ပါကစ္စတန်သည် ၎င်းနယ်မြေပေါ်ရှိ အကြမ်းဖက်သမားများနှင့်ပတ်သက်၍ ကမ္ဘာကို လှည့်ဖြားနေသည်ဟု အိန္ဒိယက ယုံကြည်နေကြောင်း အိန္ဒိယ နိုင်ငံခြားရေးဝန်ကြီး Vikram Misri က သတင်းစာရှင်းလင်းပွဲတွင် ပြောကြားလိုက်ပါသည်။

အကြမ်းဖက်သမားများသည် ပါကစ္စတန်နယ်မြေတွင် ပုန်းအောင်းနေကြကြောင်း၊ ထိုကိစ္စနှင့်ပတ်သက်၍ ပါကစ္စတန်သည် Financial Action Task Force (FATF) ကဲ့သို့သော အပြည်ပြည်ဆိုင်ရာအဖွဲ့အစည်းများကို ရည်ရွယ်ချက်ရှိရှိ လှည့်ဖြားနေသည်မှာ လူသိရှင်ကြားဖြစ်နေပြီဖြစ်ကြောင်း ၎င်းက ပြောကြားခဲ့သည်။

အိန္ဒိယကာကွယ်ရေးဝန်ကြီးဌာနက မေလ ၆ ရက်နေ့ ညနှောင်းပိုင်းတွင် Operation Sindoor ကို စတင်ခဲ့ပြီး ပါကစ္စတန်ရှိ ပစ်မှတ် ၉ ခုကို တိုက်ခိုက်ခဲ့ကြောင်း ကြေညာခဲ့ပါသည်။

ကိုးကား-TASS

Photo: The Hindu

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

အစ္စလာမ်မာဘတ်၊ ကာကွယ်ရေး

အိန္ဒိယနှင့်ပါကစ္စတန်တို့ကြား တင်းမာနေစဉ်အတွင်း ပါကစ္စတန်နိုင်ငံက Fatah အမျိုးအစား တာတိုပစ်ဒုံးကျည်တစ်စင်းကို မေလ ၅ ရက်တွင် အောင်မြင်စွာစမ်းသပ်ခဲ့ကြောင်း သိရသည်။

ယခုလုပ်ဆောင်ခဲ့သည့်ဒုံးကျည်စမ်းသပ်မှုသည် သုံးရက်အတွင်း ပါကစ္စတန်က ဒုတိယအကြိမ်အဖြစ်  လုပ်ဆောင်ခဲ့ခြင်းဖြစ်သည်။ အဆိုပါ မြေပြင်မှဝေဟင်ပစ်ဒုံးကျည်သည် အကွာအဝေး ၁၂၀ ကီလိုမီတာအထိပစ်ခတ်နိုင်ပြီး ပါကစ္စတန်တပ်ဖွဲ့ဝင်များ၏ တိုက်ပွဲဝင်အသင့်ဖြစ်မှုအတွက် အသင့်ဖြစ်စေရန်နှင့်   အဆိုပါဒုံးကျည်၏ လမ်းကြောင်းရှာစနစ်နှင့် တိကျမှုတို့ကို တိုးတက်ကောင်းမွန်စေရန် ရည်ရွယ်ခြင်းဖြစ်ကြောင်း ပါကစ္စတန်ကထုတ်ပြန်သည်။

ထို့ပြင် ပါကစ္စတန်နိုင်ငံသည်  မေလ  ၃ ရက်ကလည်း  Abdali  လက်နက်စနစ်ဟုအမည်ပေးထားသည့် မြေပြင်မှမြေပြင်ပစ်ဒုံးကျည်တစ်စင်းကိုပစ်ခတ်စမ်းသပ်ခဲ့ကြောင်း သိရသည်။

Abdali လက်နက်စနစ်သည် အကွာအဝေး ၄၅၀ ကီလိုမီတာ ၂၈၀ မိုင် အကွာအထိ ပစ်ခတ်နိုင်ပြီး ပါကစ္စတန်တပ်မတော်က အဆိုပါဒုံးကျည်စမ်းသပ်မှုများအား Exercise Indus ဟူသော   စစ်ရေးလေ့ကျင့်မှု၏ တစ်စိတ်တစ်ဒေသအဖြစ် ပစ်ခတ်ခဲ့ခြင်းဖြစ်သည်။

အဆိုပါဒုံးကျည်စမ်းသပ်ပစ်ခတ်မှုများနှင့်စပ်လျဉ်း၍ အိန္ဒိယနိုင်ငံက တရားဝင် တုံ့ပြန်ပြောကြားထားခြင်းမရှိသော်လည်း အဆိုပါဒုံးကျည်စမ်းသပ်ပစ်ခတ်မှုများကို ရန်စခြင်းဖြစ်သည်ဟု   အိန္ဒိယအစိုးရက စွပ်စွဲထားကြောင်းသိရသည်။  

Ref: RT

Source: https://myawady.net.mm/

တဲအဗစ်၊ စစ်ရေး

ဂါဇာကမ်းမြောင်ဒေသတွင် စစ်ဆေးရေးတိုးမြှင့်လုပ်ဆောင်ရန်အတွက်အရန်တပ်ဖွဲ့ဝင် ထောင်ပေါင်းများစွာအား စည်းရုံးဖြန့်ကြက်ရန်   စီစဉ်လျက်ရှိကြောင်း အစ္စရေးအစိုးရအဖွဲ့မှ ပြောရေးဆိုခွင့်ရှိသူ ဒေးဗစ်မန်ဆာကပြောကြားသည်။

အစ္စရေးနိုင်ငံအနေဖြင့် ယခုရက်သတ္တပတ်အတွင်း အရန်တပ်ဖွဲ့ဝင်များကို ဂါဇာဒေသတွင်စစ်ဆင်ရေးတိုးမြှင့်ရန်နှင့် အင်အားတိုးချဲ့ရန်အတွက် ဆင့်ခေါ်သွားမည်ဖြစ်ကြောင်း၊ သို့သော် ၎င်းတို့အား ပါလက်စတိုင်းနယ်မြေများအား သိမ်းပိုက်ရန်အတွက်ဖြန့်ကြက်မည်မဟုတ်ကြောင်း မန်ဆာက ပြောကြားသည်။

ဂါဇာကမ်းမြောင်ဒေသတွင် အစ္စရေးတပ်ဖွဲ့ဝင်များအား တိုးမြှင့်ဖြန့်ကြက်ခြင်းသည် ဟားမက်အဖွဲ့အား ၎င်းတို့ထိန်းသိမ်းထားသည့်ဓားစာခံများအား ပြန်လည်လွှတ်ပေးရန်အတွက် ဖိအားပေးခြင်းသာဖြစ်ကြောင်း အစ္စရေးကပြောသည်။

ထို့ပြင် ဟားမက်အဖွဲ့အနေဖြင့် ၎င်းတို့ဖမ်းဆီးထိန်းသိမ်းထားသည့် ဓားစာခံများကို ပြန်လည်လွှတ်ပေးပြီး လက်နက်ချမည်ဆိုပါက အစ္စရေး-ဟားမက်စစ်ပွဲသည် အဆုံးသတ်မည်ဖြစ်ကြောင်း   အစ္စရေးအစိုးရက ပြောကြားထားသည်။

Ref: TNA

ပါကစ္စတန်စစ်တပ်သည် အိန္ဒိယရှိ ပစ်မှတ်များကို တန်ပြန်တိုက်ခိုက်မှုများ ပြုလုပ်ခဲ့ကြောင်းSamaa TV ရုပ်သံလိုင်း၏ သတင်းရင်းမြစ်များက ပြောကြားခဲ့ပါသည်။ 

အရပ်သားအခြေခံအဆောက်အအုံများ ထိခိုက်ပျက်စီးမှုနှင့် အရပ်သားပြည်သူများအပေါ် အိန္ဒိယ၏တိုက်ခိုက်မှုကြောင့် ပါကစ္စတန်က ပြန်လည် တိုက်ခိုက်ရန် ဆုံးဖြတ်ချက် ချမှတ်ခဲ့ခြင်းဖြစ်သည်။ 

ကိုးကား - Tass 

တရုတ်နိုင်ငံသည် ၎င်းတို့၏ ကုန်း-ရေနှစ်သွယ်သွား တင့်ဖျက်ပဲ့ထိန်းဒုံးကျည်တင်ယာဉ်အသစ်တစ်စင်းကို ထုတ်ဖော်ပြသလိုက်သည်။

အဆိုပါ ဒုံးကျည်တင်ယာဉ်သစ်ကို ခြေလျင်တိုက်ယာဉ်၏ကိုယ်ထည်အပေါ် အခြေခံထုတ်လုပ်ထားခြင်းဖြစ်ပြီး အဆိုပါကိုယ်ထည်ပေါ်တွင်   ဒုံးပစ်စင်များကို တည်ဆောက်ထားခြင်းဖြစ်သည်။

အဆိုပါ Type 05 အတန်းအစား ဒုံးကျည်တင်ယာဉ်တွင် HJ-10 သို့မဟုတ် HJ-13 အမျိုးအစား တင့်ဖျက်ပဲ့ထိန်းဒုံးကျည်များကို တပ်ဆင်ထားဖွယ်ရှိသည်။ တရုတ်နိုင်ငံသည် အဆိုပါယာဉ်ကို ယခုနှစ်ဧပြီလနှောင်းပိုင်းကတရုတ်မီဒီယာတွင် ဖော်ပြခဲ့ခြင်းဖြစ်သည်။

၎င်းဒုံးကျည်တင်ယာဉ်သည် ရေထဲတွင် တစ်နာရီလျှင် ၃၀ ကီလိုမီတာအရှိန်နှုန်းဖြင့် မောင်းနှင်နိုင်ပြီး မောင်းနှင်အား ထုတ်လုပ်ပေးရန်အတွက် water jet နှစ်ခုနှင့် ဒီဇယ်အင်ဂျင် တစ်လုံးတို့ကိုတပ်ဆင်ထားသည်။

Type 05 အတန်းအစား ဒုံးကျည်တင်ယာဉ်ပေါ်တွင်တပ်ဆင်ထားသည့် တင့်ဖျက်ပဲ့ထိန်းဒုံးကျည်နှင့် အမြောက်စနစ်များကိုကမ်းထိုးရာဒေသများတွင် ဖြန့်ကြက်ထားသည့် ရန်သူ၏ အထိအခိုက်မခံသည့်ပစ်မှတ်များ၊ အထူးသဖြင့် သံချပ်ကာတိုက်ယာဉ်နှင့် ကမ်းရိုးတန်းကာကွယ်ရေးအမြောက်စနစ်များအား တိုက်ခိုက်ရာတွင် အသုံးပြုနိုင်ဖွယ်ရှိသည်။                         

Ref: YH, AMR  

Source: https://myawady.net.mm/

အိန္ဒိယနိုင်ငံသည် ပါကစ္စတန်နှင့် နယ်နိမိတ်ချင်းထိစပ်နေသော ဒေသများတွင် လေကြောင်းကာကွယ်ရေးတပ်ဖွဲ့အားလုံးကို အရေးပေါ် အခြေအနေများအတွက် အသင့်တပ်စွဲထားကြောင်း ANI သတင်းဌာနကကာကွယ်ရေးဝန်ကြီးဌာန၏ ကိုယ်စားလှယ်များ၏ ပြောကြားချက်ကို ကိုးကား၍ ဖော်ပြခဲ့ပါသည်။

“မမျှော်လင့်ထားသော ခြိမ်းခြောက်မှုများကို တုံ့ပြန်နိုင်ရန် အိန္ဒိယ-ပါကစ္စတန်နယ်စပ်တစ်လျှောက် လေကြောင်းရန်ကာကွယ်ရေး တပ်ဖွဲ့ အားလုံးကို အသင့်ပြင်ထားပြီးဖြစ်သည်” ဟု ကာကွယ်ရေးဝန်ကြီးဌာနမှ ထုတ်ပြန်ကြေညာခဲ့ပါသည်။

အဆိုပါသတင်းမတိုင်မီက အိန္ဒိယစစ်တပ်က ပါကစ္စတန်ဘက်မှ ကြားနေ ဇုန် (Line of Control) တွင် အမြောက်များ ပစ်ခတ်မှုကိုစတင်ခဲ့ကြောင်း သတင်းထုတ်ပြန်ခဲ့ပါသည်။ နယ်စပ်တစ်လျှောက် ဒေသအမျိုးမျိုးတွင်ပစ်ခတ်တိုက်ခိုက်မှုများ ဆက်လက်ဖြစ်ပွားနေသည်ဟုလည်း သတင်းရရှိထားသည်။

ကိုးကား - Tass

အိန္ဒိယသည် “Sindoor” စစ်ဆင်ရေးနှင့် ပတ်သက်၍ ရုရှားအပြင် အမေရိကန်၊ ဗြိတိန်၊ ဆော်ဒီအာရေဗျနှင့် ယူအေအီးတို့ကိုလည်း အသိပေးအကြောင်းကြားခဲ့ကြောင်း အိန္ဒိယအစိုးရ အရာရှိများက သတင်းထောက် များအား ပြောကြားခဲ့ပါသည်။

“အိန္ဒိယအနေဖြင့် ယခုလုပ်ဆောင်ချက်များကို ကြိုတင်အသိပေးရန်အကြီးတန်းအိန္ဒိယအရာရှိများသည် ၎င်းတို့၏နိုင်ငံအသီးသီးရှိ သက်ဆိုင်ရာ သံတမန်များနှင့် ဆွေးနွေးတိုင်ပင်ခဲ့ပါသည်။ ထိုနိုင်ငံများတွင် အမေရိကန်၊ ဗြိတိန်၊ ဆော်ဒီအာရေဗျ၊ ယူအေအီးနှင့် ရုရှားတို့ ပါဝင်ပါသည်” ဟု သတင်းရင်းမြစ်များက ပြောကြားခဲ့သည်။

အိန္ဒိယ၏ တိုက်ခိုက်မှုကြောင့် ပါကစ္စတန်ရှိ စစ်သွေးကြွစခန်းများတွင် အနည်းဆုံး အကြမ်းဖက်သမား ၁၂ ဦး သေဆုံးပြီး ၅၅ ဦး ဒဏ်ရာရရှိခဲ့ကြောင်း အိန္ဒိယရုပ်သံလိုင်း News 18 က ဖော်ပြထားပါသည်။

ကိုးကား - Tass

အိန္ဒိယတပ်ဖွဲ့များသည် ဂျမူးနှင့် ကက်ရှ်မီးယား ပြည်ထောင်စုနယ်မြေ၏ ပါကစ္စတန်ထိန်းချုပ်နယ်မြေအတွင်းရှိ ပစ်မှတ်ကိုးခုကို တိုက်ခိုက်မှုများ ပြုလုပ်ခဲ့ကြောင်း အိန္ဒိယအစိုးရ၏ ထုတ်ပြန်ချက်ကို ကိုးကား၍ ရိုက်တာ သတင်းဌာနက ဖော်ပြထားပါသည်။

နယူးဒေလီရှိ အိန္ဒိယအာဏာပိုင်များက အဆိုပါတိုက်ခိုက်မှုများသည် စစ်ရေးပစ်မှတ်များပေါ်တွင်သာ သီးသန့်လုပ်ဆောင်ခဲ့ကြောင်း ရှင်းလင်း ပြောကြားခဲ့သည်။

ပါကစ္စတန်ထိန်းချုပ်ထားသော ကက်ရှ်မီးယားဒေသ၏ အုပ်ချုပ်ရေးဗဟိုဖြစ်သော Muzaffarabad မြို့အနီးတွင် ပေါက်ကွဲမှုအများအပြား ဖြစ်ပွားခဲ့ကြောင်း အစောပိုင်း မျက်မြင်သက်သေများကို ကိုးကား၍ Reuters သတင်းဌာနက ဖော်ပြထားပါသည်။

ကိုးကား - Tass

အိန္ဒိယ၏ တတိယမြောက် လေယာဉ်ကို ကက်ရှ်မီးယားဒေသ၊ အဝန်တီပူရ် မြို့အနီးတွင် ပစ်ချခဲ့ကြောင်း ပါကစ္စတန် မီဒီယာများက ဖော်ပြထားပါသည်။

ကိုးကား-ပါကစ္စတန် မီဒီယာ

ကမ္ဘာလှည့်ခရီးသည်များအား လုပ်ကြံတိုက်ခိုက်မှုဖြစ်စဥ် ဖြစ်ပွားပြီး‌နောက် အိန္ဒိယနှင့် ပါကစ္စတန်နိုင်ငံတို့အကြား ဆက်ဆံရေး ဆိုးရွားစွာ ကျဆင်းလာမှုကြောင့် အဓိက လေကြောင်းလိုင်းများသည် ပါကစ္စတန်၏ လေပိုင်နက် အတွင်း ပျံသန်းပြေးဆွဲရန် ရှောင်ရှားလျက်ရှိသည်။ 

အဆိုပါလုပ်ကြံတိုက်ခိုက်မှုအပြီး ယင်းနှစ်နိုင်ငံအနေဖြင့် တစ်နိုင်ငံနှင့်တစ်နိုင်ငံ အပြန်အလှန် လေကြောင်းလိုင်းများ ပိတ်သိမ်းခြင်း၊ ဒုံးကျည် စမ်းသပ်မှုများ ဆောင်ရွက်ခြင်းနှင့် စစ်ရေးအရ တုံ့ပြန်မှုများ ပြုလုပ်ခြင်း တို့ကြောင့် နှစ်နိုင်ငံအကြား တင်းမာမှုများ ပိုမို မြင့်တက်လျက်ရှိသည်။ ထိုသို့ နှစ်နိုင်ငံအကြား တင်းမာမှုများ မြင့်တက်လာခြင်းကြောင့် ယခုအခါ အခြားအပြည်ပြည်ဆိုင်ရာ လေကြောင်းလိုင်းများ အပေါ်တွင်ပါ သက်ရောက်မှုများ ရှိလာခြင်းဖြစ်သည်။

Emirates အပါအဝင် ဗြိတိန်လေကြောင်းလိုင်းအချို့၊ ဆွစ်လေကြောင်း လိုင်းနှင့် အခြားလေကြောင်းလိုင်းများသည် ပါကစ္စတန်၏ လေပိုင်နက်ကို ရှောင်ရှားရန်အတွက် အာရေဗျပင်လယ်ကို ဖြတ်ပြီး လမ်းကြောင်းရှည်များဖြင့် ပျံသန်းနေရသည်။ ထို့ကြောင့် အနာဂတ်တွင် အဆိုပါ လေကြောင်းလိုင်းများအနေဖြင့် လောင်စာဆီ ပိုမိုသုံးစွဲရမည် ဖြစ်ပြီး ကုန်ကျစရိတ်များ မြင့်တက်လာနိုင်မည်ဖြစ်သည်။

ကိုးကား -CNN

ဘာသာပြန်ဆိုသူ- ဒေါ်မေသူခိုင်၊ လက်ထောက်ညွှန်ကြားရေးမှူး၊ နစက-၃