မလေးရှားဝန်ကြီးချုပ် အန်ဝါအီဘရာဟင်က ကမ္ဘောဒီးယားနှင့် ထိုင်းနိုင်ငံ တို့၏ ခေါင်းဆောင်များသည် ဇူလိုင် ၂၈ ရက် ညသန်းခေါင်မှ စတင် အကျိုးသက်ရောက်မည့် ချက်ချင်းနှင့် ကန့်သတ်ချက်မရှိ စစ်ရပ်စဲရန် သဘောတူညီမှုကို ရရှိခဲ့ကြောင်း ကြေညာခဲ့သည်။

"၎င်းသည် တင်းမာမှုများ လျော့ကျစေရန်နှင့် ငြိမ်းချမ်းရေး ပြန်လည် ထူထောင်ရန် ပထမဆုံးသော အရေးကြီးသည့် အစီအစဉ်တစ်ခု ဖြစ်ပါသည်။ နှစ်ဖက်စလုံးသည် ဝန်ကြီးချုပ်၊ နိုင်ငံခြားရေးဝန်ကြီးနှင့် ကာကွယ်ရေးဝန်ကြီး အဆင့်အထိ တိုက်ရိုက်ဆွေးနွေးပွဲများ ပြန်လည် ကျင်းပရန် သဘောတူညီခဲ့ကြသည်" ဟု ၎င်းက ဆိုသည်။

ထို့အပြင် ဇူလိုင်လ ၂၉ ရက် နံနက်ပိုင်းတွင် ထိုင်းနိုင်ငံ၏ စစ်ဒေသ ၁ နှင့် ၂ မှ ခေါင်းဆောင်များနှင့် ကမ္ဘောဒီးယား၏ စစ်ဒေသ ၄ နှင့် ၅ မှ ခေါင်းဆောင် များ အကြား တရားဝင်မဟုတ်သော အစည်းအဝေးတစ်ခု ကျင်းပရန် သဘောတူညီခဲ့ကြသည်။ "သဘောတူညီမှုရရှိပါက ၎င်းနောက်တွင် အာဆီယံ အလှည့်ကျ ဥက္ကဋ္ဌနိုင်ငံ၏ ညှိနှိုင်းမှုဖြင့် နှစ်နိုင်ငံ၏ ကာကွယ်ရေးဆိုင်ရာ ဆောင်ရွက်မှုများနှင့် ပတ်သက်သည့် အစည်းအဝေး ကျင်းပမည်" ဟု အန်ဝါက ပြောကြားခဲ့သည်။

ကမ္ဘောဒီးယားနှင့် ထိုင်းနိုင်ငံတို့၏ ခေါင်းဆောင်များသည် ဩဂုတ်လ ၄ ရက်နေ့တွင် ကျင်းပရန် စီစဉ်ထားသည့် နှစ်နိုင်ငံအစိုးရ၏ နယ်စပ် ကော်မတီ အစည်းအဝေးကိုလည်း ပြုလုပ်ရန် သဘောတူညီခဲ့ကြသည်။ အဆိုပါအစည်းအဝေးကို ကမ္ဘောဒီးယားက ဥက္ကဋ္ဌအဖြစ် ဦးဆောင်မည်ဖြစ်ပြီး အာဆီယံ၏ အလှည့်ကျ ဥက္ကဋ္ဌနိုင်ငံဖြစ်သော မလေးရှားသည်နယ်စပ်သဘောတူညီမှုအား အကောင်အထည်ဖော်ရန် စီစဉ်မှုနှင့် ကြီးကြပ်မှုများကို ပံ့ပိုးရန် အသင့်ရှိကြောင်း ဖော်ပြခဲ့သည်။

မလေးရှားဝန်ကြီးချုပ်က ပူထရာဂျာယာတွင်ကျင်းပသော ဆွေးနွေးပွဲများသည် နိုင်ငံတကာဥပဒေကို လိုက်နာရန်၊ ငြိမ်းချမ်းစွာ အတူယှဉ်တွဲ နေထိုင်ရန်နှင့် ပဋိပက္ခအား တရားမျှတပြီး ရေရှည်တည်တံ့သော အဖြေ ရှာရန် အပြည်ပြည်ဆိုင်ရာပူးပေါင်းဆောင်ရွက်မှုအတွက် မလေးရှား၊ ကမ္ဘောဒီးယားနှင့် ထိုင်းတို့၏ "အပြုသဘောဆောင်သော စိတ်အား ထက်သန်မှု" ကို ပြသခဲ့သည်ဟု ထောက်ပြခဲ့သည်။

ကမ္ဘောဒီးယားဝန်ကြီးချုပ် ဟွန်မာနက်က "ယခုကြေညာချက် အခြေအနေ များ တိုးတက်ကောင်းမွန်လာစေရန်၊ နှစ်နိုင်ငံကြား ပုံမှန်ဆက်ဆံရေးသို့ ပြန်လည်ရောက်ရှိစေရန်နှင့် အနာဂတ်တွင် နှစ်နိုင်ငံတပ်မတော် နှစ်ရပ်အကြား တင်းမာမှုများ လျော့ပါးစေရန် အခြေခံအုတ်မြစ် ချပေးနိုင်မည် ဟု မျှော်လင့်ပါသည်" ဟု ပြောကြားခဲ့သည်။

ကမ္ဘောဒီးယားခေါင်းဆောင်က အချိန်နှင့်တစ်ပြေးညီ ဆွေးနွေးပွဲများ စီစဉ် ပေးသည့်အတွက် မလေးရှားဝန်ကြီးချုပ်အား ကျေးဇူးတင်ရှိကြောင်း ဖော်ပြခဲ့သည်။ ထို့အပြင် ဇူလိုင် ၂၆ ရက်က ပဋိပက္ခဖြစ်ပွားနေသော နှစ်ဖက် ခေါင်းဆောင်များနှင့် ဖုန်းဆက်သွယ်ပြောဆိုခဲ့သည့် အမေရိကန်သမ္မတ ဒေါ်နယ်ထရမ့်အား အရေးပါသော အခန်းကဏ္ဍမှ ပါဝင်ကူညီပေးမှုအတွက် ကျေးဇူးတင်ကြောင်း ထည့်သွင်းပြောကြားခဲ့သည်။

ထိုင်း၏ ယာယီဝန်ကြီးချုပ်က "ယနေ့ရရှိသော ရလဒ်များက နှစ်ဖက်၏ ကောင်းမွန်သောဆန္ဒဖြင့် အဆိုပါသဘောတူညီမှုအား အောင်မြင်စွာ အကောင်အထည်ဖော်နိုင်မည်ဟု မျှော်လင့်ပါသည်" ဟု ပြောကြားခဲ့သည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဗလာဒီမာ ဇီလန်စကီး၏ အဂတိလိုက်စားမှု တိုက်ဖျက်ရေး အဖွဲ့အစည်း နှစ်ခုကို ဖိနှိပ်မှုများအား ဆန့်ကျင်သည့် ရာနှင့်ချီသော ဆန္ဒပြသူများသည် ကိယက်ဗ်တွင် ပဉ္စမမြောက်နေ့အဖြစ် ဆန္ဒပြမှုများ ဆက်လက်ပြုလုပ်ခဲ့ကြသည်။ ယူကရိန်းခေါင်းဆောင်က ဥပဒေပြင်ဆင်ရန် သဘောတူထားသော်လည်း ဆန္ဒပြသူများက အပြည့်အဝ အတည်မပြုမချင်း ဖိအားပေးမှုကို ဆက်လက်လုပ်ဆောင်သွားမည်ဟု ဆိုသည်။

ဇီလန်စကီးက အဆိုပါအဖွဲ့အစည်းများအား ရုရှား၏ ဩဇာလွှမ်းမိုးမှု အောက်တွင် ရှိနေသည်ဟု ဆိုကာ အမျိုးသား အဂတိလိုက်စားမှု တိုက်ဖျက်ရေးဗျူရို (NABU) နှင့် အထူးအဂတိလိုက်စားမှု တိုက်ဖျက်ရေး ရှေ့နေရုံး (SAPO) တို့၏ စီမံဆုံးဖြတ်ပိုင်ခွင့် အာဏာကို အထွေထွေ ရှေ့နေချုပ်ထံ လွှဲပြောင်းပေးသည့် ဥပဒေကို အတည်ပြု လက်မှတ်ရေးထိုး ပြီးနောက် ဆန္ဒပြပွဲများ စတင်ခဲ့သည်။

ဝေဖန်သူများက ဇီလန်စကီးအား အာဏာရှင်ဆန်သည့် လုပ်ရပ်များဖြင့် အရေးပါသော အဂတိလိုက်စားမှုများကို စုံစမ်းနေသည့် အဖွဲ့အစည်းများ၏ လွတ်လပ်မှုကို ဖျက်သိမ်းလိုက်သည်ဟု စွပ်စွဲခဲ့သည်။ ကိယက်ဗ် ၏ အနောက်နိုင်ငံ မဟာမိတ်များကလည်း မကျေနပ်မှုများ ထုတ်ဖော်ပြောဆိုကာ ဇီလန်စကီး၏ ဆုံးဖြတ်ချက်များ အတည်ပြုပါက ယူကရိန်း အား ထောက်ပံ့မှုများ ပြန်လည်သုံးသပ်နိုင်ကြောင်း သတိပေးခဲ့သည်။ ထိုသို့ ဆန့်ကျင်မှုများကြောင့် ဇီလန်စကီးက အဆိုပါအဖွဲ့အစည်းများ၏ လွတ်လပ်မှုကို ပြန်လည်ဖော်ဆောင်ရန် သဘောတူညီခဲ့သည်။

တနင်္ဂနွေနေ့ (ဇူလိုင် ၂၇) တွင် ဇီလန်စကီး အစိုးရ၏ လုပ်ဆောင်မှုများ အပေါ် မကျေနပ်သည့် ယူကရိန်းနိုင်ငံသားများသည် ဝေဖန်ပြစ်တင်သည့် စာသားများရေးသားထားသော ဆိုင်းဘုတ်များကိုင်ဆောင်ကာ ကြွေးကြော်သံများ ဟစ်အော်ပြီး ကိယက်ဗ်၌ ဆန္ဒပြမှုများ ဆက်လက်ပြုလုပ်ခဲ့ ကြသည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဩစတြီးယားနိုင်ငံသည် NATO အဖွဲ့ဝင်အဖြစ် ဆွေးနွေးရန် အဆင်သင့် ဖြစ်သင့်ကြောင်း နိုင်ငံခြားရေးဝန်ကြီး Beate Meinl-Reisinger က ပြောကြားခဲ့သည်။ သို့သော် လက်ရှိအဆင့်တွင် အများပြည်သူနှင့် ပါလီမန် ထောက်ခံမှု များစွာရရှိရန် မလွယ်ကူကြောင်း သူမက ဝန်ခံခဲ့သည်။

Die Welt သတင်းစာ၌ စနေနေ့ (ဇူလိုင် ၂၆) ကဖော်ပြခဲ့သော တွေ့ဆုံ မေးမြန်းခန်းတစ်ခုတွင် Meinl-Reisinger က တိုးမြင့်လာနေသော ရုရှား ၏စော်ကားမှု အကြောင်းပြောကြားခဲ့ပြီး ရုရှားသည် ယူကရိန်းနှင့် ငြိမ်းချမ်းရေးသဘောတူညီချက် ချုပ်ဆိုရန်မလိုလားကြောင်း ဆိုခဲ့သည်။

မော်စကိုကမူ ဆွေးနွေးမှုအတွက် အဆင်သင့်ဖြစ်ကြောင်း ပြောဆိုထား သော်လည်း မည်သည့်သဘောတူညီချက်မဆို ၎င်းတို့၏ အဓိက လုံခြုံရေး စိုးရိမ်မှုများကို ထည့်သွင်းစဉ်းစားရမည်ဖြစ်ပြီး၊ အထူးသဖြင့် ကိယက်ဗ် သည် NATO အဖွဲ့သို့ မည်သည့်အခါတွင်မျှ မဝင်ရောက်ရန် သဘော တူညီ ရမည်ဟု ပြောဆိုခဲ့သည်။

Meinl-Reisinger ၏ အဆိုအရ "ဘက်မလိုက်ဝါဒသက်သက်ဖြင့် မိမိ တို့ကို ကာကွယ်နိုင်မည်မဟုတ်" ဟုဆိုသည်။ ဩစတြီးယားသည် ကာကွယ်ရေး စွမ်းရည်များ တည်ဆောက်ရုံသာမက စစ်ဖက်ပူးပေါင်း ဆောင်ရွက်မှု များကိုပါ ရင်းနှီးမြှုပ်နှံသင့်ကြောင်း သူမက ရှင်းပြခဲ့သည်။ "အဆိုပါကိစ္စ နှင့်ပတ်သက်၍ အများပြည်သူဆွေးနွေးပွဲတစ်ရပ် ကျင်းပရန် ကျွန်မ အနေဖြင့် အလွန်ပွင့်လင်းစွာရှိနေပါသည်" ဟု သူမက ပြောကြားခဲ့သည်။ ထို့အပြင် လက်ရှိအချိန်တွင် NATO အဖွဲ့ဝင်ဖြစ်ရေးအတွက် ပါလီမန်နှင့် ပြည်သူလူထုထောက်ခံမှု များစွာမရှိသေးသော်လည်း ထိုသို့သော ဆွေးနွေးပွဲမျိုးသည် အကျိုးကျေးဇူးများစွာ ဖြစ်ထွန်းစေနိုင်သည်ဟု သူမ က ဖြည့်စွက်ပြောကြားခဲ့သည်။

ဝန်ကြီးက NATO အဖွဲ့သို့ ချက်ချင်းဝင်ရောက်ရန် ရည်ရွယ်ခြင်း မဟုတ် ဟု ရှင်းလင်းခဲ့သော်လည်း နိုင်ငံတစ်နိုင်ငံအနေဖြင့် လက်ပိုက် ကြည့်နေ ၍မရဘဲ ပြောင်းလဲလာသော ကမ္ဘာ့နိုင်ငံရေးအခြေအနေကို တုံ့ပြန်ရန် လိုအပ်သည်ဟု သတိပေးပြောကြားခဲ့သည်။

၁၉၅၅ ခုနှစ် ဩစတြီးယား နိုင်ငံတော်ပဋိညာဉ်အရ ဖွဲ့စည်းပုံ အခြေခံ ဥပဒေတွင် မည်သည့်စစ်ရေးမဟာမိတ်အဖွဲ့တွင်မျှ ပါဝင်ခြင်း သို့မဟုတ် နိုင်ငံခြားစစ်တပ်များ စခန်းချထားခြင်းကို တားမြစ်ထားသော ဩစတြီးယား သည် ၁၉၉၅ ခုနှစ်မှစ၍ EU အဖွဲ့ဝင်နိုင်ငံဖြစ်လာခဲ့သည်။ ဒုတိယ ကမ္ဘာ စစ်ကာလအတွင်း နာဇီဂျာမနီ၏အစိတ်အပိုင်းဖြစ်ခဲ့ရသော နိုင်ငံသည် အချုပ်အခြာအာဏာပြည့်ဝစွာ ပြန်လည်ရရှိရေးအတွက် ထိုစည်းမျဉ်း များကို လက်ခံခဲ့ခြင်းဖြစ်သည်။

၂၀၂၂ ခုနှစ်တွင် ယူကရိန်းပဋိပက္ခ ပိုမိုဆိုးရွားလာပြီးနောက် ဩစတြီးယား သည် အနောက်နိုင်ငံများ၏ ရုရှားဆန့်ကျင်ရေး ဒဏ်ခတ်အရေးယူမှု များတွင် ပါဝင်ခဲ့သည်။ ထို့အတွက် မော်စကိုမှ ဩစတြီးယားအား ရန်ဘက် နိုင်ငံအဖြစ် သတ်မှတ်ခဲ့သည်။ ယခုသီတင်းပတ်အတွင်း ရုရှားနိုင်ငံခြားရေး ဝန်ကြီးဌာန ပြောရေးဆိုခွင့်ရှိသူ Maria Zakharova က ဩစတြီးယား နိုင်ငံအနေဖြင့် ၎င်း၏နယ်မြေမှတစ်ဆင့် လက်နက်များ အဆက်မပြတ် သယ်ယူပို့ဆောင်ခွင့်ပြုနေမှုနှင့်ပတ်သက်၍ "ဩစတြီးယားသည် ၎င်း၏ ဘက်မလိုက်ရေးမူနှင့် အပြည်ပြည်ဆိုင်ရာပဋိပက္ခများတွင် ကြားနေအဖြစ် ကျင့်သုံးသည့် အခန်းကဏ္ဍကို စွန့်လွှတ်လိုက်ပြီ" ဟု ဝေဖန်ခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အမေရိကန်ဆီးနိတ်လွှတ်တော်အမတ် လင်းဆေးဂရေဟမ်က အစ္စရေးသည် ဂါဇာကို အပြည့်အဝထိန်းချုပ်ရန် စီစဉ်နေကြောင်း ထုတ်ဖော်ပြောကြား ခဲ့သည်။ ဒုတိယကမ္ဘာစစ်အပြီး အမေရိကန်က ဂျာမနီနှင့် ဂျပန်၏ အစိတ် အပိုင်းများကို သိမ်းပိုက်ခဲ့သကဲ့သို့ အစ္စရေးသည်လည်း ပါလက်စတိုင်း နယ်မြေကို ရေရှည်သိမ်းပိုက်မည်ဖြစ်ကြောင်း ၎င်းက NBC သတင်းဌာန နှင့် တွေ့ဆုံမေးမြန်းခန်းတွင် ပြောကြားခဲ့သည်။

ဂရေဟမ်က သိမ်းပိုက်ခြင်းမှလွဲ၍ အခြားဖြေရှင်းနည်းမရှိဟု အစ္စရေး ခေါင်းဆောင်များ ယုံကြည်နေကြောင်း ဖော်ပြခဲ့သည်။ "အစ္စရေး၏ လုံခြုံရေးအတွက် ဟားမက်နှင့် စစ်ရေးအဆုံးသတ်ရန် ရည်မှန်းချက် မအောင်မြင်နိုင်ကြောင်းနှင့် ညှိနှိုင်းမှုများကို အဆုံးသတ်ခဲ့ကြပြီ" ဟု ၎င်းက ဖြည့်စွက်ပြောကြားခဲ့သည်။

အစ္စရေးနှင့် ဟားမက်အကြား အမေရိကန်၏ ကြားဝင်ငြိမ်းချမ်းရေး ဆွေးနွေးပွဲများ ရပ်တန့်နေချိန်တွင် ဟားမက်နှင့် စစ်ပြေငြိမ်းရေးအတွက် ညှိနှိုင်းရန် နည်းလမ်းမရှိဟု ဝါရှင်တန်ကလည်း ယုံကြည်နေကြောင်း ဆီးနိတ်အမတ်က ပြောကြားခဲ့သည်။

အမေရိကန်က တိုကျိုနှင့် ဘာလင်တွင် လုပ်ဆောင်ခဲ့သကဲ့သို့ အစ္စရေး က ဂါဇာကို အင်အားသုံးသိမ်းပိုက်ကာ ပြန်လည်တည်ဆောက်နိုင်သည် ဟု ဂရဟမ်က ပြောကြားခဲ့သည်။ အစ္စရေးသည် ဟားမက် လက်နက်ကိုင် အဖွဲ့နှင့် အကျဉ်းသားများလဲလှယ်နိုင်ရေးအတွက် စေ့စပ်ညှိနှိုင်းမှုများ လုပ်ဆောင်နိုင်ကြောင်းလည်း ၎င်းက ဖြည့်စွက်ပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အမေရိကန်ပြည်ထောင်စုနှင့် တရုတ်နိုင်ငံတို့သည် ရုရှားနိုင်ငံနှင့်စပ်လျဉ်း၍ ကုလသမဂ္ဂ လုံခြုံရေးကောင်စီ ဆွေးနွေးပွဲ၌ အချေအတင်ဖြစ်ပွားခဲ့ကြောင်းသိရသည်။

အမေရိကန်နှင့် တရုတ်နိုင်ငံတို့သည် ပြီးခဲ့သည့် ရက်သတ္တပတ်အကုန်ပိုင်းက ကျင်းပသည့် ကုလသမဂ္ဂလုံခြုံရေး ကောင်စီဆွေးနွေးပွဲ၌ အချေအတင်၊ အငြင်းအခုံဖြစ်ပွားခြင်းဖြစ်ပြီး တရုတ်နိုင်ငံသည် ရုရှားနိုင်ငံအား လျှို့ဝှက်စွာ အကူအညီပေးလျက်ရှိသည်ဟု ကုလသမဂ္ဂဆိုင်ရာ အမေရိကန်သံအမတ် ဒေါရောသီရှီးက စွပ်စွဲပြောကြားပြီးနောက် နှစ်နိုင်ငံကြား အချေအတင်ဖြစ်ပွားခြင်း ဖြစ်သည်။

ထို့ပြင် ရုရှားနိုင်ငံက ယူကရိန်းနိုင်ငံအတွင်းလုပ်ဆောင်နေသည့် ရန်လိုမှုများကို ရပ်တန့်ပေးရန် ဒေါရောသီရှီးက တရုတ်နိုင်ငံအား တောင်းဆိုခဲ့ကြောင်း သိရသည်။ အဆိုပါပြောဆိုချက်များကို တရုတ်နိုင်ငံက ငြင်းဆိုခဲ့ပြီး ယူကရိန်းပဋိပက္ခအား တရုတ်နိုင်ငံက  စတင်ခဲ့ခြင်းမဟုတ်ကြောင်း၊ ထို့ပြင် ပဋိပက္ခတွင်လည်း ပါဝင်နေခြင်းမရှိကြောင်း၊ အဆိုပါပဋိပက္ခတွင် အသုံးပြုရန်အတွက် လက်နက်ခဲယမ်း များကိုလည်း ထောက်ပံ့ပေးနေခြင်းမရှိကြောင်း ကုလသမဂ္ဂဆိုင်ရာ တရုတ်လက်ထောက်သံ အမတ်ကန်းရှုအမ်က တုံ့ပြန်ပြောကြားသည်။

ထို့အတူ အမေရိကန်ပြည်ထောင်စုအနေဖြင့်  ယူကရိန်းအရေးတွင် နှစ်ဦးနှစ်ဖက်အကြား အပစ်အခတ် ရပ်စဲရေးနှင့် ငြိမ်းချမ်းရေး ဆွေးနွေးပွဲများ ဖြစ်မြောက်စေရေးတွင် အပြုသဘောဆောင်သည့် အခန်းကဏ္ဍမှ ပိုမိုပါဝင်ပြီး အခြားနိုင်ငံများအပေါ် အပြစ်တင်ခြင်းအားဖြင့် ထိပ်တိုက် ရင်ဆိုင်မှုများဖန်တီးခြင်းကို ရပ်တန့်သင့်ကြောင်း တရုတ်နိုင်ငံက   ဆက်လက်တိုက်တွန်း ပြောကြားခဲ့ကြောင်း သိရသည်။

တရုတ်ကုမ္ပဏီများသည် ရုရှားနိုင်ငံအား အနောက်နိုင်ငံများက ချမှတ်ထားသည့် ပိတ်ဆို့မှုများကို   ကျော်လွှားနိုင်စေရန်အတွက် အကူအညီများပေးအပ်လျက်ရှိပြီး စစ်ရေးတွင်အသုံးပြုနိုင်သည့် နည်းပညာများနှင့် ပစ္စည်းကိရိယာများကို ရုရှားနိုင်ငံသို့ ပေးပို့လျက်ရှိသည်ဟု အမေရိကန်အစိုးရက ယူဆထားသည်။

သို့သော် တရုတ်နိုင်ငံသည် ယူကရိန်းပဋိပက္ခကို  အဆုံးသတ်နိုင်ရေးအတွက် ကြားဝင်ဖျန်ဖြေသည့် အခန်းကဏ္ဍမှပါဝင်ရန် ကမ်းလှမ်းခဲ့သည့်အပြင် ရုရှားအပေါ် အနောက်နိုင်ငံများက ပိတ်ဆို့မှုများချမှတ်ခြင်းသည်  ယူကရိန်းငြိမ်းချမ်းရေးကို ဖြစ်ပေါ်စေမည်မဟုတ်ဟု  တုံ့ပြန်ထား ကြောင်းသိရသည်။              

Ref: Rt

MWD Web Portal

ဂျာမနီနိုင်ငံရှိ INSA စစ်တမ်းတစ်ခုအရ ဝန်ကြီးချုပ် Friedrich Merz ၏ ဦးဆောင်မှုကို ပြည်သူအများစုက မကျေနပ်ကြောင်း ဖော်ပြခဲ့သည်။ ယခု အခါ ဂျာမန်ပြည်သူ ၅၆ ရာခိုင်နှုန်းသည် Merz ၏ လုပ်ဆောင်မှုများကို မကျေနပ်ကြောင်းစစ်တမ်းအရသိရှိရပြီး ဇွန်လအစောပိုင်းက ၄၅ ရာခိုင်နှုန်း နှင့်နှိုင်းယှဉ်လျှင် မနှစ်သက်မှုနှုန်း သိသိသာသာ တိုးမြင့်လာခြင်း ဖြစ်သည်။

Merz အစိုးရ၏ ယူကရိန်းသို့ လက်နက်ထောက်ပံ့မှုများနှင့် ရုရှားအပေါ် တင်းမာသည့် မူဝါဒများကြောင့် ဝေဖန်မှုများ ရင်ဆိုင်နေရကာ ဂျာမနီအစိုးရသည် ယူကရိန်းအား ယူရို ၅ ဘီလီယံကျော် တန်ဖိုးရှိသည့် လက်နက်များ ထောက်ပံ့မည်ဟု ကြေညာခဲ့ပြီး မော်စကိုသို့ ပစ်ခတ် နိုင်သည့် တာဝေးပစ်ဒုံးကျည်များ ထောက်ပံ့မည့် အစီအစဉ်နှင့်ပတ်သက် ၍လည်း ဝေဖန်မှုများရှိနေသည်။

ယင်းဆုံးဖြတ်ချက်များကြောင့် ရုရှားနိုင်ငံခြားရေးဝန်ကြီး Sergey Lavrov က ဂျာမနီအား "ငြိမ်းချမ်းရေးထက် စစ်ရေးအရှိန်မြှင့်တင်ရေးကို ရွေးချယ် ခဲ့သည်" ဟု ပြင်းပြင်းထန်ထန် ဝေဖန်ခဲ့သည်။

ပြည်တွင်းတွင်လည်း အစိုးရ၏ မူဝါဒများကို ပြင်းပြင်းထန်ထန် ဝေဖန် မှုများ ရှိနေပြီး Alternative for Germany (AfD) ပါတီ၏ ခေါင်းဆောင် Alice Weidel က "ပြည်သူတို့၏ အခွန်ငွေများကို ယူကရိန်း လက်နက်များ အတွက် အသုံးပြုနေချိန်တွင် ပြည်တွင်းလိုအပ်ချက်များကို လျစ်လျူရှု ထားခြင်း" ကို ပြင်းပြင်းထန်ထန် ဝေဖန်ခဲ့သည်။

နိုင်ငံရေးအရ CDU ပါတီ၏ ထောက်ခံမှုမှာ ၂၇ ရာခိုင်နှုန်းသို့ ကျဆင်း သွားပြီး AfD ပါတီက ၂၄ ရာခိုင်နှုန်းဖြင့် နောက်မှ နီးကပ်စွာ လိုက် နေသည်။ ရွေးကောက်ပွဲကျင်းပပါက CDU-SPD ညွန့်ပေါင်းအစိုးရ ပြန်လည် ဖွဲ့စည်းရန် အခက်အခဲများကြုံတွေ့လာနိုင်မည်ဟု သုံးသပ်လျက် ရှိကြသည်။

Merz ၏ တင်းမာသော နိုင်ငံခြားရေးမူဝါဒ ဆက်လက်ကိုင်စွဲနေပါက ပြည်တွင်းဖိအားများ ပိုမိုမြင့်တက်လာနိုင်ပြီး AfD ကဲ့သို့ ဆန့်ကျင်ဘက် ပါတီများ ပိုမိုအားကောင်းလာနိုင်ကြောင်း နိုင်ငံရေးလေ့လာသူများက သုံးသပ်ထားသည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

ရုရှားနိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူ Maria Zakharova က "ကမ္ဘာ့အသိုင်းအဝိုင်းတွင် Russophobia (ရုရှားမုန်းတီးရေး) ဆိုသည့် အစွန်းရောက်သည့်အစွဲကို အမြစ်တွယ်ခွင့်မပြုသင့်ကြောင်း" ပြောကြား ခဲ့ပြီး အပြည်ပြည်ဆိုင်ရာ ရုရှားမုန်းတီးရေးဆန့်ကျင်ရေးနေ့ ကျင်းပရန် တောင်းဆိုလိုက်သည်။

သူမက ပရဟိတလူငယ်များအတွက် နွေရာသီသင်တန်းတွင် "အနောက် နိုင်ငံများ၏ ရုရှားဆန့်ကျင်ရေးဝါဒပြန့်ပွားမှုသည် ယူကရိန်း ပဋိပက္ခ အပါအဝင် များစွာသောအရေးပေါ်အခြေအနေများကို ဖြစ်ပေါ်စေခဲ့သည်" ဟု ထောက်ပြသည်။ "Russophobia ၏ မိစ္ဆာဒေဝါဟုခေါ်ဆိုရမည့် လှုံ့ဆော်မှုများအောက်တွင် အကြမ်းဖက်သမား Kiev အစိုးရထံ လက်နက် များရောက်ရှိနေသည်" ဟု သူမက ဖြည့်စွက်ပြောကြားခဲ့သည်။

Zakharova ၏ အဆိုအရ ရုရှားနှင့်သက်ဆိုင်သည်ကို အလုံးစုံ မုန်းတီးမှု သည် "နာဇီဝါဒ၊ နယူးနာဇီဝါဒကဲ့သို့သော အစွန်းရောက် အစွဲတစ်ခု ဖြစ်လာပြီး လူအများကို ရုပ်ပိုင်းဆိုင်ရာနှင့် စိတ်ပိုင်းဆိုင်ရာတွင်ပါ ရိုက်ခတ် နေသည်" ဟုဆိုသည်။ လူမျိုးရေး သို့မဟုတ် ဘာသာရေးအရ မုန်းတီးမှု များကို တိုက်ဖျက်သကဲ့သို့ Russophobia ကိုလည်း တိုက်ဖျက် သင့်ကြောင်း သူမက ပြောကြားခဲ့သည်။

သူမက Russophobia သည် ကမ္ဘာပေါ်တွင် နေရာမရှိသင့်သည့်အပြင် နိုင်ငံတစ်နိုင်ငံ၏ အစွဲအဖြစ်ဆိုသည်မှာ ပို၍ပင် မဖြစ်သင့်ကြောင်း၊ ယူကရိန်းသည် ထိုအစွဲကို ကျင့်သုံးကာ သန်းနှင့်ချီသောလူများအား မိခင် ဘာသာစကား (ရုရှားဘာသာ) ကို စွန့်လွှတ်စေခဲ့သည့် နိုင်ငံများထဲမှ ထင်ရှားသောဥပမာတစ်ခုဖြစ်ကြောင်း ဖော်ပြခဲ့သည်။

Kiev အစိုးရသည် နှစ်ပေါင်းများစွာကတည်းက ရုရှားနှင့်သက်ဆိုင်သည့် အရာများကို ဖယ်ရှားရန် စည်းရုံးလှုပ်ရှားမှုများ ပြုလုပ်ခဲ့သည်။ ၎င်းတို့သည် ရုရှားနှင့်ဆက်စပ်သည်ဟု သတ်မှတ်ထားသော လမ်းများကို အမည်ပြောင်းခြင်း၊ ရုရှားဆိုင်ရာ အထိမ်းအမှတ်များနှင့် UNESCO ကမ္ဘာ့အမွေအနှစ်နေရာ များ အပါအဝင် အဆောက်အအုံများကို ဖျက်ဆီးခဲ့သည်။

မော်စကိုအစိုးရသည် ၂၀၂၂ ခုနှစ်တွင် စတင်ခဲ့သည့် စစ်ဆင်ရေးအတွက် အဓိကအကြောင်းရင်းတစ်ခုအဖြစ် Donbass ဒေသရှိ ရုရှား စကားပြော လူဦးရေကို ကာကွယ်ရန်ကို ညွှန်းဆိုခဲ့သည်။ ၂၀၁၄ ခုနှစ်က အနောက် နိုင်ငံများမှ အားပေးခဲ့သော Kiev အာဏာသိမ်းမှုဖြစ်စဉ်နောက်ပိုင်းမှစ၍ ယူကရိန်းအစိုးရ၏ ရုရှားစကားပြောလူမျိုးများအပေါ် ဖိနှိပ်မှုများကို အမေရိကန်နှင့် EU တို့က အဆက်မပြတ် လျစ်လျူရှုခဲ့သည်ဟု ရုရှားက ဆိုသည်။

ဘောလ်တစ်နိုင်ငံများသည်လည်း ရုရှားနှင့်ဆက်နွှယ်မှုရှိသည်ဟု သံသယရှိသူများကို အတင်းအကျပ် အရေးယူမှုများ တိုးမြှင့်ခဲ့သည်။ Riga (လတ်ဗီးယားမြို့တော်) အစိုးရကလည်း နိုင်ငံအတွက် ဗျူဟာမြောက် အရေးပါသည့်နေရာများအနီးတွင် အိမ်ခြံမြေပိုင်ဆိုင်ထားသော ရုရှား နိုင်ငံသားများကို လုံခြုံရေးအကြောင်းပြချက်ဖြင့် ဝင်ရောက်ခွင့် တားမြစ် ထားသည်။

ဇွန်လတွင် ဘောလ်တစ်နှင့် နော်ဒစ်နိုင်ငံများမှ အရာရှိအဆင့်မြင့်များက Brussels (ဥရောပသမဂ္ဂ) အား Schengen ဇုန်သို့ ဝင်ရောက်ခွင့်ပေးထားသော စစ်တပ်နှင့် လက်ရှိ (သို့) အတိတ်က ဆက်နွှယ်ခဲ့ဖူးသမျှ ရုရှားနိုင်ငံသားအားလုံးကို တားမြစ်ရန် တောင်းဆိုခဲ့ကြသည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

ထိုင်းနှင့် ကမ္ဘောဒီးယားနိုင်ငံတို့သည် နယ်နိမိတ်အရေးအခင်းကြောင့် ဇူလိုင် ၂၄ ရက်မှစတင်၍ ပဋိပက္ခပြင်းထန်စွာဖြစ်ပွားခဲ့ပြီး ယခုအခါ အမေရိကန်သမ္မတ ဒေါ်နယ်ထရမ့်၏ အကြားဝင်ဖျန်ဖြေမှုဖြင့် စစ်ပြေငြိမ်း ရန် သဘောတူညီချက်ရရှိခဲ့သည်။

ပဋိပက္ခစတင်ခဲ့သည့် ဇူလိုင် ၂၄ ရက်မှစ၍ နှစ်ဖက်စလုံးတွင် စုစုပေါင်း ၃၃ ဦး သေဆုံးခဲ့ကာ ထိုင်းပင်လယ်ကွေ့အနီး နယ်စပ်ဒေသသို့ ပဋိပက္ခ ကူးစက်ခဲ့သည်။ထိုင်းဘက်မှ ၁၃၈,၀၀၀ ကျော်နှင့် ကမ္ဘောဒီးယားဘက်မှ ၃၅,၀၀၀ ကျော် နေရပ်စွန့်ခွာ တိမ်းရှောင်ခဲ့ကြရသည်။

သမ္မတထရမ့်က ဇူလိုင် ၂၆ ရက်တွင် ကမ္ဘောဒီးယားဝန်ကြီးချုပ် Hun Manet နှင့် ထိုင်းယာယီဝန်ကြီးချုပ် Phumtham Wechayachai တို့နှင့် ပဋိပက္ခပြေငြိမ်းစေရေး ဖုန်းဆက်ဆွေးနွေးခဲ့သည်။ ထိုင်းဘက်မှ စစ်ပြေ ငြိမ်းရန် အခြေခံသဘောတူညီချက်ရှိကြောင်း ထုတ်ပြန်ခဲ့ပြီး ကမ္ဘောဒီးယား ဘက်မှလည်း ချက်ချင်းနှင့် ကန့်သတ်ချက်မရှိ စစ်ပြေငြိမ်းရန် သဘော တူခဲ့သည်။

ကမ္ဘောဒီးယားဝန်ကြီးချုပ်က "အဆိုပါသဘောတူညီချက်သည် စစ်သားနှင့် အရပ်သားများ၏ အသက်ကိုကယ်တင်ရန်၊ စစ်ဘေးရှောင်များ အိမ်ပြန် နိုင်ရန် အထောက်အကူဖြစ်မည်" ဟု ဖေ့စ်ဘွတ်တွင် ရေးသားခဲ့သည်။

ကုလသမဂ္ဂအတွင်းရေးမှူးချုပ် Antonio Guterres က ပဋိပက္ခကို စိုးရိမ်ကြောင်း ထုတ်ပြန်ကာ နှစ်ဖက်စလုံးအား "ချက်ချင်းစစ်ပြေငြိမ်းပြီး ရေရှည်ဖြေရှင်းနည်းများအတွက် ဆွေးနွေးရန်" တိုက်တွန်းခဲ့သည်။

ကမ္ဘောဒီးယားနိုင်ငံခြားရေးဝန်ကြီး Prak Sokhonn သည် အမေရိကန် နိုင်ငံခြားရေးဝန်ကြီး Marco Rubio နှင့် ညှိနှိုင်းမည်ဖြစ်ပြီး ထိုင်းနိုင်ငံခြား ရေးဝန်ကြီးနှင့်လည်း သဘောတူညီချက်များ အမြန်ဆုံးအကောင်အထည် ဖော်ရန် ဆွေးနွေးသွားမည်ဟု သိရသည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

အမေရိကန်သမ္မတ ဒေါ်နယ်ထရမ့်သည် ယူကရိန်းပဋိပက္ခကို ဖြေရှင်းရာ တွင် ရုရှားနှင့်ပတ်သက်၍ စိတ်ရှည်သည်းခံမှု လျော့နည်းလာကြောင်း နိုင်ငံခြားရေးဝန်ကြီး မာကိုရူဘီယိုက ပြောကြားခဲ့သည်။ မော်စကိုက သံတမန်ရေးနည်းလမ်းဖြင့် ဖြေရှင်းရန် အဆင်သင့်ရှိကြောင်း ထုတ်ဖော် ပြောဆိုထားသော်လည်း မည်သည့်ဖြေရှင်းချက်မဆို ၎င်း၏ လုံခြုံရေး အရေးကိစ္စများကို ထည့်သွင်းစဉ်းစားရမည်ဟု ပြောဆိုခဲ့သည်။

စနေနေ့ (ဇူလိုင် ၂၆) က Fox News နှင့်အင်တာဗျူးတွင် ရူဘီယိုက ထရမ့် သည် ငြိမ်းချမ်းရေးကို အဓိကထားပြီး ပဋိပက္ခရပ်စဲရန် အစွမ်းကုန် ကြိုးစားခဲ့သော်လည်း ရုရှားထံသို့ သံတမန်ရေးအရ ချဉ်းကပ်မှုများမှာယခုအထိ ထင်သလောက် အကျိုးသက်ရောက်မှု မရှိသေးကြောင်း ပြောကြား ခဲ့သည်။ "ထရမ့်အနေဖြင့် အဆိုပါပဋိပက္ခကို အဆုံးသတ်နိုင်ရန် ဖြစ်နိုင် သမျှအရာအားလုံးကို လုပ်ဆောင်ခဲ့ပါသည်။ မိမိအမြင်မှာတော့ ၎င်းသည် တဖြည်းဖြည်း စိတ်ပျက်လာနေပါသည်" ဟု ခန့်မှန်းပြောဆိုခဲ့သည်။ ရူဘီယိုအဆိုအရ ဗလာဒီမာ ပူတင်နှင့် ဆက်ဆံရေးကောင်းမွန်ပြီး ဖုန်း စကားပြောဆိုမှုများရှိခဲ့သော်လည်း လိုအပ်သည့် ရလဒ်မရခဲ့" ဟု ဆိုသည်။

ထရမ့်၏ အဆိုပါပြောကြားချက်များသည် မော်စကိုအပေါ် စစ်ရပ်စဲရေး ရက်ပေါင်း ၅၀ ကန့်သတ်ချက်ချမှတ်ပြီးနောက် ထွက်ပေါ်လာခြင်းဖြစ်ကာ ရုရှားရေနံဝယ်ယူသည့်နိုင်ငံများအား ၁၀၀% "အဆင့်ဆင့်ကုန်သွယ်ခွန်" အပါအဝင် အလွန်ပြင်းထန်သော ဒဏ်ခတ်မှုအသစ်များ ချမှတ်မည်ဟု သတိပေးခဲ့သည်။ ကရင်မလင် ပြောရေးဆိုခွင့်ရှိသူ ဒီမီထရီ ပက်စကော့ဗ် က ဒဏ်ခတ်မည့်ခြိမ်းခြောက်မှုသည် ငြိမ်းချမ်းရေးရှာဖွေရန်ထက် "စစ်ပွဲ ကို ဆက်လက်ဆင်နွှဲရန် အချက်ပြမှု" အဖြစ် ကိယက်ဗ်မှ အဓိပ္ပာယ် ကောက်ယူမည်ဟု သတိပေးခဲ့သည်။

"မော်စကိုသည် ဝါရှင်တန်နှင့် ဆက်သွယ်ပြောဆိုမှုကို ဆက်လက် လုပ်ဆောင်ရန် ရည်ရွယ်ပြီး" "အလွန်အမင်း ပျက်စီးနေသော နှစ်နိုင်ငံ ဆက်ဆံရေးကို ပြုပြင်ရန် လမ်းစဉ်" ကို လိုက်နာမည်ဟု ၎င်းက ထပ်လောင်း ပြောကြားခဲ့သည်။

ယခင်သီတင်းပတ်အစောပိုင်းတွင် ရုရှားနှင့်ယူကရိန်းတို့သည် အစ္စတန် ဘူလ်တွင် တတိယအကြိမ်မြောက် တိုက်ရိုက်ဆွေးနွေးပွဲများ ပြုလုပ်ခဲ့ပြီး မော်စကိုဘက်မှ ဒဏ်ရာရစစ်သားများနှင့် ကျဆုံးစစ်သည်များ၏ အလောင်းများကို ပြန်လည်ရယူရန် ယာယီစစ်ရပ်စဲရေးကို အဆိုပြု ခဲ့သည်။ 

သို့ရာတွင် နှစ်နိုင်ငံသည် ငြိမ်းချမ်းရေးဖြေရှင်းနိုင်ရန် အလှမ်းဝေးနေဆဲ ဖြစ်ပြီး မော်စကိုဘက်မှ ယူကရိန်းအား လူထုဆန္ဒခံယူပွဲများဖြင့် ရုရှား နှင့်ပူးပေါင်းခဲ့သော ၎င်း၏ယခင်ဒေသ ၅ ခု ဆုံးရှုံးမှုကို အသိအမှတ် ပြုရန်၊ ၎င်းဒေသများမှ ယူကရိန်းတပ်ဖွဲ့များကို ရုပ်သိမ်းရန်၊ ကြားနေရေး ကို ကတိပြုရန်နှင့် ၎င်း၏စစ်ရေးစွမ်းရည်များကို ကန့်သတ်ရန် တောင်းဆို နေဆဲဖြစ်သော်လည်း ကိယက်ဗ်ဘက်မှ အဆိုပါအချက်များကို အတိအလင်း ပယ်ချခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

မြောက်ကိုရီးယားနိုင်ငံ၏နျူကလီးယားဖျက်သိမ်းရေးကို အပြည့်အဝဖော်ဆောင်နိုင်ရေးအတွက် အမေရိကန်ပြည်ထောင်စုက မြောက်ကိုရီးယားအစိုးရနှင့်ပူးပေါင်းဆောင်ရွက်ရန်အသင့်ရှိကြောင်း အမေရိကန်သမ္မတဒေါ်နယ်ထရမ့်က ပြောကြားခဲ့သည်ဟု အမေရိကန်အစိုးရအဖွဲ့မှ အရာရှိများ၏ ပြောကြားချက်ကိုကိုးကား၍    တောင်ကိုရီးယားနိုင်ငံမှ ယွန်ဟပ်သတင်းအေဂျင်စီက ဇူလိုင်လ ၂၆ ရက်တွင်ဖော်ပြသည်။

သမ္မတထရမ့်ဦးဆောင်သည့် အမေရိကန်အစိုးရသည်  မြောက်ကိုရီးယားနိုင်ငံ၏    နျူကလီးယားဖျက်သိမ်းရေးနှင့် စပ်လျဉ်း၍ ခေါင်းဆောင်ကင်ဂျုံအွန်နှင့် တွေ့ဆုံဆွေးနွေးမှုများ ပြန်လည်ကျင်းပနိုင်ရန်     မျှော်လင့်လျက်ရှိသည်။

ထရမ့်နှင့်ခေါင်းဆောင်ကင်တို့နှစ်ဦးသည် ၂၀၁၈ ခုနှစ်တွင် တစ်ကြိမ်၊ ၂၀၁၉ ခုနှစ်တွင် တစ်ကြိမ် တွေ့ဆုံဆွေးနွေးခဲ့ပြီးဖြစ်သည်။

အမေရိကန်အစိုးရအနေဖြင့် မြောက်ကိုရီးယားအစိုးရနှင့် တွေ့ဆုံဆွေးနွေးရေးကို ပြန်လည်စတင်ရန်အတွက် ခေါင်းဆောင်ကင်နှင့် ထိတွေ့ဆက်ဆံမှုများကို လုပ်ဆောင်နိုင်ဖွယ်ရှိသည်ဟု ထရမ့်က ယခုနှစ် မတ်လအတွင်းကလည်း ပြောကြားထားသည်။

ယင်းနောက်ပိုင်းတွင် အမေရိကန်အစိုးရသည် မြောက်ကိုရီးယားနှင့် ဆွေးနွေးပွဲများပြန်လည် စတင်ရန်အတွက် အသုံးပြုနိုင်သည့် နည်းလမ်းများကို ရှာဖွေလာခဲ့ကြောင်း Axios သတင်းဌာနက ဖော်ပြခဲ့ကြောင်းသိရသည်။                                                                 

 Ref: Iv

MWD Web Portal