US သံရုံးက Kyiv ရှိ အမေရိကန်နိုင်ငံသားများကို လေကြောင်းတိုက်ခိုက်မှုအတွက် သတိပေးချက်မြည်သံများကို သတိထားပြီး သင့်လျော်သည့် ခိုလှုံရာနေရာများတွင် ခိုလှုံရန် အကြံပြုထားပါသည်။ “ကြီးမားသည့် လေကြောင်းတိုက်ခိုက်မှုများ ဆက်လက်ဖြစ်ပွားနိုင်ခြေရှိနေသည်” ဟု ဗုဒ္ဓဟူးနေ့ (ဇွန် ၄) က ထုတ်ပြန်သည့် လုံခြုံရေး သတိချက်ပေးချက်၌ ဖော်ပြထားပါသည်။

ရုရှား သမ္မတ ပူတင် က “မကြာသေးမီက ရုရှားပိုင် နျူကလီယား ဗုံးကြဲလေယာဉ်ကြီးများရှိသည့် လေယာဉ်ကွင်းများကို ယူကရိန်း၏ တိုက်ခိုက်မှုများအတွက် တုံ့ပြန်မည်” ဟု ပြောကြားခဲ့သည်ဟု အမေရိကန် သမ္မတ ဒေါ်နယ်ထရမ့် က Truth Social မှာ ဗုဒ္ဓဟူးနေ့ (ဇွန် ၄) ညက ရေးသား ခဲ့ပါသည်။ ၎င်းတို့နှစ်ဦး မကြာသေးမီက ပြုလုပ်ခဲ့သည့် ကြိုတင်စီစဉ်မထားသော ဆွေးနွေးမှုအကြောင်းကိုလည်း ဖော်ပြခဲ့ပါသည်။

အဆိုပါလုံခြုံရေး သတိပေးချက်ကို US နိုင်ငံခြားရေးဝန်ကြီးဌာနက ထုတ်ပြန်ခဲ့ပြီး ယခု ယူကရိန်းရှိ အမေရိကန်နိုင်ငံသားများကို “ကြိုတင်၍ ခိုလှုံရာနေရာများ သတ်မှတ်ထားရန်” နှင့် “ရေ၊ အစားအစာနှင့် ဆေးဝါး များ သိုလှောင်ထားရန်” အကြံပြုထားပါသည်။

ရုရှားသမ္မတ ဗလာဒီမာ ပူတင်က ဗုဒ္ဓဟူးနေ့ (ဇွန် ၄) တွင် Bryansk နှင့် Kursk ဒေသများရှိ မီးရထားလမ်းဖျက်ဆီးမှုများကို “လုံးဝသေချာသော အကြမ်းဖက်လုပ်ရပ်တစ်ခု” အဖြစ် ရှုမြင်ကြောင်း ပြောကြားခဲ့သည်။ ၎င်းကို “ကိယက်ဗ် ရှိ တရားမဝင်အာဏာရှင်စနစ်” မှ ကျူးလွန်ခဲ့သည်ဟု ဆိုကာ ထိုစနစ်သည် “တဖြည်းဖြည်း အကြမ်းဖက် အဖွဲ့အစည်း တစ်ခု အဖြစ် ပြောင်းလဲလာနေသည်” ဟု ထောက်ပြခဲ့သည်။

နိုင်ငံခြားရေးမူဝါဒ အကြီးတန်းအကြံပေး Yury Ushakov ၏ အဆိုအရ ပူတင်သည် ထရမ့်အား အဆိုပါတိုက်ခိုက်မှုများသည် မော်စကိုနှင့် ကိယက်ဗ် အကြား တိုက်ရိုက်ဆွေးနွေးပွဲများကို နှောင့်ယှက်ရန် ရည်ရွယ်ခဲ့ကြောင်း၊ ၎င်းတို့၏ ဒုတိယအကြိမ်ဆွေးနွေးပွဲကို တနင်္လာနေ့ (ဇွန် ၂) က အစ္စတန် ဘူလ်တွင် ကျင်းပခဲ့ကြောင်း အသိပေးခဲ့သည်။

ခေါင်းဆောင်နှစ်ဦးသည် ယူကရိန်းနှင့်ပတ်သက်သည့် အဆင့်မြင့် အစည်းအဝေးများနှင့် အခြားလမ်းကြောင်းများမှတစ်ဆင့် ဆက်သွယ်မှုများကို ဆက်လက်ထိန်းသိမ်းရန် သဘောတူညီခဲ့ကြသည်။ ထရမ့်သည် ဖုန်းစကား ပြောဆိုမှုကို “ကောင်းမွန်သော ဆွေးနွေးမှု” အဖြစ် ဖော်ပြခဲ့သော်လည်း ၎င်းသည် “ချက်ချင်း ငြိမ်းချမ်းရေးကို ဖြစ်စေမည့်အရာမဟုတ်ကြောင်း” မှတ်ချက်ပြုခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဝါရှင်တန်ပို့စ်သတင်းစာ၏ ဖော်ပြချက်အရ အမေရိကန် ကာကွယ်ရေးဝန်ကြီးဌာန (ပင်တဂွန်) သည် ယခင်က ယူကရိန်းလေကြောင်းရန် ကာကွယ်ရေး အတွက် ရည်ရွယ်ခဲ့သော အရေးကြီးဒုံးကျည်အစိတ်အပိုင်းများကို အရှေ့ အလယ်ပိုင်းဒေသရှိ အမေရိကန်တပ်ဖွဲ့များထံသို့ လွှဲပြောင်းပေးခဲ့ကြောင်း သိရသည်။ ထိုလုပ်ဆောင်ချက်သည် အမေရိကန်သမ္မတ ဒေါ်နယ်ထရမ့် လက်ထက်တွင် ယူကရိန်းအားထောက်ပံ့မှုများကို တဖြည်းဖြည်း လျှော့ချလာခြင်းနှင့်အတူ ဆောင်ရွက်ခဲ့ခြင်းဖြစ်သည်။

ဝါရှင်တန်ပို့စ်၏ ဖော်ပြချက်အရ အမေရိကန်သမ္မတဟောင်း ဂျိုးဘိုင်ဒင် လက်ထက်က ယူကရိန်းလုံခြုံရေးအထောက်အပံ့အစီအစဉ် (USAI) အောက်တွင် ဝယ်ယူထားသော မြေပြင်အခြေစိုက် Advanced Precision Kill Weapon System (APKWS) တွင် အသုံးပြုသည့် Fuze (explosive devices များတွင် အသုံးပြုသည့် ချိတ်ဆက်မှုအပိုင်း) များကို လွှဲပြောင်းခဲ့ခြင်းဖြစ်သည်။ APKWS သည် ပဲ့ထိမ်းလမ်းညွှန်  ဒုံးကျည်စနစ်တစ်ခုဖြစ်ပြီး ယူကရိန်းတပ်ဖွဲ့များက လွန်ခဲ့သည့်နှစ်အနည်းငယ်အတွင်း ဒရုန်းများကို ပစ်ချရန်အသုံးပြုခဲ့သည်။ အဆိုပါအစီအစဉ်အတွက် ရန်ပုံငွေများ သုံးစွဲပြီးဖြစ်သော်လည်း ယခင်အတည်ပြုထားသည့် ထောက်ပံ့မှုများမှာ ယခုနှစ်နှောင်းပိုင်းနှင့် လာမည့်နှစ်တွင် ယူကရိန်းသို့ ဆက်လက် ရောက်ရှိရန် စီစဉ်ထားဆဲဖြစ်သည်။

သို့ရာတွင် အမေရိကန်ကာကွယ်ရေးဝန်ကြီး Pete Hegseth က မေလ အတွင်းက လျှို့ဝှက်စာတစ်စောင်ဖြင့် Fuze များလွှဲပြောင်းရန် ခွင့်ပြုခဲ့ပြီး ယင်းကို ကာကွယ်ရေးဝန်ကြီး၏ အရေးပေါ်ကိစ္စအဖြစ် သတ်မှတ်ခဲ့သည်။ ထိုဆုံးဖြတ်ချက်ကို ဆီးနိတ်လွှတ်တော် လက်နက်ကိုင်တပ်ဖွဲ့များ ဆိုင်ရာကော်မတီသို့ အကြောင်းကြားခဲ့သော်လည်း ပင်တဂွန်မှ အများ ပြည်သူထံ ထုတ်ဖော်ပြောဆိုရန် ငြင်းဆိုခဲ့သည်။

အမည်မဖော်လိုသူ အရင်းအမြစ်များနှင့် အတွင်းရေး အချက်အလက်များကို ကိုးကားပြီး ဝါရှင်တန်ပို့စ်က အမေရိကန်လေတပ်သည် F-16 နှင့် F-15E တိုက်လေယာဉ်များတွင် တပ်ဆင်ထားသော ဒုံးကျည်များတွင် ပြန်လည်ခွဲဝေထားသည့် Fuze များကို အသုံးပြုရန် ရည်ရွယ်ထားကြောင်းဖော်ပြခဲ့သည်။ ယခုလွှဲပြောင်းမှုကို ယမန်နှစ်က အတည်ပြုခဲ့သည့်အရေးပေါ်စစ်ရေးအသုံးစရိတ်ဥပဒေကြမ်း အောက်တွင် ခွင့်ပြုခဲ့ခြင်း ဖြစ်သည်။

ဘိုင်ဒင်အစိုးရလက်ထက်က ကာကွယ်ရေးဝန်ကြီးဌာန အဆင့်မြင့် အရာရှိအဖြစ် တာဝန်ထမ်းဆောင်ခဲ့သူ Celeste Wallander က WSJ ကို ပြောကြားရာတွင် APKWS စနစ်များသည် ယူကရိန်း၏လေကြောင်း ကာကွယ်ရေးအတွက် အရေးပါသည့်အခန်းကဏ္ဍ မှပါဝင်နေသော်လည်း ယီမင်ရှိဟူသီသူပုန်များနှင့် အီရန်မှဖြစ်ပေါ်လာနိုင်သည့် ဒရုန်း တိုက်ခိုက်မှုများမှ အမေရိကန်စစ်သည်များနှင့်စခန်းများကို ကာကွယ်ရန် အရေးတကြီး လိုအပ်နေသည်” ဟု ထည့်သွင်းရှင်းပြခဲ့သည်။

အဆိုပါသတင်းသည် ကာကွယ်ရေးဝန်ကြီး Pete Hegseth ၏ NATO အစည်းအဝေးတက်ရောက်မှုကို ရုတ်တရက်ပယ်ဖျက်ခဲ့ပြီးနောက် ထွက်ပေါ် လာခြင်းဖြစ်သည်။ ယူကရိန်းသို့စစ်ရေးအကူအညီများနှင့်ပတ်သက်၍ဆွေးနွေးမည့် ထိုအစည်းအဝေးကို ပင်တဂွန်ခေါင်းဆောင် ပထမဆုံးအကြိမ် ပျက်ကွက်ခဲ့ခြင်းဖြစ်ကာ Hegseth က ယူကရိန်းပဋိပက္ခတွင် အမေရိကန်၏ဆက်လက်ပါဝင်မှုကို အထပ်ထပ်ဝေဖန်နေချိန်နှင့် ယှဉ်တွဲ ဖြစ်ပွားခဲ့သည်။

သမ္မတ Trump က ယူကရိန်းအားစစ်ရေးထောက်ပံ့မှုများ ဆက်လက် ပေးသင့်၊ မပေးသင့်ကို မေးခွန်းထုတ်လျက်ရှိပြီး မော်စကိုနှင့် ကိယက်ဗ် တို့အကြား ငြိမ်းချမ်းရေးသဘောတူညီချက်ရရှိရန် တွန်းအားပေးကာသံတမန်နည်းလမ်းဖြင့် အဆုံးသတ်ရမည်ဟု မကြာခဏ ထုတ်ဖော် ပြောဆို ခဲ့သည်။

ရုရှားအရာရှိများကမူ ယူကရိန်းသို့အနောက်နိုင်ငံများမှ လက်နက်တပ်ဆင်မှုများကို ပဋိပက္ခတလျှောက်လုံး ပြင်းပြင်းထန်ထန်ရှုတ်ချခဲ့ပြီး ထိုသို့ပံ့ပိုးမှုများသည် စစ်ပွဲ၏အခြေအနေကို မပြောင်းလဲနိုင်ဘဲ အရှိန်မြှင့်တင်မှုနှင့် ထိခိုက်သေကြေမှုများကိုသာ ပိုမိုဖြစ်ပေါ်စေမည်ဟု အကြိမ်ကြိမ်ပြောဆိုခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

တရုတ်သတင်းဌာန (CCTV) က ယခုသီတင်းပတ်အတွင်း DF-5 နျူကလီးယားဒုံးကျည်၏ အဓိက အချက်အလက်များကို ထုတ်ပြန်ခဲ့ပြီး ၎င်းဒုံးကျည်သည် ကီလိုမီတာ ၁၂,၀၀၀ အကွာအဝေးအထိ ရောက်ရှိနိုင်ကာ TNT တန်ချိန် သန်း ၃-၄ သန်းနှင့် ညီမျှသည့် အဖျက် စွမ်းအား ရှိသော ထိပ်ဖူးကို သယ်ဆောင်နိုင်ကြောင်း ဖော်ပြခဲ့သည်။ အဆိုပါ စွမ်းအားသည် ဒုတိယကမ္ဘာစစ်အတွင်း အမေရိကန်က ဟီရိုရှီးမားမြို့ပေါ်သို့ ပစ်ချခဲ့သည့် အနုမြူဗုံး၏ စွမ်းအားထက် အဆ ၂၀၀ ပိုမို ကြီးမားသည်။ 

CCTV က DF-5 ကို “ပထမမျိုးဆက် တိုက်ချင်းပစ်ဒုံးကျည် (ICBM)” အဖြစ် ဖော်ပြထားပြီး အမေရိကန်နှင့် အနောက်ဥရောပတိုက်ရှိ ပစ်မှတ်များ၏ မီတာ ၅၀၀ အတွင်း ထိရောက်နိုင်သည်ဟု ဆိုသည်။ အဆိုပါ ဒုံးကျည် သည် အလျား ၃၂.၆ မီတာ၊ အချင်း ၃.၃၅ မီတာနှင့် လွှတ်တင်အလေးချိန် တန်ချိန် ၁၈၃ ရှိသည်။ ၎င်းကို ၁၉၇၀ ပြည့်လွန်နှစ်များအစောပိုင်းတွင် တည်ဆောက်ခဲ့ပြီး ၁၉၈၁ ခုနှစ်တွင် တပ်ဖွဲ့များတွင် စတင်အသုံးပြု ခဲ့သည်။ 

တရုတ်နိုင်ငံသည် များသောအားဖြင့် ၎င်း၏နျူကလီးယား လက်နက်အစီအစဉ်များကို လျှို့ဝှက်ထားလေ့ရှိပြီး အထူးသဖြင့် ဒုံးကျည်များ၏ တိကျသောစွမ်းရည်များနှင့် တပ်ဆင်ထားသည့်အနေအထားများကို ဖော်ပြလေ့မရှိပါ။ အစိုးရအရာရှိများသည် မကြာသေးမီက ထုတ်ဖော်ပြသခဲ့သည့် လက်နက်အသစ်များနှင့်ပတ်သက်သည့် အသေးစိတ် အချက်အလက်များကို ဖော်ပြရန် ရှောင်ရှားလေ့ရှိသည်။ ပေကျင်းအစိုးရသည် အဘယ်ကြောင့် ဤအချိန်တွင် DF-5 ၏စွမ်းရည်များကို ထုတ်ဖော်ပြောကြားရန် ရွေးချယ်ခဲ့သည်ကို ရှင်းရှင်းလင်းလင်း မသိရှိရသေးပေ။

တရုတ်နိုင်ငံ၏ နိုင်ငံပိုင်မီဒီယာများတွင် ကာကွယ်ရေးကိစ္စရပ်များကို မကြာခဏ သုံးသပ်ပြောဆိုလေ့ရှိသူ ဟောင်ကောင်အခြေစိုက် စစ်ရေးကျွမ်းကျင်သူ ဆုန်ကျုံ့ဖိန် (Song Zhongping) က DF-5 ဒုံးကျည်သည် ပေကျင်း၏ နျူကလီးယား ပိုင်ဆိုင်မှုမဟာဗျူဟာတွင် အလွန်အရေးကြီးသော အခန်းကဏ္ဍမှ ပါဝင်နေသည်ဟု အလေးအနက်ပြောကြားခဲ့သည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

မြန်မာနိုင်ငံမှ သင်္ဘောတစ်စီး နစ်မြုပ်ခဲ့သောကြောင့် ထိုင်းနိုင်ငံမူကိုဆူရင် အမျိုးသားဥယျာဉ်ကမ်းလွန်ရှိ သန္တာကျောက်တန်း၏ ပျက်စီးနိုင်ခြေကို ဥယျာဉ်နှင့် ရေတပ်ရေငုပ်သမားများက စစ်ဆေးအကဲဖြတ်နေကြောင်း သိရသည်။
           
ကုန်သင်္ဘော အမ်ဗီဧရာလင်း နစ်မြုပ်ခဲ့သော ရေပြင်ဧရိယာရှိ သန္တာကျောက်တန်းအခြေအနေကို စစ်ဆေးရန်အတွက် အဏ္ဏဝါဥယျာဉ်ဌာနနှင့် ဘုရင့်ရေတပ်မှ ရေငုပ်သမားများကို စေလွှတ်ထားသည်ဟု အဒ္ဒမန်ကမ်းရိုးတန်းကို ကြီးကြပ်ရသည့် ထိုင်းရေကြောင်း ကွပ်ကဲမှုစင်တာက တနင်္လာနေ့တွင် ပြောကြားခဲ့သည်။
          
လူသုံးကုန်ပစ္စည်းများ အပြည့်တင်ဆောင်ထားပြီး သင်္ဘောသား ခုနှစ်ဦးလိုက်ပါခဲ့သော မြန်မာနိုင်ငံအလံတင်သင်္ဘောသည် ကြာသပတေးနေ့က ရနောင်းပြည်နယ်ရှိ ဆိပ်ခံတံတားတစ်ခုမှ မြန်မာနိုင်ငံ ဆိပ်ကမ်းများသို့ ထွက်ခွာသွားခဲ့ခြင်းဖြစ်သည်။ သင်္ဘောသည် ကော့သောင်းတွင် တစ်ထောက်ရပ်နားကာ မြိတ်မြို့သို့ ဆက်လက်ထွက်ခွာလာစဉ် သင်္ဘောအတွင်း ရေများစိမ့်ဝင်နေသည်ကို သင်္ဘောသားများက တွေ့ရှိခဲ့ပြီးနောက် သင်္ဘောကို နီးရာကမ်းခြေတစ်ခုသို့ ဦးတည်ခုတ်မောင်းရန် ကက်ပတိန် ဦးအောင်ငွေစိုးက ညွှန်ကြားခဲ့သည်။
           
စုစုပေါင်း တန်ချိန် ၁၀၀ ရှိသော သင်္ဘောသည် မူကိုဆူရင် မြောက်ဖက် Jak ပင်လယ်အော်တွင် သောင်တင်သွားခဲ့ကာ နောက်ဆုံးတွင် ပင်လယ်အတွင်း၌ နစ်မြုပ်သွားပြီး ကုန်ပစ္စည်းများ မျောပါသွားခဲ့သည်။
       
သင်္ဘောအတွက် အသုံးပြုမည့် ဒီဇယ်ဆီ ၇,၇၀၀ လီတာကို သယ်ဆောင်လာခဲ့သော်လည်း ပင်လယ်အတွင်းသို့ ဆီ မယိုစိမ့်ခဲ့ဟု စင်တာက ပြောဆိုသည်။ အများဆုံး စိုးရိမ်မှုမှာ ရေအောက်ကြမ်းပြင်သို့ ရောက်သွားသော သင်္ဘောကြောင့် သန္တာကျောက်တန်း၏ ထိခိုက်ပျက်စီးနိုင်ခြေဖြစ်ကြောင်း သတင်းတွင် ဖော်ပြထားသည်။

Source: Popular Myanmar

ယူကရိန်းနှင့် ရုရှားနိုင်ငံကြား အပစ်ခတ်ရပ်စဲရေးရယူနိုင်ရန် ဆွေးနွေး နေသော်လည်း အခြားတစ်ဖက်တွင် အပြန်အလှန် တိုက်ခိုက်နေဆဲ ဖြစ်ရာ ယူကရိန်းသည် ဇွန်လ ၃ ရက်တွင် ခရိုင်းမီးယားဒေသရှိတံတားကို ပစ်မှတ်ထားပြီး ရေအောက်မှ ဖောက်ခွဲတိုက်ခိုက်ခဲ့ကြောင်းသိရသည်။ ယူကရိန်း လုံခြုံရေးအဖွဲ့ (SBU) က ခရိုင်းမီးယားဒေသရှိတံတားကို ဖောက်ခွဲ တိုက်ခိုက်ရန် ကြိုးပမ်းခဲ့ပြီး ပေါက်ကွဲစေသောယမ်း TNT ၁၁၀၀ ကီလိုဂရမ်ကို အသုံးပြုခဲ့ပြီး အရပ်သားများ ထိခိုက်မှုမရှိကြောင်း ပြောသည်။

အဆိုပါတိုက်ခိုက်မှုများကြောင့် တံတားကို ယာယီပိတ်ထားရပြီး ရေအောက်မှ ပစ်မှတ်ထားတိုက်ခိုက်မှုကြောင့် တံတားဝန်းကျင် ထိခိုက်ခဲ့ကြောင်း သိရသည်။ ရုရှားအစိုးရသည် အဆိုပါတိုက်ခိုက်မှုနှင့် ပတ်သက်ပြီး အတည်ပြုပြောဆိုခြင်း မရှိသေးသော်လည်း ရုရှားစစ်တပ် ဘလော့ဂါများက ပေါက်ကွဲစေသောပစ္စည်းများနှင့် တိုက်ခိုက်ခြင်းထက် ရေအောက်ဒရုန်းအသုံးပြုတိုက်ခိုက်ခြင်းမျိုးဖြစ်ဖွယ်ရှိသည်ဟုဆိုသည်။ ရုရှားထိန်းချုပ်ထားသည့် ခရိုင်းမီးယားကျွန်းဆွယ်ရှိ တံတားကို ပစ်မှတ် ထားဖောက်ခွဲတိုက်ခိုက်ခြင်းအစီအစဉ်ကို ယူကရိန်း ဒုတိယဗိုလ်ချုပ်ကြီး Vasyl Malyuk က ဦးဆောင်ကြီးကြပ်ခဲ့ခြင်းဖြစ်ကြောင်း သိရသည်။

ယူကရိန်းစစ်တပ်က “ခရိုင်းမီးယားဒေသတံတားကို ရုရှားစစ်တပ်က အဓိကထားအသုံးပြုနေ၍ တိုက်ခိုက်ခဲ့ခြင်းဖြစ်ကြောင်း” ပြောသည်။ ယူကရိန်းသည် ပြီးခဲ့သော ရက်ပိုင်းကလည်း “Spider Web” အမည်ရှိ စစ်ဆင်ရေးကိုစတင်ခဲ့ပြီး ရုရှားနိုင်ငံတစ်ဝန်းရှိပစ်မှတ်များကို တိုက်ခိုက် ခဲ့ရာ ရုရှား၏မဟာဗျူဟာမြောက်ဗုံးကြဲလေယာဉ်များလည်း တိုက်ခိုက် ခံခဲ့ရသည် ဟု သိရသည်။ ယူကရိန်းအစိုးရက ရုရှားပိုင်နက်အတွင်းသို့ ဒရုန်းအစင်းရေ ၁၀၀ ကျော် မှောင်ခိုတင်သွင်းခဲ့ပြီး အဆိုပါဒရုန်းများကို ရုရှားလေတပ်စခန်းအနီး အပါအဝင် ရုရှားနိုင်ငံအတွင်းရှိ နေရာအများ အပြားကို့ စေလွှတ်ပျံသန်းတိုက်ခိုက်ခဲ့ကြောင်းပြောကြားခဲ့သည်။

ကိုးကား- NP News

အိန္ဒိယသည် လွန်ခဲ့သည့် ဆယ်စုနှစ်များစွာအတွင်း ခေတ်မီတိုက် လေယာဉ်များပိုင်ဆိုင်ရေးအတွက် ပြည်ပနိုင်ငံများကို မှီခိုခဲ့ရသော်လည်း လက်ရှိတွင် တိုက်လေယာဉ်များအား ပြည်တွင်းမှာပင် ထုတ်လုပ်နေကြောင်း South China Morning Post မှ ဖော်ပြခဲ့သည်။

ပြီးခဲ့သည့် သီတင်းပတ်ကလည်း အိန္ဒိယအစိုးရသည် Advanced Medium Combat Aircraft (AMCA) အမည်ရှိ ပဉ္စမမျိုးဆက် နောက်ဆုံးပေါ် ကိုယ်ပျောက် ဂျက်တိုက်လေယာဉ် တည်ဆောက်ရေး အစီအစဉ်ကို အတည်ပြုခဲ့သည်။ ထို့ကြောင့် ပါကစ္စတန်နှင့် တရုတ်၏ ဖိအားများဖြင့် ရင်ဆိုင်နေရသည့် အိန္ဒိယနိုင်ငံအတွက် အမျိုးသားလုံခြုံရေး ကဏ္ဍတွင် ထိုအစီအစဉ်သည် အရေးပါသော အပြောင်းအလဲတစ်ခု ဖြစ်လာခဲ့ကြောင်း ကျွမ်းကျင်သူများက သုံးသပ်ခဲ့ကြသည်။

မေလ ၂၇ ရက်က အိန္ဒိယကာကွယ်ရေးဝန်ကြီးဌာနသည် အိန္ဒိယ လေတပ်၏ တိုက်ခိုက်ရေး စွမ်းဆောင်ရည်များကို မြင့်တက်စေရန် ရည်ရွယ်ခဲ့သည့် AMCA တိုက်လေယာဉ် စီမံကိန်းအတွက် အကောင်အထည်ဖော်သော အဆင့်ကို အတည်ပြုပေးခဲ့သည်။ ထိုကြောင့် လက်ရှိ တည်ဆောက်ပြီးစီးထားသည့် ရှေ့ပြေးပုံစံ AMCA တိုက်လေယာဉ်ကို အဆင့်မြှင့်တင် မွမ်းမံနိုင်ပြီး တိုက်လေယာဉ် အများအပြား ထုတ်လုပ်ရန် လမ်းပွင့်သွား ခဲ့သည်။

“အိန္ဒိယ၏ လေကြောင်းနှင့် အာကာသနယ်ပယ်မှာ AMCA တိုက်လေယာဉ် အတွက် ရှေ့ပြေးပုံစံ ထုတ်လုပ်မှုသည် ကြီးမားသော အခိုက်အတန့် ဖြစ်ခဲ့ပြီး စွမ်းဆောင်ရည်တွေကို ပိုမိုမြှင့်တင်နိုင်ရန် အစိုးရ၏ ဆုံးဖြတ်ချက်သည် အရေးကြီးသည့် ခြေလှမ်းတစ်ခု ဖြစ်ခဲ့ပါသည်” ဟု အိန္ဒိယ ကာကွယ်ရေး ဝန်ကြီးဌာနက ထုတ်ပြန်ခဲ့သည်။

AMCA ပရောဂျက်သည် လက်ရှိတွင် အလွန်အရေးကြီးသည့် အဆင့်သို့ ရောက်ရှိလာခဲ့ပြီး အပြီးသတ် လုပ်ဆောင်ရမည့် အဆင့်သို့ ရောက်ရှိလာခဲ့ကြောင်း နိုင်ငံတကာ မဟာဗျူဟာလေ့လာရေး အင်စတီကျုမှ တောင်အာရှနှင့် ဗဟိုအာရှဆိုင်ရာ ကာကွယ်ရေး၊ မဟာဗျူဟာနှင့် သံတမန်ရေးရာ ကျွမ်းကျင်သူ အန်တိုနီ လီဗက်စ် (Antoine Levesques) က ပြောကြား ခဲ့သည်။

ထိုတိုက်လေယာဉ်သည် ပါကစ္စတန်လေတပ်၏ တရုတ်လုပ် တိုက်လေယာဉ်များနှင့် ယှဉ်ပြိုင်ရာတွင် အသာစီးရရှိအောင် ရည်ရွယ် ထုတ်လုပ်နေခြင်း ဖြစ်သည်ဟုလည်း ကျွမ်းကျင်သူများက ပြောကြားခဲ့သည်။

ယခုနှစ် အစောပိုင်းကလည်း အိန္ဒိယနိုင်ငံ ဘန်ဂလူရူ (Bengaluru) မြို့တွင် ပြုလုပ်သည့် Aero India 2025 လေကြောင်းပြပွဲ၌ AMCA ကိုယ်ပျောက် တိုက်လေယာဉ်၏ ရှေ့ပြေးပုံစံ လေယာဉ်တစ်စင်းကို ပြသခဲ့သည်။

ကိုးကား- CNI 

ထိုင်း ဒုတိယဗိုလ်ချုပ်ကြီး Amarit Boonsuya သည် ကမ္ဘောဒီးယားနှင့် အငြင်းပွားမှုများဖြစ်ပွားလျက်ရှိနေသည့် နယ်စပ်ဒေသကို လာရောက်ခဲ့ပြီး ထိုင်းစစ်တပ်တပ်ဖွဲ့ဝင်များကိုစစ်ဆေးခဲ့ကြောင်းသိရသည်။

ထိုင်းနှင့် ကမ္ဘောဒီးယားနိုင်ငံတို့သည် မေလ ၂၈ ရက်တွင် နယ်စပ်ဒေသ၌ အပြန်အလှန်ပစ်ခတ်မှုဖြစ်ပွားခဲ့ရာ တင်းမာမှုများရှိနေပြီး နှစ်နိုင်ငံစလုံးက စစ်တပ်များသည် အငြင်းပွားလျက်ရှိနေသည့် ရှေ့တန်းစစ်မျက်နှာ ပြင်တွင် တိုက်ခိုက်ရေးတပ်ဖွဲ့များ ဖြန့်ကြက်ချထားကြောင်းသိရသည်။

ထိုင်းဒုတိယဗိုလ်ချုပ်ကြီးသည် ချွန်ဘူရီ ဒေသအရှေ့ဘက်ပိုင်းရှိ ထိုင်းစစ် တပ်စခန်းကိုလာရောက်ခဲ့ပြီး ထိုင်းစစ်တပ်တပ်ဖွဲ့ဝင်များကို စစ်ဆေးခဲ့ခြင်း ဖြစ်သည်။ အငြင်းပွားနေသည့်နယ်စပ်ဒေသတွင် ထိုင်းတပ်မ ၁၁ မှ တိုက်ခိုက်ရေးတပ်ဖွဲ့ဝင်များ၊ အမြှောက်တပ်များ၊ လေကြောင်းရန်ကာကွယ်ရေးတပ်ဖွဲ့များ၊ သံချပ်ကာတပ်ဖွဲ့များ၊ လေကြောင်းရန်ကာကွယ်ရေး လက်နက်များ၊ စစ်သားများ အမြန်သယ်ယူ ပို့ဆောင်နိုင်မည့် ကားများ ဖြန့်ကြက်ချထားပြီး ထိုင်းစစ်တပ်၏ စစ်အင်အား တောင့်တင်း မှုကို ပြသခဲ့ကြောင်းသိရသည်။

ထိုင်းဒုတိယဗိုလ်ချုပ်ကြီးက ထိုင်းစစ်သားများအနေဖြင့် မိမိတို့၏ တိုက်ခိုက်ရေး စွမ်းရည်ပိုင်းကို ယုံကြည်မှုအပြည့်ရှိစေရန်နှင့် ထိုင်းနိုင်ငံ ကို ကာကွယ်ရန်အဆင့်သင့်ရှိနေရမည်ဖြစ်ကြောင်း တိုက်တွန်းပြောဆိုခဲ့သည်။ ထိုင်းအစိုးရအဖွဲ့ကလည်း ကမ္ဘောဒီးယားနှင့်ဖြစ်ပွားနေသည့်နယ်စပ်ဒေသအငြင်းပွားမှုများကို ငြိမ်းချမ်းစွာဆွေးနွေးမည်ဆိုလျှင် ငြိမ်းချမ်းစွာဆွေးနွေးမည်ဖြစ်သလို လက်နက်ကိုင်တိုက်ခိုက်မည်ဆိုလျှင် ပြန်လည်တုံ့ပြန်တိုက်ခိုက်မည်ဖြစ်ကြောင်းပြောဆိုထားသည်။

ကိုးကား- NP News

ယူကရိန်းလေတပ်အရာရှိများက F-16 တိုက်လေယာဉ်များသည် ရုရှား၏ Su-35S နှင့် ယှဉ်ပြိုင်နိုင်စွမ်းမရှိကြောင်း ဝန်ခံပြောဆိုခဲ့ပြီး ၎င်းတို့ပစ်ချခံရခြင်းသည် ပုံမှန်ဖြစ်စဉ် ဖြစ်ကြောင်း ပြောကြားခဲ့သည်။

“တိုက်လေယာဉ်များ ပစ်ချခံရခြင်းသည် ပဋိပက္ခ၏ ပုံမှန်ဖြစ်ရပ်တစ်ခုဖြစ်ကြောင်း နားလည်ရန် အရေးကြီးပါသည်။ အထူးသဖြင့် အပြင်းထန် တိုက်ပွဲများတွင် ဆုံးရှုံးမှုများ ရှောင်လွှဲ၍မရပါ။ F-16 လည်း အပါအဝင် ဖြစ်သည်။ အရေးကြီးသည်မှာ ယူကရိန်းသည် ၎င်း၏စွမ်းအားကို တိုးမြှင့် နေခြင်းဖြစ်သည်” ဟု ယူကရိန်းလေတပ်ဌာနချုပ်၏ ပြောရေးဆိုခွင့်ရှိသူ ဗိုလ်မှူးကြီး Yuri Ignat က ဇွန်လ ၃ ရက်တွင် ထုတ်ပြန်သော တွေ့ဆုံ မေးမြန်းခန်းတစ်ခုတွင် ပြောကြားခဲ့သည်။

ထို့အပြင် ၎င်းက အနောက်နိုင်ငံများမှ လှူဒါန်းထားသော F-16 များသည် အသုံးပြုပြီးသား (အဟောင်း) များဖြစ်ကြောင်း ထည့်သွင်းပြောဆိုခဲ့သော်လည်း ခေတ်ဟောင်း ဆိုဗီယက်တိုက်လေယာဉ်များထက် ပိုမို သာလွန်ပြီး ခရုဇ်ဒုံးကျည်များကို ကာကွယ်ရာတွင် အထူးထိရောက်မှုရှိကြောင်း ပြောဆိုခဲ့သည်။ တိုက်လေယာဉ်တစ်စီး၏ တိုက်ခိုက်ရေး စွမ်းဆောင်နိုင်မှုသည် ၎င်း၏ နည်းပညာဆိုင်ရာ စွမ်းဆောင်မှုများသာမက တပ်ဆင်ထားသော ရေဒါနှင့် ဒုံးကျည်အမျိုးအစားပေါ်တွင်လည်း မူတည်ကြောင်း အတိအလင်းပြောကြားခဲ့သည်။ 

ထုတ်ပြန်ထားသောဓာတ်ပုံများအရ ယူကရိန်း၏ F-16 တိုက်လေယာဉ်များ တွင် အမေရိကန်နှင့်မဟာမိတ်နိုင်ငံများမှ ခေတ်အမီဆုံးဟုဆိုရမည့် တာလတ်ပစ် AIM-120C နှင့် တာတိုပစ် AIM-9X ဝေဟင်မှဝေဟင်ပစ် ဒုံးကျည်များ တပ်ဆင်ထားကြောင်း တွေ့ရသည်။

သို့ရာတွင် ဗိုလ်မှူးကြီး Ignat က ယူကရိန်း၏ F-16 တပ်ဖွဲ့သည် ရုရှား၏ ခေတ်မီ Su-35S ဘက်စုံသုံးတိုက်လေယာဉ်များနှင့် “တိုက်ရိုက် ရင်ဆိုင် နိုင်စွမ်းမရှိကြောင်း” ဝန်ခံခဲ့သည်။ “ရုရှားတိုက်လေယာဉ်များသည် F-16 ထက် ပိုမိုဝေးကွာသောအကွာအဝေးမှ ပစ်မှတ်များကို ဖော်ထုတ်နိုင်ပြီး ဒုံးကျည်ပစ်ခတ်နိုင်စွမ်းရှိသည်။ မိမိတို့အနေဖြင့် ပိုမိုဝေးကွာသော အကွာအဝေးအထိ ထိရောက်စွာ လုပ်ဆောင်နိုင်သည့် ရေဒါစနစ်များနှင့် ပိုမိုတိကျသောဒုံးကျည်များ လိုအပ်နေပါသည်” ဟု ၎င်းက ရှင်းပြခဲ့သည်။ ရုရှားတိုက်လေယာဉ်များသည် S-400 ကဲ့သို့သော စွမ်းအားကြီးမားသည့် လေကြောင်းကာကွယ်ရေးစနစ်များနှင့် အချိန်ကိုက် ညှိနှိုင်းလုပ်ဆောင်လေ့ရှိပြီး ယူကရိန်း၏ F-16 တပ်ဖွဲ့အတွက် ပိုမိုအခက်အခဲများစေကြောင်း ဖြည့်စွက်ပြောကြားခဲ့သည်။

၂၀၂၃ ခုနှစ်က ဒိန်းမတ်၊ နယ်သာလန်၊ နော်ဝေးနှင့် ဘယ်လ်ဂျီယံ နိုင်ငံများသည် အမေရိကန်ထုတ် F-16 တိုက်လေယာဉ်စုစုပေါင်း ၈၅ စီးကို ယူကရိန်းသို့ လှူဒါန်းရန် ကတိပြုခဲ့ကြပြီး၊ ပထမဆုံးအသုတ်ကို ၂၀၂၄ ခုနှစ်၊ ဩဂုတ်လတွင် ပေးပို့ခဲ့သည်။ 

ရုရှားစစ်တပ်သည် Suicide drones နှင့် ဒုံးပျံများဖြင့် ယူကရိန်း၏ F-16 တပ်ဖွဲ့များ ရှိနေသည့် အခြေစိုက်စခန်းများကို အကြိမ်ကြိမ် တိုက်ခိုက်ခဲ့သည်။ ယူကရိန်းလေတပ်က ထိုလေဆိပ်များ ပစ်ခတ်ခံရကြောင်း သွယ်ဝိုက်၍ ဝန်ခံခဲ့သော်လည်း ပျက်စီးဆုံးရှုံးမှုအတိအကျကို ထုတ်ဖော်ပြောဆိုရန် ငြင်းဆိုခဲ့သည်။

ကိုးကား- VN Express

ဘာသာပြန်ဆိုသူ-ဦးဝင်းဇော်ထွန်း၊ဒုတိယညွှန်ကြားရေးမှူး၊ နစက-၂

ယူကရိန်းတို့သည် အမေရိကန်ထံမှ တိုက်ရိုက်ထောက်လှမ်းရေး သတင်း အချက်အလက်များနှင့် ဂြိုလ်တုအထောက်အပံ့မရှိပါက ရုရှားနယ်မြေအတွင်းပိုင်း နက်ရှိုင်းစွာတည်ရှိသော နေရာများတွင် ရပ်နားထားသည့်ရုရှားနိုင်ငံ၏ မဟာဗျူဟာမြောက်လေယာဉ်များကို အဝေးမှ ထိရောက်စွာ တိုက်ခိုက်နိုင်မည် မဟုတ်ကြောင်း ပြင်သစ်စစ်တပ်အရာရှိဟောင်း တစ်ဦး က ပြောကြားခဲ့သည်။

ယူကရိန်းတို့သည် တနင်္လာနေ့ (ဇွန် ၂) တွင် “Operation Spider’s Web” ဟု အမည်ရသည့် ပေါင်းစပ်တိုက်ခိုက်မှုတစ်ခုဖြင့် အာတိတ်ဒေသရှိ Murmansk မှ ဆိုက်ဘေးရီးယားရှိ Irkutsk အထိ ရုရှားနယ်မြေအတွင်းရှိ လေတပ်စခန်းများကို ဒရုန်းများဖြင့် တိုက်ခိုက်ခဲ့သည်။ ကိယက်ဗ်၏ ပြောဆိုချက်အရ Tu-95 နှင့် Tu-22 ကဲ့သို့သော ရုရှား၏ ရေဒါ ရှောင်ရှား နိုင်သည့် ဗုံးကြဲလေယာဉ်အပါအဝင် စစ်လေယာဉ်ပေါင်း ၄၀ ခန့် ပျက်စီး ခဲ့သည်ဟုဆိုသည်။ မော်စကိုမှ အဆိုပါပြောဆိုချက်ကို အတည်မပြုသေးဘဲ ယူကရိန်း၏ဒရုန်းအများစုကို ပစ်ချဖျက်ဆီးနိုင်ခဲ့သည်ဟုသာ ထုတ်ပြန် ခဲ့သည်။ သတင်းများအရ ယင်းတိုက်ခိုက်မှုကို ရုရှားနယ်အတွင်းသို့ကြိုတင်ပို့ဆောင်ထားသော ကုန်တင်ကားများတွင် ပါဝင်သည့် ဒရုန်း များဖြင့် ဆောင်ရွက်ခဲ့ခြင်းဖြစ်သည်။

စာရေးဆရာနှင့် ပြင်သစ်စစ်တပ်၏ ဗိုလ်မှူးကြီးဟောင်း Guillaume Ancel က ဗုဒ္ဓဟူးနေ့ (ဇွန် ၄) တွင် Le Monde သို့ ပြောကြားရာတွင် ကိယက်ဗ်၏စစ်ဆင်ရေးတွင် ရှေ့တန်းမှ ကီလိုမီတာထောင်ချီဝေးသော နေရာများမှ FPV ဒရုန်းများကို မောင်းနှင်ခဲ့ကြောင်း ဖော်ပြခဲ့သည်။

“ထိုသို့ပြုလုပ်နိုင်ခြင်းမှာ စွမ်းအားပြည့် ဂြိုလ်တုဆက်သွယ်ရေးစနစ်၏ အထောက်အပံ့မပါဘဲ မဖြစ်နိုင်ပါ” ဟု ၎င်းက ဆိုသည်။ “ယူကရိန်း တို့တွင် ထိုကဲ့သို့သော နည်းပညာအရည်အချင်းမရှိသောကြောင့် အဝေးမှ ထိန်းချုပ် တိုက်ခိုက်နိုင်ခဲ့ခြင်းမှာ အမေရိကန်ပြည်ထောင်စု၏ အကူအညီကြောင့်သာ ဖြစ်နိုင်သည်” ဟု ၎င်းက ဖြည့်စွက်ပြောကြားခဲ့သည်။ Ancel က ကိယက်ဗ် သည် “အမေရိကန်ထောက်လှမ်းရေးမှ သတင်းအချက်အလက်များမရှိပါက အဆိုပါစစ်ဆင်ရေးကို အောင်မြင်စွာ လုပ်ဆောင်နိုင်မည် မဟုတ်ပါ” ဟု ထောက်ပြခဲ့သည်။

အနောက်နိုင်ငံအချို့က ယူကရိန်း၏ ဒရုန်းတိုက်ခိုက်မှုကို ချီးကျူးနေကြ သော်လည်း အပြည်ပြည်ဆိုင်ရာ စွန့်စားမှုအန္တရာယ်ဆိုင်ရာ အကြံပေးနှင့် အရန်စစ်မှုထမ်း အရာရှိ Stephane Audrand က ယင်းတိုက်ခိုက်မှုသည် လက်ရှိအခြေအနေအတွက် ကြီးမားသောသက်ရောက်မှုမရှိဟု အတည်ပြုပြောဆိုခဲ့သည်။

ကိုးကား- RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

လက်ရှိဘဏ္ဍာရေးနှစ်အကုန် ၂၀၂၆ ခုနှစ်၊ ဧပြီလတွင် ယူကရိန်းကို ဒရုန်း အစင်းရေ (၁) သိန်းထောက်ပံ့ပေးရန် ဗြိတိန်အစိုးရက ကတိပြုခဲ့ကြောင်း သိရပါသည်။ ဒရုန်းများသည် စစ်ပွဲဆင်နွှဲသည့်ပုံစံများကို ပြောင်းလဲစေခဲ့ သည်ဟု ပြောဆိုမှုများရှိခဲ့ပြီးနောက် ယခုကဲ့သို့ကတိပြုမှု ထွက်ပေါ်လာခြင်း ဖြစ်ပါသည်။

ရုရှား၏ ဖြစ်နိုင်ခြေရှိသည့် တိုက်ခိုက်မှုအပါအဝင် အခြားပေါ်ပေါက်လာ နိုင်သော ခြိမ်းခြောက်မှုများကို တန်ပြန်နိုင်ရန်အတွက် မြင့်မားသည့် နည်းပညာနှင့် စစ်တပ်အတွက်တောင်းဆိုသည့် မဟာဗျူဟာမြောက် ကာကွယ်ရေးသုံးသပ်ချက်ကို ဗြိတိန်အစိုးရက ထောက်ခံခဲ့ကြောင်းလည်း သိရပါသည်။

ရုရှား-ယူကရိန်းစစ်ပွဲဖြစ်ပွားချိန်မှစတင်ပြီး ယူကရိန်း၏ အဓိက ကျောထောက် နောက်ခံနိုင်ငံများထဲမှ တစ်နိုင်ငံဖြစ်သည့် ဗြိတိန်သည် ဒရုန်းများက စစ်မြေပြင်ကို မည်ကဲ့သို့ပြောင်းလဲမှုများဖြစ်ပေါ်စေသည်ကို ယူကရိန်းထံ လေ့လာသင်ယူရန် စီစဉ်နေကြောင်းလည်း သိရပါသည်။ ထို့အပြင် ပေါင်သန်း(၃၅၀)တန်ဖိုးရှိ ဒရုန်းအကူအညီသည် ယူကရိန်းအတွက် ပေါင် (၄ ဒသမ ၅) ဘီလီယံတန်ဖိုးရှိ စစ်ရေးထောက်ပံ့မှုအစီအစဉ်၏ တစ်စိတ်တစ်ပိုင်းဖြစ်သည်ဟု ဗြိတိန်အစိုးရကပြောကြားခဲ့ပါသည်။ ဗြိတိန် အစိုးရက “ဗြိတိန်နိုင်ငံသည် ယခုနှစ်အတွင်း ယူကရိန်းကို ထောင်နှင့် ချီသော ဒရုန်းများ ပေးပို့ပြီး ယူကရိန်းအတွက် ဗြိတိန်၏ အကူအညီ များကို တိုးမြှင့်ဆောင်ရွက်လျက်ရှိသည်” ဟု ပြောဆိုခဲ့ပါသည်။

ကိုးကား- NP News