နှစ်နိုင်ငံခေါင်းဆောင်များသည် ၂၀၂၄ ခုနှစ် ဒီဇင်ဘာလတွင် ကျင်းပခဲ့သော Supreme Eurasian Economic Council အစည်းအဝေးတွင် ဆွေးနွေးခဲ့သော စွမ်းအင်ကဏ္ဍတွင် အဓိကအားဖြင့် ပိုမိုနက်ရှိုင်းသော ပေါင်းစည်း ပူးပေါင်းဆောင်ရွက်မှုဆိုင်ရာလက်ရှိကိစ္စရပ်များကို ဆွေးနွေးခဲ့ပါသည်။ အာမေးနီးယားစီးပွားရေးအတွက် Eurasian Economic Union အပါအဝင် ပူးပေါင်းလုပ်ဆောင်ခြင်းမှ သိသာထင်ရှားသော လက်တွေ့ကျသည့် အကျိုးကျေးဇူးများရှိကြောင်း သိရှိရပါသည်။ 

အာမေးနီးယားနိုင်ငံဝန်ကြီးချုပ် Nikol Pashinyan သည် ဥရောပသမဂ္ဂနှင့် ဆက်ဆံရေးအခြေအနေတွင် အာမေးနီးယားနိုင်ငံ၏ မကြာသေးမီက ခြေလှမ်းများနှင့်ပတ်သက်သည့် အခြေအနေများကို ရှင်းလင်းပြောကြားခဲ့ပါသည်။ ရုရှားသမ္မတ ဗလာဒီမာပူတင်သည် သက်ဆိုင်ရာမှတ်ချက်များနှင့် အကဲဖြတ်ချက်များကိုပေးခဲ့ကြောင်း သိရှိရပါသည်။ 

ကိုးကား - kremlin.ru

Photo: armenpress.am

သမ္မတပူတင်က အီရန်သမ္မတ၏ ခရီးစဉ်သည် ၎င်းတို့၏ ပူးပေါင်းဆောင်ရွက်မှု နယ်ပယ်အားလုံးကို ဆွေးနွေးခွင့်ရရုံသာမကဘဲ ဘက်စုံမဟာဗျူဟာမြောက် မိတ်ဖက်ဆက်ဆံရေးအတွက် ရုရှားနှင့်အီရန်တို့အကြား အဓိကအခြေခံသဘောတူစာချုပ်ကိုလည်း လက်မှတ်ရေးထိုးသွားမည်ဖြစ်သည့်အတွက် အထူးအရေးကြီးကြောင်း ပြောကြားခဲ့ပါသည်။ 

မိမိတို့အနေဖြင့် အဆိုပါသဘောတူစာချုပ်ကို အချိန်အတော်ကြာအောင် လုပ်ဆောင်နေခဲ့ရပြီး ဤလုပ်ငန်းပြီးမြောက်ခဲ့သည့်အတွက် အလွန်ဝမ်းသာပါကြောင်း၊ မိမိတို့၏ အပြန်အလှန်ဆက်သွယ်မှုနယ်ပယ်အားလုံးနီးပါးအတွက် ထပ်လောင်း တွန်းအားများပေးရန် အခွင့်အရေးပေးသောကြောင့် ၎င်းသည် အရေးကြီးပါကြောင်း၊ ကုန်သွယ်မှုနှင့် စီးပွားရေးဆက်ဆံမှု ဖွံ့ဖြိုးတိုးတက်ရေးကို အထောက်အကူဖြစ်စေမည်ဟု ယုံကြည်ပါကြောင်း၊ ခြုံငုံကြည့်ပါက လက်ရှိအရှိန်အဟုန်သည် အတော်အတန် လက်ခံနိုင်သည်ဟု မိမိထင်မြင်မိပါကြောင်း၊ ပြီးခဲ့သောနှစ် ပထမ ၁၀ လတွင် ၎င်းတို့၏ ကုန်သွယ်မှု တန်ဖိုးသည် ၁၅.၅ ရာခိုင်နှုန်း တိုးတက်ခဲ့ပါကြောင်း သမ္မတ ပူတင်ကပြောကြားခဲ့ပါသည်။

မိမိတို့သည် နျူကလီးယားစွမ်းအင်နယ်ပယ်တွင် ပရောဂျက်များအပါအဝင် ကျွန်ုပ်တို့၏ အဓိကပရောဂျက်များကို ဆက်လက်လုပ်ဆောင်နေပါကြောင်း၊ မိမိတို့သည် စွမ်းအင်ကဏ္ဍတွင် အခြားဖြစ်နိုင်ချေရှိသော ပရောဂျက်များရှိပြီး ထောက်ပံ့ပို့ဆောင်ရေးကဏ္ဍတွင် အလားအလာ ကောင်းများရှိပါကြောင်း၊ ထို့အပြင် လူသားချင်းစာနာထောက်ထားမှုဆိုင်ရာ ဆက်ဆံမှုနယ်ပယ်တွင် မိမိတို့၏ ပူးပေါင်းဆောင်ရွက်မှုကို မှတ်သားစေလိုပါကြောင်း၊ သယ်ယူပို့ဆောင်ရေး ဆက်သွယ်ရေးနယ်ပယ်တွင်လည်း တိုးတက်လာပါကြောင်း၊ ယဉ်ကျေးမှုဝန်ကြီးဌာန၏ သိသာထင်ရှားသည့် တိုးတက်မှုများရှိနေပါကြောင်း၊ ယခုနှစ် ဇွန်လတွင် ကျင်းပမည့် အီရန်ရှိ ရုရှားယဉ်ကျေးမှုနေ့အတွက် ပြင်ဆင်နေပါကြောင်း သမ္မတ ဗလာဒီမာပူတင်က ပြောကြားခဲ့ပါသည်။

နိုင်ငံတကာအစီအစဉ်နှင့်ပတ်သက်သည့် မိမိတို့၏  ဆွေးနွေးညှိနှိုင်းမှုများက ကမ္ဘာတစ်ခုလုံးနှင့် ဒေသတွင်းတွင် လိုအပ်ချက်ကြီးကြီးမားမားရှိနေခြင်းဖြစ်ကြောင်း သမ္မတ ပူတင်ကပြောကြားခဲ့ပါသည်။

ထို့နောက် ရုရှားသမ္မတ ဗလာဒီမာပူတင်က အီရန်ဘာသာရေးခေါင်းဆောင် မစ္စတာ ခါမေနီထံ ဆုတောင်းမေတ္တာပို့သအပ်ပါကြောင်း ပြောကြားခဲ့ပါသည်။ အီရန်-ရုရှား နှစ်နိုင်ငံ ပူးပေါင်းဆောင်ရွက်မှုလမ်းကြောင်းတွင် လုပ်ဆောင်သမျှသည် အီရန်ဘာသာရေးခေါင်းဆောင် မစ္စတာ ခါမေနီ၏ ကိုယ်ရေးကိုယ်တာ ထိန်းချုပ်မှုအောက်၌ရှိနေကြောင်း မိမိတို့ ကောင်းစွာ သိရှိထားပါကြောင်း၊ ထို့အတွက် ၎င်းကို ကျေးဇူးတင်ပါကြောင်း ပြောကြားခဲ့ပါသည်။

ကိုးကား - MOFA Russia

ပြည်တွင်းရေးကိုဝင်ရောက်စွက်ဖက်သည့် ဂျာမနီအစိုးရကို အိန္ဒိယက မတ်လ၂၃ ရက်တွင် တရားဝင် ကန့်ကွက်သတိပေးလိုက်ကြောင်းသိရသည်။

အိန္ဒိယအစိုးရက အာဏာရ BJP ပါတီကို နှုတ်အားဖြင့်ဝေဖန်သည့် နယူးဒေလီဝန်ကြီးချုပ်အာဗင်းကက်ရီဝယ်ကို မတ်လ၂၁ ရက်တွင်ဖမ်းဆီးပြီးနောက် ဂျာမနီအစိုးရ၏မှတ်ချက်ပြုပြောဆိုမှုထွက်ပေါ်လာခြင်းဖြစ်သည်။

အာဗင်းကက်ရီဝယ်ဖမ်းဆီးခံရမှုနှင့် ပတ်သက်၍ လွတ်လပ်စွာတရားစီရင်မှုနှင့် အခြေခံဒီမိုကရေစီ စည်းမျဉ်းစည်းကမ်းများနှင့် ပတ်သက်သည့်   စံချိန်စံနှုန်းများရှိမည်ဟု မျှော်လင့်ကြောင်း ဂျာမနီနိုင်ငံခြားရေး ဝန်ကြီးဌာနက မတ်လ၂၂ ရက်တွင် ထုတ်ပြန်သည်။

ဒီလိုမျိုးမှတ်ချက်ပြုပြောဆိုမှုတွေဟာ မိမိတို့နိုင်ငံရဲ့ တရားစီရင်ရေး လုပ်ငန်းစဉ်ကို ဝင်ရောက်စွက် ဖက်ရာရောက်တဲ့အပြင် လွတ်လပ်စွာ တရားစီရင်မှုကိုလည်း လျော့ပါးစေပါတယ်ဟု အိန္ဒိယပြည်ပရေးရာ ဝန်ကြီးဌာနက မတ်လ၂၃ ရက်တွင် ထုတ်ပြန်ထားသည်။

BJP ပါတီခေါင်းဆောင် ကက်ရီဝယ်သည် လာဘ်ပေးလာဘ်ယူမှုများ ပြုနေသည် ဟူသော စွဲဆိုချက်ဖြင့် ရဲတပ်ဖွဲ့၏ ဖမ်းဆီးမှုကိုခံရခြင်း ဖြစ်သည်။

သို့သော် ထိုသို့ဖမ်းဆီးမှုသည် ပူးပေါင်းကြံစည်မှုသာဖြစ်ကြောင်း၊ စွဲဆိုခံထားရသကဲ့သို့ မည်သည့်ပြစ်မှုကိုမျှ ကျူးလွန်ထားခြင်းမရှိကြောင်း ကက်ရီဝယ်က ပြောထားသည်ဟုသိရသည်။                                                      

  Ref: RT

Source: Myawady Web Portal

ပြီးခဲ့သည့် ဇန်နဝါရီ ၁၆ ရက်နေ့က  ဘူဂေးရီးယားနိုင်ငံ အမျိုးသားညီလာခံသည် Rosen Zhelyazkov  ဦးဆောင်သော ညွန့်ပေါင်းအစိုးရအဖွဲ့ကို အတည်ပြုလိုက်ပြီ ဖြစ်ပါသည်။ ထိုညွန့်ပေါင်းအစိုးရအဖွဲ့ကို ဘူဂေးရီးယား ပါလီမန်ရွေးကောက်ပွဲများအပြီး နှစ်လကျော်အကြာတွင် အတည်ပြုလိုက်ခြင်း ဖြစ်ပါသည်။ 

လက်ရှိနိုင်ငံတော်တာဝန်ယူထားသည့် Dimitar Glavchev ဦးဆောင်သော အိမ်စောင့်အစိုးရအဖွဲ့ကို အစားထိုးမည့် ယခုအစိုးရသစ်အဖွဲ့ကို ပါလီမန်ရှိ အဖွဲ့ဝင် ၂၄၀ အနက် ၁၂၅ ဦးက ထောက်ခံလိုက်ခြင်းဖြစ်သည်။ 

Rosen Zhelyazkovသည် ၁၉၆၈ ခုနှစ်တွင် မွေးဖွားခဲ့ပြီး ဥပဒေမဟာဘွဲ့ရရှိထားသူဖြစ်ကာ အမျိုးသား ညီလာခံဥက္ကဋ္ဌ၊ ပို့ဆောင်ရေးနှင့်ဆက်သွယ်ရေးဝန်ကြီးနှင့် ဝန်ကြီးများကောင်စီ အထွေထွေအတွင်းရေးမှူး တာဝန် များကို ထမ်းဆောင်ခဲ့သည်။ 

ဘူဂေးရီးယားနိုင်ငံသည်  နိုင်ငံရေးအကျပ်အတည်းကို အချိန်ကာလကြာမြင့်စွာ ကြုံတွေ့ခဲ့ရကြောင်း၊ နိုင်ငံရေး အင်အားစုများအကြား မိမိတို့အယူအဆနှင့် နိုင်ငံရေး ကွဲလွဲမှုများကို ဘေးဖယ်ကာ သဘောတူညီမှုရရှိခဲ့သည့်အတွက် စည်းလုံးညီညွတ်မှုရှိသည့်  မဟာမိတ်အဖွဲ့အစည်းအားလုံးကို ကျေးဇူးတင်ရှိပါကြောင်း  Zhelyazkov  က ဇန်နဝါရီ ၁၆ ရက်နေ့တွင် ၎င်း၏အစိုးရအဖွဲ့ထံ တင်ပြရာ၌  ပြောကြားခဲ့သည်။ 

မိမိအစိုးရအဖွဲ့အနေဖြင့် ကျန်းမာရေး၊ ပညာရေး၊ လုပ်သားဈေးကွက်ဖွံ့ဖြိုးတိုးတက်ရေး၊ တရားဥပဒေ စိုးမိုးရေးနှင့် ခိုင်မာအားကောင်းသည့်အဖွဲ့အစည်းများ အားပေးထောက်ခံရေး၊ ပြည်သူများ၏ စွမ်းဆောင်ရည် တိုးတက်မြင့်မားလာရေးတို့အတွက် အဓိကထားဆောင်ရွက်သွားမည်ဖြစ်ကြောင်း၊ ရေရှည်တည်တံ့ခိုင်မာသော ပြည်သူ့ဘဏ္ဍာငွေစနစ် ဖြစ်လာစေရေး၊ ပြည်သူများ၏ ရင်းနှီးမြှုပ်နှံမှုလုပ်ငန်းများအပေါ် ထိရောက်စွာ စီမံခန့်ခွဲရေး၊ သုတေသနလုပ်ငန်းများ၌ ရင်းနှီးမြှုပ်နှံမှုများ စဉ်ဆက်မပြတ် တိုးတက်လာစေရေးတို့ကိုလည်း ဆောင်ရွက်သွားမည်ဖြစ်ကြောင်း ၎င်းက  ပြောကြားခဲ့ပါသည်။ 

ဘူဂေးရီးယားနိုင်ငံတွင် ၂၀၂၄ ခုနှစ်၊ ဇွန်လတွင် ရွေးကောက်ပွဲကျင်းပပြီးစီးခဲ့သော်လည်း အစိုးရသစ်ဖွဲ့ရန် ပျက်ကွက်ခဲ့သဖြင့် ၂၀၂၄ ခုနှစ်၊ အောက်တိုဘာ ၂၇ ရက်တွင် ဆိုင်းမဆင့်ဗုံမဆင့် ပါလီမန်ရွေးကောက်ပွဲ ကျင်းပခဲ့ကာ ၂၀၂၅ ခုနှစ် ဇန်နဝါရီ ၁၆ ရက်တွင်မှ  ညွန့်ပေါင်းအစိုးရအဖွဲ့  ဖွဲ့စည်းလိုက်ခြင်းဖြစ်ပါသည်။ 

ကိုးကား - ဆင်ဟွာ 

အမေရိကန်နိုင်ငံ၏ဖိတ်ကြားချက်အရ  တရုတ် သမ္မတ ရှီကျင့်ဖျင် ကိုယ်စား ဒုတိယသမ္မတ ဟန်ဇန်သည်  ဇန်နဝါရီ ၂၀ တွင် ကျင်းပပြုလုပ်မည့် (၄၇) ကြိမ်မြောက် အမေရိကန်ပြည်ထောင်စု၏ သမ္မတကျမ်းသစ္စာဆိုပွဲ အခမ်းအနားသို့ တက်ရောက်မည်ဖြစ်ကြောင်း တရုတ်နိုင်ငံခြားရေးဝန်ကြီးဌာနမှာ ပြောရေးဆိုခွင့်ရှိသူက ဇန်နဝါရီ ၁၇ ရက်နေ့တွင် ပြောကြားလိုက်သည်။

တရုတ်နိုင်ငံအနေဖြင့် နှစ်နိုင်ငံအကြား အပြန်အလှန်လေးစားရေး၊ ငြိမ်းချမ်းစွာအတူယှဉ်တွဲနေထိုင်ရေး၊ နှစ်ဦး နှစ်ဖက်အကျိုးရှိစေမည့် ပူးပေါင်းဆောင်ရွက်ရေးဆိုင်ရာ မူဝါဒများနှင့်အညီ ဆက်လက်ကျင့်သုံးဆောင်ရွက်သွားမည်ဖြစ်ပါကြောင်း၊ အမေရိကန်အစိုးရသစ်နှင့်လည်း အပြန်အလှန် ဆွေးနွေးမှုများလုပ်ဆောင်သွားလိုပြီး နှစ်နိုင်ငံအကြား  သဘောထားကွဲလွဲမှုများအတွက် အတူတကွအဖြေရှာကာ နှစ်ဖက်အပြန်အလှန် အကျိုးရှိစွာ ဆောင်ရွက်နိုင်မည့် ဆက်ဆံရေးမျိုးကို တည်ဆောက်သွားလိုကြောင်း  ၎င်းက ဆက်လက်ပြောကြားထားပါသည်။ 

ကိုးကား-ဆင်ဟွာ

Photo: NBC News

ထရမ့်နှင့် ရှီတို့၏ အဆိုပါစကားပြောဆိုမှုသည် အမေရိကန်နှင့် တရုတ်နိုင်ငံအတွက် အလွန်ကောင်းမွန်ကြောင်း ထရမ့်က ပြောကြားခဲ့ပါသည်။ ဆွေးနွေးချက်များထဲတွင် တရုတ်နိုင်ငံ၏ TikTok application နှင့် ကုန်သွယ်မှုပိုင်းများကိုလည်း ထည့်သွင်းဆွေးနွေးခဲ့ကြောင်း သိရှိရပါသည်။

တရုတ်သမ္မတ ရှီကျင့်ဖျင်နှင့် ဒေါ်နယ်ထရမ့် တို့သည် ယူကရိန်းအကျပ်အတည်းနှင့် ပါလက်စတိုင်း-အစ္စရေး ပဋိပက္ခတို့ကို ဖုန်းဖြင့် ဆွေးနွေးခဲ့ကြကြောင်း၊ ထို့အပြင် တရုတ်သမ္မတ ရှီကျင့်ဖျင်နှင့် အမေရိကန်သမ္မတ ဒေါ်နယ်ထရမ့် တို့သည် အဓိကကိစ္စရပ်များအတွက် ပုံမှန် အဆက်အသွယ်များပြုလုပ်ရန် မဟာဗျူဟာကျသော ဆက်သွယ်ရေးလမ်းကြောင်းကို ထူထောင်ရန် သဘောတူညီခဲ့ကြကြောင်း China Central Television က ဖော်ပြထားပါသည်။

တွေ့ဆုံပွဲအပြီးတွင် အမေရိကန် ရွေးကောက်ခံသမ္မတက တရုတ်သမ္မတ ရှီကျင့်ဖျင်နှင့်အတူ ၎င်းသည် နိုင်ငံတကာငြိမ်းချမ်းရေးနှင့် လုံခြုံရေးအတွက် တတ်နိုင်သမျှ လုပ်ဆောင်သွားမည်ဖြစ်ကြောင်း ပြောကြားခဲ့ပါသည်။

ကိုးကား - RIA Novosti

တရုတ်သမ္မတ ရှီကျင့်ဖျင်သည် ဇန်နဝါရီ ၁၇ ရက်နေ့က အမေရိကန် ရွေးကောက်ခံသမ္မတ ဒေါ်နယ်ထရမ့်နှင့် တယ်လီဖုန်းဖြင့် စကားပြောဆိုခဲ့ကြောင်း ဆင်ဟွာ သတင်းအေဂျင်စီက ဖော်ပြထားပါသည်။ 

စေ့စပ်ညှိနှိုင်းမှု အသေးစိတ်ကိုမူ ပြောကြားခြင်းမရှိကြောင်း သိရှိရပါသည်။

ကိုးကား- ဆင်ဟွာ

ရုရှားသမ္မတ ဗလာဒီမာပူတင်သည် ဇန်နဝါရီ ၁၇ ရက် နေ့တွင် အီရန်သမ္မတ Masoud Pezeshkian နှင့် မော်စကို၌ တွေ့ဆုံစဉ် ဒေသတွင်းနှင့်ကမ္ဘာလုံးဆိုင်ရာ ပြဿနာအများအပြားကို ဆွေးနွေးမည်ဖြစ်ကြောင်း ကရင်မလင်နန်းတော်က ဇန်နဝါရီ ၁၆ ရက်နေ့တွင် အတည်ပြုခဲ့သည်။

ရုရှားနှင့်အီရန်အကြား နှစ်နိုင်ငံဆက်ဆံရေး ရေရှည်ဖွံ့ဖြိုးတိုးတက်မှုအတွက် ကရင်မလင်က “မူဘောင်”အဖြစ် ဖော်ပြထားသည့် ဘက်စုံမဟာဗျူဟာမြောက် မိတ်ဖက်ဆက်ဆံရေး သဘောတူညီချက်ကို ခေါင်းဆောင်များ လက်မှတ်ရေးထိုးရန် မျှော်လင့်ရသည် ။

ဆွေးနွေးပွဲအစီအစဉ်တွင် အရှေ့အလယ်ပိုင်းဒေသ အထူးသဖြင့် ဆီးရီးယားနှင့်အစ္စရေး-ပါလက်စတိုင်း ပဋိပက္ခများဖြစ်စဉ်များအပေါ် သုံးသပ်မှုများပါဝင်မည် ဖြစ်ကြောင်း ကရင်မလင်၏ ဇန်နဝါရီ ၁၆ ရက်နေ့ ထုတ်ပြန်ချက်တွင်ဖော်ပြထားသည်။ ဆွေးနွေးမှုများတွင် တောင်ကော့ကေးဆပ်ဒေသနှင့် တီဟီရန်၏ နျူကလီးယားအစီအစဉ်တို့လည်း ပါဝင်မည်ဖြစ်ပြီး တွေ့ဆုံမှုအပြီးတွင် Putin နှင့် Pezeshkian တို့သည် မီဒီယာများနှင့်တွေ့ ဆုံရန် စီစဉ်ထားသည်။

ခေါင်းဆောင်နှစ်ဦးသည် ကုန်သွယ်မှု၊ ရင်းနှီးမြှုပ်နှံမှု၊ ထောက်ပံ့ပို့ဆောင်ရေးနှင့် သယ်ယူပို့ဆောင်ရေးဆိုင်ရာ အခြေခံအဆောက်အအုံများတွင် ပူးပေါင်းဆောင်ရွက်မှုများအတွက် လုပ်ဆောင်ရမည့်နည်းလမ်းများကို ရှာဖွေမည်ဖြစ်ကြောင်း Kremlin က ယခုသီတင်းပတ် အစောပိုင်းတွင် ပြောကြားခဲ့သည်။

ရုရှားနှင့်အီရန်တို့သည် အိန္ဒိယ၊ အီရန်၊ အဇာဘိုင်ဂျန်၊ ရုရှား ဗဟိုအာရှနှင့်ဥရောပတို့အကြား သယ်ယူပို့ဆောင်ရေး ချိတ်ဆက်မှုကို ဖန်တီးရန်ရည်ရွယ်သည့် အဓိကအခြေခံအဆောက်အဦ စီမံကိန်းဖြစ်သော နိုင်ငံတကာ မြောက်-တောင် သယ်ယူပို့ဆောင်ရေးစင်္ကြံ (INSTC)တွင် ပူးပေါင်းဆောင်ရွက်လျက်ရှိသည်။ ၇,၂၀၀ ကီလိုမီတာ ရှည်လျားသော ဘက်စုံသုံးသယ်ယူပို့ဆောင်ရေးစင်္ကြံသည် ကုန်စည်ပို့ဆောင်မှုကို လွယ်ကူချောမွေ့စေရန် သင်္ဘော၊ မီးရထားနှင့် အဝေးပြေး လမ်းများကို ပေါင်းစပ်ထားသည်။ အချို့သော ကျွမ်းကျင်သူများ၏ သုံးသပ်ချက်များအရ ၎င်းစင်္ကြံသည် စူးအက်တူးမြောင်း၏ လုံခြုံရေးကို အထောက်အပံ့ပေးနိုင်ပြီး ကုန်သွယ်စီးဆင်းမှုများအတွက် ခြိမ်းခြောက်နေမှု အန္တရာယ်များမှကာကွယ်ပေးနိုင်မည်ဖြစ်သည်။

မော်စကိုနှင့် တီဟီရန်ကြားဆက်ဆံရေးသည် နှစ်နိုင်ငံစလုံး၏အကျိုးစီးပွားကို ထည့်သွင်းစဉ်းစားကာ အပြန်အလှန်လေးစားမှုအပေါ်အခြေခံ၍ အားကောင်းလာနေကြောင်း ကရင်မလင်နန်းတော်က အလေးပေး ပြောကြားခဲ့သည်။

ကိုးကား-RT

အမေရိကန်သမ္မတ ဂျိုးဘိုင်ဒင် သည် ရာထူးမှဆင်းပြီး ဒေါ်နယ်ထရမ့်အား အာဏာလွှဲပြောင်းပေးရန် ပြင်ဆင်နေချိန်တွင် အလွန်ချမ်းသာသော လူအနည်းငယ်လက်ထဲ၌ အာဏာစုပြုံနေခြင်းကို သတိပေးလိုက်ပါသည်။

ဘိုင်ဒင် က နှုတ်ဆက်မိန့်ခွန်းကို သမ္မတရုံးခန်းမှ ဇန်နဝါရီ ၁၅ ရက်တွင် ပြောကြားခဲ့ပြီး မိန့်ခွန်းအစတွင် ဘိုင်ဒင် က အစ္စရေးနှင့် ဟားမတ်စ်တို့အကြား ရရှိခဲ့သည့် အပစ်အခတ်ရပ်စဲရေးနှင့် ဓားစာခံများလွှတ်ပေးရေး သဘောတူညီချက်သည် ၎င်းဦးဆောင်သောအစိုးရက ၈ လကြာ မရပ်မနားညှိနှိုင်းမှုများအပြီးတွင် ရရှိခဲ့ခြင်းဖြစ်ကြောင်း ပြောပါသည်။

လွန်ခဲ့သော လေးနှစ်အတွင်း ၎င်းဦးဆောင်သော အစိုးရ၏ အောင်မြင်မှုများအပေါ် ပြန်လည်သုံးသပ်ရာ၌ COVID-19 ကပ်ရောဂါအကျပ်အတည်းမှ စီးပွားရေး နာလန်ထူအောင်ဆောင်ရွက်နိုင်ခဲ့ကြောင်း ဘိုင်ဒင် က ပြောခဲ့ပါသည်။

အာဏာလွှဲပြောင်းမှုမတိုင်ခင်တွင် အလွန်စိုးရိမ်ရမည့် အကြောင်းအရာများနှင့်ပတ်သက်၍ ၎င်းအနေဖြင့် ပြည်သူများအား သတိပေးလိုသည်အချက်တစ်ခုအဖြစ်

အလွန်ချမ်းသာသော လူနည်းစုလက်ထဲ၌ အာဏာစုပြုံနေမှုသည် လွန်စွာအန္တရာယ်ရှိကြောင်းနှင့် ၎င်းတို့၏ အာဏာအလွဲသုံးစားမှုလုပ်ရပ်များကို စောင့်ကြည့်မှု မရှိပါက အန္တရာယ်ရှိသောအကျိုးဆက်များ ဖြစ်ပေါ်လာ နိုင်ကြောင်း မစ္စတာဘိုင်ဒင် ကပြောကြားခဲ့ပါသည်။

တန်းတူညီမျှသော အခွင့်အလမ်းများကသာ အမေရိကကို အမေရိက ပီသစေမည်ဖြစ်ကြောင်းပြောကြားခဲ့ကာ အမေရိကန်ပြည်ထောင်စုအနေနှင့် အားလုံးအတွက် တန်းတူညီမျှသည့် အခွင့်အရေးကို ဆက်လက်ထိန်းသိမ်းထား စေလိုကြောင်း ၎င်း၏ဆန္ဒကို ဘိုင်ဒင် က ထုတ်ဖော် ပြောကြားခဲ့ပါသည်။

ကိုးကား-NHK World

ရုရှားသမ္မတ ဗလာဒီမာပူတင် နှင့် အီရန်သမ္မတ Masoud Pezeshkian တို့သည် ဇန်နဝါရီလ ၁၇ ရက်နေ့တွင် ကရင်မလင်နန်းတော်၌ တွေ့ဆုံဆွေးနွေးမည် ဖြစ်ပြီး ဘက်စုံမဟာဗျူဟာမြောက် မိတ်ဖက်ဆက်ဆံရေး သဘောတူညီချက်ကို လက်မှတ်ရေးထိုးကြမည် ဖြစ်ပါသည်။

အစည်းအဝေး၏ အစီအစဉ်သည် ကျယ်ပြန့်မည်ဟု မျှော်လင့်ရပါသည်။ ၎င်းတွင် ကမ္ဘာလုံးဆိုင်ရာနှင့် ဒေသတွင်း အပြန်အလှန် အကျိုးစီးပွားဆိုင်ရာ ပြဿနာများ ပါဝင်မည်ဖြစ်ပြီး ဆီးရီးယားနှင့် ပါလက်စတိုင်း-အစ္စရေး ပဋိပက္ခဇုန်တို့ အပါအဝင်အရှေ့အလယ်ပိုင်းတွင် ဖြစ်ပေါ်တိုးတက်မှုများကို ဆွေးနွေး ကြမည်ဖြစ်ပါသည်။ ထို့အပြင် Transcaucasia ရှိ အခြေအနေနှင့် အီရန်နိုင်ငံ၏ နျူကလီးယား အစီအစဉ် အခြေအနေကိုလည်း ဆွေးနွေးကြမည်ဖြစ်ပါသည်။ 

နှစ်နိုင်ငံဆက်ဆံရေး၏ အဆင့်အသစ်တစ်ခုအဖြစ်ပြင်ဆင်ထားသည့် အဆိုပါသဘောတူညီချက်သည် ရုရှားနှင့်အီရန်နိုင်ငံအကြားဆက်ဆံရေးကို အဆင့်အသစ်တစ်ခုသို့ ရောက်ရှိစေမည်ဖြစ်ပါသည်။

အဆိုပါ ဘက်စုံမဟာဗျူဟာမြောက် သဘောတူညီချက်စာချုပ်သည် ရေရှည်ပူးပေါင်းဆောင်ရွက်မှုများ ပိုမို ဖွံ့ဖြိုးတိုးတက်ရေးအတွက် ဥပဒေမူဘောင်ကိုလည်း ချမှတ်နိုင်မည်ဖြစ်ပါသည်။ သဘောတူစာချုပ်တွင် ကာကွယ်ရေး၊ အကြမ်းဖက်မှု တိုက်ဖျက်ရေး၊ စွမ်းအင်၊ ဘဏ္ဍာရေး၊ လမ်းပန်းဆက်သွယ်ရေး၊ စက်မှုလုပ်ငန်း၊ စိုက်ပျိုးရေး၊ ယဉ်ကျေးမှု၊ သိပ္ပံနှင့် နည်းပညာ အပါအဝင် နယ်ပယ်အားလုံး အကျုံးဝင်မည်ဖြစ်ကြောင်း နှစ်နိုင်ငံ တာဝန်ရှိသူများက ပြောကြားခဲ့ပါသည်။ 

လက်ရှိတွင် ရုရှားနှင့် အီရန်တို့သည် နှစ်နိုင်ငံဆက်ဆံရေး အခြေခံမူများနှင့် ပူးပေါင်းဆောင်ရွက်ရေးမူများကို ၂၀၀၁ ခုနှစ် စာချုပ်ပါ ပြဋ္ဌာန်းချက်များ၊ လမ်းညွှန်ချက်များဖြင့်ဆောင်ရွက်နေပြီး ၎င်းသည် ၁၀ နှစ်ကြာသက်တမ်းရှိခဲ့ပြီး နောက်ထပ်ငါးနှစ်တာ ကာလအတွက် အလိုအလျောက်သက်တမ်းတိုးခဲ့ပါသည်။ဘက်စုံမဟာဗျူဟာမြောက်သဘောတူညီချက်စာချုပ်အသစ်သည် အနှစ် ၂၀ သက်တမ်းရှိမည်ဖြစ်ပါသည်။ 

အီရန်နိုင်ငံရေးသိပ္ပံပညာရှင်နှင့် ရုရှားနိုင်ငံဆိုင်ရာ ထိပ်တန်းကျွမ်းကျင်သူ ပါမောက္ခ Ruhollah Modabber က အဆိုပါသဘောတူညီချက်အသစ်သည် နိုင်ငံများကြား ပူးပေါင်းဆောင်ရွက်မှုကို ချဲ့ထွင်ရုံသာမက အမေရိကန်၏ ပိတ်ဆို့မှုများကိုတွန်းလှန်ရန် အခွင့်အလမ်းများကိုလည်း ပံ့ပိုးပေးမည်ဖြစ်ကြောင်း မှတ်ချက်ပြုခဲ့ပါသည်။ သဘောတူညီချက်အသစ်တွင် တစ်နိုင်ငံနှင့်တစ်နိုင်ငံ နယ်မြေစိုးမိုးရေး လေးစားမှုဆိုင်ရာ ပြဋ္ဌာန်းချက်များလည်းပါရှိပါသည်။ အဆိုပါ သဘောတူညီချက်သည် မော်စကိုနှင့် တီဟီရန်တို့၏ မျှော်မှန်းချက်များနှင့်ကိုက်ညီပြီး အခြားနိုင်ငံများ၏ အကျိုးစီးပွားကို ဆန့်ကျင်ခြင်းမဟုတ်ကြောင်း သိရှိရပါသည်။

ကိုးကား - TASS

Photo: Al Jazeera