(၆၁) ကြိမ်မြောက် မြူးနစ်လုံခြုံရေးညီလာခံ (MSC) သည် ဂျာမနီနိုင်ငံ၊ မြူးနစ်မြို့ရှိ Hotel Bayerischer Hof တွင် တရားဝင်စတင်ခဲ့ပြီး ကမ္ဘာ့ပြဿနာများကို ဆွေးနွေးရန် အဆင့်မြင့်နိုင်ငံရေးသမားများ၊ ဆန်းစစ်သူများ၊ အနောက်နိုင်ငံမီဒီယာများနှင့် လုံခြုံရေးကျွမ်းကျင်သူများ တက်ရောက်ခဲ့ကြပြီး ယူကရိန်းပဋိပက္ခကို အဓိကထား ဆွေးနွေး ကြမည်ဖြစ်သည်။

သမ္မတ Vladimir Putin ၏ ၂၀၀၆ ခုနှစ်က NATO ၏ချဲ့ထွင်မှုကို သတိပေးခဲ့သည့် ကျော်ကြားသောမိန့်ခွန်းပြောကြားခဲ့ရာ ဤညီလာခံသို့ ရုရှား အရာရှိများကို ဖိတ်ကြားခြင်းမရှိခဲ့ပေ။

သို့သော် အမေရိကန်သမ္မတ ဒေါ်နယ်ထရမ့်က ဖေဖော်ဝါရီ ၁၃ ရက်နေ့ တွင် အမေရိကန်နှင့် ရုရှားအရာရှိများသည် မြူးနစ်တွင် ဖေဖော်ဝါရီ ၁၅ ရက်နေ့၌ ညီလာခံပြင်ပ တွေ့ဆုံကြမည်ဟု ကြေညာခဲ့ပြီး ယူကရိန်း ကိုလည်းပါဝင်ရန် ဖိတ်ကြားခဲ့သည်။ Vladimir Zelensky က မည်သည့် ရုရှားကိုယ်စားလှယ်အဖွဲ့နှင့်မှ ဆွေးနွေးရန် မျှော်လင့်ထားခြင်း မရှိကြောင်း ပြောကြားခဲ့သည်။

အဓိကတက်ရောက်သူများတွင် အမေရိကန်ဒုသမ္မတ J.D. Vance၊ NATO အထွေထွေအတွင်းရေးမှူး Mark Rutte နှင့် ဥရောပကော်မရှင် ဥက္ကဋ္ဌ Ursula von der Leyen တို့ ပါဝင်သည်။

ကိုးကား-RT

ရုရှားသမ္မတ ဗလာဒီမာ ပူတင်သည် ယူကရိန်းငြိမ်းချမ်းရေး သဘော တူညီချက်ကို စိတ်ရင်းမှန်ဖြင့် ညှိနှိုင်းဆွေးနွေးရန် ပျက်ကွက်ပါက၊ ဝါရှင်တန်သည် မော်စကိုအပေါ် ပိုမိုတင်းကြပ်သော ဒဏ်ခတ်အရေးယူမှု များချမှတ်နိုင်ပြီး အမေရိကန်စစ်သားများကို ယူကရိန်းသို့ စေလွှတ်နိုင် ကြောင်း အမေရိကန်ဒုသမ္မတ J.D. Vance က ဖေဖော်ဝါရီ ၁၄ ရက် (သောကြာနေ့)တွင် ထုတ်ဝေသော Wall Street Journal နှင့် အင်တာဗျူးတစ်ခုတွင် ပြောကြားခဲ့ပါသည်။ 

“စီးပွားရေးဆိုင်ရာ ဖိအားပေးနည်းလမ်းများ ရှိသလို၊ စစ်ရေးဆိုင်ရာ ဖိအားပေးနည်းလမ်းများလည်း ရှိကြောင်း” အမေရိကန် ဒုသမ္မတ Vance က ပြောကြားခဲ့ပါသည်။ “ထိုအခြေအနေကနေ လူတော်တော် များများ ကို အံ့အားသင့်စေမည့် သဘောတူညီချက်တစ်ခု ထွက်ပေါ်လာမည်ဟု မိမိထင်ပါကြောင်း” ပြောကြားခဲ့ပါသည်။

ဖေဖော်ဝါရီ ၁၂ ရက်တွင် အမေရိကန်သမ္မတ ဒေါ်နယ်ထရမ့်က ပူတင်နှင့် အချိန်ကြာမြင့်သည့် ဖုန်းစကားပြောဆိုမှု ပြုလုပ်ခဲ့ကြောင်း ပြောကြား ခဲ့ပြီး၊ ယူကရိန်းစစ်ပွဲအတွက် စစ်ပြေငြိမ်းရေးညှိနှိုင်းမှုများ စတင်ရန် သဘောတူညီခဲ့ကြောင်း ၎င်း က ဖြည့်စွက်ပြောကြားခဲ့ပါသည်။ 

ထိုဖုန်းစကားပြောဆိုမှုနှင့်အတူ ယူကရိန်းသည် ဆုံးရှုံးသွားသော နယ်မြေအားလုံးကို ပြန်လည်ရယူနိုင်မည် မဟုတ်သလို၊ မည်သည့် ဖြစ်နိုင်ခြေရှိသော သဘောတူညီချက်တွင်မဆို NATO အဖွဲ့ဝင်အဖြစ် ရရှိမည်မဟုတ်ကြောင်း သမ္မတဒေါ်နယ်ထရမ့်၏ မှတ်ချက်များသည် ဥရောပအရာရှိများကို အံ့အားသင့်စေခဲ့ပြီး၊ ယူကရိန်း၏ အနာဂတ်နှင့် ပတ်သက်သည့် ဆွေးနွေးမှုများတွင် ယူကရိန်း ကို ဘေးဖယ်ထားခံရနိုင်သည် ဟူသော စိုးရိမ်မှုများကို မြင့်တက်စေခဲ့ပါသည်။ 

“သမ္မတက ထိုကိစ္စကို မျက်စိမှိတ်ပြီး လုပ်ဆောင်မည် မဟုတ်ပါကြောင်း” ဒုသမ္မတ Vance က WSJ ကို ပြောကြားခဲ့ပါသည်။ 

ဒုသမ္မတ Vance က ဝါရှင်တန်သည် ယူကရိန်း၏ အချုပ်အခြာ အာဏာ ကို အလေးထားကြောင်း အာမခံချက်ပေးခဲ့ပြီး၊ ရုရှားနှင့် ငြိမ်းချမ်းရေး သဘောတူညီချက်တွင် “မည်သည့်ပုံစံမဆို ဖြစ်နိုင်သည်” ဟု ဖြည့်စွက် ပြောကြားခဲ့ပါသည်။ ၎င်း၏ မှတ်ချက်များသည် အမေရိကန် ကာကွယ်ရေး ဝန်ကြီး Pete Hegseth ၏ ယခင်ကပြောကြားချက်များနှင့် ဆန့်ကျင်နေ ပါသည်။ ကာကွယ်ရေးဝန်ကြီးHegseth က ယူကရိန်းသို့ အမေရိကန် ငြိမ်းချမ်းရေးတပ်ဖွဲ့များ စေလွှတ်မည်မဟုတ်သလို၊ ယူကရိန်းအနေဖြင့် NATO အဖွဲ့ဝင်အဖြစ် သို့မဟုတ် ၂၀၁၄ ခုနှစ်မတိုင်မီ နယ်နိမိတ်များကို ပြန်လည်ရယူရန် ကြိုးပမ်းခြင်းသည် “လက်တွေ့မကျပါ” ဟု ပြောကြား ခဲ့ပါသည်။ ကာကွယ်ရေးဝန်ကြီး Hegseth သည် နောက်ပိုင်းတွင် ထိုမှတ်ချက်များကို ပြန်လည်ရုပ်သိမ်းခဲ့ပြီး၊ သမ္မတဒေါ်နယ်ထရမ့်သည် နောက်ဆုံးတွင် သီးသန့်လျှော့ပေးမှုများကို ဆုံးဖြတ်မည်ဖြစ်ကြောင်း သတင်းထောက်များကို ပြောကြားခဲ့ပါသည်။ 

ဖေဖော်ဝါရီ ၁၄ ရက်နေ့နောက်ပိုင်းတွင် Vance ၏ မော်စကိုအပေါ် ဖြစ်နိုင်ခြေရှိသော ဒဏ်ခတ်အရေးယူမှုများနှင့် ယူကရိန်းတွင် အမေရိကန် စစ်သားများ စေလွှတ်မည့်အကြောင်း မှတ်ချက်များနှင့်ပတ်သက်၍ ရုရှား သမ္မတ၏ ပြောရေးဆိုခွင့်ရှိသူအား မေးမြန်းခံရသောအခါ ကရင်မလင်၏ တုံ့ပြန်မှုမှာ အံ့အားသင့်ခဲ့ကြောင်းသိရှိရပါသည်။

“အဆိုပါကိစ္စနှင့်ပတ်သက်၍ ယခင်က ထုတ်ပြောခဲ့ခြင်းမရှိကြောင်း” ကရင်မလင်၏ ပြောရေးဆိုခွင့်ရှိသူ Dmitry Peskov က သတင်းထောက်များကို ပြောကြားခဲ့ပါသည်။ “နောက်ထပ်ရှင်းလင်းချက်များ ရရှိရန် မိမိတို့ အနေဖြင့် မျှော်လင့်နေပါကြောင်း” ပြောကြားခဲ့ပါသည်။

ယူကရိန်းစစ်ပွဲအတွက် အရေးပါသော အချိန်ကာလတွင်၊ သမ္မတထရမ့် အစိုးရအဖွဲ့၏ အနာဂတ်ငြိမ်းချမ်းရေးဆွေးနွေးပွဲများနှင့်ပတ်သက်သည့် ပြောင်းလဲနေသော ထုတ်ပြန်ချက်များ ထွက်ပေါ်လာနေပါသည်။ 

ရုရှား၏ သုံးနှစ်နီးပါးကြာ ယူကရိန်းစစ်ပွဲသည် ဤအပတ်အတွင်း မြူးနစ်ညီလာခံတွင် အဓိကဆွေးနွေးမှုဖြစ်လာမည်ဟု မျှော်လင့်ရပြီး၊ ဇီလန်စကီးသည် အမေရိကန် ကာကွယ်ရေးဝန်ကြီး Hegseth၊ အမေရိကန်နိုင်ငံခြားရေးဝန်ကြီး Marco Rubio နှင့် ယူကရိန်းနှင့် ရုရှားဆိုင်ရာ အထူးကိုယ်စားလှယ် Keith Kellogg တို့နှင့် တွေ့ဆုံမည်ဖြစ်ကြောင်း သိရှိရပါသည်။

ကိုးကား - Moscow Times

“ရုရှားနိုင်ငံကို G7 အဖွဲ့သို့ ပြန်လည်ပါဝင်စေလိုပါကြောင်း၊ ၎င်းတို့သည် စားပွဲဝိုင်းတွင် ပြန်လည်ထိုင်သင့်သည်ဟု ယုံကြည်ပါကြောင်း၊ ရုရှား သမ္မတ ဗလာဒီမာပူတင်လည်း ပြန်လာရန် အလွန်လိုလားမည်ဟုထင်ပါကြောင်း၊ အကယ်၍ G8 အဖြစ် ဆက်ရှိနေခဲ့ပါက ယူကရိန်းနှင့် ပတ်သက်သော ပြဿနာများ ဖြစ်ပွားခဲ့မည်မဟုတ်ကြောင်း အမေရိကန် သမ္မတ ဒေါ်နယ်ထရမ့်ကပြောကြားခဲ့ပါသည်။ 

အမေရိကန်သမ္မတဒေါ်နယ်ထရမ့်၏ အဆိုပါပြောဆိုချက်သည် ရုရှားနှင့် အနောက်နိုင်ငံများအကြား ဆက်ဆံရေးပြန်လည်တည့်မတ်ရေး ရည်ရွယ်ချက်ကို ထင်ဟပ်စေခဲ့ပြီး၊ ယူကရိန်းအရေးတွင် G8 ၏ စုစည်းမှုပျက်ပြားခြင်းကို သွယ်ဝိုက်ညွှန်းဆိုထားပါသည်။ ထို့အပြင် နိုင်ငံရေးအရ G8 ၏ အခန်းကဏ္ဍကို မီးမောင်းထိုးပြထားပါသည်။

ကိုးကား- RT

ရုရှားသမ္မတ ဗလာဒီမာပူတင်နှင့် ပထမဆုံး တွေ့ဆုံမည့် အစည်း အဝေးကို ဆော်ဒီအာရေးဗီးယားတွင် ကျင်းပရန် စီစဉ်ထားကြောင်း၊ အဆိုပါ တွေ့ဆုံမှုတွင် ဆော်ဒီအိမ်ရှေ့မင်းသား Mohammed bin Salman AI Saud လည်း ပါဝင်နိုင်ကြောင်း ထရမ့်က ပြောကြားလိုက်ပါသည်။ 

ဖေဖော်ဝါရီ ၁၂ ရက်တွင် ပူတင်နှင့် ထရမ့်တို့၏ တယ်လီဖုန်း ဆက်သွယ်ပြောကြားမှုသည် ၁ နာရီခွဲကြာမြင့်ခဲ့ပြီး နိုင်ငံသားများ အပြန်အလှန်လဲလှယ်မှုကိစ္စရပ်များအပါအဝင် ယူကရိန်း အရေးနှင့် အရှေ့အလယ်ပိုင်းဒေသ ဖွံ့ဖြိုးတိုးတက်ရေးဆိုင်ရာကိစ္စရပ်များကို ဆွေးနွေးခဲ့ကြောင်း ကရင်မလင်က ထုတ်ပြန်ထားပါသည်။ 

ထရမ့်နှင့် ပူတင်တို့ သည် ၂၀၁၉ ခုနှစ်၊ ဇွန်လကုန်ပိုင်းတွင် ဂျပန်နိုင်ငံ၊ အိုဆာကာမြို့၌ ကျင်းပသည့် G20 ထိပ်သီးအစည်းအဝေးတွင် နောက်ဆုံး အကြိမ် တွေ့ဆုံခဲ့သည်။

ကိုးကား-TASS

အမေရိကန်သမ္မတ ဒေါ်နယ်ထရမ့်က နျူကလီးယားလက်နက်များ မည်သည့်အခါမျှ အသုံးမပြုရလေအောင် မျှော်လင့်ထားကြောင်း ဖော်ပြခဲ့ပါသည်။

“မိမိ ဦးစွာလုပ်ဆောင်ချင်သည်မှာ တရုတ်နှင့်ရုရှားကို နျူကလီးယား လက်နက်ထုတ်လုပ်မှုနှေးကွေးရေး၊ ရပ်တန့်ရေးနှင့်လျှော့ချရေးအတွက် အစည်းအဝေးလုပ်ဆောင်ရန်ဖြစ်ပါကြောင်း၊ မိမိတို့တွင် နျူကလီးယား လက်နက်များ အများကြီးရှိနေပြီဖြစ်ကြောင်း၊ ကမ္ဘာကို ၅၀ ကြိမ်၊ ၁၀၀ ကြိမ် ဖျက်ဆီး၍ရနိုင်ကြောင်း၊ ယခု မိမိတို့က အသစ်ထုတ်နေကြောင်း၊ ရုရှား နှင့်တရုတ်တို့ကလည်း ထုတ်နေပါကြောင်း၊ အဆိုပါထုတ်လုပ်သည့် ငွေများကို အခြားအကျိုးရှိသော အရာများအတွက် အသုံးပြုနိုင်ရန် မျှော်လင့်ပါကြောင်း” အမေရိကန်သမ္မတ ဒေါ်နယ်ထရမ့်က အိမ်ဖြူတော်တွင် သတင်းထောက်များအား ပြောကြားခဲ့ပါသည်။ အဆိုပါ လက်နက်များ အသုံးပြုရမည့်အချိန် မည်သည့်အခါမျှ မရောက်စေလိုကြောင်း” ၎င်းက နိဂုံးချုပ်ပြောကြားခဲ့ပါသည်။

ထိုပြောဆိုချက်သည် နျူကလီးယားလက်နက်ထိန်းချုပ်ရေးဆိုင်ရာ နိုင်ငံတကာ ပူးပေါင်းဆောင်ရွက်မှုကို မီးမောင်းထိုးပြပြီး၊ ဒေါ်နယ်ထရမ့် ၏ နျူကလီးယားလက်နက်ထိန်းချုပ်ရေးဆိုင်ရာမူဝါဒကို ရှင်းလင်းစွာ ဖော်ပြထားပါသည်။

ကိုးကား - TASS

ယူကရိန်းသမ္မတ Volodymyr Zelenskyy က အမေရိကန်သမ္မတ Donald Trump သည် ၎င်းနှင့် စကားမပြောမီ ရုရှားသမ္မတနှင့် ဦးစွာ ဖုန်းဆက်စကားပြောဆိုခြင်းကို မကျေနပ်ကြောင်း အရိပ်အမြွက် ပြောဆို လိုက်ပါသည်။ ယူကရိန်းစစ်ပွဲအဆုံးသတ်ရေးအတွက် ရုရှားသည် အမေရိကန်နှင့် နှစ်ဖက်ညှိနှိုင်းကြိုးပမ်းမည်ကို စိုးရိမ်ကြောင်း Zelenskyy က ထုတ်ဖော်ပြောဆိုခဲ့ပါသည်။

Vladimir Putin နှင့် တယ်လီဖုန်းဆက် စကားပြောခဲ့သည်ဟု Trump က ဖေဖော်ဝါရီ ၁၂ ရက်နေ့တွင် ကြေညာခဲ့ပြီး စစ်ပွဲအဆုံးသတ်ရေး ရည်ရွယ်သည့် စေ့စပ်ညှိနှိုင်းမှုများစတင်ရန် ၎င်းတို့နှစ်ဦး သဘောတူ ခဲ့ကြောင်း ဆိုပါသည်။

Zelenskyy က ဖေဖော်ဝါရီ ၁၃ ရက်နေ့တွင် သတင်းထောက်များနှင့် တွေ့ဆုံခဲ့ရာ၌ Trump က Putin ကို ဦးစွာဖုန်းဆက်ခဲ့သည့်အကြောင်းနှင့်ပတ်သက်၍ "သိပ်ကျေနပ်စရာမဟုတ်ဘူး" ဟု Zelenskyy က ပြောခဲ့ ပြီး Putin သည် အမေရိကန်နှင့်သာ နှစ်ဖက်ညှိနှိုင်းမှုများ လုပ်ဆောင်လိုပြီး Putin ၏ အစီအစဉ်အတိုင်း ဆက်လက်လုပ်ဆောင်ရန် ခွင့်မပြုသင့်ကြောင်း ၎င်းကပြောဆိုခဲ့ပါသည်။

ဆက်လက်ပြီး ၎င်းက “မိမိတို့ပါဝင်ခြင်းမရှိဘဲ မည်သည့် သဘောတူ ညီချက်ကိုမျှ လက်ခံနိုင်မည်မဟုတ်ကြောင်း” ဖြည့်စွက်ပြောဆိုခဲ့ပါ သည်။

ရုရှားနှင့်ယူကရိန်းအကြား ရှေ့တန်းစစ်မြေပြင်တွင် တိုက်ပွဲများ ပြင်းထန်နေဆဲဖြစ်ပြီး အပစ်အခတ်ရပ်စဲရေး ညှိနှိုင်းဆွေးနွေးမှုများမစတင်မီ အသာစီးရမည့် အနေအထား၌ရှိနေရေး နှစ်ဖက်စလုံးက မျှော်လင့်နေကြကြောင်းသိရှိရပါသည်။

ကိုးကား-NHK World

ဆူဒန်နိုင်ငံ၌ ရုရှားရေတပ်အခြေစိုက်စခန်းတစ်ခု တည်ထောင်ရန် ဆွေးနွေးမှုများ အောင်မြင်စွာပြီးဆုံးခဲ့ပြီဖြစ်ကြောင်း ဆူဒန်နိုင်ငံခြားရေးဝန်ကြီး Ali Youssef Ahmed Al-Sharif က ထုတ်ပြန်ကြေညာခဲ့ပါသည်။

Ali Youssef Ahmed Al-Sharif က ရုရှားနိုင်ငံခြားရေးဝန်ကြီး ဆာဂေးလာရော့ဗ်နှင့် သတင်းစာရှင်းလင်းပွဲတစ်ခုတွင် ဤကိစ္စသည် လွန်စွာရိုးရှင်းကြောင်းနှင့် အားလုံးသဘောတူညီပြီးဖြစ်ကြောင်း ထုတ်ဖော် ပြောဆိုခဲ့ခြင်းလည်းဖြစ်ပါသည်။

၂၀၂၀ ခုနှစ် ဒီဇင်ဘာလတွင် စတင်လုပ်ဆောင်ခဲ့သော အဆိုပါ သဘောတူညီချက်သည် ရုရှားရေတပ်အတွက် ထောက်ပံ့ပို့ဆောင်ရေးဆိုင်ရာ အထောက်အကူပြု အဆောက်အဦတစ်ခုဖန်တီးမှုကို အလေးပေး ဖော်ပြထားကြောင်းလည်း သိရှိရပါသည်။ အဆိုပါရေတပ်အခြေစိုက်စခန်းတွင် သင်္ဘောများပြုပြင်မှုနှင့် ပြန်လည်ထောက်ပံ့ရေးတို့အတွက် အချက်အချာ နေရာတစ်ခုအဖြစ် ဆောင်ရွက်သွားမည်ဖြစ်ကြောင်းလည်း သိရပါသည်။

ထို့အပြင် ရေတပ်အခြေစိုက်စခန်းအတွင်းတွင် ဝန်ထမ်းအင်အား ၃၀၀ အထိ ထားရှိသွားမည်ဖြစ်ပြီး ရုရှားသင်္ဘော ၄ စင်းကို တစ်ချိန်တည်း၌ စခန်းချခွင့်ပြုထားမည်ဖြစ်ကြောင်းလည်းသိရှိရပါသည်။

ကိုးကား-NP News

နေတိုးအဖွဲ့ အတွင်းရေးမှူးချုပ် မက်ခ်ရက်တီက ရုရှားသမ္မတ ဗလာ ဒီမာပူတင်အား အမေရိကန်ဦးဆောင်သောစစ်ဘက်အုပ်စု (နေတိုး)၏ အဖွဲ့ဝင်နိုင်ငံများကို တိုက်ခိုက်လာပါက မော်စကိုအား ချေမှုန်းပစ်မည် ဟု ဖေဖော်ဝါရီ ၁၂ ရက်နေ့က သတိပေးခဲ့ပါသည်။ 

မကြာသေးမီနှစ်များအတွင်း ရက်တီ ကဲ့သို့သော နေတိုးအဖွဲ့၏ ထိပ်တန်း အကြီးအကဲများကို ရုရှားက ချုပ်ကိုင်နိုင်ရန်အတွက် အစီစဉ်ချ လုပ်ဆောင် နေကြောင်း စွပ်စွဲထားပြီး ပူတင်က အဓိပ္ပာယ်မရှိသောစွပ်စွဲချက်များဟု ငြင်းဆိုထားခဲ့သည်။ 

ရက်တီက အဖွဲ့ဝင်နိုင်ငံများအနေဖြင့် ကာကွယ်ရေးအသုံးစရိတ်နှင့် ပတ်သက်၍ ယခုနှစ်အတွင်း ခက်ခဲသော ဆုံးဖြတ်ချက် အချို့ကို ပြုလုပ် နေရပြီး တိုင်းပြည်ဝင်ငွေ၏ ၂ % ထက် ပိုမိုထည့်ဝင်ရန် လိုအပ်သည်ဟု တိုက်တွန်းခဲ့ပါသည်။ ဥရောပနိုင်ငံများတွင် အရည်အသွေးကောင်းမွန်သော လက်နက်ထုတ်လုပ်သူများ ရှိသော်လည်း အလုံအလောက် မထုတ်လုပ် နိုင်သေးကြောင်းနှင့် အဆိုပါပြဿနာကို အရေးတကြီး ဖြေရှင်းရန် လိုအပ်ကြောင်း ဆက်လက်ပြောကြားခဲ့ပါသည်။

ဒိန်းမတ် ထောက်လှမ်းရေးဌာန၏ ဖေဖော်ဝါရီ ၁၁ ရက်နေ့တွင် ထုတ်ပြန် ခဲ့သည့်အစီရင်ခံစာတွင် ရုရှား၏တိုက်ခိုက်လာနိုင်မှုနှင့်ပတ်သက်၍ နေတိုး၏ အစီအမံ ၊ ယူကရိန်းပဋိပက္ခကို ရပ်တန့်နိုင်ရေးအစီအမံနှင့် နေတိုး၏ ကာကွယ်ရေးစရိတ်တိုးမြှင့်မှုနှင့်ပတ်သက်၍ အဖွဲ့ဝင်နိုင်ငံများ၏ စီးပွားရေးအခြေအနေကို ထည့်သွင်းစဉ်းစားထားမှု ရှိ/မရှိ ဟူသော မေးခွန်းများနှင့်အတူ ရုရှားက ဥရောပကို ကြီးမားသော ထိုးစစ်ဆင် နိုင်ကြောင်းလည်း ပါဝင်သည်ဟု သိရှိရပါသည်။

ကိုးကား-RT

အမေရိကန်နှင့် ဥရောပသမဂ္ဂ (EU) အကြား ကုန်သွယ်ရေး ညှိနှိုင်းမှု ပြုရာ၌ အီးယူဘက်မှ အမေရိကန်ကို လိုက်လိုက်လျောလျော ဆက်ဆံ နေခြင်းနှင့်ပတ်သက်၍ ဟန်ဂေရီဝန်ကြီးချုပ် ဗစ်တာအော်ဘန်က အီးယူ ခေါင်းဆောင်များသည် သူရဲဘောကြောင်ပြီး ကြောက်တတ်သည့်ယုန်ကလေးများကဲ့သို့ဖြစ်နေသည်ဟုဆိုကာ ပြင်းထန်စွာ ဝေဖန်ခဲ့ပါသည်။ လက်ရှိဖြစ်ပေါ်နေသည့် အီးယူနှင့်အမေရိကန်တို့အကြား ကုန်သွယ်ရေး တင်းမာမှုဖြစ်နေချိန်၌ အချိန်ကိုက်ဝေဖန်လိုက်ခြင်းပင် ဖြစ်ပါသည်။ 

ဖေဖော်ဝါရီ ၁၂ ရက်နေ့တွင် ဘူဒါပတ်မြို့၌ ပြုလုပ်သည့် သတင်းစာ ရှင်းလင်းပွဲတွင် ၎င်းက ပြောဆိုလိုက်ခြင်းဖြစ်ပြီး ဂျာမဏီ AFD ပါတီ ခေါင်းဆောင် အဲလိုက်ဝိုက်ဒယ်နှင့် ပူးတွဲလုပ်ဆောင်ခဲ့ခြင်းဖြစ်သည်။ အမေရိကန်နှင့် စီးပွားရေးဆိုင်ရာ အငြင်းပွားမှုတွင် အီးယူခေါင်းဆောင် များ၏စွမ်းဆောင်ရည်သည် သံသယဖြစ်စရာရှိနေကြောင်း ဆိုလိုက်ခြင်း ပင် ဖြစ်ပါသည်။ 

ဝါရှင်တန်နှင့် ကုန်သွယ်ရေးညှိနှိုင်းမှုတွင် လေးနက်သော ကမ်းလှမ်းမှု များကို လုပ်ဆောင်နိုင်ခြင်းမရှိဘဲ အီးယူ၏ စီးပွားရေးအင်အားကြီးနှစ်နိုင်ငံဖြစ်သည့် ဂျာမနီနှင့် ပြင်သစ်တို့က အစပျိုးလုပ်ဆောင်သင့်ကြောင်း အော်ဘန်ကပြောဆိုသွားပါသည်။ 

ခြွင်းချက် သို့မဟုတ် ကင်းလွတ်ခွင့်မရှိဘဲ လာမည့်လတွင် အမေရိကန်သို့ တင်သွင်းသော သံမဏိနှင့် အလူမီနီယံအပေါ် အခွန် ၂၅ ရာခိုင်နှုန်း စည်းကြပ်မည်ဖြစ်ကြောင်း အမေရိကန်သမ္မတ ဒေါ်နယ်ထရမ့်က ဖေဖော်ဝါရီ ၁၀ ရက်နေ့တွင်ပြောကြားခဲ့ပါသည်။ နောက်ဆုံး အချက်အလက် များအရ အီးယူမှ အမေရိကန်သို့ သံမဏိတင်ပို့မှုသည် လွန်ခဲ့သည့် ဆယ်စုနှစ်အတွင်း တစ်နှစ်လျှင် ပျမ်းမျှ ယူရို ၃ ဘီလီယံ (ဒေါ်လာ ၃.၁၀ ဘီလီယံ) ခန့်ရှိပြီး ဥရောပကော်မရှင်ဥက္ကဋ္ဌ အာဆူလာဗွန်ဒါလီယန် က စည်းကြပ်ခွန် အပြန်အလှန် ကောက်နေခြင်းက အ‌ဖြေမဟုတ်ကြောင်း နှင့် အီးယူမှ “ခိုင်မာပြီး အချိုးကျသော တန်ပြန်အရေးယူမှုများ” ကို စတင်မည်ဖြစ်ကြောင်း ဖေဖော်ဝါရီ ၁၁ ရက်နေ့တွင် ပြောကြားခဲ့ ပါသည်။

ကိုးကား-Myanmar National Post

 ရုရှားနိုင်ငံက ဖမ်းဆီးခံထားရသည့် အမေရိကန်နိုင်ငံသား တစ်ဦးကို ပြန်လွှတ်ပေးရန် သဘောတူခဲ့ခြင်းသည် နှစ်နိုင်ငံကြား ကောင်းမွန်သော ဆက်ဆံရေး၏ အစဖြစ်လာမည်ဟု မျှော်လင့်ကြောင်း အမေရိကန်သမ္မတ ဒေါ်နယ်ထရမ့်က ပြောသည်။

ရုရှားအစိုးရသည် နိုင်ငံအတွင်း မူးယစ်ဆေးဝါးတရားမဝင် ကုန်ကူးမှုနှင့် လက်ဝယ်ထားရှိမှုတို့ဖြင့် ထောင်ဒဏ် ၁၄ နှစ်ကျခံနေရသည့် အမေရိကန်နိုင်ငံသား မာ့ဖိုဂျယ်အား နှစ်နိုင်ငံကြား ဆွေးနွေးမှုများ လုပ်ဆောင်ပြီးနောက် ဖေဖော်ဝါရီလ ၁၁  ရက်တွင် ပြန်လွှတ်ပေးလိုက်ခြင်းဖြစ်သည်။

ရုရှားအစိုးရ၏ အဆိုပါ လုပ်ဆောင်ချက်သည် အလွန်မျှတမှုရှိပြီး လက်တွေ့ဆန်သည့်  သဘောတူညီချက်ဖြစ်ကြောင်း ထရမ့်ကပြောသည်။ နောက်ပိုင်းတွင် ထရမ့်သည် ရုရှားနိုင်ငံမှ ပြန်လည်ရောက်ရှိလာသည့် မာ့ဖိုဂျယ်အား သွားရောက်တွေ့ဆုံခဲ့ပြီး ယင်းတွေ့ဆုံမှုတွင် မာ့ဖိုဂျယ်က ရုရှားသမ္မတ    ဗလာဒီမာပူတင်အား ကျေးဇူးတင်ရှိကြောင်း ပြောကြားခဲ့သည်။

မာ့ဖိုဂျယ်သည် မော်စကိုမြို့ရှိ အန်ဂလို-အမေရိကန် စာသင်ကျောင်းတစ်ကျောင်းတွင် ဆရာတစ်ဦးအဖြစ် တာဝန်ထမ်းဆောင်ခဲ့ပြီး ယခင်က ရုရှားနိုင်ငံရှိ အမေရိကန်သံရုံးတွင်လည်း အလုပ်လုပ်ကိုင်ခဲ့သူဖြစ်သည်။ ၂၀၂၁   ခုနှစ် မေလတွင် မော်စကိုမြို့ရှိ ရှယ်ရီမက်ယီဗို လေဆိပ်၌ ရုရှားအာဏာပိုင်များက ၎င်းထံတွင် ဆေးခြောက်များကို တွေ့ရှိခဲ့ပြီးနောက်    ဖမ်းဆီးခံခဲ့ရခြင်း ဖြစ်သည်။

ရုရှားနိုင်ငံ၏ ချစ်ကြည်မှုကို တုံ့ပြန်သည့် အနေဖြင့် ထရမ့်နှင့် ၎င်း၏အကြံပေးများက အမေရိကန်ပြည်ထောင်စုတွင် အကျဉ်းကျခံနေရသည့် ရုရှားနိုင်ငံသားတစ်ဦးကို ပြန်လွှတ်ပေးရန် သဘောတူညီခဲ့ကြောင်း ထရမ့်၏ အမျိုးသားလုံခြုံရေး အကြံပေး မိုက်ကယ်ဝေါ့က ပြောကြားခဲ့ကြောင်း သိရသည်။  

Source: Myawady Web Portal