ဟူသီသူပုန်တို့က ပင်လယ်နီအတွင်းစစ်ဆင်ရေးဆောင်ရွက်နေသည့် အမေရိကန်ရေတပ်မှ ဖျက်သင်္ဘော တစ်စင်းကို သင်္ဘောဖျက်ဒုံးကျည်ဖြင့် ပစ်ခတ်လိုက်ကြောင်း သိရသည်။

ဖျက်သင်္ဘောဖြစ်သည့် USS Laboon ကို ယီမင်နိုင်ငံအတွင်းရှိ ဟူသီသူပုန်တို့၏နေရာမှနေ၍ ဒုံးကျည်ဖြင့်ပစ်ခတ်လာခြင်းဖြစ်ကြောင်း    အမေရိကန်အလယ်ပိုင်း ကွပ်ကဲမှုဌာနချုပ်က ထုတ်ပြန်ထားသည်။

ဇန်နဝါရီလ ၁၄ ရက်  ယီမင်စံတော်ချိန် ညနေ ၄ နာရီ ၄၅ မိနစ်မှာ ယီမင်နိုင်ငံအတွင်းရှိ ဟူသီသူပုန်တို့ ထိန်းချုပ်ထားတဲ့နေရာမှ သင်္ဘောဖျက်ဒုံးကျည်တစ်စင်းကို  USS Laboon ဆီဦးတည်ပစ်လွှတ်လိုက်ပါတယ်။

ဒါပေမဲ့ အဲဒီဒုံးကျည်ကို ဟူဒေးဒါကမ်းရိုးတန်းအနီးမှာ အမေရိကန် တိုက်လေယာဉ်တစ်စင်းက ကြားဖြတ် ပစ်ချနိုင်ခဲ့ပါတယ်။ ထိခိုက်မှု၊     ဒဏ်ရာရရှိမှုမရှိပါဘူးဟု အလယ်ပိုင်းကွပ်ကဲမှုဌာနချုပ်၏ ထုတ်ပြန်ချက်တွင် ဖော်ပြထားသည်။

ဇန်နဝါရီလ ၁၂ ရက်တွင် အမေရိကန်နှင့်ဗြိတိန်တို့က ယီမင်နိုင်ငံပြည်နယ်လေးခုရှိ ဟူသီသူပုန်တို့၏ စစ်ရေးပစ်မှတ် ၂၃ ခုကို လေကြောင်းမှတိုက်ခိုက်မှုများ လုပ်ဆောင်သည်။ အဆိုပါတိုက်ခိုက်မှုများသည် နေရာ ၁၆ ခုရှိ ပစ်မှတ်အခု ၆၀ ကျော်ကို ထိမှန်ကြောင်း အမေရိကန်လေတပ်ဗဟိုဌာနချုပ်ကထုတ်ပြန်သည်။

ပင်လယ်နီဒေသအတွင်း ဟူသီသူပုန်တို့က အမေရိကန်၊ အစ္စရေးတို့နှင့်ဆက်စပ်နေသည့် ကုန်တင်သင်္ဘောများကို ပစ်မှတ်ထားတိုက်ခိုက်မှုများလုပ်ဆောင်လျက်ရှိသည်။

ထိုဒေသရှိ ဟူသီသူပုန်တို့ကိုလက်တုံ့ပြန်ရေးနှင့် ပင်လယ်နီဒေသဘေးကင်းလုံခြုံရေးအတွက် နိုင်ငံပေါင်းစုံ ပါဝင်သော မဟာမိတ်တပ်ပေါင်းစုကိုဖွဲ့စည်းသည်ဟု အမေရိကန်ကာကွယ်ရေးဝန်ကြီး လွိုက်သြစတင်က ဒီဇင်ဘာလတွင်  ကြေညာပြီးနောက် ယခုကဲ့သို့ အပြန်အလှန် တိုက်ခိုက်မှုများ ဖြစ်ပွားလာခြင်းဖြစ်ကြောင်း သိရသည်။      

Ref: Sputnik

Source: MWD Web Portal

ရုရှားက Iskander ပဲ့ထိန်း ဒုံးကျည်များကို သုံး၍ ယူကရိန်း မြို့တော် ကိယက်ဗ်ကို တခြားဒေသတွေနှင့်အတူ ပစ်မှတ်ထားတိုက်ခိုက်ရန် စတင်နေပြီဖြစ်ကြောင်း သတင်းရရှိသည်။ 

နေတိုး အဖွဲ့ဝင် နိုင်ငံများအားလုံးလည်း ယခု သတိကြီးစွာ ထားနေရပြီဖြစ်ပါသည်။ ရုရှားနိုင်ငံအနေဖြင့် ဒရုန်းထောက်ပံ့ရေးဌာနများကိုလည်း ပစ်မှတ်ထား တိုက်ခိုက်နိုင်ဖွယ်ရှိကြောင်း သတင်းရရှိသည်။

ကိုးကား- အင်တာနက်စာမျက်နှာ 

ရုရှားနိုင်ငံခြားရေးဝန်ကြီး ဆာဂျေ လာဗရော့ဗ်သည် တနင်္ဂနွေနေ့ (ဇွန် ၁) က အမေရိကန်နိုင်ငံခြားရေးဝန်ကြီး မာကို ရူဘီယိုနှင့် အစ္စတန်ဘူလ်တွင် ကျင်းပမည့် မော်စကို-ကိယက်ဗ်ဆွေးနွေးပွဲနှင့် ရုရှားနယ်မြေအတွင်း ယူကရိန်းတိုက်ခိုက်မှုများအကြောင်း ဖုန်းဆက်ဆွေးနွေးခဲ့ကြသည်။

တူရကီနိုင်ငံတွင် ကျင်းပမည့် ဆွေးနွေးပွဲမတိုင်မီ တစ်ရက်အလိုတွင် ရုရှား၏ နယ်စပ်ဒေသဖြစ်သော ဘရီယန်းစ်နှင့် ကာ့စ်ခ်တို့တွင် တံတား နှစ်စင်း ပြိုကျပျက်စီးခဲ့ပြီး အနည်းဆုံး ခုနစ်ဦးသေဆုံးကာ ဒါဇင်ချီ ဒဏ်ရာရရှိခဲ့ပြီး အဆိုပါ ဖြစ်ရပ်များသည် ဖောက်ခွဲဖျက်ဆီးမှုများကြောင့် ဖြစ်သည်ဟု ရုရှားစုံစမ်းစစ်ဆေးရေး ကော်မတီက ဆိုသည်။ 

ထိုနေ့ညနေပိုင်းတွင် ရုရှား၏ မြောက်ပိုင်း မာမန်စ်ခ်ဒေသ၊ အနောက်ပိုင်း အီဗာနိုဗိုနှင့် ရီယာဇန်ဒေသများ၊ ဆိုက်ဘီးရီးယားရှိ အီရ်ကုတ်စ်ခ် ဒေသ နှင့် အရှေ့ဖျားပိုင်း အမုရ်ဒေသရှိ လေတပ်စခန်းများကို ဒရုန်းများဖြင့် တိုက်ခိုက်ခံခဲ့ရသည်။

ရုရှားနိုင်ငံခြားရေးဝန်ကြီးဌာန၏ ထုတ်ပြန်ချက်အရ ရူဘီယိုက “ဇွန် ၁ ရက်နေ့တွင် ဘရီယန်းစ်နှင့် ကာ့စ်ခ်ဒေသရှိ ရထားလမ်းအခြေခံ အဆောက် အအုံများ ဗုံးခွဲတိုက်ခိုက်ခံရမှုကြောင့် ပြည်သူများ သေဆုံးရသည်ကို ဝမ်းနည်းကြောင်း” ပြောကြားခဲ့သည်။

လာဗရော့ဗ်က အဆိုပါတိုက်ခိုက်မှုများကို သေချာစွာစုံစမ်းစစ်ဆေး သွားမည်ဖြစ်ပြီး ရလဒ်များကို အမြန်ဆုံး ထုတ်ပြန်သွားမည် ဟု ပြောကြား ခဲ့သည်။

“ပြစ်မှုကျူးလွန်သူများကိုဖော်ထုတ်ပြီး ၎င်းတို့အနေဖြင့် ထိုက်တန်သည့် အပြစ်ဒဏ်ကို မလွဲမသွေခံရမည်” ဟု ၎င်းက ဖြည့်စွက် ပြောကြားခဲ့သည်။

လာဗရော့ဗ်နှင့် ရူဘီယိုတို့သည် ဇွန် ၂ ရက်တွင် အစ္စတန်ဘူလ်၌ ကျင်းပမည့် ရုရှား-ယူကရိန်းညှိနှိုင်းဆွေးနွေးပွဲအပါအဝင် ယူကရိန်း အကျပ်အတည်း၏ နိုင်ငံရေးအရဖြေရှင်းနည်းဆိုင်ရာ အဆိုပြုချက်များနှင့်ပတ်သက်၍ အမြင်ချင်းဖလှယ်ခဲ့ကြသည်။

အမေရိကန်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ တာမ်မီဘရုစ် က ရူဘီယိုသည် “တည်တံ့ခိုင်မြဲသောငြိမ်းချမ်းရေးအတွက် ရုရှားနှင့် ယူကရိန်းတို့အကြား တိုက်ရိုက်ဆွေးနွေးမှုများ ဆက်လက် လုပ်ဆောင်ရန် သမ္မတထရမ့်၏ တောင်းဆိုချက်ကို ထပ်လောင်းပြောကြားခဲ့သည်” ဟု ဖော်ပြခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

Colorado ပြည်နယ် Boulder မြို့တွင် တနင်္ဂနွေနေ့ (ဇွန် ၁) က Hamas အဖွဲ့၏ ထိန်းသိမ်းခံ အစ္စရေးဓားစာခံများ၏ ဓာတ်ပုံများကို ကိုင်ဆောင်ကာ ထောက်ခံဆန္ဒပြပွဲပြုလုပ်နေသည့် လူစုလူဝေးအတွင်းသို့ Molotov Cocktail မီးလောင်ဗုံးများဖြင့် ပစ်ခတ်ခဲ့သူအား ဖမ်းဆီးခဲ့ကြောင်း သိရှိရသည်။

ဖြစ်စဉ်မှတ်တမ်းဗီဒီယိုများတွင် အင်္ကျီမပါသည့် လူတစ်ဦးသည် Molotov Cocktail မီးလောင်ဗုံးများကိုင်ဆောင်ကာ “ပါလက်စတိုင်း လွတ်မြောက်ရေး” ဟု အော်ဟစ်နေပုံကို တွေ့ရပြီး နောက်ပိုင်းတွင် ရဲများက ဝင်ရောက် ဖမ်းဆီးခဲ့သည်ကို မြင်တွေ့ရသည်။

FBI ဒါရိုက်တာ Kash Patel က X တွင် “Colorado၊ Boulder ရှိ အကြမ်းဖက်တိုက်ခိုက်မှုကို သေချာစွာစုံစမ်းစစ်ဆေးနေပြီး ၎င်းတို့၏ အေးဂျင့်များနှင့် ဒေသဆိုင်ရာရဲတပ်ဖွဲ့များ အခင်းဖြစ်ရာနေရာတွင် ရောက်ရှိနေပါသည် ဟု ထုတ်ပြန်ခဲ့ပြီး ဒဏ်ရာရရှိခဲ့သူအချို့အား ဆေးရုံတင်ခဲ့ရကြောင်း အတည်ပြုခဲ့သည်။

FBI အထူးအေးဂျင့် Mark Michalek က "Free Palestine" အော်ဟစ်ကာ လူခြောက်ဦးကိုဒဏ်ရာရစေရန် တိုက်ခိုက်ခဲ့သူမှာ Mohamed Sabry Soliman (၄၅ နှစ်) ဖြစ်ကြောင်း ထုတ်ဖော်ပြောကြားခဲ့သည်။ “ထိုကဲ့သို့သောတိုက်ခိုက်မှုများသည် တစ်နိုင်ငံလုံးတွင် မကြာခဏ ဖြစ်ပွားလာနေသည်မှာ ဝမ်းနည်းစရာပင်” ဟု ၎င်းက မှတ်ချက်ပြုခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

ဝန်ကြီးချုပ် ကီယာ စတာမာက တနင်္လာနေ့ (ဇွန် ၂) တွင် ပြောကြားသည့် မိန့်ခွန်းတွင် ဗြိတိန်နိုင်ငံသည် စစ်အင်အား တိုးချဲ့တည်ဆောက်ရေး အရှိန်အဟုန်မြှင့်တင်ရန် အဓိက လက်နက်ခဲယမ်းများ ပြန်လည် ထုတ်လုပ်ရေးလုပ်ငန်းစဉ်ကို စတင်ခဲ့သည်ဟု ထုတ်ဖော်ပြောကြား ခဲ့သည်။

စတာမာက ၎င်း၏ အစိုးရအဖွဲ့၏ “မဟာဗျူဟာမြောက် ကာကွယ်ရေး သုံးသပ်ချက်” (Strategic Defense Review) ကို ကြေညာခဲ့ပြီး ယင်းတွင် နေတိုးအဖွဲ့ဝင်နိုင်ငံများ၏ လှုပ်ရှားမှုများနှင့်အညီ လက်နက် စွမ်းအားမြှင့်တင်ရေးအစီအစဉ်များ ပါဝင်သည်။ လွန်ခဲ့သည့် သီတင်းပတ် က ဗြိတိန် ကာကွယ်ရေးဝန်ကြီး ဂျွန်ဟိလီက လန်ဒန်သည် လက်နက် စက်ရုံများ၊ တာဝေးပစ် ဒုံးပစ်စနစ်များနှင့် အခြားစစ်အင်အားများ တည်ဆောက်ရန် ဘီလီယံပေါင်းများစွာ သုံးစွဲမည်ဖြစ်ကြောင်း ကြေညာကာ “မော်စကိုသို့ သတင်းစကားပေးပို့ခဲ့ခြင်း” ဖြစ်သည်ဟု ပြောကြားခဲ့သည်။

၎င်းကို ရုရှားက အနောက်နိုင်ငံများသည် ပြည်သူ့ဘဏ္ဍာငွေများကို စစ်ရေးအသုံးစရိတ်များသို့ လွှဲပြောင်းရန် အကြောင်းပြချက်များ ဖန်တီး နေသည်ဟု စွပ်စွဲခဲ့သည်။

စတာမာက ဂလပ်စဂိုမြို့ရှိ သင်္ဘောကျင်းတစ်ခုတွင် “မိမိတို့အနေဖြင့် စစ်အတွက် အဆင်သင့်ဖြစ်နေရန် ဆောင်ရွက်နေပြီ” ဟု ပြောကြားခဲ့ပြီး “ဗြိတိန်၏ ကာကွယ်ရေးမူဝါဒသည် နေတိုးကို အမြဲတမ်း ဦးစားပေးမည်” ဟု ဖြည့်စွက်ခဲ့သည်။ ၎င်းက ဗြိတိန်ကို “အနာဂတ် ဆယ်စုနှစ်များအတွက် အခိုင်မာဆုံး မဟာမိတ်များနှင့် အဆင့်မြင့်နည်းပညာများဖြင့် စစ်အင်အားပြည့်ဝသော နိုင်ငံတစ်ခု” အဖြစ် ပြောင်းလဲမည်ဟု ကတိပြု ခဲ့သည်။ 

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

ဇွန်လ ၁ ရက်နေ့က ဂါဇာတောင်ပိုင်းရှိ အစားအစာဖြန့်ဝေသည့်နေရာအနီး အစ္စရေးကတိုက်ခိုက်မှု၌ ဒေသခံ ပြည်သူ ၃၀ ဦးထက်မနည်း သေဆုံးခဲ့ကြောင်း ဂါဇာကျန်းမာရေးအာဏာပိုင်များက စွပ်စွဲပြောကြားခဲ့ပြီး အဆိုပါ စွပ်စွဲချက်ကို အစ္စရေးက ငြင်းဆိုခဲ့သည်။

အမေရိကန်က ကျောထောက်နောက်ခံပြုထားသည့် ဂါဇာဒေသ လူသားချင်းစာနာထောက်ထားမှုဆိုင်ရာ အကူအညီပေးရေးဖောင်ဒေးရှင်းသည် ရာဖာ၌ ကူညီကယ်ဆယ်ရေးပစ္စည်းများကို ဖြန့်ဝေပေးလျက်ရှိရာ အဆိုပါ ကယ်ဆယ်ရေးပစ္စည်းများ ဖြန့်ဝေရာနေရာအနီး၍ အစ္စရေးတပ်ဖွဲ့များက ပစ်ခတ်တိုက်ခိုက်မှုတွင် ဒေသခံပြည်သူ ၃၀ ဦးထက်မနည်း သေဆုံးခဲ့ပြီး ၁၅၀ ကျော် ထိခိုက်ဒဏ်ရာ ရရှိခဲ့ကြောင်း ဂါဇာကျန်းမာရေး အာဏာပိုင်များနှင့် သတင်းမီဒီယာများက ထုတ်ဖော်ပြောကြားခဲ့သည်။

အဆိုပါသတင်းအပေါ် အစ္စရေးစစ်ဘက်က “လက်ရှိတွင် လူသားချင်းစာနာ ထောက်ထားမှုဆိုင်ရာ အကူ အညီများ ဖြန့်ဝေပေးသည့်နေရာအနီးအနား၌ အစ္စရေးတပ်မတော်၏ ပစ်ခတ်တိုက်ခိုက်မှုကြောင့်ထိခိုက် ဒဏ်ရာရရှိသည့်ဖြစ်စဉ်မရှိကြောင်း” တုံ့ပြန်ပြောကြားခဲ့သကဲ့သို့ ဂါဇာဒေသလူသားချင်းစာနာ ထောက်ထားမှု ဆိုင်ရာအကူအညီပေးရေးဖောင်ဒေးရှင်း(GHF)ကလည်း “ဂါဇာဒေသခံများ သေဆုံးဒဏ်ရာရရှိမှုသတင်းမှာ လုံးဝမှားယွင်းသည့်သတင်းဖြစ်ပြီး မဟုတ်မမှန် စွပ်စွဲပြောဆိုခြင်းသာ ဖြစ်ကြောင်း” တုံ့ပြန်ပြောကြားခဲ့ကြောင်း ဖြင့် NHK သတင်းစာမျက်နှာတွင် ရေးသားဖော်ပြထားပါသည်။

ကိုးကား- NHK 

အလွတ်သဘောဘာသာပြန်သူ- ဦးထက်ထက်အောင်၊ နစက (၄)

ရုရှားကာကွယ်ရေးဝန်ကြီးဌာနက တနင်္ဂနွေနေ့ (ဇွန် ၁) တွင် ထုတ်ပြန်ချက် အရ ကိယက်ဗ်မှ တာဝန်ရှိသည်ဟု စွပ်စွဲထားသော ကမီကာဇေ ဒရုန်း တိုက်ခိုက်မှုများဖြင့် ရုရှားနိုင်ငံတစ်ဝှမ်းရှိ စစ်ဘက်ဆိုင်ရာ လေယာဉ်ကွင်း များကို တိုက်ခိုက်ခံခဲ့ရကြောင်းသိရှိရသည်။ အများစုမှာ အောင်မြင်စွာ ကာကွယ်နိုင်ခဲ့သော်လည်း အချို့တွင် ပစ္စည်းထိခိုက်ဆုံးရှုံးမှုများ ဖြစ်ပေါ် ခဲ့ကြောင်း ဝန်ကြီးဌာနက ဖြည့်စွက်ပြောကြားခဲ့သည်။

ထိုတိုက်ခိုက်မှုများတွင် မြောက်ဘက်ရှိ Murmansk ဒေသ၊ ဗဟိုရုရှားရှိ Ivanovo နှင့် Ryazan ဒေသများ၊ ဆိုက်ဘေးရီးယားရှိ Irkutsk ဒေသနှင့် အရှေ့ဖျားရှိ Amur ဒေသတို့မှ လေယာဉ်ကွင်းများ ပစ်မှတ်ထား တိုက်ခိုက် ခံခဲ့ရသည်ဟု ဝန်ကြီးဌာနက ဆိုသည်။ တိုက်ခိုက်မှုအားလုံးတွင် FPV (First-Person View) ကမီကာဇေဒရုန်းများ အသုံးပြုထားပြီး အချို့မှာ လေယာဉ်ကွင်းအနီးရှိ နယ်မြေများမှ လွှတ်တင်ခဲ့ခြင်းဖြစ်ကြောင်း ဖော်ပြ ခဲ့သည်။

တိုက်ခိုက်မှုများနှင့်သက်ဆိုင်သည့် အချို့ပြစ်မှုကျူးလွန်သူများကို ဖမ်းဆီးထားပြီးဖြစ်သော်လည်း ဖမ်းဆီးခံရသူအရေအတွက်နှင့် ၎င်းတို့၏ အထောက်အထားများကိုမူ မဖော်ပြခဲ့ပေ။ ရုရှားစစ်တပ်က ကိယက်ဗ် အစိုးရသည် အဆိုပါအကြမ်းဖက်တိုက်ခိုက်မှုများအတွက် တာဝန်ရှိကြောင်း ပြောကြားခဲ့သည်။

Ivanovo ၊ Ryazan နှင့် Amur ဒေသများတွင် တိုက်ခိုက်မှုများကို ကာကွယ်နိုင်ခဲ့ပြီး ပစ္စည်းနှင့် လူသေဆုံးမှုမရှိခဲ့ကြောင်း၊ Murmansk နှင့် Irkutsk ဒေသများတွင်မူ လေယာဉ်အချို့မီးလောင်ပျက်စီးမှုများ ဖြစ်ပေါ် ခဲ့ကြောင်း စစ်တပ်က ပြောကြားခဲ့ပြီး တိုက်ခိုက်ခံရမှု ဖြစ်စဉ်အားလုံး၌ လူသေဆုံးမှုမရှိကြောင်း ဝန်ကြီးဌာန၏ အချက်အလက်များအရ သိရ သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

ယူကရိန်းဒရုန်းတိုက်ခိုက်မှုအပြီး Belaya လေတပ်စခန်း၏ ဂြိုလ်တုပုံရိပ်များတွင် ရုရှား၏ နျူကလီယားဗုံး သယ်ဆောင်နိုင်သည့် ဗုံးကြဲ လေယာဉ်ကြီး အနည်းဆုံး ၄ စင်း ပျက်စီးနေသည်ကို တွေ့ရသည်။

အမေရိကန်ကုမ္ပဏီ Umbra မှ ဇွန် ၁ ရက်က ရိုက်ယူပြီး DD Geopolitics မှ ထုတ်ပြန်သည့် ဂြိုလ်တုပုံများအရ Tu-95 နျူကလီယား ဗုံးသယ် လေယာဉ် ၃ စင်း နှင့် Tu-22M3 ဗုံးကြဲလေယာဉ် ၁ စင်း ပျက်စီးနေပြီး၊ အခြား Tu-95 ၁ စင်းလည်း ပျက်စီးနေသည်ကို ဆိုက်ဘေးရီးယားဒေသ၊ Irkutsk စီရင်စုရှိ ရုရှား၏ Belaya လေတပ်စခန်းတွင် တွေ့ရသည်။

ယင်းပုံရိပ်များကို ယူကရိန်းတပ်ဖွဲ့ဝင်များက “Operation Spider Web” စစ်ဆင်ရေးဖြင့် Belaya အပါအဝင် ရုရှားနယ်မြေအတွင်းရှိ လေတပ် စခန်း ၅ ခုကို FPV ဒရုန်းများဖြင့် တစ်ပြိုင်နက်တိုက်ခိုက်ပြီးနောက် ရိုက်ကူးခဲ့ခြင်းဖြစ်သည်။ ယူကရိန်းတပ်များသည် ဒရုန်းများကို လေဆိပ် အနီးရှိ ကုန်တင်ကွန်တိန်နာများအတွင်း ဝှက်ထားပြီး ရုရှားတပ်များ တုံ့ပြန်နိုင်ချိန် မရမီ ရုတ်တရက်အသုံးပြုတိုက်ခိုက်ခဲ့ခြင်းဖြစ်သည်။

ယူကရိန်းလုံခြုံရေးဝန်ဆောင်မှု (SBU) က ရုရှား၏ Tu-22M3 နှင့် Tu-95 ဗုံးကြဲလေယာဉ်များ၊ A-50 စောင့်ကြည့်လေယာဉ်အပါအဝင် မဟာဗျူဟာ မြောက်လေယာဉ် ၄၀ ကို လေယာဉ်ကွင်း ၅ ခုတွင် ပစ်မှတ်ထား ဖျက်ဆီးနိုင်ခဲ့ကြောင်း ကြေညာခဲ့သည်။ SBU ၏ထုတ်ပြန်ချက်အရ အဆိုပါ တိုက်ခိုက်မှုသည် ရုရှား၏ ခရုဇ်ဒုံးကျည် လက်နက်သယ်ဆောင်နိုင်သည့် မဟာဗျူဟာမြောက်လေယာဉ်များ၏ ၃၄% ကို ထိခိုက်စေခဲ့ပြီးတစ်ရက်တည်းအတွင်း အမေရိကန်ဒေါ်လာ ၇ ဘီလီယံခန့် ပျက်စီးဆုံးရှုံးမှု ဖြစ်စေခဲ့သည်။

SBU အတွင်းရင်းနှီးသော အရင်းအမြစ်တစ်ဦး၏ပြောကြားချက်အရ အဆိုပါ စစ်ဆင်ရေးကို ယူကရိန်းသမ္မတ Volodymyr Zelensky နှင့် SBU ခေါင်းဆောင် Vasyl Maliuk တို့က ကိုယ်တိုင်ကြီးကြပ်ခဲ့သည်ဟု ဆိုသည်။ SBU သည် FPV ဒရုန်းများနှင့် သစ်သားသေတ္တာများကို ရုရှား နယ်မြေအတွင်းသို့ ဦးစွာပို့ဆောင်ခဲ့ပြီး ဒရုန်းများကို သစ်သား သေတ္တာ များအတွင်း ဝှက်ထားကာ ကုန်တင်ကားတစ်စီးထဲတွင် သိမ်းဆည်း ထားခဲ့သည်။

ကြိုတင်သတ်မှတ်ထားသော အချိန်တွင် သစ်သားသေတ္တာများနှင့် ကွန်တိန်နာများ၏ အဖုံးများကို အဝေးထိန်းဖြင့် ဖွင့်လိုက်ကာ ဒရုန်းများကို လွှတ်တင်ပြီး ရုရှား၏ ဗုံးကြဲလေယာဉ်များကို တိုက်ခိုက်ခဲ့ခြင်းဖြစ်သည်။

“ယင်းသည် ယူကရိန်း၏ သမိုင်းဝင်အောင်မြင်မှုပါ။ ၁ နှစ် ၆ လ ၉ ရက်ကြာ အစီအစဉ်ချမှတ်ပြီး အကောင်အထည်ဖော်ခဲ့သည့် မိမိတို့၏ အဝေးဆုံးစစ်ဆင်ရေးဖြစ်ပြီး ပါဝင်သူအားလုံးသည် ရုရှားနယ်မြေမှအချိန်မီဆုတ်ခွာနိုင်ခဲ့ပါသည်” ဟု Zelensky က ဂုဏ်ယူစွာ ပြောခဲ့ ပါသည်။ ဒရုန်း ၁၁၇ စီးဖြင့် တိုက်ခိုက်ရာတွင် စစ်ဆင်ရေးအဖွဲ့သည် FSB ရုံးနှင့် နီးကပ်စွာရှိနေခဲ့သော်လည်း ရုရှားတို့ လုံးဝမသိခဲ့ကြောင်း ၎င်းက ဖွင့်ဟခဲ့ပါသည်။

အဆိုပါတိုက်ခိုက်မှုသည် တူရကီ၌ ရုရှား-ယူကရိန်း ဒုတိယအကြိမ် ဆွေးနွေးပွဲမတိုင်မီ တစ်ရက်အလိုတွင် လုပ်ဆောင်ခဲ့ခြင်းဖြစ်သည်။ အမည်မဖော်လိုသည့် အရင်းအမြစ်များက ယူကရိန်းဘက်မှ “အကန့် အသတ်မရှိ စစ်ရပ်စဲရေး” နှင့် “ကိယက်ဗ်၏ ကြားနေရေး” အပါအဝင် အခြားသတ်မှတ်ချက်များ တောင်းဆိုမည်ဟု Reuters ကို ပြောကြားသွားပါသည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

ယခင်ဆီးရီးယားခေါင်းဆောင် ဘာရှာ အာဆက်အစိုးရကို ဖယ်ရှားပြီး ယာယီသမ္မတ Ahmed al-Sharaa အာဏာရရှိရန် ကူညီခဲ့သည့် လက်နက်ကိုင် သူပုန်များသည် ယခုအခါ ၎င်း၏အာဏာတည်မြဲမှုကို ခြိမ်းခြောက်လာနိုင်သည်ဟု ဝါရှင်တန်ပို့စ်သတင်းစာက စနေနေ့ (မေ ၃၁) တွင် ဖော်ပြခဲ့သည်။

Hayat Tahrir al-Sham (HTS) ဦးဆောင်သည့် လက်နက်ကိုင် အဖွဲ့အများအပြားသည် လွန်ခဲ့သည့်နှစ်နှောင်းပိုင်းတွင် ဒမတ်စကပ်၌ အာဏာသိမ်းယူခဲ့သည်။ ၎င်းတို့တွင် Islamic State (အစ္စလာမ္မစ်နိုင်ငံ) နှင့် အခြားအစွန်းရောက်အဖွဲ့များနှင့် ဆက်နွှယ်နေသည့် နိုင်ငံခြား တိုက်ခိုက်ရေး သမားများ အပါအဝင် ဆီးရီးယားတွင် ဆက်လက်ရှိနေသည့် လူထောင် ပေါင်းများစွာ ပါဝင်နေကြောင်း သတင်းစာက ရေးသားခဲ့သည်။

Al-Sharaa သည် အနောက်နိုင်ငံများ၏ထောက်ခံမှုရရှိရန် ကြိုးပမ်း နေစဉ် ၎င်းတို့ထဲမှ အချို့ကို ဆက်လက်ထိန်းသိမ်းထားရန် ရည်ရွယ်ပုံ ရသော်လည်း အစွန်းရောက် ဆွန်နီမွတ်စလင်လက်နက်ကိုင်များသည် ယခုပင် ၎င်းအတွက် ပြဿနာများ ဖန်တီးလျက်ရှိကြောင်း WaPo က ဖော်ပြခဲ့သည်။ အချို့လက်နက်ကိုင်အဖွဲ့များသည် မတ်လအတွင်း ဆီးရီးယားကမ်းရိုးတန်းတစ်လျှောက်ရှိ အလာဝိုက်လူမျိုးစုများအား အစုလိုက် အပြုံလိုက် သတ်ဖြတ်မှုများတွင် ပါဝင်ခဲ့ကြောင်း သတင်းဌာန က ဖြည့်စွက်ခဲ့သည်။ ဒေသခံမီဒီယာများ၏ဖော်ပြချက်အရ ရက်အနည်းငယ် အတွင်း ပြည်သူ ၉၇၃ ဦးအပါအဝင် လူပေါင်း ၁,၃၀၀ ခန့် သေဆုံးခဲ့သည်။ အာဏာလွှဲပြောင်းပြီးနောက်ပိုင်းတွင် ခရစ်ယာန်နှင့် ဒရူးဇ်လူမျိုးစုများ သည်လည်း သွေးချောင်းစီးသည့် ဂိုဏ်းကွဲအကြမ်းဖက်မှုများကို ရင်ဆိုင် ခဲ့ရသည်ဟု သတင်းများအရ သိရသည်။

အစွန်းရောက် နိုင်ငံခြားအစ္စလာမ္မစ်ဝါဒီများသည် al-Sharaa အပေါ် အမျက်ထွက်နေကြပြီး ၎င်းတို့၏အကူအညီဖြင့် အသစ်ရွေးချယ် တင်မြှောက်ခံရသည့် သမ္မတသည် ရှရီယာဥပဒေကို အကောင်အထည်မဖော်ဘဲ အမေရိကန်နှင့် တူရကီတို့နှင့် ပူးပေါင်းကာ ဆီးရီးယားရှိ အစွန်းရောက်အဖွဲ့များကို ပစ်မှတ်ထားနေသည်ဟု စွပ်စွဲခံနေရကြောင်း WaPo က ရေးသားခဲ့သည်။

ကိုးကား- RT

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ပါလက်စတိုင်းကျန်းမာရေးဝန်ကြီးဌာန၏ ထုတ်ပြန်ချက်အရ တနင်္ဂနွေ နေ့ (ဇွန် ၁) တွင် အမေရိကန်အစိုးရပံ့ပိုးမှုဖြင့် ဆောင်ရွက်လျက်ရှိသော ပုဂ္ဂလိကအဖွဲ့အစည်းတစ်ခု၏ ဂါဇာတောင်ပိုင်းရှိ အကူအညီ ဖြန့်ဝေရာ နေရာ၌ ပစ်ခတ်မှုများကြောင့် ပါလက်စတိုင်း ၃၁ ဦး သေဆုံးပြီး ဒါဇင်နှင့် ချီ၍ ဒဏ်ရာရရှိခဲ့ကြောင်း သိရှိရသည်။

ကျန်းမာရေးဝန်ကြီးဌာနက သေဆုံးမှုများအတွက် အစ္စရေးစစ်တပ်ကို အဓိကတာဝန်ရှိသူအဖြစ် ညွှန်းဆိုခဲ့သည်။ အချို့မျက်မြင် သက်သေများက အကူအညီဖြန့်ဝေရာစင်တာရှိ လုံခြုံရေးတပ်ဖွဲ့ဝင်များက ပစ်ခတ်ခဲ့သည် ဟု ဆိုသည်။

ကျန်းမာရေးဝန်ကြီးဌာနက ဆေးရုံများသို့ ဒဏ်ရာရရှိသူ ၂၀၀ ကျော် ရောက်ရှိလာခဲ့ပြီး အချို့မှာ အသက်အန္တရာယ်ထိခိုက်နိုင်သည့် ပြင်းထန် ဒဏ်ရာများဖြစ်ကြောင်း ဖော်ပြခဲ့သည်။ သေဆုံးသူအားလုံး၏ ခန္ဓာကိုယ် တွင် ဦးခေါင်းနှင့် ရင်ဘတ်အစိတ်အပိုင်းများ၌ ကျည်ဆန်များ ထိမှန် ခဲ့ကြောင်း ဆိုသည်။

အစ္စရေးကာကွယ်ရေးတပ်ဖွဲ့ (IDF) က လူသားချင်းစာနာမှုဆိုင်ရာ အကူအညီ ဖြန့်ဝေရာနေရာအတွင်း IDF ၏ ပစ်ခတ်မှုကြောင့် ဒဏ်ရာ ရမှုများ ဖြစ်ပွားခဲ့ကြောင်းကို မသိရှိရကြောင်း CNN ၏ မေးမြန်းချက်ကို အတိုချုံးဖြေကြားခဲ့ပြီး အဆိုပါကိစ္စနှင်ပတ်သက်၍ စုံစမ်းစစ်ဆေးဆဲ ဖြစ်သည်ဟု ဖြည့်စွက်ပြောကြားခဲ့သည်။ ထို့အပြင် “၎င်းတို့၏ တပ်ဖွဲ့ဝင် များတွင် ဒဏ်ရာရသူ သို့မဟုတ် သေဆုံးသူမရှိပါ” ဟု ပြောကြားခဲ့သည်။

ရာဖာဒေသရှိ အကူအညီဖြန့်ဝေရာနေရာသို့ အကူအညီရယူရန် လူအုပ်ကြီး စုရုံးနေစဉ် အစ္စရေးတပ်ဖွဲ့ဝင်များက ပစ်ခတ်ခဲ့ခြင်းဖြစ်ကြောင်း ထိုဒေသရှိ တစ်ခုတည်းသော ဆေးဘက်ဆိုင်ရာ အဖွဲ့အစည်းဖြစ်သည့် ပါလက်စတိုင်း ကြက်ခြေနီတပ်ဖွဲ့ (PCRS)၏ အရေးပေါ်ဆေးဘက်ဆိုင်ရာအဖွဲ့မှ ဝန်ထမ်း တစ်ဦးက ပြောကြားခဲ့သည်။

ဆေးဘက်ဆိုင်ရာအရာရှိတစ်ဦးက CNN သို့ “ပစ်ခတ်သူများကို အတိအကျ ဖော်ထုတ်ရန် မဖြစ်နိုင်သော်လည်း အကူအညီဖြန့်ဝေရာနေရာများ၏လုံခြုံရေးအား အစ္စရေးစစ်တပ်က တာဝန်ယူထားသည်။ ၎င်းတို့ ကိုယ်တိုင် ပစ်ခတ်သည်ဖြစ်စေ၊ အခြားသူများအတွက် တာဝန်ထမ်းဆောင်သူများက ပစ်ခတ်သည်ဖြစ်စေ၊ ၎င်းတို့တွင် တာဝန်ရှိသည်” ဟု ပြောကြားခဲ့သည်။

ကိုးကား- CNN