အမေရိကန် သမ္မတ ဒေါ်နယ်ထရမ့်သည် ၎င်း၏ သမ္မတ အဖြစ် ကျမ်းသစ္စာကျိန်ဆိုပွဲအပြီး အဖွင့်မိန့်ခန်း၌ “အမေရိကန်၏ ဩဇာအာဏာ” သည် စစ်ပွဲအားလုံးကို ရပ်တန့်ပြီး ကမ္ဘာ့စည်းလုံးညီညွတ်မှု အသစ်ကို ဆောင်ကြဉ်း ပေးမည်ဟု ကတိပြုခဲ့ပါသည်။

အမေရိကန် သမ္မတ ဒေါ်နယ်ထရမ့်သည် ၎င်း၏ ရာထူး စတင်သည့်နေ့တွင် “သမိုင်းဝင်” အမိန့်များ ဆက်တိုက်ထုတ်မည်ဟု ကြေညာခဲ့ပါသည်။

အဆိုပါ အဖွင့်မိန့်ခွန်း၌ မက္ကဆီကိုပင်လယ်ကွေ့ကို မကြာမီ Gulf of America ဟု အမည်ပြောင်းမည်ဟု သမ္မတဒေါ်နယ်ထရမ့် က ကြေညာခဲ့သည်။ ထို့နောက် ပနားမားတူးမြောင်းကို ပြန်လည်ထိန်းချုပ်ရန် ရည်ရွယ် ထားကြောင်း ပြောကြားခဲ့ပါသည်။

အမေရိကန်တွင် လွတ်လပ်စွာ ပြောဆိုခွင့်ကို ပြန်လည်ရရှိစေမည်ဟု သမ္မတဒေါ်နယ်ထရမ့်က ကတိပြုထားပြီး အစိုးရ၏ ဆင်ဆာဖြတ်တောက်မှုကို အဆုံးသတ်ရန် အမှုဆောင်အမိန့်ကို ထုတ်ပြန်မည်ဟု ပြောကြားခဲ့ ပါသည်။

ယနေ့မှစ၍ အမေရိကန်ပြည်ထောင်စု၏ တရားဝင် မူဝါဒမှာ အမျိုးသားနှင့် အမျိုးသမီး ကျား-မ နှစ်မျိုးသာ အသိအမှတ်ပြုရန်ဖြစ်ကြောင်း သမ္မတဒေါ်နယ်ထရမ့် က ပြောကြားခဲ့ပါသည်။

တရားမ၀င် ရွှေ့ပြောင်းနေထိုင်သူများ ကျူးကျော်မှုကို ရပ်တန့်ရန် အမေရိကန် တောင်ပိုင်းနယ်စပ်သို့ တပ်ဖွဲ့ဝင်များ ဖြန့်ကျက်ထားမည်ဖြစ်ကြောင်း သမ္မတက ကြေညာ ခဲ့ပါသည်။ မူးယစ်ဂိုဏ်းများကို အကြမ်းဖက်အဖွဲ့များ အဖြစ် သတ်မှတ်မည်ဖြစ်ကြောင်း သမ္မတ ဒေါ်နယ်ထရမ့် က ပြောကြားခဲ့ပါသည်။

အမေရိကန်စစ်တပ်သည် အမေရိကန်၏ ရန်သူများကို ချေမှုန်းရန် တစ်ခုတည်းသော ရည်မှန်းချက်အပေါ် အာရုံစိုက်မည်ဖြစ်ကြောင်း၊ “ကမ္ဘာတွင် မြင်ဖူးသမျှ အနက်အပြင်းထန်ဆုံးစစ်တပ်” ကိုလည်း တည်ဆောက် မည်ဖြစ်ကြောင်း ဒေါ်နယ်ထရမ့်က ကတိပြုခဲ့ပါသည်။

တစ်ချိန်တည်းမှာပင် အမေရိကန်ပြည်ထောင်စု၏ စစ်ရေးအောင်မြင်မှုကို ယခုတိုက်ပွဲများတွင် အောင်ပွဲများနှင့်သာမက ရှောင်ရှားခဲ့သော စစ်ပွဲများဖြင့်လည်း တိုင်းတာရမည်ဖြစ်ကြောင်း ၎င်းက အလေးပေးပြောကြားခဲ့ပြီး ၎င်းသည် ငြိမ်းချမ်းရေးကို ဖန်တီးသူနှင့် စည်းလုံးညီညွတ်ရေးကို ဖော်ဆောင်သူဖြစ်လိမ့်မည်ဖြစ်ကြောင်း ပြောကြားခဲ့ပါသည်။ 

အမေရိကန်သမ္မတ ဒေါ်နယ်ထရမ့်သည် ၎င်း၏ အဖွင့် မိန့်ခွန်းပြောကြားရာ၌ ရုရှား သို့မဟုတ် ယူကရိန်းအရေးကိစ္စအကြောင်း ပြောကြားခဲ့ခြင်းမရှိကြောင်း သိရှိ ရပါသည်။ 

ကိုးကား - RIA Novosti

ရုရှားသမ္မတ ပူတင်က ဒေါ်နယ်ထရမ့်၏ သမ္မတ ကျမ်းကျိန်ပွဲနှင့်ပတ်သက်၍ ချီးကျူးဂုဏ်ပြုခဲ့ပြီး ငြိမ်းချမ်းရေးအတွက် အမေရိကန်အစိုးရသစ်နှင့် တွေ့ဆုံ ဆွေးနွေးရန် ရုရှားတွင် ဆန္ဒရှိကြောင်း အလေးပေး ပြောကြားခဲ့ပါသည်။

“အပြန်အလှန်လေးစားမှုရှိသော ဆွေးနွေးပွဲဖြစ်ရန် မျှော်လင့်ပါကြောင်း၊ ယူကရိန်းတွင် ရေရှည်တည်တံ့သော ငြိမ်းချမ်းရေးကို ရုရှားကလိုလားကြောင်း” လည်း ထည့်သွင်း ပြောဆိုခဲ့ပါသည်။

ကိုးကား- RT

အမေရိကန်သမ္မတအဖြစ် ရွေးကောက်ခံထားရသည့် ဒေါ်နယ်ထရမ့်သည်  ၎င်းတက်ရောက်လာပြီးနောက်   မကြာမီတရုတ်နိုင်ငံသို့   အလည်အပတ်သွားရောက်ရန်ဆန္ဒရှိသည်ဟု  အကြံပေးများအားပြောကြားခဲ့ကြောင်း Wall Street ဂျာနယ်ကဖော်ပြသည်။

သမ္မတအဖြစ်တက်ရောက်လာပြီးနောက်ရက်ပေါင်း ၁၀၀ အတွင်း တရုတ်နိုင်ငံသို့သွားရောက်ရန် ထရမ့်ကစိတ်ဝင်စားနေခြင်းဖြစ်ကြောင်း ထရမ့်၏အကြံပေးတစ်ဦး၏ပြောကြားချက်ကိုကိုးကား၍ Wall Street ဂျာနယ်က ဖော်ပြခြင်းဖြစ်ကြောင်းသိရသည်။

ထရမ့်နှင့် တရုတ်သမ္မတရှီကျင့်ဖျင်တို့ကြား တွေ့ဆုံဆွေးနွေးရန် အမေရိကန်နှင့် တရုတ်ကိုယ်စားလှယ်များက စေ့စပ်ဆွေးနွေးခဲ့ကြပြီး ထရမ့်အနေဖြင့် သမ္မတရှီအား    အမေရိကန်ပြည်ထောင်စုသို့လာရောက်လည်ပတ်ရန်  ဖိတ်ခေါ်ထားကြောင်း ဂျာနယ်တွင် ဆက်လက်ဖော်ပြထားသည်။

အဆိုပါကိစ္စရပ်နှင့်စပ်လျဉ်း၍ ဝါရှင်တန်မြို့ရှိ တရုတ်သံရုံးက တစ်စုံတစ်ရာ တုံ့ပြန်ပြောဆိုထားခြင်းမရှိသေးကြောင်းသိရသည်။

Source: Myawady Web Portal

ဒုတိယဝန်ကြီးချုပ်နှင့် ဘဏ္ဍာရေးဝန်ကြီးဟောင်း Chrystia Freeland သည် လာမည့် လစ်ဘရယ်ပါတီခေါင်းဆောင်နှင့် ၀န်ကြီးချုပ်ရာထူးနေရာတွင် ဝင်ရောက်ယှဉ်ပြိုင်အရွေးခံရန် မဲဆွယ်စည်းရုံးရေးကမ်ပိန်းများ ပြုလုပ်လျက်ရှိသည်။

ဗဟိုဘဏ်အကြီးအကဲဟောင်းဖြစ်သူ Mark Carney အား နောက်လာမည့် လစ်ဘရယ်ပါတီခေါင်းဆောင်နှင့် ၀န်ကြီးချုပ်အဖြစ် ထောက်ခံကြောင်း နိုင်ငံခြားရေးဝန်ကြီး Mélanie Joly ၏ ပြောကြားခဲ့မှုနှင့် ပါလက်စတိုင်း ထောက်ခံသူများ၏ ကန့်ကွက်ဆန္ဒပြမှုကြောင့် ဇန်နဝါရီ ၁၉ ရက် (တနင်္ဂနွေနေ့)တွင် ပြုလုပ်ခဲ့သည့် Freeland ၏ မဲဆွယ်စည်းရုံးရေးကမ်ပိန်း ပျက်ပြားခဲ့ရသည်။

ကနေဒါနိုင်ငံတွင် အမေရိကန်နှင့်ကုန်သွယ်ရေးတင်းမာမှုများ တိုးမြင့်လာကာ နိုင်ငံရေးအကြပ်အတည်းများ ပိုမိုပြင်းထန်လာခြင်းကြောင့် ပြီးခဲ့သည့်လတွင် ဘဏ္ဍာရေးဝန်ကြီး Freeland က Trudeau အစိုးရအဖွဲ့မှ ရုတ်တရက်နုတ်ထွက်သွားပြီး မကြာမီ လစ်ဘရယ်ပါတီခေါင်းဆောင်၊ ကနေဒါဝန်ကြီးချုပ်ဖြစ်သူ Justin Trudeau လည်း နုတ်ထွက်သွားခဲ့ရသည်။ ယခုအခါ Freeland သည် လစ်ဘရယ်ပါတီ ခေါင်းဆောင်သစ်နှင့် ကနေဒါ၀န်ကြီးချုပ်ရာထူးနေရာများတွင် အရွေးချယ်ခံနိုင်ရေးအတွက် ကြိုးပမ်း ဆောင်ရွက်လျက်ရှိသည်။

လစ်ဘရယ်ပါတီခေါင်းဆောင်သစ်ကို လာမည့် မတ်လ ၉ ရက်နေ့တွင် ရွေးချယ်သွားမည်ဖြစ်ပြီး ထိုအချိန်အထိ Trudeau က ၀န်ကြီးချုပ်အဖြစ် ဆက်လက် တာဝန်ယူ သွားမည်ဖြစ်သည်။

Mark Carney သည် လာမည့် အထွေထွေရွေးကောက်ပွဲတွင် ကွန်ဆာဗေးတစ်အတိုက်အခံခေါင်းဆောင် Pierre Poilievre ကို အနိုင်ယူနိုင်မည်ဟု ယုံကြည်ကြောင်းနှင့် ကနေဒါထုတ်ကုန်များအပေါ်တွင် ကုန်သွယ်ခွန်တိုးမြှင့်ကောက်ခံမည့် အမေရိကန်သမ္မတ Donald Trump ၏ ခြိမ်းခြောက်မှုကို ကိုင်တွယ်ဖြေရှင်းရန် အကောင်းဆုံး သမ္မတလောင်း ဖြစ်ကြောင်း နိုင်ငံခြားရေးဝန်ကြီး Mélanie Joly က ပြောကြားခဲ့သည်။

ကိုးကား-AP News

တရုတ်သမ္မတ ရှီကျင့်ဖျင်နှင့် အမေရိကန် ရွေးကောက်ခံ သမ္မတ ဒေါ်နယ်ထရမ့်တို့သည် ဇန်နဝါရီ ၁၇ ရက် (သောကြာနေ့)က ဖုန်းဆက်သွယ်ပြောကြားခဲ့ပါသည်။ ထိုဖုန်းပြောဆိုမှုသည် ၎င်းတို့နှစ်ဦး၏ ၂၀၂၁ ခုနှစ် နောက်ပိုင်းတွင် ပထမဆုံးအကြိမ် ဖုန်းတိုက်ရိုက် ပြောဆိုကြခြင်း ဖြစ်ပါသည်။ 

ဒေါ်နယ်ထရမ့် သမ္မတကျမ်းသစ္စာဆိုပွဲမတိုင်မီ ရက်အနည်းငယ်အလိုတွင် ထရမ့်နှင့် ရှီတို့က TikTok ကိစ္စ၊ fentanyl နှင့် Taiwan ကိစ္စတို့ကို ဆွေးနွေးခဲ့ကြကြောင်း သိရပါသည်။ 

“ယခုလိုဖုန်းပြောမှုသည် တရုတ်နှင့်အမေရိကန် နှစ်နိုင်ငံလုံးအတွက် အလွန်ကောင်းမွန်မှုရှိပါကြောင်း၊ ပြဿနာများကို အတူဖြေရှင်းရန် စတင်နိုင်တော့မည် ဖြစ်သည်ဟု မျှော်လင့်ပါကြောင်း၊ သမ္မတရှီနှင့် မိမိတို့သည် ကမ္ဘာကြီး ပိုမိုငြိမ်းချမ်းလာပြီး ဘေးကင်းစေရန်အတွက် တတ်နိုင်သမျှလုပ်ဆောင်သွားမည်ဖြစ်ပါကြောင်း” ထရမ့်က ၎င်း၏ Truth Social တွင် ရေးသားထား ပါသည်။ 

ဒေါ်နယ်ထရမ့်သည် ဇန်နဝါရီ ၂၀ တွင် ပြုလုပ်မည့် ၎င်း၏ သမ္မတကျမ်းသစ္စာဆိုပွဲ အခမ်းအနားသို့ တက်ရောက်ရန် တရုတ်သမ္မတရှီကျင့်ဖျင်ကို ဖိတ်ကြား ခဲ့သော်လည်း သမ္မတရှီကျင့်ဖျင်က ၎င်းကိုယ်စား ဒုတိယသမ္မတ Han Zheng ကို အထူးကိုယ်စားလှယ်အဖြစ် စေလွှတ်မည်ဖြစ်ကြောင်း ဇန်နဝါရီ ၁၇ ရက် (သောကြာနေ့)က ပြောကြားထားပါသည်။

ကိုးကား -AP

ယူကရိန်းနှင့်ပတ်သက်သည့် ငြိမ်းချမ်းရေးဆွေးနွေးပွဲများကို တူရကီတွင် ကျင်းပမည်ဖြစ်ကြောင်း ဆလိုဗက်ကီးယား ဝန်ကြီးချုပ် ဖီကို က ဖွင့်ဟ ပြောကြား လိုက်ပါသည်။

တူရကီသမ္မတ Recep Tayyip Erdogan နှင့် Ankara ၌ တွေ့ဆုံပြီးနောက် ဆလိုဗက်ကီးယားဝန်ကြီးချုပ် Robert Fico က တူရကီသည် ၎င်း၏ ပိုင်နက် နယ်မြေ၌ ပဋိပက္ခတွင် အဓိက ပါဝင်ပတ်သက်သူများကြား ဆွေးနွေးပွဲများကို လက်ခံကျင်းပနိုင်ပြီး ယူကရိန်းပဋိပက္ခကို အဆုံးသတ်နိုင်မည်ဖြစ်ကြောင်း ပြောကြားခဲ့ပါသည်။ 

ဆလိုဗက်ကီးယားသည် “ထိပ်သီးအစည်းအဝေးကို ကျင်းပရန် မကြိုးစားနိုင်သော်လည်း အောက်ခြေအဆင့်တွင် ငြိမ်းချမ်းရေးတွေ့ဆုံပွဲများကို ကျင်းပနေကြောင်း” ဝန်ကြီးချုပ် Fico က အလေးပေး ပြောကြားခဲ့ပါသည်။

ဆလိုဗက်ကီးယားဝန်ကြီးချုပ်က “ယခုကိစ္စတွင် လုံးဝကြားနေဖြစ်ပြီး နိုင်ငံတကာရာဇ၀တ်ခုံရုံးနှင့် ဆက်စပ်မှုမရှိသည့် နိုင်ငံတစ်နိုင်ငံ၌ အဆင့်မြင့် ငြိမ်းချမ်းရေး ဆွေးနွေးပွဲများကို ကျင်းပသင့်သည်ဟု ယုံကြည်ကြောင်း” ပြောကြားခဲ့ပါသည်။

ကိုးကား - TASS

ဒေါ်နယ်ထရမ့်သည် St. John's ဘုရားကျောင်းတွင် အခမ်းအနားတက်ရောက်ခြင်းဖြင့် ၎င်း၏ ဇန်နဝါရီ ၂၀ ရက်နေ့၌ ကျင်းပသော သမ္မတကျမ်းသစ္စာ ကျိန်ဆိုသည့်နေ့၏ အစီအစဉ်ကို စတင်ခဲ့သည်။

ကိုးကား- TASS/Reuters

ဂရင်းလန်းကို အမေရိကန်ထံ ရောင်းချမည် မဟုတ်ကြောင်း ဒိန်းမတ်ဝန်ကြီးချုပ် Mette Frederiksen က အမေရိကန်ရွေးကောက်ခံသမ္မတ ဒေါ်နယ်ထရမ့် ကို ပြောကြားခဲ့ပါသည်။

နိုင်ငံ့လုံခြုံရေးရည်ရွယ်ချက်အတွက် ဒိန်းမတ် ကိုယ်ပိုင်အုပ်ချုပ်ခွင့်ရ ဂရင်းလန်းကို အမေရိကန်က ရယူသင့်ကြောင်း ထရမ့် ကပြောကြားထားခဲ့သည်။

Rederiksen သည် ဇန်နဝါရီ ၁၅ရက်နေ့တွင် ထရမ့်နှင့်တယ်လီဖုန်းမှတစ်ဆင့် စကားပြောခဲ့ကြောင်း ဝန်ကြီးချုပ်ရုံးမှ ထုတ်ပြန်ထားသည်။ Greenland သည် ရောင်းချရန်မဟုတ်ကြောင်း၊ လွတ်လပ်ရေးနှင့်ပတ်သက်ပြီး ဆုံးဖြတ်ချက်ချရန်က Greenland အပေါ်တွင်သာ မူတည်ကြောင်း Mette Frederiksen က ထရမ့်ကို ပြောကြားခဲ့ကြောင်း သိရသည်။

ဒိန်းမတ်မှ သွင်းကုန်များအပေါ် ဒဏ်ခတ်သည့် အကောက်ခွန်ဆိုင်ရာ ခြိမ်းခြောက်မှုများကို ထရမ့်က ရုပ်သိမ်းခြင်းမရှိခဲ့ကြောင်း Mette Frederiksen က သတင်းထောက်များအား ဇန်နဝါရီ ၁၆ရက် နေ့က ပြောကြားခဲ့ပြီး ဒိန်းမတ်နိုင်ငံသည် အမေရိကန်နှင့် ကုန်သွယ်ရေးနယ်ပယ်တွင် ဆိုးရွားသောအခြေအနေတွင်ရှိနေပြီး မည်သည့်ပဋိပက္ခမျိုးမှ ထပ်မံမဖြစ်ပွားစေလိုကြောင်း ၎င်းက ဆက်လက်ပြောကြားခဲ့ပါသည်။

ဒိန်းမတ်စီးပွားရေး လုပ်ငန်းများသည် အမေရိကန်နှင့် ကုန်သွယ်ရေးပဋိပက္ခဖြစ်လာမည်ကို စိုးရိမ်နေကြပြီး Mette Frederiksen သည် ဆေးဝါး၊ ဘီယာနှင့် နိုင်ငံ့ အထင်ကရ အမှတ်တရ အရုပ်ထုတ်လုပ်ရေးကုမ္ပဏီများ အပါအဝင် ဒိန်းမတ်စီးပွားရေးလုပ်ငန်းကြီးများ၏ ကိုယ်စားလှယ်များနှင့် ဇန်နဝါရီ ၁၆ရက်နေ့တွင် တွေ့ဆုံခဲ့ကာ လက်ရှိအခြေအနေနှင့်သတင်းကို ရှင်းလင်း ပြောပြခဲ့ကြောင်း ဖော်ပြထားသည်။

ယခုသီတင်းပတ်အတွင်း ထရမ့် သမ္မတတာဝန်ယူပြီးသည့်နောက် ၎င်နှင့်တွေ့ဆုံဆွေးနွေးမှုကို ဆက်လက် လုပ်ဆောင်မည်ဖြစ်ကြောင်း ဝန်ကြီးချုပ်က ပြောကြားပါသည်။

ကိုးကား-Myanmar National Post

အမေရိကန် သမ္မတ ဒေါ်နယ်ထရမ့် က အမေရိကန်သမိုင်းတွင် အကြီးမားဆုံး ပြည်နှင်ဒဏ်ပေးရေး စစ်ဆင်ရေးကို မကြာမီ စတင်မည်ဖြစ်ကြောင်း ကတိပြုလိုက် ပါသည်။ 

“မကြာမီ အမေရိကန်သမိုင်းတွင် အကြီးမားဆုံး ပြည်နှင်ဒဏ်ပေးရေးစစ်ဆင်ရေးကို စတင်မည်ဖြစ်ကြောင်းနှင့် ယခင် စံချိန်တင်ထားသည့် သမ္မတ Dwight D. Eisenhower ထက်တောင် ပိုမည်ဖြစ်ကြောင်း” ဝါရှင်တန်ရှိ Capital One အားကစားကွင်း၌ ဇန်နဝါရီ ၁၉ ရက်က ပြုလုပ်သည့် လူထုစည်းဝေးပွဲတွင် အမေရိကန် သမ္မတ ဒေါ်နယ်ထရမ့် က ထောက်ခံသူများရှေ့တွင် ပြောဆိုခဲ့ပါသည်။

ကိုးကား - TASS

အိန္ဒိယနှင့်ရုရှားနိုင်ငံတို့သည် သမ္မတဗလာဒီမာပူတင်၏ အိန္ဒိယခရီးစဉ်အတွက် အချိန်ကာလသတ်မှတ်ခြင်းကို အပြီးသတ်လုပ်ဆောင်လျက်ရှိကြောင်း အိန္ဒိယပြည်ပရေးရာဝန်ကြီးဌာနမှ ပြောရေးဆိုခွင့်ရှိသူတစ်ဦးက ပြောသည်။

အိန္ဒိယဝန်ကြီးချုပ် နာရန်ဒရာမိုဒီက ရုရှားနိုင်ငံ ကာဇန်မြို့တွင် ပြီးခဲ့သည့်နှစ်အတွင်းက ကျင်းပသည့် BRICS ထိပ်သီးဆွေးနွေးပွဲ၌ နိုင်ငံအတွင်းသို့ လာရောက်လည်ပတ်ရန် သမ္မတပူတင်အား ဖိတ်ခေါ်ခဲ့ခြင်းဖြစ်သည်။

ထို့ကြောင့် အိန္ဒိယနိုင်ငံ  နယူးဒေလီမြို့တော်သို့ သမ္မတပူတင်လာရောက်မည့် ခရီးစဉ် နေ့ရက်အတိအကျ သတ်မှတ်နိုင်ရန် နှစ်နိုင်ငံစလုံးက သံတမန်နည်းလမ်းများအရ လုပ်ဆောင်လျက်ရှိသည်။ နှစ်နိုင်ငံကြား နောက်ဆုံးကျင်းပသည့် ထိပ်သီးဆွေးနွေးပွဲကို ၂၀၂၄ ခုနှစ်  ဇူလိုင်လအတွင်းက ရုရှားနိုင်ငံ   မော်စကိုမြို့တော်၌ကျင်းပခဲ့ပြီး ယင်းနှစ် အောက်တိုဘာလတွင် ကာဇန်မြို့၌ ဒုတိယအကြိမ်  ထပ်မံတွေ့ဆုံခဲ့ကြောင်းသိရသည်။

အိန္ဒိယနိုင်ငံသည် ရုရှားနိုင်ငံမှ ရေနံကို အဓိကဝယ်ယူတင်သွင်းနေသည့်    နိုင်ငံတစ်နိုင်ငံဖြစ်ပြီး  ၂၀၂၃ ခုနှစ်အတွင်းမှာပင် ဒေါ်လာ ၆၅ ဘီလီယံအထိ မြင့်တက်လာခဲ့သည်။ ယင်းပမာဏမှာ သာမန်ထက် ၅ ဆ ပိုမိုမြင့်တက်လာခြင်းဖြစ်ပြီး နှစ်နိုင်ငံကုန်သွယ်မှုသည် လာမည့် ၂၀၃၀ ပြည့်နှစ်တွင် ဒေါ်လာ ၁၀၀ ဘီလီယံအထိ မြင့်တက်လာစေရန်   သမ္မတပူတင်နှင့်ဝန်ကြီးချုပ် မိုဒီတို့က ဆုံးဖြတ်ထားကြောင်း သိရသည်။

Ref: RT

Source: Myawady Web Portal