ကမ္ဘာ့နိုင်ငံအများအပြားက အင်တာနက်ကွန်ရက်ကို အသုံးပြုရာမှာ 5G ကွန် ရက်နည်းပညာကိုသာ အသုံးပြုနိုင်နေချိန်မှာ တရုတ်နိုင်ငံက ကမ္ဘာ့ပထမဆုံး အဖြစ် 10G ကွန်ရက်နည်းပညာကို နည်းပညာမြို့တော်ဖြစ်တဲ့ ရှောင်အန်းမြို့မှာ စတင်အသုံးပြုလိုက်ပြီ ဖြစ်ပါတယ်။

အခုလိုကွန်ရက်နည်းပညာကို အသုံး ပြုနိုင်စေဖို့အတွက်  ဟွားဝေကုမ္ပဏီနဲ့ ချိုင်းနားယူနီကွန်း ကုမ္ပဏီတို့က ပူးပေါင်းပြီး 50G-PON   နည်းပညာကို အသုံးပြုကာဝန်ဆောင်မှုပေးထားတာပါ။

ဒီကွန်ရက်နည်းပညာရဲ့ အမြန်နှုန်းက အရွယ်အစား အလွန်ကြီးမားတဲ့ ဗီဒီယိုဖိုင် တွေကိုတောင်မှ စက္ကန့်ပိုင်းအတွင်း ဒေါင်းလုတ်ရယူနိုင်စေမှာပါ။ တရုတ်နိုင်ငံက အသုံးပြုလာတဲ့ အလွန်မြန်နှုန်းမြင့်ကွန် ရက်နည်းပညာက အနာဂတ်မှာ ပေါ်ပေါက်လာမယ့် စမတ်မြို့တော်များအတွက် မရှိမဖြစ် အရာဖြစ်လာပါတယ်။  

Source: https://myawady.net.mm/

ပြီးခဲ့သည့်လက မြန်မာနိုင်ငံတွင် ငလျင်လှုပ်ခတ်မှုကြောင့် တရုတ်နိုင်ငံသို့ မြေရှားဒြပ်စင် ပုံမှန်တင်ပို့ရောင်းချမှုကို အနှောင့်အယှက် ဖြစ်စေခဲ့သည်။ ထို့အပြင် နိုင်ငံတကာ ကုန်သွယ်မှုအတွက် အဓိက လမ်းကြောင်းကိုလည်း ပျက်စီးစေခဲ့သည်။

မတ်လနှောင်းပိုင်းတွင် ပြင်းအား ၇.၇ အဆင့်ရှိ ငလျင်လှုပ်ခတ်မှုကြောင့် မိုင်းတူးစက်ကိရိယာများ ပျက်စီးကာ မိုင်းအန္တရာယ်ကင်းရှင်းရေးကို ထိခိုက်ကြောင်းနှင့် တရုတ်နိုင်ငံ၏ ရှားပါးမြေဒြပ်စင်များကို နိုင်ငံခြားမှ အများဆုံး ထောက်ပံ့ပေးနေသည့် မြန်မာနိုင်ငံတွင် သယ်ယူပို့ဆောင်ရေးလမ်းကြောင်းများ ပိတ်ဆို့သွားနိုင်ကြောင်း လေ့လာသုံးသပ်သူများက ဆိုသည်။

“ဒီမြေငလျင်က ရှားပါးမြေတွေ ပေးသွင်းရေးနဲ့ ပတ်သက်ပြီး စိုးရိမ်မှုတွေ နောက်တစ်ကြိမ် ထပ်ဖြစ်လာနိုင်ပြီး ဈေးနှုန်းမတည်ငြိမ်မှုကို ပိုမိုဆိုးရွားစွာဖြစ်စေနိုင်ပါတယ်” ဟု ကော်နဲလ် တက္ကသိုလ်မှ အသုံးချစီးပွားရေးနှင့် စီမံခန့်ခွဲမှုဆိုင်ရာ လက်ထောက်ပါမောက္ခ ဝန်ဒုန်ဇန်က ပြောကြားခဲ့သည်။ “တရုတ်နိုင်ငံသည် သတ္တု ဒြပ်စင် တင်သွင်းမှု ရှားပါးမှုအတွက် ပိုမိုသက်သာအောင်ပြောင်းလဲရန် မဖြစ်မနေ လုပ်ရတော့မည်ဟုလည်း ထပ်မံဖော်ပြထားပါသည်။

တရုတ်နိုင်ငံသည် ကမ္ဘာပေါ်ရှိ ရှားပါးမြေရိုင်းများကို အဓိကထုတ်လုပ်သည့်နိုင်ငံဖြစ်သည်—စမတ်ဖုန်းများမှအစ အဆင့်မြင့်လက်နက်များအထိအရာအားလုံးကိုပြုလုပ်ရန် မရှိမဖြစ်လိုအပ်သော အရေးပါသောသတ္တုများပါဝင်ပြီး ကမ္ဘာလုံးဆိုင်ရာလုပ်ဆောင်နိုင်စွမ်း၏ ၉၀ ရာခိုင်နှုန်းနီးပါးကို ထိန်းချုပ်ထားသည်။

စက်ရုံများ၌ အသုံးပြုနေ‌သောကုန်ကြမ်းအများစုကို နိုင်ငံခြားမှ တရုတ်နိုင်ငံကို တင်သွင်းခြင်းဖြစ်ပြီး အထူးသဖြင့် မြန်မာနိုင်ငံကတင်သွင်းပါသည်။ ဇန်၏ တွက်ချက်မှုများအရ တရုတ်နိုင်ငံသည် ယမန်နှစ်က မြန်မာနိုင်ငံမှ ရှားပါးဒြပ်စင် တန်ချိန် (၄၄,၀၀၀) ကို တင်သွင်းခဲ့ပြီး စုစုပေါင်း တင်သွင်းမှု၏ (၅၇) ရာခိုင်နှုန်းရှိကြောင်း သိရှိရပါသည်။

မြန်မာနိုင်ငံသည် မြင့်မားသောအပူချိန်တွင် သံလိုက်များ အလုပ်လုပ်နိုင်စေရန်အတွက် အလွန်အရေးကြီးသော ရှားပါးဒြပ်စင်များဖြစ်သည့် ဒစ်စ်ပရိုးစီယမ် နှင့် တာဘီယမ် တို့ကို အဓိကပံ့ပိုးပေးနေသည့် အရေးကြီးသောနိုင်ငံဖြစ်ကြောင်း တိုရွန်တိုအခြေစိုက် စက်မှုလုပ်ငန်းအကြံပေးကုမ္ပဏီ Stormcrow Capital ဥက္ကဋ္ဌ ဂျွန် ဟိုက်ခါဝီက ပြောကြားခဲ့သည်။

တရုတ်နိုင်ငံသည် အရေးကြီးသော သတ္တုများပို့ရန် တည်ငြိမ်သော ပိုက်လိုင်းကို ၎င်း၏ နိုင်ငံတော်လုံခြုံရေးအတွက် မရှိမဖြစ်အရေးကြီးသောအရာဟု မှတ်ယူထားပြီး ယခုအခါ အမေရိက နှင့် ဆက်ဆံရာတွင် အရေးကြီးသော ဓာတ်သတ္တုထောက်ပံ့ရေးလုပ်ငန်းလမ်းကြောင်း၏ လွှမ်းမိုးချုပ်ကိုင်မှုကို ဦးတိုးမြှင့်လုပ်ဆောင်ရန် ဆန္ဒရှိလာပါသည်။

ယခုလအစောပိုင်းတွင် အမေရိကန်သမ္မတ ဒေါ်နယ်ထရမ့်ပ်သည် တရုတ်ကုန်ပစ္စည်းများအပေါ် အခွန်တိုးကောက်ပြီးနောက် ရှားပါးဒြပ်စင် ခုနစ်မျိုးတင်ပို့မှုအပေါ် ပေကျင်းကတားမြစ်ကန့်သတ် ခဲ့ပါသည်။

မြန်မာနိုင်ငံ၏ အရေးပါသော ဓာတ်သတ္တုကုန်သွယ်မှုသည် ၂၀၂၁ ခုနှစ်တွင် မြန်မာနိုင်ငံ၏ ပြည်တွင်းစစ်ကြောင့် ရှုပ်ထွေးနေပြီဟု လေ့လာသုံးသပ်သူများက ဆိုကြသည်။

ပြီးခဲ့သောနှစ်တွင် ပြည်တွင်းပဋိပက္ခကြောင့် နယ်စပ်ကို ပိတ်ထားရခြင်းကြောင့် မြန်မာနိုင်ငံ၏ သတ္တုတင်ပို့မှုမှာ “သိသိသာသာ ကျဆင်းသွားသည်” ဟု ဇန် က ပြောကြားခဲ့သည်။ အဆိုပါအနှောင့်အယှက်များသည် “ဈေးနှုန်းများ ကို သိသိသာသာ မြင့်တက်‌စေခဲ့သည်” ဟု ၎င်းက ထပ်လောင်း ပြောကြားခဲ့သည်။

“တရုတ်ရဲ့ အဓိက စိုးရိမ်ပူပန်မှုက မြန်မာနိုင်ငံ တည်ငြိမ်ရေးနဲ့ လက်ရှိဖြစ်နေတဲ့ ပဋိပက္ခတွေက တရုတ်စီးပွားရေး အကျိုးစီးပွားတွေကို ဘယ်လို သက်ရောက်မှုရှိလဲ” ဟု ကော်လိုရာဒို ကျောင်းမှ Ph.D သင်တန်းသား တင်ဇာထွန်း က ပြောပါသည်။

Source: Popular Myanmar

ပုပ်ရဟန်းမင်းကြီး ဖရန်စစ်သည် ဧပြီ ၂၁ ရက် မွန်းလွဲပိုင်း (မော်စကို စံတော်ချိန် နံနက် ၅:၃၅ ၊ မြန်မာစံတော်ချိန် နံနက် ၁၁:၀၅ အချိန်) တွင် အသက် ၈၈ အရွယ်၌ ကွယ်လွန်သွားကြောင်း ဗာတီကန်၏ သတင်း ထုတ်ပြန်ရေးဌာနက ကြေညာလိုက်ပါသည်။

ဖရန်စစ်သည် အီစတာပွဲတော်မတိုင်မီ နောက်ဆုံးအကြိမ်အဖြစ် ဗာတီကန်ရှိ စိန့်ပီတာဘုရားကျောင်း လှေကားဆင်းတွင် ဝတ်ပြုသူများ ကို ကောင်းချီးပေးခဲ့သည်။ 

အမေရိကန်ဒုသမ္မတ JD Vance နှင့် နောက်ဆုံးတွေ့ဆုံခဲ့ပြီး၊ ကျန်းမာရေး အခြေအနေ ဆိုးရွားနေသော်လည်း ပုပ်ရဟန်းမင်းကြီးသည် မိမိ၏ တာဝန်များကို ဆက်လက်ထမ်းဆောင်ခဲ့ပါသည်။ 

ပုပ်ရဟန်းမင်းကြီး ဖရန်စစ်သည် မတ်လ ၂၃ ရက်တွင် နမိုးနီးယား ရောဂါဆိုးဖြင့် ဆေးရုံအတွင်းလူနာအဖြစ် ၄၀ ရက်ကြာ ကုသမှုခံယူပြီး နောက်ဆေးရုံမှ ဆင်းခဲ့သော်လည်း ကျန်းမာရေးမှာ ချိုယွင်းနေခဲ့ရာ ဧပြီ ၂၁ တွင် အသက် ၈၈ အရွယ်၌ ကွယ်လွန်သွားရှာပြီဖြစ်ပါသည်။ 

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

နေပြည်တော်   ဧပြီ ၂၁

မကွေးတိုင်းဒေသကြီး ပခုက္ကူမြို့နယ်၌ ဧပြီလ ၂၀ က်က ဝိုင်ယာရှော့ခ်ဖြစ်ရာမှတစ်ဆင့် မီးလောင်မှုဖြစ်ပွားခဲ့ကြောင်း သိရသည်။

ဖြစ်စဉ်မှာ ဧပြီ ၁၉ ရက်ည ၁၂ နာရီခွဲတွင် ပခုက္ကူမြို့နယ် UA Interveb စီးကရက်စက်ရုံ၌ မီးလောင်မှုဖြစ်ပွားကြောင်းသတင်းအရ ပခုက္ကူမြို့မရဲစခန်းမှ တပ်ဖွဲ့ဝင်များ၊ မြို့နယ်မီးသတ်ဦးစီးဌာနမှ မီးသတ်တပ်ဖွဲ့ဝင်များပါဝင်သော ပူးပေါင်းအဖွဲ့က မီးသတ်ယာဉ် သုံးစီးဖြင့် သွားရောက်မီးငြှိမ်းသတ်ခဲ့ရာ ၂၅ မိနစ်ခန့်အကြာတွင် မီးငြိမ်းသွားခဲ့ပြီး ဖြစ်စဉ်အား စိစစ်ခဲ့ရာ ပခုက္ကူမြို့နယ် ရွှေချောင်းကျေးရွာနေ စက်ရုံမှူး ခင်မောင်သန်း (၅၈) နှစ်သည် အဆောက်အအုံအတွင်း၌ စီးကရက်ဖာများအား အဲကွန်းလွှတ်ပေးထားရာမှ လျှပ်စစ်ဝိုင်ယာရှော့ခ်ဖြစ်ကာ မီးစတင်လောင်ခဲ့ခြင်းဖြစ်ပြီး မီးလောင်မှုကြောင့် ဂိုဒေါင်အတွင်းရှိ စီးကရက်ဖာ ၂၅ ဖာ မီးလောင်ပျက်စီးဆုံးရှုံးခဲ့သဖြင့် ခင်မောင်သန်းအား ပခုက္ကူမြို့မရဲစခန်းက အမှုဖွင့်အရေးယူထားကြောင်း သတင်းရရှိသည်။

Source: မြန်မာ့အလင်းသတင်းစာ 

အဓိကအချက်များ

၁။       Trump ၏ နိုင်ငံရေးအရင်းအနှီး 

Pete Hegseth သည် ကမ္ဘာ့အဆင့်မီ နိုင်ငံရေးသမားတစ်ဦး၏ ရာထူးလုပ်သက် (resume) မရှိသော်လည်း၊ Donald Trump သမ္မတက ၎င်းအား ကာကွယ်ရေးဝန်ကြီးအဖြစ် အတည်ပြုရန် နိုင်ငံရေးအရင်းအနှီးအမြောက်အမြား သုံးစွဲခဲ့သည်။အကြောင်းမှာ Hegseth သည် Trump ၏ နိုင်ငံရေး စိတ်ဓာတ်နှင့် အတွေးအခေါ်များကို အပြည့်အဝကိုယ်စားပြုသောကြောင့် ဖြစ်သည်။

၂။       သမားရိုးကျ လုံခြုံရေးအရာရှိများ၏ စံနှုန်းများကို ပစ်ပယ်ခြင်း

Trump ၏ ဒုတိယသက်တမ်းတွင် သာမန်အားဖြင့် အမျိုးသားလုံခြုံရေးအရာရှိများတွင် ရှိသင့်သည့် အရည်အချင်းများကို လုံးဝအရေးမထားဘဲ၊ ၎င်း၏ မူဝါဒကို အကောင်အထည်ဖော်ရန် Hegseth ကို ရွေးချယ်ခဲ့ခြင်း ဖြစ်သည်။

၃။       လက်ရှိပြဿနာများနှင့် ဘေးကင်းနေရသည့် အကြောင်းရင်း

Trump ၏ သစ္စာရှိသူ: Hegseth သည် Trump အား အလွန်အမင်း သစ္စာရှိသူဖြစ်ပြီး၊ Trump အဖို့ ဤအရည်အချင်းသည်သာ အဓိက ဖြစ်နေသည်။

အချက်အလက်များ မလုံခြုံစွာ မျှဝေမှု: Yemen တိုက်ခိုက်မှုဆိုင်ရာ အချက်အလက်များကို အရာရှိကြီးများနှင့် ဆွေးနွေးခဲ့သည့် အစည်းအဝေးအပြီး၊ အရေးကြီးသော စစ်ဆင်ရေး အစီအစဉ်များကို ၎င်း၏ ဇနီး၊ အစ်ကိုနှင့် ၎င်း၏ရှေ့နေ အပါအဝင် Group Chat တွင် မျှဝေခဲ့ သည့် ပေါက်ကြားမှုများ ထွက်ပေါ်လာသော်လည်း Hegseth အနေဖြင့် လက်ရှိတွင် ဘေးကင်း နေဆဲ ဖြစ်သည်။

Trump ၏ မတည်မြဲသော စီမံခန့်ခွဲမှု: Trump ၏ Cabinet အဖွဲ့ဝင်များသည် သမ္မတ၏ စိတ်ကြိုက် အချိန်အတိုင်းအတာအတွင်းသာ တာဝန်ထမ်းဆောင်ရပြီး၊မည်သည့်အချိန်တွင် မဆို အလွယ်တကူ ဖယ်ရှားခံရနိုင်သည်။

၄။       John Bolton ၏ ဝေဖန်ချက်

Trump ၏ ပထမသက်တမ်း လုံခြုံရေးအကြံပေးဟောင်း John Bolton က CNN တွင် ပြောကြားရာတွင် “Hegseth ကဲ့သို့သော လူများကို ရွေးချယ်ခြင်းသည် Trump ၏ သစ္စာရှိမှုကိုသာ အဓိကထားသော စနစ်၏ ရလဒ်ဖြစ်သည်။ ၎င်းသည် ထိုရာထူးအတွက် လိုအပ်သော အရည်အချင်း များနှင့် မကိုက်ညီပါ” ဟု ဝေဖန်ခဲ့သည်။

၅။      သုံးသပ်ချက်   

Pete Hegseth သည် Trump ၏ နိုင်ငံရေးစိတ်ဓာတ်ကို ထင်ဟပ်စေသော ပုဂ္ဂိုလ်ဖြစ်ပြီး၊ ၎င်း၏ အရည်အချင်းများထက် Trump အား သစ္စာရှိမှုက ပိုမိုအရေးပါသည့် စနစ်တစ်ခု၏ ရလဒ် ဖြစ်သည်။ သို့သော် Trump ၏ မတည်မြဲသော စီမံခန့်ခွဲမှုပုံစံကြောင့် Hegseth ၏ ရာထူးသည် မည်သည့်အချိန်တွင်မဆို အဆုံးသတ်သွားနိုင်သည်။

သို့သော် ပင်တဂွန်အား ဦးဆောင်ရန် လုံခြုံစိတ်ချရသည့် အရည်အချင်း ကင်းမဲ့သူဖြစ်ကြောင်း အမျိုးသားလုံခြုံရေး ကျွမ်းကျင်သူများက သတိပေးထားသည့် Hegseth အား တာဝန်ထမ်းဆောင်ပြီး သုံးလအတွင်း ရာထူးမှ ရုတ်သိမ်းခြင်းသည် Trump အား မိမိအမှားကို ဝန်ခံရမည့် အရှက်ကွဲ အခြေအနေသို့ ရောက်စေမည်ဖြစ်သည်။

ထို့ထက်ပို၍ အရေးကြီးသည်မှာ Hegseth သည် Trump ၏ ပထမသက်တမ်း ကာလအတွင်း ကာကွယ်ရေးဝန်ကြီး နှစ်ဦးကို ရာထူးမှ ထုတ်ပယ်စေခဲ့သည့် ခွင့်လွှတ်၍မရသော အပြစ် ဖြစ်သည့် “သမ္မတ၏ဆုံးဖြတ်ချက်ကို ဆန့်ကျင်ခြင်း” ကို မပြုလုပ်ရသေးခြင်းပင်။ ၎င်းတို့အနက် ပထမဦးဆုံးဖြစ်သူ ရေတပ်ဗိုလ်ချုပ်ကြီး James Mattis သည် Trump ၏ “အမေရိကဦးစားပေး” နိုင်ငံခြားရေးမူဝါဒကို ထိန်းကျောင်းရန် ကြိုးပမ်းခဲ့ပြီး ဆီးရီးယားမှ အမေရိကန်တပ်များ ရုပ်သိမ်းရန် Trump တောင်းဆိုမှုကို အဆုံးသတ်အကြောင်းရင်းဖြစ်ခဲ့သည်။ အခြားကာကွယ်ရေးဝန်ကြီးဟောင်း Mark Esper မှာ နိုင်ငံတွင်းနိုင်ငံရေးဆန္ဒပြမှုများကို နှိမ်နင်းရန် တပ်သားများအသုံးပြုခြင်းကို ၎င်း ကိုယ်တိုင်ကန့်ကွက်ကြောင်း ပြည်သူအများရှေ့တွင် ထုတ်ဖော်ပြောဆိုပြီးနောက် ရာထူးမှ ထွက်ခွာရန် လွှာတစ်စောင်ကို လပေါင်းများစွာ ကြိုတင်ရေးသားထားခဲ့သည်။

Hegseth နှင့်ပတ်သက်သည့် မကြာသေးမီက အခြေအနေများသည် ၄၇ ဦး မြောက် သမ္မတ ၏ အုပ်ချုပ်ရေးစနစ်သည် သာမန်အစိုးရများ၏ စည်းမျဉ်းများနှင့်မတူကြောင်း နောက်တစ်ကြိမ် သတိပေးနေပြန်သည်။ အခြားသာမန်အစိုးရများတွင် အထိခိုက်မခံနိုင်သော အချက်အလက်များ ပေါက်ကြားမှုသည် ရာထူးပါဆုံးရှုံးစေနိုင်သော အရှက်တကွဲဖြစ်သော်လည်း Trump ခေတ်၌မူ ၎င်း၏ နိုင်ငံရေးအတွင်းကျကျ ပရိသတ်မှ ထုတ်ပယ်ခံရသူများသည် အများအားဖြင့် သမ္မတကိုယ်တိုင် အား စိတ်အနှောင့်အယှက်ဖြစ်စေသော သို့မဟုတ် ၎င်း၏ ဆန္ဒနှင့်ဆန့်ကျင်သောအပြစ်များကိုသာ ကျူးလွန်မိလေ့ရှိသူများဖြစ်သည်။

ကိုးကား-CNN

ရုရှားအာကာသအေဂျင်စီ Roscosmos မှ အာကာသယာဉ်မှူး အလက်ဇီ အိုဗ်ချီနင်နှင့် အိုင်ဗန် ဗာ့ဂ်နာ တို့သည် အမေရိကန် NASA အာကာသယာဉ်မှူး ဒေါ်နယ်ပက်တစ်နှင့်အတူ Soyuz MS-26 အာကာသယာဉ်ဖြင့် ကမ္ဘာသို့ ဧပြီ ၂၀ ရက်တွင် ပြန်လည်ဆင်းသက်ခဲ့ကြောင်း ရုရှားမစ်ရှင် ထိန်းချုပ်ရေးစင်တာ (Mission Control Center) ၏ ထုတ်ပြန်ချက်အရ သိရသည်။ 

အာကာသယာဉ်မှူးတို့သည် ကာဇက်စတန်နိုင်ငံသို့ Soyuz MS-26 ယာဉ်ဖြင့် ဆင်းသက်ခဲ့ပြီးနောက် ၎င်းတို့၏ အပြည်ပြည်ဆိုင်ရာ အာကာသစခန်း (ISS) တွင် ရက်ရှည်လုပ်ငန်းဆောင်တာများ ပြီးဆုံးသွားပြီဖြစ်ပါသည်။

Soyuz MS-26 ပြန်လည်ဆင်းသက်ပြီးနောက် ISS တွင် ၇၃ ကြိမ်မြောက် ရက်ရှည်အာကာသစူးစမ်းရေးအဖွဲ့က ဆက်လက်တာဝန်ထမ်းဆောင်မည် ဖြစ်ပါသည်။ ထိုအဖွဲ့တွင် Roscosmos အာကာသယာဉ်မှူး / TASS ၏ ISS မှ အထူးသတင်းထောက်အလက်ဇီ ဇူဘရစ်စကီး၊ Roscosmosအာကာသ ယာဉ်မှူးဆာဂေး ရီဇီကို့ဗ်နှင့် NASA အာကာသယာဉ်မှူး ဂျော်နီကင်းတို့ ပါဝင်ပါသည်။

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ဘီလီဇ်တွင် ခရီးသည် ၁၃ ဦးပါဝင်သော လေယာဉ်ကို ဓားဖြင့် ထိန်းချုပ်၍ ပြန်ပေးဆွဲခဲ့သည့် အမေရိကန်နိုင်ငံသားတစ်ဦးကို ခရီးသည်တစ်ဦးမှသေနတ်ဖြင့်ပစ်သတ်လိုက်သည့်ဖြစ်စဥ်တစ်ခု ပြီးခဲ့သည့် ကြာသပတေးနေ့ (ဧပြီ ၁၇) က ဖြစ်ပွားခဲ့ကြောင်း Anadolu Agency သတင်းတွင် ဖော်ပြ ထားမှုအရ သိရသည်။

အဆိုပါ လေယာဉ်ငယ်ကို ပြန်ပေးဆွဲခဲ့သူမှာ အမေရိကန်နိုင်ငံသား အမ်ခရိုင်နီလာဆာဝါတိုင်လာ ဆိုသူဖြစ်သည်ဟု သိရပြီး ၎င်းသည် ကိုရိုဇယ် မှ ဆန်ပီဒရိုသို ပျံသန်းနေသည့် လေယာဥ်ငယ်ပေါ်တွင် လိုက်ပါလာစဉ် လေယာဉ်မှူးအပါအဝင် လူသုံးဦးတို့ကို ဓားဖြင့်ထိုးကာ ၎င်းအား တိုင်းပြည်မှ ထွက်ခွင့်ပေးရန်တောင်းဆို၍ လေယာဉ်ပျံကိုလည်း ဆီထည့် ပေးရန်နှင့် အနိမ့်မှ ပျံသန်းပေးရန်လည်း တောင်းဆိုခဲ့သည်။

ယင်းဖြစ်စဥ်ကြောင့် လေယာဉ်မှာ ပျံသန်းမှုမမှန်တော့ဘဲ ဘီလီဇ် မြောက်ပိုင်းနှင့် ဘီလီဇ်မြို့ကြားရှိ လေကြောင်းလိုင်းများကို အနှောင့် အယှက် ဖြစ်စေခဲ့ကြောင်း ရဲတပ်ဖွဲ့၏ အစီရင်ခံစာတွင် ဖော်ပြထားပြီး ခရီးသည်တစ်ဦးမှ ပြန်ပေးဆွဲသူကို သေနတ်ထုတ်၍ ပစ်ခတ်ခဲ့ပြီးနောက် လေယာဉ်မှာ ဘီလီဇ်မြို့ ဆင်ခြေဖုံးတွင် အန္တရာယ်ကင်းစွာ ဆင်းသက် နိုင်ခဲ့သည်ဟုဆိုသည်။

ထို့နောက် သေနတ်ဒဏ်ရာရရှိခဲ့သည့် တိုင်လာနှင့်အတူ ၎င်း၏ လက်ချက်ဖြင့် ဓားဒဏ်ရာရရှိခဲ့သည့် ခရီးသည်များအားလုံးကို တာဝန်ရှိသူများက အနီးအနားရှိ ဆေးရုံသို့အလျင်အမြန် ပို့ဆောင်ခဲ့သော်လည်း တိုင်လာ သည် သေဆုံးခဲ့ခြင်းဖြစ်ကြောင်း သိရသည်။

ကိုးကား-MHT

တရုတ်နိုင်ငံသည် အဏုမြူသတ္တုများ (နျူကလီးယားပစ္စည်း) အသုံးပြုထားခြင်းမရှိသော ဟိုက်ဒရိုဂျင်ဗုံးကို အောင်မြင်စွာ စမ်းသပ်ခဲ့ကြောင်း South China Morning Post က ဖော်ပြထားပါသည်။

နှစ်ကီလိုဂရမ်ရှိသော အဆိုပါဗုံးပေါက်ကွဲမှုသည် စင်တီဂရိတ် ၁,၀၀၀ ဒီဂရီခန့်ရှိသော မီးတောက်တစ်ခုကို ဖြစ်ပေါ်စေခဲ့ပြီး၊ ယင်းမီးတောက် သည် ၂ စက္ကန့်ကျော်ကြာရှည်ခဲ့သည်။ အဆိုပါကြာချိန်သည် TNT ဖြင့် ပေါက်ကွဲမှုတစ်ခု၏ ပျမ်းမျှကြာချိန်ထက် ၁၅ ဆ ပိုကြာရှည်ခံခဲ့သည်။

ထိုဗုံးတွင် အဏုမြူသတ္တုများ (နျူကလီးယားပစ္စည်း) လုံးဝအသုံးမပြုထားကြောင်း သိရသည်။

ထိုစမ်းသပ်မှုသည် သမားရိုးကျ နျူကလီးယားလက်နက်မဟုတ်သော်လည်း စွမ်းအားပြင်းထန်သည့် စိတ်ဝင်စားဖွယ် နည်းပညာအသစ်တစ်ရပ်ကို မီးမောင်းထိုးပြနေပါသည်။ 

ကိုးကား - South China Morning Post

တရုတ်နိုင်ငံ ပေကျင်းမြို့၌ ဧပြီလ ၁၉ ရက်နံနက်ပိုင်းက ကျင်းပသည့် ကမ္ဘာ့ပထမဆုံး လူတူစက်ရုပ်မာရသွန် အပြေးပြိုင်ပွဲတွင် တရုတ်နိုင်ငံထုတ် လူတူစက်ရုပ်က အနိုင်ရရှိသွားကြောင်း သိရသည်။

တရုတ်အစိုးရနှင့်ပြည်တွင်း ကုမ္ပဏီတို့ ပူးပေါင်းထားသည့် အေအိုင်နည်းပညာသုံး စက်ရုပ်တီထွင် ဆန်းသစ်မှုစင်တာက ဖန်တီးထုတ်လုပ်ထားသော ထျန်းကုန်းအာထရာအမည်ရှိ စက်ရုပ်က ၂၁ ကီလိုမီတာ အကွာအဝေးကို ပြေးပြီးနောက် အချိန် ၂ နာရီ မိနစ် ၄၀ ခန့်တွင် ပထမဆုံးပန်းဝင်လာခြင်းဖြစ်သည်။

အဆိုပါပြိုင်ပွဲတွင် ကုမ္ပဏီပေါင်း ၂၀ မှ လူတူစက်ရုပ် အမျိုးအစားပေါင်း ၁၈ မျိုးက ဝင်ရောက်ယှဉ်ပြိုင်ခဲ့ခြင်းဖြစ်ပြီး စက်ရုပ်များ၏ ပြေးလွှားဟန်၊ သက်လုံ၊ လူကြိုက်များမှုနှင့် ဒီဇိုင်းတို့အပေါ်မူတည်ကာ ဆုများ ချီးမြှင့်ခြင်းဖြစ်သည်။

ယခုကဲ့သို့ လူတူစက်ရုပ်များဖြင့်မာရသွန်အပြေးပြိုင်ပွဲ ကျင်းပခြင်းသည် လူတူ စက်ရုပ်နည်းပညာတွင် တရုတ်နိုင်ငံက ရှေ့တန်းသို့ရောက်နေပြီကို ဖော်ညွှန်းပြ သခြင်းဖြစ်ကြောင်း တာဝန်ရှိသူများက ပြောသည်။

ပြီးခဲ့သည့်လအနည်းငယ်အတွင်းမှာပင် တရုတ်နိုင်ငံမှ ဖန်တီးထုတ်လုပ်ထားသည့် လူတူစက်ရုပ်များက စက်ဘီးစီးနင်းခြင်း၊ တိုက်ကွမ်ဒိုကန်ချက်ဖြင့် ကစားပြခြင်း၊ ဘေးတိုက်အလွတ်ခုန်ခြင်း အစရှိသည့် သရုပ်ပြသမှုများကို ပြသထားနိုင်သည့်အတွက် အင်တာနက်ပေါ်ရှိ ကမ္ဘာတစ်ဝန်းမှ ပြည်သူများ၏ စိတ်ဝင်စားမှုကို ရရှိထားကြောင်း သိရသည်။

Source: https://myawady.net.mm/

BRICS အဖွဲ့ဝင်များ အပါအဝင် နိုင်ငံအများအပြားသည် အာကာသ နယ်ပယ်တွင် ရုရှားနှင့် ပူးပေါင်းရန် စိတ်ဝင်တစားရှိကြောင်း သမ္မတ ဗလာဒီမာ ပူတင်က ကျောင်းသားများနှင့် တွေ့ဆုံစဉ် ပြောကြားလိုက်သည်။ 

“အမေရိကန်ကဲ့သို့ အခြားနိုင်ငံတွေနဲ့ ပူးပေါင်းဆောင်ရွက်မှုက ဆက်လက် ရှိနေပါတယ်” ဟု ပူတင်က မှတ်ချက်ပြုခဲ့သည်။ "နိုင်ငံတကာ အာကာသ စခန်းကို တည်ထောင်ပြီး လည်ပတ်နေပါပြီ။အဲဒါကို ဘယ်လိုနိဂုံးချုပ်သင့် သလဲ၊ ကျွန်တော်တို့ရဲ့ နောက်ခြေလှမ်းတွေ ဘယ်လိုဖြစ်မလဲ ဆိုတာနဲ့ ပတ်သက်ပြီး အမျိုးမျိုးသော စိတ်ကူးစိတ်သန်းတွေ ရှိပါတယ်။ ဒါပေမယ့် မိတ်ဖက်အသစ်တွေနဲ့ လက်တွဲပြီး ဆက်လုပ်သွားမှာ သေချာပါတယ်" ဟု ပူတင်က အာမခံခဲ့ပါသည်။ 

ရုရှားနှင့် တရုတ်တို့သည် စိတ်ဝင်စားစရာကောင်းသော၊ ရည်မှန်းချက် ကြီးပြီး ကြီးကျယ်ခမ်းနားသော အစီအမံများရှိသည်ဟု ပူတင်က အလေးပေး ပြောကြားခဲ့သည်။ "ယေဘုယျအားဖြင့်တော့ အိန္ဒိယ၊ တောင်အာဖရိကနဲ့ ဘရာဇီးတို့အပါအဝင် BRICS နိုင်ငံတွေနဲ့လည်း ပူးပေါင်းဆောင်ရွက် နေပါတယ်" ဟု ၎င်းက ထပ်လောင်း ပြောကြားခဲ့ပါသည်။ 

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃