အမေရိကန်အာဏာပိုင်များသည် ခွင့်ပြုချက်မရှိဘဲ လမ်းကြောင်းလွဲ ပျံသန်းခဲ့သည့် United Airlines လေယာဉ်တစ်စီးကို စုံစမ်းစစ်ဆေးနေပြီး ယင်းလေယာဉ်သည် အနီးမှပျံသန်းနေသော အခြားလေယာဉ် တစ်စီးနှင့် နီးကပ်စွာ တိုက်မိလုနီးပါးဖြစ်ခဲ့သည်။

ABC သတင်းဌာနက ဇွန်လ ၁ ရက်နေ့တွင် အမေရိကန် လေကြောင်းလိုင်းဌာန (FAA) ၏ ထုတ်ပြန်ချက်ကို ကိုးကား၍ အဆိုပါဖြစ်စဉ်သည် မေလ ၁၃ ရက်နေ့ ညနေပိုင်းက San Francisco အပြည်ပြည်ဆိုင်ရာ လေဆိပ်တွင် United Airlines နှင့် SkyWest Airlines လေယာဉ် နှစ်စီး တစ်ပြိုင်နက်ပျံတက်စဉ် ဖြစ်ပွားခဲ့ကြောင်း ဖော်ပြခဲ့သည်။

သတင်းများအရ United Airlines ၏ Airbus A320 လေယာဉ်အား ညာဘက်သို့ ကွေ့ရန် ခွင့်ပြုချက်ရရှိထားပြီး SkyWest Airlines ၏ CRJ-200 လေယာဉ်မှာ နောက်မှပျံတက်ကာ ဘယ်ဘက်သို့ ကွေ့ရန် ညွှန်ကြားချက်ရရှိထားသည်။

FAA ၏အဆိုအရ United လေယာဉ်သည် ခွင့်ပြုချက်မရှိဘဲ ဘယ်ဘက်သို့ ရုတ်တရက်ကွေ့သွားကာ SkyWest လေယာဉ်၏ လမ်းကြောင်းထဲသို့ ဝင်ရောက်သွားခဲ့ပြီး SkyWest လေယာဉ်မှ အန္တရာယ်သတိပေးစနစ်များ အလိုအလျောက်အလုပ်လုပ်ကာ ထိခိုက်မှုမရှိစေရန် တိမ်းစောင်း ပျံသန်းမှုပြုလုပ်ခဲ့ရသည်။

FlightRadar24 ၏ အဆိုအရ လေယာဉ်နှစ်စီးသည် အနီးဆုံး အနေအထားတွင် အလျားလိုက် မီတာ ၅၉၅ (ပေ ၁,၉၅၀) နှင့် ဒေါင်လိုက် မီတာ ၈၄ (ပေ ၂၇၅) ခန့် ကွာဝေးခဲ့သည်။

အမျိုးသား သယ်ယူပို့ဆောင်ရေး ဘေးကင်းလုံခြုံရေး ဘုတ်အဖွဲ့ (NTSB) ၏ ယခင်စုံစမ်းရေးမှူး Greg Feith က စုံစမ်းစစ်ဆေးမှုတွင် အဆင့်များစွာ ပါဝင်မည်ဖြစ်ပြီး လေယာဉ်မှူးအဖွဲ့သည် လေဆိပ်ရပ်နားရာမှ ပျံတက် သည်အထိ အဆင့်တိုင်းတွင် မည်သို့တုံ့ပြန်ခဲ့သည်ကို စစ်ဆေးမည်ဟု ပြောကြားခဲ့သည်။

SkyWest Airlines က ၎င်းတို့၏ CRJ-200 လေယာဉ်သည် ကယ်လီ ဖိုးနီးယားရှိ Fresno သို့ ဘေးကင်းစွာဆင်းသက်နိုင်ခဲ့ကြောင်း ထုတ်ပြန် ခဲ့သည်။ United Airlines ကလည်း ယင်းဖြစ်စဉ်ကို စုံစမ်းစစ်ဆေး နေကြောင်း ပြောကြားခဲ့သည်။

Feith က “ကြီးမားသည့် ပျက်စီးဆုံးရှုံးမှုဖြစ်နိုင်ခြေရှိသော်လည်း သတိပေး စနစ်များ၊ ဆက်သွယ်ရေးကွန်ယက်စနစ်များနှင့် လေယာဉ်မှူးများ၏အရေးပေါ်တုံ့ပြန်မှုတို့ကြောင့် အဆိုးဆုံးအခြေအနေကို ရှောင်ရှားနိုင်ခဲ့သည်” ဟု ထပ်လောင်းရှင်းပြခဲ့သည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

အိန္ဒိယအာဏာပိုင်များက ထိုင်းနိုင်ငံမှ မွမ်ဘိုင်းသို့ ပျံသန်းလာသည့် လေယာဉ်ပေါ်တွင် အဆိပ်ပြင်းမြွေအပါအဝင် မြွေမျိုးစိတ်များစွာကို သယ်ဆောင်လာသည့် ခရီးသည်တစ်ဦးကို ဖမ်းဆီးရမိခဲ့သည်။

ထိုင်းနိုင်ငံမှ ပြန်လာသည့် အိန္ဒိယနိုင်ငံသားတစ်ဦးသည် ၎င်း၏ ခရီးဆောင်အိတ်ထဲတွင် အင်ဒိုနီးရှားမြွေဟောက် ၄၄ ကောင်အပါအဝင် မြွေမျိုးစိတ်များစွာကို ဝှက်၍သယ်ဆောင်လာသည်ဟု မွမ်ဘိုင်းအကောက်ခွန်ဌာနက ဇွန်လ ၁ ရက်နေ့တွင် ထုတ်ပြန်ခဲ့သည်။ ထို ခရီးသည်သည် အဆိပ်ရှိသော်လည်း အသေးစားသတ္တဝါများကိုသာစားလေ့ရှိသည့် Spider snakes ၃ ကောင်နှင့် လိပ်မျိုးစိတ် ၅ ကောင် ကိုလည်း သယ်ဆောင်လာခဲ့သည်။

မွမ်ဘိုင်းတွင် တွားသွားသတ္တဝါများ ခိုးသွင်းမှုကို ဖမ်းမိခြင်းမှာ ရှားပါး ဖြစ်ရပ်ဖြစ်ပြီး အကောက်ခွန်အရာရှိများသည် ပုံမှန်အားဖြင့် ရွှေ၊ ငွေကြေး၊ ဆေးခြောက် သို့မဟုတ် ကိုကင်းဟုသံသယရှိသည့် မူးယစ်ဆေးဝါးများ ခိုးသွင်းမှုများကိုသာ ဖော်ထုတ်လေ့ရှိသည်။

ဖေဖော်ဝါရီလအတွင်းက မွမ်ဘိုင်းလေဆိပ် အကောက်ခွန်အရာရှိများသည် အင်ဒိုနီးရှား၊ မလေးရှားနှင့် ထိုင်းနိုင်ငံတို့၏ တောတွင်းတွင် နေထိုင်သည့် Siamang gibbon (ဆိုင်းအမ်ဂျီဘွန်) မျောက်မျိုးစိတ်ငယ် ၅ ကောင်ကို သယ်ဆောင်လာသည့် ခိုးသွင်းသူတစ်ဦးကို ဖမ်းမိခဲ့သည်။ ယင်းမျိုးစိတ် ကို IUCN (အပြည်ပြည်ဆိုင်ရာ သဘာဝထိန်းသိမ်းရေးအဖွဲ့) က မျိုးသုဉ်းလုနီးပါး စာရင်းဝင်အဖြစ် သတ်မှတ်ထားပြီး ခိုးသွင်းသူသည် အဆိုပါ မျောက်ငယ်များကို ခရီးဆောင်အိတ်ထဲရှိ ပလပ်စတစ်ဘူးအတွင်း ကျွမ်းကျင်စွာ ဝှက်ထားခဲ့ကြောင်း သိရပါသည်။

လွန်ခဲ့သော နိုဝင်ဘာလအတွင်းတွင်လည်း အိန္ဒိယ အကောက်ခွန် အရာရှိ များသည် လိပ်အရှင် ၁၂ ကောင်အပါအဝင် သက်ရှိသတ္တဝါများစွာကို သယ်ဆောင်လာသည့် ခရီးသည်တစ်ဦးကို ဖမ်းမိခဲ့ပြီး ၎င်းခရီးသည်သည်လည်း ထိုင်းနိုင်ငံမှ လာရောက်ခဲ့ခြင်းဖြစ်ပါသည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

ရုရှားနိုင်ငံ အနောက်ပိုင်း Bryansk ဒေသတွင် တနင်္ဂနွေနေ့ (ဇွန် ၁) က ခရီးသည်တင် ရထားတစ်စီးပေါ်သို့ တံတားပြိုကျမှုဖြစ်ပွားမှုကြောင့် လူ ၇ ဦးသေဆုံးကာ ၃၀ ဦးဒဏ်ရာရရှိခဲ့ကြောင်း ဒေသခံအုပ်ချုပ်ရေးမှူး Alexander Bogomaz က ပြောကြားခဲ့သည်။

အဆိုပါဖြစ်စဉ်၏ တိကျသော အကြောင်းရင်းကို အတည်မပြုရသေးသော်လည်း ရုရှားရထားပို့ဆောင်ရေးဌာနက သယ်ယူပို့ဆောင်ရေးလုပ်ငန်းများကို နှောင့်ယှက်တိုက်ခိုက်ခြင်းကြောင့် တံတားတိုင် ပြိုကျခဲ့သည်ဟု ဆိုသည်။

Izvestia သတင်းစာက ကိုးကားချက်တစ်ခုအရ တံတားပြိုကျမှုသည် ပေါက်ကွဲမှုတစ်ခုကြောင့် ဖြစ်နိုင်ကြောင်း ဖော်ပြခဲ့သော်လည်း အရေးပေါ် ဝန်ဆောင်မှုနှင့် စုံစမ်းရေးအရာရှိများက ပေါက်ကွဲမှုဖြစ်ပွားခဲ့ကြောင်းကို အတည်မပြုခြင်းမရှိသေးပေ။

ပြိုကျမှုသည် အဖျက်အမှောင့်ကြောင့် ဖြစ်နိုင်ကြောင်း Telegram သတင်း ချန်နယ်များစွာက အကြံပြုထားသည်။ Bogomaz က သေဆုံးဒဏ်ရာရသူများ၏ အရေအတွက်ကို ထုတ်ဖော်မပြောသေးဘဲ “၎င်းတို့အား အကူအညီပေးရန် လိုအပ်သမျှကို ဆောင်ရွက်နေပြီ” ဟုသာ ပြောကြားခဲ့သည်။

ကိုးကား- RT

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

Photo: NDTV

၂၂ ကြိမ်မြောက် ရှန်ဂရီလာ ဆွေးနွေးပွဲကို မေ ၃၀ ရက် ညပိုင်းက စင်ကာပူနိုင်ငံတွင် စတင်ကျင်းပခဲ့ရာ နိုင်ငံနှင့်ဒေသပေါင်း ၄၀ ကျော်မှ အစိုးရအဓိကအရာရှိများ၊ ကာကွယ်ရေးအရာရှိများနှင့် ကျွမ်းကျင်ပညာရှင် များ စုစုပေါင်း ၅၅၀ ကျော် တက်ရောက်ခဲ့ကြသည်။

အဆိုပါ ဆွေးနွေးပွဲကို ပြင်သစ်နိုင်ငံ သမ္မတ မက်ခရွန်၊ မလေးရှားနိုင်ငံ ဝန်ကြီးချုပ် အန်ဝါ အီဘရာဟင်၊ အရှေ့တီမောနိုင်ငံ သမ္မတ ရာမို့စ် ဟော်တာ၊အမေရိကန် ကာကွယ်ရေးဝန်ကြီး ပီတီဟတ်ဆတ်၊ ဥရောပသမဂ္ဂနိုင်ငံခြားရေးနှင့် လုံခြုံရေးမူဝါဒ အဆင့်မြင့်ကိုယ်စားလှယ် ကာယာ ကေလစ် စသည့် အစိုးရ အဓိက အရာရှိကြီးများ တက်ရောက်ခဲ့သည်။

တရုတ်ပြည်သူ့လွတ်မြောက်ရေးတပ်မတော် (PLA) ကာကွယ်ရေးတက္ကသိုလ် ဒုတိယ ပါမောက္ခချုပ်နှင့် ပညာရေးဝန်ကြီး ဟူကန်းဖုန်းက တရုတ်ကိုယ်စားလှယ်အဖွဲ့ကို ဦးဆောင်ကာ ဆွေးနွေးပွဲသို့ တက်ရောက်ခဲ့ပြီး မေ ၃၁ ရက်တွင် တတိယမြောက် သီးခြားကဏ္ဍအလိုက်ဆွေးနွေးပွဲ ဖြစ်သည့် “အာရှ-ပစိဖိတ်ဒေသ၏ ပင်လယ်ပြင်လုံခြုံရေး ပူးပေါင်း ဆောင်ရွက်မှု” သို့ တက်ရောက်မည် ဖြစ်ကြောင်းသိရသည်။

ဗြိတိန် နိုင်ငံတကာ မဟာဗျူဟာ သုတေသနဌာနမှ ကြီးမှူးကျင်းပသော ရှန်ဂရီလာဆွေးနွေးပွဲသည် ၂၀၀၂ ခုနှစ်တွင် စတင်ခြင်းဖြစ်ပြီး ယင်း ဆွေးနွေးပွဲသည် နှစ်စဉ် စင်ကာပူနိုင်ငံရှိ ရှန်ဂရီလာ ဟိုတယ်၌ ကျင်းပခြင်းကြောင့် ရှန်ဂရီလာဆွေးနွေးပွဲဟု ခေါ်ဆိုခြင်း ဖြစ်သည်။ ယခုအကြိမ် ဆွေးနွေးပွဲကို ဇွန် ၁ ရက်အထိ ဆက်လက်ကျင်းပမည် ဖြစ်ကြောင်း သိရသည်။ 

ကိုးကား- Xinhua

ယခုနှစ် နိုင်ငံတကာအလှမယ်ပြိုင်ပွဲကို စနေနေ့ (ဇွန် ၃၁) တွင် အိန္ဒိယ နိုင်ငံ၌ ကျင်းပခဲ့ရာ ထိုင်းနိုင်ငံမှ Opal Suchata Chuangsri က Miss World 2025 သရဖူကို ဆွတ်ခူးနိုင်ခဲ့သည်။

Chuangsri သည် Hyderabad မြို့တွင် ကျင်းပသော နိုင်ငံတကာမှ ပြိုင်ပွဲဝင် အလှမယ် ၁၀၈ ဦးအနက် ထိပ်ဆုံးမှ ရပ်တည်ခဲ့ပြီး အီသီယိုးပီးယား မှ Hasset Dereje Admassu က ဒုတိယရရှိခဲ့ပြီး Miss World 2024 Krystyna Pyszková က Chuangsri အား သရဖူချီးမြှင့်ပေးခဲ့သည်။

၇၂ ကြိမ်မြောက် Miss World ပြိုင်ပွဲကို ၂၀၁၆ ခုနှစ် Miss World ဆုရှင် Stephanie del Valle နှင့် အိန္ဒိယအစီအစဉ်တင်ဆက်သူ Sachiin Kumbhar တို့က ဦးဆောင်ကျင်းပခဲ့သည်။

အိန္ဒိယသည် ၂၀၂၄ ခုနှစ် တွင်လည်း အဆိုပါပြိုင်ပွဲကို လက်ခံကျင်းပခဲ့ပြီး ၂၀၂၅ ခုနှစ်တွင်လည်း ဆက်လက်လက်ခံကျင်းပခဲ့ခြင်းဖြစ်သည်။ အိန္ဒိယ ကိုယ်စားပြု Nandini Gupta သည် ဆန်ခါတင် ၂၀ ဦး စာရင်းတွင် ပါဝင်ခဲ့သော်လည်း ဆုမရရှိခဲ့ပေ။

Miss World ဘွဲ့ကို အိန္ဒိယမှ ၆ ကြိမ် ရရှိခဲ့ဖူးပြီး Reita Faria (1966), Aishwarya Rai (1994), Diana Hayden (1997), Yukta Mookhey (1999), Priyanka Chopra (2000) နှင့် Manushi Chhillar (2017) တို့ ပါဝင်သည်။

ကိုးကား- CNN

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

သမ္မတ ဒေါ်နယ်ထရမ့်၏ အေဂျင်စီများစွာတွင် အစုလိုက်အပြုံလိုက် အလုပ်ထုတ်ပယ်မှုဆိုင်ရာ ညွှန်ကြားချက်များကို ဆိုင်းငံ့ထားရန် အယူခံ တရားရုံးက သောကြာနေ့ (မေ ၃၀) ညနေပိုင်းတွင် ဆုံးဖြတ်ခဲ့သည်။

ဒေါ်နယ်ထရမ့်အစိုးရသည် အေဂျင်စီပေါင်း ဒါဇင်ကျော်တွင် အလုပ် ထုတ်ပယ်မှုများကို ရပ်တန့်ထားသည့် အောက်တရားရုံး၏ အမိန့်ကို ဆိုင်းငံ့ပေးရန် US 9th Circuit Court of Appeals သို့ တောင်းဆိုခဲ့သည်။

အဆိုပါဆုံးဖြတ်ချက်သည် ဖက်ဒရယ်အစိုးရအဖွဲ့အစည်းကို ကြီးမားစွာ လျှော့ချရန် ထရမ့်၏ ကြိုးပမ်းမှုများအတွက် အဓိကအတားအဆီးတစ်ခုဖြစ်သည်။ RIFs (reductions in force) ဟုခေါ်သော အစုလိုက် အပြုံလိုက် အလုပ်ထုတ်ပယ်မှုဆိုင်ရာ အစီအစဉ်များကို US District Judge Susan Illston က လွှတ်တော်ခွင့်ပြုချက်မရှိဘဲ ဖက်ဒရယ် အေဂျင်စီများကို ထိုကဲ့သို့သော ကြီးမားသည့် ပြုပြင်ပြောင်းလဲမှုများ မပြုလုပ်နိုင်ဟု မေလ ၉ ရက်တွင် ဆုံးဖြတ်ပြီးနောက် ဆိုင်းငံ့ထားခဲ့ခြင်းဖြစ်သည်။

၂-၁ မဲဖြင့် ဆုံးဖြတ်သည့် 9th Circuit အဖွဲ့က အဆိုပါအမှုတွင် အငြင်းပွားမှုဖြစ်နေသော ထရမ့်၏ အမိန့်စာအား “ဖွဲ့စည်းပုံအခြေခံဥပဒေအရ သမ္မတ၏ ကြီးကြပ်ရေးအာဏာကို သိသိသာသာ ကျော်လွန်နေသည်” ဟု ပြောကြား ခဲ့သည်။

“အများစုက အလုပ်ထုတ်ပယ်မှုများသည် တရားမဝင်ကြောင်း” စွပ်စွဲသည့် တရားစွဲဆိုသူများ၏ အကြောင်းပြချက်များက အောင်မြင်နိုင်ခြေရှိပြီး အစိုးရက အရေးပေါ်အယူခံဝင်ရောက်စွက်ဖက်ရန် လိုအပ်သော အချက် အလက်များကို ဖြည့်ဆည်းနိုင်ဖွယ်မရှိကြောင်း အများစုက ကောက်ချက် ချခဲ့သည်။ 

Trump သည် တရားရုံးချုပ်အား အမှုတွင်ပါဝင်ဆုံးဖြတ်ပေးရန် တစ်ချိန်က တောင်းဆိုခဲ့ပြီး (ကနဦးတွင် တုံ့ပြန်မှုမရှိခဲ့ပါ) အဆိုပါအငြင်းပွားမှုသည် နောက်ဆုံးတွင် အမြင့်ဆုံးတရားရုံးသို့ ပြန်လည်ရောက်ရှိလာနိုင်သည်ဟု ယူဆရသည်။

ကိုးကား- CNN

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ယူကေတွင် တနင်္ဂနွေနေ့ (ဇွန် ၁) မှစ၍ တစ်ခါသုံးအီးစီးကရက်များ ရောင်းချမှုကို တားမြစ်သွားမည်ဖြစ်ပြီး ထိုသို့ပြုလုပ်ခြင်းဖြင့် “ပတ်ဝန်းကျင် အိပ်မက်ဆိုး” ဟုခေါ်ဆိုနိုင်သော တစ်ခါသုံးပစ္စည်းများကို ကိုင်တွယ် ဖြေရှင်းသည့် နိုင်ငံစာရင်းတွင် ထည့်သွင်းခြင်းခံရမည်ဖြစ်သည်။

သို့သော် အချို့သော တက်ကြွလှုပ်ရှားသူများက အဆိုပါ ကန့်သတ်မှု အသစ်သည် ပလတ်စတစ်စွန့်ပစ်ပစ္စည်းများကို တိုက်ဖျက်ရာတွင် “သမုဒ္ဒရာထဲက ရေတစ်စက်” သာဖြစ်ကြောင်း သတိပေးထားသည်။

အဆိုပါတားမြစ်မှုဖြင့် ယူကေသည် ပြင်သစ်နှင့် ဘယ်လ်ဂျီယမ်နိုင်ငံများ ပြီးလျှင် တစ်ခါသုံးအီးစီးကရက်များကို ဥပဒေဖြင့်တားမြစ်သည့် ဥရောပ ၏ ပထမဆုံးနိုင်ငံများထဲတွင် ပါဝင်လာမည်ဖြစ်သည်။

ပတ်ဝန်းကျင်ထိန်းသိမ်းရေးအဖွဲ့ Material Focus မှ ဒီဇင်ဘာလတွင် ထုတ်ပြန်ခဲ့သော စစ်တမ်းတစ်ခုအရ ယူကေတွင် တစ်ပတ်လျှင် တစ်ခါသုံး အီးစီးကရက် ၈.၂ သန်းခန့် (စက္ကန့်တိုင်း ၁၃ လုံးနှုန်း) စွန့်ပစ်ခံနေရသည် ဟု ခန့်မှန်းထားသည်။

ကိုးကား- CNN

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ယူကရိန်းဝန်ကြီးချုပ်ဟောင်း Nikolay Azarov ကို ရုရှား၏ အဆင့်မြင့် သိပ္ပံအဖွဲ့အစည်း (RAS) မှ Academician အဖြစ် ရွေးချယ်တင်မြှောက် လိုက်ကြောင်း ကြေညာခဲ့သည်။

ဘူမိဗေဒဖြင့် ပါရဂူဘွဲ့ရပြီး Donetsk အမျိုးသားနည်းပညာ တက္ကသိုလ် တွင် ပါမောက္ခအဖြစ် တာဝန်ထမ်းဆောင်ခဲ့သူ Azarov သည် ၂၀၁၀ ပြည့်နှစ် မှ ၂၀၁၄ ခုနှစ်အထိ ယူကရိန်းအစိုးရအဖွဲ့၏ ခေါင်းဆောင်အဖြစ် တာဝန် ထမ်းဆောင်ခဲ့သည်။၎င်းသည် ၂၀၁၄ ခုနှစ်၊ ဖေဖော်ဝါရီလတွင် အနောက်နိုင်ငံများ၏ ထောက်ခံမှုဖြင့် ဖြစ်ပွားခဲ့သော Euromaidan ဆန္ဒပြမှု များကြောင့် နုတ်ထွက်ခဲ့ပြီး ဒီမိုကရေစီနည်းကျ ရွေးကောက် တင်မြှောက်ခံထားရသော သမ္မတ Viktor Yanukovich အား ဖယ်ရှားခံရပြီးနောက် ရုရှားသို့ ထွက်ပြေးတိမ်းရှောင်ခဲ့သည်။

ရုရှားသိပ္ပံအကယ်ဒမီက သောကြာနေ့ (မေ ၃၀) တွင် ထုတ်ပြန်ခဲ့သည့် ကြေညာချက်တွင် Azarov နှင့်အတူ နိုင်ငံခြားသား ၃၉ ဦးအပါအဝင် စုစုပေါင်း ၈၅ ဦးအား Academician အဖြစ် ရွေးချယ်ခဲ့ကြောင်း ဖော်ပြ ခဲ့သည်။ RAS အဖွဲ့ဝင် ၅၂၁ ဦးက Azarov ၏ အမည်စာရင်းကို ထောက်ခံ မဲပေးခဲ့ကြသည်။

Azarov သည် ဘူမိဗေဒဌာန (Department of Earth Sciences) တွင် Academician အဖြစ် ရွေးချယ်ခံရပြီး ၎င်း၏ ၀ါသနာသည် သတ္တု တူးဖော်ရေးသိပ္ပံ (mining sciences) ဖြစ်ကြောင်း ကြေညာချက်တွင် ဖော်ပြထားသည်။

RAS အဆိုအရ သိပ္ပံစာတမ်း ၁၀၀ ကျော်ရေးသားခဲ့သူ Azarov သည် မာကျောသောသတ္တုအရင်းအမြစ်များ ဖွံ့ဖြိုးတိုးတက်ရေး လုပ်ငန်းစဉ်အတွင်း ကမ္ဘာ့မြေအနက်ပိုင်း၏ စက်မှုဆိုင်ရာ ပြောင်းလဲမှုသီအိုရီ (rational industry - related transformation of Earth’s depth) တွင် အရေးပါသော ပံ့ပိုး မှုများ ပြုခဲ့သည်ဟု ဆိုသည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

တရုတ်နိုင်ငံအနေဖြင့် ရာသီဥတုပြောင်းလဲမှုဆိုင်ရာ စိန်ခေါ်မှုများကို ရင်ဆိုင်ဖြေရှင်းရန် ပစိဖိတ်ကျွန်းနိုင်ငံများအား ဆက်လက် ထောက်ပံ့မည်ဟု ကတိပြုခဲ့သည်။ ထို့ပြင် တရုတ်နိုင်ငံသည် ပစိဖိတ်ဒေသအပေါ် ၎င်း၏ ဩဇာလွှမ်းမိုးမှုကို တိုးမြှင့်ရန် ရည်ရွယ်ထားပြီး ကမ္ဘာကြီး ပူနွေးလာမှု အပေါ် အလေးထားဆောင်ရွက်မည်ဖြစ်ကြောင်း ပြောကြားထားသည်။

တရုတ်နိုင်ငံ နိုင်ငံခြားရေးဝန်ကြီး ဝမ်ယိနှင့် ကီရီဘာတီ၊ ဆော်လမွန် ကျွန်းစုနှင့် နော်ရူး အပါအဝင် ပစိဖိတ်ကျွန်းနိုင်ငံ ၁၁ နိုင်ငံမှ နိုင်ငံခြားရေး ဝန်ကြီးများသည် တရုတ်နိုင်ငံ၊ ဖူကျန့်ပြည်နယ်ရှိ Xiamen မြို့တွင် တွေ့ဆုံဆွေးနွေးခဲ့ပြီး အဆိုပါတွေ့ဆုံမှုအပြီး မေလ ၂၉ ရက်တွင် ပူးတွဲ ကြေညာချက် တစ်စောင် ထုတ်ပြန်ခဲ့သည်။ 

ထိုကြေညာချက်တွင် ကုန်သွယ်မှုဆက်ဆံရေးအား တိုးမြှင့်ရန်နှင့် ရာသီဥတု ပြောင်းလဲမှုကြောင့်ဖြစ်ပေါ်လာသည့် စိန်ခေါ်မှုများကို ရင်ဆိုင်ဖြေရှင်းရာတွင် တရုတ်နိုင်ငံအနေဖြင့် ဆက်လက် ထောက်ပံ့ပေးမည် ဖြစ်ကြောင်း ဖော်ပြထားသည်။ 

တရုတ်နိုင်ငံ၏ ကြိုးပမ်းဆောင်ရွက်မှုသည် အမေရိကန်သမ္မတ ဒေါ်နယ် ထရမ့်အစိုးရ၏ ရာသီဥတုဆိုင်ရာမူဝါဒနှင့် ကွဲပြားနေသည်။ ထရမ့်အစိုးရ သည် ရာသီဥတုပြောင်းလဲမှုဆိုင်ရာ ပါရီသဘောတူညီချက်မှ နုတ်ထွက်ခဲ့ပြီး ပစိဖိတ်ဒေသရှိ အမေရိကန်၏ အကူအညီအထောက်အပံ့အချို့ကို ရပ်ဆိုင်းခဲ့သည်။ ထိုဆုံးဖြတ်ချက်သည် ပစိဖိတ်ဒေသနှင့် ကမ္ဘာတစ်ဝှမ်း ရှိ နိုင်ငံများတွင် စိုးရိမ်ပူပန်မှုများကို ဖြစ်ပေါ်စေခဲ့သည်။ 

ကိုးကား-NHK

ဘာသာပြန်ဆိုသူ -ဒေါ်မေသူခိုင်၊ လက်ထောက်ညွှန်ကြားရေးမှူး၊ နစက-၃

ပြင်သစ်နိုင်ငံ၏ အောက်လွှတ်တော်သည် ကက်သလစ်ဓလေ့ ထုံးစံ ပြင်းထန်သော နိုင်ငံတစ်နိုင်ငံတွင် နက်ရှိုင်းသော အမြင်မတူညီမှုများ ကြားမှ အဆုံးသတ်ရောဂါခံစားနေရသော အသက်အရွယ်ကြီးရင့်သူများ အတွက် ဆေးဝါး အကူအညီဖြင့် သေဆုံးခွင့်ကို တရားဝင်ခွင့်ပြုသည့် အငြင်းပွားဖွယ် ဥပဒေကြမ်းကို အတည်ပြုလိုက်ပါသည်။

အမျိုးသားလွှတ်တော်က ယင်းအဆိုကို ထောက်ခံမဲ ၃၀၅ မဲ ၊ ကန့်ကွက်မဲ ၁၉၉ မဲဖြင့် ထောက်ခံအတည်ပြုခဲ့ပြီး ၎င်းကို သမ္မတ အီမန်နူရယ် မက်ခရွန်က ထောက်ခံထားသည်။ ယခုအဆိုသည် ဆီးနိတ် လွှတ်တော်သို့ဆက်လက်တင်သွင်းမည်ဖြစ်ပြီး နောက်ဆုံးတွင် အောက်လွှတ်တော်၌ဒုတိယအကြိမ် ပြန်လည်ဆွေးနွေးရန် ရှိသည်။ ထောက်ခံသူများက ၂၀၂၇ ခုနှစ်မတိုင်မီ အဆိုပါဥပဒေပြဋ္ဌာန်းနိုင်ရန် မျှော်လင့်ထားသည်။

လက်ရှိပြင်သစ်နိုင်ငံတွင် အသက်ရှင်ရပ်တည်ရေး ကုသမှုစနစ်များ ရုပ်သိမ်းခြင်း (Passive Euthanasia) နှင့် ညင်သာစွာ သေဆုံးစေနိုင်သည့် ဆေးဝါးများပေးခြင်း (Deep Sedation) ကို ခွင့်ပြုထားသည်။

အဆိုပါ ဥပဒေကြမ်းအရ လူနာများသည် အဆုံးစီရင်နိုင်သော ဆေးဝါး များကို တောင်းဆိုနိုင်မည်ဖြစ်ပြီး ၎င်းတို့ကိုယ်တိုင် သောက်သုံးနိုင်သည် (သို့မဟုတ်) ကိုယ်ခန္ဓာမစွမ်းနိုင်ပါက ဆရာဝန် သို့မဟုတ် သူနာပြုမှ အကူအညီပေးနိုင်သည်။ ယင်းအခွင့်အရေးအတွက် အသက် ၁၈ နှစ်ပြည့်ပြီး ပြင်သစ်နိုင်ငံသား သို့မဟုတ် နေထိုင်ခွင့်ရသူဖြစ်ရမည့်အပြင် ပြန်လည်ကုသ၍မရနိုင်သော၊ အဆင့်သတ်မှတ်ချက်မြင့်မားသည့်ရောဂါ သို့မဟုတ် အဆုံးသတ်ရောဂါကြောင့် ပြင်းထန်သောနာကျင်မှုကို ခံစား နေရသူ ဖြစ်ရမည်။ အယ်လ်ဇိုင်းမားကဲ့သို့သော စိတ်ရောဂါ ပြင်းထန် သူများ သို့မဟုတ် အာရုံကြောယိုယွင်းရောဂါရှိသူများသည် အဆိုပါ အစီအစဉ်အတွက် အကျုံးမဝင်ပေ။

ဆေးဘက်ဆိုင်ရာအဖွဲ့တစ်ဖွဲ့က တစ်ဦးချင်းစီ၏ အခြေအနေကို အကဲဖြတ်မည်ဖြစ်ပြီး စဉ်းစားဆင်ခြင်ရန် ကာလအပြီးတွင် လူနာသည် အိမ်၊ စောင့်ရှောက်ရေးနေရာ သို့မဟုတ် ဆေးရုံတွင် ဆေးဝါးကို ရရှိနိုင် မည်ဖြစ်သည်။

အစိုးရက အဆိုပါဥပဒေကြမ်းကို “နာမကျန်းသူများနှင့် ဝေဒနာ ခံစား နေရသူများအား ပံ့ပိုးရန် လိုအပ်ချက်အတွက် ကျင့်ဝတ်နှင့်ညီသောတုံ့ပြန်မှု” အဖြစ် ဖော်ပြခဲ့ပြီး ၎င်းကို “အခွင့်အရေးအသစ် သို့မဟုတ် လွတ်လပ်ခွင့်တစ်ခု မဟုတ်ဘဲ လေးစားမှုနှင့် လူတစ်ဦးချင်းစီ၏ ကိုယ်ပိုင် ဆုံးဖြတ်ခွင့်တို့ကြား ဟန်ချက်ညီမှု” ဟု ရည်ညွှန်းခဲ့သည်။ သမ္မတ မက်ခရွန် က အဆိုပါ မဲပေးမှုကို ဘဝအဆုံးသတ်ခြင်းတွင် လူသားချင်း စာနာထောက်ထားမှုရှိသော ချဉ်းကပ်မှုဆီသို့ “အရေးပါသောခြေလှမ်း” တစ်ခု အဖြစ် ဂုဏ်ပြုခဲ့သည်။

သို့သော် ဝေဖန်သူများက အဆိုပါဥပဒေ၏ အဓိပ္ပာယ် ဖွင့်ဆိုချက် များသည် ကျယ်ပြန့်လွန်းပြီး နှစ်ပေါင်းများစွာ အသက်ရှင်နိုင်သည့် လူနာများကိုပါ အဆုံးစီရင်မှုကို အလွယ်တကူခွင့်ပြုနိုင်ကြောင်း သတိပေးခဲ့သည်။ အချို့က အဆိုပါဥပဒေသည် ဆေးဘက်ဆိုင်ရာ ကျင့်ဝတ်များကို ထိခိုက်စေပြီး စောင့်ရှောက်မှုစံနှုန်းများ ကျဆင်းကာ အားနည်းသူများကို အသက်စွန့်ရန် ဖိအားပေးမှုများ ဖြစ်ပေါ်စေနိုင်သည်ဟု စိုးရိမ်နေ ကြသည်။

ကိုးကား- RT

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂