ပြန်လည်ထူထောင်ရေးနှင့်ပတ်သက်၍ နိုင်ငံတော်အနေဖြင့် မူလထက် ပိုမိုကောင်းမွန်သည့် အဆောက်အဦများ၊ လမ်းတံတားများ ဖြစ်လာရမည်၊ယခုထက်ပိုမို ဖွံ့ဖြိုးတိုးတက်သည့်မြို့များကို ဖော်ဆောင်ပေးနိုင်ရမည်ဟု မူဝါဒချမှတ်၍ ဆောင်ရွက်လျက်ရှိကြောင်း နိုင်ငံတော်စီမံအုပ်ချုပ်ရေး ကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်က ပြောကြားသည်။

ဧပြီလ ၁၀ ရက် နံနက်ပိုင်းက ရှမ်းပြည်နယ်(တောင်ပိုင်း)နှင့် ပအိုဝ်း ကိုယ်ပိုင်အုပ်ချုပ်ခွင့်ရဒေသတို့ရှိ ပြည်နယ်၊ ခရိုင်၊ မြို့နယ်အဆင့် ဌာန ဆိုင်ရာဝန်ထမ်းများအား တောင်ကြီးမြို့၊ မြို့တော်ခန်းမနှင့် ဟိုပုံးမြို့၊ ပအိုဝ်းကိုယ်ပိုင်အုပ်ချုပ်ခွင့်ရဒေသ အစည်းအဝေးခန်းမတို့၌ သီးခြားစီ တွေ့ဆုံ၍ ငလျင်သဘာဝဘေးဒဏ်ဆိုင်ရာများနှင့် ဒေသဖွံ့ဖြိုးရေးဆိုင်ရာ များကို ဆွေးနွေးပြောကြားစဥ် ထည့်သွင်းပြောကြားခဲ့ခြင်းဖြစ်သည်။

အလားတူ မကြာမီကျရောက်တော့မည့် မြန်မာ့ရိုးရာအတာသင်္ကြန်နှင့် ပတ်သက်၍လည်း ယခုနှစ် အတာသင်္ကြန်ကာလကို မြန်မာရိုးရာ အစဉ်အလာ နှင့်အညီ အေးအေးချမ်းချမ်းဖြင့်သာ ဖြတ်သန်းကြစေလိုကြောင်း ပြောကြား ခဲ့သလို လာမည့်ဒီဇင်ဘာလတွင် လွတ်လပ်၍ တရားမျှတသည့် ရွေးကောက်ပွဲကို ကျင်းပပြုလုပ်သွားမည်ဖြစ်ပြီး အောင်မြင်စွာ ကျင်းပ ပြီးစီးနိုင်ရေးအတွက် ဝိုင်းဝန်းပူးပေါင်းဆောင်ရွက်သွားရန် လိုကြောင်းလည်း မှာကြားခဲ့သည်။ 

ထို့အပြင် ကျန်းမာရေးနှင့်ပတ်သက်၍လည်း မိမိနှင့် မိမိ မိသားစုအတွက် မည်သို့မျှအကျိုးမရှိသည့် ဆေးလိပ်၊ အရက်၊ ကွမ်း သုံးစွဲခြင်းများကို ရှောင်ကြဉ်ကြရန်လိုပြီး မိမိကိုယ်ကို ထိန်းထိန်းသိမ်းသိမ်းဖြင့် နေထိုင် သွားကြရန်လိုကြောင်းနှင့် မိမိတို့ တစ်ဦးတစ်ယောက်ခြင်းစီ၏ သွားလာ နေထိုင်စားသောက်မှု မဆင်ခြင်ခြင်းများကြောင့် အချိန်မတိုင်မီ မလိုလား အပ်ပဲ အသက်ဆုံးရှုံးရခြင်းများ မဖြစ်စေရေး ကျန်းမာရေး အသိပညာ ပေးခြင်းများကိုလည်း ဆောင်ရွက်ပေးသွားရန်လိုကြောင်း ပြောကြား သည်။

နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့် အဖွဲ့ဝင်များသည် ကွန်ပျူတာတက္ကသိုလ်(တောင်ကြီး)သို့ သွားရောက်၍ လည်း ငလျင်ဘေးဒဏ်ကြောင့် ပင်မသုံးထပ်စာသင်ဆောင်နှင့် တောင်၊ မြောက် စာသင်ဆောင်များတွင် ထိခိုက်ပျက်စီးမှုများဖြစ်ပေါ်ခဲ့မှု၊ ကျောင်းသား၊ ကျောင်းသူအဆောင်များ၊ ဝန်ထမ်းအိမ်ရာများတွင် ထိခိုက်ပျက်စီးခဲ့ရမှု များကို ကြည့်ရှုစစ်ဆေးခဲ့သည်။

ထိုသို့ကြည့်ရှုစစ်ဆေးစဥ် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်က ပင်မသုံးထပ်စာသင်ဆောင်ကြီးသည် ပညာရှင် များ၏ စစ်ဆေးတွေ့ရှိချက်များအရ ထိခိုက်ပျက်စီးမှု များပြားခဲ့ပြီး အန္တရာယ်ရှိ အဆောက်အဦဖြစ်သဖြင့် စနစ်တကျဖြင့် ဖြိုဖျက်သွားရန် လိုကြောင်း၊ အသစ်ပြန်လည်တည်ဆောက်ရာတွင် အဆောက်အဦ ကြံ့ခိုင်မှုနှင့် ဘေးကင်းလုံခြုံမှုကို ဦးစားပေး၍ စနစ်တကျ တွက်ချက် တည်ဆောက် သွားရန်လိုကြောင်း၊ အခြားထိခိုက်ပျက်စီးခဲ့ရသည့် အဆောက်အဦများ ကိုလည်း စနစ်တကျဖြင့် ပြန်လည်ပြုပြင်ခြင်း၊ ထိန်းသိမ်းခြင်းများကိုဆက်လက်ဆောင်ရွက်သွားရမည်ဖြစ်ကြောင်းဖြင့် မှာကြားခဲ့သည်ဟု သိရသည်။

ကိုးကား- MRTV

ဗြိတိန်နိုင်ငံရှိ ယူကရိန်းနိုင်ငံသားထောင်ပေါင်းများစွာမှာ အိုးမဲ့အိမ်မဲ့အဖြစ်နေနေရလျက်ရှိကြောင်း ဗြိတိန်အစိုးရ၏ ထုတ်ပြန်ချက်တွင် ဖော်ပြထားသည်။

အထူးသဖြင့် ဗြိတိန်နိုင်ငံရှိပံ့ပိုးပေးသူများနှင့် ယူကရိန်းနိုင်ငံသားတို့ကြားဆက်ဆံရေးပျက်ယွင်းသွားသည့်အတွက် အဆိုပါ နိုင်ငံသား ၁၅၀၀၀ ခန့်မှာ အိမ်ခြေရာမဲ့ ထောက်ပံ့မှုရယူရန် လျှောက်ထားလာခြင်း ဖြစ်သည်ဟု ထုတ်ပြန်ချက်တွင်ဖော်ပြထားသည်။

ဗြိတိန်အစိုးရသည် "Homes for Ukraine" အမည်ဖြင့် အစီအစဉ်တစ်ရပ်ကို  အကောင်အထည်ဖော်လျက်ရှိရာ ဇန်နဝါရီလအထိ ထိုအစီအစဉ်တွင်ပါဝင်ခွင့်ရရှိသူ ၁၄၁,၀၀၀ ရှိသည်။

ထိုအစီအစဉ်အရ ယူကရိန်းနိုင်ငံသား တစ်ဦး သို့မဟုတ် မိသားစုတစ်စုကို ခြောက်လတာ တင်ကျွေးထားသူ ဗြိတိန်အိမ်ပိုင်ရှင်များအား တစ်လလျှင် ပေါင် ၃၅၀ ထောက်ပံ့ပေးသွားမည်ဖြစ်သည်။

သို့သော် လက်ရှိအချိန်အထိ အိုးမဲ့အိမ်မဲ့အဖြစ် နေနေရသည့် ယူကရိန်းနိုင်ငံသား အရေအတွက်မှာ ၁၅,၀၀၀ ခန့်ကျန်ရှိနေသေးကြောင်း ထုတ်ပြန်ချက်တွင် ဆက်လက် ဖော်ပြထားသည်။

၂၀၂၂ ခုနှစ်၊ ဖေဖော်ဝါရီလမှစ၍ ဗြိတိန် နိုင်ငံ၌ ခိုလှုံခွင့်တောင်းခံသူ စုစုပေါင်းနှစ်သိန်းအထိ ရှိလာပြီဖြစ်ပြီး သီတင်းပတ်တစ်ပတ်လျှင် လူအယောက်  ၄၀၀ ခန့် ဝင်ရောက်လာနေဆဲ ဖြစ်ကြောင်း သိရသည်။

Ref: RT

Source: https://myawady.net.mm/

“ရှင်ကန်ဆန် အနမ်း” - ကမ္ဘာတစ်ဝှမ်းက ရထားဝါသနာရှင်များကို ဆွဲဆောင် နေသော ဂျပန်၏ လူသိမများသေးသည့် အံ့ဖွယ်မြင်ကွင်း

ဂျပန်နိုင်ငံ၏ နာမည်ကျော် ရှင်ကန်ဆန် အမြန်ရထားများတွင် ထူးဆန်း သည့်အလေ့အထတစ်ခုရှိပါသည်။ ထိုအရာမှာ မတူညီသော ရထားလိုင်း နှစ်ခု ဖြတ်သန်းသည့်အခါ ရထားခေါင်းနှစ်ခု ခပ်နီးနီး ဖြတ်သွားသည့် အချိန်တွင် အနမ်းတစ်ခုကဲ့သို့ ထင်ရသော အံ့ဖွယ်မြင်ကွင်းပင် ဖြစ်ပါသည်။

အဆိုပါဖြစ်စဉ်ကို “ရှင်ကန်ဆန် အနမ်း” (Shinkansen Kiss) ဟု ခေါ်ကြ ပြီး နာရာမြို့အနီးမှ အိုဆာကာ- တိုကျိုလိုင်းနှင့် ဆန်ယို ရှင်ကန်ဆန် လိုင်းတို့ ဖြတ်သန်းရာနေရာ၌ အများဆုံးတွေ့ရတတ်ပါသည်။ ရထား နှစ်စီးသည် တစ်စက္ကန့်အတွင်း 300 ကီလိုမီတာအထိ အမြန်နှုန်းနှင့် ဖြတ်သန်းသည့်အခါ မီးမောင်းများ၏ အလင်းရောင်နှင့်အတူ ထူးဆန်းသည့် အလှတရားကို ဖန်တီးပေးပါသည်။

အဆိုပါအံ့ဖွယ်မြင်ကွင်းကို ရှုမြင်ခံစားရန် ကမ္ဘာတစ်ဝှမ်းမှ ရထား ဝါသနာရှင်များသည် ဂျပန်ကို ခရီးထွက်လာကြပြီး အကောင်းဆုံး ဓာတ်ပုံ ရရှိရန် နာရီပေါင်းများစွာ စောင့်ဆိုင်းလေ့ရှိပါသည်။ အဆိုပါဖြစ်စဉ်ကိုတိတိကျကျ မြင်တွေ့နိုင်ရန်အတွက် အချိန်ဇယားနှင့် နေရာများကို အတိအကျ တွက်ချက်ထားရန် လိုအပ်ပါသည်။

တိုကျို၊ ကျိုတိုနှင့် အိုဆာကာမြို့များသို့ ခရီးသွားအများစု သွားရောက် လည်ပတ်လာကြသော်လည်း၊ စွန့်စားလိုသူများအတွက် မြို့တော်မှ မြောက်ဘက်သို့ နာရီအနည်းငယ်သာ ခရီးနှင်ပါက လူထူထပ်မှု နည်းပြီး နှင်းဝေနေသော အသက်ဝင်မီးတောင်တစ်ခု၏ နောက်ခံတွင် ရှားပါး အရသာများကို မြည်းစမ်းနိုင်သည့် မြို့တစ်မြို့ကို တွေ့ရှိနိုင်ပါသည်။

မိုရီအိုကာမြို့သည် ၎င်း၏ အံ့ဖွယ်ခေါက်ဆွဲစားပြိုင်ပွဲနှင့် လူကြိုက်များသော နွေရာသီပွဲတော်များအတွက် အထူးကျော်ကြားသော်လည်း၊ မြို့၏ ရထား ဘူတာတွင် ဂျပန်နိုင်ငံ၏အထူးဆန်းဆုံး အံ့ဖွယ်တစ်ခုက စောင့်ဆိုင်းနေ ပါသည်။

ရထားဝါသနာရှင်များ၏ နှလုံးခုန်နှုန်းကို မြန်စေသည့် အဆိုပါ အံ့ဖွယ် မြင်ကွင်းကို တစ်နေ့လျှင် ၁၇ ကြိမ် တိုင်တိုင် ဖြစ်ပေါ်ပြီး၊ ဘူတာရုံတွင် စောင့်ကြည့်လိုသူများ အမြဲရှိနေတတ်ပါသည်။

ပထမဦးစွာ၊ ကမ္ဘာကျော် ဂျပန်မြန်နှုန်းမြင့်ရထား “Tohoku Shinkansen Hayabusa” (အစိမ်းရင့်ရောင်) သည် ဘူတာသို့ ရောက်ရှိလာပြီး ရပ်နားကာ ခရီးသည်များ ဆင်းသွားကြသည်။ ထို့နောက် တောက်ပသော အနီရောင် “Akita Shinkansen Komachi” ရထားသည် တူညီသော လမ်းကြောင်း ပေါ်မှ တဖြည်းဖြည်း ချဉ်းကပ်လာပါသည်။ နောက်ဆုံးတွင် ကြည့်ရှုနေ သူများ၏ စိတ်လှုပ်ရှားမှု အထွတ်အထိပ်သို့ ရောက်ရှိစေရန် ရထား နှစ်စီး ၏ ခေါင်းပိုင်းများသည် ဖွင့်လာကာ နှာခေါင်းချင်း ထိကပ်လိုက်ပါသည်။

ဤသည်မှာ ဂျပန်နိုင်ငံ၏ အဆင့်မြင့်အင်ဂျင်နီယာနည်းပညာနှင့် အတိအကျ တွက်ချက်ထားသော ရထားအချိန်ဇယားတို့၏ ပူးပေါင်းဖန်တီးမှုကြောင့် ဖြစ်ပေါ်လာသော အံ့ဖွယ်မြင်ကွင်းတစ်ခုဖြစ်ပြီး၊ ကမ္ဘာအရပ်ရပ်မှ ရထား ဝါသနာရှင်များကို ဆွဲဆောင်လျက်ရှိပါသည်။

ကိုးကား-CNN

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ငလျင်ဒဏ်သင့်ဒေသများရှိ ပြည်သူများဆက်သွယ်မှုအဆင်ပြေစေရန် အခမဲ့စာတိုပေးပို့ ဝန်ဆောင်မှုကိုဆောင်ရွက်ပေးထားရာ ယခုအခါ ဧပြီ ၁၁ ရက်အထိ ထပ်မံတိုးပေးလိုက်ကြောင်း မြန်မာ့ဆက်သွယ်ရေး လုပ်ငန်း မှ ထုတ်ပြန်ထားသည်။

အဆိုပါ အခမဲ့ဝန်ဆောင်မှုကို မူလက ဧပြီ ၅ ရက် အထိ အော်ပရေတာ များ ကအခမဲ့ဆောင်ရွက်ပေးထားရာ ယခုတွင် MPT၊ ATOM ၊ MYTEL ၊ Ooredooစသည့် အော်ပရေတာများအားလုံးက ငလျင်ဒဏ်သင့်ဒေသ များရှိပြည်သူများဆက်သွယ်မှုအဆင်ပြေစေရန် ယခုကဲ့သို့ထပ်တိုး၍ ဆောင်ရွက်ပေးခြင်းဖြစ်ကြောင်းလည်း သိရသည်။

မတ်လ၂၈ ရက်နေတွင် ပြင်းထန်ငလျင်လှုပ်ခတ်မှုကြောင့်နိုင်ငံတစ်ဝှမ်းရှိ မိုဘိုင်းဆက်သွယ်ရေး စခန်း ၂၆,၀၀၀ ကျော်အနက် ၆,၇၃၀ ကျော်သည် ဆက်သွယ်ရေးပြတ်တောက်မှုဖြစ်ပေါ်ခဲ့ပြီး ပြန်လည်ကောင်းမွန်ရေး ဆောင်ရွက်ခဲ့ရာ ဧပြီ ၆ ရက်အထိစခန်းပေါင်း ၅,၉၀၀ ကျော် ပြုပြင်နိုင်ခဲ့ ကြောင်းသိရသည်။

ကိုးကား-NP News

မန္တလေးငလျင်ကြီးကြောင့် ထွက်ပေါ်လာသော အင်းဝမြို့ရှိ ရေနန်းဆောင်ကြီးကို စနစ်တကျဖော်ထုတ်ထိန်းသွားမည်ဖြစ်ကြောင်း ရှေးဟောင်းသုတေသနနှင့်အမျိုးသားပြတိုက်ဦးစီးဌာနက ယနေ့ (ဧပြီလ ၈ရက်)တွင် အသိပေးထုတ်ပြန်ထားသည်။

ယခုတွေ့ရှိရသည့် အင်းဝမြို့ဟောင်းရှိ ရေနန်းတော်ဟု ယူဆနေကြသော အဆောက်အအုံ၏ တောင်ဘက်ရှိ သရက်ကင်းလှေကား အစိတ်အပိုင်းများကို ပြီးခဲ့သည့် ၂၀၀၉ ခုနှစ်တွင် ဒေသခံများ အုတ်ဖုတ်လုပ်ငန်း ဆောင်ရွက်ရာမှ စတင်တွေ့ရှိခဲ့သဖြင့် ရှေးဟောင်းသုတေသနနှင့် အမျိုးသားပြတိုက်ဦးစီးဌာနက ထိန်းသိမ်းထားရှိခဲ့ကြောင်း သိရသည်။

ထိုသို့ထိန်းသိမ်းထားရှိခဲ့ရာ မတ်လ ၂၈ ရက်က လှုပ်ခဲ့သော ပြင်းထန်ကြီးမားသည့် မန္တလေးငလျင်ကြီးကြောင့် ယခင်တွေ့ရှိထားသည့် လှေကားခုံနှင့် ဆက်စပ်လျက်ရှိသော ယဉ်ကျေးမှု အမွေအနှစ်များကို အက်ကွဲကြောင်းများကြားမှ ထပ်မံတွေ့ရှိလာရခြင်းဖြစ်ကြောင်း ထုတ်ပြန်ထားသည်။

ထို့ကြောင့် ဧပြီလ ၆ရက်မှ စတင်၍ ရှေးဟောင်းသုတေသနနှင့် အမျိုးသားပြတိုက် ဦးစီးဌာန၊ မန္တလေးဌာနခွဲက စမ်းသပ်တူးဖော်ခဲ့ရာတွင် အရှေ့ဘက် သရက်ကင်းလှေကား၏ သရက်ကင်းပုံ မြောက်ဘက်လက်တံနှင့် ဆင်ကပ်အုတ်ခုံတို့ကို တူးဖော်တွေ့ရှိခဲ့ရကြောင်း သိရသည်။

ထို့ပြင် ပန္နက်အုတ်ခုံ အလျား (၁၀ ပေ ၆ လက်မ)၊ အနက် (၃ ပေ ၈ လက်မ)၊ အုတ်ခံထောင့်ချိုး (၂ ပေ ၆ လက်မ)၊ အုတ်ခုံမှ လှေကားအထွက် ခိုနန်းချိုး (၁၈ လက်မ)၊ လက်ရုံးဒေါင့်ချိုး (၈ လက်မ)၊ ခိုနန်းချိုးမှ သရက်ကင်းအဆုံး (၁၁ ပေ ၄ လက်မ)တို့ကို တူးဖော်တွေ့ရှိထားပြီး ဆက်လက်တူးဖော်သုတေသန ပြုလုပ်လျက် ရှိကြောင်း သိရသည်။

လတ်တလော စမ်းသပ်တူးဖော်တွေ့ရှိချက်အရ ပုရပိုက်ပုံဆွဲများတွင် တွေ့ရှိရသည့် ရေနန်းတော်ကဲ့သို့ အဆောက်အအုံများစွာပါဝင်သည့် ကြီးမားသောအဆောက်အအုံမျိုး မဟုတ်ဘဲ အလျား (ပေ ၂၀၀ မှ ၂၅၀ ပေ)နှင့် အနံ (ပေ ၂၀၀ ခန့်) သစ်သားတိုင်များဖြင့် သရက်ကင်းလှေကားခုံကို တွဲဆက်တည်ဆောက်ထားသော အဆောက်အအုံမျိုးဖြစ်နိုင်ကြောင်း သိရသည်။

နီးစပ်ဆုံး နှိုင်းယှဉ်ရာတွင် အင်းဝ ဗားကရာ သစ်သားကျောင်း၊ မန္တလေးမြို့ရှိ ရွှေနန်းတော် ကျောင်းများကဲ့သို့ သရက်ကင်းလှေကား (၈ ခုမှ ၁၀ ခု) အထက်ပါရှိနိုင်သော အဆောက်အအုံမျိုး ဖြစ်နိုင်ကြောင်း ရှေးဟောင်းသုတေသနနှင့်အမျိုးသားပြတိုက်ဦးစီးဌာနက ဆိုသည်။

ရှေးမြန်မာမင်းများ အသုံးပြုခဲ့သည့် ရေနှင့်သက်ဆိုင်သော ပွဲလမ်းသဘင် အခမ်းအနားများ ကျင်းပသည်ကို ကြည့်ရှုရာတွင် အသုံးပြုသည့် အဆောက်အအုံမျိုး ပို၍ ဖြစ်နိုင်ကြောင်းနှင့် ရေနန်းတော်ထက် ရေနန်းဆောင်ဟုသာ သုံးနှုန်းသင့်ကြောင်း သိရသည်။

မြန်မာ့သမိုင်းတွင် ရေနန်းတော်ဟူသည် အုပ်ချုပ်သူဘုရင်မင်းကိုယ်တိုင် ဦးစီး၍ ခေါင်းဆေးမင်္ဂလာပြုခြင်း၊ သင်္ကြန်ခေါ်တော်မူခြင်း၊ အတာရေသဘင်ပွဲဆင်နွဲခြင်းနှင့် ရေခင်းသဘင် ဆင်ယင်ကျင်းပရန်အတွက် အရေးပါသည့် အဆောင်တော်များလည်းဖြစ်ကြောင်း သိရသည်။


အချုပ်အားဖြင့် ပုရပိုက်တွင် ပါရှိသည့် ရေနန်းတော်ကဲ့သို့ ကြီးကျယ်သည့် အဆောင်ခန်းများပါဝင်သည့် အဆာက်အအုံမဖြစ်နိုင်ကြောင်းကို ကနဦးလေ့လာတွေ့ရှိ သုံးသပ်ရကြောင်း ထုတ်ပြန်ချက်အရ သိရသည်။

ထို့ကြောင့် သာသနာရေးနှင့် ယဉ်ကျေးမှုဝန်ကြီးဌာန၊ ရှေးဟောင်းသုတေ သနနှင့် အမျိုးသားပြတိုက်ဦးစီးဌာနအနေဖြင့် မြန်မာ့ရှေးဟောင်းယဉ်ကျေးမှုအမွေအနှစ်များအား အစဉ်တစိုက်တူးဖော်ထိန်းသိမ်းခြင်းလုပ်ငန်းများ ဆောင်ရွက်လျက်ရှိရာ ယခုငလျင်ကြီးကြောင့် ထွက်ပေါ်လာသည့် အင်းဝခေတ် ယဉ်ကျေးမှု အဆောက်အအုံမွေအနှစ်ကို စနစ်တကျ ဖော်ထုတ် ထိန်းသိမ်းသွားပြီး အများပြည်သူ လေ့လာနိုင်ရန်အတွက် စီမံဆောင်ရွက်သွားမည်ဖြစ်ကြောင်း အသိပေးထုတ်ပြန်ထားသည်။

အဆိုပါတွေ့ရှိသည့် ရေနန်းဆောင်ကိုထီးသုံး၊ နန်းသုံးအနေဖြင့် ရေနန်းဗိမာန်ဟု ခေါ်ဆိုကြောင်း U Pauk Paukက ဆိုထားသည်။

Source​: NP News

ထိုင်းနိုင်ငံတွင် တာဝန်ထမ်းဆောင်နေသော အမေရိကန်ပညာရှင် တစ်ဦး သည် ဘုရင်စနစ်ကို ပုတ်ခတ်စော်ကားမှုဖြင့် တရားစွဲဆိုခံထားရပြီး ထောင်ဒဏ်နှစ်ရှည်ချမှတ်ခံရနိုင်ကြောင်းသိရှိရသည်။ထိုင်း၏ တင်းကျပ်သော ဘုရင်စနစ်ကို မထီမဲ့မြင်ပြုမှုဆိုင်ရာဥပဒေဖြင့် နိုင်ငံခြားသား တစ်ဦး တရားစွဲခံရသည့် ရှားပါးဖြစ်စဉ်တစ်ခု ဖြစ်သည်။

ထိုင်းနိုင်ငံအလယ်ပိုင်းရှိ Naresuan တက္ကသိုလ်မှ ကထိက Paul Chambers (ထိုင်းနိုင်ငံ၏ စစ်တပ်နှင့် နိုင်ငံရေးဆိုင်ရာ သုံးသပ်ချက်များ ရေးသားသူ) အား ဧပြီ ၈ ရက်နေ့က ရဲစခန်းတွင် အမှုဖွင့် တရားစွဲဆိုခံခဲ့ရသည်။

ထိုင်းနိုင်ငံသည် ကမ္ဘာပေါ်တွင် ဘုရင်စနစ်ကို မထီမဲ့မြင်ပြုမှုဆိုင်ရာ အပြင်းထန်ဆုံး ဥပဒေများ ပြဋ္ဌာန်းထားသည့် နိုင်ငံတစ်ခုဖြစ်ကာ ဘုရင်၊ မိဖုရား သို့မဟုတ် အိမ်ရှေ့စံအား ဝေဖန်ပါက ပြစ်မှုတစ်ခုစီအတွက် အများဆုံး ၁၅ နှစ်အထိ ထောင်ဒဏ်ချမှတ်နိုင်ကြောင်း သိရှိရသည်။ မည်သူမဆို ဘုရင်စနစ်ကို မထီမဲ့မြင်ပြုမှုအတွက် တိုင်ကြားနိုင်ပြီး ပြစ်မှု ထင်ရှားသူများအား နှစ်ပေါင်းများစွာ ထောင်ဒဏ်ချမှတ်နိုင်ကာ မကြာ သေးမီနှစ်များအတွင်း လူပေါင်းရာချီ၍ တရားစွဲဆိုခံခဲ့ရသည်။

Chambers ၏ အကြံပေး Wannaphat Jenroumjit က ဒေသဆိုင်ရာ စစ်ဌာနချုပ်မှ တိုင်ကြားချက်ဖွင့်လှစ်ပြီးနောက် လွန်ခဲ့သည့် သီတင်းပတ် က အကျယ်ချုပ်ပြစ်ဒဏ်ချမှတ်ခံခဲ့ရကြောင်း ဆိုသည်။ ဘုရင်စနစ်ကို မထီမဲ့မြင်ပြုမှုအပြင် Chambers သည် ဆက်သွယ်ရေးဆိုင်ရာ ဥပဒေ အရလည်း တရားစွဲခံထားရသည်။

“၎င်းအား ၂၀၂၄ ခုနှစ်၊ အောက်တိုဘာလက စစ်တပ်ပြောင်းလဲမှုများနှင့် ပတ်သက်သည့် ISEAS အွန်လိုင်းဆွေးနွေးပွဲနှင့်ဆက်စပ်ပြီး စင်ကာပူ၏ အရှေ့တောင်အာရှလေ့လာရေးအင်စတီကျု ဝက်ဘ်ဆိုက်တွင် ဘုရင်စနစ်ကို ဝေဖန်ရေးသားခဲ့ကြောင်း စွပ်စွဲခံရသည်” ဟု Thai Lawyers for Human Rights ရှေ့နေနှင့် Chambers ၏ ရှေ့နေ Akarachai Chaimaneekarakate က ပြောဆိုခဲ့ပြီး ၎င်းကစွပ်စွဲချက်အားလုံးကို ငြင်းဆန်ထားသည်ဟု သိရှိရသည်။

Chambers သည် အာမခံ ငြင်းပယ်ခံရပြီးနောက် အကျယ်ချုပ်ဖြင့် ထိန်းသိမ်းခံထားရကာ ၎င်း၏ရှေ့နေများက အမှုစစ်ဆေးမှုမတိုင်မီ အကျယ်ချုပ်မှ ကင်းလွတ်ရန် ထပ်မံ၍ အာမခံချက် တင်သွင်းထားကြောင်း သိရှိရသည်။

Chambers သည် Naresuan တက္ကသိုလ်၏ ASEAN Community Studies စင်တာတွင် ပညာရှင်၊ စာရေးဆရာနှင့် ကထိက တစ်ဦးဖြစ်ပြီး CNN အပါအဝင် အရှေ့တောင်အာရှဆိုင်ရာ သတင်းဆောင်းပါးများတွင် သုံးသပ်ချက်များ မကြာခဏ ရေးသားလေ့ရှိသူဖြစ်သည်။

ကိုးကား-CNN

ဘာသာပြန်ဆိုသူ-ဦးဝင်းဇော်ထွန်း၊ဒုတိယညွှန်ကြားရေးမှူး၊ နစက-၂

ရုရှား၏ Mir ငွေပေးချေမှုကတ်သည် ပိတ်ဆို့ဒဏ်ခတ်မှုများရှိသော်လည်း နိုင်ငံတကာတွင် ပိုမိုလက်ခံအသုံးပြုလာ ကြောင်း ရုရှားဗဟိုဘဏ်ဥက္ကဋ္ဌ အယ်လ်ဗီရာ နာဘီအူလီနာ (Elvira Nabiullina) က ဒူးမာလွှတ်တော် (ပါလီမန် အောက်လွှတ်တော်) တွင် ပြောကြားခဲ့ပါသည်။

“ပိတ်ဆို့မှုဒဏ်များကြားမှာပင် မိမိတို့သည် ရုရှားခရီးသွားများ သွားလေ့ရှိသော မိတ်ဖက်နိုင်ငံများတွင် Mir ကတ်ကို တဖြည်းဖြည်း ချဲ့ထွင်လျက်ရှိပါသည်” ဟုရုရှားဗဟိုဘဏ်ဥက္ကဋ္ဌ မှ ဖြည့်စွက်ပြောကြားခဲ့ပါသည်။ 

လက်ရှိတွင် ရုရှားအပြင် Mir ကတ်ကို နိုင်ငံ ၁၃ နိုင်ငံတွင် အသုံးပြုနိုင်ပြီဖြစ်ပြီး ၎င်းတို့အနက်မှ ၉ နိုင်ငံတွင် (အာမေးနီးယား၊ ဗင်နီဇွဲလား၊ ဗီယက်နမ်၊ ကာဇက်စတန်၊ လာအို၊ မော်လ်ဒိုဗာ၊ မြန်မာ၊ တာဂျစ်ကစ္စတန်နှင့် နီကာရာဂွါ) ဘဏ်များ သို့မဟုတ် ငွေချေစက် (ATM)ရှိသည့်နေရာများတွင် အကန့်အသတ်ဖြင့် သို့မဟုတ် နိုင်ငံ တစ်ခု လုံးတွင် မဟုတ်ဘဲ အချို့နေရာများတွင်သာ အသုံးပြုနိုင်ပြီဖြစ်ပါသည်။ အဘ်ခါဇီးယား၊ ဘယ်လာရုဇ်၊ ကျူးဘားနှင့် တောင်အော်ဆက်တီးယားနိုင်ငံတို့တွင် Mir ကတ်ကို နေရာတိုင်းတွင် အသုံးပြုနိုင်ပါသည်။ 

ထို့အပြင် အင်ဒိုနီးရှား၊ မလေးရှား၊ နီပေါ၊ ပါကစ္စတန်၊ ထိုင်းနှင့် သီရိလင်္ကာနိုင်ငံများတွင် Mir ကတ်ကို စတင် အသုံးပြုနိုင်ရန် ပြင်ဆင်လျက်ရှိပါသည်။ အခြားနိုင်ငံ ၃ နိုင်ငံဖြစ်သည့် အီဂျစ်၊ အီရန်နှင့် မော်ရီးရှား တို့ကလည်း Mir ကတ်ကို လက်ခံအသုံးပြုရန် အစီအစဉ်ရှိကြောင်း ကြေညာထားပါသည်။ ထပ်မံ၍ နိုင်ငံ ၆ နိုင်ငံကလည်း Mir ကတ် စနစ် မိတ်ဆက်ရန် အဆိုပြုထားသည်။ သို့သော် မကြာသေးမီနှစ်များအတွင်း တူရကီ၊ ဥဇဘက်ကစ္စတန်နှင့် ခရူ ဂစ္စစတန် တို့တွင် Mir ကတ်ကို အသုံးပြုခွင့် ရပ်ဆိုင်းလိုက်ပါသည်။

ကိုးကား - TASS 

၂၀၂၅ ခုနှစ်၊ ဧပြီလ ၄ ရက်နေ့တွင် ထိုင်းနိုင်ငံ၊ ဘန်ကောက်မြို့၌ ဘင်္ဂလားပင်လယ်အော်ဒေသ ဘက်စုံကဏ္ဍနှင့် နည်းပညာဆိုင်ရာ စီးပွားရေး ပူးပေါင်းဆောင်ရွက်ရေးအဖွဲ့ (BIMSTEC) ၏ ဆဋ္ဌမအကြိမ်မြောက် ထိပ်သီးအစည်းအဝေး ကျင်းပပြုလုပ်ခဲ့သည်။ အစည်းအဝေးအား ဧပြီလ ၂ ရက်နေ့တွင် ၂၅ကြိမ်မြောက် BIMSTEC အကြီးတန်းအရာရှိများအဆင့် အစည်းအဝေး နှင့် ဧပြီလ ၃ ရက်နေ့တွင် ၂၀ကြိမ်မြောက် BIMSTEC ဝန်ကြီးများအဆင့်အစည်းအဝေးတို့အပြီးတွင် ကျင်းပခဲ့ခြင်းဖြစ်ပါသည်။

ထိပ်သီးအစည်းအဝေးသို့ တက်ရောက်ခဲ့သော ခေါင်းဆောင်များ

၁။       ဘင်္ဂလားဒေ့ရှ် - H.E. Professor Muhammad Yunus   (ပြည်သူ့သမ္မတနိုင်ငံ၏ အကြံပေးအရာရှိချုပ်)

၂။       ဘူတန် - H.E. Dasho Tshering Tobgay (ဝန်ကြီးချုပ်)

၃။       အိန္ဒိယ - H.E. Shri Narendra Modi (ဝန်ကြီးချုပ်)

၄။       မြန်မာ - H.E. Senior General Min Aung Hlaing           (နိုင်ငံတော်စီမံအုပ်ချုပ်ရေးကောင်စီဥက္ကဋ္ဌနှင့် ဝန်ကြီးချုပ်)

၅။       နီပေါ - H.E. KP Sharma Oli (ဝန်ကြီးချုပ်)

၆။       သီရိလင်္ကာ - H.E. Dr. Harini Amarasuriya (ဝန်ကြီးချုပ်)

၇။       ထိုင်း - H.E. Ms. Paetongtarn Shinawatra (ဝန်ကြီးချုပ်)

အစည်းအဝေး၏ အဓိကရည်မှန်းချက်

“သာယာဝပြော၍ ခံနိုင်ရည်ရှိပြီး ပွင့်လင်းမြင်သာမှုရှိသော BIMSTEC” ဟူသည့် ဆောင်ပုဒ်ဖြင့် ကျင်းပခဲ့သော အစည်းအဝေးသည် အဖွဲ့ဝင် နိုင်ငံများအကြား လုံခြုံရေး၊ ဖွံ့ဖြိုးရေးနှင့် စီးပွားရေးဆိုင်ရာ စိန်ခေါ်မှု များကို ဖြေရှင်းရန် ပူးပေါင်းဆောင်ရွက်မှုကို မြှင့်တင်ခဲ့သည်။

ဆဋ္ဌမအကြိမ်မြောက် BIMSTEC ထိပ်သီးအစည်းအဝေး၏ အဓိက ရလဒ်များ

၁။       ၆ ကြိမ်မြောက် BIMSTEC ထိပ်သီးအစည်းအဝေး ကြေညာ        စာတမ်း အား အတည်ပြုခြင်း

၂။       BIMSTEC ဘန်ကောက်မျှော်မှန်းချက် ၂၀၃၀ ကို အတည်ပြုခြင်း           (ပထမဆုံးသော မျှော်မှန်းချက်စာတမ်း)

၃။       ပင်လယ်ရေကြောင်းသယ်ယူပို့ဆောင်ရေး ပူးပေါင်းဆောင်ရွက်မှု  သဘောတူညီချက် လက်မှတ်ရေးထိုးခြင်း

၄။       BIMSTEC နှင့် IORA (အိန္ဒိယသမုဒ္ဒရာဒေသအဖွဲ့) အကြား MoU           လက်မှတ်ရေးထိုးခြင်း

၅။       BIMSTEC နှင့် UNODC (ကုလသမဂ္ဂ မူးယစ်ဆေးဝါးနှင့် ပြစ်မှု    ဆိုင်ရာရုံး) အကြား MoU လက်မှတ်ရေးထိုးခြင်း

၆။         BIMSTEC လုပ်ငန်းစဉ်များ၏ လုပ်ထုံးလုပ်နည်း စည်းမျဉ်းများအား   အတည်ပြုခြင်း

၇။       BIMSTEC ၏ အနာဂတ်လမ်းညွှန်ချက်ဆိုင်ရာ Eminent Persons           Group အစီရင်ခံစာ အား အတည်ပြုခြင်း

၉။       မတ်လ ၂၈ ရက်နေ့တွင် မြန်မာနှင့်ထိုင်းနိုင်ငံတို့၌ လှုပ်ခတ် ခဲ့သော ငလျင်ဘေးအား အရေးပေါ်ကယ်ဆယ်ရေးဆိုင်ရာ    ခေါင်းဆောင်များ၏ ပူးတွဲကြေညာချက်အား ထောက်ခံ အတည်      ပြုခြင်း

အခြားအရေးပါသော ဆွေးနွေးချက်များ

ခေါင်းဆောင်များသည် ဒေသတွင်း ကုန်သွယ်ရေး၊ ခရီးသွားလုပ်ငန်း၊ ယဉ်ကျေးမှုဖလှယ်ရေး၊ ရာသီဥတုလုပ်ဆောင်ချက်များ၊ စိမ်းလန်းစွမ်းအင် နှင့် သဘာဝဘေးအန္တရာယ် စီမံခန့်ခွဲမှုတို့တွင် ပူးပေါင်းဆောင်ရွက်ရန် အလေးထား ဆွေးနွေးခဲ့ကြသည်။

ဘင်္ဂလားဒေ့ရှ်၏ ဥက္ကဋ္ဌအဖြစ် တာဝန်လွှဲပြောင်းခြင်း

အစည်းအဝေးအပြီးတွင် BIMSTEC ၏ တည်ထောင်သူ အဖွဲ့ဝင်နိုင်ငံ ဖြစ်သော ဘင်္ဂလားဒေ့ရှ်သည် အဖွဲ့၏ ဥက္ကဋ္ဌတာဝန်ကို လက်ခံရယူ ခဲ့သည်။

နိဂုံး

ကမ္ဘာ့နိုင်ငံရေး နှင့် စီးပွားရေး အခြေအနေများ ပိုမိုရှုပ်ထွေးလာသည့် အချိန်တွင် BIMSTEC သည် ဒေသတွင်း ပူးပေါင်းဆောင်ရွက်မှုကို အားကောင်းစေရန် အရေးပါသော အခန်းကဏ္ဍမှ ပါဝင်လျက်ရှိသည်။ အဆိုပါထိပ်သီးအစည်းအဝေးသည် ဘင်္ဂလားပင်လယ်အော်ဒေသ၏ ငြိမ်းချမ်းရေး၊ သာယာဝပြောရေးနှင့် အခက်အခဲများ ကျော်ဖြတ်နိုင်ရေး အတွက် ခံနိုင်စွမ်းကို မြှင့်တင်ရာတွင် အရေးပါသော တွေ့ဆုံ ဆွေးနွေးမှု တစ်ခု ဖြစ်စေခဲ့သည်။

ကိုးကား-အင်တာနက်စာမျက်နှာများ

မြန်မာနိုင်ငံတွင်ဖြစ်ပွားခဲ့သည့် ပြင်းထန်မြေငလျင်ကြောင့်   ထိခိုက်ဆုံးရှုံးမှုများ ဖြစ်ပေါ်ခဲ့သည့်  ငလျင်ဒဏ်သင့် ပြည်သူများအတွက် ပြည်ပနိုင်ငံများမှ လူသားချင်း စာနာထောက်ထားမှုဆိုင်ရာ အကူအညီပစ္စည်းများ တင်ဆောင်လာသည့် လေယာဉ်များသည် ရန်ကုန်အပြည်ပြည်ဆိုင်ရာလေဆိပ်သို့ ဆက်လက် ရောက်ရှိလာ ကြောင်း သိရသည်။

ယင်းသို့ ရောက်ရှိလာရာ ယနေ့နံနက် ၅ နာရီမိနစ်၄၀ အချိန်ခန့်တွင် စင်ကာပူနိုင်ငံ ကျန်းမာရေးဝန်ကြီးဌာနမှ မြန်မာနိုင်ငံရှိ မြေငလျင်ဘေးဒဏ်သင့် ဒေသများအား လှူဒါန်းသည့် ကယ်ဆယ်ရေး အထောက်အကူပြု ဆေးရုံသုံးပစ္စည်း များနှင့် ဆေးဝါးများ၊ ပါဝင်သည့်(၅၇၃၇) Kgကို Asia Cargo Airlines ဖြင့်လည်းကောင်း၊ ၇ နာရီ၄၀ မိနစ်အချိန်ခန့်တွင် အမေရိကန်ပြည်ထောင်စု၊ Samaritans Purse International Reliefအဖွဲ့မှ မြန်မာနိုင်ငံရှိ မြေငလျင်ဘေးဒဏ်သင့် ဒေသများအားလှူဒါန်းသည့် ကူညီကယ်ဆယ်ရေးပစ္စည်းများဖြစ်သည့် ဆေးဝါးနှင့် ခွဲစိတ်ခန်း တည်ဆောက်ရန် ဆက်စပ်ပစ္စည်းများပါဝင်သည့် (၂၂၆၃၄) Kgနှင့် ခွဲစိတ် ဆရာဝန်များ၊ အထွေထွေရောဂါကုဆရာဝန်များ၊ သူနာပြုများ၊ ကျွမ်းကျင်ပညာရှင်များ စုစုပေါင်း(၂၅)ဦးကို တင်ဆောင်ပြီး Samaritans Purse အဖွဲ့ပိုင် လေယာဉ်ဖြင့် လည်းကောင်း အသီးသီးရောက်ရှိလာသည်။

ဆက်လက်ပြီး မွန်းလွဲ ၁၂ နာရီ၁၅ မိနစ်ခန့်တွင် တရုတ်ပြည်သူသမ္မတနိုင်ငံမှ လှူဒါန်းသော ကူညီ ကယ်ဆယ်ရေးပစ္စည်းများဖြစ်သည့်၊ဆေးသေတ္တာ ၊ရွက်ဖျင်တဲ၊ ခြင်ထောင်၊ ရေသန့်ဗူးစသည့်ပစ္စည်း ၈၇၃၉၀kgကို သယ်ဆောင်လာသည့် AIR CHINA CARGO လေယာဉ်သည် ရန်ကုန်အပြည်ပြည် ဆိုင်ရာလေဆိပ်သို့ ထပ်မံရောက်ရှိလာရာ ရန်ကုန်တိုင်းဒေသကြီးအစိုးရအဖွဲ့ ဝန်ကြီးချုပ် ဦးစိုးသိန်းနှင့် တိုင်းဒေသကြီးအစိုးရအဖွဲ့ ဝန်ကြီးများ၊ နိုင်ငံခြားရေးဝန်ကြီးဌာန၊  ဘေးအန္တရာယ်ဆိုင်ရာ စီမံခန့်ခွဲမှု ဦးစီးဌာန တို့မှ တာဝန်ရှိသူများ၊ မြန်မာနိုင်ငံဆိုင်ရာ တရုတ်သံရုံးမှ Econnmic and Commercial Counsellory  Mr.Ouyang Daobingနှင့် တာဝန်ရှိ သူများက ကြိုဆိုလက်ခံခဲ့ကြသည်။

ယ​င်းအပြင်ညနေ ၅နာရီ ၅၀ မိနစ်အချိန်တွင်  သိရိလင်္ကာအစိုးရမှ လှူဒါန်းသော ကူညီ ကယ်ဆယ်ရေးပစ္စည်းများဖြစ်သည့် ရွက်ဖျင် တဲ၊ဆေးရုံသုံးပစ္စည်းများ၊ လက်သန့် ဆေးများ၊ရေသန့်စင် စက်များ ၊ တစ်ကိုယ်ရေသုံး ပစ္စည်းများ နှင့်သီရိလင်္ကာ နိုင်ငံတပ်မတော်မှ Brigadier General  Karunatilake  Hewakattuge Punyasiri ဦးဆောင်သောဆေးတပ်ဖွဲ့ဝင်(၂၆)ဦးတို့သည် သီရိလင်္ကာနိုင်ငံပိုင်လေကြောင်းလိုင်းဖြင့် ရန်ကုန်အပြည်ပြည်ဆိုင်ရာလေဆိပ်သို့ ရောက်ရှိလာရာ ရန်ကုန်တိုင်းဒေသကြီး  ဝန်ကြီးချုပ် ဦးစိုးသိန်းနှင့် တိုင်းဒေသကြီးအစိုးရအဖွဲ့ ဝန်ကြီးများ၊ မြန်မာနိုင်ငံဆိုင်ရာ သီရိလင်္ကာသံအမတ်ကြီးH.E. Mrs. Prabashini Ponnamperumaနှင့် တာဝန်ရှိသူများ က ကြိုဆိုခဲ့ကြသည်။

အဆိုပါ ရောက်ရှိလာသည့် ကယ်ဆယ်ရေးပစ္စည်းများကို တပ်မတော်သားများ၊ ရန်ကုန်မြို့တော် စည်ပင်သာယာရေးကော်မတီမှ ဝန်ထမ်းများ၊ ပြည်တွင်း ကုန်တင်ကုန်ချ လုပ်သားများက သက်ဆိုင်ရာမော်တော်ယာဉ်များပေါ်သို့ တင်ဆောင်ပြီး ရန်ကုန်တိုင်းဒေသကြီးအစိုးရအဖွဲ့၏ ကြီးကြပ်မှုဖြင့် နေပြည်တော်သို့ ဆက်လက် ပို့ဆောင်ခဲ့ကြောင်း သတင်းရရှိသည်။

Source​: Myawady Webportal 

ထိုင်းနိုင်ငံတွင် အိမ်ရှင်အဖြစ်လက်ခံကျင်းပသည့် ဆဋ္ဌမအကြိမ်မြောက် ဘင်းမ် စတက် ထိပ်သီးအစည်းအဝေးသို့ တက်ရောက်ခဲ့သော နိုင်ငံတော်စီမံအုပ်ချုပ်ရေး ကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်သည် သီရိ လင်္ကာနိုင်ငံဝန်ကြီးချုပ် H.E. Dr. Harini Amarasuriya နှင့် ယနေ့ဒေသ စံတော်ချိန် မွန်းလွဲပိုင်းတွင် ဘန်ကောက်မြို့ရှိ Shangri – La ဟိုတယ်၌ တွေ့ဆုံ ဆွေးနွေးသည်။

ထိုသို့တွေ့ဆုံဆွေးနွေးရာတွင် ဦးစွာ သီရိလင်္ကာနိုင်ငံဝန်ကြီးချုပ်က မိမိတို့ သမ္မတကြီးအနေဖြင့် မြန်မာနိုင်ငံတွင် ပြင်းထန်ငလျင်လှုပ်ခတ်ခဲ့မှုကြောင် ထိခိုက် ပျက်စီးဆုံးရှုံးမှုများဖြစ်ပေါ်ခဲ့မှုအပေါ် များစွာစိတ်မကောင်းဖြစ်ရသည်ကို အမှာစကား ပါးလိုက်ပါကြောင်း၊ မိမိတို့သီရိလင်္ကာနိုင်ငံအနေဖြင့် မြန်မာနိုင်ငံ၏ ကူညီကယ်ဆယ် ရေးလုပ်ငန်းများတွင် တစ်ထောင့်တစ်နေရာမှ ကူညီဆောင်ရွက်ပေးလျက်ရှိပါကြောင်း ဖြင့်ပြောကြားသည်။

ယင်းနောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်က မိမိတို့နှစ်နိုင်ငံသည် ချစ်ကြည်ရင်းနှီးမှုနှင့် ပူးပေါင်းဆောင်ရွက်မှုများတိုးတက်ကောင်း မွန်သည့် နိုင်ငံများဖြစ်ပါကြောင်း၊ ယခုကဲ့သို့ မြန်မာနိုင်ငံတွင် ပြင်းထန်ငလျင်ကြောင့် ထိခိုက်ပျက်စီးမှုများဖြစ်ပေါ်ချိန်တွင် ကူညီကယ်ဆယ်ရေး လုပ်ငန်းများအတွက် တစ်ဖက်တစ်လမ်းမှ ကူညီဆောင်ရွက်ပေးသည့်အတွက်ကျေးဇူးတင်ရှိပါကြောင်းဖြင့် ပြောကြားသည်။

ထို့နောက် နှစ်နိုင်ငံအကြား စီးပွားရေးကဏ္ဍ၊ ကာကွယ်ရေးကဏ္ဍ၊ ပညာရေး ကဏ္ဍ၊ သိပ္ပံနှင့်နည်းပညာကဏ္ဍများ၌ ပူးပေါင်းဆောင်ရွက်မှုများ မြှင့်တင်ဆောင် ရွက်သွားမည့် အခြေအနေများနှင့် နှစ်နိုင်ငံအကြားချစ်ကြည်ရင်းနှီးမှု တိုးတက်စေရေး ဆောင်ရွက်သွားမည့် အခြေအနေများနှင့်ပတ်သက်၍ ရင်းရင်းနှီးနှီးဆွေးနွေးခဲ့ကြသည်။

တွေ့ဆုံပွဲအခမ်းအနားသို့ နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌ နိုင်ငံတော် ဝန်ကြီးချုပ်နှင့်အတူ ကောင်စီတွဲဖက်အတွင်းရေးမှူး ဗိုလ်ချုပ်ကြီး ရဲဝင်းဦး၊ ပြည် ထောင်စုဝန်ကြီးများဖြစ်ကြသည့် ဦးသန်းဆွေ၊ ဗိုလ်ချုပ်ကြီး မိုးအောင်နှင့် ခရီးစဉ်တွင် လိုက်ပါလာသည့် အဆင့်မြင့်အရာရှိကြီးများတက်ရောက်ကြပြီး သီရိလင်္ကာနိုင်ငံ ဝန်ကြီး ချုပ်နှင့်အတူ  သီရိလင်္ကာနိုင်ငံအစိုးရအဖွဲ့မှ တာဝန်ရှိသူများတက်ရောက်ကြ သည်။

တွေ့ဆုံပွဲအပြီးတွင် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီး ချုပ် နှင့် သီရိလင်္ကာနိုင်ငံဝန်ကြီးချုပ်တို့သည် အမှတ်တရလက်ဆောင်ပစ္စည်း အပြန်အလှန်ပေးအပ်ခဲ့ကြကြောင်း သတင်းရရှိသည်။

Source​: Myawady Webportal