စင်ကာပူရှိ ဝက်သားစွပ်ပြုတ်ဆိုင်တစ်ဆိုင်၏ ပိုင်ရှင်က ချောင်ယွန်ဖတ် လာရောက် စားသောက်သည့်အတွက် ၎င်း၏မိသားစုသည် ဆုံးရှုံးမှုများမှ လွတ်မြောက်ခဲ့သည်ဟု ဆိုပါသည်။ Zaobao သတင်းစာ၏ ဖော်ပြချက် အရ ဟောင်ကောင်သရုပ်ဆောင် ချောင်ယွန်ဖတ်သည် ၂၀၂၅ ခုနှစ် ဇူလိုင် ၆ ရက်နေ့တွင် စင်ကာပူ၌ကျင်းပမည့် Star Awards 2025 ကို တက်ရောက်ရန် ရောက်ရှိလာခဲ့ပြီး အဆိုပါခရီးစဉ်အတွင်း ၎င်းနှင့်၎င်း၏ ဇနီးတို့သည် South Bridge Road ရှိ ဝက်သားစွပ်ပြုတ်ဆိုင်တစ်ဆိုင်ကို သွားရောက်စားသောက်ခဲ့သည်။ ဆိုင်ပိုင်ရှင် Thai Thuy Thuy က ချောင်ယွန်ဖတ်ကို ၎င်းတို့မိသားစု၏ ကျေးဇူးရှင်အဖြစ် မှတ်ယူထား ပါသည်။

Thai Thuy Thuy ၏ ဖခင်သည် ပထမဆုံး ဝက်သားစွပ်ပြုတ်ဆိုင်ကို ဖွင့်လှစ်ခဲ့သော်လည်း အစပိုင်းတွင် ရောင်းအားမကောင်းဘဲ တစ်နေ့လျှင် အနည်းငယ်သာ ရောင်းချနိုင်ခဲ့သည်။ ချောင်ယွန်ဖတ်သည် ယခင်က သူမ၏ ဖခင်ဆိုင်တွင် လာရောက်စားသောက်လေ့ရှိပြီး နောက်ပိုင်းတွင် ဒါရိုက်တာ အန်းလီကိုပါ ထိုဆိုင်သို့ လာရောက်စားသောက်ရန် ဖိတ်ခေါ် ခဲ့သည်။ ထို့အပြင် ၎င်း၏မိတ်ဆွေအချို့ စင်ကာပူသို့ လာရောက်သည့် အခါတိုင်း အဆိုပါဆိုင်ကို မိတ်ဆက်ပေးလေ့ရှိခဲ့သည်။

ချောင်ယွန်ဖတ်က Thai Thuy Thuy ကို သူမ၏ဖခင် အခြေအနေနှင့် ဆိုင်လုပ်ငန်းတိုးတက်မှု အခြေအနေများကို မေးမြန်းခဲ့သည်။ သူမတို့ မိသားစုသည် ဆိုင်အသစ်ဖွင့်လှစ်နိုင်သည့်အပြင် ဘိုးဘွားများ၏ ချက်ပြုတ် နည်းလျှို့ဝှက်ချက်များကို ဆက်ခံနိုင်ခြင်းကြောင့် တိုးပွားလာခဲ့သဖြင့် ချောင်ယွန်ဖတ်က သူမတို့မိသားစုအတွက် အထူးဝမ်းမြောက် ဝမ်းသာ ဖြစ်ခဲ့သည်။

ဇူလိုင် ၃ ရက်နေ့က ချောင်ယွန်ဖတ်နှင့် ဇနီး လာရောက် စားသောက် ပြီးနောက် သူမတို့မိသားစု၏ ဆိုင်သုံးဆိုင်စလုံးတွင် ပုံမှန်ရက်များထက် ဖောက်သည်အရေအတွက် ၃၀% ကျော် တိုးတက်လာခဲ့သည်ဟု ဆိုသည်။

ယခုနှစ်တွင် အသက် ၇၀ ရှိပြီဖြစ်သည့် ချောင်ယွန်ဖတ်သည် သရုပ်ဆောင်မှု ကို လျှော့ချလိုက်ကာ အားကစားပြုလုပ်ခြင်း၊ ဓာတ်ပုံရိုက်ကူးခြင်းနှင့် ရေငုပ်ခြင်းတို့တွင် အချိန်ကုန်ဆုံးနေစေပြီး ခြေဖဝါးနှိပ်နယ်ကုထုံး၊ နှိပ်နယ် ကုသနည်းနှင့် အားကစားပြုလုပ်စဉ် ထိခိုက်ဒဏ်ရာရမှု ပြုစုနည်းများကို လေ့လာနေကြောင်း သိရှိရပါသည်။

၎င်း၏ နှစ် ၅၀ ကြာ အနုပညာလမ်းကြောင်းတွင် The Net ၊ Shanghai Bund ၊ The Yang Famil ၊ The Legend of Fuyao ၊ Crouching Tiger, Hidden Drago နှင့် God of Gamblers တို့ကဲ့သို့သော ဇာတ်လမ်းများ တွင် အောင်မြင်မှုများ ရရှိခဲ့ပါသည်။ ယခုနှစ် ဖေဖော်ဝါရီတွင် ချောင်ယွန်ဖတ် သည် Detective Chinatown 1900 ဇာတ်ကားကို အမေရိကန်တွင် ရုံတင်ခဲ့ပြီး ဤသည်မှာ ၎င်း၏ လွန်ခဲ့သော ၅ နှစ်အတွင်း ပါဝင်ခဲ့သည့် ရှားရှားပါးပါး ရုပ်ရှင်ဇာတ်ကားတစ်ကားပင် ဖြစ်ပါသည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ထိုင်းနိုင်ငံက ကမ္ဘောဒီးယားသို့ ရှေးဟောင်းပစ္စည်း ၂၀ ပြန်လည် ပေးအပ်ရေးကို ဘဏ္ဍာရေးအခက်အခဲကြောင့် ရွှေ့ဆိုင်းလိုက်ကြောင်း ကြေညာခဲ့ပြီး ဖနွမ်းပင်အစိုးရက ပြန်လည်ပို့ဆောင်ရန် ကုန်ကျစရိတ်ကို ကျခံမည် ဖြစ်ကြောင်း တုံ့ပြန်ကြေညာခဲ့သည်။ 

ထိုင်းယဉ်ကျေးမှုဝန်ကြီး ပေထုန်တန် ရှင်နာဝပ်ထရာက မကြာသေးမီက ဝန်ကြီးချုပ်ရာထူးမှ ယာယီရပ်ဆိုင်းခံခဲ့ရပြီးနောက် ဘဏ္ဍာရေးအခက်အခဲကို အကြောင်းပြကာ ထိုင်းမှ ကမ္ဘောဒီးယားသို့ ရှေးဟောင်းပစ္စည်း ၂၀ ပြန်လည်ပေးအပ်ရေးလုပ်ငန်းစဉ်ကို ရွှေ့ဆိုင်းလိုက်ကြောင်း လွန်ခဲ့သည့် သီတင်းပတ်က ကြေညာခဲ့သည်။

“ရှေးဟောင်းပစ္စည်းများ ပြန်လည်ပေးအပ်ရေးသည် အရေးတကြီးကိစ္စ မဟုတ်ဘဲ အစိုးရဗဟိုဘတ်ဂျက်မှ ရန်ပုံငွေမရရှိသေးပါ” ဟု ပေထုန်တန် က ပြောကြားခဲ့သည်။

ထိုင်းနှင့် ကမ္ဘောဒီးယားအကြား ဆက်ဆံရေးတင်းမာမှုများ ရှိနေချိန်တွင် ယဉ်ကျေးမှုဝန်ကြီးအဖြစ် တာဝန်ယူပြီးနောက် ပေထုန်တန်၏ ပထမဆုံး ဆုံးဖြတ်ချက်ဖြစ်သည်။ “နှစ်နိုင်ငံဆက်ဆံရေး အခြေအနေကို ထည့်သွင်း စဉ်းစားကာ ယဉ်ကျေးမှုဝန်ကြီးဌာနက ရှေးဟောင်းပစ္စည်းများ လွှဲပြောင်း ပေးအပ်ရေး လုပ်ငန်းစဉ်ကို ပြန်လည်သုံးသပ်ရန် အကြံပြုထားပါသည်” ဟု ၎င်းက ဆိုသည်။

ကမ္ဘောဒီးယားယဉ်ကျေးမှုဝန်ကြီး Phoerng Sackona က ဇူလိုင် ၇ ရက်နေ့တွင် ပေထုန်တန်ထံသို့ စာတစ်စောင် ပေးပို့ခဲ့ပြီး ဖနွမ်းပင် အစိုးရ အနေဖြင့် ရှေးဟောင်းပစ္စည်း ၂၀ ကို ကမ္ဘောဒီးယားသို့ ပြန်လည် ပို့ဆောင်ရန် ကုန်ကျစရိတ်ကို ကျခံမည် ဖြစ်ကြောင်း ကြေညာခဲ့သည်။ ထို့အပြင် ၎င်းက ဧပြီလတွင် နှစ်နိုင်ငံသဘောတူညီခဲ့သည့် စာချုပ်ပါ အချိန်ကာလများကို ထိုင်းနိုင်ငံအနေဖြင့် လေးစားလိုက်နာရန် တိုက်တွန်း ခဲ့သည်။

စာချုပ်အရ နှစ်နိုင်ငံသည် ရှေးဟောင်းပစ္စည်း ၂၀ ကို ဇူလိုင်လတွင် ဘန်ကောက်မြို့၌ လွှဲပြောင်းပေးအပ်သည့် အခမ်းအနားကျင်းပရန်စီစဉ်ထားပြီး ဩဂုတ်လတွင် ပို့ဆောင်ရေးလုပ်ငန်းစဉ် စတင်မည် ဖြစ်သည်။ သို့သော် ယခုအခါ အဆိုပါလွှဲပြောင်းပေးအပ်မှု အခမ်းအနား ကို အချိန်မသတ်မှတ်ဘဲ ရွှေ့ဆိုင်းလိုက်ပြီ ဖြစ်သည်။

အဆိုပါရှေးဟောင်းပစ္စည်း ၂၀ သည် ၁၉၉၉ ခုနှစ်က ထိုင်းသို့ တရားမဝင် ခိုးယူခံခဲ့ရသည့် ကမ္ဘောဒီးယား၏ ခမာရှေးဟောင်းပစ္စည်း ၄၃ ခုအနက် ကျန်ရှိနေသေးသည့် အပိုင်းဖြစ်သည်။ ၂၀၀၈ နှင့် ၂၀၁၅ ခုနှစ်များတွင် ရှေးဟောင်းပစ္စည်း ၂၃ ခုကို ကမ္ဘောဒီးယားသို့ ပြန်လည်ပေးအပ်ခဲ့ပြီး ဖြစ်သည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဂျာမနီနိုင်ငံရှိ Schwedt မြို့အာဏာပိုင်များသည် ရုရှားရေနံပိတ်ဆို့မှု များကို ရုတ်သိမ်းပေးရန် တောင်းဆိုလျက်ရှိကြောင်း Politico သတင်း ဌာနက သောကြာနေ့ (ဇူလိုင် ၆) တွင် ထုတ်ပြန်ခဲ့သည်။ ဒေသခံ အာဏာပိုင်များ၏ ပြောကြားချက်အရ ရုရှားရေနံဖြန့်ဝေမှုအပေါ် မှီခို နေရသော ဒေသခံရေနံချက်စက်ရုံတွင် ပြဿနာများ တိုးပွားလာလျက် ရှိသည်ဟု ဆိုသည်။

အဆိုပါသတင်းတွင် ဂျာမနီ၏ စတုတ္ထအကြီးဆုံး ရေနံချက်စက်ရုံ ဖြစ်သော Schwedt PCK အကြောင်း အဓိကထားဖော်ပြထားသည်။ ယင်းစက်ရုံ၏ အဓိကပိုင်ရှင်မှာ ရုရှား Rosneft ကုမ္ပဏီဖြစ်ပြီး ဘာလင် တွင်အသုံးပြုလျက်ရှိသော ရေနံ၏ ၉၀% ကျော်ကို ထောက်ပံ့ပေးနေသည်။ ၂၀၂၂ ခုနှစ်တွင် EU ၏ ပိတ်ဆို့မှုများကြောင့် ရုရှားက ပိုလန်နှင့် ဂျာမနီသို့ ပိုက်လိုင်းဖြင့် ရေနံပို့ဆောင်မှုကို ရပ်ဆိုင်းခဲ့ပြီးနောက် ယင်းစက်ရုံသည် ရုရှားရေနံအရင်းအမြစ်များကို ဆုံးရှုံးခဲ့ရသည်။

စက်ရုံလုပ်ငန်းကောင်စီဥက္ကဋ္ဌ Danny Ruthenberg က အခြားရေနံ ထောက်ပံ့မှုများသို့ ပြောင်းလဲအသုံးပြုသော်လည်း စက်ရုံသည် အပြည့်အဝ လည်ပတ်မှုစွမ်းရည်သို့ မပြန်ရောက်ရှိသေးဘဲ လက်ရှိတွင် ၈၀% သာ လည်ပတ်နေကြောင်း ပြောကြားခဲ့သည်။ ၎င်းသည် စက်ရုံ၏ လည်ပတ် စရိတ်များ ပုံသေကုန်ကျနေပြီး ယခုအခြေအနေတွင်ဆက်ရှိနေပါက အလုပ်သမားများအား အလုပ်မှထုတ်ပယ်ရန် မလွှဲမရှောင်သာ ဆောင်ရွက် ရမည်ဖြစ်ကြောင်း သတိပေးခဲ့သည်။

Schwedt မြို့တော်ဝန် Annekathrin Hoppe က Politico သို့ ပြောကြား ရာတွင် အဆိုပါရေနံချက်စက်ရုံ၏ ပြဿနာများသည် မြို့တစ်ခုလုံးကို ခြိမ်းခြောက်နေကြောင်း၊ Schwedt မြို့နေ လူဦးရေ ၃၀,၀၀၀ ၏ ၂၀% ခန့်သည် ယင်းစက်ရုံပေါ်တွင် အသက်မွေးဝမ်းကျောင်းမှုအတွက် မှီခို နေရကြောင်း ဖော်ပြခဲ့သည်။

ပိတ်ဆို့မှုများနှင့် ၂၀၂၄ ဇန်နဝါရီတွင် ယူကရိန်းက အဓိက ဓာတ်ငွေ့ ဖလှယ်ရေးသဘောတူညီချက်ကို သက်တမ်းမတိုးခြင်းကြောင့် ရုရှား၏ EU သို့စွမ်းအင်တင်ပို့မှုမှာ သိသိသာသာကျဆင်းခဲ့သည်။ ဘရပ်ဆဲလ် သည် ၂၀၂၈ မတိုင်မီ ရုရှားစွမ်းအင်တင်သွင်းမှုလုံးဝရပ်စဲရန် ဖိအားပေး လျက်ရှိသော်လည်း ဆလိုဗက်ကီးယားနှင့် ဟန်ဂေရီကဲ့သို့နိုင်ငံများက ကန့်ကွက်နေသည်။

အထူးသဖြင့် ယခုနှစ်အစောပိုင်းက မော်စကိုနှင့် ကိယက်ဗ်တို့ ငြိမ်းချမ်းရေးညှိနှိုင်းမှုပြန်စချိန်မှစ၍ EU အတွင်းရှိ ကျွမ်းကျင်သူများနှင့် အတိုက်အခံပါတီများက ရုရှားမှ စွမ်းအင်ပြန်လည်ဝယ်ယူရန် တောင်းဆို လျက်ရှိသည်။

ဘရပ်ဆဲလ်ရှိ အရင်းအမြစ်များက Politico သို့ ထုတ်ဖော် ပြောကြားချက် အရ ဂျာမနီက ရုရှားစွမ်းအင်ဆိုင်ရာ မူဝါဒကို ပြန်လည်ပြင်ဆင်ပါက အီတလီ၊ ဩစတြီးယား၊ ဘူဂေးရီးယားနှင့် ချက်သမ္မတ နိုင်ငံတို့ ကဲ့သို့သော အခြား EU နိုင်ငံများလည်း လိုက်လံဆောင်ရွက်နိုင်သည်ဟု သိရသည်။

မော်စကိုမှ အနောက်နိုင်ငံများ၏ ပိတ်ဆို့မှုများကို တရားမဝင်ဘဲ ကိုယ်တိုင် အရှုံးပေးရာရောက်သည်ဟု ထပ်ခါတလဲလဲ ရှုတ်ချခဲ့ပြီး အထူးသဖြင့် ၂၀၂၂ ခုနှစ်က ရုရှားအပေါ် ပထမဆုံးချမှတ်ခဲ့သော စွမ်းအင်ဆိုင်ရာ ပိတ်ဆို့မှု များ နောက်ပိုင်း EU တွင် စျေးနှုန်းများ ခုန်တက်မှုကို ညွှန်ပြခဲ့သည်။ ရုရှားအရာရှိများက EU ၏ ထောက်ပံ့မှုငြင်းပယ်ခြင်းသည် ပိုမိုစျေး ကြီးသော အခြားရွေးချယ်စရာများကို အားကိုးရမည် သို့မဟုတ် ကြားခံ များမှတစ်ဆင့် ရုရှားထုတ်ကုန်များကို သွယ်ဝိုက်တင်သွင်းရမည် ဖြစ်ကြောင်း သတိပေးခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဂျပန်နိုင်ငံက ဖိလစ်ပိုင်သို့ တစ်ပတ်ရစ် ဖျက်သင်္ဘောများကို တင်ပို့ပေးသွားမည် ဖြစ်ကြောင်း Yomiuri သတင်းစာက ဇူလိုင် လ ၆ ရက်တွင်ဖော်ပြထားသည်။ အဆိုပါ တင်ပို့မှုအစီအစဉ်တွင် ဂျပန်ရေကြောင်း ကိုယ့်ကိုယ်ကိုယ် ကာကွယ်ရေးတပ်ဖွဲ့က   ဆယ်စုနှစ်သုံးခုကြာ အသုံးပြုထားသည့် Abukuma အတန်းအစား ဖျက်သင်္ဘော ခြောက်စင်းပါဝင်ကြောင်း အမည်မဖော်လိုသူ အစိုးရအရင်းအမြစ်များ၏ ပြောဆိုချက်ကိုကိုးကား၍ သတင်းစာက ဖော်ပြ ထားသည်။

ဂျပန်ကာကွယ်ရေးဝန်ကြီး ဗိုလ်ချုပ်ကြီး နာကာတာနီနှင့် ဖိလစ်ပိုင်ကာကွယ်ရေးဝန်ကြီး ဂီဘာတိုတီယိုဒိုရိုတို့က ပြီးခဲ့သည့်လတွင် စင်ကာပူနိုင်ငံ၌တွေ့ဆုံစဉ် အဆို ပါဖျက်သင်္ဘောများတင်ပို့ရန် သဘောတူခဲ့ခြင်းဖြစ်သည်။

အဆိုပါသဘောတူညီချက်အရ နောက်ဆုံးပြင်ဆင်မှုတစ်ခုအဖြစ် တင်ပို့မည့်ဖျက် သင်္ဘောများကို ဖိလစ်ပိုင်တပ်မတော်က စစ်ဆေးမှုများ လုပ်ဆောင်သွားမည်ဖြစ်ကြောင်း Yomiuri သတင်းစာက ဆက်လက်ဖော်ပြထားသည်။ ထိုနှစ်နိုင်ငံကြား ကာကွယ်ရေးပူးပေါင်း ဆောင်ရွက်မှုတွင် ပူးတွဲစစ်ရေး လေ့ကျင့်မှုများ လုပ်ဆောင်ရန်လည်း ပါဝင်သည်။

MWD Web Portal

ဆွစ်ဇာလန်နိုင်ငံ ၊ ဘာဆယ် (Basel) နှင့် ဘန်းမြို့ (Bern) ရှိ လူများစွာတို့သည် အလုပ်ချိန်ပြီးနောက် အိမ်ပြန်ရန် အများသုံးသယ်ယူပို့ဆောင်ရေးယာဉ်များကို အသုံးမပြုဘဲ ရိုင်းမြစ် (Rhine) နှင့် အာရီမြစ် (Aare) တို့တွင် စီးမျှောလျက် ပြန်လေ့ရှိကြသည်။

ခရီးစတင်ရန် ၎င်းတို့သည် အဝတ်အစား၊ ဖုန်းနှင့် ပိုက်ဆံအိတ်တို့ကို ရေမစိမ့်သော အိတ်ထဲတွင်သေချာစွာထည့်ကာ ရေကူးဝတ်စုံလဲ၍ မြစ်ထဲသို့ ခုန်ချလိုက်ကြသည်။ ထို့နောက် ရေစီးကြောင်းက ၎င်းတို့ကို သယ်ဆောင်သွား စေသည်။

ဒေသခံ အီဗလင်း ရှနိုက်ဒါ-ရေယက်စ် (Evelyn Schneider-Reyes) က အဆိုပါ နည်းလမ်းသည် အချိန်ကုန်သက်သာသည်ဟု ဆိုသည်။ “ကျွန်မရုံးမှ မြစ်ထဲ ခုန်ချဖို့ ၃၀ စက္ကန့်သာ လမ်းလျှောက်ရပြီး အိမ်ပြန်ရန် ၁၅ မိနစ်ခန့် မျှောရုံဖြင့် ရောက်ပါတယ် ၊ လမ်းပိတ်ပြီး အချိန်ကြာမြင့်စွာ စောင့်စရာမလိုပါ” ဟု သူမက ရှင်းပြခဲ့သည်။

အာရီမြစ် (Aare River) သည် ရိုင်းမြစ် (Rhine) ၏ အဓိက မြစ်လက်တက်ဖြစ်ပြီး အရှည် ၂၉၂ ကီလိုမီတာ ရှိသည့် ဆွစ်ဇာလန်နိုင်ငံ၏ အရှည်ဆုံးမြစ် လည်း ဖြစ်သည်။

အဆိုပါမြို့နှစ်မြို့တွင် နေထိုင်သူများအတွက် ထိုရှည်လျားပြီး အေးချမ်းသော ခရီးသည် ညနေပိုင်းယာဉ်ကြောပိတ်ဆို့ရှုပ်ထွေးမှုကို ရှောင်ရှားရန် နည်းလမ်းတစ်ခုသာမက စိတ်ဖိစီးမှုလျှော့ချရန် ထိရောက်သော ကုထုံးတစ်ခုလည်းဖြစ်သည်။ အေးမြကြည်လင်နေသော စိမ်းပြာရောင်ရေပြင်ပေါ်တွင် စီးမျှောလျက် မြို့၏မြင်ကွင်းများနှင့် သမိုင်းဝင်အဆောက်အအုံများကို ကြည့်ရှုကာ တနေကုန် အလုပ်လုပ်ပြီးနောက် စိတ်ဖိစီးမှုများကို ဖြေလျှော့နိုင်ကြသည်။

အဆိုပါ မြစ်တွင်း စီးမျှောခြင်းခရီးစဉ်သည် နွေရာသီတွင် စတင်ပြီး၊ လူကြီး၊ ကလေးများမှ ခရီးသွားဧည့်သည်များအထိ အသက်အရွယ်စုံလင်စွာကို ဆွဲဆောင် လျက်ရှိသည်။

မြစ်အတွင်းသို့ ဝင်ရောက်ရန် အလွန်လွယ်ကူပြီး အတက်အဆင်း လှေကား ပါသော ဝင်ပေါက်နှင့် ထွက်ပေါက်များကို ရွေးချယ်နိုင်ကာ ထိုနေရာများကို အနီရောင်တိုင်များဖြင့် အမှတ်အသားပြုထားသည်။ မြစ်ကမ်းတစ်လျှောက်တွင်အစိုးရမှ အဝတ်လဲခန်း၊ ရေချိုးခန်းနှင့် အများသုံးအိမ်သာများ ပါဝင်သည့် အသေးစားအဆောက်အအုံများကိုလည်း စီစဉ်ထားရှိသည်။

သို့သော် ရိုင်းမြစ်နှင့် အာရီမြစ်ကဲ့သို့ အဓိကမြစ်ကြီးတွေမှာ ရေကူးခြင်းသည် ပြင်းထန်သည့် ရေစီးကြောင်းများကြောင့် အန္တရာယ်များပြီး ဒေသခံ အာဏာပိုင် များက လုံခြုံရေးစည်းမျဉ်းများကို လိုက်နာရန် အကြိမ်ကြိမ် သတိပေးလျက် ရှိပါသည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

BRICS ၏ ၁၇ ကြိမ်မြောက် နှစ်စဉ်ထိပ်သီးအစည်းအဝေးကို လက်ရှိ အလှည့်ကျ ဥက္ကဋ္ဌနိုင်ငံဖြစ်သော ဘရာဇီးနိုင်ငံ၊ ရီယိုဒီဂျနေးရိုးမြို့တွင် စတင်ဖွင့်လှစ်ခဲ့သည်။ နှစ်ရက်ကြာ ကျင်းပမည့် အဆိုပါဆွေးနွေးပွဲတွင် ကမ္ဘာ့ဖွံ့ဖြိုးရေးနှင့်အုပ်ချုပ်ရေး၊ အပြည်ပြည်ဆိုင်ရာမူဝါဒများနှင့် ဘက်ပေါင်းစုံ ပူးပေါင်းဆောင်ရွက်မှုများကို ဆွေးနွေးသွားမည်ဖြစ်သည်။

တရားဝင်တက်ရောက်သူစာရင်းကို ထုတ်ပြန်ခြင်းမရှိသေးသော်လည်း ဘရာဇီးအရာရှိများက အဖွဲ့ဝင်နိုင်ငံများ၊ မိတ်ဖက်နိုင်ငံများနှင့် အပြည်ပြည် ဆိုင်ရာအဖွဲ့အစည်းများမှ အဆင့်မြင့်ကိုယ်စားလှယ်များအပါအဝင် နိုင်ငံ ၃၇ နိုင်ငံမှ လူ ၄,၀၀၀ ကျော် တက်ရောက်မည်ဟု မျှော်မှန်းထားကြောင်း ပြောကြားခဲ့သည်။

ဘရာဇီးလီးယားအစိုးရက ယခုနှစ်အတွက် ဦးစားပေးဆောင်ရွက်ရမည့် အချက် ၆ ချက်ကို သတ်မှတ်ထားသည်။ ၎င်းတို့မှာ -

(၁) ကမ္ဘာ့ကျန်းမာရေးပူးပေါင်းဆောင်ရွက်မှု

(၂) ကုန်သွယ်ရေး၊ ရင်းနှီးမြှုပ်နှံမှုနှင့် ငွေကြေးဆိုင်ရာကိစ္စရပ်များ

(၃) ရာသီဥတုပြောင်းလဲမှုဆိုင်ရာစိန်ခေါ်မှုများ

(၄) AI အုပ်ချုပ်ရေး

(၅) ဘက်ပေါင်းစုံငြိမ်းချမ်းရေးနှင့်လုံခြုံရေးစနစ်ပြုပြင်ပြောင်းလဲရေး

(၆) BRICS အဖွဲ့အတွင်း အဖွဲ့အစည်းဆိုင်ရာဖွံ့ဖြိုးတိုးတက်ရေး တို့ ဖြစ်သည်။

ရီယိုဒီဂျနေးရိုးမြို့တော်ဝန် Eduardo Cavalieri က မြို့တော်အနေဖြင့် BRICS ၏ အမြဲတမ်း ရုံးချုပ်ကို လက်ခံဖွင့်လှစ်ရန် တရားဝင် ကမ်းလှမ်းထားကြောင်း ယခင်ကပြောကြားခဲ့သည်။

ရုရှားနိုင်ငံခြားရေးဝန်ကြီး Sergey Lavrov က ရုရှားကိုယ်စား တက်ရောက်မည်ဖြစ်ပြီး သမ္မတ Vladimir Putin သည် Video Conferencing စနစ်ဖြင့် အစည်းအဝေး၏ အထွေထွေဆွေးနွေးပွဲသို့ ပါဝင်မည်ဖြစ်သည်။

တရုတ်သမ္မတ ရှီကျင့်ဖျင် သည် ထိပ်သီးအစည်းအဝေးသို့ တက်ရောက်မည် မဟုတ်ဘဲ ၁၂ နှစ်တာကာလအတွင်း ပထမဆုံးအကြိမ် ပျက်ကွက်မည် ဖြစ်ပြီး တရုတ်ကိုယ်စားလှယ်အဖွဲ့ကို ဝန်ကြီးချုပ် Li Qiang က ဦးဆောင် မည်ဖြစ်သည်။ အီဂျစ်သမ္မတ Abdel Fattah el-Sisi သည်လည်း အဆိုပါ အစည်းအဝေးကို တက်ရောက်နိုင်ခြင်းမရှိကြောင်း သိရှိရသည်။ အိန္ဒိယ ၀န်ကြီးချုပ် Narendra Modi နှင့် တောင်အာဖရိကသမ္မတ Cyril Ramaphosa တို့ ဘရာဇီးသို့ ရောက်ရှိနေပြီဖြစ်ပြီး ကုလသမဂ္ဂ အထွေထွေအတွင်းရေးမှူးချုပ် Antonio Guterres လည်း တက်ရောက်မည်ဟု မျှော်လင့်ရသည်။

BRICS ကို ဘရာဇီး၊ ရုရှား၊ အိန္ဒိယနှင့် တရုတ်တို့က ၂၀၀၉ ခုနှစ်တွင် စတင်တည်ထောင်ခဲ့ပြီး တောင်အာဖရိကမှ ၂၀၁၁ ခုနှစ်တွင် ပူးပေါင်း ခဲ့သည်။ ၂၀၂၄ ခုနှစ် အတွင်းတွင် တင်းပြည့်အဖွဲ့ဝင်အဖြစ် အီရန်၊ အီဂျစ်၊ အီသီယိုးပီးယား၊ UAE နှင့် အင်ဒိုနီးရှားနိုင်ငံတို့ ပါဝင်လာခဲ့သည်။ ယခု အခါ အဆိုပါအဖွဲ့သည် ကမ္ဘာ့လူဦးရေ၏ ထက်ဝက်နီးပါးနှင့် ဝယ်ယူ နိုင်စွမ်းအား တန်းတူညီမျှမှုအရ ကမ္ဘာ့ GDP ၏ ၄၀% ခန့်ကို ကိုယ်စားပြု ထားပြီး G7 ကို ကျော်လွန်နေပြီဖြစ်သည်။ ရုရှားနိုင်ငံ Kazan မြို့တွင် ယမန်နှစ် ထိပ်သီးအစည်းအဝေးတွင် နိုင်ငံပေါင်း ၃၀ ကျော်မှ အဖွဲ့ဝင် များ၏ စိတ်ဝင်စားမှုကို တုံ့ပြန်သည့်အနေဖြင့် အဖွဲ့သည် “မိတ်ဖက်နိုင်ငံ” အဆင့်အတန်းသစ်ကို အတည်ပြုခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

၁။     ယနေ့မြန်မာစံတော်ချိန် ၁၇:၃၀ နာရီအချိန် တိုင်းထွာချက်များအရ ကပ္ပလီပင်လယ်ပြင်နှင့် ဘင်္ဂလားပင်လယ်အော်တို့တွင် မုတ်သုံ‌လေ အားအသင့်အတင့်မှ အားကောင်းနေခြင်းကြောင့်လည်းကောင်း၊ အရှေ့ဘက်မှ ရွေ့လျားလာသော လေပွေလှိုင်းများ၏ အရှိန်ကြောင့်လည်းကောင်း၊ အနောက်ဘက်မှ ရွေ့လျားလာသော လေပွေလှိုင်းများ၏ အရှိန်ကြောင့်လည်းကောင်း ယနေ့ညမှ ၇-၇-၂၀၂၅ ရက်နေ့အတွင်း မန္တလေးတိုင်းဒေသကြီး၊ မကွေးတိုင်းဒေသကြီး၊ စစ်ကိုင်းတိုင်းဒေသကြီးအောက်ပိုင်းနှင့် ကယားပြည်နယ်တို့တွင် နေရာကျဲကျဲနှင့် နေပြည်တော်၊ ရန်ကုန်တိုင်းဒေသကြီး၊ ပဲခူးတိုင်းဒေသကြီး၊ စစ်ကိုင်းတိုင်းဒေသကြီးအထက်ပိုင်း၊ ဧရာဝတီတိုင်းဒေသကြီး၊ တနင်္သာရီတိုင်းဒေသကြီး၊ ကချင်ပြည်နယ်၊ ကရင်ပြည်နယ်၊ ချင်းပြည်နယ်၊ မွန်ပြည်နယ်၊ ရခိုင်ပြည်နယ်နှင့် ရှမ်းပြည်နယ်တို့တွင် နေရာစိပ်စိပ်မှ နေရာအနှံ့အပြား မိုးထစ်ချုန်းရွာပြီး၊ အချို့ဒေသများတွင် ဒေသအလိုက်နှင့် နေရာကွက်၍ မိုးကြီး မည်။ မြစ်ဝကျွန်းပေါ်၊ ရခိုင်ကမ်းရိုးတန်းတစ်လျှောက်နှင့် ကမ်းလွန်ပင်လယ်ပြင်တို့တွင် ရံဖန်ရံခါ မိုးသက်လေပြင်းများကျရောက်ပြီး လှိုင်းကြီးမည်။ မိုးသက်လေပြင်းကျစဉ် ရေပြင်/မြေပြင်လေသည် တစ်နာရီလျှင် ၃၅ မိုင်အထိ တိုက်ခတ်နိုင်ပါသည်။ လှိုင်းအမြင့်မှာ မြစ်ဝကျွန်းပေါ်၊ ရခိုင်ကမ်းရိုးတန်း တစ်လျှောက်နှင့် ကမ်းလွန်ပင်လယ်ပြင်တို့တွင် ၁၁ ပေမှ ၁၃ ပေခန့် ရှိနိုင်ပါသည်။ မုတ္တမကွေ့၊ မွန်-တနင်္သာရီကမ်းရိုးတန်းတစ်လျှောက်နှင့် ကမ်းလွန်ပင်လယ်ပြင်တို့တွင် တစ်ခါတစ်ရံ  မိုးသက်လေပြင်းများ ကျရောက်ပြီး လှိုင်းအသင့်အတင့်မှ လှိုင်းကြီးနိုင်ပါသည်။ မိုးသက်လေပြင်းကျစဉ် ရေပြင်/မြေပြင်လေ သည် တစ်နာရီလျှင် ၂၅ မိုင်မှ မိုင် ၃၀ အထိ တိုက်ခတ်နိုင်ပါသည်။ လှိုင်းအမြင့်မှာ မုတ္တမကွေ့၊ မွန်-တနင်္သာရီကမ်းရိုးတန်းတစ်လျှောက်နှင့် ကမ်းလွန်ပင်လယ်ပြင်တို့တွင် ၇ ပေမှ ၉ ပေခန့် ရှိနိုင်ပါသည်။

အကြုံပြုချက်

၂။       သို့ဖြစ်ပါ၍ မိုးသည်းထန်စွာရွာသွန်းခြင်းနှင့်အတူ လေပြင်းတိုက်ခတ်ခြင်း၊ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်း၊ မိုးသီးကြွေခြင်း၊ လျှပ်တစ်ပြက်ရေကြီးခြင်းနှင့် မြေပြိုခြင်းစသည့် သဘာဝဘေးအန္တရာယ်များ ဖြစ်ပေါ်နိုင်ပါသဖြင့် အဆိုပါဒေသများရှိ ကုန်းမြင့်ဒေသအနီးတွင် နေထိုင် ကြသူများအနေဖြင့် မြေပြိုမှုအန္တရာယ်၊ မြစ်ငယ်၊ ချောင်းငယ်များအနီးတွင် နေထိုင်ကြသူများအနေဖြင့် ရေကြီး၊ ရေလျှံမှုများကို ကြိုတင်သတိပြုရှောင်ရှားနိုင်ပါရန်နှင့် ပြည်တွင်းရေကြောင်းသွားလာရေး၊ လေကြောင်းပျံသန်းရေးနှင့် ဆည်မြောင်းတာတမံများအနေဖြင့် လိုအပ်သည်များ ကြိုတင်ပြင်ဆင်ဆောင်ရွက် ထားနိုင်ပါရန် သတိပေးနှိုးဆော်အပ်ပါသည်။

မိုး/ဇလ

ပဲခူးတိုင်း ဘုရားကြီးမြို့ဝင်္ဂဘော်ဆင်ထိန်းသိမ်းရေးစခန်းရှိ ဆင်အမွှာလေးတကောင်ဖြစ်သည့် ရှစ်လသားအရွယ် ဆင်ထီးလေး ကျော်ပုလဲမှာ ခါးရိုးဆစ်၊ နောက်မြီးရိုးဒဏ်ရာများဖြင့် ယနေ့ ဇူလိုင် ၆ ရက် နံနက် ၅ နာရီခွဲအချိန်တွင် ကွယ်လွန်ခဲ့ကြောင်း စခန်းကတရားဝင်အသိပေးသည်။

၄င်းအား ယနေ့နံနက်ပိုင်းတွင် ကောင်းမွန်စွာ မြေမြှုပ်သဂြိုဟ်ပြီးစီးပြီဖြစ်ကာ ၊ ဆင်စခန်းအတွင်း အမှတ်တရ အုတ်ဂူတည်ဆောက်ပြီး ထားရှိရန်စီစဉ်ထားရှိကြောင်း သိရသည်။

ထို့အပြင် ကျော်ပုလဲအားရည်စူး၍ ဝင်္ဂဘော်ရွာဦး‌ကျောင်း၌ လှူဖွယ်ပစ္စည်းများ သွားရောက်လှူဒါန်းခဲ့သည့်အပြင် ဆင်စခန်း၌ ဇူလိုင် ၁၂ရက်တွင် ရက်လည်ဆွမ်းကပ်ကုသိုလ်ဆောင်ရွက်ပေးရန်စီစဉ်ထားရှိကြောင်း သိရသည်။

အမွှာဆင်ထီးလေးကျော်ပုလဲသည် ပြီးခဲ့သည့် မေ ၃ ရက် ညသန်းခေါင်းယံအချိန်၌ ခွေးများရုတ်တရက်ဟောင်သည့်အတွက် မိခင်ဖြစ်သူ ဆင်မကြီးမှာ ရုတ်တရက် နောက်ခြေအားယူ ထလိုက်ရာ မိခင်အနားအိပ်ပျော်နေသည့် ကျော်ပုလဲလေး၏ ကျောနှင့် တင်ပါးဆုံပိုင်းကို ခြေထောက်ဖြင့်ပြင်းပြင်းထန်ထန် ထိခိုက်မိခဲ့‌ကြောင်း ဝင်္ဂဘော်ဆင်စခန်းက အသိပေးချက်တွင်ဖော်ပြထားသည်။

၈ လကျော်အရွယ် ဆင်ထီးကလေး ကျော်ပုလဲအား အနာသက်သာစေရန်‌ ဆေးမျိုးစုံ နည်းမျိုးစုံဖြင့် ၂ လနှင့် ၃ရက်ကြာ နေ့ညမပြတ် ဆေးကုသပေးခဲ့သော်လည်း ယနေ့တွင် ‌သေဆုံးခဲ့ရခြင်းဖြစ်ကြောင်းဆိုသည်။

ကျော်ပုလဲနှင့် အစ်မဖြစ်သူ ပုလဲဆင့်တို့ကို အသက် ၂၂ နှစ်အရွယ် မိခင်ဆင်မကြီး ပုလဲစန္ဒာက၂၀၂၄ ဩဂုတ်လ၂၆ ရက်တွင် ဝင်္ဂဘော်ဆင်စခန်း၌ မွေးဖွားခဲ့ခြင်းဖြစ်သည်။

ထိုမွေးဖွားမှုသည် မြန်မာ့သစ်ထုတ်ဌာန၏ ၁၂ ကြိမ်မြောက် ဆင်အမွှာမွေးဖွားမှု မှတ်တမ်း ဖြစ်ပြီး ၂၀၁၆ ခုနှစ်တွင် စတင်တည်ထောင်ခဲ့သည့် ဝင်္ဂဘော်ဆင်စခန်းအတွက်လည်း ပထမဆုံးအကြိမ် ဆင်အမွှာမွေးဖွားမှုဖြစ်ကြောင်း သိရသည်။ကမ္ဘာပေါ်တွင် ဆင်အမွှာ မွေးသည်မှာ ရှားပါးလှသည်။ ထို့ထက်ပို၍ ဆင်မောင်နှမ အမွှာက ပိုရှားသည်။

ပုလဲဆင့်နှင့် ကျော်ပုလဲဆင်အမွှာ မွေးဖွားပြီးနောက်ပိုင်းတွင် စခန်းသို့ ဧည့်သည်လာရောက်မှုပိုမိုများလာခဲ့သည်။

လက်ရှိ မြန်မာနိုင်ငံအတွင်း သဘာဝသစ်တောနယ်မြေများ၌ တောင်ဆင်ရိုင်း ခန့်မှန်းကောင်ရေ ၁၅၀၀ ခန့်နှင့် အစိုးရနှင့် ပုဂ္ဂလိကပိုင် မှတ်ပုံတင်ထားသည့် ဆင်ကောင်ရေ ၃၀၀၀ နှင့် ၅၀၀၀ ခန့်ထိ ရှိကြောင်း သိရသည်။

Popular Myanmar

နေပြည်တော် ဇူလိုင် ၆

ဇူလိုင် ၆ ရက်တွင် ကျရောက်သည့် ကမ္ဘာ့ကျေးလက်ဖွံ့ဖြိုးရေးနေ့အထိမ်းအမှတ်အခမ်းအနားကို ယနေ့နံနက်ပိုင်းက နေပြည်တော်ရှိ Grand Amara ဟိုတယ်၌ ကျင်းပရာ ပြည်ထောင်စုဝန်ကြီးများ၊ နေပြည်တော်ကောင်စီဥက္ကဋ္ဌ၊ ဒုတိယဝန်ကြီးများ၊ အမြဲတမ်းအတွင်းဝန်များ၊ ညွှန်ကြားရေးမှူးချုပ်များ၊ ကုလသမဂ္ဂလက်အောက်ခံအဖွဲ့အစည်းများ၊ ပြည်တွင်းပြည်ပ အစိုးရမဟုတ်သောအဖွဲ့အစည်းများမှ တာဝန်ရှိသူများ၊ ဖိတ်ကြားထားသော ဧည့်သည်တော်များ တက်ရောက်ကြသည်။

ဦးစွာ သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန ပြည်ထောင်စုဝန်ကြီး ဦးလှမိုးက ယနေ့ ဇူလိုင် ၆ ရက်သည် မြန်မာနိုင်ငံအပါအဝင် ကမ္ဘာ့နိုင်ငံအသီးသီးက ကျေးလက်ဒေသဖွံ့ဖြိုးတိုးတက်ရေး ကြိုးပမ်းဆောင်ရွက်မှုများအား အသိအမှတ်ပြုသည့် ဂုဏ်ယူဖွယ်နေ့ထူးနေ့မြတ်တစ်နေ့ဖြစ်ပါကြောင်း၊ ယနေ့ကမ္ဘာပေါ်တွင် လူဦးရေ ၈ ဒသမ ၂ ဘီလီယံရှိသည့်အနက် ၄၃ ရာခိုင်နှုန်းမှာ ကျေးလက်ဒေသ၌ နေထိုင်ကြသည့်သူများဖြစ်ပါကြောင်း၊ မြန်မာနိုင်ငံတွင်လည်း ၂၀၂၄ ခုနှစ်တွင် ကောက်ယူခဲ့သည့် လူဦးရေနှင့် အိမ်အကြောင်းအရာသန်းခေါင်စာရင်းအရ လူဦးရေ ၅၁ ဒသမ ၃ သန်းအနက် ၆၉ ရာခိုင်နှုန်းမှာ ကျေးလက်ဒေသများတွင် နေထိုင်ကြသူများဖြစ်ကြပါကြောင်း၊ ထို့ကြောင့် နိုင်ငံတော်အစိုးရအနေနှင့် ကျေးလက်ဒေသဖွံ့ဖြိုးရေးကို ဦးစားပေးဆောင်ရွက်လျက်ရှိပါကြောင်း၊ ယခင်က ဖွံ့ဖြိုးမှုနိမ့်ကျခဲ့သော ကျေးလက်ဒေသများသည် ယခုအခါ သိသာစွာဖွံ့ဖြိုးတိုးတက်လာသော်လည်း ဖွံ့ဖြိုးရေးဆိုင်ရာ လိုအပ်ချက်များစွာရှိနေသော ကျေးရွာအချို့လည်း ရှိနေသေးသည်ကို တွေ့ရှိရပါကြောင်း။

မိမိတို့ဝန်ကြီးဌာနအနေဖြင့် သက်တန့်ရောင်စီမံကိန်းဖော်ဆောင်၍ သမဝါယမကဏ္ဍဖွံ့ဖြိုးတိုးတက်အောင် ဆောင်ရွက်ခြင်း၊ ဝင်ငွေတိုးစီမံကိန်းဖြင့် အသက်မွေးဝမ်းကျောင်းလုပ်ငန်းများနှင့် အသေးစား၊ အငယ်စားစက်မှုလက်မှုလုပ်ငန်းများ ဖွံ့ဖြိုးအောင်ဆောင်ရွက်ခြင်း၊ ကျေးလက်လမ်းနှင့် ကုန်ထုတ်လမ်းတံတားများ ဖောက်လုပ်ခြင်း၊ သန့်ရှင်းသော သောက်သုံးရေနှင့် လျှပ်စစ်မီးရရှိရေးလုပ်ငန်းများ ဆောင်ရွက်ခြင်း၊ မြစိမ်းရောင်၊ ကျေးလက်စီးပွားမြင့်မားရေးရန်ပုံငွေထူထောင်ခြင်း၊ အသက်မွေးဝမ်းကျောင်းများဖြင့် ကျေးလက်စီးပွားမြင့်မားရေးဆောင်ရွက်ခြင်း၊ ခေတ်မီစံပြကျေးရွာထူထောင်ခြင်းစီမံကိန်း၊ ကျေးရွာဖွံ့ဖြိုးတိုးတက်ရေးစီမံကိန်းများဖြင့် ရပ်ရွာအခြေပြုဘက်စုံဖွံ့ဖြိုးရေးလုပ်ငန်းများကို နှစ်စဉ်တိုးချဲ့အကောင်အထည်ဖော်ဆောင်ရွက်လျက်ရှိပါကြောင်း။

ယခုနှစ် ကမ္ဘာ့ကျေးလက်ဖွံ့ဖြိုးရေးနေ့၏ ဆောင်ပုဒ်ဖြစ်သော “တို့ကမ္ဘာမြေတိုးတက်ပြောင်းလဲဖို့ ကျေးလက်စွမ်းအားမြှင့်တင်စို့” ဟူသော ဆောင်ပုဒ်နှင့်အညီ စဉ်ဆက်မပြတ် ကျေးလက်ဒေသဖွံ့ဖြိုးရေးလုပ်ငန်းများကို အစွမ်းကုန်ကြိုးပမ်းဆောင်ရွက်ကြစေလိုကြောင်း တိုက်တွန်းပြောကြားသည်။

ဆက်လက်၍ အာရှနှင့် ပစိဖိတ်ဒေသဆိုင်ရာ ကျေးလက်ဒေသဘက်စုံဖွံ့ဖြိုးတိုးတက်ရေးဗဟိုဌာန (Centre on Integrated Rural Development for Asia and the Pacific –CIRDAP) ညွှန်ကြားရေးမှူးချုပ်မှ ပေးပို့သော ဝမ်းမြောက်စကားမှတ်တမ်းဗီဒီယိုကိုလည်းကောင်း၊ ကျေးလက်ဖွံ့ဖြိုးရေးအကောင်အထည်ဖော်ဆောင်ရွက်မှု မှတ်တမ်းဗီဒီယိုကိုလည်းကောင်း ပြသသည်။

ယင်းနောက် သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန အမြဲတမ်းအတွင်းဝန် ဦးခန့်ဇော်က စဉ်ဆက်မပြတ်ကျေးလက်ဖွံ့ဖြိုးရေးအတွက် မူဝါဒဦးစားပေးမှုနှင့် ပြည်သူပူးပေါင်းပါဝင်မှုခေါင်းစဉ်ဖြင့်လည်းကောင်း၊ Water Aim မှ Advisor Mr. Shihab Uddin Ahamad က Unlocking the Potential of Regional Cooperation for Rural Transformation in Myanmar: A Pathway to Sustainable Deve-lopment ခေါင်းစဉ်ဖြင့်လည်းကောင်း ဆွေးနွေးပြောကြားကြသည်။

ထို့နောက် ပြည်ထောင်စုဝန်ကြီးနှင့် တာဝန်ရှိသူများက ၂၀၂၄-၂၀၂၅ ဘဏ္ဍာနှစ်အတွင်း ကျေးလက်ဒေသဖွံ့ဖြိုးရေးလုပ်ငန်းများ ဆောင်ရွက်ရာတွင် လုပ်ငန်းစွမ်းဆောင်ရည်ဆုရရှိခဲ့သည့် ရှမ်းပြည်နယ်(တောင်ပိုင်း)၊ ဧရာဝတီတိုင်းဒေသကြီးနှင့် ပြည်ထောင်စုနယ်မြေ နေပြည်တော်ကျေးလက်ဒေသဖွံ့ဖြိုးတိုးတက်ရေးဦးစီးဌာနတို့မှ ဦးစီးမှူးများကို ဂုဏ်ပြုဆုများ ပေးအပ်သည်။

ထို့နောက် ပြည်ထောင်စုဝန်ကြီးများ၊ နေပြည်တော်ကောင်စီဥက္ကဋ္ဌ၊ ဒုတိယဝန်ကြီးများနှင့် တာဝန်ရှိသူများသည် သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန၊ ပို့ဆောင်ရေးနှင့် ဆက်သွယ်ရေးဝန်ကြီးဌာန၊ နယ်စပ်ရေးရာဝန်ကြီးဌာန၊ စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန၊ သယံဇာတနှင့်သဘာဝပတ်ဝန်းကျင်ထိန်းသိမ်းရေး ဝန်ကြီးဌာန၊ လျှပ်စစ်စွမ်းအားဝန်ကြီးဌာန၊ ပညာရေးဝန်ကြီးဌာန၊ ကျန်းမာရေးဝန်ကြီးဌာနတို့မှ ကျေးလက်ဖွံ့ဖြိုးရေးဆိုင်ရာ မှတ်တမ်းဓာတ်ပုံပြခန်းများကို လှည့်လည်ကြည့်ရှုခဲ့ကြောင်း သိရသည်။

MOI

နေပြည်တော် ဇူလိုင် ၅

(၁၀၃)ကြိမ်မြောက် အပြည်ပြည်ဆိုင်ရာသမဝါယမနေ့အခမ်းအနားကို ယနေ့နံနက်ပိုင်းက ရန်ကုန်မြို့ သမဝါယမစီးပွားရေးဗဟိုဌာန၌ကျင်းပရာ သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန ပြည်ထောင်စုဝန်ကြီး ဦးလှမိုး၊ အမြဲတမ်းအတွင်းဝန်၊ ညွှန်ကြားရေးမှူးချုပ်များ၊ ပါမောက္ခချုပ်များ၊ ဗဟိုသမဝါယမအသင်းလီမိတက် နာယက၊ ဥက္ကဋ္ဌနှင့် ဒါရိုက်တာအဖွဲ့ဝင်များ၊ တိုင်းဒေသကြီး/ ပြည်နယ်သမဝါယမဦးစီးဌာနများမှ ညွှန်ကြားရေးမှူးများ၊ သမဝါယမကောလိပ်များမှ ကျောင်းအုပ်ကြီးများ၊ တိုင်းဒေသကြီး/ ပြည်နယ်သမဝါယမအသင်းစုချုပ်များမှ ဥက္ကဋ္ဌများနှင့် ဝန်ထမ်းများ တက်ရောက်ကြသည်။

အပြည့်အစုံဖတ်ရှုရန်- https://www.moi.gov.mm/news/71905