ကျောက်ဆည်   ဇန်နဝါရီ   ၃၀

မန္တလေးတိုင်းဒေသကြီး ကျောက်ဆည်မြို့နယ်၌ ဒေသတွင်းစားသုံးဆီဖူလုံပိုလျှံရေးအတွက်ဆောင်းရာသီဆီထွက်သီးနှံများဖြစ်သည့် မြေပဲ၊ နေကြာ၊ နှမ်း သီးနှံများ  စိုက်ပျိုးကြောင်းနှင့်အခြေခံသမဝါယမအသင်း ၆၃ သင်းမှအသင်းသားတောင်သူ၂၃၃၉  ဦးက ဆောင်းနေကြာ ၈၇၈၄ ဧကစိုက်ပျိုးထားကြောင်း သိရသည်။

ထိုသို့ ဆောင်းနေကြာစိုက်ခင်းများ စိုက်ပျိုးရာတွင် ရွှေဝါမြေ၊ ကျီးအိပ်၊ ဒွေးလှ၊ ရွှေဆူးလေ၊ ကျားကာ၊ ကလေး၊ ဖျောက်ဆိပ်ပင်၊ ပဲခင်း၊ သင်ပျို၊ ရန်ဘက်လို၊ ပန်းဝတ်ရည်၊ ဘုံကွင်း၊ ရွှေဒါး၊ အရှေ့ငယ်တိုး၊ မှိုင်းပန် လယ်ယာမြေနှင့် အထွေထွေသမဝါယမ အသင်းသား၊ အသင်းသူ ၅၄၉ ဦးက  ၂၁၃၆ ဧက၊ ရတနာမွန်၊ ရောင်နီဦး၊ ပန်းခွာ၊ဆယ်သိန်း၊ အောင်ဇေယျ၊ ပနံ၊ ဒါန်းတိုင်၊မြင်စိုင်း၊   သုခစိုက်ပျိုးရေးနှင့်အထွေထွေသမဝါယမ အသင်းသား၊   အသင်းသူ၃၄၄ ဦးက ၁၃၂၂ ဧက၊ ရွာတော်၊ ငါးလုံကုန်း၊ ညောင်ပင်ဇောက်၊   ဇရပ်ဖြူ၊  ငါးဆူ၊ ငွေပန်းကုန်း၊  ညောင်ဝန်း၊ မြင်းတွင်း၊ပတ္တာ၊ မြင်းချီနိုင်၊ မြင်းကဘက်၊ လက်ပံဇင်၊ ပေါင်လောင်လေး၊ ရွှေပေါက်ပင်၊ သံ-နောက်၊ ကင်း၊  တောင်တော်၊  မြေစိုမိုးကောင်း၊ လယ်ကြီး၊ တောတွင်၊ စိုက်မလန်း၊ ကိုးပင်၊ ရဲမအူ၊ ရွှေညောင်၊ န-ရွာနန်း၊ လက်ပံပင်၊ စွမ်းရည်၊ ရွှေအင်း၊ အင်ရောင်း၊ စပါယ်တော၊ ကောင်းတင်၊ စင်းကွန်း၊ ရွာသစ်၊ ရဲရွာ၊ ရှမ်းတောင်ဦး၊ ချောင်းဆုံ၊ ရဲဘော်ကြီး၊ ရေကြည်  စိုက်ပျိုးရေးနှင့်အထွေထွေသမဝါယမအသင်းသား၊  အသင်းသူ ၁၄၄၆ ဦးက ၇၄၆၂ ဧက   စိုက်ပျိုးထားသည်။

နေကြာစိုက်တောင်သူများ လူမှုစီးပွားဘဝဖွံ့ဖြိုးတိုးတက်ရေးနှင့်  နေကြာသီးနှံစိုက်ပျိုးရာတွင် ခက်ခဲမှုမရှိစေရေး မြို့နယ်သမဝါယမဦးစီးဌာနမှ နေကြာတစ်ဧကအတွက်  ငွေကျပ်နှစ်သိန်းနှင့်ညီမျှသောသွင်းအားစုများ ထုတ်ချေးပေးလျက်ရှိကြောင်း၊ နိုင်ငံတော်အစိုးရက စိုက်ပျိုးထုတ်လုပ်သူများအား လိုအပ်ချက်မရှိအောင်ကူညီဆောင်ရွက်ပေးလျက်ရှိရာ မိမိတို့လုပ်ငန်းများ ပိုမိုအောင်မြင်ရေးကိုအားသွန်ခွန်စိုက်ကြိုးပမ်းရမည်ဖြစ်သည်။

အလားတူ ဆီထွက်သီးနှံများ အများဆုံးစိုက်ပျိုးသည့်  တိုင်းဒေသကြီးနှင့်ပြည်နယ်များတွင် ပန်းတိုင်ရည်မှန်းချက်များအတိုင်းထွက်ရှိစေရေး ဆောင်ရွက်လျက်ရှိသဖြင့် ပြည်တွင်းစားသုံးဆီ ဖူလုံမှုကို များစွာအထောက်အကူပြုစေမည်ဖြစ်ကြောင်းသိရသည်။

Source: Myawady Web Portal

ဥဇဘက်ကစ္စတန်နိုင်ငံသည် ပြီးခဲ့သည့် ၂၀၂၄ ခုနှစ်အတွင်း ဒေါ်လာ ၁၈၆ ဒသမ၂သန်းတန်ဖိုးရှိ စပျစ်သီးများကို ပြည်ပသို့တင်ပို့နိုင်ခဲ့ကြောင်း အစိုးရကထုတ်ပြန်သည့်   စာရင်းအင်းများကိုကိုးကား၍ဒေသတွင်းမီဒီယာတစ်ခုက ထုတ်ပြန်သည်။

၂၀၂၄ ခုနှစ် ဇန်နဝါရီလမှ ဒီဇင်ဘာလအထိ ဥဇဘက်ကစ္စတန်မှ  ပြည်ပနိုင်ငံများသို့တင်ပို့သည့် စပျစ်သီးတင်ပို့မှုမှာ တန်ချိန်ပေါင်း ၂၁၉,၂၀၀ ရှိကြောင်း အစိုးရက ဇန်နဝါရီလ  ၂၉ ရက်တွင် ထုတ်ပြန်သည့် အစီရင်ခံစာတွင်ဖော်ပြထားသည်။

အဆိုပါပမာဏသည် ၂၀၂၃  ခုနှစ်ကတင်ပို့သည့်ပမာဏနှင့်နှိုင်းယှဉ်ပါက နှစ်ဆကျော်မြင့်တက်လာခြင်းဖြစ်သည်။

ဥဇဘက်ကစ္စတန်နိုင်ငံမှ စပျစ်သီးများကို ရုရှားနိုင်ငံက အများဆုံးတင်သွင်းလျက်ရှိပြီး ပြီးခဲ့သည့်နှစ်အတွင်းတန်ချိန်ပေါင်း ၁၇၄၉၀၀ တင်သွင်းခဲ့သည်။ ထို့ပြင် ကာဇက်စတန်နှင့် ကာဂျစ္စတန်နိုင်ငံတို့ကလည်း တန်ချိန်ပေါင်း  ၂၁,၀၀၀ နှင့် ၁၅,၄၀၀ အသီးသီးတင်သွင်းခဲ့သည်။

ဥဇဘက်ကစ္စတန်မှ စပျစ်သီးများကို ဘယ်လာရုဇ်နှင့်   ယူကရိန်းနိုင်ငံတို့ကလည်းတင်သွင်းလျက်ရှိသည်။

Ref: Xinhua, Fructidor

Source: Myawady Web Portal

အနောက်နိုင်ငံများ၏ စီးပွားရေးပိတ်ဆို့မှုများရှိနေသော်လည်း ရုရှားပြည်သူများ၏ မော်တော်ကားဝယ်ယူမှုသည်  ပြီးခဲ့သည့်နှစ်အတွင်း၌  ရူဘယ် ၄ ဒသမ ၉၁ထရီလီယံ (ဒေါ်လာ ၅၀ ဒသမ ၁ ဘီလီယံ) အသုံးပြုခဲ့ပြီး နိုင်ငံအတွင်းရှိ ကားဈေးကွက်တွင် တရုတ်နှင့် ရုရှားလုပ်မော်တော်ကားများက    ထိပ်ဆုံးမှဦးဆောင်လျက်ရှိကြောင်း ကားဈေးကွက်လေ့လာရေးအဖွဲ့တစ်ဖွဲ့ဖြစ်သည့် Avtostat က ထုတ်ပြန်သည်။

ရုရှားနိုင်ငံ၏  မော်တော်ကားသစ်များအပေါ် ငွေကြေးအသုံးပြုမှုသည် ၂၀၂၃ခုနှစ်က ပမာဏနှင့်နှိုင်းယှဉ်ပါက ၅၇ ရာခိုင်နှုန်းမြင့်တက်လာခြင်းဖြစ်သည်။ ထို့ပြင် ရုရှားကားဈေးကွက်တွင်   ဦးဆောင်နေသည့် တရုတ်နှင့် ရုရှားမော်တော်ကားများသည် ရုရှားနိုင်ငံအပေါ်ချမှတ်ထားသည့် ပိတ်ဆို့မှုများကြောင့်   နိုင်ငံအတွင်းမှ ထွက်ခွာသွားသည့်   အနောက်နိုင်ငံများနှင့်    ဂျပန်ကားကုမ္ပဏီများ၏နေရာတွင် အစားထိုးဝင်ရောက်လာခြင်းဖြစ်သည်။

၂၀၂၄ ခုနှစ်တွင် ရုရှားနိုင်ငံ၌ မော်တော်ကားသစ်အစီးပေါင်း ၁ ဒသမ ၅၇ သန်းခန့်ရောင်းချနိုင်ခဲ့ပြီး  ယင်းပမာဏသည် ငါးနှစ်အတွင်း     အမြင့်ဆုံးအဆင့်သို့ရောက်ရှိလာခြင်းဖြစ်ကြောင်း Avtostat နှင့် Gazprombank Auto Leasing တို့က ပူးတွဲထုတ်ပြန်သည့်   အစီရင်ခံစာတွင် ဖော်ပြထားသည်။

ရုရှားနိုင်ငံတွင် ၂၀၂၄ ခုနှစ် ဒီဇင်ဘာလအတွင်းရောင်းချနိုင်ခဲ့သည့် စာရင်းများအရ ယင်းလအတွင်း၌  တရုတ်နိုင်ငံထုတ် မော်တော်ကားများသည် ရုရှားနိုင်ငံတွင် ရောင်းချခဲ့သည့် မော်တော်ကား စုစုပေါင်းအနက် ၆၂  ရာခိုင်နှုန်းရှိပြီး ရုရှားထုတ်ကားများက ၁၇  ဒသမ  ၅ ရာခိုင်နှုန်းဖြင့်ဒုတိယနေရာတွင်     ရပ်တည်နိုင်ခဲ့သည်။ယင်းနောက်တွင်    ဥရောပထုတ်ကားများက    တတိယနှင့် ဂျပန်နိုင်ငံထုတ်မော်တော်ကားများက စတုတ္ထနေရာများ၌ အသီးသီးရပ်တည်ခဲ့သည်။

ရုရှားနိုင်ငံတွင် ပြီးခဲ့သည့်နှစ်က ရောင်းချခဲ့သည့် မော်တော်ကားများတွင်ဇိမ်ခံကားအမျိုးအစားပါဝင်မှုများမြင့်တက်လာကြောင်း Avtostat က ဆက်လက်ဖော်ပြသည်။     ရုရှားပြည်တွင်းဖြစ် ကားထုတ်လုပ်မှုတွင် Lada ကုမ္ပဏီထုတ် မော်တော်ကားများက ထိပ်ဆုံးမှရပ်တည်လျက်ရှိပြီး ၎င်းကုမ္ပဏီထုတ် Granta နှင့် Vesta ကားများမှာ လူကြိုက်များသည့် မော်ဒယ်များဖြစ်သည်။

Ref: RT

Source: Myawady Web Portal

ရန်ကုန်   ဇန်နဝါရီ   ၂၉

ရန်ကုန်တိုင်းဒေသကြီး အင်းစိန်မြို့နယ် ရှိ တညင်းကုန်းလက်ကားဈေးကြီး၏ ဈေးရုံအမှတ်(၁)တွင် နယ်စုံမှထွက်ရှိသော သစ်သီး၀လံများကို အဓိကရောင်းချပြီး  ယခုအခါ အဆိုပါဈေးကြီး၌   ရာသီပေါ် သစ်သီးများ လှိုင်လှိုင်ဝင်ရောက်လျက်ရှိရာလာရောက်ဝယ်ယူသူများဖြင့်   စည်ကား လျက်ရှိကြောင်း သိရသည်။

တညင်းကုန်းလက်ကားဈေးကြီးတွင် ဒေသအသီးသီးမှထွက်ရှိသော ကုန်မျိုးစုံ၊ ကုန်ခြောက်မျိုးစုံ၊    သစ်သီး၀လံများ၊        ဟင်းသီးဟင်းရွက်များနှင့် ရာသီပေါ်သီးနှံ များကို   လက်လီလက်ကားရောင်းချပေး လျက်ရှိပြီး လက်ရှိ တညင်းကုန်းလက်ကားဈေးကြီးရှိ ဈေးရုံငါးရုံတွင် ဆိုင်ခန်းပေါင်း  ၇၆၀၀ ကျော်  ဖွင့်လှစ်ထားကြောင်း သိရသည်။

“ဈေးရုံအမှတ်(၁)မှာ ဆိုင်ခန်းပေါင်း ၁၀၀၀ လောက်ရှိပြီးတော့ အဲဒီဈေးရုံမှာ သစ်သီး၀လံတွေကို အဓိကရောင်းချတာ ပါ။ လက်ရှိမှာ ရာသီပေါ်သီးနှံတွေဖြစ်တဲ့ စတော်ဘယ်ရီသီး၊ ထောပတ်သီး၊ လိမ္မော် သီး၊ စပျစ်သီး၊ ပျားလိမ္မော်၊ ဆီးသီး  စတဲ့ သစ်သီးဝလံတွေ အများအပြားဝင်ရောက် လျက်ရှိပါတယ်။ အဓိကက ရှမ်းပြည်နယ် ဘက်က ဝင်ရောက်တာများပါတယ်"  ဟု တညင်းကုန်းလက်ကားဈေးကြီးမှ အထွေထွေမန်နေဂျာ ဦးရဲထွန်းကပြောသည်။

တညင်းကုန်းလက်ကားဈေးကြီး၏ ဈေးရုံအမှတ်(၁)တွင်  သစ်သီး၀လံများ၊ ဈေးရုံအမှတ်(၂)တွင် ဟင်းသီးဟင်းရွက် များ၊ ဈေးရုံအမှတ် (၃)တွင် မီးဖိုချောင်သုံးကုန်မျိုးစုံနှင့်ကုန်ခြောက်ပစ္စည်းများ၊ ဈေးရုံအမှတ်(၄)တွင်  ရာသီပေါ်သစ်သီး ၀လံများနှင့် သားငါးများ၊  ဈေးရုံအမှတ်(၅)တွင်  ဆန်၊  ဆီ၊ ကြက်သွန်နီ စသည့်အခြေခံ စာသောက်ကုန်ပစ္စည်းများကို     ရောင်းချ ပေးလျက်ရှိသည်။

တညင်းကုန်းလက်ကားဈေးကြီးတွင် ၀န်ဆောင်မှုများအနေဖြင့်  လုံခြုံရေးအတွက်  ဈေးအတွင်းနေရာအနှံ့အပြား တွင် CCTV ကင်မရာများ  တပ်ဆင်ထား ခြင်း၊  လုံခြုံရေး၀န်ထမ်းများဖြင့်  နေ့ည မပြတ်   စောင့်ကြပ်ကြည့်ရှုခြင်း၊ ၂၄ နာရီ လျှပ်စစ်မီးရရှိစေရန် ဆောင်ရွက်ပေးထား ခြင်း၊ စားသောက်ဆိုင်များနှင့် အများသုံး သန့်စင်ခန်းများ ဖွင့်လှစ်ပေးထားခြင်းများ ဆောင်ရွက်ထားရှိကြောင်း၊ ထို့ပြင် မြန်မာ နိုင်ငံအနှံ့မှရန်ကုန်မြို့သို့လာရောက်၍  ကုန်ပစ္စည်းများ သယ်ယူပို့ဆောင်ကြသောကုန်တင်ယာဉ်အမျိုးမျိုး  လုံခြုံစိတ်ချစွာ ညအိပ်ရပ်နားနိုင်စေရန် ဈေး၀င်းအတွင်း ၌ ယာဉ်ရပ်နားစခန်းကိုလည်း  ဖွင့်လှစ် ထားရှိကြောင်း သိရသည်။  

Source: Myawady Web Portal

အမေရိကန်ဗဟိုဘဏ်ကအတိုးနှုန်းများကို မူလနှုန်းထားအတိုင်း ဆက်လက်သတ်မှတ်လိုက်ကြောင်း ကြေညာပြီးနောက် နာရီပိုင်းအကြာတွင် အမေရိကန်ဗဟိုဘဏ်နှင့် ဗဟိုဘဏ်ဥက္ကဋ္ဌ Jerome Powellတို့သည် စီးပွားရေးကို အလွဲသုံးစားလုပ်ကာ ငွေကြေးဖောင်းပွမှုကို ထိန်းချုပ်နိုင်စွမ်းမရှိကြောင်း အမေရိကန်သမ္မတ ဒေါ်နယ်ထရမ့် က စွပ်စွဲပြောကြားခဲ့ပါသည်။

Powell က ဇန်နဝါရီ ၂၉ ရက်(ဗုဒ္ဓဟူးနေ့) တွင် ကျင်းပပြုလုပ်သည့် အစည်းအဝေးတွင် အတိုးနှုန်းများကို ယခင်အတိုင်း ၄.၂၅ % မှ ၄.၅ % အထိ သတ်မှတ် ခဲ့ပါသည်။ အမေရိကန်စီးပွားရေးသည် သေချာရေရာသည့် အခြေအနေမဟုတ်သည့်အတွက် ဘဏ်၏အတိုးနှုန်းများကို ရုတ်တရက်လျှော့ချရန်မသင့်ဟု Powell ကပြောကြားခဲ့ပါသည်။ 

သမ္မတဒေါ်နယ်ထရမ့်သည် မဲဆွယ်စည်းရုံးသည့်ကာလအတွင်း အတိုးနှုန်းများကိုလျှော့ချပေးမည်ဟုပြောကြားခဲ့ပြီး လက်ရှိတွင်လည်း အမေရိကန်စီးပွားရေးကို အကြီးအကျယ်ပြောင်းလဲစေမည့် မူဝါဒများကို ချမှတ်နေသူဖြစ်ပါသည်။ သို့သော်လည်း ထိုမူဝါဒများသည် အမေရိကန်ဈေးနှုန်းများအပေါ်တွင် ဖိအားများဖြစ်စေနိုင်သည့်အတွက် အချို့သောစီးပွားရေးပညာရှင်များမှာ Powell ဘက်မှ ထောက်ခံနေကြပါသည်။

Powell ကမူ “၎င်းအနေဖြင့် ထရမ့်နှင့် အဆက်အသွယ်မရှိပါကြောင်း၊ အတိုးနှုန်းများကို အချက်အလက်အပေါ် တွင်သာ အခြေခံပြီးလုပ်ဆောင်ပါကြောင်း” ပြောကြားခဲ့ပါသည်။

ကိုးကား -BBC

ငဖဲ     ဇန်နဝါရီ    ၂၉

မကွေးတိုင်းဒေသကြီး   ငဖဲမြို့နယ်၌ ၂၀၂၄-၂၀၂၅ ဆောင်းသီးနှံစိုက်ပျိုးရာသီတွင်   ဆည်ရေနှင့်မြေအောက်ရေတို့ကို အသုံးပြု၍    ဒေသတွင်းစားနပ်ရိက္ခာဖူလုံစေရေးအတွက် ပဲမျိုးစုံ   ၇၁၅၂   ဧက စိုက်ပျိုးပြီးစီးပြီး လျာထားချက်ထက် ပိုမိုစိုက်ပျိုးနိုင်ခဲ့ကြောင်း မြို့နယ်စိုက်ပျိုးရေး ဦးစီးဌာနမှ သိရသည်။

၂၀၂၄-၂၀၂၅ ခုနှစ် ဆောင်းသီးနှံပဲမျိုးစုံအဖြစ် မတ်ပဲ၊ ပဲတီစိမ်း၊ ပဲကြီး၊ ကုလားပဲ၊ ပဲနောက်နှင့် အခြားပဲမျိုးစုံ  ၆၉၅၉ ဧက စိုက်ပျိုးရန်လျာထားခဲ့ရာ ယနေ့အထိ မတ်ပဲ၇၆၄   ဧက၊ ပဲတီစိမ်း ၄၉၈   ဧက၊ ကုလားပဲ ၅၅၀၈ ဧက၊ ပဲနောက် ၃၆၆ ဧကနှင့်  ပဲကြီး၁၆ ဧက  စုစုပေါင်း ၇၁၅၂    ဧက စိုက်ပျိုးပြီးစီးကာ လျာထားချက်ထက် ပိုမိုစိုက်ပျိုးနိုင်ကြောင်း၊ မိုးစပါးများရိတ်သိမ်းခြွေလှေ့အပြီး လယ်မြေများတွင် ဒေသခံတောင်သူများက ကုလားပဲနှင့် ပဲတီစိမ်းကို ပိုမိုစိုက်ပျိုးနိုင်ခဲ့ကြောင်းနှင့်    ငဖဲမြို့နယ်အနေဖြင့် ယမန်နှစ်က ပဲမျိုးစုံ ၆၈၈၃ ဧကကို စိုက်ပျိုးနိုင်ခဲ့ကာ အထွက်နှုန်းများကောင်းမွန် ကြောင်း သိရသည်။

ငဖဲမြို့နယ်တွင်  စိုက်ပျိုးပြီးစီးသော ပဲမျိုးစုံသီးနှံများအောင်မြင်ဖြစ်ထွန်းရေး၊ပဲမျိုးစုံအထွက်နှုန်းကောင်းမွန်ရေး၊ သဘာဝမြေဩဇာနှင့်ဓာတ်မြေဩဇာများ စနစ်တကျထည့်သွင်းရေး၊   ပေါင်းသတ်ဆေး အသုံးပြုခြင်း၊ ပိုးမွှားရောဂါကာကွယ်နှိမ်နင်းရေးနည်းလမ်းများနှင့် စနစ်တကျရိတ်သိမ်းနည်းများကို မြို့နယ်စိုက်ပျိုးရေးဦးစီးဌာန ဦးစီးမှူးနှင့် သက်ဆိုင်ရာကွင်းဝန်ထမ်းများက   အနီးကပ်ကြီးကြပ်၍ ပံ့ပိုးကူညီ ဆောင်ရွက်ပေးလျက်ရှိကြောင်း သိရသည်။     

Source: Myawady Web Portal        

ဂျပန် မော်တော်ကားထုတ်လုပ်သည့် ကုမ္ပဏီ ၃ ခုက ၎င်းတို့ ပူးပေါင်းတီထွင်ထားသော လုပ်ငန်းသုံးအသေးစား လျှပ်စစ်မော်တော်ယာဉ် EV များကို ၂၀၂၅ ဘဏ္ဍာရေးနှစ်အတွင်းမှာ ဖြန့်ချိရောင်းချမည်ဖြစ်ကြောင်း ကြေညာလိုက်ပါသည်။

အစိုးရအသိအမှတ်ပြုလက်မှတ်ရရန်အတွက် Daihatsu ကုမ္ပဏီက ဘေးကင်းရေးစမ်းသပ်မှုအတုများ ပြုလုပ်ခဲ့ခြင်းမှတ်တမ်းများ ပေါ်ထွက်လာပြီးနောက် Daihatsu ၊ Toyota နှင့် Suzuki တို့သည် အဆိုပါယာဉ်တီထွင်မှုကို ယာယီရပ်ဆိုင်းခဲ့ပါသည်။

၎င်းမော်တော်ယာဉ်များကို ၂၀၂၃ ဘဏ္ဍာရေးနှစ်အတွင်း ပွဲဦးထွက်ရောင်းချရန် စီစဉ်ထားခဲ့သော်လည်း Daihatsu က ၎င်းတို့လုပ်ဆောင်ခဲ့မှုများအတွက် ပြေလည်အောင်ဖြေရှင်းပြီးမှသာ တီထွင်မှုကိုပြန်လည် စတင်ခဲ့ပါသည်။

Daihatsu နှင့် Suzuki တို့၏ အသေးစား မော်တော်ယာဉ်ထုတ်လုပ်မှုနည်းပညာကို Toyota ၏ EV နည်းပညာနှင့်ပေါင်းစပ်ပြီး EV အသေးစားဗင်ကားများကို တီထွင်ထားခြင်းဖြစ်သည်။

အဆိုပါမော်တော်ယာဉ်သစ်များကို Daihatsu က ထုတ်လုပ်မည်ဖြစ်ပြီး ကုမ္ပဏီ ၃ ခု၏ ကိုယ်ပိုင်အမှတ် တံဆိပ်များတပ်ဆင် ရောင်းချမည်ဟုသိရပါသည်။

အသေးစား EV ဗင်ကားများ၏ ဝယ်လိုအားမြင့်မားနေပြီး ဂျပန်ကုန်ပစ္စည်းသယ်ယူပို့ဆောင်ရေး ကုမ္ပဏီအချို့က တရုတ် EV ကားများကို ပြောင်းလဲဝယ်ယူ လာနေကြခြင်းကြောင့် ပြိုင်ဆိုင်မှုများ ပြင်းထန်လာနေပါသည်။

ဝယ်လိုအားကို ပြည့်မီစေရန်အတွက် Mitsubishi Motors သည် လွန်ခဲ့သော ၃ နှစ်က EV မော်တော်ယာဉ်များရောင်းချမှုကို ပြန်လည်စတင်ခဲ့ပြီး Honda က အလားတူမော်ဒယ်များကို ၂၀၂၄ ခုနှစ်၊ အောက်တိုဘာလအတွင်း စတင်ရောင်းချခဲ့ပါသည်။

ကိုးကား-NHK World

သာယာဝတီ  ဇန်နဝါရီ  ၂၉

ပဲခူးတိုင်းဒေသကြီး သာယာဝတီမြို့နှင့် ၇ မိုင်ကွာဝေးသော ဖိုးခေါင်ကျေးရွာရှိ အိမ်ထောင်စုများသည်မိရိုးဖလာအိုးလုပ်ငန်းဖြစ်သော မြေအိုးအမျိုးမျိုးလုပ်ကိုင်ကာ အသက်မွေးဝမ်းကျောင်းပြုလုပ်ပြီး မိသားစုစားဝတ်နေရေးအဆင်ပြေလျက်ရှိကြောင်း သိရသည်။

မြေအိုးအမျိုးမျိုးပြုလုပ်ရာတွင် ရှေးဦးစွာ ရွာ၏အပြင်ဘက်ရှိ မြေကျင်းမှ မြေနီ၊ မြေစေးတို့ကို လှည်းဖြင့်တိုက်၍ မိမိတို့နေအိမ်တွင် စုပုံထားရကြောင်း၊  အိုးပြုလုပ်ရန်  နုန်းမြေတစ်ဆ မြေနီနှစ်ဆ မြေစေးတစ်ဆတို့ကိုရော၍    အင်တုံထဲတွင်ထည့်ကာ စိမ်ထားရကြောင်း၊ မြေများနူးလာပါက စေးသွားစေရန် ဖျာပေါ်သို့ပုံ၍ ခြေထောက်ဖြင့် အကြိမ်ကြိမ်နင်းနယ်ရကြောင်း၊ ထို့နောက် လက်လှည့်ဆုံပေါ်တွင်တင်ကာ  မိမိပြုလုပ်လိုသောအိုးပုံစံကို  လက်ဖြင့်ပုံဖော်၍ အဆင့်ဆင့် ပြုလုပ်ပြီးမှ မီးဖုတ်ရကြောင်း သိရသည်။

အဆိုပါ ဖိုးခေါင်ကျေးရွာမှထွက်ရှိသောအိုးများကို   အိုးအမျိုးအစားအလိုက် ဈေးနှုန်းအသီးသီးဖြင့် သာယာဝတီမြို့သို့သွားရောက်ရောင်းချရာ မိသားစုစားဝတ်နေရေးအဆင်ပြေလျက်ရှိကြောင်း ဖိုးခေါင်ကျေးရွာနေ မြေအိုးအမျိုးမျိုးလုပ်ကိုင်သူမသင်းသင်းမော်၏  ပြောကြားချက်အရ သိရသည်။

Source: Myawady Web Portal

BYD ကုမ္ပဏီထုတ်မော်တော်ကားသည် တရုတ်နိုင်ငံရှိ   မော်တော်ကားဈေးကွက်တွင် နာမည်ကြီး ဂျာမနီကားကုမ္ပဏီများကို ကျော်ဖြတ်၍ ဘဏ္ဍာငွေအများဆုံး ရှာဖွေပေးနိုင်သည့်ကားအဖြစ် ရပ်တည်နိုင်ခဲ့ကြောင်း Sina Finance တွင်ဖော်ပြထားသည်။

BYD ကုမ္ပဏီသည် ၎င်းတို့ထုတ်လုပ်သည့် မော်တော်ကားများအား ပျမ်းမျှအားဖြင့် တစ်စီးလျှင် ယွမ် ၁၂၁၀၀၀ (ဒေါ်လာ ၁၆၇၀၀) ဖြင့်ရောင်းချပေးခဲ့ပြီး တရုတ်ဈေးကွက်အတွင်း နှစ်စဉ်ရောင်းချမှုသည် မော်တော်ကားအစီးပေါင်း ၃ ဒသမ ၄၉ သန်းအထိမြင့်တက်လာခဲ့ခြင်းကြောင့် တရုတ်နိုင်ငံအတွက် ဘဏ္ဍာငွေအဖြစ် ယွမ် ၄၂၀ ဒသမ ၇ ဘီလီယံ (ဒေါ်လာ ၅၈ ဒသမ ၁ ဘီလီယံ) ရှာဖွေပေးနိုင်ခဲ့သည်။

ဘဏ္ဍာငွေအများဆုံး  ရှာဖွေပေးနိုင်သည့်စာရင်းတွင် BYD ကုမ္ပဏီပြီးနောက် နာမည်ကြီးဂျာမနီကုမ္ပဏီကြီးများဖြစ်သည့် Mercedes-Benz နှင့် Volkswagen တို့က ဒုတိယနှင့် တတိယနေရာအသီးသီးတွင် ရပ်တည်လျက်ရှိသည်။

ထို့ပြင်  အခြားကုမ္ပဏီများဖြစ်သည့် Aito  နှင့် Li Auto တို့ကလည်း ဘဏ္ဍာငွေအများဆုံးရှာဖွေပေးနိုင်သည့် မော်တော်ကားစာရင်းတွင်  ပါဝင်လာခဲ့ကြောင်း  Sina Finance တွင်    ဆက်လက်ဖော်ပြထားသည်။

Ref: CNChina

Source: Myawady Web Portal

ရုရှားနိုင်ငံသည် ယမန်နှစ်တွင် သဘာဝဓာတ်ငွေ့ရည် (LNG) တန်ချိန် ၃၃.၆ သန်း စံချိန်တင်တင်ပို့ခဲ့ပြီး ထက်ဝက်ကျော်သည် အီးယူဈေးကွက်သို့ တင်ပို့ခဲ့ကြောင်း စီးပွားရေးနေ့စဉ်ထုတ်သတင်းစာ RBK မှ ဇန်နဝါရီ ၂၈ ရက်နေ့တွင် စွမ်းအင်တင်ပို့မှုသုံးသပ်ရေးအဖွဲ့ Kpler ၏ အချက်အလက်များကို ကိုးကား၍ဖော်ပြခဲ့သည်။

အဆိုပါကိန်းဂဏန်းသည် ၂၀၂၂ ခုနှစ်တွင် သတ်မှတ်ထားသော ယခင်စံချိန်တင်တန်ချိန် ၃၂.၉ သန်းထက် ၄% တိုးလာသည်ဟု အစီရင်ခံစာကဖော်ပြခဲ့သည်။ ထို့အပြင် ရုရှားနိုင်ငံသည် ဒီဇင်ဘာလတွင် မှတ်တမ်းသစ်တစ်ခုရောက်ရှိခဲ့ပြီး LNG တန်ချိန် ၃ ဒသမ ၂၅ သန်း တင်ပို့နိုင်ခဲ့ကာ ယခင်လနှင့်နှိုင်းယှဉ်ပါက ၁၄ % တိုးလာပြီး ၂၀၂၃ ခုနှစ် ဒီဇင်ဘာလတွင် ယခင် သတ်မှတ်ထားသည့် အမြင့်ဆုံးထက် ၁.၃ % တိုးမြင့် လာခဲ့သည်။

အစီရင်ခံစာအရ နိုင်ငံ၏ LNG တင်ပို့မှုသည် ဒီဇင်ဘာလတွင် ၂၀၂၄ နှစ်ကုန်တွင် တန်ချိန် ၃၃ သန်း ခန့်ရောက်ရှိမည်ဟု ခန့်မှန်းထားသော ရုရှားဒုတိယ ဝန်ကြီးချုပ် Aleksandr Novak ၏ ထုတ်ပြန်ချက် များနှင့် ကိုက်ညီကြောင်းတွေ့ရှိရပါသည်။

အီးယူသို့တင်ပို့မှုသည် ခန့်မှန်းခြေအားဖြင့် တန်ချိန် ၁၇ ဒသမ ၄ သန်း သို့မဟုတ် ရုရှား၏ LNG တင်ပို့မှုစုစုပေါင်း၏ ၅၂% ရှိပြီး ၂၀၂၃ ခုနှစ်ထက် ၄%တိုးလာကြောင်း အစီရင်ခံစာတွင်ဖော်ပြထားသည်။ ရုရှားစွမ်းအင်အပေါ် မှီခိုအားထားမှုကို တားဆီးရန် EU က ကြိုးပမ်းခဲ့သော်လည်း သွင်းကုန်များ ပိုမိုမြင့်တက် လာခဲ့သည်။

ဇွန်လတွင် ဘရပ်ဆဲလ်သည် ရုရှား LNG ကို ပထမဆုံးအကြိမ် ပစ်မှတ်ထားခဲ့ပြီး ပြန်လည်တင်ဆောင်ခြင်း လုပ်ငန်းများ၊ သင်္ဘောမှသင်္ဘောလွှဲပြောင်းခြင်းနှင့် အီးယူမှတစ်ဆင့် တတိယနိုင်ငံသို့ ပြန်လည်တင်ပို့ရန် ရည်ရွယ်ချက်ဖြင့် သင်္ဘောမှသင်္ဘော လွှဲပြောင်းခြင်းများကို တားမြစ်ခဲ့သည်။ 

ပြင်သစ်၊ စပိန်၊ ဘယ်လ်ဂျီယံနှင့် နယ်သာလန်တို့သည် အီးယူအတွင်း ရုရှား LNG ကို ယမန်နှစ်တွင် အများဆုံး ဝယ်ယူသည့်နိုင်ငံများဖြစ်ကြောင်း အစီရင်ခံစာအရ သိရသည်။

တစ်ချိန်တည်းတွင် တန်ချိန် ၁၅ ဒသမ ၂ သန်းနှင့် ညီမျှသော စုစုပေါင်းတင်ပို့မှု၏ ၄၅ % ခန့်ကို အာရှ ဈေးကွက်များသို့ ဦးတည်ခဲ့သည်။ တရုတ်နိုင်ငံက တန်ချိန် ၇ သန်း တင်သွင်းခဲ့ပြီး၊ ဂျပန်က တန်ချိန် ၅ ဒသမ ၇ သန်း တင်သွင်းခဲ့ကာ တူကီယဲ နှင့် ကူဝိတ်တို့သို့လည်း တင်ပို့ခဲ့ရကြောင်း သိရှိရပါသည်။

ကိုးကား-RT