အမေရိကန်နှင့် အီရန်နိုင်ငံတို့ကြားတွင် နိုင်ငံရေးတင်းမာမှုများ ဆက်တိုက် ဖြစ်ဖော်နေသည့်အချိန်၌ အီရန်ငွေကြေး ရီယယ်က စံချိန်တင် ကျဆင်းမှုများဖြစ်နေပါသည်။ ဧပြီ ၅ ရက် က ပေါက်ဈေးဆိုရင် ကန် ၁ ဒေါ်လာကို ရီယယ် ၁,၀၄၃,၀၀၀ အထိဖြစ်ခဲ့ပါသည်။ 

ပါရှန်နှစ်သစ်ကူးကာလတွင် ရီယယ်သည် ၁ သန်းကျော် ကျဆင်းသွားခဲ့ပြီး ငွေကြေးဆိုင်များပိတ်ကာ လမ်းများပေါ်တွင်သာ အလွတ်သဘော ရောင်းဝယ် ဖောက်ကားမှုများကြောင့် စျေးကွက်အပေါ် ထပ်လောင်း ဖိအားများ ဖြစ်ပေါ်စေခဲ့ပါသည်။ သို့သော် ကုန်သည်များသည် ဧပြီ ၅ ရက်တွင် အလုပ်ပြန်စသည်နှင့်အမျှ နှုန်းထားသည် တစ်ဒေါ်လာလျှင် ၁,၀၄၃,၀၀၀ သို့ ပို၍ကျဆင်းသွားပြီး အနိမ့်ဆုံးသို့ ရောက်ရှိသွားပါသည်။ 

အီရန်နိုင်ငံ၏ ငွေကြေးဖလှယ်မှု၏ ဗဟိုချက်ဖြစ်သော တီဟီရန်မြို့ရှိ ဖာဒိုးဆီလမ်းတွင် အချို့သော ကုန်သည်များသည် ရီယယ် မည်မျှအထိ ကျဆင်းနိုင်သည်ကို မသေချာသဖြင့် ငွေလဲ နှုန်းထားပြသသည့် အီလက်ထရွန်နစ် ဆိုင်းဘုတ်များကိုပင် ပိတ်လိုက်ကြပါသည်။

ကိုးကား-အင်တာနက်စာမျက်နှာ

ရုရှားနိုင်ငံနှင့် အမေရိကန်အကြား ကုန်သွယ်ရေး၊ ကူးသန်းရောင်းဝယ်ရေး နှင့် စီးပွားရေးဆက်ဆံရေးတို့မှာ လက်ရှိအချိန်မှာ လုံးဝနီးပါး မရှိတော့ ပါကြောင်း၊ အမေရိကန်၏ အခွန်စည်းကြပ်မှုစည်းမျဉ်းများ အောက်တွင် ထိခိုက်ခံရသည့်နိုင်ငံများစာရင်းတွင် ရုရှားမပါဝင်သည်မှာ အထူးအဆန်း မဟုတ်ကြောင်း ကရင်မလင်ပြောခွင့်ရ Dmitry Peskov က TASS သတင်းဌာနမေးခွန်းကို ဖြေကြားလိုက်ပါသည်။

“အမေရိကန်၏ အခွန်စည်းကြပ်မှုများက မိမိ(ရုရှား)တို့အတွက် မည်သည့် အကျိုးသက်ရောက်မှုမျှ မရှိပါ၊ ကမ္ဘာ့စီးပွားရေးကတော့ အဆိုပါ အဆုံး အဖြတ်များကြောင့် အလွန်အမင်း ထိတ်လန့်မှုများနှင့် တုံ့ပြန်နေကြသည် ကို တွေ့ရပါကြောင်း၊ ရုရှားသမ္မတနှင့်အစိုးရတို့၏ ကျွမ်းကျင်သည့် လုပ်ဆောင်မှုများကြောင့် ယခုအချိန်မှာတော့ မိမိတို့၏ စီးပွားရေးသည် တည်တည်ငြိမ်ငြိမ်ဖြင့် သိသိသာသာ တိုးတက်နေပါကြောင်း” ၎င်းက ဖြေကြားထားပါသည်။ 

ဧပြီလ ၂ ရက်က ဒေါ်နယ်ထရမ့်သည် အမေရိကန်သို့ တင်သွင်းလာသော ကုန်စည်များအပေါ် ၁၀ % အခြေခံအခွန်အဖြစ် ချမှတ်ရန် ကြေညာခဲ့ပြီး ထိုအခွန်သည် နိုင်ငံတော်တော်များများအတွက် ပိုမိုမြင့်မားသော အခွန် နှုန်းထားများ ဖြစ်လာနိုင်ပြီး တန်ပြန်တုံ့ပြန်မှု ပြုလုပ်ရန် လုပ်ဆောင်နေ ကြပါသည်။ 

ကိုးကား- ကရင်မလင်

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊နစက-၃

တရုတ်ကွန်မြူနစ်ပါတီ ဗဟိုကော်မတီ နိုင်ငံရေးဗျူရိုအဖွဲ့ဝင်၊ နိုင်ငံတော်ကောင်စီ ဒုတိယဝန်ကြီးချုပ် ဟယ်လိဖုန်း သည် Apple၊ Pfizer၊ Brookfield၊ Medtronic၊ Mastercard၊ Eli Lilly၊ Cargill၊ Corning စသည့် နာမည်ကျော် နိုင်ငံစုံကုမ္ပဏီများမှ တာဝန်ခံများနှင့် မတ် ၂၃ ရက် ညနေပိုင်းက တွေ့ဆုံပြီး ကမ္ဘာလုံးဆိုင်ရာနှင့် တရုတ်နိုင်ငံ၏ စီးပွားရေးအခြေအနေ၊ တရုတ်-အမေရိကန် ကုန်သွယ်စီးပွား ပူးပေါင်းဆောင်ရွက်မှု၊ တရုတ်နိုင်ငံတွင် ရင်းနှီးမြှုပ်နှံမှုတိုးချဲ့ရေး စသည်နှင့်စပ်လျဉ်း၍ အမြင်သဘောချင်း ဖလှယ်ခဲ့ကြသည်။

ဟယ်လိဖုန်းက တရုတ်နိုင်ငံ၏ စီးပွားရေးသည် ခံနိုင်ရည်စွမ်းအားကောင်းမှု၊ အလားအလာကြီးမားမှု၊ တက်ကြွ စွမ်းအားပြည့်ဝမှုရှိကြောင်း၊ တရုတ်နိုင်ငံသည် အရည်အသွေးမြင့်ဖွံ့ဖြိုးတိုးတက်ရေးကို မပြောင်းမလဲခိုင်မာစွာ ဆောင်ရွက်သွားမည်ဖြစ်သလို ပြည်ပအဆင့်မြင့်တံခါးဖွင့်လှစ်ရေးကို တိုးချဲ့သွားမည်ဖြစ်ပြီး စီးပွားရေးပတ်ဝန်းကျင် ကောင်းမွန်အောင် ဆက်လက်ဆောင်ရွက်သွားမည်ဖြစ်ရာ တရုတ်နိုင်ငံတွင် နိုင်ငံစုံကုမ္ပဏီများ ရင်းနှီးမြှုပ်နှံရန်၊ တိုးတက်မှုအခွင့်အလမ်းများ မျှဝေခံစားရန် ဖိတ်ခေါ်ကြောင်း ပြောကြားခဲ့သည်။

ကိုးကား- New China

နှုန်းထားမြင့်မားသောစည်းကြပ်ခွန်နှင့် နောက်ဆက်တွဲပေါ်ပေါက်လာမည့် ကုန်သွယ်ရေးတင်းမာမှုများက ကမ္ဘာလုံးဆိုင်ရာစီးပွားရေးကို ထိခိုက်စေနိုင်ပြီး စီးပွားရေးဖွံ့ဖြိုးမှုထက် ဆုတ်ယုတ်ကျဆင်းမှုဆီသို့သာ တွန်းပို့လိမ့်မည်ဖြစ်ကြောင်း ထိပ်တန်းစီးပွားရေးပညာရှင်တစ်ဦးက သတိပေးခဲ့သည်။ စည်းကြပ်ခွန်များက သွင်းကုန်များအပေါ် ကုန်ရောင်းခွန်ပုံစံတစ်မျိုးဖြင့် အစိုးရ၏ အခွန်ဘဏ္ဍာကို တိုးပွားစေနိုင်သော်လည်း ယင်းအခွန်အကောက်များက သွင်းကုန်စရိတ်စကများကို မြင့်တက်စေသလို စားသုံးသူများက ဈေးနှုန်းပိုမိုမြင့်မားဖွယ်ရှိသော ပြည်တွင်းမှ အခြားရွေးချယ်စရာများကို ပြောင်းလဲအာရုံစိုက်လာသည့်အတွက် ငွေကြေးဖောင်းပွမှုကို ဖြစ်ပေါ်စေနိုင်သည်ဟု လန်ဒန် ဘောဂဗေဒနှင့် နိုင်ငံရေးသိပ္ပံတက္ကသိုလ်မှ စီးပွားရေးပညာရှင် အင်းဘက်ဂ်က ဆိုသည်။

စည်းကြပ်ခွန်များကြောင့် ပိုမိုကျွမ်းကျင်သော နိုင်ငံတကာကုန်ပစ္စည်းပေးသွင်းသူများဆီမှ ကျွမ်းကျင်မှု ပိုနည်းသော ပြည်တွင်းထုတ်လုပ်သူများဆီသို့ ထုတ်လုပ်မှုပြောင်းလဲခြင်းက ကမ္ဘာလုံးဆိုင်ရာ ကုန်သွယ်ရေးကို ထိခိုက်စေသလို စီးပွားရေးတိုးတက်မှုကိုလည်း ပိုမိုအဟန့်အတား ဖြစ်စေမည်ဟု ၎င်းက ဆင်ဟွာသို့ ပြောကြားခဲ့သည်။

နှုန်းထားမြင့်မားသော စည်းကြပ်ခွန်များနှင့် နောက်ဆက်တွဲကုန်သွယ်ရေးစစ်ပွဲက ကမ္ဘာလုံးဆိုင်ရာ စီးပွားရေးကို ဆိုးကျိုးဖြစ်ပေါ်စေသည့် အလေ့အထရှိကြောင်း အဆိုပါ စီးပွားရေးပညာရှင်က ဆိုသည်။ ယင်းက စီးပွားရေးတိုးတက်မှုထက် စီးပွားရေး ဆုတ်ယုတ်ကျဆင်းမှုနှင့် အကျဘက်ဆီသို့သာ တစ်စတစ်စ ဦးတည်စေဖွယ်ရှိကြောင်း ၎င်းက ဆက်လက်ပြောကြားခဲ့သည်။

ထို့ပြင် စည်းကြပ်ခွန်များက အထူးသဖြင့် ကနေဒါမှ စက်ပစ္စည်းအစိတ်အပိုင်းများကို မှီခိုနေရသော အမေရိကန် မော်တော်ယာဉ်ထုတ်လုပ်သူများကဲ့သို့ နယ်စပ်ဖြတ်ကျော် တင်သွင်းသည့် အစိတ်အပိုင်းများအပေါ်  အားထားနေရသည့် လုပ်ငန်းများအပါအဝင် ကမ္ဘာလုံးဆိုင်ရာထောက်ပံ့ကွင်းဆက်များကို အကြီးအကျယ်ထိခိုက်စေနိုင်သည်ဟု ၎င်းကဆိုသည်။  

ကိုးကား-ဆင်ဟွာ

ကမ္ဘာ့စီးပွားရေးအခင်းအကျင်းသည် ငွေကြေးပေါင်းစုံသုံးစွဲသည့်စနစ်သို့ ပြောင်းလဲကျင့်သုံးနေ ပြီဖြစ်သည်နှင့်အညီ တရုတ်နိုင်ငံ၏ ယွမ် ငွေကြေးကို နိုင်ငံတကာသုံးငွေကြေး ဖြစ်လာစေရန် အစဉ်တစိုက် ကြိုးပမ်းချက်များနှင့် နည်းပညာပြောင်းလဲလာမှုများသည် စီးပွားရေးပညာရှင်များက နည်းပညာဦးဆောင်မှုနေရာ‌ အပြောင်းအလဲများကြောင့် အမေရိကန် ဒေါ်လာ၏ကြီးစိုးမှု လျော့ကျလာပြီဖြစ်ကြောင်း ပြီးခဲ့သည့် တနင်္လာနေ့ (မတ် ၂၄) က စီးပွားရေးပညာရှင်များက သုံးသပ်ထားကြပါသည်။

ကုန်သွယ်မှုများတွင် တရုတ်ယွမ်ငွေအသုံးပြုမှုသည် လွန်ခဲ့သည့် ၁၀ နှစ် အတွင်း ၀ ရာခိုင်နှုန်းမှ ၃၀ ရာခိုင်နှုန်းအထိ တိုးမြင့်အသုံးပြုလာနိုင်ပြီး တရုတ်ကုန်စည်စီးဆင်းမှုစုစုပေါင်း၏ ထက်ဝက်ခန့်ကို တရုတ်ယွမ်ငွေ ဖြင့် ငွေပေးချေမှုပြုလုပ်နေပြီ ဖြစ်ကြောင်း လန်ဒန်စီးပွားရေး တက္ကသိုလ်မှ ပါမောက္ခ Jin Keyu က ဆွေးနွေးပွဲတွင် ပြောကြားခဲ့ပါသည်။ 

စီးပွားရေးအချက်အလက်များအရ ဒေါ်လာတန်ဖိုးသည် တဖြည်းဖြည်း ကျဆင်းနေပြီဖြစ်ပြီး ဒေါ်လာကို သီးသန့်ငွေကြေးအဖြစ် ထားရှိမည့်အစား ယွမ်ငွေထားရှိမှုသည် ၂ ရာခိုင်နှုန်းမှ ၁၁ ရာခိုင် နှုန်းအထိ ခုန်တက်ခဲ့ကြောင်းနှင့် ရေရှည်တွင်ငွေကြေးပေါင်းစုံသုံးစွဲသည့်စနစ်သို့ ပြောင်းလဲလာမည်ဖြစ်သည်ကို စီးပွားရေးပညာရှင်များအားလုံးက ဂရုပြုနေပြီဖြစ်ကြောင်း လန်ဒန်စီးပွားရေး တက္ကသိုလ်မှ ပါမောက္ခ Keyu က ထပ်မံ ပြောကြားခဲ့ပါသည်။

ကိုးကား-South China Morning Post

ဘာသာပြန်ဆိုသူ-ဒေါ်မေသူဌေး၊ ဦးစီးအရာရှိ၊ နစက-၃

မတ်လအတွင်း စျေးနှုန်းကျဆင်းလာမှုကြောင့် ရုရှားမှ အိန္ဒိယနိုင်ငံသို့ ရေနံစိမ်းတင်ပို့မှုများ ပြန်လည်တိုးတက်လာကြောင်း Financial express သတင်းစာက မတ်လ ၂၄ရက် (တနင်္လာနေ့)တွင် ဖော်ပြခဲ့သည်။ စျေးနှုန်းချိုသာမှုသည် ရေနံတင်သင်္ဘောများရရှိနိုင်မှုကို တိုးမြင့်စေပြီး အိန္ဒိယကုမ္ပဏီများအတွက် ရေနံသယ်ယူမှုကို ပိုမိုလွယ်ကူစေခဲ့ပါသည်။ ထို့ကြောင့် ယခင်လများက ကျဆင်းခဲ့သော ရုရှားရေနံတင်သွင်းမှုသည် မတ်လတွင် ပြန်လည်တိုးတက်လာခဲ့ပါသည်။

Kpler ၏ စာရင်းဇယားအရ မတ်လပထမ ၂၁ ရက်အတွင်း အိန္ဒိယ၏ ရုရှားရေနံတင်သွင်းမှုသည် သိသိသာသာတိုးလာခဲ့ပြီး ပျမ်းမျှတစ်ရက်လျှင် ဗြိတိသျှပုံစံ ဘားရယ်လ် ၁.၈၅ သန်း (bpd) အထိ ရှိခဲ့ပါသည်။ ယခင်လ ဖြစ်သော ဖေဖော်ဝါရီလတွင် ၁.၄၇ သန်း bpd နှင့် ဇန်နဝါရီလတွင် ၁.၆၄ သန်း bpd သာရှိခဲ့ပါသည်။ မတ်လတွင် ရုရှားရေနံသည် အိန္ဒိယ၏စုစုပေါင်းရေနံတင်သွင်းမှု၏ ၃၅% ကျော်ကို ကိုယ်စားပြုနေပြီး ဖေဖော်ဝါရီလက ၃၁% သာရှိခဲ့ပါသည်။ အဆိုပါတိုးတက်မှုက ရုရှားအား အာရှနိုင်ငံများသို့ အဓိကရေနံပေးသွင်းသူအဖြစ် ပိုမိုခိုင်မာစေခဲ့ပါသည်။

အနောက်နိုင်ငံများ၏ ဖေဖော်ဝါရီလပိုင်းက ပိုမိုတင်းကျပ်လာသော ပိတ်ဆို့မှုများအပြီး အိန္ဒိယသည် ရုရှားရေနံကို ဘားရယ်လ်တစ်ခု (ရေနံ တစ်စည်) လျှင် အမေရိကန်ဒေါ်လာ ၆၀ အောက် စျေးနှုန်းဖြင့် ရောင်းချပါက၊ အရေးယူပိတ်ဆို့ခံမထားရသော ရေနံတင်သင်္ဘောများဖြင့် သယ်ယူပို့ဆောင်ကာ ပိတ်ဆို့ခံအဖွဲ့အစည်း သို့မဟုတ် ပုဂ္ဂိုလ်များ မပါဝင်ပါက ဆက်လက်ဝယ်ယူမည်ဟု ကတိပြုခဲ့ကြောင်း Financial express က ဖော်ပြခဲ့ပါသည်။

Kpler မှ လေ့လာသုံးသပ်သူ ဆူမစ်ရီတိုလီယာက “ယူကရိန်း၏ ရုရှား စက်ရုံများကို ဒရုန်းတိုက်ခိုက်မှုများကြောင့် ရုရှား၏ ပြည်တွင်းရေနံ လိုအပ်ချက် ဖေဖော်ဝါရီနှင့် မတ်လများတွင် ကျဆင်းသွားခြင်းက ရုရှား ရေနံထုတ်လုပ်မှုကို တိုးစေခဲ့ပါသည်။ ရုရှားရေနံထွက်လာမှု တိုးလာခြင်းက ယူရယ်လ် (ရုရှား၏ အဓိကရေနံအမျိုးအစား) စျေးနှုန်းကို ဖေဖော်ဝါရီ တွင် ပျမ်းမျှဒေါ်လာ ၅၉.၉ နှင့် မတ်လတွင် ဒေါ်လာ ၅၆ အထိ ကျဆင်းစေခဲ့ပါသည်။ ယင်းသည် G7 ၏ သတ်မှတ်စျေးနှုန်းထက် နိမ့်နေသေးသဖြင့် ဝယ်ယူသူနှင့် ရောင်းချသူများအနေဖြင့် အနောက်တိုင်းသင်္ဘောနှင့် အာမခံဝန်ဆောင်မှုများကို အသုံးပြုနိုင်ဆဲဖြစ်သည်” ဟု ဖော်ပြခဲ့သည်။

Bloomberg သတင်းအရ အိန္ဒိယ၏ ရုရှားမှ ရေနံတင်သွင်းမှုသည် ယခင်လတွင် ၂၀၂၃ခုနှစ်၊ ဇန်နဝါရီလပြီးနောက် အနိမ့်ဆုံးသို့ ရောက်ရှိခဲ့ပြီး အမေရိကန်က ရုရှားစွမ်းအင်ကုမ္ပဏီများနှင့် ရေနံတင်သင်္ဘော ၁၈၃ စီးကို အရေးယူပိတ်ဆို့မှုများချမှတ်အပြီးတွင် ဖြစ်ပွားခဲ့ပါသည်။ 

အဆိုပါအစီအမံများသည် ကမ္ဘာ့တတိယအကြီးဆုံး ရေနံတင်သွင်းသူဖြစ်ပြီး ပင်လယ်ရေနံသယ်ယူမှုကို မှီခိုနေရသော အိန္ဒိယနှင့် ကမ္ဘာ့အကြီးဆုံးရေနံတင်သွင်းသူ တရုတ်တို့အပေါ် သက်ရောက်မှုရှိခဲ့ပါသည်။

ကိုးကား - RT

ကမ္ဘာပေါ်ရှိဗဟိုဘဏ်များသည် ပြီးခဲ့သည့် ၂၀၂၄ ခုနှစ်အတွင်း ရွှေချောင်း ၁၀၄၄ ဒသမ ၆ မက်ထရစ်တန်ချိန်ကို အရန်အဖြစ်သိုလှောင်ရန် ဝယ်ယူခဲ့ကြောင်း ကမ္ဘာ့ရွှေကောင်စီက ထုတ်ပြန်သည့် အစီရင်ခံစာ တစ်စောင်တွင် ဖော်ပြထားသည်။

ကမ္ဘာ့နိုင်ငံများရှိ ဗဟိုဘဏ်များသည် ဒေါ်လာငွေကြေးအစား ရွှေချောင်းများကို ပိုမိုဝယ်ယူ၍ အရန်အဖြစ်သိုလှောင်ခဲ့ခြင်းကြောင့် ၂၀၂၄ ခုနှစ်သည် ရွှေချောင်းများအား မက်ထရစ်တန်ချိန်ပေါင်း ၁၀၀၀ ကျော်ထက် ပိုမိုများပြားသည့် ပမာဏကိုဝယ်ယူသည့် တတိယမြောက်နှစ် ဖြစ်လာခဲ့သည်ဟု အစီရင်ခံစာ တစ်စောင်တွင် ဖော်ပြထားသည်။

ထို့ပြင် ဗဟိုဘဏ်များ၏ ရွှေချောင်းဝယ်ယူမှု ပမာဏသည် ၂၀၂၁ ခုနှစ်မှ ၂၀၂၄ ခုနှစ်အတွင်း နှစ်ဆမြင့်တက်လာပြီး လာမည့် ၁၂ လအတွင်း ကမ္ဘာပေါ်ရှိ ဗဟိုဘဏ်များအနက် ၈၁ ရာခိုင်နှုန်းသည် ရွှေချောင်းကို အရန်အဖြစ် သိုလှောင်ရန်အတွက် ပိုမိုဝယ်ယူမည်ဟု မျှော်လင့်ထားသည်။

ရွှေချောင်းများကို အရန်အဖြစ် အများဆုံး သိုလှောင်ထားသည့် နိုင်ငံ ၁၀ နိုင်ငံတွင် အမေရိကန်ပြည်ထောင်စုက ထိပ်ဆုံးမှ ဦးဆောင်နေပြီး ရုရှားနိုင်ငံက နံပါတ် ၅ နေရာနှင့် တရုတ်နိုင်ငံက နံပါတ် ၆ နေရာတို့တွင် ရပ်တည်လျက်ရှိသည်။

ရုရှားဗဟိုဘဏ်က  အရန်အဖြစ် သိုလှောင်ထားသည့် ရွှေချောင်းပမာဏမှာ ၂၃၃၂ ဒသမ ၇၄  မက်ထရစ်တန်ရှိပြီး တရုတ်နိုင်ငံကမူ ၂၂၇၉ ဒသမ ၅၆ မက်ထရစ်တန် ကိုသိုလှောင်ထားသည်ဟု အစီရင်ခံစာတွင် ဆက်လက် ဖော်ပြထားသည်။

Source: https://myawady.net.mm/

တရုတ်စိုက်ပျိုးရေးသိပ္ပံပညာရှင်များသည် တိရစ္ဆာန်အစာအတွက် ပဲပိစပ် အစားထိုး ပရိုတင်းဓာတ်ကြွယ်ဝသော ပြောင်းဖူးမျိုးစိတ် အသစ်များကို တီထွင်လျက်ရှိပြီး ၎င်းသည် ကောက်ပဲသီးနှံသွင်းကုန်အပေါ် မှီခိုမှု ကို လျှော့ချရန် ကြိုးပမ်းမှုအတွက် အပြောင်းအလဲတစ်ခု ဖြစ်လာနိုင်သည်။

နိုင်ငံတွင်း အသားနှင့်နို့ထွက်ပစ္စည်းများ စားသုံးမှုများပြားလာသည့်အတွက် မကြာသေးမီ နှစ်များအတွင်းက တိုးချဲ့လာသည့် မွေးမြူရေးလုပ်ငန်းများအတွက် တိရစ္ဆာန်အစာ လိုအပ်ချက်ဖြစ်သည့် ပဲပိစပ် ပမာဏ တိုးမြှင့်တင်သွင်းရန် အကြောင်းအရင်းဖြစ်လာသည်။

ပေကျင်းအစိုးရသည် ပြည်ပစိုက်ပျိုးရေးထွက်ကုန်များအပေါ် မှီခိုမှု တိုးမြှင့်လာခြင်းသည် နိုင်ငံ၏ စားနပ်ရိက္ခာဖူလုံမှုအတွက် ခြိမ်းခြောက်မှုတစ်ရပ် အဖြစ်လည်းကောင်း၊ အမေရိကန်နှင့် ကုန်သွယ်ရေးစစ်ပွဲ တိုးမြှင့်လာခြင်း၏ ပဋိပက္ခဖြစ်နိုင်ခြေတစ်ရပ်အဖြစ်လည်းကောင်း ရှုမြင်သည်။

ထို့ကြောင့် တိရစ္ဆာန်အစာ ပဲပိစပ်အစားထိုးအဖြစ် ပရိုတင်းဓာတ် ကြွယ်ဝသော ပြောင်းဖူးမျိုးစိတ်များကို တီထွင်ထုတ်လုပ်ခြင်းသည် လက်တွေ့ ကျသည့် ဖြေရှင်းနည်းဖြစ်ပြီး၊ အခြားမျိုးကွဲများစွာကိုလည်း တရုတ်နိုင်ငံ Huazhong စိုက်ပျိုးရေးတက္ကသိုလ် သုတေသီများမှ တီထွင်ထုတ်လုပ်လျက်ရှိကြောင်း တက္ကသိုလ်၏ ဥက္ကဋ္ဌက ပြောကြားခဲ့သည်။

တရုတ်နိုင်ငံတွင် ပြောင်းဖူးပမာဏ အများအပြား စိုက်ပျိုးထုတ်လုပ်လျက်ရှိပြီး ပြောင်းဖူးတွင် ပရိုတင်းပါဝင်မှု ၁%မျှ တိုးတက်လာပါက ပြည်ပပဲပိစပ် ဝယ်လိုအား တန်ချိန် ၈ သန်းထိ လျှော့ချနိုင်ကြောင်း Huazhong စိုက်ပျိုးရေးတက္ကသိုလ် ဥက္ကဋ္ဌ Yan Jianbing က ပြီးခဲ့သည့် အပတ်၌ ကျင်းပခဲ့သည့် တရုတ်နိုင်ငံ၏ ထိပ်တန်းဥပဒေပြုရေးနှင့် အတိုင်ပင်ခံ အဖွဲ့ နှစ်ပတ်လည် အစည်းအဝေးတွင် သတင်းထောက်များအား ပြောကြားခဲ့သည်။

ပထဝီနိုင်ငံရေးတင်းမာမှုများနှင့် နိုင်ငံတကာဈေးကွက် မတည်ငြိမ်မှုများ မြင့်တက်လာခြင်းကြောင့် တရုတ်နိုင်ငံသည် ပြည်တွင်းစားနပ်ရိက္ခာ ဖူလုံရေးကို ပိုမိုအလေးထားဆောင်ရွက်လျက် ရှိသည်။

တရုတ်နိုင်ငံ၏ ပဲပိစပ်သွင်းကုန်ပမာဏသည် ကမ္ဘာ့ကောက်ပဲသီးနှံ စုစုပေါင်းကုန်သွယ်မှု၏ ၆၀%ခန့်ရှိပြီး၊ အမေရိကန်နိုင်ငံနှင့် ဘရာဇီး နိုင်ငံတို့သည် အဓိကတင်သွင်းသည့်နိုင်ငံများ ဖြစ်ပါသည်။ 

ကိုးကား- South China Morning Post

ဘာသာပြန်ဆိုသူ-ဒေါ်ငြိမ်းဆုသာ၊ ဦးစီးအရာရှိ၊ နစက-၃

ဂျာမနီအခြေစိုက် ကမ္ဘာကျော် မော်တော်ကားကုမ္ပဏီဖြစ်သည့် BMW သည် ၂၀၂၃ ခုနှစ် အမြတ်ငွေနှင့် နှိုင်းယှဉ်ပါက ၂၀၂၄ ခုနှစ်တွင် ၃၇ ရာခိုင်နှုန်း (ယူရို ၇ ဒသမ ၇ ဘီလီယံ) အထိ အမြတ်စံချိန်တင်ကျဆင်းခဲ့ကြောင်း အဆိုပါကုမ္ပဏီ၏ ၂၀၂၄ ခုနှစ် ဘဏ္ဍာရေးအစီရင်ခံစာဖော်ပြချက်အရ သိရ ပါသည်။

BMW ကုမ္ပဏီအချက်အလက်များအရ BMW ကား ဝယ်လိုအားအများဆုံး ဈေးကွက်မှာ ဥရောပဖြစ်ပါသည်။ စုစုပေါင်းကားထုတ်လုပ်မှု၏ ၄၂.၇ ရာခိုင်နှုန်းကို ဝယ်ယူကြပါသည်။ ၎င်းနောက်တွင် အာရှသည် ဒုတိယ အကြီးဆုံး ဈေးကွက်နေရာတွင်လိုက်နေပြီး ၃၂.၇ ရာခိုင်နှုန်းရှိပါသည်။ မြောက်အမေရိကတိုက်နှင့် တောင်အမေရိကတိုက်တို့မှာ တတိယ ၂၂.၄ ရာခိုင်နှုန်း ဖြစ်ပြီး ကျန်နိုင်ငံများကမူ ၂.၂ ရာခိုင်နှုန်း ဝယ်ယူကြပါသည်။

နိုင်ငံအားဖြင့်ဆိုလျှင် တရုတ်နိုင်ငံသည် BMW ကား ဝယ်လိုအား အများဆုံး နိုင်ငံဖြစ်ပြီး ၂၉.၂ ရာခိုင်နှုန်း ရှိပါသည်။ အမေရိကန်သည် ဒုတိယ ဝယ်လိုအား အများဆုံးဖြစ်ပြီး ၁၆.၃ ရာခိုင်နှုန်းရှိပါသည်။ ဂျာမနီသည် ၁၀.၈ ရာခိုင်နှုန်းဖြင့် တတိယနေရာတွင် ရပ်တည်နေပါသည်။

ဂျာမနီစီးပွားရေးသုတေသနအဖွဲ့အစည်း Ifo ထုတ်ပြန်ချက်အရ  လက်ရှိ အခြေအနေတွင် BMW သည် ပြီးခဲ့သည့် ငါးနှစ်တာကာလအတွင်း ပြည်တွင်းဈေးကွက်မှာရော ပြည်ပဈေးကွက်မှာပါ ရောင်းလိုအား စံချိန်တင် ထိုးကျနေကြောင်း ဖော်ပြထားပါသည်။ ထိုသို့ ဖြစ်ရခြင်းမှာ တရုတ်ကားများ၏ ပြိုင်ဆိုင်မှု ပြင်းထန်လာခြင်း၊ EV အဆင့်မြင့်ကားများ ဥရောပတွင် အစားထိုးနေရာ ဝင်ယူလာခြင်း၊  ဂျာမနီပြည်တွင်းစီးပွားရေး မငြိမ်မသက် ဖြစ်နေခြင်းတို့အပြင် အမေရိကန်သမ္မတဒေါ်နယ်ထရမ့်၏ ဥရောပမှ တင်ပို့သည့်ကားများအပေါ် အခွန်တိုးမြှင့်စည်းကြပ်ရန် ခြိမ်းခြောက်နေမှုတို့ကြောင့် ဟု Ifo မှ ဈေးကွက်ကျွမ်းကျင်သူက ပြောကြားထားပါသည်။ 

ကိုးကား- TASS

Photo: MSN

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

အမေရိကန်သမ္မတ ဒေါ်နယ်ထရမ့်၏ ပိတ်ဆို့မှုချမှတ်ရေးမူဝါဒကြောင့် အမေရိကန် ဒေါ်လာငွေကြေး၏ လွှမ်းမိုးမှုအပေါ် ထိခိုက်စေနိုင်ကြောင်း အမေရိကန်စီးပွားရေး ပညာရှင် ဘယ်ရီ အိုက်ချင် ဂရစ်က ပြောကြားလိုက်သည်။

အမေရိကန်ဒေါ်လာ၏ လွှမ်းမိုးမှုသည် ကုန်သွယ်ရေး၊  မဟာမိတ်နိုင်ငံများနှင့် ဘဏ္ဍာရေးအဖွဲ့အစည်းများအပေါ် အမှီသဟဲပြုနေခြင်းကြောင့် ပြီးခဲ့သည့်လများအတွင်း ထရမ့်၏ပိတ်ဆို့မှုချမှတ်ရေး မူဝါဒသည် မဟာမိတ်နိုင်ငံများနှင့် ဆက်ဆံရေးကို လျှော့ပါးစေခဲ့ သို့မဟုတ် ပျက်စီးစေခဲ့ကြောင်း၊ ထို့ကြောင့် နောက်ဆုံးတွင် ဒေါ်လာငွေကြေးသည်   ကမ္ဘာပေါ်တွင် ဦးဆောင်နေသည့်   ငွေကြေးအဖြစ်မှ ကျဆင်းလာနိုင်ကြောင်း အိုက်ချင်ဂရစ်၏ ပြောကြားချက်ကို ကိုးကား၍ Financial Times သတင်းဌာနကဖော်ပြသည်။

လက်ရှိတွင် ကမ္ဘာ့နိုင်ငံအများအပြားက ကုန်သွယ်မှုပြုလုပ်ရာတွင် ဒေါ်လာငွေကြေးကို အသုံးပြုရန်ငြင်းဆန်လျက်ရှိပြီး အခြားငွေကြေးများအား အသုံးပြုလျက်ရှိသောကြောင့် အမေရိကန်အစိုးရ၏ ပိတ်ဆို့မှုချမှတ်ရေးမူဝါဒအား ပြန်လည်ပြင်ဆင်ရန် သမ္မတထရမ့်က ညွှန်ကြားခဲ့ရကြောင်း ဘဏ္ဍာရေးဝန်ကြီး  စကော့ ဘက်ဆန့်က အစောပိုင်းတွင်  ထုတ်ပြန်ထားသည်။

ကမ္ဘာပေါ်ရှိ နိုင်ငံအများအပြားက ကုန်သွယ်မှုလုပ်ဆောင်ရာတွင်  ဒေါ်လာငွေကြေးအား အသုံးပြုရန် ငြင်းဆန်လာခြင်းကြောင့် အမေရိကန်အစိုးရအနေဖြင့် အများဆုံးဖိအားပေး ပိတ်ဆို့သည့် နည်းလမ်းကို အသုံးမပြုဘဲ ပယ်ဖျက်သွားမည်ဖြစ်သည်ဟု  ဘက်ဆန့်က ဆက်လက် ပြောကြားသည်။

Source: https://myawady.net.mm/