ဥရောပကော်မရှင်သည် ရုရှားနိုင်ငံအပေါ် ၁၆ ကြိမ်မြောက် ဒဏ်ခတ်ပိတ်ဆို့မှု အစီအစဉ်ချမှတ်ရန် အဆိုတင်သွင်းထားကြောင်း ထိုအစီအစဉ်တွင် ရုရှား၏ အဓိက အလူမီနီယမ်တင်သွင်းမှုများကို တားမြစ်ပိတ်ပင်ရန် ရည်ရွယ်ထားကြောင်း ဥရောပသတင်းအရင်းအမြစ်များကို ကိုးကား၍ ရိုက်တာသတင်းဌာနက ပြောပြထားပါသည်။ 

၂၀၂၁ ခုနှစ်၊ ဖေဖော်ဝါရီတွင် စတင်ခဲ့သည့် ရုရှား-ယူကရိန်းစစ်ပွဲ သုံးနှစ်ပြည့်မြောက်သည့် အထိမ်းအမှတ်အဖြစ် လာမည့် ဖေဖော်ဝါရီတွင် အဆိုပါ ၁၆ ကြိမ်မြောက် ဒဏ်ခတ်ပိတ်ဆို့မှုအစီအစဉ်ချမှတ်ရန် အီးယူနိုင်ငံများက မျှော်လင့်ထားကြကြောင်း ဖော်ပြထားပါသည်။ 

ဇန်နဝါရီ ၁၄ ရက်နေ့က ဥရောပကော်မရှင်သည် အီးယူနိုင်ငံများနှင့် လာမည့်ပိတ်ဆို့မှုအစီအစဉ်အတွက် အသေးစိတ်ဆွေးနွေးခဲ့ကြကြောင်း သတင်းအရင်းအမြစ်များက ပြောကြားထားကြပြီး သတင်းအရင်းအမြစ်တစ်ခုကမူ ထိုပိတ်ဆို့မှုမှာ ရပ်ဆိုင်းသွားဖွယ်ရှိနေကြောင်း ရိုက်တာက ထပ်လောင်းပြောကြားထားပါသည်။

ကိုးကား- Reuters

Photo: Anadolu Ajansi

UAE ၏ ကြားဝင်စေ့စပ်မှုဖြင့် ရုရှားစစ်သည် ၂၅ ဦးအား ယူကရိန်းကလွှတ်ပေးခဲ့ပြီး ရုရှားကလည်း ယူကရိန်းစစ်သည် ၂၅ ဦးကို ပြန်လည်လွှတ်ပေးခဲ့ကြောင်း ရုရှားကာကွယ်ရေးဝန်ကြီးဌာနက ထုတ်ပြန်ခဲ့သည်။

ယူကရိန်းမှ ဖမ်းဆီးထိန်းသိမ်းခဲ့သော ရုရှားစစ်သည်များကို ဘယ်လာရုစ်နိုင်ငံမှတစ်ဆင့် လွှဲပြောင်းပေးခဲ့ခြင်းဖြစ်ပြီး ၎င်းတို့အား ကျန်းမာရေးစစ်ဆေးပေးခြင်း၊စိတ်ဓာတ်ပိုင်းဆိုင်ရာအားပေးကူညီမှုများအပြင် မိသားစု၊ ချစ်ခင်ရသူများနှင့် ဆက်သွယ်နိုင်စေရန်ဆောင်ရွက်ပေးခဲ့ကြောင်း ရုရှားကာကွယ်ရေးဝန်ကြီးဌာနမှ ထုတ်ပြန်ထားပါသည်။

ဒီဇင်ဘာနှောင်းပိုင်းကလည်း UAE ၏ ကြားဝင်စေ့စပ်ပေးမှုဖြင့် နှစ်ဖက်အကျဉ်းသားလဲလှယ်မှုတွင် ရုရှားစစ်သည် ၁၅၀ နှင့် ယူကရိန်းနိုင်ငံသား ၂၀၀ နီးပါးကို အပြန်အလှန် လွှဲပြောင်းပေးနိုင်ခဲ့ကြောင်း သိရှိရပါသည်။

၂၀၂၄ ခုနှစ်၊ ဒီဇင်ဘာလအတွင်း အပြန်အလှန် အကျဉ်းသားလွှဲပြောင်းပေးမှုအပြီး ယခုအကြိမ်သည် ၂၀၂၅ ခုနှစ်အတွင်း ပထမဆုံးလွှဲပြောင်းပေးမှုဖြစ်သည်။

ကိုးကား-RT

တာလီဘန်တို့မြို့တော် ကဘူးလ်ကို ဩဂုတ်လ ၂၀၂၁ ခုနှစ်တွင် သိမ်းပိုက်ခဲ့စဉ်က "၂၀၀၁ ခုနှစ်မှစ၍ ပထမဆုံးအကြိမ် အာဏာပြန်လည်ရရှိပြီး ကျွန်ဘဝမှ လွတ်မြောက်ခဲ့ပြီ" ဟု ပါကစ္စတန်ဝန်ကြီးချုပ် အီရန်ခန်က ပြောကြားခဲ့ပါသည်။ 

တာလီဘန်များ၏ အာဏာကြီးစိုးမှုသည် ပါကစ္စတန်တို့၏ ဒေသတွင်းအာဏာလွှမ်းမိုးမှုကို တောက်လျှောက်မြှင့်တင်ပေးခဲ့ပါသည်။ ယခုအိန္ဒိယနိုင်ငံခြားရေး အတွင်းဝန်နှင့် တာလီဘန်နိုင်ငံခြားရေးဝန်ကြီးတို့၏ တွေ့ဆုံမှုအပေါ် ပါကစ္စတန်တို့က စိုးရိမ်နေရခြင်းမှာ တာလီဘန်မှတစ်ဆင့် အာဖဂန်နစ္စတန်အပေါ် စစ်ဗျူဟာအရ ထိန်းချုပ်နိုင်မည့် မဟာဗျူဟာအခွင့်အရေးလက်လွတ်သွားမည် စိုးရိမ်သည့်အတွက် ဖြစ်နိုင်ပါသည်။

ယင်းကဲ့သို့ တာလီဘန်နှင့် အိန္ဒိယတို့တွေ့ဆုံမှုသည် တာလီဘန်အပေါ် ပါကစ္စတန်တို့၏ ယုံကြည်မှုကို ကျဆင်းစေသည့်အတွက်  အာဖဂန်နစ္စတန်-ပါကစ္စတန် တို့၏ ဆက်ဆံရေးကို တားဆီးစေမည်လားဆိုသည်ကို ဆက်လက်စောင့်ကြည့်ရမည် ဖြစ်ပါသည်။  "အကယ်၍ အိန္ဒိယ၏ အာဖဂန်နစ္စတန်အပေါ် လွမ်းမိုးမှုသည် ပိုမို ကြီးမားလာပြီး အာဖဂန်နစ္စတန်- ပါကစ္စတန် ဆက်ဆံရေးပျက်ပြားလာပါက ယင်းတိုက်ခိုက်မှုများ၏ဆိုးကျိုးကို ပါကစ္စတန်နယ်နိမိတ်တစ်လျှောက် နေထိုင်နေရသော အာဖဂန်လူမျိုးများက ခံစားရမည်ဖြစ်ပါသည်" ဟု The Khorasan Diary ပူးတွဲတည်ထောင်သူ Iftikhar Firdous က Al jazerra သတင်းဌာနသို့ ပြောကြားထားပါသည်။

ကိုးကား -Aljazerra

ဇန်နဝါရီ ၁၃ ရက်က ဖိလစ်ပိုင်နိုင်ငံတွင်ကြီးမား‌သော လူထုဆန္ဒပြပွဲကြီးတစ်ခုကိုတွေ့မြင်ခဲ့ရပြီး ဒုတိယသမ္မတ ဆာရာဒူတာတေးအပေါ် စွပ်စွဲပြစ်တင်သည့် အမှုများကို မကျေနပ်သည့်အတွက် ဘာသာရေးအရ ဩဇာလွှမ်းမိုးမှုရှိသော ခရစ်ယာန်အဖွဲ့ Iglesia ni Cristo (INC) ၏ အဖွဲ့ဝင် ၁.၈ သန်းနီးပါးက  မြို့တော် မနီလာရှိ သမိုင်းဝင် Quirino Grandstand နှင့် အနီးတစ်ဝိုက်ရှိ လမ်းမများပေါ်တွင် စုဝေးဆန္ဒပြကြခြင်း ဖြစ် သည်။

ဆန္ဒပြပွဲတွင် ပါဝင်သူများမှာ မည်သူမည်ဝါဖြစ်ကြောင်း မသိရသေးသော်လည်း ဖိလစ်ပိုင်နိုင်ငံ၏ အခြားမြို့ ၁၂ မြို့တွင်လည်း ၂.၈ သန်းပါဝင်သောလူအုပ်ကြီးက အလားတူဆန္ဒပြပွဲများ ပြုလုပ်ခဲ့ကြကြောင်းသိရှိရပါသည်။   

ဖိလစ်ပိုင်ဒုသမ္မတ မစ္စဆာရာဒူတာတေးနှင့် သမ္မတ ဖာဒီနန်မားကို့စ်ဂျူနီယာတို့နှစ်ဦးအကြား ဆက်ဆံရေးတင်းမာ‌နေပြီး လက်ရှိဆန္ဒပြပွဲများမှာ မစ္စဒူတာတေးအား ထောက်ခံကြောင်း အင်အားတောင့်တင်းသည့် ခရစ်ယာန်အသင်းတော်က ဦးဆောင်ဆန္ဒပြခြင်းဖြစ်သည်ဟု လေ့လာသူများက ပြောကြားနေကြ ပါသည်။ 

မနီလာတွင်ပြုလုပ်သည့် လူထုဆန္ဒပြပွဲသို့ ဆာရာ ဒူတာတေးကိုယ်တိုင် မတက်ရောက်ခဲ့သော်လည်း ဆန္ဒပြပွဲပြီးဆုံးပြီးနောက် မကြာမီ “ထိုအရာက ကျွန်မတို့ နိုင်ငံအကျိုးစီးပွားအတွက် ငြိမ်းချမ်းရေးလိုလားသူများ၏ စည်းလုံးညီညွတ်မှုနှင့်ပူးပေါင်းမှုကိုဖော်ပြသော ထိရောက်မှုရှိသည့် နည်းလမ်းတစ်ခုဖြစ်ကြောင်း” သူမကိုယ်တိုင်ပြောဆိုထားသည့် ရုပ်သံဗွီဒီယိုတစ်ခုအား သူမ၏ ဖေ့စ်ဘုတ်စာမျက်နှာတွင် ထုတ်လွှင့်ခဲ့ပါသည်။                                                                                                                         

ကိုးကား- The Straits times 

မကြာမီ ရာထူးမှအနားယူတော့မည့် အမေရိကန်သမ္မတ ဂျိုးဘိုင်ဒန်သည် ၎င်းရာထူးမှ အနားမယူမီ ဒေါ်နယ်ထရမ့်၏ ပစ်မှတ်ထားခြင်းခံရဖွယ်ရှိနေသူများ ကို လွတ်ငြိမ်းချမ်းသာခွင့်ပေးရန် စဉ်းစားနေကြောင်း သိရှိရပါသည်။

ဂျိုးဘိုင်ဒန်က ဒေါ်နယ်ထရမ့်သည် ၎င်းသမ္မတ ဖြစ်လာချိန်တွင် ပြိုင်ဘက်နိုင်ငံရေးသမားများကို ဖိနှိပ်ခြင်းများ ပိုမိုလုပ်ဆောင်လာဖွယ်ရှိနေကြောင်းနှင့် လွတ်ငြိမ်း ချမ်းသာခွင့်ပေးရေးကိစ္စအား စဉ်းစားနေဆဲဖြစ်ပြီးအပြီးသတ်ဆုံးဖြတ်ချက် မချရသေးကြောင်း၊ ဒေါ်နယ်ထရမ့်၏ ပြောဆိုချက်များအပေါ်တွင် မူတည် နေကြောင်းပြောပါသည်။

ဂျိုးဘိုင်ဒန်သည် အမေရိကန်သမ္မတရွေးကောက်ပွဲတွင် ဒေါ်နယ်ထရမ့်နှင့်ယှဉ်ပြိုင်ရန် စီစဉ်ခဲ့သော်လည်း ၂၀၂၄ ခုနှစ်၊ ဇူလိုင်လတွင် သမ္မတရွေးကောက်ပွဲမှ နှုတ်ထွက်ခဲ့သည်။ ဒေါ်နယ်ထရမ့်က အမေရိကန်နိုင်ငံသမိုင်းတွင် အကျင့်ပျက်လာဘ်စားမှုအများဆုံးဖြစ်သော လက်ရှိ သမ္မတဂျိုးဘိုင်ဒန်နှင့် ၎င်း၏မိသားစုတစ်ခုလုံးအပြင် ဒုတိယသမ္မတ ကာမီလာဟဲရစ်အပါအဝင် ပြိုင်ဖက်များကို ဖိနှိပ်သွားမည်ဖြစ်ကြောင်း ပြီးခဲ့သည့်ရက်ပိုင်းက ပြောဆိုခဲ့သည်ဟု သိရပါသည်။

သမ္မတရာထူးမှ အနားမယူမီ သားဖြစ်သူ ဟန်တာဘိုင်ဒန်ကို လွတ်ငြိမ်းချမ်းသာခွင့်ပေးခဲ့ခြင်းနှင့်ပတ်သက်ပြီး ဒေါ်နယ်ထရမ့်က လက်ရှိ သမ္မတ ဂျိုးဘိုင်ဒင် ကို လူသိရှင်ကြား ဝေဖန်ခဲ့ပါသည်။

ဒေါ်နယ်ထရမ့်သည် ပထမအကြိမ်သမ္မတ ဖြစ်လာချိန်တွင် သမ္မတဟောင်း ဘားရက်အိုးဘားမားနှင့် ၎င်းကို အပြင်းထန်ဆုံးဝေဖန်သူ ချီနေးတို့ကို စုံစမ်းစစ်ဆေးရန် တောင်းဆိုခဲ့ဖူးကြောင်း သိရှိရပြီး ရွေးကောက်ပွဲ မဲဆွယ်စည်းရုံးချိန်ကာလကလည်း ရွေးကောက်ပွဲလိမ်လည်မှု ကျူးလွန်ခဲ့သူများကို ဖိနှိပ်သွားမည်ဖြစ်ကြောင်း ပြောဆိုခဲ့ဖူးပါသည်။ ဂျိုးဘိုင်ဒန်သည် သမ္မတရာထူးမှ အနားမယူမီ ယူကရိန်းအား စစ်ရေးအကူအညီများ ထပ်မံပေးအပ်ခဲ့ပြီး လွတ်ငြိမ်းချမ်းသာခွင့်ပေးခြင်းများ လည်းရှိခဲ့သည်။

ဂျိုးဘိုင်ဒန်သည် ၎င်း၏လုပ်ပိုင်ခွင့်ဘောင်အတွင်းမှ လွတ်ငြိမ်းချမ်းသာခွင့်ပေးနိုင်ရန် စဉ်းစားနေခြင်းဖြစ်ပြီး လာမည့်ရက်ပိုင်းအတွင်း လွတ်ငြိမ်းချမ်းသာခွင့် အမိန့် ထုတ်ပြန်ခြင်း ရှိ/မရှိ ကို တွေ့မြင်ရဖွယ်ရှိနေပါသည်။

ကိုးကား-NP News

တရုတ်ပြည်သူ့   လွတ်မြောက်ရေးတပ်မတော်မှ ကိုယ်စားလှယ်အဖွဲ့တစ်ဖွဲ့သည်   နှစ်နိုင်ငံကြား  အပြန်အလှန် နားလည်မှုနှင့် ယုံကြည်မှုတိုးမြှင့်ရန်အတွက် ဂျပန်နိုင်ငံသို့ သွားရောက်မည်ဖြစ်ကြောင်း တရုတ်ကာကွယ်ရေးဝန်ကြီးဌာနက ဇန်နဝါရီလ ၁၃ ရက်တွင် ထုတ်ပြန်သည်။

တရုတ်အရှေ့ပိုင်းစစ်နယ်ဝန်းဌာနချုပ်မှ ဦးဆောင်သည့် ကိုယ်စားလှယ်အဖွဲ့သည် ဂျပန်နိုင်ငံသို့ ဇန်နဝါရီလ လလယ်ခန့်တွင် သွားရောက်မည်ဖြစ်ပြီး    ယင်းခရီးစဉ်အတွင်း ဂျပန်ကာကွယ်ရေးဝန်ကြီးဌာနမှ ခေါင်းဆောင်များ၊ ဂျပန်တပ်မတော်ပူးတွဲ စစ်ဦးစီးချုပ်တို့နှင့် တွေ့ဆုံမည်ဖြစ်သည်။

ထို့ပြင် တရုတ်ကိုယ်စားလှယ်အဖွဲ့သည် ယင်းခရီးစဉ်အတွင်း ဂျပန်နိုင်ငံရှိသက်ဆိုင်ရာ တပ်ဖွဲ့များသို့လည်း သွားရောက်လည်ပတ်မည်ဖြစ်သည်။

တရုတ်ကိုယ်စားလှယ်အဖွဲ့၏ အဆိုပါခရီးစဉ်သည် တရုတ်နှင့် ဂျပန်နှစ်နိုင်ငံကြား ကာကွယ်ရေးအရ အပြန်အလှန်ဖလှယ်မှုကို တိုးမြှင့်ရန်ရည်ရွယ်ခြင်း ဖြစ်ကြောင်း သိရသည်။

တရုတ်ပြည်သူ့   လွတ်မြောက်ရေး တပ်မတော် အရှေ့ပိုင်းစစ်နယ်ဝန်း ဌာနချုပ်သည် အဓိကအားဖြင့် အရှေ့တရုတ် ပင်လယ်၊ တရုတ်နိုင်ငံအရှေ့ပိုင်းနှင့်   ထိုင်ဝမ်ရေလက်ကြားတို့၏ လုံခြုံရေးဆိုင်ရာ ကိစ္စရပ်များကို ကြီးကြပ်ကွပ်ကဲသည့် ဌာနချုပ်ဖြစ်ကြောင်း သိရသည်။

Source: Myawady Web Portal

အမေရိကန်ပြည်ထောင်စု ကယ်လီဖိုးနီးယားပြည်နယ် တောမီးလောင်ကျွမ်းနေမှုကို ငြှိမ်းသတ်နိုင်ရန် ရာနှင့်ချီသည့်အကျဉ်းသားများကို စည်းရုံးခဲ့သည့် သတင်းများအပေါ် အမေရိကန်၏ ကြောင်သူတော်လုပ်ရပ်ဖြစ်ကြောင်းရုရှားနိုင်ငံခြားရေးဝန်ကြီးဌာန ပြောခွင့်ရသူ Maria Zakharova က မှတ်ချက်ပြုပြောကြားလိုက်သည်။ 

တောမီးလောင်ကျွမ်းမှုငြှိမ်းသတ်နိုင်ရေး အကျဉ်းသား ၃၉၅ ဦး စေလွှတ်ခဲ့ကြောင်း၊ ထိုအကျဉ်းသားများအနက်အများစုမှာ အသေးအမွှားပြစ်မှု ကျူးလွန်ခဲ့သူများ ဖြစ်ကြောင်း ကယ်လီဖိုးနီးယားပြည်နယ် ပြုပြင်ရေးနှင့် ပြန်လည်ထူထောင်ရေးဌာနကို ကိုးကား၍ ဝါရှင်တန် ပို့စ်က ဖော်ပြထားပါသည်။

အမေရိကန်သည် မကြာသေးမီနှစ်များအတွက် ရှင်ကျန်း ဝီဂါကိုယ်ပိုင်အုပ်ချုပ်ခွင့်ရဒေသတွင် အကျဉ်းသားများအား အဓမ္မလုပ်အားပေးစေခိုင်းမှုကြောင့် တရုတ်နိုင်ငံကို အကြိမ်ကြိမ်ဝေဖန်ထောက်ပြဖူးကြောင်း၊ ယခု ကယ်လီဖိုးနီးယားအာဏာပိုင်များက တောမီးလောင်မှုကို ငြှိမ်းသတ်ပေးရန် အကျဉ်းသားများကို စေခိုင်းမှုအတွက် ဒဏ်ခတ်အရေးယူရန် ဉပဒေကြမ်းကို ကွန်ဂရက် က ရေးဆွဲထားခြင်းရှိ၊ မရှိ သိချင်ပါကြောင်း သူမ၏ Telegram ချန်နယ်တွင် ပြောကြားလိုက်ပါသည်။

အမေရိကန်နိုင်ငံ၊ ကယ်လီဖိုးနီးယားပြည်နယ် လော့စ်အိန်ဂျလိစ် တောမီးသည် ဇန်နဝါရီ ၇ ရက်တွင် စတင်လောင်ကျွမ်းပျံ့နှံ့ခဲ့ပြီး ခြောက်သွေ့ပြီး လေထန်သော ရာသီဥတုကြောင့် တောမီးလျင်မြန်စွာ ကူးစက်ခဲ့ရာ ဒေသခံ ၁၈၀,၀၀၀ နီးပါး ဘေးလွတ်ရာသို့ ရွှေ့ပြောင်းပေးရန် သတိပေးထုတ်ပြန်ခဲ့ရသည်။ တောမီးလောင်မှုကြောင့် ဒေသအတွင်း နေအိမ်အဆောက်အအုံ ၁၂,၃၀၀ ကျော် ပျက်စီးခဲ့ပြီး အမေရိကန်ဒေါ်လာ ဘီလီယံချီ ဆုံးရှုံးခဲ့ကြောင်း သိရပါသည်။

ကိုးကား-TASS

သမ္မတ ဒေါ်နယ်ထရမ့်လက်အောက်တွင် အမေရိကန်အစိုးရသစ်မှ အစိုးရအဖွဲ့ စတင်ဖွဲ့စည်းတာဝန်ပေးအပ်ပြီးနောက် လာမည့်သီတင်းပတ်တွင် အမေရိကန်၊သြစတြေးလျ၊ အိန္ဒိယတို့နှင့် Quad နိုင်ငံခြားရေးဝန်ကြီးများ အစည်းအဝေးကျင်းပနိုင်ရန် ဂျပန်အစိုးရက စီစဉ်နေကြောင်း သိရှိရသည်။

ဂျပန်နိုင်ငံခြားရေးဝန်ကြီး Iwaya Takeshi က NHK ၏ ဆွေးနွေးပွဲ အစီအစဉ်တစ်ခုတွင် ၎င်းသည် ဇန်နဝါရီ ၂၀ ရက်တွင် ထရမ့်အစိုးရ၏ ကျမ်းသစ္စာကျိန်ဆိုပွဲ အခမ်းအနားသို့ တက်ရောက်မည်ဖြစ်ကြောင်း ထုတ်ဖော်ပြောဆိုခဲ့ပါသည်။

မစ္စတာ Iwaya ၏ အမေရိကန်ခရီးစဉ်နှင့်တိုက်ဆိုင်ပြီး ဂျပန်တာဝန်ရှိသူများသည် Quad မူဘောင်ဆိုင်ရာ နိုင်ငံခြားရေးဝန်ကြီးများ၏ အစည်းအဝေးကျင်းပနိုင်ရန် စီစဉ်နေကြောင်း သတင်းရင်းမြစ်များကဆိုပါသည်။

လွတ်လပ်၍ပွင့်လင်းသော အင်ဒို-ပစိဖိတ်ဒေသ အကောင်အထည်ဖော်ရေး ၄ နိုင်ငံအကြား ပူးပေါင်းဆောင်ရွက်မှုကို ဆက်လက်ထိန်းသိမ်းထားရန်နှင့် ခိုင်မာအားကောင်းရန် အရေးကြီးကြောင်း အမေရိကန်အစိုးရသစ်နှင့် အတည်ပြုနိုင်ရေး ဂျပန်က မျှော်လင့်ထားကြောင်း သိရသည်။

မစ္စတာ Iwaya နှင့် အမေရိကန်နိုင်ငံခြားရေးဝန်ကြီးတို့ အကြား တွေ့ဆုံရေးကိုလည်း ဂျပန်အစိုးရက စီစဉ်လျက်ရှိသည်။

နိုင်ငံခြားရေးဝန်ကြီးများသည် မဟာမိတ်ဆက်ဆံရေး ပိုမိုနက်ရှိုင်းစေရေး၊ ဂျပန်နှင့် အမေရိကန်ကြား ယုံကြည်မှုရှိသည့်ဆက်ဆံရေးကို တည်ဆောက်ရေး ကြိုးပမ်းဖွယ်ရာရှိသည်။

နှစ်နိုင်ငံခေါင်းဆောင်များအကြား ထိပ်သီးဆွေးနွေးပွဲတစ်ရပ်ကို ဆောလျင်စွာကျင်းပနိုင်ရေး စီစဉ်နိုင်ရန်လည်း ဂျပန်ကမျှော်လင့်ထားပါသည်။

ဝန်ကြီးအဖွဲ့အတည်ပြုရေးအတွက် အမေရိကန်အထက်လွှတ်တော်၏ လုပ်ဆောင်မှုများကို စောင့်ကြည့်ကာ အဆိုပါကိစ္စနှင့်ပတ်သက်၍ အပြီးသတ် ဆုံးဖြတ်ချက်ချရန် ဂျပန်အစိုးရက စီစဉ်ထားပါသည်။

ထရမ့် က Marco Rubio အား အမေရိကန် နိုင်ငံခြားရေးဝန်ကြီးရာထူးအတွက် ရွေးချယ်ထားကြောင်း သိရှိရပါသည်။

ကိုးကား-NHK World

ဆီးရီးယားပြည်သူများအပေါ် စစ်ရာဇဝတ်မှုများ ကျူးလွန်ခဲ့သည့် အာဆတ်အစိုးရအဖွဲ့ဝင်များကို အရေးယူပိတ်ဆို့မှုများ ဆက်လက်ပြုလုပ်သွားကြရန်နှင့် ပြည်သူများအပေါ် လူသားချင်းစာနာထောက်ထားမှုအကူအညီပေးရေးကို မထိခိုက်စေသည့် ဒဏ်ခတ် ပိတ်ဆို့မှုများကိုသာ ပြုလုပ်သွားကြရန်  ဇန်နဝါရီ ၁၂ ရက်နေ့က ဆော်ဒီအာရေဗျနိုင်ငံ၊ ရီးယာဒ်မြို့တွင် ဆီးရီးယားနိုင်ငံ အရေးဆွေးနွေးကြသည့် အစည်းအဝေး၌ ဂျာမနီနိုင်ငံခြားရေးဝန်ကြီး Annalena Baerbock က တက်ရောက်လာသူ ဥရောပနှင့်အရှေ့အလယ်ပိုင်းနိုင်ငံများမှ ထိပ်တန်းသံတမန်များအား အဆိုပြုပြောကြား လိုက်ပါသည်။ 

ဂျာမနီသည် ပြည်သူများအပေါ် စစ်ရာဇဝတ်မှုများ ကျူးလွန်ခဲ့သည့် အာဆတ်အစိုးရ အဖွဲ့ဝင်များကို ပိတ်ဆို့အရေးယူမှုများ ချမှတ်ဆောင်ရွက်ခဲ့သည့် နိုင်ငံ များတွင် ပါဝင်သော နိုင်ငံတစ်နိုင်ငံလည်းဖြစ်သည်။ 

၁၄ နှစ်ကြာ ဖြစ်ပွားခဲ့သည့် ပြည်တွင်းစစ်ကြောင့် ခန့်မှန်းခြေလူဦးရေ ၅ သိန်းခန့် သေဆုံးခဲ့ရပြီး၊ အဆိုပါ ပြည်တွင်းစစ်နှင့် ပြည်ပနိုင်ငံများ၏ ကာလရှည်ကြာ ဒဏ်ခတ်ပိတ်ဆို့မှုများကြောင့် ဆီးရီးယားနိုင်ငံ ပြန်လည်ထူထောင်ရေးလုပ်ငန်းများကို အဟန့်အတားဖြစ်စေနိုင်ပြီး နိုင်ငံလူဦးရေ ၂၃ သန်းခန့်၏ တစ်ဝက်ခန့်မှာလည်း အိုးမဲ့အိမ်မဲ့ဖြစ်လာနိုင်ဖွယ်ရှိကြောင်း၊ လက်ရှိ ဆီးရီးယားနိုင်ငံ အာဏာအလွှဲအပြောင်းဖြစ်စဉ်မှ ဆီးရီးယားပြည်သူများအတွက် ရလဒ်ကောင်းများ အလျင်အမြန်ရရှိရန် လိုအပ်နေကြောင်း သူမက ပြောကြားလိုက်ပါသည်။

ကိုးကား- ABC

Facekook ၊ Instagram၊ WhatsApp နဲ့ Threads Social Media များ၏ မိခင်ကုမ္ပဏီ Meta ၏ ပိုင်ရှင်ဖြစ်သူ မက်ခ်ဇူကာဘတ်ကို အမေရိကန်သမ္မတ ဂျိုးဘိုင်ဒန်က စိတ်ပျက်ရကြောင်း ပြောဆိုလိုက်ပါသည်။ ဆိုရှယ်မီဒီယာများမှ ပြောဆိုမှုများကို အစိုးရပိုင်းအေဂျင်စီများက စောင့်ကြည့်ခြင်း၊ထိုးဖောက်ဝင်ရောက်ကြည့်ရှု့ခြင်းများ ပြုလုပ်နေခြင်းနှင့်ပတ်သက်၍ ဇူကာဘတ်က မဖြစ်သင့်ကြောင်း လူသိရှင်ကြား ပြောဆိုလာမှုအပေါ် သမ္မတဘိုင်ဒန်က ဇူကာဘတ်သည် အမေရိကန်၏ စံနှုန်းများနှင့်မကိုက်ညီကြောင်း ဇန်နဝါရီ ၁၂ ရက်နေ့ တွင် ပြုလုပ်သည့် အိမ်ဖြူတော်သတင်းစာရှင်းလင်းပွဲ၌ ပြောဆိုသွားပါသည်။ 

ဇူကာဘတ်က သတင်းအချက်အလက်များကို ပိုမိုလုံခြုံ စေရန်အတွက် ကြိုးစားနေကြောင်း ထုတ်ဖော်ပြောဆိုသွားပါသည်။ 

ဘိုင်ဒန်က ဇူကာဘတ်သည် လူပြိန်းကြိုက်စကားများကို ပြောဆိုခဲ့ကြောင်းနှင့် အမေရိကန် လျှောက်လှမ်းနေသည့် လမ်းကြောင်းကို ဆန့်ကျင်လိုက်ခြင်းဖြစ်ကြောင်း ပြောဆိုခဲ့သည်။ 

ဇူကာဘတ်က အစပိုင်းတွင် အချက်အလက်များအား စစ်ဆေးခြင်းနှင့်စသော်လည်း နောက်ပိုင်းတွင် အယူအဆမတူညီသောသူများ၊ မတူညီသောလှုပ်ရှားမှုများကို ပိတ်ချခြင်းများ ပိုမိုလုပ်ဆောင်လာခြင်းကြောင့် မူလရည်ရွယ်ချက်ဖြစ်သည့် စောင့်ကြည့်ခြင်းဆိုသည့် သဘောတရားနှင့် သိသာစွာကွဲပြားလာကြောင်း ပြောသည်။

ယခုတွင် Meta သည် အီလွန်မက်စ်၏ X Media တွင် အသုံးပြုသည့် လုံခြုံရေးစနစ်များကို ထည့်သွင်းရန် လုပ်ဆောင်နေပြီး မတူကွဲပြားမှုများ၊ သာတူညီမျှမှုများ ပါဝင်သည့် အစီအစဉ်အသစ်ကို စတင်လုပ်ဆောင်နေကြောင်းနှင့် ဆိုရှယ်မီဒီယာသုံးစွဲသူများ၏ လိင်၊လူမျိုးပိုင်းဆိုင်ရာ ကွဲပြားမှုနှင့်ပတ်သက်၍ နောက်ခံသမိုင်းဆိုင်ရာ အချက်အလက်များကိုလည်း လျှော့ချပေးသွားမည်ဟု ဖော်ပြထားပါသည်။ 

ကိုးကား-Myanmar National Post