်းတူညီမျှမှုအပေါ် အခြေခံရပါမည်” ဟု တရုတ်နိုင်ငံခြားရေးဝန်ကြီးဌာနက ဝမ်ယိက ဆက်လက် ပြောကြားထားပါသည်။   

တရုတ်သည် မိမိနိုင်ငံ၏ ဂုဏ်သိက္ခာကို သာမက ကမ္ဘာ၏ အနာဂတ် တောက်ပမှုအတွက်ပါ ကာကွယ်နေခြင်းဖြစ်ပါကြောင်း၊ အမေရိကန်သည် ကမ္ဘာတစ်ဝှမ်းကို အကောက်ခွန်တိုးမြင့်နေခြင်းမှာ အပြည်ပြည်ဆိုင်ရာ အသိုင်းအဝိုင်း၌ အားကောင်းသူက အားနည်းသူကို အနိုင်ကျင့်နေသော အရိုင်းအစိုင်းခေတ်ကာလကို ပြန်သွားရန် လုပ်ဆောင်နေခြင်းလား ဆိုသည်ကို ဝိုင်းဝန်းဆုံးဖြတ်ကြရန် လိုအပ်ကြောင်း ဝမ်ယိက ဖြည့်စွက် ပြောကြားထားပါသည်။ 

ကိုးကား- TASS

Photo: Moneycontrol

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ပေကျင်းအစိုးရသည် အမေရိကန်သမ္မတ ဒေါ်နယ်ထရမ့်၏ ၁၄၅% အထိ မြင့်တက်စေခဲ့သော ကုန်သွယ်ခွန်များနှင့်ပတ်သက်၍ ဆွေးနွေးရန် ဝါရှင်တန်၏ ကမ်းလှမ်းချက်ကို စဉ်းစားသုံးသပ်နေဆဲဖြစ်ကြောင်း သောကြာနေ့ (မေ ၂) တွင် တရုတ်နိုင်ငံကုန်သွယ်ရေးဝန်ကြီးဌာနက ထုတ်ပြန်သည်။ အဆိုပါဖြစ်စဉ်သည် ကမ္ဘာလုံးဆိုင်ရာဈေးကွက် များကို လှုပ်ခတ်ခဲ့သော ကုန်သွယ်ရေးစစ်ပွဲ ပြေလည်စေရန် အလားအလာ ရှိကြောင်း ညွှန်းဆိုနေသည်။

အမေရိကန်က ၁၄၅% ကုန်သွယ်ခွန်များဆိုင်ရာ ညှိနှိုင်းမှုများအတွက် တရုတ်ထံ ချဉ်းကပ်ခဲ့ပြီး တရုတ်ကုန်သွယ်ရေးဝန်ကြီးဌာနက “ဆွေးနွေးရန် တံခါးဖွင့်ထား” ကြောင်း အတည်ပြုခဲ့ခြင်းကြောင့် နှစ်နိုင်ငံကြား ကုန်သွယ်ရေး တင်းမာမှု လျော့ကျနိုင်သည့် အလားအလာရှိသည်ဟုသိရှိရပါသည်။

၂၀၁၈ ခုနှစ်မှစတင်၍ စုစုပေါင်း ကုန်သွယ်မှုတန်ဖိုး ဘီလီယံပေါင်း ၅၀၀ ကျော်အထိ သက်ရောက်ခဲ့သော အမေရိကန်-တရုတ် ကုန်သွယ်ရေး ပဋိပက္ခတွင် ယခုကဲ့သို့ ညှိနှိုင်းမှုများ ပြုလုပ်ရန် သဘောတူညီမှုသည် ကောင်းမွန်သော အလားအလာတစ်ခုဖြစ်သည်။

စီးပွားရေးပညာရှင်များက အဆိုပါဆွေးနွေးမှုများသည် နှစ်နိုင်ငံ စီးပွားရေးအတွက် အပြုသဘောဆောင်သည့် အချက်တစ်ခုဖြစ်ကြောင်း မှတ်ချက်ပြုခဲ့ပြီး နှစ်ဖက်စလုံးမှ အခြေခံသဘောတူညီမှုများ ရရှိရန် လိုအပ်ဆဲ ဖြစ်သည်ဟု ဆိုသည်။

ကမ္ဘာ့ကုန်သွယ်ရေးအဖွဲ့ (WTO)၏ အချက်အလက်များအရ နှစ်နိုင်ငံအကြား ကုန်သွယ်မှုသည် ၂၀၂၃ ခုနှစ်တွင် ၆၉၀ ဘီလီယံဒေါ်လာ ရှိခဲ့ ကြောင်းသိရှိရသည်။

အမေရိကန်နိုင်ငံသည် “မှားယွင်းနေသော အလေ့အထများကို ပြုပြင်ရန်” လုပ်ဆောင်မှုများ ပြင်ဆင်ပြီး တစ်ဖက်သတ်ကုန်သွယ်ခွန်များကို ရုပ်သိမ်းရန် အဆင်သင့်ဖြစ်ထားသင့်ကြောင်း တရုတ်ကုန်သွယ်ရေးဝန်ကြီးဌာနက ကြေညာချက်တွင် ဖော်ပြခဲ့သည်။ ဝါရှင်တန်အနေဖြင့် ညှိနှိုင်းဆွေးနွေးမှုများတွင် “အစစ်အမှန်စိတ်ဓာတ်” ပြသရန် လိုအပ်ကြောင်း ဌာနမှ ဖြည့်စွက်ပြောကြားခဲ့သည်။

၂၀၁၈ ခုနှစ်မှစတင်၍ အမေရိကန်သည် တရုတ်ထုတ်ကုန်များအပေါ် သံသယဖြစ်ဖွယ် ၃၇၀ ဒေါ်လာဘီလီယံတန်ဖိုးရှိ ကုန်သွယ်ခွန်များ စည်းကြပ်ခဲ့ပြီး၊ လက်ရှိတွင် စီးပွားရေးပညာရှင်များက အဆိုပါ အစီအမံ များကြောင့် အမေရိကန်စားသုံးသူများအနေဖြင့် ဒေါ်လာ ၅၁ ဘီလီယံ အပိုပေးဆောင်နေရကြောင်း တွက်ချက်ပြသခဲ့သည်။

ဟားဗက် တက္ကသိုလ် စီးပွားရေးပါမောက္ခ ဂျက်ဖရီး ဖရန့်ကယ်က “အမေရိကန်စီးပွားရေးအတွက် ကာလရှည်အကျိုးကျေးဇူးထက် နိုင်ငံရေးအရ တိုတောင်းသောအောင်ပွဲများကို ဦးစားပေးခဲ့သည့် မဟာဗျူဟာ” ဟု ဝေဖန်ခဲ့သည်။

တရုတ်စီးပွားရေးအကြံပေး လီကျန်းက “နှစ်နိုင်ငံစလုံးအတွက် အကျိုးရှိမည့် ကုန်သွယ်ရေးသဘောတူညီချက်မျိုးရရှိရန် အချိန်ကျပြီ” ဟု အကြံပြုခဲ့သည်။

WTO စာရင်းများအရ နှစ်နိုင်ငံကြား ကုန်သွယ်မှုသည် ၂၀၂၃ ခုနှစ်တွင် ၂၀၁၉ ခုနှစ်ကထက် ၂၂% ကျဆင်းခဲ့ကြောင်းသိရှိရပါသည်။

ကိုးကား- Reuters

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

တရုတ်နိုင်ငံသည် အမေရိကန်နှင့် ဖြစ်ပွားနေသည့် ကုန်သွယ်ရေးနှင့် အကောက်ခွန်စစ်ပွဲကြောင့် မိမိကုန်ပစ္စည်းများကို အခြားနိုင်ငံများသို့ ဈေးချရောင်းချမည်မဟုတ်ကြောင်း အိန္ဒိယသတင်းစာ Indian Express တွင် ရေးသားထားသော ဆောင်းပါးတစ်ပုဒ်တွင် တရုတ်သံအမတ်ကြီး Xu Feihong က ပြောကြားထားပါသည်။

ကမ္ဘာ့အကြီးဆုံးစီးပွားရေး ၂ နိုင်ငံဖြစ်သည့် တရုတ်နှင့် အမေရိကန်တို့သည် အပြန်အလှန်အကောက်ခွန်များ မြှင့်တင်ခဲ့ကြပြီး သမ္မတဒေါ်နယ်ထရမ့် ရာထူးတက်သည့် ဇန်နဝါရီလမှစ၍ ကုန်ပစ္စည်းတစ်ခုချင်းစီကို ၁၀၀% အထိ အကောက်ခွန်တိုးမြှင့်ခဲ့ကြပါသည်။ အဆိုပါအခြေအနေမှာ ကမ္ဘာလုံးဆိုင်ရာဈေးကွက်များကို လှုပ်ခတ်စေခဲ့ပါသည်။

ကုန်သွယ်ရေးစစ်ပွဲကြောင့် တရုတ်ကုမ္ပဏီများသည် ၎င်းတို့၏ ကုန်ပစ္စည်းများကို အခြားဈေးကွက်များသို့ လွှဲပြောင်းရောင်းချနိုင်သည်ဟူသောစိုးရိမ်မှုများ ပေါ်ပေါက်လာခဲ့သည်။ ထိုသို့ဖြစ်ပါက အခြားနိုင်ငံများ၏ တင်ပို့ကုန်များ၏ ယှဉ်ပြိုင်နိုင်စွမ်းကို ထိခိုက်စေနိုင်မည်ဖြစ်ပါသည်။

ကမ္ဘာ့ဒုတိယအကြီးဆုံး သံမဏိထုတ်လုပ်သည့် အိန္ဒိယနိုင်ငံသည်ပင် မကြာသေးမီက တရုတ်မှ တင်သွင်းလာသော သံမဏိပစ္စည်းများ၏ ဈေးနှုန်းကျဆင်းမှုကို ထိန်းချုပ်ရန် အကောက်ခွန်ကို ၁၂% ယာယီ သတ်မှတ်ခဲ့သည်။

“ဝါရှင်တန်၏ အနိုင်ကျင့်မှုကို ရပ်တန့်ပါ” ဟူသော ခေါင်းစဉ်ဖြင့်   Indian Express သတင်းစာတွင် ဖော်ပြထားသည့် ဆောင်းပါးတွင် တရုတ်သံ အမတ်ကြီး Xu က တရုတ်နိုင်ငံသည် ပြည်တွင်းဝယ်လိုအားနှင့် စားသုံးမှုကို မြှင့်တင်ရန် အာရုံစိုက်နေကြောင်း ဖော်ပြခဲ့ပါသည်။

တရုတ်နိုင်ငံသည် ကမ္ဘာ့ကုန်သွယ်ရေးအဖွဲ့ (WTO)၏ စည်းမျဉ်းစည်းကမ်းများနှင့် ဈေးကွက်သတ်မှတ်ချက်များကို တိတိကျကျ လိုက်နာလျက်ရှိပါကြောင်း၊ တရုတ်နိုင်ငံအနေဖြင့် ဈေးကွက်ဝယ်လိုအားကျဆင်းစေရန် လုပ်ဆောင်ခြင်း သို့မဟုတ် အပြိုင်အဆိုင်ဈေးဖြတ်ခြင်းမျိုး ပြုလုပ်မည် မဟုတ်သလို အခြားနိုင်ငံများ၏ စီးပွားရေးနှင့် စက်မှုလုပ်ငန်းများကိုလည်း နှောင့်ယှက်မည်မဟုတ်ပါကြောင်း သံအမတ်ကြီး Xu ၏ ပြောကြားချက်ကို ဆောင်းပါးက ဖော်ပြထားပါသည်။

ကိုးကား- Reuters

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

Mercedes-Benz ကုမ္ပဏီသည် အမေရိကန်သမ္မတ ဒေါ်နယ်ထရမ့်၏ ကားအကောက်ခွန်များကြောင့် အလာဘားမားပြည်နယ်ရှိ စက်ရုံတွင် အခြေခံအဆင့် ကားမော်ဒယ်အသစ်တစ်မျိုးကို ၂၀၂၇ ခုနှစ်မတိုင်မီ ထုတ်လုပ်သွားမည်ဟု ကြေညာလိုက်ပါသည်။ 

ကုမ္ပဏီသည် Tuscaloosa အနီးရှိ စက်ရုံတွင် ကား၏ အဓိက အစိတ်အပိုင်း (core segment) ကို ထုတ်လုပ်မည်ဖြစ်သော်လည်း အတိအကျ သတင်းများ ဖော်ပြထားခြင်း မရှိသေးပါ။ ယခုစက်ရုံသည် အဓိကအားဖြင့် Mercedes-Benz SUV များ (GLE, GLS) ကို ထုတ်လုပ်လျက်ရှိပါသည်။ 

Mercedes-Benz ၏ မြောက်အမေရိက အမှုဆောင်အရာရှိချုပ် Jason Hoff က “Tuscaloosa တွင် အခြေခံအဆင့်မော်ဒယ်တစ်ခုကို ဒေသတွင်း ထုတ်လုပ်ခြင်းဖြင့် အမေရိကန်ဝယ်ယူသူများနှင့် ပိုမိုနီးစပ်လာပြီး   မြောက်အမေရိကဈေးကွက်ကို ပိုမိုခိုင်မာစေမည်” ဟု ပြောကြားခဲ့ ပါသည်။ 

Mercedes-Benz ၏ ပြောရေးဆိုခွင့်ရှိသူက ဒေသတွင်း ရောင်းချရန် ဒေသတွင်းထုတ်လုပ်သည့် မဟာဗျူဟာ (local-for-local strategy) ကြောင့် ဟု ဆိုထားသော်လည်း ထရမ့်၏ ကားနှင့် ကားအစိတ်အပိုင်းကို ၂၅ ရာခိုင်နှုန်းအကောက်ခွန်များ မေ ၃ ရက် (စနေနေ့)မှ စတင်မည့်ကိစ္စနှင့် ဆက်စပ်နေသည်ဟု ယူဆရပါသည်။ 

Tuscaloosa စက်ရုံသည် Mercedes-Benz SUV များ၏ ကမ္ဘာ့တင်ပို့မှု ဗဟိုဌာနအဖြစ် ရပ်တည်နေပြီး ကုမ္ပဏီက ထုတ်လုပ်သော SUV များ၏ ၆၀ % ကို တင်ပို့ပေးလျက်ရှိပါသည်။

ကိုးကား- CNBC

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

BRICS နိုင်ငံများမှ နိုင်ငံခြားရေးဝန်ကြီးများသည် ဧပြီ ၂၉ ရက်တွင် ရီယို ဒီဂျနေးရိုးမြို့တွင် အစည်းအဝေးပြုလုပ်ပြီးနောက် ကြေညာချက်ထုတ်ပြန် လိုက်ကြပါသည်။

ထိုကြေညာချက်တွင် အဖွဲ့ဝင်နိုင်ငံများသည် ၎င်းတို့၏ ကုန်သွယ်ဖက်နိုင်ငံများနှင့် ကုန်သွယ်ရေးနှင့်ငွေကြေးဆိုင်ရာ လွှဲပြောင်းမှုများ ဆောင်ရွက်ရာတွင် မိမိတို့၏ ပြည်တွင်းငွေကြေးများကိုသာ ပိုမိုအသုံးပြုနိုင်ရေးအားပေးရန်၊ ဖွဲ့ဖြိုးဆဲနိုင်ငံများ၏ ပါဝင်နိုင်မှုနှင့် ကိုယ်စားပြုနိုင်မှုကို မြှင့်တင်ပေးနိုင်သည့် ကမ္ဘာ့ငွေကြေးဆိုင်ရာအဖွဲ့အစည်းများအဖြစ် ပြုပြင်ရန် အထူးသဖြင့် ဖွံ့ဖြိုးဆဲနိုင်ငံများအတွက် ငွေကြေးအရင်းအနှီးနှင့်အရင်းအမြစ်များ လွယ်ကူစွာ ရရှိစေရေး အာမခံရန်၊ G20 အုပ်စုကို ဖွံ့ဖြိုးပြီး/ဖွံ့ဖြိုးဆဲ နိုင်ငံများပူးပေါင်းသည့် အဓိက စီးပွားရေးဖိုရမ်အဖြစ် အသိအမှတ်ပြုကြရန်၊ သတ္တုတူးဖော်ရေးနယ်ပယ်တွင် နည်းပညာလွှဲပြောင်းခြင်း၊ ရေရှည်တည်တံ့သော လုပ်ငန်းစဉ်များဖြင့် ပူးပေါင်း ဆောင်ရွက်ရန်တို့ ဖော်ပြပါရှိပါသည်။

အချုပ်ဆိုလျှင် BRICS နိုင်ငံများသည် အမေရိကန်ဒေါ်လာလွှမ်းမိုးမှုကို လျှော့ချရန်နှင့် ဖွံ့ဖြိုးဆဲနိုင်ငံများ၏ စီးပွားရေးအခွင့်အလမ်းများ တိုးမြှင့်ရန် ရည်ရွယ်ထားပါသည်။

ကိုးကား- TASS

Photo: Weekly-Echo

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

အမေရိကန်မီဒီယာများ၏ အတည်မပြုရသေးသော သတင်းနှင့်စပ်လျဉ်း၍ အမေရိကန် အိမ်ဖြူတော် ပြန်ကြားရေးတာဝန်ခံ ကာရိုလိုင်း လီဗစ်ထ်က ဧပြီ ၂၉ ရက်တွင် အစောဆုံး သဘောထား ထုတ်ပြန်ပြောကြားခဲ့ရာ အဆိုပါသတင်းတွင် အမေရိကန်၏ အွန်လိုင်း လက်လီရောင်းချရေး ထိပ်တန်းကုမ္ပဏီ အမေဇုံ (Amazon) က ကုန်ပစ္စည်းအရောင်း ဈေးနှုန်းတွင် ထပ်တိုးကောက်ခံသည့် စည်းကြပ်ခွန်စရိတ်အား ဖော်ပြရန် စီစဉ်ထားသောလုပ်ရပ်သည် “ရန်လိုပြီး နိုင်ငံရေးအသွင်ဖော်ဆောင်သည့် လုပ်ရပ်” ဖြစ်သည်ဟု ဝေဖန်ပြောကြားခဲ့သည်။

အမေဇုံသည် စားသုံးသူများထံ ကုန်ပစ္စည်းတိုင်း၏ဈေးနှုန်းတွင် စည်းကြပ်ခွန်ကြောင့် ထပ်တိုးလာသောစရိတ်ကို ဖော်ပြသွားမည်ဖြစ်ကြောင်း၊ ထိုငွေပမာဏကို ကုန်ပစ္စည်း၏ စုစုပေါင်းဈေးနှုန်းနှင့်အတူ ဖော်ပြမည်ဖြစ်ကြောင်း ဧပြီ ၂၉ ရက် အစောပိုင်းက Punchbowl News သတင်းဝက်ဘ်ဆိုက်တွင် သတင်းအရင်းအမြစ်တစ်ဦး၏ ပြောကြားချက်ကို ကိုးကား၍ ဖော်ပြထားသည်။

အမေဇုံ စီစဉ်ထားသည့် လုပ်ရပ်သည် “ရန်လိုပြီး နိုင်ငံရေးအသွင်ဖော် ဆောင်သည့်လုပ်ရပ်” တစ်မျိုးဖြစ်ကြောင်း ထိုနေ့က အိမ်ဖြူတော်တွင် ကျင်းပသည့် သတင်းစာရှင်းလင်းပွဲတစ်ခု၌ ကာရိုလိုင်း လီဗစ်ထ်က တုံ့ပြန်ဖြေကြားခဲ့သည်။ ဘိုင်ဒင်အစိုးရက ငွေကြေးဖောင်းပွမှုကို နှစ် ၄၀ အတွင်း အမြင့်ဆုံးအဆင့်သို့ ရောက်ရှိအောင် လုပ်ဆောင်စဉ်တွင် “အမေဇုံ က ဘာလို့ ဒီလိုမလုပ်တာလဲ” ဟု ၎င်းက တန်ပြန်မေးခွန်းထုတ်ခဲ့သည်။ ယင်းသည် “အမေရိကန်သားများက အမေရိကန်ထုတ် ကုန်ပစ္စည်းများကို ဝယ်ယူသင့်သည့် နောက်ထပ်အကြောင်းရင်းတစ်ခုဖြစ်ပါသည်” ဟု လည်း ၎င်းက ဖြည့်စွက်ပြောကြားခဲ့သည်။ အိမ်ဖြူတော်က ထိုသို့ ပြောကြားပြီးနောက် အမေဇုံ၏ ပြောခွင့်ရပုဂ္ဂိုလ်တစ်ဦးက အမေရိကန် CNBC ချန်နယ် တွင် ရှင်းလင်းပြောကြားခဲ့သည်။ ၎င်းက အဆိုပါကုမ္ပဏီသည် အချို့သော ကုန်ပစ္စည်းများတွင်သာ စည်းကြပ်ခွန်ကုန်ကျစရိတ် ဖော်ပြရန် စဉ်းစားနေခြင်းဖြစ်ပြီး အဆိုပါကုန်ပစ္စည်းများသည် အလွန်တန်ဖိုးနည်း ဈေးဝယ်မှု အပိုင်း Amazon Haul တွင်သာဖြစ်ကာ အမေဇုံပလက်ဖောင်းတစ်ခုလုံးတွင် မဟုတ်ကြောင်း အတည်ပြုခဲ့သည်။

အမေရိကန်၏ စည်းကြပ်ခွန်အစီအမံများကြောင့် ၎င်းပြည်တွင်း စီးပွားရေး လှုပ်ရှားမှုအပေါ် ထိုးနှက်မှုသည် တစ်ဆင့်ချင်းပေါ်လွင်လာနေကြောင်း၊ ထို့ပြင် အမေရိကန်အစိုးရအပေါ် ပိုမိုကြီးမားသည့် ဖိအားများ သယ်ဆောင်လာကြောင်း အချို့သောမီဒီယာများက သတင်းဖော်ပြထားသည်။

သမ္မတ ထရမ့်နှင့် အိမ်ဖြူတော် အရာရှိများက စည်းကြပ်ခွန်စရိတ်ကို ကုန်သွယ်ရေးမိတ်ဖက်များက တာဝန်ခံရမည်ဟု အခိုင်အမာ ပြောကြားနေသော်လည်း အဆိုပါပြောဆိုချက်သည် စီးပွားရေးပညာရှင်နှင့် စီးပွားရေးလောက ပုဂ္ဂိုလ်များ၏ ကျယ်ကျယ်ပြန့်ပြန့် ကန့်ကွက်ခြင်းခံနေရသည်။ 

ကိုးကား- Xinhua

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဂျပန်နိုင်ငံဝန်ကြီးချုပ် Ishiba သည် ဗီယက်နမ်နိုင်ငံ၊ Hanoi မြို့မှ ခေါင်းဆောင်များနှင့် တွေ့ဆုံခဲ့ပြီး နှစ်နိုင်ငံအကြား ကုန်သွယ်မှုများ တိုးမြှင့်လုပ်ဆောင်ခြင်းနှင့် ကုန်စည်များလွတ်လပ်စွာ ကုန်သွယ်နိုင်မှုအပေါ် စည်းမျဉ်းများထုတ်ပြန်နိုင်ရေး ကိစ္စရပ်များအား ဆွေးနွေးခဲ့ကြပါသည်။ ဖော်ပြပါ နှစ်နိုင်ငံသည် အမေရိကန်နိုင်ငံ၏ အကောက်ခွန် တိုးမြှင့်ကောက်ခံမှုများမှ ကင်းလွင့်ခွင့်ရရှိရန် အမေရိကန်နိုင်ငံနှင့် ဆွေးနွေး ပြောဆိုလျက်ရှိပါသည်။

ဂျပန်နိုင်ငံဝန်ကြီးချုပ် Ishiba ၏ ဗီယက်နမ်နိုင်ငံသို့ ပထမအကြိမ် သွားရောက်လည်ပတ်ခြင်းနှင့် ဖိလစ်ပိုင်သို့ ဆက်လက် လည်ပတ်ခဲ့ခြင်းသည် အမေရိကန်၏ အကောက်ခွန်နှုန်းများကြောင့် စီးပွားရေးမသေချာမရေရာမှုများအကြား အဆင့်မြင့်အရာရှိကြီးများ တက်ရောက်ခဲ့သည့် အရှေ့အာရှနိုင်ငံတွင် ကျင်းပခဲ့သည့် အစည်းအဝေးဖြစ်ခဲ့ပါသည်။ 

ကမ္ဘာ့စီးပွားရေးအခြေအနေတည်ငြိမ်မှုမရှိခြင်းသည် အရှေ့တောင်အာရှနိုင်ငံများအပေါ် အကျိုးသက်ရောက်မှုကြီးမားကြောင်း ဂျပန်ဝန်ကြီးချုပ် က ဗီယက်နမ်နိုင်ငံဝန်ကြီးချုပ်နှင့် တွေ့ဆုံခဲ့ပြီး နောက်သတင်းထောက်များထံ ပြောကြားခဲ့ပါသည်။ ပြီးခဲ့သည့်အပတ်တွင် တရုတ်သမ္မတ ရှီကျင့်ဖျင်နှင့် ထိပ်တန်းတောင်ကိုရီးယားဝန်ကြီးများ ဗီယက်နမ်နိုင်ငံသို့ သွားရောက်လည်ပတ်ခဲ့ပြီး ဂျပန်နိုင်ငံ၊ တိုကျိုမြို့တွင်လည်း ဂျပန်၊ တရုတ်၊ တောင်ကိုးရီးယား သုံးနိုင်ငံ မျက်နှာစုံညီအစည်းအဝေး ကျင်းပပြုလုပ်ခဲ့မှုများ ရှိပါသည်။ 

ဂျပန်နှင့် ဗီယက်နမ်နှစ်နိုင်ငံခေါင်းဆောင်များ တွေ့ဆုံခဲ့မှုတွင် ပူးပေါင်းဆောင်ရွက်မှု သဘောတူစာချုပ် (၂) စောင် လက်မှတ်ရေးထိုးနိုင်ခဲ့ပြီး ကုန်သွယ်မှုများမှာ များသောအားဖြင့် စွမ်းအင်ကဏ္ဍသုံးပစ္စည်းများနှင့် လျှပ်ကူးပစ္စည်းများ ကုန်သွယ်မှု ဖြစ်ပါသည်။ 

ဘာသာပြန်ဆိုသူ-ဒေါ်မေသူဌေး၊ ဦးစီးအရာရှိ၊ နစက-၃

ကိုးကား-The Straits Times

ကမ္ဘာ့ထိပ်တန်း အားကစားဝတ်စုံထုတ်လုပ်ရေး ကုမ္ပဏီကြီး Adidas သည် ၂၀၂၅ ဘဏ္ဍာရေးနှစ်အတွက် ဈေးကွက်ခန့်မှန်းချက်နှင့် အစီအစဉ်များ ရေးဆွဲရန် ယခုအချိန်တွင် ရွှေ့ဆိုင်းထားကြောင်း အင်္ဂါနေ့ (ဧပြီ ၂၉) က ထုတ်ပြန်ကြေညာလိုက်ပါသည်။ အဓိကအကြောင်းရင်းမှာ အမေရိကန် ပြည်ထောင်စု၏ ကုန်သွယ်ရေးနှင့် အကောက်ခွန်ဆိုင်ရာမူဝါဒများနှင့် ပတ်သက်၍ မရေရာမှုများ ရှိနေသဖြင့် ဖြစ်ပါသည်။

“ပုံမှန်အားဖြင့် မိမိတို့၏ ပထမလေးလပတ် ကောင်းမွန်သော ရလဒ်များအရ ဝင်ငွေနှင့် အမြတ်ငွေခန့်မှန်းချက်များ ခန့်မှန်းတွက်ချက်နိုင်ခဲ့မည် ဖြစ်သော်လည်း လက်ရှိအခြေအနေတွင် အကောက်ခွန်ဆိုင်ရာ မရေရာမှုများက ထိုသို့ပြုလုပ်ရန် အခက်အခဲဖြစ်စေသည်” ဟု Adidas ၏ အမှုဆောင် အရာရှိချုပ် Bjørn Gulden က ရှင်းပြခဲ့ပါသည်။

ကုမ္ပဏီ၏ ထုတ်ပြန်ချက်အရ အမေရိကန်၏ အကောက်ခွန် မြှင့်တင်မှုများကြောင့် Adidas ထုတ်ကုန်များ၏ ဈေးနှုန်းများကို တက်လာစေမည်ဟု ခန့်မှန်းထားသော်လည်း ယခုအချိန်တွင် မည်မျှဈေးတက်မည်၊ အမေရိကန် ၏ ဝယ်လိုအားအပေါ် မည်သို့သက်ရောက်မည်ကို တိကျစွာ ခန့်မှန်း၍ မရသေးကြောင်း ဖော်ပြထားသည်။

Gulden က Adidas သည် တရုတ်နိုင်ငံတွင် ထုတ်လုပ်သော ကုန်ပစ္စည်းများကို အမေရိကန်သို့ တင်ပို့မှုကို အနည်းဆုံးအဆင့်သို့ လျှော့ချထားပြီ ဖြစ်သော်လည်း အမေရိကန်၏ မြင့်မားသော အကောက်ခွန် နှုန်းထားများကြောင့် အနည်းငယ်ထိခိုက်နိုင်သည့် အခြေအနေတွင် ရှိနေဆဲဖြစ်ကြောင်း ဖြည့်စွက်ပြောကြားခဲ့ပါသည်။

“အမေရိကန်နှင့် အခြားကုန်တင်ပို့သည့် နိုင်ငံများအကြား ဆက်လက် ဖြစ်ပေါ်နေသော ညှိနှိုင်းမှုများနှင့်ပတ်သက်၍ မရေရာမှုများရှိနေသဖြင့် နောက်ဆုံးအကောက်ခွန်နှုန်းထားများ မည်သို့ဖြစ်မည်ကို မိမိတို့ အတိအကျ မသိရသေးပါ။ ထို့ကြောင့် မိမိတို့၏ နောက်ဆုံး ဆုံးဖြတ်ချက်များကို ချမှတ်၍မရနိုင်သေးပါ” ဟု Gulden က ထပ်လောင်းရှင်းပြခဲ့သည်။

Adidas ၏ အဆိုပါဆုံးဖြတ်ချက်သည် ကမ္ဘာ့ကုန်သွယ်ရေးစနစ်တွင် မရေရာမှုများ တိုးပွားလာနေသည့် အခြေအနေကို ထင်ဟပ်စေပြီး အခြားသော နိုင်ငံတကာကုမ္ပဏီများအတွက်လည်း သတိပေးချက် တစ်ရပ်အဖြစ် ရှိနေပါသည်။

ကိုးကား- Reuters

Photo: Yahoo Finance

ဘာသာပြန်ဆိုသူ-ဒေါ်မေသူဌေး၊ ဦးစီးအရာရှိ၊ နစက-၃