မြောက်ကိုရီးယားခေါင်းဆောင် ကင်ဂျုံအန် ကိုယ်တိုင် တက်ရောက်သည့် မေလ ၂၁ ရက်နေ့က Chongjin ဆိပ်ကမ်း၌ ကျင်းပသည့် မြောက်ကိုရီးယား၏ တော်ပီဒိုသင်္ဘောဖျက်ယာဉ်အသစ် ရေချခြင်းအခမ်းအနားတွင် ပြင်းထန်သော မတော်တဆမှုတစ်ခု ဖြစ်ပွားခဲ့ပါသည်။

KCNA ၏ အဆိုအရ စစ်သင်္ဘောရေချရာတွင် ဟန်ချက်မညီမျှမှုကြောင့် အဆိုပါ မတော်တဆမှုဖြစ်ပွားခဲ့ပြီး သင်္ဘောအောက်ပိုင်း အစိတ်အပိုင်းများ ပျက်စီးခဲ့သည်ဟု သိရပါသည်။

ဖြစ်စဉ်တစ်ခုလုံး မြင်တွေ့လိုက်ရသည့် ကင်ဂျုံအန်က ယခုဖြစ်ရပ်မှာ နမော်နမဲ့မှု၊ တာဝန်မဲ့မှုနှင့် သိပ္ပံနည်းမကျသော လုပ်ဆောင်မှုတို့ကြောင့် အာဏာရပါတီဗဟိုကော်မတီအစည်းအဝေးမတိုင်မီ ထိုသင်္ဘောကို ပြန်လည်ပြင်ဆင်ထားရန် ညွှန်ကြားခဲ့ပါသည်။ 

ယခုမတော်တဆမှုမှာ နိုင်ငံ၏ ဂုဏ်သိက္ခာနှင့် မိမိကိုယ်ကိုလေးစားမှုကို ထိခိုက်စေရသည်ဟု ကင်ဂျုံအန်က ဆိုထားပါသည်။

ကိုးကား- Tass

Photo: NK News

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊နစက-၃

တရုတ်နိုင်ငံအရှေ့ပိုင်း Anhui ပြည်နယ်၊ Fengyang ခရိုင်ရှိ Fengyang Drum Tower ၏ အမိုးမှ အုတ်ချပ်များ ရုတ်တရက်လျှောကျပြီး နှစ်ထပ် အမြင့်ခန့်မှ ကြမ်းပြင်ပေါ်သို့ ကျဆင်းလာခဲ့ခြင်းကြောင့် နေရာတွင်ရှိ နေသည့်ခရီးသွားများ ထိတ်လန့်တကြား ထွက်ပြေးကာ ရုတ်ရုတ်သဲသဲ ဖြစ်ပွားခဲ့သည်။

အမိုးအုတ်ချပ် ၁၀၀ ကျော် လျှောကျခဲ့ပြီး အောက်ခြေရှိ ဝင်ပေါက်နှင့် လမ်းလွှာများ ပျက်စီးခဲ့သည်။

တာဝန်ရှိသူများက ပြင်းထန်စွာ ဒဏ်ရာရသူမရှိဟု ကနဦး ထုတ်ပြန်ချက်တွင် ဖော်ပြထားပြီး ဒေသအာဏာပိုင်များက ထိုနေရာကို ချက်ချင်း ပိတ်ကာ ပြုပြင်ရေးလုပ်ငန်းများ စတင်ခဲ့သည်။

ယဉ်ကျေးမှုအမွေအနှစ်ဌာနမှ ကျွမ်းကျင်သူများက ပျက်စီးမှုအကြောင်းရင်းနှင့် ပြန်လည်ထိန်းသိမ်းရန် နည်းလမ်းများကို စုံစမ်းစစ်ဆေးလျက်ရှိသည်ဟု ဆိုသည်။

Fengyang Drum Tower ကို ၁၃၇၅ ခုနှစ်တွင် Ming မင်းဆက် ကာလအတွင်း တည်ဆောက်ခဲ့ပြီး ရိုးရာပွဲတော်များ၏ အစနှင့် အချိန်ကို ကြေညာရန် အသုံးပြုခဲ့သည်။ ယခုအခါ တရုတ်နိုင်ငံတွင် အကြီးဆုံး မျှော်စင်များထဲမှ တစ်ခုအဖြစ် သတ်မှတ်ခံထားရသည်။

ကနဦး အကဲဖြတ်ချက်များအရ မိုးရွာသွန်းမှုနှင့် ရာသီဥတုဒဏ်ကြောင့် အုတ်ချပ်များ လျှောကျခြင်းဖြစ်နိုင်သည်ဟု ယူဆရသည်။ သို့သော် နှစ်ပေါင်း ၆၀၀ ကျော် သက်တမ်းရှိပြီဖြစ်သော အဆောက်အဦး၏ ယိုယွင်းလာမှုကလည်း အဓိကအချက်တစ်ခုဖြစ်နိုင်သည်ဟု သိရှိရပါသည်။

Fengyang ဒေသသို့ ခရီးစဉ်စီစဉ်ထားသူများအနေဖြင့် မျှော်စင်သို့ သွားရောက်လည်ပတ်ခွင့် ပြန်လည်ဖွင့်လှစ်ချိန်ကို ဒေသခံအာဏာပိုင်များ၏ ထုတ်ပြန်ချက်များကို စောင့်ကြည့်၍ သွားရောက်ရန် အကြံပြု ထားသည်။

ကိုးကား- CNN

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဗြိတိန်တောင်တက်သမားများက ဇီနွန် ဓာတ်ငွေ့အသုံးပြုပြီး မေလ ၂၁ ရက်တွင် ဧဝရတ်တောင်ပေါ်သို့ စံချိန်တင် အချိန်တိုအတွင်း တက်ရောက်နိုင်ကြောင်း စူးစမ်းလေ့လာရေးခရီးသွား ကုမ္ပဏီတစ်ခုမှ တာဝန်ရှိသူ တစ်ဦးကပြောသည်။

သာမန်အားဖြင့် တောင်တက်သမားများသည် ဧဝရတ်တောင်ပေါ်သို့ တက်မည်ဆိုပါက ခန္ဓာကိုယ်အခြေအနေနှင့် တောင်ပေါ်ပတ်ဝန်းကျင် အခြေအနေတို့ သဟဇာတဖြစ်စေရန်  အချိန်ပေးရသောကြောင့် သီတင်းပတ်ပေါင်း များစွာကြာမြင့်လေ့ရှိသည်။

ဗြိတိန်တောင်တက်သမားများသည် ဧဝရတ်တောင်တက် ခရီးမသွားခင် ဇီနွန် ဓာတ်ငွေ့ကို ရှူပြီးနောက် အမြင့်ပေ ၈၈၄၈ မီတာရှိသည့် ဧဝရတ်တောင်ကို ငါးရက် ပင်မကြာဘဲ တက်နိုင်ခဲ့ခြင်းဖြစ်ကြောင်း ခရီးစဉ်ကို စီစဉ်သူ လူးကတ်ဖာတန်ဘတ် ကပြောသည်။

ယင်းဓာတ်ငွေ့က တောင်တက်သမားများကို အချိန်တိုအတွင်း ပတ်ဝန်းကျင်နှင့် သဟဇာတဖြစ်စေကာ တောင်ပေါ်တက်စဉ် ဖြစ်ပေါ်လေ့ရှိသည့်   ဝေဒနာကိုလည်း သက်သာစေသောကြောင့် ၎င်းတို့အနေဖြင့် အချိန်တိုအတွင်း ဧဝရတ်တောင်ပေါ်သို့ တက်နိုင်ခြင်းဖြစ်သည်။

Source: Myawady Web Portal

ဂျပန်အစိုးရသည် နွေရာသီတွင် ကျင်းပမည့် အထက်လွှတ်တော် ရွေးကောက်ပွဲမတိုင်မီ ပြည်သူများ၏ လူနေမှုစရိတ်မြင့်တက်မှု ဖိအားများကို သက်သာစေရန်အတွက် မေလ ၂၂ ရက်နေ့မှ စတင်၍ ဓာတ်ဆီ တစ်လီတာလျှင် ၁၀ ယန်း လျှော့ချပေးမည့် ထောက်ပံ့ရေးအစီအစဉ်သစ် တစ်ရပ်ကို အာဏာတည်စေခဲ့သည်။ 

ဂျပန်အစိုးရ၏ ၂၀၂၂ ခုနှစ်၊ ဇန်နဝါရီတွင် စတင်ခဲ့သော ဓာတ်ဆီ ထောက်ပံ့ရေးအစီအစဉ်အရ ဓာတ်ဆီ တစ်လီတာလျှင် ၁၈၅ ယန်းတွင် ထိန်းထားရန်အတွက် လက်ကားရောင်းချသူများအား ထောက်ပံ့ပေးခဲ့သော်လည်း လက်ရှိစျေးနှုန်းမှာ သတ်မှတ်နှုန်းထားအောက် ကျဆင်း နေသည့်အတွက် အစီအစဉ်သစ်အရ စျေးနှုန်းကို ထည့်သွင်းမစဉ်းစားဘဲ ပုံသေသတ်မှတ်၍ ထောက်ပံ့ပေးသွားမည်ဖြစ်သည်။

ဂျပန်အစိုးရ၏ ဓာတ်ဆီထောက်ပံ့ရေးအစီအစဉ်သစ်မှာ ပထမအပတ်တွင် ဓာတ်ဆီလက်ကားဈေး တစ်လီတာလျှင် ၇.၄၀ ယန်းအထိ လျှော့ချရန် ရည်ရွယ်ထားပြီး ရေနံစိမ်းစျေးနှုန်း အပြောင်းအလဲများကို ထည့်သွင်း တွက်ချက်မည်ဆိုပါက ပြီးခဲ့သည့်သီတင်းပတ်မှစ၍ ၅ ယန်းအထိ သိသိ သာသာ‌ လျှော့ချရန် သတ်မှတ်ထားသည်။ ထို့နောက် တစ်ပတ်လျှင် အနည်းဆုံး ၁ ယန်းနှုန်းဖြင့် အဆင့်ဆင့်လျှော့ချသွားမည်ဖြစ်ပြီး ဇွန်လ လယ်တွင် စုစုပေါင်း ၁၀ ယန်းအထိ လျှော့ချနိုင်ရန် ရည်ရွယ်ထားသည်။ 

ယခုထောက်ပံ့ရေးအစီအစဉ်သစ်ကို မည်သည့်ကာလအထိ ဆောင်ရွက်မည် ကို အတိအကျ မသတ်မှတ်ရသေးသော်လည်း အဆိုပါအစီအစဉ်အတွက် ယန်း ငွေ ၁ ထရီလီယံ (အမေရိကန်ဒေါ်လာ ၆.၅ ဘီလီယံခန့်) ချထား ပေးသဖြင့် ၂၀၂၆ ခုနှစ်၊ မတ်လအထိ ဆက်လက် အကောင်အထည်ဖော် နိုင်မည်ဖြစ်သည်။ 

ယခုထောက်ပံ့ရေးအစီအစဉ်သစ်ကို ဂျပန်အစိုးရအနေဖြင့် ပြန်လည် အာဏာတည်စေခြင်းသည် နွေရာသီတွင် ကျင်းပမည့် အထက်လွှတ်တော် ရွေးကောက်ပွဲမတိုင်မီ ပြည်သူများ၏ စီးပွားရေးအခက်အခဲများကို ဖြေရှင်းရန် နိုင်ငံရေးအရ ဆောင်ရွက်ချက်တစ်ခုဟု သုံးသပ်နိုင်သည်။

ကိုးကား - Kyodo news

ဘာသာပြန်ဆိုသူ-ဒေါ်မေသူခိုင်၊ လက်ထောက်ညွှန်ကြားရေးမှူး၊နစက-၃

ကူးသန်းရောင်းဝယ်ရေးဝန်ကြီး Howard Lutnick က အမေရိကန်တွင် အချိန်ပြည့်နေထိုင်ခွင့်နှင့် အလုပ်လုပ်ကိုင်ခွင့်ပေးမည့် ဒေါ်လာ ၅ သန်း (သို့) အထက်ရင်းနှီးမြှုပ်နှံနိုင်သူများအတွက် “Gold card” ဗီဇာ အစီအစဉ်ကို တစ်ပတ်အတွင်း မှတ်ပုံတင်နိုင်မည်ဟု ဗုဒ္ဓဟူးနေ့ (မေ ၂၁) က ကြေညာခဲ့သည်။

“TrumpCard.gov” ဝက်ဘ်ဆိုက်ကို တစ်ပတ်အတွင်း စတင် ဖွင့်လှစ်မည်ဖြစ်ပြီး အသေးစိတ်အချက်အလက်များကိုလည်း မကြာမီ ထုတ်ပြန်သွားမည်ဟု ၎င်းက ဝါရှင်တန်ဒီစီတွင် ကျင်းပသည့် Axios ၏ "Building the Future" အခမ်းအနားတွင် ပြောကြားခဲ့သည်။

အဆိုပါဗီဇာအစီအစဉ်သည် အစိုးရ၏ EB-5 ရွှေ့ပြောင်းရင်းနှီးမြှုပ်နှံသူ ဗီဇာအစီအစဉ်ကို အစားထိုးမည်ဖြစ်ကာ EB-5 တွင် ဒေါ်လာ ၁.၈ သန်း (သို့) စီးပွားရေးခက်ခဲသည့်ဒေသများတွင် ဒေါ်လာ ၉ သိန်း ရင်းနှီးမြှုပ်နှံရန် လိုအပ်ခဲ့သည်။

Lutnick က မကြာသေးမီက အရှေ့အလယ်ပိုင်းသို့ ခရီးစဉ်တွင် အဆိုပါ ကဒ်များကို “ရောင်းချနေပြီဖြစ်ကြောင်း၊ ငွေကြေးတတ်နိုင်သူ နိုင်ငံခြားသားတိုင်း စိတ်ဝင်စားလာမည်ဟု မျှော်လင့်ထားကြောင်း” ဖော်ပြခဲ့သည်။

ကိုးကား- CNN 

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

Jill Biden သည် သူမ၏ခင်ပွန်း Joe Biden ၏ ကင်ဆာရောဂါ အခြေအနေကို သိရှိပါလျက် သမ္မတအဖြစ်အရွေးခံရန် တွန်းအားပေးခဲ့ ပါက “သက်ကြီးရွယ်အိုနှိပ်စက်ခြင်း” (Elder Abuse) စွဲချက်နှင့် ရင်ဆိုင် သင့်ကြောင်း ဒေါ်နယ်ထရမ့်၏ တရားစီရင်ရေးဌာနရှေ့နေ လီယို တာရယ် က ပြောကြားခဲ့သည်။

လွန်ခဲ့သည့် သီတင်းပတ်က အမေရိကန်သမ္မတဟောင်း၏ ရုံးမှ ဘိုင်ဒင် တွင် “အလွန် ပြင်းထန်သော” ဆီးကျိတ်ကင်ဆာ (prostate cancer) ရှိကြောင်း ရောဂါရှာဖွေတွေ့ရှိခဲ့သည်ဟု ထုတ်ပြန်ခဲ့သည်။ ဤကြေညာ ချက်သည် များစွာသောတုံ့ပြန်မှုများကို ဖြစ်ပေါ်စေခဲ့ပြီး အချို့က Biden နှင့်၎င်း၏မိသားစုအား ဝမ်းနည်းကြောင်းဖော်ပြကြသော်လည်း အချို့ကမူ ဤရောဂါရှာဖွေတွေ့ရှိမှုကို ကြာမြင့်စွာသိရှိထားသော်လည်း ရည်ရွယ်ချက် ဖြင့် ပြည်သူများကို လျှို့ဝှက်ထားခဲ့သည်ဟု စွပ်စွဲခဲ့ကြသည်။

လူ့အခွင့်အရေး ရှေ့နေချုပ်၏ အကြီးတန်းအကြံပေးဖြစ်သူ တာရယ်က Ian Jaeger ၏ X ပို့စ်တစ်ခု၌ အဆိုပါအယူအဆကို ဖော်ပြခဲ့သည်။ အင်တာနက်လူမှုကွန်ရက်များတွင် လူသိများသော နိုင်ငံရေးလေ့လာသူ တစ်ဦးဖြစ်သည့် Jaeger က Jill Biden သည် “သမ္မတ Biden ၏ ကျန်းမာရေးပြဿနာများကို သိရှိခဲ့သော်လည်း ၎င်းအား သမ္မတအဖြစ် အရွေးခံရန် ဆက်လက်လိုလားခဲ့သည်” ဟု တိုက်ရိုက်စွပ်စွဲခဲ့သည်။

“ရောဂါရှိနေသည်ကို သိလျက်ဖြင့် သမ္မတအဖြစ် တာဝန်ထမ်းဆောင်စေခဲ့ခြင်းသည် သက်ကြီးရွယ်အို နှိပ်စက်မှုမြောက်ပြီး ရာဇဝတ်မှုစွဲချက် တင်သင့်သည်” ဟု တာရယ်က ရေးသားခဲ့သည်။

Biden ၏ရုံးမှထုတ်ပြန်ချက်အရ သမ္မတဟောင်းနှင့်၎င်း၏မိသားစုသည် ယခုအခါ ဆရာဝန်များနှင့်အတူ ကုသမှုနည်းလမ်းများကို ပြန်လည် သုံးသပ်နေပြီဖြစ်သည်။ အရေပြားကင်ဆာမှ ယခင်က အောင်မြင်စွာ ကုသပျောက်ကင်းခဲ့ဖူးသော သမ္မတဟောင်း၏ ကျန်းမာရေး အခြေအနေ ကို ပုံမှန်ကျန်းမာရေးစစ်ဆေးမှုတစ်ခုအတွင်း အတည်ပြုခဲ့ခြင်း ဖြစ်သည်။

“သောကြာနေ့ (မေ ၁၆) တွင် ၎င်းအား Gleason score 9 (Grade Group 5) ရှိပြီး အရိုးများသို့ ပြန့်ပွားနေသော ဆီးကျိတ်ကင်ဆာရောဂါရှိကြောင်း ရောဂါရှာဖွေတွေ့ရှိခဲ့သည်” ဟု ၎င်း၏ရုံးမှ ထုတ်ပြန်ချက်တွင် ဖော်ပြ ထားသည်။ “ဤသည်မှာ ပိုမိုပြင်းထန်သော ကင်ဆာအမျိုးအစားဖြစ်သော်လည်း ဟော်မုန်းအပေါ် တုံ့ပြန်မှုရှိသော ကင်ဆာဖြစ်သည့် အတွက် ထိရောက်စွာ ကုသနိုင်မည်ဖြစ်သည်” ဟု ဆိုသည်။

(မှတ်ချက် - “Elder Abuse” ဆိုသည်မှာ သက်ကြီးရွယ်အိုများအား စိတ်ပိုင်း၊ ရုပ်ပိုင်း သို့မဟုတ် ငွေကြေးဆိုင်ရာ နှိပ်စက်ခြင်းကို ရည်ညွှန်းပါသည်။ အမေရိကန်ဥပဒေအရ ဤအမှုမျိုးတွင် တရားစွဲနိုင်သော အခြေအနေများ ရှိပါသည်။)

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

တရုတ်နိုင်ငံရဲ့ Agibot ဆိုတဲ့ ကုမ္ပဏီက သူတို့ ထုတ်လုပ်တဲ့ လူတူစက်ရုပ်များရဲ့ စွမ်းဆောင်ရည် တစ်ခုကို မကြာသေးခင်ကထုတ်ဖော်ပြသသွားပါတယ်။ အဲဒီထုတ်ဖော်ပြသမှုအပြီးမှာ လူတူစက်ရုပ်က လူအများရဲ့ စိတ်ဝင်စားမှုကို ပိုမိုရရှိလာတာတွေ့ရပါတယ်။ အကြောင်းရင်းကတော့ အဲဒီလူတူစက်ရုပ်ဟာ ကွန်ဖူးတိုက်ကွက်များကိုတောင်မှ ကစားပြနိုင်တဲ့ အတွက်ပါပဲ။

ဒီစက်ရုပ်ကို Lingxi X2 လို့ အမည်ပေးထားတာ တွေ့ရပါတယ်။ သူ့ရဲ့စွမ်းဆောင်ရည်များ အနက်တစ်ခုက အရာဝတ္ထုများကို ရှေ့ကနေကြိုတင် သင်ပြပေးစရာမလိုဘဲနဲ့ ကိုင်တွယ်နိုင်စွမ်းရှိတာဖြစ်ပါတယ်။ Agibot ကုမ္ပဏီက Lingxi X2 ကို မတ်လအတွင်းမှာ မိတ်ဆက်ခဲ့တာဖြစ်ပြီး သူ့ရဲ့စွမ်းဆောင်ရည်များ အနက်တချို့ကိုတော့ မကြာသေးခင်ကမှ ထုတ်ဖော်ပြသခဲ့တာပါ။ သူတို့က စွမ်းဆောင်ရည်မြင့်မားလှတဲ့ AI နည်းပညာနဲ့ နောက်ဆုံးပေါ် စက်ရုပ်နည်းပညာ များကိုပေါင်းစပ်ပြီး ဘက်စုံအသုံးပြုနိုင်မယ့် စက်ရုပ်အမျိုးအစားကို တီထွင်ထားတာဖြစ်ပါတယ်။

Agibot ကုမ္ပဏီရဲ့ ထုတ်ဖော်ပြသထားမှုမှာဆိုရင် စက်ရုပ်ကအမြင့် ၁ ဒသမ ၃ မီတာရှိပါတယ်။ အလေးချိန်က ၇၄ ပေါင်ခွဲရှိပါတယ်။ ခံစားချက်ကိုလည်းထုတ်ဖော်ပြသနိုင်ပါတယ်။ လူတစ်ယောက်လိုမျိုးအပြုအမူနဲ့အတူ လေသံကိုလည်းလိုအပ်သလို ပြောဆိုနိုင်တာတွေ့ရပါတယ်။ သူတို့အနေနဲ့ အခုလိုမျိုးစက်ရုပ်ကို ရရှိလာဖို့အတွက် Genie Operator-1 ဆိုတဲ့ AI ပုံစံကိုအသုံးပြုထားတာ ဖြစ်တယ်လို့ ဆိုပါတယ်။

Source: https://myawady.net.mm/

နည်းပညာသတင်း

အခုဆိုရင် အဝတ်များကို ဖန်တီးချုပ်လုပ်မှုနည်းပညာက ခေတ်သစ်တစ်ခုကို ရောက်လာပြီလို့ဆိုနိုင်ပါတယ်။ ဒီနေရာမှာတော့ အထည်တွေ ချုပ်လုပ်ဖို့အတွက် လျှပ်စစ်စွမ်းအင်ကို အသုံးပြုစရာမလိုဘဲ အသံလှိုင်းကိုသာ အသုံးပြုရမှာဖြစ်တယ်လို့ ဇူးရစ်တက္ကသိုလ်မှ သုတေသနပညာရှင်များကပြောပါတယ်။

သုတေသနပညာရှင်များက  စမတ်တီရှပ်နဲ့ လက်အိတ်တစ်မျိုးကို  တီထွင်လိုက်ပါတယ်။ အဲဒီတီရှပ်က ဝတ်ဆင်ထားသူရဲ့ အသက်ရှူနှုန်းကို တိုင်းတာနိုင်ပါတယ်။ လက်အိတ်ကကျတော့ လက်ရဲ့လှုပ်ရှားမှုကို ကွန်ပျူတာအတွက် အမိန့်ပေးစေခိုင်းမှုအဖြစ် ပြောင်းလဲပေးစေနိုင်ပါတယ်။

ပညာရှင်များတီထွင်လိုက်တဲ့ စမတ်အာရုံခံကိရိယာများက ဖိုက်ဘာကြိုးမျှင်တွေကနေတစ်ဆင့်  ထုတ်လွှင့်တဲ့အသံ လှိုင်းတွေကိုအသုံးပြုပြီး ထိတွေ့မှု၊ ဖိအားပေးမှုနဲ့ လှုပ်ရှားမှုတို့ကို ထောက်လှမ်းသိရှိတာဖြစ်ပါတယ်။

ပညာရှင်များက ပေါင်းစပ်ဖိုက်ဘာကြိုးမျှင်များကို တီရှပ်ရဲ့ ချည်ထည်ထဲမှာထည့်သွင်းထားပါတယ်။ အဲဒီကြိုးမျှင်တစ်ခုစီမှာ အသံလှိုင်းများကို ထုတ်လွှတ်တဲ့ဘက်အခြမ်းမှာ ထရန်စမစ်တာ တစ်လုံးစီတပ်ဆင်ထားပြီး အခြားသော တစ်ဖက်မှာကျတော့ အသံလှိုင်းအတွင်း ပြောင်းလဲမှုများကိုသိရှိနိုင်မယ့် လက်ခံစက်များကိုတပ်ဆင်ကာ ဖန်တီးထားတာဖြစ်တယ်လို့ဆိုပါတယ်။         

Source: https://myawady.net.mm/

တရုတ်တပ်မတော်က အမေရိကန်၏ F-22 နှင့် F-35 တို့ကဲ့သို့သော ပဉ္စမမျိုးဆက် ကိုယ်ပျောက်တိုက်လေယာဉ်များကို ထောက်လှမ်းရှာဖွေရန် အသုံးပြုသွားမည့် JY-27V ရေဒါအသစ်ကို ထုတ်ဖော်ပြသလိုက်ကြောင်း သိရသည်။

JY-27V ရေဒါကို လှုပ်ရှားသွားလာမှုအတွက် စစ်သုံးယာဉ် ထရပ်ကားပေါ်တင်ဆောင်နိုင်ပြီး ကြိမ်နှုန်းအလွန်မြင့်ရေဒီယိုလှိုင်းနှုန်းများဖြင့် အလုပ်လုပ်ခြင်းဖြစ်ကာ သာမန်ရေဒါများဖြင့်  ဖမ်းယူနိုင်ခြင်းမရှိသော ကိုယ်ပျောက်ပစ်မှတ်များကို တိကျစွာထောက်လှမ်းနိုင်သည့်အပြင် တိကျစွာတိုက်ခိုက်နိုင်ရေးအတွက် လေကြောင်းရန်ကာကွယ်ရေးတပ်ဖွဲ့ကို လမ်းညွှန်မှုပေးနိုင်ကြောင်း ထိုရေဒါကိုထုတ်လုပ်သည့် တရုတ်နိုင်ငံပိုင် CETC ကုမ္ပဏီက ထုတ်ပြန်ထားသည်။

ရေဒါတွင်တပ်ဆင်ထားသည့် အင်တာနာကို အချိန်တိုအတွင်း ဖြန့်နိုင်မည်ဖြစ်သောကြောင့် မိနစ်ပိုင်းအတွင်းမှာပင် ရေဒါလုပ်ငန်းကိုစတင်နိုင်မည်ဖြစ်ကြောင်းနှင့် အခြားနေရာသို့ရွှေ့ပြောင်းနေရာချနိုင်ရေးအတွက် အင်တာနာကိုပြန်လည်ခေါက်သိမ်းနိုင်ကြောင်း Xinhua သတင်းဌာန ကဖော်ပြထားသည်။ ရေဒါကိုခေါက်သိမ်းခြင်းနှင့် ပြန်ဖြန့်ခြင်းတို့လုပ်ဆောင်ရာတွင် ညင်သာချောမွေ့မှုလည်း ရှိကြောင်း CETC ကုမ္ပဏီ၏ ထုတ်ပြန်ချက်တွင်ဖော်ပြထားသည်။

"အင်တာနာရဲ့အချင်းက  ပိုပြီးကြီးလေလေ၊    ထောက်လှမ်းမှုလုပ်နိုင်တဲ့ အကွာအဝေးကလည်း ပိုပြီးများလေလေ ဖြစ်ပါတယ်" ဟု CETC မှသိပ္ပံပညာရှင် တစ်ဦးကပြောသည်။

အဆိုပါရေဒါကို အန်းဟွေပြည်နယ် ဟီဖေးမြို့၌ မေလ ၁၇ ရက်မှ ၁၉ ရက် အထိ ကျင်းပသော ရေဒါပြပွဲတစ်ခုတွင် ထုတ်ဖော်ပြသခဲ့ခြင်း ဖြစ်ကြောင်း သိရသည်။

Source: https://myawady.net.mm/

နည်းပညာသတင်း

ဘေးရုတက္ကသိုလ်မှ သုတေသနပညာရှင်များက   မျိုးရိုးဗီဇပြုပြင်ပြောင်းလဲမှုမှာ အဓိကအခန်းကဏ္ဍ ကနေပါဝင်နေတဲ့ CRISPR-Cas9 ဆိုတဲ့ကိရိယာကို ထိထိရောက်ရောက်နဲ့ အောင်မြင်စွာ အသုံးပြုလိုက်နိုင်ပါပြီ။ သူတို့ရဲ့အောင်မြင်မှုကိုတော့ ပင့်ကူတစ်ကောင်က အနီရောင်ပင့်ကူမျှင်များကို ထုတ်လွှတ်မှုမှာ မြင်တွေ့နိုင်ပါတယ်။ ဒါဟာ ကမ္ဘာပေါ်မှာပထမဆုံးသောအောင်မြင်မှုလည်း ဖြစ်ပါတယ်။

ပင့်ကူမျှင်ဆိုတာ သဘာဝအရဖြစ်တည်နေပြီး သူ့ရဲ့အလွန်ခိုင်ခံ့မှု၊ ဆန့်ထုတ်နိုင်မှု၊ ပေါ့ပါးမှုနဲ့သဘာဝနည်းအရ ဆွေးမြည့်နိုင်မှုတို့ကြောင့် သိပ္ပံပညာရှင်များရဲ့စိတ်ဝင်စားမှုကို ခံနေရတာပါ။  တကယ်လို့များ ပင့်ကူများရဲ့ သဘာဝဖြစ်စဉ်များကို သိရှိပြီး ဒီဖြစ်စဉ်ကိုပေါင်းစပ် အသုံးပြုလိုက်နိုင်မယ်ဆိုရင် ပိုမိုစွမ်းဆောင်ရည်မြင့်မားတဲ့ အရာတွေပေါ်ထွက်လာနိုင်တယ်လို့ ပညာရှင်များက ယူဆထားပါတယ်။ ဒီအတွက်ကြောင့်ပဲ သူတို့ရဲ့မျိုးရိုးဗီဇပြုပြင် ပြောင်းလဲမှုကိရိယာကို လက်တွေ့အသုံးပြုခဲ့တာပါ။

CRISPR-Cas9 ဆိုတဲ့ မျိုးရိုးဗီဇပြုပြင်ပြောင်းလဲမှုဆိုင်ရာကိရိယာက သက်ရှိဒီအန်အေများကို တိကျမှုရှိစွာ ပစ်မှတ်ထားကာ မျိုးရိုးဗီဇများကို ဖြတ်ထုတ်ခြင်း၊ ထည့်သွင်းခြင်းတို့ကို လုပ်ဆောင်နိုင်စေတဲ့ ကိရိယာဖြစ်ပါတယ်။ အခုစမ်းသပ်မှုမှာ မျိုးရိုးဗီဇ ပြုပြင်ပြောင်းလဲမှု စနစ်နဲ့အတူ အနီရောင်တောက်ပတဲ့ပရိုတိန်းမျိုးရိုးဗီဇကို ပင့်ကူထဲထိုးသွင်းလိုက်တာ ဖြစ်ပါတယ်။ ရလဒ်ကတော့ အစမ်းသပ်ခံပင့်ကူက အနီရောင်တောက်ပတဲ့ ပင့်ကူမျှင်ကို ထုတ်လွှတ်နိုင်တာကြောင့် သူတို့ရဲ့စမ်းသပ်မှုက အောင်မြင်တယ်လို့ ဆိုရမှာဖြစ်ပါတယ်။

Source: https://myawady.net.mm/