ပေါ့သ်အူပရင့်စ်  ဇန်နဝါရီ ၁၅

ဟေတီနိုင်ငံ၌ ၂၀၂၄ ခုနှစ် ဒီဇင်ဘာလအထိ ပြည်တွင်းနေရပ်စွန့်ခွာသူပေါင်း ၁ ဒသမ ၀၄၁ သန်းကျော်ရှိကြောင်း‌ ရွှေ့ပြောင်းနေထိုင်ခြင်းဆိုင်ရာ နိုင်ငံတကာအဖွဲ့အစည်း (အိုင်အိုအမ်) ကပြောသည်။ အဆိုပါ ပမာဏမှာ နိုင်ငံ့လူဦးရေ စုစုပေါင်း၏ ၉ ရာခိုင်နှုန်းခန့် ရှိသည်ဟု ဆိုသည်။

ဇန်နဝါရီ ၁၄ ရက်တွင် အိုင်အိုအမ်၏ အစီရင်ခံဖော်ပြချက်အရ ၂၀၂၃ ခုနှစ် ဒီဇင်ဘာလတွင် ပြည်တွင်းနေရပ်စွန့်ခွာသူပေါင်း ၃၁၅၀၀ သာရှိသည့်အတွက် ယမန်နှစ်တွင် နေရပ်စွန့်ခွာလာသူပေါင်း သုံးဆကျော်မြင့်တက်ကြောင်း သိရသည်။

အကြမ်းဖက်မှုများ ဆက်တိုက်ဖြစ်ပေါ်နေမှုက ကျန်းမာရေးစောင့်ရှောက်မှုစနစ်ကဲ့သို့ မရှိမဖြစ်အရေးပါသော ဝန်ဆောင်မှုဌာနပြိုလဲမှုများကို ဖြစ်ပေါ်စေသည်။ ထို့ပြင် စားရေရိက္ခာမလုံလောက်မှုအခြေအနေ ပိုမိုဆိုးရွားလာခြင်းသည် ပြည်တွင်းနေရပ်စွန့်ခွာသူ အရေအတွက် ပိုမိုများပြားလာခြင်း၏ နောက်ကွယ်မှ အဓိကအကြောင်းရင်းတစ်ခုဖြစ်ကြောင်း သိရသည်။

အဆိုပါ အစီရင်ခံစာတွင် နိုင်ငံ၏မြို့တော် ပေါ့သ်အူပရင့်စ်၌ ပြည်တွင်းနေရပ်စွန့်ခွာသူအရေအတွက်မှာ ၈၇ ရာခိုင်နှုန်းရှိသောကြောင့် နှစ်ဆခန့်မြင့်တက်လာကြောင်း ဆိုးဆိုးရွားရွား ထိခိုက်ခံစားရလျက်ရှိပြီး အစားအစာ၊ ကျန်းမာရေးစောင့်ရှောက်မှု၊ အမိုးအကာနှင့်  သန့်ရှင်းသော သောက်သုံးရေအရေးပေါ် လိုအပ်လျက်ရှိကြောင်း သိရသည်။

ဆင်ဟွာ

Source: မြန်မာ့အလင်းသတင်းစာ

Tik Tok ပိတ်သိမ်းမည့်ဥပဒေကို အမေရိကန်တွင် မပြဋ္ဌာန်းသေးမီအချိန်အတွင်း အမေရိကန်ပြည်သူများအကြား Xiaohongshu ဟု လူသိများသော တရုတ်နိုင်ငံထုတ် RedNote ပလက်ဖောင်းသုံးစွဲမှု မြင့်တက် လျက်ရှိနေပြီး ၂ ရက်တာအတွင်း သုံးစွဲသူ ၇ သိန်းကျော် အထိ တိုးများလာလျက်ရှိကြောင်း သိရပါသည်။ 

ပြီးခဲ့သည့် ဇန်နဝါရီ ၁၃ ရက်နေ့က RedNote ပလက်ဖောင်းတွင် Tik Tok ဒုက္ခသည်များ တိုက်ရိုက်စကားဝိုင်းကို အမေရိကန်ပြည်သူ ၅ သောင်းကျော်နှင့် တရုတ်ပြည်သူတို့ အတူတကွ အသုံးပြု၍ ဆွေးနွေးမှုများ ပြုလုပ်ခဲ့ကြသည်။ 

RedNoteမှာ လက်ရှိအချိန်တွင်မတည်ရင်းနှီးငွေ အမေရိကန်ဒေါ်လာ ၁၇ ဘီလီယံ ကျော်ဖြင့်လုပ်ငန်းလည်ပတ်လျက်ရှိပြီး ဓာတ်ပုံဖြင့်လည်းကောင်း၊ ဗီဒီယို ဖြင့်လည်းကောင်း၊ စာသားဖြင့်လည်းကောင်း သုံးစွဲသူများ၏ နေ့စဉ်ဘဝအကြောင်းများကို မှတ်တမ်းတင်ခြင်း လုပ်ဆောင်ပေးနိုင်ပါသည်။

RedNote နှင့်အပြိုင် ဒုတိယလူသုံးအများဆုံးမှာ ByteDance ကုမ္ပဏီပိုင် Lemon 8 အက်ပလီကေးရှင်းဖြစ်ပြီး ထိုအက်ပလီကေးရှင်းမှာလည်း ယခင်လအတွင်း က Google Playstore တွင် ဒေါင်းလော့ဒ်ပြုလုပ်မှု သိသိသာသာ မြင့်တက်လာလျက်ရှိပြီး  ဒီဇင်ဘာလတွင် ဒေါင်းလော့ဒ်ပြုလုပ်သူ ၃.၄ သန်းအထိ မြင့်တက်လာကြောင်း သိရှိရပါသည်။ 

ByteDance ကုမ္ပဏီပိုင် Tik Tok သည် တရုတ်နိုင်ငံတွင် Duoyin နှင့် အခြားနိုင်ငံများတွင် Tik Tok ဟူ၍ ဗားရှင်းနှစ်မျိုးအသုံးပြုရသော်လည်း ယခုကျော်ကြားလာသည့် RedNote အက်ပလီကေးရှင်းမှာ မည်သည့်နိုင်ငံတွင်မဆို တူညီသည့် ဗားရှင်းတစ်မျိုးဖြင့်သာ အသုံးပြုနိုင်မည်ဖြစ်ကြောင်း သိရှိရပါသည်။

ကိုးကား-The Guardian

တွစ်တာ စတော့ရှယ်ယာပိုင်ဆိုင်မှုကို ထုတ်ဖော်ရန် ပျက်ကွက်ခဲ့မှု၊ ကုမ္ပဏီရှယ်ယာများကို ဈေးနှိမ်ပြီး ဝယ်ယူပိုင်ဆိုင်ခဲ့မှုများကြောင့် အီလွန်မက်စ်အား အမေရိကန်ဘဏ္ဍာရေးပညာရှင်တစ်ဦးက တရားစွဲဆိုထားကြောင်း သိရှိရပါသည်။

ပြီးခဲသည့် ဇန်နဝါရီ ၁၄ ရက်နေ့တွင် အီလွန်မက်စ်အား မသမာသည့်နည်းလမ်းအသုံးပြု၍ ရှယ်ယာဝယ်ယူထားမှုဖြင့် အမေရိကန်၊ ရှယ်ယာနှင့် ငွေကြေးလဲလှယ်မှုကော်မရှင်က  အမေရိကန်ပြည်ထောင်စုတရားလွှတ်တော်ချုပ်တွင် အမှုဖွင့်ခဲ့ပါသည်။ အီလွန်မက်စ်သည် Twitter ကုမ္ပဏီအား မဝယ်ယူခင်က ကုမ္ပဏီ၏ ရှယ်ယာ ၅ % ကို ထုတ်ပြန်ကြေညာခြင်းမပြုဘဲ ဝယ်ယူခဲ့ခြင်းကို  ၎င်း၏ ရှယ်ယာပိုင်ဆိုင်မှုအစီရင်ခံစာ ထုတ်ပြန်ခဲ့ပြီးမှသာ သိရှိရကြောင်း၊ Twitter ရှယ်ယာများအတွက် အမေရိကန် ဒေါ်လာ သန်း ၁၅၀ လျော့နည်းပြီး ပေးချေထားကြောင်း စွဲချက်တင်ထားပါသည်။ 

အီလွန်မက်စ်သည် Twitter ကို ၂၀၂၂ ခုနှစ်တွင် ဒေါ်လာ ၄၄ ဘီလီယံနှင့် ဝယ်ယူခဲ့ပြီးနောက် X မီဒီယာပလက်ဖောင်းဟု အမည်ပြောင်းခဲ့ပါသည်။ Twitter ကို အပိုင်မဝယ်ယူခင်က ကုမ္ပဏီ၏ ရှယ်ယာ ၅ % ကို ထုတ်ပြန်ကြေညာခြင်းမပြုဘဲ ဝယ်ယူခဲ့သည့် အီလွန်မက်စ်၏ ရှယ်ယာပိုင်ဆိုင်မှု အစီရင်ခံစာ ထွက်လာပြီး ၁၁ ရက်‌ အကြာတွင် SEC က တရားစွဲဆိုလိုက်ခြင်းဖြစ်ပါသည်။ 

အီလွန်မက်စ်သည် ပြီးခဲ့သည့် အမေရိကန် ပြည်ထောင်စုရွေးကောက်ပွဲ၌ ဒေါ်နယ်ထရမ့်၏ မဲဆွယ်စည်းရုံးမှုအတွက် အမေရိကန်ဒေါ်လာသန်း ၂၅၀ ကျော် သုံးစွဲပေးထားပြီး ရွေးကောက်ခံသမ္မတဖြစ်လာသူ ထရမ့်ကလည်း ၎င်းအား အစိုးရအကြံပေးအဖွဲ့ ခေါင်းဆောင်အဖြစ် ခန့်အပ်ထားပါသည်။

ကိုးကား -The Guardian

ကမ္ဘာကျော် တောင်ကိုရီးယားနည်းပညာ ကုမ္ပဏီကြီးတစ်ခုဖြစ်သည့် Samsung ကုမ္ပဏီသည် ၎င်းတို့ ထုတ်လုပ်ထားသည့် Galaxy စမတ်ဖုန်းအဟောင်းများကို ပြန်လည်လက်ခံ ဝယ်ယူပေးမည့် အစီအစဉ် တစ်ရပ်ကို ဇန်နဝါရီလ ၁၄ ရက်တွင် တရားဝင်  ထုတ်ပြန်ကြေညာမည်ဖြစ်သည်။

Galaxy Easy Compensation ဟုအမည်ပေးထားသည့် အဆိုပါအစီအစဉ်သည် အီလက်ထရွန်နစ်ပစ္စည်း အပျက်အစီးများ လျှော့ချရေးနှင့် ပြန်လည်ပြုပြင် အသုံးပြုရေးတို့ကို မြှင့်တင်ပေးရန် ရည်ရွယ်ခြင်းဖြစ်သည်။

အစီအစဉ် အရ Samsung အသုံးပြုသူများအနေဖြင့် ၎င်းတို့၏ ဖုန်းအဟောင်းများကို ကုမ္ပဏီ၏ဝက်ဘ်ဆိုက်မှ တစ်ဆင့် ပြန်လည်ရောင်းချနိုင်မည်ဖြစ်သည်။

ထို့ပြင် စမတ်ဖုန်းအသုံးပြုသူများ အနေဖြင့်လည်း ၎င်းတို့၏ ဖုန်းအဟောင်းများကို ရောင်းချနိုင်မည့် ခန့်မှန်းဈေးနှုန်းကိုလည်း စုံစမ်းဖော်ထုတ်နိုင်မည်ဖြစ်ပြီး ဈေးနှုန်းအား ဆုံးဖြတ်ပြီးပါက ဖုန်းအဟောင်းများကို Samsung ကုမ္ပဏီသို့ ချောပို့စနစ်ဖြင့် ပို့ဆောင်ပေးနိုင်မည်ဖြစ်သည်။

အသုံးပြုသူများ  ပေးပို့လိုက်သည့် Samsung ဖုန်းအဟောင်းများကို ကုမ္ပဏီမှ Excellent၊ Good နှင့် Recycle ဟူ၍ အဆင့် သုံးဆင့်ခွဲခြားသတ်မှတ်ပြီး သတ်မှတ်တန်ဖိုးများကို အသုံးပြုသူများထံ  အသီးသီး ပြန်လည်ပို့ပေးမည်ဖြစ်သည်။

ကုမ္ပဏီအနေဖြင့် လာမည့်အနာဂတ်ကာလတွင် ၎င်းတို့ထုတ်လုပ်ထားသည့် လက်တော့များ၊   စမတ်နာရီများ၊ တက်ဘလက်ဖုန်းများကိုလည်း ယခုအစီအစဉ်အတိုင်း ပြန်လည်လက်ခံမည်ဟူသော မျှော်လင့်ချက်များလည်း ထွက်ပေါ်လျက်ရှိသည်။

Source: Myawady Web Portal

ရီယိုဒီဂျနေရိုး   ဇန်နဝါရီ ၁၃

ဘရာဇီးနိုင်ငံတောင်ပိုင်း၌ ဇန်နဝါရီ ၁၂ ရက်က မိုးသည်းထန်းစွာရွာသွန်းမှုကြောင့် သေဆုံးသူ ၁၁ ဦးရှိပြီး ၎င်းတို့အနက် ကိုးဦးမှာ မီးနပ်ဂျီရေ့စ်ပြည်နယ် တောင်ကြားဒေသ၌ မြေပြိုမှုကြောင့် သေဆုံးသူများဖြစ်သည်ဟု ဒေသခံအာဏာပိုင်များက ပြောသည်။

အိုင်ပက်တင်ဂါမြို့တွင် မြေပြိုမှုကြောင့် ကိုးဦးသေဆုံးပြီး တစ်ဦးပျောက်ဆုံးနေဆဲဖြစ်သည်။ အဆိုပါမြို့တွင် မိုးသည်းထန်စွာရွာသွန်းမှုကြောင့် မြေပြိုမှုနှင့် ရေကြီးမှုများ ဖြစ်ပေါ်ခဲ့သည်။ ယင်းအခြေအနေကို တုံ့ပြန်သည့်အနေဖြင့် တာဝန်ရှိသူများက ရက်ပေါင်း ၁၈၀ ကြာ လူထုသဘာဝဘေးအန္တရာယ်အဖြစ် ကြေညာခဲ့သည်။

မီးနပ်ဂျီရေ့စ် အုပ်ချုပ်ရေးမှူးက ဇန်နဝါရီ ၁၃ ရက်တွင် အဆိုပါဒေသသို့ သွားရောက်ကာ သဘာဝဘေးအန္တရာယ်ကြောင့် ပျက်စီးဆုံးရှုံးမှုများကို အကဲဖြတ်ရန်နှင့် နေအိမ်ဆုံးရှုံးသွားသူများအတွက် လုံခြုံစိတ်ချရသည့် ယာယီအိမ်ရာများ ပြုလုပ်ပေးသွားမည်ဟု လူမှုကွန်ရက်မီဒီယာတွင် ပြောသည်။ ဆန်တာ ကက်တာရီနားဒေသတွင်လည်း မိုးသည်းထန်စွာရွာသွန်းမှုကြောင့် တစ်ဦးသေဆုံးပြီး တစ်ဦးပျောက်ဆုံးခဲ့သည်ဟု သိရသည်။

Source: မြန်မာ့အလင်းသတင်းစာ

Photo: Reuters

ကမ္ဘောဒီးယားအတိုက်အခံအမတ်ဟောင်းတစ်ဦးသည် အင်္ဂါနေ့ညနေပိုင်းက ဘန်ကောက်မြို့တော် Phra Nakhon ခရိုင်တွင် မော်တော်ဆိုင်ကယ်သမားတစ်ဦး၏ ပစ်ခတ်သတ်ဖြတ်ခြင်းကို ခံလိုက်ရကြောင်း သိရသည်။

လင်မ်ကင်ယာ(၇၃ နှစ်) သည် အခင်းဖြစ်နေရာတွင်ပင် သေဆုံးခဲ့ပြီး လုပ်ကြံသတ်ဖြတ်သူကို မြို့တော်ရဲတပ်ဖွဲ့ဝင်များက လိုက်လံရှာဖွေလျက်ရှိသည်။

အခင်းဖြစ်နေရာမှ ထောက်လှမ်းရေးကင်မရာဗီဒီယိုမှတ်တမ်းအရ Honda Wave 100 မော်တော်ဆိုင်ကယ်စီးလာသည့် အမျိုးသားတစ်ဦးက သေနတ်ဖြင့်ပစ်ခတ်ခဲ့ခြင်းဖြစ်သည်ဟု ရဲတပ်ဖွဲ့က ပြောဆိုသည်။

သေဆုံးသူသည် ကမ္ဘောဒီးယားနှင့် ပြင်သစ်နှစ်နိုင်ငံ၏ နိုင်ငံသားခံယူထားသူဖြစ်ပြီး သူ၏ ပြင်သစ်ဇနီးသည် ကမ္ဘောဒီးယားလူမျိုးဦးလေးတို့နှင့်အတူ ကမ္ဘောဒီးယားနိုင်ငံ ဆီယမ်ယိမှ ဘတ်စ်ကားဖြင့် ဘန်ကောက်သို့ ရောက်ရှိလာခြင်းဖြစ်သည်။

အခင်းဖြစ်နေရာသို့ ရောက်ရှိပြီး မကြာမီမှာပင် ပစ်ခတ်မှုဖြစ်ပွားခဲ့သည်ဟု ရဲတပ်ဖွဲ့က ပြောဆိုသည်။ ဆိုင်ကယ်စီးလာသော ပြစ်မှုကျူးလွန်သူသည် အခင်းဖြစ်နေရာတွင် ဆိုင်ကယ်ကိုရပ်ကာ ဆင်းလာပြီးနောက် ပစ်ခတ်ခဲ့ခြင်းဖြစ်သည်။ ယင်းနောက် သူသည် Phra Sumen လမ်းအတိုင်း ဆိုင်ကယ်ဖြင့် ပြန်မောင်းထွက်ပြေးခဲ့သည်ဟု ရဲတပ်ဖွဲ့က ပြောဆိုသည်။

လင်မ်ကင်ယာသည် ကမ္ဘောဒီးယားနိုင်ငံ၏ အဓိကအတိုက်အခံပါတီဖြစ်သော CNRP ပါတီဝင်တစ်ဦးဖြစ်ပြီး ပါတီသည် ၂၀၁၇ ခုနှစ်နိုဝင်ဘာလတွင် တရားရုံးချုပ်၏ ဖျက်သိမ်းမိန့်ဖြင့် အဖျက်ခံခဲ့ရသည်။

ယခင်ကမ္ဘောဒီးယားဝန်ကြီးချုပ် ဟွန်ဆင်လက်ထက်က ညှင်းပန်းနှိပ်စက်မခံရရေးအတွက် သူ့လုပ်ဖော်ကိုင်ဖက် ပါတီဝင်များစွာသည် ပြည်ပသို့ ထွက်ပြေးတိမ်းရှောင်ခဲ့ကြသည်။ ပြင်သစ်ပတ်စ်ပို့ကိုင်ဆောင်ထားသော လင်မ်ကင်ယာသည် နေရာသစ်တွင် အလွယ်တကူအခြေချခွင့်ရှိသည့်တိုင် ကမ္ဘောဒီးယားတွင် ဆက်ရှိနေခဲ့သည့် လက်တစ်ဆုပ်စာ ပါတီအမတ်များတွင် တစ်ဦးအပါအဝင်ဖြစ်သည်။

“နိုင်ငံရေးကို ဘယ်တော့မှ အရှုံးမပေးပါဘူး” ဟု ထိုအချိန်က သတင်းထောက်များကို သူ ပြောဆိုခဲ့သည်။

Ref: ဘန်ကောက်ပို့စ်

Source: Popular Myanmar

အမေရိကန်နိုင်ငံ၊ ကယ်လီဖိုးနီးယားပြည်နယ် လော့စ်အိန်ဂျလိစ်မြို့ဝန်းကျင်တွင် လောင်ကျွမ်းလျက်ရှိသော တောမီးသည် လွန်ခဲ့သော သီတင်းပတ် ဇန်နဝါရီ ၇ ရက်နေ့ညနေမှ စတင်လောင်ကျွမ်းခဲ့ ပါသည်။ 

ယခုအချိန်အထိ လူပေါင်း ၂ ဒါဇင်ကျော်သေဆုံးခဲ့ကာ အမြောက်အမြားပျောက်ဆုံးနေပြီး လေပြင်းတိုက်ခတ်မှုကြောင့် မီးလောင်မှုသည် အလျင်အမြန် ကူးစက် လောင်ကျွမ်းနေပါသည်။ မီးလောင်မှု ဧရိယာအရွယ်အစားသည် ဝါရှင်တန်မြို့အရွယ်အစားခန့် လောင်ကျွမ်းထားပြီး ဇန်နဝါရီ ၁၄ ရက်နေ့ နံနက်ပိုင်းမှစတင်ကာလေပြင်းတိုက်ခတ်မှုများ ပိုမိုဆိုးလာသည့်အတွက် အရေးပေါ်အခြေအနေ ကြေညာထားရကြောင်း သိရ ပါသည်။ 

လေတိုက်နှုန်းသည် တစ်နာရီလျှင် ၇၅ မိုင်နှုန်း (တစ်နာရီ ၁၂၀ ကီလိုမီတာ) နှုန်းဖြင့် ဇန်နဝါရီ ၁၄ ရက်နေ့ အစောပိုင်းမှစ၍ ၁၅ ရက်နေ့ အထိ တိုက်ခတ်နိုင်ပြီး နောက်ပိုင်းတွင် တစ်နာရီ မိုင် ၅၀ မှ ၇၀ အထိ တိုက်ခတ်နိုင်ကြောင်း အမျိုးသားမိုးလေဝသဌာန၏ မိုးလေဝသခန့်မှန်းရေးစင်တာမှ မိုးလေဝသပညာရှင် David Roth ဒေဗစ်ရို့သ်က ပြောကြားခဲ့ပါသည်။

ခြောက်သွေ့ပြီး အန္တရာယ်ရှိသည့် ဟာရီကိန်း ဆန်တာအန်နာ၏ လေတိုက်နှုန်းအရှိန်တက်လာခြင်းကြောင့် ဇန်နဝါရီ ၁၃ ရက်နေ့ နှောင်းပိုင်းတွင် အနီရောင် သတိပေးချက် ထုတ်ပြန်ခဲ့ပါသည်။

လော့စ်အိန်ဂျလိစ်မြို့၏ အဆုံးတစ်ဖက်တစ်ချက်တွင် မီးလောင်ကျွမ်းမှုဖြစ်ပွားရာနေရာနှင့် မြေပြင်မှ မီးလောင်ကျွမ်းမှုများအား မီးငြှိမ်းသတ်သူ ၈,၅၀၀ ကျော်က မပြန့်ပွားရန် ညတွင်းချင်း တားဆီးနိုင်ခဲ့ပါသည်။

မီးလောင်ကျွမ်းမှုသည် ပိုမိုဆိုးရွားလာနေပြီး မီးကူးစက်လောင်ကျွမ်းနေမှုအား ထိန်းချုပ်နိုင်ရန် ကြိုးစားလုပ်ဆောင်နေရကြောင်း လော့စ်အိန်ဂျလိစ်မြို့ မီးသတ်ဦးစီးချုပ် ခရစ်စတင်းခရိုးလေးမှ ဒေသခံများအား ပြောကြားခဲ့ပါသည်။ပြည်နယ်အာဏာပိုင်များကလည်း လော့စ်အိန်ဂျလိစ်နှင့် ကယ်လီဖိုးနီးယားတောင်ပိုင်းခရိုင်များတွင် မီးဘေးအန္တရာယ်မြင့်မားသည့်နေရာများ၌ မီးသတ်တပ်ဖွဲ့ဝင်များကို ကြိုတင်နေရာချထားခဲ့ကြောင်း တာဝန်ရှိသူများက ပြောကြားခဲ့ပါသည်။

ကိုးကား-Myanmar National Post

ပြင်သစ်နိုင်ငံရေးပါတီ The Ecologists ခေါင်းဆောင် Marine Tondelier က Elon Musk ၏ X Social Media Platform ကို ဥရောပသမဂ္ဂနိုင်ငံများ၌ ပိတ်ပင်ရန် တောင်းဆိုလိုက်ပါသည်။ ၎င်း၏တောင်းဆိုမှုအကြောင်းပြချက်တစ်ခုမှာ ဒီမိုကရေစီဖော်ဆောင်မှုလမ်းစဉ်ကို အနှောင့်အယှက်ဖြစ်စေခြင်းကြောင့်ဟု ပြောဆိုထားပြီး အထူးသဖြင့် ရွေးကောက်ပွဲကာလများတွင် ပိတ်ပင်ရန် ပြောကြားခဲ့သည်။

ဇန်နဝါရီ ၁၂ ရက်နေ့တွင် RTL ၏ Le Grand Jury အစီအစဉ်၌ Tondelier က Elon Musk နှင့် EU တာဝန်ရှိသူများအကြား တင်းမာမှုမြင့်တက်နေချိန်တွင် X ၏ လွှမ်းမိုးနေမှုအပေါ် စိုးရိမ်မိကြောင်း ထုတ်ဖော်ပြောဆိုခဲ့သည်။

ပြည်သူအများ၏ လွတ်လပ်စွာထုတ်ဖော်ပြောဆိုခွင့်သည် အရေးပါသော်လည်း အမြင်လွဲမှားစေမည့် အယူအဆအချက်အလက်များ ဖြန့်ဝေမှုသည် အန္တရာယ်များပြီး ပိုင်ဆိုင်မှုကြွယ်ဝလာခြင်းနှင့်အတူ အခွင့်အာဏာရရှိရေး လုပ်ဆောင်လာခြင်းဖြစ်ကြောင်း ၎င်းက ပြောကြားခဲ့ပါသည်။

ကိုးကား-RT

Tik Tok ကို တရုတ်နိုင်ငံသားမဟုတ်သည့် ကုမ္ပဏီထံရောင်းချရမည်ဆိုပါက အီလွန်မတ်စ်ထံ ရောင်းချပေးလိုကြောင်း တရုတ်အရာရှိကြီးများက ပြောကြား လိုက်ပါသည်။

တရုတ်နိုင်ငံအနေဖြင့်မူ Tik Tok ကို တရုတ်ကုမ္ပဏီ ByteDance လက်အောက်တွင် ဆက်လက်ထားရှိလိုပြီး ကုမ္ပဏီအနေဖြင့်လည်း အမေရိကန်က TikTok ပိတ်သိမ်းရန်ထုတ်ပြန်ထားသည့် ဥပဒေအပေါ် အမေရိကန်တရားလွှတ်တော်ချုပ်သို့ အယူခံတင်သွင်းရန် ဆောင်ရွက်နေကြပါသည်။ သို့သော် ဇန်နဝါရီ လ ၁၀ ရက်နေ့တွင်ကြားနာမှုများအရ တရားလွှတ်တော်ချုပ်သည်အမေရိကန်တွင် Tik Tok ပိတ်ပင်မည့်ဥပဒေကို အတည်ပြုရန် အလားအလာများနေပါသည်။

Tik Tokကို ရောင်းချမည့်ကိစ္စအပေါ် တရုတ်၏ သဘောထားအား အီလွန်မတ်စ်နှင့် ၎င်း၏ ကိုယ်စားလှယ်များက ပြန်လည်ဖြေကြားထားခြင်းမရှိသေးပါ။ ကမ္ဘာကျော်အမေရိကန်သူဌေးကြီး အီလွန်မတ်စ်သည် ပြီးခဲ့သည့် အမေရိကန်ရွေးကောက်ပွဲတွင် ဒေါ်နယ်ထရမ့်၏ မဲဆွယ်စည်းရုံးရေးအတွက် အမေရိကန်ဒေါ်လာ သန်း ၂၅၀ ကျော် သုံးစွဲပေးခဲ့ပါသည်။

 "အမေရိကန်တွင် Tik Tok ကို ပိတ်ပင်ခြင်းသည် အမေရိကန်တို့၏ လွတ်လပ်စွာ ထုတ်ဖော်ပြောဆိုခွင့်ကို ချိုးဖောက်ရာရောက်ကြောင်း" အီလွန်မတ်စ်က ဧပြီလတွင် ၎င်း၏ X မီဒီယာပလက်ဖောင်းတွင် ရေးသားခဲ့ဖူးပါသည်။ သို့သော် Tik Tok ကို အီလွန်မတ်စ်ထံ ရောင်းချလိုကြောင်း တရုတ်၏ လိုလားချက်အပေါ် သက်ဆိုင်ရာ တရုတ်နိုင်ငံ ဆိုက်ဘာစီမံခန့်ခွဲရေးဌာနနှင့် ကုန်သွယ်ရေးဝန်ကြီးဌာနတို့ကမူ မှတ်ချက်ပေးထားခြင်း မရှိသေးကြောင်း သိရှိရပါသည်။ အမေရိကန်၌ Tik Tok အက်ပလီကေးရှင်းမှတစ်ဆင့် လည်ပတ်နေသည့် ငွေတန်ဖိုးမှာ အမေရိကန်ဒေါ်လာ ၄၀ ဘီလီယံမှ ၅၀ ဘီလီယံဝန်းကျင် ရှိနိုင်ကြောင်း လေ့လာသုံးသပ်သူများ၏ အဆိုအရ သိရှိရပါသည်။ 

ကိုးကား - The Straits Times

လော့စ်အိန်ဂျလိစ်တွင် ကြီးမားသော တောမီးလောင်ကျွမ်းမှုအတွင်း  ယခုအချိန်အထိ လူ ၂၄ ဦး သေဆုံးခဲ့ပြီး မီးလောင်ကျွမ်းမှု ပိုမိုပြင်းထန်လာနိုင်သည့် အန္တရာယ်ရှိ သောလေပြင်းများ ဝင်ရောက်လာနိုင်ကြောင်း သတိပေးထားသည်။

ခြောက်ရက်မြောက်နေ့တွင် အမေရိကန်နိုင်ငံ၏ ဒုတိယအကြီးဆုံးမြို့၌ မီးလောင်ကျွမ်းမှု ဆက်လက်ဖြစ်ပွားခဲ့ပြီး ဧရိယာတစ်ခုလုံးနီးပါး လောင်ကျွမ်းပျက်စီးသွားကာ လူထောင်ပေါင်းများစွာ အိုးမဲ့အိမ်မဲ့ဖြစ်ခဲ့ရသည်။

ကယ်လီဖိုးနီးယားပြည်နယ် အုပ်ချုပ်ရေးမှူး Gavin Newsom က တောမီးသည် အမေရိကန်သမိုင်းတွင်အဆိုးရွားဆုံးသဘာဝဘေးဖြစ်ပြီး အိမ်ခြေ ထောင်ပေါင်းများစွာ ပျက်စီးကာ လူပေါင်း ၁,၀၀၀,၀၀၀ ကို ဘေးလွတ်ရာသို့ ရွှေ့ပြောင်းခဲ့ရကြောင်း ပြောကြားခဲ့သည်။

မီးငြှိမ်းသတ်ရေးကြိုးပမ်းမှုများသည် ပါလီဆိတ်ဒေသ တောမီးပျံ့နှံ့မှုကို ထိန်းချုပ်နိုင်ခဲ့သော်လည်း တောမီးသည် ဘရန့်ဝုဒ်နှင့်လူဦးရေ ထူထပ်သော ဆန်ဖာနန်ဒို တောင်ကြားဆီသို့ ဦးတည်သွားခဲ့သည်။

လာမည့်ရက်များအတွင်း ပြင်းထန်သော မီးလောင်ကျွမ်းမှုများနှင့်အတူ အသက်အန္တရာယ်ရှိသော အခြေအနေများ ဆိုးရွားစွာကြုံတွေ့လာနိုင်ကြောင်း ခန့်မှန်းထားကြပါသည်။

လေပြင်းတိုက်ခတ်မှုနှုန်း တစ်နာရီလျှင် မိုင် ၇၀ (၁၁၀ ကီလိုမီတာ) အထိ တိုက်ခတ်နိုင်ပြီး အန္တရာယ်ရှိသောအခြေအနေ (PDS) ကို ဇန်နဝါရီ ၁၄ ရက်နေ့ အစောပိုင်းတွင် ထုတ်ပြန်ကြေညာမည်ဖြစ်ကြောင်း အမျိုးသားမိုးလေဝသဌာနမှ မိုးလေဝသပညာရှင် ရို့စ်ဆန်ချိုရန်ဖဲ က ပြောကြားခဲ့သည်။

အဆိုပါလေပြင်းတိုက်ခတ်မှုကြောင့် မီးတောက်များကိုဖြစ်ပေါ်စေပြီး လက်ရှိလောင်ကျွမ်းလျက်ရှိသော ဇုန်များမှ မီးတောက်များကို နေရာသစ်များသို့ တွန်းပို့သကဲ့သို့ဖြစ်နိုင်ကြောင်း မီးသတ်သမားများက သတိပေးထားသည်။

လော့စ်အိန်ဂျလိစ် မီးသတ်ဌာနက ၎င်းတို့သည် အခြားဒေသများမှ ရေထရပ်ကားများနှင့် မီးသတ်သမား ဒါဇင်ပေါင်းများစွာအပါအဝင် ထောက်ပံ့မှုများကို လက်ခံရရှိခဲ့ပြီး ထပ်မံဖြစ်ပေါ်လာမည့် ဘေးအန္တရာယ်များကိုရင်ဆိုင်ရန် ကြိုတင်ပြင်ဆင်ထားကြောင်း ပြောကြားခဲ့သည်။

ကိုးကား-Myanmar National Post