တရုတ်သမ္မတရှီကျင့်ဖျင်သည် ဗီယက်နမ်၊ မလေးရှားနှင့် ကမ္ဘောဒီးယား နိုင်ငံသို့ ဧပြီ ၁၄ ရက်မှ ၁၈ ရက်အထိ နိုင်ငံတော်ခရီးစဉ် သွားရောက်မည် ဖြစ်ကြောင်း တရုတ်နိုင်ငံခြားရေးဝန်ကြီးဌာနက သတင်းထုတ်ပြန်ထားပါသည်။ 

ဗီယက်နမ်ကွန်မြူနစ်ပါတီ ဗဟိုကော်မတီ အထွေထွေအတွင်းရေးမှူး To Lam နှင့် ဗီယက်နမ်သမ္မတ Luong Cuong တို့၏ ဖိတ်ကြားချက်အရ ရှီကျင့်ဖျင်သည် ဧပြီလ ၁၄ ရက်မှ ၁၅ ရက်အထိ ဟနွိုင်းသို့ သွားရောက် မည်ဖြစ်ကြောင်း ဝန်ကြီးဌာန၏ တရားဝင်ဝက်ဘ်ဆိုက်တွင် ဖော်ပြ ထားသည်။ 

ဆက်လက်၍ တရုတ်ခေါင်းဆောင်သည် ဧပြီလ ၁၅ ရက်မှ ၁၈ ရက်အထိ မလေးရှားဘုရင် Sultan Ibrahim Iskandar နှင့် ကမ္ဘောဒီးယားဘုရင် Norodom Sihamoni တို့၏ ဖိတ်ကြားချက်အရ ကွာလာလမ်ပူနှင့် ဖနွမ်းပင်မြို့သို့ သွားရောက်မည်ဖြစ်သည်။

ဗီယက်နမ်၊ မလေးရှားနှင့် ကမ္ဘောဒီးယားတို့သည် အရှေ့တောင်အာရှ နိုင်ငံများအသင်း (အာဆီယံ) ၏ အဖွဲ့ဝင်များဖြစ်ပြီး ၂၀၂၄ ခုနှစ်တွင် တရုတ်နိုင်ငံ၏ ကုန်သွယ်မှုပမာဏသည် တစ်နှစ်ထက်တစ်နှစ် ၇.၈ ရာခိုင်နှုန်း တိုးမြင့်လာကာ ဒေါ်လာ ၉၈၂ ဒသမ ၃၃ ဘီလီယံအထိ ရောက်ရှိ ခဲ့သည်။ ဗီယက်နမ်သည် အာဆီယံဒေသအတွင်း တရုတ်၏ အဓိက ကုန်သွယ်ဖက်နိုင်ငံဖြစ်ပြီး စုစုပေါင်း တရုတ်-အာဆီယံ ကုန်သွယ်မှု စုစုပေါင်း၏ ၂၇ ရာခိုင်နှုန်း (ဒေါ်လာ ၂၆၀ ဒသမ ၆၅ ဘီလီယံ) ခန့် ရှိသည်။

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

CIA ဒါရိုက်တာ John Ratcliffe က ဧပြီလ ၁၀ ရက်တွင် အာရပ်စော်ဘွား များပြည်ထောင်စု (UAE) ၌ အမေရိကန်-ရုရှား အကျဉ်းသား ဖလှယ်မှု တစ်ခုပြုလုပ်ခဲ့ကြောင်း ကြေညာခဲ့သည်။ ထိုအကျဉ်းသားဖလှယ်မှုနှင့် ပတ်သက်၍ မီဒီယာများ၏ မေးမြန်းမှုအပေါ် ကရင်မလင်ပြောခွင့်ရ ပုဂ္ဂိုလ် Dmitry Peskov က ယခုအချိန်မှာ မှတ်ချက်ပေးလိုခြင်း မရှိကြောင်း ဖြေကြားခဲ့သည်။

အဆိုပါအကျဉ်းသားလဲလှယ်မှုတွင် ရုရှားနိုင်ငံသား Artur Petrov နှင့် အမေရိကန်နိုင်ငံသား Ksenia Karelina တို့ကို ဖလှယ်ခဲ့ကြသည်။

Petrov သည် အမေရိကန်လုံခြုံရေးအေဂျင်စီများ၏ တောင်းဆိုမှုအရ ၂၀၂၃ ခုနှစ်တွင် ဆိုက်ပရပ်၌ ဖမ်းဆီးခံရပြီး ၂၀၂၄ ခုနှစ်တွင် အမေရိကန် သို့ အပ်နှံခံခဲ့ရသည်။ ၎င်းသည် ရုရှားရှိ စစ်လက်နက်ထုတ်လုပ်သူများထံ အမေရိကန်၏ မိုက်ခရိုအီလက်ထရောနစ်ပစ္စည်းများ တရားမဝင် ပို့ဆောင် ခဲ့သဖြင့် သယ်ယူပို့ဆောင်ရေးထိန်းချုပ်မှုဥပဒေများ ချိုးဖောက်သည်ဟု စွပ်စွဲခံထားရသည်။ ထိုအမှုမှာ အများဆုံး ထောင်ဒဏ် နှစ် ၂၀ အထိ ချခံ ရသောအမှုဖြစ်သည်။

အမေရိကန်နိုင်ငံသား Ksenia Karelina သည် ၂၀၂၄ ခုနှစ်၊ ဖေဖော်ဝါရီ လတွင် ရုရှားနိုင်ငံ Yekaterinburg တွင် ဖမ်းဆီးခြင်းခံခဲ့ရသည်။ ၎င်းသည် ၂၀၂၂ ခုနှစ်၊ ဖေဖော်ဝါရီလ ၂၄ ရက်နေ့တွင် အမေရိကန်အခြေစိုက် ယူကရိန်းထောက်ပံ့ရေးအလှူခံအဖွဲ့သို့ ဒေါ်လာ ၅၁.၈၀ ပေးလှူခဲ့သည် ဟု စွပ်စွဲခံရပြီး၊ ရုရှားအာဏာပိုင်များက ယူကရိန်း စစ်တပ်အား ပံ့ပိုးမှု ဖြစ်သည်ဟု တိုင်တန်းခဲ့သည်။ ၎င်းကို ၂၀၂၄ ခုနှစ်၊ ဩဂုတ်လတွင် ဖမ်းဆီးခဲ့ရသည်။ ထိုအမှုမှာ ထောင်ဒဏ် ၁၂ နှစ်အထိ ချမှတ်ခံထားရ ပါသည်။

ကိုးကား - ကရင်မလင်၊ News. AZ

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ရုရှားနိုင်ငံအနေဖြင့် အမေရိကန်ထံမှ သံတမန်ရေးဆိုင်ရာပိုင်ဆိုင်မှုများ ပြန်လည်ရရှိရေးအတွက် အမေရိကန်ကိုယ်စားလှယ်အဖွဲ့များနှင့် လေးလေး နက်နက်ဆွေးနွေးရန် ဆန္ဒရှိကြောင်း ရုရှားသံအမတ်ကြီး အလက်ဇန်းဒါး ဒါချီယက်ဗ် က ပြောကြားခဲ့သည်။

အဆိုပါအချက်သည် “နှစ်နိုင်ငံဆက်ဆံရေး ပုံမှန်ပြန်ဖြစ်ရေးအတွက် အဓိကအရေးပါသည်” ဟု ဧပြီ ၁၀ ရက်နေ့တွင် အစ္စတန်ဘူလ်မြို့၌ ကျင်းပမည့် ရုရှား-အမေရိကန် အလုပ်အမှုဆောင်အဆင့် အစည်းအဝေး မတိုင်မီ အမေရိကန်နိုင်ငံဆိုင်ရာ ရုရှားသံအမတ်ကြီးက မှတ်ချက်ပြု ပြောကြားခဲ့ပါသည်။

ရုရှားနိုင်ငံအနေဖြင့် ဝါရှင်တန်မှ တရားမဝင်သိမ်းယူထားသော သံတမန် ရေးဆိုင်ရာပိုင်ဆိုင်မှုကို ပြန်လည်ရရှိရေးအတွက် အမေရိကန်နှင့် လေးလေးနက်နက်ဆွေးနွေးရန် ဆန္ဒရှိကြောင်းကို ဧပြီလ ၁၀ ရက်တွင် အစ္စတန်ဘူလ်၌ပြုလုပ်မည့် ရုရှား-အမေရိကန်ဆွေးနွေးပွဲများ စတင် မပြု လုပ်မီ အမေရိကန်နိုင်ငံဆိုင်ရာ ရုရှားသံအမတ်ကြီး အလက်ဇန္ဒား ဒါချီ ယက်ဗ်က ရုရှားသတင်းထောက်များသို့ ပြောကြားခဲ့သည်။ “ရုရှားနှင့် အမေရိကန် နှစ်နိုင်ငံ သမ္မတများ၏ ညွှန်ကြားထားချက်နှင့်အညီ နှစ်နိုင်ငံ သံတမန်ရေးမစ်ရှင်များ၏ လုပ်ငန်းဆောင်တာများ ပုံမှန်ပြန်လည် ဖြစ်စေရန် ကျွမ်းကျင်သူများအကြား ပုံမှန်ဆွေးနွေးညှိနှိုင်းမှုများကို လုပ်ဆောင်နေကြောင်း” ၎င်းက အလေးထားပြောကြားခဲ့သည်။

“ယခင်အမေရိကန်အစိုးရ၏ မတရားသော ကန့်သတ်ချက်များ (ဥပမာ- ရုရှားသံတမန်များ၏ လှုပ်ရှားသွားလာခွင့်၊ ဗီဇာနှင့် ငွေရေးကြေးရေး ဆိုင်ရာ ကန့်သတ်ချက်များ၊ နိုင်ငံတကာဆက်ဆံရေး လျှော့ချခြင်း) သည် နှစ်နိုင်ငံကြား အဆိပ်သင့်အမွေအနှစ်များအဖြစ် ကျန်ရစ်ခဲ့သည်” ဟု ၎င်းက မှတ်ချက်ပြုပြောကြားခဲ့ပါသည်။ ထို့အပြင် အမေရိကန်က ရုရှား၏ သံတမန်ဆိုင်ရာ ပစ္စည်းများ ၆ ခုကို သိမ်းဆည်းခဲ့သည့်ကိစ္စရပ်များကြောင့် နှစ်နိုင်ငံဆက်ဆံရေး ပြင်းထန်စွာ ထိခိုက်ခဲ့ပြီး ယခုအခါ အဆိုပါ ပြဿနာများကို ဖြေရှင်းရန် ရုရှားနှင့် အမေရိကန် ကိုယ်စားလှယ်အဖွဲ့များ ပူးပေါင်း ကြိုးပမ်းနေကြောင်း က ၎င်းက ဖြည့်စွက်ပြောကြားခဲ့သည်။

ကိုးကား - Tass

အမေရိကန်-ရုရှား သံတမန်ဆက်ဆံရေး မြှင့်တင်ရန် ရည်ရွယ်သည့် ထပ်မံကျင်းပမည့် ဆွေးနွေးပွဲကို ဧပြီ ၁၀ ရက် (ကြာသပတေး) နေ့တွင် တူရကီနိုင်ငံ၊ အစ္စတန်ဘူလ်မြို့၌ ကျင်းပမည်ဖြစ်ကြောင်း အမေရိကန် နိုင်ငံခြားရေးဝန်ကြီးဌာနက အတည်ပြုခဲ့သည်။

ဝါရှင်တန်နှင့် မော်စကိုတို့သည် အမေရိကန်သမ္မတ ဒေါ်နယ်ထရမ့် တာဝန်ယူချိန်မှစ၍ အဆင့်မြင့်အစည်းအဝေးများ မကြာခဏပြုလုပ်ခဲ့ပြီး လာမည့်ရက်အနည်းငယ်အတွင်း နောက်ထပ်ဆွေးနွေးပွဲများ ကျင်းပရန် စီစဉ်နေကြောင်း ရုရှားနိုင်ငံခြားရေးဝန်ကြီးဌာနက ဧပြီ ၈ ရက် (အင်္ဂါ) နေ့က ထုတ်ပြန်ခဲ့သည်။

“ဧပြီလ ၁၀ ရက်နေ့တွင် အမေရိကန်နှင့် ရုရှားကိုယ်စားလှယ် အဖွဲ့ များသည် အစ္စတန်ဘူလ်တွင် ဒုတိယအကြိမ်ဆွေးနွေးရန် စီစဉ်ထားပြီး၊ နှစ်နိုင်ငံသံတမန်ရေးရာ လုပ်ငန်းဆောင်တာများ ပိုမိုတည်ငြိမ်စေရေး အတွက် တိုးတက်မှုရရှိရန်ကြိုးပမ်းမည်” ဟု နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ တမ်မီဘရုစ်က ထိုနေ့နောက်ပိုင်း သတင်းစာ ရှင်းလင်းပွဲတွင် အတည်ပြုပြောကြားခဲ့သည်။

အမေရိကန်အရာရှိက အဆိုပါဆွေးနွေးပွဲသည် “သံရုံးလုပ်ငန်းများနှင့်သာ သက်ဆိုင်ပြီး၊ ရုရှားနှင့် ယူကရိန်းအကြား ငြိမ်းချမ်းရေး မရရှိသေးသရွေ့ နှစ်နိုင်ငံဆက်ဆံရေး ပုံမှန်ပြန်ဖြစ်ရန် ဆွေးနွေးခြင်းမဟုတ်” ဟု ထပ်လောင်း ရှင်းပြခဲ့သည်။

“အဆိုပါအစည်းအဝေးတွင် နိုင်ငံရေး သို့မဟုတ် လုံခြုံရေးဆိုင်ရာ အကြောင်းအရာများ မပါဝင်သလို၊ ယူကရိန်းနှင့်ပတ်သက်သော အချက် အလက်များလည်း လုံးဝမပါဝင်ပါ” ဟု ၎င်းမှ ဖြည့်စွက် ပြောကြားခဲ့သည်။

မကြာသေးမီနှစ်များအတွင်း ရုရှားနှင့် အမေရိကန်တို့သည် တစ်ဖက်နှင့် တစ်ဖက် သံရုံးဝန်ထမ်းများ လျှော့ချခြင်း၊ ဘဏ်လုပ်ငန်း ကန့်သတ်ချက် များချမှတ်ခြင်းနှင့် သံတမန်ဆိုင်ရာ ပိုင်ဆိုင်မှုများကို သိမ်းဆည်းခြင်းများ ပြုလုပ်ခဲ့ကြသည်။ ၂၀၂၂ ခုနှစ်တွင် ယူကရိန်းပဋိပက္ခ ပိုမိုဆိုးရွားလာခြင်း က တင်းမာမှုများကို ပိုမိုနက်ရှိုင်းစေပြီး အခြားအရေးယူမှုများကိုလည်း ဖြစ်ပေါ်စေခဲ့သည်။

သို့သော် ထရမ့်သည် ဘိုင်ဒင်လက်ထက်မူဝါဒများစွာမှ ခွဲထွက်လာကာ ယူကရိန်းပဋိပက္ခကို အမြန်ဖြေရှင်းရန်နှင့် နှစ်နိုင်ငံဆက်ဆံရေးကို အသစ် တဖန်စတင်ရန် တိုက်တွန်းခဲ့သည်။ ရုရှားနှင့် အမေရိကန် အဆင့်မြင့် ကိုယ်စားလှယ်အဖွဲ့များကြား ပထမဆုံးအစည်းအဝေးကို ဖေဖော်ဝါရီ ၁၈ ရက်တွင် ရီယာ့ဒ်မြို့၌ ကျင်းပခဲ့ပြီး သံရုံးလုပ်ငန်းများ ပြန်လည်စတင်ရေး နှင့် ကန့်သတ်ချက်များ လျှော့ချရေးကို အဓိကထားဆွေးနွေးခဲ့ကြသည်။ ဖေဖော်ဝါရီ ၂၇ ရက်တွင် အစ္စတန်ဘူလ်မြို့၌ ကျင်းပခဲ့သော နောက် ဆက်တွဲ အစည်းအဝေးတွင် သံတမန်ရေးရာ ငွေကြေးထောက်ပံ့မှုနှင့် ရုရှား၏ တိုက်ရိုက်လေကြောင်းခရီးစဉ်များ ပြန်လည်စတင်ရေး အဆိုပြု ချက်များကို ဆွေးနွေးခဲ့ကြသည်။

မော်စကိုအစိုးရ၏ ပြောကြားချက်အရ ထိုအပတ်အတွင်း ကျင်းပမည့် အစည်းအဝေး၏ နေရာ၊ ပုံစံနှင့် ပါဝင်သူများမှာ ယခင်အတိုင်း ပြောင်းလဲ မည်မဟုတ်ပေ။ ရုရှားကိုယ်စားလှယ်အဖွဲ့ကို ဝါရှင်တန်ရှိ ရုရှား သံအ မတ်ကြီး အလက်ဇန်းဒါ ဒါချီအက်ဗ်က ဦးဆောင်မည်ဖြစ်ပြီး အမေရိကန် ဘက်မှ ယူရေးရှားကိစ္စရပ်များဆိုင်ရာ နိုင်ငံခြားရေးဝန်ကြီးဌာန ဒုတိယ လက်ထောက်အတွင်းဝန် ဆိုနာတာ ကိုလ်တာက ဦးဆောင်မည် ဖြစ်သည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဆိုဗီယက်ပြည်ထောင်စုက ၁၉၄၅ ခုနှစ်တွင် နာဇီဂျာမနီကို အနိုင်ရခဲ့သည့် နှစ် ၈၀ ပြည့် အမျိုးသားအောင်ပွဲနေ့ အထိမ်းအမှတ်အခမ်းအနားသို့ အိန္ဒိယ ဝန်ကြီးချုပ် Narendra Modi ကို ဂုဏ်ပြုဧည့်သည်တစ်ဦးအနေဖြင့်မော်စကိုက ကြိုဆိုရန်မျှော်လင့်ထားသည်ဟု ရုရှား ဒုတိယ နိုင်ငံခြားရေး ဝန်ကြီး Andrey Rudenko ကပြောကြားချက်အရသိရှိရပါသည်။

ရုရှားနိုင်ငံသည် မေလ ၉ ရက်နေ့တွင်ကျင်းပမည့် အမျိုးသားအောင်ပွဲနေ့ အခမ်းအနားသို့ တက်ရောက်ရန် မိတ်ဖက်နိုင်ငံများ၏ ခေါင်းဆောင်များကို ဖိတ်ကြားထားခဲ့ခြင်းဖြစ်သည်။

နှစ်စဉ် မေလ ၉ ရက်နေ့တွင် ဆိုဗီယက်ပြည်ထောင်စုက နာဇီဖက်ဆစ် ဝါဒကို အနိုင်ရရှိခဲ့သည့် အထိမ်းအမှတ်အောင်ပွဲအခမ်းအနားကို ကျင်းပ လေ့ရှိသည်။

အဆိုပါအခမ်းအနားသို့ မိုဒီ တက်ရောက်နိုင်ရန် စီစဉ်လျက်ရှိသည်ဟု အိန္ဒိယကာကွယ်ရေးဌာနသတင်းရင်းမြစ်တစ်ခုကို ကိုးကား၍ TASS သတင်း ဌာနက ဖော်ပြခဲ့သည်။

နယူးဒေလီနှင့်မော်စကိုတို့သည် ရင်ပြင်နီတွင်ကျင်းပပြုလုပ်မည့် စစ်ရေးပြ အခမ်းနားသို့ အိန္ဒိယတပ်ဖွဲ့ဝင်များ ပါဝင်ချီတက်နိုင်ရေး ဆွေးနွေးခဲ့ကြ ကြောင်း သတင်းအေဂျင်စီများက အစောပိုင်းတွင် ဖော်ပြခဲ့ကြသော်လည်း တရားဝင်သတင်းထုတ်ပြန်ခြင်းမရှိသေးပေ။

ဖေဖော်ဝါရီလတွင် ရုရှားနှင့် အိန္ဒိယတို့သည် BRICS နိုင်ငံများ၏ တပ်မတော်များအကြား ပူးပေါင်းဆောင်ရွက်မှုကိုအားဖြည့်ရန် ကာကွယ်ရေး ဆိုင်ရာ လက်တွေ့ဆောင်ရွက်မှု သဘောတူစာချုပ်ကို လက်မှတ်ရေးထိုး ခဲ့သည်။ အဆိုပါသဘောတူညီချက်သည် ပူးပေါင်းစစ်ရေးလေ့ကျင့်မှုများ၊ သဘာဝဘေးအန္တရာယ် ကယ်ဆယ်ရေးလုပ်ငန်းများနှင့် အခြားပူးပေါင်း ဆောင်ရွက်မှုပုံစံများကို လွယ်ကူချောမွေ့စေရန် ရည်ရွယ်သည်။

ရုရှားသမ္မတ ဗလာဒီမာပူတင်က တရုတ်ခေါင်းဆောင်ရှီကျင့်ဖျင်သည် နိုင်ငံတော်အဆင့်ခရီးစဉ်အနေဖြင့် အဆိုပါအခမ်းအနားသို့ တက်ရောက် မည်ဟု လွန်ခဲ့သောသတင်းပတ်က ပြောကြားခဲ့ပြီး ရှီကလည်း ပူတင်အား စက်တင်ဘာလတွင်ကျင်းပမည့် နယ်ချဲ့ဂျပန်အား အောင်မြင်မှု အထိမ်းအမှတ် အခမ်းအနားသို့တက်ရောက်ရန် ဖိတ်ကြားခဲ့ကြောင်းသိရှိရပါသည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အမေရိကန်နှင့် အီရန် ကိုယ်စားလှယ်အဖွဲ့တို့သည် လာမည့် ဧပြီလ ၁၂ ရက်တွင် အိုမန်နိုင်ငံတွင် တွေ့ဆုံဆွေးနွေးမှုများ ပြုလုပ်မည်ဖြစ်ကြောင်း အီရန်နိုင်ငံခြားရေးဝန်ကြီး Abbas Araghchi က ၎င်း၏ X လူမှုကွန်ရက် တွင် ကြေညာချက်ထုတ်ပြန်ထားပါသည်။ 

အမေရိကန်နှင့် အီရန်တို့သည် လာမည့်စနေနေ့ (ဧပြီ ၁၂) တွင် အဆင့်မြင့် ဆုံးနီးပါးဖြစ်သော တိုက်ရိုက်ဆွေးနွေးမှုများ ပြုလုပ်သွားကြမည်ဟု အမေရိကန်သမ္မတ ဒေါ်နယ်ထရမ့်က ဧပြီ ၇ ရက်က ပြောကြားထားပြီး အသေးစိတ်ကို ရှင်းပြခဲ့ခြင်း မရှိချေ။ 

ကိုးကား- TASS

အမေရိကန်သမ္မတ ဒေါ်နယ်ထရမ့်သည် ဆော်ဒီအာရေဗျနိုင်ငံသို့ မေလအလယ်တွင် သွားရောက်မည်ဖြစ်ကြောင်း အိမ်ဖြူတော်ပြောရေးဆိုခွင့်ရှိသူ ကယ်ရိုလိုင်းလီဗစ်က ပြောကြားခဲ့ပါသည်။ “သမ္မတကြီးသည် မေလတွင် ဆော်ဒီ အာရေးဗီးယားသို့ ထွက်ခွာသွားမည်ဖြစ်ပြီး သီးသန့်ရက်စွဲများနှင့် အသေးစိတ်အချက်အလက်များကို ဖော်ပြနိုင်ပါက မိမိတို့အနေဖြင့် အမြန်ဆုံးထုတ်ပြန်သွားမည်ဖြစ်သည်” ဟု သူမက ဆိုပါသည်။ ခရီးစဉ်သည် ဂါဇာတွင် အပစ်အခတ် ရပ်စဲရေး သို့မဟုတ် ယူကရိန်းတွင် အပစ်အခတ်ရပ်စဲရန် အခြေအနေရှိမရှိကိုလည်း ကယ်ရိုလိုင်းလီဗစ် အား သတင်း ထောက်များက မေးမြန်းခဲ့ပြီး “အပစ်အခတ်ရပ်စဲရေးနှင့်ပတ်သက်၍ သမ္မတကြီးက ရုရှား-ယူကရိန်းနှင့်ပတ်သက်၍ ထိုသို့ဖြစ်လာစေလိုကြောင်း ရှင်းရှင်းလင်းလင်းပြောကြားခဲ့ပြီး ၎င်း၏ အဖွဲ့သည် နေ့စဉ်အလုပ်လုပ်ဆောင်နေသည်” ဟု သူမက ဖြည့်စွက်ပြောကြားခဲ့ပါသည်။ အစောပိုင်းက ရုရှားသမ္မတ၏ ပြောရေးဆိုခွင့်ရှိသူ ဒမီထရီပက်စကော့ဗ်က TASS သို့ပြောကြားရာတွင် ဆော်ဒီအာရေဗျနိုင်ငံတွင် ရုရှားနှင့်အမေရိကန်သမ္မတများ ဖြစ်သည့် ဗလာဒီမာပူတင်နှင့် ဒေါ်နယ်ထရမ့်တို့ တွေ့ဆုံမှုဖြစ်နိုင်ခြေကို ဖယ်ထုတ်၍မရသေးသော်လည်း လက်ရှိတွင် သီးသန့်တွေ့ဆုံမှုနေရာကို အတည်ပြုထားခြင်းမရှိသေးဟု ဆိုပါသည်။ အမေရိကန်သမ္မတ၏ အထူးကိုယ်စားလှယ် စတီဗင်ဝှစ်ကော့ဖ်က Bloomberg အေဂျင်စီနှင့်ပြုလုပ်သော အင်တာဗျူးတွင် ရုရှား အမေရိကန် သီးသန့်တွေ့ဆုံပွဲသည် ဆော်ဒီအာရေဗျ နိုင်ငံတွင်ဖြစ်နိုင်ကြောင်း ပြောကြားခဲ့ပါသည်။

ကိုးကား-TASS

ဓာတ်ပုံ- Biography

ရုရှား-အမေရိကန် နှစ်နိုင်ငံဆက်ဆံရေးတွင် စိတ်အနှောင့်အယှက်ဖြစ်စေသော အကြောင်းရင်းများကို ဖယ်ရှားရန်နှင့် ဆက်သွယ်ရေး ပုံမှန်ပြန်လည်ထူထောင်ရန်အတွက် တွေ့ဆုံမှုအသစ်တစ်ရပ်ကို ပြင်ဆင်နေကြောင်း ရုရှားနိုင်ငံခြားရေး ဝန်ကြီး ဆာဂေးလာဗရော့ဗ်က သတင်းထောက်များအား ပြောကြားခဲ့ပါသည်။ ရုရှားနိုင်ငံခြားရေးဝန်ကြီး ဆာဂေး လာဗရော့ဗ်က သံတမန်ဆိုင်ရာအလေ့အကျင့်များအရ လက်မခံနိုင်သော အကြပ်အတည်းများကို ဖြေရှင်းရန် အမေရိကန်ဘက်မှ ဆန္ဒရှိမှုနှင့် တိုးတက်မှုလက္ခဏာများကိုလည်း ထောက်ပြခဲ့ပါသည်။ လက်ရှိတွင် ရုရှားနှင့် အမေရိကန် ခေါင်းဆောင်များ၏ သဘောတူညီချက်ဖြင့် မော်စကိုနှင့်ဝါရှင်တန်ရှိ သံရုံးများ၏ လုပ်ငန်းဆောင်တာများကို ဟန့်တား နေသော “စိတ်အနှောင့်အယှက်များ" ဖယ်ရှားရေး လုပ်ငန်းစဉ်များ လည်ပတ်နေကြောင်း ၎င်းက ဖော်ပြခဲ့ပါသည်။ “အစ္စတန်ဘူလ်တွင် တွေ့ဆုံမှုတစ်ခုပြုလုပ်ခဲ့ပြီး ယခုအချိန်တွင် ဒုတိယအကြိမ်မြောက် တွေ့ဆုံရန်ပြင်ဆင်နေကာ ထိုအတောအတွင်း တယ်လီဖုန်းဖြင့်၊ ဗီဒီယိုကွန်ဖရင့်ဆက်သွယ်မှုဖြင့် ဆက်သွယ်မှုများပြုလုပ်နေသည်” ဟု ပြောကြားခဲ့ပါသည်။ “သံတမန်များ၏ ပုံမှန်လုပ်ငန်းများအတွက် သံတမန်ဆိုင်ရာအလေ့အကျင့်များအရ လုံးဝ မလက်ခံနိုင်သော အဟန့်အတားများကို ဖယ်ရှားလိုသည့် အမေရိကန်မိတ်ဖက်များ၏ ဆန္ဒရှိမှုကို မိမိတို့ တွေ့မြင် ရပါသည်” ဟု လာဗရော့ဗ်က  မှတ်ချက်ပြုခဲ့သည်။ ရုရှားနိုင်ငံခြားရေး ဝန်ကြီးက မော်စကိုဘက်မှ သံတမန် လုပ်ငန်း များကို အခက်အခဲဖန်တီးခဲ့သည်မဟုတ်ဘဲ ယခင်က ဘာရက်အိုဘားမားအစိုးရလက်ထက်ကပင် စတင်ခဲ့ကြောင်း အလေးထားပြောကြားခဲ့ပါသည်။ ရုရှားဘက်မှ ဤကဲ့သို့လုပ်ရပ်များကို သံတမန်ရေးရာ တုံ့ပြန်မှု ဥပဒေများအရသာ ပြန်လည်တုံ့ပြန်ခဲ့ကြောင်း၊ ထိုဥပဒေများကို မည်သူမျှ ပယ်ဖျက်ခြင်း မရှိကြောင်း နိုင်ငံခြားရေးဝန်ကြီး ဆာဂေး လာဗရော့ဗ်က ဖြည့်စွက်ပြောကြားခဲ့ပါသည်။

ကိုးကား-TASS

ယူကရိန်းသို့ ထောက်ပံ့ခဲ့သော ရန်ပုံငွေများ စာရင်းစစ်ဆေးပြီး ဇီလန်စကီး၏ မသမာမှုများကို ဖော်ထုတ်သင့်ကြောင်း ရုရှားသံအမတ်ကြီး Rodion Miroshnik က Evening With Vladimir Soloviev ရုပ်သံအစီအစဉ်တွင် ပြောကြား လိုက်ပါသည်။

“အမေရိကန်ပြည်သူအခွန်ထမ်းများအနေဖြင့် ၎င်းတို့၏ ဒေါ်လာဘီလီယံပေါင်းများစွာ ခွဲဝေပေးပို့ခဲ့မှုမှာ မည်သည့် နေရာသို့ ရောက်ရှိသွားသင့်သည်ကို သိသင့်ပါကြောင်း၊ ဇီလန်စကီး၊ ၎င်း၏ရုံးအကြီးအကဲ Yermak နှင့် ၎င်း၏ ကာကွယ်ရေးဝန်ကြီးဟောင်း Reznikov တို့ကို စစ်ဆေးသင့်ပါကြောင်း၊ အမေရိကန်အနေဖြင့် ရည်ရွယ်ချက် ကောင်းကောင်းဖြင့် ခွဲဝေထောက်ပံ့ပေးပို့ခဲ့မှုကို ခိုးယူ၊ အလွဲသုံးစားလုပ်ခဲ့သည်ကို နားလည်နိုင်မည်ဟု ထင်ပါကြောင်း၊ မပြီးဆုံးသောဆောက်လုပ်ရေးစီမံကိန်းများ၊ အသတ်ခံရသော သို့မဟုတ် ပျောက်ဆုံးသွားသူများကို ပေးဆောင်နေသည် ဟု စွပ်စွဲထားသော လစာများကို ဖော်ထုတ်နိုင်လိမ့်မည်ဟု ယုံကြည်ပါကြောင်း” ၎င်းက ဆက်လက် ပြောကြား ထားပါသည်။ 

“သို့သော်  ဇီလန်စကီးတို့က မကောင်းမှုများကို ဖော်ထုတ်အစစ်ဆေးခံနိုင်ရန်အတွက် ၎င်းတို့မှာ သတ္တိမရှိဟု မိမိထင်ပါသည်” ဟု သံအမတ်ကြီးက ပြောကြားထားပါသည်။ 

ကိုးကား- TASS

ရုရှားနှင့် တရုတ်နိုင်ငံသမ္မတများ၏ အပြန်အလှန်ခရီးစဉ်များသည် နှစ်နိုင်ငံဆက်ဆံရေးကို တွန်းအားသစ် တစ်ရပ် ဖြစ်စေနိုင်ကြောင်း တရုတ်နိုင်ငံခြားရေးဝန်ကြီးက ၎င်း၏အမြင်ကို ထုတ်ဖော်ပြောဆိုခဲ့ပါသည်။ ရုရှားသမ္မတ ဗလာ ဒီမာပူတင်၏ ပေကျင်းသို့သွားရောက်လည်ပတ်ခြင်းနှင့် ရှေ့လာမည့် တရုတ်နိုင်ငံဥက္ကဋ္ဌ ရှီကျင့်ဖျင်၏ မော်စကိုသို့ လာရောက်မည့်ခရီးစဉ်တို့သည် နှစ်နိုင်ငံအကြား ဆက်ဆံရေးဖွံ့ဖြိုးတိုးတက်မှုကို တွန်းအားသစ်တစ်ရပ်ဖြစ်စေလိမ့် မည်ဟု တရုတ်နိုင်ငံခြားရေးဝန်ကြီး ဝမ်ယိက ရုရှားသမ္မတပူတင်နှင့် မတွေ့ဆုံမီ သတင်းစာ ရှင်းလင်းပွဲတွင် ပြောကြား ခဲ့သည်။ “ရှေ့လာမည့် (တရုတ်နိုင်ငံ) ဥက္ကဋ္ဌ၏ ရုရှားနိုင်ငံသို့ခရီးစဉ်နှင့် ရုရှားသမ္မတ၏တရုတ်နိုင်ငံသို့ ခရီးစဉ်သည် နှစ်နိုင်ငံဆက်ဆံရေးဖွံ့ဖြိုးတိုးတက်မှုကို တွန်းအားသစ်တစ်ရပ်ဖြစ်စေရန် မဖြစ်မနေလုပ်ဆောင်ရပါလိမ့်မည်” ဟု ၎င်းကပြောကြားခဲ့ပါသည်။

ကိုးကား-TASS