ဘယ်လာရုစ်သမ္မတနိုင်ငံ မင့်စ်မြို့၌ နိုင်ငံတော်အဆင့် ချစ်ကြည်ရေးခရီးရောက်ရှိနေသည့် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်သည် ဘယ်လာရုစ်သမ္မတနိုင်ငံဝန်ကြီးချုပ် H.E. Mr. Roman Alexand-rovich Golovchenko နှင့် ယနေ့ဒေသစံတော်ချိန် ညနေပိုင်းတွင် ဝန်ကြီးချုပ်ရုံးအစည်းအဝေးခန်းမ၌ တွေ့ဆုံဆွေးနွေးသည်။

ကြိုဆိုနှုတ်ဆက်

ဦးစွာ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်သည် ဘယ်လာရုစ် နိုင်ငံဝန်ကြီးချုပ်ရုံးသို့ ရောက်ရှိရာ ဘယ်လာရုစ်နိုင်ငံဝန်ကြီးချုပ်က ကြိုဆိုနှုတ်ဆက်သည်။

တာဝန်ရှိသူများ တက်ရောက်

ယင်းနောက် တွေ့ဆုံပွဲကို ကျင်းပပြုလုပ်ရာ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့်အတူ ကောင်စီတွဲဖက်အတွင်းရေးမှူး ဗိုလ်ချုပ်ကြီးရဲဝင်းဦးနှင့် ခရီးစဉ်တွင်လိုက်ပါလာသည့် ချစ်ကြည်ရေးကိုယ်စားလှယ်အဖွဲ့ဝင်များ၊ ဘယ်လာရုစ်နိုင်ငံဆိုင်ရာ မြန်မာနိုင်ငံသံအမတ်ကြီးတို့ တက်ရောက်ကြပြီး ဘယ်လာရုစ်သမ္မတနိုင်ငံဝန်ကြီးချုပ်နှင့်အတူ ဘယ်လာရုစ်အစိုးရအဖွဲ့မှ တာဝန်ရှိသူများ တက်ရောက်ကြသည်။

နှစ်နိုင်ငံ အကျိုးဖြစ်ထွန်းစေမည့် ကိစ္စရပ်များဆွေးနွေး

ထိုသို့တွေ့ဆုံရာတွင် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်၏ ဘယ်လာရုစ်နိုင်ငံသို့ လာရောက်သည့် ချစ်ကြည်ရေးခရီးစဉ်သည် နှစ်နိုင်ငံချစ်ကြည်ရင်းနှီးမှုနှင့် ပူးပေါင်းဆောင်ရွက်မှုများကို များစွာမြှင့်တင်ပေးနိုင်မှုအခြေအနေများ၊ မြန်မာ-ဘယ်လာရုစ် စီးပွားရေးဖိုရမ်အောင်မြင်စွာကျင်းပနိုင်ခဲ့မှုနှင့် နှစ်နိုင်ငံအကြား နားလည်မှုစာချွန်လွှာများ လက်မှတ်ရေးထိုးနိုင်ခဲ့သည့် အခြေအနေများ၊ နှစ်နိုင်ငံအကြား ထုတ်ကုန်ပစ္စည်းများ အပြန်အလှန်တင်ပို့နိုင်ရေးကိစ္စရပ်များ၊ မြန်မာနိုင်ငံမှထွက်ရှိသည့် ဆန်အပါအဝင် အခြားစက်မှုကုန်ကြမ်းသီးနှံများအား ဘယ်လာရုစ်နိုင်ငံသို့ တင်ပို့နိုင်ရေးဆိုင်ရာ ကိစ္စရပ်များ၊ စိုက်ပျိုးမွေးမြူရေးလုပ်ငန်းများအတွက် ရေခံမြေခံကောင်းများရှိပြီးဖြစ်သည့် မြန်မာနိုင်ငံနှင့် ခေတ်မီစိုက်ပျိုးမွေးမြူရေးနည်းပညာများ ပိုင်ဆိုင်ထားသည့် ဘယ်လာရုစ်နိုင်ငံတို့အကြား ပူးပေါင်းဆောင်ရွက်ခြင်းဖြင့် နှစ်နိုင်ငံအကျိုးဖြစ်ထွန်းစေမည့် ကိစ္စရပ်များ၊ စိုက်ပျိုးရေးနှင့် မွေးမြူရေးလုပ်ငန်းများတွင် နည်းပညာများ ဖလှယ်ရေးဆိုင်ရာကိစ္စရပ်များ၊ လျှပ်စစ်စွမ်းအင်သုံးမော်တော်ယာဉ်များ ထုတ်လုပ်ရေးတွင် ပူးပေါင်းဆောင်ရွက်ရေး ဆိုင်ရာကိစ္စရပ်များနှင့် အခြားနှစ်နိုင်ငံအကြား ချစ်ကြည်ရင်းနှီးမှုနှင့် ပူးပေါင်းဆောင်ရွက်မှုများ မြှင့်တင်ရေးဆိုင်ရာကိစ္စရပ်များအား ရင်းနှီးပွင့်လင်းစွာဖြင့် အမြင်ချင်းဖလှယ်ဆွေးနွေးခဲ့ကြကြောင်း သတင်းရရှိသည်။

Source: MOI

နေပြည်တော် မတ် ၇

မြန်မာ-ဘယ်လာရုစ် နှစ်နိုင်ငံ နိုင်ငံတော်အဆင့်တွေ့ဆုံဆွေးနွေးပွဲကို ယနေ့ဒေသစံတော်ချိန် မွန်းလွဲပိုင်းတွင် ဘယ်လာရုစ်နိုင်ငံ မင့်စ်မြို့ရှိ သမ္မတနန်းတော်အစည်းအဝေးခန်းမ၌ ကျင်းပပြုလုပ်ရာ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်နှင့် ဘယ်လာရုစ်သမ္မတနိုင်ငံသမ္မတ H.E. Mr. Alexander Gregoryevich Lukashenko တို့ တက်ရောက်ဆွေးနွေးကြသည်။

အဆိုပါတွေ့ဆုံပွဲသို့ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့်အတူ ချစ်ကြည်ရေးအဖွဲ့ဝင်များအဖြစ် လိုက်ပါသွားသည့် ကောင်စီတွဲဖက်အတွင်းရေးမှူး ဗိုလ်ချုပ်ကြီး ရဲဝင်းဦး၊ ကောင်စီဝင်ဗိုလ်ချုပ် ကြီးညိုစော၊ ပြည်ထောင်စုဝန်ကြီးများ၊ ဘယ်လာရုစ်နိုင်ငံဆိုင်ရာ မြန်မာနိုင်ငံသံအမတ်ကြီး၊ ဒုတိယဝန်ကြီးများ၊ ကာကွယ်ရေးဦးစီးချုပ်ရုံးမှ အဆင့်မြင့်တပ်မတော်အရာရှိကြီးများ တက်ရောက်ကြပြီး ဘယ်လာရုစ်သမ္မတနိုင်ငံ သမ္မတနှင့်အတူ ဘယ်လာရုစ်အစိုးရအဖွဲ့မှ အဆင့်မြင့်အရာရှိကြီးများ တက်ရောက်ကြသည်။

ရင်းရင်းနှီးနှီးဆွေးနွေး

ထိုသို့ တွေ့ဆုံဆွေးနွေးရာတွင် နှစ်နိုင်ငံအလှမ်းကွာဝေးသော်လည်း သံတမန်ဆက်ဆံရေးနှင့် ကာကွယ်ရေးပိုင်းဆိုင်ရာ ဆက်ဆံရေးများရှိသည့် နိုင်ငံများဖြစ်ပြီး ချစ်ကြည်ရင်းနှီးမှုရှိသည့် မိတ်ဆွေကောင်းနိုင်ငံများဖြစ်သည့် အခြေအနေများ၊ ချစ်ကြည်ရေးခရီးစဉ်အတွင်း နှစ်နိုင်ငံအကြား နားလည်မှုစာချွန်လွှာများ ရေးထိုးမည့် အခြေအနေများ၊ နှစ်နိုင်ငံနိုင်ငံခြားရေးဝန်ကြီးဌာနများအကြား ညှိနှိုင်းဆွေးနွေးပွဲများ ကျင်းပနိုင်မှုအခြေအနေများ၊ နို့ထွက်ပစ္စည်းများထုတ်လုပ်ခြင်း၊ စက်မှုကုန်ကြမ်းသီးနှံများ စိုက်ပျိုးထုတ်လုပ်ခြင်းများတွင် ပူးပေါင်းဆောင်ရွက်သွားမည့် အခြေအနေများ၊ နှစ်နိုင်ငံအကြား ကုန်သွယ်ရေးနှင့် စီးပွားရေးပူးပေါင်းဆောင်ရွက်မှုများ တိုးမြှင့်ဆောင်ရွက်ရေးဆိုင်ရာ ကိစ္စရပ်များ၊ ရင်းနှီးမြှုပ်နှံမှုများ ဆောင်ရွက်ရေးဆိုင်ရာ ကိစ္စရပ်များ၊ စိုက်ပျိုးရေးလုပ်ငန်း၊ လယ်ယာသုံးစက်ကိရိယာများ ထုတ်လုပ်ခြင်းလုပ်ငန်းနှင့် အခြားကဏ္ဍပေါင်းစုံ၌ ပူးပေါင်းဆောင်ရွက်ရေးဆိုင်ရာ ကိစ္စရပ်များနှင့် စပ်လျဉ်း၍ ရင်းရင်းနှီးနှီးဆွေးနွေးခဲ့ကြသည်။

စာချွန်လွှာများလဲလှယ်

ယင်းနောက် နှစ်နိုင်ငံအစိုးရ နှစ်ရပ်အကြား သဘောတူညီချက်များနှင့် နားလည်မှုစာချွန်လွှာများ လက်မှတ်ရေးထိုးလဲလှယ်ခြင်း အခမ်းအနားကို ဆက်လက်ကျင်းပပြုလုပ်ရာ ဒုတိယဝန်ကြီးချုပ်နှင့် နိုင်ငံခြားရေးဝန်ကြီးဌာန ပြည်ထောင်စုဝန်ကြီး ဦးသန်းဆွေနှင့် ဘယ်လာရုစ်သမ္မတနိုင်ငံ နိုင်ငံခြားရေးဝန်ကြီးတို့က နှစ်နိုင်ငံအကြား၊ အစိုးရများအကြား ပူးပေါင်းဆောင်ရွက်မှုဆိုင်ရာ စာချွန်လွှာများ၊ အားကစားကဏ္ဍ၊ ခရီးသွားကဏ္ဍ၊ ဥပဒေရေးရာ ပူးပေါင်းဆောင်ရွက်ရေး၊ စိုက်ပျိုးရေးနှင့် အစားအစာဘေးအန္တရာယ်ကင်းရှင်းရေးကဏ္ဍများတွင် ပူးပေါင်းဆောင်ရွက်ရေး နားလည်မှုစာချွန်လွှာများကို လဲလှယ်ကြသည်။

နှစ်နိုင်ငံ ပူးတွဲကြေညာချက်များ

ထို့နောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့် ဘယ်လာရုစ်သမ္မတနိုင်ငံသမ္မတတို့သည် မီဒီယာများအား နှစ်နိုင်ငံပူးတွဲကြေညာချက်များကို အပြန်အလှန်ပြောကြားကြသည်။

ဆက်လက်၍ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်သည် ဘယ်လာရုစ်သမ္မတနိုင်ငံ သမ္မတ H.E. Mr. Alexander Gregor-yevich Lukashenko အား အဂ္ဂမဟာသရေစည်သူဘွဲ့ကို ချီးမြှင့်အပ်နှင်းသည်။

မြန်မာ-ဘယ်လာရုစ် နှစ်နိုင်ငံတွေ့ဆုံပွဲအခမ်းအနားအပြီးတွင် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့်အတူ ချစ်ကြည်ရေးခရီးစဉ်တွင် လိုက်ပါသွားသည့် နိုင်ငံတော်စီမံအုပ်ချုပ်ရေးကောင်စီ သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက မီဒီယာ၏ မေးမြန်းမှုများကို ပြန်လည်ဖြေကြားခဲ့ကြောင်း သတင်းရရှိသည်။

Source: MOI

အမေရိကန်နှင့် ဂျပန်နိုင်ငံကြား မဟာမိတ်စာချုပ်သည် မျှတမှုမရှိကြောင်း အမေရိကန်သမ္မတ ဒေါ်နယ်ထရမ့်က ထုတ်ဖော်ပြောဆိုလိုက်သည်။ ဒေါ်နယ်ထရမ့်က “ကျွန်တော်တို့ဟာ ဂျပန်နိုင်ငံနဲ့ အလွန်ကောင်းမွန်တဲ့ ဆက်ဆံရေး ရှိတယ်။ ဒါပေမဲ့ ကျွန်တော်တို့ဟာ ဂျပန်နိုင်ငံနဲ့ ပတ်သက်ရင် သူတို့ကိုကာကွယ်ပေးရပေမယ့် သူတို့ကတော့ ကျွန်တော်တို့နိုင်ငံကို ကာကွယ်ပေးစရာမလိုဘူး။ တစ်နည်းအားဖြင့် သူတို့က ငါတို့နဲ့ စီးပွားရေး အရ ချမ်းသာတယ်။ တကယ်မေးတာပါ။ ဒီသဘောတူညီချက်တွေကို ဘယ်သူလုပ်တာလဲ၊ မျှတမှုရှိရဲ့လား” ဟု ပြောသည်။

ဂျပန်အစိုးရအဖွဲ့ပြောရေးဆိုခွင့်ရှိသူ ယိုရှိမာဆာဟာယာရှီက အမေရိကန် နိုင်ငံအနေဖြင့် ဂျပန်နှင့် အမေရိကန် နိုင်ငံကြားချုပ်ဆိုထားသည့် လုံခြုံရေး သဘောတူညီမှုစာချုပ်ကို လိုက်နာမည်ဟု ယုံကြည်ကြောင်း ပြောသည်။ ဂျပန်နိုင်ငံကို ကာကွယ်ပေးရန်အတွက် ဂျပန်နိုင်ငံတွင် အမေရိကန် စစ်သား အနည်းဆုံး ၅၄,၀ဝဝ ကျော်ရှိနေပြီး အများစုက အိုကီနာဝါကျွန်း တွင် ရှိနေကြောင်းသိရသည်။

လက်ရှိအချိန်တွင် အမေရိကန်သမ္မတ ဒေါ်နယ်ထရမ့်သည် ဂျပန်နိုင်ငံမှ တင်သွင်းသော အလူမီနီယံနှင့် သံမဏိများကို အခွန်ကောက်ခံရန် စီစဉ်နေကြောင်း သိရသည်။ ဂျပန်အစိုးရသည် ဂျပန်နိုင်ငံမှ တင်သွင်းသော အလူမီနီယံနှင့် သံမဏိများကို အခွန်ကောက်ခံရန် စီစဉ်မှုများကို ကင်းလွတ်ခွင့်ပေးရန် တောင်းဆိုထားကြောင်း သိရသည်။

ဂျပန်ကုန်သွယ်ရေးဝန်ကြီးသည် ၎င်းတို့ နိုင်ငံမှတင်သွင်းသော ကုန်စည် များအတွက် အခွန်ကောက်ခံခြင်းကို ကင်းလွတ်ခွင့်ပေးရေး ဆွေးနွေးရန် အတွက် ပြီးခဲ့သည့်ရက်ပိုင်းတွင် အမေရိကန်အစိုးရတာဝန်ရှိသူများနှင့် တွေ့ဆုံခဲ့ကြောင်း သိရသည်။ သို့သော်လည်း အမေရိကန်အစိုးရသည် ဂျပန်နိုင်ငံမှ တင်သွင်းသော သံမဏိနှင့်အလူမီနီယံများကို အခွန် ကောက်ခံခြင်းကို လာမည့်သီတင်းပတ်အတွင်း အမိန့်ထုတ်ပြန်မည် ဖြစ်ကြောင်းသိရသည်။ ဂျပန်ကုမ္ပဏီများအနေဖြင့် အခွန်ကောက်ခံခြင်း မခံလိုလျှင် အမေရိကန်နိုင်ငံတွင်လာရောက် ရင်းနှီးမြှုပ်နှံရမည်ဟု အမေရိကန်အစိုးရက ပြောဆိုထားကြောင်းသိရသည်။

ကိုးကား-NP News

အမေရိကန်သမ္မတ ဒေါ်နယ်ထရမ့်က ရုရှားနှင့် ယူကရိန်းနိုင်ငံတို့အကြား စစ်ပြေငြိမ်းရေး ညှိနှိုင်းဆောင်ရွက်ရာတွင် ယူကရိန်းထက် ရုရှားနှင့် ဆက်ဆံရသည်မှာ ပိုမိုလွယ်ကူသည်ဟု ပြောကြားခဲ့သည်။ 

မတ်လ ၇ ရက်(သောကြာ)နေ့က သတင်းထောက်များနှင့်တွေ့ဆုံရာတွင် သတင်းထောက်တစ်ဦးက ယူကရိန်းတွင် ရုရှား၏လတ်တလော စစ်ရေး လုပ်ဆောင်မှုများကို ဖော်ပြပြီး ထရမ့်အား သမ္မတဗလာဒီမာပူတင်သည် ငြိမ်းချမ်းရေးကိုလိုလားသည်ဟု ပြောဆိုမှုနှင့်ပတ်သက်ပြီး ထရမ့်၏ ယုံကြည်မှုအားမေးမြန်းခဲ့ခြင်းအပေါ် ထရမ့်က ယုံကြည်မှုရှိကြောင်းနှင့် ရုရှားနှင့်ဆက်ဆံရေးအခြေအနေကောင်းမွန်မှုရှိကြောင်း ပြန်လည်ဖြေကြားခဲ့ပါသည်။

ဆက်လက်၍ ယူကရိန်းနှင့်ဆက်ဆံရသည်က ပိုမိုခက်ခဲသည်ဟု သုံးသပ် ရပါကြောင်း ပြောကြားခဲ့ပါသည်။

ထရမ့်က ၎င်း၏ Truth Social ပလက်ဖောင်းတွင် “စစ်ပြေငြိမ်းရေးနှင့် ငြိမ်းချမ်းရေးဆိုင်ရာ နောက်ဆုံးသဘောတူညီချက်ရရှိသည်အထိ ရုရှား အပေါ် ထပ်မံပိတ်ဆို့မှုများနှင့် အကောက်ခွန်များ တိုးမြှင့်ရန် စဉ်းစား နေကြောင်း” ရေးသားခဲ့သည်။

လွန်ခဲ့သည့် သီတင်းပတ်တွင် ထရမ့်သည် ကိယက်ဗ်သို့ လက်နက်များ ပေးပို့မှုအားလုံးကို ရပ်ဆိုင်းခဲ့ပြီး ထောက်လှမ်းရေးသီတင်းမျှဝေမှုကို ကန့်သတ်ခဲ့သည်။ အဆိုပါလုပ်ဆောင်ချက်သည် ထရမ့်နှင့် ဗလာဒီမာ ဇီလန်စကီးတို့အကြား အိမ်ဖြူတော်တွင် ဖြစ်ပွားခဲ့သော အများသိ ငြင်းခုန်မှုအပြီးတွင် ဖြစ်ပွားခဲ့ပြီး စစ်ပြေငြိမ်းရေးစည်းမျဉ်းများနှင့် လုံခြုံရေးအာမခံချက်များနှင့်ပတ်သက်၍ ဆက်လက်ဖြစ်ပွားနေသော သဘောထားကွဲလွဲမှုများကို မီးမောင်းထိုးပြခဲ့သည်။

အမေရိကန်နှင့် ယူကရိန်း ညှိနှိုင်းဆွေးနွေးသူများသည် လာမည့် သီတင်းပတ်အစောပိုင်းတွင် ဆော်ဒီအာရေဗျ၌တွေ့ဆုံရန် စီစဉ်ထားသည်။လွန်ခဲ့သည့်လက အမေရိကန်သည် ရီယာ့ဒ်နှင့် အစ္စတန်ဘူလ်တွင် ရုရှားနှင့် နှစ်နိုင်ငံချင်းဆွေးနွေးပွဲများပြုလုပ်ခဲ့ပြီး ထိုဆွေးနွေးပွဲများသည် ဘိုင်ဒင်အုပ်ချုပ်ရေးအဖွဲ့က ၂၀၂၂ ခုနှစ်တွင် မော်စကိုနှင့် ဆက်ဆံရေး ရပ်ဆိုင်းခဲ့ပြီးနောက် ပထမဆုံးအကြိမ် အမြင့်ဆုံးအဆင့် နှစ်နိုင်ငံချင်း ဆွေးနွေးပွဲများ ဖြစ်သည်။

မော်စကိုသည် ခရိုင်းမီးယားနှင့် ရုရှားနိုင်ငံ၏ တစ်စိတ်တစ်ပိုင်း ဖြစ်လာရန် မဲပေးခဲ့သော အခြားဒေသနေရာလေးခုအပေါ် ကိယက်ဗ်၏ တောင်းဆိုမှု များကို စွန့်လွှတ်ရန် ၎င်း၏ ခိုင်မာသောရပ်တည်ချက်ကို ထုတ်ဖော်ပြောဆိုထားသည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ဒုတိယညွှန်ကြားရေးမှူး၊နစက-၂

နေပြည်တော် မတ် ၇

ဘယ်လာရုစ်သမ္မတနိုင်ငံ၊ မင့်စ်မြို့၌ နိုင်ငံတော်အဆင့်ချစ်ကြည်ရေး ခရီးရောက်ရှိနေသည့် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်သည် ယနေ့ဒေသစံတော်ချိန် မွန်းလွဲပိုင်းတွင် ဘယ်လာရုစ်နိုင်ငံ အမျိုးသားလွှတ်တော်ဥက္ကဋ္ဌ H.E. Mr. Igor Petrovich Sergeenko နှင့် မင့်စ်မြို့ရှိ အမျိုးသားလွှတ်တော်၌ တွေ့ဆုံဆွေးနွေးသည်။

ကြိုဆိုနှုတ်ဆက်

ဦးစွာ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်အား ဘယ်လာရုစ်နိုင်ငံ အမျိုးသားလွှတ်တော်ဥက္ကဋ္ဌက ကြိုဆိုနှုတ်ဆက်သည်။ ယင်းနောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်က လွှတ်တော်ဧည့်သည်တော်မှတ်တမ်းစာအုပ်၌မှတ်တမ်းတင်လက်မှတ်ရေးထိုးသည်။

ထို့နောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်သည် အမျိုးသားလွှတ်တော်အတွင်း လှည့်လည်ကြည့်ရှုလေ့လာရာ ဘယ်လာရုစ်နိုင်ငံ အမျိုးသားလွှတ်တော်ဥက္ကဋ္ဌက လိုက်လံရှင်းလင်းပြသသည်။

နှစ်နိုင်ငံလွှတ်တော်အကြား ပူးပေါင်းဆောင်ရွက်ရေး

ဆက်လက်၍ အစည်းအဝေးခန်းမ၌ တွေ့ဆုံ၍ နှစ်နိုင်ငံလွှတ်တော်များအကြား ပူးပေါင်းဆောင်ရွက်ရေးဆိုင်ရာ ကိစ္စရပ်များ၊ ဥပဒေပြုရေးဆိုင်ရာ ကိစ္စရပ်များတွင် ပူးပေါင်းဆောင်ရွက်ရေးဆိုင်ရာကိစ္စရပ်များ၊ မြန်မာနိုင်ငံတွင် လွတ်လပ်ပြီးတရားမျှတသည့် ရွေးကောက်ပွဲကျင်းပနိုင်ရေး ကြိုတင်ပြင်ဆင်ဆောင်ရွက်လျက်ရှိသည့် အခြေအနေများ၊ ဘယ်လာရုစ်နိုင်ငံ၏ အထွေထွေရွေးကောက်ပွဲတွင် မြန်မာနိုင်ငံမှ ကိုယ်စားလှယ်အဖွဲ့များ လာရောက်လေ့လာခဲ့မှုနှင့် မြန်မာနိုင်ငံ၌ ရွေးကောက်ပွဲကျင်းပချိန်တွင် ဘယ်လာရုစ်နိုင်ငံမှ လေ့လာစောင့်ကြည့်ရေးအဖွဲ့များ စေလွှတ်သွားမည့် အခြေအနေများ၊ နှစ်နိုင်ငံလွှတ်တော်နှစ်ရပ်အကြား ချစ်ကြည်ရင်းနှီးမှုနှင့် ပူးပေါင်းဆောင်ရွက်မှုများ တိုးမြှင့်ဆောင်ရွက်သွားမည့် အခြေအနေများနှင့်ပတ်သက်၍ ရင်းရင်းနှီးနှီးဆွေးနွေးခဲ့ကြကြောင်း သတင်းရရှိသည်။    

Source: MOI

အမေရိကန်သည် တောင်အာဖရိကသို့ ထောက်ပံနေသော ဖက်ဒရယ် ရန်ပုံငွေအားလုံးကို ရပ်တန့်သွားမည်ဖြစ်ကြောင်း သမ္မတ ဒေါ်နယ်ထရမ့် က မတ်လ ၇ ရက်(သောကြာ)နေ့တွင် ကြေညာခဲ့ပြီး နေထိုင်ရန် မသင့်သော နေရာဟုခေါ်ဆိုကာ ယခုအချိန်၌ ထွက်ခွာလိုသူမည်သူမဆို အမြန်ရွှေ့ပြောင်းနိုင်ရန် ကမ်းလှမ်းခဲ့သည်။

တောင်အာဖရိကရှိ မြေယာပိုင်ဆိုင်မှုဆိုင်ရာ လူမျိုးရေးကွဲပြားမှုများကို ဖြေရှင်းရန် ပြဋ္ဌာန်းထားသော အငြင်းပွားဖွယ်ရာ မြေယာသိမ်းဆည်းရေး ဥပဒေနှင့်ပတ်သက်၍ ဝါရှင်တန်နှင့် ပရီတိုရီးယားအကြား တင်းမာမှုများ မြင့်တက်လာချိန်တွင် ထရမ့်၏ မှတ်ချက်များ ထွက်ပေါ်လာခြင်း ဖြစ်သည်။ ယခုလအစောပိုင်းတွင် ထရမ့်က ပရီတိုရီးယား၏ ဥပဒေပြဋ္ဌာန်းခဲ့မှုကို တရားမဲ့သောလုပ်ရပ်ဟု ဝေဖန်ခဲ့ပြီး အမေရိကန် အစိုးရ အေဂျင်စီများအား တောင်အာဖရိကသို့ ကူညီထောက်ပံ့မှုများကို ရပ်တန့်ရန် အမိန့် ညွှန်ကြားချက်ကို လက်မှတ်ရေးထိုးခဲ့သည်။

ဇန်နဝါရီလတွင် လက်မှတ်ရေးထိုးခဲ့သော မြေယာဥပဒေတွင် တောင်အာဖရိက၏ အများပြည်သူအကျိုးစီးပွားအတွက် မြေယာသိမ်းဆည်းခြင်းကို ခွင့်ပြုထားပြီး အချို့သောကိစ္စများတွင် လျော်ကြေး မပေးဘဲ ခွင့်ပြုထားသည်။ ပရီတိုရီးယားက မြေယာပိုင်ဆိုင်မှုဆိုင်ရာရှည်လျားသော ကွဲလွဲမှုများကိုဖြေရှင်းရန် ရည်ရွယ်ထားကြောင်း ပြောကြား ခဲ့သည်။ ၂၀၁၇ ခုနှစ် မြေယာစစ်တမ်းတစ်ခုအရ လူဦးရေ၏ ၈% ရှိသော လူဖြူ Afrikaners များသည် တောင်အာဖရိကနိုင်ငံ၏ လွတ်လပ်သော လယ်ယာမြေ၏ ၇၅% နီးပါးကို ပိုင်ဆိုင်ထားဆဲဖြစ်ပြီး လူဦးရေ၏ ၈၀% ရှိသော တောင်အာဖရိက လူမည်းများသည် ၄% သာပိုင်ဆိုင်ကြောင်း သိရသည်။ အစိုးရသည် ၂၀၃၀ ပြည့်နှစ်တွင် လယ်ယာမြေ၏ ၃၀% ကို လူမည်းလယ်သမားများထံသို့ လွှဲပြောင်းပေးရန် ရည်မှန်းချက် ချမှတ် ထားသည်။

ထရမ့်က ဥပဒေသည် Afrikaners များကို မတရားသဖြင့် ခွဲခြား ဆက်ဆံသည်ဟု ဆိုသည်။

တောင်အာဖရိကအစိုးရက ထရမ့်၏ဝေဖန်မှုများကိုပယ်ချခဲ့ပြီး ဥပဒေကို နားလည်မှုလွဲခဲ့ကြောင်း ပြောကြားခဲ့သည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ဒုတိယညွှန်ကြားရေးမှူး၊နစက-၂

ယူကရိန်းအပစ်အခတ်ရပ်စဲရေး သဘောတူညီချက် မရရှိမချင်း ရုရှား အပေါ် ကြီးမားသောပိတ်ဆို့ အရေးယူမှုအသစ်များ ချမှတ်သွားမည်ဟု အမေရိကန်သမ္မတဒေါ်နယ်ထရမ့်က ခြိမ်းခြောက်ပြောဆိုလိုက်ပါသည်။ အဆိုပါပိတ်ဆို့ အရေးယူမှုများသည် ရုရှား၏ဘဏ်လုပ်ငန်းကဏ္ဍကိုပစ်မှတ်ထားပြီး ရုရှားနိုင်ငံ၏ နိုင်ငံခြားကုန်သွယ်မှုအပေါ်အခွန်စည်းကြပ်ခြင်းများပါဝင်မည်ဟု Truth Social ပလက်ဖောင်း၌ ဒေါ်နယ်ထရမ့်က ထုတ်ပြန်ကြေညာခဲ့ပါသည်။

ဒေါ်နယ်ထရမ့်က “ရုရှားစစ်တပ်သည် စစ်မြေပြင်၌ အနိုင်ကျင့်နေပြီး ၎င်းအချက်များအပေါ် အခြေခံကာ ယူကရိန်းတွင် အပစ်အခတ်ရပ်စဲရေး သဘောတူညီချက်နှင့် ငြိမ်းချမ်းရေးအတွက် နောက်ဆုံးဖြေရှင်းရေးသဘောတူညီချက်မရရှိမချင်းရုရှားအပေါ်ပိတ်ဆို့အရေးယူမှုများ ပြင်းပြင်း ထန်ထန် ချမှတ်သွားရန် စဉ်းစားနေပါသည်” ဟု ပြောခဲ့ပါသည်။

ထို့အပြင် အချိန်မနှောင်းမီ စေ့စပ်ညှိနှိုင်းရေးဆွေးနွေးပွဲ စားပွဲဝိုင်းသို့ ချက်ချင်း လာရောက်ကြရန် ရုရှားနှင့် ယူကရိန်းတို့ကို ဒေါ်နယ်ထရမ့်က တောင်းဆိုခဲ့ကြောင်းလည်း သိရပါသည်။ အမေရိကန်သမ္မတဟောင်း ဂျိုးဘိုင်ဒင်လက်ထက်က ရုရှားအပေါ် ချမှတ်ခဲ့သည့် ပိတ်ဆို့အရေးယူမှု များသည် အလွန်အားနည်းသည်ဟု အမေရိကန်ဘဏ္ဍာရေးဝန်ကြီး Scott Bessent က ပြောဆိုခဲ့ပြီးနောက် ဒေါ်နယ်ထရမ့်၏ ခြိမ်းခြောက် ပြောဆိုမှုများ ထွက်ပေါ်လာခြင်းဖြစ်ပါသည်။ထို့အပြင် အမေရိကန်သည် ရုရှားအပေါ် ပိတ်ဆို့အရေးယူမှုများကို တင်းကြပ်ရန် ပြင်ဆင်ထားသည် ဟု Scott Bessent က ထပ်မံပြောကြားခဲ့ပါသည်။

ကိုးကား-NP News

သမ္မတ ဒေါ်နယ်ထရမ့်က ဗဟိုအစိုးရဌာနများနှင့် အေဂျင်စီများ၏ ဝန်ထမ်းများခန့်အပ်ခြင်းနှင့်ပတ်သက်၍ Musk ၏ လုပ်ပိုင်ခွင့်ကို ကန့်သတ်လိုက်ကြောင်း အမေရိကန်နိုင်ငံရေးသတင်းထုတ်ပြန်ချက်တစ်ခုအရ သိရှိရပါသည်။

Musk သည် အစိုးရလုပ်ငန်းများနှင့် အသုံးစရိတ်များ ဖြတ်တောက်ရေး တာဝန်ပေးထားသည့် "အစိုးရစွမ်းဆောင်ရည် မြှင့်တင်ရေးဌာန (DOGE)"ကို ဦးဆောင်နေသူတစ်ဦး ဖြစ်သည်။

"Musk သည် ဌာနဆိုင်ရာများသို့ အကြံပြုချက်ပေးရန် အခွင့်အာဏာရှိသော်လည်း ဝန်ထမ်းခန့်အပ်မှုနှင့် မူဝါဒဆိုင်ရာ အပေါ် ၎င်း၏ တစ်ဦးတည်းဆုံးဖြတ်ချက်ဖြင့် ထုတ်ပြန်ခြင်းများ ပြုလုပ်၍ခွင့်မရှိကြောင်း ထရမ့်က ၎င်း၏ အစိုးရ အဖွဲ့အား ပြောကြားခဲ့သည်ဟု အုပ်ချုပ်ရေးအရာရှိများ၏ ပြောကြားချက်ကို ကိုးကား၍ Politico သတင်းစာ မျက်နှာ တွင် ရေးသားဖော်ပြခဲ့သည့်အပြင် "DOGE သည် အမှားအယွင်းအချို့ပြုလုပ်ဆောင်ခဲ့မိသည်ကို ဝန်ခံကြောင်း" Musk ၏ ပြောကြားချက်ကို ကိုးကား၍လည်း ရေးသားဖော်ပြခဲ့သည်။

ထို့အပြင် “အစိုးရအဖွဲ့အစည်းအတွင်း လူကောင်းသူကောင်းများ လိုအပ်ကြောင်း၊ လုပ်ငန်းတာဝန်များကိုလည်း မိမိတတ်စွမ်းသရွေ့ ကြိုးပမ်းလုပ်ဆောင်စေလိုကြောင်း၊ ဝန်ထမ်းအင်အားကို လျှော့ချကြရန်လိုကြောင်း၊ အစိုးရအဖွဲ့ အဖွဲ့ဝင်များက ဝန်ထမ်းအင်အားလျှော့ချခြင်းကို မလုပ်ဆောင်ပါက Musk က အဆိုပါတာဝန်ကို လုပ်ဆောင်လိမ့်မည်ဖြစ်ကြောင်း” ထရမ့်က ၎င်း၏ အစိုးရအဖွဲ့ဝင်များအား လမ်းညွှန်မှာကြားထားမှုကို သတင်းထောက် များအား ထုတ်ဖော်ပြောကြားခဲ့ပါသည်။

Musk ၏ အစိုးရအဖွဲ့အစည်းအတွင်း လုပ်ပိုင်ခွင့်ရယူပုံနှင့်ပတ်သက်၍ အစိုးရအဖွဲ့ အဖွဲ့ဝင်များက ကျေနပ်မှုမရှိကြကြောင်း ထုတ်ဖော်ပြောကြားခဲ့သည့် သတင်းများထွက်ပေါ်နေချိန်တွင် ထရမ့်၏ ယခုလိုပြောကြားချက် ထွက်ပေါ်လာခြင်းဖြစ်ပြီး ထရမ့်အနေဖြင့် ၎င်း၏အုပ်ချုပ်ရေးယန္တရားအတွင်း တင်းမာမှုများကို ဖြေလျှော့ရန် ကြိုးပမ်းလျက်ရှိသည်ဟု လေ့လာသူများက ဆိုကြသည်။

ကိုးကား-NHK World

အလွတ်သဘောဘာသာပြန်ဆိုသူ-ဦးထက်ထက်အောင် (နစက-၄)

တောင်ကိုရီးယားနိုင်ငံ ဆိုးလ်မြို့တရားရုံးသည် စွပ်စွဲပြစ်တင်ခံရကာ ရာထူးမှဆိုင်းငံ့ခံထားရသည့် တောင်ကိုရီးယားသမ္မတကို အကျဉ်းထောင်မှ ပြန်လွှတ်ပေးရန် အမိန့်ချမှတ်လိုက်ကြောင်း သိရသည်။ တောင်ကိုရီးယား သမ္မတ ယွန်းဆက်ယိုးလ်သည် လွန်ခဲ့သောနှစ် ဒီဇင်ဘာလအတွင်းတွင် စစ်အုပ်ချုပ်ရေး ဥပဒေထုတ်ပြန်ခဲ့ပြီးနောက် လွှတ်တော်အတွင်း စွပ်စွဲ ပြစ်တင်ခံရကာ ရာထူးမှ ဆိုင်းငံ့ခံထားရသူဖြစ်သည်။

လက်ရှိအချိန်တွင် ရာထူးမှဆိုင်းငံ့ခံထားရသည့် တောင်ကိုရီးယားသမ္မတ ယွန်းဆက်ယိုးလ်သည် တောင်ကိုရီးယားသမ္မတအဖြစ် ရာထူးတွင် ဆက်လက်ရှိ၊ မရှိဆိုသောအချက်ကို တောင်ကိုရီးယား ဖွဲ့စည်းပုံ အခြေခံ ဥပဒေခုံရုံး၏ ဆုံးဖြတ်ချက်ကို ရင်ဆိုင်ရမည်ဖြစ်သည်။

တောင်ကိုရီးယားသမ္မတဟောင်း ယွန်းဆက်ယိုးလ်၏ ရှေ့နေဖြစ်သူသည် ပြီးခဲ့သောလတွင် ၎င်းအား ဖမ်းဝရမ်းထုတ်ခြင်းကို ပယ်ဖျက်ရန်နှင့် ဖမ်းဆီးထိန်းသိမ်းခြင်းသည် တရားဥပဒေနှင့်မညီကြောင်း တရားရုံးတွင် လျှောက်ထားခဲ့သည်။ တောင်ကိုရီးယားတရားရုံးက “တရားခံကို ချုပ်နှောင်မှုကာလ ကုန်ဆုံးခဲ့ပြီဖြစ်ပြီး လုပ်ထုံးလုပ်နည်းများကို ရှင်းလင်း သေချာစေရန်နှင့် စုံစမ်းစစ်ဆေးရေးလုပ်ငန်းစဉ်များအပြင် တရားဥပဒေ စိုးမိုးရေးနှင့်ပတ်သက်၍ သံသယများကင်းရှင်းစေရေး ထိန်းသိမ်းခြင်းကို ပယ်ဖျက်ရန် ဆုံးဖြတ်ခဲ့ပါသည်” ဟု သတင်းထုတ်ပြန်ထားသည်။တောင်ကိုရီးယားအခြေစိုက် ယွန်ဟတ်သတင်းအေဂျင်စီကလည်းယွန်းဆက်ယိုးလ်ကို အကျဉ်းထောင်မှ ပြန်လွှတ်ပေးလိုက်ကြောင်း အတည်ပြုထားသည်။ ၎င်း၏ ရှေ့နေဖြစ်သူက “တောင်ကိုရီးယားနိုင်ငံ ၏ တရားဥပဒေစိုးမိုးမှုများ ဆက်လက်ရှင်သန်နေသည်” ဟု ပြောသည်။

အာဏာရပါတီဖြစ်သော ပြည်သူ့အာဏာပါတီကလည်း ယွန်းဆက်ယိုးလ် ကို ဖမ်းဝရမ်းထုတ်ခြင်းနှင့် ဖမ်းဆီးထိန်းသိမ်းခြင်း ဖျက်သိမ်းရန် ဆုံးဖြတ် ခဲ့သော တရားရုံးဆုံးဖြတ်ချက်ကို ကြိုဆိုခဲ့ကြောင်း သိရသည်။

တောင်ကိုရီးယားနိုင်ငံတွင် ယွန်းဆက်ယိုးလ်က စစ်အုပ်ချုပ်ရေး ဥပဒေထုတ်ပြန်ခဲ့ပြီးနောက် ၎င်းကို ထောက်ခံသူများနှင့် ဆန့်ကျင်သူများကြား အပြိုင်ဆန္ဒပြခဲ့ကြောင်း သိရသည်။ ယွန်းဆက်ယိုးလ်ကို စစ်အုပ်ချုပ်ရေး ဥပဒေထုတ်ပြန်ခြင်းနှင့်ပတ်သက်ပြီး စုံစမ်းစစ်ဆေးရန် တောင်းဆိုမှုများ ရှိလာခဲ့ပြီး တောင်ကိုရီးယားရဲတပ်ဖွဲ့က ဇန်နဝါရီ(၁၅)ရက်တွင် ဖမ်းဆီးခဲ့ကြောင်းသိရသည်။

ကိုးကား-NP News

အစ္စရေးနှင့် ဟားမက်တို့အကြား အပစ်အခတ်ရပ်စဲရေး သဘောတူညီချက် ပျက်ပြယ်မည်ကို စိုးရိမ်နေသည့်အကြား ဆော်ဒီအာရေဗျ တော်ဝင် မိသားစုဝင်တစ်ဦးက ပါလက်စတိုင်းနိုင်ငံ ထူထောင်ရန်လိုအပ်ကြောင်း အလေးပေးပြောကြားလိုက်ပါသည်။

ဆော်ဒီထောက်လှမ်းရေးအေဂျင်စီအား နှစ် ၂၀ ကျော်ကြာ ဦးဆောင်ခဲ့သည့် မင်းသား Turki Al-Faisal သည် NHK နှင့် မတ်လ ၆ ရက် (ကြာသပတေး)နေ့ တွေ့ဆုံမေးမြန်းမှု၌ ယခုကဲ့သို့ မှတ်ချက်ပေးခဲ့ခြင်း ဖြစ်သည်။ အသက် ၈၀ အရွယ် မင်းသားသည် ၂၀၀၅ ခုနှစ်မှ ၂၀၀၇ ခုနှစ်အတွင်း အမေရိကန်ပြည်ထောင်စုဆိုင်ရာ သံအမတ်အဖြစ် တာဝန် ထမ်းဆောင်ခဲ့သည်။

အရှေ့အလယ်ပိုင်းဒေသတွင် ငြိမ်းချမ်းရေးဖော်ဆောင်လိုသည့် ဆန္ဒနှင့် ပတ်သက်၍ အမေရိကန် သမ္မတ Donald Trump ပြောဆိုနေသည့် ဂါဇာကမ်းမြောင်နှင့်ပတ်သက်သော ၎င်း၏ အဆိုပြုချက်များသည် လူမျိုးတုံးသုတ်သင်မှုထက် မလျော့နည်းသည့်လုပ်ဆောင်မှုကို ဦးတည် နေသည့်အတွက် လုံးဝလက်မခံနိုင်ကြောင်း မင်းသားက ဆိုပါသည်။

Trump က အမေရိကန်မှ ဂါဇာကို ထိန်းချုပ်ပြီး အဆိုပါဒေသရှိ ဒေသခံ များကို အခြားနေရာ၌ ပြန်လည်နေရာချထားရေး အကြံပြုထားခြင်းဖြစ်သည်။

ထာဝရငြိမ်းချမ်းရေးရရှိရန် အစ္စရေးအနေဖြင့် ပါလက်စတိုင်းနယ်မြေမှ တပ်များရုတ်သိမ်းရန်လိုအပ်ပြီး ပါလက်စတိုင်းနိုင်ငံထူထောင်နိုင်ရန် လိုအပ်ကြောင်း မင်းသားကအလေးပေးပြောကြားခဲ့သည်။

ကိုးကား-NHK World

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂