DEMU ရထားနှင့် လေအိတ်ရထားများဖြင့်ပြေးဆွဲမည့် ရန်ကုန်- မန္တလေး ခရီးစဉ်အစအဆုံးအတွက် အချိန် ၁၁ နာရီသာ ကြာမြင့်မည်ဖြစ်ကြောင်း ပို့ဆောင်ရေးနှင့်ဆက်သွယ်ရေးဝန်ကြီးဌာန၏ အချက်အလက်များအရ သိရသည်။

ရန်ကုန် - နေပြည်တော် ခရီးစဉ်အမှတ် (၇) အဆန်ရထားနှင့် နေပြည်တော် - ရန်ကုန် ခရီးစဉ်အမှတ် (၈) အစုန် လူစီးရထားများကို ဂျပန်နိုင်ငံမှ ဝယ်ယူရောက်ရှိလာသည့် လေအေးပေးစက်ပါရှိသော ခေတ်မီ DEMU ရထားတွဲဆိုင်းသစ်များဖြင့်လည်းကောင်း၊ မန္တလေး - နေပြည်တော် ခရီးစဉ်အမှတ် (၂၈) အစုန်နှင့် နေပြည်တော် - မန္တလေး ခရီးစဉ်အမှတ် (၂၇) အဆန် လူစီးရထားများအား လေအိတ်ရထားတွဲဆိုင်းဖြင့် လည်းကောင်း ဖေဖော်ဝါရီ ၂၈ ရက်မှ စတင်ကာ ချိတ်ဆက်ပြေးဆွဲပေးသွားမည် ဖြစ်ကြောင်း သိရသည်။

အမှတ် (၇) အဆန် လေအေးပေးစက်ပါရှိသော ခေတ်မီ DEMU ရထား သည် နံနက် ၆ နာရီတွင် ရန်ကုန်ဘူတာမှ စတင်ထွက်ခွာ၍ နံနက် ၁၁ နာရီခွဲတွင် နေပြည်တော်ဘူတာသို့ ဆိုက်ရောက်မည်ဖြစ်ပြီး အမှတ် (၂၇) အဆန် လေအိတ်ရထားသည် နေ့လယ် ၁၂ နာရီတွင် နေပြည်တော် ဘူတာမှ စတင်ထွက်ခွာ၍ မန္တလေးဘူတာသို့ ညနေ ၅ နာရီတွင် ဆိုက်ရောက်မည်ဖြစ်ကြောင်း သိရသည်။

ထို့အတူ အမှတ် (၂၈) အစုန် လေအိတ်ရထားသည် နံနက် ၆ နာရီတွင် မန္တလေးဘူတာမှ စတင်ထွက်ခွာပြီး နံနက် ၁၁ နာရီတွင် နေပြည်တော် ဘူတာသို့ ဆိုက်ရောက်မည်ဖြစ်ကာ အမှတ် (၈) အစုန် လေအေးပေးစက် ပါရှိသော ခေတ်မီ DEMU ရထားသည် မွန်းတည့် ၁၂ နာရီတွင် နေပြည်တော် ဘူတာမှ စတင်ထွက်ခွာ၍ ညနေ ၅ နာရီခွဲတွင် ရန်ကုန် ဘူတာသို့ ဆိုက်ရောက်မည်ဖြစ်ကြောင်း သိရသည်။

လက်မှတ်နှုန်းထားအနေဖြင့် ရန်ကုန် - နေပြည်တော်၊ နေပြည်တော် - ရန်ကုန် ခရီးစဉ်အတွက် DEMU ရထားတွင် ပထမတန်း ငွေကျပ် ၁၉၀၀၀၊ အထက်တန်းငွေကျပ် ၂၈၀၀၀နှင့် မန္တလေး - နေပြည်တော်၊ နေပြည်တော် - မန္တလေး ခရီးစဉ်အတွက် လေအိတ်ရထားတွင် ရိုးရိုးတန်းငွေကျပ် ၇၀၀၀၊ အထက်တန်း ငွေကျပ် ၁၁၀၀၀ ဖြစ်ကြောင်း သိရသည်။

ခရီးသည်များအနေဖြင့် ရန်ကုန် - မန္တလေးနှင့် မန္တလေး - ရန်ကုန် ခရီးစဉ် အစအဆုံး လက်မှတ်ဝယ်ယူနိုင်ပြီး ပထမတန်း / ရိုးရိုးတန်း ငွေကျပ် ၂၆၀၀၀၊ အထက်တန်းငွေကျပ် ၃၉၀၀၀ ဖြစ်ကာ လက်မှတ်များကို သုံးရက် ကြိုတင်ရောင်းချပေးသွားမည်ဖြစ်ကြောင်း သိရသည်။

ခရီးသည်များအနေဖြင့် အဆိုပါ DEMU ရထားနှင့် လေအိတ်ရထားများအား နေပြည်တော်ဘူတာတွင် ပြောင်းလဲ စီးနင်းနိုင်ကာ ခရီးစဉ်တစ်လျှောက် ပဲခူး၊ ဖြူး၊ တောင်ငူ၊ နေပြည်တော်၊ သာစည်ဘူတာတို့၌ ရပ်တန့်ပေးသွား မည်ဖြစ်ကာ ခရီးစဉ်အစအဆုံး ဘူတာများတွင် ရပ်တန့်ချိန်အပါအဝင် ပြေးဆွဲချိန် ၁၁ နာရီသာ ကြာမြင့်မည်ဖြစ်ကြောင်းသိရသည်။

ကိုးကား - NP News

နိုင်ငံအတွင်းဖြစ်ပေါ်နေသည့် လေထုညစ်ညမ်းမှုကို ၂၀၂၅ ခုနှစ်အတွင်း အပြီးသတ်တိုက်ဖျက်နိုင်ရန် တရုတ်နိုင်ငံက စီစဉ်လျက်ရှိသည်။

တရုတ်နိုင်ငံသည်  ဆိုးရွားသည့် လေထုညစ်ညမ်းခြင်းကို အဆုံးသတ်နိုင်ရေးအတွက် ငါးနှစ်စီမံကိန်းကို အပြီးသတ်ဖော်ဆောင်နိုင်ရန် ကြိုးပမ်းလျက်ရှိပြီး ယင်းသို့ကြိုးပမ်းရာတွင် လေထုညစ်ညမ်းမှု ထိန်းချုပ်ရေး၊  ကာဗွန်ဒိုင်အောက်ဆိုက် ဓာတ်ငွေ့ထုတ်လွှတ်မှု လျှော့ချရေး၊ လေထု၏ အရည်အသွေးကို တိုးမြှင့်နိုင်ရေးနှင့်   ကြိုတင်သတိပေးစနစ်များ အသုံးပြုနိုင်ရေးတို့ကိုလည်း လုပ်ဆောင်လျက်ရှိသည်။

တရုတ်နိုင်ငံတွင် လေထုညစ်ညမ်းမှုကို  အဓိကဖြစ်ပေါ်စေသည့် အကြောင်းရင်းမှာ ညစ်ညမ်းစေသည့် ဓာတ်ငွေ့များနှင့် အရာဝတ္ထုများကို ထုတ်လွှတ်ခြင်းဖြစ်သည်။ အဆိုပါညစ်ညမ်းမှုများတွင် ခန့်မှန်းခြေအားဖြင့် နိုက်ထရိုဂျင်ဓာတ်ငွေ့ ၆၀ ရာခိုင်နှုန်းနှင့် အငွေ့ပြန်လွယ်သည့် အော်ဂဲနစ်ကွန်ပေါင်းများ၏ ၂၄ ရာခိုင်နှုန်းပါဝင်လျက်ရှိသည်။

တရုတ်အစိုးရသည် လေထုညစ်ညမ်းမှုကို  တိုက်ဖျက်ရန်အတွက်  ကမ္ဘာ့အကောင်းဆုံး လေထုညစ်ညမ်းမှု တိုက်ဖျက်ရေး  လုပ်ဆောင်မှုများနှင့် ကိုက်ညီမှုရှိသော ဓာတ်ငွေ့များ ထုတ်လွှတ်မှုဆိုင်ရာ သတ်မှတ်ချက်အသစ်များကို   ထုတ်ပြန်ရန်စီစဉ်လျက်ရှိသည်။

ထို့ပြင်  တရုတ်နိုင်ငံအနေဖြင့် ပတ်ဝန်းကျင် ညစ်ညမ်းမှုကို လျှော့ချနိုင်သည့် စွမ်းအင် အရင်းအမြစ်များကို အသုံးပြုသည့် မော်တော်ယာဉ်များနှင့် စက်ပစ္စည်းများကို လေဆိပ်များ၊ ဆိပ်ကမ်းများနှင့် ထောက်ပံ့ပို့ဆောင်ရေး စက်မှုဇုန်များတွင်  တိုးမြှင့် အသုံးပြုမည်ဖြစ်သည်။

Source: Myawady Web Portal

တောင်ကိုရီးယားနိုင်ငံ ဆိုးလ်မြို့တော် တောင်ပိုင်းရှိ အဝေးပြေးလမ်း ဆောက်လုပ်ရေးလုပ်ငန်းခွင်တစ်ခုသည် အင်္ဂါနေ့က ပြိုကျခဲ့ရာ လူ လေးဦးထက်မနည်း ‌သေဆုံးကာ ခြောက်ဦးဒဏ်ရာရရှိခဲ့သည်ဟု မီးသတ်အရာရှိများက ပြောကြားသည်။

ဆိုးလ်မြို့မှ ကီလိုမီတာ ၇၀ ခန့်အကွာရှိ Anseong အရပ်တွင် နံနက် ၉:၄၉ နာရီက အဆိုပါ မတော်တဆမှုဖြစ်ပွားခဲ့ခြင်းဖြစ်ပြီး အဝေးပြေးလမ်း တံတားကို ထောက်ကူသည့် မီတာ ၅၀ အရှည် ကွန်ကရစ်အဆောက်အအုံ ငါးခုကို ကရိန်းဖြင့် တစ်ခုပြီးတစ်ခု နေရာချနေစဉ် ပြိုကျမှုဖြစ်ခဲ့ခြင်းဟု ယွန်ဟပ်သတင်းဌာနက ဖော်ပြသည်။

ဖြစ်စဉ်တွင် တရုတ်နိုင်ငံသား နှစ်ဦး အပါအဝင် လူလေးဦး ‌သေဆုံးခဲ့ပြီး ဒဏ်ရာရခဲ့သူ ခြောက်ဦးတွင် ငါးဦးသည် စိုးရိမ်ရကြောင်းနှင့် ယင်းငါးဦးတွင်လည်း တရုတ်နိုင်ငံသားတစ်ဦး ပါဝင်ကြောင်း Anseong မီးသတ်ဌာန အရာရှိ ကိုကျွန်းမန်က ပြောဆိုသည်။

၎င်းတို့သည် တံတားပေါ်တွင် ကုန်းပတ်တပ်ဆင်နေကြသူများဖြစ်ပြီး တံတားပြိုကျခဲ့ချိန်တွင် ကုန်းပတ်ပေါ်ရှိ ၁၀ ယောက်လုံးသည် နှစ်ဖက်စလုံးမှ ပြုတ်ကျခဲ့ကြကြောင်း ကို က ရုပ်သံ သတင်းစာရှင်းလင်းပွဲတွင် ပြောကြားခဲ့သည်။

‌သေဆုံးခဲ့သူ လေးဦးတွင် အခြားနှစ်ဦးသည် တောင်ကိုရီးယားနိုင်ငံသားများဖြစ်သည်ဟု ပြည်ထဲရေးဝန်ကြီးဌာန အရာရှိတစ်ဦးက ပြောဆိုသည်။

နောက်ထပ်ပြိုကျမှုများ ထပ်မဖြစ်စေရေးနှင့် ပျောက်ဆုံးနေဖွယ်ရှိသူများကို ရှာဖွေရန်အတွက် ဝန်ထမ်းနှင့် အရင်းအမြစ်အားလုံးကို အသုံးပြုရန် ယာယီသမ္မတ Choi Sang-mok က တိုက်တွန်းခဲ့သည်။        
 
ရှာဖွေ ကယ်ဆယ်မှုများလုပ်ဆောင်ရန်အတွက် ရဟတ်ယာဉ် သုံးစီးနှင့် မီးသတ်ဝန်ထမ်း ၁၅၀ နီးပါး ပေးပို့ထားကြောင်း နိုင်ငံတော်မီးသတ်ဌာနက ပြောကြားခဲ့သကဲ့သို့ သယ်ယူပို့ဆောင်ရေးဝန်ကြီးဌာနကလည်း အခင်းဖြစ်နေရာသို့ အဖွဲ့တစ်ဖွဲ့ စေလွှတ်ထားကြောင်း ပြောကြားခဲ့သည်။

Source: Popular Myanmar

တံတားဦး၊ ဖေဖော်ဝါရီ - ၂၄

မန္တလေးတိုင်းဒေသကြီး၊ တံတားဦးခရိုင်၊ တံတားဦးမြို့နယ် မီးသတ်ဦးစီးဌာနမှ ပြည်သူများ ပွင့်လင်းရာသီရောက်ရှိပြီဖြစ်၍ မီးဘေးအန္တရာယ်ကင်းဝေးရေးနှင့် မီးလောင်ကျွမ်းမှုမဖြစ်ပေါ်စေရေး ၊ မီးဘေးသတိရှိရေး စသည်တို့ကို ရည်ရွယ်ပြီး မီးဘေးအန္တရာယ်ကြိုတင်ကာကွယ်ရေးအတွက် ဖေဖော်ဝါရီ ၂၂ ရက်၊ ညနေ (၅) နာရီအချိန်က မြို့ပေါ်ရပ်ကွက်များသို့ ကွင်းဆင်း၍ အသံချဲ့စက်ဖြင့် လိုက်လံအသိပေးနှိုးဆော်ခြင်းများ ဆောင်ရွက်ကြောင်းသိရသည်။

ထိုသို့အသိပေးနှိုးဆော်ဆောင်ရွက်ရာတွင် မြို့နယ်မီးသတ်ဦးစီးဌာန၊ မြို့နယ်ဦးစီးမှူး ဦးကျော်သူအောင် ဦးဆောင်ပြီး တပ်ဖွဲ့ဝင်များနှင့်အတူ မီးဘေးအန္တရာယ်ကြိုတင်ကာကွယ်ရေးအတွက်  ပြည်သူများအနေဖြင့် မိမိတို့ နေအိမ်များတွင် မီးချိတ် ၊ မီးကပ်  ၊ သဲပုံး ၊ ရေပုံးများနှင့် မီးသတ်ဆေးဘူးများ အဆင်သင့်ထားရှိကြရန်၊  လျှပ်စစ် မီးများအသုံးပြုရာတွင်လည်း မီးဘေးလုံခြုံရေးအတွက် အထူးဂရုပြုကိုင်တွယ်အသုံးပြုကြရန်၊ မီးဘေးအန္တရာယ် ကြုံတွေ့လာပါက သက်ဆိုင်ရာတာဝန်ရှိသူများနှင့် ချိတ်ဆက်ပြီး အချိန်နှင့်တစ်ပြေးညီ ဆောင်ရွက်ပေးကြရန် စသည်တို့ကို မြို့ပေါ်ရပ်ကွက်များနှင့် လမ်းဆုံလမ်းခွများ၌ မီးသတ်ယာဉ်ဖြင့်လှည့်လည်၍ မီးဘေးအန္တရာယ် ကြိုတင်ကာကွယ်ရေးလုပ်ငန်းများ ကွင်းဆင်းဆောင်ရွက်ပေးကြောင်းသိရသည် ။

မြို့နယ်မီးသတ်ဦးစီးဌာနအနေဖြင့် ပြည်သူများမီးဘေးလုံခြုံရေးအတွက် ရပ်ကွက်ကျေးရွာများသို့ တစ်အိမ်တက်တစ်အိမ်ဆင်းစစ်ဆေးခြင်း၊ မြို့မဈေးစစ်ဆေးခြင်း၊ စက်သုံးဆီဆိုင်များစစ်ဆေးခြင်း၊ ဌာနဆိုင်ရာများ မီးဘေးအန္တရာယ် သရုပ်ပြခြင်း၊ ပြည်သူလူထုအတွင်းမီးဘေးလုံခြုံရေး စိမ့်ဝင်ပျံ့နှံ့စေရန် အသိပညာပေးခြင်းများ၊ လက်ကမ်းစာစောင်ဖြန့်ဝေခြင်းများ အကောင်အထည်ဖော်ဆောင်ရွက်လျက်ရှိကြောင်းသိရသည် ။

ဦးရဲတင့် (ပြန်/ဆက်)

၀၉-၇၉၇၄၃၈၃၀၅

Toyota Motor သည် တိုကျိုအနောက်တောင်ဘက်၌ မြို့ပြလူနေမှုဘဝနှင့် နည်းပညာအသစ်များ ပေါင်းစပ်ဖန်တီးထားသည့် အနာဂတ်မြို့ တည်ဆောက်မှု ပထမအဆင့် ဆောက်လုပ်မှုလုပ်ငန်းများပြီးမြောက်ခဲ့ပြီး အကျယ်အဝန်း ၁၇၅ ဧက ခန့်ရှိမည့် ပထမအဆင့်တည်ဆောက်ရေး ပြီးမြောက်မှုနှင့် ပတ်သက်၍ Toyota က ဖေဖော်ဝါရီ ၂၂ ရက်နေ့က ပြသခဲ့ပါသည်။

Toyota သည် “Woven City” ဟု အမည်ပေးထားသည့် စီမံကိန်းအတွက် ၂၀၂၁ ခုနှစ်တွင် Shizuoka ခရိုင် Susono မြို့၌ လုပ်ငန်းစတင်ခဲ့ပါသည်။

အဆိုပါ မြို့ပြဧရိယာသည် နေထိုင်သူများအတွက် ရွေ့လျားသွားလာမှုဆိုင်ရာ ရှုထောင့်အမျိုးမျိုးကိုပြသမည်ဖြစ်သည်ဟု Toyota က ရှင်းလင်း ပြသခဲ့ပြီး အလိုအလျောက်မောင်းနှင်နိုင်သောယာဉ်များအတွက် သီးသန့် လမ်း၊ အခြားသယ်ယူပို့ဆောင်ရေးအတွက် အသုံးပြုသည့်လမ်းနှင့် လူသွားလမ်းများ ပါရှိမည် ဖြစ်ပါသည်။

သယ်ယူပို့ဆောင်ရေးယန္တရားအမျိုးမျိုး၌ ဘေးကင်းလုံခြုံရေး စစ်ဆေးမှုများ လုပ်ဆောင်မည်ဖြစ်သည်ဟု Toyota က ပြောပါသည်။

အဆိုပါမြို့တွင် အိမ်တိုင်ရာရောက် ပစ္စည်းပို့သည့်ဝန်ဆောင်မှုနှင့် အမှိုက်သိမ်းယူမှုအတွက် မြေအောက်လမ်းတစ်ခု ထားရှိမည်ဖြစ်ပြီး အဆင့်မြင့်ဒီဂျစ်တယ်နည်းပညာများနှင့် အလိုအလျောက် လှုပ်ရှားသွားလာနိုင်သည့် စက်ရုပ်များကိုလည်း စမ်းသပ်မည်ဖြစ်သည်။

ကုမ္ပဏီအရာရှိများနှင့် ၎င်းတို့မိသားစုများအပါအဝင် လူ ၃၆၀ ခန့်သည် ယခုနှစ်၏ ဒုတိယနှစ်ဝက်တွင် အဆိုပါမြို့ကို စတင်ရွှေ့ပြောင်းမည် ဖြစ်သည်ဟု Toyota က ဆိုထားကာ နောက်ပိုင်း၌ လူ ၂,၀၀၀ ခန့် နေထိုင်နိုင်မည် ဖြစ်ပါသည်။

ကိုးကား-NHK World

ဘာသာပြန်ဆိုသူ-ဦးဝင်းဇော်ထွန်း၊ဒုတိယညွှန်ကြားရေးမှူး၊နစက-၂

၂၀၂၅ ခုနှစ်၊ ဖေဖော်ဝါရီ ၂၁ ရက် နံနက် ၁၀ နာရီ ၃၅ မိနစ်တွင် ကျိုင်းတုံခရိုင်ရဲတပ်ဖွဲ့မှ တပ်ဖွဲ့ဝင်များ၊ နယ်မြေခံတပ်မတော်သားများပါဝင်သော ပူးပေါင်းအဖွဲ့က ရှမ်းပြည်နယ်(အရှေ့ပိုင်း)၊ ကျိုင်းတုံမြို့နယ်၊ ပန်မတ်ကျေးရွာတောင်ဘက် ၃ မိုင်ခန့်အကွာရှိ အမြင့်သုံးပေခန့် ဘိန်းခင်း ငါးဧကခန့်နှင့် ပန်မတ်ကျေးရွာတောင်ဘက် ၁၁ မိုင်ခန့်အကွာရှိ အမြင့်နှစ်ပေခွဲခန့် ဘိန်းခင်း ငါးဧကခန့်တို့အား ဖျက်ဆီးခြင်းများဆောင်ရွက်ခဲ့ကြောင်း သတင်းရရှိသည်။

Source: www.moha.gov.mm 

ရွှေ့ပြောင်းအခြေချနေထိုင်သူများ ခိုလှုံရာနေရာအဖြစ် Manhattan ဧရိယာ၏ အလယ်၌ ဖွင့်လှစ်ထားသည့် Roosevelt Hotel ဟိုတယ်ကို မကြာမီ ပိတ်သိမ်းသွားမည်ဖြစ်ကြောင်းနယူးယောက်မြို့တော်ဝန် Eric Adams က ဖေဖော်ဝါရီ ၂၄ ရက်နေ့တွင် ကြေညာခဲ့ပါသည်။

တောင်အမေရိကနှင့် အခြားဒေသများမှ ရောက်ရှိလာသည့် ရွှေ့ပြောင်းအခြေချနေထိုင်သူများ တိုးမြင့်လာခဲ့ရာ ၎င်းတို့အတွက် အဆိုပါ ဟိုတယ်ကို ၂၀၂၃ ခုနှစ်၊ မေလတွင် ပြန်လည်မွမ်းမံပြီး ခိုလှုံရာနေရာအဖြစ် ဘိုင်ဒင် အစိုးရက ဖွင့်လှစ်ပေးခဲ့ခြင်းဖြစ်သည်။

ဒုက္ခသည်အဖြစ် လျှောက်ထားသူအရေအတွက် များစွာတိုးမြင့်ခဲ့သည့် ကာလတွင် ပျမ်းမျှအားဖြင့် တစ်ပတ်လျှင် ရွှေ့ပြောင်းအခြေချနေထိုင်သူ ၄,၀၀၀ ခန့် ရှိခဲ့ကြောင်း Adams က ဆိုခဲ့ပြီး မကြာသေးမီလများအတွင်း တစ်ပတ်လျှင် ရွှေ့ပြောင်းအခြေချနေထိုင်သူ ၃၅၀ ခန့်အထိ အရေအတွက် ကျဆင်းသွားခဲ့သည်ဟု ၎င်းကဆိုပါသည်။

အမေရိကန်သမ္မတ Donald Trump ဒုတိယအကြိမ် တာဝန်ထမ်းဆောင်ပြီးနောက် တရားမဝင် ရွှေ့ပြောင်းအခြေချနေထိုင်မှုဆိုင်ရာ အစီအမံများကို တင်းကျပ်လာမှုနှင့်အတူ နယူးယောက်မြို့တွင်လည်း ယခုကဲ့သို့ ဆောင်ရွက်လာခြင်း ဖြစ်ပါသည်။

နယူးယောက်သည် လစ်ဘရယ်ဆန်သည့် လူဝင်မှုကြီးကြပ်ရေး မူဝါဒများကို ကိုင်ဆွဲထားလေ့ရှိပြီး ဒီမိုကရက်တစ်ပါတီဝင် မြို့တော်ဝန်သည် တရားမဝင် ရွှေ့ပြောင်းအခြေချနေထိုင်မှုဆိုင်ရာ ကိစ္စရပ်များ၌ Trump နှင့် ပူးပေါင်းဆောင်ရွက်သည့် ရပ်တည်ချက်ကို စတင် လုပ်ဆောင်လာခြင်း ဖြစ်သည်။

အဆိုပါလုပ်ဆောင်မှုအား Adams ၏ အကျင့်ပျက်ခြစားမှုဆိုင်ရာ စွဲချက်များအပေါ် အစိုးရရှေ့နေများက ရုပ်သိမ်းပေးရန် သမ္မတ Trump ၏ အစိုးရအဖွဲ့က အမိန့်ပေးခဲ့ခြင်းနှင့် ဆက်နွှယ်နေနိုင်ကြောင်း ဝေဖန်မှုများ ထွက်ပေါ်လျက်ရှိပါသည်။

ကိုးကား-NHK World

ဘာသာပြန်ဆိုသူ-ဦးဝင်းဇော်ထွန်း၊ဒုတိယညွှန်ကြားရေးမှူး၊နစက-၂

ဒူဘိုင်းအခြေပြု  Cryptocurrency exchange ကုမ္ပဏီကြီးဖြစ်သည့် ByBit က ၎င်းတို့၏ ဝန်ဆောင်မှုစနစ်အတွင်းသို့ ထိုးဖောက်ဝင်ရောက်၍  ဒစ်ဂျစ်တယ်ငွေကြေးများအား ခိုးယူသွားသည့် ဟက်ကာများကို ဖမ်းဆီးပေးနိုင်ရန် အကူအညီပေးသူများအား ဆုငွေအဖြစ်  ဒေါ်လာသန်း ၁၄၀ အထိ ပေးအပ်မည်ဟုကြေညာသည်။

ByBit ကုမ္ပဏီသည် သမိုင်းတစ်လျှောက်တွင်  အကြီးမားဆုံး  Cryptocurrency ခိုးယူမှုဟုယူဆရသည့်ဖြစ်ရပ်နှင့် ကြုံတွေ့ခဲ့ရပြီး   ဟက်ကာများသည် နေ့စဉ်ရောင်းဝယ်မှုပြုလုပ်နေသည့် warm wallet ဟုအမည်ပေးထားသည့်   ဒစ်ဂျစ်တယ်ငွေကြေးသိုလှောင်မှုစနစ်ကို ဖေဖော်ဝါရီလ ၂၁ ရက်တွင်  ထိန်းချုပ်၍  ယင်းစနစ်မှ ဒေါ်လာ  ၁ ဒသမ ၅ ဘီလီယံတန်ဖိုးရှိ ငွေကြေးနှင့်လဲလှယ်နိုင်သည့် ဒစ်ဂျစ်တယ် ငွေကြေးများကို ခိုးယူသွားခြင်းဖြစ်သည်။

ထို့ကြောင့် ဒစ်ဂျစ်တယ်ငွေကြေးများအား ခိုးယူသွားသည့် ဟက်ကာများကို ဖမ်းဆီးနိုင်ရေးအတွက် အကူအညီပေးနိုင်သူအား ခိုးယူခံရသည့်ငွေကြေး၏ ၁၀ ရာခိုင်နှုန်းခန့်ကို ဆုငွေအဖြစ်ပေးအပ်မည်ဟု ByBit တည်ထောင်သူ ဘန်ကျူက   ၎င်းတို့၏ဝက်ဆိုက်၌  ဖေဖော်ဝါရီလ ၂၂ ရက်တွင် ကြေညာခြင်းဖြစ်သည်။

ယခုဖြစ်ပွားသည့် ဆိုက်ဘာတိုက်ခိုက်မှုသည် ByBit ကုမ္ပဏီအတွက်သင်ခန်းစာဖြစ်ပြီး  ၎င်းတို့၏  လုံခြုံရေးစနစ်ကို ပြန်လည်အဆင့်မြှင့်တင်တည်ဆောက်မည်ဖြစ်ကြောင်း ၎င်းကဆက်လက်ပြောကြားထားသည်။                           

Ref: Ivt

Source: Myawady Web Portal

လာမည့်ဖေဖော်ဝါရီ ၂၈ ရက်မှစတင်၍ နေပြည်တော်- ရန်ကုန်- နေပြည်တော် ခရီးစဉ်အား ဂျပန်နိုင်ငံမှ ဝယ်ယူရောက်ရှိလာသည့် ခေတ်မီ DEMU ရထားတွဲဆိုင်းသစ်များဖြင့် စတင်ပြေးဆွဲပေးမည် ဖြစ်ကြောင်း ပို့ဆောင်ရေးနှင့်ဆက်သွယ်ရေး ဝန်ကြီးဌာန၏ အချက်အလက်များအရ သိရသည်။

အဆိုပါခေတ်မီ DEMU ရထားတွဲဆိုင်းဖြင့် နေပြည်တော်မှ ရန်ကုန်အထိ စတင် စမ်းသပ်ပြေးဆွဲသည့် ခရီးစဉ်အဖြစ် ဖေဖော်ဝါရီ ၂၁ ရက်တွင် ခရီးသွားပြည်သူ ၁၃၀ လိုက်ပါစီးနင်းခဲ့ပြီး နေပြည်တော်မှရန်ကုန်သို့ ဘူတာစဉ် ရပ်တန့်ချိန်များအပါအဝင် ခရီးသွားချိန် ၅ နာရီ မိနစ် ၅၀ ကြာမြင့်ကြောင်း သိရှိရသည်။

အဆင့်မြှင့်တင်ပြီးဖြစ်သည့် ရန်ကုန်-နေပြည်တော် ရထားလမ်းပိုင်း၌ ဖေဖော်ဝါရီ ၂၈ ရက်တွင် စတင်ပြေးဆွဲမည့် DEMU ရထားတွင် ပထမတန်း လေးတွဲ၊ အထက်တန်းနှစ်တွဲ စုစုပေါင်း တွဲဆိုင်းခြောက်တွဲဖြင့် ခရီးသည် ၃၁၂ ဦး လိုက်ပါစီးနင်းနိုင်မည်ဖြစ်ကြောင်း သိရသည်။

နေပြည်တော် - မန္တလေးပြေးဆွဲမည့် လေအိတ်ရထားခရီးစဉ်အတွက် ရိုးရိုးတန်းလေးတွဲ၊ အထက်တန်းနှစ်တွဲ စုစုပေါင်း တွဲဆိုင်းခြောက်တွဲဖြင့် ခရီးသည် ၃၃၀ စီးနင်းနိုင်မည်ဖြစ်ကာ ရထားအချိန်စာရင်းနှင့် လက်မှတ်ခနှုန်းထားတို့ကို မြန်မာ့မီးရထားမှ ထပ်မံထုတ်ပြန်မည်ဖြစ်ကြောင်း သိရသည်။

ခရီးသည်များအနေဖြင့် အဆိုပါ DEMU ရထားနှင့် လေအိတ်ရထားများကို နေပြည်တော်ဘူတာတွင် ပြောင်းလဲလိုက်ပါ စီးနင်းနိုင်မည် ဖြစ်ကြောင်း သိရသည်။

ရန်ကုန် - မန္တလေး ခရီးစဉ်တစ်လျှောက် ပဲခူး၊ ဖြူး၊ တောင်ငူ၊ နေပြည်တော်၊ သာစည်ဘူတာတို့၌ ရပ်တန့်ပေးသွားမည်ဖြစ်ပြီး မြန်မာ့မီးရထားအနေဖြင့် ခေတ်မီလူစီးတွဲများ ဖြည့်တင်း/ထုတ်လုပ်ခြင်း၊ ရထားလမ်းအဆင့်မြှင့်တင်ခြင်း၊ ဘူတာရုံများ အဆင့်မြှင့်တင်ခြင်းတို့ကိုလည်း ဆောင်ရွက်လျက်ရှိကြောင်း သိရသည်။

ကိုးကား-NP News

တူကီယဲနိုင်ငံ     အစ္စတန်ဘူမြို့တွင် နှင်းမုန်တိုင်းတိုက်ခတ်မှုကြောင့် သယ်ယူပို့ဆောင်ရေး လမ်းကြောင်းများ ပြတ်တောက်သွားပြီး    စာသင်ကျောင်းများကိုလည်း ပိတ်ပစ်ခဲ့ရကြောင်း သိရသည်။

နှင်းမုန်တိုင်းသည်  အစ္စတန်ဘူမြို့၌ ဖေဖော်ဝါရီလ ၂၀ ရက်မှ စတင်တိုက်ခတ်ခဲ့ခြင်းဖြစ်ပြီး မြို့အတွင်းရှိ စာသင်ကျောင်းများကို နှစ်ရက်ဆက်တိုက် ပိတ်ထားခဲ့ရကြောင်း၊ နှင်းမုန်တိုင်းတိုက်ခတ်မှုကြောင့် အပူချိန်သည် ဖေဖော်ဝါရီလ ၂၁ ရက်တွင် ပိုမိုကျဆင်းခဲ့ပြီး ဆီးနှင်းများကျဆင်းမှုမှာလည်း အမြင့်ဆုံးအဆင့်သို့ ရောက်ရှိလာခဲ့သည်။

မြို့အတွင်း   ဆီးနှင်းများကျဆင်းမှုကြောင့် မော်တော်ဆိုင်ကယ်စီးနင်းခြင်းကို တားမြစ်ထားကြောင်း   အစ္စတန်ဘူမြို့တော်ဝန်   ဒါဗွက်ဂူးကပြောသည်။

ဆီးနှင်းကျဆင်းမှုကြောင့် အိမ်ခြေမဲ့ ၁၀၀၀ ကျော်အား  ယာယီခိုနားဆောင်များသို့ ပို့ဆောင်ထားကြောင်းသိရသည်။

နှင်းမုန်တိုင်းတိုက်ခတ်မှုသည် လာမည့်ရက်သတ္တပတ် အစောပိုင်းအထိ ဆက်လက်ဖြစ်ပွားနိုင်ပြီး အပူချိန်မှာလည်း သုညဒီဂရီ အောက်သို့ ကျဆင်းနိုင်ကြောင်း အာဏာပိုင်အဖွဲ့က ခန့်မှန်းထားသည်။

Source: Myawady Web Portal