ယူကရိန်းသည် နေတိုးအဖွဲ့ဝင် ဖြစ်မလာပါက ယူကရိန်းစစ်တပ်ကို ၁.၅ သန်းအထိ တိုးချဲ့ဖွဲ့စည်းသွားရမည်ဖြစ်ကြောင်း ဖေဖော်ဝါရီ ၁၄ ရက် တွင် မြူးနစ်မြို့၌ ယူကရိန်းသမ္မတဇီလန်စကီးက သတင်းထောက်များ နှင့်တွေ့ဆုံချိန် ပြောကြားလိုက်ခြင်းဖြစ်ပါသည်။

လက်ရှိယူကရိန်းစစ်တပ်အင်အားမှာ ၎င်း၏ တစ်ဝက်ခန့်သာရှိကြောင်း ၊ ထိုသို့အင်အားတိုးချဲ့မည်ဆိုပါက ကုန်ကျစရိတ် ဒေါ်လာ ၆၀ ဘီလီယံ လိုအပ်မည်ဖြစ်ကြောင်း ၎င်းက ထပ်မံပြောကြားထားပါသည်။ 

ယူကရိန်းအနေဖြင့် လက်ရှိအချိန်တွင် နေတိုးအဖွဲ့ဝင် ဖြစ်လာနိုင်စရာအကြောင်းမရှိကြောင်း၊ အဖွဲ့ဝင်ဖြစ်လာရန် နောက်ထပ် ၂၅ နှစ် စောင့်ဆိုင်းရမည်ဖြစ်ကြောင်း အမေရိကန်ကာကွယ်ရေးဝန်ကြီး Pete Hegseth က အစောပိုင်းတွင် ပြောကြားထားပါသည်။

ကိုးကား- TASS

Photo: Apa.az

ယူကရိန်းခေါင်းဆောင် ဗလာဒီမာဇီလန်စကီးက ရုရှားသမ္မတ ဗလာဒီမာ ပူတင်နှင့်သာ ဆွေးနွေးရန်အဆင်သင့်ရှိကြောင်း၊ မော်စကို၏ ကိုယ်စားလှယ်များပါဝင်မည့် အခြားမည်သည့်ပုံစံကိုမဆိုပယ်ချကြောင်း ပြောကြားခဲ့ပါသည်။

ဇီလန်စကီးက ၂၀၂၂ ခုနှစ်တွင် ရုရှားခေါင်းဆောင်နှင့် မည်သည့် တုံ့ပြန်ဆက်သွယ်မှုကိုမဆို တားမြစ်သည့်အမိန့်တစ်ရပ်ကို ထုတ်ပြန်ခဲ့ပါသည်။ သို့သော် ယခုလအစောပိုင်း၌ ယူကရိန်းခေါင်းဆောင်က ဗြိတိန် သတင်းထောက် Piers Morgan ကို ပြောကြားရာတွင် “ယူကရိန်း နိုင်ငံသားများကို ငြိမ်းချမ်းရေးယူဆောင်လာနိုင်မည့် တစ်ခုတည်းသော ပုံစံဖြစ်မည်ဆိုပါက ၎င်းက ပူတင်နှင့်တွေ့ဆုံမည်” ဟု ဖြေကြားခဲ့ပါသည်။

မြူးနစ်လုံခြုံရေးညီလာခံ၌ ပြောကြားရာတွင် ဇီလန်စကီးက “မိမိအနေ ဖြင့် ရုရှားများနှင့်တွေ့ဆုံမည်မဟုတ်ကြောင်း၊ ရုရှား သမ္မတ ပူတင် တစ်ယောက်တည်းဖြင့်သာ တွေ့ဆုံမည်ဖြစ်ကြောင်း” ပြောကြားခဲ့ပါသည်။ ထို့နောက် ယူကရိန်း၊ အမေရိကန်နှင့် EU တို့အနေဖြင့် အခြေခံ အစီအစဉ်တစ်ခုကို ရေးဆွဲပြီးမှသာ “မိမိနှင့်ပူတင် ထိုင်ပြီး စစ်ပွဲကို ရပ်တန့်မည်" ဟု ထပ်လောင်းပြောကြားခဲ့ပါသည်။

ဇီလန်စကီးက “အခြားမည်သည့်သဘောတူညီမှုကိုမဆို” လက်မခံကြောင်း ပြောကြားခဲ့ပြီး အမေရိကန်သမ္မတ ဒေါ်နယ်ထရမ့်က ကြားဝင်ဆောင်ရွက်ပေးသူအဖြစ်သာမက ကိယက်ဗ်ကို ထောက်ခံပြီး အမှန်တကယ် ကူညီပေးမည်ဟု မျှော်လင့်ကြောင်း ပြောကြားခဲ့ပါသည်။

ကိုးကား-RT

ရုရှားသမ္မတ ဗလာဒီမာ ပူတင်သည် ယူကရိန်းဆိုင်ရာဆွေးနွေးပွဲအတွက် 'အတွေ့အကြုံရင့်ကျက်သောပုဂ္ဂိုလ်များ' အဖွဲ့ကို ဖွဲ့စည်းနေကြောင်း သိရှိရပါသည်။

လက်ရှိအချိန်တွင် ဆွေးနွေးပွဲတွင်ပါဝင်မည့်သူနှစ်ဦးကို သတင်းဌာနက ဖော်ပြထားပါသည်။ ၎င်းတို့မှာ နှစ်ပေါင်း ၅၀ကျော်ကြာ သံခင်းတမန်ခင်း တွင် အတွေ့အကြုံရှိသော သမ္မတပူတင်၏ ထိပ်တန်း နိုင်ငံခြားရေးမူဝါဒ အကြံပေး ယူရီ ဦးရှာကော့ဗ် (Yuri Ushakov) နှင့် KGB တွင် သမ္မတ ဗလာဒီမာ ပူတင်နှင့်အတူတူ တာဝန်ထမ်းဆောင်ခဲ့သော နိုင်ငံခြား ထောက်လှမ်းရေးဌာနအကြီးအကဲ ဆာဂေးနာရီရှ်ကင်း(Sergei Naryshkin) တို့ဖြစ်ပါသည်။ နှစ်ဦးစလုံးသည် ၂၀၂၂ခုနှစ် ဆွေးနွေးပွဲများတွင် ပါဝင်ခဲ့ကြပါသည်။ ထိုအဖွဲ့ ဖွဲ့စည်းပုံအရ ၂၀၂၂ ခုနှစ်က တောင်းဆိုချက်များနှင့် သမ္မတပူတင်၏ လက်ရှိတောင်းဆိုချက်များ သိသိသာသာ မပြောင်းလဲနိုင်ကြောင်း သတင်းဌာနက သုံးသပ်ထားပါသည်။ 

တစ်ချိန်တည်းတွင် သမ္မတနှင့်နီးစပ်သူ (ကီရီးလ် ဒီမီထရီယက်ဗ်) Kirill Dmitriev သည် အလွတ်သဘောဆွေးနွေးမှုလမ်းကြောင်းများမှတစ်ဆင့် ညှိနှိုင်းမှုများကိုဆက်လက်လုပ်ဆောင်မည်ကြောင်း သိရှိရပါသည်။

အမေရိကန်ဘက်မှ ပါဝင်မည့်သူများအဖြစ် နိုင်ငံခြားရေးဝန်ကြီး Marco Rubio၊ CIA ညွှန်ကြားရေးမှူး John Ratcliffe၊ အမျိုးသားလုံခြုံရေး အကြံပေး Mike Waltz နှင့်အမေရိကန်သမ္မတ ဒေါ်နယ်ထရမ့် ၏ အရှေ့ အလယ်ပိုင်းအထူးကိုယ်စားလှယ် Steven Whitkoff တို့ကို အစောပိုင်း တွင်သမ္မတဒေါ်နယ်ထရမ့် က ပြောကြားခဲ့ပါသည်။

ကိုးကား - Bloomberg

“ရုရှားနိုင်ငံကို G7 အဖွဲ့သို့ ပြန်လည်ပါဝင်စေလိုပါကြောင်း၊ ၎င်းတို့သည် စားပွဲဝိုင်းတွင် ပြန်လည်ထိုင်သင့်သည်ဟု ယုံကြည်ပါကြောင်း၊ ရုရှား သမ္မတ ဗလာဒီမာပူတင်လည်း ပြန်လာရန် အလွန်လိုလားမည်ဟုထင်ပါကြောင်း၊ အကယ်၍ G8 အဖြစ် ဆက်ရှိနေခဲ့ပါက ယူကရိန်းနှင့် ပတ်သက်သော ပြဿနာများ ဖြစ်ပွားခဲ့မည်မဟုတ်ကြောင်း အမေရိကန် သမ္မတ ဒေါ်နယ်ထရမ့်ကပြောကြားခဲ့ပါသည်။ 

အမေရိကန်သမ္မတဒေါ်နယ်ထရမ့်၏ အဆိုပါပြောဆိုချက်သည် ရုရှားနှင့် အနောက်နိုင်ငံများအကြား ဆက်ဆံရေးပြန်လည်တည့်မတ်ရေး ရည်ရွယ်ချက်ကို ထင်ဟပ်စေခဲ့ပြီး၊ ယူကရိန်းအရေးတွင် G8 ၏ စုစည်းမှုပျက်ပြားခြင်းကို သွယ်ဝိုက်ညွှန်းဆိုထားပါသည်။ ထို့အပြင် နိုင်ငံရေးအရ G8 ၏ အခန်းကဏ္ဍကို မီးမောင်းထိုးပြထားပါသည်။

ကိုးကား- RT

ရုရှားသမ္မတ ဗလာဒီမာပူတင်နှင့် ပထမဆုံး တွေ့ဆုံမည့် အစည်း အဝေးကို ဆော်ဒီအာရေးဗီးယားတွင် ကျင်းပရန် စီစဉ်ထားကြောင်း၊ အဆိုပါ တွေ့ဆုံမှုတွင် ဆော်ဒီအိမ်ရှေ့မင်းသား Mohammed bin Salman AI Saud လည်း ပါဝင်နိုင်ကြောင်း ထရမ့်က ပြောကြားလိုက်ပါသည်။ 

ဖေဖော်ဝါရီ ၁၂ ရက်တွင် ပူတင်နှင့် ထရမ့်တို့၏ တယ်လီဖုန်း ဆက်သွယ်ပြောကြားမှုသည် ၁ နာရီခွဲကြာမြင့်ခဲ့ပြီး နိုင်ငံသားများ အပြန်အလှန်လဲလှယ်မှုကိစ္စရပ်များအပါအဝင် ယူကရိန်း အရေးနှင့် အရှေ့အလယ်ပိုင်းဒေသ ဖွံ့ဖြိုးတိုးတက်ရေးဆိုင်ရာကိစ္စရပ်များကို ဆွေးနွေးခဲ့ကြောင်း ကရင်မလင်က ထုတ်ပြန်ထားပါသည်။ 

ထရမ့်နှင့် ပူတင်တို့ သည် ၂၀၁၉ ခုနှစ်၊ ဇွန်လကုန်ပိုင်းတွင် ဂျပန်နိုင်ငံ၊ အိုဆာကာမြို့၌ ကျင်းပသည့် G20 ထိပ်သီးအစည်းအဝေးတွင် နောက်ဆုံး အကြိမ် တွေ့ဆုံခဲ့သည်။

ကိုးကား-TASS

အမေရိကန်သမ္မတ ဒေါ်နယ်ထရမ့်က နျူကလီးယားလက်နက်များ မည်သည့်အခါမျှ အသုံးမပြုရလေအောင် မျှော်လင့်ထားကြောင်း ဖော်ပြခဲ့ပါသည်။

“မိမိ ဦးစွာလုပ်ဆောင်ချင်သည်မှာ တရုတ်နှင့်ရုရှားကို နျူကလီးယား လက်နက်ထုတ်လုပ်မှုနှေးကွေးရေး၊ ရပ်တန့်ရေးနှင့်လျှော့ချရေးအတွက် အစည်းအဝေးလုပ်ဆောင်ရန်ဖြစ်ပါကြောင်း၊ မိမိတို့တွင် နျူကလီးယား လက်နက်များ အများကြီးရှိနေပြီဖြစ်ကြောင်း၊ ကမ္ဘာကို ၅၀ ကြိမ်၊ ၁၀၀ ကြိမ် ဖျက်ဆီး၍ရနိုင်ကြောင်း၊ ယခု မိမိတို့က အသစ်ထုတ်နေကြောင်း၊ ရုရှား နှင့်တရုတ်တို့ကလည်း ထုတ်နေပါကြောင်း၊ အဆိုပါထုတ်လုပ်သည့် ငွေများကို အခြားအကျိုးရှိသော အရာများအတွက် အသုံးပြုနိုင်ရန် မျှော်လင့်ပါကြောင်း” အမေရိကန်သမ္မတ ဒေါ်နယ်ထရမ့်က အိမ်ဖြူတော်တွင် သတင်းထောက်များအား ပြောကြားခဲ့ပါသည်။ အဆိုပါ လက်နက်များ အသုံးပြုရမည့်အချိန် မည်သည့်အခါမျှ မရောက်စေလိုကြောင်း” ၎င်းက နိဂုံးချုပ်ပြောကြားခဲ့ပါသည်။

ထိုပြောဆိုချက်သည် နျူကလီးယားလက်နက်ထိန်းချုပ်ရေးဆိုင်ရာ နိုင်ငံတကာ ပူးပေါင်းဆောင်ရွက်မှုကို မီးမောင်းထိုးပြပြီး၊ ဒေါ်နယ်ထရမ့် ၏ နျူကလီးယားလက်နက်ထိန်းချုပ်ရေးဆိုင်ရာမူဝါဒကို ရှင်းလင်းစွာ ဖော်ပြထားပါသည်။

ကိုးကား - TASS

ယူကရိန်းသမ္မတ Volodymyr Zelenskyy က အမေရိကန်သမ္မတ Donald Trump သည် ၎င်းနှင့် စကားမပြောမီ ရုရှားသမ္မတနှင့် ဦးစွာ ဖုန်းဆက်စကားပြောဆိုခြင်းကို မကျေနပ်ကြောင်း အရိပ်အမြွက် ပြောဆို လိုက်ပါသည်။ ယူကရိန်းစစ်ပွဲအဆုံးသတ်ရေးအတွက် ရုရှားသည် အမေရိကန်နှင့် နှစ်ဖက်ညှိနှိုင်းကြိုးပမ်းမည်ကို စိုးရိမ်ကြောင်း Zelenskyy က ထုတ်ဖော်ပြောဆိုခဲ့ပါသည်။

Vladimir Putin နှင့် တယ်လီဖုန်းဆက် စကားပြောခဲ့သည်ဟု Trump က ဖေဖော်ဝါရီ ၁၂ ရက်နေ့တွင် ကြေညာခဲ့ပြီး စစ်ပွဲအဆုံးသတ်ရေး ရည်ရွယ်သည့် စေ့စပ်ညှိနှိုင်းမှုများစတင်ရန် ၎င်းတို့နှစ်ဦး သဘောတူ ခဲ့ကြောင်း ဆိုပါသည်။

Zelenskyy က ဖေဖော်ဝါရီ ၁၃ ရက်နေ့တွင် သတင်းထောက်များနှင့် တွေ့ဆုံခဲ့ရာ၌ Trump က Putin ကို ဦးစွာဖုန်းဆက်ခဲ့သည့်အကြောင်းနှင့်ပတ်သက်၍ "သိပ်ကျေနပ်စရာမဟုတ်ဘူး" ဟု Zelenskyy က ပြောခဲ့ ပြီး Putin သည် အမေရိကန်နှင့်သာ နှစ်ဖက်ညှိနှိုင်းမှုများ လုပ်ဆောင်လိုပြီး Putin ၏ အစီအစဉ်အတိုင်း ဆက်လက်လုပ်ဆောင်ရန် ခွင့်မပြုသင့်ကြောင်း ၎င်းကပြောဆိုခဲ့ပါသည်။

ဆက်လက်ပြီး ၎င်းက “မိမိတို့ပါဝင်ခြင်းမရှိဘဲ မည်သည့် သဘောတူ ညီချက်ကိုမျှ လက်ခံနိုင်မည်မဟုတ်ကြောင်း” ဖြည့်စွက်ပြောဆိုခဲ့ပါ သည်။

ရုရှားနှင့်ယူကရိန်းအကြား ရှေ့တန်းစစ်မြေပြင်တွင် တိုက်ပွဲများ ပြင်းထန်နေဆဲဖြစ်ပြီး အပစ်အခတ်ရပ်စဲရေး ညှိနှိုင်းဆွေးနွေးမှုများမစတင်မီ အသာစီးရမည့် အနေအထား၌ရှိနေရေး နှစ်ဖက်စလုံးက မျှော်လင့်နေကြကြောင်းသိရှိရပါသည်။

ကိုးကား-NHK World

ဆူဒန်နိုင်ငံ၌ ရုရှားရေတပ်အခြေစိုက်စခန်းတစ်ခု တည်ထောင်ရန် ဆွေးနွေးမှုများ အောင်မြင်စွာပြီးဆုံးခဲ့ပြီဖြစ်ကြောင်း ဆူဒန်နိုင်ငံခြားရေးဝန်ကြီး Ali Youssef Ahmed Al-Sharif က ထုတ်ပြန်ကြေညာခဲ့ပါသည်။

Ali Youssef Ahmed Al-Sharif က ရုရှားနိုင်ငံခြားရေးဝန်ကြီး ဆာဂေးလာရော့ဗ်နှင့် သတင်းစာရှင်းလင်းပွဲတစ်ခုတွင် ဤကိစ္စသည် လွန်စွာရိုးရှင်းကြောင်းနှင့် အားလုံးသဘောတူညီပြီးဖြစ်ကြောင်း ထုတ်ဖော် ပြောဆိုခဲ့ခြင်းလည်းဖြစ်ပါသည်။

၂၀၂၀ ခုနှစ် ဒီဇင်ဘာလတွင် စတင်လုပ်ဆောင်ခဲ့သော အဆိုပါ သဘောတူညီချက်သည် ရုရှားရေတပ်အတွက် ထောက်ပံ့ပို့ဆောင်ရေးဆိုင်ရာ အထောက်အကူပြု အဆောက်အဦတစ်ခုဖန်တီးမှုကို အလေးပေး ဖော်ပြထားကြောင်းလည်း သိရှိရပါသည်။ အဆိုပါရေတပ်အခြေစိုက်စခန်းတွင် သင်္ဘောများပြုပြင်မှုနှင့် ပြန်လည်ထောက်ပံ့ရေးတို့အတွက် အချက်အချာ နေရာတစ်ခုအဖြစ် ဆောင်ရွက်သွားမည်ဖြစ်ကြောင်းလည်း သိရပါသည်။

ထို့အပြင် ရေတပ်အခြေစိုက်စခန်းအတွင်းတွင် ဝန်ထမ်းအင်အား ၃၀၀ အထိ ထားရှိသွားမည်ဖြစ်ပြီး ရုရှားသင်္ဘော ၄ စင်းကို တစ်ချိန်တည်း၌ စခန်းချခွင့်ပြုထားမည်ဖြစ်ကြောင်းလည်းသိရှိရပါသည်။

ကိုးကား-NP News

အမေရိကန် သမ္မတ ဒေါ်နယ်ထရမ့်က မြူးနစ်လုံခြုံရေးညီလာခံ၏ ဘေးဘက်တွင် ဖေဖော်ဝါရီ ၁၄ ရက်နေ့၌ ရုရှား၊ ယူကရိန်းနှင့် အမေရိကန်မှ အဆင့်မြင့် တာဝန်ရှိသူများ ပါဝင်သည့် အစည်းအဝေး တစ်ရပ် ကျင်းပမည်ဟု ပြောကြားခဲ့ပါသည်။ ၂၀၂၂ ခုနှစ်ကတည်းက ရုရှားအရာရှိများသည် အဆိုပါညီလာခံသို့ တက်ရောက်လာခြင်းမရှိကြောင်း သိရှိရပါသည်။ အမေရိကန်၊ ရုရှားနှင့် ယူကရိန်း ကိုယ်စားလှယ်များသည် ရုရှားနှင့် ယူကရိန်းအကြား ပဋိပက္ခ ဖြေရှင်းရေးကိစ္စရပ်များကို မြူးနစ်ညီလာခံ၏ဘေးဘက်၌ ဆွေးနွေးမည်ဟု သမ္မတဒေါ်နယ်ထရမ့် က ဝါရှင်တန်တွင် သတင်းထောက်များအား ပြောကြားခဲ့ပါသည်။ 

အမေရိကန်သမ္မတက “ရုရှားက မိမိတို့နှင့်အတူ ပါဝင်မည်၊ ယူကရိန်း ကိုလည်း ဖိတ်ကြားထားသည်” ဟု ဖြည့်စွက်ပြောဆိုသော်လည်း မည်သူတို့ တက်ရောက်မည်ကို ပြောကြားခဲ့ခြင်းမရှိကြောင်း သိရှိရပါသည်။ ဒေါ်နယ်ထရမ့်က “နိုင်ငံတစ်နိုင်ငံဆီမှ မည်သူတို့ ပါဝင်မည်ကို အတိအကျ မသိရသေးသော်လည်း ရုရှား၊ ယူကရိန်းနှင့် အမေရိကန်မှ အဆင့်မြင့် အရာရှိများ တက်ရောက်လိမ့်မည်” ဟု ပြောကြားခဲ့ပါသည်။ 

ညီလာခံကို ဖေဖော်ဝါရီလ ၁၄ ရက်နေ့မှ ၁၆ ရက်နေ့အထိ ကျင်းပမည်ဖြစ်ပြီး အမေရိကန် ဒုတိယသမ္မတ ဂျေ.ဒီ. ဗန့်စ်နှင့် အမေရိကန် နိုင်ငံခြားရေးဝန်ကြီး မားကို ရူဘီယိုတို့သည် ယူကရိန်းသမ္မတ ဇီလန်စကီးနှင့် တွေ့ဆုံကာ ထရမ့်၏ ရုရှား-ယူကရိန်း စေ့စပ်ညှိနှိုင်းရေး တောင်းဆိုချက်များကို ဆွေးနွေးမည်ဟု ယူရိုနယူး သတင်းဌာနက ဖော်ပြခဲ့ပါသည်။ 

ရုရှား၏ မြူးနစ်ညီလာခံတွင် ပါဝင်မှုအပေါ် တရားဝင်ထုတ်ပြန်ချက် မရှိသေးကြောင်း သိရှိရပါသည်။ ၂၀၂၂ ခုနှစ်မှစ၍ ရုရှားအစိုးရ အဖွဲ့ဝင် များသည် အဆိုပါညီလာခံသို့ တတ်ရောက်ခြင်း မရှိခဲ့ကြောင်း သိရှိရပါသည်။

ကိုးကား - RBK

အမေရိကန်ပြည်ထောင်စု၏ ဖွဲ့စည်းပုံအခြေဥပဒေအရ လုပ်ပိုင်ခွင့်ကို ကျင့်သုံး၍ သမ္မတဒေါ်နယ်ထရမ့်သည် အမေရိကန်ပြည်ထောင်စု၏ တစ်သံတည်း နိုင်ငံခြားဆက်ဆံရေး (ONE VOICE FOR AMERICA’S FOREIGN RELATIONS) ကို ဖေဖော်ဝါရီ ၁၂ ရက်တွင် လက်မှတ် ရေးထိုးထုတ်ပြန်လိုက်ပါသည်။ 

ထိုသမ္မတအမိန့်တွင် ပုဒ်မ ၆ ခုပါဝင်ပါသည်။

ကိုးကား- White House 

အပြည့်အစုံကို အောက်ပါ link တွင် ဝင်ရောက်ဖတ်ရှုနိုင်ပါသည်- https://www.whitehouse.gov/presidential-actions/2025/02/one-voice-for-americas-foreign-relations/