၂၀၂၅ ခုနှစ်၊ မတ် ၁ ရက်က ရှမ်းပြည်နယ်(တောင်ပိုင်း)၊ ပင်လောင်းမြို့နယ်နှင့် ဆီဆိုင်မြို့နယ်တို့၌ ဘိန်းခင်းဖျက်ဆီးခြင်းများ ဆောင်ရွက်ခဲ့ကြောင်း သိရသည်။
ရှမ်းပြည်နယ်(တောင်ပိုင်း)၊ ပင်လောင်းမြို့နယ်ရဲတပ်ဖွဲ့မှ တပ်ဖွဲ့ဝင်များ၊ နယ်မြေခံတပ်မတော်သားများပါဝင်သော ပူးပေါင်းအဖွဲ့သည် ၂၀၂၅ ခုနှစ်၊ မတ် ၁ ရက်တွင် ပင်လောင်းမြို့နယ်၊ ခေါပူကျေးရွာအရှေ့ဘက် ၂ ဖာလုံခန့်အကွာ၌ အမြင့် သုံးပေခန့် ဘိန်းခင်း ၃၀ ဧကခန့်အားလည်းကောင်း၊ အလားတူ နံနက် ၉ နာရီ ၅ မိနစ်တွင် ဆီဆိုင်မြို့နယ်ရဲတပ်ဖွဲ့မှ တပ်ဖွဲ့ဝင်များ၊ နယ်မြေခံတပ်မတော်သားများပါဝင်သော ပူးပေါင်းအဖွဲ့သည် ဆီဆိုင်မြို့နယ်၊ လွယ်မန့်ကျေးရွာအရှေ့မြောက်ဘက် ၂ ဖာလုံခန့်အကွာ၌ အမြင့် သုံးပေခန့် ဘိန်းခင်း ၁၁ ဧကခန့်အားလည်းကောင်း အသီးသီးဖျက်ဆီးခြင်းများ ဆောင်ရွက်ခဲ့ကြောင်း သတင်းရရှိသည်။

Source: www.moha.gov.mm

နေပြည်တော် မတ် ၅

ရုရှားဖက်ဒရေးရှင်းနိုင်ငံမော်စကိုမြို့၌ တရားဝင်ချစ်ကြည်ရေးခရီး ရောက်ရှိနေသည့် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်သည် ယနေ့နံနက်ပိုင်းတွင် ရုရှားဖက်ဒရေးရှင်းနိုင်ငံ ကာကွယ်ရေးဝန်ကြီး H.E. Mr. Andrei Removich နှင့် ရုရှားဖက်ဒရေးရှင်းနိုင်ငံ ကာကွယ်ရေးဝန်ကြီးဌာန အစည်းအဝေးခန်းမ၌ တွေ့ဆုံဆွေးနွေးသည်။

အဆိုပါတွေ့ဆုံပွဲသို့ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့်အတူ ကောင်စီတွဲဖက်အတွင်းရေးမှူး ဗိုလ်ချုပ်ကြီးရဲဝင်းဦး၊ ကောင်စီဝင်ဗိုလ်ချုပ်ကြီး ညိုစော၊ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌရုံး ဝန်ကြီးဌာန(၁) ပြည်ထောင်စုဝန်ကြီး၊ အမျိုးသားလုံခြုံရေးဆိုင်ရာအကြံပေးပုဂ္ဂိုလ် ဗိုလ်ချုပ်ကြီးမိုးအောင်၊ ရုရှားဖက်ဒရေးရှင်းနိုင်ငံဆိုင်ရာ မြန်မာနိုင်ငံသံအမတ်ကြီး ဦးသစ်လင်းအုန်း၊ ကာကွယ်ရေးဦးစီးချုပ်ရုံး(ကြည်း)မှ အဆင့်မြင့်တပ်မတော် အရာရှိကြီးများနှင့် မြန်မာစစ်သံ (ကြည်း၊ ရေ၊ လေ)တို့ တက်ရောက်ကြပြီး ရုရှားဖက်ဒရေးရှင်းနိုင်ငံ ကာကွယ်ရေးဝန်ကြီးနှင့်အတူ ရုရှားဖက်ဒရေးရှင်းနိုင်ငံ လုံခြုံရေးကောင်စီအတွင်းရေးမှူး Mr. Sergey Kuzhugetovich Shoigu၊ ကာကွယ်ရေးဝန်ကြီးဌာနမှ တာဝန်ရှိသူများနှင့် ရုရှားတပ်မတော်မှ အဆင့်မြင့်အရာရှိကြီးများ တက်ရောက်ကြသည်။

ကြိုဆိုနှုတ်ဆက်

ဦးစွာ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့် ချစ်ကြည်ရေးကိုယ်စားလှယ် အဖွဲ့ဝင်များသည် ကာကွယ်ရေးဝန်ကြီးဌာနသို့ ရောက်ရှိကြရာ ရုရှားဖက်ဒရေးရှင်းနိုင်ငံ ကာကွယ်ရေးဝန်ကြီးက ရင်းရင်းနှီးနှီးကြိုဆိုနှုတ်ဆက်သည်။

ယင်းနောက်တွေ့ဆုံပွဲကို အစည်းအဝေးခန်းမ၌ ကျင်းပပြုလုပ်ရာ နှစ်နိုင်ငံအကြား ကာကွယ်ရေးကဏ္ဍတွင် နယ်ပယ်ပေါင်းစုံ၌ ပူးပေါင်းဆောင်ရွက်လျက်ရှိမှု၊ နှစ်နိုင်ငံနှင့် တပ်မတော်နှစ်ရပ်အကြား အရပ်ဘက်၊ စစ်ဘက်ဆက်ဆံရေးများ တိုးတက်ကောင်းမွန်လျက်ရှိမှုနှင့် ပိုမိုမြှင့်တင် ဆောင်ရွက်သွားမည့်အခြေအနေများ၊ လူသားချင်းစာနာထောက်ထားမှုဆိုင်ရာ၊ အကူအညီပေးရေးဆိုင်ရာ ကိစ္စရပ်များတွင် ပူးပေါင်းဆောင်ရွက်သွားမည့် အခြေအနေများနှင့် စစ်ဘက်နည်းပညာ ပူးပေါင်းဆောင်ရွက်မှုများ မြှင့်တင်ဆောင်ရွက်သွားမည့် အခြေအနေများနှင့် ပတ်သက်၍ ရင်းရင်းနှီးနှီးဆွေးနွေးခဲ့ကြသည်။

အမှတ်တရပစ္စည်းများပေးအပ်

တွေ့ဆုံပွဲအပြီးတွင် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့် ရုရှားဖက်ဒရေးရှင်းနိုင်ငံ ကာကွယ်ရေးဝန်ကြီးတို့သည် အမှတ်တရလက်ဆောင်ပစ္စည်းများ အပြန်အလှန်ပေးအပ်ပြီး စုပေါင်းမှတ်တမ်းတင် ဓာတ်ပုံရိုက်ခဲ့ကြကြောင်း သတင်းရရှိသည်။       

Source: MOI

နေပြည်တော် မတ် ၅

ရုရှားနိုင်ငံ၌ တရားဝင်ချစ်ကြည်ရေးခရီးရောက်ရှိနေသည့် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်ဦးဆောင်သည့် မြန်မာအဆင့်မြင့် ချစ်ကြည်ရေးကိုယ်စားလှယ်အဖွဲ့သည် ယနေ့ဒေသစံတော်ချိန် မွန်းလွဲပိုင်းတွင် မော်စကိုမြို့ရှိ ဘနုကာဘာ အပြည်ပြည်ဆိုင်ရာလေဆိပ်မှ ပြန်လည်ထွက်ခွာကြရာ ရုရှားစီးပွားရေးဖွံ့ဖြိုးတိုးတက်မှုဝန်ကြီး Mr. Maxim Reshetnikov ၊ ရုရှားနိုင်ငံခြားရေးဝန်ကြီးဌာန ဒုတိယဝန်ကြီးနှင့် တာဝန်ရှိသူများက လေဆိပ်တွင် ရုရှားဖက်ဒရေးရှင်းနိုင်ငံ ဂုဏ်ပြုတပ်ဖွဲ့နှင့်အတူ လေဆိပ်၌ ပို့ဆောင်နှုတ်ဆက်ကြသည်။

အလေးပြုခြင်းကိုခံယူ

နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်သည် ရုရှားဖက်ဒရေးရှင်းနိုင်ငံ ဂုဏ်ပြုတပ်ဖွဲ့၏ အလေးပြုခြင်းကိုခံယူပြီး ထိုသို့ဂုဏ်ပြုတပ်ဖွဲ့မှ ပို့ဆောင်နှုတ်ဆက်စဉ် မြန်မာ - ရုရှားနှစ်နိုင်ငံ နိုင်ငံတော်တေးသီချင်းများကို တီးမှုတ်ကြသည်။ ယင်းနောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်သည် ဘနုကာဘာ အပြည်ပြည်ဆိုင်ရာလေဆိပ်မှ အထူးလေယာဉ်ဖြင့် ထွက်ခွာခဲ့သည်။

ကြိုဆိုနှုတ်ဆက်

ထို့နောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဦးဆောင်သည့် မြန်မာအဆင့်မြင့် ချစ်ကြည်ရေးကိုယ်စားလှယ်အဖွဲ့သည် ဒေသစံတော်ချိန်ညနေပိုင်းတွင် စိန့်ပီတာစဘတ်မြို့ရှိ Pulikovo လေဆိပ်သို့ရောက်ရှိကြရာ စိန့်ပီတာစဘတ်အစိုးရအဖွဲ့ ပြည်ပဆက်ဆံရေးကော်မတီဥက္ကဋ္ဌ Mr. Grigoriev ၊ မြန်မာကောင်စစ်ဝန်ချုပ် ဦးအောင်ဖေသက်နှင့် တာဝန်ရှိသူများကလေဆိပ်တွင် ကြိုဆိုနှုတ်ဆက်ခဲ့ကြကြောင်း သတင်းရရှိသည်။

Source: MOI

၂၀၂၅ ခုနှစ် ပထမ ၂ လအတွင်း ဗီယက်နမ်နိုင်ငံသည် နိုင်ငံခြားဧည့်သည် ၃.၉၆ သန်းအား လက်ခံခဲ့ပြီး ယခင်နှစ်ကထက် ၃၀% တိုးတက်ခဲ့သော်လည်း ထိုင်းနိုင်ငံ၏ စုစုပေါင်းဧည့်သည်အရေအတွက် ခုနစ်သန်း နောက် တွင် ကျန်ရှိနေဆဲဖြစ်သည်။

ဗီယက်နမ်၏ နိုင်ငံခြားဧည့်သည်များ တိုးတက်လာခြင်းသည် ဧည့်သည်များအဆင်ပြေစေမည့် ဗီဇာမူဝါဒများ၊ ခရီးသွားလုပ်ငန်းမြှင့်တင်ရေး အစီအစဉ်များနှင့် အပြည်ပြည်ဆိုင်ရာအဖွဲ့အစည်းများမှ ဂုဏ်သိက္ခာ ရှိသော ခရီးသွားဆုများကြောင့် ဖြစ်ကြောင်း ဗဟိုစာရင်းအင်းရုံးက ဆိုသည်။

ဇန်နဝါရီနှင့်ဖေဖော်ဝါရီ ၂ လ အတွင်း တရုတ်နိုင်ငံသည် ဗီယက်နမ်သို့ လာရောက်လည်ပတ်သည့် ဧည့်သည်ဦးရေအများဆုံး ဖြစ်နေဆဲဖြစ်ပြီး ဧည့်သည် ၉၅၅,၀၀၀ ဦးရှိခဲ့သည်။ ၎င်း၏နောက်တွင် တောင်ကိုရီးယား (၈၈၅,၀၀၀) ဦး နှင့် တိုင်ပေ (၂၁၈,၀၀၀) ဦး တို့ရပ်တည်နေကြသည်။

အမေရိကန်ပြည်ထောင်စုသည် ဧည့်သည် ၁၈၀,၀၀၀ ဦးဖြင့် စတုတ္ထ နေရာတွင် ရပ်တည်ခဲ့ပြီး ဂျပန်နိုင်ငံသည် ဧည့်သည် ၁၄၇,၀၀၀ ဦးဖြင့် ပဉ္စမနေရာတွင် ရပ်တည်ခဲ့သည်။

ထိပ်တန်း ၁၀ နိုင်ငံစာရင်းတွင် ကမ္ဘောဒီးယား (၁၄၂,၀၀၀) ၊ သြစတြေးလျ (၁၀၄,၈၁၇) ၊ မလေးရှား (၁၀၂,၀၀၀) ၊ အိန္ဒိယ (၉၂,၀၀၀) နှင့် ရုရှား (၇၉,၀၀၀) တို့ ပါဝင်ခဲ့သည်။

ဘန်ကောက်ပို့စ်သတင်းအရ ထိုင်းနိုင်ငံသည် ဇန်နဝါရီ ၁ ရက်မှ မတ် ၂ ရက်အထိ နိုင်ငံခြားဧည့်သည်များ ၅.၉% တိုးတက်မှုဖြင့် ဧည့်သည် ခုနစ်သန်းကို ရောက်ရှိခဲ့သည်။

ဗီယက်နမ်နိုင်ငံသည် ယခုနှစ်အတွင်း နိုင်ငံခြားဧည့်သည် ၂၃ သန်းကို ဆွဲဆောင်ရန် ရည်မှန်းထားပြီး ယခင်နှစ်ကထက် ၃၀% နီးပါး တိုးတက်ရန် ရည်ရွယ်ထားသည်။

ဝန်ကြီးချုပ် Pham Minh Chinh သည် ခရီးသွားလုပ်ငန်း ပြန်လည်ထူထောင်ရေးအတွက် ကြိုးပမ်းမှုများ၏ တစ်စိတ်တစ်ပိုင်းအနေဖြင့်သက်ဆိုင်ရာဝန်ကြီးဌာနများအား နိုင်ငံအချို့မှ ခရီးသွားဧည့်သည်များနှင့်ကမ္ဘာ့ဘီလီယံနာများအတွက် ဗီဇာကင်းလွတ်ခွင့်ကို စဉ်းစားရန် ညွှန်ကြားခဲ့သည်။

ကိုးကား-VN Express

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

မက်ဒရစ်  မတ် ၅

ကမ္ဘာ့အပါးလွှာဆုံး စမတ်ဖုန်းတစ်မျိုးကို တရုတ်နိုင်ငံအခြေစိုက် Tecno Mobile ကုမ္ပဏီက ထုတ်ဖော်ပြသခဲ့သသည်ဟု မတ် ၄ ရက်သတင်းများတွင် ရေးသားဖော်ပြထားကြောင်း သိရသည်။

Tecno Spark Slim ဟူ၍ အမည်ပေးထားသော အဆိုပါစမတ်ဖုန်းသစ်၏ အထူမှာ ၅ ဒသမ ၇၅ မီလီမီတာ (သုည ဒသမ ၂၂၆ လက်မ) သာရှိသည်။

Tecno Spark Slim စမတ်ဖုန်းသည် ပြိုင်ဘက်တောင်ကိုရီးယားအခြေစိုက် ဆမ်ဆောင်းကုမ္ပဏီ၏ Galaxy Edge စမတ်ဖုန်းထက်ပင် ပို၍ပါးလွှာကြောင်း သိရသည်။

ဆမ်ဆောင်းကုမ္ပဏီ၏ Galaxy Edge စမတ်ဖုန်းမှာ ၅ ဒသမ ၈၄ မီလီမီတာ (သုည ဒသမ ၂၂၉ လက်မ) ထူကြောင်း သိရသည်။

Tecno Mobile ကုမ္ပဏီသည် Tecno Spark Slim စမတ်ဖုန်းကို စပိန်နိုင်ငံ ဘာစီလိုနာမြို့တော်၌ မတ် ၃ ရက်မှ ၆ ရက်ထိ ကျင်းပမည့် Mobile World Congress (MWC) ပြပွဲ၌ ပြသလျက်ရှိသည်။

Tecno Spark Slim စမတ်ဖုန်းသည် မျက်နှာပြင်အကျယ် ၆ ဒသမ ၇၈ လက်မထိရှိပြီး ၅၂၀၀ mAh ဘက်ထရီကို အသုံးပြုထားကြောင်း သိရသည်။

Source: ရတနာပုံသတင်းစာ

နေပြည်တော် မတ် ၅

ရုရှားဖက်ဒရေးရှင်းနိုင်ငံ မော်စကိုမြို့၌ တရားဝင်ချစ်ကြည်ရေးခရီးရောက်ရှိနေသည့် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်ထံသို့ ရုရှားဖက်ဒရေးရှင်းနိုင်ငံ ဒူးမားလွှတ်တော်ဒုတိယဥက္ကဋ္ဌ H.E. Mr.Sholban Kara-Ool သည် ယနေ့ဒေသစံတော်ချိန် မွန်းလွဲပိုင်းတွင် Radisson Collection ဟိုတယ်၌ လာရောက်ဂါရဝပြုတွေ့ဆုံသည်။

ရင်းနှီးပွင့်လင်းစွာ ဆွေးနွေး

ထိုသို့တွေ့ဆုံရာတွင် နှစ်နိုင်ငံလွှတ်တော်နှစ်ရပ်အကြား ပူးပေါင်းဆောင်ရွက်ရန် ဆွေးနွေးထားသည့်အချက်များအပေါ် အကောင်အထည်ဖော်ဆောင်ရွက်လျက်ရှိသည့် အခြေအနေများ၊ ဒူးမားလွှတ်တော်သို့ မြန်မာနိုင်ငံမှလေ့လာရေးအဖွဲ့များစေလွှတ်၍ အတွေ့အကြုံများ ဖလှယ်ရေးဆိုင်ရာကိစ္စရပ်များ၊ နှစ်နိုင်ငံလွှတ်တော်များအကြား ချစ်ကြည်ရင်းနှီးမှုများ ပိုမိုတိုးတက်ကောင်းမွန်စေရေးဆိုင်ရာကိစ္စရပ်များနှင့်ပတ်သက်၍ ရင်းနှီးပွင့်လင်းစွာ ဆွေးနွေးခဲ့ကြသည်။

ဂါရဝပြုတွေ့ဆုံ

ယင်းနောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်ထံ ရုရှားဖက်ဒရေးရှင်းနိုင်ငံ ကာမီးကီယာ ပြည်နယ်အကြီးအကဲ H.E.Mr. Batu KHASIKOV နှင့်အဖွဲ့ဝင်များက လာရောက်ဂါရဝပြုတွေ့ဆုံနှုတ်ဆက်၍ ကာမီးကီယာပြည်နယ်ရှိ ဗုဒ္ဓဥယျာဉ်အတွင်း မြန်မာနိုင်ငံမှစေတီတော် (သို့မဟုတ်) ဗုဒ္ဓရုပ်ပွားတော် လာရောက်တည်ထားကိုးကွယ်စေလိုမှု၊ မြန်မာနိုင်ငံမှ လေ့လာရေးကိုယ်စားလှယ်အဖွဲ့အား ကာမီးကီယာပြည်နယ်သို့ လာရောက်လေ့လာစေလိုမှုများနှင့် ပတ်သက်၍ ရင်းရင်းနှီးနှီးဆွေးနွေးခဲ့ကြသည်။

လက်ဆောင်ပစ္စည်း အပြန်အလှန်ပေးအပ်

ထို့နောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့် ရုရှားဖက်ဒရေးရှင်းနိုင်ငံ ကာမီးကီယာပြည်နယ်အကြီးအကဲတို့သည် အမှတ်တရ လက်ဆောင်ပစ္စည်းများ အပြန်အလှန်ပေးအပ်ပြီး မှတ်တမ်းတင်ဓာတ်ပုံရိုက်ခဲ့ကြကြောင်း သတင်းရရှိသည်။

Source: MOI

ပလတ်စတစ်ကြောင့် ပတ်ဝန်းကျင်ညစ်ညမ်းမှုကိုလျှော့ချနိုင်မည့် ပထမဆုံးအပြည်ပြည်ဆိုင်ရာစာချုပ်(မူကြမ်း) တစ်ရပ်ကို အတူတကွပူးပေါင်းဖော်ဆောင်နိုင်ရန်အတွက် ယခုနှစ်ဩဂုတ်လအတွင်း ဆွေးနွေးပွဲများပြန်လည် စတင် မည်ဖြစ်ကြောင်း ကုလသမဂ္ဂ၏သဘာဝပတ်ဝန်းကျင်ဆိုင်ရာအစီအစဉ် (UNEP)က ထုတ်ဖော်ပြောကြားခဲ့ပါသည်။

ပလတ်စတစ်ကြောင့် ပတ်ဝန်းကျင်ညစ်ညမ်းမှုဆိုင်ရာ အပြည်ပြည်ဆိုင်ရာညှိနှိုင်းရေးကော်မတီ အစည်းအဝေးများကို ဆွစ်ဇာလန်နိုင်ငံ၊ ဂျနီဗာမြို့တွင် ကျင်းပသွားမည်ဖြစ်ပါသည်။

ကမ္ဘာလုံးဆိုင်ရာ ပလတ်စတစ်စွန့်ပစ်မှုသည် ၂၀၁၉ ခုနှစ်အထိ နှစ်ပေါင်းနှစ်ဆယ်ကာလအတွင်း (၂) ဆကျော် မြင့်တက်လာခဲ့သည်။ ကုလသမဂ္ဂအနေဖြင့် ၂၀၂၄ ခုနှစ်၊ နှစ်ကုန်ပိုင်းတွင် ပလတ်စတစ်ကြောင့်ဖြစ်ပေါ်သည့်ပတ်ဝန်းကျင် ညစ်ညမ်းမှုနှင့်ပတ်သက်၍ အပြည်ပြည်ဆိုင်ရာဥပဒေအရ စည်းနှောင်မှုရှိသည့် ဥပဒေတစ်ရပ် ပြဋ္ဌာန်းသွားရန် ဆုံးဖြတ်ချက်တစ်ရပ်ကို ချမှတ်နိုင်ခဲ့သည်။

အပြည်ပြည်ဆိုင်ရာညှိနှိုင်းရေးကော်မတီမှ ကိုယ်စားလှယ်များသည် ပြီးခဲ့သည့် ၂၀၂၄ ခုနှစ်၊ နိုဝင်ဘာလက တောင်ကိုရီးယားနိုင်ငံ၊ ဘူဆန်မြို့တွင် တွေ့ဆုံဆွေးနွေးခဲ့ကြသော်လည်း သဘောထားကွဲလွဲမှုများအပေါ် ဆွေးနွေး ညှိနှိုင်းနိုင်ခြင်းမရှိသဖြင့် သဘောတူညီချက်ကို ဆိုင်းငံ့ထားခဲ့ရသည်။

အစည်းအဝေးတွင် ဥရောပသမဂ္ဂနှင့် အခြားအဖွဲ့ဝင်နိုင်ငံက ပလတ်စတစ်ထုတ်လုပ်မှုကို ကန့်သတ်ရန် တိုက်တွန်းခဲ့ကြသော်လည်း ဆီထုတ်လုပ်သည့်နိုင်ငံများက အဆိုပါအချက်ကို ကန့်ကွက်ခဲ့ကြသည်။ 

လာမည့်ဩဂုတ်လတွင် ကျင်းပပြုလုပ်မည့် အစည်းအဝေး၌ ယခင်နှစ်အစည်းအဝေးတွင် ကော်မတီဥက္ကဋ္ဌက တင်ပြခဲ့သည့် အဆိုပြုမူကြမ်းအပေါ် ဆက်လက်ဆွေးနွေးသွားဖွယ်ရှိပြီး ဝန်ကြီးအဆင့်အစည်းအဝေးဆွေးနွေးပွဲများကိုလည်း ကျင်းပရန် စီစဉ်ထားရှိကြောင်း NHK သတင်းစာမျက်နှာတွင် ရေးသားဖော်ပြထားပါသည်။

ကိုးကား-NHK World

အလွတ်သဘောဘာသာပြန်ဆိုသူ-ဦးထက်ထက်အောင် (နစက-၄)

သဘောထားကွဲနေသော နိုင်ငံတော်တရားရုံးချုပ်က မတ် ၅ ရက်တွင် သမ္မတဒေါ်နယ်ထရမ့်ကို တရားဥပဒေအရ ရှုံးနိမ့်စေခဲ့ပြီး ပြည်ပအကူအညီ အမေရိကန်ဒေါ်လာနှစ်ဘီလီယံခန့်ကို ထိန်းချုပ်ရန် ထရမ့်၏ ကြိုးပမ်းမှု ကို ပယ်ချလိုက်သည်။

ထရမ့်အစိုးရအဖွဲ့ကို ဥပဒေကြောင်းအရ စိန်ခေါ်ရာတွင် ထင်သာမြင်သာ ရှိသော ပထမဆုံး စီရင်ဆုံးဖြတ်မှု၌ နိုင်ငံတော်တရားရုံးက ပြည့်စုံနေပြီ ဖြစ်သောအကူအညီ ကန်ထရိုက်များအတိုင်း ငွေပေးချေမှုများကို ပေးရန် လိုအပ်သည်ဟူသော အောက်တရားရုံးအမိန့်ကို ထောက်ခံမဲ ငါးမဲ၊ ကန့်ကွက်မဲ လေးမဲဖြင့် အတည်ပြုခဲ့သည်။

အပြည်ပြည်ဆိုင်ရာဖွံ့ဖြိုးရေးအတွက် အမေရိကန်အေဂျင်စီ (USAID) နှင့် ချုပ်ဆိုထားသော ကန်ထရိုက်များအတွက် ငွေပေးချေမှုများကို ပြန်လည် လုပ်ဆောင်ရန်နှင့် အစိုးရက ဖြည့်ဆည်းပေးရမည့် တာဝန်ခံမှုများကို နိုင်ငံခြားရေးဝန်ကြီးဌာနက ရှင်းရှင်းလင်းလင်းဖြစ်စေရမည်ဟု ဖက်ဒရယ် တရားသူကြီးတစ်ဦးက ညွှန်ကြားခဲ့သည်ဟု တရားသူကြီးများက ပြောကြား ခဲ့သည်။

ကွန်ဆာဗေးတစ်များဖြစ်သော ဂျွန်ရောဘတ်(တရားသူကြီးချုပ်)၊ အေမီ ကိုနေးဘာရတ် (ထရမ့် ခန့်အပ်ထားသော တရားသူကြီး) တို့က အဖွဲ့ဝင် ကိုးဦးပါသော နိုင်ငံတော်တရားရုံးတွင် လစ်ဘရယ်သမားသုံးဦးနှင့်အတူ မဲပေးခဲ့ကြသည်။

တရားသူကြီး ဆမ်ဝဲလ်အလီတိုက သဘောထားကွဲသည်ဟု ရေးသား ခဲ့သည်။ အခြားကွန်ဆာဗေးတစ်သုံးဦးကလည်း သဘောထားကွဲသည်ဟု ဖော်ပြခဲ့ကြသည်။

“တရားစီရင်ပိုင်ခွင့်ရှိပုံမရသည့် ခရိုင်တရားသူကြီး တစ်ဦးတည်းက (ထာဝရ ဆုံးရှုံးသွားဖို့ရှိသည့်) အခွန်ထမ်း ပြည်သူများ၏ အမေရိကန် ဒေါ်လာနှစ်ဘီလီယံကို အပြတ်ပေးရန် အမေရိကန်အစိုးရအဖွဲ့ကို အတင်းအကြပ် လုပ်စေနိုင်မည့် အတားအဆီးမဲ့ အာဏာရှိနေပါသလား” ဟု အယ်လီတိုက ရေးခဲ့သည်။

“အဆိုပါမေးခွန်းအတွက် အဖြေသည် No ဆိုပြီး ပြတ်ပြတ်သားသား ဆုံးဖြတ်သင့်သော်လည်း အဆိုပါ တရားရုံး၏ တရားသူကြီးအများစုကအခြားနည်းလမ်းကို စဉ်းစားနေကြောင်း ထင်ရှားနေသောကြောင့် မိမိ အနေဖြင့် အံ့အားသင့်မိပါကြောင်း” ၎င်းက ဖြည့်စွက်ဖော်ပြခဲ့သည်။

ထရမ့်သည် ကမ္ဘာ့အချမ်းသာဆုံးပုဂ္ဂိုလ် အီလွန်မက်ဦးဆောင်သော အစိုးရအဖွဲ့ စွမ်းဆောင်ရည်ဌာနကို ဖွဲ့စည်းခဲ့ကာ အစိုးရအဖွဲ့၏ အချို့သောအပိုင်းများကို ချုံ့ပစ်ခြင်းသို့မဟုတ် ဖယ်ရှားခြင်းတို့ကို လုပ်ဆောင်ခဲ့သည်။

USAID သည် ဝန်ထမ်းအများဆုံး ထုတ်ပယ်ခံရသော အေဂျင်စီဖြစ်သည်။ USAID သည် ကမ္ဘာတစ်ဝန်း ကျန်းမာရေးအစီအစဉ်များနှင့် အရေးပေါ် အစီအစဉ်များအတွက် နိုင်ငံ ၁၂၀ ခန့်တွင် လူသားချင်းစာနာမှုဆိုင်ရာ အကူအညီများကို ဖြန့်ဝေပေးနေသော အေဂျင်စီဖြစ်သည်။

USAID ကို အစွန်းရောက်သော အရူးများက လည်ပတ်နေခြင်း ဖြစ်သည် ဟု ထရမ့်က ပြောကြားခဲ့သည်။ အီလွန်မက်ကလည်း USAID သည် အပိုင်းပိုင်းဖြတ်ထုတ်ပစ်ရန် လိုအပ်သည့် ရာဇဝတ် အဖွဲ့အစည်း တစ်ခု အဖြစ် ဖော်ပြခဲ့သည်။

ထရမ့်အစိုးရအဖွဲ့၏ လုပ်ဆောင်ချက်များအား ဥပဒေကြောင်းအရ စိန်ခေါ်မှုများကို ထောက်ခံသော American Civil Liberties Union (ACLU) က နိုင်ငံတော်တရားရုံး၏ဆုံးဖြတ်ချက်ကို ကြိုဆိုခဲ့သည်။

“ပြည်ပအကူအညီငွေများကို ရပ်ပစ်မည့် သမ္မတ ဒေါ်နယ်ထရမ့်၏ ကြိုးပမ်းမှုသည် သမ္မတလုပ်ပိုင်ခွင့်အာဏာကို အဆင်ခြင်မဲ့ ရက်စက်သည့် မကြုံစဖူး အလွဲသုံးစားလုပ်မှုဖြစ်ကြောင်း” အမှုဆောင်ဒါရိုက်တာ အန်သိုနီ ရိုမီယိုက ထုတ်ပြန်ချက်တွင် ဖော်ပြခဲ့သည်။

“ကွန်ဂရက်က တရားဝင်ခွင့်ပြုပေးထားသည့် အစီအစဉ်များအတွက် ရန်ပုံငွေများကို ရပ်ဆိုင်းကြောင်း သမ္မတက တဖက်သတ် ကြေညာခြင်း က သမ္မတထရမ့်အနေဖြင့် ၎င်း၏လုပ်ပိုင်ခွင့်ကို ကျော်လွန် ဆောင်ရွက် နေသည်ဟု အောက်တရားရုံးက မှန်ကန်စွာ ဆုံးဖြတ်ခဲ့ပါကြောင်း” ဟု ရိုမီယိုက ဆက်လက်ဖော်ပြထားသည်။

ကိုးကား- Eleven

အစ္စလာမ်မာဘတ် မတ် ၄

ပါကစ္စတန်နိုင်ငံ၏ ဂေဟစနစ်ဖွံ့ဖြိုးတိုးတက်ရေးနှင့် စဉ်ဆက်မပြတ် ဖွံ့ဖြိုးတိုးတက်ရေးရည်မှန်းချက်များ အောင်မြင်စေရေးအတွက် တန်ဖိုးရှိသည့် တောရိုင်းတိရစ္ဆာန်များ ကာကွယ်စောင့်ရှောက်ရေးလုပ်ငန်းများကို ကြိုးပမ်းဆောင်ရွက်မည်ဟု ဝန်ကြီးချုပ် ရှာဘတ်ရှာရစ်က ယမန်နေ့တွင် ပြောကြားခဲ့သည်။

လူသားနှင့် သဘာဝတရားတို့ ဆက်သွယ်မှု၏ အရေးပါပုံကို ၎င်းက မီးမောင်းထိုးပြခဲ့သည်။ ပါကစ္စတန်နိုင်ငံတွင် သဘာဝတရားကပေးအပ်ထားသည့် ဆွဲဆောင်နိုင်သော ဇီဝမျိုးစုံမျိုးကွဲများတည်ရှိနေသောကြောင့် ၎င်းတို့ကို ထိန်းသိမ်းရမည့်တာဝန်မှာ အမျိုးသားရေးတာဝန်ဖြစ်သည်ဟု ၎င်းကပြောကြားသည်။ နိုင်ငံအတွင်း ဟိမဝန္တာဒေသရှိ နှင်းကျားသစ်၊ အိန္ဒုမြစ်မှ လင်းပိုင်နှင့် အာရေးဗျပင်လယ်မှ ဝေလငါးစသည့် ရှားပါးတိရစ္ဆာန်များ ရှိနေကြောင်းနှင့် ၎င်းတိရစ္ဆာန်များသည် အမျိုးသားရေးဆိုင်ရာ အမွေအနှစ်များအဖြစ်သာမက နိုင်ငံ၏ ဂေဟစနစ်နှင့် စီးပွားရေးဖွံ့ဖြိုးတိုးတက်မှုကို အကူအညီပေးနေကြောင်း ၎င်းကပြောကြားသည်။

ကမ္ဘာ့လူသားတစ်ရပ်လုံးနှင့် ကမ္ဘာကြီး၏ ကောင်းကျိုးအတွက် ဆောင်ရွက်သည့် အစိမ်းရောင်ပါကစ္စတန်စီမံကိန်းဖြင့် နိုင်ငံသားများအတွက် စီးပွားရေးဆိုင်ရာ အကျိုးကျေးဇူးများရရှိစေရေး ဆောင်ရွက်နေပြီး ဆင်စွယ်ဖြတ်တောက်ခြင်းကဲ့သို့သော လုပ်ငန်းများနှင့် တောရိုင်းတိရစ္ဆာန်များ၏ နေထိုင်ရာနေရာများကို ဖျက်ဆီးသည့်လုပ်ငန်းများကို တားဆီးနေကြောင်း ၎င်းက ပြောကြားသည်။

Source: ကြေးမုံသတင်းစာ

ဟောင်ကောင်အခြေစိုက် ကုမ္ပဏီတစ်ခုသည် ပနားမားတူးမြောင်းရှိ အဓိကဆိပ်ကမ်းနှစ်ခုကို လုပ်ကိုင်နေသည့် လုပ်ငန်းတစ်ခုမှ ရှယ်ယာများကို အမေရိကန်ကုမ္ပဏီတစ်ခုက ဦးဆောင်သည့် ရင်းနှီးမြှုပ်နှံသူ အဖွဲ့သို့ ရောင်းချရန် အစီအစဉ်များကို ကြေညာခဲ့သည်။ အဆိုပါ သဘောတူညီချက်သည် အမေရိကန်သမ္မတ ဒေါ်နယ်ထရမ့်က အရေးပါသည့် ရေလမ်းကြောင်းပေါ်တွင် တရုတ်ဩဇာလွှမ်းမိုးမှုရှိသည် ဟု စွပ်စွဲပြီး ဖိအားပေးမှုများ တိုးလာနေချိန်တွင် ရရှိခဲ့ခြင်းဖြစ်သည်။

အမေရိကန်သမ္မတက အမေရိကန်လွှတ်တော်နှစ်ရပ်၏ အထူး ပူးတွဲ အစည်းအဝေးတွင် ပနားမားတူးမြောင်းကို ပြန်လည်ရယူရန် ထိရောက်သော သံတမန်ရေးရာ ဖိအားပေးမှုများ ပြုလုပ်နေသည်ဟု ပြောကြားခဲ့သည်။ ၎င်းက ပနားမားတူးမြောင်းကို အမေရိကန် လူမျိုးများအတွက် အမေရိကန်က ဖန်တီးထားသည့် အရေးပါသည့် အခြေခံ အဆောက်အအုံစီမံကိန်းတစ်ခုဟု ဖော်ပြခဲ့သည်။

အာရှမှကုမ္ပဏီကြီးဖြစ်သည့် CK Hutchison Holdings သည် ပနားမား ဆိပ်ကမ်းကုမ္ပဏီ၏ ရှယ်ယာ ၉၀% ကို အမေရိကန် ရင်းနှီးမြှုပ်နှံမှုကုမ္ပဏီ BlackRock၊ ၎င်း၏ လက်အောက်ခံ Global Infrastructure Partners နှင့် ဂျီနီဗာအခြေစိုက် ကွန်တိန်နာတင် ဆိပ်ကမ်း အဓိက ကုမ္ပဏီ Terminal Investment တို့ပါဝင်သည့် အဖွဲ့သို့ ရောင်းချရန် သဘောတူညီခဲ့ကြောင်း CK Hutchison နှင့် BlackRock တို့က ပူးတွဲ ကြေညာချက်ထုတ်ပြန်ခဲ့သည်။

ပနားမားဆိပ်ကမ်းကုမ္ပဏီသည် တူးမြောင်း၏ ပစိဖိတ်နှင့် အတ္တလန္တိတ် ဝင်ပေါက်များတွင် တည်ရှိသည့် Balboa နှင့် Cristobal ဆိပ်ကမ်းများကို ၂၀၄၇ ခုနှစ်အထိ လုပ်ကိုင်ခွင့်ရရှိထားသည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ဒုတိယညွှန်ကြားရေးမှူး၊နစက-၂