ဥရောပသမဂ္ဂအဖွဲ့ဝင်နိုင်ငံများမှ နိုင်ငံခြားရေးဝန်ကြီးများသည် ဇန်နဝါရီ ၃၁ ရက်တွင် သက်တမ်းကုန်ဆုံးမည့် ရုရှားအပေါ် ပိတ်ဆို့အရေးယူမှုများကို နောက်ထပ် ၆ လ သက်တမ်းတိုးရန် သဘောတူညီခဲ့ ကြောင်း ဥရောပသမဂ္ဂအဖွဲ့ဝင် နိုင်ငံတစ်နိုင်ငံ၏ ကိုယ်စားလှယ်အဖွဲ့မှ TASS သို့ ပြောကြားခဲ့သည်။

ဥရောပသမဂ္ဂအဖွဲ့ဝင် နိုင်ငံခြားရေးဝန်ကြီးများအနေဖြင့် အဆိုပါပိတ်ဆို့အရေးယူမှုကို ထပ်မံသက်တမ်းတိုးလိုက်ကြပါကြောင်း နိုင်ငံခြားရေးဝန်ကြီးဌာန အဆင့်မြင့် ကိုယ်စားလှယ် Kaja Kallas က နောက်ပိုင်းတွင် ၎င်း၏ X လူမှုကွန်ရက်တွင် ရေးသားဖော်ပြထားပါသည်။

ဟန်ဂေရီသည် ရုရှားအပေါ် ဒဏ်ခတ်ပိတ်ဆို့မှု သက်တမ်းတိုးရန် မဲခွဲမဆုံးဖြတ်မီ ဥရောပသမဂ္ဂထံမှ တောင်းဆိုထားသည့် စွမ်းအင်လုံခြုံရေးဆိုင်ရာအာမခံချက်ကို ရရှိထားပြီးဖြစ်သော်လည်း ရုရှားအပေါ် ဒဏ်ခတ်ပိတ်ဆို့မှုအား သက်တမ်းတိုးရန်ဆုံးဖြတ်ချက်ကို ဟန်ဂေရီက ပိတ်ပင်ခဲ့ကြောင်း ဟန်ဂေရီ နိုင်ငံခြားရေးဝန်ကြီး Peter Szijjarto က ပြောကြားထားပါသည်။

ကိုးကား-TASS

ယူကရိန်းနိုင်ငံအနေဖြင့် အီးယူအဖွဲ့သို့ ဝင်ရောက်နိုင်ရေးကြိုးပမ်းမှုသည် အောင်မြင်မှုမရှိဘဲ နေတိုးအဖွဲ့ဝင်နိုင်ငံလည်း ဖြစ်လာနိုင်ဖွယ်မရှိကြောင်း ဆလိုဗက်ကီးယားဝန်ကြီးချုပ် ရောဘတ်ဖီကိုက ပြောကြားလိုက်သည်။

နိုင်ငံရေးသမားအချို့၏  မကြာမီကပြောဆိုချက်များအရ ယူကရိန်းက အီးယူအဖွဲ့ဝင် နိုင်ငံဖြစ်လာရေး ကြိုးပမ်းမှုသည် ပြဿနာအများအပြားနှင့် ရင်ဆိုင်ရနိုင်ဖွယ်ရှိပြီး ယူကရိန်းအစိုးရက နေတိုးအဖွဲ့သို့ ဝင်ရောက်နိုင်ရေးကြိုးပမ်းမှုသည် လက်ရှိဆက်လက်ဖြစ်ပွားနေသည့် ယူကရိန်း ပဋိပက္ခ၏ အခြေခံအကြောင်းရင်းဖြစ်ကြောင်း ဖီကိုက ဇန်နဝါရီလ  ၂၅   ရက်တွင် ကျင်းပသည့် ဆွေးနွေးပွဲတစ်ခု၌ ပြောကြားခြင်းဖြစ်သည်။

ထို့ပြင် ယူကရိန်းက ရုရှားနှင့်  အပစ်အခတ်ရပ်စဲရေးဆွေးနွေးမှုအပေါ် ကန့်ကွက်နေခြင်းသည်   ပဋိပက္ခကို ပိုမိုကြာမြင့်စေကြောင်း  ဖီကိုက ပြောကြားထားပြီး ယူကရိန်းအစိုးရ၏ မူဝါဒများအပေါ် ၎င်းကပြစ်တင်ဝေဖန်ထားသည်။ ထို့ပြင် အနောက်နိုင်ငံများသည် ယူကရိန်းကိုအသုံးချ၍ ရုရှားနိုင်ငံအား အားနည်းစေရန်ကြိုးပမ်းလျက်ရှိသည်ဟု ၎င်းကစွပ်စွဲထားသည်။

လက်ရှိဖြစ်ပွားနေသည့် ပဋိပက္ခတွင် ရုရှားက အရှုံးပေးမည်မဟုတ်ဘဲ နောက်ဆုံးတွင် ယူကရိန်းကသာ အနောက်နိုင်ငံများ၏ အလျှော့ပေးရေးဖိအားပေးမှုကြောင့် အရှုံးပေးရမည်ဖြစ်ကြောင်း ဖီကိုကဆက်လက်ပြောကြားသည်။                    

Source: Myawady Web Portal

အကြီးစားဗုံးများ အစ္စရေးသို့ပေးပို့ခြင်းနှင့်ပတ်သက်၍ ယခင်သမ္မတ ဂျိုးဘိုင်ဒင် ပိတ်ပင်ထားသည့် အမိန့်ကို ဖယ်ရှားရန်အမိန့်ပေးလိုက်ကြောင်း အမေရိကန် သမ္မတ ဒေါ်နယ်ထရမ့် က ပြောကြားလိုက်သည်။

ဇန်နဝါရီ ၂၆ ရက်နေ့က အနောက်ပိုင်း နီဗားဒါးပြည်နယ်မှ ဖလော်ရီဒါခရီးစဉ်တွင် ထရမ့်က သတင်းထောက်များ၏ မေးခွန်းများအား ပြန်လည်ဖြေကြားစဉ်၌ ပြောကြားခဲ့ခြင်းဖြစ်သည်။

ဂါဇာ၌ အရပ်သားသေဆုံးမှုများ တိုးလာနေသည့်အကြား အဆိုပါဒေသမှ လူနေထူထပ်သော ဧရိယာများတွင် အကြီးစားဗုံးများအသုံးပြုမှုအပေါ် စိုးရိမ်မှုများကြောင့် အကြီးစားဗုံးများ အစ္စရေးသို့ တင်ပို့ရောင်းချခြင်းအား ယခင်နှစ် မေလတွင် ဘိုင်ဒင်က ရပ်ဆိုင်းခဲ့သည် ဟု ABC ရုပ်မြင်သံကြားနှင့် အခြားသတင်းရင်းမြစ်များ ကဆိုပါသည်။

ဇန်နဝါရီ ၂၆ ရက်နေ့တွင် ထရမ့်သည် အစ္စရေးက မှာကြားငွေပေးချေခဲ့ပြီး ဘိုင်ဒင်က မပေးပို့သေးသည့်အရာများအား ယခုအခါတွင် ပေးပို့ရန် အသင့်ဖြစ်နေပြီဖြစ်ကြောင်း လူမှုကွန်ယက်မီဒီယာတွင် ရေးသားခဲ့ပါသည်။

အမေရိကတွင် ဆိုင်းငံ့ထားသော MK-84 ဗုံးအလုံးရေ ၁,၈၀၀ အား လာမည့်ရက်များ၌ အစ္စရေးသို့ ပို့ဆောင်မည်ဖြစ်သည်ဟု အမေရိကန်သတင်းဝက်ဆိုက် Axios က ဖော်ပြခဲ့ပါသည်။

ထိုအတောအတွင်း အမေရိကန်သမ္မတသည် ဂျော်ဒန်ဘုရင် Abdullah နှင့် တယ်လီဖုန်းပြောဆိုခဲ့ကြောင်း အိမ်ဖြူတော်က ဇန်နဝါရီ ၂၅ ရက်နေ့တွင် ကြေညာ ခဲ့ပါသည်။

Air Force One ပေါ်တွင် သတင်းထောက်များနှင့် စကားပြောဆိုမှုအတွင်း ထရမ့် က အလွန်ရှုပ်ထွေးသောနေရာဟု ၎င်းကရည်ညွှန်းခဲ့သည့် ဂါဇာကမ်းမြောင်ဒေသမှ ပြည်သူများအား ပိုမိုလက်ခံရန် ဂျော်ဒန်နိုင်ငံကို ၎င်းကတောင်းဆိုခဲ့ကြောင်း ပြောခဲ့ပါသည်။

အီဂျစ်အနေဖြင့် ဂါဇာကမ်းမြောင်ဒေသမှ ဒုက္ခသည်များကို နေရာပေးစေလိုကြောင်း ထရမ့်ကပြောခဲ့ပြီး ဇန်နဝါရီ ၂၆ ရက်နေ့တွင် အီဂျစ်သမ္မတ Abdel Fattah el-Sisi နှင့် တယ်လီဖုန်းဆက်သွယ် စကားပြောမည်ဟုလည်း ဆက်လက်ပြောကြားခဲ့ပါသည်။

ထရမ့်က ဂါဇာကမ်းမြောင်ဒေသသည် ရာစုနှစ်များစွာ ပဋိပက္ခအမြောက်အမြားကို ကြံ့ကြံ့ခံရင်ဆိုင်နေရကြောင်းပြောဆိုခဲ့ပြီး ဂါဇာကို လူအများအပြားသေကြေပျက်စီးရသည့် နေရာတစ်ခုအဖြစ် ရည်ညွှန်းပြောဆိုခဲ့ပါသည်။

ထရမ့်အနေဖြင့် အာရပ်နိုင်ငံအချို့နှင့် လက်တွဲရန် ဆန္ဒရှိနေပြီး ဂါဇာဒုက္ခသည်များ ငြိမ်းငြိမ်းချမ်းချမ်း နေထိုင်နိုင်မည်ဟု ၎င်းယူဆသည့် အခြားနေရာတစ်ခု၌ အိမ်ရာများ ဆောက်လုပ်လိုကြောင်းပြောကြားခဲ့ပါသည်။

အဆိုပါအိမ်ရာများသည် ယာယီ/ ရေရှည် ဖြစ်နိုင်ခြင်းနှင့်ဆက်စပ်သော မေးခွန်းကို ထရမ့်က နှစ်မျိုးလုံးဖြစ်နိုင်သည်ဟု ဖြေကြားခဲ့ပါသည်။

ကိုးကား-NHK World

ဒေသတွင်း နေတိုးအဖွဲ့၏ လှုပ်ရှားမှုများ တိုးလာနေချိန်၌ ရုရှားနိုင်ငံသည် ဘောလ်တစ်ပင်လယ်တွင် ၎င်း၏အကျိုးစီးပွားကိုကာကွယ်ရန် လိုအပ်သည့် အရာအားလုံးကို လုပ်ဆောင်သွားမည်ဖြစ်ကြောင်း ဒုတိယနိုင်ငံခြားရေးဝန်ကြီး အလက်ဆန်ကာဂရက်ရှ်ကို က ပြောကြားခဲ့သည်။ 

နေတိုးက Baltic Sentry မစ်ရှင်ပြုလုပ်မည်ဟု ဇန်နဝါရီလလယ်က ကြေညာခဲ့ပါသည်။ ယမန်နှစ်က ရေအောက်ကေဘယ်ကြိုးများ ပျက်စီးသွားပြီးနောက် နေတိုးက ဘောလ်တစ်ပင်လယ်ပြင်တွင် ကင်းလှည့်ရန် ရည်ရွယ်ထားကြောင်း ထုတ်ပြန်ခဲ့သည်။ အမေရိကန် ဦးဆောင်သော စစ်ဘက်အစုအဖွဲ့က ဘောလ်တစ်ပင်လယ်ကို ၎င်းတို့၏ စိုးမိုးမှုပိုင်နက်အဖြစ် ပြောင်းလဲရန်အိပ်မက်သည် အကောင်အထည်ပေါ်မည်မဟုတ်ကြောင်းနှင့် ရုရှားက အဆိုပါလုပ်ရပ်ကို ခွင့်ပြုမည်မဟုတ်ကြောင်း ဂရက်ရှ်ကို က ရုရှား 24 TV မှ ဇန်နဝါရီ ၂၄ ရက်နေ့တွင် ပြောဆိုခဲ့ပါသည်။ 

ဘောလ်တစ်ပင်လယ်ဒေသရှိ ၎င်းတို့၏ အကျိုးစီးပွားများကို စိတ်ချယုံကြည်စွာ အကာအကွယ်ပေးနိုင်ရန် လိုအပ်သည့်အရာအားလုံးကို လုပ်ဆောင်သွားမည်ဖြစ်ကြောင်း ၎င်းကဆိုပါသည်။ ရုရှား၏ တိကျသော တန်ပြန်အရေးယူမှုများနှင့်ပတ်သက်၍ နေတိုးနှင့်ဒေသတွင်းရှိ ၎င်း၏ အဖွဲ့ဝင်တစ်နိုင်ငံချင်းစီ၏လုပ်ဆောင်ချက်များကို အခြေခံ၍ ဆုံးဖြတ်မည်ဖြစ်ကြောင်း ၎င်းကဆိုပါသည်။ 

ရုရှား၏ ခန့်မှန်းချက်အရ ဘောလ်တစ် ကင်းထောက်မစ်ရှင်တွင် ခန့်မှန်းခြေရေယာဉ် ၁၀ စီးနှင့် ဧရိယာအား ထိန်းချုပ်နိုင်မည်ဟုသိရှိရပြီး နေတိုးအဖွဲ့၏ ဘောလ်တစ်မစ်ရှင်ကို အနီးကပ်စောင့်ကြည့်သွားမည်ဟုဆိုပါသည်။ နေတိုးအဖွဲ့၏ နောက်ဆက်တွဲပြောဆိုမှုများကိုလည်း ဆက်လက်စောင့်ကြည့်မည်ဖြစ်ပြီး ဘောလ်တစ်ပင်လယ်သည် ပူးပေါင်းဆောင်ရွက်မှုပင်လယ်၊ အပြန်အလှန်ဖလှယ်ရေးပင်လယ်၊ ရာစုနှစ်များကြာအောင် ပြေးဆွဲခဲ့သည့် သင်္ဘောလမ်းကြောင်းများမှတစ်ဆင့် ကုန်သွယ်မှုပြုသည့်ပင်လယ်သာဖြစ်ရမည်ဟု ဂရက်ရှ်ကို ကအလေးပေးပြောကြားသွားပါသည်။ 

ရုရှားလုံခြုံရေးကောင်စီ၏ အကြီးအကဲဟောင်း နီကိုလေး ပါထရူရှေ့ဗ်က အနောက်နိုင်ငံများသည် ဘောလ်တစ်ပင်လယ်ကို ၎င်းတို့အပိုင်ပင်လယ် အဖြစ်ဆောင်ရွက်နေပြီး ဆွီဒင်နှင့်ဖင်လန်တို့သည် နေတိုးအဖွဲ့သို့ ဝင်ရောက်ပြီး ဘောလ်တစ်ကို ၎င်းတို့ပိုင်နက်ဖြစ်ရန်လုပ်ဆောင်နေသည်ဟု ပြောကြားခဲ့ပါသည်။ 

ကိုးကား-Myanmar National Post

သမ္မတဟောင်း ဂျိုးဘိုင်ဒင်လက်ထက်၌ ချမှတ်ထားသော ဟန်ဂေရီအပေါ် ပိတ်ဆို့အရေးယူမှုများကို ပြန်လည်သုံးသပ်ရန် အမေရိကန်က ကတိပြုထားသည်ဟု ဟန်ဂေရီနိုင်ငံခြားရေးဝန်ကြီး Peter Szijjarto က ဇန်နဝါရီ ၂၆ ရက်နေ့တွင် ပြောကြားခဲ့သည်။ အမေရိကန်နိုင်ငံခြားရေးဝန်ကြီး Marco Rubio နှင့် ဖုန်းပြောဆိုမှုအပြီးတွင် ဝါရှင်တန်သည် Budapest နှင့် ဆက်ဆံရေးပြန်လည်တည်ဆောက်ရန် ကတိပြုထားကြောင်း Szijjarto က ပြောကြားခဲ့သည်။

အမေရိကန်သမ္မတ ဒေါ်နယ်ထရမ့်နှင့်၎င်း၏ မူဝါဒများသည် အလွန်အရေးကြီးသောကိစ္စရပ်များတွင် ဟန်ဂေရီနှင့် ရပ်တည်ချက်တူညီကြသည့်အတွက် ဝမ်းမြောက်မိကြောင်း Szijjarto က ပြောကြားခဲ့သည်။

Biden ၏ မူဝါဒများအရ ဟန်ဂေရီနိုင်ငံအပေါ် ကန့်သတ်ချက်များစွာချမှတ်ခဲ့ပြီး နှစ်နိုင်ငံအခွန်သဘောတူညီချက်ကိုရပ်ဆိုင်းကာ ဟန်ဂေရီနိုင်ငံသားများအတွက် တင်းကျပ်သည့် ဝင်ခွင့်စည်းမျဉ်းများကိုလည်း ချမှတ်ခဲ့သည်။ Budapest က အဆိုပါ လုပ်ရပ်များသည် ရုရှားနှင့်တရုတ်နိုင်ငံတို့နှင့် ဆက်ဆံရေး  အားနည်းစေရန် နိုင်ငံအား ဖိအားပေးရန်ကြိုးပမ်းမှုဟု မှတ်ယူသည်။ ပြီးခဲ့သည့် ဒီဇင်ဘာလတွင် အမေရိကန်သည် အကျင့်ပျက်ခြစားမှုစွပ်စွဲချက်ဖြင့် ဟန်ဂေရီ ဝန်ကြီးချုပ် Viktor Orban ၏ ဝန်ထမ်းအကြီးအကဲ Antal Rogan ကို ဒဏ်ခတ်အရေးယူခဲ့သည်။ Szijjarto က Rubio နှင့် ၎င်း၏ စကားပြောဆိုမှုသည် အလွန် ကောင်းမွန်ကြောင်း ဖော်ပြခဲ့ပြီး ၎င်း၏ မျှော်လင့်ချက်မှာလာမည့်နှစ်များတွင် ဟန်ဂေရီ-အမေရိကန် နိုင်ငံရေးဆက်ဆံမှုတွင် ရွှေခေတ်သစ်ကို ယူဆောင်လာမည်ဟု မျှော်လင့်ပါကြောင်း ဆိုထားသည်။ ဟန်ဂေရီဝန်ကြီးချုပ် Orban က ရုရှားအပေါ် EU ၏ ဒဏ်ခတ်ပိတ်ဆို့မှုများကို ပြန်လည်သုံးသပ်ရန် တောင်းဆိုထားပြီး ၎င်းက EU နှင့် US ၏မူဝါဒများကိုပြောင်းလဲရန်နှင့် ရုရှားနှင့် ပိတ်ဆို့မှုကင်းသော ဆက်ဆံရေးထူထောင်ရန်ကိုလည်း အကြံပြုထားသည်။ 

ဟန်ဂေရီသံတမန်များသည် အီးယူဆွေးနွေးပွဲအတွင်း ကိယက်ဗ်သည် ရုရှားဓာတ်ငွေ့လုပ်ငန်းစုကြီး Gazprom နှင့် စာချုပ်သက်တမ်းမတိုးခဲ့ခြင်းကြောင့် EU ၏ စွမ်းအင်ကဏ္ဍပြဿနာကို ကိုင်တွယ်ဖြေရှင်းရန် လိုအပ်ကြောင်း အလေးပေးပြောကြားခဲ့သည်။

ဥရောပသမဂ္ဂသည် မော်စကို၏စစ်ရေးဆိုင်ရာ ငွေကြေးထောက်ပံ့နိုင်မှုအား ကန့်သတ်ရန်ရည်ရွယ်ပြီး ၂၀၂၂ ခုနှစ်၊ ဖေဖော်ဝါရီလတွင် ယူကရိန်းပဋိပက္ခ ပြင်းထန်လာပြီးနောက် ရုရှားအပေါ် ပိတ်ဆို့အရေးယူမှု ၁၅ ကြိမ် ချမှတ်ခဲ့သည်။ သို့သော်လည်း အဆိုပါ အစီအမံများကို ဇန်နဝါရီ ၃၁ ရက် နောက်ဆုံးထား၍ ခြောက်လတစ်ကြိမ် သက်တမ်းတိုးရန် တညီတညွတ်တည်း အတည်ပြုချက်လိုအပ်သည်။ဇန်နဝါရီ ၂၇ ရက်နေ့တွင် ကျင်းပသည့် EU နိုင်ငံခြားရေးဝန်ကြီးများအစည်းအဝေးတွင် ဟန်ဂေရီက ဒဏ်ခတ်ပိတ်ဆို့မှုများအပေါ် အချေအတင်ဆွေးနွေးခဲ့ကြောင်း သိရှိရပါသည်။

ကိုးကား-RT

ဒီဇင်ဘာလတွင် ခေတ္တသာကြာမြင့်ခဲ့သော စစ်အုပ်ချုပ်ရေးကျင့်သုံးမှုကိုကြေညာပြီး ပုန်ကန်မှုကိုဦးဆောင်ခဲ့သည် ဟူသောစွဲချက်နှင့် သမ္မတ Yoon Suk-yeol ကို တောင်ကိုရီးယား စုံစမ်းစစ်ဆေးရေးအရာရှိများက ဇန်နဝါရီ ၂၆ ရက်နေ့တွင် စွဲချက်တင်ခဲ့ပါသည်။

စုံစမ်းစစ်ဆေးရေးမှူးများ၏ ပူးပေါင်းအဖွဲ့တစ်ဖွဲ့က သမ္မတ ယွန်းဆော့ယိုးကို ထိန်းသိမ်းခဲ့ပြီး ဇန်နဝါရီ ၁၉ ရက်တွင် ဖမ်းဆီးခဲ့ပါသည်။ ၎င်းက စစ်ဆေးမေးမြန်းမှုအတွက် ပူးပေါင်းဆောင်ရွက်ရန် ငြင်းဆိုနေပါသည်။ စုံစမ်းစစ်ဆေးရေးအရာရှိများ စွဲဆိုထားသောအမှုကို ဇန်နဝါရီ ၂၃ ရက်နေ့၌ တရားရုံးကို လွှဲပြောင်းပေးခဲ့သည်။ စုံစမ်းစစ်ဆေးရေးအရာရှိများက စုံစမ်းစစ်ဆေးမှုအခွင့်အာဏာအောက်၌ စစ်ဆေးမေးမြန်းမှုများ ဆက်လက်လုပ်ဆောင်နိုင်ရန် ယွန်းဆော့ယိုးအား ဖမ်းဆီးမှုသက်တမ်းတိုးရန် တရားရုံးကို နှစ်ကြိမ်တိုင်တိုင် တောင်းဆိုခဲ့သော်လည်း တရားရုံးက အဆိုပါတောင်းဆိုချက် နှစ်ကြိမ်လုံးကို ပယ်ချခဲ့သည်။

ထို့နောက်တွင် စုံစမ်းစစ်ဆေးရေးအရာရှိများသည် ယွန်းဆော့ယိုးကို တိုက်ရိုက်မေးမြန်းခွင့်မရရှိဘဲ စွဲချက်တင်နိုင်ရေး ဆုံးဖြတ်ခဲ့ကြသည်။

စွဲချက်တင်ခံထားရပြီးဖြစ်သည့်အချိန်တွင် ကာကွယ်ရေးဝန်ကြီး Kim Yong-hyun အား စစ်ဆေးမေးမြန်းမှုများ အပေါ်အခြေခံပြီး ယွန်းဆော့ယိုးတွင် အပြစ်ရှိကြောင်း သက်သေပြနိုင်သည်ဟု ၎င်းတို့ကပြောကြားခဲ့ပါသည်။

ဤဖြစ်ရပ်သည် တောင်ကိုရီးယား၌ တာဝန်ထမ်းဆောင်ဆဲ သမ္မတတစ်ဦးကို ပထမဆုံးအကြိမ် စွဲချက်တင်လိုက်ခြင်းပင်ဖြစ်သည်။

တောင်ကိုရီးယားသမ္မတများသည် တာဝန်ထမ်းဆောင်စဉ်အတွင်း တရားစွဲဆိုခံရခြင်းမှ ကင်းလွတ်ခွင့်ရှိသော်လည်း ပုန်ကန်မှုမှာ သမ္မတများ ကင်းလွတ်ခွင့်မရှိသည့် ရာဇ၀တ်မှုအနည်းငယ်ထဲမှ တစ်ခုဖြစ်ပါသည်။

တောင်ကိုရီးယားဥပဒေအရ စုံစမ်းစစ်ဆေးရေး အရာရှိများသည် သမ္မတ ယွန်းဆော့ယိုးကို စွဲချက်တင်ပြီးနောက် ၆ လအထိ ထိန်းသိမ်းရေးစခန်း၌ ထိန်းသိမ်းထားနိုင်မည်ဖြစ်သည်။

သမ္မတ ယွန်းဆော့ယိုး၏ ရှေ့နေအဖွဲ့က ၎င်းအပေါ် စွဲဆိုချက်ကို အဆိုးရွားဆုံး ဆုံးဖြတ်ချက်ဖြစ်သည်ဟု ပြောဆိုခဲ့ပြီး သမ္မတတစ်ဦး၏ စစ်အုပ်ချုပ်ရေး ကြေညာမှုသည် မည်သို့မျှပုန်ကန်မှုမဖြစ်နိုင်ဟု ဆိုကြပါသည်။ စစ်ဆေးမှုများ၏ တရားမဝင်မှုကို သက်သေထူရန် တရားရုံးတွင် တရားရင်ဆိုင်မည်ဖြစ်ကြောင်း ရှေ့နေအဖွဲ့ကဆိုပါသည်။

ဖွဲ့စည်းပုံအခြေခံဥပဒေခုံရုံးက သမ္မတ ယွန်းဆော့ယိုးအပေါ် စွဲချက်တင်မှုသည် တရားဝင်ခြင်း ရှိ၊ မရှိ ဆုံးဖြတ်ရန် သီးခြားဆောင်ရွက်နေချိန်တွင် ရာဇ၀တ်မှု ဆိုင်ရာတရားရုံးက ရုံးတင်စစ်ဆေးမှု တစ်ခုပြုလုပ်မည်ဟု မျှော်လင့်ကြောင်းသိရှိရပါသည်။

ကိုးကား-NHK World

ဒေါ်နယ်ထရမ့်သမ္မတဖြစ်သည့် ဇန်နဝါရီ ၂၀ ရက်နေ့ တွင်ပင် အမေရိကန်နိုင်ငံအတွင်းမှ အထောက်အထားမဲ့ ရွှေ့ပြောင်းများကိုနှင်ထုတ်ရန် သမ္မတလုပ်ပိုင်ခွင့်အား အသုံးပြုကာ လက်မှတ်ရေးထိုးခဲ့သည်။

ဇန်နဝါရီ ၂၂ ရက်နေ့မှစတင်ကာ အမေရိကန်မြို့များရှိ အထောက်အထားမဲ့ရွှေ့ပြောင်းများကို လူဝင်မှုကြီးကြပ်ရေးကလိုက်လံဖမ်းဆီးပြီး လေယာဉ်ပေါ်တင်ကာ နေရပ်နိုင်ငံသို့ပြန်ပို့ခဲ့သည်။ သို့သော် မက္ကဆီကိုနှင့်ကိုလံဘီယာက ၎င်းတို့နိုင်ငံသားများကို ပြန်လည်လက်မခံဘဲ လေယာဉ်ကိုလည်း ဆင်းခွင့်မပြုခဲ့ပေ။

ထရမ့်အစိုးရအဖွဲ့က လူလက်မခံပါက ၂ နိုင်ငံ ကုန်သွယ်မှု၌ အမေရိကန်ဘက်မှ အခွန်တိုးကောက်မည်ဟု ကြိမ်းဝါးခဲ့သည်။ ယခင်က မက္ကဆီကိုနှင့် ကိုလံဘီယာ နိုင်ငံတို့မှ သွင်းကုန်များကို အမေရိကန်က ၂၅% ကောက်မည်ဟု ဆိုလိုက်ပါသည်။ အိမ်ဖြူတော်က ပထမဦးစွာကုန်သွယ်မှုအပေါ် အခွန်စည်းကြပ်မှု တိုးမြှင့်မည်။ ထို့နောက် စီးပွားရေးပိတ်ဆို့အရေးယူမှုစတင်မည်ဟု ကြေညာလိုက်ရာ ယခုတွင် မက္ကဆီကိုနှင့် ကိုလံဘီယာ ၂ နိုင်ငံစလုံးက အထောက် အထားမဲ့ ရွှေ့ပြောင်းလာသူများ ပြန်ပို့ခြင်းကို လက်ခံလိုက်ရပြီဖြစ်ကြောင်း သိရှိရသည်။

ကိုးကား-Myanmar National Post

ဘယ်လာရုစ်သမ္မတရွေးကောက်ပွဲတွင် မဲ ၈၆.၈၂ ရာခိုင်နှုန်းဖြင့် အနိုင်ရရှိသည့် လက်ရှိခေါင်းဆောင် Lukashenko ကို ရုရှားသမ္မတဗလာဒီမာပူတင်က ဂုဏ်ပြုစကား ပြောကြားလိုက်ပါသည်။

နှစ်နိုင်ငံအကြား ဘက်စုံပူးပေါင်းဆောင်ရွက်မှုမြှင့်တင်ရန်နှင့် ပြည်ထောင်စုနိုင်ငံတော်ရှိ အင်စတီကျူးရှင်းများ၏ စွမ်းဆောင်ရည်များမြှင့်တင်နိုင်ရေး အပြန်အလှန် ပူးပေါင်းမှုဆက်လက်လုပ်ဆောင်သွားမည်ဖြစ်ကြောင်း ရုရှားခေါင်းဆောင်က အလေးပေးပြောကြားထားပါသည်။

ကိုးကား-TASS

ဇန်နဝါရီလ ၁၉ ရက်က လန်ကာဝီ(Langkawi)ကျွန်း၌ ကျင်းပပြုလုပ်ခဲ့သည့် အာဆီယံဝန်ကြီးများအဆင့်အစည်းအဝေးအပြီး သတင်းစာရှင်းလင်းပွဲတွင်သတင်းထောက်များက နိုင်ငံတော်စီမံအုပ်ချုပ်ရေးကောင်စီမှ အကောင်အထည်ဖော်နေသော ရွေးကောက်ပွဲကိစ္စနှင့်ပတ်သက်ပြီး မလေးရှား၏သဘောထားကိုမေးမြန်းခဲ့ရာတွင် မလေးရှားနိုင်ငံခြားရေးဝန်ကြီးမိုဟာမက်ဟာဆန်က “ရွေးကောက်ပွဲဆိုသည်မှာ အင်အားစုအသီးသီး စုံစုံညီညီပါဝင်ရန်လိုအပ်ပြီး အစုအဖွဲ့တစ်ခုတည်းက သီးခြားကျင်းပ၍မရကြောင်း၊ နိုင်ငံရေးနှင့်ဆက်နွယ်သည့် အင်အားစုအားလုံး အကျုံးဝင်နိုင်ရမည်ဖြစ်ကြောင်း၊ လောလောဆယ် မြန်မာနိုင်ငံ၏ ဦးစားပေးလုပ်ဆောင်ရမည့်ကိစ္စသည် ကြမ်းတမ်းရက်စက်မှုများကို အဆုံးသတ်ရန်နှင့် ငြိမ်းချမ်းရေးကိုပြန်လည်ဖော်ဆောင်ရန်သာဖြစ်သင့်ကြောင်း” မိုဟာမက် က ပြောကြားသွားခဲ့သည်။

ထို့အပြင် ဆွစ်ဇာလန်နိုင်ငံ၊ Davos(ဒါဗို့စ်)မြို့မှာ ဇန်နဝါရီလ ၂၂ ရက်တွင် ကျင်းပပြုလုပ်ခဲ့သော ကမ္ဘာ့စီးပွားရေးဖိုရမ်တွင် အင်ဒိုနီးရှားနိုင်ငံခြားရေးဝန်ကြီး Mr Sugion(ဆူဂီရိုနို) ဆိုသူက “မြန်မာနိုင်ငံရှိ နိုင်ငံရေးပါတီအားလုံးနှင့် အမျိုးသားအဆင့်ဆွေးနွေးပွဲတစ်ရပ်ပြုလုပ်နိုင်ရေးအတွက် ပံ့ပိုးကူညီသွားရန် အင်ဒိုနီးရှားနိုင်ငံအနေဖြင့် ဆုံးဖြတ်ထားကြောင်း၊ မြန်မာနိုင်ငံတွင် ရေရှည်တည်တံ့ခိုင်မြဲသော ငြိမ်းချမ်းရေးနှင့် တည်ငြိမ်ရေးရရှိရန် သက်ဆိုင်သူအားလုံးပါဝင်သည့် အမျိုးသားအဆင့်ဆွေးနွေးပွဲအား ဦးစားပေးလုပ်သွားရမည်ဖြစ်ကြောင်း” ပြောကြားခဲ့ပါသည်။

အဆိုပါပြောဆိုမှုများသည် မြန်မာနိုင်ငံကိုခုတုံးလုပ်ပြီး ထင်ပေါ်ကျော်ကြားလိုသည့်စိတ်ဖြင့် အဆင့်အတန်းမဲ့စွာပြောဆိုခဲ့သည့် ပြောဆိုမှုများသာဖြစ်ပါသည်။ နိုင်ငံတော်စီမံအုပ်ချုပ်ရေးကောင်စီ စတင်တာဝန်ယူခဲ့စဉ်ကတည်းက ရှေ့လုပ်ငန်းစဉ်(၅)ရပ် ချမှတ်အကောင်အထည်ဖော်ဆောင်ရွက်ခဲ့ပြီး လက်ရှိအချိန်တွင်လည်း ပြည်သူများမျှော်လင့်စောင့်စားနေသည့် ပါတီစုံဒီမိုကရေစီအထွေထွေရွေးကောက်ပွဲကြီး ကျင်းပရန်အတွက် ကြိုးပမ်းဆောင်ရွက်နေသကဲ့သို့ တစ်ဖက်တွင်လည်း တိုင်းရင်းသားလက်နက်ကိုင်များကို ငြိမ်းချမ်းရေးဆွေးနွေးရန်အတွက် အကြိမ်ကြိမ်ဖိတ်ခေါ်လျက်ရှိပြီး ငြိမ်းချမ်းရေးအတွက်လည်း အမြဲတမ်းတံခါးဖွင့် ကြိုဆိုလျက်ရှိပါသည်။ ဤကဲ့သို့သော လုပ်ဆောင်ချက်များအပါအဝင် မြန်မာနိုင်ငံ၏ ပြည်တွင်းရေးကိစ္စများကို ဂဃနဏမသိဘဲ ဝင်ရောက်စွက်ဖက်ပြီး ပြောဆိုဝေဖန်စရာအကြောင်းမရှိပေ။

အချုပ်အခြာအာဏာပိုင် နိုင်ငံတစ်ခု၏ ပြည်တွင်းရေးသည် အဆိုပါနိုင်ငံ၏အစိုးရနှင့် ပြည်သူများက စိတ်ကြိုက် စီမံဆုံးဖြတ်ကြခြင်းပင်ဖြစ်ပါသည်။ထို့အတူပင် မြန်မာနိုင်ငံ၏ ပြည်တွင်းရေးကိစ္စအဝဝသည် မြန်မာနိုင်ငံအစိုးရနှင့် မြန်မာပြည်သူများနှင့်သာသက်ဆိုင်ပြီး မည်သည့်အချိန်တွင် ရွေးကောက်ပွဲလုပ်မည်၊ မည်သည့်အချိန်တွင် ငြိမ်းချမ်းရေးလုပ်မည်ဆိုသည်မှာ မြန်မာနိုင်ငံအစိုးရနှင့် ပြည်သူများကသာ စီမံဆုံးဖြတ်ကြရမည်သာဖြစ်သည်။ မည်သည့်ပြည်ပနိုင်ငံကမျှ မြန်မာနိုင်ငံ၏ ပြည်တွင်းရေးကို ဝင်ရောက်စွက်ဖက်ခွင့်မရှိပေ။ အထူးသဖြင့် မလေးရှား၊ အင်ဒိုနီးရှားတို့ကဲ့သို့ အာဆီယံဒေသတွင်းမှ နိုင်ငံခြားရေးဝန်ကြီးများဖြစ်ပါလျက်နှင့် လက်ရှိအစိုးရ၏ လုပ်ဆောင်မှုများကို အပြုသဘောဆောင်ကာ ဝိုင်းဝန်းကူညီဆောင်ရွက်ရမည့်အစား ထင်ပေါ် ကျော်ဇောမှုအတွက် မြန်မာနိုင်ငံ၏ ပြည်တွင်းရေးကို ထင်မြင်ချက်နှင့်ဝေဖန်ပြောဆိုမှုများသည် ရှက်ဖွယ်ကောင်းသော ပြောဆိုမှုများသာဖြစ်ပါသည်။

ကိုးကား-NP News

ဇန်နဝါရီ ၂၇ ရက်နေ့တွင် ပြုလုပ်ခဲ့သော EU နိုင်ငံခြားရေးဝန်ကြီးများအစည်းအဝေးတွင် ရုရှားအပေါ် ဒဏ်ခတ်ပိတ်ဆို့မှုများ ဆက်လက်လုပ်ဆောင်ရန်ဆုံးဖြတ်ခဲ့ကြကြောင်း သဘောတူညီခဲ့ကြပြီး EU နိုင်ငံခြားရေးမူဝါဒ အကြီးအကဲ Kaja Kallas က သက်တမ်းတိုးကြောင်း ကြေညာခဲ့သည်။

ဟန်ဂေရီသည် နိုင်ငံ၏ သဘာဝဓာတ်ငွေ့ တင်ပို့မှု လေးပုံသုံးပုံခန့်ကို ရုရှားအပေါ်မှီခိုနေရပြီး ရုရှားအပေါ် ပိတ်ဆို့ အရေးယူမှုများ သက်တမ်းတိုးခြင်းအား ကန့်ကွက်မည်ဟု ပြောဆိုထားခဲ့သည်။

ထို့အတူ ဆလိုဗက်ကီးယားသည်လည်း ၎င်း၏ဝယ်လိုအား ၆၀% ခန့်ကိုပြည့်မှီရန် ရုရှား၏ဓာတ်ငွေ့တင်ပို့မှုအပေါ် မှီခိုနေရပြီး ကိယက်ဗ်၏ စာချုပ်သက်တမ်းတိုးရန် ငြင်းဆန်ခဲ့မှုအပြီးတွင် ၎င်းတို့အနေဖြင့် ထောက်ပံ့မှုများ ဆိုင်းငံ့သွားမည်ဖြစ်ကြောင်းပြောဆိုထားခဲ့သည်။

Orban နှင့် Fico တို့သည် ယူကရိန်းစစ်မြေပြင်တွင် ရုရှားကိုအနိုင်ယူ၍မရနိုင်ကြောင်း အကြိမ်ကြိမ် ပြောဆိုခဲ့ကြကာ ကိယက်ဗ်အား အနောက်နိုင်ငံများ၏ စစ်ရေးအကူအညီသည် သွေးထွက်သံယိုမှုကိုသာ တာရှည်စေမည်ဖြစ်ပြီး ဥရောပသမဂ္ဂ၏ ပိတ်ဆို့အရေးယူမှုသည် ရုရှားကို ထိခိုက်သည်ထက် ဥရောပစီးပွားရေးကို ပိုမိုထိခိုက်စေသည်ဟု ခေါင်းဆောင်နှစ်ဦးစလုံးက အခိုင်အမာပြောဆိုခဲ့ကြသည်။ 

ကိုးကား-RT