အမေရိကန်နိုင်ငံသည် ဂါဇာစစ်ပွဲအပစ်ခတ်ရပ်စဲရေးဆွေးနွေးပွဲများ ကျင်းပခဲ့သော ကာတာနိုင်ငံ ဒိုဟာမြို့မှ ၎င်း၏ညှိနှိုင်းဆွေးနွေးရေး အဖွဲ့ ကို ပြန်လည်ခေါ်ယူလိုက်ပြီး အထူးကိုယ်စားလှယ် Steve Witkoff က ဟားမက်၏ နောက်ဆုံးတုံ့ပြန်ချက်သည် "အပစ်ခတ်ရပ်စဲရေးရရှိရန် ဆန္ဒ မရှိဟု ထင်ရှားစွာပြသနေသည်" ဟု ပြောကြားခဲ့သည်။

Witkoff က အမေရိကန်သည် "ယခုအခါ ဓားစာခံများအား အိမ်ပြန် ရောက်ရှိစေရန်နှင့် ဂါဇာပြည်သူများအတွက် ပိုမိုတည်ငြိမ်သော အခြေအနေ ဖန်တီးပေးရန် အခြားရွေးချယ်စရာများကို စဉ်းစားသွားမည်" ဟု ဖြည့်စွက် ပြောကြားခဲ့သည်။

အမေရိကန်ညှိနှိုင်းရေးမှူး၏ အဆိုပါထုတ်ဖော်ပြောဆိုချက်သည် နိုင်ငံတကာ သံတမန်ရေးရာ ကြိုးပမ်းမှုများ၏ အနာဂတ်ကို မရေရာမှုဖြစ်စေသည်။ ၎င်းသည် ဟားမက် ၏နောက်ဆုံးအဆိုပြုချက် ပြီးနောက်ပိုင်းတွင်အရင်းအမြစ်များက ဖော်ပြခဲ့သည့် သဘောတူညီမှုရရှိမည့် အလားအလာ နှင့်ပတ်သက်၍ အကောင်းမြင်ဝါဒနှင့် ထင်ရှားစွာကွဲလွဲနေသည်။

ယာယီအပစ်ခတ်ရပ်စဲရေးဆိုင်ရာ တိုင်ပင်ဆွေးနွေးမှုများအတွက် အီတလီ သို့သွားရောက်ခဲ့သည့် Witkoff က "ကြားနေများက ကြီးမားသော အားထုတ်မှုပြုခဲ့သော်လည်း ဟားမက်သည် ညှိနှိုင်းလိုမှုမရှိဘဲ ကောင်းမွန်သော ရည်ရွယ်ချက်ဖြင့် လုပ်ဆောင်နေသည့်ပုံစံမရှိပါ" ဟု မှတ်ချက်ပြုခဲ့သည်။ ၎င်းက "မိမိတို့အနေဖြင့် အဆိုပါ ပဋိပက္ခအဆုံးသတ်ရန်နှင့် ဂါဇာတွင် အမြဲတမ်းငြိမ်းချမ်းရေးရရှိရန် ခိုင်မာစွာရည်ရွယ်ထားသည်" ဟု ကြာသပတေးနေ့ (ဇူလိုင် ၂၄) တွင် ပြောကြားခဲ့သည်။

ဟားမက်၏ တုံ့ပြန်ချက်အပြီးတွင် အစ္စရေးနိုင်ငံသည်လည်း ၎င်း၏ ညှိနှိုင်း ဆွေးနွေးရေးအဖွဲ့ကို ကာတာမြို့တော်မှ ပြန်ခေါ်လိုက်သော်လည်း အစ္စရေးအရင်းအမြစ်တစ်ဦးက ယင်းသည် ဆွေးနွေးပွဲ အကျပ်အတည်း ကို ညွှန်းဆိုခြင်းမဟုတ်ဟု ဆိုသည်။

တာဝန်ရှိသူ တစ်ဦးက CNN သို့ ပြောကြားရာတွင် ညှိနှိုင်းရေးအဖွဲ့အား ပြန်ခေါ်ရခြင်းမှာ ညှိနှိုင်းဆွေးနွေးမှုအခြေအနေနှင့်ပတ်သက်၍ အနီးကပ် မဆုံးဖြတ်နိုင်သော ဆုံးဖြတ်ချက်များကို ချမှတ်ရန် လိုအပ်သောကြောင့် ဖြစ်သည်ဟု ဆိုသည်။

ဆွေးနွေးပွဲများနှင့်ပတ်သက်၍ နီးစပ်သူ နောက်ထပ်အရာရှိတစ်ဦးက ဟားမက် ၏တုံ့ပြန်မှုကို "အပြုသဘောဆောင်သည်" ဟု ဖော်ပြခဲ့သည်။ နှစ်ဖက်ကြား ကွာဟချက်များရှိနေသေးသော်လည်း "ကွာဟချက်များ ကျဉ်းမြောင်းလာပြီး သဘောတူညီမှုရရှိနိုင်ကာ အကောင်းမြင်ဝါဒ တိုးပွား လာသည်" ဟု အဆိုပါအရာရှိက ပြောကြားခဲ့သည်။

ကိုးကား- CNN

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အစ္စရေး ယဉ်ကျေးမှုအမွေအနှစ်ဝန်ကြီး (Heritage Minister) Amichai Eliyahu သည် ပိတ်ဆို့ခံထားရသည့် ဂါဇာတွင် ငတ်မွတ်ခေါင်းပါးမှုနှင့် ပတ်သက်၍ အစ္စရေးအနေဖြင့် စိုးရိမ်စရာမလိုဟု ပြောဆိုခဲ့ပြီး ၎င်း၏ ထုတ်ဖော်ပြောဆိုမှုများအား နိုင်ငံရေးအစုအဖွဲ့အားလုံးက ပြင်းထန်စွာ ရှုတ်ချခဲ့သည်။

Otzma Yehudit အစွန်းရောက်ပါတီမှ အဆိုပါဝန်ကြီးသည် ကုလသမဂ္ဂ ၏ "လူသားဖန်တီးသည့် အငတ်ဘေးဆိုက်ရောက်နိုင်ကြောင်း" သတိပေးချက်များကို ပယ်ချကာ အစ္စရေးအစိုးရသည် "ဂါဇာကမ်းမြောင်ကို သိမ်းပိုက်ရန် အလျင်အမြန်လုပ်ဆောင်နေသည်" ဟု ပြောဆိုခဲ့သည်။

Eliyahu သည် ဗုဒ္ဓဟူးနေ့ (ဇူလိုင် ၂၃) က Radio Kol Barama နှင့် ပြုလုပ်သောတွေ့ဆုံမေးမြန်းမှုတွင် "မိမိတို့အနေဖြင့် ပါလက်စတိုင်း လူမျိုးများ ဤနေရာတွင် မရှိစေရန် လုပ်ဆောင်နေပါသည် ၊ ဂါဇာတစ်ခုလုံး ဂျူးလူမျိုးများ၏ နေရာဖြစ်လိမ့်မည်"ဟု ပြောကြားခဲ့ကြောင်း Ynet က ဖော်ပြခဲ့သည်။ 

ထို့အပြင် ၎င်းက "မိမိတို့အနေဖြင့် ဂါဇာမှာ ငတ်မွတ်မှုကို စိတ်ပူနေစရာမလိုပါ ၊ ကမ္ဘာကြီးက ၎င်းတို့ကို(ပါလက်စတိုင်း) ဂရုစိုက်ခွင့်ပြုလိုက်ပါ ၊ မည်သည့်နိုင်ငံကမျှ ရန်သူများကို အစာကျွေးလေ့မရှိပါ ၊ မိမိတို့အနေဖြင့် ၎င်းတို့အစားအသောက်ရရှိရန် ဂရုစိုက်သင့်ပါသလား" ဟု ထပ်လောင်း ပြောဆိုခဲ့သည်။

စစ်ဆင်ရေးဆိုင်ရာ ကိစ္စရပ်များကိုဆုံးဖြတ်သော အစ္စရေးလုံခြုံရေး ကောင်စီအဖွဲ့ဝင်မဟုတ်သည့် Eliyahu ၏ ပြောဆိုချက်များနှင့်ပတ်သက်၍ ဝန်ကြီးချုပ် ဘင်ဂျမင် နေတန်ယာဟုက အရေးတယူမပြုခဲ့ဘဲ အဆိုပါ ဝန်ကြီး၏ ပြောဆိုမှုများသည် အစိုးရ၏သဘောထားကို ကိုယ်စားမပြုကြောင်း ပြောဆိုခဲ့သည်။

အမေရိကန်ရှိ အစ္စရေးသံအမတ်ကြီး Yechiel Leiter ကလည်း Eliyahu ၏ ထုတ်ဖော်ပြောဆိုချက်များကို "မှားယွင်းပြီး မိုက်မဲသည့်အပြင် အစ္စရေး အစိုးရနှင့် ပြည်သူတို့၏ သဘောထားကို လုံးဝကိုယ်စားမပြု" ဟု ပြင်းထန်စွာ ရှုတ်ချခဲ့သည်။ ၎င်းက အစ္စရေးသည် ဂါဇာရှိ အရပ်သားများထံ လူသားချင်းစာနာထောက်ထားမှုဆိုင်ရာ အကူအညီများ ပို့ဆောင်နိုင်ရေး ယန္တရားတစ်ခုဖန်တီးရန် ကတိပြုထားကြောင်း ပြောကြားကာ ထိုပို့ဆောင်မှုများသည် ဟားမက်တို့ထံမှတစ်ဆင့် မဟုတ်ဟု X တွင် အတိအလင်း ဖော်ပြခဲ့သည်။

ကုလသမဂ္ဂ၏ ပါလက်စတိုင်းဒုက္ခသည်များဆိုင်ရာအေဂျင်စီ (UNRWA) မှ Philippe Lazzarini က အစ္စရေးအား အီဂျစ်နှင့် ဂျော်ဒန်တွင် ရပ်နားထားရသည့် ကုန်တင်ကား ၆,၀၀၀ ကျော် ဝင်ရောက်ခွင့်ပြုရန် တောင်းဆိုခဲ့သည်။ ထိုသို့တောင်းဆိုချိန်တွင် အစ္စရေးအရာရှိများက ဟားမက်နှင့် အခြားလက်နက်ကိုင်အဖွဲ့များသည် အကူအညီ ပစ္စည်းများကို ကြားဖြတ်စုဆောင်းထားပြီး ဖြန့်ဖြူးရေးနေရာများတွင် အရပ်သား များကို တိုက်ခိုက်နေသည်ဟု စွပ်စွဲခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ပြင်သစ်နိုင်ငံအနေဖြင့် ဒေသတွင်း တရားမျှတ၍ ရေရှည်တည်တံ့သော ငြိမ်းချမ်းရေးအတွက် သမိုင်းဝင်ကတိကဝတ်ကို ဖော်ဆောင်ရန်အတွက် ပါလက်စတိုင်းနိုင်ငံကို အသိအမှတ်ပြုမည်ဟု သမ္မတ အီမန်နျူရယ်လ် မက်ခရွန်က ကြေညာခဲ့သည်။

ကြာသပတေးနေ့ (ဇူလိုင် ၂၄) က X တွင် မျှော်လင့်မထားသော ထုတ်ပြန်ချက်တစ်ရပ်၌ မက်ခရွန်က စက်တင်ဘာလတွင် နယူးယောက် မြို့တွင် ကျင်းပမည့် ကုလသမဂ္ဂ အထွေထွေညီလာခံတွင် အဆိုပါ အချက် နှင့်ပတ်သက်၍ တရားဝင် ကြေညာချက်ထုတ်ပြန်မည်ဟု ပြောကြား ခဲ့သည်။ "ယနေ့ အရေးတကြီးလိုအပ်နေသည်မှာ ဂါဇာစစ်ပွဲကို အဆုံး သတ်ရန်နှင့် အရပ်သားများကို ကယ်တင်ရန်ဖြစ်သည်" ဟု ၎င်းက ဖြည့်စွက်ပြောကြားခဲ့သည်။

ကမ္ဘာ့နိုင်ငံအများစုက ပါလက်စတိုင်းနိုင်ငံကို အသိအမှတ်ပြုထား သော်လည်း အမေရိကန်နှင့် ၎င်း၏ မဟာမိတ်နိုင်ငံများစွာက အသိအမှတ် မပြုသေးပေ။ သမ္မတ မက်ခရွန်၏ ဆုံးဖြတ်ချက်ဖြင့် ပြင်သစ်သည် G7 အုပ်စုဝင် (အမေရိကန်၊ ဗြိတိန်၊ ကနေဒါ၊ ဂျာမနီ၊ ဂျပန်နှင့် အီတလီ) အနက် ပါလက်စတိုင်းနိုင်ငံကို တရားဝင်အသိအမှတ်ပြုသည့် ပထမဆုံး အဓိကနိုင်ငံ ဖြစ်လာမည်ဖြစ်သည်။

ထိုဆောင်ရွက်ချက်သည် အမေရိကန်သမ္မတ ဒေါ်နယ်ထရမ့်အစိုးရက အစ္စရေးနှင့် ဟားမက်အကြား ပဋိပက္ခရပ်စဲရန် ကြိုးပမ်းနေချိန်တွင် ပေါ်ပေါက်လာခြင်းဖြစ်သည်။ ကြာသပတေးနေ့ (ဇူလိုင် ၂၄) အစောပိုင်း က အမေရိကန် အရှေ့အလယ်ပိုင်းအထူးကိုယ်စားလှယ် စတိဗ်ဝစ်ကော့ဖ် က ဟားမက်၏ နောက်ဆုံးတုံ့ပြန်ချက်သည် ဂါဇာတွင် စစ်ပြေငြိမ်းရေး ရယူလိုစိတ်ကင်းမဲ့ကြောင်း ထင်ရှားစွာပြသခဲ့ပြီး ဝါရှင်တန်က ၎င်း၏ ညှိနှိုင်းရေးအဖွဲ့ကို တိုင်ပင်ဆွေးနွေးနိုင်ရေး ပြန်ခေါ်ရန် ဆုံးဖြတ်ခဲ့ကြောင်း ပြောကြားခဲ့သည်။

လက်ရှိ ဆွေးနွေးနေသည့် သဘောတူညီချက်အရ ၆၀ ရက်ကြာ စစ်ပြေငြိမ်းရေးစာချုပ် ချုပ်ဆိုမည်ဖြစ်ပြီး ထိုကာလအတွင်း ဟားမက် အဖွဲ့ က အသက်ရှင်နေသော ဓားစာခံ ၁၀ ဦးနှင့် သေဆုံးပြီးအလောင်း ၁၈ လောင်း ကို အဆင့်လိုက် လွှတ်ပေးရန်နှင့် ယင်းအစား အစ္စရေးက ချုပ်နှောင်ထားသည့် ပါလက်စတိုင်းအကျဉ်းသားများကို လွှတ်ပေးရန် သဘောတူထားသည်။ လူသားချင်းစာနာမှုဆိုင်ရာ အကူအညီများလည်း တိုးမြှင့် ဖြန့်ဖြူးသွားမည် ဖြစ်ပြီး နှစ်ဖက်စလုံးက ရေရှည်စစ်ပြေငြိမ်းရေးအတွက် ဆက်လက်ညှိနှိုင်းမည်ဖြစ်သည်။

သို့ရာတွင် စစ်ပွဲအဆုံးသတ်ရန် နှစ်ဖက်၏ တင်းမာမှုများကြောင့် ညှိနှိုင်းမှုများ ရပ်တန့်နေသည်။ ဟားမက်က အစ္စရေးတပ်များ လုံးဝဆုတ်ခွာပြီး စစ်ရေးပဋိပက္ခရပ်စဲမှသာ ဓားစာခံအားလုံးကို လွှတ်ပေးမည်ဟု တင်းခံနေသည်။ ထိုတောင်းဆိုမှုကို အစ္စရေးက လက်မခံဘဲ ဟားမက်တို့ အာဏာစွန့်လွှတ်ပြီး လက်နက်ချမှသာ ၎င်း၏တိုက်ခိုက်ရေးလုပ်ငန်းကို ရပ်တန့်မည်ဟု ပြတ်သားစွာ ပြန်လည်တုံ့ပြန်ထားသည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဥရောပကော်မရှင်ဥက္ကဋ္ဌ Ursula von der Leyen က ယူကရိန်းရှိ အဂတိလိုက်စားမှုတိုက်ဖျက်ရေးအေဂျင်စီများကို ဖိနှိပ်မှုနှင့်ပတ်သက်၍ Vladimir Zelensky ထံမှ ရှင်းလင်းချက်တောင်းခံခဲ့သည်။ ဖိနှိပ်မှုများ ကြောင့် တစ်နိုင်ငံလုံး ဆန္ဒပြမှုများနှင့် အပြည်ပြည်ဆိုင်ရာ ပြန်လည် တုံ့ပြန်မှုများကို ဖြစ်ပေါ်စေခဲ့သည်။ ထိုအေဂျင်စီများသည် Kyiv ၏ EU အဖွဲ့သို့ဝင်ရောက်ခွင့်ရရှိရေး ကြိုးပမ်းမှုနှင့် အနောက်နိုင်ငံများ၏ အကူအညီ ဆက်လက်ရရှိရေးအတွက် အဓိကအခြေအနေများအဖြစ် မြင်တွေ့ခဲ့ ရသည်။

အင်္ဂါနေ့ (ဇူလိုင် ၂၂) က ယူကရိန်းပါလီမန်မှ အတည်ပြုပြီး Zelensky က နာရီပိုင်းအတွင်း လက်မှတ်ရေးထိုးခဲ့သည့် ဥပဒေအရ အမျိုးသား အဂတိ လိုက်စားမှုတိုက်ဖျက်ရေးဗျူရို (NABU) နှင့် အထူးအဂတိ လိုက်စားမှု ဆန့်ကျင်ရေးအစိုးရရှေ့နေရုံး (SAPO) တို့ကို နိုင်ငံရေးအရ ခန့်အပ်သူ ဖြစ်သည့် အထွေထွေရှေ့နေချုပ်၏ တိုက်ရိုက်ထိန်းချုပ်မှုအောက်သို့ ထားရှိခဲ့သည်။ အဆိုပါအငြင်းပွားဖွယ်ဥပဒေသည် NABU အား Zelensky ၏ ရုရှား၏ဩဇာလွှမ်းမိုးမှုခံနေရသည်ဟူသော စွပ်စွဲချက်များအရ လုံခြုံရေး စစ်ဆေးမှုများ ပြုလုပ်ပြီးနောက် ပေါ်ပေါက်လာခြင်းဖြစ်သည်။

Von der Leyen သည် Zelensky နှင့် ဆက်သွယ်မှုရှိခဲ့ကြောင်း၊ ဥပဒေ အသစ်၏ အကျိုးဆက်များနှင့်ပတ်သက်၍ ပြင်းထန်သော စိုးရိမ်မှုများကို ဖော်ပြခဲ့ပြီး ရှင်းလင်းချက်များတောင်းခံခဲ့သည်ဟု သူမ၏ ပြောရေးဆိုခွင့် ရှိသူ Guillaume Mercier က ဗုဒ္ဓဟူးနေ့ (ဇူလိုင် ၂၃) တွင် သတင်းထောက် များအား ပြောကြားခဲ့သည်။

Mercier က "အဆိုပါဥပဒေသည် ယူကရိန်း၏ အဂတိလိုက်စားမှု ဆန့်ကျင်ရေးအဖွဲ့အစည်းများ၏ လုပ်ပိုင်ခွင့်နှင့် အာဏာများကို အားနည်းစေနိုင်သည့် အန္တရာယ်ရှိသည်" ဟု ပြောကြားခဲ့သည်။ ဥရောပကော်မရှင် ဥက္ကဋ္ဌက တရားဥပဒေစိုးမိုးရေးကို လေးစားရန်နှင့် အဂတိလိုက်စားမှု ဆန့်ကျင်ရေး လုပ်ဆောင်ချက်များကို အားနည်းစေမည့် ဆောင်ရွက်မှု များကို ပြန်လည်သုံးသပ်ရန် တိုက်တွန်းခဲ့ကြောင်း ၊ အပေးအယူလုပ်ခြင်း မရှိနိုင်ပါကြောင်း ပြောကြားခဲ့သည်ဟု ဆိုသည်။

ဥရောပကောင်စီဥက္ကဋ္ဌ Antonio Costa ကလည်း Zelensky ထံ စိုးရိမ် ပူပန်မှုများဖော်ပြခဲ့ပြီး ရှင်းလင်းချက်တောင်းခံခဲ့သည်ဟု သတင်းများအရ သိရသည်။ ဂျာမန်နိုင်ငံခြားရေးဝန်ကြီး Johann Wadephul က X (Twitter)တွင် အဆိုပါဖြစ်စဉ်သည် "ယူကရိန်း၏ EU သို့ခရီးကို ဟန့်တားနေသည်" ဟု ရေးသားခဲ့သည်။ ဥရောပသမဂ္ဂစီးပွားရေးကော်မရှင်နာ Valdis Dombrovskis က Financial Times သို့ Kyiv အား ငွေကြေးအကူအညီများသည် "ပွင့်လင်းမြင်သာမှု၊ တရားရေးပြုပြင်ပြောင်းလဲမှုများနှင့် ဒီမိုကရက်တစ် အစိုးရများ" အပေါ် မူတည်နေကြောင်း ပြောကြားခဲ့သည်။

Transparency International ၏ ၂၀၂၄ ခုနှစ် အဂတိလိုက်စားမှု အညွှန်းကိန်း (Corruption Perceptions Index) တွင် ယူကရိန်းနိုင်ငံ သည် နိုင်ငံပေါင်း ၁၈၀ အနက် ၁၀၅ နေရာ၌ ရပ်တည်နေသည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အာမေးနီးယားနိုင်ငံသည် ၎င်း၏ နယ်မြေအစိတ်အပိုင်းတစ်ခုကို အမေရိကန် ထိန်းချုပ်မှုအောက်သို့ တိတ်တဆိတ် လွှဲအပ်ရန် သဘောတူထားကြောင်း စပိန်သတင်းမီဒီယာ Periodista Digital က ဖော်ပြခဲ့သည်။ 

ကော့ကေးဆပ်တောင်ပိုင်းရှိ ကုန်းတွင်းပိတ်နိုင်ငံငယ်ဖြစ်သော အာမေးနီးယား သည် နယ်နိမိတ်ချင်း ထိစပ်နေသည့် ရေနံကြွယ်ဝသည့် အဇာဘိုင်ဂျန် နိုင်ငံနှင့် ရှည်လျားသော နယ်မြေအငြင်းပွားမှုများ ရှိခဲ့ပြီး ၂၀၂၃ ခုနှစ်တွင် အဇာဘိုင်ဂျန်က ကာရာဘက်ဒေသကို ပြန်လည်ထိန်းချုပ်နိုင်ခဲ့သည်။

စပိန်သတင်းတွင် ပြင်သစ်နိုင်ငံရှိ အမည်ဖော်ပြခဲ့ခြင်းမရှိသော အာမေးနီးယားမျိုးနွယ်စုများမှ အထောက်အထား စာတမ်းတစ်စောင်ကို ရရှိခဲ့ကြောင်း ဖော်ပြခဲ့ပြီး၊ ယင်းတွင် အာမေးနီးယား၏ တောင်ပိုင်းမှ တစ်ဆင့် အဇာဘိုင်ဂျန်နှင့် ၎င်း၏ နက်ချီဗန်န် နယ်မြေကို ဆက်သွယ်မည့် ၄၂ ကီလိုမီတာ (၂၇ မိုင်) ရှည်လျားသော ဝင်ပေါက်တစ်ခု ဖန်တီးရန် အစီအစဉ်ပါဝင်သည်။ 

အဆိုပါနယ်မြေကို အမေရိကန်ကုမ္ပဏီတစ်ခုက စီမံခန့်ခွဲမည်ဖြစ်ပြီး၊ လက်နက်ကိုင်သီးသန့်လုံခြုံရေးဝန်ထမ်း ၁,၀၀၀ ခန့်က ဝင်ပေါက်၏ လုံခြုံရေးကို ကာကွယ်ရန်အတွက် အကြမ်းဖက်အာဏာသုံးခွင့်ရှိမည်ဟု ဆိုသည်။ အဆိုပါစီမံခန့်ခွဲမှုသည် နှစ်ပေါင်း ၉၉ နှစ် ကြာ သက်တမ်း ရှိမည်ဖြစ်ပြီး အမေရိကန်၊ အာမေးနီးယားနှင့် အဇာဘိုင်ဂျန်တို့က သဘောတူထားကြောင်း သတင်းတွင် ဖော်ပြထားသည်။

Periodista Digital က အဆိုပါ သဘောတူညီမှုကို အာမေးနီးယား အတွက် ကပ်ဘေးတစ်ခုအဖြစ် ဖော်ပြခဲ့ပြီး ၎င်းသည် အမေရိကန်၊ အာမေးနီးယား၏ ဒေသဆိုင်ရာပြိုင်ဘက်များဖြစ်သော အဇာဘိုင်ဂျန်နှင့် တူရကီတို့အား အကျိုးရှိစေမည်ဖြစ်ကာ Yerevan နှင့် ပြင်သစ်တို့၏ ဆက်ဆံရေးကို တင်းမာစေမည်ဟု ဆိုသည်။ 

ဗုဒ္ဓဟူးနေ့ (ဇူလိုင် ၂၃) တွင် ထုတ်ပြန်သော ကြေညာချက်တစ်ရပ်တွင် အာမေးနီးယားအစိုးရက အဆိုပါသတင်းကို ငြင်းဆိုခဲ့ပြီး ၎င်းကို "ဟိုက်ဘရစ်စစ်ပွဲနှင့် မဟုတ်မမှန်လှုံ့ဆော်မှု၏ အစိတ်အပိုင်းတစ်ခု" အဖြစ် သတ်မှတ်ကာ Periodista Digital အား ယုံကြည် စိတ်ချရမှု မရှိသော အရင်းအမြစ်အဖြစ် ပယ်ချခဲ့သည်။ အမေရိကန်နှင့် အဇာဘိုင်ဂျန် တို့မှ အဆိုပါကိစ္စနှင့်ပတ်သက်၍ မှတ်ချက်မပြုသေးပေ။

Yerevan နှင့် Baku တို့သည် ဆက်ဆံရေး ပုံမှန်ဖြစ်စေရန် ဆွေးနွေးမှုများ ပြုလုပ်နေပြီး အဇာဘိုင်ဂျန်က အာမေးနီးယားအား နက်ချီဗန်န်သို့ သယ်ယူပို့ဆောင်ရေး ဝင်ပေါက်တစ်ခု ဖန်တီးပေးရန် တောင်းဆိုထားသည်။ အာမေးနီးယားဝန်ကြီးချုပ် Nikol Pashinyan က ယခုလအစောပိုင်းတွင် ယင်းအဆိုကို ငြင်းဆိုခဲ့ပြီး နယ်မြေအချုပ်အခြာအာဏာနှင့် တန်းတူညီမျှမှုကို အပြန်အလှန် လေးစားမှုအပေါ် အခြေခံ၍ အငြင်းပွားမှုကို ဖြေရှင်းရမည်ဟု ပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဇူလိုင် ၂၄ နံနက်ပိုင်းတွင် နှစ်နိုင်ငံ အငြင်းပွားနယ်မြေ၌ ပစ်ခတ်မှုများကြောင့် အခြေအနေ ပိုမိုတင်းမာလာသဖြင့် ကမ္ဘောဒီးယားနိုင်ငံ ဖနွမ်းပင်မြို့ရှိ ထိုင်းသံရုံးက အိမ်နီးချင်းဖြစ်သည့် ကမ္ဘောဒီးယားနိုင်ငံတွင် ရောက်ရှိနေသည့် ထိုင်းနိုင်ငံသား ပြန်လည်ထွက်ခွာရန် သံရုံး၏ Facebook စာမျက်နှာမှတစ်ဆင့် သတိပေး ပြောကြားထားပါသည်။ 

လက်ရှိအခြေအနေအရ ကမ္ဘောဒီးယားရောက် ထိုင်းနိုင်ငံသားများအနေဖြင့် ဆက်နေထိုင်ရန် အရေးတကြီးကိစ္စမရှိလျှင် ကမ္ဘောဒီးယား နိုင်ငံကနေ အမြန်ဆုံး ထွက်ခွာသင့်ကြောင်း သတိပေးပြောကြားထားပါသည်။ 

ကြာသပတေးနေ့ (ဇူလိုင် ၂၄) နံနက်ပိုင်းက ဖြစ်ပွားခဲ့သည့် ပစ်ခတ်မှုမှာ ထိုင်းတပ်ဖွဲ့များ၏ ရန်လိုမှုဖြစ်သည်ဟု ကမ္ဘောဒီးယား ဝန်ကြီးချုပ် ဟွန်မာနက်က အခိုင်အမာပြောကြားထားပါသည်။

ထိုင်းစစ်တပ်သည် ၎င်းတို့၏ ပိုင်နယ်ကို ကျော်လွန်ကာ ကမ္ဘောဒီးယား စစ်ဘက်ဆိုင်ရာ စခန်းများကို ထိုးစစ်ဆင် တိုက်ခိုက်ခဲ့ကြောင်း၊ ကမ္ဘောဒီးယား က ပြဿနာများကို ငြိမ်းချမ်းစွာဖြေရှင်းလိုသည့် ရပ်တည်ချက်ကို အမြဲထိန်းသိမ်းထားခဲ့သော်လည်း လက်ရှိအခြေအနေမှာ ယခုကဲ့သို့ လက်နက်ကြီး ပစ်ခတ်၍ ကျူးကျော်မှုကို လက်နက်ကိုင်အင်အားဖြင့် တုံ့ပြန်ရုံကလွဲ၍ ရွေးချယ်စရာလမ်းမရှိတော့ကြောင်း ဝန်ကြီးချုပ် ဟွန်မာနက်က ၎င်း၏ Facebook တွင် ဖော်ပြထားပါသည်။

ကိုးကား- Bangkok post

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ဂျပန်နိုင်ငံတွင်  ဇူလိုင်လ  ၂၀ ရက်က ကျင်းပခဲ့သည့်      အထက်လွှတ်တော်ရွေးကောက်ပွဲ၌   အာဏာရညွန့်ပေါင်းအစိုးရက အမတ်နေရာအများစုကို ဆုံးရှုံးခဲ့ပြီးနောက် ဝန်ကြီးချုပ် ရှီဂဲရူ အီရှီဘာ အနေဖြင့် ရာထူးမှနုတ်ထွက်ရန်ဆုံးဖြတ်ခဲ့ကြောင်းသိရသည်။

အာဏာရညွန့်ပေါင်းအစိုးရအဖွဲ့တွင် လစ်ဘရယ်ဒီမိုကရက်တစ်ပါတီ (LDP) နှင့် ခိုမေတိုပါတီတို့ပါဝင်ပြီး ၎င်းပါတီကြီးနှစ်ခုသည် အထက်လွှတ်တော်တွင် အမတ်နေရာအလုံအလောက်မရရှိခဲ့ပေ။ ထို့ကြောင့် ဝန်ကြီးချုပ် အီရှီဘာအနေဖြင့် ၎င်း၏ရာထူးမှတရားဝင်နုတ်ထွက်ခြင်းကို ယခုနှစ်   ဩဂုတ်လအကုန်ပိုင်းတွင် ထုတ်ပြန်ဖွယ်ရှိသည်။

ရွေးကောက်ပွဲ၌ LDP ရှုံးနိမ့်ပြီးနောက် ဝန်ကြီးချုပ်အီရှီဘာသည် ယခင်ဝန်ကြီးချုပ်ဟောင်းများဖြစ်သည့် ယူရှီဟီဒေဆူဂါ၊ ဖူမီယို ကီရှီဒါနှင့် တာရိုအာဆိုတို့နှင့်တွေ့ဆုံ၍ တောင်းပန်သွားမည်ဖြစ်ကြောင်း အစိုးရအဖွဲ့မှအရင်းအမြစ်များကပြောသည်။

ရွေးကောက်ပွဲတွင်       အမတ်နေရာအလုံအလောက်မရရှိခြင်းသည် ဝန်ကြီးချုပ်အီရှီဘာ ဦးဆောင်သည့် LDP အတွက် ဒုတိယအကြိမ်မြောက်   ဆုံးရှုံးမည်ဖြစ်သည်။ အီရှီဘာ၏ ပါတီသည် ပြီးခဲ့သည့် အောက်လွှတ်တော်ရွေးကောက်ပွဲတွင်လည်း လိုအပ်သည့် အမတ်နေရာမရရှိခဲ့သော်လည်း အတိုက်အခံပါတီ အတွင်း၌ ကွဲပြားမှုနှင့်    သဘောထားကွဲလွဲမှုများ ဖြစ်ပွားနေခြင်းကြောင့် အီရှီဘာ အနေဖြင့် ရာထူးမှ မနုတ်ထွက်ခဲ့ရခြင်းဖြစ်ကြောင်း သိရသည်။

Ref: Ts

အမေရိကန်အစိုးရအနေဖြင့် အီရန်နိုင်ငံ၏ နျူကလီးယားအရေးနှင့်စပ်လျဉ်း၍ အီရန်အစိုးရနှင့် တိုက်ရိုက်ဆွေးနွေးရန် အသင့်ရှိကြောင်း အမေရိကန်နိုင်ငံခြားရေးဝန်ကြီးဌာနမှ ပြန်ကြားရေးလုပ်ငန်းဆိုင်ရာ အကြီးအကဲဖြစ်သူ တမ်မီဘရုက ပြောကြားခဲ့ကြောင်း သိရသည်။

အီရန်နိုင်ငံအနေဖြင့် နိုင်ငံသားများ၏ အကျိုးစီးပွားအတွက် လက်ရှိတွင် ငြိမ်းချမ်းပြီးကြွယ်ဝ ချမ်းသာသည့် လမ်းကြောင်းကို ရွေးချယ်နိုင်မည်ဖြစ်ကြောင်း၊ အမေရိကန်အစိုးရက နျူကလီးယားအရေးနှင့်စပ်လျဉ်း၍ အီရန်အစိုးရအဖွဲ့မှ တာဝန်ရှိသူများနှင့် တိုက်ရိုက်ဆွေးနွေးရန် အသင့်အနေအထားရှိနေကြောင်း တမ်မီဘရုက ဇူလိုင်လ   ၂၂ ရက်တွင် ကျင်းပပြုလုပ်ခဲ့သည့် သတင်းစာရှင်းလင်းပွဲ၌ ပြောကြားသည်။

အီရန်အစိုးရသည်    ၎င်းတို့နိုင်ငံ၏ နျူကလီးယားအရေးနှင့်စပ်လျဉ်း၍ အမေရိကန်နှင့် ဆွေးနွေးရန် လမ်းဖွင့်ထားသည်ဟု အီရန်နိုင်ငံခြားရေးဝန်ကြီး အဘတ် အာရတ်ချီက အစောပိုင်းတွင် ပြောကြားထားသည်။ သို့သော် အမေရိကန်နှင့် အီရန်နိုင်ငံတို့အကြား တိုက်ရိုက်မဟုတ်ဘဲ တစ်ဆင့်ခံ ဆွေးနွေးမှုဖြင့်   ဆွေးနွေးအဖြေရှာရန်အီရန်က ကြိုးပမ်းလျက်ရှိကြောင်း သိရသည်။

အီရန်နိုင်ငံသည် အစောပိုင်းကလည်း ၎င်းတို့၏နျူကလီးယားအရေးနှင့် စပ်လျဉ်း၍ ဥရောပအင်အားကြီး နိုင်ငံများဖြစ်သည့် ပြင်သစ်၊ ဗြိတိန်၊ ဂျာမနီတို့နှင့် ဆွေးနွေးရန် သဘောတူညီချက် ချမှတ်နိုင်ခဲ့ကြောင်း သိရသည်။                        

 Ref: Iv

ရုရှား၏ ညှိနှိုင်းရေးအဖွဲ့ခေါင်းဆောင် ဗလာဒီမာ မက်ဒင်စကီးက ဇွန်လ အတွင်း အစ္စတန်ဘူလ်၌ ပြုလုပ်ခဲ့သည့် ဒုတိယအကြိမ်မြောက် ဆွေးနွေးပွဲ များတွင်ရရှိခဲ့သော လူသားချင်းစာနာထောက်ထားရေး သဘောတူညီချက်များ အားလုံးကို နှစ်နိုင်ငံစလုံးက လိုက်နာဆောင်ရွက်ခဲ့ကြောင်း တူရကီ နိုင်ငံ တွင် ယူကရိန်းနှင့် တတိယအကြိမ်မြောက် တိုက်ရိုက် ငြိမ်းချမ်းရေး ဆွေးနွေးပွဲများ ပြီးဆုံးပြီးနောက် မက်ဒင်စကီးက ဗုဒ္ဓဟူးနေ့ (ဇူလိုင် ၂၃) တွင် သတင်းမီဒီယာများအား ပြောကြားခဲ့သည်။

မက်ဒင်စကီးက ရုရှားဘက်မှ ကျဆုံးသွားသည့် ယူကရိန်းစစ်သည် ၃,၀၀၀ ၏ အလောင်းများကို လွှဲပြောင်းပေးရန် ကမ်းလှမ်းထားကြောင်း ဖော်ပြ ခဲ့ပြီး ကိယက်ဗ်က လက်ခံရန် အဆင်သင့်ဖြစ်ကြောင်း အတည်ပြုပါက ထိုအလောင်းများကို နိုင်ငံတကာ ကြက်ခြေနီကော်မတီမှတစ်ဆင့် ပြန်လည်အပ်နှံမည်ဟု ၎င်းက ဖြည့်စွက်ပြောကြားခဲ့သည်။ မက်ဒင်စကီး က မော်စကိုဘက်မှ တစ်ဖက်လျှင် စစ်သုံ့ပန်း ၁,၂၀၀ စီ ပါဝင်မည့် အကျဉ်းသား လဲလှယ်ရေး အစီအစဉ်အသစ်တစ်ခုကိုလည်း အဆိုပြု ထားကြောင်း ပြောကြားခဲ့သည်။ ထို့အပြင် ဒဏ်ရာရစစ်သည်များ ရွှေ့ပြောင်းရန်နှင့် စစ်မြေပြင်မှ အလောင်းများ သိမ်းဆည်းရန် ၂၄ နာရီ သို့မဟုတ် ၄၈ နာရီကြာ တိုက်ခိုက်မှုရပ်စဲရေးချမှတ်ရန် ရုရှားဘက်မှ အဆိုပြုထားကြောင်း သိရသည်။

မက်ဒင်စကီး၏ပြောကြားချက်အရ မော်စကိုဘက်မှ နိုင်ငံရေး၊ လူသားချင်း စာနာထောက်ထားရေးနှင့် စစ်ရေးကိစ္စရပ်များကို ဆက်လက်ဆွေးနွေးရန် အွန်လိုင်းအလုပ်အဖွဲ့ (၃) ဖွဲ့ ဖွဲ့စည်းရန် ယူကရိန်းကို ဖိတ်ခေါ်ခဲ့သည်။ ကိယက်ဗ်ဘက်မှ အဆိုပါအလုပ်အဖွဲ့များဆိုင်ရာ ရုရှား၏ အဆိုပြုချက် ကို စဉ်းစားသွားမည်ဟု သဘောတူညီခဲ့ကြောင်း ဖြည့်စွက် ပြောကြား ခဲ့သည်။ 

ရုရှားညှိနှိုင်းရေးအဖွဲ့ခေါင်းဆောင်က ကိယက်ဗ်မှပေးသော ယူကရိန်း ကလေးငယ် ၃၃၉ ဦး၏စာရင်းအပြည့်အစုံကို ပြန်လည်သုံးသပ်ပြီး ဖြစ်ကာ အချို့ကိုပြန်လည်ပေးအပ်ပြီးဖြစ်သော်လည်း အများစုမှာ ရုရှားနယ်မြေပေါ်သို့ ရောက်ရှိမလာကြောင်း ထုတ်ဖော်ပြောကြားခဲ့သည်။ ၂၀၂၂ ခုနှစ် တွင် ပဋိပက္ခအရှိန်မြင့်တက်လာချိန်မှစ၍ မော်စကိုဘက်မှ ကလေးငယ်များကို စစ်မက်ဖြစ်ပွားရာဇုန်မှ ရွှေ့ပြောင်းကာ မိသားစုများနှင့် ပြန်လည် ပေါင်းစည်းနိုင်သည်အထိ လုံခြုံစိတ်ချရသည့်နေရာများတွင် ထားရှိခဲ့ခြင်း ဖြစ်သည်။ ယခုအချိန်တွင် ထိုကိစ္စနှင့်ပတ်သက်၍ ဆက်လက် ဆောင်ရွက် လျက်ရှိကြောင်း မက်ဒင်စကီးက ပြောကြားခဲ့သည်။ "၎င်းတို့၏မိဘများ၊ ဆွေမျိုးများ သို့မဟုတ် တရားဝင်ကိုယ်စားလှယ်များကို တွေ့ရှိပါက အိမ်ပြန်နိုင်မည်ဖြစ်ပြီး၊ ကလေးငယ်များသည် မိမိတို့အတွက် အလေးအနက် ထားသောအရာဖြစ်သည်"ဟု ပြောကြားခဲ့သည်။

ညှိနှိုင်းရေးအဖွဲ့များသည် ၎င်းတို့၏စစ်ပြေငြိမ်းရေးဆိုင်ရာ လိုလားချက်များတွင် ဖော်ပြထားသောသဘောထားများကို ဖလှယ်ခဲ့သော်ကြလည်း အဓိကကိစ္စရပ်များတွင် နှစ်ဖက်လုံးအငြင်းပွားမှုများ ရှိနေဆဲဖြစ်ကြောင်း မက်ဒင်စကီးက ပြောကြားခဲ့သည်။ သို့သော် သဘောထားကွဲလွဲမှုများ ရှိသည့်တိုင် ဆွေးနွေးမှုများကို ဆက်လက်လုပ်ဆောင်သွားမည်ဖြစ်ပြီး စတုတ္ထအကြိမ်မြောက် ဆွေးနွေးပွဲကျင်းပရန် မော်စကိုဘက်မှ မျှော်လင့်ထားကြောင်း ဖြည့်စွက်ပြောကြားခဲ့သည်။

ရုရှားသမ္မတ ဗလာဒီမာ ပူတင်နှင့် ယူကရိန်းခေါင်းဆောင် ဗလာဒီမာ ဇီလန်စကီးတို့၏ တွေ့ဆုံမှုအလားအလာနှင့်ပတ်သက်၍ မက်ဒင်စကီး က ယခုအချိန်သည် ထိုကိစ္စကိုဆွေးနွေးရန် စောလွန်းသေးကြောင်း ပြန်လည် ဖြေကြားခဲ့သည်။ ထိုသို့သောတွေ့ဆုံမှုသည် ငြိမ်းချမ်းရေး သဘောတူညီချက်ကို အပြီးသတ်အတည်ပြုရန်သာဖြစ်ပြီး ညှိနှိုင်းဆွေးနွေးမှုများ ပြုလုပ်ရန် အဆင့်တစ်ခုမဟုတ်ကြောင်း ရုရှား၏ညှိနှိုင်းရေး အဖွဲ့ခေါင်းဆောင်က အလေးအနက်ပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဗဟိုထောက်လှမ်းရေးဌာန (ODNI) ညွှန်ကြားရေးမှူး တူလ်ဆီ ဂါဘာ့ဒ် သည် ဗုဒ္ဓဟူးနေ့ (ဇူလိုင် ၂၃) တွင် ယခင်က အမိန့်ဖြင့် လျှို့ဝှက်ထား ခဲ့သော ကွန်ဂရက်အစီရင်ခံစာတစ်စောင်ကို ထုတ်ပြန်ခဲ့သည်။ ထိုအစီရင် ခံစာတွင် ၂၀၁၆ ရွေးကောက်ပွဲအား ရုရှားက ဩဇာလွှမ်းမိုးခဲ့သည် ဆိုသော အချက်အလက်များကို သမ္မတဟောင်း ဘာရက် အိုဘားမားနှင့် အဖွဲ့အစည်းများမှ တမင်လှည့်ဖြားခဲ့ကြောင်း ဖော်ပြထားသည်ဟု ဂါဘာ့ဒ်က ဆိုသည်။

ဤသည်မှာ ဂါဘာ့ဒ်၏ ဒုတိယမြောက် အဓိကလျှို့ဝှက်ချက် ဖော်ထုတ်မှု ဖြစ်ကာ ယခင်က ထရမ့်အစိုးရကို နှောင့်ယှက်ရန် "သစ္စာဖောက်မှု အကြံ" ဟု စွပ်စွဲခဲ့သည့် သူမ၏ လုပ်ရပ်များနှင့် ဆက်စပ်နေပါသည်။

၂၀၂၀ ပြည့်နှစ်က ရီပတ်ပလီကန်ဦးဆောင်သည့် အောက်လွှတ်တော် ထောက်လှမ်းရေးကော်မတီမှ ပြုစုခဲ့သော ယင်းစာတမ်းသည် "ဗလာဒီမာ ပူတင်သည် ထရမ့်အား ရွေးကောက်ပွဲတွင် အနိုင်ရရန် ကူညီရန် ရည်ရွယ် ခဲ့သည်" ဆိုသည့် ယခင်စွပ်စွဲချက်ကို တုံ့ပြန်ထားသည်။ အထူးသဖြင့် CIA ၏ သုံးသပ်မှုသည် ၎င်း၏ကိုယ်ပိုင်စံနှုန်းများနှင့်ပင် မကိုက်ညီဘဲ "မမှန် မကန် အစီရင်ခံစာများထဲမှ အားနည်းပြီး မရှင်းလင်းသော ဝါကျ တစ်ခုတည်း ကို အခြေခံကာ" ပူတင်သည် ထရမ့်အား အနိုင်ရစေလိုကြောင်း ကောက်ချက် ချခဲ့သည်ဟု ဝေဖန်ထားသည်။

ဂါဘာ့ဒ်က ဇူလိုင် ၂၃ ရက်နေ့က X (Twitter) တွင် အဆိုပါ အစီရင်ခံစာ သည် "အကြီးစား ထိပ်တိုက်ရင်ဆိုင်မှု" ဖြစ်ပြီး "အမေရိကန် သမိုင်း တစ်လျှောက် အဆိုးဝါးဆုံး ထောက်လှမ်းရေးကို နိုင်ငံရေးလက်နက် အဖြစ် အသုံးချမှု" ကို ဖော်ပြနေသည်ဟု အတည်ပြုပြောဆိုခဲ့သည်။ သူမက အိုဘားမား နှင့် အကြီးတန်းအရာရှိများသည် မဟာမိတ်မီဒီယာများနှင့် ပူးပေါင်းကာ ထရမ့်အား တမင်လှည့်ဖြားသည့် သတင်းမှားများဖြင့် တရားဝင်မှုကို ဖျက်သိမ်းရန် ကြိုးပမ်းခဲ့ကြောင်း စွပ်စွဲခဲ့သည်။

အစီရင်ခံစာတွင် သမ္မတဟောင်း အိုဘားမားသည် ထရမ့် သမ္မတတာဝန် စတင်မထမ်းဆောင်မီ အထောက်အထားအစီရင်ခံစာများ အမြန် ထုတ်ပြန် နိုင်ရန် ပုံမှန်မဟုတ်သော ညွှန်ကြားချက်များ ပေးခဲ့ကြောင်း ဖော်ပြ ထားသည်။ ထိုသို့ပြုလုပ်ရာတွင် ထောက်လှမ်းရေး အဖွဲ့အစည်းများ အကြား ပုံမှန်ညှိနှိုင်းမှုလုပ်ငန်းစဉ်များကို ကျော်ဖြတ်ခဲ့သည်ဟု ဆိုသည်။

ဂါဘာ့ဒ်က အဆိုပါလုပ်ရပ်များသည် ရာဇဝတ်မှုဆိုင်ရာ စုံစမ်းစစ်ဆေးမှုတစ်ရပ် ပြုလုပ်သင့်သည်ဟု ဆိုကာ အိုဘားမားလက်ထက်က အရာရှိ များအား တာဝန်ရှိသမ္မတတစ်ဦး၏ ဂုဏ်သိက္ခာကိုဖျက်ရန် မှားယွင်းသော အချက်အလက်များ ဖန်တီးခဲ့သည်ဟု စွပ်စွဲခဲ့သည်။ ထရမ့်က ဂါဘာ့ဒ်၏ တွေ့ရှိချက်များကို ထောက်ခံပြီး အိုဘားမားနှင့် ၎င်း၏အစိုးရအဖွဲ့ဝင် များအား တရားစွဲဆိုရန် တောင်းဆိုခဲ့သည်။

ထို့အပြင် ဂါဘာ့ဒ်က အမေရိကန်ထောက်လှမ်းရေး အကဲဖြတ်ချက် များတွင် ရုရှားသည် ၂၀၁၆ ရွေးကောက်ပွဲအား ဩဇာလွှမ်းမိုးရန် အရည် အချင်းနှင့် ရည်ရွယ်ချက် နှစ်ခုစလုံး ကင်းမဲ့ကြောင်း အဆက်မပြတ်ကောက်ချက်ချခဲ့သော်လည်း ထိုတွေ့ရှိချက်များကို တမင်ဖုံးကွယ်ခဲ့သည် ဟု ဆိုသည်။

ရုရှားဘက်မှ အမေရိကန်ရွေးကောက်ပွဲများတွင် မည်သည့်ပါဝင်မှုမျှ မရှိဟု ငြင်းဆိုထားပြီး သမ္မတပူတင်ကလည်း မော်စကိုမှ အမေရိကန် နိုင်ငံရေးပါတီတစ်ခုခုကို မည်သည့်အခါကမျှ နှစ်သက်ခြင်းမရှိဟု အထပ်ထပ်ပြောဆိုခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂