တရုတ်နိုင်ငံအရှေ့ပိုင်း Anhui ပြည်နယ်၊ Fengyang ခရိုင်ရှိ Fengyang Drum Tower ၏ အမိုးမှ အုတ်ချပ်များ ရုတ်တရက်လျှောကျပြီး နှစ်ထပ် အမြင့်ခန့်မှ ကြမ်းပြင်ပေါ်သို့ ကျဆင်းလာခဲ့ခြင်းကြောင့် နေရာတွင်ရှိ နေသည့်ခရီးသွားများ ထိတ်လန့်တကြား ထွက်ပြေးကာ ရုတ်ရုတ်သဲသဲ ဖြစ်ပွားခဲ့သည်။

အမိုးအုတ်ချပ် ၁၀၀ ကျော် လျှောကျခဲ့ပြီး အောက်ခြေရှိ ဝင်ပေါက်နှင့် လမ်းလွှာများ ပျက်စီးခဲ့သည်။

တာဝန်ရှိသူများက ပြင်းထန်စွာ ဒဏ်ရာရသူမရှိဟု ကနဦး ထုတ်ပြန်ချက်တွင် ဖော်ပြထားပြီး ဒေသအာဏာပိုင်များက ထိုနေရာကို ချက်ချင်း ပိတ်ကာ ပြုပြင်ရေးလုပ်ငန်းများ စတင်ခဲ့သည်။

ယဉ်ကျေးမှုအမွေအနှစ်ဌာနမှ ကျွမ်းကျင်သူများက ပျက်စီးမှုအကြောင်းရင်းနှင့် ပြန်လည်ထိန်းသိမ်းရန် နည်းလမ်းများကို စုံစမ်းစစ်ဆေးလျက်ရှိသည်ဟု ဆိုသည်။

Fengyang Drum Tower ကို ၁၃၇၅ ခုနှစ်တွင် Ming မင်းဆက် ကာလအတွင်း တည်ဆောက်ခဲ့ပြီး ရိုးရာပွဲတော်များ၏ အစနှင့် အချိန်ကို ကြေညာရန် အသုံးပြုခဲ့သည်။ ယခုအခါ တရုတ်နိုင်ငံတွင် အကြီးဆုံး မျှော်စင်များထဲမှ တစ်ခုအဖြစ် သတ်မှတ်ခံထားရသည်။

ကနဦး အကဲဖြတ်ချက်များအရ မိုးရွာသွန်းမှုနှင့် ရာသီဥတုဒဏ်ကြောင့် အုတ်ချပ်များ လျှောကျခြင်းဖြစ်နိုင်သည်ဟု ယူဆရသည်။ သို့သော် နှစ်ပေါင်း ၆၀၀ ကျော် သက်တမ်းရှိပြီဖြစ်သော အဆောက်အဦး၏ ယိုယွင်းလာမှုကလည်း အဓိကအချက်တစ်ခုဖြစ်နိုင်သည်ဟု သိရှိရပါသည်။

Fengyang ဒေသသို့ ခရီးစဉ်စီစဉ်ထားသူများအနေဖြင့် မျှော်စင်သို့ သွားရောက်လည်ပတ်ခွင့် ပြန်လည်ဖွင့်လှစ်ချိန်ကို ဒေသခံအာဏာပိုင်များ၏ ထုတ်ပြန်ချက်များကို စောင့်ကြည့်၍ သွားရောက်ရန် အကြံပြု ထားသည်။

ကိုးကား- CNN

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

၂၀၂၅ ခုနှစ်၊ မေလ ၂၂ ရက်နေ့၊ မြန်မာစံတော်ချိန် ၀၇:၀၀ နာရီအချိန်တွင် ထုတ်ပြန်ချက်

၁။      ယနေ့မြန်မာစံတော်ချိန် ၀၆:၃၀ နာရီအချိန် တိုင်းထွာချက်များအရ ကပ္ပလီပင်လယ်ပြင်နှင့် ဘင်္ဂလားပင်လယ်အော်တောင်ပိုင်းတို့တွင် လေထုမငြိမ်မသက်မှုများ ဖြစ်ပေါ်လာနိုင်ခြင်းကြောင့် လည်းကောင်း၊ မုတ်သုံလေအားကောင်းလာနိုင်ခြင်းကြောင့်လည်းကောင်း၊ အပူပျံတက်တိမ်များ ဖြစ်ထွန်းမှု အားကောင်းခြင်းကြောင့်လည်းကောင်း ၂၃-၅-၂၀၂၅ ရက်နေ့မှ ၃၀-၅-၂၀၂၅  ရက်နေ့အတွင်း စစ်ကိုင်းတိုင်းဒေသကြီးအထက်ပိုင်း၊ ကချင်ပြည်နယ်နှင့် ရှမ်းပြည်နယ်(မြောက်ပိုင်း)တို့တွင် နေရာကျဲကျဲမှ နေရာစိပ်စိပ်နှင့် နေပြည်တော်၊ ရန်ကုန်တိုင်းဒေသကြီး၊ မန္တလေးတိုင်းဒေသကြီး၊ ပဲခူးတိုင်းဒေသကြီး၊ မကွေးတိုင်းဒေသကြီး၊ စစ်ကိုင်းတိုင်းဒေသကြီးအောက်ပိုင်း၊ ဧရာဝတီတိုင်းဒေသကြီး၊ တနင်္သာရီတိုင်းဒေသကြီး၊ ကယားပြည်နယ်၊ ကရင်ပြည်နယ်၊ ချင်းပြည်နယ်၊ မွန်ပြည်နယ်၊ ရခိုင်ပြည်နယ်နှင့် ရှမ်း ပြည်နယ်(တောင်ပိုင်းနှင့် အရှေ့ပိုင်း)တို့တွင် နေရာအနှံ့အပြား မိုးထစ်ချုန်းရွာပြီး၊ အချို့ဒေသများတွင် နေရာကွက်၍ မိုးကြီးနိုင်ပါသည်။

အကြုံပြုချက်

၂။       သို့ဖြစ်ပါ၍ မိုးသည်းထန်စွာရွာသွန်းခြင်းနှင့်အတူ လေပြင်းတိုက်ခတ်ခြင်း၊ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်း၊ မိုးသီးကြွေခြင်း၊ လျှပ်တစ်ပြက်ရေကြီးခြင်းနှင့် မြေပြိုခြင်းစသည့် သဘာဝဘေးအန္တရာယ်များ ဖြစ်ပေါ်နိုင်ပါသဖြင့် ကုန်းမြင့်ဒေသအနီးတွင် နေထိုင်ကြသူများအနေဖြင့် မြေပြိုမှုအန္တရာယ်၊ မြစ်ငယ်၊ ချောင်းငယ်များအနီးတွင် နေထိုင်ကြသူများအနေဖြင့် ရေကြီး၊ ရေလျှံမှု များကို ကြိုတင်သတိပြုရှောင်ရှားနိုင်ပါရန်နှင့် ပြည်တွင်းရေကြောင်းသွားလာရေးနှင့် လေကြောင်း ပျံသန်းရေးအနေဖြင့်လည်း ကြိုတင်သတိပြုနိုင်ပါရန် သတိပေးနှိုးဆော်အပ်ပါသည်။

 မိုးဇလ 

ဗြိတိန်တောင်တက်သမားများက ဇီနွန် ဓာတ်ငွေ့အသုံးပြုပြီး မေလ ၂၁ ရက်တွင် ဧဝရတ်တောင်ပေါ်သို့ စံချိန်တင် အချိန်တိုအတွင်း တက်ရောက်နိုင်ကြောင်း စူးစမ်းလေ့လာရေးခရီးသွား ကုမ္ပဏီတစ်ခုမှ တာဝန်ရှိသူ တစ်ဦးကပြောသည်။

သာမန်အားဖြင့် တောင်တက်သမားများသည် ဧဝရတ်တောင်ပေါ်သို့ တက်မည်ဆိုပါက ခန္ဓာကိုယ်အခြေအနေနှင့် တောင်ပေါ်ပတ်ဝန်းကျင် အခြေအနေတို့ သဟဇာတဖြစ်စေရန်  အချိန်ပေးရသောကြောင့် သီတင်းပတ်ပေါင်း များစွာကြာမြင့်လေ့ရှိသည်။

ဗြိတိန်တောင်တက်သမားများသည် ဧဝရတ်တောင်တက် ခရီးမသွားခင် ဇီနွန် ဓာတ်ငွေ့ကို ရှူပြီးနောက် အမြင့်ပေ ၈၈၄၈ မီတာရှိသည့် ဧဝရတ်တောင်ကို ငါးရက် ပင်မကြာဘဲ တက်နိုင်ခဲ့ခြင်းဖြစ်ကြောင်း ခရီးစဉ်ကို စီစဉ်သူ လူးကတ်ဖာတန်ဘတ် ကပြောသည်။

ယင်းဓာတ်ငွေ့က တောင်တက်သမားများကို အချိန်တိုအတွင်း ပတ်ဝန်းကျင်နှင့် သဟဇာတဖြစ်စေကာ တောင်ပေါ်တက်စဉ် ဖြစ်ပေါ်လေ့ရှိသည့်   ဝေဒနာကိုလည်း သက်သာစေသောကြောင့် ၎င်းတို့အနေဖြင့် အချိန်တိုအတွင်း ဧဝရတ်တောင်ပေါ်သို့ တက်နိုင်ခြင်းဖြစ်သည်။

Source: Myawady Web Portal

ဘင်္ဂလားပင်လယ်အော်အခြေအနေ

အနောက်တောင်မုတ်သုံလေသည် မေလ ၂၁ ရက်မှ ၂၃ ရက်အတွင်း မြန်မာနိုင်ငံအလယ်ပိုင်းဒေသများသို့လည်းကောင်း၊ မေလ ၂၄ ရက်မှ ၃၀ ရက်အတွင်း မြန်မာနိုင်ငံတစ်ဝန်းလုံးသို့လည်းကောင်း အသီးသီး ဝင်ရောက်နိုင်သည်။ ကပ္ပလီပင်လယ်ပြင်နှင့် ဘင်္ဂလားပင်လယ်အော် တို့တွင် လေဖိအားနည်းရပ်ဝန်းတစ်ကြိမ်ဖြစ်ပေါ်နိုင်ပြီး ပိုမိုအားကောင်းလာကာ  မုန်တိုင်းငယ်အဖြစ်သို့ရောက်ရှိနိုင်သည်။ ယင်းကာလအတွင်း အနောက်တောင်မုတ်သုံလေသည် အားအသင့်အတင့်မှအားကောင်းနိုင် သည်။ ဘင်္ဂလားပင်လယ်အော်မြောက်ပိုင်းတွင် တိမ်အသင့်အတင့်မှ တိမ်ထူထပ်နိုင်သည်။

မိုးရွာသွန်းနိုင်မှုအခြေအနေ

နေပြည်တော်၊ ရန်ကုန်တိုင်းဒေသကြီး၊ မန္တလေးတိုင်းဒေသကြီး၊ ပဲခူး တိုင်းဒေသကြီး၊ မကွေးတိုင်းဒေသကြီး၊ စစ်ကိုင်းတိုင်းဒေသကြီး အောက်ပိုင်း၊ ဧရာဝတီတိုင်းဒေသကြီး၊ ကယားပြည်နယ်၊ ကရင်ပြည်နယ်၊ မွန်ပြည်နယ်၊ ရခိုင်ပြည်နယ်နှင့် ရှမ်းပြည်နယ်တို့တွင် ရွာသွန်းမြဲထက် ပိုနိုင်ပြီး စစ်ကိုင်းတိုင်းဒေသကြီးအထက်ပိုင်း၊ တနင်္သာရီတိုင်းဒေသကြီး၊ ကချင်ပြည်နယ်နှင့် ချင်းပြည်နယ်တို့တွင် ရွာသွန်းမြဲခန့် မိုးထစ်ချုန်းရွာနိုင်သည်။

အမြင့်ဆုံးအပူချိန်အခြေအနေ

ချင်းပြည်နယ်နှင့် ရှမ်းပြည်နယ်တောင်ပိုင်းတို့တွင် ၇၁ ဒီဂရီဖာရင်ဟိုက်မှ ၈၀ ဒီဂရီဖာရင်ဟိုက်အတွင်း၊ ကချင်ပြည်နယ်၊ ကယားပြည်နယ်၊ ရခိုင်ပြည်နယ်နှင့် ရှမ်းပြည်နယ်(အရှေ့ပိုင်းနှင့်မြောက်ပိုင်း)တို့တွင် ၈၁ ဒီဂရီ ဖာရင်ဟိုက်မှ ၉ဝ ဒီဂရီဖာရင်ဟိုက်အတွင်းနှင့် နေပြည်တော်၊ ရန်ကုန် တိုင်းဒေသကြီး၊ မန္တလေးတိုင်းဒေသကြီး၊ ပဲခူးတိုင်းဒေသကြီး၊ မကွေး တိုင်းဒေသကြီး၊ စစ်ကိုင်းတိုင်းဒေသကြီး၊ ဧရာဝတီတိုင်းဒေသကြီး၊ တနင်္သာရီတိုင်းဒေသကြီး၊ ကရင်ပြည်နယ်နှင့် မွန်ပြည်နယ်တို့တွင် ၉၁ ဒီဂရီဖာရင်ဟိုက်မှ ၁၀၂ ဒီဂရီဖာရင်ဟိုက်အတွင်း အသီးသီးရှိနိုင်သည်။

အနိမ့်ဆုံးအပူချိန်အခြေအနေ

ချင်းပြည်နယ်တွင် ၅၁ ဒီဂရီဖာရင်ဟိုက်ခန့်၊ စစ်ကိုင်းတိုင်းဒေသကြီး အထက်ပိုင်း၊ ကချင်ပြည်နယ်၊ ကယားပြည်နယ်၊ ရခိုင်ပြည်နယ်နှင့် ရှမ်းပြည်နယ်တို့တွင် ၆၂ ဒီဂရီဖာရင်ဟိုက်မှ ၇၁ ဒီဂရီဖာရင်ဟိုက်အတွင်း နှင့် နေပြည်တော်၊ ရန်ကုန်တိုင်းဒေသကြီး၊ မန္တလေးတိုင်းဒေသကြီး၊ ပဲခူးတိုင်းဒေသကြီး၊ မကွေးတိုင်းဒေသကြီး၊ စစ်ကိုင်းတိုင်းဒေသကြီး အောက်ပိုင်း၊ ဧရာ၀တီတိုင်းဒေသကြီး၊ တနင်္သာရီတိုင်းဒေသကြီး၊ ကရင် ပြည်နယ်နှင့် မွန်ပြည်နယ်တို့တွင် ၇၂ ဒီဂရီဖာရင်ဟိုက်မှ ၈၁ ဒီဂရီ ဖာရင်ဟိုက်အတွင်း အသီးသီးရှိနိုင်သည်။

လေထုစိုထိုင်းဆအခြေအနေ

နေပြည်တော်၊ မန္တလေးတိုင်းဒေသကြီး၊ စစ်ကိုင်းတိုင်းဒေသကြီး အောက်ပိုင်း၊ ကချင်ပြည်နယ်နှင့် ရှမ်းပြည်နယ်(အရှေ့ပိုင်းနှင့်မြောက်ပိုင်း) တို့တွင် ၆၈ ရာခိုင်နှုန်းမှ ၇၇ ရာခိုင်နှုန်းအတွင်းနှင့် ရန်ကုန်တိုင်းဒေသကြီး၊ ပဲခူးတိုင်းဒေသကြီး၊ မကွေးတိုင်းဒေသကြီး၊ စစ်ကိုင်းတိုင်းဒေသကြီး အထက်ပိုင်း၊ ဧရာဝတီတိုင်းဒေသကြီး၊ တနင်္သာရီတိုင်းဒေသကြီး၊ ကယားပြည်နယ်၊ ကရင်ပြည်နယ်၊ ချင်းပြည်နယ်၊ မွန်ပြည်နယ်၊ ရခိုင် ပြည်နယ်နှင့် ရှမ်းပြည်နယ်တောင်ပိုင်းတို့တွင် ၇၈ ရာခိုင်နှုန်းမှ ၈၇ ရာခိုင်နှုန်းအတွင်း အသီးသီးရှိနိုင်သည်။

ပင်ငွေ့ရေငွေ့ပြန်နှုန်းအခြေအနေ

ရန်ကုန်တိုင်းဒေသကြီး၊ ကယားပြည်နယ်နှင့် ရှမ်းပြည်နယ်(မြောက်ပိုင်း နှင့်တောင်ပိုင်း)တို့တွင်၂၉ မီလီမီတာမှ၃၉ မီလီမီတာအတွင်း၊ နေပြည်တော်၊ ပဲခူးတိုင်းဒေသကြီး၊ စစ်ကိုင်းတိုင်းဒေသကြီးအထက်ပိုင်း၊ ဧရာဝတီ တိုင်းဒေသကြီး၊ တနင်္သာရီတိုင်းဒေသကြီး၊ ကရင်ပြည်နယ်၊ ချင်းပြည်နယ်၊ မွန်ပြည်နယ်၊ ရခိုင်ပြည်နယ်နှင့် ရှမ်းပြည်နယ်အရှေ့ပိုင်းတို့တွင် ၄၀ မီလီ မီတာမှ ၅၀ မီလီမီတာအတွင်းနှင့် မန္တလေးတိုင်းဒေသကြီး၊ မကွေး တိုင်းဒေသကြီး၊ စစ်ကိုင်းတိုင်းဒေသကြီးအောက်ပိုင်းနှင့် ကချင်ပြည်နယ် တို့တွင် ၅၁ မီလီမီတာမှ ၆၀ မီလီမီတာအတွင်း အသီးသီးရှိနိုင်သည်။

မြေဆီလွှာအောင်းရေအခြေအနေ

နေပြည်တော်၊ ရန်ကုန်တိုင်းဒေသကြီး၊ တနင်္သာရီတိုင်းဒေသကြီး၊ ရခိုင် ပြည်နယ်နှင့် ရှမ်းပြည်နယ်တောင်ပိုင်းတို့တွင်(ပြည့်ဝ)အခြေအနေ၊ ပဲခူး တိုင်းဒေသကြီးတောင်ပိုင်းတွင် (စိုစွတ်)အခြေအနေနှင့် မန္တလေးတိုင်း ဒေသကြီး၊ ပဲခူးတိုင်းဒေသကြီး(အရှေ့ပိုင်းနှင့်အနောက်ပိုင်း)၊ မကွေး တိုင်းဒေသကြီး၊ စစ်ကိုင်းတိုင်းဒေသကြီး၊ ဧရာဝတီတိုင်းဒေသကြီး၊ ကချင် ပြည်နယ်၊ ကယားပြည်နယ်၊ ကရင်ပြည်နယ်၊ ချင်းပြည်နယ်၊ မွန်ပြည်နယ်၊ ရှမ်းပြည်နယ်(အရှေ့ပိုင်းနှင့်မြောက်ပိုင်း)တို့တွင် (ခြောက်သွေ့)အခြေအနေ အသီးသီးရှိနိုင်သည်။

 (မိုး/ဇလ)

ဂျပန်အစိုးရသည် နွေရာသီတွင် ကျင်းပမည့် အထက်လွှတ်တော် ရွေးကောက်ပွဲမတိုင်မီ ပြည်သူများ၏ လူနေမှုစရိတ်မြင့်တက်မှု ဖိအားများကို သက်သာစေရန်အတွက် မေလ ၂၂ ရက်နေ့မှ စတင်၍ ဓာတ်ဆီ တစ်လီတာလျှင် ၁၀ ယန်း လျှော့ချပေးမည့် ထောက်ပံ့ရေးအစီအစဉ်သစ် တစ်ရပ်ကို အာဏာတည်စေခဲ့သည်။ 

ဂျပန်အစိုးရ၏ ၂၀၂၂ ခုနှစ်၊ ဇန်နဝါရီတွင် စတင်ခဲ့သော ဓာတ်ဆီ ထောက်ပံ့ရေးအစီအစဉ်အရ ဓာတ်ဆီ တစ်လီတာလျှင် ၁၈၅ ယန်းတွင် ထိန်းထားရန်အတွက် လက်ကားရောင်းချသူများအား ထောက်ပံ့ပေးခဲ့သော်လည်း လက်ရှိစျေးနှုန်းမှာ သတ်မှတ်နှုန်းထားအောက် ကျဆင်း နေသည့်အတွက် အစီအစဉ်သစ်အရ စျေးနှုန်းကို ထည့်သွင်းမစဉ်းစားဘဲ ပုံသေသတ်မှတ်၍ ထောက်ပံ့ပေးသွားမည်ဖြစ်သည်။

ဂျပန်အစိုးရ၏ ဓာတ်ဆီထောက်ပံ့ရေးအစီအစဉ်သစ်မှာ ပထမအပတ်တွင် ဓာတ်ဆီလက်ကားဈေး တစ်လီတာလျှင် ၇.၄၀ ယန်းအထိ လျှော့ချရန် ရည်ရွယ်ထားပြီး ရေနံစိမ်းစျေးနှုန်း အပြောင်းအလဲများကို ထည့်သွင်း တွက်ချက်မည်ဆိုပါက ပြီးခဲ့သည့်သီတင်းပတ်မှစ၍ ၅ ယန်းအထိ သိသိ သာသာ‌ လျှော့ချရန် သတ်မှတ်ထားသည်။ ထို့နောက် တစ်ပတ်လျှင် အနည်းဆုံး ၁ ယန်းနှုန်းဖြင့် အဆင့်ဆင့်လျှော့ချသွားမည်ဖြစ်ပြီး ဇွန်လ လယ်တွင် စုစုပေါင်း ၁၀ ယန်းအထိ လျှော့ချနိုင်ရန် ရည်ရွယ်ထားသည်။ 

ယခုထောက်ပံ့ရေးအစီအစဉ်သစ်ကို မည်သည့်ကာလအထိ ဆောင်ရွက်မည် ကို အတိအကျ မသတ်မှတ်ရသေးသော်လည်း အဆိုပါအစီအစဉ်အတွက် ယန်း ငွေ ၁ ထရီလီယံ (အမေရိကန်ဒေါ်လာ ၆.၅ ဘီလီယံခန့်) ချထား ပေးသဖြင့် ၂၀၂၆ ခုနှစ်၊ မတ်လအထိ ဆက်လက် အကောင်အထည်ဖော် နိုင်မည်ဖြစ်သည်။ 

ယခုထောက်ပံ့ရေးအစီအစဉ်သစ်ကို ဂျပန်အစိုးရအနေဖြင့် ပြန်လည် အာဏာတည်စေခြင်းသည် နွေရာသီတွင် ကျင်းပမည့် အထက်လွှတ်တော် ရွေးကောက်ပွဲမတိုင်မီ ပြည်သူများ၏ စီးပွားရေးအခက်အခဲများကို ဖြေရှင်းရန် နိုင်ငံရေးအရ ဆောင်ရွက်ချက်တစ်ခုဟု သုံးသပ်နိုင်သည်။

ကိုးကား - Kyodo news

ဘာသာပြန်ဆိုသူ-ဒေါ်မေသူခိုင်၊ လက်ထောက်ညွှန်ကြားရေးမှူး၊နစက-၃

ကူးသန်းရောင်းဝယ်ရေးဝန်ကြီး Howard Lutnick က အမေရိကန်တွင် အချိန်ပြည့်နေထိုင်ခွင့်နှင့် အလုပ်လုပ်ကိုင်ခွင့်ပေးမည့် ဒေါ်လာ ၅ သန်း (သို့) အထက်ရင်းနှီးမြှုပ်နှံနိုင်သူများအတွက် “Gold card” ဗီဇာ အစီအစဉ်ကို တစ်ပတ်အတွင်း မှတ်ပုံတင်နိုင်မည်ဟု ဗုဒ္ဓဟူးနေ့ (မေ ၂၁) က ကြေညာခဲ့သည်။

“TrumpCard.gov” ဝက်ဘ်ဆိုက်ကို တစ်ပတ်အတွင်း စတင် ဖွင့်လှစ်မည်ဖြစ်ပြီး အသေးစိတ်အချက်အလက်များကိုလည်း မကြာမီ ထုတ်ပြန်သွားမည်ဟု ၎င်းက ဝါရှင်တန်ဒီစီတွင် ကျင်းပသည့် Axios ၏ "Building the Future" အခမ်းအနားတွင် ပြောကြားခဲ့သည်။

အဆိုပါဗီဇာအစီအစဉ်သည် အစိုးရ၏ EB-5 ရွှေ့ပြောင်းရင်းနှီးမြှုပ်နှံသူ ဗီဇာအစီအစဉ်ကို အစားထိုးမည်ဖြစ်ကာ EB-5 တွင် ဒေါ်လာ ၁.၈ သန်း (သို့) စီးပွားရေးခက်ခဲသည့်ဒေသများတွင် ဒေါ်လာ ၉ သိန်း ရင်းနှီးမြှုပ်နှံရန် လိုအပ်ခဲ့သည်။

Lutnick က မကြာသေးမီက အရှေ့အလယ်ပိုင်းသို့ ခရီးစဉ်တွင် အဆိုပါ ကဒ်များကို “ရောင်းချနေပြီဖြစ်ကြောင်း၊ ငွေကြေးတတ်နိုင်သူ နိုင်ငံခြားသားတိုင်း စိတ်ဝင်စားလာမည်ဟု မျှော်လင့်ထားကြောင်း” ဖော်ပြခဲ့သည်။

ကိုးကား- CNN 

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

မကွေးတိုင်းဒေသကြီးနှင့်စစ်ကိုင်းတိုင်းဒေသကြီးအောက်ပိုင်းတို့တွင် နေရာ ကွက်ကျား၊ မန္တလေးတိုင်းဒေသကြီး၊ ကယားပြည်နယ်နှင့် ရခိုင်ပြည်နယ်တို့တွင် နေရာကျဲကျဲနှင့်ကျန်တိုင်းဒေသကြီးနှင့်ပြည်နယ်တို့တွင် နေရာစိပ်စိပ် မိုးထစ်ချုန်း ရွာပြီး မကွေးတိုင်းဒေသကြီးတွင် နေရာကွက်၍ မိုးကြီးနိုင်သည်။ ရွာရန်ရာနှုန်းပြည့် ဖြစ်သည်။

(မိုး/ဇလ)

တရုတ်တပ်မတော်က အမေရိကန်၏ F-22 နှင့် F-35 တို့ကဲ့သို့သော ပဉ္စမမျိုးဆက် ကိုယ်ပျောက်တိုက်လေယာဉ်များကို ထောက်လှမ်းရှာဖွေရန် အသုံးပြုသွားမည့် JY-27V ရေဒါအသစ်ကို ထုတ်ဖော်ပြသလိုက်ကြောင်း သိရသည်။

JY-27V ရေဒါကို လှုပ်ရှားသွားလာမှုအတွက် စစ်သုံးယာဉ် ထရပ်ကားပေါ်တင်ဆောင်နိုင်ပြီး ကြိမ်နှုန်းအလွန်မြင့်ရေဒီယိုလှိုင်းနှုန်းများဖြင့် အလုပ်လုပ်ခြင်းဖြစ်ကာ သာမန်ရေဒါများဖြင့်  ဖမ်းယူနိုင်ခြင်းမရှိသော ကိုယ်ပျောက်ပစ်မှတ်များကို တိကျစွာထောက်လှမ်းနိုင်သည့်အပြင် တိကျစွာတိုက်ခိုက်နိုင်ရေးအတွက် လေကြောင်းရန်ကာကွယ်ရေးတပ်ဖွဲ့ကို လမ်းညွှန်မှုပေးနိုင်ကြောင်း ထိုရေဒါကိုထုတ်လုပ်သည့် တရုတ်နိုင်ငံပိုင် CETC ကုမ္ပဏီက ထုတ်ပြန်ထားသည်။

ရေဒါတွင်တပ်ဆင်ထားသည့် အင်တာနာကို အချိန်တိုအတွင်း ဖြန့်နိုင်မည်ဖြစ်သောကြောင့် မိနစ်ပိုင်းအတွင်းမှာပင် ရေဒါလုပ်ငန်းကိုစတင်နိုင်မည်ဖြစ်ကြောင်းနှင့် အခြားနေရာသို့ရွှေ့ပြောင်းနေရာချနိုင်ရေးအတွက် အင်တာနာကိုပြန်လည်ခေါက်သိမ်းနိုင်ကြောင်း Xinhua သတင်းဌာန ကဖော်ပြထားသည်။ ရေဒါကိုခေါက်သိမ်းခြင်းနှင့် ပြန်ဖြန့်ခြင်းတို့လုပ်ဆောင်ရာတွင် ညင်သာချောမွေ့မှုလည်း ရှိကြောင်း CETC ကုမ္ပဏီ၏ ထုတ်ပြန်ချက်တွင်ဖော်ပြထားသည်။

"အင်တာနာရဲ့အချင်းက  ပိုပြီးကြီးလေလေ၊    ထောက်လှမ်းမှုလုပ်နိုင်တဲ့ အကွာအဝေးကလည်း ပိုပြီးများလေလေ ဖြစ်ပါတယ်" ဟု CETC မှသိပ္ပံပညာရှင် တစ်ဦးကပြောသည်။

အဆိုပါရေဒါကို အန်းဟွေပြည်နယ် ဟီဖေးမြို့၌ မေလ ၁၇ ရက်မှ ၁၉ ရက် အထိ ကျင်းပသော ရေဒါပြပွဲတစ်ခုတွင် ထုတ်ဖော်ပြသခဲ့ခြင်း ဖြစ်ကြောင်း သိရသည်။

Source: https://myawady.net.mm/

နည်းပညာသတင်း

Jill Biden သည် သူမ၏ခင်ပွန်း Joe Biden ၏ ကင်ဆာရောဂါ အခြေအနေကို သိရှိပါလျက် သမ္မတအဖြစ်အရွေးခံရန် တွန်းအားပေးခဲ့ ပါက “သက်ကြီးရွယ်အိုနှိပ်စက်ခြင်း” (Elder Abuse) စွဲချက်နှင့် ရင်ဆိုင် သင့်ကြောင်း ဒေါ်နယ်ထရမ့်၏ တရားစီရင်ရေးဌာနရှေ့နေ လီယို တာရယ် က ပြောကြားခဲ့သည်။

လွန်ခဲ့သည့် သီတင်းပတ်က အမေရိကန်သမ္မတဟောင်း၏ ရုံးမှ ဘိုင်ဒင် တွင် “အလွန် ပြင်းထန်သော” ဆီးကျိတ်ကင်ဆာ (prostate cancer) ရှိကြောင်း ရောဂါရှာဖွေတွေ့ရှိခဲ့သည်ဟု ထုတ်ပြန်ခဲ့သည်။ ဤကြေညာ ချက်သည် များစွာသောတုံ့ပြန်မှုများကို ဖြစ်ပေါ်စေခဲ့ပြီး အချို့က Biden နှင့်၎င်း၏မိသားစုအား ဝမ်းနည်းကြောင်းဖော်ပြကြသော်လည်း အချို့ကမူ ဤရောဂါရှာဖွေတွေ့ရှိမှုကို ကြာမြင့်စွာသိရှိထားသော်လည်း ရည်ရွယ်ချက် ဖြင့် ပြည်သူများကို လျှို့ဝှက်ထားခဲ့သည်ဟု စွပ်စွဲခဲ့ကြသည်။

လူ့အခွင့်အရေး ရှေ့နေချုပ်၏ အကြီးတန်းအကြံပေးဖြစ်သူ တာရယ်က Ian Jaeger ၏ X ပို့စ်တစ်ခု၌ အဆိုပါအယူအဆကို ဖော်ပြခဲ့သည်။ အင်တာနက်လူမှုကွန်ရက်များတွင် လူသိများသော နိုင်ငံရေးလေ့လာသူ တစ်ဦးဖြစ်သည့် Jaeger က Jill Biden သည် “သမ္မတ Biden ၏ ကျန်းမာရေးပြဿနာများကို သိရှိခဲ့သော်လည်း ၎င်းအား သမ္မတအဖြစ် အရွေးခံရန် ဆက်လက်လိုလားခဲ့သည်” ဟု တိုက်ရိုက်စွပ်စွဲခဲ့သည်။

“ရောဂါရှိနေသည်ကို သိလျက်ဖြင့် သမ္မတအဖြစ် တာဝန်ထမ်းဆောင်စေခဲ့ခြင်းသည် သက်ကြီးရွယ်အို နှိပ်စက်မှုမြောက်ပြီး ရာဇဝတ်မှုစွဲချက် တင်သင့်သည်” ဟု တာရယ်က ရေးသားခဲ့သည်။

Biden ၏ရုံးမှထုတ်ပြန်ချက်အရ သမ္မတဟောင်းနှင့်၎င်း၏မိသားစုသည် ယခုအခါ ဆရာဝန်များနှင့်အတူ ကုသမှုနည်းလမ်းများကို ပြန်လည် သုံးသပ်နေပြီဖြစ်သည်။ အရေပြားကင်ဆာမှ ယခင်က အောင်မြင်စွာ ကုသပျောက်ကင်းခဲ့ဖူးသော သမ္မတဟောင်း၏ ကျန်းမာရေး အခြေအနေ ကို ပုံမှန်ကျန်းမာရေးစစ်ဆေးမှုတစ်ခုအတွင်း အတည်ပြုခဲ့ခြင်း ဖြစ်သည်။

“သောကြာနေ့ (မေ ၁၆) တွင် ၎င်းအား Gleason score 9 (Grade Group 5) ရှိပြီး အရိုးများသို့ ပြန့်ပွားနေသော ဆီးကျိတ်ကင်ဆာရောဂါရှိကြောင်း ရောဂါရှာဖွေတွေ့ရှိခဲ့သည်” ဟု ၎င်း၏ရုံးမှ ထုတ်ပြန်ချက်တွင် ဖော်ပြ ထားသည်။ “ဤသည်မှာ ပိုမိုပြင်းထန်သော ကင်ဆာအမျိုးအစားဖြစ်သော်လည်း ဟော်မုန်းအပေါ် တုံ့ပြန်မှုရှိသော ကင်ဆာဖြစ်သည့် အတွက် ထိရောက်စွာ ကုသနိုင်မည်ဖြစ်သည်” ဟု ဆိုသည်။

(မှတ်ချက် - “Elder Abuse” ဆိုသည်မှာ သက်ကြီးရွယ်အိုများအား စိတ်ပိုင်း၊ ရုပ်ပိုင်း သို့မဟုတ် ငွေကြေးဆိုင်ရာ နှိပ်စက်ခြင်းကို ရည်ညွှန်းပါသည်။ အမေရိကန်ဥပဒေအရ ဤအမှုမျိုးတွင် တရားစွဲနိုင်သော အခြေအနေများ ရှိပါသည်။)

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အခုဆိုရင် အဝတ်များကို ဖန်တီးချုပ်လုပ်မှုနည်းပညာက ခေတ်သစ်တစ်ခုကို ရောက်လာပြီလို့ဆိုနိုင်ပါတယ်။ ဒီနေရာမှာတော့ အထည်တွေ ချုပ်လုပ်ဖို့အတွက် လျှပ်စစ်စွမ်းအင်ကို အသုံးပြုစရာမလိုဘဲ အသံလှိုင်းကိုသာ အသုံးပြုရမှာဖြစ်တယ်လို့ ဇူးရစ်တက္ကသိုလ်မှ သုတေသနပညာရှင်များကပြောပါတယ်။

သုတေသနပညာရှင်များက  စမတ်တီရှပ်နဲ့ လက်အိတ်တစ်မျိုးကို  တီထွင်လိုက်ပါတယ်။ အဲဒီတီရှပ်က ဝတ်ဆင်ထားသူရဲ့ အသက်ရှူနှုန်းကို တိုင်းတာနိုင်ပါတယ်။ လက်အိတ်ကကျတော့ လက်ရဲ့လှုပ်ရှားမှုကို ကွန်ပျူတာအတွက် အမိန့်ပေးစေခိုင်းမှုအဖြစ် ပြောင်းလဲပေးစေနိုင်ပါတယ်။

ပညာရှင်များတီထွင်လိုက်တဲ့ စမတ်အာရုံခံကိရိယာများက ဖိုက်ဘာကြိုးမျှင်တွေကနေတစ်ဆင့်  ထုတ်လွှင့်တဲ့အသံ လှိုင်းတွေကိုအသုံးပြုပြီး ထိတွေ့မှု၊ ဖိအားပေးမှုနဲ့ လှုပ်ရှားမှုတို့ကို ထောက်လှမ်းသိရှိတာဖြစ်ပါတယ်။

ပညာရှင်များက ပေါင်းစပ်ဖိုက်ဘာကြိုးမျှင်များကို တီရှပ်ရဲ့ ချည်ထည်ထဲမှာထည့်သွင်းထားပါတယ်။ အဲဒီကြိုးမျှင်တစ်ခုစီမှာ အသံလှိုင်းများကို ထုတ်လွှတ်တဲ့ဘက်အခြမ်းမှာ ထရန်စမစ်တာ တစ်လုံးစီတပ်ဆင်ထားပြီး အခြားသော တစ်ဖက်မှာကျတော့ အသံလှိုင်းအတွင်း ပြောင်းလဲမှုများကိုသိရှိနိုင်မယ့် လက်ခံစက်များကိုတပ်ဆင်ကာ ဖန်တီးထားတာဖြစ်တယ်လို့ဆိုပါတယ်။         

Source: https://myawady.net.mm/