ရောမ   ဇွန် ၄

အီတလီနိုင်ငံတွင် မောင့်အက်တနာမီးတောင် ပေါက်ကွဲပြီးနောက် မီးခိုးလုံးများသည် မီးတောင်အနီးပျံ့နှံ့နေပြီး ထပ်မံလှုပ်ရှားနိုင်သဖြင့် စစ္စလီမြို့ပြကာကွယ်ရေးဌာနက ဇွန် ၃ ရက်က မီးတောင်သတိပေးချက် ထုတ်ပြန်ထားကြောင်း ယနေ့သတင်းများအရ သိရသည်။

အီတလီနိုင်ငံရှိ မောင့်အက်တနာမီးတောင်သည် ဇွန် ၂ ရက်က ပေါက်ကွဲခဲ့ပြီးနောက် မီးတောင်မှ ပြာမှုန်များနှင့် မီးခိုးငွေ့များသည် စစ္စလီကျွန်းအရှေ့ဘက်ထိ ပျံ့နှံ့နေကာ မီးတောင်ထိပ်တစ်ဝိုက်တွင်လည်း မီးခိုးများဖြင့် ဖုံးလွှမ်းနေသောကြောင့် ဇွန် ၃ ရက်တွင် မီးတောင်သတိပေးချက် ထုတ်ပြန်ထားကြောင်း၊ ထို့ကြောင့် မီးတောင်သို့ လေ့လာလည်ပတ်မည့်သူများ မြို့ပြကာကွယ်ရေးဌာနက သတိပေးထားကြောင်း သိရသည်။

“မီးတောင်သတိပေးချက်ထုတ်ထားပေမဲ့ စွန့်စွန့်စားစားတက်ကြတဲ့ တောက်တက်သမားတွေရှိပါတယ်။ အသက်အန္တရာယ်မဖြစ်ဖို့ အတွက်တော့ ဂရုစိုက်ကြရမှာပါ။ လက်ရှိအခြေအနေထိ မီးတောင်က မတည်ငြိမ်သေးပါဘူး။ စွန့်စားတာမျိုး မလုပ်စေချင်ပါဘူး။ တောက်မတက်မီ မိမိကိုယ်ကို ကာကွယ်ရေးအစီအစဉ်တွေတော့ သေချာပြင်ဆင်သွားဖို့လိုပါမယ်” ဟု စစ္စလီမြို့ပြကာကွယ်ရေးဌာနအကြီးအကဲ ဆာဗိုကိုနီကာက ပြောကြားခဲ့ကြောင်း သိရသည်။

Source: ရတနာပုံသတင်းစာ

ကမ္ဘာပတ်လမ်းအတွင်းရှိ နိုင်ငံတကာ အာကာသစခန်း (ISS)၏ နေရာတွင် အစားထိုး၍ အာကာသခရီးသွားလာရေး လုပ်ငန်းဖွံ့ဖြိုး တိုးတက်ရေးကို ဖော်ဆောင်နိုင်မည့် ရုရှားအာကာသစခန်း (ROS) တစ်ခုကို တည်ဆောက်ရန် ရုရှားနိုင်ငံက စီစဉ်လျက်ရှိသည်။

ROS အနေဖြင့် လက်ရှိ နိုင်ငံတကာ အာကာသစခန်း၏ နေရာတွင် အစားထိုးသွားမည်ဖြစ်ပြီး အဆိုပါ ရုရှားအာကာသစခန်းကို အသုံးပြုခြင်းအားဖြင့် အာကာသခရီး သွားလာရေးလုပ်ငန်းကို ဖော်ဆောင်ရန် စီစဉ်လျက် ရှိကြောင်း ရုရှားအာကာသအေဂျင်စီ အကြီးအကဲဖြစ်သူ   ဒီမီထရီ ဘာကာနော့ဗ်က ဇွန်လ  ၃  ရက်တွင် ကျင်းပခဲ့သည့် (၁၀) ကြိမ်မြောက် ညီလာခံ တစ်ခုတွင် ပြောကြားသည်။

လက်ရှိအစီအစဉ်အရ ရုရှားနိုင်ငံသည် ရုရှားအာကာသစခန်းကို ပတ်လမ်းအတွင်း၌   ၂၀၂၇ ခုနှစ်မှစ၍  ၂၀၃၃ ခုနှစ်အထိ လည်ပတ်မည်ဖြစ်ပြီး ယင်းစီမံကိန်းအား အကောင်အထည်  ဖော်ဆောင်နိုင်ရေး အတွက် ကြိုးပမ်းလျက် ရှိသည်။

ထို့ပြင် ပတ်လမ်းအတွင်းသို့ လွှတ်တင်မည့် ရုရှားအာကာသစခန်းအား လူလိုက်ပါသည့် အာကာသယာဉ်များ လွှတ်တင်ရေးအတွက်လည်း   အသုံးပြုမည်ဖြစ်သည်။

MWD Web Portal

တံတားဦး ၊ ဇွန် - ၅

မန္တလေးတိုင်းဒေသကြီး၊ တံတားဦးခရိုင်၊ တံတားဦးမြို့နယ်တွင် သဘာဝဘေးအန္တရာယ်များ ကြိုတင်ကာကွယ်နိုင်ရန်နှင့် ကျရောက်လာပါက အချိန်နှင့်တစ်ပြေးညီလျင်မြန်စွာ တုံ့ပြန်ဆောင်ရွက်နိုင်ရန်အတွက် ဇွန်လ ၅ ရက်နေ့၊ နံနက် (၁၀) နာရီက မြို့နယ်မီးသတ်ဦးစီးဌာနတွင် ကူညီရှာဖွေကယ်ဆယ်ရေးသုံး ပစ္စည်းကိရိယာများ အသင့်စုဖွဲ့ထားရှိမှု ပြင်ဆင်ဆောင်ရွက်ထားရှိမှုကို တံတားဦးမြို့နယ် မီးသတ်ဦးစီးဌာန ဦးစီးအရာရှိ ဦးကျော်သူအောင် က ဆွေးနွေးတင်ပြရာ တံတားဦးခရိုင် စီမံအုပ်ချုပ်ရေးအဖွဲ့ ဥက္ကဋ္ဌ ဦးကျော်ငြိမ်းနှင့် တာဝန်ရှိသူများ၊ မြို့နယ်စီမံအုပ်ချုပ်ရေးအဖွဲ့ ဥက္ကဋ္ဌ ဦးဖြိုးဇော်ကိုကိုနှင့် တာဝန်ရှိသူများက လေ့လာကြည့်ရှုကြပြီး လိုအပ်သည်များကို သက်ဆိုင်ရာဌာနများနှင့် ပူးပေါင်းဆောင်ရွက်ပေးမည်ဖြစ်ကြောင်းပြောကြားသည်။

မြို့နယ်မီးသတ်ဦးစီးဌာနအနေဖြင့် သဘာဝဘေးအန္တရာယ်များကို ကြိုတင်ကာကွယ်နိုင်ရန်နှင့် သဘာဝဘေးများကျရောက်လာပါက အချိန်နှင့်တစ်ပြေးညီ လျင်မြန်စွာတုံ့ပြန်ကူညီဆောင်ရွက်ပေးနိုင်ရေးအတွက် လူ၊ ယာဉ်နှင့် ရှာဖွေကယ်ဆယ်ရေးသုံး စက်နှင့်ပစ္စည်းကိရိယာများ အသင့်စုဖွဲ့ထားရှိမှု၊ သန္ဓေမီးသတ်တပ်ဖွဲ့ဝင်များ၊ အရန် မီးသတ်တပ်ဖွဲ့ဝင်များအား ရှာဖွေကူညီကယ်ဆယ်ရေးလုပ်ငန်းများ ဆောင်ရွက်နိုင်ရန်အတွက် ဇာတ်တိုက်လေ့ကျင့်ခြင်း၊ ရှာဖွေကယ်ဆယ်ရေးသုံးစက်ပစ္စည်းကိရိယာအသုံးပြု၍ လျင်မြန်စွာဆောင်ရွက်နိုင်ရန် ကြိုတင် ပြင်ဆင်ဆောင်ရွက်လျက်ရှိကြောင်း သိရသည်။

ပေးပို့သူ- ဦးရဲတင့် (ပြန်/ဆက်)

Google က ဗုဒ္ဓဟူးနေ့ (ဇွန် ၄) တွင် ထုတ်ပြန်ချက်အရ ဟက်ကာ များသည် ဥရောပနှင့် အမေရိကရှိ ကုမ္ပဏီများ၏ ဝန်ထမ်းများကိုSalesforce နှင့်ဆက်စပ်သော အပလီကေးရှင်း၏ ပြုပြင်ထားသည့် ဗားရှင်း ကို တပ်ဆင်စေရန် လှည့်ဖြားနေပြီး ၎င်းတို့အား အချက်အလက်များ ခိုးယူခြင်း၊ အခြားကော်ပိုရိတ် Cloud ဝန်ဆောင်မှုများသို့ ဝင်ရောက်ခွင့် ရယူခြင်းနှင့် ကုမ္ပဏီများအား ငွေညှစ်ခြင်းများ ပြုလုပ်နေကြောင်း ဖော်ပြ ခဲ့သည်။ 

Google ၏ Threat Intelligence Group က UNC6040 အဖြစ် ခြေရာခံ ထားသော ဟက်ကာအဖွဲ့သည် Salesforce ၏ Data Loader (Salesforce သို့ အချက်အလက်များကို အစုလိုက်ထည့်သွင်းရန် အသုံးပြုသည့် ကိရိယာ) ၏ ပြုပြင်ထားသည့် ဗားရှင်းကို တပ်ဆင်ရန် ဝန်ထမ်းများအား ပိပိရိရိ လှည့်ဖြားနိုင်ခဲ့ကြောင်း သုတေသီများက ဆိုသည်။

ဟက်ကာများသည် အလုပ်သမားများအား အတုအယောင် Salesforce ချိတ်ဆက်ထားသော အပလီကေးရှင်း စနစ်ထည့်သွင်းမှုစာမျက်နှာသို့ သွားရောက်စေပြီး၊ ၎င်းတို့ကိုယ်တိုင် ဖန်တီးထားသော Data Loader အတုကို အတည်ပြုခိုင်းကာ အသုံးပြုစေခဲ့သည်။

ဝန်ထမ်းများက အဆိုပါအက်ပ်ကို တပ်ဆင်မိပါက ဟက်ကာများသည် ၎င်းတို့ဖန်တီးထားသည့် Salesforce ၏ Data Loader မှတစ်ဆင့် ဝယ်ယူသူများ၏ အရေးကြီးသောအချက်အလက်များကို ရယူခြင်း၊ ရှာဖွေခြင်းနှင့် ခိုးယူခြင်း စွမ်းရည်များကို ရရှိသွားမည်ဖြစ်ကြောင်း သုတေသီ များက ပြောကြားခဲ့သည်။

ထို့အပြင် ခွင့်ပြုချက်ရရှိပါက ဟက်ကာများသည် ဝယ်ယူသူ၏ ကွန်ရက် အတွင်း လှည့်လည်သွားလာနိုင်ပြီး အခြား Cloud ဝန်ဆောင်မှုများနှင့် ကုမ္ပဏီ၏ အတွင်းပိုင်းကွန်ရက်များကိုပါ ထပ်မံတိုက်ခိုက်နိုင်သည်ဟု ဆိုသည်။

အဆိုပါလှုပ်ရှားမှုနှင့်သက်ဆိုင်သော နည်းပညာဆိုင်ရာ အခြေခံ အဆောက် အအုံများသည် “The Com” ဟုလူသိများသည့် အင်တာနက် မှောင်ခို လှုပ်ရှားမှုများနှင့် တစ်ခါတစ်ရံ အကြမ်းဖက်လုပ်ရပ်များတွင် ပါဝင်လေ့ ရှိသော အုပ်စုငယ်များပါဝင်သည့် လျော့ရဲသော ဂေဟစနစ်နှင့် ဆက်စပ် နေသော လက္ခဏာများရှိကြောင်း သုတေသီများက ဖော်ပြခဲ့သည်။

Google ၏ ပြောရေးဆိုခွင့်ရှိသူတစ်ဦးက Reuters သို့ ပြောကြားရာတွင် UNC6040 ၏ လှုပ်ရှားမှုကြောင့် အဖွဲ့အစည်း ၂၀ ခန့် ထိခိုက်ခဲ့ပြီး ယခုနှစ် လွန်ခဲ့သည့် လအနည်းငယ်အတွင်း ထိုကဲ့သို့ဖြစ်စဉ်များကို မြင်တွေ့ခဲ့ရကြောင်း ဖော်ပြခဲ့သည်။ ထိုအဖွဲ့အစည်းများအနက် အချို့မှာ အချက်အလက်များ အောင်မြင်စွာ ခိုးယူခြင်းခံခဲ့ရသည်ဟု ၎င်းက ဆိုသည်။

Salesforce ၏ ပြောရေးဆိုခွင့်ရှိသူတစ်ဦးကလည်း အီးမေးလ်ဖြင့် Reuters သို့ ပြန်ကြားရာတွင် “ဖော်ပြပြီးသော ပြဿနာသည် မိမိတို့၏ ပလက်ဖောင်း၏ အားနည်းချက်တစ်ခုကြောင့် မဟုတ်ကြောင်း” ထုတ်ပြန် ခဲ့သည်။ ၎င်းက ဝန်ထမ်းများအား လှည့်ဖြားရန် အသုံးပြုသည့် ဖုန်းခေါ်ဆိုမှုများသည် လူမှုရေးရာ နည်းပညာဆိုင်ရာ လှည့်ကွက်များ (social engineering scams) ဖြစ်ပြီး တစ်ဦးချင်းအသုံးပြုသူများ၏ ဆိုက်ဘာ လုံခြုံရေး အသိပညာနှင့် အကောင်းဆုံးအလေ့အကျင့်များ၏ ကွာဟချက် များအား အခွင့်ကောင်းယူထားခြင်းသာဖြစ်ကြောင်း ရှင်းပြခဲ့သည်။

ထို့အပြင် ၎င်းက ထိခိုက်ခံရသည့် ဖောက်သည်အရေအတွက်ကို တိတိ ကျကျ ဖော်ပြရန် ငြင်းဆိုခဲ့သော်လည်း၊ “ထိခိုက်ခံရသည့် ဖောက်သည် အနည်းငယ်သာ ရှိပြီး ကြီးကြီးမားမား ပြဿနာတစ်ခု မဟုတ်ကြောင်း” ပြောကြားခဲ့သည်။

Salesforce သည် ၂၀၂၅ ခုနှစ်၊ မတ်လအတွင်း ထုတ်ပြန်ခဲ့သော ဘလော့ဂ်ပို့စ်တွင် ဖုန်းဖြင့်လှည့်ဖြားခြင်း (vishing) တိုက်ခိုက်မှုများနှင့် Data Loader ၏ ပြုပြင်ထားသော အန္တရာယ်ရှိဗားရှင်းများကို အလွဲသုံးစား ပြုမှုများအား ဖောက်သည်များအား သတိပေးခဲ့သည်။

ကိုးကား- CNN

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အမေရိကန်ရှေ့နေချုပ်ရုံးက တရုတ်သိပ္ပံပညာရှင် ၂ ဦးကို သီးနှံများကို ပျက်စီးစေနိုင်သည့် အဆိပ်ပြင်းမှိုမျိုးကို တရားမဝင် သယ်ဆောင်လာမှုဖြင့် တရားစွဲဆိုလိုက်ပါသည်။

မစ်ရှီဂန်ပြည်နယ် အရှေ့ပိုင်းခရိုင်ရှေ့နေရုံးက ဇွန်လ ၃ ရက်နေ့တွင် တရုတ်နိုင်ငံသား သိပ္ပံပညာရှင် ၃၃ နှစ်အရွယ် Yunqing Jian နှင့် ၃၄ နှစ် အရွယ် Zunyong Liu တို့အား အမေရိကန်သို့ တရားမဝင် ပစ္စည်းများ သယ်ဆောင်ခြင်း၊ လိမ်လည်ထွက်ဆိုခြင်းနှင့် ဗီဇာလိမ်လည်မှုများဖြင့် စွဲချက်တင်ကြောင်း ကြေညာခဲ့သည်။

အမေရိကန်တရားရေးဌာန၏ အဆိုအရ ထိုသိပ္ပံပညာရှင် ၂ ဦးသည် Fusarium graminearum ဟုခေါ်သော အဆိပ်ရှိမှိုမျိုးကို အမေရိကန်သို့ လျှို့ဝှက်သယ်ဆောင်ကာ မစ်ရှီဂန်တက္ကသိုလ်တွင် သုတေသနပြုလုပ်ရန် စီစဉ်ခဲ့ကြသည်။ FBI ၏ ဖော်ပြချက်အရ အဆိုပါမှိုမျိုးသည် ဂျုံ၊ မုယော၊ ဆန်နှင့် ပြောင်းကဲ့သို့သော သီးနှံများတွင် Cotton blight ရောဂါကို ဖြစ်စေနိုင်ပြီး “စိုက်ပျိုးရေးအကြမ်းဖက်လက်နက်” အဖြစ် သတ်မှတ်ခံထားရသည့် အန္တရာယ်ရှိသော မှိုမျိုးဖြစ်ကာ ကမ္ဘာတစ်ဝှမ်းတွင် နှစ်စဉ် ဒေါ်လာဘီလီယံချီ ဆုံးရှုံးမှုများ ဖြစ်စေနိုင်ပါသည်။ ထို့အပြင် ထိုမှိုမျိုးသည် လူနှင့် တိရစ္ဆာန်များတွင် အန်ခြင်း၊ အသည်းပျက်စီးခြင်း နှင့် မျိုးပွားမှုဆိုင်ရာ ချို့ယွင်းချက်များကိုလည်း ဖြစ်စေနိုင်ပါသည်။

Zunyong Liu သည် ၂၀၂၄ ခုနှစ်၊ ဇူလိုင်လတွင် ၎င်း၏ ကျောပိုးအိတ်တွင်တွေ့ရသော အနီရောင်နမူနာပစ္စည်းနှင့်ပတ်သက်၍ မေးမြန်း စစ်ဆေးစဉ် လိမ်လည်ထွက်ဆိုခဲ့ခြင်းကြောင့် ဒက်ထရိုက်လေဆိပ်၌ ဝင်ရောက်ခွင့်ငြင်းပယ်ခံရပြီး တရုတ်နိုင်ငံသို့ ပြန်ပို့ခြင်းခံခဲ့ရသည်။ FBI ၏အဆိုအရ Liu သည် အစောပိုင်းတွင် နမူနာပစ္စည်းများအကြောင်း ဘာမှမသိဟု ငြင်းဆိုခဲ့သော်လည်း နောက်ပိုင်းတွင် မစ်ရှီဂန် တက္ကသိုလ် ဓာတ်ခွဲခန်းတွင် သုတေသနပြုလုပ်ရန် ရည်ရွယ်ခဲ့ကြောင်း ဝန်ခံခဲ့သည်။ Liu ၏ ချစ်သူ Yunqing Jian သည် အဆိုပါဓာတ်ခွဲခန်းတွင် အလုပ်လုပ်နေဆဲဖြစ်ပြီး Liu ကိုယ်တိုင်မှာမူ အလုပ်မှ နုတ်ထွက်ထားသူဖြစ်သည်။

တရားစွဲဆိုချက်အရ ၎င်းတို့နှစ်ဦးစလုံးသည် တရုတ်နိုင်ငံတွင် Fusarium graminearum မှိုမျိုးကို လေ့လာခဲ့ဖူးပြီး ၂၀၂၄ ခုနှစ်က သူတို့အကြား ပို့သောစာတိုများတွင် Jian သည် Liu ဒက်ထရိုက်လေဆိပ်တွင် ဖမ်းဆီးခံရချိန်မတိုင်မီကပင် မစ်ရှီဂန်တက္ကသိုလ်ဓာတ်ခွဲခန်းတွင် ထိုမှိုမျိုးကို လေ့လာနေခဲ့ကြောင်း ဖော်ပြထားသည်။ မစ်ရှီဂန်တက္ကသိုလ်တွင် အဆိုပါ မှိုမျိုးကို လေ့လာရန် ဖက်ဒရယ်လိုင်စင်မရှိခဲ့ပေ။

အမေရိကန်ပြည်ထောင်စုသည် တရုတ်နိုင်ငံနှင့် တရားခံလွှဲပြောင်းရေး သဘောတူစာချုပ်မရှိသောကြောင့် Liu ကို ဝါရှင်တန်က ဖမ်းဆီးနိုင်ရန် မဖြစ်နိုင်ဟု ယူဆရသည်။ ထိုအတောအတွင်း Jian အား တရားရုံးတွင် ရုံးထုတ်ခဲ့ပြီး လာမည့်ရက်များအတွင်း အာမခံကြားနာမှုကို ဆိုင်းငံ့ထားကာ အကျဉ်းထောင်သို့ ပြန်လည်ပို့ဆောင်ခဲ့သည်။

တရုတ်အစိုးရက အဆိုပါဖြစ်ရပ်နှင့်ပတ်သက်၍ မှတ်ချက်တစ်စုံတစ်ရာ ထုတ်ပြန်ပြောဆိုခြင်းမရှိသေးဘဲ မစ်ရှီဂန်တက္ကသိုလ်မှ စုံစမ်းစစ်ဆေးမှုတွင် အာဏာပိုင်များနှင့် ပူးပေါင်းဆောင်ရွက်နေကြောင်း ပြောကြားခဲ့သည်။

ကိုးကား-VN Express

ဘာသာပြန်ဆိုသူ-ဦးဝင်းဇော်ထွန်း၊ဒုတိယညွှန်ကြားရေးမှူး၊ နစက-၂

ခရီးသွားဧည့်သည် ၂၀၀ ကျော် လိုက်ပါလာသည့် ပထမဆုံးသော တရုတ်-ဗဟိုအာရှယဉ်ကျေးမှု ခရီးစဉ် ရထားမှာ နှစ်ရက်ကြာ ခရီးနှင်ပြီးနောက် ကာဇက်စတန်နိုင်ငံ အယ်လ်မာတီမြို့သို့ ဆိုက်ရောက်လာ ခဲ့သည်။
ရှီးအန်းမြို့မှ ထွက်ခွာလာသည့် အဆိုပါရထားမှာ မေ ၃၁ ရက်က တရုတ်နိုင်ငံ ရှင်းကျန်းဒေသရှိ ဟော့အယ် ကောစစ် နယ်စပ်စခန်းမှတစ်ဆင့် နယ်စပ်ကိုဖြတ်ကျော်ခဲ့ခြင်းဖြစ်သည်။ အဆိုပါ နိုင်ငံတကာရထား အဆင်ပြေပြေ ထွက်ခွာနိုင်ရေးအတွက် ဘူတာရုံက လက်မှတ်လဲလှယ်ခြင်း၊ အထွက်စစ်ဆေးခြင်းနှင့် ရထား အစိတ်အပိုင်းများ လဲလှယ်ခြင်းတို့ လွယ်ကူချောမွေ့စေရန် ထိထိရောက်ရောက် ဆောင်ရွက်ပေးခဲ့သည်။

ကိုးကား- Xinhua

ထိုင်ဝမ်၏ အလှအပလုပ်ငန်းတွင် လူကြိုက်များပြီး မိတ်ကပ်ပစ္စည်းများကို စားသုံးပြသည့် ဗီဒီယိုများဖြင့် ကျော်ကြားခဲ့သော အမျိုးသမီးငယ်တစ်ဦး အသက် ၂၄ နှစ်အရွယ်တွင် ကွယ်လွန်သွားခဲ့သည်။

Guava Beauty အမည်ရှိ အဆိုပါ အမျိုးသမီးငယ်သည် နုပျိုချစ်စရာကောင်းသော ဟန်ပန်နှင့် “မိတ်ကပ်နှင့် အစားအစာ” ပေါင်းစပ်ထားသည့် "mukbang" ဗီဒီယိုများကြောင့် လူမှုကွန်ရက်ပေါ်တွင် ပရိသတ် ၁၂,၀၀၀ ကျော်ရှိခဲ့သည်။ သူမ၏ ဗီဒီယိုများတွင် နှုတ်ခမ်းနီ၊ မိတ်ကပ်၊ မျက်နှာနှင့် ဝက်ခြံအတွက် အသုံးပြုသည့် ဂွမ်းပြားများအထိ စားသုံး နေသည်ကို တွေ့ရသည်။

ဇွန်လ ၃ ရက်နေ့တွင် ထိုင်ဝမ်မီဒီယာများက အဆိုပါ အမျိုးသမီးငယ်၏ မိသားစုမှ ၎င်းတို့၏သမီး ကွယ်လွန်သွားသည်ကိုအတည်ပြုကြောင်းဖော်ပြခဲ့သည်။ “မိမိတို့၏ အဖိုးတန်သမီး Guava Beauty သည် ၂၀၂၅ ခုနှစ်၊ မေလ ၂၄ ရက်နေ့တွင် ဤကမ္ဘာမှ ထွက်ခွာသွားကြောင်း ဝမ်းနည်းစွာ ကြေညာအပ်ပါသည်၊ သူမကို နှစ်သက်ခဲ့ကြသူများ၊ မှတ်ချက်ပေးခဲ့ကြသူများနှင့် အတူရယ်မောခဲ့ကြသူများအားလုံးကို ကျေးဇူးတင်ပါသည်” ဟု ဖော်ပြခဲ့သည်။

Guava ၏ သေဆုံးရသည့် အကြောင်းရင်းကို မိသားစုနှင့် အာဏာပိုင်များက ထုတ်ပြန်ခြင်း မရှိသေးပါ။ သို့သော် သူမ၏ သေဆုံးမှုသည် လူမှုကွန်ရက်ပေါ်တွင် များစွာ စဉ်းစားဆင်ခြင်မှုများ ဖြစ်ပေါ်စေခဲ့သည်။အချို့က မိတ်ကပ်ပစ္စည်းများ အဆိပ်သင့်မှုကြောင့် ဖြစ်နိုင်သည်ဟု ယုံကြည်ကြပြီး အချို့က စိတ်ဖိစီးမှုနှင့် မူမမှန်သော နေထိုင်မှုပုံစံတို့ကြောင့် လေဖြတ်ခြင်း သို့မဟုတ် နှလုံးရပ်ခြင်း ဖြစ်နိုင်သည်ဟု သံသယ ရှိကြသည်။

ကိုးကား- VN Express

ဘာသာပြန်ဆိုသူ-ဦးဝင်းဇော်ထွန်း၊ဒုတိယညွှန်ကြားရေးမှူး၊ နစက-၂

အမေရိကန် ရေတပ်သည် USNS Harvey Milk ဟုအမည်ပေးထားသော လောင်စာဆီဖြည့် စစ်သင်္ဘောကို အမည်ပြန်မှည့်ရန် ညွှန်ကြားခံရသည်။ ယင်းသင်္ဘောကို လိင်တူချစ်သူ အခွင့်အရေး တက်ကြွလှုပ်ရှားသူနှင့် ရေတပ်အရာရှိဟောင်း Harvey Milk ၏ အမည်ကို ဂုဏ်ပြုမှည့်ခေါ် ထားခြင်းဖြစ်သည်။ ယခုအခါ သမ္မတ Donald Trump ၏ စစ်တပ်အတွင်း မတူကွဲပြားမှု၊ တရားမျှတမှုနှင့် ပါဝင်မှု (DEI) ဆိုင်ရာ ကိုးကားချက် များကို ဖယ်ရှားရန် စီမံချက်၏တစ်စိတ်တစ်ပိုင်းအဖြစ် အဆိုပါ ပြောင်းလဲမှု ကို ဆောင်ရွက်ခြင်းဖြစ်သည်။

ထိုအမည်ပြောင်းလဲမှုကို တရားဝင်အတည်မပြုရသေးသော်လည်း ကာကွယ်ရေးဆိုင်ရာ အရင်းအမြစ်များက Military.com နှင့် အခြား အမေရိကန် မီဒီယာများအား အတွင်းရေးမှတ်တမ်းတစ်ခုတွင် ဖော်ပြ ထားကြောင်း အင်္ဂါနေ့ (ဇွန် ၃) က ပြောကြားခဲ့သည်။

USNS Harvey Milk ကို ၂၀၁၆ ခုနှစ်တွင် ထိုစဉ်က ရေတပ် အတွင်းရေးမှူး Ray Mabus မှ Milk ၏ ရေတပ်တာဝန်ထမ်းဆောင်မှုနှင့် တက်ကြွ လှုပ်ရှားမှုအား ဂုဏ်ပြုသောအားဖြင့် အမည်ပေးခဲ့ပြီး၊ ၂၀၂၁ ခုနှစ်တွင် လိင်ပြောင်းစစ်မှုထမ်းဟောင်းတစ်ဦးမှ အမည်မှည့်ခဲ့သည်။

Milk သည် ၁၉၅၀ ပြည့်လွန်နှစ်များတွင် အမေရိကန် ရေတပ်တွင် တာဝန်ထမ်းဆောင်ခဲ့သော်လည်း ၎င်း၏ လိင်စိတ်တိမ်းညွှတ်မှုကြောင့် ရေတပ်မှ ထုတ်ပယ်ခံခဲ့ရသည်။ ထို့နောက် California ပြည်နယ်တွင် ပထမဆုံးသော လူသိရှင်ကြား လိင်တူချစ်သူ အရာရှိအဖြစ် အမေရိကန် LGBT လှုပ်ရှားမှု၏ သင်္ကေတတစ်ခုဖြစ်လာခဲ့သည်။ San Francisco မြို့တော်ကောင်စီသို့ အရွေးခံပြီး တစ်နှစ်မပြည့်မီ ၁၉၇၈ ခုနှစ်တွင် မြို့တော်မူဝါဒကြောင့် ၎င်းနှင့် အချင်းများခဲ့သော အဖွဲ့ဝင်တစ်ဦး၏ လုပ်ကြံ သတ်ဖြတ်ခြင်းခံခဲ့ရသည်။

Pride Month အတွင်း ချမှတ်လိုက်သော အဆိုပါဆုံးဖြတ်ချက်သည် ဒီမိုကရက်များထံမှ အပြင်းအထန် ဝေဖန်မှုများကို ဖြစ်ပေါ်စေခဲ့သည်။ အမေရိကန်လွှတ်တော်အကြီးအကဲဟောင်း Nancy Pelosi က အဆိုပါ လုပ်ရပ်ကို “အရှက်ရဖွယ်၊ လက်စားချေမှုသဘောဆောင်သော နိုင်ငံသား အခွင့်အရေး ပုဂ္ဂိုလ်များ၏ အမွေအနှစ်များကို ဖျက်ဆီးခြင်း” ဟု ပြင်းပြင်း ထန်ထန် ရှုတ်ချခဲ့သည်။ California ပြည်နယ်အုပ်ချုပ်ရေးမှူး Gavin Newsom ကလည်း အဆိုပါ ဆုံးဖြတ်ချက်ကို “မိမိတို့၏ စစ်မှုထမ်း ဟောင်းများ ကာကွယ်ရန် တိုက်ပွဲဝင်ခဲ့သော တန်ဖိုးများအပေါ် Trump ၏ မထီမဲ့မြင်ပြုမှု၏ လက္ခဏာ” ဟု ဝေဖန်ခဲ့သည်။

Harvey Milk သည် လိင်တူချစ်သူများ၏ အခွင့်အရေးအတွက် သမိုင်းဝင် တိုက်ပွဲဝင်ခဲ့သူဖြစ်ပြီး ၎င်း၏အမည်ဖြင့် သင်္ဘောအမည်ပေးခံရခြင်းသည် LGBT အသိုင်းအဝိုင်း၏ အောင်ပွဲတစ်ခုအဖြစ် မှတ်ယူခံခဲ့ရသည်။ ထရမ့် အစိုးရက DEI အစီအစဉ်များကို “စစ်တပ်အား နိုင်ငံရေးအရ အားနည်း စေသည့် အစီအမံများ” ဟု စွပ်စွဲပယ်ဖျက်လျက်ရှိသည်။ အဆိုပါ အမည် ပြောင်းလဲမှုသည် လိင်တူချစ်သူ စစ်မှုထမ်းဟောင်းများ၏ ဂုဏ်သိက္ခာကို ထိခိုက်စေသည်ဟု LGBT အခွင့်အရေးအဖွဲ့များက စိုးရိမ်ပူပန်လျက် ရှိသည်။

ကိုးကား- RT

ဘာသာပြန်ဆိုသူ-ဦးဝင်းဇော်ထွန်း၊ဒုတိယညွှန်ကြားရေးမှူး၊ နစက-၂

မကွေးတိုင်း၊ မင်းဘူး(စကု)မြို့နယ်အတွင်း မိုးသည်းထန်စွာရွာသွန်းမှုကြောင့် မန်းရွှေစက်တော်ဘုရားကြီး၏ အောက်စက်တော်ရာရင်ပြင်တော်ပေါ်သို့ ယနေ့ ဇွန် ၂ ရက်နံနက်ပိုင်းက မန်းချောင်းရေများတက်လာခဲ့ကြောင်း ဒေသခံများထံမှ သိရသည်။

“ရေကအတော်တက်လာတယ်လို့ပြောရမယ်။ အောက်စက်တော်ရာရင်ပြင်ပေါ်မှာတော့ ရေတွေဝင်နေပြီ။ အခြေအနေကိုစောင့်ကြည့်နေရတဲ့အနေ အထားပါ။ အောက်စက်တော်ရာရဲ့ ခြေတော်ရာဖန်အုပ်ဆောင်းရှေ့မှာလည်းရေတွေဝင်နေတယ်။ မနှစ်ကလည်း သြဂုတ်လထဲမှာ ရေတက်သေးတယ်”ဟု ဒေသခံတစ်ဦးက ပြောသည်။

မန်းရွှေစက်တော်ဘုရား၏ (၂၅၉၁)ကြိမ်မြောက် ဗုဒ္ဓပါဒပူဇနိယဘုရားပွဲတော်အား ပြီးခဲ့သည့် ဖေဖော်ဝါရီ ၂ ရက်မှ ဧပြီ ၁၇ ရက်အထိ(၇၅) ရက်ကြာကျင်းပပြုလုပ်ခဲ့ကြောင်း သိရသည်။

Source: Popular Myanmar

ဂျာမနီနိုင်ငံအနောက်ပိုင်းရှိ လူနေအိမ်တစ်ခုပေါ်သို့ လေယာဉ်ငယ် တစ်စင်းပျက်ကျခဲ့ရာ လူ (၂) ဦးသေဆုံးခဲ့သည်ဟု ရဲတပ်ဖွဲ့က ပြောကြားခဲ့ပါသည်။ အဆိုပါလေယာဉ်ငယ်ပျက်ကျမှုသည် Mönchengladbach မြို့အနီးရှိ Korschenbroich မြို့၌ဖြစ်ပွားခဲ့ခြင်းဖြစ်သည်ဟု ရဲတပ်ဖွဲ့ က ပြောကြားခဲ့ပါသည်။

လေယာဉ်ငယ်သည် လူနေအဆောက်အအုံကို ဝင်တိုက်ခဲ့ပြီးနောက် မီးလောင်ကျွမ်းသွားခဲ့ကြောင်း ရဲတပ်ဖွဲ့ကပြောကြားခဲ့ပါသည်။ ထို့အပြင် အဆိုပါဖြစ်ရပ်အတွင်း လူနှစ်ဦးသေဆုံးခဲ့ပြီး တစ်ဦးမှာ လေယာဉ်မှူး ဖြစ်နိုင်သည်ဟု ဂျာမန်သတင်းအေဂျင်စီ dpa က ရေးသားဖော်ပြခဲ့ပါသည်။

သို့သော်လည်း သေဆုံးသွားသည့် အခြားသူတစ်ဦးသည် လေယာဉ်ပေါ် တွင် လိုက်ပါလာသူ သို့မဟုတ် နေအိမ်ထဲ၌ ရှိနေသူဆိုသည်ကို လက်ရှိ အချိန်အထိ ရှင်းရှင်းလင်းလင်းမသိရှိရကြောင်းလည်း ရဲတပ်ဖွဲ့က ပြောကြားခဲ့ပါသည်။ ထို့အပြင် အဆိုပါလေယာဉ်ငယ် ပျက်ကျရသည့် အကြောင်းအရင်း အသေးစိတ်အချက်အလက်များကိုလည်း လက်ရှိအချိန်ထိ မသိရှိ ရသေးကြောင်း တာဝန်ရှိသူများက ဆက်လက်ပြောကြားခဲ့ပါသည်။

ကိုးကား- NP News