ကိုင်ရို   ဇန်နဝါရီ ၂

၂၀၂၄ ခုနှစ်အတွင်း အီဂျစ်နိုင်ငံသို့ လာရောက်လည်ပတ်သည့် နိုင်ငံခြားသားခရီးသည် ၁၅ ဒသမ ၇ သန်း စံချိန်တင်ခဲ့ကြောင်း အီဂျစ်ဝန်ကြီးချုပ် မိုစတာဖာမတ်ဘောင်လီက ယမန်နေ့ကပြောကြားသည်။

အဆိုပါ အရေအတွက်သည် အီဂျစ်နိုင်ငံ၏ ခရီးသွားလုပ်ငန်းအတွက် ကောင်းမွန်သည့်ရလဒ်များကို ပိုင်ဆိုင်ရရှိခြင်းဖြစ်ကြောင်း ဝန်ကြီးချုပ် မတ်ဘောင်လီက အုပ်ချုပ်ရေးမြို့တော်သစ်ကိုင်ရို၌ အပတ်စဉ် ပြုလုပ်သည့် သတင်းစာရှင်းလင်းပွဲတွင် ပြောကြားသည်။ အထူးသဖြင့် Grand Egyptian ပြတိုက်ကို တရားဝင်ဖွင့်လှစ်မည်ဖြစ်ပြီး ၂၀၂၅ ခုနှစ်တွင် နိုင်ငံခြားသားခရီးသည် ၁၈ သန်းလာရောက်ရန် ရည်မှန်းထားသည်။

ကိုဗစ်-၁၉ ကပ်ရောဂါကြောင့် အီဂျစ်နိုင်ငံသို့ လာရောက်လည်ပတ်သည့် ခရီးသွားဦးရေသည် ၂၀၁၉ ခုနှစ်တွင် ၁၃ သန်းကျော်မှ ၂၀၂၀ ပြည့်နှစ်တွင် ၃ ဒသမ ၇ သန်းဝန်းကျင်သို့ သိသိသာသာ လျော့ကျသွားခဲ့ပြီး ၂၀၂၁ ခုနှစ်တွင် ရှစ်သန်းခန့် ၂၀၂၂ ခုနှစ်တွင် ၁၁ ဒသမ ၇ သန်းနှင့် ၂၀၂၃ ခုနှစ်တွင် ၁၄ ဒသမ ၉ သန်းလာရောက်ခဲ့ကြောင်း တရားဝင်အချက်အလက်များအရ သိရသည်။

ကိုးကား- ဆင်ဟွာ၊ ဘာသာပြန်- အောင်ကျော်ကျော်

Source: ကြေးမုံသတင်းစာ

ဂျေရုဆလင်   ဇန်နဝါရီ ၂

အစ္စရေးနိုင်ငံ၏ လူဦးရေသည် ၂၀၂၄ ခုနှစ် နှစ်ကုန်တွင် ၁၀ ဒသမ ၀၂၇ သန်းရောက်ရှိလာသဖြင့် ၂၀၂၃ ခုနှစ်ကုန်က ၉ ဒသမ ၉၁၅ သန်းရှိရာမှ ၁ ဒသမ ၁ ရာခိုင်နှုန်းတိုးလာကြောင်း နိုင်ငံ၏ စာရင်းအင်းဗျူရိုက ဇန်နဝါရီ ၂ ရက်တွင် နှစ်စဉ်ထုတ်ပြန်သည့် အစီရင်ခံစာအရ သိရသည်။

လူဦးရေး ၁၂ ဆကျော်တိုးလာ

၁၉၄၈ ခုနှစ် အစ္စရေးနိုင်ငံကို ထူထောင်ချိန်က လူဦးရေ ၈၀၆၀၀၀ သာရှိခဲ့ပြီး နောက်ပိုင်းတွင် ၁၂ ဆကျော်တိုးလာကြောင်း သိရသည်။ နိုင်ငံလူဦးရေ၏ လူ ၇ ဒသမ ၇၁ သန်းခန့်မှာ ဂျူးလူမျိုးများဖြစ်ပြီး ၂ ဒသမ ၁၀၄ သန်းမှာ အာရပ်လူမျိုးများဖြစ်ကြကြောင်း အချက်အလက်များအရ သိရသည်။

ပြည်ပသို့ ပြောင်းရွှေ့

၂၀၂၄ ခုနှစ်တွင် အစ္စရေးလူမျိုး ၈၂၇၀၀ မှာ ပြည်ပသို့ ပြောင်းရွှေ့ နေထိုင်ကြောင်း သိရသည်။

သေဆုံးသူ ၅၁၄၀၀ ရှိ

အစ္စရေးနိုင်ငံ၌ ၂၀၂၄ ခုနှစ်တွင် မွေးကင်းစကလေးငယ် ၁၈၁၀၀၀ ရှိပြီး သေဆုံးသူ ၅၁၄၀၀ ရှိကြောင်း ထုတ်ပြန်ချက်အရ သိရသည်။

ဆင်ဟွာ

Source: မြန်မာ့အလင်းသတင်းစာ

ရုရှားစွမ်းအင်ကုမ္ပဏီကြီး Gazprom က ယူကရိန်းကိုဖြတ်ပြီး သဘာဝဓာတ်ငွေ့ပေးပို့ခြင်းကို ရပ်တန့်လိုက်ပြီ ဖြစ်ကြောင်း ဇန်နဝါရီ ၁ရက်နေ့က ထုတ်ပြန်ခဲ့ပါသည်။ ၂၀၂၂ ခုနှစ်တွင် ယူကရိန်းနှင့် ရုရှား စစ်ပွဲစတင်ခဲ့သော်လည်း ရုရှားသည် ယူကရိန်းကိုဖြတ်ပြီး ဓာတ်ငွေ့ကို ဥရောပသို့ ပို့ဆောင်ခဲ့ပါသည်။

Gazprom က ယခုကဲ့သို့ရပ်တန့်ရခြင်းသည် ဓာတ်ငွေ့ သယ်ယူပို့ဆောင်ရေး သဘောတူညီချက်အား သက်တမ်းတိုးရန် ယူကရိန်းက ငြင်းဆိုခဲ့ခြင်းကြောင့် ဖြစ်ကြောင်း ထုတ်ပြန်ခဲ့ပါသည်။ ထုတ်ပြန်ချက်တွင် ပါရှိသော အချက်အလက်များ၌ Gazprom သည် ၂၀၂၅ ခုနှစ်၊ ဇန်နဝါရီလ ၁ ရက်နေ့မှစတင်ကာ ယူကရိန်းနိုင်ငံကိုဖြတ်၍ ဥရောပသို့ ဓာတ်ငွေ့ပို့ဆောင်မှုကို ဆောင်ရွက်နိုင်ခြင်း မရှိတော့ကြောင်း ဖော်ပြထားပါသည်။

ယူကရိန်းကလည်း ရုရှားနိုင်ငံက ဓာတ်ငွေ့ သယ်ယူပို့ဆောင်ခြင်းကို ရပ်ဆိုင်းလိုက်ကြောင်း ဇန်နဝါရီ ၁ ရက်နေ့က ကြေညာခဲ့ပါသည်။

တူရကီနှင့်ဘူလ်ဂေးရီးယားတို့မှတစ်ဆင့် ဓာတ်ငွေ့ဖြတ်သန်းမှုတိုးမြှင့်မည်ဆိုပါက ယူကရိန်း၏ ဖြတ်တောက်မှုကို တစ်စိတ်တစ်ပိုင်း ကာမိစေမည်ဟု ကျွမ်းကျင်သူတစ်ဦး၏ အကြံပြုချက်ကို ရုရှားမီဒီယာများက ကိုးကားဖော်ပြခဲ့ပါသည်။

သို့သော် အခြားလမ်းကြောင်းများ ပြောင်းလဲအသုံးပြုခြင်းအတွက် ဥရောပနိုင်ငံများအနေဖြင့် ကုန်ကျစရိတ်များ ပိုပြီးမြင့်မားလာမည်ဟု Reuters သတင်းဌာနက ဖော်ပြခဲ့ပါသည်။

ကိုးကား-NHK World

ကြီးမားသောကွန်တိန်နာသင်္ဘောကြီးများကို စွမ်းအင်ပေးရန်အတွက် ဒီဇိုင်းထုတ်ထားသော 14-cylinder Wartsila-Sulzer RTA96-C two-stroke turbocharged ဒီဇယ်အင်ဂျင်ကြီးသည် ကမ္ဘာ့အကြီးဆုံး လောင်စာဆီလောင်ကျွမ်းမှုရှိသည့် အင်ဂျင်ကြီးတစ်ခုဖြစ်ကြောင်း သိရသည်။ အမြင့်(၁၃)မီတာ၊ အရှည်(၂၆)မီတာနှင့် အလေးချိန်တန်ချိန် (၂၃၀ဝ)ထိ ရှိသော 14-cylinder Wartsila-Sulzer RTA96-C ဒီဇင်အင်ဂျင်ကြီးသည် တည်ဆောက်ဖူးသမျှ အင်ဂျင်များထဲတွင် လောင်စာဆီ လောင်ကျွမ်းမှုအများဆုံးရှိသည့် အင်ဂျင်ဆိုသည့်ခေါင်းစဉ်နှင့်အတူ သတ္တုရိုင်းများဖြင့် တည်ဆောက်ထားကြောင်း သိရသည်။ အဆိုပါအင်ဂျင်ကြီးတွင်ကရိုင်းရှပ်တစ်ခုတည်းပင်လျှင် တန်ချိန် (၃၀ဝ) အထိရှိပြီး ပစ္စတင်(၁၄)လုံးတွင် တစ်လုံးချင်းစီ၏ အလေးချိန်သည် (၅)တန်ရှိကြောင်း သိရသည်။

ထို့ပြင် (၁၀၂) RPM အတွက် စွမ်းအင်ထွက်ရှိမှု (၁၀၈,၉၂၀) bhp ရှိပြီး တစ်ရက်လျှင် လောင်စာဆီတန်ချိန် (၂၅၀) ခန့်ကို လောင်ကျွမ်းစေကြောင်းလည်း သိရသည်။ အမြင့်ဆုံးအခြေအနေများတွင် 14-cylinder Wartsila-Sulzer RTA96-C အင်ဂျင်ကြီးသည် တစ်နာရီလျှင် လောင်စာဆီ(၁၆၆၀)ဂါလန်ခန့်ကို အသုံးပြုကြောင်း သိရသည်။

ဖင်လန်အင်ဂျင်ထုတ်လုပ်သည့် ကုမ္ပဏီ Wartsila က ၎င်း၏ 12-cylinder RTA96C အင်ဂျင်သည် Emma Maersk ကဲ့သို့သော ကြီးမားသော ကွန်တိန်နာသင်္ဘော များကို စွမ်းအင်ပေးနိုင်မည်မဟုတ်ကြောင်း ရှင်းရှင်းလင်းလင်း သိရှိခဲ့ပြီးနောက် ကမ္ဘာ့အကြီးဆုံး လောင်စာဆီလောင်ကျွမ်းမှုအင်ဂျင်ကြီးကို တည်ဆောက်ရန် ဆုံးဖြတ်ခဲ့ခြင်းဖြစ်သည်။ ပထမဆုံး 14-cylinder Wartsila -Sulzer RTA96-C two-stroke turbocharged ဒီဇယ် အင်ဂျင်ကို (၂၀ဝ၆)ခုနှစ်တွင် ထုတ်လုပ်ခဲ့ပြီး အဆိုပါ နှစ်တွင်ပင် ကမ္ဘာ့အကြီးဆုံးကွန်တိန်သင်္ဘော Emma Maersk တွင် တပ်ဆင်ကာ စတင်အသုံးပြုခဲ့ကြောင်း သိရသည်။

ယင်းကဲ့သို့ ကြီးမားပြီး ရှုပ်ထွေးသော အင်ဂျင်ကြီးကိုတည်ဆောက်ခြင်းသည် အလွန်ခက်ခဲပြီး အရင်းအမြစ်များစွာအသုံးပြုရသည့်အပြင် ကုန်ကျစရိတ်မှာ အမေရိကန်ဒေါ်လာ (၂၅) သန်းကျော်ရှိကြောင်းလည်း သိရသည်။

ကိုးကား- NP News

ဂျာမနီပြည်သူများအနေဖြင့် ဓာတ်ငွေ့ပြတ်လပ်မှုနှင့်မကြုံကြိုက်စေရေးအတွက် ထိုလောင်စာကိုချွေတာသုံးစွဲရန် ဂျာမနီစွမ်းအင်တာဝန်ရှိသူတစ်ဦးက သတိပေးတောင်းဆိုထားကြောင်း Die  Welt သတင်းစာက ဇန်နဝါရီလ ၁ ရက်တွင်ဖော်ပြထားသည်။

နိုင်ငံ၏ဓာတ်ငွေ့သုံးစွဲမှုပမာဏသည်၂၀၂၃ ခုနှစ် အောက်တိုဘာလမှ ဒီဇင်ဘာလထက် ၂၀၂၄ ခုနှစ် အလားတူကာလတွင်၅ ဒသမ ၈ ရာခိုင်နှုန်းတိုးမြင့်လာကြောင်း၊ စက်မှုလုပ်ငန်းများအနေဖြင့်မူ ဓာတ်ငွေ့သုံးစွဲမှုပမာဏ ၉ ဒသမ ၁ ရာခိုင်နှုန်းမြင့်တက်လာကြောင်း  သတင်းစာကဖော်ပြထားသည်ကိုတွေ့ရသည်။

ဂျာမနီနိုင်ငံသည် နိုင်ငံအတွက် လိုအပ်သောဓာတ်ငွေ့စုစုပေါင်းအနက် ထက်ဝက်ခန့်ကို ရုရှားနိုင်ငံမှဝယ်ယူအသုံးပြုနေရခြင်းဖြစ်ပြီး အနောက်အုပ်စုက ရုရှားနိုင်ငံအပေါ်  ပိတ်ဆို့မှုများချမှတ်ပြီးနောက် စွမ်းအင်ကဏ္ဍတွင် အထိခိုက်ရဆုံးမှာဂျာမနီနိုင်ငံဖြစ်သည်။

လက်ရှိကျရောက်နေသော ဆောင်းရာသီကာလအတွင်း နေအိမ်များကိုအနွေးဓာတ်ပေးနိုင်ရေးအတွက် ဓာတ်ငွေ့များကိုသာ အဓိကအသုံးပြုနေရခြင်းဖြစ်သည့်အတွက် ဆောင်းရာသီမကုန်မီ စွမ်းအင်ပြတ်လပ်မှုမဖြစ်စေရန်  တာဝန်ရှိသူကယခုကဲ့သို့ သတိပေးထားခြင်းဖြစ်ကြောင်းသိရသည်။

Ref: RT

တရုတ်အစိုးရသည်  ပြည်သူများ၏ သုံးစွဲမှုကို တိုးမြှင့်နိုင်ရန်အတွက် နှစ်ပေါင်းများစွာအတွင်း  ပထမဆုံးအကြိမ်အဖြစ် အစိုးရဝန်ထမ်းများ၏   လုပ်ခလစာကို တိုးမြှင့်ပေးခဲ့ကြောင်း သိရသည်။

အစိုးရဌာနအများအပြားတွင် တာဝန်ထမ်းဆောင်နေသည့်    ဝန်ထမ်းများ၏ အခြေခံလစာအဖြစ် တစ်လလျှင် အနည်းဆုံး ယွမ် ၅၀၀ သတ်မှတ်ပေးခဲ့ကြောင်း အစိုးရနှင့်နီးစပ်သူများက ပြောသည်။ အစိုးရ၏ လစာတိုးမြှင့်ပေးမှုသည် ဝန်ထမ်းများ၏ အခြေခံလစာအပေါ်မူတည်၍ ရာခိုင်နှုန်းအားဖြင့် ကွာခြားလျက်ရှိပြီး အချို့ဝန်ထမ်းများ၏ လစာမှာ  အကြမ်းဖျင်းအားဖြင့် ၅ ရာခိုင်နှုန်းမြင့်တက်လာခဲ့ကြောင်း သိရသည်။

တရုတ်အစိုးရသည် အစိုးရဝန်ထမ်းများအတွက် နောက်ဆုံးအကြိမ် လစာတိုးမြှင့်မှုကို ၂၀၁၅ ခုနှစ်တွင် လုပ်ဆောင်ခဲ့ခြင်းဖြစ်ပြီး ယင်းကာလတွင် နိုင်ငံအတွင်းရှိ အစိုးရဝန်ထမ်း သန်း ၄၀ ခန့်သည် တစ်လလျှင် ပျမ်းမျှအားဖြင့် ယွမ် ၃၀၀ ခန့်သာ ရရှိခဲ့ကြောင်း သိရသည်။

ရှီကျင့်ဖျင်ဦးဆောင်သည့် တရုတ်အစိုးရသည် လာမည့် ၂၀၂၅ ခုနှစ်တွင် ပြည်သူများ၏ ငွေကြေးသုံးစွဲမှုကို တိုးမြှင့်၍ နှေးကွေးနေသည့် နိုင်ငံ့စီးပွားရေး တိုးတက်မှုကို ပိုမိုအားကောင်းလာစေရန်  ဦးစားပေး လုပ်ဆောင်လျက်ရှိကြောင်း သိရသည်။

ထို့ပြင်   ကလေးသူငယ်အရေအတွက် များပြားသည့်  မိသားစုများအတွက် နေအိမ်နှင့် ထောက်ပံ့ကြေးပေးအပ်ခြင်းကို တိုးမြှင့်မည်ဟု ရှန်ဟိုင်းမြို့တော်အစိုးရက ဒီဇင်ဘာလ ၃၁ ရက်တွင် ထုတ်ပြန်ကြေညာခဲ့ကြောင်း သိရသည်။

Source: Myawady Web Portal

တရုတ်နိုင်ငံ မြို့တော်ပေကျင်းတွင် အလိုအလျောက် မောင်းနှင်သည့်နည်းပညာကို မြှင့်တင်ရန်အတွက် စည်းမျဉ်းစည်းကမ်းသစ်များကို မြို့တော်အာဏာပိုင်အဖွဲ့က ဒီဇင်ဘာလ ၃၁ ရက်တွင် အတည်ပြုခဲ့သည်။

မြို့တော်အာဏာပိုင်အဖွဲ့သည် မောင်းသူမဲ့ကား  သို့မဟုတ်  အလိုအလျောက်မောင်းနှင်သည့် မော်တော်ယာဉ်များအား ပုဂ္ဂလိကကဏ္ဍများ၊   မြို့တော်ဧရိယာအတွင်းပြေးဆွဲသည့် ဘတ်စကားများ၊ ဓာတ်ရထားများနှင့် အငှားယာဉ်များတွင် အစားထိုးအသုံးပြုရန် အားပေးလှုံ့ဆော်သွားမည်ဖြစ်သည်။ ထို့ပြင် မြို့တော်အတွင်း မောင်းသူမဲ့မော်တော်ယာဉ်များ အသုံးပြုနိုင်ရေးအတွက် မြို့အတွင်းရှိ အခြေခံအဆောက်အဦများကိုလည်း အဆင့်မြှင့်တင်ရန် အားပေးလျက်ရှိသည်။

တရုတ်အစိုးရသည် အလိုအလျောက်မောင်းနှင်နိုင်သည့် မော်တော်ကားများ အသုံးပြုခြင်းကို  ခွင့်ပြုပေးလျက်ရှိပြီး လက်ရှိတွင် နိုင်ငံအတွင်းရှိ  အနည်းဆုံးမြို့ကြီး ၁၉ မြို့သည်  အဆိုပါကားများကို စမ်းသပ်မောင်းနှင်လျက်ရှိသည်။

မြို့တော်အာဏာပိုင်များသည် မောင်းသူမဲ့အများပြည်သူသုံး ဘတ်စကားများနှင့် တက္ကစီများကို လာမည့်နှစ် ဧပြီလ ၁ ရက်မှစ၍ မောင်းနှင်ခွင့်ပေးရန် စီစဉ်လျက်ရှိသည်။

တရုတ်နိုင်ငံသည် နည်းပညာတိုးတက်မှုတွင် ထိပ်ဆုံးမှဦးဆောင်နေသည့် နိုင်ငံတစ်နိုင်ငံဖြစ်ပြီး သဘာဝပတ်ဝန်းကျင်ကို ထိခိုက်မှုမရှိစေသည့် လျှပ်စစ်ကားများနှင့် မောင်းသူမဲ့ကားများကိုလည်း ထုတ်လုပ်လျက်ရှိသည်။

Source: Myawady Web Portal

ယူကရိန်းနိုင်ငံကိုဖြတ်ကျော်ကာ ရုရှားနိုင်ငံမှ ဓာတ်ငွေ့ အား ပိုက်လိုင်းများနှင့် ဥရောပနိုင်ငံများဆီသို့ ရောင်းချ နေသော ဖြတ်သန်းသွားလာရေး သဘောတူညီချက် သည် ဒီဇင်ဘာ ၃၁ ရက်တွင် သက်တမ်း ကုန်ဆုံးမည် ဖြစ်သဖြင့် ရုရှားသဘာဝဓာတ်ငွေ့ ဆက်လက်စီးဆင်းမှု သေချာစေရန် ဥရောပအလယ်ပိုင်းနှင့် တောင်ပိုင်းရှိ နိုင်ငံများသည် အဖြေများကို ရှာဖွေနေကြကြောင်း Bloomberg သတင်းဌာနကဖော်ပြထားသည်။ 

ရုရှားအစိုးရနှင့်မဖြေရှင်းနိုင်သေးသော တင်းမာမှုများ နှင့် အငြင်းပွားမှုများကြောင့် ယူကရိန်းအစိုးရက သဘောတူညီချက်ကို သက်တမ်းတိုးရန် ငြင်းဆို ထားသည်။ ဆလိုဗက်ကီးယား၊ ဟန်ဂေရီ၊ သြစတြီးယား နှင့် အီတလီတို့သည် ၎င်းတို့၏ ဓာတ်ငွေ့ရရှိရေးအတွက် အစားထိုးနည်းဗျူဟာများကို ရှာဖွေနေကြသည်။ 

ထည့်သွင်းစဉ်းစားထားသော ရွေးချယ်စရာများထဲတွင် ယူကရိန်းနှင့် ရုရှားတို့အကြား အစိုးရချင်း သဘော တူညီချက်အား သက်တမ်းတိုးရန်လိုအပ်မှုအား ကျော်လွှား နိုင်သည့် ကူးသန်းရောင်းဝယ်ရေး သဘောတူညီချက် တစ်ခုဖြစ်ပါသည်။ ယင်းတွင် ယူကရိန်း၏ ကန့်ကွက်မှု များရှိနေသော်လည်း ရုရှားစွမ်းအင်ကုမ္ပဏီ Gazprom နှင့် တိုက်ရိုက်စာချုပ်ချုပ်ရန် စလိုဗက်ကီးယားနှင့် အခြားဗဟိုဥရောပနိုင်ငံများက ပါဝင်ဆွေးနွေးလျက် ရှိပါသည်။

ဆလိုဗက်ကီးယားနိုင်ငံပိုင် ဓာတ်ငွေ့ကုမ္ပဏီ AS (SPP) သည် အဇာဘိုင်ဂျန်နိုင်ငံပိုင် ရေနံကုမ္ပဏီ SOCAR နှင့် လည်းဆွေးနွေးနေသည်။ အဇာဘိုင်ဂျန်သည် ဓာတ်ငွေ့ တင်ပို့မှုတွင် ရုရှားဓာတ်ငွေ့အပေါ် မှီခိုမှုလျှော့ချရန်ဒီဇိုင်းထုတ်ထားသည့် Southern Gas Corridor မှတစ်ဆင့် အီးယူနိုင်ငံအများအပြားသို့ တင်ပို့နိုင်ရေးကို လိုလားလျက်ရှိသည်။ 

ဟန်ဂေရီ၀န်ကြီးချုပ် ဗစ်တာအိုဘန်က ရုရှား ဓာတ်ငွေ့ ရောင်းချမှု တည်နေရာကို ရုရှားနှင့်ယူကရိန်းကြား နယ်စပ်သို့ ပြောင်းရွှေ့ရန်အဆိုပြုထားပါသည်။ ဟန်ဂေရီ၊စလိုဗက်ကီးယား၊ တူရကီနှင့် အဇာဘိုင်ဂျန် တို့ပါဝင်သော အဆိုပြုချက်အမျိုးမျိုးကို ဆွေးနွေးခဲ့ပြီးဖြစ်ကြောင်း ရုရှားသမ္မတ ဗလာဒီမာပူတင်က ပြီးခဲ့သည့် သီတင်းပတ် တွင် ပြောကြားခဲ့သည်။ သို့သော် Gazprom ၏ နှစ်ရှည် စာချုပ်များကြောင့် ထိုကဲ့သို့သော အစီအစဉ်များကို ပြဋ္ဌာန်းရန် ခက်ခဲမည်ဖြစ်ကြောင်း၊ ယူကရိန်းနှင့် စာချုပ် သက်တမ်းကုန်ဆုံးခြင်းကြောင့် အခြားနည်းလမ်းများဖြင့် ဓာတ်ငွေ့တင်ပို့ရပါကလည်း ဈေးတက်မည်မဟုတ်ကြောင်း နှင့် အီးယူနိုင်ငံများသို့ ဓာတ်ငွေ့ပေးပို့ရန်အတွက် အမြဲ အသင့်ရှိနေကြောင်း  ပူတင်က ပြောကြားခဲ့ကြောင်း သိရှိ ရသည်။

ကိုးကား - RT

ဂျပန်နိုင်ငံအလယ်ပိုင်းတွင် ၂၀၂၄ ခုနှစ် နှစ်ဦးပိုင်းက လှုပ်ခတ်ခဲ့သည့် အင်အားပြင်းငလျင်ကြောင့် Ishikawa ခရိုင် Wajima မြို့၏ ကမ်းရိုးတန်းမြေသည် ၅.၅ မီတာ အထိ မြင့်တက်လာမှုအား သုတေသီအဖွဲ့တစ်ဖွဲ့မှ တိုင်းတာတွေ့ရှိခဲ့ပါသည်။

Toyama တက္ကသိုလ်နှင့် တိုကျိုငလျင်သုတေသနဌာနမှ သုတေသီများပါဝင်သည့် အဆိုပါအဖွဲ့သည် ယခုနှစ် ဇန်နဝါရီလမှ ဇွန်လအတွင်း Noto ကျွန်းဆွယ်၏ မြောက်ဘက်ကမ်းရိုးတန်းတစ်လျှောက်ရှိ နေရာ ၁၀၀ ခန့်တွင် စစ်တမ်းကောက်ယူခဲ့ပါသည်။

Shika မြို့မှ Suzu မြို့အထိ ကီလိုမီတာ ၈၀ ခန့် ရှည်လျားသော ဧရိယာတစ်လျှောက် ကမ်းရိုးတန်းမြေ မြင့်တက်လာခဲ့ကြောင်း သုတေသီများက အတည်ပြု ခဲ့ပါသည်။Wajima မြို့၏ Monzenmachi Yoshiura တွင် ကမ်းရိုးတန်းမြေ ၅.၅ မီတာခန့် မြင့်တက်လာမှု အား တွေ့ရှိခဲ့ရသည်မှာ အစိုးရ၏ ငလျင် သုတေသန ကော်မတီက ဇန်နဝါရီလတွင် အမြင့်ဆုံးအဖြစ် ထုတ်ပြန်ခဲ့သော ၄ မီတာထက် ပိုမိုကျော်လွန်နေ ပါသည်။

Suzu မြို့၏ Nagahashimachi တွင် ၃ မီတာနီးပါး မြင့်တက်လာခဲ့ကြောင်း အတည်ပြုခဲ့သည်။ ကမ်းရိုးတန်း မြေ သိသိသာသာ မြင့်တက်လာရခြင်းမှာ သက်ဝင် လှုပ်ရှားနေသည့် ပြတ်ရွေ့ကြောတစ်ခုနှင့် နီးကပ်နေခြင်း ကြောင့်နှင့် ကြီးမားသော ပြတ်ရွေ့ကြော ရွေ့လျားမှု များကြောင့် ဖြစ်သည်ဟု Toyama တက္ကသိုလ်၏ တွဲဖက်ပါမောက္ခ Tateishi Ryo က ပြောဆိုခဲ့သည်။

အဆိုပါလေ့လာမှုအရ ကမ်းရိုးတန်းအနီး သက်ဝင် လှုပ်ရှားနေသည့် ရေအောက် ပြတ်ရွေ့ကြောများသည် ကမ်းရိုးတန်းမြေကို သိသိသာသာ မြင့်တက်လာစေနိုင် ကြောင်းကို တွေ့ရှိခဲ့ကြောင်း၊ အချက်အလက်များကို လေ့လာသုံးသပ်ခြင်းသည် အနာဂတ်တွင် ငလျင်များကို ကြိုတင်ခန့်မှန်းနိုင်ရန် အထောက်အကူပြုနိုင်ကြောင်း Mr Tateishi က ပြောကြားခဲ့ကြောင်း သိရှိရပါသည်။

ကိုးကား-NHK World

ရုရှားနိုင်ငံသည် ကာဇက်စတန်နိုင်ငံမှတစ်ဆင့် တရုတ် နိုင်ငံသို့ ဆက်သွယ်ပေးမည့် သဘာဝဓာတ်ငွေ့ပိုက်လိုင်း အသစ်တစ်ခုကို စတင်တည်ဆောက်နေပြီ ဖြစ်ပြီး နှစ်စဉ် သဘာဝဓာတ်ငွေ့ ကုဗမီတာ(၄၅)ဘီလီယံထိ ပေးပို့ရန် စီစဉ်ထားကြောင်း ရုရှားနိုင်ငံခြားရေးဒုဝန်ကြီး အဲလက်ဇန်းဒါးနိုဗက်က ထုတ်ဖော်ပြောဆိုခဲ့သည်။

တရုတ်နိုင်ငံသည် အဆိုပါသဘာဝဓာတ်ငွေ့ပိုက်လိုင်းမှ တစ်ဆင့် တစ်နှစ်လျှင် သဘာဝဓာတ်ငွေ့ကုဗမီတာ (၃၅) ဘီလီယံ ရရှိလိမ့်မည်ဖြစ်ပြီး ကျန်ရှိနေသည့် သဘာဝဓာတ်ငွေ့များကို ကာဇက်စတန်နိုင်ငံက ရရှိ မည်ဖြစ်ကြောင်း သိရသည်။ ထို့ပြင် တရုတ်နိုင်ငံနှင့် ရုရှားနိုင်ငံအကြား နှစ်နိုင်ငံစွမ်းအင်ပူးပေါင်း ဆောင်ရွက်မှု ဆိုင်ရာ ဆွေးနွေးမှုများအတွင်း စီမံကိန်း၏ မဟာဗျူဟာ မြောက်အရေးပါမှုကို အဲလက်ဇန်းဒါးနိုဗက်က ရှင်းလင်း ပြောကြားခဲ့သည်။

သဘောတူညီချက်၏တစ်စိတ်တစ်ပိုင်းအဖြစ် သဘာဝ ဓာတ်ငွေ့ပိုက်လိုင်းအသစ်၏ အခြေခံအဆောက်အအုံ တစ်စိတ်တစ်ပိုင်းကို လက်ခံမည့် ကာဇက်စတန် နိုင်ငံ သည် နှစ်စဉ်သဘာဝဓာတ်ငွေ့ ကုဗမီတာ (၁၀) ဘီလီယံ ရရှိမည် ဖြစ်ကြောင်းလည်း သိရသည်။

အဆိုပါစီမံကိန်းတွင် ကာဇက်စတန်နိုင်ငံ၏ စိတ်ဝင်စား မှုများကို ကာဇက်စတန်စွမ်းအင်ဝန်ကြီး Almasadam Satkaliyev က အတည်ပြုခဲ့ပြီး နိုင်ငံ၏စွမ်းအင် ထောက်ပံ့မှုအတွက် အကျိုးအမြတ်များကို အလေးပေး ပြောကြားခဲ့ကြောင်းလည်း သိရသည်။ 

တရုတ်နိုင်ငံသည် ရုရှားနိုင်ငံ၏အကြီးဆုံးကုန်သွယ်ဖက် နိုင်ငံဖြစ်ပြီး ရုရှားအပေါ် အနောက်အုပ်စုနိုင်ငံများ၏ ပိတ်ဆို့အရေးယူမှုများ ရှိနေသော်လည်း နှစ်နိုင်ငံကြား စီးပွားရေး ပူးပေါင်းဆောင်ရွက်မှုများမှာ ဆက်တိုက် တိုးလာလျက်ရှိကြောင်း သိရသည်။

ကိုးကား-NP News