အမေရိကန်ပြည်ထောင်စုသည် ၂၀၂၅ ခုနှစ်အစောပိုင်းတွင် ဗီယက်နမ် ခရီးသွားလုပ်ငန်းအတွက် အများဆုံးလာရောက်လည်ပတ်သော နိုင်ငံ ၁၀ နိုင်ငံစာရင်း၌ ထိပ်ဆုံးမှရပ်တည်နေပြီး ၎င်းနောက်တွင် ဩစတြေးလျနှင့် အိန္ဒိယနိုင်ငံတို့က ရပ်တည်နေကြောင်း မကြာသေးမီက အစီရင်ခံစာ တစ်စောင်၌ ဖော်ပြသည်။

ဗီယက်နမ် အမျိုးသားခရီးသွားလာရေးအာဏာပိုင်အဖွဲ့က Google ၏ Destination Insights မှ ဒေတာများကို ကိုးကား၍ အခြား လာရောက် လည်ပတ်မှုအများဆုံးနိုင်ငံများမှာ ဂျပန်၊ တောင်ကိုရီးယား၊ စင်္ကာပူ၊ ဗြိတိန်၊ ကနေဒါ၊ ဂျာမနီနှင့် မလေးရှားနိုင်ငံတို့ ဖြစ်ကြောင်း ဖော်ပြခဲ့သည်။

၂၀၂၄ ခုနှစ်၊ နိုဝင်ဘာလကုန်မှ ၂၀၂၅ ခုနှစ်၊ ဇန်နဝါရီလအတွင်း ဗီယက်နမ်နိုင်ငံရှိ လေ့လာလည်ပတ်ရာနေရာများသို့ လာရောက်မှုများ သည် ၂၀၂၃ ခုနှစ် ကာလတူနှင့်နှိုင်းယှဉ်ပါက ၁၅-၃၀% အထိ မြင့်တက် လာခဲ့သည်။ အဆိုပါတိုးတက်မှုသည် ဖေဖော်ဝါရီလအစောပိုင်းအထိ ဆက်လက်တည်ရှိခဲ့ပြီး လာရောက်လည်ပတ်မှုပမာဏသည် ၃၀-၄၅% အထိ မြင့်တက်လာခဲ့သည်။

Google ၏ အစီရင်ခံစာသည် ဗီယက်နမ်နိုင်ငံသို့ လာရောက် လည်ပတ်သည့် အမေရိကန်ခရီးသွားဧည့်သည်များ တိုးပွားလာမှုနှင့် ကိုက်ညီနေသည်။

၂၀၂၄ ခုနှစ်၊ နိုဝင်ဘာလတွင် ဗီယက်နမ်နိုင်ငံသို့ အမေရိကန်ခရီးသွား ၆၉,၂၃၇ ဦး လာရောက်လည်ပတ်ခဲ့ပြီး၊ ယခင်နှစ်နှင့်နှိုင်းယှဉ်ပါက ၁၆% တိုးတက်လာခဲ့သည်။ ဒီဇင်ဘာလတွင် ၇၃,၀၀၀ အထိ မြင့်တက်လာခဲ့ပြီး ၂၀၂၅ ခုနှစ်၊ ဇန်နဝါရီလတွင် ၉၂,၀၀၀ အထိ ရောက်ရှိလာကာ ယခင်နှစ် နှင့်နှိုင်းယှဉ်ပါက ၂၅% တိုးတက်မှု ရှိခဲ့သည်။

၂၀၂၅ ခုနှစ်၊ ဇန်နဝါရီလတွင် ဗီယက်နမ်နိုင်ငံသည် နိုင်ငံခြားခရီးသွား ၂.၁ သန်းကို လက်ခံခဲ့ရပြီး မှတ်တမ်းများအရ အမြင့်ဆုံးလစဉ် ဧည့်သည် အရေအတွက် ဖြစ်သည်။

ယခုနှစ်အတွက် ဗီယက်နမ်နိုင်ငံသည် နိုင်ငံခြားခရီးသွား ၂၂ -၂၃ သန်း လက်ခံရန် ရည်မှန်းထားပြီး ယခင်နှစ်က နိုင်ငံခြားခရီးသွား ၁၇.၆ သန်း ကို လက်ခံခဲ့သည်။

ကိုးကား-VN Express

နာမည်ကျော် ဂန္တဝင်အဆိုတော်ကြီး ခင်ညွန့်ရီ ကင်ဆာရောဂါဖြင့် ကွယ်လွန်ခဲ့ကြောင်း မြန်မာနိုင်ငံဂီတအစည်းအရုံးထံမှ သိရသည်။

အသက်(၇၅)နှစ်ရှိပြီဖြစ်သည့် တေးသံရှင် ဒေါ်ခင်ညွန့်ရီသည် ဖေဖော်ဝါရီ ၂၀ ရက်၊ ည ၁၁ နာရီ ၅ မိနစ်တွင် ရန်ကုန်ပြည်သူ့ဆေးရုံကြီး ကင်ဆာကုသဆောင်တွင် တက်ရောက်ကုသနေစဥ် ကွယ်လွန်ခဲ့ခြင်း ဖြစ်ကြောင်း သိရသည်။

၎င်းသေဆုံးမှုနှင့်ပတ်သက်၍ “အမေ (အညာသူကြီး) (၂၀.၂.၂၀၂၅) ည ၁၁:၅ မိနစ်မှာ သူချစ်တဲ့အနုပညာ ၊ သူချစ်တဲ့ပရိတ်သတ်များကို ထာဝရ စွန့်ခွာသွားပါပြီ" ဟု သမီးဖြစ်သူ အိုပြည့်ရှင်က ၎င်း၏လူမှုကွန်ယက် စာမျက်နှာတွင် ရေးသားထားသည်။

အဆုတ်ကင်ဆာဝေဒနာခံစားနေရသည့် အဆိုတော်ကြီး ခင်ညွန့်ရီသည် ပြီးခဲ့သည့် ဇန်နဝါရီ (၃၀) ရက်မှ စတင်ကာ ရန်ကုန်ပြည်သူ့ဆေးရုံကြီး ကင်ဆာဌာနတွင် တက်ရောက်ကုသမှု ခံယူနေခြင်းဖြစ်ကြောင်း သိရသည်။

“ခင်ညွန့်ရီက ဝါသနာအရမ်းကြီးတာ။ မြန်မာမှုဂီတမှာတော့ သူ့မှတ်တိုင် တစ်ခုတော့ရှိတာပေါ့။ ဘယ်လောက်ပဲဘဝ‌တွေ ကုန်လွန်သွားပါစေ သူ့အနုပညာကတော့ မြန်မာနိုင်ငံမှာ ရှင်သန်နေမှာပဲလေ။ မြန်မာမှု ဂီတသမားတွေ အခုလို အင်အားနည်းနေတဲ့အချိန်မှာ တန်ဖိုးရှိတဲ့ ဂီတသမား ဆုံးရှုံးသွားတာကတော့ ဂီတလောကအတွက်ရော၊ တိုင်းပြည်အတွက်ရော၊ မြန်မာမှုအတွက်ပါ အများကြီးဆုံးရှုံးမှုဖြစ်ပါတယ်။ ဘယ်လိုပဲပြောပြော သူကတိုင်းပြည်အတွက်ရော၊ ဂီတလောကအတွက်ရော ထင်ရှားတဲ့ ပုဂ္ဂိုလ်ဖြစ်တဲ့အတွက် သူ့မိသားစုနဲ့ ထပ်တူထပ်မျှ ဝမ်းနည်းပါတယ်" ဟု မြန်မာနိုင်ငံဂီတအစည်းအရုံးဥက္ကဋ္ဌ ဦးလွင်မြင့်က NP News ကို ပြောသည်။

ဒေါ်ခင်ညွန့်ရီသီဆိုခဲ့သည့် “လွမ်းငွေ့ဝေဝေ”၊ “သောကသူဋ္ဌေးမလေး”၊ “မလွမ်းဘယ်သူနေပါ့မယ်”နှင့် “နှင်းဆီမလေး ချစ်ပုံပြင်” ဆိုသည့် သီချင်းများသည် ယနေ့ထိ လူကြိုက်များ ထင်ရှားနေဆဲဖြစ်သည်။

ကိုးကား-NP News

သီရိလင်္ကာနိုင်ငံ အလယ်ပိုင်းက သားရိုင်းတိရစ္ဆာန် ထိန်းသိမ်းရေးစခန်းတစ်ခုအနားတွင် ခရီးသည်တင်ရထားတစ်စင်းသည် ဆင်အုပ်နှင့် တိုက်မိပြီး လမ်းချော်မှု ဖေဖော်ဝါရီ ၂၀ ရက် (ကြာသပတေးနေ့) နံနက် အစောပိုင်း က ဖြစ်ပွားခဲ့ပါသည်။

ရထားပေါ်ပါ ခရီးသည်များ ထိခိုက်ဒဏ်ရာရမှု မရှိသော်လည်း ကိုလံဘို မြို့တော် အရှေ့ပိုင်း ဟာဘာရန အရပ်တွင် ဖြစ်ပွားခဲ့သည့် အဆိုပါ ဖြစ်ရပ်ကြောင့် ဆင် ၆ ကောင် သေဆုံး သွားပါသည်။

ထို့အပြင် ဆင် ၂ ကောင်လည်း ဒဏ်ရာရရှိသွားသဖြင့် ကုသပေးနေရပြီး “ထိုဖြစ်ရပ်သည် သမိုင်းတွင် အဆိုးရွားဆုံး သားရိုင်းတိရစ္ဆာန် ထိခိုက် သေဆုံးမှု” ဟု ရဲက ပြောကြားခဲ့ကြောင်း AFP သတင်းတွင် ဖော်ပြထားပါသည်။

သီရိလင်္ကာတွင် ယခုကဲ့သို့ ဆင်အုပ်ကို ရထားတိုက်မိခြင်းသည် ဖြစ်လေ့ဖြစ်ထရှိသည့်ကိစ္စဖြစ်ပြီး အလားတူ ဆင်ရော လူများပါ သေဆုံးမှု ကမ္ဘာ ပေါ်တွင် အများဆုံးရှိသည့် နိုင်ငံ ဖြစ်ပါသည်။

လူနှင့် ဆင် မတော်တဆ ဖြစ်ရပ်များကြောင့် လူအယောက် ၁၇၀ ကျော် နှင့် ဆင်အကောင်ရေ ၅၀၀ နီးပါး ဆုံးရှုံး ခဲ့ရပါသည်။

ထို့အပြင် နှစ်စဉ် ရထားတိုက်မှုကြောင့် ဆင်အကောင်ရေ ၂၀ ဝန်းကျင် သေဆုံးလေ့ရှိကြောင်း ဒေသတွင်း သတင်းများတွင် ရေးသားထားပါသည်။

သစ်တောပြုန်းတီးမှုများနှင့် အရင်းအမြစ် လျော့ပါးလာမှုများကြောင့် သဘာဝပတ်ဝန်းကျင်အပေါ် မှီခိုနေထိုင်ရသည့် ဆင်များအပေါ် သက်ရောက်မှု ရှိလာချိန်တွင် လူများ၏ပယောဂကြောင့် ဆင်အသက် ဆုံးရှုံးမှုလည်း တိုးလာနေပါသည်။

တချို့ကလည်း ရထားမောင်းသမားများကို ဖြည်းဖြည်းမောင်းကြရန်နှင့် ရထားလမ်းပေါ် တိရစ္ဆာန် ဖြတ်ကူးသည်ကို မြင်ပါက ဥသြသံပေး၍ သတိပေးရန် တိုက်တွန်းထားပါသည်။

၂၀၁၈ ခုနှစ်ကလည်း ယခု အခင်းဖြစ်ပွားသည့် ဟာဘာရနတွင် ရထားတိုက်မှုကြောင့် ကိုယ်ဝန်ဆောင် ဆင်မိခင်ကြီးနှင့် ဆင်ကလေး နှစ်ကောင် သေဆုံးသွားပါသည်။

အာရုံတက်ချိန် ရထားလမ်းကို ဖြတ်ကူးသည့် ဆင်အုပ်များတွင် အဆိုပါ ဆင်သုံးကောင် ပါဝင်ခြင်း ဖြစ်ပါသည်။ ၂၀၂၄ ခုနှစ်၊ အောက်တိုဘာလ တွင် ဟာဘာရနနှင့် ၁၅ မိုင်ခန့်ဝေးသည့် မင်နာရီရာ အရပ်တွင် ဆင်အုပ်ကို ရထားတိုက်မှု ဖြစ်ပွားခဲ့မှုကြောင့် ဆင် ၂ ကောင်သေဆုံးပြီး ဆင် ၁ ကောင် က ဒဏ်ရာရသွားခဲ့ပါသည်။

သီရိလင်္ကာတွင် ဆင်ရိုင်း အကောင် ၇,၀၀၀ နီးပါး ရှိကြောင်း ခန့်မှန်းထားကြပြီး ဗုဒ္ဓဘာသာဝင် အများစုနေထိုင်ရာ တိုင်းပြည်ဖြစ်သောကြောင့် ဆင်ကဲ့သို့ တိရစ္ဆာန်များကို အမြတ်တနိုး ဆက်ဆံလေ့ရှိသည့်အပြင် ဥပဒေအရလည်း အကာအကွယ်ပေးထားပါသည်။

ဆင်တစ်ကောင်ကို သတ်လျှင် ရာဇဝတ်မှုမြောက်ပြီး ထောင်ဒဏ် သို့မဟုတ် ငွေဒဏ်အပြစ်ပေးခံရနိုင်ပါသည်။

ကိုးကား- BBC News

တံတားဦး ၊ ဖေဖော်ဝါရီ - ၂၁

မန္တလေးတိုင်းဒေသကြီး၊ ကျောက်ဆည်ခရိုင်၊ တံတားဦးမြို့နယ် ကျေးလက်လမ်းဖွံ့ဖြိုးရေးဦးစီးဌာန၏ ၂၀၂၄-၂၀၂၅ ဘဏ္ဍားရေးနှစ် ပြည်ထောင်စု(လမ်းပြင်ဆင်ထိန်းသိမ်းခြင်း) ရန်ပုံငွေဖြင့် ဌာနမှ တာဝန်ယူ ဆောင်ရွက်လျက်ရှိသော သားများဘ ကျေးရွာအဝင်လမ်း (0km-2km)အတွင်း လမ်းတာဘောင်ပျက်စီးသော အပိုင်းများအား ဂျင်းခင်းပြုပြင်ခြင်း(0.26kmx 4.57m x100mm)လုပ်ငန်းဆောင်ရွက်ပြီးစီးမှု အခြေအနေအား ယမန်နေ့ မွန်းလွဲပိုင်းက မန္တလေးတိုင်းဒေသကြီး ကျေးလက်လမ်းဖွံ့ဖြိုးရေးဦးစီးဌာန ညွှန်ကြားရေးမှူး (မြို့ပြ) ဦးကျော်ဇေယျာဝင်း ၊ ကျောက်ဆည်ခရိုင် လက်ထောက်ညွှန်ကြားရေးမှူး(မြို့ပြ) ၊ တံတားဦးမြို့နယ်တာဝန်ခံ ဒေါ်သန္တာဝင်းနှင့် တာဝန်ရှိသူများ လိုက်ပါ၍ ကွင်းဆင်းကြည့်ရှုစစ်ဆေးခဲ့ကြောင်းသိရသည် ။

ထိုသို့ကွင်းဆင်းစစ်ဆေးရာတွင် မန္တလေးတိုင်းဒေသကြီး ကျေးလက်လမ်းဖွံ့ဖြိုးရေးဦးစီးဌာန ညွှန်ကြားရေးမှူးက လမ်းများရေရှည်တည်တံ့ခိုင်မာရေး၊ လုပ်ငန်းများကိုစနစ်တကျဆောက်လုပ်ရေး၊ သတ်မှတ်ချိန် အတွင်း အချိန်မီပြီးစီးရေးနှင့် အရည်အသွေးပြည့်မီရေးတို့ ဆောင်ရွက်ပေးစေလိုကြောင်း ပြောကြားပြီး တာဝန်ရှိ သူများ၏ တင်ပြချက်များအပေါ် လိုအပ်သည်များကို ပေါင်းစပ်ညှိနှိုင်းဆောင်ရွက်ပေးသည်။

အဆိုပါလမ်းမှာ သားများဘကျေးရွာ အနီးရှိကျေးရွာ (၃) ရွာမှ အိမ်ခြေ(၅၁၈)အိမ်ရှိ လူဦးရေ (၂၃၇၇)ဦး တို့၏ ပညာရေး၊ ကျန်းမာရေး၊ ကုန်စည်စီးဆင်းရေးတို့ကို အလွယ်တကူ ချောမွေ့စေကြောင်း သိရသည်။

ပေးပို့သူ- ဦးရဲတင့်( ပြန်/ဆက်)၊ ၀၉-၇၉၇၄၃၈၃၀၅

အသစ်ထွက်ရှိလာသည့် iPhone 16e ကို စင်ကာပူနိုင်ငံတွင် ဖေဖော်ဝါရီလ ၂၁ ရက်မှစတင်၍ ကြိုတင်စာရင်းသွင်း မှာယူနိုင်ပြီဖြစ်ပြီး ဖေဖော်ဝါရီလ ၂၈ ရက်တွင် စတင်ရောင်းချသွားမည် ဖြစ်သည်။

iPhone 16e တွင်ပါရှိသည့် ခလုတ်ပုံစံများ၊ Type-C အမျိုးအစား USB အားသွင်းကြိုးပေါက်များ စသည့် အသွင် အပြင်များသည် iPhone 16 နှင့်အလားသဏ္ဍာန်တူညီပြီးသော်လည်း iPhone 16e တွင်မူ ကင်မရာတစ်လုံးသာ ပါဝင်မည်ဖြစ်သည်။ ၎င်းတွင် 48 Mega Pixel Fusion ကင်မရာအား ဒီဇိုင်းပြန်လည်ပြုပြင်၍ အဆင့်မြင့်တင် ထားသော်လည်း ပုံထွက်အရည်အသွေးမှာ အခြားသော iPhone 16 model များထက် ထူးခြားသည့်ပြောင်းလဲမှု မရှိပေ။

iPhone 16e သည် ၂၀၂၅ ခုနှစ်၊ ဧပြီလတွင် ထွက်ရှိသည့် Apple Intelligence ကို လုပ်ဆောင်နိုင်မည်ဖြစ်ပြီး အနက်ရောင်နှင့် အဖြူရောင် ၂ မျိုးကို 128GB ၊ 256GB နှင့် 512GB စသည့် storage များဖြင့် ရွေးချယ် ဝယ်ယူ နိုင်မည် ဖြစ်ပါသည်။

ဈေးနှုန်းအနေဖြင့် စင်ကာပူဒေါ်လာ ၉၄၉ မှစတင်ပြီး ယင်းဈေးနှုန်းမှာ ယခင်ထွက်ရှိခဲ့သည့် iPhone 16 ထက် စင်ကာပူဒေါ်လာ ၃၅၀ သက်သာပါသည်။

ကိုးကား- mothership.com              

ဘာသာပြန်ဆိုသူ- ဦးထက်ထက်အောင် (နစက-၄)

ဖေဖော်ဝါရီ ၂၀ ရက်တွင် တောင်တရုတ်ပင်လယ်အတွင်း၌ရှိသော စပရက်တလီကျွန်းစုများအနီးရှိ လေပိုင်နက်အတွင်းသို့ တရားမဝင် ကျူးကျော်ဝင်ရောက်လာသောဖိလစ်ပိုင်လေယာဉ်သုံးစင်းကို သတိပေးမှုများလုပ်ဆောင်ကာ မောင်းထုတ်ပစ်ခဲ့ကြောင်း တရုတ်စစ်တပ်က ထုတ်ပြန်ပြောဆိုခဲ့သည်။

တရုတ်စစ်တပ်၏ ထုတ်ပြန်ချက်နှင့်ပတ်သက်ပြီး တရုတ်နိုင်ငံရှိ ဖိလစ်ပိုင် သံရုံးက ချက်ချင်းမှတ်ချက်ပြု တုံ့ပြန်ပြောဆိုခြင်းမျိုး မရှိသေးကြောင်း သိရသည်။ ဖိလစ်ပိုင်လေယာဉ်သုံးစင်းသည် လေပိုင်နက် တရားမဝင်ကျူးကျော်ဝင်ရောက်မှုများကို လုပ်ဆောင်ခဲ့သော်လည်း တရုတ်ဘက်က အောင်မြင်စွာဟန့်တားမှုများ လုပ်ဆောင်နိုင်ခဲ့ကြောင်း တရုတ်တောင်ပိုင်းကွပ်ကဲမှုဌာနချုပ်က ပြောကြားခဲ့သည်။

တောင်တရုတ်ပင်လယ် တစ်ခုလုံးနီးပါးကို ၎င်းပိုင်ဆိုင်ကြောင်း တရုတ်ဘက်က အခိုင်အမာပြောဆိုထားသကဲ့သို့ ဘရုနိုင်း၊ မလေးရှား၊ အင်ဒို နီးရှား၊ ဖိလစ်ပိုင်နှင့် ဗီယက်နမ်တို့ကလည်း တောင်တရုတ်ပင်လယ်အတွင်း တစ်စိတ်တစ်ပိုင်းကို ၎င်းတို့ပိုင်ဆိုင်ကြောင်း အခိုင်အမာပြောဆို ထားကြသည်။

ဖိလစ်ပိုင်နှင့် တရုတ်တို့သည် အငြင်းပွား တောင်တရုတ် ပင်လယ်အတွင်းတွင် ထိပ်တိုက်တွေ့ဆုံမှုများ မကြာခဏဖြစ်ပွားလျက်ရှိပြီး နှစ်နိုင်ငံကြား တင်းမာမှုများ ဆိုးရွားစွာမြင့်တက်လျက်ရှိကြောင်း သိရသည်။ တရုတ် အစိုးရက ၎င်း၏ပိုင်နက်နယ်မြေအတွင်းသို့ ကျူးကျော်ဝင်ရောက်ကာ ရန်စမှုများ လုပ်ဆောင်နေကြောင်း ဖိလစ်ပိုင်ဘက်မှ အခိုင်အမာ စွပ်စွဲ ပြောဆိုထားသလို တရုတ်ဘက်ကလည်း ဖိလစ်ပိုင်အစိုးရသည် ၎င်း၏ ပိုင်နက်နယ်မြေအတွင်း ကျူးကျော်ဝင်ရောက်ကာ ရန်စမှုများကို လုပ်ဆောင်နေကြောင်း ပြန်လည်စွပ်စွဲပြောဆိုထားသည်။

ကိုးကား-NP News

Microsoft သည် ၎င်း၏ Majorana 1 stable quantum processor အသစ်ကို ထုတ်ဖော်ပြသခဲ့ပြီး ၎င်းကို လက်တွေ့ကျသော Quantum Computing ဆီသို့ ဦးတည်သည့် ကျယ်ပြန့်သော ခြေလှမ်းတစ်ခုအဖြစ် ကြေညာခဲ့သည်။ Pentagon ၏ Defense Advanced Research Projects Agency (DARPA) သည် ၎င်း၏သုတေသနကို ပရိုဂရမ်တစ်ခုတွင် ထည့်သွင်းထားကြောင်း ကုမ္ပဏီမှ ဖြည့်စွက်ပြောကြားခဲ့သည်။

ဖေဖော်ဝါရီ ၁၉ ရက်နေ့ ထုတ်ပြန်ချက်တစ်ခုတွင် Microsoft ၏ ကမ္ဘာ့ ပထမဆုံး Topoconductor ဖြင့် မောင်းနှင်ထားသော Chip အသစ်သည် Conductivity လွန်စွာမြင့်မားသော ပစ္စည်းအသစ်တစ်ခုကို ဖန်တီးနိုင်စွမ်းရှိပြီး တွက်ချက်မှုကို ပိုမိုတည်ငြိမ်စေကြောင်း ပြောကြားခဲ့သည်။

Quantum Computing ၏ အဓိကပြဿနာတစ်ခုမှာ Quantum bits များ အလွန်ပျက်စီးလွယ်ခြင်းဖြစ်ပြီး ၎င်းတို့သည် ပြင်ပအနှောင့်အယှက်များကို ကောင်းစွာခံနိုင်ရည်ရှိပြီး အလွန်ရှုပ်ထွေးနက်နဲသော အမှားပြင်ဆင်မှုနည်းပညာများ လိုအပ်နေခြင်းဖြစ်ပါသည်။ သို့သော် Microsoft ၏ Majorana 1 သည် Topological qubits များကို အခြေခံထားပြီး ၎င်းတို့သည် ပင်ကိုယ်အားဖြင့် အမှားဒဏ်ခံနိုင်ရည်ရှိရန် ဒီဇိုင်းထုတ်ထားသည်။

Microsoft က ၎င်း၏ Processor အသစ်သည် လက်တွေ့ကျသော Quantum Computing ဆီသို့ ကူးပြောင်းလိုက်သည့် အမှတ်အသားပင်ဖြစ်ပြီး ပိုမိုဘေးကင်းစေသော ဓာတုဗေဒဆိုင်ရာ ရှာဖွေတွေ့ရှိမှုများနှင့် ကျယ်ပြန့်သော သိပ္ပံနည်းကျသုတေသနများတွင် အချိန်နှင့်ငွေကြေးကို ချွေတာပေးနိုင်ကြောင်း ပြောကြားခဲ့သည်။

ကိုးကား-RT

၂၀၂၅ ခုနှစ်၊ ဖေဖော်ဝါရီ ၁၇ ရက်တွင် ရှမ်းပြည်နယ်(တောင်ပိုင်း)၊ ကွန်ဟိန်းမြို့နယ်၊ ဆီဆိုင်မြို့နယ်နှင့် ရှမ်းပြည်နယ်(အရှေ့ပိုင်း)၊ မက်မန်းမြို့နယ်၊ မိုင်းပျဉ်းမြို့နယ်တို့၌ ရဲတပ်ဖွဲ့ဝင်များ၊ နယ်မြေခံတပ်မတော်သားများပါဝင်သော ပူးပေါင်းအဖွဲ့က ဘိန်းခင်းဖျက်ဆီးခြင်းများ ဆောင်ရွက်ခဲ့ကြောင်း သိရသည်။
 ထိုသို့ ဖျက်ဆီးရာတွင် ၂၀၂၅ ခုနှစ်၊ ဖေဖော်ဝါရီ ၁၇ ရက် နံနက် ၈ နာရီ ၃၀ မိနစ်တွင် ရှမ်းပြည်နယ်(တောင်ပိုင်း)၊ ကွန်ဟိန်းမြို့နယ်ရဲတပ်ဖွဲ့မှ ရဲတပ်ဖွဲ့ဝင်များ၊ နယ်မြေခံတပ်မတော်သားများ ပါဝင်သော ပူးပေါင်းအဖွဲ့သည် ကွန်ဟိန်းမြို့နယ်၊ လွယ်ဆိုင်ကျေးရွာအရှေ့မြောက်ဘက် ၂ ဖာလုံခန့်အကွာ၌ အမြင့် နှစ်ပေခွဲခန့်ရှိ ဘိန်းခင်း ရှစ်ဧကခန့်အားလည်းကောင်း၊ နံနက် ၉ နာရီ ၁၅ မိနစ်တွင် ဆီဆိုင်မြို့နယ်ရဲတပ်ဖွဲ့မှ ရဲတပ်ဖွဲ့ဝင်များပါဝင်သော ပူးပေါင်းအဖွဲ့သည် ဆီဆိုင်မြို့နယ်၊ ပုံဆွေပင်ကျေးရွာအနောက်ဘက် ၂ ဖာလုံခန့်အကွာ၌ အမြင့် နှစ်ပေခန့်ရှိ ဘိန်းခင်း ငါးဧကခန့်နှင့် ကုန်းလောကျေးရွာအရှေ့ဘက် ၂ ဖာလုံခန့်အကွာ၌ အမြင့် နှစ်ပေခန့်ရှိ ဘိန်းခင်း ခြောက်ဧကခန့်အားလည်းကောင်း ဖျက်ဆီးခြင်းများ ဆောင်ရွက်ခဲ့ကြောင်း သိရှိရသည်။ 
အလားတူ နံနက် ၉ နာရီ ၃၅ မိနစ်တွင် ရှမ်းပြည်နယ်(အရှေ့ပိုင်း)၊ မက်မန်းမြို့နယ်ရဲတပ်ဖွဲ့မှ ရဲတပ်ဖွဲ့ဝင်များ၊ နယ်မြေခံတပ်မတော်သားများပါဝင်သော ပူးပေါင်းအဖွဲ့သည် မက်မန်းမြို့နယ်၊ ငှက်ယောင်းကျေးရွာမြောက်ဘက် ၆ ဖာလုံခန့်အကွာ၌ အမြင့် နှစ်ပေခန့်ရှိ ဘိန်းခင်း တစ်ဧကခန့်အားလည်းကောင်း၊ နံနက် ၉ နာရီ ၄၅ မိနစ်တွင် မိုင်းပျဉ်းမြို့နယ်၊ တုံတာနယ်မြေရဲစခန်းမှ ရဲတပ်ဖွဲ့ဝင်များ၊ နယ်မြေခံတပ်မတော်သားများပါဝင်သော ပူးပေါင်းအဖွဲ့သည် မိုင်းပျဉ်းမြို့နယ်၊ (၁၁)မိုင်ကျေးရွာ၏ အနောက်ဘက် ၃ မိုင်ခန့်အကွာ၌ အမြင့် နှစ်ပေခန့်ရှိ ဘိန်းခင်း သုံးဧကခန့်အားလည်းကောင်း အသီးသီးဖျက်ဆီးခြင်းများ ဆောင်ရွက်ခဲ့ကြောင်း သတင်းရရှိသည်။

Source: www.moha.gov.mm 
 

GAP ဆိုသည်မှာ 

GAP (စိုက်ပျိုးရေးဆိုင်ရာအလေ့အကျင့်ကောင်းများ) ဆိုသည်မှာ မြေပြုပြင် စိုက်ပျိုး ထုတ်လုပ်သည်မှ စားသုံးသူ လက်ဝယ်ရောက်သည်အထိ ထုတ်လုပ်မှု ကွင်းဆက်တိုင်းတွင် စားသုံးသူအတွက် အန္တရာယ် ဖြစ်စေသည့် ကူးစက်ညစ်ညမ်းမှုများ အနည်းဆုံး ဖြစ်စေရန် လိုက်နာရမည့် နည်းလမ်းများကို စုစည်း ထားသည့် စံလုပ်ထုံးလုပ်နည်း လမ်းညွှန်မှုများ ဖြစ်ပါသည်။

“သီးနှံများအတွက် မြန်မာနိုင်ငံ၏ စိုက်ပျိုးရေးဆိုင်ရာ အလေ့အကျင့်ကောင်းများ စံချိန်စံညွှန်း” ကို စိုက်ပျိုးရေးဦးစီးဌာနမှ မူကြမ်းရေးဆွဲခဲ့ပြီး၊  စိုက်ပျိုးရေးဦးစီးဌာန၊ ညွှန်ကြားရေးမှူးချုပ်မှ ဥက္ကဋ္ဌအဖြစ် ဦးဆောင်ဖွဲ့စည်းထားသော စိုက်ပျိုးထုတ်လုပ်မှုဆိုင်ရာ စံချိန်စံညွှန်း ရေးဆွဲရေးနည်းပညာဆပ် ကော်မတီ အဖွဲ့ဝင်များမှ အဆင့်ဆင့် ပြင်ဆင်ဖြည့်စွက်ညှိနှိုင်းဆွေးနွေး၊ အတည်ပြုချက် ရရှိခဲ့ပြီးနောက် နိုင်ငံတော် စံချိန်စံညွှန်းအဖြစ် အတည်ပြုချက်ရရှိရေးအတွက် အမျိုးသားစံချိန်စံညွှန်းကောင်စီသို့ ပေးပို့တင်ပြခဲ့ရာ ၂၀၂၀ ပြည့်နှစ်၊ မတ်လ ၂၀ ရက်နေ့တွင် ကျင်းပသော အမျိုးသား စံချိန်စံညွှန်းကောင်စီ အစည်းအဝေး (၁/၂၀၂၀) မှ MMS GAP 23:2020 ဖြင့် “သီးနှံများအတွက် မြန်မာနိုင်ငံ၏ စိုက်ပျိုးရေးဆိုင်ရာ အလေ့အကျင့်ကောင်းများ စံချိန်စံညွှန်း” ကို နိုင်ငံတော်စံချိန်စံညွှန်းအဖြစ် အတည်ပြုချက်ရရှိခဲ့ပါသည်။

စိုက်ပျိုးရေးဦးစီးဌာနအနေဖြင့် မြန်မာနိုင်ငံမှ စိုက်ပျိုးရေးထွက်ကုန်များ ဘေးအန္တရာယ် ကင်းရှင်းပြီး အရည်အသွေးကောင်းမွန်စွာထုတ်လုပ်၍ ဈေးကွက်သို့ ပိုမိုတင်ပို့ ရောင်းချ နိုင်ရေးအတွက် စိုက်ပျိုးရေး ဆိုင်ရာ အလေ့အကျင့်ကောင်းများ မြန်မာ(GAP) အသိအမှတ်ပြု လက်မှတ်ထုတ်ပေးနိုင်ရန် တိုင်း၊ ခရိုင်၊ မြို့နယ် GAP Inspector Team များ ဖွဲ့စည်း၍ ကွင်းဆင်းစစ်ဆေးခြင်း၊ သက်ဆိုင်ရာဌာနခွဲများ ပူးပေါင်းပါဝင်ဖွဲ့စည်းထားသော ပညာပေးရေးနှင့် ကွင်းဆင်းစစ်ဆေးရေးအဖွဲ့များသည် သက်ဆိုင်ရာ ဌာနခွဲ၊ တိုင်း၊ ခရိုင်တို့၏ စီမံကွပ်ကဲမှုဖြင့် (သီးနှံကာကွယ်ရေး/ မြေအသုံးချ / စိုက်ပညာ/ မျိုးစေ့) တို့နှင့် ပူးပေါင်း ဆောင်ရွက်လျက် ရှိပါသည်။ 

ကွင်းဆင်းစစ်ဆေးခြင်း လုပ်ငန်းစဉ်များ ဆောင်ရွက်ရာတွင် တောင်သူများထားရှိ ရေးသွင်းရမည့် မှတ်တမ်းပုံစံများ ဖြန့်ဝေခြင်း၊  တောင်သူများ၏ စိုက်ကွင်းတွင် ခဲ၊ ပြဒါး နှင့် အာဆင်းနစ် စသည့် Heavy Metal များ ပါဝင်မှုနှင့် အာဟာရဓာတ်များ ပါဝင်မှု အခြေအနေအား စစ်ဆေးနိုင်ရန် မြေ၊ ရေ နမူနာများ ရယူခြင်းနှင့် ဓါတ်ခွဲခန်းသို့ ပေးပို့ခြင်း၊ သီးနှံများ ခူးဆွတ်ပြီးနောက်ပိုင်း သတ်မှတ်ထားသော အမြင့်ဆုံး ပိုးသတ်ဆေး ဓါတ်ကြွင်း အာနိသင် ပါဝင်မှုကို တိုင်းတာစစ်ဆေးရန် ဆောင်ရွက်ခြင်း၊ ဘက်စုံပိုးမွှား ကာကွယ်ရေး နည်းစနစ်များ အသုံးပြု ဆောင်ရွက်မှု၊ စိုက်ခင်းသန့်ရှင်းရေး၊ ရေအိမ် ဆောက်လုပ်ထား ရှိမှုနှင့် စွန့်ပစ်ပစ္စည်းများ စွန့်ပစ်ပုံ စသည်တို့အပြင် ခူးဆွတ်ပြီးနောက်ပိုင်း လုပ်ငန်းစဉ်များ အဆင့်ဆင့် ဆောင်ရွက်ရာတွင် ဘေးအန္တရာယ်ကင်းရှင်းစေရေးအတွက် အဆင့်အတန်း ခွဲခြားခြင်း၊ ထုတ်ပိုး ပြုပြင်ခြင်းနှင့် အမှတ်တံဆိပ်ကပ်ခြင်းတို့တွင် စနစ်တကျ ဆောင်ရွက်ခြင်းနှင့် သန့်ရှင်းရေး လိုက်နာ ကျင့်သုံးမှုတို့ကို စစ်ဆေးဆောင်ရွက်ရပါသည်။

Township Admin မှ Online Digitalization ဆောင်ရွက်မှု။ မြို့နယ်ဦးစီးမှူးမှ လျှောက်လွှာများကို စိစစ်၍ ထောက်ခံအတည်ပြုချက်နှင့်အတူ လျှောက်လွှာများအား (GAP website) သို့ (Township Admin) အကူအညီဖြင့် တင်သွင်းဆောင်ရွက်ရပါသည်။ လျှောက်ထားခြင်း ပြီးမြောက်မှု (၂၀ %) အဖြစ် သတ်မှတ် ပါသည်။

District Admin မှ Online Digitalization ဆောင်ရွက်မှု။ ခရိုင်ကွင်းဆင်း စစ်ဆေး ရေးအဖွဲ့မှ ကွင်းဆင်းစစ်ဆေး၍ ရေ၊ မြေ စစ်ဆေးမှုအတွက် ကူညီဆောင်ရွက်ပေးခြင်း၊ (GAP Guideline) နှင့် အညီ ဆောင်ရွက်ထားရှိမှု မှတ်တမ်းများအား ခရိုင်ဦးစီးမှူးမှ ထောက်ခံ အတည်ပြု၍ တိုင်းဒေသကြီး/ ပြည်နယ် ဦးစီးမှူးထံ တင်ပြဆောင်ရွက်ပါသည်။ ခရိုင်ဦးစီးမှူး၏ ထောက်ခံအတည်ပြုချက်နှင့်အတူ စစ်ဆေးချက်မှတ်တမ်းများအား (GAP website) သို့ တင်သွင်းဆောင်ရွက်ရပါသည်။ လျှောက်ထားခြင်း ပြီးမြောက်မှု (၅၀%) အဖြစ် သတ်မှတ်ပါသည်။

Region/State Admin မှ Online Digitalization ဆောင်ရွက်မှု။ ခရိုင်ဦးစီးမှူး၏ ထောက်ခံ အတည်ပြု ချက်ဖြင့် တင်ပြလာသော (GAP Guideline) နှင့်အညီ ဆောင်ရွက်ထားရှိမှု မှတ်တမ်းများအား တိုင်းဒေသကြီး/ ပြည်နယ်ဦးစီးမှူးမှ စစ်ဆေးထောက်ခံ၍ ဥယျာဉ်ခြံ၊ ဟင်းသီးဟင်းရွက်နှင့် အပင်ဇီဝ နည်းပညာဌာနခွဲ၊ ညွှန်ကြားရေးမှုးထံ တင်ပြ ဆောင်ရွက်ရသည်။ တိုင်းဒေသကြီး/ ပြည်နယ်ဦးစီးမှူးမှထောက်ခံအတည်ပြုချက် နှင့်အတူ စစ်ဆေးချက်မှတ်တမ်းများအား (GAP website)သို့ တင်သွင်းဆောင်ရွက်ရပါသည်။ လျှောက်ထားခြင်းပြီးမြောက်မှု (၇၀%) အဖြစ် သတ်မှတ်ပါသည်။

Main Admin မှ Online Digitalization ဆောင်ရွက်မှု။ တိုင်းဒေသကြီး/ ပြည်နယ် ဦးစီးမှူး၏ ထောက်ခံချက်ဖြင့် တင်ပြလာသော မှတ်တမ်းများအား၊  ဥယျာဉ်ခြံ၊ ဟင်းသီးဟင်းရွက်နှင့် အပင်ဇီဝ နည်းပညာ ဌာနခွဲ၊ GAP ဌာနစိတ်မှ စိစစ်၍  GAP အသိအမှတ်ပြု လက်မှတ်များအား စီမံ၍  ဥယျာဉ်ခြံ၊ ဟင်းသီးဟင်းရွက်နှင့် အပင်ဇီဝနည်းပညာ ဌာနခွဲ၊ ညွှန်ကြားရေးမှုး၏ ထောက်ခံချက်နှင့်အတူ ညွှန်ကြားရေးမှုးချုပ် (စိုက်ပျိုးရေး ဦးစီးဌာန) ထံ တင်ပြဆောင်ရွက်ရသည်။ မြို့နယ်၊ ခရိုင်၊ တိုင်း/ ပြည်နယ် များမှ  ထောက်ခံအတည်ပြုချက်များနှင့်အတူ စစ်ဆေးချက်မှတ်တမ်းများအားလုံးအား GAP website တွင် စိစစ် ၍ GAP certificate ထုတ်ပေးနိုင်ရေး ဆောင်ရွက်ရပါသည်။ လျှောက်ထားခြင်း ပြီးမြောက်မှု (၁၀၀%) အဖြစ် သတ်မှတ်ပါသည်။

ဥယျာဉ်ခြံ၊ ဟင်းသီးဟင်းရွက်နှင့် အပင်ဇီဝနည်းပညာ ဌာနခွဲ၊ GAP ဌာနစိတ်၏ Certification ဆိုင်ရာ လုပ်ငန်းတာဝန်များ အောက်ပါအတိုင်း ဖြစ်ပါသည်-

• တိုင်းဒေသကြီး/ ပြည်နယ်များမှ လျှောက်ထားမှုများကို Admin Panel မှ တစ်ဆင့် နေ့စဉ်စစ်ဆေးရန်

• တိုင်းဒေသကြီး/ ပြည်နယ်များမှ ထောက်ခံချက်ပေးပြီး (၇၀ %) အဆင့်ရှိ လျှောက်လွှာများကို(GAP)အသိအမှတ်ပြု လက်မှတ်ထုတ်ပေးနိုင်ရေး ဆောင်ရွက်ရန်

• Excel export ထုတ်ယူခြင်း

• QR code အတွက် data ထည့်သွင်းခြင်း

• Certificate တွင် တောင်သူ၏ data အချက်အလက်များ ဖြည့်သွင်းခြင်း

• အုပ်စုအဖွဲ့ဝင်များ၏ စာရင်းများ ပြုစုရေးသွင်းခြင်း

• DG (ညွှန်ကြားရေးမှူးချုပ်) လက်မှတ်အတွက် အပေါ်စာ ပြင်ဆင်ခြင်း

• DG လက်မှတ်ထိုးပြီးသော Certificate များအား သက်ဆိုင်ရာ တိုင်းဒေသကြီး/ ပြည်နယ်များသို့ ပေးပို့ရန်အတွက် ညွှန်ကြားရေးမှူးအပေါ်စာ ပြင်ဆင်ခြင်း

အထက်ဖော်ပြပါ အကြောင်းအရာများသည် စိုက်ပျိုး၊ မွေးမြူရေးနှင့် ဆည်မြောင်းဝန်ကြီးဌာန၊ စိုက်ပျိုးရေးဦးစီးဌာနတွင် ဖော်ပြချက်အား ကူးယူဖော်ပြခြင်း ဖြစ်ပါသည်။

ကိုးကား -https://www.doa.gov.mm/doa/index.php?route=information/information&information_id=32

Apple ကုမ္ပဏီသည် AI နည်းပညာများပါဝင်၍ Flagship ဖုန်းအမျိုးအစားထက် စျေးနှုန်းချိုသာသည့် iPhone အသစ်တစ်မျိုးကို မိတ်ဆက်လိုက်သည်။

iPhone 16e ကို iPhone 16 ၏ Processor နှင့် Storage အတိုင်း ထုတ်လုပ်ထားပြီး ကင်မရာအရေအတွက်နှင့် အခြား Specification အနည်းငယ်သာ လျှော့ချထားကြောင်း Apple က ပြောကြားထားသည်။

ပြီးခဲ့သည့်နှစ်ကုန်ပိုင်းတွင် iPhone ရောင်းအားများ ကျဆင်းခဲ့ပြီး သုံးစွဲသူများ အကြိုက်တွေ့စေမည့် ထုတ်ကုန်အသစ်များ ထုတ်လုပ်နိုင်ရန် Apple အနေဖြင့် ကြိုးစား ရုန်းကန်နေရသည်။

အဆိုပါဖုန်းတွင် AI နည်းပညာထည့်သွင်း၍ စျေးနှုန်းချိုသာစွာဖြင့် ဈေးကွက်အတွင်း ထုတ်လုပ်ရောင်းချခြင်းဖြင့် ရောင်းအားကျသည့် ပြဿနာကို ဖြေရှင်းနိုင်မည်ဟု Apple က မျှော်လင့်ထားသော်လည်း ထိုသို့ဆောင်ရွက်ခြင်းက ရောင်းအားကို မည်မျှတိုးတက်စေမည်ကို လေ့လာသူများက စောင့်ကြည့်နေကြသည်။

iPhone 16e ဆိုသည်မှာ ၂၀၁၆ ခုနှစ်မှ ၂၀၂၂ ခုနှစ်အထိ ထွက်ရှိခဲ့သော စျေးနှုန်းချိုသာသည့် iPhone SE series ကို ရည်ညွှန်းထားခြင်း ဖြစ်သည်။ Apple ၏ပြောကြားချက်အရ iPhone 16e ကို ဖေဖော်ဝါရီလ ၂၁ ရက်နေ့မှစ၍ နိုင်ငံပေါင်း ၅၉ နိုင်ငံ၌ Pre Order စတင်မှာယူနိုင်မည်ဖြစ်သည်။

ကိုးကား-BBC