နေပြည်တော် ဇူလိုင် ၂၉      

တပ်မတော်အနေဖြင့် နိုင်ငံတော်တည်ငြိမ်အေးချမ်းရေးကို အစဉ်တစိုက် အလေးထားဆောင်ရွက်လျက်ရှိသည်နှင့်အညီ အကြမ်းဖက်ချေမှုန်းမှုစစ်ဆင်ရေး (Counter Terrorism Operation) များတွင် အောင်မြင်မှုများရရှိကာ အကြမ်းဖက်သောင်းကျန်းသူများ ယာယီထိန်းချုပ်ထားသည့် နယ်မြေများအား အပြီးတိုင်ပြန်လည်ထိန်းချုပ်နိုင်ခဲ့မှုများအပေါ် ဒေသခံတိုင်းရင်းသားပြည်သူများအနေဖြင့် ဝမ်းသာအားရကြိုဆိုထောက်ခံလျက်ရှိကြပြီး စိတ်အားထက်သန်စွာ အားပေးထောက်ခံမှုများ၊ ယုံကြည်အားကိုးမှုများဖြင့် တပ်မတော်နှင့်အတူ ပူးပေါင်းပါဝင်ဆောင်ရွက်လာခဲ့ခြင်းများကြောင့် လက်နက်ကိုင်အကြမ်းဖက်အဖွဲ့ဝင်များ အနေဖြင့်လည်း ငြိမ်းချမ်းရေးလုပ်ငန်းစဉ်များအပေါ် နားလည်သဘောပေါက်လာကြကာ နီးစပ်ရာနယ်မြေခံတပ်စခန်းများနှင့် လုံခြုံရေးရဲကင်းများတွင် လာရောက်သတင်းပို့ပြီး ဥပဒေဘောင်အတွင်းသို့ ပြန်လည်ဝင်ရောက်လျက်ရှိကြသည်။

ထိုသို့ ဥပဒေဘောင်အတွင်းသို့ ပြန်လည်ဝင်ရောက်လျက်ရှိရာ ဇူလိုင် ၁၇ ရက်မှ ဇူလိုင် ၂၈ ရက်အထိ TNLA အဖွဲ့ဝင်လေးဦး ၊ DPLA အဖွဲ့ဝင် ၄၁ ဦး နှင့် MDY-PDF အဖွဲ့ဝင် ၅၂ ဦး စုစုပေါင်း ၉၇ ဦး တို့သည် လက်နက်မျိုးစုံ ၁၃ လက်၊ ကျည် မျိုးစုံ ၁၅၁၅ တောင့်၊ ကျည်အိမ် ၁၂ ခုနှင့် အတူ ပြန်လည်ဝင်ရောက်လာခဲ့ကြသည်။

ယနေ့တွင်လည်း အရှေ့ပိုင်းတိုင်းစစ်ဌာနချုပ် သံလွင်ခန်းမ၌ DPLA အဖွဲ့ဝင် အမျိုးသားလေးဦး၊ အမျိုးသမီးနှစ်ဦး၊ MDY-PDF အဖွဲ့မှ အမျိုးသားခုနစ်ဦးနှင့် အမျိုးသမီးနှစ်ဦး၊ ရွာငံ PDF အဖွဲ့မှ အမျိုးသားသုံးဦးနှင့် အမျိုးသမီးသုံးဦး စုစုပေါင်း ၂၁ ဦးတို့သည် Zoraki အမျိုးအစားပစ္စတို ၁ လက်နှင့်အတူ ဥပဒေဘောင်အတွင်း ငြိမ်းချမ်းစွာနေထိုင်လိုခြင်း၊ နိုင်ငံတော်အစိုးရ၏ ငြိမ်းချမ်းရေးလုပ်ငန်းစဉ်များအား ယုံကြည်လက်ခံလာခြင်းများကြောင့် ဥပဒေဘောင်အတွင်းကို ပြန်လည်ဝင်ရောက်လာခဲ့ရာ ၎င်းတို့ကို တာဝန်ရှိသူများက ပြန်လည်လက်ခံပြီး ချီးမြှင့်ငွေများနှင့် ထောက်ပံ့ပစ္စည်းများပေးအပ်ကာ မိဘအုပ်ထိန်းသူများထံသို့ စနစ်တကျပြန်လည်လွှဲပြောင်း အပ်နှံပေးခဲ့သည်။

အဆိုပါ ဥပဒေဘောင်အတွင်းဝင် ရောက်လာသူများ၏ ပြောကြားချက်များအရ ယင်းတို့သည် အေးချမ်းစွာနေ ထိုင်လုပ်ကိုင်စားသောက်သူများဖြစ်ပြီး အကြမ်းဖက်သမားများအနေဖြင့် ၎င်းတို့အဖွဲ့သို့မဝင်ရောက်ပါက မိဘဆွေမျိုးများနှင့် အကျပ်ကိုင်၍ အတင်းအဓမ္မလူသစ်စုဆောင်းခြင်းကို ခံခဲ့ရကြောင်း၊ ထို့ပြင် တောတွင်း၌ ပင်ပန်းကြမ်းတမ်းစွာဖြင့် အနေဆင်းရဲ၊ အစားဆင်းရဲ နေထိုင်ခဲ့ ရကြောင်း၊ ၎င်းတို့အဖွဲ့အတွင်း၌ လက်နက်အားကိုးဖြင့် အထက်အောက်အနိုင်ကျင့် ဗိုလ်ကျလူမျိုးရေးခွဲခြားဆက်ဆံခံရခြင်း၊ အဆင့်အတန်းခွဲခြား ဆက်ဆံခံရခြင်းများ ရှိကြောင်း၊ တပ်မတော်၏ အကြမ်းဖက်ချေမှုန်းမှုစစ်ဆင်ရေး (Counter- Terrorism Operation)များ ဆင်နွှဲမှုတွင် အကျအဆုံးများပြားလာသဖြင့် ခုခံနိုင်ခြင်းမရှိတော့၍ ဆက်လက်တိုက်ခိုက် လိုခြင်းမရှိခြင်းကြောင့် အသက်ရှင်သန်ရေးအတွက် အခက်အခဲဒုက္ခမျိုးစုံကြားမှ ထွက်ပြေးတိမ်းရှောင်နေရခြင်းများကြောင့် စိတ်ဓာတ်များကျဆင်းလာခြင်း၊ အကြမ်းဖက်သမားများ၏ လုပ်ရပ်များသည် အပြစ်မဲ့ပြည်သူများအတွက် လူမှုစီးပွားဘဝများ များစွာထိခိုက်နစ်နာသည်ကို သိရှိနားလည်လာခြင်း၊ မိသားစုများနှင့်အတူ ယခင်ကဲ့သို့ နွေးနွေးထွေးထွေးပြန်လည်နေထိုင်လိုခြင်း၊ နိုင်ငံတော်အစိုးရ၏ ငြိမ်းချမ်းရေးလုပ်ငန်းစဉ်များအပေါ် နားလည်သဘောပေါက်လာခြင်းတို့ကြောင့် ယခုကဲ့သို့ ၎င်းတို့အဖွဲ့အတွင်းမှ ပြန်လည်စွန့်ခွာလာပြီး နီးစပ်ရာတပ်မတော်စခန်းများမှတစ်ဆင့် ဥပဒေဘောင်အတွင်းကို ပြန်လည်ဝင်ရောက်လာခြင်းဖြစ်ကြောင်း သိရှိရသည်။

ထိုသို့ နိုင်ငံတော်အစိုးရအနေဖြင့် ဥပဒေဘောင်အတွင်း ဝင်ရောက်လာသူများအား နွေးထွေးစွာပြန်လည်ကြိုဆို လက်ခံ၍ လိုအပ်သည့်ကူညီပံ့ပိုးမှုများ ဆောင်ရွက်ပေးကာ မိဘအုပ်ထိန်းသူများထံသို့ စနစ်တကျပြန်လည်လွှဲအပ်ပေး လျက်ရှိခြင်းများကြောင့် ဥပဒေဘောင် အတွင်းသို့ ပြန်လည်ဝင်ရောက်ရန် ဆန္ဒရှိသူများ ကျန်ရှိနေသေးကြောင်းသိရှိရပြီး ဥပဒေဘောင်အတွင်း ပြန်လည်ဝင်ရောက် လိုသူများအနေဖြင့် နီးစပ်ရာ ခရိုင်၊ မြို့နယ် စီမံအုပ်ချုပ်ရေးအဖွဲ့များ၊ တပ်စခန်းများနှင့် ရဲစခန်းများသို့ အမြန်ဆက်သွယ် သတင်းပေးပို့လာပါက ကြိုဆိုလက်ခံပေးသွားမည်ဖြစ်ကြောင်းနှင့် လက်နက်/ခဲယမ်းများအတွက် ဆုကြေးငွေများအား ထိုက်တန်စွာပေးအပ်သွားမည်ဖြစ်ကြောင်း သိရှိရသည်။

အဆိုပါ ဥပဒေဘောင်အတွင်း ဝင်ရောက်လာသူများ၏ ရင်တွင်းစကားသံများကိုလည်း ယခုကဲ့သို့ ကြားသိရပါသည်-

၁။ အမျိုးသား

ကျွန်တော်ကတော့ DPLF/DPLA အကြမ်းဖက်အဖွဲ့အစည်းကနေပြီးတော့ အလင်းဝင်ရောက်လာတဲ့သူဖြစ်ပါတယ်။ ဒီအကြမ်းဖက်အဖွဲ့အစည်းကို မဝင်ရောက် ခင်အချိန်မှာ ကျွန်တော်က ဒီပင်းတယမြို့မှာပဲ မိသားစုရဲ့လုပ်ငန်းဖြစ်တဲ့ တိုင်းရင်း ဆေးဝါးရောင်းဝယ်ရေးလုပ်ငန်းကို ကူညီလုပ်ကိုင်နေတဲ့ သူတစ်ယောက်ဖြစ်ပါတယ်။ ဆန္ဒပြပွဲတွေမှာ စိတ်ပါဝင်စားမှုမရှိခဲ့ပေမယ့် လူငယ်တစ်ယောက်ပီပီ Social Network သုံးစွဲတာတွေနဲ့ အဲဒီအထဲကို ကြိုတင်ရောက်နှင့်ပြီးသား သူငယ်ချင်းတစ်ယောက်က ဆွဲဆောင်မှုကြောင့် အဲဒီအကြမ်းဖက်အဖွဲ့အစည်းထဲ ရောက်ရှိသွားတာဖြစ်ပါတယ်။ ကျွန်တော်အဲဒီအကြမ်းဖက်အဖွဲ့အစည်းကို ကျောက်မဲမြို့ ခွန်ကော်ကျေးရွာမှာ သင်တန်း(၃)လ တက်ပြီးတာနဲ့ ကျွန်တော်က (၁၀) တန်းအောင်မြင်ထားတဲ့သူ တစ်ယောက်ဖြစ်တဲ့အတွက် KIA/KPDF/NUG က ဦးစီးဖွင့်လှစ်ထားတဲ့ ဆေးသင်တန်းကို ကျွန်တော်(၃)လ တက်ရောက်ခဲ့ရပါတယ်။ အဲဒီ(၃)လ ကျွန်တော်တက်ရောက်ပြီးတဲ့အချိန်မှာ ကျွန်တော်တို့ နောင်ချိုမြို့ ပါဟက်ရပ်ကွက်ထဲမှာ ဒီအကြမ်းဖက်အဖွဲ့ထဲက ထိခိုက်ဒဏ်ရာ ရရှိလာတဲ့သူတွေကို ကုသပေးနေတဲ့ CDM ဆေးဆရာဝန်နဲ့အတူ ကျွန်တော်ဆေးမှူးတာဝန်ကို ထမ်းဆောင်ခဲ့ရပါတယ်။ ဆေးမှူးတာဝန်ကိုပဲ ထမ်းဆောင်ရတာဖြစ်တဲ့အတွက် အခွန်ငွေကောက်ခံတဲ့ ကိစ္စတွေ၊ တချို့သောကိစ္စတွေကို ကျွန်တော်သေချာမသိပါဘူး။ ဒီအတင်း အဓမ္မလူသစ်စုဆောင်းတဲ့ ကိစ္စတွေကိုတော့ ကျွန်တော်တချို့သိခဲ့ရပါတယ်။ ဘာလို့လဲဆိုတော့ လူသစ်စုဆောင်းလာတဲ့အထဲမှာ လူသစ်စုဆောင်းလာတဲ့လူတွေကို နေရာထားတာမလုံလောက်လို့ ကျွန်တော့်ဆေးခန်းမှာ လာထားတဲ့အတွက် ကျွန်တော်သိရှိခဲ့ရတာဖြစ်ပါတယ်။ အဲဒီလူသစ်စုဆောင်းတဲ့ အချိန်မှာလည်း ရွာတွေကိုဝိုင်းပြီးတော့ ကျည်တွေဖောက်ပြီးတော့ တစ်အိမ်တက်၊ တစ်အိမ်ဆင်း လူသစ်ဆွဲတာတွေဖြစ်တယ်။ ရှေ့တန်းစစ်မျက်နှာပြင်မှာဆိုရင်လည်း ဒီအကြမ်းဖက်အဖွဲ့အစည်းမှာ အထက်လူကြီးတွေက အောက်လက်ငယ်သားတွေကို အနိုင်ကျင့်တာတွေ၊ သူတို့ကျတော့ အဆင်ပြေပြေနေပြီးတော့ အောက်ကလူတွေကို အတင်းတိုက်ခိုင်းတာတွေ၊ ခံစစ်မှာဆိုရင်လည်း အတင်းခံစစ်ပြင်ခိုင်းတာတွေရှိတယ်။ အဲဒီလိုမျိုးတွေလည်း ကျွန်တော့်ဆီရောက်လာတဲ့ ထိခိုက်ဒဏ်ရာရလာတဲ့ သူတွေဆီကတဆင့် ကျွန်တော်ပြန်ကြားရတာဖြစ်တယ်။ သူတို့ရဲ့ ဖိအားပေးမှုတွေကြောင့် တချို့ကျွန်တော်တို့ ဒီတောထဲဝင်တဲ့အကြမ်းဖက်အဖွဲ့အစည်းက သူငယ်ချင်းတွေလည်း ကိုယ့်ကိုယ်ကိုယ် သတ်သေသွားတာတွေလည်း အများကြီးရှိတယ်။ အဲဒီလိုကိစ္စတွေကြားတဲ့အတွက် ကျွန်တော်က အလင်းဝင်ရောက်ဖို့ စဉ်းစားတယ်။ ဒါပေမယ့် အလင်းဝင်ရောက်ဖို့လုပ်တဲ့ အချိန်မှာလည်း သံသယတော့ရှိမိတယ်။ ဘာဖြစ်လို့လဲဆိုတော့ ဒီဘက်မှာ ဝါဒဖြန့်ထားတာက တပ်မတော်ဘက်က ကျွန်တော်တို့ အလင်းဝင်ရောက်တဲ့သူတွေကို ဖမ်းဆီးတယ်၊ ရိုက်နှက်တယ်၊ သတ်ဖြတ်တယ်၊ ထောင်ချတယ်ဆိုပြီးတော့ ဝါဒဖြန့်ထားတယ်။ အဲဒီအတွက် စိုးရိမ်မှုတော့ရှိတယ်။ ဒါပေမယ့် ဟိုမှာနေပြီးတော့ အလကားသေမဲ့အစားတော့ ကျွန်တော်ဒီဘက်ကိုပဲ အလင်းဝင်ရောက်လိုက်မယ်ဆိုပြီးတော့ပဲ ဆုံးဖြတ်လိုက်တယ်။ အဓိက အလင်းဝင်ရတဲ့အကြောင်းရင်းက DPLA အကြမ်းဖက်အဖွဲ့အစည်းရဲ့ ခေါင်းဆောင်တွေကျတော့ ဓနုအမျိုးသားလွတ်မြောက်ရေး တပ်မတော်လို့ထောင်ပြီးတော့ ဓနုပြည်သူတွေကို အဓမ္မဖမ်းဆီးတာတွေ၊ ငွေညှစ်တာတွေ၊ ပြီးတော့ အသက်မပြည့်သေးတဲ့သူတွေပါပါတယ်။ သူတို့တွေကိုပါ လူသစ်စုဆောင်းတာတွေရှိတယ်။ ပြီးတော့ အောက်လက်ငယ်သားတွေကိုလည်း အနိုင်ကျင့်ဖိနှိပ်တာတွေ၊ အရာရှိပိုင်းတွေပဲ အဆင်ပြေနေတာမျိုးတွေပဲ မြင်နေရတဲ့အတွက် ကျွန်တော်အလင်းဝင်ရခြင်းဖြစ်ပါတယ်။ အခုလိုမျိုး ကျွန်တော်အလင်းဝင်ရောက်ပြီးတော့ မိသားစုနဲ့အတူတူ ပြန်လည်နေထိုင်တဲ့အချိန်မှာ ဒီတောထဲမှာ အတူတူသင်တန်းတက်ရောက်ဖူးတဲ့သူတွေ၊ မိတ်ဆွေတွေ၊ သူငယ်ချင်းတွေ အကုန်လုံးကိုလည်း မိသားစုနဲ့နွေးနွေး ထွေးထွေးပြန်နေဖို့ တိုက်တွန်းချင်ပါတယ်။ တပ်မတော်ကလည်း နွေးနွေးထွေးထွေးကြိုဆိုနေပါတယ်။ အလင်းဝင်ရောက်တဲ့အချိန်မှာလည်း ကျွန်တော်တို့ကို ဟိုဘက်ကဝါဒဖြန့်ထားတာနဲ့ တခြားဆီဘဲဗျ။ ဘယ်လိုခေါ်မလဲဆိုတော့ နွေးနွေးထွေးထွေးမိသားစုလိုမျိုး၊ ညီအစ်ကိုမောင်နှမလိုမျိုး ဆက်ဆံတယ်၊ ပြောဆိုတယ်၊ နေထိုင်ရတယ်။ အဲဒီအတွက်လည်း ကိုယ့်ကိုယ်ကိုယ် အလင်းဝင်ရတဲ့အတွက် ဂုဏ်ယူပါတယ်။ ဟိုဘက်မှာနေထိုင်ပြီးတော့ တောထဲမှာကျန်ခဲ့တဲ့သူငယ်ချင်းတွေ၊ အတင်းအဓမ္မစုဆောင်းခံရတဲ့ လူငယ်တွေ၊ လမ်းမှားနေတဲ့လူငယ် တွေအကုန်လုံးကို တပ်မတော်ဘက်က နွေးနွေးထွေးထွေး ကြိုဆိုနေပါတယ်လို့ ပြောချင်ပါတယ်။

၂။ အမျိုးသား

ကျွန်တော်ကတော့ ဖယ်ခုံ PDF အကြမ်းဖက် ပျားစစ်ကြောင်းမှ အလင်းဝင်ရောက်လာသူဖြစ်ပါတယ်။ ကျွန်တော်အကြမ်းဖက်အဖွဲ့ထဲကို မဝင်ရောက်လာ ခင်မှာပင်လောင်းမြို့နယ် နမ့်ဖာမူကျေးရွာမှာ မိသားစုနဲ့အတူနေထိုင်ပြီး တောင်ယာလုပ်ကိုင်နေပါတယ်။ အဲဒီလို နေရင်းနဲ့ ပအိုဝ်းရွာမှာနေတဲ့ ကျွန်တော့် သူငယ်ချင်းက သူတို့အဖွဲ့အစည်းထဲ ဝင်ဖို့လာခေါ်တဲ့ အချိန်မှာ ကျွန်တော့်အိမ်နဲ့ အဆင်မပြေဖြစ်နေတာကြောင့် ဝင်ရောက်ခဲ့ခြင်းဖြစ်ပါတယ်။ ကျွန်တော်အကြမ်းဖက်သင်တန်းသုံးလကို ဖယ်ခုံမြို့နယ် ဆင်ဖြူကျေးရွာ စာသင်ကျောင်းကျောင်းဝင်းထဲမှာတက်ရောက်ကာ ဆင်ဖြူကျေးရွာ စာသင်ကျောင်းဝင်းထဲမှာပဲအခြေချပြီးတော့ ဖယ်ခုံမြို့အရှေ့ ဘက်အခြမ်းရပ်ရွာတွေမှာ ဆက်လက် လှုပ်ရှားပြီးတော့ အကြမ်းဖက်ဝင်တပ်သားတာဝန်ကို ထမ်းဆောင်ခဲ့ပါတယ်။ ကျွန်တော်တို့ အကြမ်းဖက်ခေါင်းဆောင်ပိုင်းတွေမှာ ကယန်းလူမျိုး၊ ခရစ်ယာန်ဘာသာဝင်တွေ ဖြစ်ပြီးတော့ တချို့ လက်အောက်ငယ်သားတွေမှာ ဗုဒ္ဓဘာသာဗမာ၊ ပအိုဝ်းလူမျိုးတွေပါဝင်ခဲ့ပေမယ့် ဘာသာရေးအရ ခွဲခြားဆက်ဆံတာတွေ၊ လူမျိုးရေးအရခွဲခြားဆက်ဆံ တာတွေအပြင် တပ်မတော်နဲ့တိုက်ခိုက်ရ တဲ့အချိန်တွေမှာလည်းဗမာ၊ ပအိုဝ်းလူမျိုးတွေကို ရှေ့တန်းကျကျ တိုက်ခိုက်ခိုင်းပြီးတော့ သူတို့ကယန်းလူမျိုးတွေကို ပိုပြီးအရေးပေးဆက်ဆံတာကိုတွေ့ရပါတယ်။ ကျွန်တော်အကြမ်းဖက်အဖွဲ့ဝင် ထဲကို ဝင်တာကြာလာတဲ့အချိန်မှာတော့ ခေါင်းဆောင်ပိုင်းတွေရဲ့ လုပ်ရပ်တွေကို ကျွန်တော်သိမြင်လာတဲ့အခါမှာ မိသားစု နဲ့ပဲ ပြန်လည်နေထိုင်ဖို့ ကျွန်တော်စဉ်းစား ဆုံးဖြတ်ခဲ့ပါတယ်။ ဒါပေမယ့် အရင်ကကျွန်တော်ကြားသိထားတဲ့ တပ်မတော်ထံအလင်းဝင်သွားတဲ့သူတွေကို တပ်မတော်က ညှဉ်းပန်းနှိပ်စက်သတ်ဖြတ်မှု၊ ထောင်ချမှုစတဲ့ ဝါဒဖြန့်တာတွေကြောင့် ကျွန်တော်အလင်းဝင်ရောက်ဖို့ အဆင်ပြေပါ့မလားလို့ စိုးရိမ်စိတ်ဖြစ်မိပါတယ်။ ကျွန်တော်အဓိက အလင်းဝင်ရတဲ့အကြောင်းရင်းကတော့ ကျွန်တော်အကြမ်းဖက်အဖွဲ့ထဲ ဝင်ရောက်လာတဲ့အချိန်က အိမ်နဲ့အဆင်မပြေတာကြောင့် သူငယ်ချင်းခေါ်လို့ လိုက်ခဲ့တာဖြစ်ပါတယ်။ အမှန်တကယ် လက်နက်ကိုင်တိုက်ခိုက်ရေးလုပ်ငန်းတွေ လုပ်တဲ့အချိန်မှာတော့ အဖွဲ့ဝင်မှ ခေါင်းဆောင်ပိုင်းတွေက ဘာသာရေးအရ ခွဲခြားဆက်ဆံတာတွေ၊ လူမျိုးရေးအရ နှိမ့်ချဆက်ဆံတာတွေအပြင် တိုက်ပွဲမှာလည်း ကျွန်တော်တို့ပအိုဝ်းလူမျိုးတွေကိုပဲ ပြန်တိုက်နေရတဲ့အတွက် လက်နက်ကိုင်လမ်းစဉ်ကို ဆက်လက်လုပ်ဆောင်ချင်စိတ်မရှိတော့ပဲ အလင်းဝင်ရောက်ခဲ့တာဖြစ်ပါတယ်။ ကျွန်တော့်အနေနဲ့ တပ်မတော်နဲ့ချိတ်ဆက်ပြီး အမှန်တကယ်ဝင်ရောက် တဲ့အချိန်မှာတော့ အရင်ကကျွန်တော် ကြားသိထားတဲ့ညှဉ်းပန်းနှိပ်စက်သတ်ဖြတ်မှု၊ ထောင်ချမှုသူတို့ဝါဒဖြန့် သလိုမဟုတ်ပါဘူး။ ကျွန်တော်အလင်းဝင်ရောက်တဲ့အချိန်မှာတော့ တပ်မတော်မှတာဝန်ရှိသူတွေက နွေးထွေးစွာကြိုဆို ဆက်ဆံကြပါတယ်။ ကောင်းမွန်စွာထားတယ်။ မိသားစုသဖွယ်ဆက်ဆံကြတယ်။ အဲဒါတွေကို ကျွန်တော်မြင်ရတွေ့ရတော့ အလွန်ကိုဝမ်းသာမိပါတယ်။ ကျွန်တော် အခုလိုအလင်းဝင်ရောက်လာတဲ့အချိန်မှာ မိသားစုတွေနဲ့အတူ အေးအေးချမ်းချမ်း နေရသလိုမျိုး ကျွန်တော်နဲ့အတူတောထဲမှာ နေထိုင်ခဲ့ဖူးတဲ့သူငယ်ချင်းတွေ၊ အဖွဲ့ထဲမှလူငယ်တွေကိုလည်းတောထဲမှာနေပြီး အကြောင်းမဲ့သေရမယ့်အစား မိသားစုနဲ့အတူ ဘဝကိုအေးအေးချမ်းချမ်း ဖြတ်သန်းပြီးတော့ ကျွန်တော့်လို အလင်းဝင်ရောက်ဖို့ဖိတ်ခေါ်ပါတယ်။ တပ်မတော်အနေနဲ့လည်း အလင်းဝင်ရောက်လာမယ့် လမ်းမှားနေတဲ့လူငယ်တွေကို နွေးထွေးစွာကြိုဆိုဆက်ဆံပြီးတော့ အရင်ကကြားသိထားတဲ့ ဝါဒဖြန့်တာတွေကို နားမယောင်ဘဲ အမြန်အလင်းဝင်ရောက်ဖို့ ကျွန်တော့်အနေနဲ့ တိုက်တွန်းလိုပါတယ်။

အမျိုးသမီး

ကျွန်မတို့ နောင်ချိုနယ်ထဲမှာတိုက်ပွဲ တွေဖြစ်ပွားတဲ့အတွက် အကြမ်းဖက်အဖွဲ့တွေဟာ ကျွန်မတို့နေထိုင်တဲ့ကျေးရွာ တွေကိုလာပြီးတော့ အဓမ္မဖမ်းဆီးတဲ့အတွက် အကြမ်းဖက်အဖွဲ့ထဲကို ရောက်ရှိခဲ့ခြင်းဖြစ်ပါတယ်။ ကျွန်မကတော့ အဖွဲ့ထဲမှာတပ်သားအနေနဲ့ ဘဏ္ဍာရေးဌာနမှာ တာဝန်ထမ်းဆောင်ခဲ့ပါတယ်။ ကျွန်မတို့အကြမ်းဖက်အဖွဲ့မှာ လူသစ်စုဆောင်းရေးအတွက် နောင်ချိုမြို့နယ်အတွင်းမှာရှိတဲ့ ကျေးရွာတွေကို လိုက်ပြီးတော့ အဓမ္မဖမ်းဆီးတာတွေ၊ တစ်အိမ်တစ်ဦးမဖြစ်မနေဝင်ရောက်တာတွေ လုပ်ဆောင်ခဲ့တာကို တွေ့မြင်ခဲ့ရပါတယ်။ ကျွန်မကတော့အဖွဲ့ထဲမှာ အမျိုးသမီးတစ်ယောက်ဖြစ်တဲ့အတွက် တိုက်ခိုက်ရတာမျိုးတော့ လုပ်ဆောင်ခြင်းမရှိပါဘူး။ ကျွန်မတွေ့မြင်ရတာကတော့ ခေါင်းဆောင်ပိုင်းတွေရဲ့ အာဏာပြပြီးတော့ ဆဲဆိုတာတွေ၊ မတရားညှဉ်းပန်း နှိပ်စက်တာတွေတော့တွေ့ရပါတယ်။ ကျွန်မအမျိုးသမီးတစ်ယောက်ဖြစ်တဲ့အတွက် အဖွဲ့ထဲမှာနေထိုင်ရတာ ဘဝလုံခြုံမှုတော့မရှိပါဘူး။ ခေါင်းဆောင်ပိုင်းတွေရဲ့ အာမခံချက်နဲ့ လုပ်ဆောင်ချက်တွေက ကိုက်ညီမှုမရှိတဲ့အတွက် အဖွဲ့မှာနေရတာ ကြာလာတာနဲ့အမျှ စိတ်ဓာက်ကျဆင်းလာခဲ့ပါတယ်။ ကျွန်မအလင်းဝင်ဖို့ တပ်မတော်ထံချိတ်ဆက်တဲ့အချိန်မှာ စိတ်ကတော့စိုးရိမ်စိတ်တွေတော့ ဖြစ်မိပါတယ်။ ဒါပေမယ့် ကျွန်မအမှန်တကယ် အလင်းဝင်ဖို့လာရောက်တဲ့အချိန်မှာ တပ်မတော်အနေနဲ့ သားသမီးတစ်ဦးလို နွေးထွေးစွာဆက်ဆံတယ်။ မိသားစုဝင်တစ်ဦးလို နွေးထွေးစွာဆက်ဆံတဲ့အတွက် စိတ်လုံခြုံမှုရှိခဲ့ပါတယ်။ ကျွန်မအခုလို အလင်းဝင်ရောက်လာရတဲ့အတွက် ကျွန်မကိုယ် ကျွန်မမှန်ကန်တယ်လိုမြင်မိပါတယ်။ ကျွန်မအခုလိုအလင်းဝင်ရောက်လာပြီးတော့ မိသားစုနဲ့အတူ နွေးထွေးစွာနေထိုင်ရသလိုမျိုး အဖွဲ့ထဲမှာရှိတဲ့ ကျွန်မရဲ့သူငယ်ချင်းတွေ၊ လူငယ်တွေကိုလည်း တောထဲမှာ အခုလိုနေထိုင်နေမယ့်အစားမိသားစုနဲ့အတူ ပြန်လည်နွေးထွေးစွာနေထိုင်ဖို့ တိုက်တွန်းချင်ပါတယ်။ နောက်ပြီးတော့ တပ်မတော်အနေနဲ့လည်း အလင်းဝင်ရောက်လာမယ့် လမ်းမှားတဲ့လူငယ်တွေကို ကြိုဆိုလျက်ရှိပါတယ်။ ကျွန်မတို့အရင်ကကြားခဲ့ဖူးတဲ့ ခေါင်းဆောင်ပိုင်းတွေရဲ့ မဟုတ်မမှန်ဘဲနဲ့ ပြောတဲ့စကားဖြစ်စေ၊ မှန်တာပြောတဲ့စကားဖြစ်စေ သူတို့ရဲ့စကားတွေကို နားမယောင်ပဲနဲ့ ဘဝရှေ့ရေးအတွက်၊ လျှောက်လှမ်းဖို့အတွက် အလင်းဝင်ရောက်ဖို့ တိုက်တွန်းလိုပါတယ်။

MOI

ရုရှားနိုင်ငံ၏ သမ္မတဟောင်း ဒီမီထရီ မက်ဗီဒက်ဗ်က အမေရိကန်သမ္မတ ဒေါ်နယ်ထရမ့်အား ရုရှားနိုင်ငံသည် အစ္စရေးသို့မဟုတ် အီရန်ကဲ့သို့သော နိုင်ငံမျိုးမဟုတ်ကြောင်း၊ ထရမ့်၏ ခြိမ်းခြောက်မှုတိုင်းသည် နိုင်ငံတကာ ပဋိပက္ခကို တစ်လှမ်းချင်း နီးကပ်လာစေကြောင်း ပြောကြားခဲ့သည်။

ဒေါ်နယ်ထရမ့်သည် ဇူလိုင် ၂၈ ရက်နေ့တွင် ရုရှားအစိုးရအား ပိုမို တင်းကျပ်သည့် နောက်ဆုံးသတ်မှတ်ချက်တစ်ရပ်ကို ထုတ်ပြန်ကာ ကိယက်ဗ်အစိုးရနှင့် "၁၀ ရက်မှ ၁၂ ရက်အတွင်း" စစ်ပြေငြိမ်းရေး သဘော တူညီမှုရရှိရန် တောင်းဆိုခဲ့သည်။ ယခုလအစောပိုင်းကလည်း ဆောင်းဦး ရာသီတွင် သဘောတူညီမှုမရရှိပါက ရုရှား၏ကုန်သွယ်ဖက်နိုင်ငံများအပေါ်ကျယ်ကျယ်ပြန့်ပြန့် အရေးယူမှုများ ဆောင်ရွက်မည်ဟု ခြိမ်းခြောက်ခဲ့ ဖူးသည်။

ရုရှား လုံခြုံရေးကောင်စီ၏ ဒုတိယဥက္ကဋ္ဌဖြစ်သူ မက်ဗီဒက်ဗ်က ထရမ့်၏ ရုရှားအား ယူကရိန်း ပဋိပက္ခအပေါ် နောက်ဆုံး သတ်မှတ်ချက် ထုတ်ပြန် ခဲ့ခြင်းနှင့်ပတ်သက်၍ ဝေဖန်ပြောဆိုခဲ့ပြီး X လူမှုကွန်ရက် ပို့စ်တစ်ခုတွင် "ရုရှားနိုင်ငံသည် အစ္စရေးသို့မဟုတ် အီရန်နိုင်ငံများနှင့် မတူညီကြောင်း နှင့် နောက်ဆုံး သတ်မှတ်ချက် အသစ်တိုင်းသည် ခြိမ်းခြောက်မှု တစ်ရပ် ဖြစ်ပြီး ရုရှားနှင့် အမေရိကန်ကြား ပဋိပက္ခကို ပိုမိုနီးကပ်စေသည့် အဆင့်တစ်ခုပင်ဖြစ်သည်ကို ထရမ့်အနေဖြင့် သတိရသင့်ကြောင်း ရေးသား ခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ကမ္ဘောဒီးယားဝန်ကြီးချုပ် ဟွန်မာနက်နှင့် ထိုင်းယာယီဝန်ကြီးချုပ် ဖွမ်သန် ဗီချိုင်ချိုင်တို့အကြား ဇူလိုင်လ ၂၈ ရက်တွင် မလေးရှားနိုင်ငံ ပူထရာဂျာယာမြို့၌ တွေ့ဆုံဆွေးနွေးပြီးနောက် အပစ်အခတ်ရပ်စဲရေးနှင့်နှစ်နိုင်ငံအကြားတင်းမာမှုလျှော့ချရေးအတွက် သဘောတူလိုက်ပြီဖြစ်ကြောင်းသိရသည်။

နှစ်နိုင်ငံဝန်ကြီးချုပ်များသည် မလေးရှားဝန်ကြီးချုပ် အန်နဝါအီဘရာဟင်က အိမ်ရှင်အဖြစ်  လက်ခံကျင်းပသည့်  အဆင့်မြင့်တွေ့ဆုံပွဲအတွင်း တွေ့ဆုံဆွေးနွေးပြီးနောက် အပစ်အခတ်ရပ်စဲရန်နှင့် တင်းမာမှုများကို လျှော့ချရန်ဆုံးဖြတ်ခဲ့ကြခြင်း ဖြစ်သည်။

အဆိုပါ သဘောတူညီချက်အရ ကမ္ဘောဒီးယားနှင့် ထိုင်းနိုင်ငံတို့အကြား အပစ် အခတ်ရပ်စဲမှုသည် ဇူလိုင်လ ၂၈ ရက် ဒေသ စံတော်ချိန် သန်းခေါင်ယံအချိန်မှစတင် အသက်ဝင်မည်ဖြစ်ကြောင်း မလေးရှားဝန်ကြီးချုပ် အီဘရာဟင်က ပြောသည်။

ထို့ပြင် ကမ္ဘောဒီးယားနှင့် ထိုင်းနိုင်ငံကြား နှစ်နိုင်ငံစလုံးမှ တပ်မတော်များအကြား တွေ့ဆုံဆွေးနွေးပွဲများ ကျင်းပရန် ဆုံးဖြတ်ခဲ့ကြပြီး အပစ်အခတ်ရပ်စဲရေး သဘောတူညီချက်ကို လိုက်နာခြင်းရှိ၊ မရှိ စောင့်ကြည့်ရန်အတွက် ပူးတွဲနယ်စပ်ဒေသ စောင့်ကြည့်ရေးကော်မတီတစ်ရပ်ကို ယခု နှစ် ဩဂုတ်လအစောပိုင်းမှစ၍ ဖွဲ့စည်းသွားမည်ဖြစ်ကြောင်း သိရသည်။

ထို့အတူ မလေးရှားအစိုးရသည် ထိုင်းနှင့် ကမ္ဘောဒီးယားနိုင်ငံတို့၏ အပစ်အခတ်ရပ်စဲရေးကို    စောင့်ကြည့်ရန်အတွက် အာဆီယံအဖွဲ့ဝင်နိုင်ငံများမှ စောင့်ကြည့်သူများကို တာဝန်ပေးရန် ကမ်းလှမ်းခဲ့သည်။

ကမ္ဘောဒီးယားနှင့် ထိုင်းနိုင်ငံတို့အနေဖြင့် နှစ်နိုင်ငံအကြားဖြစ်ပွားသည့် ပဋိပက္ခကို ငြိမ်းချမ်းစွာဖြေရှင်းမည်ဟု ကမ္ဘော ဒီးယားဝန်ကြီးချုပ် ဟွန်မာနက်နှင့် ထိုင်းယာယီဝန်ကြီးချုပ် ဖွမ်သန်ဗီ ချိုင်ချိုင်တို့က မလေးရှားဝန်ကြီးချုပ် အီဘရာဟင်နှင့် ပူးတွဲကျင်းပပြုလုပ်သည့် သတင်းစာရှင်း လင်းပွဲ၌ ကတိပြုပြောကြားခဲ့ကြောင်း သိရသည်။                                   

 Ref: Rt

MWD Web Portal
 

ယခုဇူလိုင်လ အတွင်းက ၅ ရက်တာ ဖြစ်ပွားသော အရှေ့တောင်အာရှ အိမ်နီးချင်း နိုင်ငံ ၂ နိုင်ငံဖြစ်သည့် ကမ္ဘောဒီးယားနှင့် ထိုင်းတို့အကြား ရရှိထားသော အပစ်အခတ် ရပ်စဲရေး သဘောတူညီချက်ကို အမေရိကန် က ပါဝင်စောင့်ကြည့်ပေးရန် သဘောတူကြောင်း အမေရိကန် သမ္မတ ဒေါ်နယ်ထရမ့်နှင့် ဖုန်းပြောဆိုပြီးနောက် ကမ္ဘောဒီးယားဝန်ကြီးချုပ် ဟွန်မာနက်က ပြောကြားလိုက်ပါသည်။

“အပစ်အခတ်ရပ်စဲမှုစောင့်ကြည့်လေ့လာရာတွင် အမေရိကန်က ပါဝင်ပြီး ယခုအသက်ဝင်နေသည့်အခြေအနေကို ဆက်လက်ထိန်းသိမ်းထားနိုင်ရန် အမေရိကန်သမ္မတဒေါ်နယ်ထရမ့်နှင့် သဘောတူညီချက် ရရှိထား ပါသည်” ဟု ကမ္ဘောဒီးယားဝန်ကြီးချုပ် ပြောကြားချက်ကို ကိုးကား၍ ကျိုဒိုသတင်းဌာနက ဖော်ပြထားပါသည်။

အာဆီယံအဖွဲ့ဝင်နိုင်ငံများဖြစ်သည့် ထိုင်းနိုင်ငံ ခေတ္တဝန်ကြီးချုပ် Phumtham Wechayachai နှင့် ကမ္ဘောဒီးယားဝန်ကြီးချုပ် ဟွန်မာနက် တို့ အာဆီယံအလှည့်ကျဥက္ကဋ္ဌ ဖြစ်သည့် မလေးရှားနိုင်ငံတွင် တွေ့ဆုံ ပြီးနောက် နှစ်နိုင်ငံကြား အပစ်အခတ်ရပ်စဲရေးကို ရရှိခဲ့ကြောင်း ကြေညာ ထားပြီး ထိုသဘောတူညီချက်မှာ ဇူလိုင် ၂၈ ရက်တွင် စတင် အသက် ဝင်မည်ဖြစ်ပါသည်။

ကိုးကား- TASS

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ကမ္ဘောဒီးယားနှင့် ထိုင်းနိုင်ငံသားများသည် ဇူလိုင် ၂၉ ရက်နေ့ ည သန်းခေါင်မှစတင်၍ စစ်ပြေငြိမ်းရေး စတင်ချိန်တွင် လွန်စွာ ဝမ်းမြောက် ခဲ့ကြပြီး အဆိုပါ သဘောတူညီချက် ရေရှည်မတည်တံ့မည်ကို စိုးရိမ်နေ ကြသည်။ ဇူလိုင် ၂၄ ရက်တွင် စတင်ဖြစ်ပွားခဲ့သော တိုက်ပွဲများအပြီး ထိုင်းနိုင်ငံ၏ ယာယီဝန်ကြီးချုပ် Phumtham Wechayachai နှင့် ကမ္ဘောဒီးယားဝန်ကြီးချုပ် Hun Manet တို့သည် မလေးရှားနိုင်ငံ Kuala Lumpur တွင် တွေ့ဆုံဆွေးနွေးပြီး စစ်ပြေငြိမ်းရေး သဘောတူညီခဲ့သည်။

ငါးရက်ကြာ တိုက်ပွဲများတွင် နှစ်ဖက်တပ်များက လက်နက်ကြီးများဖြင့် တိုက်ခိုက်ခဲ့ပြီး အရပ်သားများ သေဆုံးကာ လူပေါင်း ၃၀၀,၀၀၀ ကျော် အိုးအိမ်စွန့်ခွာ ထွက်ပြေးခဲ့ရသည်။ စစ်ဘေးရှောင်စခန်းတစ်ခုတွင် နေထိုင်နေသော Phean Neth (၄၅ နှစ်) က “အိမ်ကို အရမ်းလွမ်းနေပါသည်။ ယခုလို သတင်းကို ကြားရတော့ အရမ်းဝမ်းသာပါသည်" ဟု ပြောသည်။ ထိုင်းနိုင်ငံသား Jeanjana Phaphan (၄၈နှစ်) ကလည်း "စစ်တကယ် ပြီးသွားပါက အလွန်ဝမ်းသာသွားပါမည်" ဟု မျှော်လင့်ချက်ဖြင့် ပြောသည်။

သို့သော် စစ်ပြေငြိမ်းရေး ရေရှည်တည်တံ့မှုကို သံသယရှိသူများလည်း ရှိသည်။ ထိုင်းနိုင်ငံ Surin မှ Siriwut Wongcharoen (၅၉ နှစ်) က "ကျွန်တော် ကတော့ စစ်ဘေးရှောင် နေဦးမည်။ နောက်နှစ်ရက်ခန့် စောင့်ကြည့် ဦးမည်" ဟု ဆိုသည်။

မလေးရှားဝန်ကြီးချုပ် Anwar Ibrahim က အဆိုပါစစ်ပြေငြိမ်းရေးသည် ငြိမ်းချမ်းရေးနှင့် လုံခြုံရေး ပြန်လည်တည်ဆောက်ရန် အရေးကြီးသော ပထမဆုံးခြေလှမ်းဖြစ်သည်ဟု ပြောသည်။ ကမ္ဘောဒီးယား အတွေးအခေါ် အဖွဲ့ Future Forum ၏ တည်ထောင်သူ Ou Vik က မည်သည့် သဘောတူညီချက်မဆို ရည်မှန်းချက်သည် ကမ္ဘောဒီးယားနှင့် ထိုင်းနိုင်ငံ အကြား ရေရှည်တည်တံ့သော ငြိမ်းချမ်းရေး ဖြစ်ရမည်ဟု ပြောကြား ခဲ့သည်။

ထိုင်းနိုင်ငံက ဇူလိုင် ၂၉ ရက်နေ့ နံနက်ပိုင်းတွင် နယ်စပ်တစ်လျှောက် တိုက်ပွဲငယ်များ ဆက်လက်ဖြစ်ပွားနေကြောင်း ထုတ်ဖော်ပြောဆိုခဲ့သော်လည်း ကမ္ဘောဒီးယားက စစ်ပြေငြိမ်းရေး စတင်ပြီးနောက် အခြေအနေ အေးချမ်း သွားကြောင်း ဆိုသည်။

ကျွမ်းကျင်သူများက စစ်ပြေငြိမ်းရေး၏ အကြီးမားဆုံး စိုးရိမ်ရမှုမှာ နှစ်နိုင်ငံအကြား ယုံကြည်မှုကင်းမဲ့ခြင်းနှင့် နယ်နိမိတ်အငြင်းပွားမှုများ ဖြစ်သည်ဟု သုံးသပ်ကြသည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အမေရိကန်သမ္မတ ဒေါ်နယ်ထရမ့်အနေဖြင့် ပြုံယမ်းကို နျူကလီးယား လက်နက် ပိုင်ဆိုင်သည့်နိုင်ငံအဖြစ် လက်ခံရမည်ဖြစ်ပြီး နျူကလီးယား ဖျက်သိမ်းရေးမူဝါဒကို ဆက်လက် ကျင့်သုံးနေပါက နှစ်နိုင်ငံ ခေါင်းဆောင် များအကြား နောက်ထပ်တွေ့ဆုံရန် မဖြစ်နိုင်တော့ကြောင်း မြောက်ကိုရီးယား က အင်္ဂါနေ့ (ဇူလိုင် ၂၉) တွင် ပြောကြားလိုက်သည်။

မြောက်ကိုရီးယားခေါင်းဆောင် ကင်ဂျုံအန်၏ ဩဇာအရှိဆုံးညီမဖြစ်သူ ကင်ယိုဂျုံက မြောက်ကိုရီးယားဗဟိုသတင်းဌာန (KCNA) မှတစ်ဆင့် ထုတ်ပြန်သော ထုတ်ပြန်ချက်တွင် ကင်နှင့် ထရမ့်တို့၏ ပုဂ္ဂိုလ်ရေး ဆက်ဆံရေးသည် "မဆိုးလှကြောင်း" ဝန်ခံပြောကြားခဲ့သည်။

သို့သော် "ဒီပီအာရ်ကေ (မြောက်ကိုရီးယား) နှင့် အမေရိကန်တို့၏ အမြင့်ဆုံးခေါင်းဆောင်များအကြား ပုဂ္ဂိုလ်ရေးဆက်ဆံရေးကို နျူကလီးယား ဖျက်သိမ်းရေးအတွက် အသုံးချလိုပါက ၎င်းကို လှောင်ပြောင်သည့် လုပ်ရပ် အဖြစ်သာ ကောက်ချက်ချနိုင်သည်" ဟု သူမက ပြောကြားခဲ့သည်။

အမေရိကန်သည် ပြောင်းလဲလာသော အခြေအနေကို လက်မခံဘဲ ကျရှုံး ခဲ့သည့် ယခင် မူဝါဒများကိုသာ ဆက်လက်ဆုပ်ကိုင်ထားပါက ဒီပီအာရ်ကေ -အမေရိကန် တွေ့ဆုံမှုသည် အမေရိကန်ဘက်တစ်ခုတည်း၏ 'မျှော်လင့်ချက်' အဖြစ်သာ ရှိနေဦးမည်ဖြစ်သည်" ဟု သူမက ဖြည့်စွက် ပြောကြား ခဲ့သည်။

ကင်ဂျုံအန်နှင့် မိမိ၏ "အလွန်ကောင်းမွန်သော ဆက်ဆံရေး" ကို အထပ်ထပ်အခါခါ ဂုဏ်ယူဝင့်ကြွားလေ့ရှိသည့် သမ္မတထရမ့်က မတ်လ ကုန်ပိုင်းတွင် ၎င်း၏အစိုးရအဖွဲ့သည် မြောက်ကိုရီးယားခေါင်းဆောင်နှင့် ဆက်သွယ်မှုရှိခဲ့ကြောင်း၊ နှစ်ဘက်လုံးသည် "တစ်ချိန်ချိန်တွင်" တစ်ဖက် နှင့်တစ်ဖက် ပြန်လည်ဆက်သွယ်နိုင်ကြောင်း ပြောကြားခဲ့သည်။

သို့သော် မြောက်ကိုရီးယားကို စောင့်ကြည့်နေသည့် NK News ဝက်ဘ်ဆိုဒ် က ဇွန်လတွင် အမေရိကန်သည် နယူးယောက်ရှိ ကုလသမဂ္ဂဌာနချုပ်၌ တာဝန်ထမ်းဆောင်နေသော မြောက်ကိုရီးယားသံတမန်များမှတစ်ဆင့် ထရမ့်ရေးသားခဲ့သည့်စာကို အကြိမ်ကြိမ်ပို့ဆောင်ရန် ကြိုးပမ်းခဲ့သော်လည်း "ပြတ်ပြတ်သားသား" ငြင်းပယ်ခံခဲ့ရကြောင်း သတင်းထုတ်ပြန်ခဲ့သည်။ ထိုကြိုးပမ်းမှုများ မည်သည့်အချိန်က ပြုလုပ်ခဲ့သည်ကိုမူ မရှင်းလင်း ခဲ့ပေ။

၎င်း၏ပထမသက်တမ်းအတွင်း ကင်နှင့် သုံးကြိမ်တွေ့ဆုံခဲ့ပြီး မြောက် ကိုရီးယားသို့ လာရောက်သည့် ပထမဆုံးသော အမေရိကန်သမ္မတအဖြစ် မှတ်တမ်းဝင်ခဲ့သူ ထရမ့်သည် ဒုတိယသက်တမ်း၏ ပထမလများအတွင်း ပြုံယမ်းကို "နျူကလီးယားအင်အားကြီးနိုင်ငံ" အဖြစ် အထပ်ထပ် ရည်ညွှန်း ခဲ့သည်။ ၎င်းသည် ကင်နှင့် ပြန်လည်ဆက်သွယ်ရန် ကြိုးပမ်းမှုတွင် ပထမ သက်တမ်းက အဆုံးသတ်ရှုံးနိမ့်ခဲ့သော နျူကလီးယား ဖျက်သိမ်းရေး လုပ်ငန်းစဉ်ထက် လက်နက်လျှော့ချရေးဆွေးနွေးပွဲများကိုသာ ဦးတည် နိုင်ခြေရှိ၊ မရှိ မေးခွန်းထုတ်စရာဖြစ်စေခဲ့သည်။

သို့သော် အိမ်ဖြူတော်မှ တာဝန်ရှိသူများက ထိုသို့သော အခြေအနေမျိုး ကို လက်မခံဘဲ ထရမ့်သည် "ပထမသက်တမ်းကာလကဲ့သို့ပင် မြောက်ကိုရီးယား ၏ နျူကလီးယားဖျက်သိမ်းရေးကို အပြည့်အဝ ဆက်လက် လုပ်ဆောင် သွားမည်" ဟု ပြောကြားခဲ့သည်။

အဆိုပါမူဝါဒသည် ရေရှည်ပန်းတိုင်တစ်ခုဖြစ်သည့်တိုင် ကင်အုပ်စုအတွက် စတင်ရန် မဖြစ်နိုင်သော အရာတစ်ခုအဖြစ် ယူဆထားကြသည် - အဆိုပါ အမြင်သည် ကင်ယိုဂျုံ၏ အင်္ဂါနေ့ (ဇူလိုင် ၂၉) က ထုတ်ပြန်ချက်တွင် ထင်ဟပ်နေသည်။

"၂၀၂၅ ခုနှစ်သည် ၂၀၁၈ ခုနှစ် သို့မဟုတ် ၂၀၁၉ ခုနှစ်နှင့် မတူညီ ကြောင်း ထည့်သွင်း စဉ်းစားသင့်သည်" ဟု သူမက ပြောကြားခဲ့သည်။ အဆိုပါစကားလုံးများသည် ထရမ့်နှင့် သူမ၏အစ်ကို တွေ့ဆုံခဲ့သည့် ၂ နှစ်တာကာလအတွင်းက အခြေအနေကို သွယ်ဝိုက်ညွှန်းဆိုနေခြင်း ဖြစ်သည်။

အမှန်စင်စစ် ၂၀၁၉ ခုနှစ်က ထိပ်သီးဆွေးနွေးပွဲ အကျိုးဆက် ပြတ်တောက် သွားချိန်နှင့် နှိုင်းယှဉ်ပါက ကင်သည် ယခုအခါ အလွန်ကွဲပြားသော အနေ အထားတွင် ရှိနေသည်။ ယခု ခြောက်နှစ်အတွင်း ကင်သည် ၎င်း၏ နျူကလီးယားလက်နက်နှင့် ဒုံးကျည်အစီအစဉ်များကို နှစ်ဆတိုးမြှင့်ခဲ့သည်။ မြောက်ကိုရီးယားတွင် နျူကလီးယားထိပ်ဖူး ၅၀ ခန့် ပိုင်ဆိုင်ပြီးဖြစ်ကာ နောက်ထပ် အခု ၄၀ အထိ ထုတ်လုပ်နိုင်ရန် လုံလောက်သောနျူကလီးယားလောင်စာပစ္စည်းများ ပိုင်ဆိုင်ထားသည်ဟု ခန့်မှန်း ရသည်။

ကင်သည် မိမိ၏နျူကလီးယားလက်နက်အစီအစဉ်ကို "အကန့်အသတ်မဲ့" တိုးချဲ့ရန် တောင်းဆိုခဲ့ပြီး မြောက်ကိုရီးယား၏ အဓိကနျူကလီးယား စက်ရုံဖြစ်သော ယုံဗြုံ (Yongbyon) တွင် ပိုမိုမြင့်မားသော ယူရေနီယမ် သန့်စင်မှုများ လုပ်ဆောင်နိုင်ရန် အဆောက်အဦအသစ်တစ်ခု တည်ဆောက်ရန် အမိန့်ပေးခဲ့သည်ဟု ယုံကြည်ရသည်။

၂၀၂၃ ခုနှစ်၊ စက်တင်ဘာလတွင် မြောက်ကိုရီးယားနိုင်ငံသည် ၎င်း၏ ဖွဲ့စည်းပုံအခြေခံ ဥပဒေတွင် "အမြဲတမ်း" နျူကလီးယား လက်နက် ပိုင်ဆိုင်သည့်နိုင်ငံအဖြစ် အဆင့်အတန်းကို ဥပဒေတစ်ရပ်အနေဖြင့် အတည်ပြုခဲ့သည်။

"ဒီပီအာရ်ကေ၏ နျူကလီးယားလက်နက်ပိုင်ဆိုင်သည့် နိုင်ငံအဖြစ် ပြန်လည်မပြောင်းလဲနိုင်သော အခြေအနေနှင့် ၎င်း၏စွမ်းရည်များနှင့် ပထဝီနိုင်ငံရေးပတ်ဝန်းကျင်များ အကြီးအကျယ် ပြောင်းလဲသွားပြီ ဖြစ်သည့် အချက်တို့ကို အသိအမှတ်ပြုခြင်းသည် အနာဂတ်တွင် ဖြစ်ပျက်လာမည့် အရာရာတိုင်းကို ကြိုတင်ခန့်မှန်းရန်နှင့် စဉ်းစားရန်အတွက် ကနဦး အခြေခံ သဘောတရားတစ်ရပ် ဖြစ်သင့်သည်" ဟု ကင်ယိုဂျုံက အင်္ဂါနေ့ တွင် ပြောကြားခဲ့သည်။

“အဆိုပါအဖြစ်မှန်ကို မည်သူတစ်ဦးတစ်ယောက်ကမျှ မငြင်းဆိုနိုင်သလို နားလည်မှုလွဲမှားခြင်းလည်း မရှိသင့်ပါ" ဟု သူမက ဖြည့်စွက် ပြောကြား ခဲ့သည်။

"ဒီပီအာရ်ကေအား နျူကလီးယားလက်နက်ပိုင်ဆိုင်သည့်နိုင်ငံအဖြစ် အသိအမှတ်မပြုရန် မည်သည့်ကြိုးပမ်းမှုကိုမဆို... အလုံးစုံငြင်းပယ်ခြင်း ခံရမည်"ဟုဆိုသည်။

ကင်ယိုဂျုံ၏ ထုတ်ပြန်ချက်နှင့်ပတ်သက်၍ The Japan Times မှ မေးမြန်းချက်ကို အိမ်ဖြူတော်နှင့် အမေရိကန်နိုင်ငံခြားရေးဝန်ကြီးဌာန တို့က ချက်ချင်းတုန့်ပြန်ခြင်းမရှိခဲ့ပေ။

ကင်ယိုဂျုံ၏ အဆိုပါပြောကြားချက်များသည် တောင်ကိုရီးယား သမ္မတ သစ် လီဂျယ်မြောင်၏ ငြိမ်းချမ်းရေးလှုပ်ရှားမှုများအား ကင်အုပ်စုဘက်မှ ပထမဆုံးတုန့်ပြန်ချက်အဖြစ် ဆိုးလ်နှင့် ဆက်ဆံရေး တိုးတက်ရန် အလား အလာများကို အေးစက်စေခဲ့သည့် နောက်တစ်ရက်တွင် ထွက်ပေါ်လာခြင်း ဖြစ်သည်။

ကိုးကား - The Japan Times

ဘာသာပြန်ဆိုသူ- ဦးရဲကျော်တေဇ၊ ဒုတိယညွှန်ကြားရေးမှူး၊ နစက-၂

ထိုင်းအစိုးရက ကမ္ဘောဒီးယားသည် စစ်ရပ်စဲရေးသဘောတူညီချက် စတင်အသက်ဝင်ပြီးနောက်ပိုင်း ထိုင်းနယ်မြေအတွင်း ဆက်လက် တိုက်ခိုက်မှုများ ပြုလုပ်ခဲ့ကြောင်း ဇူလိုင် ၂၉ ရက်နေ့တွင် အပြည်ပြည် ဆိုင်ရာအသိုင်းအဝိုင်းထံ တိုင်ကြားခဲ့သည်။ 

ထိုင်းအစိုးရ၏ ထုတ်ပြန်ချက်အရ ကမ္ဘောဒီးယားစစ်တပ်သည် မလေးရှားနိုင်ငံ ကွာလာလမ်ပူမြို့တွင် နှစ်နိုင်ငံဝန်ကြီးချုပ်များ သဘော တူညီခဲ့သည့် စစ်ရပ်စဲရေးသဘောတူညီချက်ကို ချိုးဖောက်ခဲ့သည်ဟု ဆိုသည်။ ထို့အပြင် ကမ္ဘောဒီးယားဘက်မှ နယ်စပ်တစ်လျှောက် ထိုင်း နယ်မြေအတွင်း ဆက်လက်တိုက်ခိုက်မှုများ ပြုလုပ်ခဲ့ကြောင်း ဖော်ပြ ခဲ့သည်။

ထိုင်းအစိုးရသည် ယင်းချိုးဖောက်မှုကို အပြည်ပြည်ဆိုင်ရာ အသိုင်းအဝိုင်း ထံ အထူးသဖြင့် တရုတ်၊ မလေးရှား (အာဆီယံဥက္ကဋ္ဌ) နှင့် အမေရိကန် တို့ထံ အသိပေးခဲ့ပြီး၊ ကမ္ဘောဒီးယား၏ စစ်ရပ်စဲရေးအား စိတ်မဝင်စားမှု ကို ထောက်ပြခဲ့သည်။

ထိုင်းစစ်တပ်သည် နယ်စပ်တစ်လျှောက် တပ်များကို ဆက်လက် တည်ရှိ စေကာ ထိုင်း၏ အချုပ်အခြာအာဏာနှင့် ပြည်သူများ၏ လုံခြုံရေးကို ကာကွယ်ရန် အမိန့်ပေးခဲ့သည်။ သို့သော် အစိုးရဘက်မှ နှစ်နိုင်ငံအကြား အကြမ်းဖက်မှုများရပ်စဲရန်နှင့် အရပ်သားနှင့် စစ်ဘက်ဆိုင်ရာ ဆုံးရှုံးမှု များကိုကာကွယ်ရန် ဆက်လက်ဆွေးနွေးရန် အဆင်သင့်ရှိကြောင်း ပြောကြားခဲ့သည်။

ထိုင်းစစ်တပ်သည် ကမ္ဘောဒီးယား၏ “စစ်ရပ်စဲရေးကိုလိုက်နာကြောင်း ထုတ်ပြန်ချက်” ကို ငြင်းဆိုခဲ့ပြီး ကမ္ဘောဒီးယားဘက်မှ လက်နက်ကြီး များဖြင့် ဆက်လက်တိုက်ခိုက်မှု သက်သေအထောက်အထားများ ရှိကြောင်း ဖော်ပြခဲ့သည်။ နယ်စပ်တိုက်ပွဲများကြောင့် ထိုင်းအရပ်သား ၁၅ ဦး သေဆုံးပြီး ၃၈ ဦး ဒဏ်ရာရရှိခဲ့ကာ အရပ်သား ၁၈၈,၀၀၀ ကျော်ကို လုံခြုံရာသို့ ရွှေ့ပြောင်းထားရကြောင်း သိရှိရသည်။

ကိုးကား- Bangkok Post

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အမေရိကန်သမ္မတ ဒေါ်နယ်ထရမ့်က ရုရှားလူမျိုးများကို ချစ်ခင်ကြောင်း နှင့် ၎င်းတို့သည် ကြီးကျယ်သောလူမျိုးများဖြစ်သည်ဟု ဂုဏ်ပြု ပြောကြား ခဲ့သည်။ တစ်ချိန်တည်းမှာပင် ၎င်းက မော်စကိုကို ပိုမိုတင်းကျပ်သော ဒဏ်ခတ်အရေးယူမှုများဖြင့် ခြိမ်းခြောက်ခဲ့ပြီး ယူကရိန်းပဋိပက္ခ ဖြေရှင်းရန် အချိန်ကာလအသစ်သတ်မှတ်ခဲ့သည်။

ထရမ့်က စကော့တလန်နိုင်ငံ Turnberry တွင် ဗြိတိသျှဝန်ကြီးချုပ် Keir Starmer နှင့် အမေးအဖြေအစီအစဉ်တစ်ခုအတွင်း ၎င်းသည် ရုရှား သမ္မတ ဗလာဒီမာ ပူတင်နှင့် ကောင်းမွန်သော ဆက်ဆံရေးရှိကြောင်း ပြောကြား ခဲ့ပြီး ရုရှားနိုင်ငံသည် အခြားနိုင်ငံကြီးများကဲ့သို့ တိုးတက်ဖွံ့ဖြိုးသော နိုင်ငံ ဖြစ်ကာ ရုရှားနှင့် အမေရိကန်အကြား ကြီးမားသော ကုန်သွယ်ရေး အလား အလာများအကြောင်း ပြောကြားခဲ့သည်။

မော်စကိုအပေါ် ဖြစ်နိုင်ခြေရှိသော ဒဏ်ခတ်မှုအသစ်များနှင့်ပတ်သက်၍ မေးမြန်းမှုအပေါ် ၎င်းအနေဖြင့် ရုရှားလူမျိုးများကို ချစ်ခင်ပြီး ထိုကဲ့သို့ သော ဒဏ်ခတ်အရေးယူမှုများ မလုပ်ဆောင်လိုကြောင်း ပြောကြားခဲ့သည်။ မော်စကိုနှင့် ကိယက်ဗ်အကြား ငြိမ်းချမ်းရေးလုပ်ငန်းစဉ်များ နှေးကွေး နေမှုအပေါ် စိတ်ပျက်မိကြောင်း ၎င်းက ဖော်ပြခဲ့ပြီး ယူကရိန်းမြို့များကို တိုက်ခိုက်မှုအတွက် ရုရှားကို စွပ်စွဲပစ်တင်ခဲ့သည်။ ထရမ့်က ပူတင်နှင့် ၎င်း၏ လေးစားဖွယ်ကောင်းသည့် စကားဝိုင်းများသည် အကျိုး သက်ရောက်မှု မရှိခဲ့သည့်အတွက် ဆက်လက်ဆွေးနွေးရန် စိတ်မဝင်စားတော့ကြောင်း လည်း ပြောကြားခဲ့သည်။

ထရမ့်၏ ထုတ်ဖော်ပြောကြားချက်များသည် ယူကရိန်းငြိမ်းချမ်းရေး သဘောတူညီချက်အတွက် အချိန်ကာလအသစ်သတ်မှတ်ချိန်တွင် ပြုလုပ် ခဲ့ခြင်းဖြစ်ပြီး ဇူလိုင် ၂၈ ရက်နေ့ မှစ၍ "၁၀ ရက် သို့မဟုတ် ၁၂ ရက်" အတွင်း သဘောတူညီချက်ရရှိသင့်ကြောင်း ပြောကြားခဲ့သည်။ ထိုသို့ မဟုတ်ပါက ဝါရှင်တန်သည် မော်စကိုအပေါ် ဒဏ်ခတ်မှုအသစ်များ ချမှတ်မည်ဟု ဆိုသည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အမေရိကန်ပြည်ထောင်စုနှင့် တရုတ်နိုင်ငံတို့သည် ရုရှားနိုင်ငံနှင့်စပ်လျဉ်း၍ ကုလသမဂ္ဂ လုံခြုံရေးကောင်စီ ဆွေးနွေးပွဲ၌ အချေအတင်ဖြစ်ပွားခဲ့ကြောင်းသိရသည်။

အမေရိကန်နှင့် တရုတ်နိုင်ငံတို့သည် ပြီးခဲ့သည့် ရက်သတ္တပတ်အကုန်ပိုင်းက ကျင်းပသည့် ကုလသမဂ္ဂလုံခြုံရေး ကောင်စီဆွေးနွေးပွဲ၌ အချေအတင်၊ အငြင်းအခုံဖြစ်ပွားခြင်းဖြစ်ပြီး တရုတ်နိုင်ငံသည် ရုရှားနိုင်ငံအား လျှို့ဝှက်စွာ အကူအညီပေးလျက်ရှိသည်ဟု ကုလသမဂ္ဂဆိုင်ရာ အမေရိကန်သံအမတ် ဒေါရောသီရှီးက စွပ်စွဲပြောကြားပြီးနောက် နှစ်နိုင်ငံကြား အချေအတင်ဖြစ်ပွားခြင်း ဖြစ်သည်။

ထို့ပြင် ရုရှားနိုင်ငံက ယူကရိန်းနိုင်ငံအတွင်းလုပ်ဆောင်နေသည့် ရန်လိုမှုများကို ရပ်တန့်ပေးရန် ဒေါရောသီရှီးက တရုတ်နိုင်ငံအား တောင်းဆိုခဲ့ကြောင်း သိရသည်။ အဆိုပါပြောဆိုချက်များကို တရုတ်နိုင်ငံက ငြင်းဆိုခဲ့ပြီး ယူကရိန်းပဋိပက္ခအား တရုတ်နိုင်ငံက  စတင်ခဲ့ခြင်းမဟုတ်ကြောင်း၊ ထို့ပြင် ပဋိပက္ခတွင်လည်း ပါဝင်နေခြင်းမရှိကြောင်း၊ အဆိုပါပဋိပက္ခတွင် အသုံးပြုရန်အတွက် လက်နက်ခဲယမ်း များကိုလည်း ထောက်ပံ့ပေးနေခြင်းမရှိကြောင်း ကုလသမဂ္ဂဆိုင်ရာ တရုတ်လက်ထောက်သံ အမတ်ကန်းရှုအမ်က တုံ့ပြန်ပြောကြားသည်။

ထို့အတူ အမေရိကန်ပြည်ထောင်စုအနေဖြင့်  ယူကရိန်းအရေးတွင် နှစ်ဦးနှစ်ဖက်အကြား အပစ်အခတ် ရပ်စဲရေးနှင့် ငြိမ်းချမ်းရေး ဆွေးနွေးပွဲများ ဖြစ်မြောက်စေရေးတွင် အပြုသဘောဆောင်သည့် အခန်းကဏ္ဍမှ ပိုမိုပါဝင်ပြီး အခြားနိုင်ငံများအပေါ် အပြစ်တင်ခြင်းအားဖြင့် ထိပ်တိုက် ရင်ဆိုင်မှုများဖန်တီးခြင်းကို ရပ်တန့်သင့်ကြောင်း တရုတ်နိုင်ငံက   ဆက်လက်တိုက်တွန်း ပြောကြားခဲ့ကြောင်း သိရသည်။

တရုတ်ကုမ္ပဏီများသည် ရုရှားနိုင်ငံအား အနောက်နိုင်ငံများက ချမှတ်ထားသည့် ပိတ်ဆို့မှုများကို   ကျော်လွှားနိုင်စေရန်အတွက် အကူအညီများပေးအပ်လျက်ရှိပြီး စစ်ရေးတွင်အသုံးပြုနိုင်သည့် နည်းပညာများနှင့် ပစ္စည်းကိရိယာများကို ရုရှားနိုင်ငံသို့ ပေးပို့လျက်ရှိသည်ဟု အမေရိကန်အစိုးရက ယူဆထားသည်။

သို့သော် တရုတ်နိုင်ငံသည် ယူကရိန်းပဋိပက္ခကို  အဆုံးသတ်နိုင်ရေးအတွက် ကြားဝင်ဖျန်ဖြေသည့် အခန်းကဏ္ဍမှပါဝင်ရန် ကမ်းလှမ်းခဲ့သည့်အပြင် ရုရှားအပေါ် အနောက်နိုင်ငံများက ပိတ်ဆို့မှုများချမှတ်ခြင်းသည်  ယူကရိန်းငြိမ်းချမ်းရေးကို ဖြစ်ပေါ်စေမည်မဟုတ်ဟု  တုံ့ပြန်ထား ကြောင်းသိရသည်။              

Ref: Rt

MWD Web Portal