လက်နက်ကိုင်အစွန်းရောက် အကြမ်းဖက်သမားများအနေဖြင့် တိုင်းဒေသကြီးနှင့် ပြည်နယ်များရှိ မြို့နယ်အချို့တွင် နိုင်ငံ့ဝန်ထမ်းများအား ပြည်သူလူထုအတွင်း အကြောက်တရားများ လွှမ်းမိုးစေရန်လည်းကောင်း၊ ၎င်းတို့နှင့် အမြင်အယူအဆမတူသူ အရပ်သားပြည်သူများအား “သူလျှို၊ ဒလန်၊ သတင်းပေး” ဟုစွပ်စွဲ၍လည်းကောင်း၊ “ငါနှင့်မတူ၊ ငါ့ရန်သူ” ဟူသည့် တစ်ဖက် သတ်အစွန်းရောက် ဂိုဏ်းဂဏစွဲအပေါ် အခြေခံကာ ဓား၊ သေနတ်များအသုံးပြု၍ ရက်စက်စွာ လုပ်ကြံတိုက်ခိုက်၊ သတ်ဖြတ်ခြင်းများ ပြုလုပ်လျက်ရှိသည်။
ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇွန် ၆ ရက် ညနေ ၄ နာရီ ၅၀ မိနစ်တွင် မကွေးတိုင်းဒေသကြီး၊ နတ်မောက်မြို့နယ်၊ ကူနီကျေးရွာ၌ သေနတ်ဖြင့် ပစ်ခတ်ခံရ၍ အမျိုးသမီး တစ်ဦး သေဆုံးသွားကြောင်း သတင်းအရ လုံခြုံရေးတပ်ဖွဲ့ဝင်များက ဖြစ်စဉ်အားစိစစ်ခဲ့ရာ အဆိုပါကျေးရွာရှိ အခြေခံပညာမူလတန်းကျောင်းသို့ PDF အမည်ခံ အကြမ်းဖက်သမား ခြောက်ဦး(စိစစ်ဆဲ)က ဆိုင်ကယ် သုံးစီးဖြင့် ရောက်ရှိလာပြီး ကျောင်းအတွင်း ဝင်ရောက်လာကာ ကျောင်းအုပ်ဆရာမကြီးဖြစ်သူ ဒေါ်ရီရီထွေး(၄၅)နှစ်အား သေနတ်ဖြင့် ပစ်ခတ်သတ်ဖြတ်သွားခဲ့သဖြင့် ဒေါ်ရီရီထွေးတွင် ကျည်ထိမှန်ဒဏ်ရာများရရှိ၍ သေဆုံးသွားခဲ့ကြောင်း သိရသည်။
ထိုသို့ နိုင်ငံ့ဝန်ထမ်းများအား “ငါနှင့်မတူ၊ ငါ့ရန်သူ” ဟူသည့် တစ်ဖက်သတ်အစွန်းရောက် ဂိုဏ်းဂဏစွဲအပေါ် အခြေခံကာ လုပ်ကြံသတ်ဖြတ်မှု ကျူးလွန်ခဲ့သူများအား ဖော်ထုတ်ဖမ်းဆီး၍ ဥပဒေနှင့်အညီ အရေးယူနိုင်ရေး လုံခြုံရေးတပ်ဖွဲ့ဝင်များက ဆက်လက်ဆောင်ရွက်လျက်ရှိကြောင်း သတင်းရရှိပါသည်။

MOHA

လက်နက်ကိုင်အကြမ်းဖက်သမားများသည် အပြစ်မဲ့ အရပ်သားပြည်သူများ နေထိုင်ရာ မြို့၊ ရပ်ကွက်၊ ကျေးရွာများအတွင်း၌ တိုက်ပွဲများဖော်ဆောင်ခြင်း၊ လက်နက်ကြီး၊ ရှော့တိုက်ဒုံး၊ Drop Bomb များဖြင့် ပစ်ခတ်တိုက်ခိုက်ခြင်းများအား လုပ်ဆောင်လျက်ရှိပါသည်။
 ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇွန် ၆ ရက် နံနက် ၁၁ နာရီတွင် မန္တလေးတိုင်းဒေသကြီး၊ ချမ်းအေးသာစံမြို့နယ်ရှိ မန္တလေးပြည်သူ့ဆေးရုံကြီးသို့ ဗုံးသီးပေါက်ကွဲစ ထိမှန်ဒဏ်ရာများဖြင့် အမျိုးသမီး နှစ်ဦး ရောက်ရှိနေကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ စစ်ကိုင်းတိုင်းဒေသကြီး၊ အရာတော်မြို့နယ်၊ မြေနက်ကျေးရွာသို့ အကြမ်း ဖက်အဖွဲ့(စိစစ်ဆဲ)က အများပြည်သူ ထိခိုက်စေရန်ရည်ရွယ်၍ လက်နက်ကြီးများဖြင့် ပစ်ခတ်တိုက်ခိုက်ခဲ့ရာ ကျေးရွာအတွင်း လက်နက်ကြီး ဗုံးသီးများ ကျရောက်ပေါက်ကွဲခဲ့မှုကြောင့် အဆိုပါ ကျေးရွာနေ ဒေါ်ညွန့်နွယ်(၄၈)နှစ်နှင့် ဒေါ်ဦး(၄၇)နှစ် တို့တွင် ဗုံးသီးပေါက်ကွဲစ ထိမှန်ဒဏ်ရာများ ရရှိခဲ့ခြင်းဖြစ်ကြောင်း သိရသည်။
ထိုသို့ အပြစ်မဲ့ အရပ်သားပြည်သူများ အေးချမ်းစွာ နေထိုင်လျက်ရှိသော မြို့၊ ရပ်ကွက်၊ ကျေးရွာများအတွင်းသို့ အကြမ်းဖက်သမားများမှ တိုက်ပွဲများဖော်ဆောင်ခြင်းနှင့် လက်နက်ကြီး၊ ရှော့တိုက်ဒုံး၊ Drop Bomb များဖြင့် ပစ်ခတ်တိုက်ခိုက်ခြင်းများ လုပ်ဆောင်မှုကြောင့် အပြစ်မဲ့ အရပ်သားပြည်သူများ ထိခိုက်ဒဏ်ရာရရှိခဲ့မှုအပေါ် ဒေသခံပြည်သူများက လုံးဝလက်ခံနိုင်ခြင်းမရှိဘဲ ဆန့်ကျင်ကန့်ကွက်လျက်ရှိကြောင်းနှင့် လုံခြုံရေးတပ်ဖွဲ့ဝင်များက လိုအပ်သော လုံခြုံရေးလုပ်ငန်းများကို ပြည်သူလူထုနှင့်ပူးပေါင်းကာ တိုးမြှင့်လုပ်ဆောင်လျက်ရှိကြောင်း သတင်းရရှိပါသည်။

MOHA

လက်နက်ကိုင်အကြမ်းဖက်သမားများသည် အပြစ်မဲ့ အရပ်သားပြည်သူများ နေထိုင်ရာ မြို့၊ ရပ်ကွက်၊ ကျေးရွာများအတွင်း၌ တိုက်ပွဲများဖော်ဆောင်ခြင်း၊ လက်နက်ကြီး၊ ရှော့တိုက်ဒုံး၊ Drop Bomb များဖြင့် ပစ်ခတ်တိုက်ခိုက်ခြင်းများအား လုပ်ဆောင်လျက်ရှိပါသည်။
ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇွန် ၅ ရက် နံနက် ၁၁ နာရီ ၄၅ မိနစ်တွင် ကရင် ပြည်နယ်၊ ကော့ကရိတ်မြို့နယ်၊ ကျုံဒိုးမြို့၊ အမှတ်(၁)ရပ်ကွက်သို့ အကြမ်းဖက်အဖွဲ့(စိစစ်ဆဲ)က အများပြည်သူထိခိုက်စေရန် ရည်ရွယ်၍ ရှော့တိုက်ဒုံးဖြင့် ပစ်ခတ်တိုက်ခိုက်ခဲ့ရာ ရပ်ကွက်အတွင်း ရှော့တိုက်ဒုံးဗုံးသီးများ ကျရောက်ပေါက်ကွဲခဲ့မှုကြောင့် အဆိုပါရပ်ကွက်နေ မောင်အောင်စည်ဟိန်း (၁၇)နှစ်တွင် ဗုံးသီးပေါက်ကွဲစထိမှန် ဒဏ်ရာများရရှိခဲ့၍ ကျုံဒိုးတိုက်နယ်ဆေးရုံသို့ ပို့ဆောင်ဆေးကုသ ပေးလျက်ရှိကြောင်း သိရသည်။
ထိုသို့ အပြစ်မဲ့ အရပ်သားပြည်သူများ အေးချမ်းစွာ နေထိုင်လျက်ရှိသော မြို့၊ ရပ်ကွက်၊ ကျေးရွာများအတွင်းသို့ အကြမ်းဖက်သမားများမှ တိုက်ပွဲများဖော်ဆောင်ခြင်းနှင့် လက်နက်ကြီး၊ ရှော့တိုက်ဒုံး၊ Drop Bomb များဖြင့် ပစ်ခတ်တိုက်ခိုက်ခြင်းများ လုပ်ဆောင်မှုကြောင့် အပြစ်မဲ့ အရပ်သား ပြည်သူများ ထိခိုက်ဒဏ်ရာရရှိခဲ့မှုအပေါ် ဒေသခံပြည်သူများက လုံးဝလက်ခံနိုင်ခြင်းမရှိဘဲ ဆန့်ကျင် ကန့်ကွက်လျက်ရှိကြောင်းနှင့် လုံခြုံရေးတပ်ဖွဲ့ဝင်များက လိုအပ်သော လုံခြုံရေးလုပ်ငန်းများကို ပြည်သူလူထုနှင့်ပူးပေါင်းကာ တိုးမြှင့်လုပ်ဆောင်လျက်ရှိကြောင်း သတင်းရရှိပါသည်။

MOHA

ရုရှားစစ်တပ်က ကြည်း၊ရေ၊လေ တပ်ဖွဲ့များ၏ ဒုံးကျည်များနှင့် ဒရုန်းများ အပါအဝင် တိုက်ခိုက်မှုများကို ကိယက်ဗ်၏ မကြာသေးမီက “အကြမ်းဖက် လုပ်ရပ်များ” အား တုံ့ပြန်သည့်အနေဖြင့် ပြုလုပ်ခဲ့ခြင်းဖြစ်ကြောင်း ရုရှား ကာကွယ်ရေးဝန်ကြီးဌာနက သောကြာနေ့ (ဇွန် ၆) တွင် ပြောကြား ခဲ့သည်။

အရှိန်မြှင့်တိုက်ခိုက်မှုများတွင် ဒရုန်းများနှင့် တိကျသော လမ်းညွှန်စနစ်ပါ လက်နက်များ အသုံးပြု၍ ယူကရိန်းကာကွယ်ရေးစက်မှုလုပ်ငန်းဆိုင်ရာ ပစ်မှတ်များကို ညအချိန်တွင် အကြီးစား တိုက်ခိုက်မှုများ ပြုလုပ်ခဲ့ကြောင်း ရုရှားစစ်တပ်က ပြောကြားခဲ့သည်။

ယူကရိန်းအရာရှိများကလည်း သောကြာနေ့မနက်ပိုင်းတွင် မြို့တော် ကိယက်ဗ် အပါအဝင် Lviv နှင့် Lutsk ကဲ့သို့သော မြို့ကြီးများတစ်လျှောက် ဒုံးကျည်နှင့် ဒရုန်းတိုက်ခိုက်မှုလှိုင်းများ ရှိခဲ့ကြောင်း ထုတ်ပြန် ခဲ့သည်။

လွန်ခဲ့သည့်သီတင်းပတ်က ယူကရိန်းတပ်များက ရုရှားရထားလမ်း တံတားများကို ဗုံးခွဲဖျက်ဆီးခဲ့ပြီး ခရီးသွားနှင့် ကုန်တင်ရထားများ လမ်းချော် ခဲ့ရာ အနည်းဆုံး ၇ ဦးသေဆုံးကာ ၁၂၀ ကျော် ဒဏ်ရာရခဲ့သည်။ ထို့အပြင် ကိယက်ဗ်တပ်များက ရုရှား၏ မြောက်ပိုင်းနှင့် အရှေ့ဖျား ဒေသရှိ နျူကလီးယားတင်ဆောင်နိုင်သော ဗုံးကြဲလေယာဉ်များကို ပစ်မှတ် ထား၍ လေယာဉ်ကွင်းများအပေါ် ဒရုန်းများဖြင့် ပေါင်းစပ်တိုက်ခိုက်မှုများ ပြုလုပ်ခဲ့သည်။ မော်စကိုက ဒရုန်းအများစုကို ကာကွယ်နှိမ်နင်းနိုင်ခဲ့ပြီး ပစ်မှတ်ထားခံရသည့် လေယာဉ်များပျက်စီးမှုရှိသော်လည်း အပြီးအပိုင် ဖျက်ဆီးနိုင်ခြင်းမရှိကြောင်း ပြောကြားခဲ့သည်။

ရုရှား၏ ညအချိန်တိုက်ခိုက်မှုများ၏ ပစ်မှတ်များတွင် “ဒီဇိုင်းဗျူရိုများ၊ ယူကရိန်း၏ လက်နက်နှင့် စစ်ပစ္စည်းများ ထုတ်လုပ်ရေးနှင့် ပြုပြင်ရေး လုပ်ငန်းများ၊ တိုက်ခိုက်ရေးဒရုန်းများ စုစည်းသည့် ဝပ်ရှော့များ၊ လေယာဉ် မောင်းလေ့ကျင့်ရေးစင်တာများနှင့် လက်နက်နှင့် စစ်ပစ္စည်းများ သိုလှောင်ရုံများ” ပါဝင်ကြောင်း ထုတ်ပြန်ချက်တွင် ဖော်ပြထားသည်။ “တိုက်ခိုက်မှု၏ ရည်မှန်းချက်အောင်မြင်ပြီး သတ်မှတ်ထားသော ပစ်မှတ်အားလုံးကို ထိမှန်ခဲ့သည်” ဟု ကာကွယ်ရေးဝန်ကြီးဌာနက ပြောကြားခဲ့သည်။

မော်စကို၏အဆိုအရ မေလ ၃၁ ရက်နေ့မှစတင်၍ ရုရှားတပ်များမှ ယူကရိန်း၏ စစ်ရေးဆိုင်ရာပစ်မှတ်များကို ပြုလုပ်ခဲ့သည့် ပေါင်းစပ်တိုက်ခိုက်မှု ဆဋ္ဌမအကြိမ်ဖြစ်သည်။

လွန်ခဲ့သည့်သီတင်းပတ်အတွင်း တိုက်ခိုက်မှုများတွင် ကိယက်ဗ်၏ ကာကွယ်ရေးစက်မှုလုပ်ငန်းများ၊ စစ်လေယာဉ်ကွင်းများ၊ ဒရုန်းများ ထုတ်လုပ်ရေး၊ သိုလှောင်ရေးနှင့် ပစ်လွှတ်ရေးနေရာများ၊ လက်နက်သိုလှောင်ရုံများနှင့် ယူကရိန်းစစ်တပ်နှင့် နိုင်ငံခြားအထောက်အပံ့ခံ စစ်သားများ၏ တပ်စွဲနေရာများ ပါဝင်ကြောင်း ဝန်ကြီးဌာနက ဖော်ပြခဲ့ သည်။

ရုရှားသမ္မတ ပူတင်က ရထားလမ်းဖျက်ဆီးမှုများကို “ကိယက်ဗ် ရှိ တရားမဝင်အာဏာရှင်စနစ်” မှ ကျူးလွန်ခဲ့သည့် “အကြမ်းဖက်မှုတစ်ခု” အဖြစ် ဖော်ပြခဲ့ပြီး၊ ၎င်းစနစ်သည် “တဖြည်းဖြည်း အကြမ်းဖက် အဖွဲ့အစည်းတစ်ခုအဖြစ် ပြောင်းလဲလာနေသည်” ဟု ပြောကြားခဲ့သည်။ ပူတင်သည် ဗုဒ္ဓဟူးနေ့က အမေရိကန်သမ္မတ ဒေါ်နယ်ထရမ့်နှင့် ဖုန်းစကားပြောဆိုရာတွင် နိုင်ငံ၏ နျူကလီးယားတားဆီးရေးစနစ်ကို တိုက်ခိုက်မှုများအား “တုံ့ပြန်ရန် လိုအပ်မည်” ဟု ပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ယူကရိန်းအရာရှိများက ရုရှားသည် ယမန်နေ့ (ဇွန် ၅) ညပိုင်းတွင် ကိယက်ဗ်မြို့နှင့် တစ်နိုင်ငံလုံးရှိ အခြားမြို့များကို ဒုံးကျည်နှင့် ဒရုန်းများဖြင့် အကြိမ်ကြိမ် တိုက်ခိုက်ခဲ့ကြောင်း ပြောကြားခဲ့ပြီး ရုရှား ကာကွယ်ရေး ဝန်ကြီးဌာနမှ လက်ရှိအချိန်အထိ မှတ်ချက်တစ်စုံတစ်ရာ တုံ့ပြန်ခြင်း မရှိသေးပေ။

ကိယက်ဗ်နှင့် ဆင်ခြေဖုံးဒေသများတွင် သောကြာနေ့ (ဇွန် ၆) နံနက် စောစောတွင် ပေါက်ကွဲမှုများစွာ ဖြစ်ပွားခဲ့ပြီး မြို့တော်ဝန် Vitaly Klitschko က ယူကရိန်းလေကြောင်းကာကွယ်ရေးစနစ်များက ဝင်ရောက်လာသော ဒုံးကျည်များနှင့် ဒရုန်းများကို ခုခံတိုက်ခိုက်နေကြောင်း ပြောကြားခဲ့သည်။ အစောပိုင်းတွင် ၎င်းက ပျက်စီးသွားသော ဒုံးကျည် အပိုင်းအစ များသည် လူမနေသော အဆောက်အအုံများပေါ်တွင်သာ ကျဆင်းခဲ့သည်ဟု ဆိုသော်လည်း နောက်ပိုင်းတွင် အနည်းဆုံး ၄ ဦးသေဆုံးပြီး ၂၀ ခန့် ဒဏ်ရာရကြောင်း ထုတ်ပြန်ခဲ့သည်။

ကိယက်ဗ်ဒေသတစ်နေရာရှိ CCTV ကင်မရာမှ ဖမ်းယူထားသည့် မှတ်တမ်းတွင် အမေရိကန်ထောက်ပံ့ထားသည့် Patriot လေကြောင်းကာကွယ်ရေးစနစ်က ဝင်ရောက်လာသော ဒုံးကျည်တစ်စင်းကို ကြားဖြတ်ဒုံးကျည် လေးစင်းဖြင့် ပစ်ခတ်စဉ် ထိမှန်သွားသည့် အခိုက်အတန့်ကို ဖော်ပြနေသည်။

Ternopol ၊ Lviv ၊ Lutsk နှင့် Kremenchug တို့အပါအဝင် နေရာ များစွာတွင် ပေါက်ကွဲသံများ ကြားခဲ့ရပြီး ယူကရိန်း လူမှုကွန်ရက်များ ပေါ်တွင် တိုက်ခိုက်မှုနောက်ပိုင်း ဗီဒီယိုများ ပျံ့နှံ့နေသော်လည်း၊ မည်သည့် နေရာနှင့် မည်သည့်အဆောက်အအုံများ တိုက်ခိုက်ခံရသည်ကို အတည်ပြု နိုင်ခြင်းမရှိသေးပေ။

အဆိုပါတိုက်ခိုက်မှုနှင့်ပတ်သက်၍ ရုရှား ကာကွယ်ရေးဝန်ကြီးဌာနမှ ယခု အချိန်အထိ ကြေညာချက် ထုတ်ပြန်ခြင်းမရှိသေးဘဲ မော်စကိုက ယူကရိန်း၏ စစ်ရေးအခြေခံအဆောက်အအုံများကိုသာ ဒုံးကျည်နှင့် ဒရုန်းများဖြင့် ပစ်ခတ်တိုက်ခိုက်ခဲ့ခြင်းဖြစ်ပြီး ယင်းလုပ်ရပ်များတွင် အရပ်သားပစ်မှတ်များ မပါဝင်ဟု ဆိုသည်။ ထို့အပြင် မော်စကိုက လူဦးရေထူထပ်သည့် နေရာများတွင် လေကြောင်းကာကွယ်ရေးစနစ်များ တပ်ဆင်ထားမှုအတွက် ကိယက်ဗ်အစိုးရအား အပြစ်တင်နေသည်ဟု ဆိုသည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

NATO အဖွဲ့၏ အကြီးအကဲ အတွင်းရေးမှူးချုပ် Mark Rutte က Baltic နှင့် Black Sea ပင်လယ်များကို ယခုအခါ NATO ၏ နည်းဗျူဟာမြောက် တာဝန်ယူမှုဧရိယာအဖြစ် သတ်မှတ်ကြောင်း ထုတ်ဖော်ပြောကြားခဲ့သည်။

ဗုဒ္ဓဟူးနေ့ (ဇွန် ၄) က NATO ကာကွယ်ရေးဝန်ကြီးများ အစည်းအဝေး မတိုင်မီ Rutte က ပြောကြားခဲ့ခြင်းဖြစ်ပြီး၊ ရေအောက် ဆက်သွယ်ရေး ကေဘယ်လ်များ ပျက်စီးမှုဖြစ်စဉ်များနှင့်ပတ်သက်၍ Baltic ဒေသတွင် တင်းမာမှုများ မြင့်တက်လာခြင်းနှင့်စပ်လျဉ်း၍ မေးမြန်းခံရချိန်တွင် ဖြေကြားခဲ့ခြင်းဖြစ်သည်။ လွန်ခဲ့သော လများအတွင်း အဆိုပါဒေသတွင် ရေအောက်ကေဘယ်လ်များ ပျက်စီးမှုအချို့ဖြစ်ပွားခဲ့ပြီး၊ မော်စကိုက ထိုအကြံပြုဖျက်ဆီးမှုများကို နောက်ကွယ်မှ လှုံ့ဆော်ခဲ့သည်ဟု ယူဆကြသည်။ သို့သော် အနောက်နိုင်ငံများမှ စုံစမ်းစစ်ဆေးသူများက နိုင်ငံတော်အဆင့် စီစဉ်ဖျက်ဆီးမှုဆိုင်ရာ ခိုင်မာသောအထောက်အထားများ မတင်ပြနိုင်သေးပေ။

Rutte က “Baltic ဒေသနှင့်ပတ်သက်လာပါက Black Sea နှင့် အခြား NATO ဧရိယာတွေမှာလည်း မိမိတို့၏ အရေးကြီး ရေအောက်အခြေခံ အဆောက်အအုံတွေကို တိုက်ခိုက်မှုအန္တရာယ်က အမြဲရှိနေပါသည်” ဟု ပြောကြားခဲ့သည်။

ထို့အပြင် Baltic ဒေသတွင် “ရုရှား၏ ပြင်းထန်သောတိုက်ခိုက်မှုအတွက် NATO အဖွဲ့သည် အဆင်သင့်ဖြစ်ပြီလား” ဟု မေးမြန်းခံရသည့်အခါ၎င်းက အမေရိကန်ဦးဆောင်သော အဆိုပါစစ်ရေးအဖွဲ့သည် ကာကွယ်ရေးအသုံးစရိတ်ကို တိုးမြှင့်ရန် လိုအပ်ကြောင်းဖြည့်စွက်၍ “ပြင်းထန်သော ပြန်လည်တုံ့ပြန်မှု” ရှိမည်ဟု ခြိမ်းခြောက်မှုပြုခဲ့သည်။

ရုရှားက NATO သို့မဟုတ် EU နိုင်ငံများကို တိုက်ခိုက်ရန် မော်စကိုတွင် ရည်ရွယ်ချက်ရှိကြောင်း အနောက်နိုင်ငံများ၏ အရာရှိများ၏ စွပ်စွဲချက်များကို အဖန်ဖန် ပျက်ရယ်ပြုခဲ့သည်။ ရုရှားသမ္မတ ဗလာဒီမာ ပူတင်က ယခင်က ထိုကဲ့သို့သော ထုတ်ပြန်ချက်များကို “အဓိပ္ပာယ်မရှိသော စကားများ” အဖြစ် ပယ်ချခဲ့ဖူးသည်။

လွန်ခဲ့သော ၁၈ လ အတွင်း စွမ်းအင်နှင့် ဆက်သွယ်ရေး အခြေခံအဆောက်အအုံများ ပျက်စီးမှုနှင့်သက်ဆိုင်သည့် ဖြစ်စဉ်များစွာကြောင့် NATO နှင့် EU အရာရှိအချို့က မော်စကိုကို “ဟိုက်ဘရစ်စစ်ပွဲ (hybrid warfare)” ဆင်နွှဲနေသည်ဟု စွပ်စွဲခဲ့ကြသည်။ ရုရှားဆိပ်ကမ်းများသို့ သွားလာနေသော သင်္ဘောများနှင့် ဆက်စပ်နေသည့် အဆိုပါ ဖြစ်ရပ် များတွင် ၂၀၂၃ ခုနှစ်၊ အောက်တိုဘာလက ဖင်လန်ပင်လယ်ကွေ့ရှိ ဓာတ်ငွေ့ ပိုက်လိုင်း ပျက်စီးမှုနှင့် ဒီဇင်ဘာလတွင် EstLink 2 ပါဝါကေဘယ်လ် ပြတ်တောက်မှုတို့ ပါဝင်သည်။ စုံစမ်းစစ်ဆေးသူများက ကြိုးများကို သင်္ဘောကျောက်ဆူးများဖြင့် ဆွဲငြိမိခဲ့ဟန် ရှိပြီး ဖြစ်ရပ်တစ်ခုစီတွင် ရုရှားနှင့်ဆက်နွှယ်သော သင်္ဘောများ ပါဝင်နေသည်ဟု သတင်းများအရ သိရသည်။

ရုရှားနှင့် ဆက်စပ်မှုရှိကြောင်း ခိုင်မာသော အထောက်အထား မတွေ့ရှိရသော်လည်း ဇန်နဝါရီလတွင် NATO က Baltic Sea ရေအောက်အခြေခံအဆောက်အအုံများကို ကာကွယ်ရန် အကြောင်းပြ၍ “Baltic Sentry” အမည်ရှိ စောင့်ကြည့်ရေးတာဝန်အသစ်ကို စတင်ခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အကြမ်းဖက်အုပ်စုအဖြစ် ကြေညာထားသော CRPH ၊ NUG နှင့် ယင်းတို့၏ လက်အောက်ခံ PDF အမည်ခံအကြမ်းဖက်အဖွဲ့များ၊ ယင်းတို့နှင့်ဆက်နွှယ်နေသော အဖွဲ့အစည်းများနှင့် လူပုဂ္ဂိုလ်များသည် နိုင်ငံတော်တည်ငြိမ်အေးချမ်းရေးကို ပျက်ပြားစေရန်နှင့် ပြည်သူလူထုကို အကြောက်တရားများဖြစ်ပေါ်စေပြီး အစိုးရယန္တရားများပျက်ပြားစေရန် ရည်ရွယ်လျက် နိုင်ငံ့ဝန်ထမ်းများအပါအဝင် အပြစ်မဲ့ပြည်သူများအား အဓိကပစ်မှတ်ထား၍ လုပ်ကြံသတ်ဖြတ်ခြင်း၊ အများပြည်သူပိုင် အဆောက်အအုံများအား မီးရှို့ခြင်း၊ ဖောက်ခွဲဖျက်ဆီးခြင်းစသည့် အကြမ်းဖက်လုပ်ငန်းများကို နည်းမျိုးစုံဖြင့် ပြုလုပ်လျက်ရှိသည်။

၂၀၂၅ ခုနှစ် မေ ၂၂ ရက် နံနက်ပိုင်းတွင် မရမ်းကုန်းမြို့နယ် (၅)ရပ်ကွက် ရွှေနှင်းဆီလမ်းနှင့် ဝိဇ္ဇာလမ်းထောင့်နေသံအမတ်ကြီး(ငြိမ်း) ဦးချိုထွန်းအောင်သည် နေအိမ်ရှေ့တွင် မြေးဖြစ်သူနှင့်အတူ လမ်းလျှောက်နေစဉ် (စိစစ်ဆဲ)ကျားနှစ်ဦးမှ သေနတ်ဖြင့် ပစ်ခတ်ခဲ့သောကြောင့် ဦးချိုထွန်းအောင် သေဆုံးခဲ့သည့်ဖြစ်စဉ် ဖြစ်ပွားခဲ့သည်။

ထိုသို့ အကြမ်းဖက်တိုက်ခိုက်မှုဖြစ်စဉ်များ ဖြစ်ပွားမှုမရှိစေရေးအတွက် လုံခြုံရေးတပ်ဖွဲ့ဝင်များက ပြစ်မှုကျူးလွန်သည့် တရားခံများရှာဖွေတွေ့ရှိရေး စုံစမ်းဖော်ထုတ်ခဲ့ရာ ပြည်သူလူထု၏ ပူးပေါင်းပါဝင် သတင်းပေးမှုကြောင့် ဖြစ်စဉ်ဖြစ်ပွားသည့်နေ့တွင် အကြမ်းဖက်အဖွဲ့များ အသုံးပြုခဲ့သည့် စက်ဘီးအား သုံးဘီးယာဉ်တစ်စီးပေါ်တွင် တင်ဆောင်သွားသည် ကိုတွေ့ရှိခဲ့ကြောင်း သိရှိရသဖြင့် စုံစမ်းဖော်ထုတ်ခဲ့ရာ မေ ၂၃ ရက်တွင် အကြမ်းဖက်သမားများ အသုံးပြုခဲ့သည့် သုံးဘီးယာဉ်မောင်းနှင်သူ စန်းထက်အောင်(ခ)ပဲခူးသား(၄၀)နှစ်အား မြောက်ဥက္ကလာပမြို့နယ်(ဌ)ရပ်ကွက် ခိုင်ရွှေဝါ(၃)လမ်း အမှတ်(၂၄၈)ရှိနေအိမ်၌ အကြမ်းဖက်တိုက်ခိုက်ရာတွင် အသုံးပြုခဲ့သည့် စက်ဘီးနှင့်အတူ ဖမ်းဆီးရမိခဲ့သည်။ ထို့အပြင် အကြမ်းဖက်လုပ်ငန်းများ လုပ်ဆောင်ရာတွင် ထောက်ပို့အဖြစ်ဆောင်ရွက်ခဲ့သည့် ဝင်းသူ(ခ)ကုလားလေး(၃၉)နှစ်အား မြောက်ဥက္ကလာပမြို့နယ်၊ (ဌ)ရပ်ကွက် စိန်ချယ်လမ်တိုက် အမှတ်(၂၃၃)ရှိ နေအိမ်၌ ထပ်မံဖမ်းဆီးရမိခဲ့သည်။ 

ဖမ်းဆီးရမိတရားခံများ၏ ထွက်ဆိုချက်အရ မေ ၂၅ ရက်တွင် ဦးချိုထွန်းအောင်အား လုပ်ကြံသတ်ဖြတ်ခဲ့ပြီး ထွက်ပြေးတိမ်းရှောင်နေသည့် တရားခံမျိုးကိုကို(ခ)စိုင်းကိုကို(ခ) ဇင်မင်းထက်(ခ)လင်းလက်ဇော်(၂၈)နှစ်၊ ၎င်း၏ဇနီးဖြစ်သူ ပြုံးပြုံး(၂၄)နှစ်၊ သမီးဖြစ်သူလင်းလက်ရွှေ (၆)နှစ်တို့အား ညောင်ဦးမြို့နယ် ပုဂံမြို့ဟောင်းတွင်လည်းကောင်း၊ ၎င်းတို့အား လိုက်ပါပို့ဆောင်ပေးခဲ့သည့် ယာဉ်မောင်း အောင်ဆန်းဟိန်း(၂၅)နှစ်နှင့် ချိတ်ဆက်ဆောင်ရွက်ပေးသူ ညီညီလှိုင်(၃၉)နှစ်တို့အား မွန်ပြည်နယ် မုဒုံမြို့တွင်လည်းကောင်း အသီးသီးဖမ်းဆီးရမိ ခဲ့သည်။

ဖမ်းဆီးရမိတရားခံ မျိုးကိုကို(ခ)စိုင်းကိုကို(ခ)ဇင်မင်းထက်(ခ)လင်းလက်ဇော်၏ ထွက်ဆို ချက်အရ ဦးချိုထွန်းအောင် လုပ်ကြံသတ်ဖြတ်ရာတွင်ပါဝင်ခဲ့သည့် ဖမ်းဆီးရန်ကျန်တရားခံ ချစ်ကိုကို(ခ)ကျော်ကြီး ၏ မိသားစုဝင်များသည် မြဝတီမြို့ဘက်သို့ ထွက်ပြေးတိမ်းရှောင်ရန် လုပ်ဆောင်နေကြောင်း သိရှိရသဖြင့် လုံခြုံရေးတပ်ဖွဲ့ဝင်များက ဝိုင်းဝန်းပိတ်ဆို့ဖမ်းဆီးခဲ့ရာ မေ ၂၆ ရက်တွင် ချစ်ကိုကို (ခ)ကျော်ကြီး၏ဇနီး မြင့်မြင့်ထွေး(၃၉)နှစ်၊ အောင်ကိုကိုချစ်(၁၈)နှစ်၊ ဇင်မောင်မောင်(ခ) အာနိုး(၂၇)နှစ်နှင့် ထွက်ပြေးတိမ်းရှောင်ရာတွင် ကူညီဆောင်ရွက်ပေးခဲ့သည့် ဖြိုးဝေအောင်(ခ) အရှည်ကြီး(၄၀)နှစ်တို့အား ပဲခူးမြို့ အဝင် စစ်ဆေးရေးဂိတ်၌ ဖမ်းဆီးရမိခဲ့သည်။

ဖမ်းဆီးရမိတရားခံများ၏ထွက်ဆိုချက်အရ မေ ၂၉ ရက်တွင် ဦးချိုထွန်းအောင်အား လုပ်ကြံသတ်ဖြတ်မှုအပါအဝင် ၎င်းတို့အကြမ်းဖက်အဖွဲ့ဆောင်ရွက်ခဲ့သော လုပ်ကြံသတ်ဖြတ်မှုများ၌ Scout ကြည့်ရှုပေးခဲ့သည့် တရားခံ မင်းစည်သူ(ခ)အငယ်လေး (၂၉)နှစ်နှင့် ကျော်ဇင်သန့်(ခ)လွင်ကြီး(ခ) ကျော်ဇင်(၃၃)နှစ်တို့အား ကြည့်မြင်တိုင်မြို့နယ် ဈေးကလေးရပ်ကွက် ဈေးကလေးလမ်း အမှတ်(၁၇၇)ရှိ နေအိမ်၌လည်း ကောင်း၊ တရားခံ ဟန်လင်းအောင် (၂၈)နှစ်၊ ကြည့်မြင်တိုင်မြို့နယ် သီတာရပ်ကွက် သိန္နိလမ်းအမှတ် (၃၂)နေသူအားလည်းကောင်း အသီးသီးထပ်မံ ဖမ်းဆီးရမိခဲ့သည်။

ထို့ပြင် ဖမ်းဆီးရမိတရားခံ မျိုးကိုကို(ခ)စိုင်းကိုကို(ခ)ဇင်မင်းထက်(ခ)လင်းလက်ဇော်၏ ထွက်ဆိုချက်အရ ၎င်းသည် ဦးချိုထွန်းအောင်အား လုပ်ကြံသတ်ဖြတ်စဉ် သေနတ်ကျည်ပေါက်ထွက်၍ ဘယ်ဘက်ခြေထောက် ဒဏ်ရာရရှိခဲ့ပြီး အဆိုပါဒဏ်ရာအား သာကေတမြို့နယ် ၄/တောင်ရပ်ကွက် မြင်တော်သာလမ်း အမှတ်(၅၂၄)ရှိ "လင်း" အထူးကုဆေးရုံ၌ လျှို့ဝှက်စွာ ဆေးကုသခဲ့ကြောင်း သိရှိရသဖြင့် မေ ၂၆ ရက် ညနေပိုင်းတွင် တရားမဝင်ဆေးကုသပေးခဲ့သော DCS ဆရာဝန် ဇော်ကိုကို(၃၈)နှစ်နှင့် DCS ဆရာဝန်များဖြင့် စုစည်းဖွင့်လှစ်ထားသည့် "လင်း" အထူးကုဆေးရုံပိုင်ရှင် ဒေါက်တာရဲလင်းစိုး(၃၆)နှစ်တို့အား ဖမ်းဆီးရမိခဲ့သည်။    

ဖြစ်စဉ်တွင် တရားခံ ကျား ၁၃ ဦး၊ မ ၃ ဦး၊ စုစု ပေါင်း ၁၆ ဦးတို့ကို လုပ်ကြံသတ်ဖြတ်ရာတွင် အသုံးပြုခဲ့သည့် သက်သေခံပစ္စည်းများနှင့်အတူ ဖမ်းဆီးရမိခဲ့ပြီး ဖမ်းဆီးရမိတရားခံများ၏ ထွက်ဆိုချက်အရ ၂၀၂၃ ခုနှစ် မတ်လတွင် Golden Valley Warrior အမည်ခံအကြမ်းဖက်အဖွဲ့အား ထိုင်းနိုင်ငံ ချင်းမိုင်မြို့၌ အကြမ်းဖက်အဖွဲ့အစည်းဖြစ်သော NUG မှ တရားခံပြေးရည်မွန်၏ စီစဉ်ထောက်ပံ့ပေးမှုဖြင့် ဖွဲ့စည်းခဲ့ခြင်းဖြစ်ကြောင်း၊ Golden Valley Warrior အမည်ခံအကြမ်းဖက်အဖွဲ့တွင် ဖမ်းဆီးရန်ကျန် တရားခံကိုထက် ခေါင်းဆောင်၍ အင်အားရှစ်ဦးရှိပြီး ရန်ကုန်မြို့၌ အကြမ်းဖက်ဖောက်ခွဲဖျက်ဆီးရေးလုပ်ငန်းများ လုပ်ဆောင်ရန်နှင့် ၎င်းတို့ မကျေနပ်သည့် အပြစ်မဲ့ပြည်သူများအား ဒလန်ဟုစွပ်စွဲကာ လုပ်ကြံသတ်ဖြတ်ရန် ရည်ရွယ်ဖွဲ့စည်းခဲ့ခြင်းဖြစ်ကြောင်း ဖော်ထုတ်သိရှိရသည်။

ဖမ်းဆီးရမိတရားခံများ၏ ထွက်ဆိုချက်အရ မေ ၁၅ ရက်တွင် Golden Valley Warrior အမည်ခံအကြမ်းဖက်အဖွဲ့ခေါင်းဆောင် ဖမ်းဆီးရန်ကျန် တရားခံကိုထက်သည် Telegram မှတစ်ဆင့် ဦးချိုထွန်းအောင်၏ ဓာတ်ပုံနှင့်နေအိမ်တည်နေရာ Google Map တို့အား ပေးပို့ခဲ့ပြီး လုပ်ကြံသတ်ဖြတ်ရန် စေခိုင်းခဲ့ကြောင်း၊ ဖမ်းဆီးရမိတရားခံများဖြစ်သည့် မျိုးကိုကို(ခ)စိုင်းကိုကို (ခ)ဇင်မင်းထက်(ခ)လင်းလက်ဇော်၊ မင်းစည်သူ(ခ)အငယ်လေး၊ ကျော်ဇင်သန့်(ခ)လွင်ကြီး(ခ) ကျော်ဇင်နှင့် ဖမ်းဆီးရန်ကျန် တရားခံချစ်ကိုကို(ခ)ကျော်ကြီးတို့သည် ဦးချိုထွန်းအောင်၏ နေအိမ်ဝန်းကျင်သို့ ခြောက်ကြိမ်သွားရောက်၍ အခြေအနေကြည့်ခဲ့ကြောင်း၊ မေ ၂၁ ရက်တွင် ဖမ်းဆီးရန်ကျန်တရားခံကိုထက်မှ မျိုးကိုကို(ခ)စိုင်းကိုကို(ခ)ဇင်မင်းထက်(ခ)လင်းလက်ဇော်ထံသို့ ပစ္စတို နှစ်လက်အားပေးပို့ခဲ့ကြောင်း ဖော်ထုတ်သိရှိရ သည်။

မေ ၂၂ ရက်တွင် မျိုးကိုကို (ခ) စိုင်းကိုကို(ခ)ဇင်မင်းထက်(ခ)လင်းလက်ဇော်နှင့် ဖမ်းဆီးရန်ကျန် တရားခံ ချစ်ကိုကို(ခ)ကျော်ကြီးတို့သည် ကိုထက်မှ ငှားရမ်းပေးထားသည့် ရွှေပေါက်ကံမြို့သစ် (၂၂)ရပ်ကွက် သပြေခြံမြို့ပတ်လမ်း အမှတ်(ရ/၁၀၃/၁၀၄)ရှိ Safe House မှ စက်ဘီးဖြင့်ထွက်ခွာခဲ့ကြောင်း၊ ဦးချိုထွန်းအောင်၏ နေအိမ်ရှေ့အရောက်တွင် လမ်းလျှောက်နေသော ဦးချိုထွန်းအောင်အား မျိုးကိုကို(ခ)စိုင်းကိုကို(ခ)ဇင်မင်းထက်(ခ)လင်းလက်ဇော်မှ အသင့်ယူဆောင်လာသည့် ပစ္စတိုဖြင့် လေးချက်ပစ်ခတ်လုပ်ကြံသတ်ဖြတ်ခဲ့ကြောင်း၊ ထိုသို့ပစ်ခတ်စဉ် ပစ္စတိုကျည်ညှပ်သဖြင့် ရှင်းလင်းစဉ် ကျည်ပေါက်ထွက်၍ ၎င်း၏ဘယ်ခြေထောက်ကို ထိမှန်ဒဏ်ရာ ရရှိခဲ့ကြောင်း၊ ယင်းနောက် စက်ဘီးဖြင့် ရွှေပေါက်ကံ မြို့သစ်ရှိ Safe House သို့ပြန်လာခဲ့ပြီး စက်ဘီးနှင့် လုပ်ကြံသတ်ဖြတ်စဉ် ဝတ်ဆင်ခဲ့သည့် အဝတ်အစားများအား စန်းထက်အောင်(ခ)ပဲခူးသားနှင့် ဝင်းသူ(ခ)ကုလားလေးတို့အား ဝှက်ထားခိုင်းခဲ့ကြောင်း ဖော်ထုတ်သိရှိရသည်။

ဖမ်းဆီးရမိတရားခံမျိုးကိုကို(ခ)စိုင်းကိုကို(ခ)ဇင်မင်းထက်(ခ)လင်းလက်ဇော်၏ ထွက်ဆိုချက်အရ ၎င်းသည် ရရှိခဲ့သည့်ဒဏ်ရာအား ဆေးကုသရန် အတွက် ဖမ်းဆီးရန်ကျန်တရားခံ အောင်သူမှ ကြိုတင်ချိတ်ဆက်ပေးထားသည့် "လင်း"အထူးကု ဆေးရုံရှိ DCS ဆရာဝန် ဇော်ကိုကိုထံသို့ သွားရောက်၍ လျှို့ဝှက်စွာဆေးကုသမှုခံယူခဲ့ကြောင်း၊ ထို့နောက် မိသားစုနှင့်အတူ ပခုက္ကူမြို့နယ်ဘက်၌ တိမ်းရှောင် ရန်သွားရောက်စဉ် ပုဂံမြို့ဟောင်း၌ ဖမ်းဆီးခံခဲ့ရခြင်း ဖြစ်ကြောင်း ဖော်ထုတ်သိရှိရသည်။

ဖမ်းဆီးရမိတရားခံများ၏ ထွက်ဆိုချက်အရ အကြမ်းဖက်အဖွဲ့အစည်းဖြစ်သော NUG မှ တရားခံ ပြေး ရည်မွန်၏စေခိုင်းမှုဖြင့် Golden Valley Warrior အမည်ခံအကြမ်းဖက်အဖွဲ့သည် နိုင်ငံတော်၏အုပ်ချုပ်မှုယန္တရားပျက်ပြားစေရန်နှင့် အပြစ်မဲ့ပြည်သူများ ထိတ်လန့်မှုဖြစ်စေရန်ရည်ရွယ်၍ အောက်ပါအတိုင်း လုပ်ကြံသတ်ဖြတ်မှု လေးကြိမ်ကျူးလွန်ခဲ့ကြောင်း ဖော်ထုတ်သိရှိရပါသည်-

(က)    ၂၀၂၃ ခုနှစ် မတ် ၂၄ ရက်တွင် မျိုးကိုကို(ခ)စိုင်းကိုကို(ခ)ဇင်မင်းထက် (ခ)လင်းလက် ဇော်သည် သန်လျင်မြို့နယ် အမှုထမ်း ရပ်ကွက်ဖွံ့ဖြိုးရေးလမ်းနေ ဥပဒေအတိုင်ပင်ခံ ဦးမင်းတေဇာညွန့်တင်အား ပစ္စတိုဖြင့် ပစ်ခတ်လုပ်ကြံသတ်ဖြတ်ခဲ့ပြီး ဖမ်းဆီး ရန်ကျန်တရားခံ ချစ်ကိုကို(ခ)ကျော်ကြီးတို့မှ အခြေအနေစောင့်ကြည့်ပေးခဲ့ကြောင်း။

( ခ )   ၂၀၂၃ ခုနှစ် ဩဂုတ် ၁၆ ရက်တွင် မျိုးကိုကို(ခ) စိုင်းကိုကို(ခ) ဇင်မင်းထက် (ခ) လင်းလက်ဇော်နှင့် ချစ်ကိုကို(ခ)ကျော်ကြီးတို့သည် ရွှေပြည်သာမြို့နယ် အမှတ်(၃)ရပ်ကွက် ပန်းခြံ(၄)လမ်း၌ လုံခြုံရေးတပ်ဖွဲ့ဝင်တစ်ဦးအား ပစ္စတိုဖြင့် ချောင်းမြောင်းပစ်ခတ်ခဲ့ပြီး ဟန်လင်းအောင်မှ အခြေအနေစောင့်ကြည့်ပေးခဲ့ကြောင်း။

( ဂ )   ၂၀၂၃ ခုနှစ် ဒီဇင်ဘာ ၁ ရက်တွင် မျိုးကိုကို(ခ) စိုင်းကိုကို(ခ) ဇင်မင်းထက် (ခ)လင်းလက်ဇော်သည် သင်္ဃန်းကျွန်းမြို့နယ် ငမိုးရိပ်ရပ်ကွက် ငမိုးရိပ်(၃)လမ်းနေ အမျိုးသားဒီမိုကရေစီပါတီသစ်ဥက္ကဋ္ဌ ဦးသန်းထွန်းအား ပစ္စတိုဖြင့် ပစ်ခတ်လုပ်ကြံသတ်ဖြတ်ခဲ့ပြီး မင်းစည်သူ(ခ)အငယ်လေးနှင့် ကျော်ဇင်သန့်(ခ) လွင်ကြီး (ခ)ကျော်ဇင်တို့မှ အခြေအနေစောင့်ကြည့် ပေးခဲ့ကြောင်း။

(ဃ)    ၂၀၂၄ ခုနှစ် အောက်တိုဘာ ၁၃ ရက်တွင် မျိုးကိုကို(ခ)စိုင်းကိုကို(ခ) ဇင်မင်းထက်(ခ)လင်းလက်ဇော်သည် လှိုင်သာယာ(အနောက်ပိုင်း)မြို့နယ် (၁၁)ရပ်ကွက် အောင်မင်္ဂလာကျောင်းအနီးတွင် မစဖအဖွဲ့ဝင်(၂)ဖြစ်သူ ဦးရွှေမန်းအား ပစ္စတိုဖြင့် လုပ်ကြံသတ်ဖြတ်ခဲ့ရာ ယာဉ်မောင်းဖြစ်သူဦးသန့်ဇင်တွင် ထိခိုက်ဒဏ်ရာရရှိခဲ့ပြီး ကျော်ဇင်သန့်(ခ)လွင်ကြီး(ခ)ကျော်ဇင်မှ အခြေအနေစောင့်ကြည့် ပေးခဲ့ကြောင်း။

ဖမ်းဆီးရမိတရားခံများ၏ ထွက်ဆိုချက်အရ Golden Valley Warrior အကြမ်းဖက်အဖွဲ့သည် ရန်ကုန်မြို့အတွင်း၌ အပြစ်မဲ့ပြည်သူများအား ဒလန်အဖြစ်စွပ်စွဲ၍ လုပ်ကြံသတ်ဖြတ်ခဲ့ကြောင်း၊ ထိုသို့လုပ်ကြံသတ်ဖြတ်ခြင်းများအတွက် အကြမ်းဖက်အဖွဲ့အစည်းဖြစ်သော NUG က တစ်ကြိမ်လျှင် နှစ်သိန်းကျပ် NUG Pay မှတစ်ဆင့်ပေးခဲ့ကြောင်း ဖော်ထုတ်သိရှိရသည်။

သို့ဖြစ်၍ ဖမ်းဆီးရမိတရားခံများအား ဥပဒေအရ ထိရောက်စွာအရေးယူနိုင်ရေး ဆက်လက်ဆောင် ရွက်သွားမည်ဖြစ်ပြီး အကြမ်းဖက်မှုဆောင်ရွက်နေသူများအား ပြည်သူတစ်ရပ်လုံးက ဝိုင်းဝန်းကာကွယ် တိုက်ဖျက်ကြရန်နှင့် ဆက်စပ်တရားခံများအား အမြန်ဆုံးဖမ်းဆီးရမိရေးအတွက် ၎င်းတို့ပုန်းခိုရာနေရာများ၊ လှုပ်ရှားသွားလာနေထိုင်မှု သတင်းများရရှိပါက သက်ဆိုင်ရာသို့ လျှို့ဝှက်စွာ သတင်းပေးတိုင်ကြားနိုင်ပါကြောင်း၊ သတင်းပေးသူနှင့် ဖမ်းဆီးပေးသူများအား ထိုက်တန်စွာ လျှို့ဝှက်၍ဆုငွေများချီးမြှင့်ပေးမည်ဖြစ်ကြောင်းနှင့် မြို့ရွာများအမြန်ဆုံး အေးချမ်းတည်ငြိမ်ရေးအတွက် ပြည်သူတစ်ရပ်လုံး ပူးပေါင်းပါဝင်ကြိုးပမ်းဆောင်ရွက်နိုင်ပါရန် မေတ္တာ ရပ်ခံအပ်ပါကြောင်း သက်ဆိုင်ရာက အသိပေး သတင်းထုတ်ပြန်ထားသည်။

MOI

Colorado ပြည်နယ် Boulder တွင် ဂျူးမုန်းတီးရေး တိုက်ခိုက်မှု ကျူးလွန်သည်ဟုစွပ်စွဲခံရသူ အီဂျစ်နိုင်ငံသား Mohamed Soliman (၄၅နှစ်) အား ဖက်ဒရယ်တရားရုံးသို့ သောကြာနေ့ (ဇွန် ၆) တွင် ရုံးထုတ် စစ်ဆေးမည်ဖြစ်ပြီး မီးခိုးဗုံးဖြင့်တိုက်ခိုက်မှုနှင့်စပ်လျဉ်း၍ လူသတ်ရန် ကြံစည်မှုစွဲချက်၂၈ ခုဖြင့် တရားစွဲဆိုခံထားရသည်။

၎င်းသည် Gaza ရှိ အစ္စရေးဓားစာခံများလွတ်မြောက်စေရေး ထောက်ခံ အားပေးသည့် ပွဲတစ်ခုတွင် Molotov မီးလောင်ဗုံးများဖြင့် လူအုပ်ကို တိုက်ခိုက်ခဲ့သည်ဟု စွပ်စွဲခံရသည်။ ယင်းတိုက်ခိုက်မှုသည် ဂျူးဘာသာဝင် များ၏ Shavuot ပွဲတော်မတိုင်မီညတွင်ဖြစ်ပွားခဲ့ပြီး ဝါရှင်တန်ဒီစီတွင် အစ္စရေးသံရုံးဝန်ထမ်း ၂ဦး ပစ်ခတ်သတ်ဖြတ်ခံရသည့် ဂျူးဆန့်ကျင်ရေး တိုက်ခိုက်မှုမှ ၂ ပတ်အတွင်းဖြစ်ပွားခဲ့ခြင်းဖြစ်သည်။

FBI နှင့် ပြည်တွင်းလုံခြုံရေးဌာနတို့က ကြာသပတေးနေ့ ထုတ်ပြန်ချက် တွင် “အစ္စရေးနှင့်ဂျူးလူမျိုးများအား ဆက်လက်ခြိမ်းခြောက်နေသည့် အန္တရာယ်များနှင့်ပတ်သက်၍ ပြည်သူ့လုံခြုံရေးအတွက် စိုးရိမ်ဖွယ်ရာ များရှိနေကြောင်း” သတိပေးခဲ့သည်။

တရားရုံးအထောက်အထားများအရ Soliman အား Boulder တိုက်ခိုက်မှု နှင့်ဆက်စပ်သည့် ဖက်ဒရယ်မုန်းတီးရေးရာဇဝတ်မှုဖြင့် တရားစွဲထားပြီး အပြစ်ရှိကြောင်းထင်ရှားပါက ထောင်ဒဏ်တစ်သက်တစ်ကျွန်း ချမှတ် နိုင်ကြောင်း Colorado ခရိုင် ယာယီအမေရိကန်ရှေ့နေ J. Bishop Grewell က တနင်္လာနေ့ (ဇွန် ၂) က ပြောကြားခဲ့သည်။

ကိုးကား- CNN

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

နှစ်နိုင်ငံနယ်စပ်တွင် အပစ်အခတ်လေ့ကျင့်မှုပြုလုပ်မှုအပေါ် ရုရှားနိုင်ငံက ဂျပန် နိုင်ငံအား ကန့်ကွက်ခဲ့ကြောင်းသိရသည်။

ဂျပန်နိုင်ငံသည် ဟော့ကိုင်းဒိုးကျွန်းပေါ်ရှိ ရုရှားနိုင်ငံ၏ နယ်စပ်အနီး ပင်လယ်ပြင် အတွင်း ပစ်ခတ်မှုလေ့ကျင့်ခဲ့မှုကို ရုရှားနိုင်ငံခြားရေးဝန်ကြီးဌာနက ကန့်ကွက်ခဲ့ခြင်း ဖြစ်ကြောင်း ဝန်ကြီးဌာန၏ပြန်ကြားရေးအဖွဲ့က ဇွန်လ ၄ ရက်တွင် ထုတ်ပြန်သည်။ 
ရုရှားနိုင်ငံနယ်စပ်အနီးတွင် ထိုသို့လုပ်ဆောင်ခြင်းသည် မဆင်မခြင်လုပ်ဆောင်ရာ ရောက်ပြီး နိုင်ငံတကာဥပဒေကို ချိုးဖောက်ခြင်းဖြစ်ကြောင်း၊ ယင်းသို့ပစ်ခတ်မှု လေ့ကျင့်ခြင်းသည် အရပ်ဘက်ရေကြောင်းသွားလာမှုအပေါ်အန္တရာယ်ကျရောက်စေ နိုင်ကြောင်း၊ ထိုသို့လုပ်ဆောင်ခြင်းကို လက်သင့်မခံနိုင်ကြောင်း ရုရှားနိုင်ငံခြားရေးဝန်ကြီး ဌာနက ထုတ်ပြန်သည့် ကြေညာချက်တွင် ဖော်ပြထားသည်။

Ref: Ivz

လက်နက်ကိုင်အစွန်းရောက် အကြမ်းဖက်သမားများအနေဖြင့် တိုင်းဒေသကြီးနှင့် ပြည်နယ်များရှိ မြို့နယ်အချို့တွင် အပြစ်မဲ့ အရပ်သားပြည်သူများအား ပြည်သူလူထုအတွင်း အကြောက်တရားများ လွှမ်းမိုးစေရန်လည်းကောင်း၊ ၎င်းတို့နှင့်အမြင်အယူအဆမတူသူ အပြစ်မဲ့ အရပ်သားပြည်သူများအား “သူလျှို၊ ဒလန်၊ သတင်းပေး” ဟုစွပ်စွဲ၍လည်းကောင်း၊ “ငါနှင့်မတူ၊ ငါ့ရန်သူ” ဟူသည့် တစ်ဖက်သတ်အစွန်းရောက် ဂိုဏ်းဂဏစွဲအပေါ် အခြေခံကာ ဓား၊ သေနတ်များ အသုံးပြု၍ ရက်စက်စွာ လုပ်ကြံတိုက်ခိုက်၊ သတ်ဖြတ်ခြင်းများ ပြုလုပ်လျက်ရှိသည်။
ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇွန် ၂ ရက် မွန်းလွဲ ၃ နာရီ ၃၀ မိနစ်တွင် မကွေးတိုင်းဒေသကြီး၊ ပေါက်မြို့နယ်၊ ကုက္ကိုလ်စုကျေးရွာရှိ ကျေးရွာနေပြည်သူများက ကျေးရွာမြောက်ဘက် မီတာ ၄၀၀ ခန့်အကွာရှိ ယာခင်းအတွင်း စိုက်ပျိုးရေးလုပ်ငန်းများ လုပ်ကိုင်နေစဉ် PDF အမည်ခံ အကြမ်းဖက်သမား ၃၀ ဦးခန့်(စိစစ်ဆဲ)က လက်နက်ငယ်များဖြင့် လာရောက်ပစ်ခတ်တိုက်ခိုက်ခဲ့သဖြင့် လုံခြုံရေးဆောင်ရွက်ပေးနေသည့် ကျေးရွာပြည်သူ့စစ်အဖွဲ့ဝင်များက ပြန်လည်ခုခံပစ်ခတ်ခဲ့ရာ အကြမ်းဖက်အဖွဲ့များသည် ကျေးရွာအနောက်တောင်ဘက် နှစ်မိုင်ခန့်အကွာရှိ လယ်ဘဲ့(တောင်)ကျေးရွာသို့ ဆုတ်ခွာထွက်ပြေးသွားခဲ့ပြီး ထိတွေ့ပစ်ခတ်မှုဖြစ်စဉ်အတွင်း ကျေးရွာပြည်သူ့စစ်အဖွဲ့ဝင် ဦးအောင်ကြိုင်(၄၃)နှစ်နှင့် ကျေးရွာနေပြည်သူများဖြစ်ကြသည့် မောင်စိုင်း(၁၄)နှစ်တို့ နှစ်ဦးတွင် ကျည်ထိမှန်ဒဏ်ရာများရရှိကာ သေဆုံးသွားခဲ့ပြီး ဦးချိန်အို(၅၂)နှစ်တွင် ကျည်ထိမှန်ဒဏ်ရာများ ရရှိခဲ့သဖြင့် အဆိုပါကျေးရွာ၌ ဆေးကုသမှုများ ဆောင်ရွက်ပေးလျက်ရှိကြောင်း သိရသည်။
ထိုသို့ အပြစ်မဲ့ အရပ်သားပြည်သူများအား “ငါနှင့်မတူ၊ ငါ့ရန်သူ” ဟူသည့် တစ်ဖက်သတ်အစွန်းရောက် ဂိုဏ်းဂဏစွဲအပေါ် အခြေခံကာ ပစ်ခတ်သတ်ဖြတ်မှု ကျူးလွန်ခဲ့သူများအား ဖော်ထုတ်ဖမ်းဆီး၍ ဥပဒေနှင့်အညီ အရေးယူနိုင်ရေး လုံခြုံရေးတပ်ဖွဲ့ဝင်များက ဆက်လက်ဆောင်ရွက်လျက်ရှိကြောင်း သတင်းရရှိပါသည်။

MOHA