ဝါရှင်တန်   ဇန်နဝါရီ ၂၃

အမေရိကန်ပြည်ထောင်စုရှိ ဒီမိုကရက်တစ်ဦးဆောင်သော ပြည်နယ် ၂၂ ခုနှင့် အခြားပြည်နယ်များသည် မွေးရာပါနိုင်ငံသားဖြစ်ခွင့်ကို ရုပ်သိမ်းရန် သမ္မတ ဒေါ်နယ်ထရမ့်၏ အမိန့်အပေါ် တရားစွဲဆိုခဲ့ကြောင်း သိရသည်။

လက်ရှိတွင် အမေရိကန်နိုင်ငံအတွင်း မွေးဖွားသူတိုင်းသည် ၎င်းတို့၏ မိဘများ မည်သည့်နိုင်ငံသားဖြစ်စေ အမေရိကန်နိုင်ငံသားအဖြစ် ခံယူခွင့်ရှိသည်။

လက်မှတ်ရေးထိုး

သို့သော် ၎င်းတို့၏ မိခင်များသည် နိုင်ငံအတွင်း တရားမဝင် သို့မဟုတ် ခေတ္တနေထိုင်သူများဖြစ်ပါက ၎င်းတို့၏ ဖခင်များသည် အမေရိကန်နိုင်ငံသား သို့မဟုတ် တရားဝင်အမြဲတမ်းနေထိုင်သူများ မဟုတ်ပါက အမေရိကန်နိုင်ငံ၌ မွေးဖွားသော ကလေးများအား အလိုအလျောက် နိုင်ငံသားအဖြစ် ခံယူခွင့်မပြုသည့် အမိန့်တစ်ရမ်ကို ထရမ့်က ဇန်နဝါရီ ၂၀ ရက်က လက်မှတ်ရေးထိုးခဲ့သည်။

သမ္မတထရမ့်သည် အမေရိကန်ဖွဲ့စည်းပုံအခြေခံဥပဒေကို ချိုးဖောက်ပြီး တရားရုံးချုပ်မှ အမိန့်စာတစ်ရပ်ထုတ်ပြန်ရန် တောင်းခံခဲ့ကြောင်း ဒီမိုကရက်တစ်ဦးဆောင်သော ပြည်နယ် ၂၂ ခု အပါအဝင် ကိုလံဘီယာခရိုင်နှင့် ဆန်ဖရန်စစ္စကိုမြို့တို့က ပြောကြားသည်။

နယူးဂျာစီပြည်နယ် ရှေ့နေချုပ် မတ်သရူးပလတ်ကင်က အမေရိကန်ပြည်ထောင်စုတွင် မွေးဖွားသူအားလုံးသည် အမေရိကန်၏ တရားစီရင်ပိုင်ခွင့်အောက်တွင် ရှိသူများဖြစ်ပြီး အမေရိကန်နိုင်ငံသားများဖြစ်ကြောင်း ဖွဲ့စည်းပုံအခြေခံဥပဒေ၏ အဆိုပါဥပဒေဆိုင်ရာ ၁၄ ကြိမ်မြောက် ပြင်ဆင်ချက်နှင့် နောက်ဆက်တွဲ တရားရုံးချုပ်၏ စီရင်ထုံးများကို ကိုးကားပြီး ပြောကြားသည်။

ထို့ပြင် အမေရိကန်သမ္မတများတွင် လုပ်ပိုင်ခွင့်အာဏာအပြည့်အဝရှိသော်လည်း ဖွဲ့စည်းပုံအခြေခံဥပဒေကို တစ်ဖက်သတ်ပြန်ရေးနိုင်သည့် အခွင့်အာဏာမရှိကြောင်း မတ်သရူးပလတ်ကင်က ပြောကြားသည်။ 

Source: ကြေးမုံသတင်းစာ

ဝါရှင်တန်   ဇန်နဝါရီ ၂၃

ကုလသမဂ္ဂဆိုင်ရာ အမေရိကန်သံတမန်အဖြစ် အမေရိကန်သမ္မတ‌ ဒေါ်နယ်ထရမ့် အဆိုပြုထားသည့် အီလစ်စတီဖာနစ်ခ်သည် အစ္စရေး-ပါလက်စတိုင်း နှစ်ပြည်ထောင်ယှဉ်တွဲနေထိုင်မှုဆိုင်ရာ ဖြေရှင်းချက်အပေါ် ရှုတ်ချခဲ့ပြီး ကုလသမဂ္ဂအဖွဲ့ကို ဂျူးဆန့်ကျင်ရေးအဖွဲ့အစည်းအဖြစ် စွပ်စွဲခဲ့ကြောင်း သိရသည်။

အီလစ်စတီဖာနစ်ခ်သည် ဇန်နဝါရီ ၂၁ ရက်တွင် ကျင်းပသည့် အထက်လွှတ်တော်အစည်းအဝေးတွင် အထက်ပါအတိုင်း မှတ်ချက်ပြုခဲ့သည်။

အလေးပေးပြောကြား

ကုလသမဂ္ဂအဖွဲ့အား ဂျူးဆန့်ကျင်သည့်အဖွဲ့အစည်းအဖြစ် အီလစ်စတီဖာနစ်ခ်က အကြိမ်ကြိမ်ရှုတ်ချခဲ့ပြီး ၎င်း၏ အစ္စရေးလိုလားသော ရပ်တည်ချက်ကို အလေးပေးပြောကြားခဲ့သည်။

အစ္စရေးသည် အနောက်ဘက်ကမ်းတစ်ခုလုံးအတွက် သမ္မာကျမ်းစာဆိုင်ရာအခွင့်အရေးအရ ပိုင်ဆိုင်ခွင့်ရှိသည်ဟု လက်ယာယိမ်းအစ္စရေးနိုင်ငံရေးသမားများ၏ တောင်းဆိုချက်ကို ထောက်ခံကြောင်း အီလစ်စတီဖာနစ်ခ်က ပြောကြားသည်။

အနောက်ဘက်ကမ်းနှင့် ဂါဇာကမ်းမြောင်တို့ပါဝင်သော အနာဂတ်ပါလက်စတိုင်းနိုင်ငံနှင့်အတူ ပေါင်းစည်းနေထိုင်မည့် အစ္စရေး-ပါလက်စတိုင်း နှစ်ပြည်ထောင် ယှဉ်တွဲနေထိုင်မှု ဖြေရှင်းချက်နှင့်ပတ်သက်ပြီး အီလစ်စတီဖာနစ်ခ်က သဘောထားကွဲလွဲလျက်ရှိသည်။

အရှေ့အလယ်ပိုင်း ငြိမ်းချမ်းရေးရရှိရန် သမ္မတဟောင်း ဂျိုးဘိုင်ဒင်အပါအဝင် အမေရိကန် အုပ်ချုပ်ရေးအဖွဲ့ အများအပြားက ၎င်းအမြင်ကို ဆုပ်ကိုင်လျက်ရှိသည်။

အမေရိကန်နိုင်ငံသည် ကုလသမဂ္ဂအဖွဲ့အား ငွေကြေးထောက်ပံ့မှုအများဆုံးပေးသည့် နိုင်ငံဖြစ်သည်။

လက်ရှိတွင် “အမေရိကန်သည်သာ ပထမ” မူဝါဒနှင့်အညီ အမေရိကန်နိုင်ငံနှင့် သဘောထားမတူညီသည့် အဖွဲ့အစည်းအား ငွေကြေးထောက်ပံ့ပေးမှုအပေါ် ပြန်လည်သုံးသပ်ရန်လိုအပ်ကြောင်းလည်း ၎င်းက အလေးပေးပြောကြားခဲ့သည်။

Source: ကြေးမုံသတင်းစာ

အမေရိကန် အထက်လွှတ်တော်က ဇန်နဝါရီ ၂၃ ရက် တွင် CIA ၏ ဒါရိုက်တာအဖြစ် သမ္မတ Donald Trump ၏ အမည်စာရင်းတင်သွင်းခံရသူ အမျိုးသား ထောက်လှမ်းရေး ညွှန်ကြားရေးမှူးဟောင်း John Ratcliffe ကို ထောက်ခံအတည်ပြုခဲ့ကြသည်။

ဒီမိုကရက်ပါတီမှ ၂၀ ဦးနှင့် တစ်သီးပုဂ္ဂလ ၁ ဦးတို့ကလည်း ရီပတ်ပလီကင်ပါတီမှ အမည်စာရင်းတင်သွင်းမှုကို ထောက်ခံခဲ့ကြပြီး ထောက်ခံမဲ ၇၄ မဲ၊ ကန့်ကွက်မဲ ၂၅ မဲဖြင့် Ratcliffe ကို CIA ဒါရိုက်တာအဖြစ် အတည်ပြုခဲ့ကြသည်။

ရီပတ်ဗလီကင်အများစုကြီးစိုးသည့် အထက်လွှတ်တော်သည် အမျိုးသားလုံခြုံရေးအဖွဲ့မှစတင်ကာ အုပ်ချုပ်ရေးပိုင်းအတွက် အဓိကရာထူးနေရာများတွင် ထရမ့် အမည်စာရင်းတင်သွင်းသူများကို အတည်ပြုပေးလျက်ရှိသည်။

ရီပတ်ဗလီကင်အမတ်ဟောင်း Marco Rubio အား နိုင်ငံခြားရေးဝန်ကြီးအဖြစ် ကျမ်းသစ္စာကျိန်ဆိုသည့်နေ့တွင် ခန့်အပ်ခဲ့သည်။

ကိုးကား-RT

သမ္မတထရမ့်၏ အရှေ့အလယ်ပိုင်း အထူးသံတမန် Steve Witkoff သည် လာမည့်အပတ်တွင် ဆော်ဒီအာရေးဘီးယားသို့ ဦးစွာသွားရောက်လည်ပတ်ပြီးနောက် အစ္စရေးသို့ ဆက်တိုက်သွားရောက်လည်ပတ်မည် ဖြစ်ကြောင်း အစ္စရေးသတင်းဌာနက ဖော်ပြထားပါသည်။

အပစ်အခတ်ရပ်စဲရေးသဘောတူစာချုပ်၏ ပထမအဆင့်အဖြစ် အစ္စရေးနှင့် ဟားမက်စ်နှစ်ဖက်အကြား သုံ့ပန်းလဲလှယ်မှုကို ဇန်နဝါရီ ၁၉ ရက်နေ့တွင် လုပ်ဆောင်ပြီးနောက် နှစ်ဖက်နိုင်ငံအနေဖြင့် အပစ်အခတ်ရပ်စဲရေး သဘောတူစာချုပ် ဒုတိယအဆင့်၏သတ်မှတ်ချက်များအတိုင်း လိုက်နာဆောင်ရွက်မှုရှိ၊ မရှိကို အထူးသံတမန်က စောင့်ကြည့်သွားမည်ဖြစ်ကြောင်း သတင်းဌာနက ဖော်ပြထားပါသည်။ 

ကိုးကား -Aljazerra

မြောက်ကိုရီးယားစစ်သားများ ယူကရိန်းစစ်မြေပြင်တွင် အသေအပျောက်များနေသည်ဟု သတင်းထွက်ပေါ် နေသော်လည်း ထပ်မံစေလွှတ်ရန် ပြင်ဆင်နေကြောင်း တောင်ကိုရီးယားစစ်ဘက်အရာရှိများက ပြောကြားလိုက်ပါသည်။ 

FOX News နှင့် အင်တာဗျူးတစ်ခုတွင် အမေရိကန် သမ္မတဒေါ်နယ်ထရမ့်က မြောက်ကိုရီးယားခေါင်းဆောင် ကင်ဂျုံအန်ကို “စမတ်ကျသည့် လူကလေး” ဟု ခေါ်ဝေါ်လိုက်ကာ မြောက်ကိုရီးယားခေါင်းဆောင်နှင့် ဆက်ဆံရေးပြန်လည်ကောင်းမွန်လာရန် ကြိုးစားသွားမည်ဟုပြောကြားလိုက်ခြင်းကလည်း မြောက်ကိုရီးယားကရုရှားကို ဆက်လက်ထောက်ပံ့ပေးမည့်ကိစ္စမှာ ပိုမို ခိုင်မာလာကြောင်းသုံးသပ်ထားကြသည်။ 

ရုရှားသို့ မြောက်ကိုရီးယားက ယူကရိန်းစစ်မြေပြင်သို့ တပ်ဖွဲ့ဝင် ၁၁,၀၀၀ ခန့်ကို စေလွှတ်လိုက်ပြီး ၄ လ အကြာ ဇန်နဝါရီ ၂၄ရက်နေ့က တောင်ကိုရီးယားက ထုတ်ပြန်လိုက်သည့် ကြေညာချက်တစ်ခုတွင် မြောက်ကိုရီးယားသည် ယူကရိန်းစစ်ပွဲသို့ တပ်ဖွဲ့ဝင်များ ထပ်မံစေလွှတ်ရန် ပြင်ဆင်နေကြောင်း ဖော်ပြထား ပါသည်။ 

ကိုးကား-The Guardian

တရားမဝင် ရွှေ့ပြောင်းနေထိုင်သူများ တောင်ပိုင်းနယ်နိမိတ်မှတစ်ဆင့် အမေရိကန်နိုင်ငံအတွင်းသို့ ဝင်ရောက်ခြင်းကို ယာယီရပ်တန့်ရန် အမေရိကန် သမ္မတ ထရမ့်က ဇန်နဝါရီလ ၂၂ ရက်တွင် သမ္မတအမိန့်ကြေညာချက် လက်မှတ်ရေးထိုးခဲ့ပြီး ပြည်တွင်းလုံခြုံရေးဌာန၊ တရားရေးဝန်ကြီးဌာနနှင့် နိုင်ငံခြားရေးဝန်ကြီးဌာနတို့အား အမေရိကန် တောင်ပိုင်းနယ်နိမိတ်ကို ဖြတ်ကျော်လာသည့် တရားမဝင် ရွှေ့ပြောင်းနေထိုင်သူများအား ချက်ချင်းနှင်ထုတ်ရန်၊ နေရပ် ပြန်ပို့ရန်နှင့် ဖယ်ရှားရန် လိုအပ်သည့် လှုပ်ရှားမှုအားလုံး လုပ်ဆောင်ရန် ညွှန်ကြားခဲ့သည်။

သမ္မတအခွင့်အာဏာကို အသုံးပြုခြင်းဖြင့် ထရမ့်က လူဝင်မှုကြီးကြပ်ရေးဥပဒေဆိုင်ရာ ပြဋ္ဌာန်းချက်များကို တစ်ဆင့်တိုး ကန့်သတ်ခဲ့ကြောင်း၊ ဤပြဋ္ဌာန်းချက်များသည် မူလက တောင်ပိုင်းနယ်နိမိတ်မှတစ်ဆင့် အမေရိကန်နိုင်ငံသို့ ဝင်ရောက်သော မည်သည့်တရားမဝင် နိုင်ငံခြားသားများကိုမဆို ဥပမာ ခိုလှုံခွင့် လျှောက်ထားခြင်းသည် အမေရိကန်နိုင်ငံတွင် နေထိုင်ခွင့်ပြုထားနိုင်ခြေရှိကြောင်း သမ္မတအမိန့်ကြေညာချက်တွင် ပြောကြားခဲ့သည်။
ထို့အပြင် ထရမ့်သည် အမေရိကန်နိုင်ငံ တောင်ပိုင်းနယ်စပ်သို့ အမေရိကန်စစ်သည် ၁,၅၀၀ ဦး ထပ်တိုးစေလွှတ်ရန် ညွှန်ကြားထားပြီးဖြစ်ကြောင်း အိမ်ဖြူတော် သတင်းဌာနပြောရေးဆိုခွင့်ရှိသူ Karoline Leavitt ကပြောကြားခဲ့သည်။ ထရမ့်သည် ဇန်နဝါရီ ၂၀ ရက် ကျမ်းသစ္စာကျိန်ဆိုပွဲအပြီးတွင် သမ္မတအမိန့်ကြေညာချက်လက်မှတ်ရေးထိုးကာ တောင်ပိုင်းနယ်နိမိတ်ကို အရေးပေါ်အခြေအနေအဖြစ်ကြေညာခဲ့ပြီး လူပုဂ္ဂိုလ်နှင့်အရင်းအမြစ်ဖြန့်ကျက်မှုကို အားဖြည့်ရန်၊ ရုပ်ဝတ္ထုပိုင်းဆိုင်ရာ အကာအရံများ ထပ်တိုးရန် စသည့် အစီအမံများဆောင်ရွက်ကာ တရားမဝင်ရွှေ့ပြောင်းနေထိုင်သူအားလုံး နိုင်ငံအတွင်းသို့ ဝင်ရောက်မှုကို တားဆီးရန် ညွှန်ကြားခဲ့သည်။ ထိုနေ့တွင်ပင် ၎င်းက အခြားသမ္မတအမိန့် ကြေညာချက်တစ်ရပ်လက်မှတ်ရေးထိုးကာ “တရားဥပဒေ၏ တရားဝင်ခွင့်ပြုသည့် အကြီးဆုံးအတိုင်းအတာအတွင်း” ပြည်ထောင်စု သို့မဟုတ် ပြည်နယ်ဥပဒေကို ချိုးဖောက်မှုသံသယဖြင့် ဖမ်းဆီးခံရသော နိုင်ငံခြားသားများကို ၎င်းတို့ ပြည်နှင်ခံရသည်အထိ ထိန်းသိမ်းထားပြီး ပြည်ထောင်စုဥပဒေကိုချိုးဖောက်ပြီး နိုင်ငံအတွင်းသို့ ဝင်ရောက်သော သို့မဟုတ် သောင်တင်နေသော နိုင်ငံခြားသားအားလုံးကို အမြန်ဆုံးနှင်ထုတ်ရန် ညွှန်ကြားထားကြောင်း သိရသည်။ 

ကိုးကား-ဆင်ဟွာ

တရုတ်နိုင်ငံသည် ရေအောက်နှင့်ဝေဟင်စစ်ဆင်ရေးလုပ်ငန်းများလုပ်ဆောင်နိုင်သည့်ဒရုန်းများကို တီထွင်ခဲ့ကြောင်းသိရပါသည်။ ရေငုပ်သင်္ဘောမှပစ်လွှတ်ရသော အဆိုပါဒရုန်းများသည် ပင်လယ်ရေကြောင်းစစ်ဆင်ရေးနယ်မြေတွင် ရှင်သန်နိုင်စွမ်းမြင့်မားသည်ဟုလည်းဆိုထားသည်။ တရုတ်ပြည်သူ့ လွတ်မြောက်ရေးတပ်မတော် (PLA) အား အုပ်ဖွဲ့ပျံသန်းတိုက်ခိုက်မှုများဖြင့် အလစ်အငိုက် ရယူတိုက်ခိုက်ရန် အာရှရေပိုင်နက်အနီးတွင် အမေရိကန်က ရေအောက်တိုက်ခိုက်ရေးဒရုန်းများ ဖြန့်ကြက်လာမည်ကို စိုးရိမ်သဖြင့် တရုတ်က ဤနောက်ဆုံးပေါ်ဒရုန်းကို တီထွင်ခဲ့ခြင်းဖြစ်ပါသည်။ သို့သော် နောက်ဆုံးပေါ်ဒရုန်းများသည် အမေရိကန်ပင်တဂွန်မှ အသုံးပြုနေသည့် ဒရုန်းအမျိုးအစားများထက် ပိုမိုအဆင့်မြင့်သည်ဟု ဆိုသည်။ တရုတ်သုတေသီများတီထွင်ထားသည့် ဒရုန်းသည် ကမ္ဘာပေါ်တွင် ပထမဆုံးဖြစ်ပြီး ထူးခြားသောခေါက်သိမ်းနိုင်သည့်တောင်ပံဒီဇိုင်းပါရှိသည်။ သို့ဖြစ်၍ ဒရုန်းသည် ရေပြင်နှင့် ဝေဟင်ကြားခံနယ်များကိုဖြတ်သန်း၍ ပျံသန်းနိုင်မည်ဖြစ်ပါသည်။ 

Feiyi ဟု အမည်ပေးထားသည့် အဆိုပါဒရုန်းသည် စစ်ဘက်နယ်ပယ်တွင်အသုံးချနိုင်သည့် အလားအလာကောင်းများရှိပြီး ရေကြောင်းကင်းထောက်မှု၊ စောင့်ကြည့်ထောက်လှမ်းမှုနှင့် တိုက်ခိုက်ရေးတာဝန်များလုပ်ဆောင်နိုင်သည်ဟု ဆိုသည်။ ရေပြင်နှင့်ဝေဟင်နှစ်မျိုးလုံးတွင်ပျံသန်းနိုင်သော ဒရုန်းသည် ပြင်းထန်သောလှိုင်းလုံးများနှင့် ရင်ဆိုင်ရလျှင်ပင် ရေပြင်ပေါ်၌တည့်မတ်စွာနေနိုင်သည်ဟု ဆိုထားသည်။ ဒရုန်းသည် ရေပေါ်သို့ဆင်းသက်ပြီးနောက် ငါးစက္ကန့်အတွင်း လက်တံများကိုခေါက်၍ ရေအောက်သို့ငုပ်ဆင်းနိုင်ပါသည်။ အမေရိကန်တပ်ဖွဲ့က အသုံးပြုရန်စီစဉ်ထားသောဒရုန်းများသည် တော်ပီဒိုပုံစံပြွန်ဖြင့် ရေမျက်နှာပြင်ပေါ်သို့ လွှတ်တင်ရန်လိုအပ်ပြီး ရေအောက်တွင်လည်း ရွေ့လျားသွားလာနိုင်ခြင်းမရှိကြောင်း သိရသည်။ 

Ref; https://interestingengineering.com/military/china-submarine-drone-underwater-aerial-use 

ဘာသာပြန်- ထက်မြက်အောင်

ပေးပို့သူ- ဗိုလ်မှူး အောင်ထက်ထက်

အစ္စရေးကုမ္ပဏီများဖြစ်သော SMARTSHOOTER နှင့် HevenDrones တို့သည် ထောက်ပံ့ပို့ဆောင်ရေးဒရုန်းများတွင် ခေတ်မီစက်ရုပ်လက်နက်စနစ်များတပ်ဆင်မည့်အစီအစဉ်တစ်ရပ်ကို ကြေညာခဲ့ပါသည်။ ၎င်းကုမ္ပဏီများသည် နောက်ဆုံးပေါ် SMASH Dragon လက်နက်ကို HevenDrones မှထုတ်လုပ်သည့် H100 နှင့် Urban ဒရုန်းပလက်ဖောင်းများတွင် ပေါင်းစည်းတပ်ဆင်သွားမည်ဖြစ်သည်။ ဤကဲ့သို့တပ်ဆင်ခြင်းဖြင့် မောင်းသူမဲ့လေကြောင်းစနစ်များသည် မြေပြင်နှင့်ဝေဟင်ပစ်မှတ်များအား ထိရောက်စွာတိုက်ခိုက်မှုပြုလုပ်နိုင်မည်ဖြစ်ပါသည်။  ဒရုန်းတိုက်ပွဲများ ပိုမိုများပြားလာသည်နှင့်အမျှ တန်ပြန်ဒရုန်းနည်းပညာသည် လက်နက်ကိုင်တပ်ဖွဲ့များအတွက် အလွန်အရေးပါလာခဲ့ပါသည်။

H100 နှင့် Urban ဒရုန်းများသည် သယ်ဆောင်နိုင်သောပစ္စည်းအလေးချိန် ၃၀ ကီလိုဂရမ် (၆၆ ပေါင်) နှင့် ၁၀ ကီလိုဂရမ် (၂၂ ပေါင်) အသီးသီးရှိပြီး အရေးပေါ်ထောက်ပံ့ရေးလိုအပ် ချက်များကို ဖြည့်ဆည်းပေးနိုင်ရန် ဒီဇိုင်းထုတ်ထားပါသည်။ H100 ဒရုန်းသည် လေထဲတွင် ၅၅ မိနစ် ကြာပျံသန်းနေနိုင်ပြီး အမြင့်ဆုံးအလျင်နှုန်း တစ်စက္ကန့်လျှင် ၁၆ မီတာ နှင့် Urban ဒရုန်းသည် တစ်စက္ကန့် လျှင် ၂၀ မီတာအလျင်နှုန်းဖြင့် လေထဲတွင် ၃၇ မိနစ်ကြာ ပျံသန်းနေနိုင်ပါသည်။

SMASH Dragon သည် မောင်းသူမဲ့ဝေဟင်ပလက်ဖောင်းအမျိုးမျိုးတွင်တပ်ဆင်ရန် ဒီဇိုင်းထုတ်ထားသည့် ဘက်စုံသုံးလက်နက်တစ်ခုဖြစ်သည်။ ၎င်းသည် အဆင့်မြင့်ပစ်ခတ်မှု ထိန်းသိမ်းရေးနှင့် ပစ်မှတ်ရှာဖွေရေးနည်းစနစ်များကိုအသုံးပြု၍ တည်ငြိမ်နှင့်ရွေ့လျားပစ်မှတ်များကို ထိရောက်စွာ တိုက်ခိုက်ချေမှုန်းနိုင်ပါသည်။ ဒရုန်းရန်ကာကွယ်ရေးအတွက် နေတိုးအဖွဲ့ဝင်နိုင်ငံအများအပြားတွင် အသုံးပြုလျက်ရှိသော SMASH Dragon လက်နက်အား H100 နှင့် Urban ဒရုန်းများတွင် ပေါင်းစပ်တပ်ဆင်ခြင်းဖြင့် အတားအဆီးကန့်သတ်ချက်များပြားသော မြို့ပြဧရိယာနှင့် အတားအဆီးနည်းပါး၍ ကျယ်ပြန့်သော စစ်မြေပြင်တိုက်ပွဲနယ်မြေများတွင် ထိရောက်စွာအသုံးပြုနိုင်မည်ဖြစ်ပါသည်။

Ref; https://thedefensepost.com/2025/01/22/israel-drones-robotic-weapons/ 

ဘာသာပြန်- ထက်မြက်အောင်

ပေးပို့သူ- ဗိုလ်မှူး အောင်ထက်ထက်

အမေရိကန် အမျိုးသားလုံခြုံရေးကောင်စီ ဝန်ထမ်းများကို ခန့်အပ်တာဝန်ပေးအပ်နိုင်ရေး ဒေါ်နယ်ထရမ့်၏ အစီအစဉ်များနှင့် ကိုက်ညီမှုရှိ၊ မရှိ ချိန်ညှိနိုင်ရန် ထရမ့်အစိုးရ အဖွဲ့က ပြန်လည်သုံးသပ်နေစဉ် ဇန်နဝါရီ ၂၂ ရက် (ဗုဒ္ဓဟူးနေ့)တွင် အမျိုးသားလုံခြုံရေးဆိုင်ရာအကြံပေး Mike Waltz က အိမ်ဖြူတော်ရှိ အမျိုးသားလုံခြုံရေး ကောင်စီဝန်ထမ်း ၁၆၀ ကို နေအိမ်များသို့ ပြန်ပို့လိုက်ပါသည်။

ကောင်စီတွင် ခန့်အပ်တာဝန်ပေးအပ်နိုင်ရေး ဝန်ထမ်းများရွေးချယ်ရာတွင် “နိုင်ငံရေးလုပ်ဆောင်ချက် မည်မျှ ရှိသလဲ၊ ၂၀၂၄ ခုနှစ် ရွေးကောက်ပွဲတွင် မည်သူ့ကို မဲပေးခဲ့သလဲ၊ ယခင်က ရွေးကောက်ခံသမ္မတ ထရမ့်နှင့် အဖွဲ့ကို လူမှုမီဒီယာများတွင် ပြစ်တင်စွပ်စွဲရေးသားခဲ့ခြင်း ရှိ၊ မရှိ” စသည့်အချက်များကို ထရမ့်အစိုးရအဖွဲ့က မေးမြန်းလျက်ရှိကြောင်း သိရပါသည်။ 

အမေရိကန်အမျိုးသားလုံခြုံရေးကောင်စီသည် လုံခြုံရေးနှင့် နိုင်ငံခြားရေးမူဝါဒဆိုင်ရာ အကြံဉာဏ်များကို သမ္မတ ထံ တင်ပြရပါသည်။ 

ကိုးကား-AP

ယူကရိန်းသမ္မတ ဇီလန်းစကီးက ငြိမ်းချမ်းရေးဆွေးနွေးရန်အတွက် ပူတင်နှင့်တိုက်ရိုက်ဆွေးနွေးရန်အသင့်ရှိကြောင်း ပြောဆိုခဲ့သည်ဟု သိရှိရပါသည်။

သို့သော် ဆွေးနွေးမှု၏ ရလဒ်များ၌ ယူကရိန်း၏ အနာဂတ်လုံခြုံရေးအာမခံချက်များအတွက် အမေရိကန် က ကြားဝင်ညှိနှိုင်းပေးရန် အရေးကြီးကြောင်း ပြောဆိုခဲ့သည်ဟု Bloomberg သတင်းဌာနက ဖော်ပြထားပါသည်။

Donetsk နှင့် Lugansk ပြည်သူ့သမ္မတနိုင်ငံများနှင့်အတူ Kherson နှင့် Zaporozhye ဒေသများသည် တရားဝင်ဆန္ဒခံယူပွဲရလဒ်များကြောင့် ရုရှား၏ အစိတ်အပိုင်းဖြစ်လာပြီးသည့်နောက် Zelensky သည် ၂၀၂၂ ခုနှစ် နှောင်းပိုင်းတွင် မည်သည့်ညှိနှိုင်းမှုမျှ မပြုဟု တားမြစ်ထားသောအမိန့်ကို လက်မှတ်ရေးထိုးခဲ့ပြီး ယူကရိန်းနိုင်ငံခြားရေးဝန်ကြီး Andrey Sibiga က အဆိုပါအမိန့်သည် အသက်ဝင်နေဆဲဖြစ်ကြောင်း ပြောကြားခဲ့သည်။

သို့သော်လည်း Bloomberg နှင့် အင်တာဗျူးတစ်ခုတွင် Zelensky သည် အဆိုပါကိစ္စနှင့်ပတ်သက်ပြီး ၎င်း၏ သဘောထားပြောင်းလဲသွားကြောင်းယူဆရပြီးအေဂျင်စီ၏ အဆိုအရ ယခုအခါ ယူကရိန်း ခေါင်းဆောင်သည် ပူတင်နှင့်မဆွေးနွေးမီ ယူကရိန်း၏ အနာဂတ်လုံခြုံရေးအာမခံချက်များအတွက် Trump ထံမှ ကတိကဝတ်တစ်ခုရယူလိုကြောင်း ပြောကြားခဲ့သည်ဟု သိရှိရပါသည်။

ကိုးကား-RT