15 February 2025

     အစွန်းရောက်အကြမ်းဖက်သမားများသည် အေးချမ်းစွာ နေထိုင်လျက်ရှိသော ပြည်သူများနှင့် တရားဥပဒေစိုးမိုးရေးအတွက် ဝိုင်းဝန်းဆောင်ရွက်နေသော အုပ်ချုပ်ရေးပိုင်းဆိုင်ရာ တာဝန်ရှိသူများအား ထိခိုက်ဒဏ်ရာရရှိစေရန် ရည်ရွယ်ချက်များဖြင့် အကြမ်းဖက်ဖောက်ခွဲရေးလုပ်ရပ်များအား ငွေကြေးထောက်ပံ့ကာ နောက်ကွယ်မှ သွေးထိုးမြှောက်ပင့်လှုံ့ဆော်မှုများဖြင့် အများပြည်သူ သွားလာအသုံးပြုသော လမ်းမကြီးများ၊ ရထားလမ်းများ၊ ဌာနဆိုင်ရာ ရုံးအဆောက်အအုံများနှင့် လူနေအိမ်များအား ဖောက်ခွဲရေးပစ္စည်းကိရိယာများ အသုံးပြု၍ မိုင်းထောင်ဖောက်ခွဲခြင်း၊ အဝေးမှ ပစ်ခတ်ဖောက်ခွဲခြင်းများ ပြုလုပ်လျက်ရှိပါသည်။
     ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဖေဖော်ဝါရီ ၁၁ ရက် နံနက် ၁၁ နာရီ ၄၅ မိနစ်တွင် စစ်ကိုင်းတိုင်းဒေသကြီး၊ ကန့်ဘလူမြို့နယ်ခုတင်(၁၀၀)ပြည်သူ့ဆေးရုံကြီး၌ မိုင်းပေါက်ကွဲစထိမှန် ဒဏ်ရာများဖြင့် အမျိုးသမီး တစ်ဦး ရောက်ရှိနေကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ ကန့်ဘလူမြို့နယ်၊ ဂါးတာကျေးရွာနေ ဒေါ်မာတင်(၄၁)နှစ်သည် ကျေးရွာ၏ အရှေ့မြောက်ဘက် တစ်မိုင်ခန့်အကွာရှိ တောအတွင်း၌ ဝါးခုတ်နေစဉ် PDF အမည်ခံ အကြမ်းဖက်အဖွဲ့က ထောင်ထားသည့် မိုင်း တစ်လုံးအား နင်းမိပေါက်ကွဲခဲ့သဖြင့် ၎င်းတွင် မိုင်းပေါက်ကွဲစ ထိမှန်ဒဏ်ရာများ ရရှိခဲ့ခြင်းဖြစ်ကြောင်း သိရသည်။
     အလားတူ မွန်းလွဲ ၁ နာရီ ၂၀ မိနစ်တွင် မကွေးတိုင်းဒေသကြီး၊ စလင်းမြို့နယ်ရှိ ဆင်ဖြူကျွန်းတိုက်နယ်ဆေးရုံသို့ မိုင်းပေါက်ကွဲစ ထိမှန်ဒဏ်ရာများဖြင့် အမျိုးသား တစ်ဦး ရောက်ရှိနေကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ စလင်းမြို့နယ်၊ ပေါက်မကျေးရွာနေ ဦးဇော်ဇော်နိုင်(၃၄)နှစ်သည် ကျေးရွာအနောက်ဘက် သုံးဖာလုံခန့်အကွာရှိ ယာခင်းသို့သွားရောက်စဉ် ယာခင်းအနီးအရောက် PDF အမည်ခံ အကြမ်းဖက်အဖွဲ့က ထောင်ထားသည့် မိုင်း တစ်လုံးအား နင်းမိပေါက်ကွဲခဲ့သဖြင့် ၎င်းတွင် မိုင်းပေါက်ကွဲစ ထိမှန်ဒဏ်ရာများ ရရှိခဲ့ခြင်းဖြစ်ကြောင်း သိရသည်။
     အထက်ပါဖြစ်စဉ်များမှ အကြမ်းဖက်မှုကျူးလွန်ခဲ့သူများအား ဥပဒေနှင့်အညီ ထိရောက်စွာ အရေးယူနိုင်ရေး လုံခြုံရေးတပ်ဖွဲ့ဝင်များက စုံစမ်းဖော်ထုတ်လျက်ရှိကြောင်း သတင်းရရှိသည်။

Source: www.moha.gov.mm 

အစ္စရေးနှင့် ပါလက်စတိုင်း ဟားမက်အဖွဲ့တို့ကြား ချမှတ်ခဲ့သည့် အပစ်အခတ်ရပ်စဲရေးသဘောတူညီချက်အရ ဟားမက်အဖွဲ့က ပြန်လွှတ်ပေးလိုက်သည့် ဓားစာခံ၃ ဦးမှာ ဖေဖော်ဝါရီလ ၁၅ရက်တွင် အစ္စရေးနိုင်ငံအတွင်းသို့ ပြန်လည်ရောက်ရှိလာပြီဖြစ်ကြောင်း အစ္စရေးတပ်မတော်က ထုတ်ပြန်သည်။

ဟားမက်အဖွဲ့သည် အဆိုပါဓားစာခံများအား ဖေဖော်ဝါရီလ ၁၅ ရက်အစောပိုင်းတွင် ပြန်လွှတ်ပေး လိုက်ခြင်းဖြစ်ပြီး ၎င်းဓားစာခံများတွင် အသက် ၂၉ နှစ်အရွယ် အစ္စရေး-ရုရှားနိုင်ငံသားတစ်ဦး၊ အသက် ၃၆ နှစ်အရွယ် အစ္စရေး-အမေရိကန်နိုင်ငံသားတစ်ဦးနှင့် အသက် ၄၆ နှစ်အရွယ်ရှိ အစ္စရေး-အာဂျင်တီးနား နိုင်ငံသားတစ်ဦးတို့ပါဝင်ကြောင်းသိရသည်။

ဟားမက်အဖွဲ့သည်  ၎င်းတို့အား ၂၀၂၃  ခုနှစ်အောက်တိုဘာလ ၇  ရက်တွင်    အစ္စရေးနိုင်ငံတောင်ပိုင်း၌ ဖမ်းဆီးခေါ်ဆောင်သွားခြင်းဖြစ်သည်။

ပြန်လွှတ်ပေးလိုက်သည့် ဓားစာခံများအား ကနဦးဆေးစစ်မှုများလုပ်ဆောင်မည်ဖြစ်ကြောင်း အစ္စရေးတပ်မတော်က ထုတ်ပြန်ထားသည်။

အစ္စရေးနိုင်ငံက အပစ်အခတ်ရပ်စဲရေးသဘောတူညီချက်အား ချိုးဖောက်သည်ဟု ဟားမက်အဖွဲ့က စွပ်စွဲပြီးနောက် ၎င်းတို့ထိန်းသိမ်းထားသည့် ဓားစာခံများပြန်လွှတ်မှုကို   ရွှေ့ဆိုင်းမည်ဟု  ကနဦးတွင် ရည်ရွယ်ခဲ့သော်လည်း အကျဉ်းသားလဲလှယ်မည့် အစီအစဉ်ကို စီစဉ်ထားသည့်အတိုင်း လုပ်ဆောင်ခဲ့ခြင်းဖြစ်ကြောင်း သိရသည်။

Ref: RT, Xinhua

Source: Myawady Web Portal

မော်စကို၊ နိုင်ငံရေး

ရုရှားသမ္မတဗလာဒီမာပူတင်နှင့် အမေရိကန်သမ္မတ ဒေါ်နယ်ထရမ့်တို့နှစ်ဦးကြား ပြုလုပ်ခဲ့သည့် ဖုန်းမှတစ်ဆင့်ဆွေးနွေးပြောဆိုမှုသည် နှစ်နိုင်ငံကြားနှစ်ပေါင်းများစွာကြာ    သံတမန်ဆက်ဆံရေးအေးစက်ခဲ့ပြီးနောက် ထွက်ပေါ်လာသည့်အလွန်အရေးပါသော ဆွေးနွေးမှုဖြစ်ကြောင်း ရုရှားလုံခြုံရေးကောင်စီ ဒုတိယဥက္ကဋ္ဌ ဒီမီထရီမက်ဗီဒက်က ဖေဖော်ဝါရီလ၁၃ ရက်တွင် ပြောသည်။

ရုရှားနှင့်အမေရိကန်သမ္မတတို့နှစ်ဦးကြား ဆွေးနွေးမှုတစ်ရပ်ကို လုပ်ဆောင်ခဲ့ပြီးဖြစ်ကြောင်း၊  ယင်းဆွေးနွေးမှုသည်တစ်ကမ္ဘာလုံးအတွက်  အလွန်အရေးပါကြောင်း မက်ဗီဒက်ကထုတ်ပြန်ချက်တစ်ရပ်တွင်ပြောသည်။ ထို့ပြင်  ယခင်အမေရိကန်အစိုးရသည် ရုရှားနိုင်ငံအား အပြစ်ပေးရန်နှင့် အရှက်ခွဲရန်အတွက် နှစ်နိုင်ငံအစိုးရကြား  တွေ့ဆုံဆွေးနွေးမှုအားလုံးကို  ဖြတ်တောက်ပစ်ခဲ့ကြောင်း မက်ဗီဒက်က ဆက်လက်ပြောကြားသည်။

အမေရိကန်သမ္မတ ဒေါ်နယ်ထရမ့်သည် ဖေဖော်ဝါရီလ ၁၂ ရက်တွင် ရုရှားသမ္မတ ပူတင်နှင့် ဖုန်းမှတစ်ဆင့်ပြောဆိုခဲ့ပြီး လက်ရှိ  ဆက်လက်ဖြစ်ပွားနေသည့် ယူကရိန်းပဋိပက္ခအား   အဆုံးသတ်နိုင်ရေးအတွက်စေ့စပ်ဆွေးနွေးမှုများစတင်လုပ်ဆောင်ရန် ခေါင်းဆောင်နှစ်ဦးစလုံးက သဘောတူညီခဲ့ကြောင်း   ထရမ့်က ပြောကြားသည်။

ရုရှားနိုင်ငံက ၂၀၂၂ ခုနှစ် ဖေဖော်ဝါရီလတွင် ယူကရိန်း၌ အထူးစစ်ဆင်ရေးစတင်ပြီးနောက် သမ္မတပူတင်နှင့် အမေရိကန်သမ္မတဟောင်း   ဂျိုးဘိုင်ဒင်တို့ကြား ဖုန်းပြောဆိုဆက်သွယ်မှုရပ်ဆိုင်းခဲ့သည့်အပြင် အမေရိကန်အစိုးရသည် ဥရောပနိုင်ငံများနှင့်အတူ ယူကရိန်းနိုင်ငံသို့ စီးပွားရေး၊ လူသားချင်းစာနာမှုနှင့် စစ်ရေးအကူအညီများကို  ပေးအပ်ခဲ့ခြင်းဖြစ်ကြောင်းသိရသည်။               

Ref: Tass

Source: Myawady Web Portal

ရုရှားနိုင်ငံအပေါ် ဂျပန်နိုင်ငံက အရေးယူပိတ်ဆို့ထားသော စီးပွားရေး လုပ်ငန်းများနှင့် လူပုဂ္ဂိုလ်များကို အဆိုပါအရေးယူပိတ်ဆို့မှုမှ ဖယ်ရှားသင့်ကြောင်း ဂျပန်ပါလီမန်အထက်လွှတ်တော်အမတ် မူနီအိုဆူဇူကီက သတင်းထောက်များအား ပြောကြားလိုက်ပါသည်။ 

ဒေါ်နယ်ထရမ့်နှင့် ဗလာဒီမာပူတင်တို့ တယ်လီဖုန်းဆက်သွယ် ပြောဆိုမှုအပြီးတွင် မူနီအိုဆူဇူကီက ယင်းသို့ ပြောကြားလိုက်ခြင်းဖြစ်ပါသည်။

ယခင်အမေရိကန်သမ္မတဂျိုးဘိုင်ဒင်အစိုးရ၏ အကြီးမားဆုံးအမှားနှင့် ခန့်မှန်းချက် လွဲချော်ခဲ့ရမှုတစ်ခုဖြစ်ကြောင်း၊  စီးပွားရေးပိတ်ဆို့မှု ပြုလုပ်ပါက ၄ လအတွင်း ရုရှားသည် နောက်ပြန်ဆုတ်သွားမည်ဟု ဆိုသော်လည်း ယခုအခါ ၃ နှစ်ကျော်သွားပြီဖြစ်ကြောင်း၊ ယခင်ဂျပန် ဝန်ကြီးချုပ် ဖူမီအိုကီရှီဒါသည်လည်း ရုရှားကို ဆန့်ကျင်သော ပိတ်ဆို့သော မူဝါဒတွင် ပါဝင်ခဲ့မိခြင်းဖြစ်ကြောင်း၊ လက်ရှိ ဝန်ကြီးချုပ် ရှီဂေရု အီရှီဘာ မှာ ထိုဆုံးဖြတ်ချက်တွင် ပါဝင်ခြင်းမရှိခဲ့သဖြင့်  အဆိုပါ အရေးယူပိတ်ဆို့မှုများကို ဖယ်ရှားသင့်ကြောင်း ၎င်းက ထပ်လောင်းပြောကြားထားပါသည်။

ကိုးကား- TASS

ယူကရိန်းပဋိပက္ခအဆုံးသတ်‌ရေးနှင့်ပတ်သက်၍ ဥရောပကို စေ့စပ်ညှိနှိုင်း‌ဆွေးနွေးပွဲများမှ ချန်လှပ်ထားမည်ဆိုပါက ဥရောပနှင့် အမေရိကန်တို့၏ ဆက်ဆံရေးမှာ ပြောင်းလဲသွားနိုင်ပြီး သမိုင်းတွင်မည့် ပြောင်းလဲမှုတစ်ခုဖြစ်နိုင်ကြောင်း ဂျာမနီ ကာကွယ်ရေးဝန်ကြီး Boris Pistorius က ပြောကြားလိုက်ပါသည်။

ထို့ပြင် ဥရောပနှင့် အမေရိကန်ဆက်ဆံရေးမှာ မတူညီသည့် လမ်းကြောင်း များနှင့် စိန်ခေါ်မှုများကို ရင်ဆိုင်ရမည့် သမိုင်းဝင် အပြောင်းအလဲတစ်ခုလည်း ဖြစ်သွားနိုင်ကြောင်း၊ နောင်အနာဂတ် ဥရောပမျိုးဆက်သစ်များအနေဖြင့် ငြိမ်းချမ်းစွာ နေထိုင်မည်လား၊ ပဋိပက္ခများနှင့် ရင်ဆိုင်မည်လားဟူ၍ ဆုံးဖြတ်ရမည့် ရွေးချယ်မှုတစ်ခုဖြစ်ကြောင်း မြူးနစ် လုံခြုံရေးညီလာခံတွင် ပြောကြားလိုက်ခြင်းဖြစ်သည်။ 

ကိုးကား-TASS

Photo: Reuters

အမေရိကန်သမ္မတဒေါ်နယ်ထရမ့်က ရုရှားကို G8 အဖွဲ့သို့ ပြန်လည်ဝင်ရောက်ရန် ပြောကြားမှုမှာ ရုရှားနှင့် ၂၁ ရာစု မဟာစီးပွားရေး ပြိုင်ဘက် တရုတ်တို့၏ မိတ်ဖက်ဆက်ဆံရေးကို အားပျော့သွားစေရန် ရည်ရွယ် ထားခြင်းဖြစ်ကြောင်း ရုရှားဆီးနိတ်အမတ် Alexey Pushkov က ပြောကြားလိုက်ပါသည်။

မဟာပထဝီနိုင်ငံရေးအင်အားကြီးသုံးနိုင်ငံ- အမေရိကန်၊ ရုရှားနှင့် တရုတ်တို့အကြား ယူကရိန်းပြဿနာကြောင့် ရုရှားနှင့် တရုတ် နီးကပ်စေခဲ့သည်မှာ ဒေါ်နယ်ထရမ့်အတွက် အဟန့်အတားတစ်ခု မဖြစ်စေလိုကြောင်း၊ ပြင်ပကိစ္စ စစ်ပွဲများကိုလည်း ခေါင်းရှုပ်မစဉ်းစားလိုကြောင်း၊ ၎င်း၏ ရည်မှန်းချက်မှာ မဟာနိုင်ငံရေးကစားပွဲအတွက်သာ ကာကွယ်ရန်ဖြစ်ကြောင်း သူက ပြောကြားထားပါသည်။ 

ကိုးကား-TASS

Photo: BBC

ဥရောပနိုင်ငံများ၏ အဓိကခြိမ်းခြောက်မှုမှာ တရုတ်နှင့် ရုရှားတို့ မဟုတ်ဘဲ ဥရောပနိုင်ငံများထဲမှသာ ဖြစ်လာလိမ့်မည်ဟု ယုံကြည်နေကြောင်း ဂျာမနီနိုင်ငံတွင် ကျင်းပလျက်ရှိသည့် မြူးနစ်လုံခြုံရေး ညီလာခံတက်ရောက်နေသူ အမေရိကန်ဒုတိယသမ္မတ JD Vance က ဖေဖော်ဝါရီ ၁၄ ရက်တွင် သတိပေးပြောကြားလိုက်ပါသည်။

အမေရိကန်သမ္မတဒေါ်နယ်ထရမ့်အနေဖြင့် ဥရောပလုံခြုံရေးအတွက် အလေးအနက်ထားပြီး ရုရှား-ယူကရိန်း စစ်ပွဲအတွက် သဘောတူညီချက် တစ်ခုရရှိအောင် လုပ်ဆောင်နိုင်မည်ကို ယုံကြည်နေကြောင်း၊ ဥရောပအနေဖြင့်လည်း မကြာမီတွင် မိမိလုံခြုံရေးအတွက် ကိုယ်တိုင် အားစိုက်သင့်ရန် အရေးကြီးကြောင်း Vance က ထပ်လောင်းပြောကြားထားပါသည်။

ကိုးကား- Financial Times

ယူကရိန်းသည် နေတိုးအဖွဲ့ဝင် ဖြစ်မလာပါက ယူကရိန်းစစ်တပ်ကို ၁.၅ သန်းအထိ တိုးချဲ့ဖွဲ့စည်းသွားရမည်ဖြစ်ကြောင်း ဖေဖော်ဝါရီ ၁၄ ရက် တွင် မြူးနစ်မြို့၌ ယူကရိန်းသမ္မတဇီလန်စကီးက သတင်းထောက်များ နှင့်တွေ့ဆုံချိန် ပြောကြားလိုက်ခြင်းဖြစ်ပါသည်။

လက်ရှိယူကရိန်းစစ်တပ်အင်အားမှာ ၎င်း၏ တစ်ဝက်ခန့်သာရှိကြောင်း ၊ ထိုသို့အင်အားတိုးချဲ့မည်ဆိုပါက ကုန်ကျစရိတ် ဒေါ်လာ ၆၀ ဘီလီယံ လိုအပ်မည်ဖြစ်ကြောင်း ၎င်းက ထပ်မံပြောကြားထားပါသည်။ 

ယူကရိန်းအနေဖြင့် လက်ရှိအချိန်တွင် နေတိုးအဖွဲ့ဝင် ဖြစ်လာနိုင်စရာအကြောင်းမရှိကြောင်း၊ အဖွဲ့ဝင်ဖြစ်လာရန် နောက်ထပ် ၂၅ နှစ် စောင့်ဆိုင်းရမည်ဖြစ်ကြောင်း အမေရိကန်ကာကွယ်ရေးဝန်ကြီး Pete Hegseth က အစောပိုင်းတွင် ပြောကြားထားပါသည်။

ကိုးကား- TASS

Photo: Apa.az

အမေရိကန်က ယူကရိန်းကို အကူအညီဆက်ပေးရမည်ဆိုပါ ယူကရိန်း နိုင်ငံရှိ မြေရှားသတ္တုများကို တူးဖော်ခွင့်ပေးရမည်ဖြစ်ကြောင်း အမေရိကန် သမ္မတ ဒေါ်နယ်ထရမ့်၏ တောင်းဆိုချက်ကို မလိုက်လျောနိုင်သည့် အပြင် လက်မှတ်လည်း မထိုးပေးနိုင်ဟု ယူကရိန်းသမ္မတ ဇီလန်စကီးက ပြောကြားခဲ့ကြောင်း ဝါရှင်တန်ပို့စ်နှင့် ရိုက်တာသတင်းဌာနများတွင် ဖော်ပြခဲ့ပါသည်။ 

ယူကရိန်း၌ တိုက်တေနီယံနှင့်လစ်သီယံ မြေရှားသတ္တုသိုက်များလည်း ရှိနေသည်။ အဆိုပါ သတ္တုများသည် ကာကွယ်ရေး၊ အဆင့်မြင့် နည်းပညာနှင့် သဘာဝပတ်ဝန်းကျင်ထိန်းသိမ်းရေး၊ အစိမ်းရောင် စွမ်းအင်စက်မှုလုပ်ငန်းများအတွက် မရှိမဖြစ်လိုအပ်ပြီး ယူကရိန်းထံမှ အမေရိကန်က တူးဖော်ထုတ်ယူကာ စွမ်းအင်ထုတ်လုပ်မှု လုပ်ငန်းများ၌ အသုံးပြုမည်ဖြစ်ပါသည်။ စစ်ပွဲကြောင့်ယိုယွင်းပျက်စီးခဲ့ရပြီဖြစ်သော ယူကရိန်းနိုင်ငံ၏ ကာကွယ်ရေးနှင့် ပြန်လည်တည်ဆောက်ရေးတွင် အမေရိကန်၏ အကူအညီများစွာလိုအပ်လျက်ရှိကာ အဆိုပါအကူအညီအတွက် အာမခံ တစ်စုံတစ်ရာရရန် ဒေါ်နယ်ထရမ့်က ယူကရိန်းမြေရှားသတ္ထုများကို ပြန်ပေးရမည်ဟု ယခုလအစောပိုင်းက ပြောဆိုထားပါသည်။ 

ယူကရိန်းအစိုးရက အခြားမြေရှားသတ္တုများဖြစ်သည့် ဘီရီလီယမ်၊ မန်းဂနိစ်၊ ဂယ်လီယမ်၊ ယူရေနီယမ်၊ ဇာကွန်နီယမ်၊ ဂရပ်ဖိုက်၊ အာပတ်တိ၊ ဖလိုရိုက်နှင့် နီကယ်သတ္တုများ တူးဖော်ခွင့်ကိစ္စကိုလည်း ပြန်လည် စဉ်းစားနေပါသည်။ ဖေဖော်ဝါရီ ၁၄ ရက်နေ့တွင် ကျင်းပပြုလုပ်သည့် မြူးနစ်လုံခြုံရေး ညီလာခံတွင် ယူကရိန်း၏အနာဂတ် တွင်းထွက် သတ္တုသိုက်များ၏  ၅၀ % ကို အမေရိကန်အတွက် လုပ်ပိုင်ခွင့်များပေးဆောင်ရန် လက်မှတ်ရေးထိုးစေလိုသောစာချုပ်ကို အမေရိကန် ကွန်ဂရက်လွှတ်တော် ကိုယ်စားလှယ်အဖွဲ့က ဇီလန်စကီးကိုတင်ပြခဲ့ပြီး အဆိုပါစာချုပ်ကို ဇီလန်စကီးက ယဉ်ကျေးစွာ ငြင်းပယ်လိုက်သည်ဟု သိရပါသည်။ 

အမေရိကန်ဘဏ္ဍာရေးဝန်ကြီးက စာချုပ်မူကြမ်းကို ဇီလန်စကီးအား ပြခဲ့စဉ်က ဇီလန်စကီးအနေဖြင့် သဘောတူနိုင်ကြောင်းဆိုခဲ့သော်လည်း လက်တွေ့တွင် သဘောမတူနိုင်ကြောင်း ပြောဆိုခဲ့ပါသည်။ယူကရိန်း၏ မြေရှားသတ္တုသိုက်အများစုသည် နိုင်ငံအရှေ့ပိုင်းရှိ ခွဲထွက်နယ်မြေ ဒွန်ဘက်စ်ဒေသ၌ရှိပြီး အဆိုပါဒေသများကို ရုရှားက သိမ်းယူထားကာ ကန်ဒေါ်လာ သန်းပေါင်း ၇ သန်းကျော်တန်ကြောင်း သိရှိရပါသည်။

ကိုးကား-Myanmar National Post

ယူကရိန်းခေါင်းဆောင် ဗလာဒီမာဇီလန်စကီးက ရုရှားသမ္မတ ဗလာဒီမာ ပူတင်နှင့်သာ ဆွေးနွေးရန်အဆင်သင့်ရှိကြောင်း၊ မော်စကို၏ ကိုယ်စားလှယ်များပါဝင်မည့် အခြားမည်သည့်ပုံစံကိုမဆိုပယ်ချကြောင်း ပြောကြားခဲ့ပါသည်။

ဇီလန်စကီးက ၂၀၂၂ ခုနှစ်တွင် ရုရှားခေါင်းဆောင်နှင့် မည်သည့် တုံ့ပြန်ဆက်သွယ်မှုကိုမဆို တားမြစ်သည့်အမိန့်တစ်ရပ်ကို ထုတ်ပြန်ခဲ့ပါသည်။ သို့သော် ယခုလအစောပိုင်း၌ ယူကရိန်းခေါင်းဆောင်က ဗြိတိန် သတင်းထောက် Piers Morgan ကို ပြောကြားရာတွင် “ယူကရိန်း နိုင်ငံသားများကို ငြိမ်းချမ်းရေးယူဆောင်လာနိုင်မည့် တစ်ခုတည်းသော ပုံစံဖြစ်မည်ဆိုပါက ၎င်းက ပူတင်နှင့်တွေ့ဆုံမည်” ဟု ဖြေကြားခဲ့ပါသည်။

မြူးနစ်လုံခြုံရေးညီလာခံ၌ ပြောကြားရာတွင် ဇီလန်စကီးက “မိမိအနေ ဖြင့် ရုရှားများနှင့်တွေ့ဆုံမည်မဟုတ်ကြောင်း၊ ရုရှား သမ္မတ ပူတင် တစ်ယောက်တည်းဖြင့်သာ တွေ့ဆုံမည်ဖြစ်ကြောင်း” ပြောကြားခဲ့ပါသည်။ ထို့နောက် ယူကရိန်း၊ အမေရိကန်နှင့် EU တို့အနေဖြင့် အခြေခံ အစီအစဉ်တစ်ခုကို ရေးဆွဲပြီးမှသာ “မိမိနှင့်ပူတင် ထိုင်ပြီး စစ်ပွဲကို ရပ်တန့်မည်" ဟု ထပ်လောင်းပြောကြားခဲ့ပါသည်။

ဇီလန်စကီးက “အခြားမည်သည့်သဘောတူညီမှုကိုမဆို” လက်မခံကြောင်း ပြောကြားခဲ့ပြီး အမေရိကန်သမ္မတ ဒေါ်နယ်ထရမ့်က ကြားဝင်ဆောင်ရွက်ပေးသူအဖြစ်သာမက ကိယက်ဗ်ကို ထောက်ခံပြီး အမှန်တကယ် ကူညီပေးမည်ဟု မျှော်လင့်ကြောင်း ပြောကြားခဲ့ပါသည်။

ကိုးကား-RT